رواية قصة وجدان الفصل الثلاثون 30 بقلم انين الليل

ما استغربت لان بيبي ما ردت على كلام ساره وهاجر واتذكرت بيوم اجيت ويه امي وهشام وما لكينه احد بس بيبي

وعمو عاصف وكيف اتصرفت ويانه بحيث حتى ماي ما شربنا ورجعنا

اتذكرت بيومها شكد كانت قاسيه على امي واخويه وهي تكول باان ابويه اخذ كل شي لكن الي سمعته من مهدي وعاصف

انو همه تجار وهواي عدهم املاك خصوصا عاصف ومن هاي الاملاك ما اتذكرو ابويه لو اتذكرونه بشي

ومثل ما سكتت بيبي اني هماتين سكتت وما عقبت على كلام ساره وهاجر بيني وبين نفسي كلت

= خلي ادرس وانجح ومن يطلع هشام الله كريم اكيد عمو وبهاء ما راح يعوفونه

بدت المدارس واني داومت بالرابع اعدادي وفرح بالخامس وبيبي صارت اتحفزنا ع الدراسه داىما وتنصح

بهاجر تدرس وما تبطل واهنا ساره قللت جياتها النه ومهدي صار من يجي يكعد شويه ويروح

وبهاء بكل فرصه يردد نفس الكلمه ويگلي اتمنى اسمعها منج

وفد يوم كان دوامنه صباحي وبيومها فرح كلش تعبانه مصخنه وفلاونزا وما گدرت تروح وبهاء هو الي يوصلنه بطريقه

ومن ردت اطلع عمه رجاء كلتله //. بهاء يمه مر على هاجر اخذها وياك

     سالها // ليش وابوها ؟

      - - عده شغل اخذها والظهر من ترجعون على وجدان هم رجعوها وياكم

هو هز راسه وطلع گدامي لحگته ومن ردت اركب كان اني لازم اركب بالصدر وهاجر وره واني

لان داىما اركب اكعد وره هالشكل متعوده من اروح للمدرسه هالمره انحرجت اتمنيت فعلا تجي. هاجر وتركب بالصدر

بهاء يحچي // وين الله وهي كون هم مريضه وما تداوم

ابتسمت من شفتها اجت تمشي بسرعه كالت // صباح الخير

وراسا فتحت باب السياره الامامي وركبت وسط ذهول بهاء واني ركبت وره

بهاء ساق وهو يكول //. هو حظ ومنكع بالنفط گوه خو مو گوه

هاجر // شبيك بهاء

- لا ما كو شي بس اگول هالايام ازمة بانزين

1

بقينه ساكتين طول الدرب واني دايره وجهي واباوع ع المناظر وفاتحه الجامه مالت السياره واستنشق الهوا وهذا الشي

يوميه اسوي حتى لو الدنيا بارده او تمطر

وصلنه ونزلت هاجر بقت واكفه // شنو ما تدخلين

  بهاء //. روحي هسه ندخل انا وياها نطلب اجازه الفرح

  خلي اروح وياكم

   وين رايحه شنو عدنا عزيمه فوتي ادخلي كدامي وانتي امشي وياي للاداره

  

هاجر شافت صديقتها وراحت وياها واجيت امشي هو كلي // اوكفي

= ها بهاء راح ايدك الجرس

  - - تره مو حمار طلعت من وكت يعني بعد مو هسه يدك الجرس

بقيت ساكته هو رد //.شوفي بعد ما اتحمل انتي ولا مهتمه وانا مشتعل نار

  سالته = شكو بهاء ؟

  - - اتكليلي شكو انا اكلج تره بعد ما اتحمل

   اي غير اتفهمني شصاير

   - - اليوم الظهر ارجع واريد احجي وياج بالبستان

ما جاوبته رد عليه // سمعتي مو انا عدي حجي وياج وبالبيت ما اكدر احاجيج وهنا ماكو مجال ما شاء الله مسوين

عليج حمايه

فتحت عيوني هو رد // اسمعيني العصر بالحديقه البره ماكو اجي واحجي كدام الكل افتهمتي

  = بس اني

رفع ايده // ما اريد اسمع هسه

= اي شصاير غير افتهم

  - - وجدان كتلج العصر. بالبستان افتهمتي تره ما صايره بنفس البيت وحسره عليه احجي وياج لو كلمه

  = بس ا...

     قاطعني // بلا. بس وهسه انا اروح وياج اطلب اجازه الفرح وانتي روحي الصفج

هزيت راسي ودخلنه سوا. وهو يردد // هانت كلها شكم يوم

اثناء الدرس وانا مشغول بالي واحجي ويه نفسي

    =. بهاء يحبني من صدك لو شنو سواء ايحبني او ما يحبني اني ما اصلح. لا للحب ولا للعلاقات

  = اهم شي انجح وانتظر هشام

  = بس هو اليوم منتظرني. واذا ما اروح اكيد يزعل او صدوك يجي ويحجي

  = لعد اروح وافهم منه شيريد

انتبهت ع المدرسه وهي يمي وتحجي //. هيي وين صافنه ؟

     باوعت الها بارتباك = لا ست اني ما صافنه

   - - ها بشنو چنت احجي

  = ست اسفه راسي كولش ماذيني تسمحيلي اطلع

هزت راسها اطلعي // بس. لو غير وحده جنت عاقبتها

ما سمعت باقي كلامها بقيت. افكر الى ان انتهى الدوام وعمو عاصف اجه علينه وركبنا بالسياره واني دايره

وجهي ع الجامه وصلنه.

  صبو الغدا واحجي ويه نفسي

= اني ويني او وين سوالف الحب اهم شي دراستي من اشوفه البهاء افهمه انو هذا الي دا يسوي عيب

=. باالله طلب مني نتزوج

هزيت راسي =. لا اني مو مال زواج ولا حب

عمو عاصف :: اشبيج وجدان

باوعتله =. شبيه

:: تهزين راسج عبالك احد يحجي وياج

رجاء // اسم الله ياستار

بلعت ريكي =. عمو راسي يوجعني

:: اتغدي ونامي

اكلت شويه ورحت للغرفه اتمددت واني افكر شنو احجي ويه بهاء كانت افكاري متضاربه بالاخير ابقى اني بنيه وعندي احاسيس لكن الي مثلي لازم تنسى وتتخطى كل شب

العصر اخذت كتابي وطلعت للبستان وكان هو موجود وصلت وكفت امامه

راسا سالته = ها بهاء شرايد

- - شبيج وجدان امشي نكعد

   رفعت ايدي وجاوبته بتوتر = لا ما اكعد كلي شرايد عندي دراسه

- - وجدان شبيج ليش ترجفين وهلكد مبتعده

= عادي ممكن اعرف شتريد ؟

- - انتي الي تعرفين انا اريدج

= بهاء هذا الكلام عيب واني اعتبر هذا الشي الي نسوي خيانه

عكفوجهه // - - خيانه شنو ؟

  هزيت راسي = اي خيانه الثقة بيبي وعمو خيانه للبيت الي كاعده بي الله يخليك اني كل همي ادرس وانجح وانتظر اخويه

—. وانا ما اريد منج شي انا احبج واريد اتزوجج

بلعت ريگي =. بهاء اني ما افكر بااي شي بس بدراستي

   - - ومنو گلج انا امنعج اتكملين

    = اني ما افكر لا باارتباط ولا بااي شي انت ابن عمي ولازم تساعدني وتوگف وياي اكمل وانتظر اخويه

اتنفس بعمق // وانا اوعدج بعد ما احجي وياج ولا افتح موضوع الا بالوقت المناسب وخلي اگلج شي انا اتمسكت

بيج اكثر واكثر ولوكل الدنيا توكف بوجهي ما تصيرين اله الي

= بس اني ما ...

