رواية قصة وجدان الفصل الثاني والثلاثون بقلم انين الليل
صرت اعيط واني حاضنه بيبي بحيث اجوي اولادها وعمو عاصف يركضون على صوتي دخلو للغرفه وشافوني
حاضنتها واعيط =. بيبي. بيبي
الكل صار يبچي واني بقيت خاضنتها واحاجيها = بيبي اكعدي لتعوفيني بيبي لا ترحيين منو اليه
عمو عاصف حاول يبعدني عنها وهو ايكلي :: الله يرحمها وجدان بابا كولي الله يرحمها
ما وخرت عنها بالعكس اكثر حضنتها لكن عمو حاول ان يميلني واني لازمه بيها بقوه =. ما يصير هالشكل وجد
لزمني وحضنته واني اعيط =. عمو بيبي بيبي
( صرت ابجي واشهك ) بيبي هماتين ماتت بيبي حبيبتي اكعدي الله يخليج
صار ايهدي بيه :: لا بابا مو هيج استغفري ربج
بقييت اعيط بصوت عالي =. لا ليش كل الاحبهم يرحون مني اني شمسويه لا بيبي بيبي اكعدي عفيه حبيبتي
عاصف صار ايكلي :: بابا وجد باعيلي باعيلي ( حرك وجهي حتى اباوع الها صارت عيني بعيونه )
:: كولي الله يرحمها مو انتي توج جنتي تصليين ياالله بابا حبيبتي صيري قويه
الخاطيرها ياالله بابا افه عليج لو ما تحبج ما ودت عليج صيري سباعيه وقويه هي مره مؤمنه ما تقبل هالشكل تسوين
هدئت من كلامه لان حسيت بي خايف عليه باوع الولدها الي كانو يبجون
:: ياالله لازم ناخذها للمستشفى
كريم ورحيم وكرار واولاد وبنات اولادها صارو يبجون خاله شيماء وام كرار وزوجة رحيم والبيت انملى ناس
ويامسرع ما اخذوها وبقت بس الناس الي تجي تعازي اجت رجاء ونهاد وعماتي امل وانصاف وسعاد واجت
فرح وعمه سميره وهواي ناس ما اعرفهن وبيبي تصيحني اجيب ماي وجاي وتگلي سلمي هاي من عماتج
او من بيبياتج او كرايبنه مرات اشوف النساء يكعدن ويسولفن واني ساكته مقهوره
واجت اختها ام حاتم مره كبيره وياها اثنين لازماتها وبعدها اجن خالاتي الي ما شفتهن من اتوفت امي كل وحده
جايبه وياهه بنتها
ومن اجن خاله شيماء كالت تعالي سلمي على خالاتج ما رديت عليها ومره ثانيه رجعت وطلبت مني اجي اسلم جاوبتها
= ما اگوم اله بيبي اتگلي واذا ما توافق ما اروح واسلم بعدين اني منين اعرفهن وهنه قابل سائلات عليه
راحت خاله شيماء ورجعت عليه حاجتني // حبوبتج تريدج
رحت يمها هي اشرتلي دنكت وشاورتني // روحي جده سلمي على حبوبتج وخالاتج
اخذتني خاله شيماء اني سلمت على خالاتي الي كان سلامهن كلش بارد اتجاهي عبالك ما يعرفني او اني مو بت اختهن
وحتى ما سالني على احوالي ولا على هشام او علي بعدها اخذتني الام حاتم الي كانت كاعده يم بيبي وبوقتها من رحت
بيبي گاعده وتسولف على ام حاتم خالة امي واخت بيبي هديه خاله شيماء لزمتني من ايدي وكالت
- - خاله هاي بت نجاة
اني دنكت بستها = اشلونج بيبي
ام حاتم // هلا حبيبتي (سالت شيماء) بتمن
هي مو هلكد تسمع فشيماء حجت بصوت عالي // خاله بت نجاة بت اخوج
ام حاتم حضنتني // يمه هاي ابنيتها ( وصارت تنعى على شباب امي وعلى الي. صار بيها وتبجي )
كعدت بين بيبي وبينها وهي تبوسني وتكلي اشلونج
هزيت راسي رغم ما احبها لكن كانت احسن من خالاتي الي ما كلفن خاطرهن لو يسالني سوال او حتى يتذكرن امي
ويجيبن اسمها كرهتهن وصرت اباوع الهن باشمئزاز خصوصا نظيمه الكبيره والي احس انها كانت الها يد بالظلم
الي عانت منه امي
بقيت كاعده يم بيبي واشوف نظرات خالاتي الخاليه من الحب او حتى العطف عليه
رجعت للمطبخ اساعد البنات وكان تقريبا دنيا ظهر ويردون ايصلون بقيت كاعده قريبه على باب الصاله الداخليه
وبصراحه لان شفت خاله شيماء كاعده يم خالاتي وبصراحه اكثر حتى اسمع كلامهن
شيماء // لا انتن غلطانات هاي شگد صار سوال ما سالتن عليها منين تعرفجن
- - همه اخذوها ومنعونه منها
- - نظيمه شلج بهالحجي هذا منو منعج هو انتي لو اختج كلفتن نفسجن لو تسالن عليها
غنيه // اي خليها يم عمامها احسن منو يتحمل مسووليتها
- - بس انتن خالاتها
- - شنو هي معترفه بينه ياخالات شبيج امي ماتت حتى ما كلفو خاطرهم يجيبونها لو حتى يجون للفاتحه
شيماء // بس تبقى البنيه بت اختجن
- - اختنا ماتت بعد احنه ما النه. اي علاقه ابزرها
ردت اروح واحجي النظيمه عن الي اتحملته امي. بسبب غلطها لكن اني ما ردت اتصير مشكله بفاتحة بيبي رحت
گدامهن دنكت على بيبي وحاچيتها = بيبي ياالله كومي اتوضي منا. وهيج صلاة
بيبي //. اي ياجده الله يرضى عليج (باوعت لام حاتم ). هاي روحها من الدنيا الصلا ما اتضيع فرض هي ندهتنا.
