رواية نعم أحببتك الفصل الثاني 2 بقلم انين الليل

بثينه 

انا وماما صبينه العشا نزلت منى اكلت شويه وبهاء اتعشا وظل يباوع على التلفزيون بابا يقتصر عشا على شي 

خفيف أكثر شي حليب وجاي وصمونه او شويه روبه وماما تخلي فوگه نعناع ورمان وامي همينه 

زيوني دائما من يجي يطلع ويه اصدقائه ساعات يتعشا برة وساعات يجي اي شي يأكله عائلتنه حلوه مو من هاي 

الي يتشرطون ع الاكل لا اي شي موجود ناكله الحمد لله انانظفت المطبخ وغسلت المواعين 

وخليت الجاي بالترمز وحضرت فاكهه وكرزات وقطع كيك من الي سوتها امي العصر بعدين 

صعدت اخذت دوش ولبست تراك طويل والقميص مال الأتراك همينه جوه الركبه تعليمات الماما 

وحطيت مكياج خفيف وخليت شكاله كبيرة بشعري ولبست شال طلعت نص شعري ورشيت عطري المفضل 

ولزمت النقال انا مسويه كروب ويه صديقاتي واسولف الهن على جيت بيت عمي وعلى كريمه

وابنها واكلهم 

= ادعن وياي يارب كون الساعتين يمضن على خير وهاي القوه الغاشمه ما تصددم وياي لان ما راح اسكت الها 

وظلن يكتب لي على خطط اشرد كريمه من تجينه من البيت واحنه نضحك وبيهن نصحني 

اسكتي عنها واحرگي گلبها بسكوتج 

وبيهن رايهن انو اخلي بالچاي مالتها فلفل حار وخليها تشرگ وراسا بدلي الاستكان بحجة تجيبين الماي 

واحنا نضحك ما احس إلا باب غرفتي يندك دكات خفيفه وشفتت ساهرة بت عمي وهيه تبتسم 

رحت الها بوستها وكلتلي

ساهرة/بثينه شكد بذات تعاي انزلي من يمته اجينا وانتي ماكو 

= اي سوسو هسه شويه ونازله 

ساهره //ليش هي الكعده تحلى اذا مو مناوشات انتي وكريمة عبالك شرايج

= سوسو تره انا فقيره الاتجاه المعاكس هو الي يتحرش 

ساهره /انتي فقيره وامي تكول انا فقيره تالي اتطلعن تاجرات وتملكن عمارات ويخوت وانا الفقيره بيچن

انا ضحكت لان احب ساهرة بس هي ملازمة آلامها وتخاف منها كتلها 

= وج لا تسمعج انوب تصيرين من الاعداء المناهضين 

ساهره /:اي ياالله انزلي مو تتاخرين 

حطيت الشال على منتصف شعري وبخيت نص قنينة العطر وحطيت علج بحلكي ونزلت كان الكل 

كاعدين بالصاله الداخليه ابتسمت وسلمت على عمي وبسته بخده وسلمت على كريمه وباوستها

انا عاوجه حلكي = هلاو اشلونج عمتو حبيبتي اشلون صحتج مشتاقه كومايات 

هي رادت تكوم انا كتلها = لا حياتي انتي اخذي راحتج انا (حچيتها بحرگه وانا ااشر على صدري )انا ادنك عليج 

انتي مقامج كبير عندي 

ودنكت عليها وباوستها 

كريمه بخبث/صايره حلوة يا مكموعه وعبالك سابحه بالعطر 

انا اتفشلت لان احس انغلط علي بس ما اكدر ارجع الغلطه كتلها وانا اتصنع ابتسامه لان احس وجهي فلت 

= عيونج الحلوات عمتو حبيبة گلبي بس انتي كلش متغيره خو مو مريضه 

كريمه بخبث /:اسم الله عليه ان شالله الي يكرهوني 

انا بكلبي واتصنع الابتسامه وارفع بايدي = ان شالله انتي ياربي (بگلبي )ابيش طالبتني