قاطعني //. لا تحچيين انا احبج واول وتالي نتزوج المساله مسالة وكت

  دار وجهه وراح للبيت واعرف هو كلش ضاج من ردة فعلي بس ميخالف خلي يعرف انو اني ما افكر بس بدراستي واخويه

ومن يومها صار بهاء يجي يسلم ويسولف ويه بيبي وعمو شويه ويصعد لان يجي

كلش تعبان ويطلع الصبح

واني صار كل همي ادرس ومرات اقرا كتب موجوده بغرفة عمو كتب متنوعه دينيه وسياسيه وحتى قصص عبير

استغربت =. معقوله عمو يقرا اني ولا مره شفته لازم كتاب

= ياغبيه تردينه يقرا كدامج اكيد من يدخل الغرفته يقرا

بيت مهدي ّ بالبدايه يوميه يجونه ونفس السوالف والحجي ودائما من يجون ويشوفني مو بغرفة عاصف يبدي مهدي يامرني

كل شويه عايط بااسمي جيبيلي ماي جاي تعاي بدلي الجاي شوفي عمتج شتشرب روحي جيبي للبنات فواكه

ناقص بس يكلي وكلي البنات

وهاي صار كل ما يجي هالشكل يامر عليه خصوصا اذا عاصف ما موجود واني مو بغرفته يعني مرات لو

بالمطبخ لو اغسل ملابسي

   بيومها عمو عاصف اجه الظهر سلم وكعد شويه يم بيبي الي سالته. //. شبيك يمه

    :: تعبان كلش

الله يساعدك طالع من الفجر

   وكف :: راح انام عدي شغل بالليل

    ما تتغدا

   :: لا ماكل بره حدي تعبان

  رووح يمه نام وارتاح

اني وره الغدا هماتين نمت ومن كعدت العصر شفت بيبي گاعده بالصاله ف انا بقيت بغرفتها اقره لان عندي

كان عندي امتحان كيميا

  وره المغرب ع السريع سويت العشا واني سويتلي لفه وكلت العمه رجاء

= عمه بس اكمل دراسة الامتحان اجي واغسل المواعين وارتب المطبخ انتي عوفي كل شي بمكانه

ما سمعت ردها رجعت الغرفة بيبي اقرا وهي من شافتني طلعت للصاله سديت الباب وبديت اقرا بتركيز

   اجوي بيت عمي مهدي هو ونهاد وبناته وشاف بيبي بالصاله موجوده كعدو يمها وسالها

  - - ها يمه شو گاعده اهنا

  - - تعشينه واجيت اهنا كعدت

نهاد //. مهدي خاف وجدان تدرس بحجرتها

   - - جا مو عاصف اطاها حجرته ؟

  بيبي // عاصف جان نايم وتوه طلع والبنيه عدها امتحان صعب حتى ما اتعشت سوتلها لفه واكلتها

من سمع هالشكل عاط بااسمي // تعاي وجدان جيبيلي ماي

طلعت من الغرفه ورحت جبتله ماي گلي // شني ما تعرفين اتسلمين

بلعت ريگي = السلام عليكم

شرب بالكلاص رد عليه // ثوله ما شفتي الگلاص

بقيت ساكته رجاء جاوبت // شبي الكلاص

—- زفر ما مغسول

= عمو خسلته بزاهي ومي قبل ما اصبلك بي

  رفع حواجبه // يعني اچذب انا

بيبي //. روحي بدلي الگلاص

رحت بدلت الگلاص وجبت ثاني غسلته وخليته گدامه اخذه وشرب ماي وكلي

- - سويلي جاي

بيبي كلتله // لاتامر على البنيه عدها امتحان. هاي ساره يمك. واامر عليها

- - يمه من تصير ساره راعيه بيت ذاك الوكت امر عليها هسه اامر على وجدان. خو مو امر عليج لو على

ام بهاء لو اگوم انا

  بيبي // يمه البنيه عدها دراسه

- - والله ثبرتينه دراسه ودراسه شتريد تطلعلي

نهاد // على كيفك مهدي شبيك

جاوب بعصبيه // شني اشبيه من اجت حجرة امي ما ندشها صارت اهنا الكعده

رجاء // هههه غير عايله

نهاد // اي حتى اكلهم صار بالمطبخ

     مهدي //. اي وبعد وبعد

بيبي // تنصي حسك

    - - اي حجيه بعد امنعيني من الحجي

نهاد باستهزاء // يا مهدي غير البنيه تدرس

- - تشوف الها مكان تدرس بي انا بكيفي حسي عالي وفروخي ايدشون ويحجون ويصيحون ويتشاقون تعاي

ولج وجدان وينج

دمعتي صارت بطرف عيني وصلت يمه =ها عمو

بقى يخزر بيه واني واگفه رديت = عمو صحتني

بقى ساكت بيبي سالته // شبيك مهدي شتريد من البنيه

باوعلي وهو يخزر بيه ويهز برجله //. اوكفي

=. عمو واكفه بس اني عدي امتحان

هو كانما بالونه وانفجرت راسا وكف وصار يعيط ولزمني من شعري وصار يعت بي ويحجي بعصبيه

- - انعل ابوج لا ابو الامتحان بت الكلب وينه كتابج مال الامتحان ؟

ما جاوبته هو عافني وراح دخل للغرفه ولزم كتاب الكيميا بايده وطلع للصاله وشككه وبعدها راح الكتبي الي موجودات

بالجنطه على الجربايه

وصار ايشكك بيهن ويشمر بالاوراق

بيبي //. ولك مهدي اتخبلت

  هز راسه // اي اتخبلت تره هذا بيت ابوي ما طول انتي موجوده بي بكيفنا ندخل ونطلع واحنه اهل الراهي

   بيبي // محد مانعك من بيت ابوك

      مهدي يهز براسه // لا انمنعنه من حجرتج ولدي حدهم للمضيف لو للهول. هسه لا تحجون البنيه عدها امتحان لاتسولفون

كافي طلعت من ماعونها تره انا متحلف بيها من لمن اجت وما دشت تانت عاصف تشتكيله مني استنكفت الحقيره

چيفن طگيتها عاد هسه برد گلبي اسمعي ولج بعد ماكو مدرسه تگعدين اهنا وتخدمين بهذا البيت على ما نشوفلج صرفه

  بيبي // اي چا هي بكيفك

  - - اي بكيفي وتشوفين واكبر واحد ما يوكف بوجهي

  - - ولك مهيدي جاي مكوك شعدك من خبر

  - - شتحجيين احجي ما عليه سويت البراسي وهي خلي اتطك راسها بالحايط وشوفي اذا اخليها بعد اتشم ريحة المدرسه

بت الكلب تعوج بحلگها وتتبغدد علينه شايفه روحها شوفه بت المداس

مرت عليه كل الماسي الي مرت. صرت ابجي بصوت مسموع واني اگله = حرام عليك حرام عليك

خله اصبعه على حلكه // بس اكلي تبن ولا تفكيين حلكج تره اذبحج خلاص

- ولك مهدي اتخبلت

اي اتخبلت شتردين اتطكيني لو عاصف يتعارك وياي

بقيت بغرفة بيبي ابچي بصوت مسموع ومهدي يتهدد // خليها تسكت لا اجرم بيها وانعل والديها

صرت احچي ويه روحي =. اني شنو عيشتي محد يريدني الكل يشوفني وحده غريبه شكو باقيه

سمعت صوت عاصف وهو يكول :& ياالله يالله

بيبي // هلا بيك يمه فووت

دخل :: السلام عليكم

الكل رد :: شلونك مهدي

الحمد لله زين

:: شنو هذا الكتاب المن وليش مشكك

الكل سكت :: مو جاي اسال المن هذا الكتاب

مهدي // كتاب الخاتون وانا شگكته

:: ليش ؟

- - هيج ما اريدها تداوم وشككت كل الكتب وبس اسمع الها نفس اكتلها خلاص وبعد ماكو مدرسه

