رواية اغفري لي الفصل الواحد والثلاثون بقلم أوتار حزينة
ليلى
گلبي هبط من سمعت اخر شي سالته
بخوف
«،،،ليش انت شسويت هناك وخايف تحجي
وتخسرني
ماكدر يرفع راسه ولا حجه شي شهگت
وكتله بصوت يرجف
«،،،،عرفت نسوان قائد
«،،،ليلى والله جنت اشرب وافقد كتلج صرت
انسان ثاني هناك
عبالك هو بأيده ضربني بقوه على گلبي
سحبت روحي منه لزمني دفعته وصحت بي
«،،،شلون كدرت تسوي هيج شلون قاائد
كدرت تخوني
«،،،ولج افهمي اني ماجنت بوعي اشرب
افقد الوعي ومااعرف بروحي شكاعد اسوي
ولا احس باي شي
كمت اريد اطلع وكف كدامي وصاح
«،،،وين رايحه
انهاريت بالبجي اردد
«،،،ووخر من كدامي اريد اطلع من يمك مااريد
اظل هنا
قائد
حجيت الي بگلبي وشفت اثره بيها تخبلت
وكامت تبجي حجيت
«،،،،ليلى اني حجيت الي بگلبي الج لان ماردت
اظل ضام هالشي عنج
«،،،،وليييش هسه حجيته
صاحت بي وكملت بشهكه
«،،،ليش ماحجيته قبل لانزوج
سكتت كملت بغضب
«،،جنت تعرف بس اعرف ماراح اقبل بيك
موو
«،«اي خفت من بعد الرضى احجي واخسرج
مره ثانيه
«،،،وياااريتك مااحجيت ياريتك سااكت قائد
ولا كايل هالكلام
حجت هيج رادت تفتح الباب
وكفت جدامها وصحت
من قهري
«،،،،ولج والله ماجنت بوعي
رادت تطلع گضبتها صرخت بيه
ودفعتني
«،،،لااااتزلمني
«،،،،ماراح اگضبج بس اهدأي واكعدي ولج
والله خايف عليج لايصير بيج
شي وافهمي اني هناك
تغيرت مو قائد
الي جنتي
تعرفي
صاحت بيه
«،،،وواني ليش،،ماتغيرت ليش ظليت احبك
ماكدرت احب غيرك ولا كدرت
اخلي عيوني بعيون شاب
سكتت من اختنگت بالبجي وكملت
«،،،ليش،،،،ظليت وفيه لواحد طلع
مايستاهل
«،،،،اني مااستاهل ليلى اني الي من سمعت
بيج راح تروحين من ايدي وكعت
من طولي وردت اموت
جاوبتها وكملت بقهر
«،،،اني من حجيت الج هالشي ردتج تعرفين
المضموم بگلبي ردت اخلص من حمل ثگيل نايم
على افادي ومو ندمان لان حجيت
لان تعبت واني ساكت
وضام هالشي عنج
«،،،،روح مناا مااريد اشوفك
صاحت بيه الباب اندك فتحته طبت خالتي
شافت وضعها سالت
بخوف
«،،،هاي شبيكم صاير شي
عبالي راح تحجي السمعته مني بس
هي جاوبته بشهكه
«،،،،لاا ماكو شي
كعدت يمها وسالت ادحك عليه
وعليها
«،،ولج شنو ماكو شي وانتي صاير فد
مره وتبجين
سكتت بعدين جاوبت
«،،،يريدني ابطل من الدوام واني ماقبلت
«،،،غير خايف عليج ياماما من الروحه والجيه
وانتي هذا وضعج
ماكدرت اظل يمها كلت
«،،اني طالع
غاده
الحجي من سمع نريد نعزم رغد وعيالها كالو اعزمو الكل وياهم ضجت لان ذيج راح تجي
ورانيه هم ضاجت وكالت
«،،،،اي وهم نوكف وحدنا نطبخ وننفخ وهنا
يجن حاضر محضر ياكلن ويطلع محملات
ويحجن علينا
عمه جاوبت
«،،،يمه مشيها لخاطر جدج تعرفي يحب اللمه
سكتت بس مبين عليها القهر وضايجه كلش
واني هم جنت مثلها بليل من كعدت وي حمزه حجيتله الي صار كال
«،،لاتعبن روحجن انه راح اجيب مناسف
قوزي لحم وسمج شوي
«،،،،والله اني لو اكدر الي اوكف وياها بالطبخ
بس تعرف وضعي واخاف لا يصير
بيه شي من وره الشغل
««،لاتعبين روحج بويه وكولي الها هي هم لاتعب
روحها الاكل يجيجن جاهز والولد يخلوه
انتن بس وجهن
«،،تسلم ماتقصر ابو علاوي
الوجه ضحك ورد
«،،،ادللي يبعد ابو علاوي
«،،ابني تحرك بطني انتبه سأل
«،،ها هم بدت الوكاحه
«،،،اي
جاوبته بخجل شفته صافن وملامح وجهه
تغيرت باوع عليه تردد بعدين
گال
«،،،اكدر اگضه
مارفضت هالشي هزيت راسي بأي بس خجلانه منه خله ايده على بطني ابتسم وحسيت بي فرح
بعد اكثر وتاثر كلش كال
من باوع علي
«،،،انه مااريد من الله غير ادكومين بالسلامه
واشوفج انتي ويا بخير
«،،،خايف عليه حمزه
ذب حسره وجاوب
«،،اي خايف وشايل همج وماراح ارتاحن الا
اذبين حملج
«،،اني هم اريد اجيب واخلص عاد لان تعبت
كلش
«،،هانت بويه ماظل غير شي قليل ويجينا علاوي الوكح
سكتت افكر بذيج الي راح تجي واني اعرفها
خاله عيونها علي انتبه سأل
«،،،خير غاده بيج شي
«،،،ها لا
رد مركز بملامحي
،،،لا بيج شي ليش انه مااعرفج ضايجه
من شي لچن شنو هو مدري
باوعت اله والغيره لاعبه بيه لعب
اذكر نظراتها اله كمل
مبتسم
«،،احجي بويه شنهي الي مضوج جمره
گلبي
جاوبته بضوجه
«،،ماكو شي
صفن عليه الوجه يضحك سالته
«،،شبيك تضحك
«،،،لا ماكو شي
«،،لا اكو شي گلي شبيك ضحكت
«،،،كتلج ماكو شي
«،،،،جذاب
