رواية اغفري لي الفصل الثاني والثلاثون بقلم أوتار حزينة
غاده
كمت وعفت جهازي على الفراش رحت
غسلت وجهي وايدي اريد ابرد النار الي شعلها
بيه هذا الحقير طلعت شفت حمزه
لازم جهازي باوع عليه
عاكد حواجبه وسال
«،،،شصاير غاده وليش رانيه ادكلج لاتحجين
شي اليه ابويه وجدي راح يصرف
گلبي هبط وحيلي راح سكتت ركز بنظره عليه
نزلت راسي اريد ارد علي بشي
ماكو ارتبكت وماعرفت
شاحجي سال
،،،،صايره مشكله احد حاجي وياج من النسوان
،،،،ها اي هيج سالفه ماتسوه
«،،اكيد غاده
،،،اي والله
جاوبته ورحت طفيت الضوه رجعت اردد
«،،يله بدل خلي نام
كعدت يمه سال
،،شنهي هالسالفه احجي اريد اعرف شصاير
«،،والله ماتسوه وانت تعرفهم من يجن
الا يسون مغثه
سكت بس مركز بعيونه عليه تجنبت اباوع اله
كملت
،،،كوم نام تعبت اليوم واني هم
شافني مااكدر وبعد ماسأل كام بدل واجه تمدد
خله ايده نمت واخذني لحظنه
ماكدرت انام من الي سمعته من هذا
وتعبت كلش وحسيت الفجر صار عندي
مغص بطني كام يروح ويجي
الصبح كعد باسني من خدي مافتحت
مااريد اكعد ويشوف وضعي خفت يعرف شبيه
كام بدل وطلع كعدت دمعتي بعيوني
وخايفه من الي راح يصير
وره مشوار رانيه طبت عليه سالت
«،،،ها راح حمزه
،،،،اي ولج علي طلع سامع كل الحجي الي
كاله الج هذا العار
فكيت عيوني وكلت
«،،صدك ليش هو وين جان يعني اني ماشفته
«،،،جان متمدد بالثيل العالي مسافه عنكم وسمع
كلشي وهسه جابه ابويه وكعدو يم جدي
وحجاله الي سمعه منه
صفنت وحسيت خوفي زاد كملت
،،،لاتخافين ربج ماخلاج وحدج دزلج علي
اخويه شاهد وياج
«،،مو خايفه على روحي والله خايفه من حمزه
لا يسمع ويتخبل
«،،لا ماراح يسمع لان راح الله ويا وجدي
وابويه راح يلعبون بعبيس فلك ويرزلو رزاله تسوه
عمره
حجت هيج وكامت كالت
«،،اروح اشوفهم اجوي
طلعت من يمي گلبي نغزني وحسيت بخنگه
مو طبيعيه وروحي كامت تلوب كمت وره دقائق طلعت شفت بيبي وعمه طبن للمجلس رانيه
واكفه يم الباب شافتني
اشرت اليه
رحت وكفت يمها احس الوجع زاد سمعت
الحجي حجه ويا
«،،انت تالي وياك شتريد يابه يگضك حمزه
ومايهدك الا وانت ميت
«،،،شنهي الموضوع بويه
ابوه سال الحجي گله بغضب
«،،اابنك العار بارحه بليل حاجي كلام
مو خوش وي حرمه ابو جمره ومن كايله
اله راح ادگله مهددها بفديو
مصوري بناتك بعرس
رغده
«،،،هاااي جذابه وتريد تبليني وي ابن عمي
عباس صاح عمو مهدي كال
«،،،،علي احجي السمعته
اخوه رانيه حجه الي سمعه منه ومني
عباس كام يصيح
«،،ولك انت هم جذاب ومتفق وياها عليه
علي انهد بي
«،،انه مووو جذاب وسمعتك شحجيت وياها
واحلف بكلام الله هسه وجدام جدي
والكل انت حجيت وياها
كلام مو حلو وهددتها
بفديو
فزيت من الباب اندفر بقوة وسمعت صيحه
حمزة
«،،،جتاااالك انه اليوم ياگواااد
حمزه
بارحه حسيت اكو شي صاير غاده جانت مو
على بعضها عمتي وحبوبه ورانيه
هم جانن مدري شبيهن
عدالي سوالف حريم مثل كل مره بس
الصبح لكفت حجايه من طبيت للمطبخ سمعت
عمه كالت
«،،،خلي يروح حمزه ووو
سكتت اني ثولت السالفه كلت
«،،،صباح الخير
«،،،،هلا يمه صباح النور
كعدت تريگت بالي يم السمعته
جعفر طب خلقته مگلوبه من شافني
الملامح تغيرت سلم وكعد
يمي
انتبهت لنظراتهم چن صاير شي جبير
وخايفين يحجو اليه كلت
«،،،تجي وياي
«،،لا اريدن اروحن لصاحبي بشغله
«،،،،تمام
كمت وكلت
«،،،انه طالع
«،،،الله وياك يمه
طلعت من يمهم صعدت سيارتي وحركت وصلت
الشارع وبعدين عگبت بالي
يم السمعته والشفته
من غاده ومنهم
الليل گله مانامته كل ساع تفز وهالشي
مو سالفه مشاكل حريم اكو شي صاير
عفت سيارتي مسافه
عن بيتنا وكفت يم
شجره بالبستان
اعاين للبيت
وره مشوار عمي مهدي اجه
وعلي وراهم عمي صالح وعباس وقاسم
عكدت حواجبي وكلت
«،،،،والله صاير سالفه جبيره وراح
اعرفها هسه
مشيت بخطوات واسعه ووكفت على
صفحه اريد ااعرف شصاير وشنهي الي
ضامي عليه وصلت سمعت كلام خبلني
وخلاني ادفر الباب واهد
على عباس
جعفر
كلشي توقعت من عباس بس،مال يخلي
عيونه على حرمه حمزه هالشي ابدا ماتوقعته
منه من حجت اليه رانيه شمسوي
الها وشلون مهددها بمقطع
فديو تخبلت وكلت
بس يسمع حمزه
راح يجتله
ضمينا السالفه عنه عمي مهدي عرف هو وجدي
وكالو بس يطلع اندز عليهم ونحجي
ويا جدامها
جنت اعرفها صادگه البنيه عاشرنها وعرفتها
مستوره وشريفه ولو ما ابني عمي عايل