ما سمعت اي شي لا حجي ولا اي شي تقريبا دقايق ونهاد گالت //. وينج ساره انزلي خلي نروح

   نهاد // ساره لمي هاي الورق المشككات وياالله امشينه

بقيت بالغرفه ما طلعت بقيت نايمه على وجهي استغربت من الكل اجت بيبي واسمعها تستغفر واتمددت

حتى ما اتقربت عليه ولا حاجتني ما نمت واني بس ابجي وما لاگيه لا تفسير ولا حل للي جاي يصير وياي

الصبح بقييت نايمه اجه علاوي ندهني // اكعدي وجد راح نتاخر

لزمته وحضنته وغطيته وياي هو سالني // شبيج وجد

ما رديت بقيت حاضنته حسيت بي اتوتر وگلبه صار يدك قوي صرت امسد على ظهره

سمعت رجاء تحجي // ما ادري خاله يجوز ما يروح

دخلت للغرفه// وينك علي تروح للمدرسه يو لا اجه عليك ابراهيم

  اتقربت // يا شو ماكو بفراشه ؟

بيبي ردت // ما يروح نايم يم اخته

  - - شعجب ؟

بكيفهم

بيبي طلعت من الغرفه واني شاورت علاوي // اذا جوعان رووح اتريك

هو رد // لا اصلا اريد انام

كام من يمي الجربايته واني بقيت نايمه على وجهي بيبي غابت فتره ورجعت وهي تكول // لاحول ولاقوة الا باالله العلي العظيم

غفييت والظهر سمعت بيبي تندهني // كومي شني حتى صلا ما تصلين

ما جاوبتها بقيت بفراشي واجت رجاء // ها عمه اصب الغدا

اي صبي

وين تاكلين اهنا لو بالمطبخ

بالمطبخ

وصلت يمي وخرت الغطا وهي تحجي وياي // كومي اكليلج لكمه

باوعت الها ودرت وجهي بدون ما اجاوب هي ردت // ولج كومي مو زين تبقيين بدون اكل

غطيت وجهي بدون ما احجي هي راحت وهي تستغفر غابت شويه ورجعت بدون ما تحجي اجت رجاء

  - - شني عمه ما اكلتي

  - - الحمد لله شبعت

  - - وهاي تبقى نايمه وما تاكل ؟

    بيبي // بكيفها

  رجاء // صدك بكيفها الياكل بضرسه ينفع نفسه

- - خوش تطفي الضوه اريد اناملي شويه

  - - ما تشربين جاي

  — العصر اشرب

بقيت بفراشي ولا كمت حتى ما سالت على علاوي لان اعرف بي ما يروح لبعيد البيت صار صنطه وبيبي نامت

العصر اجت رجاء وياها نهاد فتحت الباب // ها عمه كاعده

اي كاعده

جبت جاي

نهاد // اشلونج عمه

  بيبي بزعل // هله طاب لونج

نهاد // يا هاي نايمه ما تكعد

رجاء // شبيج من امس لا ماكله ولا شاربه ولا معبره احد

نهاد // اي مهدي يگول برعى وجسره

بيبي تخوط بالاستكان // وبعد نهوده انتي ومهدي شعدكم

رجاء //. اسكتي عمتي دافعت

نهاد //. چا واذا اتدافع احچي الصدك هي جسره

بيبي // لا مو جسره وانشدي رجاء

رجاء// شعليه لا تحطيني بالوسطه ؟

بيبي // اي هم صدك انتي شعليج بس نهوده عليها

نهاد // وانا هم شعليه نارها تاكل حطبها هي وعمها

تستمر القصة أدناه

بيبي // وعمها ياهو وزا

نهاد // ها تردين اتكولين انا

- - اي انتي تره ادري بيج عاجنتج وخابزتج بس شوفي مو لدالج اعبرها الج لا وروح بدر ما اعبرها وتشوفين

نهاد //. على كيفج انا ما الي شغل ذاك مهدي وروحي حاجي لا تخليني بالوسطه

بيبي //. اي احاجي ما خايفه منه

نهاد //. عمه انتي ليش اتكرهيني شمسويتلج

بيبي //. ما اكرهج انتي الي مسمومه ما ادري البنيه شمسويتلج شتردين منها من اجت خاله كورج وكورها انتي واختج

رجاء // انوب رديتي عليه عمي كون حظنا من حظها

نهاد // انا شجايبني اهنا خلي اروح اصلا بعد ما ندش البيت خاف نزعج الاميره

بيبي بعصبيه // روحة الراحو وما ردو وجعة ابوي المات وما عرفت وجعته بعد مهدي ما اريده يجي هنا عويض الله منكم

نهاد //. على كيفكم شو كل الاجه واخذ بينه صفحه وكال لا تدشون للبيت شني ينگطع الهوى

بيبي //. خوش ظلي ابيتج انا ما موديه عليكم تره جيتكم خساره مو ربح

نهاد //. رايحيين خلي نلحك على روحنه لا نتفشخ

بيبي //. روحي يمن راحت روحج وسليمه التلوحج

رجاء// يا عمه اشبيج

- - تره وانتي مو اوحيده اعرفنج

رجاء// هذا كله چيف مهدي شكك كتب الخاتون

بيبي // بسج ولج ولا تفكيين حلكج بحجايه تره واصله حدها وياي واذا تردين الحكي اختج روحن كملن سالفتجن

واطبخنها على نار هاديه خلنها تتهدر

رجاء سكتت ويمكن طلعت وبيبي تكول // هنه يصولن ويجولن وطايرات وانتي ظلي ممطوله ومغطيه وجهج

بعدها ساد السكوت عبالك البيت فارغ

سمعت بيبي تصلي المغرب وانا الجوع والعطش حييل اثر بيه بس مقرره ما اكل ولا اشرب ما اريد ابقى اهنا اصلا

كرهت وجودي بهاي الحياة

حتى بعلاوي ما فكرت بعد ما بيبي كملت صلاتها كعدت واجتها رجاء // اجيبلج عشا

لا اتاني عاصف وبهاء

بهاء يتعطل بس عاصف يجوز هسه يجي هسه

  طلعت رجاء // ها هالاجه

:: وين امي

بالحجره

بيبي طلعت وهي اتكله // الله يساعدك

:: هله يمه اشلونج

على الله يابني

:: وجدان وين

من اهد امس نايمه على وجهها لا زاد ولا ماي

:: لا باالله

اي يمه لو نكطة ماي ما خلت بحلكها

:: صيحيها

رجاء // ما تجي

:: گليلها عمج يريدج

اجت رجاء // كومي عمج يريدج

شني ما تسمعيني عمج يريدج

ما رديت عليها گالت // ما تجي ولا چني احجي وياها

   :: روحي سويلنه عشا خلي ع الطاوله وهسه نجي نتعشى يمه تعاي اريدج

دخل سد الباب وصل للجربايه وهو ايگلي :: شني ما سمعتي عمتج من گلتلج عمج يريدج

بقيت دايره وجهي وما رديت

:: مو احجي وياج

بيبي // عاصف عوفها يمه

:: لا اريدها تگعد شو اگعدي

كشف الغطا عن وجهي بقيت متمدده ما اباوعله هو گلي :: اكعدي اريد احچي وياج

كعدت وهلمره خليت عيني بعينه وانا اخزره هو اتنفس بعمق :: هاج هذني كتب (خله علاكه يمي ) ابدال كتبج الشككهن ذاك الارعن

خلاهن يمي :: اخذيهن ما عليج بي يولي ادرسي واكلي وهو ولا جنه موجود وبعد ما يفك حلكه وياج لا هو ولا اي احد

