رواية قصة وجدان الفصل الواحد والثلاثون 31 بقلم انين الليل

طلعنا من المستشفى واني بالكوه امشي وعمتي ساندتني ركبنا السياره وصلنه بعد الظهر بشويه البغداد

وهو عاصف حتى ما وگف المطعم مثل كل مره چان يسوق بسرعه وما حجى ولا سولف عمتي يمي راكبه هي نامت

وانا اول مره ما انام اشوفه يدخن بشراهه وكانما الجكاره تريد تنهزم منه ومرات يعض بااصبعه ويتنفس بعمق

وصلنه البيت بيبي ام كريم الي من شافتني صارت تبجي وهي اتگلي //شجاج بيبي شصاير بيج

خلو الغدا وانا اي شي ما خليت بحلكي حتى ماي ما شربت لان اعرف بس اشرب او اكل اتقيا

كريم اجه وكال // ياالله خلي نروح

ام كرار جابتلي ملابس من هدى لكن انا اكتفييت اهز براسي وطلعنه ويانه عمو ابو كرار. وام كرار وصلنه للطبيب

ودخلنه تقريبا المغرب وعمو عاصف سولفله وانطا كل الاوراق هو شافهن وحجى

- - تشخيص طبيبكم بمكانه وضروي نسوي ناظور

  عاصف ساله :: يمته ؟

- - هسه اني اسويلها بالعياده

:: دكتور البنيه ما ماكله شي ولا حتى قطرة ماي خاله بحلكها

    - - شقصدك ؟

  :: يعني الناظور اياذيها

  ابتسم // هههه انت عبالك ناظور قبل لا استاذ كل شي اتطور الناظور هسه ما تهجسه هاك هاي الورقه انطيها للسكرتير

طلعنا وعمو كريم اتساءل // ها بشرو

  :: اله ناظور

  راح للسكرتير انطا الورقه ورجع :: هاي انطيت الورقه للسكرتير ومنتظرين

   كريم // ان شاالله خير

بقيت كاعده انا وعمتي وام كرار تقريبا نص ساعه بعدها السكرتير اشر الغرفه ثانيه گال // اتفضلو

دخلنه انا وعمتي وام كرار شفت واحد لابس ملابس ممرض كال العمتي // ساعديها تنام

نيمتني ع السديه وبعدها ضربني ابره بالوريد وكال العماتي اطلعو يمكن نمت فتحت عيوني شفت نفسي بغير غزفه كاعده

وعمتي اجت // ها عمه اشلونج

هزيت راسي والسكرتير كال ترتاح شويه وطلعيها بالانتظاروفعلا عشر دقايق وطلعت بالانتظار وعاصف وكريم يباعولي

لمن ما السكرتير كال // اتفضلو

دخلنه للطبيب وياي عمتي وعاصف وكريم الطبيب جاي يباوع الملف كدامه بعدها اتنفس وكال // مثل ما اتوقعت

  :: شنو دكتور

- - المعده متحسسسه بقوه وماثر على عملها وبالتالي صاير التهاب جدا قوي على اثرها ما تقوم بعملها بصوره صحيحه

فبالتالي ماثره ع الجهاز الهضمي كله يعني متخربط كله فالماده الصفراء ما جاي تتمثل بصورتها الصحيحه وصاير

عدها استرجاع بالمرئ وهذا كله جاي اياثر ع المعده

  كريم // والحل دكتور ؟

  - - اليوم خلي تدخل مستشفى

عاصف راسا رد :: اي دكتور تدخلالمهم تطيب

    - - ان شاالله هاي ورقه تصرف هذا العلاج وبوجهك للمستشفى

:: دكتور مستشفى اهلي

- - براحتكم انطيني الورقه

صار يكتب //. هاي كتبتلك للمستشفى الاهلي الي اني اداوم بي وان شاالله سهله

:: اشكرك دكتور

وفعلا راح عاصف للصيدليه وجاب العلاج صار دنيا ليل وصلنه للمستشفى وام كرار اتوسلت بعمتي امل تبقى بمكانها يمي

لكن عمه ما وافقت ونفس الشي محاليل بالوريد وياهن ابر ماحسيت يمكن من التعب نمت

  الصبح اجه الدكتور وكتب علاج وكال تبقى اليوم وباجر نشوف تاثير العلاج ونقرر

بقت عمه وياي واني شويه خف الالم لكن لعبان النفس جاي دا يزيد عليه ثاني يوم اجه الطبيب وشافني وحچى ويه عمو

- - طبعا اني ماخذ بنظر الاعتبار انتو من غير محاافظه يمكن ما تكدرون تبقون بالمستشفى اكثر

عاصف :: دكتور الي تشوفه بصالحها سوي عسى ما تبقى شهر بالمستشفى المهم تصير زينه

- - تمام راح اكتب الها خروجيه من المستشفى اريد متابعه خلال يومين ما صارت زينه ترجع للمستشفى باسرع وقت

  صار يكتب باوراق //. الزم هاي ورقة الخروجيه وهاي ابر دورتين كاملات ضروري اتجيبوهن هو سعرهن شويه

غالي بس ضروري تجيبوهن تاخذهن عن طريق المحلول وما يمنع بهاي الفتره نتطيها بعض السواىل

البارده شويه شويه يعني مثل الطفل الي جاي نعلمه ع الاكل

كريم // الهلدرجه ؟

الطبيب هز راسه // اي واكثر هاي الحاله ياما موتت ناس ان شاالله نسيطر عليها

   اهم شي تبتعد عن العصاىر الحامضه الطرشي الفلفل البهارات خلو اكلها صحي

::ان شاالله غير اذا تاكل

- - لا تجبروها على شي تاكل وترجع مثل قبل واحسن

::ان شاالله الله يسمع منك

— انتو باقيين اهنا اكيد

    :: اي دكتور

  - - تمام لان اريد مراقبه الحالتها وضروري بعد اسبوع اذا امورها تمام اشوفها

    :: بحييل الله

رجعنا وصار يعلكولي المغذي الصبح وبالليل كان يمهم مركز صحي ياخذوني اله اني وعماتي نتمشى شويه

ورغم تعبي وعدم قدرتي ع المشي بس احس انو اني جاي اتحسن

  عمو عاصف ما يجي يمنا الا قليل وبس يسال عمتي شلون صارت شخبارها

  يوميه بالليل عمو كريم يخليني بالسياره وياي عمتي وام كرار ومرات هدى تجي ويانه ياخذنه ايفرنه ابغداد

والكل اشوفهم مرتاحين ويضحكون الا اني دائما ساكته وحزينه ورحنا زرنا الامام الكاظم عليه السلام وهناك عمتي

امل گالت // ذبي احمولج عده وما راح يقصر منج

فهمت يعني احجي كل همومي وفعلا وصلت يمه ورغم الازدحام لزمت الشباك الشريف وصرت ابجي وادعي سولفت كل

