رواية منار والبارود الفصل الثالث 3 بقلم مرج البحر

منار:::

سمعت صوته عفت شعري مفتوح وفتحت الباب وكف كبالي يباوع عليه من فوك لجوة بعدين كال:

روحي تزقنبي

عفته دخل للحمام..اول مسد الباب غميته:

وكلت بكلبي 

عابت..شكد مكروه..

وره خمس دقايق طلع لكاني كاعدة ع القنفة الزغيرة البصف الجرباية زمخ بيه:

مو كتلج اتزقتنبي..

كلت خلي اسكت ممجبورة ارد عليه اني ما احب هيج اسلوب فبقيت ساكته..اشو هم اجه لزمني من متوني حيل..وزمخ بصوت اعلى:

اني مو احجي وياج..ليس متزقنبتي؟؟

رفعت راسي هم صارت عيوني بعيونه دنكت كتلة:.

مجوعانه ما اريد اكل..

لا اشو اله تاكلين!                                                  

كتلك مجوعانه شنو اكل بالكوة..

اي تاكلين بالكوة

ما اريد!

ضغط ع زنودي حيل وكال:

شوفي لج الكلمة الي اكولها تنفذيها وانت الممنونه وما احب اعيدها مرتين افتهمتي..                                   

اي..اي..راح اكل بس هدني..دتوجعني..

هدني وكال:

اي عفيه ...يالله كومي مثل الحبابة تزقنبي ونامي..

رحت كعدت يم الاكل..بس مكدرت امد ايدي شلون اكل وهو ديراقبني مثل الصكر..شلون امد ايدي استحي..

شنو ناويه تاخذين صورة للاكل..يله اكلي..

اي هسه اكل بس لتباوع عليه..

ههه..ما اباوع عليج..ليش عيني..عندج طقوس خاصة بالاكل..!!

لا بس انت دور وجهك واني اكل..

هههه..بدت خبالاتج..ماشي اني هم تعبان راح انام اكلي وانطمري..

شفته راح تغطه بالبطانيه فرحت بصراحة اني ميته من الجوع لان حتى غدة متغديت..اليوم كعدت اكلت الدجاجة كولها والفواكه..وشربت العصير كوله حسيت نفسي شبعت..اكول لنفسي هو شبع وانخمد عليش ابقة جوعانه اني هم خلي اشبع وانام قابل هو احسن مني!!

بعدين غسلت اديه اوف مجايبه الفرجه والمعجون بقن بالجنطة الجبيرة..بالسيارة...تمضمضت بالصابون السائل ورجعت..اكو بطانية باقية يم رجليه اخذتها ونمت ع القنفة.هو جان رايح بسابع نومه..اني جنت افكر باجر من... اروح لبيتهم شنو البس تذكرت ماما جايبتلي شلون نفانيف مال بيت الي قصير والي ضيك..والالوان احمر..وجويتي..وبنفسجي واصفر منقط بعدين اني بيضة ومليانه واذا البس هاي النفانيف لو التراكات راح يفكر اني اريد اغري..لا ابد مستحيل البسهن كدامة ماما بطرانه عبالها زوجنا راح يصير من صدوك واكدر البس هيج اشياء كدامة وتذكرت من كال موعبالج تلبسيلي احمر واخضر وتغريني..هههه..اني اعلمه يدلل والله الا البسله اسود والبسه واحسسه انه هو ميهمني ولا اتقبلة بعيشة الله هيج واحد مغرور وعقليته مجعمرة ميفيد وياه غير التجاهل..وقبل جنت اسمع بيبيتي الله يرحمها تكول الحكران يكطع المصران..واني اعرف شلون احتقره..نمت..كعدت ع صوته 

يله خاتون كعدي الساعة بالتسعه..امج اكيد منتظرة بره..منعرف تريكت لا!!

اي..اي كمت غسلت وجهي ومشطت شعري بالحمام لكيت الماشات بمكانهن شلت شعري لفيته ع شكل طوبه وثبته بالماشات..وطلعت لبست حذائي لكيته منتظرني فتح الباب دك باب الغرفة مال امي طلعت:

شنو عمة شو بعد مطلعتو لاكلتو هالمرة تعشت تريكت!