بعدين باوعت الرغد زوجة محمد وسلمت عليها وبست ابنهم الزغيراحمد وانا اگله 

= حبيبي حماده اموت عليك فدوه الخديداتك ما ادري هالجمال عليمن 

كريمه // ليش شبينه مو حلوين طالع على عمه اياد الي كل الي يشوفه يصلي ع النبي 

امي // اللهم صل على محمد وآل محمد الله يحرسه الشبابه

انا ما چني اسمعها سلمت على ابن عمي محمد 

= اشلونك حمودي

هلا بت عمي اشلونج شو تسميني حمودي تره رجال وشكبرني 

= من المعزه اگلك حمودي 

كريمه // اذا اتعزينه سمي ابو احمد 

 جريت نفس ولملمت حلگي وعضيت شفتي وانا اريد انفجر شفت إياد يريد ياكلني بعيونه 

انا من وره خشمي = اشلونك إياد 

اياد/فز عبالك جان نايم /هله بثينه اشلونج 

= الحمد لله زينه 

اياد شاب تقريبا وسيم طوله 180 وعنده عضلات متناسقة ويه جسمه حنطي وجهه مدور

وشخصيته كلش قويه ورزن بكلامه بس يمه من يصير عصبي ما يعرف أبوه انا ما شايفته وهو عصبي بس يكولون

 يصير وحش كاسر طبعا همه يكولون وهم لا تنسوون امه كريمه فاكيد يصير 😱😱😱

أما يوسف ما يجي وياهم لان تقريبا يوميه يشوف ابويه واخوي زيوني بحكم شغله ويه بابا 

انا بالنسبه الي علاقتي ويه زوجة يوسف نفس علاقتي ويه رغد بس امي تكول زوجة 

يوسف متكبره وشايفه نفسها 

كعدنا بالصاله بابا سأل على رياض// ليش ما إجه روضي وياكم 

عمي صابر كله //يگول عنده امتحان بقى بالبيت يدرس 

محمد //يا يدرس هسه لو لازم النقال لو البلي عبالك زعطوط 

عمي //ما عليه المهم يجيني ناجح 

رحت انا وساهره ورغد للمطبخ وجبنا الجاي والكيك والفواكه والمواعين سمعت بابا يسأل اياد 

بابا/اي عمي شلونك ويه الداخليه 

اياد ::الحمد لله زين بس تعرف كل عمل واله مشاكله واحنه ياعمي هم مشاكل وهم مسؤوليه والوضع تعبان وجاي 

تصير امور عمرنا ما سمعنا عنها 

بابا /الله يساعدكم ويكون بعونكم هي المشاكل تصير من زمان 

اياد:: عمي بس مو هيج وبهذا الشكل جاي نشوف مصايب تشيب الرأس بسبب الأوضاع مو بس عدنا الأوضاع تقريبا 

بكل مكان الناس عايشه بدوامه وما تعرف شتريد او شنو يصير بيهم 

بابا /بس انت دير بالك ياابني

اياد ::الله كريم اذا اجت محد يردها 

ماما /:اسم الله عليك عمه ايودي عمرك طويل 

كريمه /:شفتي وفيقه هو هذا كلامه عبالك جاي يفاول على روحه ما يدري اذا يصير بي شي اموت ورا 

اياد كام وباس راس امه ::اسم الله عليج ياست الحبايب بعد هيه معروفه كلمن ويومه 

كريمه //ما تعرف معنى كلامك منا لمن تتزوج ويصير عدك جهال ذاك الوكت عود احجي هيج 

ماما //صدوك عمه اياد ما تكلي شمنتظر هم يالله 

اياد يباوعلي ويبتسم ::ان شالله عمه عن قريب ان شالله

كريمه /احنا شماخذين منك غير ان شالله والله كريم 

ماما /خلي ام محمد براحته وهذا هو هالگال عن قريب الله يوفقه ويتممله كل خير 

اياد =تسلمين عمه 

كريمه //هذا نفس الكلام اگله يمه بنات الحلال هواي اختار من بنات خالاتك من بنات خوالك والله ايگبعوهن 

