رواية قصة وجدان الفصل الثالث والثلاثون 33 بقلم انين الليل

 

بهاء خزرني ورجاء گامت وهي اتگول //. اصعد انام احسنلي ( باوعت البهاء ) شني يمه ما تريد تنام

   هز راسه وگف گال //. تصبحون على خير

   بيبي ردت //. اجمعين جده نام نوم العوافي

     اويلي شكد بيبي تحب بهاء لان ابن بدر ولان من عمو اتوفى هو زغير ولان ربته هلكد تحبه

   طلع واسمع وقع اقدامه ع الدرج بيبي گالت. //. تعاي جده غطي رجليه

   رحت يمها خليت الغطا على رجليها وصرت امرغ بيهن حييل وهي اتگلي //. العياره غصبا ما عليه تخليني احبها

اتقربت عليها حضنتها =. اني احبج بيبي انتي شي مهم بحياتي اموت. عليج

- - اسم الله عليج من الموت الله يرضى عليج ويطيني العمر واشوفج. مكمله دراسه وانوب ازوجج واخلص منج

صرت ادغدغ بيها =. ياااااا شنو تخلصين مني. اصلا وين ما اروح ترحين وياي

هزت ايدها //. هسه هاي شحجي وياها روحي شيلي المواعين اخذيهن للمطبخ

اخذت الصحون ورحت للمطبخ غسلتهن وجاي اخليهن بالسله حسيت اكو احد وراي جمدت بمكاني درت

والصحن بيدي. شفته بهاء ومبين عصبي لان الجكاره بحلكه ومن اخذها بايده شفتها ترجف اتنفس بقوه

   ——. الكلام الي جدتي حجته صحيح

   بقيت ساكته // احجي لا تسكتين انتي. ما تردين تتزوجين هسه لو ما ترديني

   اتقرب اكثر // اكلج ليش ساكته احجي

هزيت راسي

  جاوبني // لا تهزيلي راسج جاوبيني

     بلعت ريكي = اا ريد. اكمل دراستي ما اريد اتزوج

  خليته بالمطبخ ما انتظرت شيحجي طلعت وبمجرد ما دخلت للغرفه. اجه علاوي واشوفه ضايج سالته = شبيك علووش

- - ما بيه بس عم و مهدي گال لبر اهييم بعد ما يلعب وياي بلي وحتى ضر به. وسبني

باوعتله ولزمت ايده = عوفه واساسا راح تبدي المدرسه يعني اضمه البلي وبعد ماكو لعب بي

هز راسه وراد يحچي خليت ايدي على حلگي = اشش علي ما اسمعلك صووت ياالله ناام

من يومها صرت اتحاشى وجودي بالمطبخ اله بوجود رجاء او بيبي

ومهدي كالعاده يومين زعل وثالث يوم. رجع اتعشى ولا كانه صاير شي

عمو عاصف ملتهي بشغل الحقل. الزراعي اكثر الايام ما يبات بالبيت وبيبي دووم تدعيله وتكول

- - - الله يساعدك يمه ويشد. حيلك هاي الحلوك كلها تريد عيشه منك

غاب. يومين وبالليل اجه هو وبهاء كان لابس تراكسود و(جزمه سوده ) والجفيه متنكب بيها گال.

:: السلام عليكم

فات الغرفته بقى ربع ساعه وطلع مبدل لابس دشداشه رجع. كعد يم بيبي باس ايدها وكلها

:: اشلونج يمه

- - طاب لونك الله يساعدك

:: هلا يمه

- - هلا. بيك ياروحي

اجه مهدي وسلم // ها شلونك عاصف

:: هلا بيك مهدي

- - شو اجيت.

ابتسم :: اي اجيت اشوف امي وسبحت وشويه وارجع

بيبي // جا انت مهدي ما تروح ابداله

مهدي // يمه مو تدرين. بيه فقرات ظهري يوجعني شلون روحتي

بيبي باستهزاء // اي يمه يوجعك من النوم

صار ينكت باديناته // اهوو امي دومها مفشلتني.

- - ما مفشلتك بس اخوك هم يتعب عاد يوم انت ويوم هو مو كله علي

- - شبي. بس تهمين بي وداعتج الصبح زبد وجاي والظهرسمج شوي وبالليل لو معلاك لو دجاج لو لحم

بيبي // وانت خطيه مگطوع بيك اگلك اخوك يتعب ولوحيده يروح منا ويرد منا گبل ويا بهاء. هسه بهاء هم شال ايده منه

بهاء// لا جده انا بيوم السجي بگاعي انا اروح. ابمكانه

بيبي هزتايدها // خووش ربحنا صار كاعه وكاعي

بهاء // مو تدرين بيه على باب الله وهم ما ينعاف الشغل.

جابت عمه رجاء شلغم بس ريحته تخبل وساره جابت دبس وراشي مهدي كللها // بس. كون كسبتي الخبز زين

هزت راسها // اي كسبته

رجاء قدمت البيبي صحن شلغم. وانطتني صحن رحت للمطبخ جبت شووك وقدمت البيبي. نهاد حجت

- - هو يحلى الشلغم ينوكل اله بالايد

= لا خاله الشلغم بالذات ينوكل بشوكه.

- احنه ناكله بايدنه ها مهدي شتكول

- - ما كو احلى من الاكل بالايد

1

بقينه نباوع ونبتسم على عمو مهدي الي شتكله نهاد يكلها اي وتمم وكلامج صحيح

جاوبتهم = الصراحه الشلغم ما كنت استسيغه بس من سوته خاله ام بهاء. عجبني. كلش طعمه يخبل

بيبي //. اي جده لان من كاعه حلوه واحنه زارعينه وبس نغسله وتخلي ع الجمريه مال تنور الطين

=. عبالي تسلكونه

هزت راسها //. لا هاي اهل الولايه يسلكونه احنه نشويه

اجت فرح سلمت على ابوها وباسته وهو سالها اشلونج جاي تدرسين

اي بابا جاي ادرس

يمته دوامكم

عگب باجر

انا هالايام ما اكدر اوديجن واجيبجن بهاء عود انت اخذهن وياك ورجعهن

بس انا مرات التهي

فرغ نفسك هالشكم يوم على ما اكمل شغلي

اي ان شالله

وبيومها بقى عمو عاصف يمنه تقريبا للساعه 12وبعدها كام ونزل من نضيدة بيبي بطانيات وجودليات كللها

:: الگاع بارده وتصل علينه ولو ما شاعلين الحطب جان متنا من البرد

بيبي // عمنه مهدي شارد

:: يمه انتي هم اتعتبين على مهدي

بيبي هزت راسها // لا يمه ما اعتب علي انا على الاكبر من مهدي ما عتبت

:: من تعتازين شي اطلبي من بهاء وانت يوميه گبل لاتروح مر بيها انشدها خاف معتازه شي. ياالله تصبحون على خير

راح عمو وبهاء صعد نام لا هو يحچي وياي ولا اني احچي ويا اكثر كلامي ويه بيبي ومن راحو هي اتمددت اجيت يمها