البكلبي كل الي جرالي احچي واشكي ودموعي ينزلن واعرف انو اني راح اصير احسن

طلعنه كعدنا بالصحن الشريف وام كرار سالتني اذا اريد شي يعجبني اشتري شي لكن اكتفييت اهز راسي

وبعدها رجعنا كنت مرتاحه ودا احس صرت احسن لكن مجرد ما اتذكر مهدي وعاصف والشي السوو وياي كنت

كلش اضوج وبيومها رجعت وعمتي امل كالت //. عمه نامي ما اريدج تاخذين علاج

   ام كرار // ليش مو الطبيب كال لازم تاخذه وقت بوقته

   امل //. اي بس احنه رحنه الطبيب بغداد طبيب الحيارى والمساكين ( صارت تبجي ) وهو ما راح يقصر شوفي

حتى وجهها رجع الدم بي نامي ياروحي وان شاالله ما بيج شي مثل كبل واحسن

  فعلا نمت بعمق وبراحه وثاني يوم عمو عاصف وعمه امل رجعوني للطبيب الي شافني وعاد الناظور ومن باوع للتحاليل

   ابتسم وگال // كلش زينه وحالتها استقرت

   امل // دكتور بعدهي ما تاكل

باوعلي ورفع حواجبه // وليش يابه ما تاكلين ما تشتهيين

هزيت راسي

  سالني // ها لعد ليش ما تحجيين

بقيت ساكته

اتقرب مني الدكتور سالني // انتي ليش زعلانه لويش ما تحجيين ولا تاكلين عبالج اذا سويتي هالشكل راح تنحل مشكلتج

بالعكس هالشكل انتي جاي تفاقمين المشكله

- - شوفي اني وانتي وعمج والناس البره محد خالي كلياتنا عدنا مشاكل اهم شي انو احنه شلون نتخطاها سواء انحلت

او بقت بدون حل الزمن كفييل باان يحلها والحياة رغم اذيتها تستحق ان نعيشها لان لا عمرنا ولا رزقنا ولا اهلنه اختيارنا

هذا اختيار رب العالمين وكلنه باامتحان الانسان الي صدك هو انسان ويستحق انو نسمي انسان هو الي يعيش هاذي الحياة

بكل ما بيها من فرح وحزن ومن صح وخطا هذوله ( اشر على عاصف وامل ) هذوله الناس الي ويااج هوااي يحبوج

ويردون مصلحتج ياالله اتنفسي بعمق شهيق قوي والزفير خلي كل الي مريتي بي ذبي ميفيدج

- - ولازم تبدين تاكلين شويه شويه لان راح اكتبلج علاج تاخذينه عن طريق الفم يعني مو بالوريد ولا ابر فلازم تاكلين

والا ما راح تاخذين العلاج وبالتالي ما راح اتطيبين

المره الجايه من تجون البغداد تجيين اشوفج وانتي ما تشكيين من اي شي تجيين زياره تسلمين عليه مومريضه تردين علاج

- - اتفقنا

عمتي سالته //. دكتور ويالنسبه للاكل

   ابتسم // ما بيها شي اصحى مني اي شي يعجبها تاكل هسه لو تجيبولها خروف تكعد تاكله هي بس زعلانه شويه وجاي تدلل

عمتي ابتسمت واخذتني من ايدي // ياالله خلي نطلع

طلعنه وبقى عاصف وبعدها بشويه طلع وراح يجيب الدوا وهم رجع ع الدكتور حتى ايوصفله الدوا وبعدين مشى

گدامنا وركبنا بالسياره وامل اتكلي // باعي للمناظر اتخبل

عاصف يرد :: الازدحام كارثه

- - اي بس خويه بغداد حلوه

هو ما جاوب رن تلفونه رد

:: الو

:: هلا ابو كرار

:: الحمد لله احسن

::: اي جايين

:: هلا عمه هلا بيج

:: اي الحمد لله گال احسن

:: ها عمه

:: ها ان شاالله

  :: اي هسه اجيب امل

:: ااتصدگيين ما فكرت بيها

:: ياالله جايين

امل //. خير عاصف

:: ماكو شي

وصلنه يم بيت ابو كرار وعاصف دار على عمه امل :: انزلي انا وجدان عدنا شغل شويه ونرجع

- - جا ليش ما اروح وياكم

:: عمتي تكول رايدتها بشغله

- - خوش

:: احنه ما نتاخر

عمتي نزلت حتى بدون ما تاخذ رايي وهو دار عليه تجيين اتكعدين اهنا لو تبقيين بمكانج

درت وجهي ع الجامه ما جاوبته عرفت يريد ياخذني الاسواق لو للمول يشتريلي ملابس عباله اقبل ما يعرف

اني اكرهه واكره كل الموجودين هناك

بقيت باافكاري ما منتبهه الى ان شفت الاسواق الي كنت اروح اشتري منها

معنت شفت منطقتنا عرفت عاصف جايبني البيتنا اباوع اي اي هذا بيتنا

انربط الساني اكثر من المفاجأه هو نزل وفتح الباب ودخل السياره واني ما اوصف الي احس بي او خلي اكول ماكو

وصف الهيج شي فتحلي باب الصاله واهنا اني دخلت ودخلت وياي كل الذكريات

دخلت واني بين الشوق والحزن صرت اباوع الكل ركن بالبيت واشم بي ريحة اهلي اتخايلت امي منتظرتني وهي اتكلي

هلا حبيبتي اجيتي 

   صرت اباوع البيت نفس ما هو عبالك ما تاركينه هاي سنين نفس الاثاث المطبخ

والصاله نفس ما هو بس حسيت بي حزين مثلي دخلت الغرفة امي فتحتها اتخايلتها فاتحتلي اديها تريد تحضني

لكن شفت بس صورتها اباوع الغرفه نفس ما هي ما متغير بيها شي اباوع ودموعي هنه الي يسولفلن عن اشتياقي

والامي واحزاني

صدكو ما اگدر اكتب بعد عن الي صار وياي من دخلت للبيت وكانما روحي ردت

تمددت بفراشها وصرت ابوس بي واشمه واعاتب بصورتها واحجي وياها

= زعلانه اني عليج ماما لان تركتيني واني اساسا ما اريد الحياة

= هم تدرين بيه يئست وهم تعرفين اني ما اعرف الناس العايشه وياهم اي ما اعرفهم مره اشوفهم حبابيين

اومره اشوفهم اشرار

= لو انتي باقيه يمنا كان احنه لحد الان گاعدين سوا ومنتظرين هشام بس انتي استعجلتي وما فكرتي بيه ولا بااخويه علي

= يمكن انتي زعلانه عليه لان حاولت انتحر بس اني الي كل الحق لان كل الابواب انسدت بوجهي ناس تكرهني

