رواية نعم أحببتك الفصل الثالث 3 بقلم انين الليل

امي قصدت كل ما يجي عمي صابر او عمي عباس ابوي ينطيهم فلوس بس عود ابيناتهم عمي عباس عنده 

سيارة چبيره مالت حمل (تريله) يشتغل عليها بالميناء يحمل بضائع وعنده اثنين اولاد صادق كلية هندسه مرحله اولى 

ورعد خامس اعدادي ورغد الي ماخذه محمد هو زياراته قليله لان دائما يسافر وزوجته ماتجي إلا بالمناسبات 

فامي تكل الابوي // حسين ما يصير مو كل ما يجون اخوتك تنطيهم فلوس الحمدلله يشتغلون وحالتهم زينه 

او ولدهم هم ماشاء الله محد عايز انت حتى من قسمو بيت المرحوم ابوك الله يرحمه انت ما أخذت شي

وهمه كل من اشتراله بيت واختك صبريه هم أخذت غير هم تدير بالك على ولدك والبنات

،،،،ابوي باوع الأمي ورد عليها //شوفي وفيقه انا ماكملت دراسه لان چنت اشتغل ويه ابوي الله يرحمه 

صابر موظف وعباس روحه بالسيارات وانا شفتيني شكد تعبت ولميت هاي الثروة الحمد لله بدل البيت بيوت 

ومحلات وعقارات وفلوس بالبنك وانتن وبناتج ما ناقصچن شي وهذن الي انطيهن الاخوتي لان ابوي الله 

يرحمه وصاني كلي دير بالك على إخوانك صحيح همه اكبر مني بس انا الله فاتحها عليه

وبالنسبه للبيت الورث همه ما چان عدهم بيوت وأختي تدرين بيها متزوجه ابن عمي 

وحالتها ضعيفه لذلك اتنازلت ألهم لان الله فتحها علي ورزقني

صدكي وفيقه الله سبحانه وتعالى عوضني أكثر بمية مرة وادري

بيج انتي ما تدورين هيج سوالف شعجب هسه،،،

ماما//هم زيوني كبر وجاي يتعب وانت هم تعبت حسين وجاي تشوف الوكت يمر بسرعه وطلبات البنات الي ما 

تخلص ولازم الفلس العدنا نخلي الاولادنا ما نعرف باجر شضام الهم الوكت 

بابا //اطمني وفيقه ضامن مستقبلهم لا تخافين الخير هواي الف الحمد لله والشكر 

ماما /الله يطول عمرك ويخليك خيمه فوك رووسنا احنا نباوع ال الله والك 

+

بعد ان سمعت هاي التراجيديا صعدت الغرفتي وقريت شويه ونمت والصبح نفس الشي بدلت وسلمت ورحت 

اتلاكيت ويه صديقاتي چنت لابسه تنورة قصيره سوده وقميص ابيض وستريج اسود وحذاء عالي وردي بدون

جواريب وشال وردي ضامه نص شعري وجنطه ومكياج خفيف من نزلنه من التكسي چان اكو تلث شباب 

واگفيه يم سيارة حديثه لونها ابيض انا صار شكم يوم اشوفهم بسما مهتمه من نزلنه كامو يسمعون بينه كلام ويتغزلون 

بلبسي وخصري وطولي وسمعت واحد يحاجي صاحبه يكله //شوف ام الشال الوردي مو خد عليها تكول كيمر السده،،،

الآخر //وك ياكيمر كول تفاح لبناني هنياله الياخذها 

:اووف لو اعرف ابوها چان مشيت شيوخ وساده واخذتها 

: ابوها عليمن يطيك اياها على جمالك لو على مالك هاي الها مواخيذها

دخلنه للكليه واحنه نضحك من خلصنه محاضرات وطلعنه باب الكليه كان اكو نروح نركب ويه الحجي ابو ياسر 

عنده تكسي ورجال طيب يجي عمره خمسين سنه بس نشوفه واگف احنه نروح نصعد وياه اليوم من طلعت 

تفاجئت باياد جاي واكف اباب الكليه بقيافته العسكريه اشرلي بايده وانا باوعتله باستغراب هو ابتسم 