= بيبي

ردت عليه بتعب ونعاس //ها

=وين راح عمو وشنو هاي البطانيات

- - شني ما شايفته

= لا شايفته بس ما اعرف وين دا يروح

- - راح للسجي

=شنو السجي ؟

كعدت على حيلها ولمت حلگها // ما تعرفين شني السجي

هزيت راسي

- - جده يروح للكاع يسجيها يفك عليها الماي

= بره

- - اي

= بهذا البرد

- - اي

= وينام بره

- - اي

= اووف شغله تعب

- - هو حياته كلها تعب بتعب

حكيت خدي = بس الي اعرفه انو بالبرد الزرع ما يحتاج مي

- - لا حبوبه هسه موسم سجي الحنطه والشعير

= ومن تمطر ؟

- - خير ونعمه بس هم يروح يسد النهران ويفتح مشروع

ولو ما عرفت شنو تقصد بس الي عرفته انو بالشتا شغل عدهم متعب

  داومنا وبهاء ياخذنه اني وفرح الي تكعد بابصدر يمه وهاجر الي تگعد يمي وكان من يركبون يكضيها

سوالف وضحك ويه فرح وهاجر واني ميحجي وياي او ما كاني موجوده ومن يرجعنه الظهر دووم يجيب الهاجر وفرح حلويات

ومره سالته هاجر // بهاء جا ليش ما تجيب الوجدان شو بس النه

جاوبها // وجدان هذا الاجيبه ما تحبه ما متعلمه علي

تباوعلي وتگلي // بس طيب

... ابتسمت = بالعافيه حبيبتي

 الاشهر ونجحت من الرابع للخامس وامتحنت فرح سادس وانتظرنه النتايج وفعلا نجحت ابمعدل 76 والكل فرح

ورغم ابوها كللها قدمي والكليه الترديها ادخليها بس ما. حسيت بي فرحان ما اعرف يمكن هو هيج طبعه بس ليش حسيت

من نجحت من الثالث. فرح اكثر من هاي الفرحه

كان كل شهر ومرات اكثر هشام يخابرني ويشجعني اكمل دراسه وانجح اوو وعدني من يطلع راح ايعوضني

عن كل شي ونرجع البيتنا اني وعلاوي وهو

وقدمت فرح الانسيابه واجه قبولها تربيه احياء بنفس محافظتها واهنا فرح اتغيرت تغيير كامل من ناحية اللبس

والاهتمام بنفسها

وعمو اجر الها خط تكسي واشترالها موبايل وامها كلش فرحانه بيها

اني داومت بصف خامس اعدادي ومشت حياتي وكان اهم شي نجاحي خصوصا دا احس من بعد جية ام كرار

الكل ابتعد عني حتى هاجر صار اخوها ايوصلها واني عمو عاصف ايوصلني لكن هواي مرات كان يتاخر عليه فكنت

اجي ويه الخط وكفه ودوم ينزلني. ع الشارع وحجيت ويا يمر عليه للبيت لكن هو گلي ما عندي مكان وحتى لو اقبل

ما ادخل. جوه يعني تنزلين اهنا (يقصد ع الشارع ) وتركبين منا لان طالبات. يتاخرن وانا وياهن من زمان ومن رجعت

حچييت الهم. بيبي كالت بكيفج وعمو عاصف گال بيوم الي ما اكدر امرلج انا اخابره وانطي خبر وترحين ع الشارع وتركبين وياهم

كانت مسافه هواي من ما يوصلني عمو كنت امشي حتى اوكف ع الشارع وكنت اكعد من الفجر وابقى گاعده حتى

لا يفوتني الخط وطبعا هاي. بس اني هالشكل امشي وانتظر الخط دووم يمر عليه ابن عمي محمد بسيارته ياهذ هاجر

بس ولا نره وكف وگلي اركبي وبيوم طلعت الصبح حتى الحك ع الخط

سمعت هورن سياره عرفته بهاء كلي // اركبي اوصلج

= لا هسه الخط يجيني

هو شخط السياره بدون ما يحجي وراح وبقيت امشي لكن شفته رجع عليه ونزل وگلي

- - - حاچيته السايق گتله انا راح اوصلها فوتي اركبي

= اخاف انت تتاخر

نفخ // اذا ما تركبين لا انتي راح ترحين للدوام ولا انا راح اروح الشغلي اركبي بسرعه

فتحلي باب السياره ركبت وسديت الباب بالطريق باوعلي وهو يسوق // بعدج ما ترديني

بقيت ساكته هو. حچى بعصبيه // لا تسكتين جاوبي

باوعتله = ليش دا اتعيط

وگف السياره اتنفس بعمق // تدرين بيه احبج شنو احبج اموت عليج

= اني ما افيدك

اتغيرت ملامح وجهه // شنو شنو ما تفيديني

بلعت ريكي بخوف = اخواني علاوي وهشام من يطلع اذا تزوجت منو الهم

ابتسم // ولج ياغبيه انا ابن عمج وابن عمهم يعني همه اخواني يعني حزام ظهري وانا سندج وبظهرج وشنو تردين اسويلج

تردين نعيش ابغداد اخذج واروح تردين بيت بالولايه اشتريلج شتردين بس اطلبي

(صار يتنفس شهيق وزفير وعاظ على شفته نفخ )

احبج تعرفين شنو احبج يعني انتي كل حياتي تدرين بهاي الايام الي ما احچي وياج بيها شنو يصير بيه شكد اكابر

واغلط على نفسي واليكتلني اكثر سكوتج وعدم مبالاتج الي وجدان بيش احلف الج انا احبج حتى تصدگين تردين

اتموتيني گولي ما اريدك

عيوني غوركن بالدمع برطمت = اني ما اصير لك وهذا اخر كلامي

ضرب ع الاستيرن // لا تصيرين الي

= بالغصب

باوعلي وهز راسه // لا وجد ماكو غصب انا احبج وانتي تحبيني بس تستحين تگولين وهذا الشي الي مخليني متمسك

بيج شوفي انتي روحي وشرفي وعرضي ولا تصدكين بيوم اتخلى عنج لو اعوفج لو شصاير ويصير

= بس اني

- - انتي شنو متقبلج بكل شي وراح تشوفين شراح اسويلج وشلون اعيشج اليوم افتح موضوع ويه عاصف ومو عبالج خطبه

ابيناتنا لا وداعتج اله اجيب جاهه وساده وشيخ العشيره بكبره والمهر التردينه بس انتي اقبلي ولج انتي حلم عمري

= ما اگدر بهاء

- - ليش فهميني

بلعت ريكي = عمه ما تريدني

- - ما عليه بيها الها عليه احترامها وكل شي تحتاجه يجيلها بس تدخل بسعادتي مستحييل

- - لا تصفنين ولج احبج

- - ولج لا تصفنين گليلي قابله خلي تردلي روحي تره وداعتج امشي جسد بلا رووح

=. واني هم

- - صدك يعني انتي مثلي اتحبيني ،؟

   حسيت على نفسي وهزيت راسي =. لا لا مو هذا قصدي

- - ولج شبيج جبانه ادري بيج تحبيني ومستحيه

ا دنكت ما اعرف شجاوبه وهو كال // اموت عليج اليوم افاتح جدتي وعمي واخبر عماتي والجمعه اخطبج