وناس اذتني وناس غدرتني وما اعرف شنو راح اشوف بعد وخايفه حييل وتايهه واكثر خوفي من عاصف

= ماما اني زعلانه عليج هوااي

رحت للصاله وباوعت الصورة ابويه واتذكرت كل شي كان يسوي ويه امي الضرب. الاهانه والمسبه = وانت اكرهك هوااي

وكفت يم صورة رامي = وانت رامي انت راس البلا والسبب بلي صارلي

صرت ابچي بصوت عالي ومسموع حسيت البيت يخنگني ما ردت ابقى بي استغربت من روحي

هاي شبيه ليش ما اريد ابقى مو هذا البيت الي يوميه اتمنى ارجع واسكن بي ليش هسه ما اريد ابقى

فتحت باب الصاله واني ابچي واتفاجات بشي خلاني صراحه اخجل من نفسي

شفت عمو عاصف كاعد اباب الصاله البراني ع الارض وهو يمسح بدموعه عبالك مو عمو ذاك الشخص القوي والي

الكل يهابه ويحسبله الف حساب لا شفته يبچي حييل وبحركه اهنا لمت نفسي

= يعني اني زعلانه لان ضربني وهو جاي يبجي عليه ما اعرف على كلامي

بس اني الي صار بيه من راحو اهلي الي صار بيه هواي اشياء وكلها مصايب هسه

اني زعلت من عاصف الي باي لحظه ينفجر عليه ويجوز يقتلني مووت

اتذكرت كلام الدكتور من كلي المشكله انو الحياة رغم مساوىها واذيتها لكن تبقى حلوه او خلي نكول نبقى متمسكيين بيها

شافني واگفه هو گام باوعلي وحاجاني

:: انا اسف مو عبالج ضربتج لان حجيتي وصرتي عصبيه لا ضربتج لان شگگتي الكتب الي ترمت على مهدي يروح

يجيبهن كتله لو اعرف تبوكهن وما ادري منين دبرهن ضجت لان ما فكرتي بدراستج جان كل همج ...

سكت ما كمل ما اعرف ليش

تستمر القصة أدناه

سمعته واحس بعبرته وهو ايكلي ::انتي ما تعرفين شسويتي بيه شلون شلعتي كلبي ما خليتي لا نوم ولا راحه

:: مو بس اليه لا النه كلنه وياريتني اعرف شتردين بس من اتذكر مصيبتج وانتي تردين تنتحرين ابدي اكتلج

اموتج خلاص

فتحت عيوني ع الاخر هو هز راسه :: اي لان انتي ما تعرفين الناس شراح تحچي علينه من كلام انتي فكرتي بنفسج

ردتي تتخلصين من حياتج لان انا ضربتج

ولان مهدي الارعن شكك كتبج بس ما فكرتي الناس شراح تحجي عليج وعلينه شراح تذب من تهايم ولج

هو هشام كتل رامي وهو يدافع عن نفسه والناس خلت الف ان بالموضوع هييج الى ان ماتت امج

:: شوفي لو اكو بديل يخليج تعوفين ولايتنا وتجيين اهنا تكعدين جان انا اول واحد وافقتج بس ما كو بديل

::هسه اتكليلي كريم انا اگلج تره كريم حالته على كده ويادوب عايش ما اريد احرجه واخجله وما اكدر اعوفج

انتي واخوج يمهم لان هو عنده التزامات ولد وبنات وامه المريضه لذلك انتي واخوج ما الج اله بيت جدج واعيد واكرر

بيت جدج هو الي راح تبقيين بي على ما تتخرجين ويطلع اخوج بالسلامه

بقيت ساكته هورد عليه ::تدرين بسكتج دمرتيني

ما جاوبته هو اتنفس :: ها نرووح ؟

رفعت راسي هو ابتسم بعتب :: تردينه انمر على بيت ابو احسان مو خوش انمر وانتي ما تحچيين شگللهم

جبرت نفسي احجي واني مدنگه = اريد اشوف منار وخاله

:: تدللين ياالله امشينه بس اركبي بالصدر ما يصير يشوفوج راكبه وره

راح قفل الابواب الداخليه فتحلي باب السياره ركبت وهو راح فتح الباب وركب بالسياره وكفنا يم بيتهم هو خابر

::الو شلونك ابو احسان

::الله يخليك انتو وين

:: خوش افتحولنا الباب جايين نسلم عليكم

بسرعه انفتح الباب وابو احسان يكول //اهلا وسهلا

هو نزل اتسالم ويا ورجع فتحلي الباب نزلت شافني ابو احسان صار يحجي بفرح

:: خوله تعاي شوفي منو اجانه

طلعت خاله وبس شفتها رحت اركض عليها وهي حضنتني وتكلي // هله بريحة الحبايب

صارت تبوسني وهي تگلي // ما مصدكه تعالي منار تعالي شوفي منو اجانه

واجت منار الي شفتها صايره حلوه ونازكه حضنتني وهي اتكلي // وجد كلش مشتاقتلج حبيبيتي

وكعدنا وام احسان تسالني عن صحتي وليش هلكد متغيره خجلت اسولف الها اكتفييت كتلها

= صار عندي التهاب بمعدتي وكلش متاذايه

المهم كل الي كعدنا عد بيت ام احسان نص ساعه مع العلم همه لزمو بينه ع العشا بس عمو كللهم

:: مره ثانيه لان احنه معزومين

ودعتهم والدمعه بعيني وام احسان صارت تبجي وتكلي // بس تصير النه فرصه اجي لهناك واشوفج

واعرف كلامها مو صحيح لان تلث سنوات وهي لا اجت ولا سالت

ركبنا السياره ساكتين ودموعي ينزلن اتوقف بالطريق وباوعلي وبيده منديل وهو يحچي

:: امسحي دموعج ولا تبجيين اكو مطعم جدا راقي وحلو توه مفتوح ويقدم بوفي او انتي اتطلبين على ذوقج شنو

رايج نروح

باوعتله وسلهمت عيوني هو سالني :: ليش ما تحجيين شنو رايج نروح ناكل بي

حجيت بعدم اهتمام = يعني تدخل المطعم بدشداشتك هاي

باوع الها :: ها ليش اشبيها تره هذا اللابس دشداشه گدامج اي مكان يروحله يرحبون بي وكانه هو صاحب المكان لان

بهاي الدشداشه الي ما عاجبتج يصرف فلوس بدون ما يسال او يحچي

شفته ضاج بس صراحه واگفه ندخل مطعم حسب كلامه راقي وبمنطقه راقيه وهو لابس دشداشه صار يسوق ويدخن

واني ساكته اصلا اباوع من الجام مال السياره الى ان ركن يم فندق كبير ونزل وفتحلي الباب واجه ولد شاب