وصلت يمه = هلو إياد اشو اهنا شصاير 

دنى النظاره الشمسيه من عيونه ::هلو بثينه لا ما صاير شي بس چان عندي شغل قريب الكليه ووقتكم مال الطلعه

كلت أنتظراوصلج وياي إذا موجوده 

= بس اياد انا اروح ويه صديقاتي  

::عادي وصديقاتج همه اوصلهن ياالله صيحيهن 

 رحت يمهن وانا اضحك وهنه يباعلي = عيني مجوده اليوم ما تدفعين مال الرجعه لان ابن عمي راح يوصلنه 

والا اكلج انطيني الكروه الي مو سيارة گرايبي 

هدى ::وج بثينه هذا الصاك ابن عمج لج هذا يخبل 

ماجده //بثينه ايوميه الكروه عليه وانتي اخذيها الج وخلي يوصلنه 

باوعتلهن باستهزاء = اي هذا ابن عمي عليمن كتلتن روحچن وصاك ويخبل انتن حووول لو شنو 

ماجده اتقربت يمي //ما حوله اله انتي اذا هذا مو حلو اكيد بشير ابو الكفتريا بنظرج هو الحلو مو 

هدى // مو انتي فد وحده ذواقه وتعيبين علي وچ هذا الي تصبح بوجهه تنسى الدنيا وما بيها 

رفعت اديه =يارب وحده منچن تاخذه هو وامه مجانا بس تفكني وياالله خلي اوصلجن گبل لا تطلع اخبالاتي 

وتالي ترحن ويه ابو ياسر 

ماجده // مو احنا مخبلات نضيع هيج توصيله 

= دياالله امشن فضني 

وصلت وانا اشوفه ابده ياكلني صعدت وهنه صعدن سلمن //السلام عليكم 

وهو رد بكل رزانه وصعدت بالصدر وهنه ورة وانا عرفته //اياد هذني صديقاتي هدى وماجده 

درت عليهن وانا اسوي حركات بحلگي = بعد انتن عرفتن اسمه مو 

هنه ابتسمن وردن //اتشرفنا 

انا جاوبتهن =النه الشرف عيني 

صرت ادوربالراديو لكيت بي أخبار طفيته وتمينه ساكتين وصلنه شفنه سيطره بالطريق وصل اخذوله تحيه وهو 

سلم عليهم برزانته المعهوده وعبرونا هدى حمحمت درت عليها وانا عاكفه حاجبي واهزز براسي يعني شكو 

هي كتبتلي ع الملزمه // احچي ويا خلي نسمع صوته 

سالته = خيير اياد شنو الشغل الي عندك يم الكليه 

هو بدون ما يباوع ::صديقي امس صابته ضربة شمس فتعب واجيت اشوفه 

=هاا وهسه هو زين 

::اي احسن شويه

وصل صديقاتي كل من يم بيتها ومن نزلت هدى گالت 

شكرا استاذ (باوعتلي )باجر ان شاء الله بنفس الموعد 

= ان شالله 

هدى //بس مو تتاخرين مثل يوميه 

= لا ما اتاخر مو يوميه نوصل من وكت يمته اتاخرت اني 

هدى فلت وجهه //ياالله باي 

= باي 

وبقيت انا لازم يوصلني اشو هذا لاف بالسياره باوعتله وعكفت حاجبي = اياد شنو خربطت تره البيت ظل ورانه 

