رواية فصلية الضابط الفصل الواحد والثلاثون 31 بقلم زينب نور

•.......... نشف دمي گلت بگلبي هاي نهاية حياتي اكيد وارث يدور عليه واذا يلكاني شيخلصني من عنده 

اباوع الى ام احمد انخطف لونها اتباوعلي وتباوع الابو احمد 

گالي: عمو ندى مثلي انو نايمه وغطي وجهج 

رجع گال الام احمد: انزلي اكعدي يم ندى وخلي راسها بحضنج 

التفتلي بابا غطي وجهج زين بالعبايه

نزلت ام احمد اجت كعدت يمي واني تمددت بالسياره وخليت راسي بحضنها غطيت وجهي بس الرجفه لزمتني خوف على رهبه الموقف من يلزمني وارث شراح يسوي بيه ومجرد ما يتخايلي انو اشوف وارث موجود وياهم يصير عندي مغص ابطني ختمت القران واني ادعي الله ما يشوفني وارث  

خفف السرعه ابو احمد وطفى صوت القرأن 

وصلنه للسيطره اجو الشرطه يباوعون داخل السياره اشوفهم من جوا العبايه فاتحه اعيوني نص فتحه 

طلبو هوية ابو احمد انطاها الهم اسمعهم يسولفون ابيناتهم واحد منهم يكول لا تشبها مو هي 

هنا اني وكف گلبي من الخوف گلت اكيد يقصدوني بس هم ماشافو وجهي اصلاً

سمعت واحد منهم گال الابو احمد وهو يباوع بأتجاهي 

:- حجي منو وياك يباوع ليوره 

جاوبه ابو احمد:- بويه هاي زوجتي وبنتي رايحين لزياره 

رجع الضابط گال:- حجي بس خلي الاهل يكشفون عن وجوهم 

سئله ابو احمد

:- العفو سيدي شصاير؟ 

رد علي الضابط:- ماكو شي حجي بس اكو شخص مشتبه به اجتنه اليوم اخباريه عنه طالع من بغداد المحافظة كربلاء

دار وجه عليه ابو احمد باوعلي ويأشرلي بعيونه يعني اطمني وكالي:- اكشفي عن وجهج باباتي 

طلعت نص وجهي باوعت عليهم شافوني 

بس شفت واحد من عدهم احس هذا شايفته ما اعرف وين وجه مألوف احسه عرفني من نضرته الي  

الضابط مد أيده الابو احمد گاله 

:- اتفضل هاي هويتك حجي وتوكل بطريقك : 

جريت نفس ابراحه من عبرناهم ورفعت راسي اعدل بعبايتي بس الخوفه اخذت نص حيلي 

وكملنه طريقنه طول الطريق ما نشفت دمعتي احس الطريق صاروشطوله عليه 

 أول ما دخلنه محافظة ڪربلاء وقريت القطعه ڪربلاء ترحب بڪم  

نغزني گلبي ورجعت بيه الذكريات كاعده اشتم ريحة اهلي تجري ادموعي دموع الألم دموع الأشتيـاق دموع ڪسرة الخاطر حييل مهضومه 

اردد دخيلك يا ابا عبدالله دخيلك يا ابا فاضل ساعدوني طالبه الصبر منكم 

طلعت من كربلاء شكل ورجعتلها شكل ثاني محمله اهموم واوجاع 

موجوعه نفسياً وجسدياً

نزلت الجامه ولهوى يلفح بوجهي باارد بس ما اهتميت جمدت الدمعه بعيني 

اويلي ما مصدكه وصلت المدينتي هذا سكني هذا اماني احس وصلت بر الأمان 

 بس اكو عصرة بگلبي راح تموتني مخنوگـه احساسي يكولي اكو شي ثاني غير اعدام حسام ومصيبته ما اعرف بعد شضامتلي دنياي من مصايب اردد بداخلي دخيل اسمك ربي انت احكم وابصر لا اعتراض على أمرك ربي اللهم الصبر اللهم لا اسالك رد القضى بل أسئلك لطفاً فيه

