رواية جسر الذكريات الفصل الثاني بقلم مريم الحيالي
................في وقت من اوقات الحاظر القريب..!!
...يلا كومن خلي انروح لابو ايهاب نشتري لليل حتى نبقى كاعدين للسحور
شهد: اييي قبل لتبدي دار دور حتى نتفرجها وانجيب كرزات هم
...ديلا كومي لعد.. هاجر اتروحين لو لا مو اتكولين جيبولي ومن انجيب اتضلين تحجييين
هاجر: اروح وياجن كومني..ومدت ايدها اتريدنا انكومها طبعاً اذا اكلت ماعون تمن احمر وعليه سمج تكلا عود هي صايمه وهلكد اكلت
شهد:مديتلها ايدي وكومتها جان تندار واتكولها.. ماكله بحلگج بمعدتج معدتي وبكيفي
... ياستاااااار هو اني شكلت كاعدة بأفكارييييي
....لبسنه عبي بدون شالات موديله هالسنه واخذت فلوس من امي وعمتي هم انطتنا لازم نستغلها لان هي موظفه تنطينا اكثر ههههههههه
شهد: يوم شنو هاي متكفي ضحى اتريد تشتري ويانه هم
غصون: ليييييش شراح اتجيبن عشرة الاف ومتكفيججججن
... ها عمه ليش اتصيحين دجيبي بعد خمسه واحنه نسكت.. غمزتلها وضحكت
جان هي هم تضحك ضحكتها العاليه ووياها فشورة لازم هههههههه
غصون: امشن ولن ماكو مانطي وروووح ابويه مانطي
هاجر: نيلز انطينه بعد خمسه واحنه انولي يلا بسرعه.. ومدت ايدها اتأشرلها
علية: راح اكوملجن بالنعال روحن عاد وانتي زمووو سدي العبايه من جوة شو طالعه مشلحه خانم
...شبييييج علوووش شلابسه الدشداشه مو كلش قصيرة ... دمشن خرب جلبتن وجريتهن ونزلنه من الدرج هسه علوش تگلب علينه ونتعلل رزالة ... رحنه جبنه نمنميات وحبشكلااات دبلات واكيد الحب لازم جيييس ابو الالف.. رتبناهن واجينه نتفرج على دار دور مسلسل جديد بهذا رمضان ممنوع واحد ايصيح وايعلق لان امي وعمتي گبل ايگبببببن ميخلونه نحجي
غصون: بدت ولجن علنه ياااااا علننننننه ...
شهد: يوووم صدك تحجين ليش اتصيحين اصبري خلي تخلص الاغنيه... يااا شبيها گلبت الدنيا
.... هههههههههههههه اخ بطني يمه متت ضحك وهاجر السفيهه تضحك وكولساع وتضرب ايه على رجلها عود يعني خربانه ضحك
ايه: شبييييييج بنت الزماال ... هاجر جرتها من شعرها وايه اتصيح بالغلط بالغلط مو على خااااااليييي
... وكعدنه كلنه بالغرفه عالمبردة والحبشكلات ودنتفرج على المسلسل ....
..................ذكريات في جوف الماضي....................
دريد:طلعت اركض الف فكرة وفكرة ببالي شلون اتخربط وشنو الي صار وبالشارع واكع لا ولد ولا اثنين عنده وتالي بالشارع يوكع ومحد يدري بي امشي واحجي بيني وبين روحي
نزار: دريد اوكف انتظرني شبييك تعال خلي نصعد منا انروح البيتكم انشوف بيا مستشفى اخذوا
.... هو يحجي واني بس اهز براسي ماحجي اريد بس اوصل واعرف شنو الصار .. صعدنة بالسيارة واتجهنه للبيت ..وصلنه ونزلت اركض لكيت امي تبجي سألتها وكلتلي
سعاد: عمك خليل اخذه وراح وعصام وياهم
دريد: اخوتي الكبار لابسين عسكريه وماكو بس الصغار... طلعت من البيت ولاكيت عمي وجهه محتقن احمر عرفت وماكو داعي بعد اسأله
خليل: الى رحمه الله دريد.. انا لله وانا اليه راجعون..
دريد: خلصت ايام الفاتحه ابويه هو عامود بيتنه وفاته اثرت بيه بشكل كبير وخلتني افكر للمستقبل بشكل بطيئ ومحسوب اخواني صغار امي خواتي مسؤلية كبيرة ... الكبار بالعسكريه ومندري بوضعهم وحتى ميعرفون بوفاة ابويه... تفكير وتفكير وتفكير ...
............نبيلة
وصلت البيتهم واشوف الهوسة والرياجيل ملتمه عليهم ...تعال يولد يوللللد ..ها خاله.. شكو شصاير يم بيت دريد... ليش مدريتي ابوهم ماااات
نبيلة: خبر نزل عليه مثل الصاعقه بهتت روحي... مو انانيه والله وادري الوقت مو مناسب بهيج تفكير بس اني شلون شراح ايصير بيه ومستحييييل افتح هيج موظوع ويا بعد هو بيا حال هسه وشنو المصير الي راح يجي...؟
.... رجعت امشي بگلب مخذول وروح مكسورة امشي ودموعي تنزل على خدي ليش هيج صار وشلون وصلت الهاي الحاله كلشي ضدي ماكو شي ديصير مثل ما اريد ... فتحت باب بيتنه الطرمة فارغه فتت اتلگتني بسمة بالمطبخ وجرتني من ايدي تسحل بيه للغرفه
ابتسام: تحجي بهمس وضاغطه على اسنانها متحلفتلي... ولج انتي اتخبلتي شلون هيج اتطلعين غزوان اتحلفلج گوة سكتته امي وكلتله نفسيتها تعبانه علمود الشهادة نبيله اعقلي وكعدي وسكتي عوفي هذا الموظوع عوفي دريد والله اذا غزوان عرف مراح يسكت ولتنسين غازي صديقه يعني احتمال يتخاربون بسبب هذا الموضوووع مو احجي متجاوبيييين
نبيلة: حجيت وكوة يطلع الكلام مني ... ابو دريد مات
ابتسام: ضربت خدي حيل وصيحت ياااا داده اجتي امي تركض فتحت الباب
ام غزوان: ياااا شبيجن منيه الصيحت وانتي نبيله شبيج يووم ليش هذا حالج ليش تبجين
ابتسام: وج يووم ابو دريد انطاج عمرة
ام غزوان: يااا دادة شوكت ولجن احجن منين سمعتن
ابتسام: حرت شجاوبها وشرد عليها..اء اء اء يوم هسه من رجعت نبيله بالطريق وفاتت من يم بيتهم وشافت الهوسه
ام غزوان: شحال دريد هسه لازم اروحلهم واسوي الواجب عيب صاحب فضل هالولد هذا واكفلي بكلشي مخلاني امد ايدي الاحد..