اياد جاوبني ابرود :: أدري بس اني بثينه اريد احجي وياج 

انا ضجت كتله =. اوو ايااد مو خاف اتأخر واهلي يبقون بقلق واني تعبانه 

اياد باوعلي ::هسه اخابر عمي اكله عازمج على عصير اكيد ما راح يرفض 

انا بتململ = اياد غير مره تعبانه ومصدعه

اياد ::ما راح نتاخر بثينه شويه ونرجع

انا اتاففت مشت السياره واياد طلع التلفون واتصل أبابا وكله

:: عمو مريت من يم الكليه وجبت بثينه هي وصديقاتها وشويه بس نشرب عصير ونرجع 

سد التلفون وباوعلي وكال ::عمو گلي عادي بس لا تتاخرون 

ما جاوبته هو يسوق بالسياره بعدين ركنها مقابيل محل العصير وكلي ::شنو تحبين اجيبلج 

باوعتله = انا انزل وأخذ 

هو رد بنتر :: لا لا ابقي بالسياره هسه شنو تردين اجيبلج بعدج تحبين عصير الرمان مر 

انا ضجت بس ما حبيت اوتر الجو هزيت راسي وما جاوبت 

،،ورة شويه إجه وبيده كلاصين عصير رمان وهو يكلي ::جوعانه اجيبلج شي تاكلينه،

،انا = لا ما مشتهيه ما كله بالكليه 

هو صعد وانا اخذت العصير وسالته = اياد ممكن اعرف انت ليش ما خليتني انزل

اياد بعصبيه حاول يبين انو هادي ::شتنزلين بهذا لبسج

باوعتله صفح = شبي لبسي 

اياد جر نفس :: بثينه من طبعتي الصبح عمي وامج ما شافوج هو هذا هم لبس 

انا عقچت حواجبي ونفخت وجاوبته = اي اني هذا لبسي من زمان وانت تعرف وشايفني بي يعني مو جديد 

عليك واول مره تشوفني لابسه هالشكل 

اياد دخن جكاره :: بس صار الوقت الي تغيرين بي لبسچ ما يصير هذا مو لبس الشال كل شعرج طالع الحذاء بدون

 جواريب والأظافر مصبغات واللبس ضيق شنو شدعوه تره بثينه احنه رحنه والا اجينه نبقى ناس النه تقاليدنا وعاداتنا

شدعوة عمي الله يحفظه هلكد فاسحلج مجال

انا بقلة صبر واحرك برجلي = اكلك اياد هو هذا الموضوع الي تريد تحاجيني بي تره وصلت الفكرة وما راح اغير 

شي من لبسي 

اياد باوعلي والشرر يطلع من عيونه وده يفترسني لو طالع بايده

اياد وهو يعض على شفته وحجى بنتر ::لا مو هذا الموضوع بس انتي يا بثينه طريقة لبسج وكلامج يخلن الواحد يصير

 عصبي (حسيت بي من باوعلي هدا ) انا يا بثينه اجيت أعتذر عن التصرف الي تصرفته وياج امي اقصد الكلام 

الي امي سمعته الج 

انا بعدم أهميه وحتى ما باوعتله = متعلمه على مرت عمي دائما هذا حجيها مو أول مرة يعني شي مو جديد 

اياد :: بثينه لو تدرين والله البارحه انا الليل كله أفكر بيج ،ما كدرت انام 

وأنا لازلت من خطبتج أول العام لحد هسه وانا متمسك بيج واعيدها عليج شنو تردين ا سويلج

بيت ابحدج واذا يعجبج وره ما تكملين تتوظفين اي شي اطلبي واتمني لازم تعرفين انا لحد ه...

قاطعته بقلة صبر = اكلك اياد احنه مو سولفنا بالموضوع بدل المره عشره وكتلك انت مثل اخوي بس مسألة زواج

لا لان انا بصراحه ما افكر بالزواح بالوقت الحاضر 

اياد بصوت عالي بي رجفه ::شوفي انا مو اخوج انا ابن عمج وبعدين شبيه انا من شنو اشكي 

جريت نفس = ما تشكي من شي انت رجال تتمناك الف وحده 

اياد ::وانا ما اريد الف اريد بس انتي بثينه فكري 

انا باوعتله وبتسم بلا مبالاة = اياد ماكو داعي للتفكير انت ابن عمي وعلى راسي بس والله ما افكر بالزواح 

هو سكت وبس اسمع نفسه عالي وصار يدخن 

دار السيارة وصلنه للبيت ونزلت وهو نزل دخلت سلمت لكيت ابوي طالع وبس امي 

سلم عليها كلها اياد ::خاله مريت بطريقي على بثينه علمود أعتذر عن تصرف امي 

امي //لا يمه ما صار شي هي هم مثل أمها 

اياد::يالله في أمان الله 

الام /ابقى يمنا ارتاح واتغدا وشوف عمك 

اياد باوعلي وده اكله ابقى بس انا ما حجيت 

اياد ::لا خاله غير وقت تعبان اريد اروح أرتاح 

الام /اكعد اياد راح اصبلك غدا ع السريع شنو تطلع وما تتغدا 

كعد وانا رحت بدلت ونزلت كعدنا تلاثتنا بالمطبخ وامي صبت الغدا وصرنا ناكل واحنا ساكتين بس امي كل شويه 