                                    

              

                    

اعصر بعباتي مامصدگه روحي واخيراً وصلت المنطقتنه 

اوصف الابو احمد الطريق ادلي على فرعنه اول ما دخلنه الفرع شفت باب بيتنه من بعيد نسيت نفسي گمت افتح اباب السياره اريد انزل من كل عقلي عبالي من اركض على رجليه اوصل اسرع 

واصرخ بكلب محروگ اريد اشوفهم اريد اشكيلهم الصار بيه اريد اكعد بينهم والطم على اخيي ابراحتي اتوسط النسوان واصرخ: 

وام احمد لازمتني وابو احمد انخبص ايريد يوڪف السياره أول ما وڪف نزلت اركض وصلت ادگ على الباب بقوه بثنين اديا وابجي بصوت مسموع وام احمد اجت تلزم بيه وابو احمد واكف مسافه عني يهدئ بيه

بس من انفتح الباب خاب ڪل ضني وطلع رجال غريب ما اعرفه گالي تفضلي خويه رايده شي منو انتي ليش هيج تدكين بالباب 

جمدت الدموع بعيوني ما مستوعبه أشرت على البيت واردد 

:- والله هذا بيت اهلي والله هذا بيتنه وينهم وين راحو ابويه وامي وين 

گال الرجال منو انتي ترا اني قبل شهرين اشتريت هذا البيت جديد خاف تقصدين الجانو بي هم اهلج 

هزيتله راسي 

:- اي اي هم اهلي وينهم تندل مكانهم 

اتقدم ابو احمد سلم علي وعتذر من عنده لان من الصبح ادك بالباب بخبال وطلع مفزوع الرجال مبينه الهبطه بوجه

وهم يريد يستفسر من عنده بالكي يندل مكان اهلي يعرفهم وين هسه

جاوبه: لا والله خويه ما اعرفهم

بس اشتريت من عدهم البيت عن طريق صديقي اني ما اعرف احد هنا: 

ڰعدت بالكاع ابجي اعصر بأديا 

گالتلي ام احمد:- ماما كومي وياي دلينه على اقاربج وين خلي انروحلهم اكيد يعرفون مكان اهلج

گومتني ورجعنه لسياره صعدنه وانطيت الابو احمد عنوان بيت عمي ابو حازم 

رحنالهم قريب على بيت اهلي مو هوايه هم نزلت متلهفه اشوف واحد من اهلي نزلت ادك بالباب ونزلو ام احمد وزوجها وياي 

تأخر يله انفتح الباب طلع ماجد ابن عمي الاصغر من حازم اتفاجئ من شافني مبينه بملامحه علامات الصدمه گال:- انتي ندى لوغيرها 

اهز ابراسي وابجي:- ولك اي شبيك ماجد ما عرفتني معقوله نسيتوني اني ندى

ماجد :- شلون ما اعرفج بس ما مصدك اجيتي رجعتيلنه وين جنتي صار ايام اندور عليج 

اتقرب عليه بلهفه لزم راسي قربه علي يبوس بي واني لازمه اديه 

 احس شفت اهلي ابجي بجي مال فاگد عزيز 

وهو حاضن راسي ويبجي وياي 

سمعت صوت حازم طلع يسئل بماجد منو اجانه 

ابتعدت من ماجد شفته واكف لابس دشداشه سوده وشماغ لافه على رگبته من شافني هم اتفاجئ بيه 

وانتبه الابو احمد وام احمد بعدهم واكفين بالباب ايباوعولنه سلم عليهم 

وڰال الهم 

:- اعذرونه يابه سامحونه موكفيكم على الباب اتفضلو اتفضلو لا تبقون واكفين 

دخلنه للبيت اني وام احمد تلكتنه هيفاء بنت عمي ونجلاء زوجة حازم لابسات اسود سلمن عليه حضنني ويبجن وياي واني لحضه ماسكتت عيوني من الدموع ما كدرت اكعد او ارتاح اريد اوصل الأمي وابويه 