عليها ماتحجي هالسالفه
والله وكف وياها لان بنفس الليله جان علي
ابن عمي متمدد بالثيل وماشفه
لا هو ولا هي لان جان بمچان ظلمه سمع
شحجه هذا العار وشهد الها
بلحظه الباب اندفر والي جنا خايفين منه
صار حمزه طب غادي نار والخبال
بين عيونه هد على عباس
ووكعله دگ بوگسات
گضيته انه وعمي مهدي وقاسم ماكدرنا
اله فقد وانه اعرف من يفقد هاهيه
راح يأذي الي لازمه
گوة سحبنا منا اسمع صراخ النسوان
عباس طلع يركض من يمنا حمزه ضربني
اني وقاسم ودفع عمامنا من وجهه طلع يركض
وراه احنا وراه جمدت بمچاني من
شفته سحب سلاح من
السياره ووجه علي
صاح بي
«،،،والله اجتلك اذااا مديت ايدك عليه
«،،،،سووويها عااار
حمزه صاح بي ابوه صرخ بي
«،،،لااا عباس لاتسويها
«،،ولك لااا
الكل صرخ بي
غاده
طلعنا وره حمزه نعيط من شفت
عباس واكف وموجه مسدس
علي صرخت
«،،،لااا لااا
الكل كام يعيط ذاك صاح بي
«،،،جتااالك انه اليوم
بسرعه رحت حظنت حمزة اصرخ
«،،،لاااا عباااس لااا
طلقه ثارت وجام تكسر شهگت بقوه
وحسيت ابني صعد لگلبي وكعت حمزه لزمني يصيح
«،،،لااااا ولك لااا
الكل تراكض على عباس شفت اخوه سحب
السلاح وكام يضرب بي هو وابوه
حسيت تبللت من جوه عرفت مي الراس
طك عندي
عبالهم انضربت الكل صار فوك راسي اريد احجي ماكدر الم خيط ظهري ومغص قوي
صار بطني
لزمت ايده حجيت بس احس گلبي
يدك بزرودمي
«،،،،بيك شي
عطت من اجتني لويه قويه
«،،اااخ يمه
«،،،رانيه العبايه بسرعه
سمعت عمه صاحت بيبي تصرخ
«،،،ولكم تلاحكو الها جاااي تنزف
الا حجت بيبي
يله عرفت اني هم جاي انزف
حمزه
كلشي صار بسرعه هديت على
عباس الگواد رفع سلاحه عليه وبلحظه
مااشوف غير غاده تحظني
جيله ثارت كلت جتلها
لان شهكت بقوه ووكعت عليه تلگيتها فاقد
واصيح
رگضت بيها انه وجعفر وعمه ورانيه اشوفها
غدت فد مره تون وكل ساع
تعيط
تخبلت وكلت راح تروح من ايدي لان النزف
خذها وراح تجيب وهي بعدها بالثامن
«،،،جعفر بسرعه النزف زاد
رانيه حجت تبجي صحت اضرب
بالگشن
«،،خرررب بيك ياكووواد جتالك انه
اليوم عباس
«،،لااا لاا
حجت وياي وجزت على سنونها وكامت ترجف
«،،ااسكت هسه حمزه
عمه صاحت بيه حظنتها ترجف بين
ايدها حجت گوه
«،،عمه راح اموت
«،،اش اااش لادكولين هالجلمه
صحت بخبال وكملت بصياح
،،،دووس جعفر راح تروح من ايدي
وصلنا وره مشوار نزلت بسرعه شلتها من
يم عمه وركضت بيها للجوه هم مثل ذيج المره
تبللت بدمها اخذوها مني وطبو
للصاله
رجعت ليوره وسندت ظهري على الحايط
عمه طبت هي ورانيه وراها نزلت لجوه وكعدت
بالگاع جعفر يروح ويجي يمي
كلت
،،،،والله مااخلي الا اجتله لهذا العار
«،،عوفك منه هسه وخلينا بحرمتك
«،،،،ااخ ولك ااخ ليش،،،،ماجاي يعوفوني
بحالي ليييش شدو وياااها
عمه طلعت تبجي هي ورانيه فزيت من مچاني
كلت
«،،هاا عمه شكالو جوه
«،،،راح اجيب
«،،،شلون وهي بالثامن
«،،،صارت عدها ولاده من وكت من وره الهبطه
رانيه جاوبت ووكفت يم جعفر تبجي
وتدعي الها
«،،راح ادكوم بالسلامه مو
«،،اي اي يمه بس ادعيلها اانت
غمضت وكلت
«،،،يارب رايدها منك هي وابني يارب
لاتختبرين بيها تره مااعيشن وراها اذا
صارلها شي
غاده
جنت بنهايه الثامن مابقى غير كم يوم واطب
التاسع من وره الهبطه صارت عندي
ولاده مبكره
تعبانه مابيه حيل وابني يريد يجي
للدنيا بس اي قوه ماعندي من وره
الصار
انلعب بيه طوبه اسمع القابله تصرخ بيه
ابنج راح يموت وتشيلين خطيته
من حجت هيج صرخت
يالله
سمعت صرخته وفقدت الوعي
حمزه
ظليت اروح واجي يم الصاله ادعي
الله وانخي اوليائه الصالحين من تاخرت
جوه حيلي انهد وكلت راح
تروح من ايدي وتيتمني مره ثانيه عمه
كلما ينفتح الباب تسأل عنها
يكلون بعدها
صرنا فد مره من وراها وماظل عندي اي
صبر توسلت
،«،،،،يارب اوكفلي نخيتك يالله ادكومها
بالسلامه هي وابني
«،،،امين يارب
جعفر رد سندت روحي على الحايط
والجبل اهتز بس شاف الي يحبها راح تروح
من ايده ونيت وكلت
«،،غاده لاتسويها بيه تره اموتن وراج
مرت علينا جم ساعه ثكيله وخلت ريگنا
يبس من الخوف والقلق طلعت
دكتوره كالت
«،،،منو وي غاده
«،،اني جابت مو
عمتي جاوبتها بسرعه وراحت الها
«،،،اي
«،،هي زينه
سالت باوعت عليه وكالت
«،،انت رجلها
«،،،اي
«،،هي هسه وضعها مو مستقر وراح نخليها
تحت المراقبه لان نزفت هوايه
وخلينا الها بطل دم تبرعو
بداله وخلو بالكم
يجوز تحتاج