الفجر صلينه وام كريم اتوفت
ام حاتم //. امها. خيره وفقيره الله يرحمها
ثاني يوم اجو اهل بيداء زوجة عمو رحيم واجت وياهم رقيه الطالبه الي تداوم بجامعة بغداد وسلمت عليه گلتلي
- - اتذكرتيني لمن انتي وعمج وعمتج اجيتو ويه بيت ابو كرار عزمكم
هزيت راسي وابتسمت = اي اتذكرتج
- - وانتي شلون صرتي
= الحمد لله
-
- - وعمتج ام ( خلت اصبعها على كصتها )
= ام غانم زينه الحمد لله هياته موجوده
جاوبتني بضحكه // واكيد عمج هم اجه مو
= اي عمو موجود طبعا
صارت تشتغل بالمطبخ وتوزع ماي وجاي وكل شويه تطلع للطارمه وثالث يوم الصبح طلعت ويه عمه بيداء
ومن رجعن سالتها خاله شيماء //. ام غيث ويامن رحتن لو اجرتن تكسي
- - دزيت على عاصف واخذنه اتسوكنه واجينه
شيماء باستغراب // يا عاصف اول تالي يعوف الفاتحه ويجي
رقيه //. لا خاله عمتي تقصد دزت واحد من الجهال كلتله صيحلي الاي احد من الولد الواكفين بره اشو اجه
گرايبكم فعمتي ما قبلت گلتله خويه نريد احد ياجرنه تكسي وهو راح
بيداء //. اي شويه وجاب سيارته خلاها كلش بحلك البيت وهو يكول عدلن عبيجن منا ناس واخذنا للسوك
ومن وصلنه گتله ارجع خويه واحنه نجي بتكسي بس هو الله يسلمه ما قبل عاد احنه بساع اتسوكنا ورجعنا
تستمر القصة أدناه
دخلن داخل البيت واني سالت خاله شيماء= وين راحن
- - يتسوكن للختمه
ام كرار //. هاي بت اخو بيداء
سكتت شيماء سالتها //. شبيها ؟
ام كرار // هاي من رحنه ذيج المره من عزمونه بيت رحيم وهي ولا شالت عينها من عاصف
شيماء//. يا يا. تحجيين صدك اسكتي لحد يسمعج وعيب من عاصف
ام كرار //. شبيج شيماء قابل اكذب حتى كريم شافها وسولف ويه عاصف گله البنيه مبينه معجبه بيك ما
تخلينه نخطبها الك بس عاصف ما قبل واصلا كله سد الموضوع
شيماء //. وانتي ام كرار سدي الموضوع زحمه من بيداء
ام كرار //. شعليه هيج دا احجي الشفته
وصارت الختمه وقرن الملايات وزعنا الثواب وبالليل دز علينه عاصف وكال :: اتحضرن الصبح نرجع
وفعلا الصبح كعدنا اتريگنا واجه عاصف وبهاء وعمي مهدي سلمو على خاله شيماء وعلى ام كرار وزوجة عمو رحيم
ورقيه وامها كاعدات على صفحه لمن ما اجت رقيه وهي اتكله //. اشلونك عاصف. ماما هذا عاصف الي حجيتلج عنه
ام رقيه //. هله بيك عيني البقيه بحياتك
:: بحياتكم الباقيه رحم الله والديج ( دار على بيبي ) :: يمه اتحضرن حتى الصبح نمشي
كريم // عاصف ابقى انت وعمتي للسابعه
رحيم // اي عاصف ابقى شوراك
هز راسه وباوع البيبي :: ها يمه ؟
- - بكيفك
اتنفس :: خوش (باوع البهااء ) بهاء اخذ امك واختك وانا ومهدي نبقى اهنا
مهدي //. عاصف عدي شغل يوم السابع اجي
هز راسه :: بكيفك
بيبي // خلي وجدان وعلاوي يمي
ام كرار //. اي عاصف خليهم يمنه
راحو بعد ان سلمت رجاء ونهاد وفرح عليهم لان عماتي رجعن بالليل وبيوم السابع سوو. مثوبه كبيره وجابو ملايات للنساء
وقارى للرجال وهنا اجت رقيه هي وامها وعمه بيداء كالت //. انا عطلتهن لان رقيه راحت تسجل للمرحله الجديده
من كملو العشا احنه كفينه المواعين انا وهدى.ورقيه وبنت اخو ام كرار وصرنه
نغسلهن بره بالطارمه ونظفنه البيت. والمطبخ
ثاني بوم الضحى صار لازم نرجع سلمنه ورجعنه والعيون ما تخلو
من الدموع خاله شيماء الي تبوسني وتوصيني
وام كرار الي حضنتني وكالت // تعبتي ويانه
بيبي // شسوت هذا واجبها حبوبتها. قابل طالبتها
- - اي صدك حبوبتها وهي تحبها من كل وكلبها
سلمت على عمو كريم وهو يكلي // ديري بالج على نفسج وعلى علاوي
وعاصف اتسالم ويا وسلم على بيبي وكللها //. عمه احجي على عاصف
بيبي //. شبي ؟
عاصف //. امشي يمه هذا بطران
بيبي //. عاصف هو ايعلمنه مو احنه النعلمه
سلمنه ورجعنه البيت جدو واتلكتنا عمه رجاء وفرح والي شد انتباهي. انو لا عمه رجاء ولا فرح لابسات اسود هذا
الشي استغربتله بس ما عقبت علي. اني بالنسبه الي لبست اسود ونفس الشي والروتين والشغل عمو عاصف وهدوىه
وهيبته ومهدي وخبصته
وبهاء وعصبيته وضحكه
ولا ننسى نهاد وبصماتها
وقربت اربعين بيبي وكنت گاعده بالغرفه يم بيبي واجت رجاء وفرح رجاء بادرت بالكلام
عمه كلي العاصف اروح. الاربعينية ام كريم ومناك ازور
بيبي // بكيفج روحي انتي من زمان ما زايره
هزت راسها // اي اخذ فرح واروح
- - بكيفج.
تستمر القصة أدناه
بالليل اجو بيت مهدي. وسال عمو عاصف
— اكلك يمته الاربعين مالت عمتي
::بعد تلث تيام
- - خوش اريد اروح
هز راسه :: اي روح
- - اخذ نهوده والبنات ونروح
بهاء عقب. // مو. انا هم اريد اروح
بيبي // رووح جده اخذ امك واختك وروح
- - شتسوي رايحه فرح مو عدها دراسه
رجاء// تريد تروح اتزور وياي ليش حرام
هز راسه // مو عدها دراسه
رجاء // ما ينخاف عليها شاطره
بهاء // وانت عاصف ؟
:: عدي شغل. خو ما نعوفه ونمشي كلنه
بهاء// خلص روح انت وانا ابقى
هز راسه // لا انتو روحو انا اظلن خابرت كريم وتعذرت منه
- - وجدتي
:: بكيفها
بيبي // جده انت اخذ امك واختك ومهدي ياخذ. اعياله وانا اظلن
بهاء // هو هذا شلون حجي
- - اي اظلن ما بيه حيل اروح وهوسه وهرجه. على الطول عاصف ياخذني
- - مني يبقى وياج
- - وجدان
- - مو خاف البنيه تريد تروح
هزيت راسي = لا ابقى ويه بيبي وعمو. اني وعلاوي
وصار الاتفاق اياجرون كيه ويرحون بيها منا. قبل يوم الكربلاء
يباتون وبعدها يطلعون للنجف ويرجعون البغداد.
يزورون ويجون
طلعو الصبح واني بقيت يم بيبي عمو عاصف الصبح محاجي بيبي هو يجيب الغدا لا نطبخ شي
خاله سميره اجت وجابت النه خبز حار والظهر عمو جاب دجاج شوي وروبه ومقبلات وصرنا ناكل وبعدها سويت
الجاي وقبل ما يطلع سالني شنو تردون عشا
اني جاوبت =. اجبان
هز راسه وطلع بقيت ويه بيبي ما اطلع من الغرفه هي استغربت وگالت // اي عبالك هالرجاء وفريحه شايلين البيت وياهم.
