رواية فصلية الضابط الفصل الثاني والثلاثون 32 بقلم زينب نور

•........... انيت بوجع كاعده احس نفسي بغير عالم اكو اصوات اتروح وترجع يمي هوسه بس احاول اوعى بديت اميز الاصوات ما اڰدر افتح اعيوني اضويه قويه بعيوني افتحهم وارجع اغمض ما اكدر اكابس الضوء واحس بوجع دماار بصدري مثل الجمره بمكان گلبي وجسمي احسه خدران ما احس بي اله هل مكان بي وجع قاتل 

  ولساني ثكيل ما بيه انطق كلمه بس اسمع اصوات وهلمره اسمع صوت وسام وحازم قريب عليه ميزت اصواتهم يسولفون ويا الدكتور ويسئلونه عن صحتي 

بس الدكتور مو عراقي ايجاوبهم بغير للغة 

واكو مترجم ايترجم لدكتور والهم 

حركت اطراف اصابيعي ونيت بصوت خافت احاول افتح اعيوني زين اريد

اتاكد اني بعدني عايشه لو هاي بس روحي تفتر 

لما حسيت بالمسة ايد وسام وصوته قريب عليه ويحمد الله ويشكره

والدكتور اتقرب اكثر عليه احس بالسماعه ايمشيها على صدري ويقيس بالنبض 

احس الصوندات بخشمي والاجهزه على صدري اصواتهم مزعجه 

كدرت افتح اعيوني شفت بس وسام وجه قريب عليه مبتسم من بين ادموعه رجعت غمضت بس احس بيهم واسمع حديثهم 

الدكتور يشرح للمترجم ولمترجم يشرح الهم عن وضعي انو الحمدالله كلشي تمام ولعمليه ناجحه ومتجاوزه الخطر وضعي طبيعي 

احس بفرحهم ويشكرون من الدكتور 

يعني اني سويت عمليه وما متت ما اصدك معقوله هلكد اني نحسه حتى بهاي شكد تمنيت اموت بس ما متت 

رجعت غفيت ما اعرف اشكد ايام 

فتحت اعيوني بتثاقل شفت نفسي الوحدي بالغرفه درت وجهي للجهه الثانيه شفت اكو مضمد واكف بعيد عني مكتف اديه على صدره ومنتجي على الحايط ويباوعلي مثل المنتظرني اصحه من درت وجهي علي فز واجاني بلهفه ما اركز زين بس احس اعرفه هو لابس ملابس مضمدين ونضارات طبيه وكمامه وقبعه ما ينعرف بس احاول اركز بعيونه حتى اتأكد من عنده ليش احس فز گلبي من شافه 

اشوف اعيونه بيها دموع نزل راسه قريب يم راسي يهمس بصوت خافت بس اني اسمعه  

(نداوي يرويحتي كافي نوم اكعدي عاد مشتاقلج بكد رحمة الله وداعت أمي ) 

كلشي انتفض بيه من سمعت صوته اردد معقوله هذا وارث فاتحه عيوني مركزه بي شكد ما اكدر 

لازم أيدي يعصر بيها ويشتم بشعري الطالع من القبعه ومشى اصابيعه على اعيوني لحضات موهوايه احسه ترك ايدي وابتعد عني احاول احجي بس ما اكدر اريد اكوله انت وارث لو يتهيألي 

اباوع علي عافني وطلع ضليت اباوعله متأمله يرجع عليه بس ما رجع 

انسد الباب ما مستوعبه اني اكيد بحلم 

ماكاعده اصدك شنو وارث يجيني 

شكاعد يصير وياي يا الله 

بس هاي ريحته اعرفها من اقترب يمي ميزت ريحته وعطره البارد اتغلغل بروحي  

                                            

              

                    

فزيت على صوت الباب من رجع انفتح عبالي هو رجع بس دخل وسام وحازم ويا اجوني بلهفه ولفرحه بوجوهم مبينه

اول ما تلاكت اعيونه اني اوسام بجينه بس ادموع ينزلن من اعيوني حتى ما اكدر اتحرك احس مثل الجمرايه بمكان گلبي 