فكال:

وصيت يصعدولج عشه عمه شنو مجابولج!

لا جابولي خلفلله عليهم بس شو محد طلع منكم...

فهو كال

انزلن جوه للمطعم مال الفندق اني دقيقتين وجاي وراجن

بعدنا دنمشي بالممر امي سألتني:

ها ولج منار بشري شصار مصار كلبي يمج..هذا مبين مينجرع مثل مكالت خالته !؟

شنو شصار مصار مفهمت!.

اوف تغشم روحها يعني شغلتكم خلصت لا!!

فكرت خلي اكولها خلصنا حتى متضل تسأل:

ها..اي..اي يوم خلصت الحمد لله..

يا..صلوات..صلوات..وشلونه جان زين وياج!

اي..زين يوم هسه شنو هالاحراج كتلج خلصنا وهاي هيه اني استحي بعد لتسأليني..

اي ما اسألج يله الحمد لله والشكر!

وصلنا للمطعم كعدنا ع الكراسي اني كتلها:

ماما ملابسي مال البيت السود من ترجعين للبيت ادزيهن الي كولهن بيد رفل لو بيد احمد.

يااااا..اسم الله ملابسج السود ليش..بعدج عروس..

مثل ما اكولج يوم..دزيهن الي اني اتفقت ويه مصعب ابقة حزينه ع اختي الى ان ادور السنه..

ياااا..صدوك مخبلة تريد تشرد الرجال

لتخافين مينهزم..اصلا هو يكول ما احب الالوان احب اللون الاسود..وكلي انتي بيضة ويلوكلج الاسود..

هذا شلون حجي..شنو تلبسين اسود..

يوم رجاءا دزيهن ليش تخليني هسه ارجع للبيت المهن...

كولهن واجيبهن..

هي شافته اجه..كالت:.

اسكتي هسه اجه رجلج ادزهن كولهن بيد رفل بس ارجع للبيت..

كعدنا تريكنا شلت راسي لكيته يباوع عليه رأسا التفت سوه..نفسه يباوع بغير مكان..خلصنا ريوك ماما كالت:

عمه تضلون بالفندق كم ليلة لو ترجعون للبيت..اذا تبقون اني ارجع لان رفل مدبرها وحدها متعرف لاتطبخ ولاتنظف

لا عمه هسه راجعين للبيت..

لعد وصلوني وياكم..

وصلنا ماما..ورجعنا..دخلنا لكينا عمو منتظرنا ويمه طفله يمكن عمرها 4سنوات..

سلم علينا وشفت مصعب نزل الجنط من السيارة خلاهن بالصاله فعمو كله:

صعدهن فوك بغرفتكم بابا..

يابه وين اصعدهن منار هنا راح تنام بغرفة ملوكة..وتخلي ملابسها بنفس الغرفة بعد شكو مصعدهن:

بابا هذا شلون حجي..

هو هذا الحجي الصح واني هيج اتفقت وياك ووياها.

باوعلي عمو..

اي عمو هنا خليهن راح ابقة بهاي الغرفة الجوه

بكيفكم بابا..اني رايح اودي ملوكه لامها..

باوعت ع الطفله حليوة بس شعرها ممرتب..وملابسها مخربطه كعدت بصفها عمو كلها:...

سلمي على خاله منار..هي ادنت..باستني..اني هم بستها فدوة شلون طفله بريئة..سمعت مصعب يكول:

يابه اليوم اخر يوم ادزها لبيت عمتي قبل حجتنا معدنا احد بالبيت يدير باله عليها هسه منار صارت هنا هيه ادير بالها عليها

بابا البنيه هم عدها كليه ودوام..بعدين منو يكول عمتك لو امها يقبلن تضل عدنا طول الوقت..

يابه كتلك بتي تبقى هنا..واذا امها تريد تشوفها عود دزها كل اسبوع تبات يمها ليلة وترجع..