سئلتهم :- لعد وين عمو سامي وعمتي ام حازم 

جاوبتني نجلاء:- يم اهلج صار يومين اهناك وعود هسه احنا همين رايحين وراهم همزين وصلتي قبل لا نطلع

            

              

                    

اني الي افتهمته علمود فاتحة حسام عمت عين اخته اكيد باقين اهناك يم اهلي لان فاتحه وعالم تجيهم

رجعت سئلتها

:- فدوه كولولي اهلي وين شايلين رحت البيتهم بس مالكيتهم طلعلي رجال غريب و يكول اني اشتريت البيت قبل شهرين صدك اهلي بايعين بيتهم وليش باعو ! 

نجلاء :- اي صحيح باعو البيت قبل شهرين ونتقلو الغير منطقه بعيده شويه منا هسه تعالي اكعدي ورتاحي واني وحازم ناخذج لهلج 

:- نجلاء شلووون ترديني ارتاح شلووون اريد اشوف امي شلون حالها من سمعت بأعدام حسام عزيزها ماات بعد ماكو أمل يرجعلها

اشوف نجلاء نزلت راسها وتبجي وتكول والله ما اعرف شأكولج غير الله يصبرج على مصابج  

ندى :- نجلاء عليج الله صيحي حازم يله وصلوني الهم هسه ما اريد ارتاح اني زينه مابيه شي بس اريد اشوفهم 

دخلو حازم وماجد على صوتي واني ابجي واحجي 

أول ما شفت حازم ركضتله لزمت ايده الله يخليك حازم اخذني الهم هسه

سحب راسي باسه ويبجي بنحيب وشهگه تطلع من گلبه ويردد يابوبه ياكسرتي بيك يا حسام يا خويه هاي نديوا عزيزتك رجعت وانت ماكو 

 گمت الطم على وجهي اريد تطفه نار گلبي بس ما كاعد تطفه ناره 

اجتني هيفاء ونجلاء لازماتني 

ويبجن على مبجاي 

ابتعد حازم يمسح بدموعه وباوع الماجد

گاله:- ماجد انت اخذ ندى وهيفاء وصلهن وابقو هناك ابين ما انضيف الناس الوصلوها ومن يرحون نجي وراكم اني ونجلاء

قبل لا اطلع رحت الام احمد سلمت عليها وتشكرت من عدها وطلعت صعدت بالسياره اجت هيفاء وياي وماجد ساق السياره طلعنه من المنطقه ومشت السياره نص ساعه يله دخلنه المنطقه زراعيه بعيده عن الولايه وبيها بيوت بس موهوايه مثل القريه سئلتهم بس صوتي مبحوح من البجي 

:- ماجد ليش اهلي شايلين هنا وبهيج منطقه بعيده شصاير؟ 

جاوبني 

:- والله يختي باعو البييت علمود افلوس للمحامي وصفو الهم عالساس شاطر هذا المحامي ويكدر يخفف الحكم عن المرحوم بس كله جذب ما كدر يسوي شي وهم علمود علاج امج الله يرح..... وسكت ما كمل  

رجع گالي خويه هسه توصلين وتعرفين كلشي 

اشرلي على بيت من بعيد كالي

هذاك البيت اتشوفينه هو هذا بيت اهلج باب البيت ابيض

اباوعله داكين علي قطعه لونها اسود

من صرنه قريبين ميزت الكتابه العليها ما استوعبت اباوع بوجه هيفاء وارجع اقراها من جديد شنووو هاي 

طار عقلي ما صدكت عيوني امسح بعيوني واريد اركز زين قريت تاريخ الوفاة قبل شهر تاريخ الوفاء ما اصدك أمي ميته واني ما أدري يعني صار شهر علىةفاتحة امي من حرارة گلبي صرخت و فتحت باب السياره وهي بعدها تمشي ذبيت نفسي منها وكعت على وجهي ما حسيت باليوجعني ولا بالجروح البرجليه ولتراب الي حسيته حتى دخل بحلكي 

