رواية فصلية الضابط الفصل الثالث والثلاثون 33 بقلم زينب نور

............ ورا يومين طلعت اشوف ابويه اريد اكوله ياخذني للنجف محتاجه ازور أمي وحسام 

وصار شكم مره اكول الهم بس ميقبلون خوفاً على صحتي طلعت اشوفه وين  

ما موجود بالاستقبال

طلعت للبستان شفته گاعد على كرسي ويمه كرسي ثاني فارغ

 ويورث بجگارته واسمعه يدندن بصوت اشبه بالهمس 

رجعت سويتله چاي واخذته اله

من شافني فرح فتحلي اديه وهو يكولي

:- هله بشمعة بيتي ازهرت وانورت بويه

رحت كعدت يمه سحب راسي باسه 

عرفته جان يبجي. 

صبيتله چاي ونطيته اله گالي:- عاشت ايدج اجه بوكته رجع سئلني 

:- بويه نداوي شلونج هلفتره صحتج زينه؟ 

قربت راسي على كتفه ابتسمت اله حتى اطمنه اكثر

:- اني زينه يابه الحمدالله لا تخاف عليه ترا بنتك قويه طالعه عليك

بويه فدوه اروحلك اني ترا ماعندي غيرك دير بالك على صحتك الخاطري شبقالي غيرك اترك الجڰاير لا تشربها مو منعك الدكتور منها راح تنهيك والله 

هزالي راسه وهو يسحب نفس من الجڰاره:- والله يابويه هاي الجڰاره هي صاحبة روحي ما اكدر اتركها حاولت بس ما گدرت والاعمار بيد الله هاي كولها اسباب 

باوعتله بتوسل كتله

:- زين يابه عندي طلب يمك

 تنطيني 

:- انتي تأمرين أمر ما تطلبين بويه غالي ولطلب رخيص يابعد ابوج

رفعت ايده ابوس بيها وحاضنته احس نفسي منتكيه على جبل وكلماته ترد روحي 

:- ربي لا يحرمني من منك ولا من دلالك وطيبة گلبك 

بس اريد تاخذوني للنجف ازور امي وحسام الهسه ما زايرتهم صار اكثر من شهرين واني صرت زينه وطبت الحمدالله

:- بويه موزين عليج من ترحين خاف تتأذين من تبجين 

:- لا بويه اريد اروح گلبي خلص والله احس نفسي بعدني ما مصدكه بموتهم خليني اروح اشوف اقبورهم حتى روحي تأيس من رجعتهم بعد

:- ما ادري شگلج بويه هم حقج هو اني هم اريد اروحلهم بهل يومين 

 باجر اكعدي من وكت حتى انروح اني وياج الصبح

بوسته براسه وهو حاضني صايره جوا ايده وصافنه على الدجاجات كدامنه 

سمعنى صوت سياره ادك هورن بالباب الخارجي 

 وصوت طبكت الباب كام ابويه ايشوف منو اني هم كمت ورا اريد افوت جوا للبيت شفت وسام طلع بعدني ما داخله للبيت وسمعت صوت تقي يبجي بنحيب بصوت مسموع التفتت الباب مفتوح واشوفهم برا حاضن ابويه ويبجي وعلى صوت بجيهم ورجع حضن وسام ويبجون ضليت واكفه اباوعلهم وابجي على منضرهم وبجيهم

 رفع عينه شافني ابتعد من وسام يمسح بعيونه وابويه يكلهم اتفضلو جوا شفت جاي ويا عمو وهشام دخلت للبيت قبل لا يدخلون  

                                            

              

                    

بس صورة تقي ضلت ابالي شلون مبين علي تعبان وصاير ضعيف ولحيته عاليه ولابس قميص اسود احسه مكسور موذاك تقي ابد ما عبالك هو 

ابين ما سويتلهم الچاي وشربو تقريباً ساعه وطلعو بعده تعبان حتى ما مرتاح صارله يومين من طالع من السجن اباوع عليهم من الشباك من صعدو السياره وراحو احسه صاير فقير موذاك تقي الانيق المعتني بنفسه يمشي وهو منزل راسه السجن وموت حسام كلش مأثر بي لان جان اكثر من ابن عم هو ويا اصدقاء وعبالك توأم من صغرهم 