وينطوهن وبلاش لان يعرفون همه من ينطون ينطون الرجال بس هو ما ادري شمتاني يكبر بعد والله ما ادري 

بابا //امك عدها حق شد حيلك واتوكل 

اياد :...ان شالله عمي 

كان يتكلم بهدوء وهو بصورة عامه هادئ وصوته ناصي ومن يتكلم صوته رجولي رزن 

انا صرت اخلي قطع الكيك بالمواعين واحط الشوكه قدمت العمي ومرته والبابا واياد ومحمد

واحنه الي يعجبها شي تأخذ انا كعدت واخذت شويه كرزات مرت عمي وهي تأكل باوعتلي

كريمه /عاشت ايدج خوش كيكه 

انابابتسامه = بالعافيه عمتو بس ترة مو اني مسويتها هاي امي هي الي سوتها

كريمه بخبث / انتي يمه مو زغيره اتعلمي حركي روحج خلي نضوك اكلج 

تدخلت امي /يا ام محمد خليها تلحك تتعلم ملتهيه بالدراسة 

كريمه /اي بس لازم تتعلم تطبخ وتنظف وتغسل ملابس لعد دادا الياخذها شنو توكله كتب لودفاتر 

ضحكنا واحنه نسمع كلام مرت عمي 

كريمه باوعتلي //صدك عمه بثينه اتعلمي كل شي تسووين

انا كلت خلي احرك كلبها = عمه الحك اتعلم بعدين البنيه مو إله تعرف تشتغل خو يجيبلها خدامه اذاالتاخذه يحبها

ويريدها لو ماكو شسويله خلي ياكل كتب ودفاتر على گولتج 

كريمه /وانتي تردين الياخذح يجيبلج خدامه 

= اي ليش لا شنو عمه انا ما استاهل 

امي قطعت المشاجره وسالتها اشلون ام رامي سمعت تعبانه --ام رامي أخت كريمه --

كريمه بحسره //اي والله ام زين تعبت ارتفع ضغطها من وره رجلها 

انا ما سكتت = شنو عمه اكيد جان يريد يتزوج عليها وتخربطت 

هي باوعتلي وخزرتني تريد تاكلني بعيونها //لا عمه خطيه سووا حادث ومن كثر ما تحبه جا ماتت من القهر مو 

مثل بنات هالوكت صلفات وما يهتمن 

= خطييه ما تستاهل بعد عمه كل جيل واله محاسنه ومساوئه 

كريمه /:وشنو مساوئ جيلنا ومحاسن جيلكم بالله 

خليت رجل على رجل = مساوئ جيلكم عمه جانت الخضوع بكل شي واي شي يكولون علي اهلكم او ازواجكم 

تكولون صار بس هم مو كلهن سووا 

كريمه /:شلون مو كلهن سووا 

= عمه اعرف نسوان يممه الله لا يراويج ياعمه مسيطرات ع الرجال يعني مثل ما يكولون مسوياته زووج 

 وع الاولاد بحيث كل شي بكيفهن وهذن عمه يصيرن ما يخافن من الله يتمادن ويطغن 

كريمه /:ها ومحاسنكم شنو 

= احنا جيل ناخذ الامور بشفافيه وما ننطي الشي اكبر من حجمه يعني احنا فري هذا الشي 

ردنا سوينا ما ردنا ابتعدنا عنه مانافق على مود الواحد يكلنه عفيه وما نحشر نفسنه بكل شي 

محمد /:شنو اليوم نخلصهاسجال بين امي وبثينه 

= حمودي مو تدري عمه تحبني تموت علي لذلك دووم لو تلاشيني لو تفشلني وساعات تسالني وانا اجاوبها

وظلينه نضحك و نسولف انا والبنات وانوب صعدنا الغرفتي وانا احس انو اكو عين مانزلت 

من علي وانا احجي ويه كريمه واتعمد اهز رجلي جان اياد يباوعلي ويريد ياكلني بنظراته 

ورحنه نسولف بعدها نزلنه وكعدنا يمهم ابوي كال العمي 

صابر اليوم .بثينه سجلت دورة إعلام بالكليه يعني ويه الترجمه راح تصير صحفيه

عمي بعده ما حجى ما نسمع إلا صوت يرتجف ونبره حادة عبالك كريمه الي مسجله مو انا 😈😈😈