«،،،ههه مقبوله منج يارمش العين وهدبها
«،،حمزه احجي ليش ضحكت
خله عيونه بعيوني وجاوب مبتسم
«،،،تغارين
«،،،،اني اغااار ومن منو من كوثر عشتو والله
جاوبته وفضحت روحي ضحك وكال
«،،،عدالي تغارين عليه منها
باوعت علي وجاوبته بغضب
«،،،اي اغار عليك من عيونها
من نظراتها لان شفتها
شلون من تجي ماتشيل
عيونها منك
حمزه
جانت كعدتي يم غاده تخردل حالي قبل
لا دگلي هي تحبني ومن كمت اكعد وياها بعد
الاعتراف حالي تخردل بعد اكثر لان
كمت اشوف منها شغلات تخبل
وكلام ياخذ العگل
شفتها شلون تحجي بغضب وجاتلتها الغيره
عليه من كوثر بنت عمي وخلتني
اصفن عليها هايم بهل
الخلقه وبهل الكلام
الي كمت اسمعه
ويفرح گلبي
مارديت سويت فعل گضيتها
بهداوه وبستها اريدن نفسها يطب بصدري
مايطلع ابدا ضاعت بين ايدي
وردتها متت عليها
وانتهيت بذيج الليله وهي وياي شوفتها مره
قساوتي وكرهي وهالمره شوفتها حبي وحنيتي
تمددت،،،، هي بين ايدي مرتاح
ومبتسم وكل ساع اعاين
الها مو مصدك الي
سمعته منها
جانت تهذي باسمي وبجلمه احبك
حمزه واموت عليك
كلت هايم بيها
«،،،ولج انه عيوني قفلت عليج هي وگلبي
وبعد مايشوفن غيرج انتي
«،،اي خلي مقفول لا تعرف شاسوي بيك
«،،،،هههه مقفول بويه ومفتاحه يمج
قربت وجهي يم وجهها مبتسمه وخجلانه
مني كلت
«،،،،شسويتي بيه خبلتني وانه العاگل
جاوبت بغرور لايك الها
«،،،يمي مايظل عندك لا عقل ولا رأي
صفنت بعيونها وجاوبت
«،،،،وانه اشهد يمج انه مو انه اصيرن
واحد ثاني وراضي بهل الشي واختم علي
باسمي وگلبي
اجت لحظني لميتها بي اريد اضمها
جوه ضلوعي هلكد مااحبها
مهيب
دخت وماعرفت شلون اكدر ارجع حنين لبيتنا
لان اهلي ظل بالهم عليهم وشفتهم انقهرو
على بنتها لان تعلقو بيها كلش
رجعت من الدوم ساعه عشره الصبح لان جانت عندي خفاره مهموم ومقهور وكاره حتى
نفسي وكفت يم باب المطبخ من
سمعت امي تحجي بفرح
«،،،،يمه البنات عشره واگول قليلات
طبيت گلبي فز من الفرح من شفت يمامه
بحظنها سلمت هي كالت
««،،شوف من اجانا اليوم
مشيت ليم امي دحكت على بنتها وهالطفله
مااعرف ليش كلنا حبينها وطبت بگلبنا
كلت
«،،هلا بيها
امي باستها وكالت
«،،،يمه عبالك اخذت بيتي وراحت وي امها
ماجاوبت خاله ام ياسين سالت
«،،،تريد ريوك
«،،،لا مااشتهي اروح انام
جاوبت ومشيت من يمهن ادور عليها لان ردت
اعتذر منها ماكو جوه صعدت لفوك
وكفت بالصاله من شفتها اجتي
من السطح شايله السله
وكفت والملامح تغيرت للضوجه
ردت احجي ماطلع مني
كلام هي مدت ايدها
بجيبها طلعت ضبه
خمس وعشرين
وكالت
«،،،،هاي فلوسك اخذها
«،،،،خليهن ام يمامه واعتبريهن هديه لبنتج
«،،،،مااريد اي شي منك بس تعوفني
بحالي
«،،،،،والله بعد مالي شغله بيج والصار اني
يعني مااعرف شلون سويت هيج وكرهت
روحي لان خليتج بهل الموقف وخليت
عيونج تبجي
ماردت كملت
«،،اني اريد اعوضج عن الصار لان انتي خلصتني
من الموت وصرتي صاحبه فضل عليه
«،،، مااريد كلشي منك بس خليني اعيش
واعيش بنتي
روحي انمردت عليها من شفت الدموع نزلت
كلت
«،،،والله وداعه امي ماراح اذيج بعد واني
عند عيناج اي شي تحتاجي بس
امري ام يمامه تلكي يمج
«،،،كتلك مااريد شي منك اني ساده روحي
وبنتي بس
سكتت سالت
«،،بس شنو ام يمامه امري عيوني الج
خلت عيونها بعيوني وجاوبت
«،،،،بس خاف الله بروحك وباهلك لان هم
مايستاهلون الي كاعد تسوي بيهم
حجت هالكلام ومشت من يمي خلت الفلوس
على ميز قريب مني ونزلت لجوه
هالكلام جنت اسمعه من
ناس جثيره ماجنت
اهتم اله
ولا ادير بال بس ليش هي من حجت وياي
حسيته دك بعظمي ووجعني
كلش
جنات
ابراهيم اجر الي المشتمل الي اكبالهم وبعت
كم قطعه ذهب واشتريت اثاث
مستعمل ارتب بي ودمعتي
بعيوني
اذكر ذاك بيتي الي اشتريته من فلوسي شلون
اثثته كلشي حلو وغالي وماخليت شي
بنفسي ماسويته بي
وتالي راح من ايدي وصار لواحد غدرني وكسر
ظهري وتندمت ندم جبير لان وثقت بي
وسلمته كلشي بحياتي
بس فرحتي بهل المكان نغصوها عليه اهلي
ثاني يوم ابويه اجه هو ومهند
لبيتي جان ابراهيم يمي
وهو واختي من طبو
وكعدو ابويه نتر
بيه بعصبيه
«،،انتي شلون اتاجرين بيت وتكعدين وحدج
وليش،،ماكلتي ماحجيتي شي النا
««،،تره كلت لامي شنو ماحجت الك
جاوبته صاح بيه
««،ااني ابوج وجان لازم ادكولين اليه قبل
امج
