رواية منار والبارود الفصل الثاني 2 بقلم مرج البحر

منار:::

الليل كوله افكر شلون عمو ابو مصعب خله هيج حل وابنه متزوج..زين ابنه موافق ع هالشي؟.يعني اني الصبح حجيت وياه معقوله ابنه بسرعة وافق ودز ابو يخطب..بعدين هو متزوج وعندة طفلة وزوجته خطيه شلون مفكرو بيها..وشلون راح اتزوج واداوم..بقيت طول الليل حسبة تاخذني وحسبه تجيبني..الى ان صار الصبح فكرت اروح للصيدلية..بس الصبح شفت احمد كاعد بالصالة مطالع ويه ابويه للمحل..واحنا نتريك كتله:

احمد شنو مريض اليوم ؟؟

لا منورة مو مريض..شنو مبين عليه مريض..!

لا بس مستغربة شعجب مرحت ويه بابا للمحل.

ها....مو هالايام معدنا طلبيات هوايه فكاعدين وساكتين بدون شغل فبابا كال انت الصبح ابقه بالبيت..والعصر نطلع سوه

ها...اي احسن شكو اثنينكم بالمحل اذا ماكو شغل

وصعدت لغرفتنا..افكر شلون حظ عليه بيوم الي اريد اروح للصيدلية احمد يبقه بالبيت وما اكدر اطلع..ومرن خمس ايام واحمد باقي الصبح بالبيت يربي شلون اروح للصيدلية خصوصا ابو مصعب العصر ميفتح صيدليته لان يداوم...بين اسبوع..واسبوع.. بالمستشفى ع الشفت المسائي..وبيوم السادس كعدت الصبح لكيت بابا واحمد رايحين رحت ركض للصيدلية..يربي هواية ناس بالصيدلية شلون احجي ويه عمو ابو مصعب..دخلت هو شافني كال:

ها..بنيتي..

عمو اكدر احاجيك

تعالي بنتي دخلي..

ودخلت..وكفنا نحجي والعامل يمشي الناس نصيت صوتي:.

عمو لخاطر الله شنو موضوع الخطبة..والزواج والله صار 6ايام افكر..و

بنيتي لاتفكرين ولاشي..هذا احسن حل ابوج اذا شافج بعصمة رجال بعد ميكدر يتحكم بيج..

عمو ..باجر دوامي..مو

اي عادي داومي..اني متفق ويه ابوج اداومين..

بس..بس عمو..ابنك يقبل اكمل..؟

بنتي معليج..بكولشي الج الصافي..انتي توكلي ع الله وداومي باجر ميصير خاطرج الله طيب. 

عمو بس ..ابنك..شلون وافق بسرعة يعني هو متزوج وعندة طفلة مو خطية عائلته..

منار زواج مصعب من بنت اختي بحكم المنتهي..لتفكرين بهالموضوع اني ارتب كولشي..

بس..عمو...

لا بس ولا شي..روحي هسه للبيت وخلي كولشي عليه..

وبعد لتجين للصيدلية ما اريد اخوج لو ابوج يعرفون انتي جايه لهنا..

ماشي..ماشي عمو راح اروح..

ورجعت للبيت..صح هو طمني بس اني كلبي ابد ممرتاح..لهلزواج..وثاني يوم داومت عادي صح اسمع حجي بالكليه عن اختي شهد بس ساكته اسوي نفسي ما اسمع واصبر نفسي اكول هيه سنه تخلص..شلون مجان..ورة 3ايام ماما كالت:

ابو مصعب دز الفلوس..العصر نطلع نشتري غراض وذهب وملابس..

يوم..اني ما اريد شي..راح ابقه لابسه اسود..

شوف المخبلة..لج وين اكو عروس لابسه اسود

اي مو كلتو ماكو لاحفلة بس عقد وكبل للفندق شسوي بالملابس. والذهب بعد

لج انتي ام نص عقل شنو هي الملابس والذهب بس للحفله لازم عندج ملابس جديدة وذهب وشغلات مال عرس..يعني مكياج وملابس نوم..هو زواج لو لعب. بعدين اني صح مااسويلج حنه بس بساعة كطع المهر اجيب خالاتج..وبناتهن وعماتج وبناتهن حتى يبطلن يتشمتن..وحتى يشوفن رجلج الجنه كمر ضاوي اريد تكتلهن الحسرة والقهر

ياااا..ماما هاي شدتحجين؟

اي..ولج اريد افوخ كلبي بيهن..واكطع لسان كل وحدة حجت علينه بالعاطل..وهاي احسن مناسبه..تخلي كلبي يرتاح..من اشوف القهر والحسد ماكل كلوبهن وعيونهن!