بابا حرام عليك هاي امها شلون هيج تحجي..

يابه..انت تعرف..اني اكدر احرمها منها طول العمر بس لخاطرك ولخاطر عمتي ساكت واخليها تشوفها..

بكيفك بابا بس حضر نفسك لطلايب سوسن

انت روح دزها وفهم امها بهالحجي..واذا حجت بس خابرني اني اجي واعرف شلون اتصرف

هو يحجي واني افكر هذا شلون يحجي ويه ابوه ..عبالك يشتغل عنده كبر..ميحترم احد ويريد يحرم الطفلة من امها..هذا شنو من بشر..!!

عمو اخذ الطفلة وطلع وهو هم صعد بدل اني دخلت للغرفة الي كال عليها لكيت كنتور ابيض مال اطفال..طبعا مفتحت الجنط لان مراح استخدمهن بس خليتهن ع جهه وحدة فوك اللخ..وره شويه سمعت دكات ع الباب فتحته..شفته مبدل لابس بلوزه ماروني وبنطرون اسود كابوي..كلي:      

تعرفين اطبخين لو اجيب غدة من السوك..عادي احنا... متعودين ناكل من السوك اذا مبيج حيل لو متعرفين اطبخين خاتون!

لا..ليش تجيب من السوك جيبلي مخضر..واي شي تحبوا واني اطيخ..

اي ..زين عبالي نستلايه متعرفين اطبخين!.

لا مو نستلايه..اني اطبخ ع الاقل اشتغل اطبخ وانظف اعيش عدكم بتعبي ماكو داعي احد يتفضل عليه!

اي خوش تفكير عملي يفيدج ويفيدنا..

اكيد

شنو اجيب مسواك:

مخضر..وتمن وخبز..ما اعرف شنو عدكم بالمطبخ..يعني زيت ملح..هاي شغلات الطبخ..

كولشي اكو بالمطبخ لان ابويه مرات يسوي عشه بيده فعدنا هوايه شغلات للطبخ..بعد غير المخضروالتمن شنو اجيب..

بكيفك شنو تحبون اطبخ..لحم..سمج ..دجاج بكيفك!

ماشي

راح تقريبا ساعة عشرة ونص رجع جايب..مسواك طبخت..وره ساعة اجت رفل جايبة جنطة بيها ملابسي باستني وشبكتني وكالت رايحة للمدرسه وراحت..طلعت نفنوف اسود لبسته.اجه عمو..وراه اجه مصعب..عمو دخل كعد..وكال:

هاي شنو..ريحة الاكل الطيبة..

سويتلك مقلوبه دجاج عمو...

مصعب شفته صعد للغرفة عمو كال:.

اي..واخيرا راح ناكل اكل بي خير.

تدلل عمو

حضرت الاكل..وكعدت يمه سمعته يكولي:.

هاي شنو عمو ليش لابسه اسود اول يوم عرسج..

وقبل ما احجي حسيت..بمصعب واكف قريب يم باب المطبخ يسمعنا شدنحجي لان وجهه..مبين من..جامة الكاونتر..فكلت:.

عمو ياعرس..يا زواج انت تعرف كلش زين ماكو لاعرس ولاشي..مجرد انتو دتساعدوني حتى اخلص كليتي وبعدين كولمن يروح بطريقة واني اصلا جنت البارحة الصبح لابسه اسود وهسه مصار شي ارجع البس اسود عمو تره اختي مصارلها اربع شهور..

ميخالف بنيتي ...بس ميصير تلبسين اسود

لا عمو..يصير..اصلا اني..ملابسي مطلعتها من الجنط ولا راح اطلعها..واحتمال اخليها..على وضعها..حتى الذهب والمكياج ضميته بالجنط اني من اخلص كليه راح ارجع لاهلي كولشي ما اخذ منهن..

هذا شلون حجي هذا مهرج بنتي..

عمو كولشي ما اريد خلوهن احتمال تزوج ابنك ..بنيه ثانيه قابل ..ترجعون تشترون من جديد خليهن الكم وخلفلله عليكم ساعدتوني....