تستمر القصة أدناه

باوعتله بنظره بيها كل شي حقد وكره وعتب هو كلي

:: اخذي الكتب خليهن بجنطتج واگعدي خلي نتعشى

لزمتهن وتلقائيا صرت اشكك بيهن واشمر الاوراق بوجهه وع الگاع واحجي بقهر وعصبيه وتعب

= من الكه واحد يدافع عني وياخذ حقي ذاك الوكت ارجع ادرس واكل واشرب

بيبي // يايايا ولج صدك لو كالو

  درت عليها = كوليها ليش سكتي گالو جسره مو (هزيت راسي ) اي جسره من اشوف الكل ساكت وبس يمي يصير

بطل شجاع ذاك الوكت اصير اكبر جسره

ما حسيت اله لزمني وصار يضرب بيه راشديات بس شنو بكل قوته يضرب وهو ساكت بحيث ما صرت احس بخدودي

صرت اباوعله وبس اتنفس ولا ابديت اي رد فعل حتى ما بچييت هو طلع وبيبي طلعت ورا وهي تلوم بي

- - ليش طكيتها الفرخه لا ماكله ولا شاربه

بيبي نشغت // يمه عاصف روح غسل خشمك طك دم

   بيبي //. يمه دشداشتك انترست دم (حجت بخوف. ) تعاي رجاء جيبي ماي بارد

    بيبي //. فوت ارتاح بحجرتك وعلى كيفك ويه روحك

ما سمعتله اي رد اني وجهي گب نار ريكي يبس دموعي اول مره ينحبسن صرت احجي ويه نفسي

= المن باقيه وعلى مود منو هشام ذاك هو بالسجن اول وتالي يطلع ولاكانه شي صار وعلاوي يكبر

وينسى اصلا انا وجودي ما اله داعي

بيبي // ها يمه شلون صرت

- - عاصف شبيك احجي نجيبلك لگمه تاكلها

- - شني انعديت بس تهز براسك رجاء جيبيله چاي بساعج

  فات وقت واسمع كلام همس بالصاله حسيت بيبي دخلت للغرفه وراها اجه علي وهي سالته

وين جنت

يم بيي ت عم و جابر

ياهو جابك

عممو وخ اله سمي ره تسلم عليج

خلي اكوم اسويلك عشا

لا بيبي اتع شييت

بالعافيه

اشبيها وجد

عوفها.راسها يوجعها باجر تصير زينه

صعد نام واني مغطيه وجهي ( حتى علي اخويه ما مهتملي سال عني وصعد على چربايته نام ) البيت هدوء وبس

اني بقييت كاعده وحسيت من اجه بهاء وما مر على بيبي يمكن عباله نايميين

بقيت گاعده ما اعرف بيش الساعه

نزلت من الجربايه وطلعت بره حافيه وصرت امشي واحچي ويه روحي = الشنو باقيه والمن انا مكاني يم امي بعد ما ابقى

= كرهت كل شي انا مكاني مو اهنا

= اني محد يريدني عبالك مجدايه كل ساع واحد ذالني

= احسن شي اسوي اخلي حد الحياتي بعد ما اريد اعيش لان كلهم كذابين ومنافقين

فتحت باب الصاله لان بالليل يسدونه وطلعت من البيت كله حافيه صرت امشي وصلت يم راك الشط وهالمره صرت

ابچي واحجي

= سامحني ياربي سامحني اني كلشي انسد بوجهي وحييل اتاذيت

= سامحني واعذرني ياربي الصار بيه مو شويه ويوميه يزيد عذابي خلي اريح الناس الكاعده عدهم الي ما يردوني

واني ارتاح ياربي لا تعذبني لان اني اساسا متعذبه

غمضت عيوني رغم ظلمه وردت اشمر نفسي لمن ما ايد قويه سحبتني وهو يحچي وياي بحزن

:: ليش هالشكل تسوين ليش

عرفته عمو عاصف حاولت افك نفسي منه لكن ما كدرت صرت احجي = عوفني ما اريد اعيش

خله ايده على حلگي وهو ايگلي :: اشش لحد يسمع تعاي امشي بابا

لازمني عبالك مجتفني وجابني للبيت وشفت بهاء يمشي ويباوع وهو يسال بعاصف// شصاير شكو ؟

تستمر القصة أدناه

عمي عاصف :: اشش لحد يسمع

غير اتفهمني

:: فوت جوه ونفهمك

وصلت وبيبي لاگتني والخوف بوجهها // ها يمه وين لكيتها

:: مثل ما گلتي يم النهر

تريد تنتحر

::اي تريد تنتحر

بيبي بعتب // ليش ولج

:: يمه مو وكتها

بيبي بعصبيه // لا تگلي يمه ليش احجي استنكفتي جييف طكج ليش انتي السويتي زينيه

بهاء// جده ياهو طكها انت عاصف ليش

ما رد بعده لازمني اخذني للمغسله غسل وجهي ورفعني خله رجليه بالمغسله عبالك طفل وفتح الحنفيه عليهن صار يغسل

بيهن وهو ساكت

بصراحه رغم قهري بس خجلت من تصرف عاصف الي نزلني ودخلني للغرفه

:: عوفوها ترتاح

   سد باب الغرفه وطلع بالصاله وبهاء يحچي // اريد اعرف عاصف ليش طكيتها انشد بجدتي وما تگلي

بيبي // عاصف جابلها كتب وهي شگكتهن

- كتب المن ؟

بيبي // الها

ليش وكتبها ؟

شككهن مهدي ؟

ها هم مهدي بالسالفه شلون بي هذا

بيبي // ما عليك جده

لا عليه وعليه انا مو كتله لا تتدخل

بيبي //. ها هلبينت چيفن انت كتله لا تتدخل هلخله دوبه من دوبها وهاي تاليتها شكك كتبها ومن جاب الها عاصف

كتب هي شككتهن من حرگة گلبها وعاصف كفر بيها وهي لا ماكله ولا شاربه هاي يوميين وهسه خوش بلعنا

بهاء // هذا مهدي ما تصيرله چاره خال دوبه ودوبها (بعصبيه ) شيريد

بيبي // لا مو هو هاي نهوده

عاصف :: كافي خليها ترتاح

بيبي // شني ترتاح انا اكدر الها

عاصف بعصبيه :: جا شلون رايج انيمها يمي بالحجره

اتنفس :: راح انام بالهول

  دخل للغرفه واجه يمي شافني گاعده ودموعي ينزلن حاچاني وهو يتحسر :: استغفر الله نامي وارتاحي كافي لاتبچيين

صرت اشهك هو رد عليه :: زعلتي چي طگيتج

ما رديت اتنفس بعمق :: نامي بابا

ما ادري ليش حسيت يحاجيني وهو مكسور طلع واني اتمددت لمن ما اجتي بيبي دخلت وراي وهي اتكلي

- - انهجم بيتج تراهو انهجم من يوم سعدي ما غرب ولج جا خليتينه احجايه بحلك ملايه

اخذت جكاره وصارت تدخن وهي كاعده ع الجربايه // خايبه ليش جا وكفت عيوني انا الكبل لا تصيرين ما حابه ابوج ولا شامته

ومن اجيتي خليتج بحضني واهادد واعارك لو عاصف المسكين المحتار باخوج المريض وبذاك المسجون هيج تجازينه ياوسفه

اسمع عاصف ايكل البهاء :: رووح نام

- - طارت النومه ليش طكيتها شسوت

ما جاوبه وبهاء ايكله // عاصف ليش ما تحچي

:: رووح نام بهاء انا تعبان كلش ما الي خلك

نفخ // رايح بس هذا مهدي انا اعرف شغلي ويا

بقيت متمدده ومغطيه وجهي الصبح نزل علاوي وهو يبوس. بوجهي ويكلي

وج د اا كعد ي ات ريكي

ما جاوبته بيبي كلتله // عوفها. نايمه وانت بدل وروح للمدرسه

( ) لي ش ه ي مم ريضه

  - - مو البارحه گتلك راسها يوجعها ما عليها شي خليها نايمه وتصير زينه ياالله جده بدل وروح تعرف لو انا البسك