بالليل صلينه وكملنه واجه عمو عاصف جايب انواع الجبن والكيمر يكفن. العشرين نفر بيبي من شافت العلاكه
سالته // المن كل هذا
:: مو تردون عشا اجبان ما اعرف. شجيب جبت ذني
بيبي هزت ايدها // احنه ابختك يايمه عاد جايبلك نوعين
:: شمدريني شتحبون خليهن بالثلاجه ما يخربن
رحت للمطبخ سويت چاي وخليت كيمر عرب وجبن كرافت واحلى. شي جايب صمون حار ابتسمت واني احك
بخدي گلي ::ها شو. ابتسمتي
عبالي ما شافني باوعتله = لاعمو هالشكل
:: كولي اشتهيتي فلافل مو
هزيت راسي. = شلون عرفت
باچر اجيبلج طلع التلفون واتصل. :: الو جابر
:: هلا بيك اگلك خلي واحد من الولد يجي
:: خلي. يجي رايده
:: اي واحد
:: الله وياك
فتح الثلاجه و طلع قوطيتين. جبن وكيمر وجبن عرب وعلاكة فواكه اندك الباب طلعهن اله ورجع
بيبي. رافعه اديها وتدعي //. الله يوفقك ويفرحك
رجع سالته // خابرت اخوك
هز راسه :: اي حجيه بكربلا والصبح يطلعون للنجف
- - يوصلون بالسلامه.
راح عمو هو وبيبي گعدو بالصاله واني غسلت الصحون ورحت يمهم بيبي كاعده وعمو خال راسه بحضنها.
وهي تلعب بشعره اجيت. كعدت سالتني // ها جده كملتي مواعينج
هزيت راسي اجه علي كعد يمي وحاجاني بصوت ناصي
() ارريد االعب بلي تجييين وياي
= لا اخاف شيوديني للمضيف
() بس اااني ارريد االعب
بيبي سالتني // شبي علاوي شيريد ؟
تستمر القصة أدناه
= يريد يلعب ابلي بره
- - وين بره
= بالمضيف
() ته تكلي ااخااف
عمو وهو متمددعلى رجل بيبي كله :: رووح جيب البلي اهنا شكله والعب
بيبي // ها هو يصير اهنا يتركب
:: اي يمه يصير
راح علي وجابه بلحظات ركبه ودار عليه () تعالي نللعب
بقيت كاعده لان عمو متمدد بيبي ردت // روحي جيبي دوشك ومخده وتعاي يم اخوج ولعبي
رحت جبت من النضيده دواشك اثنين ومخاد وفرشتهن وييبي كالت روحي جيبي مخده بعد هي اتمددت واني اجيت كعدت بالارض
وصرنا نلعب درت شفت عمو عاصف كاعددع القنفه ويباوع النه حاجيته
= تعال عمو العب ويانه
بيبي بحده // تؤ شبيج جده
= ما بيه شي. عفيه عمو تعال
:: ما اعرف
اشرت على نفسي = اني اعلمك
بيبي بعصبيه // ولچ اتتي شمالج
ابتسم. :: عوفيها يمه
واتقرب كعد بصفي حاجيته = هو اني مو هلگد اعرف العب بس انت باوع وخلي ايدك اهنايه
:: وين
لزمت ايده العمو :: اهنايه هالشكل
:: خوش
وصار عمو يلعب ويه علي الي غلبه بدون منازع بعدها كال علي () تعاالي وج د العبي بمكاني
هزيت راسي = لعد وانت
عاصف بابتسامه :: خاف مني اغلبه انسحب
= معقوله علووش ؟
(). اصلا ععموو عااص ف ما يعر ف ااتي تل عبيين احسن منه
:: افه هيج بساع بعتني علاوي مع الاسف
= لا عمو تره علووش مدا يقصد
:: بعد هو حجاها
باوعت العلووش. = علاوي كل العمو اسف بسرعه اعتذر
( ). اسف ع مو مم دا اقص د
بيبي // خاب علي احجي عدل لا تلزك بلسانك
:: يمه خلي يحچي بكيفه ( باوعلي ) وانتي ياالله خلي نلعب وانشوف ياهو اليغلب
وصرنا نلعب بالبلي اكثر شي بالتسابق ومن يغلبني بيبي اتگول // صلوات عفيه ابني دومك سبع
ومن اغلب اني علاوي ايشجعني رن تلفونه بيبي سالته ياهو هذا
شافه وكف وراح يمشي ابتعد بس نسمعه
:: الو
:: هلا بيج عمو اشلونج
:: الحمد لله الاهل اشلونهم
:: دووم ان شاالله
:: لا ما نايم اامريني
:: ما كدرت اجي عندي شغل
::الله يخليج يوصل
:: الله وياج
رجع بيبي سالته // ياهو هذا
:: ها يمه ولد صديق يطمن عليه عباله رحت الاربعينية عمتي
رجع كعد ع القنفه باوعتله =. شنو ما تجي
بيبي //. عوفي باجر ورا شغل.