ورحنا العصر اشترينا ملابس طلعة وملابس نوم وداخليات ومكياج وذهب..تأخرنا هوايه صار المغرب واحنا نفتر بالمحلات..بس ملحكنا نشتري كولشي..ثاني يوم العصر هم طلعنا اشترينا بعد غراض احذيه ومناشف..ومعطرت واشكال ماما تجيب وتعبي بهالغراض..ورجعنا للبيت..بعد مخلصنا كولشي بس ماما كل ما تتذكر شي تنزل تشتري وتجيبة وتخلي ويه الغراض الى ان صار يوم العرس..الصبح ماما تريد تاخذني للصالون فكتلها:.

يوم ياصالون البس..اي نفنوف هو مجرد عقد ما اريد خالاتي وعماتي يشوفني..امكيجة ومبدلةشنو محتفلة واختي مصارلها كم شهر..

ولج دقيتيني غير عرسج وفرحانه بيه..وتسوين تسريحة ومكياج وبدله عقد

ياااا..يوم شنو تسريحة وبدلة كدام كرايبنا..تحجين صدوك؟!

انتي عبالج هينه عليه شهد ولج يوم اني اريد اكسر عيون الناس مو شغله فرحانين..

لا يوم..مستحيل البس بدله كدام كرايبنا..عود من يخلص العقد..اروح للصالون البس بدله عرس ومناك ياخذوني للفندق بسكته ما اريد احد من كرايبنا يشوفني بالبدلة اصلا..

طبج مرض

بالكوة قنعت ماما البس نفنوف..ومكياج خفيف..وشعري فتحته هو طويل وسرح ممحتاج تسريحة..وصار الظهر وعقدنا الشيخ بس مصعب مدخل يمي البنات استغربن ليش... العريس ورة العقد يم عروسته سمعت خالته تكول:.

يااااامصعب طلع ديجهز السيارةو الفندق لان هو البارحة نزل من الدوام فصارت الشغله استعجال باستعجال

بقن خالاتي وعماتي وبناتهن يحجن:.

ياااا..شنو استعجال..غير يجي حتى نشوفه..وين اكو عريس يعقد ويطلع..يعني احنه مراح نشوفه لان حتى زفه ماكو..هذا شلون عرس

ماما تشوفهن يتمضحكن ويتبسبسن..

فكالت:

اي..مستعجل متشوفنه سوه العقد والعرس بنفس اليوم خطية عندة دوام هو نقيب شكبرة شكدة..بالجيش 

خالتي كالت:

خو ياخذ اجازة زواج..

لا عيني ميكدرون بليا..هو الكل بالكل بدوامة. بعدين ع الجايات الايام هواية وتشوفنه لرجل بنتي..همزين مدخل لهنا اخاف عليه من عيون الناس اي الحسد مذكور بالقرآن!!

اني بكلبي اكول همزين مسمعت كلام ماما ولبست بدله جان تفشلت بعد اكثر..ورة ساعتين راحن خالاتي وعماتي لان ابو مصعب خابر كال راح يجي ياخذني اني ورفل..وماما للصالون..

فرحنه البنات بالصالون سونلي تسريحة تأخرن بيها لان شعري حيل طويل وسرح ومياخذ لف..فترسن شعري ماشات ومثبت..ولبست بدله بيضة ماما راحت اجرتها..ومكياج كولش حلو معرفت نفسي بالمرايه جانت... خالة مصعب ويانه بالصالون لان ام مصعب متوفية..بس خالته حيل جامدة صح مرة حلوة او وقرة بس حيل جامدة وجهها ميتفسر..تباوعلنا من جوة ليجوة عبالك مراضية..ومن خلصت..اتصل ابو مصعب كال مصعب جاي ياخذجن للفندق بسيارته..مدري ليش انقبض كلبي..ونبضي صار سريع..كمت استغفر..وقريت اية الكرسي حتى اطمئن

لبسوني برنص ابيض مستور فوك البدلة لان البدلة شوية مكشوفة..وطلعنا حتى مباوع بوجهي..بس سمعت صوته::

بس امها تروح ويانه للفندق..