الثاني يوم كعدت من وڪت طلعت لكيت ابويه كاعد رحت سويتله ريوك واني

ما اشتهيت اكل شكد لح عليه ما قبلت بس چاي شربت 

:- بويه ندى كعدي وسام ياخذنه لنجف

رحت دڪيت باب غرفة وسام وكعدته

ڪعدو هو وزهور بس غسل وشرب چاي وڪام غير ملابسه 

رحت لبست عبايتي وجواريبي 

وطلعت قبلهم صعدت بالسياره متلهفه اروح اشوف اعزازي عبالك راح الكاهم منتظريني 

صعد ابويه السياره وبيده كمامه انطانياها البسها كلش ايخاف عليه خاف اتمرض 

وصعد وسام ايسوق 

وطلعنه للنجف الطريق مفتوح ماكو ازدحامات ولان على وقت وماكو مناسبه بسرعه وصلنه على وقت أول ما وصلنه كال ابويه لازم بلأول انزور أمير الأمؤمنين علي (ع) ونصلي بي 

وبعدها نطلع للمقبره 

ورحنا سوه دخلنه 

اني دخلت ويا النسوان للضريح الشريف ادموعي يشرحن حالي شفايفي ترجف ولعبره احسها تكص ابلعومي هوايه حجي ابداخلي بس ما حجيت استحي من عنده عبالك كاعد ايشوفني واحسه ايشوف البداخلي ويفهمني ويعرف بهمومي وشنو اريد

كعدت بالكاع اباوع من الشباك القبر الأمام علي (عليه السلام ) 

وابجي بعبره احسه كاعد يشكيني 

كتله

:- بجاهك يم رب العالمين اتوسلك يا سيدي ويا مولاي انت ياعلي قالعت باب خيبر اريد من عندك تقلع كل شي بداخلي الوارث وتنسينياه

وتريحني تعبت يا علي والله تعبت بجاهك يم رب العالمين 

بداعت عزيزة گلبك مولاتي زينب (ع) 

امسح على راسي وريح بالي اريد الصبر يا ابا اليتامى ادركني ادركني يا مولاي يم دفنو اعزازي مودعتهم يمك أمي وعزيزها انت شفيعهم ماعدنه غيرك ولي يا علي : 

شبعت بجي وكمت قريت الزيارة وصليت وهديت الأمي وحسام صلاتي 

وطلعت للمكان الي تواعدنه بي لكيتهم منتظريني 

صعدنه واتجهنه للعزاز آه يا كسرة گلبي بيهم وحسرتي عليهم الما تنحمل 

أول ما وكفت السياره ونزلنه اعيوني ادورهم اباوع للمقابر واقرا بالأسامي 

لما قريت أسم أمي وبصفها حسام

 ركضت عليهم بس وصلتهم شمرت نفسي كعدت بنصهم واصرخ من كل گلبي

خليت راسي على قبر أمي واحجي وياها واضرب على قبرها اريدها تطلعلي اشوفها مشتاقتلها مشتاقه الريحتها الطيبه 

ورجعت على قبر حسام اعاتب بي لما تعبت كلشش احس كمت اهمس مابيه بعد احجي 

وابويه يسحب بيه اوسام يحجي عليه يردوني اكوم 

گلتلهم عوفوني بعد ما ابجي خلوني بعد اشويه 

            

              

                    

التفتت على صوت بجي بصريخ من بعيد باوعت شفت تقي جاي باتجاهنه يركض وفاتح اديه

أول ما وصل قبر حسام ذب نفسه علي حاضن اسمه ويصرخ :- ولك حساااام سويتها ومتت وعفتني الوحدي اني وياك شتواعدنه شسولفنه ولك ما اصدك بعد ما اشوفك اطلع شوفني شصار بيه من وراك مشاقلك مشتاق السوالفنه سوه حسااام تسمعني ولك رد عليه 