صاح بيه وسام :- هششش لا تبجين ميصير موزين عليج 

ويمسح بدموعي وهو اصلاً يبجي كاعده اشوف ادموعه ينزلن على اخدوده 

صاح بي حازم:- شسالفه وسام جا انت تسكتها لو تبجي وياها شو اطلع بره كمل بواجيك بره وتعال موزين عليها شوصانه الدكتور قبل شويه وشحذر

رفع راسه يمسح بعيونه 

ومبتسم بوجهي 

وسام:- نداوي عزيزة روحي ما مصدك فاتحه اعيونج ورجعتيلنه الف الحمدالله 

عصرت ايده وطلعت شهكه من صدري من اجه ابالي حسام وذكرت هو بعد ما موجود مات وأمي همين 

رفعت ايدي ابعد التنفس حتى اكدر احجي 

ندى:- وسام 

وسام :- يابعد روح اخوج كولي شيوجعج 

ندى:- گلبي يوجعني وسام اريد اموت 

وسام :- بيه ولا بيج خويه 

ندى:- ليش ما خليتوني اموت ليش 

وسام :- فدوه اروحلج نداوي اسكتي لا تحجين هيج كافي كل يوم ازتلي عزيز للنجف والله خلصت روحي بعد مابيه الخاطري شدي حيلج وكومي ماصدكت ترجعين تفتحين عيونج

اقترب حازم يتحمدلي على السلامه 

ويسحب بوسام:- يله وسام ميصير اتعبها بالسوالف موزين عليها 

ويطبطب على ضهره 

كمت اتحرك واصرخ من الوجع صار ما ينحمل بعد رفعت ايدي لزمت صدري لزم ايدي وسام نزلها ويهدئ بيه وحازم طلع بسرعه يصيح لدكتور

دخلو الممرضين ايحاولون يهدأوني صرفولي العلاج بالمغذي 

ثواني وحسيت خدرت وعيوني ثگلت رجعت نمت 

من المسكن 

بقيت اسبوع على هاي حالتي من اصحى ما اتحمل الوجع وينطوني مسكنات وارجع اخدر وانام

لما بديت اتحسن اشويه اشويه ولوجع بده يخف عندي واجاني ابويه شفته من بعيد ميدخلون احد يخافون لا انقهر لو ابجي وموزين عليه 

بس كلما يدخلون الكاتره او مضمدين ابقى مركزه بعيونهم بالكي اشوفه مرة ثانيه واقنع بنفسي انو جنت احلم من شفت وارث هنا او يتهيألي مستحيل يجيني وارث وميخلو يدخل اصلاً وسام وحازم موجودين شلون يكدر يدخل يمي 

كاعده احس بفجوه جبيره ابداخلي متعوده علي جنت قبل اول ما اصحى اشوفه هو كدام عيني وما يتركني ولا لحضه هسه احس اعيوني ادوره بالوجوه مثل المضيعتلي ضايعه اريده وما أريده ابد مو سهله عليه بهل سرعه اتخطى وجوده بحياتي جان كلشي بحياتي وفجئ اختفى شي حيييل صعب حتى الدمعه ما تقبل تنزل مثل الحايره بعيني 

كمت التجئ للنوم ما اريد افكر بشي كافي عذاب شبعت منه 

ووسام ابد ماتركني بهل فتره ولا لحضه واحتني تبارك هي وزوجها ايساعدوني اكوم اتمشى اروح للحمام 

كلما اسئلهم بشي يخص امي ميجاوبون احس تخنكهم العبره ويحاولون يبلعوها ويغيرون الموضوع حتى ينسوني وما ارجع انهار 

وعرفت من تبارك اني حالياً بأربيل وصارلي ثلاث اسابيع بأربيل ناقليني بأسعاف على احسابهم وابويه جاي شايفني من بعيد وراجع و گالتلي 

المصاريف كولها مدفوعه تكاليف العمليه وحتى العلاجات وكلشي يخصني من واحد مجهول مايعرفون من منو ويحاولون يعرفون من منو 

بس اني اعرف اكيد وارث ماكو غيره هو الدفع التكاليف سئلتها عن وارث اذا جاي لهنا او سائل عليه 

            

              

                    