= لا عندي امتحانات

- - الجمعه الجمعه مو الخميس

=. بس اشياء لازم تعرفها

- - كل شي ما اريد اعرف احبج وكافي مادام قبلتي وتحبيني كل شي ما اريد

رحت للمدرسه وانا افكر بكلام بهاء معقوله نتزوج ونروح البغداد گلبي فرحان لكن روحي تلووب وما مطمئنه

اشوف الكل مترقب بيبي حاجتني وگالت بهاء يريدج وعمج عاصف گال اسمعي الموافقه من السانها

ما اكذب خايفه وانا اشوف بعيون رجاء عدم القبول وابد ما فتحت وياي موضوع الخطبه وشنو اريد وشسوي

ونهاد ابدها تفترسني اما مهدي ف احس من يجي يريدله عليه حجه لكن اني اروح الغرفة عاصف اقرا

كان يوم الثلاثاءبالليل بعد ما راحو بيت عمي مهدي البيتهم صرت اتگلب بفراشي ما گدرت انام على الساعه بالوحده ندهت بيبي

وانا ابجي هي فتحت عيونها باستغراب والنعاس باين عليها

ها جده صارت صلا

جاوبتها وانا ابجي = لا بيبي اني ما اريد اتزوج بهاء

كعدت بيبي على حيلها // اسم الله جده اسم الله الرحمن شبيج ليش تبجيين ياهو وياج

= بيبي ما اريد اتزوج بهاء الله يخليج

كامت على حيلها وفتحت الگلوب / / اسم الله الرحمن الرحيم دخيلك ربي شصاير

هزيت راسي = ما صاير شي ما اريد اتزوج بهاء

لزمتني وخلتني بحضنها كنت معتقده بيبي تضربني او تعيط عليه وتسبني لكن هي صارت اتمسد على راسي وتقرا آيات

قرآنيه وتسور عليه واني بعدني ابجي واشهك من البجي

- - على كيفج جده نامي وارتاحي ومن اصبح افلح

= ما اريد اتزوج بهاء عفيه بيبي ما اريد اتزوجه البهاء ِ

- - صلي على محمد بيبي واستهدي بالرحمن

باوعتلها وانا اسحب خشمي = اذا جبرتوني احرك نفسي لو اشمر نفسي بالشط

صرت بس ابچي خفت منها ومن ردة فعلها حاچتني بعصبيه // شتي انوب هاي احرك روحي واشمر روحي بالشط

اسمعيني ما عدي بت هيج اتكول لا يسمعج عاصف لو مهدي ويذبحونج

= بيبي ما اريد اتزوج

عضت شفتها //. انتي ما تردين بهاء

= بيبي لا بهاء ولا غيره اريد اكمل دراسه وانتظر اخويه يطلع ونرجع نعيش سويه

- - جا ليش قبلتي من حجيت وياج

= بيبي عبالي تتشاقون عفيه بيبي ساعديني

- - لا تبجيين ونصي حسج ياالله ارجعي نامي والصباح رباح

اتمددت على فراشي وبيبي هم رجعت الجربايتها وهي تحجي // دخيلك ربي شتراوالها هالبنيه شبيها شجاها الله يستر

بقت تستغفر وتتعوذ من الشيطان الرجيم واني ما حسيت اله الصبح على حركه تندهني من كتفي فتحت عيوني شفت

بيبي اتگلي // اگعدي صلي

كعدت اتوضيت وصليت قضا وبيبي گالت //حتى انا گبلج گعدت وصليت قضا

ما جاوبتها رحت بدلت وطلعت بدون ما اتريك شفت عمي عاصف منتظرني بالسياره ركبت بالصدر وصار يدخن بعدها

وكف السياره سالني :: الي سمعته من امي صدك

راسا دنكت بجيت وهزيت راسي

:: وليش من حاجتج حبوبتج كتيلها راضيه

بقيت بس ابجي هو ضرب على الاستيرن :: وج انتي تدرين شراح تسوين تدرين شراح يصير فكري بابا

= عمو اذا تجبروني احرك نفسي

خزرني :: تدرين لو وحده غيرج حاجيه هالشكل تدرين شسوي بيها بس هسه مو وكته الي اريد افهمه ليش ما تردين. بهاء

هزيت راسي = لا عمو مو ما اريد بهاء اني ما اريد اتزوج اي احد لا. بهاء ولا غير بهاء

:: هاا ؟

= اي عمو شعوري اتجاهه مثل اخويه اني اريد ادرس واخذ الشهاده واربي علاوي وانتظر هشام

اتنفس. بعمق :: انا جبرتج

= لا عمو ما جبرتني

:: جا ليش ليش تزغريني گدام العالم ليش تكسرين بخاطر بهاء

صرت ابجي واشهك واردد = ما اريد اتزوج عفيه. عمو ساعدني بداعة بيبي اعتبرني مثل فرح ساعدني عمو الله يخليك

:: ليش قبلتي من البدايه

= استحييت منك ومن بيبي واني عايشه عدكم بس من صارت صدك لا عمو الله يخليك ما اريد اتزوج

:: بهاء. شلون اكسر بخاطره واگله ما قابله

= لعد بس اني تكسر بخاطري وتزوجني

اتنفس بعمق :: صبرا جميل وباالله المستعان

عمو رجعني وگلي لاتداوميين اليوم

وصلنه هو باوعلي وحجى :: تكعدين يم حبوبتج ما تفكين حلكج بحجايه سمعتي

هزيت. راسي بخوف وانا مبرطمه باوعلي :: انزلي شمتانيه

= عمو راح تساعدني

:: الله كريم

حضنته واني ابچي = عمو الله يخليك ما اريد اتزوج عمو ساعدني لا تتخلى عني

اتنفس بعمق :: يصير خير يصير خير

نزلت ودخلت الغرفة بيبي ماكان احد موجود بسرعه غيرت ملابسي واتمددت ع الچربايه اتغطييت واتظاهرت بالنوم

افكاري. كانت مزيج من ترقب وخوف واني دا اسمع رجاء تحجي ويه بيبي // ليش ما راحت للدوام

- - ما الها خلك

وحسيت بعلي من اجه وصبو الغدا وبيبي كالت الرجاء نايمه ما تشتهي

ورجعت بيبي اتمددت وهي اتكول // اكعدي اكليلج لگمه

ما جاوبتها ما ردت اتواجه وياها هي تعرف بيه كاعده وهم تعرف بيه ابجي صارت تنعى وتبچي لكن هالمره همس ة

وهالمره تعاتب باابويه وتكله من يومك وانت متعبني وهسه بزرك

بيبي طلعت ما بقت بالغرفه وتقريبا صار البيت صنطه وانا ما اتحركت من فراشي واجتني بيبي حاجتني وكالت