= لا انتي ما تردينه يلعب حتى ما اغلبه
ة- - ولج ام السان تغلبينمن
باوعتله =. شووف بيبي حتى باللعب والشقى متحيزه الك
ابتسم :: جاي بس خلي اكمل جكارتي
رجعنه نلعب هالشكل ما حسينه بالوقت باوع للساعه بتلاثه الفجر وبيبي وعلي نايمين بالصاله
وهو يحچي :: الدنيا صبح ما حسينه بالوكت
= اي عمو هاي اول مره من اجيت لهنا هالشكل
؛: هالشكل شنو
هزيت راسي = لا ولا شي
:: كولي شنو هالشكل
= حاسه بالراحه والامان
:: بس اليوم هيج تسهرين لا تنسين وراج مدرسه بعطلة نص السنه اخذج وين ما تردين
فتحت عيوني وحكيت حاجبي هو رد :: نروح كلنه انا وامي وانتي وعلاوي كلنه
وكف :: انا اروح اناملي شويه وراي شغل وانتي هم نامي
= وين انام
:: بكيفج تردين بالحجره تردين اهنا ،
= راح انام بالغرفه تصبح على خير
:: اجمعين
وكفنا اثنينه رحنه نمشي الغرفنه باوعتله = عمو ؟
هز راسه :: ها عمو
= هاي المنساع خابرتك رقيه مو ؟
فتح عيونه ع الاخر اني هزيت راسي = مو
اتنفس بعمق :: سالتني اذا اجي للاربعينيه
=وليش ؟
:: اتگول حابه تجي تزور ومن نرجع ترجع ويانه
هزيت راسي =. لعد لو رايح خطيه
:: وين اروح ؟
= للزياره ومرجعها وياك ما دام على طريقك
:: بعد بقيت يم امي ويمج
=. مو اشوفها
:: شني ليش سكتي
هزيت راسي =. لا ولا شي
:: تصبحين على خير نامي راح الوكت
خليت راسي ع المخده وغفيت گعدت الصبح. بيبي بعدهي نايمه ومن الجهه الثانيه علاوي وعمي عاصف نايم ع القنفه
سالت نفسي = هو مو راح الغرفته ينام شجابه ايهنا
باوعتله اول مره اشوفه نايم لابس فانيله بيضه وسروال طويل هاي الي يلبسوهن حوه الدشداشه
حسيت بوجهه براءه رغم هو انسان صارم وحاد بس وهو نايم فعلا عبالك طفل ورغم صرامته
لكن هو طيوب وحنين خصوصا عليه اني واخويه
رحت اتوضيت وصليت قضا بعدها رجعت اتمددت بس ما اعرف ما اجاني نوم رحت للمطبخ وسويت ريوك سلكت
بيض وخدرت الجاي وطلعت گيمر اشتهيت طماطه طلعت وكليت وحميت الخبز بالاوفن
خليت الريوك بالمطبخ اتقربت يم بيبي ندهتها = بيبي اكوعدي اتريگي
جاوبتني وهي منعسه // ياهو سوا ريوك ؟
= اني بيبي
عمو عاصف اتحرك وبيبي شافته // ها يمه صباح الخير
اتثاوب :: صباح النور
- - ما دريت بيك من رديت
:: اي ما ردتج اتگعدين
- - يساعدك الله
رغم ما فهمت ع شنو يحجون سبقتهم للمطبخ وهمه اجوي وراي صبيت الجاي وبيبي سالت عمو
- - هم خابرت اخوك
:: لا حجيه ما خابرتهم گلت ملتهيين يزورون
- - اي هم صدك (باوعتلي وابتسمت ) شني اليوم مشتهيه طماطه
هزيت راسي عمو رد :: حتى انا من شفت الطماطه اشتهيتها
بيبي //. اكل يمه الطماطه يامكثرها بس انت ...
هو هز ايده وابتسم
واستمرينه تلث تيام عمو عاصف يجيب الغدا جاهز وخاله سميره تدز النه خبزات رابع يوم بالليل تقريبا بالتسعه اجوي من الزياره اتلگيتهم وردت ابوس خد عمه رجاء لكن هي بس ردت السلام وسلمت على بيبي وباوستها واجت فرح باست بيبي
وباست عمو عاصف بعدها سالتهم بيبي اذا كانو متعشيين
جاوب بهاء // اي متعشين بس اريد جاي
رحت للمطبخ حميت وصبيتله بكوب وجبت استكانين العمه رجاء والبيبي بعدها عمه طلعت العلاكه جايبه البيبي فوطه
وتربه وسبحه وجابو دهينه وثاني يوم الصبح بهاء راح الشغله وبيبي صارت تسال برجاء يمته وصلتو وين رحتو
واتبينو انو اول يوم راحو الكربلاء وباتو والصبح طلعو للنجف وهناك اتلاكو ويه بيت عمو كريم وبعدها رجعو وياهم
البغداد زارو ورجعو ومبين عليهم كلش متونسين
رجاء // عمه بالي يمج شكلتي شربتي
- - الحمد لله شني ديرة جوع
- - اسم الله عمه بس ياهو ايخدمج يگوم بواجبج
- - وجدان ما قصرت ما خلتني محتاجه شي گبل لا اامرها تجيب الشي الاريده
بيبي كالتلي روحي جيبيلي ماي بكلاص من البراد رحت ع السريع جبت الماي ومن ردت افوت للغرفه سمعت بيبي تحاحي بعمه
- - رجاء مو الاصول مثل ما حبتيلي فوطه تجيبين للبنيه شي بيدج
شني عمه رايحه للحج
لا ما رايحه بس البنيه حتى من راحت للزياره ما نستج
بفلوس عاصف مو من عدها
وانتي بفلوسح
رادت تحجي واني دخلت ما ردت اسمع ردها ولان اتاكدت من رجاء تكرهني وصراحه هذا ابشي ريحني اقلها الگى
عذر البهاء من يريد يرتبط بيه امه واخته ما يردوني وانا مستحييل ارتبط باانسان اهله ما يردوني
ثاني يوم اجت نهاد من الصبح وراحت الظهر وبالليل اجوي بيت عمي مهدي الي شفته انو بس وصلو من السفر
نهاد نزعت الاسود اما رجاء وفرح فراسا بنفس اليوم نزعنه لان اساسا هنه مو حزينات
وره اسبوع من رجوعهم من الزياره قريب المغرب سمعنا صوت عمو عاصف وهو ايكول
:: اتفضلو حياكم الله يمه يمه هذا كريم اجه دفووت يخوي شنو انت خطار
طلعنه من الغرفه شفنا عمو كريم جاي ويا ام كرار اني بس شفتها رحت حظنتها وبجييت وهي صارت تبوسني
وتبچي بعدها سلمت على عمو كريم وبيبي مستغربه جيتهم كعدنا ورحت اخذت ماي ورجاء بالمطبخ تدرم
- - شجابهم شكو غير يخابرون يگولون
واجت نهاد سلمت عليهم وفاتت للمطبخ وهي تسال //ذوله شعدهم جايين
- - علمي علمج اانوب غير اتخابرون تگولون دشت علينه عبالك عدها تفتيش
نهاد // اي وشصار
- - چا مو عيب شافتني لابسه الوان
نهاد // ههههههه والله تحجيين واذا شافتج عود من يموت واحد من اهالينه لاتحزن ويانه