اياد ::شنو عمي وانت قبلت 

بابا /اي والله كلت احسن تستفاد

اياد ::عمي الله يخليك شتستفاد ترة دورة الإعلام تعب عل الفاضي بس تطلع وتمشي وتقابل ناس 

انا اتدخلت /كتله/ .=انا من زمان اتمنى أصير اعلاميه اسمع هموم الناس واوصلها للمسؤولين من خلال 

مقابلتي الهم شنو اياد انت ما عايش وشايف الناس شلون اتطورت

طبعا من حجيت ويه اياد خصوصا الجمله الاخيره حجيتها باستهزاء بس هو صار يتكلم بصوت عالي

اياد خزرني وجاوب ::اي ست بثينه عايش وشايف ويوميه تمر علينه قضايا خطف وقتل وسرقه 

اووومااكدر اكمل

اهنا القوه الغاشمه شاركت اياد بالهجوم عليه /يا تطور هذا التحجين عنه همده التطور الي يخلينا 

مانلزم بناتنه وما نكدر عليهن هو هذا تسمونه تطور هذا طياح حظ ......وهزت ايدها ......هذا مو 

تطور هذا تهور

محد رد على كريمه 

انا بعصبيه بس احاول ابين على طبيعتي = عمه كل من مقتنع بنفسه 

كريمه/اشلون بالله يمه فهمينه شلون كل من مقتنع بنفسه 

انا هدئت شويه ورديت عليها بس اباوع الاياد = مثلا احس باياد ابن عمي ما قابل او ما مقتنع بدورة 

الاعلام لان بيها طلعه وتحاجين الناس مع العلم بالوزارة ويا نساء يشتغلن وهو يجوز عادي

يتكلم وياهن ويجاملهن لان زميلات عمل انا هم نفس الشي لمن اريد اسوي مقال او برنامج اكيد راح يكونون

وياي ناس يجوز مو كلهم بس القسم الاكبر يكونون خوش ناس يعني ياحبيبتي يا عمتو اطمني ما أكون 

ابحدي اعرف بيج تحبيني وگلبج عليه وبعدين لازم تفهمين كل عمل واله مشاكله 

كريمه //هو انتي يمه شراح تصيرين غير تطلعين بالتلفزيون لبس ومكياج وتحجيلج شويه وتردين 

نص الليل لو تكتبين بالجريدة وهي الأخبار نصها جذب 

انا بابتسامه = اي عمه كل من راضي بشغله 

اياد::وبس هذاما يمنع انج تحترمين وجهة نظرنا وتسمعينها

= اياد انا الي جاي اسوي لا عيب ولا حرام وبعدين هي دوره عوود من اتخرح ينطوني

شهاده انا داخله دورة اعلام بلكي تفيدني بالتعيين 

عمي صابر /:هو وين التعيينات الكل بس يدرسون ويتعبون وتاليها يكعدون لا تعيين ولا شي 

امي /:اي خويه ابو محمد بس الشهاده تفيد اقلها الواحد يكدر يعلم جهاله ويدرسهم 

كريمه /:هاي بس عدج وفيقه مو ذول ولدي وبتي ما لزمتهم بس بالاول ابتدائي درستهم دار دور 

= مو اكلج عمه وكتج غير 

كريمه /:ليش يمه وكتنا غير تره انا مو كلش جبيره 

= ادري عمه اصلا الي يشوفج يكول اختي الجبيره ما شاء الله بس قصدي كل وكت واله احتياجاته 

(انا ردت انرفزها ) يعني عمه انتي عمرج تقريبا سبعين اكثر شويه اقل على وكتج وين اكو مثل