- - اكعدي اتوضي وصلي واكليلج لكمه

ولان جوعانه وتعبانه كمت ومن كملت صلاتي رحت سويت لفة بتيته وطماطه وگعدت اكلها واجه عمو عاصف

صبت رجاء العشا وفرح يمنه وهي تسال ليش ما تجي تتعشا

ما جاوبوها.وصرت ما اسمع شي بس. فجاه اجو بيت مهدي بدون ما يسلم حجى

وينها

بيبي // ياهي

- - ياهي. بعد ست الحسن والجمال اليوم اشرب من دمها

رجاء //. اسم الله شصاير

نهاد // شني ما تدرين رجاء

رجاء// بشنو ياستار ؟

نهاد // مو بت حماج الله يجرم تكول ما اريد بهاء

رجاء//شني ؟

نهاد // چا عمتي ما كالتلج

بيبي //. اكرمينه بسكوتج نهاد

مهدي // اي انتي ظلي نهاد ونهاد وذيج العايقه الضحكت ع الزلم خالتها على گلبج

بيبي // انجب مهدي واحچي عدل

- - هي وينها

رجاء//. ياااا عمنها اليوم لا اتغدت ولا داومت وضامه روحها

مهدي // اي مستحيه صيحوها الي لا افوت هسه اكسر راسها

قررت اطلع واليصير يصير شنو الزواج بالگوه طلعت وصارت عيني بعين بهاء الي مبين علي القهر والزعل

مهدي اجه صوبي كمشني من شعري // ولج شني هذا السمعته

بقيت ساكته وبيبي اتكله // عوفها مهدي

- - ما اعوفها اريد اشوف شجوه راسها من خبر احچي لا تبقيين ساكته

حاچيته واني متوجعه = عمو ما اريد اتزوج

- - ها وهسه اتفطنتي جنتي غايبه

اتقرب مني بهاء وعيونه كلها عتب وسالني // ليش ليش ما ترديني

صرت ابجي مهدي يعت بشعري // ما تردين اشايفتلج من شوفه

بيبي بعصبيه // مهدي هد البنيه

- - لا تصيحين بت ابنج مو خاليه بس اليوم انا ذابحها لو اتقر بكل شي

بيبي فكتني // خايب اسكت شو ما تعرف تحچي

مهدي // هسه ما اعرف احچي مخلي الحچي الج والعاصف اريد اعرف ليش ما قابله مو انتي حاچيتيها وگلتي قابله

بيبي // انا افتهمت حچيها مكلوبي هي كالت ما قابله وانا لدالي تگول قابله

مهدي باستهزاء// يمه هاي شلج بيها والله اكتلها وادفنها ومحد يدري بيها

بهاء // يواشك مهدي امشي اريدج بحجايه

بقيت واكفه ومدنكه هو رد عاط // ما سمعتي جاي اكلج امشي رايدج

انا فزيت لكن ما اتحركت من مكاني صرت وره بيبي الي گالت // احجي جده حاجيها اهنا كدامنا

بهاء // شني اكلها جاي اكلج امشي

بيبي وهي تحامي بادينها // عدك احجايه گدامنا

اتنفس // ليش ما ترديني

بقيت ساكته هو ضرب الحايط // لا تسكتين احجي

بيبي // احجي جده لا تخافيين محد ايحاچيج

جاوبت وانا ابچي // م ما اريد اتزوج

- - ليش ؟

= اريد ادرس

- - عدي اتدرسين

هزيت راسي // لا اني اريد ادرس وانتظر اخويه. يطلع

مهدي // يعني انتي مو ما تردينه

هزيت راسي = لا اني ما اريد اتزوج اي احد اريد بس ادرس واخذ الشهاده وابقى. يم اخواني

اتقرب مهدي وكمشني مره ثانيه من شعري وهو ايكول // جا بت الكلب ليش ضحكتي ع الولد وگلتي قابله

ضربني راشدي واجه. عاصف وكله :: مهدي عوفها

صرت وره عمو عاصف الي گال :: كافي مهدي كافي. 

مهدي // محد طيرها غيرك وغير امي

جاوبه. بعصبيه :: انت شتريد گلي شتريد

مهدي // ضحكت على بهاء على ابن بدر كسرت بخاطره وهسه اتكلي شريد اريد اكتل بت الكلب هاي

عاصف :: كل شي بالغصب. و بالگوه بس الزواج هذا مصير لازم بالتراضي والقبول

بيبي اتقربت من بهاء// اي جده واحسن ليش تتورطون. بجهال عاد اطفرو. النهر ما دامه ضيك

اتنفس والقهر مبين بوجهه ما حچى نهاد گالت // ليش هي تريد احسن من بهاء شبي شو الف تتمنا

رجاء// والناس وعماتك شنكللهم ضحكت علينه وحده زعطوطه امس اريده واليوم لا من البدايه كتلكم هاي الفرخه وحده

لعبيه كافونه شرها بس ياهو يسمعنا من تحجي رجاء تصير كطعيه

بيبي //. وهسه ما صار شي وكلشي بقسمة الله

مهدي // اي بقسمة الله التنخطب لو ترضى لو ما ترضى مو اليوم اي قابله ويوم ثاني ما اريده

رجاء //. يا فشلتنه كدام الناس شنگول وشنحچي گتلك يمه هاي الفرخه مو من ثوبنا لا بت عمي احسن هسه

فشلتك وزغرتك گدام العالم

بيبي رادت تحچي مهدي سبقها // كل شي راح يتم عمي بهاء باجر تعقد على اسويره وبدون ما اخذ رايها تريد هسه

اعقد عليها واخذها ( عاط بصوت عالي ) تعاي ولج ساره وينج

اجت. ساره // ها بابا

مهدي // سمعتي ابن عمج بهاء باجر يخطبج اذا فكيتي حلكج وكلتي. لا وانتي عدله ادفنج

بقت ساكته وسط مفاجئة الجميع ج رد سالها // شسمعتي ساره

هزت راسها

مهدي // لا تهزين راسج احجي خلي اسمع

ساره بهدوء// بكيفك بابا

مهدي دار على بهاء// باجر تعقدون هذيج بت عمك ما الك قسمه وياها وهاي بت عمك ماكو فرق

نهاد. //. هذا هو شنو ساره تلكى احسن من بهاء

هو بقى ساكت بعدين حجى //. اشكرك عمي بس ما اكدر اخذ ساره مو. بيها شي لا سامح الله لا بت عمي واتشرف بيها.