نبيله: طلعت امي واستلمتني بسمه رزايل وحجي ذبيت عباتي وجريت المخدة واتمددت خليت ايدي على عيوني وابجي واشهك غصه بداخلي وماعرف سببها... لا اعرف سببها اعرف مصيري المجهول حبي البائس حياتي الديصير كله الي مدالكاله حل وهسه موت ابوه الي راح ايعرقل هواي اموور اعرف مراح يتخطى دريد بسهولة واعرف الوقت ابد مو مناسب ومنا غزوان ايلح عليه وعلى امي
يارب ساعدني يارب...
........................
نزار: دريد المحل مسدود صارلة فترة واجاني اليوم صاحبه يسأل عليك ايكول اذا ميشتغل بي بعد خلي ايسلمليا
دريد: نزار يحجي واني كاعد عالكرويته اشرب جكارتي وحاير بالجاي والراح ايصير شنو... نزار هسه اسلمك المفتاح وانطي اله ما اشتغل بالمحل اني جنت مقرر اطلع من عندة شغله ميسد البيت والولد عسكريه لازم اشوفلي شي احسن
نزار: اتهون ياب اتهون .. اباوع عليه تعباان ووجهه ذبلان دريد من يومه حنين وقلبه طيب وايفكر بالكل قبل نفسه الله ايساعده ان شاء الله
....مرت الايام واجوي اخواني وعرفو بوفاة ابويه وجان خبر مو هين بالنسبه الهم وهم محاظرين حتى.. طلعت اتمشى رحت النزار اكيد هسه الكا بشارع الرشيد يم عكدة ابو الجبن يتريك ...وصلت ولكيته يشرب بالجاي
نزار: صبااااح الخير اشرقت وانورت
دريد: صباح النور شلونك..شنو ماعندك شغل
نزار:خلي اتريك واروحلهم مطاير الشغل..انت شلونك شسويت وين راح تشتغل مناوي تجي ويانه
دريد: خليها الوقتها لكل حادث حديث..مر على وفاة ابويه ٣ اشهر..رغم حزني وشتات عقلي الا اني منسيتها وعلى طول افكر بيها ومن هذيج الضهريه الحمرة مشفتها بعد بس امها واختها اجوي للعزة وراحو الا هي ومسألت عليها لأن الوقت مو مناسب
اتنهدت قوي وشغلت جكارتي ونزار طلبلي جاي وصافن عالشارع والناس التروح وترجع وعلى المجهول المنتظرني...
نزار: تجي ويايه للمعمل لترجع للبيت لازم تلكالك شغل شنو الي ببالك؟
دريد: قبل فترة اجاني رجال تاجر يتردد عليه بين فترة وفترة عنده معمل مال خياطه اكثر من مرة اقترح عليه اشتغل ويا ورفضت واكثر من مرة كلي راح اروحله واحجي ويا واشوف شيكول
نزار: وليش متجي يمنه ويا عماد..
دريد: لا نزار كاري غير عنكم اني بالخياطة اعرف اكثر من الاحزمة الولد وياكم ايكفون وايوفون..واكو شي ثاني ببالي لازم اسافر هالفترة احس هذا البعد راح ايفيدني هواااايه
نزار: مشايفها مووو ولا ملتقي بيها
دريد: عاينتله وبقيت اعاين بوجهه وهزيت راسي بأسى هو ابتسم وافتهم عليه... ماكدر اواجهها ولا اكدر اخطي اي خطوة هسه حياتي ممرتبة مستحيل ائملها على شي ولا انطيها وعود فارغه
نزار: يلا اني رايح العصر انتظرني بالمقهى حتى افتهم شصار وياك مو ترجع للبيت اجيك من اطلع
دريد: اتوكل في امان الله .. كمت اتمشى واتجهت اشوف المعمل وصلت وسلمت عالرجال وحجينه بالموضوع ورحب بيه وفرح من عرف راح اجي اشتغل بمعملهم والشغله الي ممتوقعها والي اقترحها عليه والي هل هي صدفه فعلا ام تدبير من الباري
ابو محمد: دريد عندي معمل ببلغاريا شنو رأيك اتروح اهناك تشتغل بي واتطور من شغلك اكثر ولو انت شاطر بس تتعلم اكثر واني حاب انت اتروح ..؟
دريد: مادري شنو اكلك صراحه بس اجتي بوقتها هاهيه اعتبرها صايرة ان شاء الله متفقين.. سلمت عليه وطلعت اتوجهت للبيت .... طلعت دفتري وكتبت رسالة لازم افهمها ماعوفها ورايه واخيب ضنها بيه
...مازلت كما انا لم اخطوا خطوة واحدة الى الامام
لا زلت لا اعرف كيف اضع حد لما انا به..
... كتبتها الرسالة بورقه ورجعت كتبتها بدفتري للحفظ والذكرى خليتها بضرف وضميتها بجيبي وطلعت من البيت واتجهت للمقهى انتظر نزار حتى احجي ويا وهو الوحيد الي اثق بي وراح ادزها بيدة .. وصلت لكيت غازي كاعد مو من عوايدة ... سلام عليكم شنو منين طالعه الشمس اليوم اهنا
غازي: الحبيب شلونك عاش من شافك وين هالغيبه ابويه يسأل عليك وباله يمك
دريد: سألت عليه العافيه موجود بهالدنيا ومشاغلها ... ليش اتغير بالموضوع مو على بعضك خير
غازي: اتنهدت واتحسرت وحجيت .. الحجي ايلح عليه بالزواج واني مخلي وحدة ببالي بس خاف هم ايشوفله لوفه ومتعجبه
دريد: بس لا من الي ببالي بالك ولك شوكت تنعدل!!