وسالته //اشلونك بالدوام 

::زين على الله 

دير بالك على نفسك الدنيا ما تتامن 

::اي والله خاله صدك جاي تصير اشياء عمرنا لا سمعنا بيها ولا نعرفها 

امي //الله يستر مو خوش وكت 

كمل وغسل وانا صبيتله چاي هو اخذ الكوب وكلي ::تسلمين بت عمي 

ابتسمت ورديت =الله يسلمك 

شرب الچاي واستاذن وطلع وامي گلتله يسلم على امه وعمو ومن طلع وانا احس جبل انشال من على كلبي 

صعدت غيرت ملابسي وتمددت على الجربايه وبقيت افكر بكلامه وتصرفاته ونرفزته من گتله انت مثل اخوي 

ساعات أحسه خطيه يحبني وساعات اكول 

...هذا ابن امه شتكله يسوي شنو قابل هي تحبنه ياالله ابنها لكن انا احس بي هو يحبني بس 

اناياربي ما أحبه حتى مثل اخوي ما أحبه هو فعلا مثل ما كال هو بس ابن عمي

،،،،قريب المغرب نزلت لكيت امي كاعده بالصاله وبهاء يمها سئلتني

ماما//اياد شعده جاي للكليه شيريد

انا سولفتها كل السالفه امي حچت //يوم بثينه اياد خوش ولد وهو ابن عمج ويخاف عليج 

انا رديت عليها وانا عاكفه حواجبي = اووو ابن عمي وابن عمي رياض هم ابن عمي ويوسف همه بس هذا 

خابص نفسه على شنو ما اعرف 

ماما /اسكتي بثينه لا يسمع ابوج وانتي تدرين اياد شيعنيله

جاوبتها == اي اي اعرف اكلج يوم هو بابا ليش ما يتبنى اياد مو احسن بدل ما كل شويه يكول 

اياد زلمه سبع ينشد الظهر بي اياد عضيد زيوني اياد مو ابن اخوي احس اني من اكبر اموون علي ما امون على 

زين وبهاء من يگعد ابويه كليله حجي اتبنا على الاقل انا افتك 

بابا يحجي وهو تعبان /ها بثينه ترديني اتبنى اياد تره اياد خوش ولد وسبع مو من ذوله المايعيين ومره ثانيه اعرفي 

شلون تحجين لا تخليني ازعل منج 

انا رحت على ابوي هو كعد ع القنفه كعدت بحضنه وبسته وانا شابكه اديه علي وارمش بعيوني ولامه حلگي واگله 

= حبيبي حسون لاتزعل مني انت عودتني ع الصراحه بس ابن أخوك غثيث مثل امه نايب ضابط كريمه ما ينبلع ثگييل 

ابوي أبتسم وامي هزت ايدها وهي تحجي ويا /ها حسين منو طلع عين بثينه غيرك انت تحجي وتضحك الها وانتي 

(امي باوعتلي ) احترمي نفسج واعرفي شلون تحچين 

هزيت ايدي =شدعوه اشو انتي وابوي طايحين بيه رزايل وبس تحمدون باياد شنو انا مو بتكم اذا مو بتكم كلولي

(طبعا دراما وانا سويت روحي ضايجه وارمش بعيوني )

ابوي لزم اذني /:ولج انتي شلون تحجين على ابن اخوي ومرت اخوي موعيب 

=والله بابا مع احتراماتي الك بس اياد ابن امه وشتكله يكلها صار نسيت البارحه من غمتني محد فك حلكه عود 

بعدين من طلعو هو اتاخر واجه يعتذر( عوجت حلگي واعيب علي ). اسفه بثينه احسبيها عليه لا ويباوع يخاف تلگفه 

اويلي لو تدري بي چان گطعت المصروف عنه 

بابا /:انتي شلون بيج بابا عيب هيج تحجين على ابن عمج والصدك اياد انسان شجاع وجسر وما يخاف وهو يحب 

امه ويحترمها وهذا الشي هو الصحيح الله راضي علي الي يرضي امه 

= كلامك صحيح بابا اياد حباب وسبع بس هم تبقى القوه الغاشمه اقصد نايب ضابط معتوك اقصد كريمه امه