اللخ
راسي ثگل وگضيت الحايط جعفر
سندني رانيه سالت
«««والجاهل دكتوره شلون وضعه
««،،خلينا بالخدج هي ضاربه ابر مال تنشيط
رئه مو
««،اي دكتوره لان اكثر من مره صار عدها وجع
ولاده
«،،،همزين ضاربه الابر بس هم الطفل لازم
يظل بالخدج حتى يكمل الشهر
«،،اي دكتورة نكدر نشوفها
عمه حجت ردت
«،،،هسه راح نطلعها لغرفه خاصه والطفل
راح يظل بالخدج
«،،تمام
«،،،تعالن وياي
عمه ورانيه طبن لجوه طلعوها وره مشوار
نايمه وخالين الها بطل دم الوجه غادي كركم اخذنها لغرفه شلتها وخليتها
على الفراش كعدت يمها
صاير فد مره عمه يمي
تبجي وتدعي
الها
جعفر كال
«،،،رانيه امشي نشوف علي
«،،اي
حتى ابني ماردت اشوفه ردتها هي تكعد
وافرح بيها
مهيب
اني بالدوام بليل ابويه خابرني ساعه 12
جاوبته صاح
«،،ولك مهيب الحك عليه امك وكعت من الدرج
وانكسرت رجلها
فزيت وصحت
«،،،شجااي تحجي انت
«،،،،ولك تعال عليه والله ماظل بيه حيل
حتى اشيلها
«،،،جااي يابه جااي
بسرعه سلمت الخفاره لولد وطلعت للبيت
اهلي وصلت نزلت اركض
طبيت اسمعها تبجي
وتصيح
شفتها يم الدرج وابويه يمها مايكدر
يشيلها لان هي صاحبه جسم رجلها
مكسوره وحالها حال
شلتها وركضت بيها للسياره هو اجه
ورايه اخذنها بسرعه لمستشفى اهلي سوالها
اشعه وجبسوا رجلها الفجر رجعنا
ردت اشيلها كالت
وهي تبجي
«،،،لا يمه راح اذيك
مادرت بال شلتها وطبيت بيها لجوه
خليتها على فراشها كلت
بغضب
«،،،شصعدج لفوك هيج احسن شوفي
وكعتي وانكسرت رجلج
«،،،حظي ردت اشوف ترتيب حنين
وتالي من نزلت دخت ووكعت
جاوبتني تبجي ابويه كال
«،،قدر ولطف بس لاتتحركين لان
رجلج مكسوره كسرين
حجه هيج وكمل
«،،تمددي ابويه انتي والله وكع حيلي
من عطتي وشفتج متكومه يم الدرج
ساعدها تتمدد على الجربايه وغطاها
كعدت يمها ادحك الها وجهها متاذي
وايدها كلها جروح انقهرت
عليها كلش وكلت
«،،،اذا اصعد هسه احرك الفوك احد يگلي ليش
سكتت وكملت بغضب
«،،، بس اريد اعرف
مو البنيه جاي ترتب وتنظف ذاك التنظيف
الحلو ليش هالواهس الي بيج
لخاطر الله
،،،ولك ردت اشوف جم شغله وصيتها عليها
مسويتهن لا
،،،،اي وطلعت مسويتهن موو
«،،،اي واحسن مني بعد
«،،شفت يابه مرتك راح تموتني بهل واهس
النظافه
«،،اسكت ابني مايفيد الحجي بيها
جاوبني وكمل
«،،،باجر خابر اختك خلي تجي يمنا
«،،قصدك اليوم حجي لان النهار طلع
«،،،اي والله دخت
«،،،تمدد وارتاح اني راح اخذ اجازه جم
يوم واظل يمك
«،،،تسوي زين والله
عفته يمها وطلعت من يمهم صعدت لفوك
كعدت على الجربايه باوعت
للساعه بالسته
كمت غسلت اريد اتنشط وراها نزلت لجوه
دحكت عليها غافيه ابويه واكف
يصلي
رحت للمطبخ شربت مي وكعدت
هناك اجه وره مشوار كال
«،،،خابر ام ياسين خلي تجي
«،،بعد وكت يابه خاف المره نايمه
هسه
«،،هم صدك
كعد يمي تعبان وصاير فد مره ردد
«،،،هاي امك راح تخبلني بهل الواهس
«،،ادري هي ماتعرف وضعها شلون صعدت
وهي ادوخ ورجلها ماتساعد
«،،ولك من اجت البنيه كالت الها الفراش
الرفع الي فوك كله نزلي وبدلي وجوه المخاد
وخلي غيرهن وبدلي الفرشات كلهن
هن والبردات وهي سوت
كلشي وطلعت البيت
يلمع حتى هي
كالت عليها هاي اضرب مني بالنظافه
والواهس وتالي شوفها صعدت
تشوف شغلها ووكعت
«،،شاحجي يابه انت كلت قبل شويه
مايفيد االحجي بامك
«،،هسه اني شايل همنا وهمها شلون راح
نكدر نداريها انت بالدوام وذيج اختك وراها
رجلها وانت تعرف خالك بي زهايمر
ولازم ماتعوفه وعمتها مره
جبيره هم معتمده عليها
«،،،اشوفلها مساعده
«،،اي اني هم اكول هيج
يمامه
جان نهايه شتا بس هم لفيت يمامه
زين حتى ماتاخذ برد من وره وضعها
بس الحمد لله صحتها زينه وجاي
تكبر ووزنها زاد وصارت
بعد احلى
مثل كل يوم طلعت وي خاله ام ياسين لبيت الحجيه وصلنا الحجي فتح النا الباب شفته مو على بعضه سلمنا وخاله سالت
خير ابو منير صاير شي
«،،،اي والله الحجيه وكعت البارحه بليل،من
الدرج وانكسرت رجلها
«،،،يمه عزه العزاني شلون صعدت وهي
ماتكدر
«،،،حظها بعد والله قدر ولطف تفضلو
يابه
خاله طبت بسرعه اني وراها بالمطبخ
شفت ابنهم غافي على القنفه
ومجتف ايده
ابوه كعده وكال
،،،اكعد مهيب
كعد عاكد الحواجب شافنا عدل روحه
وفرك وجهه خاله سلمت
علي اني هم سلمت بدون مااباوع علي
«،،الحمد لله على سلامه الحجيه
«،،،الله يسلمج خاله
«،،وينها هي
«،،جوه بغرفتها