وهو ايگله // اهلا استاذ شرفت

:: هله بيك هاك بابا اركن السياره

- - صار استاد امسح الجام

:: ياريت

- - تدلل اخليها الك تلمع

:: تسلم يابطل

دخلنه واني ورا طبعا ما احجيلكم عن مقدار الاحراج حتى اني ما لابسه ملابس تليق بالمكان دخل واتلكو العمال

اهلا شيخ واهلا حجي واتفضل وشرفتنا

كعد ع الكرسي وهو يباوعلي اكعد مقابيله واجه العامل جايب المنيو خلا وراح حاجاني

:: شوفي واطلبي اي شي يعجبج وحتى اطلبيلي

بقيت ساكته هوقرب وجهه ع الطاوله وحاجاني :: لاتاخذين ابالج وما عليج بالموجودين وشلون يباوعولج لان بالنهايه

جيبج هو الي راح يحجي

حسيت بكلامه زعلان ومن اجه النادل هو طلب عشا على ذوقه لان اني بقيت ساكته وكللهم وهو يباوعلي

:: سوو سفري لان الست تعبانه

من كملو هو وكف وكال :: يالله خلي نروح

بعد ان حاسب طلعنا والعامل شايل العلاليك كدامنا وصلنه بالسياره هو انطا للعامل بقشيش وللولد الي ركن السياره

هماتين انطا ركبنا ساق السياره بدون ما يحجي الى ان وصلنه البيت عمو كريم اتلكونه هو نزل العلاليك

وكريم ايكله // شنو هاي عاصف

:: شنو عشا

- - مو مسويين

:: المسوينه خلو ما يخرب بس هذا شي ايشهي ياالله خلونه نتعشى انا كلش جوعان

بيبي هديه // ياالله بنات عاصف جوعان ( حركت ايدها ) ها عمه وين رحتو

:: افترينه شويه

هو طلع يمكن ايغسل وبيبي سالتني // بيبي وجدان شلونج

هزيت راسي

- - شو ما تحجيين

رديت = زينه

رفعت ايدها بالدعاء // ان شاالله زينه

سمعت صوت عاصف وهو يكول :: ام غانم

- - ها خويه

:: جايب شوربه خليها تشرب منها ولا تجبروها على شي خلوها براحتها تاكل

- -اي هو براحتها

راح للديوان وام كرار اخذت العشا الهم ورجعت خلت النه عشا كان عباره عن معجنات تركيه ومشاوي وحلويات ومقبلات

عمه كالت الي // حبيبتي اشربي شويه شوربه

= مو اخاف

- - منين

= تلعب نفسي

- - لا على مسؤوليتي واذا لعبت نفسج فالحمام قريب

صرت اخذ بالخاشوكهشويه شوربه واشربها ما اخفيكم كنت خايفه لكن معدتي عادي استقبلت الاكل

صرنا ناكل ام گرار كالت //. عاصف هواي جايب

بيبي هديه // هو كل ما يجي يجيب ويا

ام غانم // ما بيها شي غير بيت عمه

بيبي هديه // يابتي هسه وين اكو هالشكل هسه اخوك يدور وياك غلب

عمه امل هزت راسها // اي عمه هسه لو باقيين على ذاك التعرفونه كل شي ما محصلين بس لان بيد عاصف

بيبي هديه // تربية غازي وفرحه وعاصف جازى الربا

شالت عمه امل الصينيه وابو كرار دك الباب // ها نجي بعدجن

- - تعال يمه

- - ياالله السلام عليكم

- - عليكم السلام

- - بشرو اكلت وجدان

- - شربت خاشوكتين شوربه ولكمتين من هاي الفطاير

- - الحمد لله شويه شويه تستقر حالتها

- - ان شاالله

سالني // بس شلون تمتحنيين لا.

امل جاوبت //بكيفها محد يجبرها تريد تمتحن تريد تعيد شتكول عاصف

باوعلي وهز راسه :: اي بكيفها اهم شي صحتها

امل // يمته نرجع ان شاالله

:: باجر الصبح عندي شغله اكملها ونمشي

كريم // وين تمشون نسيت رحيم باجر عازمنا ع العشا

:: يابه ما بيناتنا

- - تريده يزعل بعدين كال مو بالبيت بالحديقه

بيبي هديه // عمه ماكو فرق من باجر وعگبه

كريم // اعتبر شغلك ما كملته اله بالليل تبات وتتوكل الصبح شويه غيرو جو

هز راسه وثاني يوم كعدت فايت وكت شربت شويه حليب اما الغدا فما اكلت بس تفاحه لان ما اشتهي والكل اشوفه يراقبني

لكن مو مثل قبل يحثوني ع الاكل بالعكس يعاملوني بصوره طبيعيه

بالليل طلعنا للمتنزه ركبت بيبي وعمتي وانا ويه عاصف وعمو كريم وعاىلته بسيارتهم رحنه وشفنا عمو رحيم جاي ويا زوجته واولاده اثنينهم. وبنته وجايه وياهم اقارب زوجته تدرس بالكليه ومرات تجي عدهم وصادف جايتهم ذاك اليوم

كانت حلوه ودمها خفيف وبسرعه تتوالف ويه المحيط الموجوده بي وصارت تساعد ام غيث بتحضير العشا واكثر

شي مهتمه بعاصف والكل انتبه الهذا الشي وفعلا كانت سهره حلوه غيرت بيها جو رجعنا للبيت ومن كعدنا

  عمو كريم يحجي ويه بيبي

- - يووم اني بعد ما اطلع اذا عاصف يطلع ويانه

  بيبي // ليش ياستار ؟

- - شنو ليش ما شفتي البنات تكولين بس هو موجود لو هاي كرايب ام غيث عبالك ما شايفه زلم ما عوزها اتكله تعال

اخطبني وكل شي عليه

  رفعت ايدها بالدعاء // الله يحفظه الشبابه عاصف حلو وثگيل ياهو مثله

   كريم // ها شو ساكت ما تحجي

:: شحجي ؟

  - - تريد اتفهمنا انت ما انتبهت الهذني اليباوعن الك

:: وشنو يعني

امل // عاصف شيخ الشباب اسم الله علي

  باوعلي ورد :: يمعودين لا اصدك روحي شو انا واحد لاعلم ولافهم انا ودشداشتي هذني يمكن يباوعن ويستهزءن

   كريم // شنو اتغشم روحك نسيت من رحنا العام الاربيل

:: اوو احنه ابختك

   كريم //. وداعتكم راح لابس بنطلون وقميص ومن عزمونه جماعته لبس دشداشه وعكال غير البنات وگفن بالسره