تبارك:- اسكتي ولج همزين جنتي بوقتها فاقده ومتدرين غير لعب فلك هناك بكربله

ندى:- ليش اشصار سولفيلي 

تبارك:- ولج غير اجه للبيت وخبص الدنيا علينه ومن ما لكاج تخبل وضل ايدور عليج 

الحد ما عرف بيج بالمستشفى ويريد هو ياخذج وصارت ذيج العركه متضاربين هو وولدنه بس ولد عمامنه ماقصرو ويا وكفو بوجه

خابرهم وسام واجو حازم وماجد وهاشم 

وحتى زوجي عصام ومحمد زوج ضحى 

وصايره عركه شكبرها متعاركين عركه جبيره بالمستشفى بكربله يكولي عصام حتى رافع اسلاحه ورايد يرمي بس لازمينه الضباط الويا 

وماخذينه كوه ادفع وابويه متخبل من عنده من عرف بيج صاير عندج عجز بالقلب وحالتج خطره وحتى يردون يشتكون علي 

لان هو سبب حالتج هاي 

وحتى سمعت من عصام يكول عالساس شايفين سيارته هنا باربيل بالمستشفى جاي بس ما متأكدين من عنده لان ما شايفينه 

هزيت راسي 

تأكدت من گالت شايفين سيارته هنا 

لعد اني مو حلمانه جايني هو شفته 

بس ما گلت التبارك انو شفته اكتفيت بالسكوت بس بداخلي ألم يگطع بروحي اسولف ويا نفسي اقنعها انو لازم انساه او احسبه مات مثل ما مات حسام 

ورجعت سئلتها على أمي شلون وشوكت توفت 

بالبدايه ما قبلت تسولفلي بس اني أصريت عليها وسولفتلي كلشي 

وعرفت منها امي متوفيه ورا ما سامعه بقرار المحكمه من صادرين أمر بأعدامه 

ما متحمله وضاربتها جلطه بالدماغ

ما مطوله اكثر من ثلاث ايام وراحت يم رب رحيم اخذ امانته

وحسام انعدم وهو ميعرف بأمي متوفيه وقبل لا يعدمونه بيوم من رايحين ايشوفونه سائلهم عليها رايد يشوفها طالبها متوسل بيهم ايشوفها بس ما گايلين اله متوفيه گايلين اله عالساس هم ما مخلينها تجي وتشوفه لان ما تتحمل اتشوفه بهل وضع 

وكلهم رايحين شايفينه ومودعينه قبل اعدامه بيوم

جنت اسمعها واحس گلبي يتكطع وصل بس ادموعي تشرح حالي وشنو احس 

بس اكول ليش هيج صار بينه عبالك لعنه نزلت علينه وطشرتنه هيج

ورا يومين اجاني الدكتور فحصني وگال الهم عادي تكدرون اتطلعون اذا تردون صحتها تمام وضعها مستقر وانتو حاولو تبعدونها من اي ضغوطات والتزمو بالعلاج زين باوقاته اتحمدلي على السلامه وطلع

ثاني يوم جهزنه انفسنه و طلعنه من المستشفى وجان موجود عصام ويا تبارك بسيارته رجعنه المحافظة كربلاء بس ابدد ما اليه لهفه للحياة رجعت واني ما فرحانه بنجاح عمليتي ولا اليه واهس اشوفلي مخلوق وتبارك و وسام شكد ميحاولون يخفون الحزن البداخلهم بس مفضوح بوجوهم وبملامحهم 

دخلنه منطقتنه الزراعيه أول المنتظرين ابويه واكف على الشارع هو وجهال وسام وعمامي ويا واكفين شوفته ردتلي روحي بس حيييل متغير ماضال بي حيل لازم العوجيه واكف مبتسم من بعيد اشوفه اتلكاني بالاحضان ويبوس بأديه ما مصدك رجعت اله وعمامي وكل اقاربنه موجودين سلمو عليه من بعيد ماعندي طاقه اوكف او اسلم دخلوني الغرفتي مجهزيلي غرفة خاصه الي يخافون عليه بعد اكو خطوره ومشو على تعليمات الدكتور