() اااعرف

خوش وهذا مصرفك.ع الميز

راح علاوي واجه بهاء // جده

• هلا جده صباح الخير

• صباح النور شلونها

• من اهد ما. نامت لهسه ماكعدت روح تريك

• ياهو يشتهي

• اسس بهاء ما اريد احد يسمع روح اتريك حتى توصل اختك للمدرسه

• وعاصف. ؟

• الليل كله بالهول يحرك جكاير وهسه طلع ما ادري بي وين راح

• واظن انتي ما نمتي ها

ياهو يجيله نوم جده

راح بهاء ورجعت بيبي ع الجربايه اجت. فرح // صباح الخير جده

هلا صباحج نور

شنو اليوم هم ما تداوم

ما الها خلك

تبطل

ياهو گلتلج تبطل

محد بس اكول اذا ما تداوم يعني تبطل

بيبي // روحي جده روحي المدرستج لا يسمعج ابوج ويبطلج

   فرح // خو ابوي بس كادر عليه

  - - شتردينه عليمن يكدر من تصيرن عده عشر بنات عود يكدر عليهن

  فرح // انا شگلت هو اصلا معبرني وانا وحيدته خلي اروح احسنلي

راحت فرح وبيبي تحجي بهمس //. مثل امج ما تعرفين تحچيين

بقيت بفراشي لمن ما عاصف دخل وصل يم جربايتي ورفع الغطا وكلي. :: اكعدي ادري بيج ما نايمه

كنت متمدده على صفحتي هو سندني وبايده كوب حليب. :: اشربي الحليب

بقيت ساكته وما اخذت الكوب منه رد عليه :: افتحي حلكج واشربي

باوعتله و بجييت بكل قوتي بيبي گالت // اسم الله جده. الكتب ابدالهن كتب لاتنقهرين وعاصف طكج جي...

   قاطعها :: يممه

  اتنفس :: كافي لا تبجيين

لكن انا زدت بالبجي قرب الحليب من حلگي بس انا بعدته هو حاجاني :: تردين تموتين ؟

باوعتله وهزيت راسي يعني اي

نفخ وگال :: استغفر الله لاحول ولا قوة الا باالله

بقييت ابجي هو طلع وبيبي لحكته وكللها :: خليها تنام وترتاح

بيبي // يمه البنيه ما ادري شبيها ؟

رد بعصبيه :: غير من وره الهرفه ابنج

استهدى بالرحمن عاصف

:: شوفي حجيه هي لو غلطانه جان عذرته بس البنيه ما مسويه شي هو متواتب وياها

بيبي // ادري يمه كله من الحيه

:: حجيه ابنج اغم لو ما اغم ما جان وحده مثل نهاد لاعبه بطواريكه

:: راح اروح عدي شغل اكمله واجي اي شي يصير خابريني وديري بالج عليها

بيبي بحسره // عين الله يمه

طلع من البيت واني بقيت بفراشي ما اتحركت احس بجوع وبعطش بس ما اشتهي اكل رجعت بيبي كعدت بالغرفه

لمن ما اجت عمه رجاء // شني عمه بعدهي نايمه

اي مريضه ما الها خلك

چا ما تاخذونها للطبيب

بكيف عمها يمته ما ياخذها

حتى بهاء ماادري شبي.

بيبي //. انوبه هذا شماله ؟

رجاء// عمه ما اتريك وبس يحرك جكاير

ما ادري بي عبالي اتريك

لا وروحه بخشمه ما يتحاچى

تلكينه تعبان من الشغل

يجوزچا شني ما مر عليج

بيبي //. من الباب گلي صباح الخير ومشى 

اجه عاصف وبصوته : : وينج ام بهاء

ها اجيت

: :هاج هذا المعلاك اشوي

المن

:: النه للغدا وروحي اعصري برتقال وجيبي

دخل وسلم :: اشلونج يمه

هله بيك ما بطيت

:: لا اهنا بالحقل

وشني هذاالمعلاك

:: ذبحت طلي للجماعه

بيبي // يتغدون عدنا ؟

تستمر القصة أدناه

عاصف :: اي يمه وگالو يردون ياكلون بالبستان عاد انا جبت المعلاك يشوونه النه

عساك سالم وياهو يطبخ الهم

:: جابر وابو جلال

خوش الله يسهل

:: ما كعدت بعدهي ؟

لا يابني

:: وجم دووب

شسوي ما ادري حظها حظنه

:: يمه هي من اهد طيحتج البنيه مو تمام

اي بس من راحت وشافت اخوها ردت حتى وجهها مورد

نفخ :: استغفر الله

اجت رجاء // هذا العصير تريد بعد شي لو اروح اطبخ

:: لا روحي

اتقرب مني :: شو اگعدي وجد

شال البطانيه من وجهي فتحت اعيوني وهو ايگلي :: ياالله كافي كسل اكعدي

راسي يوجعني واحس بدوار غمضت عيوني هو رد :: مو جاي احجي وياج اكعدي لا تشلعين كلبي

باوعلي وكلي :: شو هاج اشربي هذا العصير

هزيت راسي يعني ما اريد

هو قرب الكلاص اكثر من حلكي :: كافي عناد افتحي حلكج واشربي العصير

جبرني افتح حلكي وشربني العصير حتى بدون ما اجر نفس شربني الكلاص كله وبمجرد ما استقر بمعدتي ولان جان

حامض حلو ومعدتي فارغه فما اتحملته راسا لعبت نفسي وكمت من الفراش بسرعه للمغسله واتقياته

بيبي تكول // ياستار

غسلت وانا احس المكان يدور بيه واحس فاقده توازني اجيت امشي هويت بالصاله وكعت

طلعت رجاء من المطبخ وهي اتكله // عاصف الحك

طلع وشافني واكعه شالني ورجعني للجربايه وكال الرجاء جيبي :: ماي بارد

رش بايده شويه ماي على وجهي جريت نفس فتحت عيوني واشوف بيبي تباوعلي وعمو ورجاء

اتنفست بعمق رجاء كالت // خلي ناخذها للمستشفى

عاصف :: لا عوفوها اخذها العصر للاخصاىي

غطوني لان صرت ارجف رجاء تسال // شبيها البنيه

محد جاوبها هي راحت للمطبخ وعاصف يسال بيبي :: شني رجفتها

بيبي // يمه معدتها فارغه وكامت ومصيبة امس الله يساعدها. نوديها للمستشفى

:: شبي المستشفى يطونها ابره تنيمها العصر اخذها الاخصاىي يشوفها احسن

ساد السكوت فتره وبيبي حجت // كافي جگاير لا تطيح انت انوب ونحتار بيكم

بقى ساكت ما رد عليها

يمكن نمت بيبي اتقربت مني وهي تحجي وياي // اكعدي اكلي شويه شو وجدان جده اكعدي

فتحت عيوني شفت بايدها صحن بي معلاك وطماطه شوي وهي اتكلي // هاج ياحبوبه اكلي شويه

هزيت راسي يعني ما اريد

- - لا لازم تاكلين ياالله شدي حيلج واكعدي اكلي هسه حجي ما تحجيين اكل هم ما تاكلين خايبه لا تموتين ومن فكر روحج

نزلن دموعي بيبي اتقربت ومسحت دموعي // منين استهضمتي من مهيدي لو من عاصف ؟

رجفن شفايفي // ادري بيج من عاصف بس هو معذور وانتي ما سويتي زين ويا انتي دريتي بروحج شحجيتي

تدرين لو شايفتج رجاء لو فرح شصار ياالله ياحبوبه امسحي وجهج بالرحمن وسمي الخاطري اكليلج ثنيوين