«،،،وهسه عرفت وين المشكله اذا كعدت
بيت وحدي
«،،،،لا بله صدك تحجين ليش ماتعرفين وضعج
ماتعرفين انتي صرتي وحده مطلگه والناس
ماراح تعوفج بحالج وراح تحجي
عليج بالطالعه والنازله
من تشوفج كاعده
وحدج وتروحين وتجين بسيارتج
مهند حجه وانهديت بي
«،،،اشگ حلك الي يحجي عليه واذاا اني ماشيه
عدل بحياتي ليش الناس تحجي عليه
واني لا اول وحده تطلگت ولا اخر
وحده
«،،،عم تره جنات ماراح تكعد وحدها ابني
يوسف راح يكعد وياها واحنا اگبالها
اي شي يصير عليها اني موجود
واكدر اتصرف
«،،،وانت منو يابه اب اخ حتى تظل رايح
جاي عليها
مهند جفص دانيه انهدت بي
«،،،موو شفتك انت دورت عليها وسالت وكلت
عندي اخت اشو لا انت ولا ابويه
اجيتو وشفتوها ولا وكفتو
وياها من طلعت زعلانه من بيتها
ولحد هاي اللحظه انتو شايلين ايدكم
منها
«،،لاتصيحين ولج
مهند صاح بيها ابراهيم كام وخزره حجه
باعصاب
«،،،اسمع ولك اني تره متحمل الك صارلي جثير
وساكت الك لخاطر عمي بس والله
اذا سمعت منك بعد قله ادب
وي مرتي او جنات
لا اشوفك شي
مو شايفه
«،،سمعت يابه شفته شلون يهدد بيه
ابويه كام وانهد بابراهيم
«،،عيب عليك هالحجي وتره ينحسب عليك
واكدر احكك بي جدام اهلك
جاوبته بعصبيه
«،،،يابه انت شتريد
«،،،اارجعي لبيتنا واكعدي هناك واسكتي
«،،واني ماارجع لان ماارتاح يمكم اني اجيت يمكم
كم يوم لعبتو بيه طوبه انت وامي وهذا
الي اجه قبل كم يوم يريد
مني سيارتي
«،،اي مو انطيتي بيتج لذاك العار الي
اخذه وازوج عليج وضربج جلاق
«،،اااني الي ضربته جلاق
صرخت بابويه ارجف من غضبي،دانيه اجت
ليمي لزمتني كملت بخبال
«،،ااني الي طلكت كريم مووو هو الي طلگني
اني الي بعت كلشي واشتريت كرامتي
مهند صاح بيه
«،،سددي حلكج ولج لاتصحين على ابويه
فقدت وصحت بي
«،،سد حلكك اانت ولاتخليني اسوي شي
يخليك حتى خلقتك بعد ماتگدر
تشوفها اليه
«،،،ولج تهددين اخوج
«،،اااي
صرخت بابويه وكملت وي مهند
«،،والله اذا بعد غلطت علي او شفت وجهك
هنا او تعرضت اليه بكلمه مره اللخ گبل
اروح اشتكي عليك واخليك
بالسجن وانعل ابوه
الاخوه لو بو الدم
الي يربطني بيكم
سكتت وكملت باعصاب
«،،وتعرفوني ااسويها وصارت عندي سهله
الروحه للمحامي والمحاكم
جر بوشه وكام يمتم
«،،كووم يابه خلي نطلع الظاهر اني وياك
بعد مالنا كلمه على بناتك
«،،اي مالك كلمه غير على مرتك هاي اذا
جانتلك كلمه عليها
دانيه جاوبته ابويه رد بغضب
«،،شوفي ولج اني طالع بس والله اذا سمعت
عليج كلمه منا او منا الا اسوي
بيج شي مو صاير
«،،،،،لاتخاف ماراح تسمع وروح انت بيض
صفحتك كدام الناس بعد ماسودتها انت وهذا
اشرت لمهند وكملت
«،،،من طعنتو بشرف ليلى بنت عمتي ندى
تذب الابره تنسمع بذيج اللحظه مهند
ردد
،،،امشي يابه امشي
طلعو من يمنا كعدت مهدود حيلي ودمعتي
نزلت ابراهيم كال
«،،استغفر الله ياربي شاحجي والله
مااعرف شأكول عليهم
«،،كول عاارات ماراح نزعل
دانيه جاوبته تبجي كعدت يمي تردد
«،،حسبي الله عليكم من اهل لا خليتو النا قدر
بين الناس ولا خليتونا بحالنا
اول ليله بيتي بجيت الما عميت من وره
قهري من اهلي ومن كريم الي طلع مثلهم
لا سند ولا امان
الشقيقه هاجت وصرت فد مره ردت اخذ
اجازه بس رصيد ماعندي وخديجه
مجازه واني مكانها كلت
خلي انام بلگي اكعد صايره زينه
بس لا نمت ولا هدأ وجع راسي بالعكس
زاد
دوامت الوجع يدك بقوه وموتني حتى
تركيز ماظل عندي بصعوبه وصلت للمصرف
مانزلت كعدت بسيارتي مغمضه
عيوني بقوه لان حتى
الضوه يتعبني ويزيد
الوجع
سمعت دكه على الجامه فتحت شفته
استاذ ارشد عدلت روحي وفتحت الباب نزلت
سأل
«،،،خير ست جنات بيج شي
«،،،ها لا مابيه شي
جاوبته اتجنب اباوع اله ماحجه شي مشى
من يمي اخذت جنطتي وسديت الباب مشيت
وراه كم خطوه
الم ضرب راسي بقوه ووكعت اصيح
«،،اخ يمه
ارشد
رحت للدوام وصلت شفت سياره جنات
واكفه وهي كاعد بيها نزلت عيوني عليها مغمضه
ومااعرف شبيها قربت منها دكيت
الجامه فزت ونزلت من
عدها سالتها كالت
مابيه شي
بس انتبهت وجهها صاير اصفر وجوه
عيونها زايد السواد ماحجيت شي ثكلت بالمشي اريدها تجي وياي وكفت من سمعتها
صاحت
«،،،ااخ يمه
انداريت عليها وگلبي فز من شفتها انهارت
بالگاع وگاضبه راسها رحت بسرعه
عليها ذبيت جنطتي وسالت
«،،خير شبيج