غازي: لا هالمرة غير معدلة والله وبنت عائله وناس شفتها مرتين ودخلت عقلي حجيت ويه اخوها وانطاني الموافقه بس كال اسألها واحجي ويه الاهل
دريد: هذا اخوها بايعها من وافق عليك هيج شنو ميعرفك ولا يعرف بسوالفك لا تضلم الابنيه وياك مو كد هالخطوة لا تخطيها
غازي: عييييب عليك دريد شو طلعتني سرسري
نزار: قابل ديكذب ولك اكبر ساقط وكلاوجي وضربته على جتفه.. دريد الحبيب شلونك ياب
غازي: انت متستحي شبيك عزيزي.. عود ضجت من عندهم بس هيهات تعبر عليهم
دريد: ضحكت وغمزت النزار افتهم وخنگه وكله..
نزار: ولك منيه الامها داعيه عليها وتاخذ واحد دايح مثلك منووووو .. هو ابيضاني اذانه ووجهه صارن حمر وهو خربان ضحك
غازي: ايقبلوون وداعتك اخوها يبجي عالفلس
دريد: اهنا الحجي مو كتلك بايعيها..!!
.... شربنا جاي وسولفنا غازي كام اترخص وبقينه اني ونزار گاعدين ...غمزلي وايحرك براسه
نزار: خيرك بحلكك حجي كول شبيك وشسويت عالمعمل الرحتله؟
دريد: طلعت الرساله وسحبت كف ايدة وخليتها بي.. امانه هاي نزار ما اثق بأحد غيرك اتوصلها النبيلة بس مو هسه باليوم الاسافر بي.. فتح عيونه مصدوم وكال
نزار: وين اتساافر دريد وشنو هالسرعه خير وين مهزوم
دريد: ما مهزوم لازم ابتعد كتلك محتاج هذا الشي اخذت الشغل ابو محمد عنده معمل ببلغاريا راح اروح اشتغل فترة اهناك وارجع ..بعد اسبوع السفره..
.... رجعت للبيت وبلغتهم بسفري واتقبلوا الموضوع ..ومرت الايام واجه موعد السفرة وحظرت غراضي بس قبل لا اسافر رحت اللتقيت بنزار ووصيته ايوصل الامانه واجاني خبر طالعه ناجحه وراح اتقدم على كليه التربيه الحمدلله الله ايوفقها
... طلعت رحت لابو محمد هو هم ايروح ويايه وكم صانع ويانه هم اتجهنا للمحطه حتى نصعد بالقطار واتلاشت ببالي الذكريات.. ذكريات اول شوفتي الها ويوميه الصبح من اطلع من وقت حتى اشوفها وهي اتروح للمدرسه اتنازلت عن علاقاتي العابرة مع البنات في سبيل حبي النبيله مكنت اضن بيوم من الأيام راح احب بهالطريقه المجنونه...
دريد: صعدنة بالقطار واتجهت الى المجهول..
...............................
ابتسام: كومي اتروحين ويايه للسوك .. اريد اجيب كم بكرة احوك بيها الشتاء على الابواب..نبيلة مو احجي وياج
نبيلة: بسمة مالي خلك الكلشي والله روحي انتي وامي اريد انام.. سحبت الجرجف وغطيت راسي.. جرته مني وكشفت وجهي
ابتسام: مو بكيفج كومي اتروحين يعني اتروحين
نبيلة: ادري بيها مراح اتعوفني كمت غسلت وبدلت وطلعت وياها للسوك
ابتسام: خلي انمر على دريد انشوفه امي تسأل عليه وصارله فوك الشهرين هو ماكو ومشايفي
نبيلة: فز قلبي على طارييه..
انتي مريلة اني انتظرج برة ما افوت ..هزت براسها وسكتت .. وصلنه لكينه المحل مسدود بس ابو غازي كاعد عالكرسي بباب المحل مالته..
ابتسام: عمو ابو غازي شلونك شلون صحتك .. دريد معزل اليوم شعجب!!
ابو غازي: هلا ببنياتي الحمدلله انتو شلونكم امكم شلونها
ابتسام: الله ايسلمك عمو بخير..بس مكتلي دريد مموجود؟امي تسأل عليه وكلنه انشوفه بدربنه
ابو غازي: بنيتي دريد ترك المحل صار فترة واشتغل بالمعمل مال التاجر ابو محمد..محتاجين شي بنتي كولي
نبيلة: انصدمت ورفعت عيوني اباوع على بسمه الي لازمه ايدي وتضغط عليها وكانها اتكولي اصبري خلي نفتهم لتحكمين عليه
ابتسام: عمو اكو شي يعني لو هو ترك ؟
ابو غازي: ماعرف بنتي سألي نزار ابن عمه اكيد يعرف
نبيلة: سلمنه عليه ومشينه امشي وببالي الف فكرة معقولة اني غلطانه بدريد ويطلع كذاب وراد يضحك عليه مثل علاقاته السابقه معقولة وهمني بشي مموجود عقلي يحجي من كل جهه الف فكرة وفكرة اجتني
ابتسام: نبيلة نبييييلة ركزي ويايه هذا نزار ديباوع علينه امشي خلي انسلم عليه نفتهم من عندة دريد وين امشي..
.... مرحبا نزار شلونك شخبارك
نزار: هلاااا ابتسام الحمدلله انتو شلونكم الوالدة شلونها
ابتسام: اشكرك يارب بخير.. اريد اسألك مرينه على دريد ولكينا مموجود وعمو ابو غازي كال ترك المحل ان شاء الله مابي شي؟؟
نبيلة: ابتسام تحجي واني بس اباوع بعيوني الذبلانه وحيلي المهدود ومنتظرة اسمع شي ايسكن روحي وشتات عقلي نزار نظراته الي بأسى واسف وعرفت وراها شي..!
نزار: لا مابي شي الحمدلله بس لكه شغل افضل بمعمل خياطه وسافر البلغاريا ويه صاحب المعمل يشتغل اهناك فترة ويرجع ميطول ان شاء الله...