بدون خبز وهذا مهدي بعد ما اله طبه للبيت لاهو ولا بزره

استحيت من بيبي وكعدت اكلت اول وحده وثاني وحده حسيت بمعدتي نار كمت رحت للحمام وهماتين اتقيات وحتى الماي

صار تلعب نفسي منه

بيبي // اشبيج جده

حاچيتها واني متالمه ولازمه معدتي =. معدتي توجعني ااااخ

- - بعد شويه عمج ياخذج للطبيب

احس بحلكي يمصل وراسي يوجعني واحجي ويه نفسي = هاي اني شبيه

معدتي بيها وما تزيد باالمها صرت ابجي اجت فرح من المدرسه //. وينج يمه

  يمكن راحت للمطبخ مر وكت وانا ما اگدر انام من الم معدتي اجت فرح // شلونج جده

هله بيج

شلونها وجدان

على الله ياهو جابج

بهاء يكول ابوي عده شغل ومخابره اجه جابني

جا هو وين ؟

فرح // راح يم الخطار

اتغديتي ؟

اي حبوبه امي صبتلي غدا اگلج جده ما كلت لها شي

لا جده حتى الماي ما تگدر اتشربه

چا وشلون

بعد الها الله

تدرين الدرب كله وبهاء يقرر بيه

بيبي // عليش ؟

فرح // ينشدني ليش عمي مهدي شكك كتب وجدان وانا احلفله ما ادري وهو يكلي اتجذبين هنوب يگول هذا شسويله

حتى يفتهم مثل البشر

  - - عليمن ؟

فرح // بعد عليمن على عمي مهدي يكول خلي اسمع بي فاك حلگه وياها اله اشيله من المنطقه كلها

بيبي //. فرح هذا الحچي مو توصلينه النهاد لو المهدي بهاء حچى چيفن مهدي شكك كتب وجدان

فرح // لا جده شعليه انا راح اصعد الحجرتي انام لي شويه واكعد ادرس باجر عدي امتحان

بيبي // روحي جده اقري محد يفيدج وانا هم اريد امدد روحي ظهري يوجعني طفي الضوه وياج

   راحت فرح وبيبي اتمددت شويه وانا يمكن غفييت لمن ما اجه عمو عاصف :: يمه يمه

فووت

:: ها شلونها

شلونها يابني عود اتوسلت بيها تاكل الها شويه معلاك خلت اول لكمه بلايه خبز والثانيه لعبت روحها وراحت ذبته

:: تحجيين صدك

اي ونفس رجفتها وهالغطيتها

شويه بعد واخذها للطبيب

بيبي // علاوي وين ؟

:: انا لاگيته من حل من المدرسه واخذته للبستان اتغدا وخليته يم بيت جابر

بيبي // ليش ؟

:: هناك احسن اله يلعب ويدرس ويه جهالهم حجيه ما اريده يجي ويشوفها هيج تعبانه

- - خطارك اتغدو

:: اي اتغدو وحملو وراحو

— - ها

:: اي واذا تنشدين على مهدي اجه هو وفروخه اتغدا حاله من حال الخطار ورد البيتهم

بيبي // عود صدك ؟

:: وداعتج حجيه

بيبي باستهزاء// اي جا نهوده تسمع اكو ذبيحه وتعلك الها طباخ ما تصير نهاد

اجت رجاء جابت الجاي //. عمه شتردين من نهاد شمسويتلج

- - كل المصايب من جوه راسها

- - عمه انتي من اوانج ما تردينها

بيبي بعصبيه // انجبي لو ما اريدها لو تنطبك السموات والارض ما اخذها بس هي مو آدميه

رجاء// عمه هسه اليسمعج شيگول

- - شني محد ايعرفها

عاصف :: يمه فد ساعه وكعديها وخليها تغسل وتلبس حتى اخذها للطبيب

بيبي سالته // تاخذ من وياك ؟

:: حجيه تلاكيني ام غانم بالدرب وتروح وياي

- - خوش

:: انا طالع شويه وارجع رايح يم الجماعه

- - الله وياك

اتقربت بيبي وشالت عن وجهي الغطا ندهتني // شو اكعدي

خلت ايدها على كصتي ورجاء تسالها // ها عمه ؟

عدها شويه صخونه شو جده اگعدي خلي عمج ياخذج للطبيب

ردت امانع ما اريده ياخذني بس الالم چان قوي بحيث ما اكدر اتحمله

بيبي كالت // فوتي غسلي وتعاي البسيلج هدووم حتى ترحين ويه عمج

رحت غسلت وجهي ورجليه وصرت ارجف بيبي شافتني //. لو سابحه ياجده

ما رديت عليها انطتني عباتي الاسلاميه وخليت الشال على شعري لمن ما اجه عاصف كال :: اذا كملتي خلي نمشي

رحت امشي وبيبي وراي تسمي وتكول // الله وياكم

فتحلي باب السياره الوره ركبت وانا دايخه بحيث غمضت عيوني وعاصف ساق السياره مسافه ورن تلفونه جاوب

:: هلا خالي

:: اي اوكف النه ع الشارع دقايق ونوصل

سد التلفون وكفت السياره. وركبت عمتي امل الي سلمت

- -شلونك ابو فرح

:: هلا اموله شلونج

— - الحمد لله خير خوفتني

:: وجدان مريضه

دارت وجهها // ها عمه وجدان شخيرج

:: ما تگدر تحجي

- - جا كول كلش مريضه ؟

:: صار تلث تيام حتى ماي ما مخليه بحلكها

امل // تحجي صدك ؟

اتحسر :: اي صدك واليوم كلش تعبت وهلجبتها للطبيب

امل // سوده عليه عمه شجاج ؟

:: من وره اخوج الهرفه

مهدي ؟

:: ليش عدج اخو ثاني ؟

امل // شنسويله استغفر الله امي وابوي ما الهم بالاولاد

نفخ وهو يحجي :: خال دوبه من دووب هاي البنيه

ليش شمسويه ؟

:: شتتصورين هي تسوي شي ؟

- - لا ابد ما الها شغل عبالك ما موجوده بالبيت تگضي شغلها وتجي الحجرة امي صوت ما نسمع الها لا هي ولا اخوها

بعد مهددي شيريد منها

:: شكك كتبها

نشغت // تحجي صدك وسكتت اله ؟

:: هو انا موجود الله ستر ما جنت اهنا جان تكولون اكو مهدي ونهاد

  امل // سمي بالرحمن بس ليش شكك كتبها

:: شوفي حتى امي ما سولفتلي السالفه

تخاف عليك وعلى مهدي هم اعذرها

:: امل البنيه واخوها شنو بالموضوع شمسويه ليش مهدي ونهاد ما يردونها هو مهدي شله ويه سعدي هو اصلا اشايف

من سعدي حتى هيج ماخذ موقف منه ومن البنيه واخوها

امل // انت كلتها عاصف نهاد كله من جوه راس نهاد تبقى حاقده ما مكفيها الخير البي هي وتره مهدي كلنه نعرفه فقير واليضحك بوجهه ياخذ الثوب اللابسه

:: هو هذا الكاسر ظهري ومخليني ما احجي ويا مرات تشوفينه فقير لا يهش ولا ينش ومرات تشوفينه خبيث وكل البلا بي

- - صدگني خويه كله من جوه راسها

:: ولا تنسين الحيه الثانيه البيتنا بس سهله انا اعلمهم

- - هسه خلي نشوف الطبيب شيكول وعلى گولتك سهله

//////////////////////////

رغم سمعت كل كلامهم ورغم الالم الي انا بي بس هذا الشي ما يخليني اغفر العاصف الي سوا بيه وكفت السياره وهو كال العمه