- - مو شافت ...( تحرك بعيونها )
عرفت تقصدني نهاد گالت //. بكيفه اليريد يحزن والما يريد شبيج انتي ياالله امشينه خلي نكعد يمها
- - والعشا ؟
- - شني ما كملتي
- - شويه واخلص
- - خلي اساعدج
صارن يكلن بالدجاج واني اسوي بالزلاطه واللبن بعدها صبن صينيتين العمو عاصف وكريم ومهدي وعلاوي
واولاد مهدي وصينيه اخذنها يم بيبي
عمه ام كرار كالت // ما اكل اذا مو كلنه نلتم شنو اني غريبه
وفعلا التمينه واكلنه وشلنه الصينيه وبيبي گالت // صبي جاي
وديت ترمز للمضافه وبالمطبخ صبيت البيبي وعماتي واحنه گاعدين اجه عاصف گال
:: يمه كريم يريد يجي يمج
- - هله بي شني مستحي شو ذني اخواته وهاي بنية اخو
كريم // ياالله الله يديم البيت واهله ويخليج ياعمه خيمه
- - الله يرحم روح اميمتك
— والله ياعمه امي مكانها فارغ او وحاشه
ام كرار // اسمه گاعد بغرفتها ويبجي
بيبي // اي الوالده ما تتجازى چا مهدي وين
عاصف :: راح على جابر يشوفون السجي (السقي )
كريم // عمه انتي عزيزه وعاصف وكل اولادج
- - يعز مقدارك يمه اخيوتك الله يحفظكم ويستركم
ولو ما ادري هاي الشغله زينه وبيها خير ما اجيت تره واني بعدني حزين بس مثل ما يكولون الحزن بالكلب
بيبي // اي عمه گوول
الصراحه بيت صلاح اخو ام كرار
بيبي // شبيهم ؟
ودوني عليج وعلى عاصف
بيبي // خير ان شاالله
كريم رفع ايده ويعدل بشعره // كل الخير عمه رايدين يخطبون وجدان الابنهم فراس
ام كرار // عمه البنات من شافنها بالفاتحه حبنها
بيبي // انعم الله عليهم بس يمه كريم وجدان بعدهي زغيره وتدرس
- - عمه شني زغيره البگدها عدها اثنين جهال
ام كرار // عمه احنه ما مستعجلين وكريم كال خلي نجي هم انشوفج وهم نفتح وياج موضوع
بيبي اتاشر عليه // هاي هي سمعت كل شي
كريم // اي عمه انا اريدها تسمع حتى ما يصير بيها جبر لو غصب شتكول عاصف
هز راسه وجاوب :: وين ديرة الغصب بعد
كريم // احنه اجينه نذب حچايه يمكم وانتم اخذو وكتكم وهم البنيه تفكر
وجهي من الخجل صار نار وكل الانظار صارت عليه وبقو ايسولفون ونهاد كل شويه وامرتني
گومي سوي هذا الشي حتى نخدمج بيوم عرسح
بيبي كالت //. جده وجدان شيلي الاستكاين
وكانما نقذتني رحت للمطبخ غسلتهن وبقيت گاعده ما طلعت وسمعت بهاء اجه سلم وگعد
وصارو ايسولفون ع الشغل لمن ما سالته نهاد // متعشي خاله
- - اي الحمد لله بس اريد چاي
- - خلي اگوم اجيبلك جاي فرح تدرس او وجدان مستحيه عروس بعد
لكتني صابه الجاي اخذت الصينيه وهي اتكلي وتعض بشفتها // خوش مجنصه مثل امج اجو عليج من بغداد بعد شتردين
اخذت الصينيه مني وراحت
- - هاك خاله بالعافيه
الله يعافيج
ام كرار // وين وجدان
نهاد // بالمطبخ كاعده مستحيه عروس بعد
بهاء // ياهي العروس
ابو كرار // والله ياعمي بيت اخو ام كرار دزونه عليكم رايدين يخطبون مره منكم
ام كرار // عمه جايين نخطب وجدان الابن اخوي يمكن تعرفه فراس ابن صلاح
بهاء ابرود // ها
ام كرار // اي البنات وامهن شافنها بالفاتحه وانعجبن باادبها واخلاقها
نهاد // الولد هم شايفها ما معقوله يوديكم وهو ما شايفها
ام كرار // يجوز شايفها بالفاتحه لعد وين شايفها
نهاد // وانا شگلت لو ما شايفها خوش ابنيه وعاجبته ما وداكم
بهاء // اي شكو بيها كل بنيه مصيرها خطبه وزواج بس وجدان لا
الكل اتفاجأ من رد بهاء كريم جاوبه // ليش بهاء كل ابنيه بعد هذا مصيرها
بهاء// كلامكم صحيح بس وجدان بت عمي وانا احق واحد بيها ومع احترامي انا اولى من الغريب
محد عقب هو رد بكل ثقه / / هاي شبيكم بت عمي واني اولى بيها من الغريب
ابو كرار // حقك عمي بس هاي مال اولى بيها واكفه
بهاء // شلون واكفه ؟
- - لان الزواج قبول شنو البنيه اذا ما موافقه انت تجبرها ها عاصف شتگول
بعد فتره جاوب :: ماكو جبر بالموضوع ومثل ما كالت امي بعدهي زغيره وخليها اتكمل دراسه وتدخل كليه
وتاخذ الشهاده وبعدين اتفكر بالزواج
ام كرار // صحيح كلام عمتي بس هم لازم تاخذون راي البنيه ها عمه شتگولين
بيبي // الله كريم ان شاالله
كريم // عمه الولد خوش ولد والله مو لان ابن اخو ام كرار بس انا اعرفه معرفه شخصيه هو مؤدب وخلوق خوش
ولد وهو يريدله بنيه هادىه وحلوه ومؤدبه
ام كرار // وهي هم خوش بنيه واني احبها على معزة امها الله يرحمها
بيبي // الله يخليج ويستر على وليداتج عمه دووم احجيها انا ما طولني عدله اريدها اتكمل دراستها وتاخذلها شهاده
بايدها البنيه يتيمه والصار بيها مو شويه
ام كرار // عمه هذا شرطكم انا كلته وهم راح اگوله واعيده عليهم
بهاء بحده // شني ام كرار ما سمعتو البنيه الي انا ابن عمها
ابو كرار // لا مو قبول كلامك بهاء ابن عمها وانا هم عمها البنيه ينوخذ رايها ما تنجبر على شي
طلع بهاء واجه للمطبخ شافني كاعده ع الكرسي بصف الطاوله اتنفس بعمق //. سمعتي مو
ما جاوبته // شو ساكته ما تحچين ؟
بقيت اتنفس بقوه بين خوف بين خجل بين قهر اتقرب عليه. //. سمعتي كلامي مو انتي اليه والياخذج مني انهي حياته
كاىنا من يكون
صرت ارجف وگلبي يدك وريكي يبس هو طلع وابو كرار كال //ياالله هم ياالله نتوكل
بيبي // وين شنو ترحون هسه
ابو كرار // اي ما عدنا شي بعد وكت
عاصف :: با تو والصبح اطلعو
كريم // لا ما عدنا شي والصبح عدي دوام