نبيلة: فتحت عيوني بصدمة واطلقت دموعي اهنا متحملت ولا اراديا وبدون تفكير حجيت وكتلة النزار . لعد واني؟؟
نزار: تركلي امانه الج اتفضلي..طلعت الظرف من جيبي وسلمته الها بأيدها الترجف وعلامات القهر الي احتلت وجهها.. اخخخ من عنادك دريد
نبيلة:سلمنة عليه ورجعنه امشي بكل سرعتي واني سارحه الفكر اريد بس اوصل اشوف شنو كاتب معقولة ايريدني انتظرة معقولة كاتبلي شي مهم امشي واني على امل يحييني واكون غلطانه بضنوني من ناحيته...؟
................................
في وقت من اوقات الحاظر القريب....
....طلعت من المدرسة والدنيا ثلج باردة ودوام ضُهري وعبالك دنيا مغرب من ورة البرد والغيم اكيد تمطر اليوم ... هاجر دمشي بسرعه مو جمدت
هاجر: اوكفي خلي تجي سارة وايناس شبيج اليوم محد كلج لبسي هاي القمصلة الكابوي خفيفه
.... لتلغين مالي خلگج امشي راح تبدي عاصي يمعودة اليوم امير يعرف باسيا بنته
هاجر: خرة عليج وعلى امير اوكفي خلي يجن البنات
....اني صوجي انتظرج اصلاً ...باوعت اجني سارة وايناس يتمضحكن ...دمشششششن مو جمدت يمعودااات
ايناس: لتصيحين عوبه اجينه اليوم شعندج شو خابصه الدنيا شكوو
هاجر: اتريد اتلحك عالمسلسل خبصتنا .. وبعدين مو جان عندج امتحان اليوم شو جنج ممجاوبه مبين
.... اوف الله يقرض الرياضيات ومدرسات الرياضيات والي ألف الرياضيات كولن آميييييييين
ايناس..سارة: آمييييين.. كالنها بصوت عالي ويضحكن عليه
... علتي بالحياة الرياضيات بس الله ايحبني وهادي عليه ست فائقه ودائما اتخليلي ٥٠ واتنجحني اتكولي انتي باليومي زينه شبيج بالورقه اتصخمين
....وصلنا للبيت وهاجر اتدردم على راسي لأن امشي سريع كتلني البرد وهي بطرانه صعدت الدرج اركض فتحت الباب والكه بيبي يمنه هلااااااا بسهامه
بيبي: ولج بولا(كلمة قديمه) بربوك سهامه شنو ..امي تضحك وبيبي استلمتني رزاله واجتي هاجر كملتها
هاجر: هاي شنووو اليوم سهام يمنه... ضحكت بصوت عالي وهي تغلط علينه بس شنو غير تعدمنه اذا رحنه سلمنا بدون منغسل لازم انبدل وانغسل يلا نوصللها
بيبي محصنه ياااااب
..يووم غدة شمسويه غدة؟؟
علية: تمن وفاصوليه روحن صبن واتغدن..جاوبتي لو لا شو مبين كلشي ماكو
.... باوعت عليها وضحكت رحت بستها كتلها مو عييييب رياضيات وما اجاوب ..هي عرفت غلطت عليه واني رحت للمطبخ لكيت هاجر اتصب ..رحنه للهول سلمنه على بيبي وبوسناها وگلبته على ام بي سي اشوف عاصي وامير....
.................ذكريات في جوف الماضي...........
نبيلة: وصلت للبيت فتت بسرعه رحت للغرفه سديت الباب ونزعت العبايه وطلعت الرسالة واقرأ ودموعي لا اراديا تنزل!!!
ألرسالة!!!
نور عيني ..
لعلي استطعت ان اصل الى فهمك وان اجعلك تعرفين الفرق بين حبي لك وبين ما اوفره من مساعدة للعائله...
ان مساعدتي للعائلة ليس لها اي ارتباط بما احملهُ لكِ.
وذلك لأني بطبيعتي لا احب ان اصل الى قلوب الناس بطرق لا اؤمن بها.. ان معزتي لوالدتكِ وثقتها بي..هما الدافع واؤكد لكِ ان رضاهم بي او عدم رضاهم.. لا يغير من علاقتي على مستوى العائله قيد شعرة لأن الصداقه العائلية شيئ وارتباط الحياة شيئ آخر .. ولكل ام واب نظرة في سعادة ابنائهم وبناتهم ..وسوف تثبت لكِ ولهم الأيام ان كتب لنا معهما موعد كهذا ...
أن الكتمان وعدم الشجاعة للمصارحة.. ووجود المد
الفاصل بين الوالدين والأبناء..
لطرح مشاكلهم وصراحة أسرارهم.. دائماً
ما تكون نهاية هذه الأشياء غير سليمة..
وربما تؤدي الى تشرد افراد البيت السعيد...،
بخط يد
دريد طاقة....
..........................................
في احدى الدول الأوربية...
دريد: مر على جيتي اسبوع ومكدرت ليالي اوربا بأن اتنسيني عن التفكير بيها.. وهل وصلتها الرسالة..قرتها ..شكالت شنو الي فهمته من كتابتي الها... مداتحمل بعدي عن بغداد بالذات ..فلذلك گمت اتصلت (بالمعمل) اسألهم عن احوالهم وعن المنطقة
وبالاحرى اريد اسمع خبر عنها او عن احوالها...
...فقررت اكتب كارتات للاصدقاء والنزار ..واكتب الها هم ..بسسس بأي صفه واي اسلوب اكتبلها واني حتى ماعرف ردة فعلها يا لشدة حيرتي...
....ما أقسى العذاااااب
الوفاء والاخلاص وصدق الاحاسييس همه الي ايشكلون اقوى واصلب اسس للحب الحقيقي..
ورغم ماعرف بشعورها واحساسها ..وشنو اكون اني بالنسبه الها ؟
الا رغم كل اجواء اوربا مكدرت اتخليني ما افكر بيها ولو لحظه وحدة..
خيالها دائما كدامي حتى من اكون طالع مع الاصدقاء شباب وبنات منسيتها.. مرة صار موقف كعدت يمي احد البنات الاوربيات حجيت وياها باللغه العربيه وكعدت اعبرلها عن الي ايجول بفكري وخاطري(النبيلة) واني اعرف هي مدتفهمني ولا تعرف شنو احجي...بس ردت افرغ عن ما في داخلي ..