واخليها على راسي

   مهدي //. جا شني ؟

  بهاء |/ الاخذها لازم تعرف انو هاي ( اشر عليه ) هاي الضامه روحها وره عاصف ومحتميه بجدتي وبي

سنه والف سنه ارجع واخذها مو حبا بيها لا. بس هي كالتها تريد تدرس وتكمل وما عدها شي وهم اتانيها تدرس

وتكمل ويطلع اخوها وتالي. اخذها وعيونها اتشوف ما اخلي اي واحد منو ما يكون يفوت وياخذها

مهدي //. انت اتزوج واكسر. عينها وتالي عود خلي ابن مره يفوت وياخذها اله اخليها تنسل شيب

اتقرب عليه بهاء واني وره عمو عاصف وهو يتوعدني وياشر بايده // لو متزوج اربعه وعندي مية ولد وانتي يصير

عمرج خمسين سنه وتقبلين تتزوجين اخذج بس حتى اذكرج شلون رفضتيني

شفت بعيون بهاء حقد وكره. بكد ما كنت اشوف حب وعشق

عاصف كلي :: فوتي روحي الحجرة امي

رحت وانا اسمع مهدي يگول // هالزوول اللحد هاي اتحيبلنه كسرة ناظر وشوفو

سديت الباب واتمددت خليت المخده فووك راسي بس حتى ما اسمع كلامهم بقيت ابچي واني متغطيه ودافسه نفسي بالفراش

ما اعرف شكد مر من وكت لمن ما اجت بيبي وهي تحچي

- - شجاج يالبنيه وهيج سويتي من الاول وگليله ما اريدك ما اريد اعرس شوف غيري هسه احسن اجه البت نهاد

بصينيه من ذهب وهيه المانه والمسويه فضل وهو ما جان. شايفها ليش ولج خليتي التسوه والما تسوه تتشمت بيه

- - استغفر. الله شو شصاير الها

- - اااخ يايمه يا سعدي شوف شصار ضيمك طاح على هالمكروده

نمت وكعدت الفجر اتوضيت وصليت ولگيت بيبي قبلي دا تصلي ما حجيت وياها او خلي نكول صلاتي بسرعه كملتها ورجعت اتمددت ودرت وجهي حتى اتحاشى بيبي وكلامها وهي مجرد ما كملت الصلاة راحت على فراشها اتمددت

نمت وكعدت على صوت عمتي امل الي كالت // اگعدي عمه دنيا ظهر

فتحت عيوني وانا اشوف عمه جايه بعيوني النعاس كعدت على حيلي وگتلها = صباح الخير

حضنتها وهي باستني وتگلي // صباح النور

رحت غسلت ورجعت حاچتني // روحي اتريگي

هزيت راسي = ما اشتهي

- - ليش ما تشتهين

رفعت اكتافي = هالشكل

طلعت عمه ورجعت سدت الباب // اشبيج عمه ليش هيج سويتي

باوعت الها مستغربه هزت راسها وهي تحاچيني بعتب // اكو وحده تعوف بهاء تكول ما اريده

بقيت ساكته // عمه تدرين بهاء اجاني من غبشه وجابني ايگلي قنعيها

بيبي الي ما منتبهه هي موجوده. // هذا يمصرن

امل هزت راسها // لا يمه بهاء يريد وجدان

بيبي // وجدان گالت ما اريده

امل // شني يمه جنج راضيه

بيبي // ما راضيه بس يمه هذا هو وگفت گدامه وگدام الزلم وكالت ما اريد اعرس شنسويلها رايج

امل // مي خالف يجوز خايفه من شي مصادفهاشي گولي عمه لاتخافيين وداعتج انتي مو هينه علينه شبيج

وما دام عاصف موجود لاتخافيين من شي گولي ياهو وياج نهاد لو رجاء

بقيت مدنكه وشفايفي يرجفن والدمعه بعيني اكابر ما تنزل وعمتي تگول وهي هم تريد تبجي

- - ولج الولد متخبل عليج ليش كسرتي بخاطره شتراوالج

صرت اناشغ وانا اگول = خلص عمه هو الله يسعده اني اكمل دراستي واربي علاوي وانتظره الهشام

امل // ولج هو هشام ياهو وبهاء ياهو ذوله ولد عم يعني اخوان وبهاء ما راح يتخلى عنج ليش ضيعتي من ايدج

بيبي //. عوفيها يمه الصار صار

لملمت حلگها وهزت ايدها // وهمه شدعوه بيت مهدي ما عطلو الموضوع شويه

بيبي // ياهي تعطله نهوده ال اجتها من الله

امل // اي صدك

بيبي // طارت هي واختها رجاء بساع صارت تنشد بيها

امل //. شتنشد

بيبي //. رجاء اتكللها يمته تلگين اتاجرين البدله يمته تحفيين البتج اتكلها بالفلوس كل شي يجهز ومن احسن ما يكون

  امل // هاي نهوده لو تدري تلبس بتها دشداشة مهرها البستها المهدي هم تلبسها

بيبي // بالعافيه عليهن

امل // يمه شبيج

بيبي بحده وقهر // شسويلها هاي هيه بلسان الهاطوله اتگلي بس اتجبروني احرك روحي لو اشمر روحي بالشط

امل. //. افه عليج وجدان هيج تحچيين

بيبي تهز براسها //. اي شني اچذب عليج هاي هي تحجي وتبچي

امل // جا يمه ليش ساكته ما اخذتوها السيد العارفه

بيبي وهي تحرك بايدها //. هو ياهو اطانه مجال مهدي اليرعد ويتشمخر ويسب ويفشر ويغلط لو بهاء الي ايهدد لو

رجاء ونهاد الي ايهلهلن ويذبن نفط فوك النار

امل // وانتي يمه وين حيلج وين امرج

بيبي // مو عبالج خايفه منهن اگدر هسه اخرب الاكو والماكو بس سكتت لا تالي اتصير مو زينه وتعال يابوي شيلني

امل //. شني اليصير ؟

بيبي بعصبيه //. اكلج هاي الفرخه نص الليل ندهتني ما اريده والا تغصبوني احرك روحي گلت تاخذه وغصبا عليها

وكسرت شوكت رجاء ونهاد وصبحت حاركه روحها شكول وشحچي

امل // ما ادري يمه بس انا وداني بهاء (باوعت عليه وابتسمت باستعطاف ) كلي گليلها شتريد حاضر حتى ما اخليها

تگعد اهنا اشتريلها بيت بالولايه وبس تدخل كليه ارجعها البغداد

بيبي // هذا يحجي سته بالشهراليوم يعقدوله على بت عمه ويريد ايبطل وياخذها (اتاشر عليه ) للولايه

امل // شكو بيها يمه بعده ما عاقد

بيبي //. ولج انتي هم اتمصرنيين مثله هي امه واخته ونهاد وبناتها غبشن للولايه من فجر الله

امل // يمه ما شفتي بهاء يكسر الخاطر

بيبي بحزن // الصار صار وهيه الگالت ما اريده بعد ما يفيد الحچي

دارت عليه وهي تحاجيني بعتب // ليش عمه شصاير وياج وما تردين اتكولينه

بقيت ساكته ومدنكه واصلا ابين ما مهتمه لان لزمت كتابي وطلعت بالصاله اقرا او اسوي روحي اقرا واني ابد لافكري

ولا حتى عيوني بالكتاب

عمتي امل فاتت للمطبخ طلعت دجاج وطبخت الغدا لان رجاء وفرح ما موجودات بعدها صبت بس النه ماكو احد بالبيت حتى

علاوي ما اجه اتغدا وره الظهر عمتي اجت يمي للمطبخ لان اخذت الصينيه وبديت اغسل الصحون باوعتلي وگالت