خو الرقمنه ما اسولفلجن عنهن وهو ولا بعينه

   عاصف هز ايده وبيبي كالت //. شو تهز بيدك

   :: هذا ابنج بطران

كريم //. انا بطران لان حجييت الصدك

بيبي //. تره كلنه شفناها البنيه شلون تباوعلك وما تحجي بس وياك

   :: خلي اكوم احسنلي

    بيبي // عمه على كيفك ويه روحك انت هم يرادلك

:: لا حجيه انا بالنسبه الي قافل هذا (وياشر على كلبه ) وشامر المفتاح بالشط

كريم بابتسامه // سالفه تفيدك هو بس يدك يامفتاح ياباب

         عاصف گال :: اتحضرو باجر نمشي

   بيبي // ما تبقون شكم يوم بعد

   امل // لا عمه شنبقى هاي النه ثمن تيام هم ياالله نرجع ما تشوفين امي كلساع وخابرت گلبها مثل النار

بيبي //. اي ام بدر مت عيني تخابر وتنشد هي وبهاء يجبس ذاك المجبوح ابد

كريم //. يمه

بيبي //. شني مچذبه

بقيت ساكته ما احجي اصلا ما الي خلك احجي والصبح بثمانيه توكلنه ورجعنا وعاصف يسال بعمتي اذا نريد شي

او يعجبنا نشتري شي ومن تسالني عمتي اكتفي اهز راسي

وصلنه ولكيت الكل منتظرني لكن حسيت اكثر واحد فرح برجعتي هو بيبي وعلووش وبهاء ورغم انو رجاء وفرح

لاكني واتحمدلي السلامه لكن احس هذا الشي مو من كلبهن او انهن مجبورات هالشكل يسوون اكيد يخافن من عاصف وبهاء

اما بيت مهدي ف اجت نهاد واتحمدتلي السلامه وباستني ولا كانه شي صاير

وبالليل مهدي جاب بناته واجه وكلي ابرود //. الحمد لله ع السلامه

   ساره وهاجر سلمن عليه وهالمره كعدن ما صعدن الغرفة فرح وساره هي الي سوت الچاي وجابت الفواكه ومحد

فتح موضوع مرضي او وين رحت او شسويت

وصارو بيت مهدي يجون بس مو يوميه ويگعدون بالصاله واني ابقى بغرفة بيبي ما اطلع ومرات مهدي ونهاد يجون

الغرفة بيبي اذا ما يلكوها بالصاله لو بالمطبخ ونفس الشي كلامي على قدر السؤال

وبدت الامتحانات واني ما امتحنت لان بالاساس ما طالبتهم بكتب وسويت هذا الشي بالضد من عاصف لان ما انسى

شلون ضربني واذاني ومحد حاچاني او كلي ليش ما امتحنت وكان هذا الشي ما يهمهم

وبقيت نفس ما اني شغلي اخلصه واروح للغرفه ما اتدخل بشي ولا احجي ويه حتى رجاء وفرح

مو مثل قبل مجرد ما تكمل عمه رجاء شغلها تصعد الغرفتها او مرات تروح البيت مهدي

    ورغم عاصف مو مثل قبل يحجي وياي لكن اكثر من مره طلب مني عاصف اني وفرح ياخذنه للزياره او يونسنا

واني ارفض واكتفي بكلمة ما اروح واگوم الغير مكان

وبيوم اجه عاصف وكلي

  :: ما تردين ترحين تزورين هشام

بقيت ساكته ما جاوبته هو رجع سالني :: مو احجي وياج ليش ما تجاوبيني باجر اروح اواجه هشام ترحيين لو لا

هزيت راسي رد حاجاني :: ليش تشلعين گلبي

  راسا جاوبته بدون تفكير.واني اتنفس بعمق = لان اكرهك

هالمره هو ضم شفايفه وهزراسه وطلع ومن يومها صار ما يحچي وياي واذا راد يسولف ويه بيبي يطلب منها تروح

الغرفته او للمضافه اما علووش فمااتغيرت تصرفاته ويا واني اشوفه اكثر من مره اخذه الصبح ويرجعون بالليل

وهو جايبله ملابس واحذيه وحتى العاب ومن سالته گلي اخذني للطبيب

اشوف علي كلش متحسنه حالته خصوصا وهو يسولفلي من يرحون للطبيب ياخذه ويفره ابغداد وكاعدين مطعم

وحتى من ياخذه اهنا للولايه يجي متونس واني اراقب كلامه من يحجي ما يتاتا او يبطي بالملام وحتى نفسيته اتعدلت

وملامحه اتغيرت للاجمل

وبيوم اجتي عمه انصاف هي وعمه امل كانن ايادن واجب العزاء بااحد اقاربهم وبيبي هماتين راحت هنه اجن وبيبي بقت بالفاتحه ومن دخلن كنت متمدده ع الجربايه هنه بوسني واني من شفتهن حضنتهن هذني عماتي احبهن بشكل لكن بعد الي صار

ما صرت اسولف وياهن اجاوب حد السوا

كعدن بغرفة بيبي وعمه انصاف سالتني

- - ليش عمه ما امتحنتي ليش ضيعتي سنه من عمرج

وقبل ما اجاوبها امل سالتها // اگلج هذوله جوارينكم خوش بانيين بيتهم

  - -يابيت ؟

  امل وهي فاتحه عيونها // ذوله الي بصفكم

   انصاف هزت راسها // ها اي الله يرزقهم خوش ناس ويستاهلون

امل ابتسمت بوجهي // حبيبتي وجدان جيبيلي بعد استكان هو جايج ما ينمل

اخذت الاستكان واعرف عمه سوت هالشكل تريد تحجي ويه انصاف وما تريدني اسمه

طلعت من الغرفه وكفت ما راحت للغرفه واني اسمع امل تحجي // شبيج انصاف مو عاصف گال خلوها براحتها لحد يضغط عليها

يمته ما يعجبها ترجع للمدرسه ترجع

انصاف // ما ادري محد گالي انا على مودها اكول حرامات ضيعت السنه وهي يتيمه الشهاده تفيدها

  امل // مو هي انصاف مو هي كله من جوه راس نهاد قرت براس مهدي وشكك كتبها والبنيه انتكست وضاعت عليها السنه م

انصاف // هسه هي ما تحجي ويه كل احد بس على كد السوال

امل // احسن خلي تتكفى شر نهاد

- - وعاصف شيكول ؟

  - - ما شفتي شلون متخبل عليها من رحنه البغداد يروح منا ويرجع منا ومن سالته يكلي امها وصتني عليها

  - - دومه عاصف شايل ضيم غيره

  - - اي وما شفتي شسوى بمهدي ومرته بالكوه كاضينه

  - - شتصصورين نهاد تجوز من سوالفها ؟

  امل // ما تجوز بس شنسوي اكثر التعب على امي تراضي هذا وتسكت هذا ما تريد تخسر عاصف الخاطر مهدي وما تريد نهاد تكول باعت ابنها الخاطر وجدان

  انصاف // وداعتج اموله ما تصير النهاد چاره ومهدي ما يعرف يتصرف سمعتيني من حجيت ويا وگتله خويه دير بالك