خلصت شغلي بالمعمل وطلعت ويه الاصدقاء راحو للسكن الي كاعدين بي واني اتمشيت ورحت عالبحر اريد اخلص من التفكير مداكدر فكري بيها وبعائلتي رغم اعرف نزار اكيد وصللها الرسالة بس قلق في داخلي مديهدأ.. دائما احمل حقيبة صغيرة بيها اشيائي جوازي واوراقي الثبوتية ودفتر مذكراتي كاعد عالبحر والجو شديد البرودة ..طلعت دفتري والقلم وكتبت هاي الابيات...
لكِ يا(نبيلة)
اراكِ من خلال نور الشمس.. وضوء القمر
بجلجلة النجوم..وهطول المطر
في الحجارة والكوخ..وجمال القصر
اراكِ شعاع قنديل..
غيمة صيف..
فوق كل نهر..
اسمع صوتكِ بتغريد الحمام..ومياه البحر
بهبوب الريح فوق الشجر ...
....................................
قريتها بروح موجوعة وقلب مكسور شيقصد بكلامة وليش ما اجه واجهني كل هاي المدة ولا حتى اجه ودعني او سلم عليه اذا هو صدك يحمل مشاعر بداخله اتجاهي...حتى امي ما اجه سلم عليها او انطاها خبر ليش هيج سوه مدالكه اي مبرر التصرفه وشنو يعني ميرجع بعد
هواي تسائلات بعقلي ومحد يكدر ايجاوب عليها غيره هو...؟
ابتسام: فتحت الباب ودخلت نبيلة بيدها الرسالة ودموعها تجري على خدها حالتها تقهر حتى العدو
نبيلة: شفتي راح حتى مكلي ولا انطاني خبر شفتي بسمه شفتي ..اشهك وابجي بصوت ..كلتيلي لتحكمين عليه لتستعجلين ميحبني دريد ميحبني
ابتسام: رحت حظنتها وهي تبجي ماعندي شي اكوله الها لان اني شخصياً اتفاجئت من تصرف دريد وليش حتى ايسافر بهذا الوقت تحديداً ؟؟
...كل شي بالحياة قسمة ونصيب ..وكلشي مقدر ومكتوب حبيبه...واذا الكم نصيب ايصير ..واذا ما الكم ميصير لا بكيفي ولا بكيفج والغايب عذرة ويا
اني ما اكلج عذري ولا اكلج لتضوجين بس مشفنا ولا نعرف بحالته ووضعه شنو ولا نعرف شنو الي جبرة
وخلا يتخذ هيج قرار وايسافر.. وبعدين يرجع فترة ويرجع وكلشي راح يتوضح
نبيلة: شنو اليتوضح حتى مكلي انتظريني ولا انطاني اي امل رسالته مشفرة مابيها اي شي معلوم..مادري اني الي مفهمتها ولا فهمت شنو قصدة
ابتسام: ميخالف وغزوان عبالك نسى السالفه ومفتح ويه امي موضوع زواجج اتأني حبيبتي وراج دوام بالكليه وانتظري كلها فترة تگضي ويجي وساعتها اني اخذج اله واخليج تحجين ويا
نبيلة: كمت مسحت دموعي وهزيت براسي.. اصبر بروحي مادري اواسي نفسي .. دودو اذا امي سألتج عني طلعي اي حجه حبابه ماريدها تاخذ نظرة عن دريد موحلوة..
ابتسام: ضحكت وگرصت خدها شذكرج ولج بهذا الاسم حتى اتندهيلي بي ...اتدللي امي عليه لتخافين
نبيلة: طبعاً بسمه اختي اسمها بالجنسية(دلفاء) بس اسمها صعب جان فأبوية الله يرحمة جان ايصيحله ابتسام على اسم امه الله يرحمها ومشى عليها هالاسم ..
مرت الايام ولكن لم تمر كمرور الكرام ابداً..
...كانت ثقيلة علية واشبه بالموت الحتمي لأن الانتظار شيئ مينوصف مر على سفرته شهر ومبقى شي على دوامي بالجامعه هالسنه اني مرحله اولى
رحت عالمسجل وخليت كاسيت عبد الحليم وطلعت اغنيه العندليب الي احسها صارت رفيقتي بهاي الايام
ورحت للشباك اباوع عالشارع وسارحة بتفكيري
ياترى هم اخطر على باله ..؟
أن لقاكم حبيبي سلمولي عليه..
طمنوني الأسمراني عاملة اي الغربه فيه..
سواح وانا ماشي ليالي سواح..
ولا داري بحالي سواح..
بالفرقة يا غالي سواح..
ايه الي جرالي سواح..
...................................
تقريباً مر شهر على بقائي في اوربا.. عملي جيد جداً واني حابه هوايه بس البعد والفراق مأذيني البعد عن عائلتي وعن اصدقائي.. بهاي الفترة وصلتني رسالة من نزار ايطمني عن احواله واحوال العائلة واخواني وامي لان الاتصال من العراق مكلف جداً للدولي.. الا وان المفاجأة اجاني احد العمال وگلي استاذ دريد اتصال الك...
دريد: خاف متوهم .. احتمال سمعت الاسم بالغلط
احد العمال: لا استاذ مرأة طلبت تحجي وياك بالأسم..
دريد: وانتابني شعور غريب وحيرة منو هاي المرأة .. رحت رفعت السماعة الا وان يجيني صوتها ..
ام غزوان: دريد وليدي يوم شلون احوالك ليش هيج لا تسأل لا اتكول ورحت حتى بدون متودعني
طمني عنك وعن صحتك
دريد: الغاليه ام غزوان الحمدلله بخير اني انتو احوالكم شلونكم بناتج شلونهن ان شاء الله بخير..اسعدني اتصالج بالله..