:: بعد بكيفكم عبالنه تباتون انشوفكم
- - دايم البيت واهله
ام كرار باوست بيبي وعمه رجاء ونهاد بعدها كالت //. وين وجدان ؟
رجاء // هاي بالمطبخ
اجتني وراها رجاء ونهاد وصلت يمي // حتى ما شفتج شنو مستحيه
نهاد // بعد هاي التنخطب تستحي
بقيت ساكته ام كرار كالت// فكري خاله وتدرين بيه معزتج من معزة هداوي ولو ما اعرف ابن اخوي يصونج ويدير
باله عليج ما تعنيت واجيت وهم ادري بيج انتي بنيه والنعم منج ومن تربيتج
بقيت ساكته هي باوستني وشاورتني //. هاي حياتج ومصيرج فكري زين
راحت واني ساكته وهنه طلعن وراها بقيت بالمطبخ لمن ما اجه ابراهيم ابن عمي مهدي وكال // جدتي رايدتج
رحت للغرفه // شني وين جنتي
نهاد // مستحيه ضامه روحها بالمطبخ
بيبي // سلمتي على ام كرار ؟
هزيت راسي سالتها = ها بيبي محتاجه شي
- - لا ما معتازه شي ردتج اتكعدين يمنه
كعدت وصارت نهاد تحچي // جا عمه ما دامه خوش ولد وجاي على حب الله ليش ما ترضيين
بيبي // مو وكته نهاد
رجاء //. شني شو الدنيا مخبوصه عليش كل واحد ماخذله كتر ويحجي. بكيفه
محد رد على رجاء لكن الي عرفته من خلال كلامها ما قابله. على تصرف بهاء
بيبي سالتها // شني شبيج ؟
رجاء// شبيه عمه ما شفتي الولد شلون يتراعش الي والي ولا چني انا امه بكيفه يحچي
بيبي // دا كافي مو وكت هذا الحچي
رجاء// هو ان شحاجيه ومن احچي ياهو يشدلي راس انا اهنا عايشه بلگمتي على برودة الكاع
اتمددت ودرت وجهي وحسيت بنفسي سلعه انباع وانشري وناس رايدتني وناس كارهتني سمعت عمي عاصف كح
وطلعت رجاء. // ها راحو
:: اي
- - لو معطلينهم
:: مو گالو عدهم شغل شني امي نامت
- - كالتلي طفي الضوه اريد انام والبنيه هم نامت اكلك عاصف انت قابل على حجي بهاء ويه ابو كرار
:: ياحجي
- - بت عمي وانا اولى بيها
:: يصير خير يصير خير
تستمر القصة أدناه
صار سكون الظاهر كلهم نامو ثاني يوم الفجر گعدت للصلاة ويه بيبي ومن كملت هي طلبت مني امرغ رجليها
من يم الكف وصرت امرغ بيهن هي نامت واني هم رجعت على فراشي صرت اتكلب الى ان غفيت ومن حسيت بيبي
كعدت اني بقيت بفراشي ما اريد اسمع كلام وكل واحد ينطي وجهة نظر واتناسو انو هاي الي يحجون بمصيرها
موجوده وعايشه
اكثر شي مخوفني تصرف بهاء وبرود عاصف
كعدت فايت وكت رحت للمطبخ ما لگيت احد همزين حميت الجاي وسويتلي بيضتين وبهاي الاثناء نزلت فرح وكالت
- - صباح الخير ياعروس
فتحت عيوني ع الاخر هي ردت //. شبيج شنو عجبه على كولة امي كل بنيه تنخطب صبيلي وياج ريوك
صبيت الها كوب جاي وطلعت جبن وصرنا ناكل وهي سالتني
- - انتي شايفته للولد ؟
هزيت راسي بلا
ابتسمت // اها هاي شلج بيها جا ليش وداهم عليج من دون كل البنات
= حتى لو شايفني اني ممنتبهه اله
لمت حلكها // يجوز
= شنو يجوز قابل اكذب
فرح // اي اتزوجي احسن اقلها يصير عندج احد يخاف عليج وعلى مستقبلج
= اني مستقبلي مو بالزواج مستقبلي مثل ما كالت بيبي بدراستي. وشهادتي
فرح // شبيج وجدان انا لو يجي عليه احد اوافق. بعدين ما گلتي هالشكل من بهاء حجى
اتنفست بقوه = اني من حچى بهاء كنت بالمطبخ واساسا محد اخذ رايي
- - يعني انتي ما موافقه
هزيت راسي = اي ما موافقه
- - حتى. على بهاء ؟
بلعت ريكي = كتلج اني اهم شي عندي دراستي. وشهادتي وطلعة هشام
فرح حكت خدها // هو بصراحه وجدان بهاء كبل لا تجيين انتي اهنا ويشوفج بهاء هو جان يحبله وحده ويريد يخطبها
وبصراحه اكثر امي قابله عليها ورايدتها
باوعت الها باستغراب هي كملت // شو امي اتفاجات من امس حاجي وكايل عليج اريدها بس انا گلت الامي يمكن
هالشكل سوا يجوز يعرف الولد او على كولة جدتي يريدج تكملين دراسه والا مستحيل بهاء يفكر بوحده غير اليحبها
من كلامها
ما هانت عليه نفسي ولان عرفت بهاء حاله حال كل الرياجيل ما يختلف عنهم ولا يمكن اثق بي جاوبتها
= واني حبيبتي لا اريد بهاء ولا غيره اصلا مدا افكر بااي شي بس دراستي واخويه هشام
كعدت شويه وبدلت الموضوع وبعدها طلعت واني بقيت بالمطبخ ما انكر ضجت حييل ويمكن غرت واني اتساءل ويه نفسي
= منو. هاي الي ايحبها وكان يريد يتزوجها قبل ما اجي ويشوفني
= بعدين هو مو البارحه وحچى وياي. والي ياخذج انهي حياته
= معقوله بهاء يكذب عليه
= اي ليش بهاء لا هو رجال حاله حال الرياجيل
= اي هم صحيح
= واني شعليه منو ما يريد يريد ومنو ما يحب ايحب ميهمني
رتبت البيت واخذت المكناسه ورحت للمضافه رغم نظيفه بس رجعت نظفتها بس حتى اضيع وقت وطلعت كنست الطارمه
وقت الغدا اني ما اشتهيت اكل لان متريگه متاخره فما كعدت وياهم. العصر رحت للمطبخ شفت عمه رجاء ونهاد موجودات ويسولفن. سلمت وصبيت چاي وطلعت وباب المطبخ سالتها
= عمه اليوم شنسوي عشا
رجاء// خاله باجلا ع النار وشوف شنگلي. وياها
= خير ونعمه
تستمر القصة أدناه
گعدت بالهول اشرب الجاي وشفت نهاد طلعت من الباب. الثاني وراحت واجت رجاء سالتني
كاعده. اهنا
هزيت راسي
عمتي بالحجره
=. بلي
شبيج ليش ضايجه اكو بنيه يجون عليها خطابه وتضوج
هزيت راسي = اي اني
يا عود ليش
= لا ولا شي
احچي شبيج
= عمه اني ما افكر بالزواج من اي شخص
رجاء// هم كالت ما. افكر عمه تره كل بنيه تستحي وتگول لا
= بس اني من صدوك ما افكر.