تره النسوان ما ينطن وجه ايگلي ها امي ترست راسج على مرتي

  امل // عوود هذا يحجي صدك

- - اي وحتى من عاتبته ليش هالشكل سويت ويه وجدان كال بت اخوي وبكيفي شريد اسوي بيها اسوي وهو وداعتج عاصف

حتى النفس عاده عليهم بس ما تصيرله جاره

امل // اي خطيه قليل عرفه

  - - اي

جبت الجاي وهي اخذته وتكلي // شو ما اريد شربت بالفاتحه

  ما جاوبتها سمعت سيارة عاصف اجت وكفت امل سالتني

  وين رايحه

   = ايهنايه وره البيت اشم هوا

  - - خوش احبيبه اطلعي وحركي رجليج

     رحت للبستان كعدت ع الجربايه مالت بيبي سمعت عاصف :: ياالله

فووت خويه هلا بيك

:: *السلام عليكم

عليكم السلام هله بيك خويه الله يساعدك

  :: الله يسلمج ها بعدهي ما جايه امي

  انصاف // لا عطلوها واستحت منهم كالت العصر اجي هنه نبن لا احنه نجيبها

  امل // چا انت ما رحت

:: شلون ما رحت رحت او وكفت امس كله واليوم رحت انا ومهدي عفته يمهم واجيت اشوف الجماعه

  امل // ان شالله خير احنه هم عطلنه بس انصاف ما رضت تكول تعبانه

:: ها شخيرج

- - لا خويه ما بيه شي بس رجاء واختها كالن يردن يجن للفاتحه وامي كالت ارجعي للبيت

  امل // اي ما تخلي وجدان لوحدها

   انصاف // خويه شو البنيه ما تحچي

   :: لحد تسالها خلنها براحتها

امل // اي انا هم كتلها

انصاف // جا وليش ساكتين اخذها السيد العارفه

   :: الله كريم هي وين ؟

   - - توها كبل لاتدش للحجره طلعت

:: شنو مسويات غدا لو اوصي جابر يشوي سمج

امل // بكيفك

:: خلص هسه اخابره

اجه واني بقيت كاعده گلي بدون ما يباوع الوجهي

:: من اجي انا وانتي تضوجين ما تردين اتشوفيني اطلعي روحي للمطبخ للهول لاتطلعين بره اله تستاذنيين لان

مرات اهنا موجودين عمال نجيبهم همه يشوفونج وانتي ما تدرين بيهم

دار وراح يمشي حاچيته بحده = تره ادري كذب

هو وكف بدون ما يدور عليه اتنفس :: خلف الله عليج سويتيني چذاب

شفته دخل هزيت ايدي واحجي ويه نفسي

= اشو داىما اجي يم بيبي ايهنا بس ولايوم كالت عدنا عمال

اجت عمه امل وهي تبتسم وجايبه وياها صحن بي فواكه وهي اتكلي // اشتهيتلج هاي التفاحه

  = شكرا

- - ادري شكرا اريدج تاكلينها كلها هاج حبيبتي لاتردين ايدي

اخذتها وصرت اكل عمتي باوعتلي وسالتني // شبيج ويه عاصف ؟

  رفعت اكتافي = ما بيه شي

  - - بس تره عيب اتطلعينه جذاب سمعتج من شباج حجرة امي

   بطلت اكل وجاوبتها = لعد اذا صدك ليش انتي طلعتي وكعدتي ايهنايه

  - - لن عاصف بعده ما جايبهم. لهنا عمه ليش هالشكل تحجيين ويه عمج. تدرين لو احد غيرج ناعته چذاب يمكن كسره اتكسر

= لان ظالم

اتنفست بعمق وعمه. حاجتني // خلي اكلج شي عاصف (اتحسرت ) استغفر الله عاصف.

عمه. ما كملت كلامها اتحسرت //. اووف بعد شكلج

ولج افتهمي لو ما عاصف موجود جان. الله يعلم مهدي ومرتهه شسوو بيج

    جاوبتها بحزن = بعد شيسوون

  هزت راسها // اي بس شفتيهم من رجعتي لليوم حتى من يجون حدهم للهول ومحد ايفك حلكه وياج لو بكلمه

تدرين ليش خلي اكلج بيوم ما اجه

عاصف ودرا بمهدي مشكك كتبج لزمه من ايده وطلعه بره بدون ما يحچي ويا ونهاد من شافت هالشكل راحت هي وبناتها

لن عاصف ما راد يطرد مهدي بلسانه ويطي النهاد مجال تحجي

وتالي غاب ساعه اكثر راح دفع باب بيت مهدي برجله وهو يصيح مهدي مهدي وينك

ومن طلع مهدي كمشه من ياخته وكعده هو ومرته وگله :: حچايه وحده مهدي تسمعها وتفهمها

:: من باجر اجيب امي وياها وجدان وعلي ايگعدون وياكم اهنا اجيب امي هي وغراضها وغراض وجدان واخوها

   وانت ما الك عليه بس شغلك تحمل بالسياره اطيك اجرتك وريع الكاع وما عليه لا بمصرف ولا بمسواك ولا بطبيب

وجدان واخوها يدرسون وامي وعلاجها واكلها وكل شي يخصها عليك ومرتك وبتك تخدمها ها وخلي ابالك وجدان

نفس الشغل التشتغله ابيتي تشتغله ابيتك

انا شلت ايدي منك ومن مصرفك ومن فروخك

ومهدي ينشده // وليش كل هذا

:: لان تدخل البيتي وما تحترمه

   - - انا ما سويت شي

  :: متاكد

  - - هي السانها طويل وانا فقدت اعصابي وشككت كتبها

  :: اي انت عمها ما بيها شي تولي طبها طووب هسه انا خليتهم يلمون غراضهم ويجونكم اهنا وانت دبر روحك

بعد انا ما عليه بشي

  مهدي // شني عاصف اتهددني ؟

:: مثل ما سمعت البيت الي تدخله وما تحترمه يتعذرك وما دام بي امك واولاد اخوك ف اخذهم يمك وانت كوم بواجبهم

مو تگول انا عمها ومسؤول عليها خليها يمك وگوم بواجب امك واولاد اخوك

طلع ونهاد لحكته وتتوسل بي // يا عاصف ما تدري بمهدي عصبي

:: ادري بي بس انتي الما تدرين بيه من اخرب احرك الاخضر واليابس

  - - هو ما سوالها شي امرها على جاي وهي صارت تنفخ

:: حكه بكل السوا حگه عمها ويكسر راسها بس وين اهنا ابيته

  مهدي // خلي نهوده عاصف اتمگطع بينه

:: اي مثل ما تگول اتمكطعت ما شاء الله عدك سياره وعدك كاع واطلع ازرعها وعيش من ريعها هاي فلاليح عدي الهم ربع