بابا بقى يضحك ويكلي //معتوك منين جبتي 

=اندري اجه بحلكي وكتله بس تدري منو كاسر خاطري بيهم 

ابوي //منو 

= عمي صابر الله يساعده شلون متحملها كل هذا العمر ما صارت بي جلطه 

امي بابتسامه //كافي ام السان كومي خلي عشا الابوج 

= غرتي وفيقه تره هذا بابا وهسه اسويله احلى عشا وداعة كريمه الي ما احلف بيها جذب والي ادعي ليل ونهار 

كون عمي صابر متزوج عليها ويحرك كلبها 

ابوي يضحك ويكول/:الله يلعن شيطانج اكعدي ما اريد ماكل بالمحل 

انا رفعت ايدي = الحمد لله شوفي وفيقه حلفاني اجه بمكانه يعني عمي صابر لو متزوج لو حيتزوج على عمتي كريمه 

ان شالله حوبتي تطلع بيها بس تعرف تغمني ومحد بيهم ردها 

امي //زين لعد منا وهيج نكول عليج دخيل بختج 

انا دنگت واحچي بهدوء = مو هسه بس خلي اتاكد عمي كاسر عينها بمره 

امي //ولج كافي السانج 

= شنو گايله ماما بس اريد اعرف بيبي الله يرحمها ليش ظلمت عمي صابر وزوجته كريمه 

امي //لان اقاربهم وهو الچبير كلتلج اخذله بنيه من كرايبنا 

ضحكت وهزيت ايدي = ياچبير هي خلت بيها چبير ما تشوفينها مسيطره ع الدنيا كلها 

امي //بس الشهاده لله الولد وساهره خوش مربيتهم 

= اي مربيتهم ع الخوف منها 

امي //بثينه همه ما يخافون همه يحترمون وهذا الشي الحلو الي بيهم 

= شوف امي تكول يحترمون ما شفتوا البارحه من صاحت عليهم ياالله گوموا الكل وكف بالاستعداد واخذ تحيه خو 

هذا الي طايحين بي تحمدون وتردون ليوره ما لامين حلككم وكف وطلع سووا روحه يلبس بالحذاء عبالك جاهل بايك 

لعبه ويريد ياخذها من غير محد يشوفه 

امي //فلشج على گولة كريمه 

= لا ماما مو هيج گولي هيج فلشج كون (صرت الم بحلكي واحرك باديه مثل كريمه )

ابوي صار يضحك وامي تهز بايدها وتكول هاي شلون بيها 

وانا صعدت الغرفتي بديت اقرا شويه وبعدها لزمت النقال وشفت هدى دازتلي 

هلو باحلى صديقه تعرفين شگد احبج 

جاوبتها =هدى سلامات حبيبتي مصخنه لو شنو منيلج هذا الادب كله 

هي راسا ردت //ما تگليلي وين چنتي 

=جوه ليش 

هدى //تگلي ليش حابه اسألج 

خير على شنو تسالين 

هدى //اسكتي بثينه اريد اسالج على هذا الرزن ابن عمج ما يريدله مره منا منا 

انا بيني وبين نفسي اتنرفزت من كلامها رديت = لا ما يريد لان هذا الرزن الي تشوفينه عقله صخره تتكس اي 

بس هم تبقى محجره 

هدى //ولچ ليش شبيج ويا 

=ما بيه شي بس انتي هذا من اتعاشرينه وتعاشرين امه تلعنين الساعه الي صرتي بيها وهسه ياالله حبيبتي روحي 

اتغطي ونامي لان باچر عدنا دوام مو 

هدى //والله يابثينه احس بيج تغارين على هذا ابن عمج وجاي تمثلين علينه انتي ما تطيقينه 

=اگلج هدى انتي مو مال احترام ياالله روحي انطمري او كي تصبحين على خير 

سديت النقال ودرت على صفحتي وانا افكر بكلام هدى واگول عنها مخبله بعدين اسأل نفسي ليش انا اتنرفزت من 

هدى سالتني على اياد يريد مره او لا 

///////

الفصل الرابع من هنا 

شكرا لزيارتكم عالم روايات سكيرهوم