كامت تلوب وتون
«،،،اخ يمه راح اموت
الحرس طلعو شافو الوضع اجوي
يركضون سالو
«،،،خير استاذ شصاير
«،،،جيبو مي بسرعه
حجيت اريد امد ايديها الها اسوي شي
لان شفتها صارت فد مره والوجه صار كركم
كلت
«،،،،بس كومي لجوه
حاولت ادكوم ماكدرت الحارس زهير راد
يگضبها صحت بي
«،،،عوفها لاتگضبها
الرجال وخر كمال اجه جايب مي اخذته
منه وفتحت البطل كلت
«««هاج غسلي وجهج
مدت ايدها شفتها ترجف خليت المي
غسلت وجهها كملت
«««اشربي مي
«،،،مااريد
جاوبتني بضعف سمعت صوت
«،،،هااي شبيها جنات
جانت ست اسماء اجت بسرعه عليها
كلت
«،،،بس ساعديها خلي ناخذها لجوه
«،،،،كومي وياي
ساعدتها وكامت رادت توكع گضبتها
ومشت تردد بقهر
««،،حسبي الله ونعم الوكيل مو اهل اعداء
صرتو الها
حجت هيج وكملت وياي
«،،استاذ خلي ناخذها للمستشفى وضعها
مو زين
،،،اي امشي لسيارتي
اخذتهن الها عيوني ماوكعت من عليها
لان حتى وعي ماظل عدها كعدتها
ليوره وهي يمها صعدت
حركت بسرعه وطلعت
من يم المصرف
««،،جنات تسمعيني
حجت وياها وهي تون حسيتها جازه
على سنونها من الالم ووجهها صار اصفر بعد
اكثر
«،،هاج مي غسلي وجهها
انطيتها بطل جان يمي بالسياره غسلت
الها وجهها وايدها تريد تشربها
المي يوكع من حلگها
صديقتها كامت تبجي عليها وتتحسب على
رجلها واهلها وصلنا بسرعه لان
دست بالسياره هي
ساعدتها ونزلت بس خلت رجلها
بالگاع رادت توكع گضبتها وي ست اسماء
وحالتها صارت فد مرة لا بيها
بعد تمشي ولا تكدر
تفتح عيونها
صحت
«،،،وخري ياابه
وخرت شلتها وركضت بيها للطوارئ طبيت
ممرض جايب سديه شافني كال
«،«خليها هنا
خليتها وطببها لغرفه هي،،،طبت وياها
ظليت واكف بره هو طلع صاح
دكتوره واجت عليها وياها
ممرضه
وره مشوار طلعت الممرضه رجعت شايله بطل
مغذي وابره طبت عليها ظليت اروح
واجي وعيني على الغرفه
الدكتوره طلعت وياها الممرضه سالت
«،،،دكتوره شبيها البنيه
«،،،ضغطها صاعد كلش وضربنها ابرتين
حتى نزل الضغط وخلينا الهم هم مغذي يخلص
وتاخذوها لدكتور اختصاص يشوف
وضعها
«،،،تمام
جاوبتها ومشت من يمي قربت من يم الباب
دحكت نايمه ويمها ست اسماء شافتني
اجت الدموع بعيونها وتبجي
كالت
«،،،استاذ اذا تريد تروح للدوام روح اني اترخص
منك واخذ اجازه حتى اظل يمها وراح
اخابر اختها حتى تجي علينا
«،،،لا اني ظال يمكم خلي تكمل المغذي وناخذها
لاهلها
ارتبكت ودحكت عليها ردت
«،،،هي كاعده يم بيت اختها
صفنت عليها من ردت هالرد كملت
«،،اروح يمها
«،،اخذي راحتج
رجعت يمها كعدت قريب منها عيوني
ظلت عليها وبداخلي انقهرت كلش عليها وروحي
انمردت رجعت ليوره سندت ظهري
على الحايط اذكرها بذاك اليوم
شلون جانت ورده مفتحه
وتخبل من حلاتها
وهسه وبعد السواه بيها هذا النذل
ذبلت والحزن والقهر غيرو ملامحها
ذبيت حسره وكلت وي روحي
«،،اخ ولج تمنيتج من الله بس ماصارت قسمتي
وياج وابتعدت والقدر رجعج اليه
ومااعرف اذا هالشي
بي صالح اليه لو لاا
وره مشوار المغذي خلص ووعيها رجعلها
كدرت تطلع وي ست اسماء بس
بعدها مو تمام شافتني
ماحجت شي
نزلت راسها سانده روحها على صديقتها
امشي بصفها خايفه عليها لا توكع
كعدت ليوره وغمضت عيونها
وصلتها كل ساع ادحك الها
وصلنا لبيت اختها هي
اخذتها لجوه
طلعت وره مشوار ورجعنا اني وست اسماء
للمصرف كعدت هناك افكر بيها
وبالي ظل يمها
قائد
رجعت تالي الليل رحت لغرفتنا اني
وليلى فتحت الباب مقفول
ذبيت حسره وسندت راسي علي وخرت ومشيت
بثكل للغرفه الثانيه طبيت وتمددت
بهدومي عرفت راح اشوف
ايام سوده واسمع منها
حجي يوجع
نمت وجه الفجر كعدت متاخر كمت طلعت
رحت لغرفتنا الباب مقفول
دكيته وكلت
«،،،،ليلى افتحي الباب
ماانفتح دگيته مره اللخ هم مافتحته
گلبي هبط وكلت اكيد سوت شي بروحها
صحت
«،،ولج اافتحي تره راح اكسره
وره لحظه فتحته وانطتني ظهرها ومشت
كعدت منزله راسها ومبين اثر الدمع
بوجهها مشيت الها كالت
بصوت مخنوك
«،،قائد روح وعوفني وحدي
«،،مااكدر اعوفج ولج والله اني هناك صرت مخبل
مو عاقل من الشفته وكلها جانت تعرف
بيه اني مو صاحي
كامت تبجي كعدت يمها لمت روحها لفوك
تجنب ادحك عليه وماتريدني اگضبها
هالشي ذبحني وموتني
رددت بتوسل
«،،،،ليلى كلشي ولا زعلج والله اموت اذا
ظليتي زعلانه عليه وماتحجين وياي
ماردت كملت