من الشغل وعدهم عوايل يعيشون من السنه للسنه ما فد يوم واحد اداين مني لو دينار

نهاد // صدك خويه وانت الله يطول عمرك ما مخلينه نعتاز شي واذا على وجدان عمها وحجى عليها

:: لا عمها مو بس حجى عمها شكك كتبها واسمعي نهاد اريد كتب وجدان تشترونهن اتبوگونهن اريد الكتب ما ناقص

منهن ورقه باجر

- - اي تدلل ابو فرح انت بس لا تزعل انا اجيبهن واجي انا ومهدي

:: لا اذا تردون وجدان وعلي يبقوون عدي انتم بعد ما تجون حدكم للمضيف اشوفون امي والكتب تطونهن الي

        

وجابوهن راحو ما ادري منين دبروهن وانتي ما قصرتي ويا شككتيهن گدامه حتى ما احترمتي وجوده

وبسبب عنادج راحت عليج السنه وهو ما يقبل احد يحجي وياج يكول خلوها بكيفها براحتها

وشفتي شلون طاير عقله من اتمرضتي يركض منا ويجي منا تالي اتكليله جذاب

روحي اتاسفي من عاصف واتذكري تره هو زعلان عليج من جنه ابغداد وجاي يحجي وياج محايا. حتى محد

ايكله هايه الزامطتنه بيها حتى احترام ما تحترمك

عمه راحت واني بقيت كاعده بمكاني واني خجلانه من تصرفاتي صحيح عمو ضربني بس اني استحق لويش شككت الكتب

شكنت. اريد منه يقتل مهدي يقتل اخو

اني هروح اعتذر منه بس ابقى ما اتدخل بااي شي لا ويا ولا ويه غيره

رحت. اتمشى بنفس الطريق الراح منه اعرف هو يم البحيره شفته كاعد وبيده حجار زغيروني يشمره وصلت يمه

هو شافني ما سالني بقى يشمر بالبحيره اتقربت

= اني اسفه

ما جاوبني كعدت بصفه وهم اخذت حجار زغير وصرت اشمر بالماي

= عمو اني اسفه

   جاوبني بزعل :: على شنو ؟

  = لان اتجاوزت بكلامي اني غلطانه

:: لا انا الغلطان اصلا انا ابيع شجاعه وبطوله وما بيه كل خير

  باوعتله وشفت التعب بوجهه = عمو سامحني ما اريدك تزعل مني

  = حباب عمو لا تزعل عليه

     نفخ. :: لا تضوجين ما زعلان

= احلف

:: بدون حلفان

   شمرت حجاره بالبحيره وحاجيته = تدري عمو اني شكد احبك

   ابتسم :: شكد ؟

   = بكد ما انت تحبني

  :: مني گال انا احبج

  رفعت اكتافي ==بكيفك عمو المهم اني هوايه اسفه واعذرني هوايه اذيتك واني هوايه احبك

  :: ياالله روحي لحد يجي ويشوفج

  = وانت ما تجي

:: لا باقي شويه

= لعد ابقى اهنايه الى ان نكوم سوا

وكف :: ياالله امشي

بقيت نفس ما اني ما اكدر اتجاوز الي صار بيه الشي الي تغير صرت مرات اسولف ويه بيبي واطلع وياها للبستان

واخلص شغلي بدون ما اتدخل بعمه رجاء او بنتها اما بهاء ف احاول ما اشوفه من يجي بالليل داىما بغرفة بيبي واذا

يصدف ايشوفني بالصاله. فتكون بيبي موجوده وكاعده يم بيت مهدي يسلم ونرد السلام كلنه

يعني ما يشوفني ابحدي

تستمر القصة أدناه

تقريبا وره تلث تشهر من رجعنه من بغداد الظهر جاي نتغدا وبيومها بهاء كان موجود لمن ما رن تلفون عمو وهو رد

  :: الو

  :: هلا. شلونكم شخباركم

:: هاا لا باالله وهسه

  :: تحجي صدك

:: جاييك جاييك.

بيبي سالته // ها يمه عاصف خير

اتنفس وكال :: ام كريم طايحه مريضه وتلح عليهم رايدتج انتي وجدان ياالله بساع بدلن وخلي نروح

من سمعت بيبي هديه كلش مريضه وطالبه اتشوفني صرت اشهك بالبجي عاصف شافني

:: ليش تبجيين

= بيبي مريضه

:: ياالله استعجلن خلي نروح

لبست بنطلون وقميص ولبست عباتي الاسلاميه ورحت واني اشوف شي بعيون عمه رجاء ما عرفته شنوو بهاء كال

اجي وياكم

لكن عمو عاصف كله :: نرجع وانت روح عدنا شغل مو لازم انتيهه

ورحنه وعمو صار يسوق بسرعه وكانما يسابق الزمن حسيت انو بيبي مريضه كلش واحتمال ما نلحك عليها

صرت استغفر واطلب من الله ان يمد بعمرها

وصلنه تقريبا بالليل ع الساعه تسعه بسبب الازدحام رالتقاطعات وكل شويه مو كفتنا سيطره دخلت بغداد احس حتى روحي ردت صرت اباوع للشوارع الي بهاي المده اختلفت هواي وكانما يوميه تنبني بنايه او سوق اوشارع او جسر

وصلنه وعمو رحيم فتح النه الباب سلمنا كان باين على وجهه الحزن وكال اتفضلو

دخلنه ورحنه گبل للغرفه اني حتى ما سلمت فتت الغرفتها الي من اجي الگاها گاعده بيها رحت وامامي صورتها وهي

كاعده ع القنفه الخشب ورافعه اديها تريد تحضني لكن من دخلت شفت بيبي نايمه ع جربايتها ويمها خاله شيماء وام كرار

وصلت وشيماء اتكلها

- - يمه هاي اجتج وجدان

حضنتها لا اراديا وصرت ابچي وهي اتكلي بصوت متعب وگوه ينفهم

- - لا تبچيين حبوبه هله بيج

اجت بيبي وسلمن عليها البنات ودنگت عليها باستها وهي اتگلها // خيه ام اكريم خطاج السو اسم الله عليج شو اكعدي لاكينه

جاوبت بتعب وعبره // بعد ما بيها فرحه ما بيها لابد منها

بيبي //. اسم الله عليج شني متعجبه كلنه نتمرض

اتنفست بعمق // ما اوصيج على اليتيمه محد الها عگب الله بس انتي كلهم احسن منها

بيبي // هاي يمي وين تروح

طاحن دموعها // ايي عينج عليها ما دامج عدله

سمعت صوت عمي عاصف وهو يگول :: ياالله

وصل يمها ودنك عليها :: عمه سلامات ما تشوفين شر

وباسها براسها

ردت بتعب // عاصف ؟

:: اي عمه

- - ااطيني ايدك

لزمت ايده حييل // لا تنسى الامانه عاصف

كانما تريد اتقربه هو رد :: ها عمه

دنك عليها اكثر وكانما تشاوره بصوت مسموع // لا تدولبها خطيه جاهله دير بالك عليها تره ما الها احد الله وانت