ابجي على مبجى واني اشوفه يضرب براسه على صبة القبر و وسام يرفع بي وابويه يحجي علي 

واني ويا متگابلين ونصرخ وحاضنين القبر 

بس ابجي بدموع بعد مابيه تعبت من البجي 

وابويه كعد يقرا قرأن و وسام بعد تقي وغسل وجه وراح كعد يم قبر أمي منزل راسه ويسولف وياها بصوت خافت 

نص ساعه وگال ابويه يله كافي اترحمولهم افضل من البجي واقرولهم الفاتحه ابتعدنه وجاب ماي غسل المرمر واساميهم بماي الورد 

طلعنه من يمهم نمشي بس ارواحنه خلصانه ولشمس قويه تضرب بالراس 

اختل توازني لزمت ايد وسام عرفني تعبت  

بعد مابيه امشي لزمني أيمشي بيه كوه وصلت للسياره 

 وسام غسل وجهي وشربني ماي 

وتقي صعد ويانه مشينه مسافه دخلنه المدينه رادو انزل اكل فدشي احتمال هبوط عندي بس ماقبلت اصريت عليهم نرجع الكربلاء وصدك رجعنه ما بقينه اول ما وصلنه للبيت نزلت ركض الكنتور أمي فتحته ونمت بين ملابسها بالكي باقي شويه من ريحتها بقيت بمكاني نمت ما اعرف شكد وحسيت بايد زهور تكعد بيه اكوم اغسل واتغدا حتى اشرب علاجي 

كمت وياها 

ورا يومين سمعت من زهور جاين علينه اثنين اشخاص معروفين والهم قدرهم جاين علمود شغله شاربين چاي يم ابويه ومسولفين ويا وعمامي هم جانم موجودين مسولفين العدهم ورايحين 

ماعرفنه علمود شنو جايين

بس لاحظت ابويه مو على بعضه و وسام مزعوج من جيتهم يحجي ويا ابويه بالغز كدامنه وتقي كل يوم يجينه بس ما اطلع ولا اشوفه 

ورا أسبوع جان يوم خميس سوينه ثواب ألامي وحسام 

واجو بيت عمي ابو هشام و بيت عمي ابو حازم وعماتي ثنينهن اباوعلهم وكارها وجودهم جاين علمود ثواب أمي وعزيزها كوه طايقه الوضع مالي خلك حتى اختلط وياهم 

ورا العشا كاعدين وسمعنه هوسه طالعه من الاستقبال راحن البنات يسمعن شسالفه يم باب الاستقبال شويه

واجت هيفاء سامعه حديثهم 

گالت:- سمعتهم يكولون زوج ندى وارث داز شكم رجال قبل فتره علمود يرجع ندى ويكول 

مانريد اندور ثارات كلمن اخذ جزائه الطرفين 

ماتو من عدنه ثنين

 ومات من عدهم واحد وثنينهم هم اصل المشكله وماتو وكلشي خلص 

و وسام وتقي متخبلين من سامعين بكلامه ولضاهر راجع مره ثانيه جاي العمو احمد قبل يومين ومتوسل بي يرجع ندى اله

بس وسام وتقي مخابرينه ومتعاركين ويا بالموبايل ومهددينه ويردون يرحون يضربونه بس عمو احمد ما قابل عليهم ايخاف من المشاكل لا تنعاد الطلايب من جديد 

وتقي متخبل من عنده شلون هيج يسوي وبيا وجه ايدز مشيات حتى ايرجع ندى وعمامي يكولون لازم ايطلكها شلون باقيه الهسه بعدها على ذمته 

وهو موصل حجي الهم يكول الهم ما اطلك ندى وشيسون خلي ايسون اعلى ما بخيلهم خل يركبو 

            

              

                    

جنت اباوع عليهن و اسمع وساكته بس داخلي عكس ضاهري ابين ما مهتمه بس النار بگلبي اشوف التحجي علي ولتغلط واشوف الي تكول كلامه صحيح اهل المشكله ماتو وكلمن اخذ جزائه وهو يريد مرته ومتمسك بيها 

خلف هل كلام تناقض بداخلي 

صرت اريده ايطلكني وهم اريده ما يطلكني لان احبه ما اعرف شلون هاي تصير وشلون ترهم هالسالفه 