الي يجينه من بعيد ايسلم ويروح 

اما البيت مابي روح الحزن مغيم علي اشوف نضرات الاستعطاف بعيون اليجوني 

كرهت روحي وجانت مسيطره على افكاري انو الله يكرهني ومارادني اموت كاتبلي اتعذب بعد

و بعد موت أمي وحسام  

وحياتي الجانت ويا وارث وتعلقي بي 

ما اضن اعيش مثل باقي البنات ومستحيل ارجع طبيعيه 

كل يوم اشبع بجي الحد ما اتعب وانام 

شكد يحاولون وياي اطلع من هذا جوي الكئيب واسمع محاضراتهم انو لازم اتخطى واتقبل الواقع بس موبيدي صار شهرين من سويت العمليه وصرت زينه اكدر اكوم افتر بالبيت واطلع ويا جهال وسام خارج البيت صاير وسط بستان بي نخل وأشجار وخضار كلش حلو الجو طبيعي بس ما غير شي بداخلي من اختل بنفسي اصفن واضل ادموعي تشرح البداخلي

صارت من اكبر أمالي انو اشوف وارث حتى لو من بعيد صرت مهوسه بي صرت ارسم ملامح وجه بكلشي كدامي 

احسه متملكني كل تفكيري بي واحسب الوقت واسولف ويا نفسي كل يوم

هسه اكيد طلع الدوامه

وهسه اكيد رجع وهيج سوه وهيج سوه

تعبت من وضعي هلكت من البجي ولتخيالات 

احس نفسي مو اني شي بداخلي يخليني هيج اسوي صح 

متعوده على افراك امي وحسام لان مفاركتهم صار سنه 

بس افراك وارث ما كاعده اتقبله ما كاعده اتعود على بعده عني 

تمرضت بمرض اسمه وارث 

بهل فتره ما عافوني اهلي ابويه و اخواتي وزهور اتحاول وياي 

اشترالي وسام موبايل جديد اسمه سامسونگ وسيم كارت جابليا حتى ايساعدني اطلع من حزني وكتئابي وحتى صديقتي أيمان مرتين جابولياها تبقى يمي يوم وتروح هي وامها في سبيل اطلع من جوي خايفين خاف تصير بيه حاله نفسيه لان ما احجي ولا اختلط بيهم اكثر وقتي اصفن او انام بس كل هذا ما عوضني غيابه واعرف هالشي غلط هو شبب كلشي صار بحياتنه بس گلبي ما يقبل يقتنع وينساه كرهت نفسي على هل تعلق بس هم مووبيدي 

احس فقدت شي اسمه فرح او ابتسامه 

اباوع الهم اشوفهم عادي عدهم ايسولفون ويطلعون ويشترون 

بس اني واشوف ابويه مبين علي مكسور وكاعد بالبيت حتى المحل ما يطلع ولا يكعد بي واشوفه عالطول عيونه حمر من البجي وضغطه ابد ما مستقر اموت من القهر بالزايد من اشوفه هيج مبين بوجه بملامحه الحزن ومياكل وهم عازل نفسه بالاستقبال لو يكعد بالبستان ولجگاره راح تموته بس چاي وجگاير وعلاجات بمعدته

  حالته تتراجع يوم بعد يوم وكل يومين يم الدكتور وسام ياخذه خطيه احتار بيني وبين ابويه 

تبارك وضحى يخابرني كل يوم ويحاولن وياي يسولفن يقنعني لازم اتخطى واطلع او ارجع ادرس اكمل خارجي بس اني رافضه كلشي 

لما بيوم سمعتهم ايسولفون وفرحانين عالساس تقي راح يطلع من السجن خاله اخو امه هم ضابط و عنده معارف و واسطات وكادر يثبت انو مووتقي الي ويا حسام ومغيرين الادله كلها بصالح تقي وراح يطلع من السجن بهل يومين واشوف وسام فرحان راح يطلع تقي وابويه همين فرحان 

كال وسام الابويه اني رايح البغداد ويا الولد نتلكا هناك احتمال باجر يطلع : 

بس اني هنا من سمعت بأسم بغداد احس گلبي گمز شي بداخلي انتفض هاي الي بيها ذكريات يابو ذكريات حيل موجوعه من عدها وابد ماشفت بيها الراحه بس احبها واحب اسمع اسمها اكو احساس ابداخلي يكول ارجعلها بيوم من الايام: 

اشوف وسام ايخابر بولد عمي واتفقو يرحون باجر الصبح يطلعون على وقت سوه البغداد حتى ايلاكون تقي : 

ورا يومين ........... 

شكرا لزيارتكم عالم روايات سكيرهوم