:: بعيني حجيه لا توصيني

- - الله يوفقك ويحفظك

ونت وصارت تسحب بالنفس قوي كريم گال // خلي نگعد بالاستقبال انتو جايين وتعبانيين سوون عشا

عاصف :: منو يشتهي بس خاف امي

بيبي // اريدلي جاي

شيماء// دا تعاي عمه اكعدي وارتاحي

عاصف طلع ويه كريم واني وبيبي رحنه للصاله واجت خاله شيماء بيبي نزعت جواريبها وهي تسال

- - شني شبيها

ام كرار // صخنت وارتفع عدها السكر والوكعه وكعه

بيبي // ااخ ياخيه ياام اكريم ما تستاهلين ياطيبه

شيماء حاجتني // كومي خاله غسلي واكليلج لكمه

بيبي // الدرب كله وهي تبجي وبسكته وكل شي ما خلت بحلكها اشوا انا عاصف جابلي لفه وجاي اله هي ابد كل شس ماكو

اتگولين صايمه وبس دموع

شيماء // تكومي يابعد خالتج

هزيت راسي ورحت غسلت اتوضيت وصليت وبعدها زوجة عمي رحيم بيداء جابت عشا كباب اعروك وباذنجان وطماطه وصمون وخلته گدامنه وبيبي گالت ياالله حتى انتي شيماء وانتي ام كرار ياالله كلجن تعالن اتعشن اخذت صمونه وخليت بيها كبابيه عروك وشويه باذنجان وطماطه وعمه شيماء صبتلي كوب جاي وبيبي سالت

:: عاصف اتعشى

بيداء // اي عمه صبيت الهم

خاله شيماء سوتلي لفه ثانيه اني جاوبتها = شبعت خاله

بيبي كملت وراحت غسلت ورجعت للحجره يم بيبي هديه الي خاله ام كرار ما تركتها لمن ما خاله شيماء اجت يمها

واني هماتين رحت وكعدت يمها كانت نايمه ونفسها عالي كلش واحنه الي يمها لا حول ولا قوه

بيبي سالت خاله شيماء // هم خابرتو اهناك

- - وين خاله ؟

- - اهلها

شيماء// خاله هو منو بقى بس خالتي ام حاتم وهم كاضيه وكريم ما قبل نخابر

بيبي // ليش غير اختها واولاد اختها واولاد اخوتها

شيماء اتحسرت //. اااخ يايمه خاله كريم يگول يجون البغداد وما يمرون ولا مره رفعو التلفون وسالو

بيبي // مي خالف يجوز هي تريدهم كريم لا يخلي بذمته

بقينه كاعدات. يم بيبي الي كعدت وهي تهذي ومن اتقربت عليها خاله شيماء سمعتها تنده باسم ابو عمو كريم يعني

زوجها وباسم اخوانها وهذول كلهم متوفيين اني استغربت ليش. ما ياخذوها للطبيب

واجه عمو عاصف هو وعمو كريم ورحيم وكعدو اني حچيت

= عمو ليش ما ناخذ بيبي للطبيب

جاوبني عمو كريم. //. اخذناها بابا

=. مي خالف رجعوها

هز راسه // اي باجر. ان شاالله

= ليش مو هسه

خاله شيماء //. الطبيب شيسويلها خاله

   = يعني انتو من اخذتوها هالشكل

- - اي خاله الله. ايعينها

  حسيت بكلامها انو ... جاوبتهم = يعني تبقى هالشكل

  كريم // منا للصبح اذا ما تحسنت. نرجعها

بيبي كالت //. عمه غير اتخايرون اختها ولد اختها اولاد اخوتها يجون

رحيم رد // عمه عليمن نخابر همه صار سنين ما مارين

- - مي خالف بعد. هاي موت وحياة

كريم // لا عمه شنو اروح اعزمهم امي مريضه. هي چانت يوم والثاني تخابر شو من وكعت الهسه محد كلف

نفسه وسال

بيبي // بكيفك بس گلت خاف هي تريد اتشوفهم

كريم // لا عمه شنو من تكول اريدهم امنعهم ما يجون. قابل شبيناتنا بس هاي ام كرار اساليها من اتمرضت وچانت

بوعيها رادتمن كلساع وكالت جيبوهم الي

ام كرار // عمه من وكعت بالبدايه عبالها مثل كل مره بس من اتمرضت كلش رادتج ورادت وجدان وعاصف

صارت بيبي تبجي // سوده عليه خيه ام كريم ياخيره ياطيبه يا صاحبة العمر

اني هماتين بجيت واني گاعده ع الجربايه من. يم رجليها فرشولنه بالغرفه يمها وعاصف. راح للديوان اني اتمددت

وبيبي هي وخاله شيماء بقن ايسولفن. واحس بخاله كل شويه وگامت ومرات اسمع ونات بيبي غفييت وسمعت. الاذان

ياذن گعدت اصلي خاله هي وبيبي نايمات رحت اتوضيت ورجعت فرشت. السجاده وصرت اصلي من كملت ندهت بيبي

حتى اتصلي كعدت خاله. شيماء وبيبي هم گعدت گالت اذن

=اي بيبي اني صليت انتي اكعدي لتوضي

راحت بيبي وخاله شيماء سالتني // هم شفتي بيبيتج

= اي قبل شويه صارت تون ورحت لمست كصتها زينه ما بيها صخونه

- - الله كريم خلي اروح اتوضى

بيبي صلت بالغرفه وخاله شيماء يمكن بالصاله بعدها اجت خاله. اتقربت على بيبي هديه وهي تحجي

- - يمه يمه

- - يمه يمه

لمست خدها وخلت ايدها على كصتها فتحت الگلوب وخاله اتكل البيبي عمه شوفي نفس امي

بيبي اتقربت وصارت تبجي //. ويلاه يم كريم خيه

بقيت اباوع البيبي وشلون النفس مالتها يوصل للحنجره وفجاه كل شي اتوقف شيماء عاطت // خاله امي ماتت

اني صرخت بصوت عالي بحيث الكل كعد

بيبي هديه الحنينه راحت وما عادت ترجع راحت مثل ما راحت ماما وراح رامي

صرت ابجي وانا اشوف نومتها الملائكيه وضحكتها الحلوه او وصاياها الي

خالتها الوقت احتاجها بي كلش وهذا الوقت اني الي اعرفه يمته لكن الي صار. مكتوب

لا اراديا بستها وحضنتها

الفصل الثاني والثلاثون من هنا 

شكرا لزيارتكم عالم روايات سكيرهوم