اشوف نضرات ام تقي عليه بس احسها ما طايقتني وما تحجي وياي وبناتها هم مثلها 

ما اهتميت الهن اني بيا حال هسه وهن ينگطن حقد وسم من عيونهن مبينات 

بس عماتي مهتمات بيه ويسئلني على الفتره العشتها ويا وارث واهله وشلون جان يعاملوني 

ما الي خلك اسولف بس انجبر اسولف لان ايلحن بالسؤال واجاوبهن 

ومن اسولف اتذكر كلشي مر عليه وابجي عاد صاحت بيهن ام حازم خايبات شسالفه عوفنها بحالها ماتشوفنها كاعده تتذكر وتبجي واصلاً موزين عليها ومو وكت هل سوالف 

غيرن الموضوع ولتهن بغير سالفه 

ما تحملت ابقى ابينهن اكثر رحت الغرفتي دخلت وسديت الباب هاجت عليه كل المواجع ولذكريات الحلوه ولمره 

لما حسيتهم راحو ولبيت صار هدوئ 

اختنكت من الغرفه ومن البيت بكبره فتحت الباب البيت وطلعت كعدت بره الجو بارد بس حلو وگمريه بقيت بنص ساعه بره اباوع باتجاه البستان اشتميت ريحة جڰاير من اشم ريحتتها تنرسم صورة وارث كدام عيني بس لاحظت اكو حركه خفيفه ابين النخلات 

وشعلة مالت جڰاره ركزت بيها زين خاف يتهيألي هل شي بس لا والله هاي جاي اشوفها جڰاىه بأيد احد يرفعها يسحب منها تجمر ويرجع اينزلها ڰمزت من الخوف دخلت ارڪض وسديت الباب ولغرفتي بسرعه دخلت بفراشي وبالغطى لفيت نفسي 

واحاول اتذڪر معقوله حرامي اي احتمال اني شفت احد اهناك يشرب جڰاره وحتى شتميت ريحتها ارجع اكول لا لا اكيد يتخايلي اني راح اتخبل لان وارث براسي جذبت نفسي وحاولت انام كوه بعد ساعه او اكثر اتگلب بمكاني 

 ومشت الايام يوم يسحب يوم نفس الوضع ونفس الروتين كل يوم ادخل بكنتور أمي باقي الها شكم قطعه من ملابسها اطلعهن واضل اشكيلها وابجي لما اتعب واطلع 

 وصديقتي ايمان كل يوم اتخابرني عدها مجاني وتحاول وياي ارجع الحياتي قبل وانساه بس موبيدي احتاج وقت وكالتلي اكو برنامج اسمه ڤايبر نزلي وخلي نتراسل علي وفعلاً گلت الوسام نزليا وكمنه نتراسل اني وياها ونسولف كل يوم فكرت انزل برنامج الفيس بوك وابحث عن صفحة وارث واشوف صوره يومين الفكره متفارڰني لما كلت الايمان وعلمتني اشلون انزله واثبته واسوي حساب سويته وسميت صفحتي ( اطياف راحله ) بدون صوره وأول ما انفتح رحت ابحث عن اسمه تعبت يله لكيت صفحته ودخلت عليها اگلب بالصور الناشرهم شفت صوره اله ناشرها بتارخ الي اني جنت عنده وكاتب جوا الصوره

 (( انه ابروحي عشگ من ينجفي اعله الگاع ذرات التراب اتصير ورديه )) 

 ضليت امركزه بيها وتذكر كل لحضاتي ويا وسوالفه وياي 

            

              

                    

دزيتله طلب صداقه وره شكم يوم يله وافق على الطلب واشوف منشوراته وصرت كل يوم ازور الصفحه مالته واشوف صوره يله انام 

 لما بيوم اجاني ابويه دخل يمي بغرفتي ويسولف وياي وينطيني أمثال ونصائح دينيه عرفت شنو يقصد

وفهمت من عنده وارث قابل ايطلڪني 

بس اهز ابراسي اله ومبتسمه بوجه جذب 

حته لا يلاحظ عليه اني اريده

بس طلع ابويه من الغرفه عضيت ايدي وڰمت اصرخ بخنڪه احس بلعومي يوجعني واعصاب راسي متشنجه من القهر البداخلي الدمعه شاطت من عيني وهاي الحاله اتعبني الدموع رحمه من تنزل اتخفف البداخلي 