الحجي جاوب مشت اني وراها رحنا
عليها كاعده وسانده روحها على مخاد
«،،،هاي شنو ام منير شلون هيج وكعتي
خاله حجت وبوستها تردد
«،،الحمد لله على سلامتج ماتشوفين شر
«،،الله يسلمج ام ياسين شاسوي حظي
الي خلاني اصعد حتى اوكع هالوكعه
«،،،سلامتج خاله
بوستها حظتني كامت تبجي وتردد
«،،الله يسلمج يمه
دموعي نزلت عليها لان شفتها صايره فد
مرة ومتاذيه
،،،ها يمامه اجيتي على بيبي
اخذت مني بنتي وباستها كالت
«،،خليها يمي الغرفه دافيه
«،،،اي خاله
«،،،راح اسويلج ريوك
حجيت سمعت صوته
«،،يمه راح اروح اجيبلج حليب مال جاموس
حتى عظمج يلم بسرعه وهم عظام
مال هوش ويا
«،،اي يمه جيب
انداريت هو مشى بسرعه من يمنا
«،،ام ياسين اريد ابدل هدومي احس
بيهن ريحه المستشفى
«،،اي هسه
طلعت من يمهن ورحت للمطبخ الحجي كاعد
كال
«،،يابه سويلي جاي راسي راح يطك
«،،اي عمو هسه اسويلك جاي وريوك
«،،،الله يرضى عليج يابنتي
وكفت اسوي الريوك والجاي سمعته
حجه
«،،،،يابه اني طالع اجيب حليب وعظام
لامي
«،،روح يابه
طلع من يمنا سويت ريوك للحجي والحجيه
اني بالمطبخ كاعد اتريك وي
خاله ام ياسين هو رجع
شايل علاليك هوايه
خلاهن على الكاونتر كال
«،،خاله هاي حليب فوري لامي وانطيها
يوميا كوبين وهم سويلها شوربه عظام
حتى العظم يجبر بسرعه
««،،اي يمه ادلل
«،،وهاي مسواك النا وهاي فواكهه لياسين
من تروحين اخذيها وياج
«،،،تسلم مهيب والله يحفظك من كل
شر
«،،تسلمين خاله
جان يحجي مايرفع راسه مشى سالته
«،،يمه شلون راح ادبرون روحكم وي الحجيه
وكف ورد
«،،والله مدري اشوف معينه الها
«،،ها اي احسن لان وضعها مو مال تتحرك
هوايه
«،،،اي اعرف وضعها مو مال حركه بعد
كمت ورحت اغسل كم ماعون بالسنك
«،،اترخص اني
مشى من يمنا وراح لجوه
«،،هاي شلون سالفه ياربي ومنو يكول
راح يلگي وحده تبات يمهم وتخدم الحجيه
جاوبت
«،،بنتها تجي يمها واداريها
«،،،ميسون ماتكدر عدها خالها رجال جبير
وبي مرض النسيان مايعرف ولده ولا مرته
بس الها يعرفها لان تحبه وشايلته
بالصلاوت هو وعمتها
حجت هيج الجرس اندك الحجي
اجه كال
«،،،هاي ميسون اجت
طلع لبره رجع هي ويا ووشاب يطلع بكد
اابنهم سلمت وكالت
«،،وين امي
«،،،جوه بغرفتها
خاله جاوبتها راحت عليها بسرعه الولد
صفن عليه بعدين سلم وراح وي
الحجي ليمها
«،،هذا ابن اخوه الحجيه يصير حمه
ميسون
خاله حجت هزيت راسي التهيت انظف
الميز واخلي الجابه ابنهم بالمجمده والثلاجه
خاله راحت يمهم رجعت وره
مشوار كالت
«،،يمه سوي ريوك لمهيب واخته وحماها
،،،،اي هسه بس شيريد هو
«،،،بيض وبصل وطمامه
«،،،تمام
هو اجه ويا الولد كعدو يمي
اسمعه يحجي
«،،،يول ماتعرف مكتب مال عاملات حتى
اشوفلي وحده لامي
«،،لا والله مااعرف بس ليش ادور عامله
مو ام ياسين موجوده
«،،خاله ام ياسين بس بالنهار تجي وتروح
بليل
اخته طبت كال
«،،يولي ماتكدرين تظلين يمها
«،«اي اكدر كم يوم بس يعني انت تعرف الوضع
الي عدنا بالبيت
سكت ماحجه شي سويت ريوك للكل
وصبيت الجاي وخليته يمهم
اتجنب ارفع عيوني بس حسيت الولد بس
صافن عليه سالت
«،،محتاجين شي
«،،لا حنين مو محتاجين شي
هي جاوبت مشيت سمعت الولد سال
«،،هاي منو
«،،،بنيه تجي وي خاله ام ياسين تشتغل
وياها بيتنا
جاوبته سمعت اخر الكلام
«،،خلي هي تظل يم عمتي وو
طبيت لغرفه الحجيه يمها الحجي وخاله
ام ياسين شلت الصينيه مال
ريوكها وكلت
،،،محتاجه شي خاله
،،،لا يمه مو محتاجه شي
باوعت ليمامه نايمه وغافيه وترضع كلت
«،،،راح اخذها للغرفه اللخ خاف تنامين
وتكعدج
«،،،لا خليها يمي خطيه غافيه وراح
تكعد بس شيليها
«،،،تمام
طلعت من يمهم خاله وياي رحنا للمطبخ
كاعدين يتريكون انتبهت علي عاكد حواجبه
ومبين علي ضايج ومقهور هو اول واحد كام وراح لجوه سويت كم شغله وسمعت يمامه بجت رحت عليها هو كاعد يم امه ويداوي وجهها كالت
«،،تعالي يمه كعدت الحبيبه وجوعانه
انداريت ورحت للجهه الثانيه
شلتها من يمها طلعت بيها سمعتها حجت
«،،لاتظل تقهر بروحك يمه اختك هم همها
جبير خالك بركبتها وانت
تعرف وضعه
رحت للغرفه الصغيره سويتلها ممه وكعدت
ارضعها كملتها ونامت خليتها على
الجربايه طلعت شفته
طلع من يم امه
كال بدون
مايرفع راسه
«،،امي تريدج
«،،تمام
رحت عليها كالت
،،،يمه نظفي البيت وسوي قائمه بضيافه وانطيها
لمهيب لان راح يجونا ناس هوايه
«،،اي خاله