هسه كمبيوتر وتواصل وحاسوب ولغات 

كريمه ما اتحملت كلامي //فلشج منيلي سبعين جا كولي عمج تسعين 

انا ردت اطلع الغلطه الي غلطتها عليه = لا عمه الچذب حرام ذاك اليوم صديقاتي شافنه العمي صابر كللي 

منيين هذا اليخبل 

انا گتلهن هذا عمي حبيبي اخو بابا عاد هنه جاوبني عبالنه اخوج الجبير مو عمج نيال مرته الماخذته 

جمال ورزانه ورجوله 

عمي صابر //بس كون ما كتيلهن هذا عمي الجبير 

انا بتشفي = افه عليك عمو انا اكول اصلا كتلهن هذا عمو الزغير بس هو هسه متغير من كثر الضيم الي 

على گلبه الله يساعده ما شايفاته شنو چان 

وضحكو بس عمه كريمه هزت ايدها والحجي ماعاجبها ورة شويه اتكلمت بلهجة الأمر 

يالله اذا شبعتو ضحك وتصنيف خلينه نروح انا تعبانه

امي //يا بعد وكت وين رايحين 

عمه //لا والله ام زين تعبانه ما لي خلك 

انا اتقربت عليها وحاچيتها بخبث = اسكتي عمه اسكتي لا يسمع عمي ويكول عليج كبرتي وانوب ياخذ عليج مره 

محمد //بثينه شبيج اله تحركين الجو اليوم تردين ابوي يبات بره 

انا اتنعوص واهز برجلي واباوع الاياد الي بس يباوعلي ويعض بشفته من جوه 

= يا حمودي عليمن عمو يبات بره يبات عدنا هذا بيته واذا يطلع متزوج بعد احسن يبات عد مرته 

عمي //اكلج عمي هو انا وحده ما كادر عليها انوب ثانيه 

اهنا كريمه باوعتلي بشماته وحجت بتحدي 

انا مامنه صابر ما ياخذءعليه بس انتي ديري بالج خاف الياخذج اسبوع ويطك عليج مره 

= ياااا عمه انا الاخذه املكه ما اخلي يتنفس اله بامري 

محمد/: همزين من كلتينه على مود بس يجي واحد يخطبج نكله دائما جيب وياك اوكسجين لان هاي 

الجاي تخطبها خبله مهنتها تخنك الواحد 

= عابت محمد عود يصنف 

محمد /:هسه احنا شفتهمنا بس انتي وامي مناكر عبالك شرايج 

وصرنا نضحك وعمه تخزر بيه وإياد بس يباوعلي 

كريمه لبست عباءتها ورغد وساهرةلبسن جببهن وعمي صابر راح ورة بابا نعرف ليش بعدين سلمو علينه وطلعو

 ظل اياد حاول يتأخر من راد يطلع سلم على ابوي وعلى امي وسلم عليه وكلي 

اياد ::لا تزعلين من حجي امي ومني انا اريد مصلحتج واحنه بعين الناس وأخاف عليج

جاوبته وانا اعوج بحلگي = عمه كريمه ما ينزعل منها اصلا انا متعوده عليها ادري بيها شكد تكر 

اقصدتحبني 

اياد::احنا كلنه نحبج ونخاف عليج 

انا باستهزاء = واضح 

بعدين كال //تصبحون على خير 

/////////////////////////

اياد

ركبت بالسياره لان هي مالتي انا اسوق وأبوي يمي وامي ومحمد ورغد وساهره

وابن أحمد الزغير ورة من صعدو وحركت السيارة 

كريمه بادرت بالكلام 

/هالبت ما الها رداد تحجي ولا شايفه احد گدامها ولا واحد بعينها 

جاوبتها ::بس يوم انتي ما قصرتي وياها ليش غلطتي وغميتيها 

كريمه بعصبيه /كافي كافي اكلك شو انت بس اتشوفها أمورك كلها تتخربط ولك انا لو بيدي اذبحها منو 

هي وترفضك بس هي يا هي أمها وفيقه .ضحكت على عمك وخذته وجرته وراها 

ابوي جاوبها //لا كريمه وفيقه ما ضحكت على حسين اخوي حباها وسووا المستحيل حتى ياخذها وهي ام زين 