ام غزوان: زينين داده زينين بس والله اسأل عليك نزار وايطمني ايكلي اتواصل ويا بين فترة وفترة واخذت عنوان المعمل ورحت واخذت الرقم منهم
واتصلت من الهاتف العمومي
دريد: اهلاً وسهلاً بيج وبصوتج .. طمنتها عليه وسلمت وراحت بس ما اجتني الشجاعه اسأل عليها مردت تاخذ نظرة وبأي صفه اسألها
ولكن سماع صوت اي فرد من العائلة يكون بمثابة
صبر لي ويخفف من عذابي...
حسيت بكلامها وسلامها كأنها ام وملهوفه على ابنها ام غزوان امرأة اصيلة ووفيه ومخلصه .. فهل يعقل بأن استغل ثقتها وابني علاقة وية بنتها هذا الدافع والمانع الوحيد الي ايخليني ما ابوح عن الي بداخلي...
شلون ابرر كل هذا الكلام الي بداخلي والاسباب الي متخلي (نبيلة) تفهمني بالطريقه الغلط..
......................................
.... بدء دوام الجامعات وباجر اول يوم الي اداوم بجامعة بغداد تربية (عربي) بس ما احس بشعور الفرح لأن جنت اخذ الدعم من دريد اثناء دراستي الاعدادية وجان الصبح يومية يجي من يم بيتنا واشوفه وايسلم وايروح هل يا ترى صدفه او شي مخطط من قبله...
شلون اعرف وهو مبادر ولا حجه وفسر هل يحمل نفس المشاعر او لا ... لو اني مدافهمه او ماريد افهمه اريدة يحجي بالطريقه المباشرة
نبيلة: كعدتني بسمه الصبح كمت بدلت وطلعت صبحت عليهم ...صباح الخير
ابتسام..ام غزوان: صباح الخيرات.. يوم ديري بالج والله ايوفقج حبيبه ان شاء الله ادعيلج اني يوم
نبيلة: حبيبي يوم اشكرج دعواتج هي الي مسهلتلي اموري.. كمت ودعتهم واتجهت بطريقي الى الحياة الدراسية الجديدة.. مر يوم طبيعي كأول يوم بالكلية محسيت بي ولا اختلطت بأحد فقط بعض البنات وكلام عابر
..رجعت للبيت صبيت غدة وبسمة كاعدة يمي واني احجي وياها... لازم من يجي هاي المرة احجي ويا وافهم شنو معنى الرسالة الدزها الي وببالي شغله اريد اخذ رأيج بيها!!
ابتسام: شنو هي اطربيني صارلج شهرين وانتي تحجين واتعيدين بنفس الموضوع ..كولي
نبيلة: قررت افصح عن مشاعري وحبي اله واشوف شنو ردة فعله ..!!
ابتسام: غللللللطططط .. دير بالج لتخلينه نخسرة بسبب طيشج اصبري احتمال بباله شي نبيلة لتستعجلين واتخربين كلشي ..اني واثقه بدريد ومتأكدة من عندة
نبيلة: مادري تفكيري مشوش بس مشتاقتلة هواي والله ... معقولة مراح يرجع خاف اتزوج هناك او حب وحدة موو شتكولين انتي
ابتسام: اني اكول كملي غداج وروحي نامي داده لأن راح اتجيبيلي الجلطة بهذا عقلج.. عفتها وكمت ادري حقها بس نبيلة عجولة واخاف تخطي خطوة اتخليها تندم بعدين..
................................
ابو محمد: حظر نفسك دريد راجعين للوطن الحبيب
دريد: الله ايبشرك بالخير صار شهرين مادري شلون صبرت واتحملت
ابو محمد: باجر ان شاء الله طالعين ..توصل لاحبابك بالسلامة ان شاء الله
دريد: الله ايسلمك يارب... فرحني ابو محمد من كلي راجعين لأن اني جنت مقرر اذا متأخرين اهنا اكله ارجع وحدي بس الحمدلله... راجع العائلتي واصدقائي ومنطقتي الي رغم تركي للعمل الا اني بعدني احبها واحب اللتقي بيها
.... رحنه للمحطه ناخذ قطار حتى انروح للمطار ومن ثم الى العراق الحبيب.. السفرة طويلة ومرهقه بس كل شي ايهون من اجل لقاء الاشخاص النحبهم والغالين على قلوبنا
وصلت للعراق.. وسلمت على ابو محمد واخذت سيارة واتجهت الشارع الرشيد گبل مشتاق النزار ..نزلت اتمشى للمعمل وجنطه سفري بأيدي وصلت للمعمل دخلت وشفته واگف على راس العمال شافني وابتسمت عيونة واجاني...
نزار: ابن العممممممم ..حظنته وكسرت ضلوعه مشتاقلة دريد اخويه وصديقي مو بس ابن عمي
دريد: ضحكت واتبادلنا الاشواق وسلمت على ولد عمي والاصدقاء ..ودار بيناتنا حديث عن سفرتي وشنو الي صار ويايه وليش اتأخرت واني استرسلت بالكلام على كد السؤال محجيت التفاصيل تعبان..وبس اريد اعرف اخبارها
...نزار امشي جوعان وراسي يوجعني اريدلي استكان جاي..طلعنه ورحنه العگدة ابو الجبن مشتاق للمخلمة مالته..اللتقيت بالمعارف وسلمت عليهم واتبادلنا الحديث كعدنة اني ونزار طلبنه مخلمه وجاي..وسألتة
دريد: نزار شلونها..؟
نزار: مشايفها من يوم الاجتني هي واختها بعد سفرك بمدة قصيرة وسلمتها الرسالة بعد معتبت السوگ ولا اجتي ..بس دتداوم كليه مرحلة اولى بجامعه بغداد تربية طلعلها
دريد: شصار على سالفه زواجها هم سمعت شي مخطوبة كلام منو الي جاي على اخوها ورايدها
نزار: لا ماكو هيج حدث صار بس مريتلهم اكثر من مرة وشفت امها واختها هي ماكو مشفتها اسأل عليها ايكولون زينه وملتهيه بالكليه
دريد: خير ان شاء الله.. انت امورك اخبارك خلي اكمل واروح مشتاق الامي والولد
نزار: همزين سألت من اجيت وانت واكع تحقيق ماعندك غيرها يالدنييييا ...
