رواية فصلية الضابط الفصل السادس والثلاثون 36 بقلم زينب نور

........... لما فديوم بليل ڪاعده وحسومي يمي يلعب وأحضر شنو البس باجر العيد ميلاده صار عمره سنتين وفرحانين بي اتصل عليه رقم ما جاوبته

رجع يتصل مره ومرتين صار عندي فضول افتح خط واعرف منو هذا المتصل 

فتحت خط وبقيت ساكته منتظره الطرف الثاني يحجي بألاول بس ساكت 

اسمع صوت اناشيد للحشد الشعبي بعيده شويه وحركه 

ندى:- الو...... الو

اجاني صوت ماميزته بالبدايه بس اسمع هوسه يمه اصوات ما كدرت اميزها 

ردت اسد الخط 

گالي:- شوكت اتحنين عليه مو تعبت كافي عاد بنص الموت وروحي اتريدج 

   من عرفته فز گلبي بسرعه سديت الخط وشمرت الموبايل بعيد عني هذا صوت وارث 

وبقيت واكفه اباوع على الجهاز يرن 

رجع يتصل مره ومرتين ما جاوبته 

حفظت رقمه من كد ما اتصل سويت جهازي صامت وعفته

ما انكر رجع بيه ذاك الشوگ القاتل الجان مدفون ابداخلي اله بس كابرت وقويت نفسي بس ارجع احجي ويا بعد ما اكدر اسحب نفسي واني اعرف اهلي مستحيل يرجعوني اله

ضليت اضغط على نفسي واحاول اتناساه 

وهو مابطل كل يوم يتصل لما يمل ما اجاوب 

ايدز رسائل امسحهن بدون ما اقرا اعرف بنفسي اذا اقراهن ارجع احن اكثر اله ومحد يتعذب غيري بس مراقبته واشوف اخباره كل يوم من خلال منشوراته على الفيس بوك واعرف كلشي عنه بس بغير حساب متابعته القديم حذفته وعرفت هو حالياً بالموصل ايقاتل واشوف صوره شكله حيل تعبان مبين علي صاير اسمر وضعفان كل مره من اشوفه ابجي لما امل واعرف شوكت موعد نزوله وشوكت يلتحق اكثر ايامه بالقتال 

ورا فتره شفت منشورات اله جديده قبل يومين فديوهات وصور گلبي عصرني اختنكت مركزه بالصور واعيد بيهن كاعده اشوف زفة عرس وهو كاعد بيها كاشخ كشخت عريس وفرحان ويا اصدقائه ومحمد يهوسون على انشوده للحشد الشعبي 

رجفت اديا ولضغط صعد الراسي تخبلت 

دخلت على التعليقات كولها معلقه اله يدزوله تهاني ويتباركوله 

احس اعيوني جمرن بس اريد ابجي ما اكدر العبره خانكتني بس ما تنزل ادوع شعور يذبح 

موت بطيئ 

احس ريگي نشف

احاول ابجي حتى ارتاح 

اعيوني ميساعدني 

ما نمت ذيج اليله لصبح افتر حالي حال التطلگ ولحد ثاني يوم العصر بعد ما اكدر تعبت اعصابي خلص حيلي احتاجيت اروح يم أمي اريد ابجي اريد انهار اهناك يمهم

رحت دخلت على ابويه بغرفته دخلت يمه أول ما شافني 

سألني بأهتمام:- شبيج بويه يوجعج شي 

ليش وجهج اصفر شفايفج بيض

كتله بصوت يرجف

:-اريد اروح الأمي اريد ازورها هي وحسام مشتاقه ازورهم 

:- خوفتيني بويه سهله باجر اخذج تدللين

                                            

              

                    

:- لا بويه هسه اريد اروح خلي وسام ياخذني فدوه العمرك 

:- بويه تخبلتي شسالفه بعد ساعتين أيصير ليل مايصير باجر الصبح اني اخذج بايدي 

احس العبره ملخت بلعومي بس ما اكدر أبجي ولا اكدر احجي رجعت الغرفتي ذبيت نفسي على السرير عضيت المخده املخ بيها واصرخ 

شويه ونفتح الباب دخل ابويه 

متفاجئ بيه ليش هيج حالي 

:- شبيج بويه اصاير وياج كوليلي

:- ما صاير يابه كلشي ما صاير بس اريد اروح الأمي وحسام

اشوفه ايباوعلي وحاير يستغفرالله ورجع 

گالي:- كومي بويه كومي حضري نفسج وطلع 

سمعته صاح على وسام وگاله يوديني للنجف ازورهم وسام قبل ماكال شي ولا اعترض كال ماعندي شي يله 

الحمدالله كمت ابسرعه لبست جواريبي وعبايتي وطلعت لكيت تقي موجود يم وسام وگال الوسام اني همين اروح وياكم وطلعنه سوه

لما دخلنه اللمقابر صاير الغروب يخنك وهدوء المكان اله رهبه بس ماخفت اريد بس اوصلهم وسام وتقي يمشون كدامي وأني وراهم وابجي بصوت مسموع 