والنعم منها طيبه وبت ناس وما شفنا منها اله كل خير 

امي //اي هيه هاي دووم تمثل حبوبي سكوني بس من جوه ليجوه مو خبلت الرجال على ما اخذها وجرته وراها 

محمد /هي بس مرت عمي وفيقه ألجرته وراها هواي زلم تخاف من نسوانها 

كريمه /قصدك منو كول اكيد انت مو صحيح 

رغد وساهره و محمد كامو يضحكون 

ابوي /كريمه الشهاده لله ام زين خوش انسانه عمرها ما حسستنا هي غريبه عنا 

امي /اي مبينه من السان بتها الي اطول من النعال 

ابوي /وانتي ما قصرتي وياها 

امي /ما شفتوها شلون ترادد مو هاي ساهره ما ينسمع صوتها بس هي بس اكول العتب على اخوك ما عرف يربي 

انا اسمع امي وانا افور من داخلي ما اعرف ودي الزم بثينه أكلها

ما ادري اريد ااذيها لو اضمها بين ضلوعي لان اخاف عليها من الهوى لان بصراحه انا احب

 بثينه من احنه زغار واغار عليها ومن اشوفها واتخايل الناس تباعلها اتمنى اموت 

بس هي ابد ولا متحركه مشاعرها اتجاهي اتحسبني ابن عمها وبس

نزلت وانا بقيت شويه بالحديقه ادخن جكاره اجه ابوي يمي وكلي 

ابوي /:ها يابه ايودي اشو اهنا 

اي والله حجي حبيت ادخن جكاره بالحديقه --وظليت اسحب بالجكاره وانا ساكت --

ابوي باوعلي وكلي //بعدك تحبها ؟

انا تفاجئت باوعت الابوي الي هز راسه وكلي 

: اياد بابا شكد تحاول تضم حبك وتخفي ما تگدر لان انت مفضوح طول كعدتنا وانت بس تباوع الها 

 ما تحاول تنساها ونخطبلك بت خالك بت خالتك وحده غريبه انت تختارها 

انا تحسرت ابوي كلي شو ساكت 

:: يابه ما كو وحده تكعد بمكان بثينه ولو اموتها ما اخليها تاخذ واحد غيري 

ابوي /: انت شتحچي 

:: بابا انت مو سالتني بعدني احبها --اي يابه احبها واموت عليها كل حياتي المضت ولي راح تجي ما بيها 

شي ينذكر بس حبي البثينه--

ابوي جر حسره //حاس بيك يابه بس البنيه رفضتك ومو حلوه بحقك نتقدم مره ثانيه وترفض 

::لا يابه هي ما رفضتني بالاسم كالت هسه ما افكر بالزواج 

ابوي /:الله كريم الله يهدي سرك ويريح بالك 

كمت على راس ابوي وبسته وكتله :: يابه ادعيلي محتاج دعائك 

ابوي حظني وكلي /:الله ينور طريقك شد حيلك اياد مو انت الي تهزك مره 

::يابه احبها ولا تصدك اخليها تتزوج غيري 

:بس يا ابني الزواج بالگوه حرام وما يجوز 

:: بابا انا ما عوزني شي وهي ترفضني اذا چنت ساكت منتظر تكمل دراسه وبعدين اخذها 

: اياد انتبه يجوز البنيه من تكمل يتقدم الها واحد وتقبل بي 

:: شلون يعني 

: يعني يجوز تحب واحد وياها بالكليه ويخطبها 

:: بابا صحيح بثينه تلبس وتخلي مكياج وهي بطبيعتها بشوشه ودائما تشوفها تبتسم لكن ما عدها سوالف الحب والغرام 

:بابا اياد انت هم على كيفك ويه نفسك زين ابني 

هزيت راسي وكملت الجكاره ودخلت للبيت لان ابوي فات قبلي صعدت الغرفتي واتمددت على فراشي 