دريد: ابتسمت .. وكملت الاكل واتجهت للبيت وسلمت عالاهل واخواني وجايبلهم هدايا شغلي هذا احسن بهواي من المحل الحمدلله ان شاء الله اكدر اخطي خطوة ايجابية للأمام ..
..........................
داومت اليوم بس احس نفسي مخنوگة وعندي امتحانات الكورس الاول ويادوب مدبرتها لأن ما الي واهس بالدراسة تفكيري مهدء من يوم الراح
...امشي بالكلية واللتقيت باحدى الصديقات ومن نفس المنطقة سلمت عليها وعزمتني عالنادي كالت تعالي ناكل ونسولف بين متبدي المحاظرة ..رحت وياها مع العلم مو دائما احظر الجمعات الي بالكلية
...رحنه كعدنة وويانه ولد من القسم وابنيه بقينه انسولف وطلبنه لفات وشربت اني مالي نفس بس محبيت اردهم
سناء: صدك نبيلة عرفتي بدريد رجع من السفر..!؟
نبيلة: اختنكت بالشربت وبقيت اكح ..سحبت كلينس ومسحت حلكي..
سناء: الله الله يمعودة شبيج على كيفج..
نبيلة: منو گلج اقصد شلون عرفتي وين شفتي.. احجي بدون تركيز ردة فعلي چذبتهم .. احم مو تدرين دريد قريب علينه وامي دوم تسأل عليه
سناء: اي صح صارلة يومين امي ملتقيه بام دريد وكلتلها رجع من السفر وفرحانين بجيته
نبيلة: خير ان شاء الله الحمدلله على سلامته..اني اروح مبقى شي للمحاظرة من رخصتكم... قلبي ينبض بسرعة معقولة رجع معقولة صارلة يومين واني مادري زين ليش ما اجه علينه ليش ما اجه شافنا وشاف امي .. امشي بسرعه محسيت الا واني بباب الجامعه طلعت اخذت سيارة وكتلة
نبيلة: الشارع الرشيد المعمل الجلود!!
.................................
مر يومين على جيتي للعراق مرحت للشغل اجازة اسبوع استراحه من السفر بس يومية الصبح اروح يم نزار للمعمل... طلعت الصبح اتمشى ومريت من يم بيت ام غزوان دكيت الباب وطلعتلي..
ام غزوان: يا داده دريد!!! الحمدلله على سلامتك
نورت بغداد يوم شلونك شلون صحتك شوكت اجيت
دريد: الله ايسلمج منورة بأهلها والله مصار يومين بس تعبان عذريني ما اجيتكم ..شلونكم اخباركم.. ان شاء الله نزار معافكم
ام غزوان: الحمدلله يوم بخير الله ينطي العافيه كل فترة يجيني ويسأل.. والله اسأله عليك وايكلي اخبارك واني مكدرت اخابرك بعد
دريد: معذورة خاله معذورة البنات شلونهم
ام غزوان: ابتسام جوة ونبيلة بالدولم للظهر يلا ترجع ..هسه تفرح بشوفتك سألتني عليك قبل ايام
دريد: ان شاء الله.. اني اترخص امرلكم بغير وقت ..سلمت وكملت دربي لازم الگالي طريقه احجي وياها صعدت واتجهت النزار... اخذتة ورحنه للمقهى
بقينه نحجي وانسولف بأمور طبيعيه.. ها شبيك شو صفنت نزار ...نزااااار وين اتعاين انداريت على الجهه الي ايعاين عليها
نبيلة: نزلت الشارع الرشيد ورحت اتمشى للمعمل وصلت سألت عليهم العامل گلي قبل شويه طلعوا راحو للمقهى.. طلعت ورحت عليهم وصلت واشوفهم من بعيد كاعدين نزار مقابيلي ودريد ضهره عليه بقيت واكفه اباوع نزار شافني.. بقيت واكفه الحد مندار عليه
.... لا اراديا نزلت دموعي وابتسمت ماعرف هل فرح ام خيبة ام خذلان بقيت امشي على كيف هو كام من الكرسي ووگف
دريد: گلت بصوت خافت وصدمة ..نبييلة؟ اجتي تمشي ودموعها تنزل وابتسامه محتلة ملامح وجهه وعيونها الجوزيه التلمع
نبيلة: رفعت ايدي مسحت دموعي وحجيت بغصه.. شلونك الحمدلله على سلامتك
دريد: الله ايسلمج انتي شلونج .. المكان مو مناسب تعالي نتمشى الشارع النهر ..نزار من رخصتك
نزار: اخذ راحتك ..
دريد: رحنه نتمشى وطلعنه من يم مكان المقهى كلها تعرفني ومو من اللائق نبقى واكفين بالشارع ونحجي..اتمشينه وگفنه عالجسر ...شلونج نبيلة ليش هاي الدموع صاير شي شنو الي جابج
نبيلة: اجيت اشوفك اجيت اريدك اتفسرلي شنو معنى الرسالة رحت وخليتني بحيرة من امري
والتفكير ذبحني..واني يومية احسب الثواني الجيتك حتى اللتقي بيك
دريد: ما اريد اخسر ثقه الوالدة بيه لازم اترجعين للبيت مو وقته هذا الكلام غلط احد ايشوفنا سوة
انتي اتهميني وسمعتج مهمه عندي روحي ووعد مني راح افسرلج كلشي بس مو هسه ..
نبيلة: شوكت لعد دريد شوكت ..
دريد: مو هسه كلت تعالي اخذلج سيارة ..وانتي شنو مو عندج كلية شلون اجيتي؟
نبيلة: عفت المحاظرة وطلعت واجيت اشوفك.. قصدي يعني اسلم عليك
دريد: ابتسمت على برائتها وعالخجل المستحل ملامح وجهها.. اخذتلها سيارة وصعدتها وراحت واني رجعت للمقهى لكيت نزار على كعدتة..
نزار: اي الوجه ورد والضحكه بينت ... لقاء الاحباب
قابل احنه اتعوفنه واتروح
دريد: نزار مو وقتك اسمعني.. اجتي تسألني عن الرسالة شلون راح افسر احس نفسي خاين ثقه امها..شلون بهذا التفكير الميعوفني
نزار: لتخبلني دريد احجي واعترفلها وفضني ترى طولت السالفه وكبرتها وهي ميرادلها..الي ايشوفك ايكول بحياتك محاجي ويه بنات وانت نص بنات المنطقه مبجيهن
دريد: بعد بعد افضحنه.. جايبلها هدية ويايه باجر اروحلها للكلية ولازم اخلي النقاط عالحروف...