- - من تكملين اتدخلين للحمام وتسبحين وتبدلين ملابسج

باوعت الها هي ردت عليه // اسمعيني اتبدلين وعادي واذا صادف واحد سالج گولي اريد اكمل دراسه سمعتيني مو

ما جاوبتها ردت عليه //. عمه ما دام جدتج بالحجره بهاء يكول بس تقبل ما عليها من يمي احلها ها شگلتي

= خلي احضر العصير اخاف احد يجي

امل // هو هذا ردج

    هزيت راسي =. اني وبهاء ما النه نصيب

       

امل طلعت وانا صبيت جاي البيبي ودخلت للحمام ومن طلعت اخذت ملابسي الي كانن عباره عن بنطلون كابوي ويا قميص

وردي وشال بيج

واجتي عمتي انصاف وبنتها وسميره واجتي سعاد ورحمه وزوجة ابنها كانت حامل وعمتي سعاد الي تباوعلي واحس بعيونها شماته

محد فتحت موضوع وياي والكل مترقب لمن ما اجت عمه رجاء وفرح اجن متمكيجات ومبدلات ورجاء بس شافت عماتي صارت تهلهل وتهوس بيبي كالت

شني ما اجت نهاد وبتها

لا عمه اجن

جا وينهن

فرح //. بيبي خاله تگول ساره تبقى ابيت ابوها

بيبي // ها شعجب ؟

رجاء // شني عمه شعجب بيت ابوها جا وين تردينها تجي

اهنا البيت جدها

مهدي ما قبل

ههههههه مهدي اليوم ما قبل احلف دونه مهدي ما يگول بس هاي افلام نهاد

محد رد على بيبي بعدها بساعه راحن عماتي واني رحت وياهن وحتى بيبي هم اجت

ساره طالعه حلوه كلش حتى بيبي گالت //. هاي سويره لو اشوفها بالشارع ما اعرفها شطالعه تخبل

الكل ضحك وبعدها كالو السيد يريد يعقد گلبي انقبض

واني اشوف ساره شگد فرحانه لمن ما دخل بهاء الي كان لابس قاط اسود دخل وصارت عيني بعينه والسيد ايگللهم

موفقين والف مبروك واجه بهاء وسط الهلاهل وباس بيبي براسها وايدها ويا عمو عاصف وعمو مهدي الي خزرني

شفته وهو يلبسها الحلقه ويقطع الكيكه ويوكلها وهي هماتين شفت الفرحه بعيونها خصوصا من باسها بخدها

شفت بعيونها فرحه كبيره لكن اعيونه البهاء كان بيها الف سوال وسؤال

الكل راح واتبارك الهم عماتي فرحتهن كبيره البهاء الي يبوسن ساره ويبوسنه هو اكثر من ساره

وصلت يمهم بست ساره واني ابتسم = الف مبروك حبيبتي تتهنون

غابت ضحكتها وجاوبتني ابرود // شكرا

عمه امل كلتلها //ساره گليلها يوم الالج

نهاد // لا خيه ما انكللها هي ما تريد تتزوج

وصلت يم بهاء = مبروك بهاء تتهنى

بدون حتى ما يباوع الوجهي // الله يبارك بيج

رجعت المكاني وصار يسولف ويه عمه امل ايشاورها وتشاوره وما يخلو من نظراته

وبعدها طلع وشغلت هاجر دي جي وصار الركص والصفكه الكل فرحان وسعيد اله اني كاعده بالزاويه لكن

احاول ان اكون طبيعيه وصار الكل يركص ويصفك واجتي عمه سعاد كومتني حتى اركص لكن اني هزيت راسي

بمعناة ما اعرف

بيبي باوعتلي وصفكت بايدها يعني صفكي وصرت اصفك بهدوءي المعتاد وابتسم واعرف باان اني انسانه غير مرغوب

بيه ابيت مهدي وتقريبا ساعه ونص وكل شي خلص واجه مهدي وبهاء سلمو على عماتي بهاء باس عماتي كل وحده براسها

وبعدها بيبي كالت // ياالله جده تعاي خلي نروح للبيت

انطتني ايدها حتى نروح عمو مهدي // وين رايحه يمه ابقي اهنا

- - لا يابعد امك اروح اتمدد ارتاح ياالله جده

نهاد //. شني عمه مو هاي كلنه اهنا ابقي اتعشي ويانه وباتي شعدج

عمي مهدي بدون نفس حاجاني // روحي انتي امي اليوم تظل اتبات يمنا

حسيت بي طردني والكل سكت عفت بيبي وبدون ما احچي ولا كلمه رجعت للبيت دمعتي بطرف عيني خصوصا ومحد

حچى ويه مهدي او اني ما سمعت شنو ردو علي

دخلت للغرفه واهنا اني انهاريت بالبجي صرت اناشغ وجهي صار نار بعدها مسحت دموعي وطلعت تراك لبسته

ورحت اتوضيت اريد اصلي

اجت عمه امل وگالت // شني زعلتي من عمج مهدي

ما جاوبتها هي ردت // هو هيج ما يعرف شلون يذب حجايته

اكتفييت اهز راسي واني احجي ويه نفسي بعتب = كان المفروض بيبي وبهاء يسكتونه ويوگفونه عد حده لكن سكتو

طبعا مهدي يصير ابنها ويصير ابو ساره مرت بهاء

صليت عادي وعمه امل صلت بينما عمتي سعاد وانصاف وبناتهم بقن ابيت مهدي من كملت عمتي صلاة كالت لي

- - ياالله امشينه

= وين ؟

- - شني وين البيت مهدي نتعشى وانتي تبقيين هناك

راسا جاوبت = لا ما اروح

- - شني ما ترحين كلنه معزومين

هزيت راسي = اي كلكم اله انا

- - شلج بهالحجي هذا شو ياالله امشي وما عليج

= عمه انتي سمعتي وشفتي واني ما اروح

تستمر القصة أدناه

عمه باصرار //لا ترحين

= وروح ابويه اني باقيه ايهنا

— عود ليش هالعناد

=مو عناد بس مو حلوه هو طردني واني ارجع للبيت تدرين عمه من اجيت لهنا ما داخله بيته ولا شايفته

امل باستغراب //. ابد ابد

= ابد اليوم اول مره اشوفه وادخله

امل نفخت // عمه بهاي سوايتج يجوز عاصف يتعارك ويه مهدي

= لا تكلوله

- - والا نشد

= ما ينشد عمه ما ينشد لان اساسا ما يجي يم النسوان

- - ولج مو احنه اخواته شني نسوان تياالله امشي ولا تعاندين

هزيت راسي = ما اروح البيت مهدي لو شنو يصير

- - شكد عنوديه الخاطر الله

اتقربت منها = عمه انتي روحي

- - يا واخليج الوحدج

= شكو عليه اشو هذا الباب بالباب روحي عمه لا تربطين نفسج بيه

- - وشتتعشين ؟

ابتسمت = هههه هاي الثلاجه مليانه اكول اي شي

طلعت من الغرفه ورجعت عاتبتني // ليش عمه چا هسه هاي فرحتج

دنگت بدون ما اجاوب سمعنا حركه من يم الحديقه البرانيه وگفت وعمه گالت ياهو هذا

انا عمه

هلا بيك شجابك

اجيت اشوف هاي

رووح عمه لا تسويلنه مشكله

مشكلتيش بيتي وجايله

بهاء عمه استهدى بالرحمن

وكفت اريد اروح الغرفة بيبي هو لزم ايدي قوي رجفت وگلبي صار يدك حاولت افرغها منه // ليش ولج ليش كسرتيني