وانا احجي ويه نفسي 

:: اي هي كالت ما افكر بالزواح ما كالت مااريده 

:: گالت اريد اكمل دراستي واتخرج والگالي وظيفه 

:: اووف منچ بثينه وتاليها وياج لا انتي قابله بيه ولا تقبلين تطلعين من عقلي وكلبي شلون بالله بيج 

وظليت افكر ونمت بملابسي والفجر كعدت صليت وسبحت وكعدت شويه وبعدين بدلت وطلعت للدوام

💙💖❤💙💖❤💙💖❤💙💖💙❤💖💙❤💖💖❤💙💖❤💙💖❤💙

بثينه 

ورة ما راحو بيت عمي شلت المواعين ودخلت للمطبخ اعزلهن سمعت الباب انفتح إجه زيوني ابوي كله

ليش اتأخرت ما تدري بيت عمك عدنا 

زين /جنت ويه أصدقائي نتمشى وبعدين تعشينا وبيت عمي تقريبا يوميه عدنا 

بابا/: ها زيوني جنك تضوج من جية بيت عمك 

زين /:لا والله يابه هلا بيهم 

بابا/:روح غسل ونام باجر تروح المخازن الي بالشعب راح توصل البضاعة مالت التايرات (الاطارات)

زين /:ان شالله بابا

صعد زيوني ا لغرفته امي كلش ضايجه والجو مشحون هاي كل ماتجي ام محمد لازم تصير ضوجه فامي بادرت ابوي بالكلام /شنو حسين توازيت كتلهم على دورة الإعلام 

بابا ابرود /وليش يابه قابل خايف منهم ما اكول وشنو بتي مسويه غلط وانا ضامه على الناس الحمد لله بثينه ما مسويه

شي غلط 

ماما/:لعد ليش ما رديت من حجت مرت أخوك وابنه

بابا/:وعلى شنو ارد خليها بكيفها واحنه ندري ليش ماخذه موقف بسبب ابنها

امي/شنو قابل هو الزواج بالكوة والله ياربي

ابوي //وفيقه تره أياد ما يتعيب ولو ما حرام جا جبرت بثينه تأخذه 

امي //حسين اياد خوش ولد بس اويلي من امه ما شفتها نص ساعه رادت تصير حرب بينها وبين بثينه 

ابوي /ما شاء الله وبتج مو قاصره ترد الحجايه عشره بس خليها وياها انا جا رديت بثينه وكتلها عيب لا 

تحاجين مرت عمج بس هاي كريمه خابصه روحها ع الخالي بلاش اشو احنه ساكتين وهي تنبز بالوسطه

انا كوه صبرت على روحي ما ضحكت من تقهر بيها وتگول 

  ليش عمي يبات بره يبات عدنا لو ابيت مرته الثانيه وهاي ماتت من الحركه 

ماما وهي تضحك // بس شفتها شلون غمت بثينه باثنين اديها 

ابوي/:اي شفتها وسمعت اياد من طلعوا اجه اتاسف 

امي /:والله اياد دره هو واخوانه 

ابوي /:اي والله دره سبع ورزن ما اعرف ليش بثينه رافضه الزواج منه اشو شاب وحلو ومثقف وشخصيه 

امي /:تكول مثل اخوي ما اكدر اتزوجه وحتى لو قبلت بثينه انا ما انطيها ويه كريمه نسيت شسوت بيه من 

جنا كاعدين سووا 

بابا/:لا ا ما نسيت ياالله وفيقه صارت سوالف والحمد لله هسه احنه خير من الله 

امي باوعت الابوي وحجت /؛اي صدك صارت سوالف والف الحمد لله على النعمه بس اكلك حسين هو كل ما يجي 

صابر لو يجي أخوك عباس تنطيهم فلوس مو هذني الفلوس حق ولدك تعبك وتعب زيوني وهمه ما عايزين خير 

من الله عدهم 

انا بصراحه جنت جايه اريد اكل الامي تره كملت المطبخ يعني مو عبالكم اتصنط 😁😁😁

الفصل الثالث من هنا 

شكرا لزيارتكم عالم روايات سكيرهوم