.... قررت قرار حازم باجر اروحلها واحجي وياها واشوف شنو رأيها وقرارها بيه...وصلت للبيت وكعدت ويه العائلة واخواني نازلين من الجيش استراحه كاعد يمهم بس تفكيري كله يمها... وباللقاء الي راح يجمعني بيها
....بخط يد دريد
أراكِ لوحةً زينت معرض الصور..
أراكِ تبتسمي.. تجلجلي..
وأنا وحدي بعذابي اواجه القدر...!
....صار الوقت بدلت وطلعت اتمشى وگفت بالركن الي ايطل على فرعهم انتظرها تطلع ..شفتها من بعيد تمشي وتتلفت بس مخليتها اتشوفني شفتها طلعت واني رحت النزار خلي اتمر ساعه واروحلها ... مر الوقت واني على اعصابي خلصت باكيت چگاير من التوتر والقلق ..
وكانه موعدي الاول..؟
وصلت للجامعة وبقيت انتظر برة واراقب الطريق حتى تجي لأن هي عندها امتحانات واني جايبلها مدالية تنلبس بالرگبة من اوربا هدية ومقرر انطيها الها اليوم..لاني سبق وان وعدتها بأن من اسافر اجيبلها هديه قبل لا اشعر بحبي الها حتى اكون وفيت بوعدي وجبتلها.. وجبت وحدة ثانية الاختها حتى امها متشك او تاخذ نظرة علية واتكول ليش بس هي جابلها بس هي مداليتها مميزة ومختلفه...
ماريد اخسر كل شي بمصارحتي الها ولا اريد اخسر علاقتي بعائلتها ..لازم اصارح امها بشعوري وحبي النقي اول ..
...اجتي شفتها من بعيد تمشي وتلتفت رفعت ايدي واشرتلها شافتني اجتي تمشي واللهفه واضحه على وجهه...
نبيلة: مساء الخير... شلونك صارلك هواي واگف...اتأخرت عليك
دريد: ضحكت وكتلها.. على كيفج مصارلي هواي ومستعد انتظرج عمر كامل مو مجرد دقائق.. اعاينلها خجلانه ونزلت نظرتها تتلاشى نظراتي الها..تعالي نوگف على صفحه ونحجي مراح ائخرج..
.... انتبهت عليها لابسة مدالية بيها صورة احد المطربين ... ماعرف شلون طلعت مني وكلتلها.. هاي المدالية الابستها مو حلوة متليق بيج
نبيلة: رفعتها بأيدي وكتله.. ليش مو حلوة عجبتني واشتريتها
دريد: برأيي مو حلوة ...منطيتها المدالية ولا كلتلها وما اعرف ليش هيج اتصرفت بس حسيت ضجت
.... نبيلة شنو فهمتي من رسالتي والمكتوب بيها؟
نبيلة: اريدك انت اتفهمني واتكلي شتقصد ..لتسألني لأن اني ماعرف شي ..
دريد: سلامتج بس كلام بداخلي وحبيت اكتبه الج ..اجيت اليوم لأن وعدتج اجي ونحجي وافسرلج ونيتي كل خير لتخافين.. ابتسمت بوجهه وهي بينت الراحه على ملامح وجهه..
...يلا تعالي نرجع سوة واذا احد شافنا وسألج كوليله اللتقينا بالسيارة.. مو دربي الكذب بس بعض الامور مرات تتطلب من عندنا نخفيها وصلنا للشارع نزلتها راحت البيتهم واني اتجهت البيتنا..
...............................
...فتت للبيت واني طايرة من الفرح... مرحباااا يووووووم ورحت بستها قووي... بسمممممة حبيبتي اشتاقيتلج اليوووم وهم رحت بستها همه صافنين عليه ومتعجبين وين يومية الكلمة كوة احجيها هسه احس بنفسي اريد احجي وما اسكت... حجت اختي
ابتسام: خيرج حبيبه اليوم شمسج عالية فرحينه وياج؟ واتأشرلي بعينها
نبيلة: ميصير واحد ايغير شوية مليت من الحزن والكئابة كلت اليوم اطلع من الي اني بي... جوعااااانه شطابخه يوووم
ام غزوان: يووم عساج دووم فرحانة ان شاء الله اذا ميطلع وراج شي بنتي واعرفج وراج سالفه مو خاليه..
نبيلة: رحت للغرفه حتى ابدل واتذكرت المدالية لزمتها بأيدي بعدين نزعتها دريد معجبته المدالية لازم انزعها اشتري وحدة غيرها.. اجتي بسمه فاتتلي تحقيق
ابتسام: تعالي كوليلي شبيج وضعج مو طبيعي بس لا اتخبلتي سولفيلي بسرعة شنو الي استجد وهيج اتغيرتي..؟
نبيلة: اجه بسمة اجه عبالج ما اعرف ادري بيج مقبلتي اتكوليلي حتى لا اروح واحجي ويا شفته بسمه شفتتتتتتتتته ... رحت اتمددت عالمخدة واللعب بشعري مبتسمة
ابتسام: انتي اتخبلتي وين شفتي وشلون اتروحيلة شلون لو شايفج واحد وموصل الغزوان هو كوة ساكت عنج لما امي انتي حتى كليه متداومين
نبيلة: مجاوبتها .. كمت بسرعة واتربعت وكتلها ... اكولج المدالية هاي معجبت دريد نزعتها اخذيها ما اريدها راح اشتري وحدة ثانية
ابتسام: لا انتي رسمي اتخبلتي مابيها مجال ...عفتها وطلعت نبيلة مدتكدر تتحكم بتصرفاتها وخايفه من نهاية هذا الطريق وين راح ايوديها..
نبيلة: رحت للكلية عندي امتحان فتت امتحنت وطلعت اللتقيت ببعض الاصدقاء نفس الروتين بعدين اتذكرت.. اكولج
شكرا لزيارتكم عالم روايات سكيرهوم