جاي احرك بايدي والم بحلگي من الخوف امل حجت // عمه بهاء عوفها

اتنفس وهو يعض بشفته // الله لا يوفقح حطمتيني

عاف ايدي دخلت الغرفتي وهو يتوعدني // لو تطيرين ما تصيرين اله الي

امل // شني هالحجي هذا

- - وداعتج حتى من شاورت ساره كتلها انتي مرتي وتاج راسي بس هاي اخذها واكسر عينها

امل //. افه عليك عمه ليش تكرهها قسمه وما صارت

  - - - اي اكرهها اكرهها بكد ما اكره روحي عمه اريد اموت

- - اسم الله عليك استهدي بالرحمن وروح اطلع لحد يشوفك روح عمه تره بت عمك خطيه صاير وياها شي وما تريد اتكوله

وساره هم خطيه لا تكسر باسها

بهاء بقهر // وانا عمه انا مو خطيه

  امل // لا مو خطيه رجال تاخذ وحده واثين واربعه وتطلع وتتونس گول ياالله وروح هسه ما شفت مهدي شلون متحمل عليها

بهاء // هذا خابص روحه ع الخالي بلاش

رن تلفونه جاوب // الو هلاعمي

طلعت شويه للبستان

لا انا جاي قريب على بيتي

جاي جاي

هذا مهدي

امل // سمعته يرعد لازم نهاد گالتله ابن اخوك طلع لو لحگها روح عمه واستر علينه

راح من الباب الخلفي وامل دخلت يمي //. هسه احسنلج الولد اليموت عليج صار عدو الج

اجت رجاء // شني امل ليش اجيتي اهنا

اجيت اصلي

ها

اي واجيت اطيب خاطر وجدان واجيبها البيت عمها بس هي ما رضت

تره ما حچى شي مهدي

لا خيه حچى كلنه سمعنا

اي حگه شايل من بت اخو ايگول صلفه

شني صلافيتها بنيه ما رادت تاخذلها رجل وگالت ما اريد

جا ليش قشمرت علينه من الاول

امل // ام بهاء خيه تره كلنه موجودين وندري انتي ما تردينها وتردين بت اختج وهل اخذها الله يهنيهم ويسعدهم

آميين ياالله تعاي

اي خلي اشوفها

ما عليها شي عود انجيب الها عشا ويانه من نجي

اجتني عمه امل وهي اتگلي // ما احچي سمعتي باذنج انا راح اروح ديري بالج على روحج

كان كلام بهاء ودعاءه عليه وتوعده مو بس خلاني ابجي لا واخاف اخاف اكثر من الخوف الي مريت بي لان اعرف المستقبل

راح يكون عليه قاسي

وراحت عمه امل الي كلتلي ما اتاخر عليج بقيت بفراشي وكل حركه اسمعها ارتعش منها

بقيت بفراشي ما كعدت الى ان سمعت صوت عماتي انصاف وامل الي گالت // شني بعدج بفراشج ما گعدتي

دخلت عمتي انصاف وهي شايله صينيه بيها تمن ولحم وروبه وخبز وخضره وهي اتكلي

   اكعدي اتعشي حبوبتج ودته الج

هزيت راسي

اكعدي اكعدي لاتهزين راسج

ما اشتهي

امل //. عمه انتي حتى الظهر ما اتغديتي اكعدي اكليلج لكمه

لملمت حلكي واتنفست بعمق جاوبتني امل // ليش ما تاكلين خيبه على مود النسوان ايگولن شبيها غيرانه وتتعاير وحاسده بت عمها

انصاف // تكعدي اكلي تره مو عبالج هذا العشا من مهدي لا مهدي لو بيده يجيب النه طماطه فطيره وخبزه هذا العشا من عاصف

جاوبتها بتعب // عمه ما احب اكول لحم وتمن بالليل

امل // ها خوش ما دامج ما تاكلين لحم وتمن خلي اضمه ونسويلنه جاي وشوفي شتردين تاكلين اكلي

انصاف انا راح اتوضا واصلي وانتي سويلنه جاي

جا ما صليتي ابيت مهدي

غير التهييت اصب العشا ويه رجاء

راحت عمتي انصاف تتوضا وعمتي امل فاتت للمطبخ غابت شويه واجت جايبه قوري جاي وخبز وصحن بيض وصحن جبن

رحت جبت كوابه للجاي ورجعت عمه امل گالت

- - من گد خباثتها حتى ما انطت كيكه الوجدان

انصاف // اي شفتها ومن انتي حچيتي نبت بلسان الشطوله چا هي خطاره هي راعية بيت تفوت وتاكل

اگلج انصاف انتي هم مثلي ما اشتهيتي تاكلين

هزت ايدها // اي ما شفتيني سويت حجتي شبعت من الصب

تياالله خلي ناكل ويه وجدان اكلي عمه

اخذت خبزه وبيها شويه بيض واكلتها مجامله وهنه يسولفن

انصاف // تره امي زعلت على مهدي بس ما رادت اتطولها وتصير صيحه

اگلج هو مهدي شبعدله عود ما ندري الشد والربط بيد نهوده

اي اذا گال (عوجت حلكها ) نهوته مو نهوده نهوته عبالك تريد اتدخله للجنه

غير امي هاي

لا مو امي رجاء رجاء هي دنتها

كملنه عشا وعماتي يسولفن لمن ما سمعت بيبي وفرح اجن امل كالت // ها يمه چا ما بتي ابيت ابنج

ما ارتاح ابات اله ابيتي

هله بيج

اتمددت ع الجربايه بعد ان خلت عبايتها على صفحه انصاف سالتها // يمه وين سعاد

ظلت اتسولف ويه نسوان اخوتها

اتبات هناك

اي تبات

اگلج هي چنتها حامل

اي اظنها توها حامل

امل // هي منين تحبل يوميه زعلانه عد اهلها

بيبي // تعشيتن

اي يمه اكلنه الحمد لله وانتي

اكلتلي لگمه انتي وين وديتي الصينيه

ضميتها بالثلاجه باچر غدا

جا شكلتن

سوينه بيض وجبن وشربنا جاي

بالعافيه

الله يعافيج يمه شعجب اجيتي اشوف مهدي كاض بيج

متعلممه على حجرتي ويمي ابنيتي

انصاف // ياهي وجدان ؟

اي وجدان بنيتي مداريتني مثل الماي البصينيه

بس شلفايده بساع ما خربت وما ندري ليش

يمه كلمن ياكل قسمته

على گولتلج الله يهنيهم سويره خوش بنيه وتستاهل بهاء

اي خوش بنيه

وهم كالو يمته يتباركون

اي. رجاء تكول كل شي ما يرادله بيومنا كل شي نشتري

ها ومهدي

مهدي ابده اليوم ياخذها خاف بهاء يبطل

امل // يممه

  بيبي // شني مجذبه. هو ومرته يگولون لو هسه. يريد ايعرس خل ياخذها ما بيناتنا احنه اهل واليثكل علي ايخف علينه