بس بنتي..

عمو لابس ولاشي اتغده هسه وشوف المقلوبه شكد طيبة..

وشفته اجه كعد كبالي اشوفه حيل تنزفز بس ساكت اي احسن خلي يتنزفز عباله اني بحاله والبسله كل شويه شكل لو بحال المهر الي دفعه..كبر اي والله كبر..صبيت وخليت كدامه وكلت:.

عمو اني باجر اداوم..لان ممداومة البارحة واليوم وتفوتني المحاضرات!

غير ماخذه اجازة

لا عمو..ارجع..اداوم مبيه حيل يتكومن عليه المحاضرات

بكيفج عمو ..

وكمت..

شنو متتغدين..

ها..اتغده عمو بس هسه مجوعانه..

اشوفه ياكل..بس وجه شايل كل غضب الدنيا بس ساكت ميحجي ياكل بسكته عمو خلص غدة صبيتله جاي. شربه وكال:

اروح للصيدلية الوجبه مال الادويه وصلت

طلع عمو..

بقه هو كاعد ع الطاوله ياكل ع كيفه وبس طلع عمواني كعدت بالصالة عفته بالمطبخ احسن البسه ما اريد اكابله..بس كعدت سمعت صوت اماعين تتكسر..ركضت للمطبخ شفته يغسل ع السنك..بقيت صافنه هذا شبي ليش كلب الاكل بالكاع الزوليه الدائرية الي جوه الطاوله صارت كولها دهن من المقلوبه..والتمن ترس الكاع..كعدت الم بالاماعين المكسرة وسمعته:

سويلي كهوة..

كمت سويتله كهوه احجي ويه نفسي شيخلصها ويه هذا الخبل..صبيتله كهوه وخليتها كباله بالصالة رجعت للمطبخ لميت التمن والكزازبالمكرافة...وخرت الكراسي وشلت الزوليه طلعتها بره..ونظفت جوه الطاوله بعدين اخذت المنظف طلعت بره جريت الصونده..اوف المي ثلج مال الخزان..نزعت شحاطتي ورشيت منظف ع الزوليه..وكعدت افرك بيها بالفرجه وحتى نفنوفي ميوكع بالمي صعدته..بقيت انظف بيها مأمنه لان هو ديشرب كهوه ولازم الموبايل اكيد مراح يطلع..رجليه ثلجت صارن حمر لان المي بارداشو دا اغسل رفعت راسي شفته كبالي عزة ..عززززة..زروري نصهن طالعات..وهذا مكابلني واكف يتفرج عليه بسرعة غطيت ..نفسي وكمت..جنت حيل مرتبكة ومستحيه لان شفته يباوع ع جسمي..شكد عيب..

انت..انت رايد شي..اصبلك بعد كهوة..

ادنه يمي..هم لزم متوني حيل..وكال:

مو شرط الالوان تغري..ترة الاسود يغري اكثر خصوصا ويه وصله بيضة مثلج..

اني..اني جنت انظف..لا اغريك ولابطيخ..بعدين انت كلبت الاكل ع الزوليه..

منار..من اول يوم اكولج بطلي هالسوالف؟

اي سوالف..

سوالفج! الحجي الي حجيته لبويه ..مال ما اريد ملابسكم وما اريد الذهب..وما اريد مهر..وخلوهن الكم احتمال..مصعب..

يتزوج مره لخ..تره اني قاريج..واعرف المرة تتمسكن الى ان تتمكن؟

هو يحجي واحس اظافرة ملخت زنودي تملخ..فكلت:.

اي ما اريد منكم شي..اريد اخلص كليه وبس وبعدها اعتبرك..كابوس..مر عليه وصحيت منه..

اني كابوس!

اكيد كابوس..

بكيفج..بس راح اتعبين هواية..اواعدج..

اعرف راح اتعب..واني كدها..ومراح ..اخليك تتشفه بيه..ولا انطيك هالفرصة

الفصل الرابع من هنا