«،،احنا عدنا بس ماراح يكفن انتي شوفي
شنو محتاجي واكتبي بورقه
وهو يجيبهن الج
«،،تمام محتاجه شي قبل لا ابلش تنظيف
«،،وين يمامه
«،،بالغرفه الصغيره
«،،جيبيها يمي تونسني شويه
«،،اي هسه اجيبها يمج
رحت جبتها وخليتها يمها بديت اشتغل
ووافكر بيها الحجيه جانت متعلقه بيمامه كلش
وتموت عليها هي والحجي وبنتهم حتى
ابنهم مرات اشوفه يصفن عليها
بحنيه ويبتسم
كلت سبحان الله الي زرع محبتها بقلوب
البشر وسخر الها ناس طيبين واني هم جانو
يحبوني ومامقصرين وياي بشي
ولا حسيت يمهم اني خدامه
بالعكس حسيتهم
اهل طيبين وجاي
اشتغل
الهم
بس جان الي منغص هالشي هو ابنهم
صح هو تندم واعتذر مني بعد ماعرفني بس
ظليت اتوتر من وجوده بيتهم وماخذه
حذري منه لان اعرفه مو راحه
وابو نسوان
خاله التهت بالطبخ واني بالتنظيف بديت
بالجوه بعدين صعدت لفوك جانت اكو
اربع غرفه وحده لابنهم
وواثنين مال بناتهم لان الاثاث
بعدهن بيهم ومبينات مال بنات واللخ
خالين بيهن فراش رفع وزوالي
نظفت الغرفتين والصاله ونزلت لجوه
رحت للمطبخ اشرب مي
طبيت هو واكف هم
يشرب مي كال
«،،،،سويتي قائمه
«،،لا هسه اسويها وي خاله ام ياسين
«،،،تمام بس فضيها من وكت حتى
اروح اجيبلكم الي تريدو
«،،اي هسه
فتحت جراره وطلعت دفتر وقلم هو راح
من يمي خاله اجت من بره وكفت
اني وياها نشوف شنو محتاجين
للضيافه
هي تحجي واني اكتب اخذتها مني وودتها
اله طلع هو والولد وراحو يجيبون
المسواك
التهيت بالشغل ورحت للحديقه نظفتها
وسگيت السنداين وغسلت
الكراج
وره ساعه هو رجع ويا الولد جايب اشكال
والوان وفوك الي كتبنا اله ابن خاله
رح لجوه خاله
حجت
«،،،يمه هذني هوايه شعندك هالكد جايب
«،،،طلعي منها الكم واخذي منهن اني
جبت زايد مو ناقص حتى تاخذين الج هم
«،،تسلم بس جاي تكلف نفسك هوايه
«،،لا ماكو تكلفه وبالعافيه خاله
«،،،الله يعافيك يمه
ام احمد اجت وكالت
««««خاله تعالي امي تريدج
«،،اي اجيت
جنت واكفه يم السنك اغسل كم شغله سمعت
الولد كال
«،«ماكو شي بارد نشربه
«،،جاوبته بدون مااندار
«،،اي اكو هسه اخلي الك
«،،وخلي من هذا البقصم لان حلو كلش
باوعت علي،،،،وعكدت حواجبي انتبهت
هو هم تغيرت ملامحه ونتر بي
«،،امشي نكعد جوه بالصاله
«،،ليش خلي نكعد هنا
دفعه بهداوه وكال
«،،لاتظل تلغي وامشي لجوه
راحو من يمي كلت بگلبي
«««هذا هم فويسد مثل ابن عمته
فريت ايدي ورحت حميت الجاي حضرت
ضيافه وكملت جلف صبيته
من صار ووشلت
الصينيه
ردت اطلع هو طب عاكد الحواجب
وضايج نتر
«،،،جيبيها اني اوديها اله
اخذها وطلع من يمي صفنت علي وكلت
«،،عبالك الشرف كام ينگط من الگصه وهو
انكس منه ابو النسوان
خاله رجعت وكالت
«،،خلي نرتب الجابه وراها نصب غده لان اذن
«،،اي خاله
خلينا الجابه بالثلاجه الثانيه لان الجبيره
انترست اكل ومسواك وراها صبينا
الغده
اخذت الصينيه مال الحجيه ووديتها
الها بالغرفه الحجي يمها مبين علي القهر
وصافن عليها جانت تحجي وي بنتها الساكنه
بتركيا
خليت الصينيه على طبله عمو كال
«،،تسلمين بنتي
«،،الله يسلمك عمو يله تعالو تغدو لان
صبينا الغده
«،،اي
ام احمد جاوبته وكملت وي امها من
سدت الخط
«،يمه تكدرين تاكلين
«،،اي رجلي الي انكسرت من ايدي يايمه
كلت
«،،،اخذ يمامه
«،،لا خليها يمي نايمه وغافيه من فدوه
لهل الوجه الحلو
جاوبتني تباوع الها بحنيه كملت
«،،روحي تغدي يمه تعبتي اليوم
«،،تعبج راحه خاله وماتشوفين غير كل
العافيه
««،تسلمين بعد خالتج والله يخلليلج بنتج
ويرحم رجلج
«،،امين
جاوبت الحجي كام هو وبنته وطلعوا
قربت الطبله منها وجبت خاولي خليته على
دشادشتها جبت كلينس معطر
وخليته يم ايدها
عدلت الغطه وشلت كم كلينسه على
الفراش كلت
«،،محتاجه شي قبل لااروح
«،،لا يمه روحي الله يرضى عليج
ماقصرتي بشي
انداريت شفته هو واكف وصافن علينا
شوكت اجه ماادري ذب حسره جانت قوي
هي كالت
«،،لاتظل تقهر بروحك يمه والله وجعي
هود عن الصبح
مشيت هو وخر طلعت هو راح يمها طبيت
المطبخ الولد كاعد يم الحجي
وبنته يم خاله ام ياسين
اشرت اليه شفت
نظرات ذاك
كلت
«،،مااشتهي خاله
«،،ليش بنتي تعالي اكلي لكمه تره من
الصبح انتي تفترين بالبيت
«،،،والله مااشتهي عمو اني من اجوع اصب
واكل
«،براحتج يابه
جاوبني طلعت من يمهم ورحت للحمام
اخذت الهدوم من السله وصعدت بيهن لفوك
وكفت بالسطح انفض واشر كملت
ونزلت لجوه