ها

اي ما يطول يجوز اسبوعين عشر تيام

الله يهنيهم

ويوم الاحد داومت كان عمو عاصف ياخذني الصبح ويرجع عليه الظهر واذ يكون عنده شغل يخابر السايق ارجع ويه الخط ومن انزل داىما كانت تلاگيني سميره وجهالها وكنت من اركب بالسياره اوصل للدوام وارجع واحنه ساكتين

تقريبا الكل ابتعد عني بهالفتره يعني الجميع ملتهي يحضرون العرس بهاء

صرت اتحاشى بهاء ومن يجي على بيبي اني اطلع اروح الغرفة عمي عاصف اقرا او اروح للمطبخ اسويلي شغل

يعني خصم الكلام اني اتحاشى بهاءومن يجون بيت مهدي صارت بيبي تطلع تكعد بالهول يمهم

بهاء من يجي يسلم ويصعد فووك ونهاد ورجاء يگولن الساره //. فوتي اصعدي يم رجلج شوفي خاف يحتاج شي

ورجاء تكلها //. اغسلي هدومه بالغساله الفوك

ساره راسا تصعد تبقى ساعه اكثر وينزل بهاء وهي ورا بفتره تنزل تسالها رجاء // ها خاله غسلتي ملابسه

ساره // اي وكربني انظف غرفته

   بهاء اعرف ايسمعني //. شسويلج تجيين يمي غير اشغلج

   بيبي //. عاد دااستحو احنه كاعدين

بهاء //. منين نستحي جده امريتي وتجي يمي

بيبي //. الله يهنيكم كل شي مكملين عرسو شمتانيين

بهاء //. ان شاالله عن قريب

مهدي من يوم الخطبه ما حجى وياي عاصف ملتهي بالشغل وتقريبا الكل عنده اموره الخاصه الي يريد ايكملها

حتى بيبي مو مثل قبل مهتمه بيه اصلا حتى كلامها وياي قليل

اخذني عمي للمدرسه وبالطريق هو ايدخن سالته

=عمو هم رايح الهشام هاي الايام

نفخ الدخان وكلي :: اي قبل اسبوع ليش

= لان صار اكثر من شهر ما حاجي ويايه بالتلفون

:: اكيد ما يكدر

= ليش ما يكدر

:: هاي الامور انتي ما تعرفينها اكيد بس يحصل فرصه راح يتصل

الكل هالايام يحضر الزواج بهاء اله اني منزويه وما اتدخل بااي شي وحتى محد يحجي وياي وقبل يوم ساره سوت حنه وحتى الرياجيل ما تتصورون شكد شباب اجوي للحنه طبعا شفتهم من رحت البيت مهدي لان البيت خالي فبيبي ما قبلت ابقى ابحدي

  بيومها لبست فستان لونه فستقي وبي ورده بيضه جابه عمو عاصف الي من فكييت حزني

بيوم العرس اجتي خاله شيماء وام كرار رغم حزينات وعمه امل جابتي فستان حلو يخبل وراقي كلش

   لونه احمر ويا حذاء كلتلي اتبدلين وتسوين شعرج وتفرحين حالج حال الناس لكن اني جاوبتها

عمه اني ما اكدر افرح لان اني ...

حضنتني // لاتبجيين حبوبتج امج وهشام اول وتالي يطلع وعلاوي بي البركه انتي لازم شويه اتفكيين عن نفسج

انا اتعمدت اجيبلج هذا الفستان وهذا اللون لان ايلوكلج ولان هم شويه اسودن نهاد وبتها

ابتسمت وعمه ضحكت وكالت //. عليمن انسودنهن اخذن بهاء الي ما جان يشوفهن بعينه

وصار العرس ولبست الفستان وسشورت شعري واجن شكد نساء وبنات والكل يبارك البيبي وكلهن ايكولن

صدك هاي الفرحه الجبيره

ما اسولف الكم على الذبايح الي انذبحن بعدين عرفت كل الذبايح وامور العرس من عمو عاصف

وزفو بهاء بالسيارات والكل اجه وراحت بيبي هي طلعت ساره وسلمتها بايد بهاء وركبت بيبي بالصدر واحنه البنات

جابولنه سياره كوستر ركبنا بيها عمه رجاء ونهاد بسيارة مهدي

وعماتي ويه ولدهم بس عمه امل ركبت ويانه وكعدتني يمها

حلوه اجواء الزفه ومن نزلو للبيت صارت الهلاهل والهوسات الجنوبيه واني اشوف بهاء شلون يدور عليه بعينه

بيبي لازمه العكازه وتهوس بيها وعماتي خلنه بالوسطه ويهوسله واني ابتسم واصفك وهو ما نزل عينه من عليه

ونهاد جابت ساره خلتها يمه لازم ايدها ويركصون وشاور عمه امل الي دفعته بشقى وهي عاضه على شفتها

  راح بهاء هو وعروسته البيته الي بصف بيتنا وبيومها شفت التمني والقهر بوجه بيبي وعمه امل وبيبي تصفك بيدها

امل //. يمه شبيج

ما ردتله بت نهاد بس شبيدي شبيدي

قسمه يمه

ياحيف بهاء ما ردتله هيج مره مو بيها شي لاسامح الله بس ما ردتها لان امها نهاد

الله يهنيهم

شگايله انا مهنايين

الصبح راحت بيبي وعماتي امل وانصاف لان سعاد باتت عد بيت مهدي راحن حتى يشوبشن العروس واصرن اروح وياهن

ورحت كان البيت حلو والاثاث بعد احلى وطلع بهاء وهو لابس دشداشه بيضه ايرحب بينه وباس بيبي وعماتي الي هلهلن

واني سلمت علي وگتله

مبروك بهاء الله يهنيكم

جاوبني بحده يخزر بيه // الله يبارك بيج بت عمي واشوف شهادتج الي تحلمين بيها ماخذتها وفرحانه بيها

بقيت ساكته عمه انصاف //. كليله بوجودك

هزلي راسه وهو يعض بشفته حاولت اتحاشى نظراته خصوصا وشفت بعيون ساره نظرة كره وغيره

بيبي //. ان شاالله يوم الولد جده وانتي ساره ديري بالج على بهاء وداري تره هذا ابن الغالي

ساره تباوعلي // بعيني جده شعدي غيره

رجاء// اتداري شعدها غيره ابن عمها وابن خالتها احجي كون الله يكافيها الشر ويفكنا من الناس التكرهنا وحاقده علينه

نهاد وهي تباوعلي //. اي والله الله يفكنا من الحيايه السايبات

///////////////////////

شكرا لزيارتكم عالم روايات سكيرهوم