ماما كالت

ياااا..وبنتي رفل شلون ترجع وحدها للبيت خلي تجي ويانه..

كلت بس امها تجي!!!

وحاجة خالته..

خاله ام قيس اخذي تكسي رجعي البنيه لبيت ابو احمد وبعدين رجعي لبيتج..

ماما هزت ايدها لان هي واكفه وراه وكالت:.

ليش عمه مصعب..                                                   

مثل مكلت..بس امها تجي ويانه!!

بكيفك عمه

انتظرن راح اجيب تكسي

وراح يوكف تكسي ماما كالت لخالته:

شبي مصعب شو صاير عصبي ويحجي بنتر ويتأمر علينه؟!

هههه..هو هذا مصعب بارود لتشوفنه حلو وعيونه مثل عيون البزون ترة مينجرع..لو اعرفة ينجرع من زمان انطيته وحدة من بناتي!!!!؟؟؟؟

تحجي بشماته بس ماما شاورتني

معليج بحجيها مبينه غيرانه وكاتلتها الحركة كولهم الرياجيل عصبيين الشاطرة التسايس الرجال بعقلها..افتهمتي بنيتي.

اي يوم..!!

وجاب التكسي وراحت خالته ورفل فتحلنه باب سيارته وكال

اصعدن..

صعدنا بالورة وهو يسوق..

حيل يخوف..محجه طول الطريق ساكت وماما تشاور بيه وتوصيني اصير عاقلة وهادئه وتكولي شوفيه لرجلج شلون جمال وجسم وهيبة..اكسبيه بعقلج ولسانج الحلو..بس اني حيل كلبي مقبوض منه وادعي رب..العالمين يكضي الليلة ع خير..وصلنا للفندق صعدنا فوك دنمشي بالممر لغرفنا امي نزعتني البرنص بقيت بس بالبدلة والبركع تمنيت منتزعني وابقه مغطية صدري ومتوني بس هيه بسرعة وخرته..دخلنا للغرفة..

هي حاجته:

دير بالك عليها بعد عمتك..

سمعته كال..باستهزاء

ههه..اي ادير بالي ليش ما ادير بالي.

وطلعت..وسدت الباب اني كاعدة ع الطرف مال الجرباية.

هو اجه كعد كبالي اني مدنكة..هو طلع جكارة سمعت الطكة مال جداحته اخذ..نفس وكال:.

اسمعي..لج...اني البارحة نزلت من دوامي..لكيت ابويه خاطب وداز مهر..وحجالي ع ظروفج اوضعج كوله..ولان ما اريد اكسر حجاية ابويه وافقت وهسه مضطر اكعد كبالج يعني زواجنا مو مثل ما انتي مفكرة..يعني زواج كلاوات..مجرد شفقة وعطف عليج من جانبي ومن جانب ابويه الى ان تخلصين كليتج..وكولمن يروح بطريقه..والا..شاب مثلي..شنو يجبرة يتزوج وحدة اسم عائلتها على كل لسان وسمعتهم زفت؟؟!.فصيري عاقلة..ولتفكرين بيوم من الايام راح اصير رجلج من صدوك..راح تعيشين ابيتنا..انتي بغرفة واني بغرفة وما دام اني بالبيت مدخلين لغرفتي بوجودي نهائيا..ولا عبالج..اني..امشي بالمسايس ويوميه تلبسيلي احمر واخضر وتغريني ويصير زواجنا صدوك..لو مو اطلعين منار..لو ملاك نازل من الجنه كلبي مراح يرف عليج..لان اني..عندي المرة متسوة فلس..وتعرفين اني متزوج قبل ومرتي صارلها سنه ونص عد اهلها وممهتم وما افكر ارجعها..ومثل مكتلج هذا قيطان حذائي عندي اهم من اي مرة..افتهمتي!!

بس اني محجيت لان صوته جان حيل يخوف جنت بالكوه ابلع ريكي همزين البركع ع وجهي بعدلي شويه وابجي وسمعته يكول:

افتهمتي!