سمعت يمامه تبجي رحت للغرفه
اخذتها من يم الحجيه وديتها
للغرفه الصغيره
نظفتها وبدلت الها وخليت بوطره من
الجابها ريحتها جانت تخبل ومبينه غاليه
رضعتها ممه وكل ساع ابوسها مانامت
ظلت كاعده خفت عليها اخليها وحدها كمت
وطلعت بيها ليم الحجيه كلت
من طبيت
«،،،خاله اخلي يمامه يمج لان كعدت
وماتقبل تنام
«،،،جيبها يمه بحظني
خليتها بحظنها باستها وشمتها بنفس
طويل رددت مبتسمه
«،،،فدوه لهل الريحه الطيبه ورد وهيل
وعنبر هالبنيه الحلوه
شلت الصينيه الحجي طب وكال
«،،جايج يابه
«،،،اي عمو
طلعت ورحت للمطبخ لا هو موجود
ولا الولد بس ام احمد تلم بالمواعين وي
خاله كلت
«،،،عوفيهن اني هسه انظف كلشي
«،،خلي احرك روحي لان تكسرت من الكعده
يمكم
«،،لا والله الا تعوفيهن وراح اصبلج جاي
وي عمو وخاله واخذي الهم
«،،،تمام
صبيت الجاي اشوفها مهمومه ومقهوره
خاله كالت
«،،يمه لاتقهرين روحج الحجيه ان شاء
الله صوابها خفيف
كامت تبجي وردت
«،،،مهيب زعل مني لان كلت راح اظل كم
يوم واني والله لو اكدو اظل يمها الا اظل
بس انتي تعرفين وضع خالي وعمتي
يعني وين اوديهم ياخاله
ومنو الهم انتي تعرفين
هم ماعدهم بس
ثائر وهاشم
وهو مو مزوج حتى اكدر اعوف
البيت على مرته
«،،،اي والله اعرف وضعج واعرف الحجي
فد مرة صاير ومهيب يعرف بس من قهره
من وره امه يجوز حجه كلمه وقهرج
بيها
«،،،هو ماحجه وياي بس مبين علي ضايج
مني شاسوي خاله كلها هجت منا وظلينا بس
اني ويا وحدنا مانعرف عليمن
نلتفت هو دوام وشغل
ليلي واني هذا قهري
«،،هو كال راح اجيب عامله ادري الحجيه
بليل
،،،خاله انتي مو تعرفين الدنيا شلون صارت
واني والله اخاف عليهم لاتجي
وحده وتشوف الخير الي
هم بي وتسويلهم
شي مو زين
«،،هم صدك يمه والله كمنا من الي نسمعه
نخاف نأمن على روحنا وبيوتنا
يم احد
الجاي خدر صبيته هي كامت وكالت
«،،،هسه لو ثائر موجود جان كتله اخذ اجازه
واكعد يمهم
«،،هو وينه يمه ماشفته اجه
سافر لتركيا يسوي عيونه لان كام مايشوف
بيها زين
«،،ها الله يرجعه بالسلامه ومايشوف
شر
«،،امين خاله
اخذت الجاي وراحت من يمنا بذاك اليوم
تاخرنا يمهم لان اجوي خطار هوايه
الحجي ماقبل نرجع بسياره
وخله الولد يوصلنا
ضجت لان شفته مو راحه ردت ارفض
اروح ويا بس ماحجيت شي
لان الوقت تاخر وتاخرنا
على ياسين
اخذت يمامه من يم الحجيه وسلمت
عليها وطلعت ابنها والولد كاعدين
سال
«،،،،ها اجتكم سياره
«،،،لا اني راح اوصلهم
صفن علي بعدين عكد حواجبه الولد
كام وكال مبتسم وماشال
عيونه مني
«،،يله امشن
«،،لا اكعد اني راح اوصلهن حتى اجيب عشه
وياي
حجه هيج وطلع كدامنا
«،،امشي يمه
خاله حجت مشيت وياها ضايجه بعد
اكثر لان هو الي راح يوصلنا
صعدنا ليوره حرك خاله تحجي ويا
ويجاوبها بدون مايباوع علينا نزل يم
مطعم جاب عشه خلاه يمه كال
«،،،خاله هاي عشاكم ويانا لان تاخرتن يمنا
وتعبتن اليوم
«،،،،جاي تكلف نفسك هوايه يايمه
وكمت مااعرف شلون اشكرك
«،،،بس ادعي لامي ادكوم بالسلامه
«،،،الله يكومها الك بالسلامه وماتشوف شر
بيها طول العمر
«،،،امين خاله والله قهرتني كلش
اليوم
من حجه اختنگ وسكت
«،،،اعرفك تحبها ،،، وصعبه
عليك تشوفها بهيج وضع
«،،،شنو احبها خاله اني اموت على امي
هاي روحي وعيوني الي اشوف بيها
ووالله مااحلف الا بيها ومن
غلاتها اكول وداعه امي
الغاليه
جاوبها وصفنت علي كمل عيونه على
الطريق
«««والله لو صاير بيها شي،الا اموت وراها
«،،،لا يمه اسم الله عليك وعليها ربك قدر
ولطف وهسه كم يوم ويجبر عظمها وترجع
تمشي وتفتر بيتها
«««يالله يكون باجر اشوفها تمشي بس
عاد هي مره جبيره ويردلها عنايه ووحده
تظل يمها ولازم اشوفلي وحده
تظل يمها لان انتي
تعرفين وضع ميسون
«،«اي اعرف وسوده عليه بجت عليها وانقهرت
لان هي هم حملها جبير
«،،اي اي خاله
جاوب وذب حسره وصلنا نزلت
وشلت الجنطه ويمامه هي اجت يمي
شايله علاليك الي جابهن النا
نزل جاب العشه وكال
«،،،،خلي اوصلكم
«،،راح نسوي زحمه عليك
«،،لا خاله رحمه
مشى كدامنا بخطوات واسعه اول مره
اشوفه لابس دشادشه وشكله تغير عن الزي
وكف يم الباب خاله فتحته طبت اني
وراها كالت
«،،،تفضل مهيب
مشيت للغرفه طبيت وخليت يمامه على
الجربايه وعلگت الهيتر حتى تدفى
الغرفه
طلعت شفته كاعد يم ياسين يحجي
ويا ومبتسم كام باسه من راسه ترخص