ڪمت كل حيلي اركض وهيفاء نزلت وراي اتريد تلزمني وصلت للباب مفتوح وصوت العياط ولطم مسموع

دفعت الباب ودخلت اصرخ بكل صوتي بس صوتي ما ينسمع 

ادور على أمي ما مصدكه القريته 

النسوان كلها كامت بوجهي يصرخن اشوف خالاتي وعماتي وكل اقاربنه موجودين ولبيت كوله اسود وصريخ يكزبر الجلد وكف صوت الملايه عن القرايه 

شافني البنات واجني يركضن تبارك وضحى يحضنن بيه ويصرخن ولج ندددى ولج راحح حسام بعد مااات ما يرجعلنه

ولج وامي ماتت بحسرت شوفتج وشوفت حسااام ما اتحملت گلبها ما اتحمل وماتت

ملخت روحي شگيت دشداشتي واصرخ بكل صوتي ولجن وين امي اريدددها ويننننهااا اري اشوفها 

وينننج يممممه اجيتج اني اجيتج يمه مو تردين تشوفيني 

هاي اني اجيت اشوفج اطلعيلي يممممه 

ملخت شعري احس نااار بصدري 

ما تبرد اعيط بدون ادموع عيوني نااار حلكي يبس بلاعيمي اتجرحت من الصريخ 

ولج يمه شلون ترحين وتعوفيني يممممه بعدني ما شبعانه من ريحتج 

وحسام لحكج اخذوني وياكم ما اريد اعيش بدونكم مااريد ولك حسسااام ليييش هيج 

اخذني وياك ابداعت أمي عليك اخذني وياكم

احس بيهن يلزمن بأديه ويردن يهدئني بس ما يسيطرن عليه حرارة گلبي خلت عندي قوه عجيبه ادفع بيهن والطم بكل قوتي على صدري ومگابلاتني تبارك وضحى وزهور يلطمن وياي لما تعبت بعد مابيه اشيل ايدي وعماتي اجن وخالاتي سلمن عليه ايبوسن بيه ويصبرن بيه بس اني فاصله عن العالم اسمعهن ايسولفن وياي ويسئلني بس ما اجاوب شويه 

و سمعت صوت وسام وابويه دخلو للبيت درت وجهي اشوفهم اجوني اريد اكوم ما اكدر حيلي باد ولبنات خلن حجاب على صدري طالع ايلمن بيه 

دفعتهن ونهضت كعدت على ارگبي فاتحه اديا الهم اول واحد حضني ابويه ويبجي ينحب بصوت عالي و وسام كعد هم حاضنه اثنينه ويبجي وصوت البجي رج البيت عباره عن صريخ يدوي أبراسي حاضنتهم ابقوه وبده النفس ايضيگ بصدري حسو عليه من فتحت حلگي اشهك دفعتهم واملخ ابرگبتي اريد الهوى احس روحي جاي تطلع گلبي احسه جاي يتگطع وجع مو طبيعي اشوفهم اختبصو يصرخ ابويه ولجن بسرعه جيبولها ماي احس بالماي بارد على وجهي وصدري ويضبرون بخدودي وصوتهم ابراسي احاول اريد احاجيهم بس ما اكدر مثل الغرگانه واريد اطلع غمضت اعيوني واحس الصوت صار عني بعييييد وبديت افقد وجانت ادعي بگلبي و متأمله اموت اروح يم رب رحيم ارحم من هيج عيشه بالدنيه ضيم وعذاب وفراق وبعد ما عرفت بموت أمي وحسام ما اريد اعيش 

شوفتهم ضلت حسره بگلبي.......

الفصل الثاني والثلاثون من هنا 

شكرا لزيارتكم عالم روايات سكيرهوم