«،،احجي شي لاتظلين ساكته تره عقابج
هذا صعب عليه
دحكت عليه القهر بملامحها وتبجي
بشهكه كلت بگلب ممرود
«،،لاتبجين وتحرگيني
ليش هيج سويت
حجت وشهكت بصوت قوي كملت
«،،،شلون كدرت تخوني قائد
«،،من الشفته
جاوبتها بقهر وكملت
«،،خبلني الشفته ليلى وماظل عقل براسي
هذا
ضربت على راسي بقوه وكملت
«،،هذا تخبل من شفتج بحظن ذاك
الگواد ماظل عقل بي هجيت ردت اموت بالبحر
بس مامتت ومشيت بالغابات وشفت الموت
اخذ جثير شباب بس اني ظليت
عايش واكثر من مره اشوف
الموت وماياخذني
سكتت انهد من قهري وكملت
«،،مااخذني ليلى الله رادني اعيش وارجع
الج حتى اصلح غلطي وياج بس
ااخ ماارتاحيت من السويته
هناك لان ضعت وجنت
عبالي انتي الي
ضيعتني
ليلى
عرفت سبب حزن قائد وقهره الي جنت
اشوفه بي كلما يحجي على وضعه بالمانيا
عرف نسوان وجانت عنده علاقات
هناك
هالشي الي عرفته منه ذبحني وخلاني اموت
من قهر السمعته الليل كله ابجي
مقهوره منه لان رغم السواه
بيه ظليت وفيه اله
ماكدرت بعد الصار بينا اني ويا اعيش
قصه حب وي غيره واعيش
نفس ذيج اللحظات الجمعتنا
سوه
لان شفت روحي ماراح اصير وفيه لغيره
وجاي اخونه بمشاعري لان گلبي
وروحي وعقلي كلهن
جانن يمه هو
وبس
طب عليه الضحى اشوفه يحجي والوجه
مطعون وصاير دم ردد
بقهر
«،،،شنو ذنبي اني وانتي حتى يصير
بينا هيج
دموعي زادت كمل بخنكه
«،،ذنبي شنو وشسويت الهم حتى اعيش
بغربه واضيع هناك
سكت من اختنك وكمل
«،،ضعت وطمست بالذنوب وجنت الومج
انتي على السويتي بيه وجنت اريد
انساج انسى العشته وياج
بس ااخ مانسيتج
ولا كدر انسى
لحظه وحده
من العشته
وياج
انهاريت بالبجي راد يلزمني سحبت روحي
وكتله بشهكه
«،،لااتزلمني وعوفني
سحب روحه مني كملت بغضب
«،،،،انت تعرف شسويت بيه ورغم السويته
ماكدرت اخونك ماكدرت حتى ارفع عيوني
بعيون رجال غيرك
««،ولج بابا اني جنت اشرب مو بوعي
وانتي مو من ورة الصار ذبحتي روحج
مو فقدتي عقلج ليلى وردتي
تموتين ااني
هم ردت اموت بس مامتت وكمت اشرب
حتى انسى وهالشي هو الي دمرني وخلاني
اسوي السويته
«،،،يااريتني ميته بذاك اليوم جان ماعرفت
الي عرفته
«،،ولج كافي ارحمي روحج وارحميني لا اني
تحملت الصار ولا انتي تحملتي
اثنينه فقدنا العقل واذينا
روحنا وترك اثر
بروحنا ماراح نكدر ننساه للابد
«،،رووح منا ااطلع مااريد اشوفك
صحت بي ودفعته كام من يمي مشه
يحجي بغضب
«،،،ياربي اني ليش مامتت بالبحر جان
لا سويت السويته ولا عشت بهل العذاب
طلع من يمي وسد الباب بقوه وره
مشوار طبت ماما سالت
«،،ولج هاي شبي قائد طلع صاير نار
مارديت كعدت يمي كملت
«،،،هم حجه وياج على الدوام
«،،اي
«،،،،كافي تبجين تره هو خايف عليج
ماعندي اي كلام اگوله الها لان ماردتها تعرف
وتسمع بي هو شمسوي هناك خفت
لايوكع من عيونها وبابا
يعرف وهم ياخذ
نفس النظره
قائد
طلعت للشغل صاير نار حسين سال شبيك
نترت بي
«،،مابيه شي
ماحجه ولا سال التهينا بالشغل وتاخرنا
العصر خلصنا،،،،،،مارحت
للبيتنا رحت كعدت بكافي افكر بحالي
والي صار ماجنت متندم اعرف الرجال يكدر يضم جثير شغلات عن مرته بس اني ماكدرت
حسيت اكو شي جذب بعلاقتي بيها وجان لازم
احجي حتى شعور الذنب الي بيه
اخلص منه
الوكت اخذني وصارت دنيا ليل مهيب
خابر كتله كاعد بنفس
المكان كال جاي
وحسين ويايه
اجوي ورة مشوار سلموا
كعدو يمي اني صافن ومهيب هم
حسين سأل
«،،،هاي شبيكم يابه عبالك صايره بيكم داء الصفنه
ورثت جگاره مهيب كال
«،،،وياك وحده
ورثت اله وانطيته اخذت نفس وذبيته
بحسره حسين سال
«،،،يول شبيك من اجيت للشغل وانت مو
على بعضك صاير شي
«،،اي حجيت الي بگلبي الها
صاح
««،خرب حظك اي والله ولك ليش حجيت
مو كتلك سدها لهل السالفه تره راح يطيح
حظك
««،اي طاح حظي وانطردت من الجنه
جاوبت حسين بقهر سال
«،،،هاي شوكت حجيت البارحه
هزيت راسي باي
«،،اخ منك ولك مو كتلك سد حلكك واسكت
شبيك انت هذا ماضي صار ليش
نبشته
««،منبوش صفحه غير غاوي شلعان گلب
مهيب حجه بضوجه وكمل
«،،،خلي اسكت مالي خلك احجي كلمه
«،،وانت شبيك خاف هم مسويلك سالفه مايلبس
عليها ثوب
سكت ماجاوب حسين دفره جلاق وكمل
«،،ماتحجي ولك انت هم صارلك كم يوم مو على
بعضك احجي شمسوي سياده النقيب
واطربني انت اللخ
«،،اخ ولكم وااوووف من السويته