رحت فتحت الموبايل ودخلت على صفحته خليت الموبايل كدامي مطلعه صورته واعصر بملابسي بحرگه دخلت ردت اراسله بس اترددت ثلاث ايام يله كدرت تنزل دمعه من عيوني وفرغت البداخلي من خلال الدموع 

وتعودت كل يوم اطلع بره اشتم هوى من الكل اينام اطلع واضل اتمعن بالسماء ولنجوم بس هم اتكررت مرتين هاي الحاله اشوف نفس الجڰاره وبنفس المكان ادخل بسرعه وهلمره لاحظت صوت الدراجه من ادخل ليجوا يله تمشي بس بين فتره وفتره تنعاد عاد سولفت الزهور انو اكو هيج شي اشوفها ضلت صافنه بوجهي وماحجت بعدين گالت اكول الوسام ايراقب المكان خاف حرامي 

لما بيوم كاعدين بالمطبخ انلف دولمه اني وزهور ونسولف كالتلي لج ندى باركيلي راح اتصيرين عمه للمره الثالثه اتباركتلها وحنا انسولف ومندمجين بالسوالف شفنه وسام دخل بس مو على بعضه شافنه صفن بوجوهنا ودخل الغرفته راحت ورا زهور حتى تعرف شبي 

شويه وطلعت 

اجتني هم ساكته 

سئلتها :- شبيج زهور غير رحتي تعرفين وسام اشبي 

گالت:- هاا مو وسام ايكول اليوم يجي الشيخ وزوجج حتى ايطلگج 

كلشي بجسمي وكف عن الحركه اله گلبي احسه انتفض هاي الجمله احسها مثل السجين ودخلت بنص گلبي ما بينت الاحد وكأنما ما عندي ردت فعل سكتت اشوفها اتباوع ابوجهي

:- شبيج زهور شكو اتباوعين بوجهي لا عبالج ابجي ترا عادي عندي اصلاً ماحبيته ولا يوم 

كملت الدولمه خليتها على النار 

ودخلت للحمام ابسرعه اتخذت الماي وسيله حتى ادموعي تنزل براحتها ويا الماي لما طلعت جفن اعيوني وارم واحمر 

للعصر قبل الغروب اجه ابويه كالي حضري نفسج حتى تدخلين وزوجج يرمي عليج يمين الطلاك

واشوف زهور حضرت الچاي ولماي 

ولااستقبال نظفته وبخرته

 واجو بيت عمو ابوهشام وتقي ويا وحازم 

واني مثل الينازع الموت 

واكابر كدامهم ما ابين 

سمعت صوت السيارات 

ومن نزلو صار صوتهم بالاستقبال بس ما سمعت صوته 

اشويه وجه وسام گالي غطي وجهج وتعالي وياي رحت عدلت حجابي ايدي ترجف ولعبره خانگتني لبست كمامه ولعبايه وطلعت دخلت ويا الاستقبال بدون سلام رفعت راسي ادور علي بعيوني

  شفته كاعد بصف الشيخ ايباوعلي بتركيز وعيونه تشرح الموقف الصرنه بي ونضرة الاشتياق والهفه بعيونه اشوفها وبنفس الوقت التعب مبين علي حتى

لابس ملابس سود 

نزلت راسي الدموع بعيوني 

صاحني ابويه اشرلي اكعد بصفه كعدت بصفه وعيوني غصب عني اتروحله واهو هم ايباوعلي 

ويباوع التقي الكاعد بنفس الجهه الكاعده بيها بيني وبينه ابو عمو ابو هشام 

بده الشيخ يحجي وينطي محاضره بخصوص الطلاق وانو ابغض الحلال عندالله هو الطلاق 

وباوعلي وسئلني اذا اني اريد الطلاق لو لا 

 سكتت باوعت علي ايباوعلي بنضرات توسل انترست عيوني دموع نزلت راسي..........

الفصل الرابع والثلاثون من هنا 

شكرا لزيارتكم عالم روايات سكيرهوم