مكدرت ارد

اشو هذا رأسا شمر الجكارة وادنه يمي رفع البركع ولزمني من متوني حيل..وصرخ بوجهي:

لج اني محد يكتلني بالسكته من احجي تفتحين اذنج زين..ومن اكول افتهمتي تكولين اي افتهمت!!!

رفعت راسي شفت وجهها عيونه صح زرك وكبار وحلوات..ووجها..عبالك وجه ملاك..بس عيونه بيهن عصبيه الدنيا كولها..عبالك حياكلني..فكتلة:

اي...اي..اي..فهمت..واطمئن اني ما افكر بهالشغلات..

فرأسا هدني وضحك..باستهزاء:.

ههه..طبعا متفكرين بعالشغلات ..لان عندج بدائل!!!!!!!

شنو..شكلت مفهمت!

سمعتني شكلت واني ما اعيد الحجاية مرتين!

هذا شبي شيحجي ليش هالكد عصبي بعدين شدعوة هالغرور اشايف نفسه...فكلت:                           

شنو تقصد بدائل..

فغير الموضوع..وراح كعد فتح السليفون مال الاكل وكال:

كومي للحمام..بدلي سلاباتج..بينما..اتزقنب

رحت بسرعه فتحت الجنطة الي خلتها ماما يمنه لكيتها مخليه سيت مال نوم وملابس داخليه وتنورة..وبدي وبنطرون ابيض وقميص وردي..ههه ع اساس البس السيت انام بي والصبح من نرجع للبيت البس لو التنوره لو البنطرون اخذت التنورة بعدين فكرت انام بالبنطرون احسن لان اخاف اتكشف من انام..ودخلت للحمام نزعت البدلة....

والبركع..اباوع ع نفسي بالمراية مدري. شبيها عيوني كامت تجري دمع..هو يكول شاب مثلي ليش يتزوج وحدة سمعه اهلها ع كل لسان..وبعد شكال عندج بدائل..شنو يعني بدائل شنو قصدة بعدين اني شمسويتلها ليش هالكد محتقرني..ماشي ..يعطف ويشفق عليه ويريد بساعدني حتى اخلص كليتي امنت بالله بس ليش عصبي..ليش يحجي ويايه باستهزاء اباوع ع زنودي صارت طبعات اصابعه بيهن لان بشرتي حيل بيضة وبسرعة يبين بيها الاثر وتصير حمرة يعني من اول يوم هو هيج يعاملني لعد الايام الجايه شلون راح تخلص وياه..غمضت..عيوني رجعت صورة ملامحه وعيونه الزركة الي بلون السما جو جفوني..صح..شاب يخبل واي وحدة تشوفه احتمال تكتل نفسها عليه بس طبعه زفت..اسود من الزفت..ههه..عبالة افكر اغري لو اريد منه زواج من صدوك اصلا همزين طلعت منه الحمد لله والشكر هو ميفكر يتقرب عليه سنه دراسية اخلصها اتخرج من كليتي وارتاح وانفصل عنه وبلكي الله ضاملي قسمه احسن منه ع الاقل ابقى محتفضة بنفسي وابقة بنيه الى ان يتزوجني واحد يستاهلني..ميخالف الله كريم اصبر عليه وعلى عقليته الزبالة الى ان الله يفرجها...

مسحت دموعي وخرت الماشات اوف شعري يلزك من المثبت الحمام دافي فتحت الدوش وكفت جواه سبحت بسرعة ارتاحيت شعري نزل..غسلت وجهي حيل حتى يروح المكياج بعدين لبست ملابسي بنطرون ابيض وقميص وردي. طويل..ومسحت وجهي كوله المكياج وخرته بس.... بقت شويه كحله بعيوني..

وكمت امشط بشعري تعبني لان تخلبص..من التسريحه خلصت بس ما كو قراصة عندي..فكرت اشيلة بماشات بس قبل ما اشيلة سمعته يكولي:.

مدام شنو حتبقين بالحمام للصبح خلصت زقنبوت وانتي بعدج..اني هم اريد ادخل اغسل ايدي..

الفصل الثالث من هنا 

شكرا لزيارتكم عالم روايات سكيرهوم