رد بحسره صفنت علي وجهه مطعون ومقهور
كلش واحنا نعرفه بس يضحك وماخذ
الدنيا ضحك وونسه حسين
رجع ساله
«،،ياساتر يارب عبالك مسوي مكسورة جبيره
ولك
«،،،وكشره وسوده بلون وجهي
«،،خرب حظك ولك شمسوي ماتحجي
مو عليت گلبي
««،،والله بس احجي راح اوكع من عيونكم
حسين صفن عليه سالته
«،،خير مهيب شمسوي
«،،،شاحجي قائد اكلك اني ردت اصخم البنيه
الي تشتغل عدنا وطلعت هي نفسها
الي انقذتني من الموت
«،،،شنوو
صحت اني وحسين العيون صارت علينا
ردد
«،،،اي بعد صيحوا وافضحوني بنص العالم
««،ولك انت صدك تحجي
سالته مذهول من السمعته منه هز راسه
حسين انهد بي
«،،،ولك طايح الحظ شلون تسوي هيج
اني كملت
«،،،شبيك انت تخبلت شلون تسوي هيج بعرض
العالم ماتخاف الله يطلعها بيك
كام يون ويردد
«،،،ولكم مااعرف شلون صار هالشي والله
مااعرف هسه لو شارب جان كلت من اثر
الشرب بس لا جنت واعي وردتها
ولكم حلت بعيوني والشيطان
خبلني وخلاني اسوي
السويته
سكتت حسين خزره وگله
«،،جان استحيت ولك هاي انت عود ضابط
وحامي العرض
«،،اي رزلني بعد والله استاهل اكثر من هذا
لان كرهت نفسي من سويت هالشي
وكمت الوب من القهر
«،،،يول مو خطيه يعني فوك ضيمها انت تجي
تريد تعتدي عليها
حجيت جاوب
««،والله عبالي من ذني الي يبيعن ثكل
بس اخ ولكم طلعت شريفه واني طلعت واحد عار
وكواد
شفته صاير فد مره وسكتت حسين كله
«،،اعتذر منها ولك صلح موقفك
«،،اعتذرت اكثر من مره وهي رجعت لبيتنا
لان توسلت بيها اكثر من مرة حتى ترجع بس
اخ حجت حجايه جنت اسمعها منكم
ومن الكل بس هي من كالتها
دكت بعظمي ووجعتني
كلش
شحجت بله
مهيب صفن بوجه صاير دم وكال
«،،،خاف الله بروحك وباهلك لان هم
مايستاهلون الي كاعد تسوي بيهم
حجه هيج ونزل راسه حسين رد
«،،لا عاب حلكها واني هم اكلك كافي عاد تمشي
بالحرام وبطل دربك الاعوج وخاف الله
بروحك وباهلك ذوله الناس
الطيبين الي سمعتهم مثل
الورد بين الناس
ذب حسره ومارد حسين كمل وياي
«،،وانت يابه گلي شلون راح تصلح السويته
وي مرتك
«،،مااعرف
«،،،طاح حظك اي والله انت ويا بس فالحين بالخراب تسوون الفاينه وتجون هنا تبجون يمي
سكتت ماعندي جواب
غاده
الغده صار عشه لان رغد وعيالها جانو
معزومين يم غيرنا تعمدت اكشخ والبس
ذهبي لان هالشي اعرفه
يضوج كوثر والي
يكرهني
وصدك شفت النظرات وجانت كلها حسد
وغيره كره خصوصا منها هي
اكلتني بعيونها وهم
ظلت تباوع للذهب
هم عزلن روحن بالهول وسون حزب الخوات
وبناتهن ولا وحده اجت وكالت
اساعدجن بشي بس
رحمه ويانا واميره
كاعده تشوف مسلسل هندي
بجهازها
واكفه وي رانيه اغسل فواكه وكل
ساع وحده طابه تاخذ مي لو قواطي وتودي
لجوه كالت
«،،،،شفتي محد منهن اجتي ووكفت ويانا
«،،،عوفيهن يمعوده ماعدنا شي الاكل راح
يجينا جاهز
«،،اوف منج مثل عمه هم من احجي تسكتيني
ابتسمت وجاوبت
«،،،،لا والله مو هيج بس مااريدج تنغثين
من ورة بشر مايسوه
وجهها فك وردت
«،،،اي والله لا عاب حلكج كلهن مايسوون اغث
روحي من وراهن
««««اكلي عنب يخبل حلو وعسل مثلج
ياعسل
انطيتها حبه وبستها من خدها كوثر
طبت وشافتنا نضحك كالت
بنغزه
«،،الله يثخن لبنجن انتي وياها
«،،امين يارب
جاوبت وسالت بنغزه
««،،شخبار رجلج ماراح يرجعج
الوجه انگلب وجاوبتني بنتره
«،،،انه الي مااريد اعگب اله لان مو خوش
زلمه وبخيل
«،،،اي والله البخيل ماينراد
جاوبتها ورجعت اغسل بالفواكه حمزه
طب وراه جعفر شايلين السمج
سلم هي ردت واجت
علي كالت
«،،،تسلم ابو جمره
صرت كدامها ماخليتها تاخذ منه
السمجه كلت مبتسمه
«،،،تسلم بعد گلبي
العيون ضحكت وحس بس جاوب
«،،،ادللي ام علي
لميت شفتي كاتمه ضحكتي هو مسح
شواربه وطلع من يمنا بسرعه
خليت السمجه على الميز رانيه هم اخذت
اللخ من جعفر وكالت
«،،تسلم بعد عيوني
«،،ادللي رنو
كوثر خلقتها انگلبت وطلعت من يمنا بسرعه
«،،،هاي شبيها حتى سلام ماسلمت
جعفر حجه علي طب شايل السمج
الباقي ويا موسى والسالفه راحت عمه طبت
وره مشوار كالت
«،،غاده حمزه يريدج بالغرفه
«،،،اي
مشيت من يمهم ورحت لغرفتنا طبيت سديت
الباب ورايه جان ذاب دشادشته
وكاعد
«،،،حبيبه اريد اغسل لان وكع عليه دهن سمج
«،،اي هسه احضرلك هدوم
رحت للكنتور سالته
«،،يادشادشه تلبس
«،،الجوزي
فزيت من سمعت صوته يم اذني
انداريت اخذني لحظنه كلت بزعل