:: ابقن بالسياره خلي اشوف شكد وندخل ع الطبيب

  - - ليش خو ننزل وياك

    :: ما تشوفينها ما تكدر تفك عيونها هناك شلون كعدتها

    - - بكيفك خويه

   :: انزلي اكعدي يمها

نزلت عمه وفتحت الباب اليمي وصعدت وهي تحچي وياي بعد ان حضنتني

  - - ما تكليلي شجاج شبيج شني هالعين هاي الخيطتج خياط

ما جاوبتها اجه عاصف وحجى ويه عمه :: نزليها ياالله

هو فتح الباب وعمه نزلت ونزلتني وهي لازمه ايدي صار يمشي كدامنا واحنه ورا وصلنا للعياده السكرتير

فتح النه الباب سلم ع الطبيب الي گله // نيمها ع السديه

      عمه ساعدتني اتمدد ع السديه وصار عمي يشرح للطبيب وشلون صرت اتقيا ساله

- - يعني هي ما ماكله من يومين

  :: اي دكتور اي شي ما ماكله وبس شربت عصير البرتقال ذبته وصار اي شي ما يركد ابمعدتها

  - - مفهوم

اجه يمي الطبيب وعمتي ويا صار يفحصني فتح عيوني وضغط على بطني الى ان وصل المعدتي اني عطت ااخ

رجع كال // تسوولها سونار وهذا التحليل وترجعون كتبت الكم بالورقه ان يدخلوها بسرعه لان حالتها تعبانه

  :: دكتور خير

  - - ان شاالله خير سوولي التحاليل وتعالو

راح عمي واحنه ورا بمجرد ما وصلنه للسونار كله // بس يطلع المريض اندخلكم

وفعلا دخلنه بسرعه والطبيب سوالي سونار وبس عمه وياي ما اسولف الكم على وضعي شنو ونفس الشي الرجفه

اجتني رغم الجو معتدل وبعدها رحت للتحليل كان دم وكالو يطول ساعه

رحت انا وعمه كعدنا بالاخير حتى انتجي عليها وعاصف كعد مقابيلنه قريب من غرفة التحليل وكل شويه يجيب ماي وعصير

وبسكت عمه تنطيني واني اكتفي باان اهز راسي وما اباوع بوجه وحتى هو ما يحجي وياي ولا يباوع بوجهي

عمه امل طلبت منه يجيب باكيت كلنس لان حلكي يمصل هو راح جاب وانطا الها

بعد اكثر من ساعه طلع التحليل ورجعنه للطبيب وهم طلب منهم يخلوني ع السديه بس هالمره كاعده فتح عيوني وگلي

جري نفس وخال السماعه على صدري

ورجع كتب ورقه وكال العمو // هاي ورقه تدخل مستشفى حالا

:: ليش دكتور

- - بالبدايه شكيت بالزاىده السونار طلع ما عدها

   :: چا شبيها دكتور ؟

   - - البنيه صاير عدها تحسس بالمعده ماثرع القناة الصفراء فمسوي عدها التهاب جدا قوي وهذا الي مخليها ما تتقبل لا تاكل ولاتشرب اي شي فصاير عدها شبه الجفاف وكذلك عدها فقر دم وهذا الشي ما يتعالج اله بالاكل الصحي وما دام هي ما تكدر تاكل او بالاحرى ما تتقبل الاكل

 فبهاي الحاله نلجا للمغذيات والابر

- - هاي ورقه هسه تدخل للمستشفى وانا اباشر حالتها

  :: زين دكتور اخذها المستشفى اهلي احسن

  - - بكيفك تريد اكتب الك للمستشفى الاهلي

  :... اي دكتور على مود راحتهن

   - - هو بكل الاحوال الابر تشتروهن من بره والمحاليل موجوده بااي مستشفى

كتب الطبيب على مستشفى اهلي ومن ردنا نطلع حجى ويه عاصف// استاذ سعدي بنتك ضروري هسه تروح للمستشفى اي تاخير مو بصالحها

:: هسه دكتور اوديها فيمان الله

طلعنه وعمه لازمتني من ايدي وتگلي // الطبيب لداله عاصف ابوج سعدي

ما جاوبتها ركبنه بالسياره وهو يسوق والكل ساكت الى ان وصلنه هو دخل قبلنه وبعدها اجه كال العمتي :: نزليها

نزلتني وصرت امشي بمساعدة عمتي وصلنه للغرفه وهنا راسا اجو وعلگو المغذي وعمه بقت بالغرفه

الممرضه سالت عمتي // شخيرها الحلوه

عمتي جاوبت بعد ان اتحسرت // مريضه وصار يومين لاماكله ولا شاربه

- - ان شاالله ما يمها الا العافيه راقبيلي المغذي جاي يمشي كلش قليل لان حتى وريدها ضعيف انا شويه وارجع

غمضت عيوني وعمتي كعدت يمي ع الكرسي وهي تحاچيني // شبيج ياعمه شجاج من ذاك اليوم من اجيتكم بحادثة بهاء

وانتي مو انتي انوب جملنه مهدي اندري شيريد منج

اتنفست بعمق وحجت // مهدي تره فقير وحجايه تاخذه وحجايه اتجيبه وهذا كله شغل نهاد

- - استغفر الله الك بيها اراده ياربي هسه هاي الفرخه ليش كلها اتچالبت عليها وين تطي وجهها

صارت تبجي وبقت كاعده يمي واكتمل اول بطل مغذي وراحت للممرضه الي اجت وخلتللي واحد ثاني سالتها عمتي

- - چا ليش خليتيلها بعد ؟

- - هذني الاربعه لازم كلهن اخليهن الها البنيه عدها جفاف

- - عبالي الجفاف بس يصير الاطفال

- - مو تكولين ما خاله بحلكها لا ماي ولا اكل من يومين اكيد صاير عدها جفاف

  - - الله يستر

رن تلفون عمتي امل الگالت هذا ياهو التصل عليه جاوبت ردت // هله يمه

الله يسلمج انتي شلونج

اي يمه نوموها

هو الطبيب نيمها

اي اخذولها سونار وتحاليل وكال حالا تنام مسشفى

هااا

لا لا بعده ما جاي

ان شاالله بلكي بس اليوم وتطلع

خووش

الله وياج

عمتي نفخت وكالت استغفر الله

بالمستشفيات يحيبون الوجبه من وكت ومن انطو العشا العمه خلته بصينته وحاجتني

- - ما الله يهديج من يكمل المغذي تاكليلج شويه وتشدين حيلج

ما رديت عليها لمن ما سمعنه طرق ع الباب هي عدلت شالي وفتحت الباب // هلا خويه

:: الله يساعدج

هله بيك

:: ها اشلونها

هاي هذا رابع بطل ايعلكونه الها

  :: وهي ؟

امل // على حطة ايدك

:: هاي جبت الها ملابس وحتى انتي امي خلتلج دشداشه من اهدومها كلت خاف نتعطل بالمستشفى

- - اي زين تسوي

:: وخابرت ابو غانم كتله وكلي خليها شريد منها

لا ما يكول شي

   :: جبت عشا

المن ابو فرح هذا الاكل محد ضاكه

:: مي خالف جبت شوربه ولفات وعصير وفواكه

احنه ابختك شني شعدنا

:: مي خالف بلكي تاكل

  امل // انت اكل ابو فرح

:: لا ما اشتهي

- - مو زين عليك بس جكاير

اندك الباب شفنا الطبيب اجه سلم وهو حجى وياي // اشو وجدان افتحي عيونج

ضرب على خدي ضربات بسيطه فتحت عيوني كان ويا طبيب ثاني فتح عيوني واخذ ضغطي

وصار يحجي ويه زميله بلغه ثانيه وسالها العمتي // هم راحت للحمام

لا دكتور

سالني // انتي ما محصوره

هزيت راسي

الطبيب باوع العمتي وكللها // اريدها تشرب سوائل حتى لو ما تريد اجبروها وراقبوها شنو يصير بعد ما تاكل