وطلع رغم طيبته وياهم وايده الكريمه ماكدرت
اشوفه بصوره طيبه ظليت ماخذه
علي نظره مو حلوه وخايفه
منه
ليلى
جنت محتاجه غاده حتى احجيلها
على الصار اتصلت عليها ماجاوبت كلت خاف
ملتهيه وي حمزه لان علاقتهم
صارت حلوه وبدت
قصه حبهم
جنت فرحانه بيها كلش لان كدرت تنسى
السواه بيها هو كدر يخليها
تحبه من وره دلاله وحبه
الها
خابرتها ماجاوبت كلت ملتهيه ويا وخليها
براحتها صفنت على حالي مقهوره
ودمعتي بعيوني اني بغرفه
وهو بالغرفه الثانيه
حجه ويا وحاول يبرر الي سواه هناك
وجان السبب الشرب اني اعرف الواحد
من يشرب يفقد الاداراك والوعي
واعرف هو صار شخص
ثاني لان ماتحمل الي
شافه
شفته من اجه لبيت عمو غانم مخبل وفاقد
وتخليته شلون عاش،هناك وهو
كالها جنت مو صاحي
والكل عرفني مخبل
دمعتي نزلت وكمت ابجي لان صعبه علي
السمعته منه عرف نسوان ونام
وياهن واني ماكدرت
حتى اخونه بنظرة
العين
شهكت وغطيت وجهي بايدي وكمت
ابجي بصوت قوي الباب انفتح
عرفته هو كال
«،،،مو كافي بجي
«،،اطلع قائد وروح من يمي
ماحجه شي اجه وكعد يمي ردت اكوم لزمني
وكال
«،،اكعدي لخاطر الگعبه وكافي تعذبين
بروحج وتعذبين بي
نفضت ايده وصحت بي من وكفت
«،،،كتلك عوووفني انت شبيك ماجاي
تفهم اني بعد مااكدر اطيق وجودك يمي
ولا اكدر اشوف خلقتك
«،،اني ااعرف شسويت وعرفت اذا حجيت
راح تتاذين وتضوجين مني بس جان لازم احجي
لازم جان تعرفين هالشي حتى مااظل
عايش بذنب السويته هناك
واحس بروحي اني
جذبت عليج
بشي
حجه بغضب وكمل
«،،الف مره ردت احجي الج شنو بيه واتراجع
خايف من خسراتج وزعلج وحجيت
وصار الجنت خايف منه بس
اكلج اني مو ندمان
لان حجيت
صفنت علي وصحت بي
«،،مو ندمان قائد حركت دمي وادكلي مو
ندمان لان حجيت
«،،اي مو ندمان تعرفين ليش
سكت وكمل بعيون صايرات دم
«،،لان تعبت واني اباوع بعيونج واضحك
وياج واكو شي بداخلي مخرب هالفرحه
تعبت من الي ضامه بگلبي،،، انتي ما حجيتي
اليه الي صار بيج ماجنت اگلج
احجيلي لاتضمين شي
«،،،هاااي مو مثل هاااي
،،،اي صح بس هم هاي هموم وقهر مضموم
بالگلب انتي جنتي واعيه واذيتي روحج من ورايه
واني مو بوعي من تصخمت وسويت
السويته
،،،منو كلك اني جنت بوعي مو تخبلت من عفتني
وماظل عقل براسي من وره السوه
بينا
سكت صافن عليه ووجهه مطعون رد
«،،شفتي كلتي مو بوعي واذيت روحي
واني هم اكلج ماجنت بوعي وسويت السويته
مارديت كمل
«،،اني اعرف راح نظل هيج نتعارك من وره هالسالفه واعرف انتي ماراح تنسين السمعتي مني
واعرف اني راح اكل خره لان حجيت
وارجع اكلج وجع هاللحظه
واتحملها واتحملج ولا اظل
مجذب عليج طول العمر
حجه هيج وطلع من يمي
جنات
بنفس،،،،اليوم الي تخربطت بي اختي اخذتني
لدكتور اختصاص شاف ضغطي
طلع بعده صاعد بس
اقل من الصبح
كتبلي حب ضغط وكال استمري علي
طول الحياه وغير دوه الشقيقه لان جان
يسويلي لعبان نفس ودوخه
رجعت لبيتي ماقبلت اظل يمها ردت اظل
وحدي واعزل نفسي عن الكل بس يوسف يمي
تمددت بغرفتي
مقهوره على روحي ونفسي مكسوره من
كلشي جهازي دك برساله مادرت
بال لان جنت مالي خلك
وراسي بعده جان
بعده يوجعني
بس بالم اخف
اجاني اتصال كلت هاي اسماء تريد
تطمن عليه اخذته شفت رقم
استاذ ارشد لان سيفته
عندي من ذيج
المره ماجاوبت جنت خجلانه منه كلش
لان شاف وضعي شلون صار وهو
شالني وركض بيه للمستشفى
دز رساله سحبت الشاشه قريت
اول وحده
«،،،مساء الخير ست جنات شلون صرتي
ان شاء الله احسن
اللخ كاتب
،،،،باجر لاتجين اخذي اجازه ثلاثه ايام
ترددت بعدين فتحتهن وكتبت
«،،،شكرا الك استاذ
قراها كتب
«،،رحتي دكتور
«،،اي
طول وكتب
«،،اكدر اعرف شكال الج
صفنت على سؤاله بعدين جاوبت
«،،طلع عندي ضغط وانطاني دوه راح اخذه
اخذه طول عمري
ماكتب شي وطول عفت جهازي اجت
رساله باوعت كاتب
«،،،اتمنى منج تنسين الي صار وتبدين
حياه جديده
عيوني غوركت وكلت بگلبي
«،،،شلون اكدر انسى
،،،اسف اذا ادخلت بشي مايخصني
كتب هيج جاوبت
«،،اترخص استاذ لان شويه مااكدر وشكرا
الك على الاجازه
تاخر وكتب
«،،هذا اقل شي اكدر اسوي الج ست
جنات
«،،اكرر شكري الك استاذ وتصبح
على خير
«،،،وانتي من اهله
طفيت جهازي وتمددت دمعتي بعيوني هوايه كالو اليه انسي وعيشي حياتج بس صعب انسى لان جرحي بعده ينزف وماطاب
ارشد
جنت اريد اساعد جنات بشي يخلي نفسيتها
شويه تتحسن بس جان لازم اعرف
كلشي عنها صح اني سمعت