- - ها تبسج لحد ايسمعج
رفعت اكتافي = واذا سمعوني. هاي. الحقيقه اني اريد اكمل وانتظر اخويه يطلع ونرجع
رحت للمطبخ غسلت الكوب وبعدها رحت. اتوضييت وصليت ومن كملت رحت للمطبخ لگيت عمه مگليه طماطه ومسويه چاي حضرت. العشا وياها واني ساكته واجتي بيبي وعمو عاصف وعلي وگعدنا ناكول لان گالت. فرح سويت الها لفه وبهاء بعده ما جاي
اني طلعت جبن وسويت لفه الي ولفه العلي وبيبي گالت فوري لي كوب حليب عمو اكل طماطه وشويه باكلا الكل ساكت او بالاحرى الكل يريد يحجي بس ميحجي كملو وكامو عمو حتى ما شرب جاي
بقيت بالمطبخ صرت اغسل بالصحون ونشفتهن ومسحت الطباخ والكاونتر سمعت بيت عمي مهدي اجو دخلو
الغرفة بيبي وهو يگول // وينج يمه اندش لا
هله بيك ياهو مانعك ما تدش
مهدي // لا اكول خاف تردينه نكعد يمج بالهول
فوت فوت هله بيك
وسلمو عليها اني بقيت بالمطبخ تقريبا ربع ساعه سمعت صوت بيبي // وجدان جيبي جاي العمامج
اخذت ترمز واستكانات وخليت كعك لان اعرف لازم يطلبون ياكلون شي ويه الجاي واخذت قوطية الحليب
دخلت اتناوشتهن نهاد واني سلمت
= السلام عليكم
هله عليكم السلام
كعدت صبيت جاي وخليت كعك بصحن وقدمت استكان البيبي والباقي الهن عمي مهدي وهو يبتسم // عاشت ايدج
استغربت كلامه رديت = شكرا
نهاد // بعدك ما ضايكه
- - لا الصراحه جاي وجدان ما يعلى علي طيب ومهدر
نهاد // وشبي جاينه مهدي
- - جايچ ماكو مره اتسوي مثلج
بيبي // خوش باجر بالليل نجي نضوك چايج
مهدي // شني يمه ما شاربه عدنا جاي
بيبي هزت راسها // لا كل عمري ما ضايگه جايكم
حاچاني // هاج صبيلي بعد استكان
صبيتله جاي هو حمحم // شني شعجب كريم راح ما بات
بيبي // يگول عدي شغل
- - شغليش انا نشدته من اج ه كال نبات والصبح نتريك ونطلع
بيبي // چا احنه شمدرينه قابل طردنا
مهدي هز راسه // لا بس اكول خو ما زعل
بيبي // منين زعل
- - ما ادري قابل انا يمكم
بيبي // مهدي يمه البربوره العدك احچيها لاتخليها بگلبك
مهدي // شني هالحجي يمه شني بربوره چا گولي انا مو ابنج لاكيتني ومربيتني
بيبي // احجي عدل مهدي
حاجي عدل كريم المن جاي
- - مرتك ما كالتلك المن جاي
اريد اعرف منكم
رجاء// جايين على وجدان ايخطبونها
ومو الاصول ايگلي يحچي وياي مو انا عمها
بيبي بنتر // اسمع مهدي ما دامني انا بالوجود وجدان تخصني محد اله غرض بيها انا ومن وراي عاصف لان امها
امنتها عده
مهدي // ها وانا شني طلاب گراط احجار
بيبي // انت ما تحچي وما تفك حلكك اب اذني سمعتك گلت ما الي شغل بيها ولا عليه بيها وهاي صار شگد اربع سنين
اكثر ما حاسبتهن ( دارت علينه ) مو وذااك بيتك خطوتين مرتك تجينه مالابسه عبا لان باب واحد ما بيوم وديت عليها لو شافت
بيتك شني ما شني هسه اتكول كراط حجار
مهدي // انا عمها غصبا عاليرضى والما يرضى
بيبي // وهسه شتريد
اريد اعرف ليش كريم ما حچى وياي
بيبي // كريم حجى وياي انا وانا نهيت الموضوع
مهدي // شلون نهيتي الموضوع يمه
شني مرتك ما كالتلك
هم ردت على مرتي يمه احنه ابختج
ما كلت شي گلت هي جانت حاضره من صار الحجي
مهدي // يمه اذا الولد خوش ولد ليش ما تنطينها
بيبي هزت راسها // اي الولد خوش ولد بس انا اريد الها شهاده
مهدي // عود نشرط علي تكمل دراسه عدهم وهمه ما راح ايگولون شي
بيبي // ها ومنو گلك ما يگولون شي
نهاد // عمه مهدي قصده يعني همه من نفس بغداد مثلها وعلى هواها
بيبي // شني هواها تعاي ولج وجدان وينج تعاي
رجاء // عمه على كيفج
بيبي // لا اريد اعرف شني مثل هواها
نهاد // عمه عود يرضون تكمل دراسه عدهم
اجيت واشوف الكل عينه مني بس عمي عاصف منتجي ع المخده والجكاره. بايده ما كانه الكلام يخصه
= ها بيبي
— تعاي شگايله العمتج
رفعت كتفي = ياعمه ؟
- - نهوده انتي راضيه باابن اخو ام كرار
بقيت ساكته ما جاوبت بيبي ردت بعصبيه // من كون راضيه ما حجيتي جدامي
مهدي // يمه على كيفج كل بنيه تستحي والولد خوش ولد وهاي هي تاخذه وتولي
الدمعه وگفت بطرف عيني بلعت ريكي =. عمو ليش اولي مو هس توك دا تگول انا عمها وتعتب لان ما شاروك
نهاد // اي وشني عمج وحچى
اتنفست بعمق وقررت اوكف الكل عد حده
= اگولج عمه انتي شنو الج ويايه اني مگلتلج موافقه اصلا انتي اجيتي اتگليلي بخيته مثل امج واني ما جاوبتج
نهاد // وشني دادا استهضمتي من كلمتي
= مدا اتشوفون نفسكم جاي دا تبيعون بيه وتشترون ولاكانه اني الي وجود
نهاد // شوفو السانها شطوله حتى احترام ماكو
= اني محترمه ومؤدبه والساني احجي بي من اشوف الناس جاي دا تبيع بيه وتشتري
- - ها
هزيت راسي = اي مثل ما سمعتي بيبي تگول اتكمل دراسه وعمو مهدي يگول تاخذه وتولي وانتي تگولين ابخيته
وبهاء دا يكول بت عمي واني اولى بيها وفرح دا تگولي بهاء دا يحبله وحده ومن اجيت اني لهنا هو بدل
بس اني محد فكر بيه محد گال هاي شتريد متريد محد فكر بعلاوي اخويه لو بذاك الي بالسجن
اختنگت بعبرتي ورحت للمطبخ صرت اناشغ وابچي ومهدي يحچي ويسمعني
- - هاي هسه اگوم اطيح حظها ام دا ودا
- - كافي مهدي
- - يمه محد طلع عينها غيرج انتي وعاصف وهاي النتيجه السانها بطول النعال ومحد بعينها والله لو تجيني عليها امصع ركبتها
بس ياهو يگدر يحاجيها عاصف ايشيلنه وانتي يمه حتى فروخي اتطردينهم من يجونج وانوب هسه بهاء