وياريت تاخذيها للحمام

بصراحه خجلت عاصف سال الدكتور :: خير دكتور

- - هسه نبقى ع العلاج هذا يعني كل ست ساعات انخليلها مغذي ومنا الباجر نشوف يمها العافيه

  :: الله يسلمك دكتور ممنون منك

طلع الطبيب وعاصف گال :: خو سمعتي شگال الطبيب ياالله اكعدي اكلي

احس بنعاس يمكن بسبب العلاج لكن ما حبيت احجي ويا وارد خصوصا واني سمعت الطبيب يكول احبروها ع الاكل

عمتي جابت الشوربه وقربتها مني اخذت خاشوكه والثانيه ونفس الشي الي صار بيه بالبيت نفسي لعبت وبطني لوتني

شافتني عمتي وعاصف الي قرب السله مني واتقيات بيها جاب بطل وقربه يمي وكال العمتي اغسلي وجهها

اتمضمضت وغسلت وجهي رجعت اتمددت وعاصف يسال بعمتي :: شبيها البنيه

علمي علمك يجي الطبيب ونگله

:: وهاي احنه نتاني لمن ما يحي الطبيب

- - جا شنسوي عاصف شنسوي ما تكلي شويه بعد واشربها ماي

:: خوش

خويه روح انت تعبان

:: لا يابه شعدي

مو خاف ما يرضون

:: ما عليج كلهم ربعي

تستمر القصة أدناه

  امل // ههههه جا من تدخن اطلع بره لا تخنكنا

  :: هسه انا مدخن

- - ادريبك شويه وتشعلك جگاره اكلك عاصف ما تاكلك شويه

  :: ما اشتهي

  - - امي كبل لا تجي خابرتني انت گلتلها

   :: اي

- - خطيه كلبها داعي نار على البنيه

   :: مو بس هي كلنه

جابتلي عمتي بطل ماي وكالت اشربي شويه

فعلا كنت عطشانه المشكله بمجرد ما الماي دخل جوفي راسا اتقياته يعني حتى ما لحكت عمتي اتقرب عليه السله

من شاف عاصف حالتي طلع غاب فتره اندك الباب اجه هو. والطبيب المقيم الي فتح الفايل مالتي واجه سالني

- - شنو يوجعج

اشرت على معدتي

صار يفحصني واخذ ضغطي وكال العمو

— - بعد ساعه تجي الممرضه وتنطيها علاجها وهذا الصار وياها شي طبيعي لان عدها تحسس بجدار المعده

باوع العمتي // حاولي تاخذيها للحمام ضروري

هو طلع وعمتي كالت // ياالله خلي اساعدج ترحين للحمام

كمت واحس بدوخه هي كلتلي // انسندي عليه

الحمام بنفس الغرفه لكن رغم هذا حسيت بدوخه مو طبيعيه غسلت وجهي وطلعت وعمتي ساعدتني ارجع للجربايه اتمددت واجت الممرضه خلتلي المغذي والابر ونمت ما حسيت بشي اله الصبح فتحت عيوني والممرضه جاي اتعلگلي بالمغذي وعمتي واگفه

الممرضه سالتني // شلونج اليوم

سلهمت عيوني بدون ما اجاوب عمتي كالت // هاي صار تلث تيام لا اكل دخل بطنها ولا ماي ولا تحجي

- - ياستار شبيها ؟

امل // ما ادري

ليش انتي مو امها

انا عمتها امها الله يرحمها

خطيه متعرضه الضغط نفسي ديرو بالكم عليها

الله كريم

من يخلص المغذي اجي اشيله انتبهيله لا ايوت

الساعه بالتسعه اجه الطبيب وعاصف اجه ويا الطبيب // هاصباح الخير اشلونج وجدان

ما جاوبته // ليش ما تحجيين

عمتي // هاي هي من طاحت الهسه لا تحجي ولا تاكل وحتى الماي هم ما ثبت ابطنها

هز راسه وسالها // امس اي شي ما اكلت

- - دكتور خاشوكتين شوربه وذبتهن راسا والماي ما لحگنا على ملابسها

هز راسه // بهاي الحاله لازم نسويلها ناظور

  كتب وحجى ويه عاصف // هاي ورقه بعد بكيفك تريد تسوي على حسابك تريد تسوي بالمستشفى الحكومي

بس تره يتاخر سوي وجيبه وبعدين انقرر يمها العافيه

طلع الطبيب وعمي كال العمتي :: جبتلج ريوك

- - خويه منو يشتهي

  :: مي خالف ادري بيج ما تاكلين اكل المستشفى

اندك الباب وعمي كال :: اتفضل

انفتح شفت بيبي جايه هي وبهاء وبحنان تسالني // ها حده اشلونج

اتقربت مني وباستني اجت يمها عمتي امل /$ يمه اشلونج

- - هله بيج يمه شلوني يوميه شغله شكل

عاصف :: المن جبتها ؟

بهاء // حقك ما شفتها شسوت ولبست جواريبها وكالت اذا ما توديني اروح ابحدي شكال الطبيب ؟

  :: اطانه ورقه انسويلها ناظور

بهاء// وهاي هي عايشه ع المغذي

  امل /$ اي حتى الماي ما يوصل الحلكها

عاصف نفخ وكال :: لبسيها انا طالع واشويه وارجع

طلع هو وبهاء وعمتي امل حاجتني // شو كومي ادخلي للحمام والبسي حتى نروح نسويلج ناظور

  بيبي // شني يمه اتحمله

امل // جا شبيدنا غصبا ما عليها تتحمله

  بيبي // منين اجتج ياجده عساها بحظ نهاد وبختها

   امل // يمه اسكتي تره كوه مسكته عاصف

عمتي سندتني ودخلت للحمام غسلت ومن ردت اطلع هي انطتني تراك نظيف لبسته وطلعت لبستني العبايه الاسلاميه

وانا اشوف بيبي تمسح بدموعها وعمتي تحجي وياي

- تشوفي حبوبتج ما بجت هالشكل الا لمن مات عمج بدر وجدج غازي

  = ويجوز انا هم اموت

- - لا حبيبتي اسم الله عليج كافي الزعل مو زين وحبوبتج بعد مو حمل ضيم

بچييت وبيبي حضنتني وهي اتگلي // اسكتي ياروحي تره گوه كاظه عاصف وبهاء من مهدي ومرته

امل // لا يمه وجدان حبابه وسباعيه وما تسوي مشاكل بين الاخوان بس مهدي يرادله لوية اذن هو ومرته

اجه عاصف وكال :: ياالله امل جيبي غراضجن وخلي نمشي

- - وين عاصف ؟

:: يمه ترحين ويانه لو بهاء ايردج

بيبي // غير اتفهمنا وين

:: البغداد شني اظل على يوم سونار يوم ناظور اخذها الطبيب ابغداد وافضها خابرت كريم يسالني على طبيب زين ونحجز عده

  بيبي // خوش اخذ اختك وروحو انا يردني بهاء

    بهاء// مو مابيج حجيه بس ما تعوفيين مهدي

    - - جا شسوي رايك بس طلايب گدام الناس

باوع البهاء :: دير بالك ع الشغل هالفتره خاف نتعطل

   - - ولا يهمك

:: وهذا مهدي ابد لا تشدله راس على ما اجي واعرف شغلي ياالله فيما الله

- - الله وياكم

بيبي حضنتني وهي تكول // جده شدي حيلج بعدج اشبيبه لاتدولبين روحج وتدولبينه

حاجيتها بتعب =. ديري بالج على علاوي

- - بعيني لا تخافين يمي انتي بس طيبي

بهاء//. شدي حيلج وطيبي والتردينه يصير

الفصل الواحد والثلاثون من هنا 

شكرا لزيارتكم عالم روايات سكيرهوم