«،،،اوي والله خفت
رفع حواجبه وجاوب مبتسم
«،،،،ولج انتي تخوفين بلد بحاله وماتخافين
من اي شي
ابتسمت وماجاوبت كمل العيون
تضحك
«،،،اكعدي راحه وصيري عاقله
«،،،يا ليش شسويت اني
عض شفته وخله گلبي يدك سريع رد
«،،،اخ من غيره النسوان
«،،،هههه صاير كاظم
مارد العيون والنظرات خلتني اضيع
واحس بروحي راحت مني باسني من خدي
ولثم رگبتي بوسه طويله وهم
كال
«،،،عرگ جيدچ مي زمزمي
ماجنت اعرف شنو معنى هالكلمه وخر
مني مبتسم سالته
««،،،شنو معنى هالكلام
«،،معناه العرگ الي بركبتج يشبه مي زمزم
«،،اوي فدوه شلون حلو هالكلام
«،،،غيده بطلي اوي وفدوه تره ورايه
زلم بره
«،،،ههه روح اني مو لازمتك انت الي لازمني
صفن عليه ورد يضحك
«،،غير لو اكدر
سكتت وهو هم باسني من شفتي
ولمني بقوه لصدره بادلته لهفته وضعت
فزينا من الباب اندك صاح
بضوجه
«،،منو
«،،حمزه جدك يريدك
جانت عمه رد
«،،،جاي
ذب حسره وصفن عليه كال
«،،،راح اخذج واهج لغير مكان حتى
نظل بس اني وياج وحدنا
«،،ههه ونفر ثالث ويانا
اشرت لبطني ضحك ورد
«،،هذا اذبه على عمه وحبوبه واخليج
بس اليه
«،،ههه انت هم مثل قائد هم هيج
يحجي وي ليلو
حضرت هدومه ودفعته للحمام اردد
واضحك
«،،طب اسبح واطلع لجدو
«،،ههه ولج اكعدي راحه لايصير بيج
شي
«،،مايصير مادام انت يمي
وكف يم باب الحمام وكال
«،،لااتعبين روحج اذا حسيت بتعب ارتاحي
بالغرفه
«،،خاف يحجون عليه
«،،انعل ابو اليحجي عليج غير اشگ
حلكه الي يجيب طاريج بعد واخلي بي قندرة
يمه من لحظه هدؤ تحول للغضب وكام
يرعد لميت شفتي كاتمه
ضحكتي ردد
«،،سمعتي لاتعبين روحج ولا ديرين بال
لاحد
«،،،اوكي او علاوي
الوجه رجع يضحك وكال
«،،،والله ماظل عقل براسي من وراج
مره اصير عاقل مره اصير مخبل
«،،ههههه
خربت ضحك عض شفته
وكمل
«،،عيب بويه صوتج طلع
خليت ايدي على شفتي وكلت
«،،ام سوري
يريد يسد الباب مايكدر كلت
«،،يله اسبح تره تاخرت
««،بس انتي روحي تره والله لعبتي
بحالي لعب
مشيت اضحك ردد
«،،صوتج ولج
فتحت الباب شفت كوثر يم الحمام
جاوبت متقصده
«،،صار ادلل يبعد گلبي
سديت الباب ومشيت للمطبخ احس
بنظراتها عليه
الغده صار وهم صار فرهود كلهن اخذن من
الي بقى واكثره جان مو مفتوح
لان حمزه جاب خير من
الله
الشغل جان قليل لان الاكل جان جاهز
وكفت وي رانيه ورحمه وعمه نعزل
وننظف رغد رادت تشتغل
ويانا ماقبلنا لان عروس
كعدت يمنا تحجي
على عيالها
وتحمد
بيهم
بتول طبت وكالت
«،،امي وخالتي يريدن بعد جاي
رانيه جاوبت
«،،ذاك الجاي صبي وودي
راحت تصب سالت
«،،مو عدالك تاخرتي بالحمل
عرفت نغزتها لان جانت تريد جعفر رانيه
مو شويه وعدها لسان جاوبت
«،،وانتي شعليج وشخصج بهل الشي
سكتت وكملت بنغزه
«««ها اي عرفت ليش هيج حجيتي
بتول وكفت وهي شايله الصينيه
ونترت بيها
«،،شتقصدين رانيه
«،،نفس الي قصدتي بتول
ماردت بلعت لسانها ومشت من يمنا
«،،يكون توكعين بواحد نكس مثلج يگومج
بجتله ويكعدج بجتله
«،،،امين
جاوبت اضحك وكملت
«،،هي والي بالي
«،،امين
ردت مبتسمه بس وجهها انطعن من القهر
اني حجزت الها موعد وبعد كم
يوم اخذها تاخرنا لان
الدكتوره جانت
مسافره
حجت
«،،غاده شوفي المي بالحديقه الوره خاف عمه نسته مثل كل مره
«،،اي هسه اروح اشوفه
طلعت ورحت للحديقه جان مفتوح سديته
انداريت فزيت من شفت عباس
واكف يم شجره وصافن عليه نزلت راسي
ومشيت وكف بطريقي رجعت ليوره وخفت منه
لان جنا وحدنا بالحديقه
حجه
«،،،اني اسف واعتذر منج عن السويته
بذاك اليوم
«،،،، اعتذراك مقبول
جاوبته مشيت هم وكف كدامي
وكال
«،،،لحظه وحده اريد احجي وياج
بشي
«،،،احجي جوه يم الاهل
جاوبته اريد امشي خله ايده وكال
«،،،لا مايرهم
گلبي لعب منه وخفت من وجودي ويا
وحدنا كلت هذا نيته سؤ حجه
«،،انتي شفتي من حمزه لخاطر الله
خزرته وجاوبت
«،،،شفته رجال وبراسه غيره عكس بعض
الرجال
««،ولج والله حرامات انتي حرمته شايفه
روحج انتي بالمرايه تخبلين وخبلتني
من شفتج تركصين وو
حس وسكت
فكيت عيوني وگلبي هبط صحت بي
«،،،ووين شفتني ولك
قرب رجعت ليوره كال
«،،غاده عوفي حمزه ولج جبير ومشوه
واني والله بس تطلگين منه اخذج وشتريدين
اسويلج
«،،،انجب عااار حمزه تاج راسك انت وشكو واحد
عار مثلك والا اكله على كلامك هذا وهو يعرف
شغله وياك