كلامها وي رجلها
وعرفت العار ماخذ البيت الي اخذته بقرض
لان جانت مسجلته باسمه وازوج عليها
من وره الخلفه بس جان لازم
اعرف عن وضعها بعد
اكثر
ماترددت بقراري هذا دزيت على ست اسماء
لان اعرفها مقربه منها كلش ونقلن سوه
لهنا اجت وره دقائق سلمت
،،،صباح الخير استاذ
«،،،صباح النور تفضلي اكعدي
كعدت كلت
«،،،اني داز عليج بموضوع مايخص الشغل
سالت
«،،خير استاذ شنو هذا الموضوع
«،،الموضوع يخص ست جنات
صفنت عليه وسألت
«،،،ليش شبيها جنات
«،،،اني ماراح الف وادور لان هذا مو طبعي
ابدا والي اريد احجي لازم يظل بينا ست اسماء
«،،،اي بس هو شنو الصاير
رجعت ليوره وجاوبت
«،،،اني اريد اساعدها وارجع بيتها الها لان عرفت
هي ماخذه بيت بقرض ومسجلته باسم رجلها
ومن طلقها مارجعه الها
«،،اي يعني هو
سكتت كلت
«،،،ست اني اعرف انتي متحفظه بالكلام وياي
واتمنى تنسين اني مديرج وتشوفيني
انسان يحاول يساعد انسانه
انظلمت من واحد
ظالم ماخاف الله بوحده امنت
بي وجانت تشوفه
سند
ملامح وجهها تغيرت وعيونها غوركت
جاوبت
«،،،استاذ اذا تكدر رجعه الها والله هاي
وكفتك ماراح تنساها الك طول عمرها
«،،لا ست اسماء اني راح ارجعه الها بس مااريده
تعرف اني سويت هالشي
صفنت عليه كملت
«،،،اريدها بيني وبينج اني كتلج الحجي هذا
يظل بينا محد يعرفه لا هي ولا غيرها
«،،،،تمام بس يعني انت شلون راح ترجعه الها
«،،،هذا شغلي ست وعوفي هالموضوع عليه
واني دزيت عليج حتى اعرف كم شغله قبل
لااسوي هالشي
«،،اي تفضل اسال
«،،،هي بعدها تدفع اقصاط مو
«،،،اي وعدها شيكات بهل الشي
«،،،،ماعدها ورق شي مكتوب منه اثبات
علي يثبت البيت مالتها
«،،،لا استاذ
زين اكو شهود علي ثقه
اي رجل اختها ابراهيم يعرف بهل الشي
واصلا كل اهلها واهله هم يعرفون البيت
مالتها واخذته بفلوسها بس هو
لان خلعته انتقم منها ومارجعه
الها
«،،تمام اني جنت بس اريد اعرف هالشي
سكتت بعدين سالت
«،،،هي هسه كاعده يم اختها مو
«،،،لا اجرت مشتمل اگبالهم وكعدت بي
«،،،وحدها
«،،،لا ابن اختها وياها
«،،،زين اهلها شبيهم وياها اني سمعتج
تدعين عليهم من تخربطت
ذبت حسره وجاوبت
«،،،اهلها انكس من رجلها لا سند ولا امان ومن
زمان هالشي
مارديت هي صفنت عليه ترددت بعدين
سالت
«،،،استاذ اني يعني اشوفك مهتم بيها
وماا
قاطعتها وكلت
«،،اني نيتي شريفه ست اسماء ومن زمان هالشي
مو اليوم
صفنت عليه كملت
««،،من زمان قبل لاتزوج اني ردتها بس قسمتي
وياها ماصارت
فكت عيونها وسالت
«،،شنو استاذ انت يعني جنت رايدها
«،،،اي تقدمت عليها مرتين ورفضتني
«،«بس شلون يعني هي ماتذكرتك
«،،،هي ماشايفتني واعتقد حتى اسمي ماسألت
علي لان رفضتني بسرعه
««،هي هوايه اجوها قبل كريم واني اعرفهم
يعني حجتلي عليهم بس انت ماحجت
شي عنك
سكتت مثل الي تفكر بعدين كالت
«،،،،سمعت واحد ابن شيخ تقدم عليها بس
لا انت
ابتسمت وجاوبت
«،،،اي اني ابن الشيخ تميم
دحگت عليه مذهوله ومتفاجأه رددت
«،،،هاي شلون صدفه
ذبيت حسره وجاوبت
«،،،هسه انتي عرفتني اني منو وعرفتي
الي اريده وياريت توكفيلي وكفه اخت لاخوها
وتقنعيها تقبل بيه من اتقدم الها مره اللخ
«،،،ياريت اااستاذ تصير من نصيبها
جاوبتني وكامت تبجي كملت
«،،،والله جنات الي يخليها بيته يربح لان
خلقه واخلاق ويجوز ربك سوه صالح من ماخلفت
من هذا العار وتطلگت منه حتى تصير
قسمتكم سوه
«،،،هي ظلت يم الله ويمج ست لان اني اكدر
اتقدم هسه عليها بس راح ترفضني مره ثالثه
كلت خلي يطيب جرحها لان بعده
جديد وانتي اوكفيلي
بهل الشي وقنعيها
تبدي حياه جديده وياي
فرحت وجاوبت
«،،،ادلل استاذ من عيوني
«،،،تسلمين ماتقصرين
«،،،اني اترخص واعتبرني اختك وان شاء الله
قسمتك انت وياها تصير وتكسر
خشوم الي كسروها
ابتسمت وجاوبت
«،،،امين
حمزه
كاعد يم غاده وگاض ايدها اريدها
تكعد وتفتح عيونها لچن هي ماكعدت
وخلوه الها بطل دم اللخ وهي
نفس وضعها
تعبت وحيلي راح والخوف اكل گلبي
وصرت فد مره من وراها
اتوسل برب العالمين تكعد وتفرح گلبي
عمتي يمي تدعي وتبجي وحالها اضرب من
حالي الباب انفتح طبت امها
تبجي ابوها وراها
كمت من يمها
اجتي عليها حظنتها وتردد
«،،،شبيها بنتي وشلون جابت وهي
بالثامن
ابوها هم حظنها وكام يبجي
بصوت مخنوك
«،،،غاده
سمعت صوت اخوها انداريت شفته يم الباب
شكرا لزيارتكم عالم روايات سكيرهوم