بيبي // شبي بهاء ؟
الكل سكت // السلام عليكم سمعت اسمي
مهدي // ماكو شي نسولف وطرا اسمك شني عجبه لو يراد انقدم الك عريضه
بهاء // خيرك مهدي سالمين
شوف حتى احترام ماكو يسميني مهدي
صدك شبيكم
بيبي // ماكو شي جده متعشي
لا ما اشتهي هسه
طلع ايغسل ومر بالمطبخ شافني كاعده سالني // منو مبجيج
= ماكو شي
گليلي منو وياج
= محد اني بجيت
ها انتي بجيتي هسه احرك البيت گليلي منو وياج (عاط بصوت عالي ) يمه يمه
رديت بعصبيه = جاي اگلك اني محد وياي اتذكرت امي واخويه رامي وبچييت هسه عرفت
رجاء //. وليش اتصيحين ما تعرفين تحجين على كيفج
اجه مهدي // هاي شكو شصاير
رجاء// ما صاير شي بهاء شاف وجدان تبجي وصاحني
مهدي // وشني الا بچت طاحن دلاليعها
خزرته البهاء هو اتنفس بعمق // البنيه ما حاجيه شي وانا سالتها عبالي احد محاجيها
مهدي // واذا احد محاجيها شني ممنوع
هز راسه // اي ممنوع
رجاء // باالله غلطت
بهاء // ما تغلط بشني تغلط واذا غلطت جدتي وعاصف ايعاقبونها
مهدي // اكلكم شو انتم لابسيني ما الي وجود شني ما معتبريني اذا جان اكو واحد مسؤول عن هاي التگول
جدتي وعاصف مسوولين عنها فهو انا زين وخلي اگلك اگدر هسه الزمها واكسر راسها واطيح حظها ومحد يوگف
بوجهي كافي طيرتوها يتيمه خطيه ايوها امها اخوها شني عمي تره طلقه بكلبها واعتبرها زلگت وغرگت
بهاء// شبيك مهدي
- - خليني شو شمخرتوها حتى ما خليتوها تستحي من عدنا هسه عبرنا فوتنا بس كل شي واله حد
بيبي اجت // اكلك شبيك جاي مناك حامي على هاليتيمه تحتار شتسوي
مهدي // اي كولي دافعتك مرتك انتي هاي الحچايه ظاله ابكلبج طلعيها
بيبي بعصبيه // تنجب ولك انت هم تحچي شني جذب ما دافعتك
بهاء بعصبيه // هسه هذا الحچي شله داعي
مهدي // لا اله داعي واله باجر من الصبح اخلي اهل ام كرار يجون ويعقدون وياخذونها عمي خلي نفتك تلح على
بغداد بغداد يا طلابة بغداد هو احنه حصلنه من ابوها ياالله نحصل منها
اجه صوت عمي عاصف الي خرس الكل :: مهدي من تكون مسوول عنها وكد المسووليه ذاك الوكت خابر وگلهم
تعالو اخذوها احنه حجينه وياهم والناس راحت بعد لحد ايفك حلكه وهذا الموضوع ينسد محد يحجي بي بعد
الكل سكت ومهدي باوع على مرته وكلها // امشي ولج
راحو وعمه رجاء حركت ايدها بعصبيه // احنه ما راح نفتك يوميه طالعتلنه شغله صفح هسه افتكينه من مرضها
هنوب خطبتها وما ندري بعد شكو
بهاء// يعني ما راح اتگلولي شصاير
عاصف :: ما صاير شي مهدي ماخذ على خاطره شلون كريم فتح الموضوع وياي او ويه امي وما حاچا
بهاء// هو مو عده شغل والرجال راح شنو اتفطن
بيبي // اي ما دام نهوده اتگر
رجاء// هاي چيف اختي كلساع وگلتي دافعته
بيبي. // اي اختج تحتار شتحجي وشتسوي وهاي افريحه دواها عدي اله اكص السانها
بهاء // ليش شبيها
رجاء// ما بيها شي كل شي ما بيها خلو البنيه ملتهيه بدراستها
بيبي // اي وبدربج هم خلي هاي البنيه تلتهي بدراستها وبردي راسج انتي واختج منها
عاصف :: راح انام باجر وراي غبشه تصبحون على خير
- - اجمعين
عاصف دخل الغرفته وبهاء دخل الغرفة بيبي واني كعدت بالصاله ما اريد اروح اصير بمواجهته لو بمواجهة رجاء الي طلعت وتباوعلي وتهز بايدها
راحت للمطبخ وهي بس تحجي وتعرف اسمعها
اول ما جابوها هنوب اخويه مريض اخويه بالسجن اريد ارجع ما اريد اداوم والله ملينه
طلعت شايله صينيه ودخلت الغرفة بيبي
وين وجدان
كاعده بالهول
وجدان تعاي جده تعاي اهنا
رحت وگعدت ع الجربايه
وهو ياكل ويباوعلي // صدك جده شبي مهدي شصاير
بيبي // اهو هم رديت شكد تلح
- - جا احجيلي حتى ما الح شعده مهدي
رجاء // مهدي. يكول انا مو عم وجدان ليش محد شارني وعمتي گالتله الشور الي والعاصف. وهالاخذ على خاطره
بهاء هز راسه // اي حجاية جدتي بمكانها
رجاء // ها تره مهدي عمها
— ادري بس هو شال ايده منها كال مالي شغل
بيبي // لاتحجي هيج تره. تزعل امك
بهاء // انا دريت. شحاجي ابنج
بيبي // اهو هي كلساع ما عولنه خلصنا
باوعلي // يعني وجدان من لگيتها تبجي. مو متذكره اهلها تبجي من وره ابنج
ما ردن بهاء// شو سكتي. ما تحجيين ليش بجاها
بيبي //. ماكو شي استهضمت على روحها كل ساع واحد يجي ذابله حجايه (باوعت الرجاء. ) وهاي فريحه دواها
عدي انا الها
رجاء // شمسويه عوفوها تدرس البنيه لا شايفينها. ولا يمكم
بيبي // ماطول اتكولين عوفوها تدرس هم انتي واختج عوفن هاي البنيه (اشرت عليه ) تدرس. هي مو وحد
رجاء// شتي عمه ظال عجيني بالشمس خليها تدرس ياهو كاظها
بهاء بعدم صبر // هسه غير كون احد ايفهمني شو الحچي بالالغاز
بيبي // ماكو الغاز جده مهدي گال خلي نطيها وهي ما رضت اتگرل انا مو. سلعه انباع وانشري
بهاء// حقها خوش حجي
باوع الامه شافها تهز بايدها // شبيج
رجاء//. والله ما ادري شني هالمعزه الطلعت عد حبوبتك شو جنه من نجيب طاريه تتسودن وبس اتدعي وعسا وعسا
بيبي //. انتي تدرين ليش ادعي وباالله انا ما اريد ابني شني اذب فروخه ولج بعينج شفتيني شلون ربيت هذا ( وتاشر على بهاء )
رجاء //. الله يديمها
بهاء // هسه شني نبقى نتناكر هذا هو البت ما راضيه تتزوج ابن اخو ام كرار سدو الموضوع
بيبي هزت راسها // اي ما راضيه وكالت اريد اكمل دراسه وما اريد اخذ اي احد
شكرا لزيارتكم عالم روايات سكيرهوم