«،،،اي روحي كولي اله وانه انشر الفديو الي
عندي
صفنت علي وكمت ارجف من خوفي
كتله
«،،،ماراح تكدر لان بنات عمك وياي
فتح جهازه وشوفني مقطع اني كاعده
يم رغد بس هي مو مبينه بس اني واركص
صحت بي
«،،،اياا حقير ياعديم الشرف
«،،كلتيها بعد حقير وعديم شرف يعني گلشي
اسوي فديربالج مني ياحلوه
مشى من يمي وراح رجعت بسرعه احس گلبي يدك بزردومي
وخايفه كلش كل ساع اريد اوكع على وجهي طبيت
للمطبخ بس رانيه بي شافت وضعي،فزت وكالت
«،،،هاي شبيج وجهج اصفر وترجفين
رحت يمها اردد بصوت ناصي
وعيوني على باب المطبخ الداخلي
«،،،رانيه احد من خوات عباس صورني
واني اركص
«،،،شنو وليش تسالين هالسؤال
حجيتلها السمعته منه لطمت خدها
وكالت
«،،،،ولج صدك تحجين هو كلج هالكلام
وهددج بس تحجين ينشر الفديو
«،،،،اي رانيه اي
«،،،مو احنا وياج شيريد هذا يفضحنا
النا هم
«،،لااا التصوير جان بس عليه
«،،عزه العزانا ولج هذه خله عيونه عليج
وراح يسويله سالفه جبيره
«،،،،عفيه شاسوي والله راح اموت من خوفي
«،،لازم اكولن لعمه
«،،اي بس بينج وبينها مااريد حمزه يعرف والله
يقتله اذا عرف هذا خال عيونه
عليه وشايفني اركص بهل
الملابس
««،ياربي شاسوي والله راح تعلك ويطيح
دم بس يعرف حمزة
روحي ماعت وحيلي راح كعدت ارجف من
خوفي هي جابت مي وكالت
«،،،هاج اشربي مي هسه يصير بيج شي
«،،،،خايفه رانيه شفت حمزة بذيج المره راد يقتله
وبصعوبه عافه هالمره والله مايعوفه
عمه طبت شافت وضعي اجت بسرعه
عليه سالت
«،،،هاي شبيج يوجعج شي
رانيه حجت الها السمعته مني بصوت ناصي
فكت عيونها ولطمت خدها كالت
«،،ولج شنهي هالحجي هذا هجمان بيوت
وراح يطيح دم من وراه
«،،،،عمه شاسوي هذا خال عيونه عليه وكلي
وحجه على،حمزه وهددني اذا حجيت اي شي
اله راح يفضحني بهل الفديو
عمه صارت فد مرة وكالت
«،،اسكتن هسه منا الاوادم وانه اتصرف بعدين
ولاتحجن شي لحمزه
باوعت عليه وكملت بخوف
«،،يمه غاده لاتحجين اله اي شي تعرفي
راح يطك عرچ بالراس ويتخبل
«،،،ماراح احجي شي اني اعرفه راح يتخبل
ويجوز ياذي بس عمه شلون والله
خايفه منه لايسوي شي
بهل الفديو
«،،لا ماراح يسوي شي هذا جبان ويخاف منه
«،،،اي مايخاف انگله علي
جاوبتها خايفه ومرعوبه ردت
«،،،مدري هذا شبي يريد يموت ويبلي
حمزه بدمه
كوثر طبت وسكتنا صفنت علينا وكالت
«،،،اريدن علاكه
رانيه انطتها وحده كمت ومشيت للغرفه
نغزت
«،،،،ها هم راح تروحين وتعوفين خطارج
«،،ماعليج بيها ياكوثر البنت شالت وحطت
وانتي كاعده وخواتج وذيجن
بنات فاضل كاعدات
وياجن
عمه حجت بضوجه ماحجيت شي من البيه
رحت لغرفتي طبيت خايفه من
هذا والف فكره مو زينة
اجت براسي
كعدت مرعوبه من السمعته منه
ومن فكرة يروح ينشره وره مشوار
جهازي دك برساله كمت اخذته من الشحن
فتحته حمزة كاتب
«،،،بيج شي
گلبي فز وخفت كلش كلت بس لا سمع
كتبت بايد ترجف
«،،،لا بس ليش تسال
«،،،،ماكو شي بس ظل بالي عليج لان سالت
عمه عليج كالت راحت ترتاح بغرفتنا
ذبيت النفس الي كتمته كتبت
«،،،تعبت شويه
«،،ارتاحي وبعد لاتطلعين
«،،،تمام
«،،،احبج ياجمره گلبي
عيوني غوركت وكتبت
«،،واني هم احبك ابو علاوي
كتب
«،،كاعد احجي وياج وجدي مشغل رادراه
عليه ومبتسم عدالك يغار مني
راح اگله ياخذ الثانيه
ويجدد شبابه
جان يشاقه وياي بس اني نفسي
انكسرت والخوف تربع بگلبي شافني تاخرت
بالرد كتب
«،،ها بويه مالج خلك مو
«،،اي راح اتمدد
«،،اوف منج كتلج لاتعبين روحج
«،،،مابيه شي لايظل بالك
«،،،يله بعد شويه يرحون الجماعه واجي
يمج
«،،تمام
رحت كعدت جهازي بحظني
مااعرف شلون اتصرف وي هذا
الحقير خايفه ومرعوبه وروحي مشمئزه من كلامه
ونظراته وره مشوار حمزه طب فزيت
صفن عليه وكال
«،،،اسم الله بويه شبيج فزيتي
،،،،ها مابيه شي
سد الباب اجه ليمي كعد وسال
يتفرس بملامحي
«،،،بعدج تعبانه
«،،،لا هسه احسن
«،،،اكيد غاده
«،،،،اي حمزة
جاوبته وسألت
«،،،راحو الخطار
«،،،اي
«،،تريد شي قبل لا انام
«،،لا نامي بويه وارتاحي
كمت من يمه وخليت جهازي على الجربايه
رحت للحمام غسلت وجهي وايدي
لان صرت نار من وره هالحقير
طلعت شفته لازم الجهاز
باوع عليه عاكد
حواجبه
سال
«،،شصاير غاده وليش رانيه ادگلج لاتحجين شي
اليه وابويه وجدي راح يصرفون
شكرا لزيارتكم عالم روايات سكيرهوم