وصلتلهم واحس اعيوني اجاها الفرج بجيت ادموع لحد ما صفه مي راسي انهاريت ملخت روحي الطم عبالك هسه ماتو كدامي وسام لازمني ويصيح عليه

:- ولج شبيج ندى تخبلتي راح يصير ثلاث سنوات من ماتو 

كافي يله كومي راح تتخبلين 

يسحب بيه اكوم 

وتقي واكف قريب مني شفته يلوج عليه وعيونه مليانات دموع ومكسور خاطره عليه 

كوه كومني امشي بلا روح ادموعي تنزل واني ساكته ماشوف الطريق لازمه وسام من ايده وذابه ثكلي علي 

وتقي ركض قبلنه اشترى ماي جابليا انطا الوسام غسل وجهي وشربني من عنده

صعدنه السياره وتوجهنه لأميرالمؤمنين علي ( ع ) زرنا وطلعنه بسرعه 

رجعنه الكربلاء سكنت حمل ونزاح عن گلبي من بجيت ارتاحيت

اسمع سوالف وسام وتقي طول الطريق بس لفت انتباهي كلام تقي من ايكول الوسام 

تقي:- مابقه شي أجانه أمر بعد ثلاث ايام ونلتحق للموصل ان شاء الله 

وسام :- تقي لا تستعجل عندك وضيفتك وراتبك خير من الله شموازيك رايح للموت 

تقي:- لا يخوي الموت بكل مكان واني قررت وحسمت أمري وسجلت ويا جماعتي بسرايا علي الأكبر وبعدين شمحلاها من ينكتب قبل اسمي الشهيد

ما انكر خفت علي الدم ايحن وشمهما يكون ابن عمي وكبرنا سوه ابيت واحد 

واني اسمع الوضع كلش خطر ايخوف بهاي الفتره كل يوم نسمع بواحد جايبينه شهيد ولفواتح بكل بيت منصوب العزه ولجنايز اشوفها اتجر للنجف بنفس الدقيقه باوعت من الجامه شفت أجنازه من ابطال الحشد الشعبي 

ما اعىف ليش اتهيألي انو هذا تقي انعصر گلبي وفزيت

وبدون تفكير تلقائياً طلعت من عندي كتله

ندى :- لا متروح مو بكيفك 

            

              

                    

سكتو اثنينهم 

واشوف وسام ايباوعلي متفاجئ بردت فعلي استحيت نزلت راسي الوم بنفسي هسه اني شحجاني 

انتبهت للمرايه الجانبيه شفت تقي مايل راسه ايباوعلي وعيونه فاضحته وبوجه ابتسامه رغم الدنيه ليل بس مبين كلش واضح

بهاي الحضه اجتني فكره انو انتقم من وارث والا اقبل بـ تقي اعناد بي وهم اازم انطي نفسي فرصه ويا تقي حتى شكو شي بداخلي الوارث يموت

اول ما وصلنه نزلت دخلت للبيت حيل تعبانه والافكار هلكتني طول الطريق

بس سبحت دخلت الغرفتي نمت بسرعه ما فزيت اله ثاني يوم الصبح بـ 9 كعدت مرتاحه نفسيتي متعدله والفكره ابراسي بعدها 

للعصر فتحت موبايلي وبحثت عن صفحة تقي بالفيس ودخلت على صفحته وبدون تفكير حسمت أمري وراسلته كتبتله

- مرحبا تقي، 

تأخر ماجاوب بسرعه ضليت انتظره ايشوف المحادثه 

شويه ودخل شافها رد عليه برساله

تقي:- العفو منو وياي ؟ 

ندى:- بنت عمك 

تقي:- معقوله بنت عمي  

ندى:- اي 

تقي:- واني اكول ليش اليوم منور الماسنجر  

ندى:- شكرا من نورك 

تقي:- اشلونج البارحه ضليت قلق عليج بس ما كدرت اسئل وسام كلت خاف يكفخني 

ندى:- زينه الحمدالله لا ليضل بالك عليه مابيه شي

تقي :- شعجب راسلتيني مو من عوايدج الصراحه فاجئتيني واني بعدني ما صاحي من صدمة البارحه من سمعتج متقبلين اروح للموصل يعني معقوله ندى اتخافين عليه؟ 

اترددت اكوله بالبدايه خجلت بس قويت نفسي وكتبتله 

ندى:- اكيد ترا الدم يتحرك وانت ابن عمي موغريب موشي عجيب اذا خفت عليك 

تقي:- تضمَيني بحَضن گلبج 

ابتسمت على هاي الجمله الكتبها وكلت يستاهلني اكثر من وارث غمضت اعيوني وجبرت نفسي وكتبتله 

ندى:- اني موافقه 

تقي:- على شنو ؟ ندى ما مستوعب ترا 

ندى:- اذا بعدك اتريد تتزوجني  

تقي:- كولي والله مرتين 

مستحيل ما اصدك تشاقين وياي اكيد

ابتسمت على سوالفه كتبتله 

ندى :- والله شبيك

اشو هذا طلع من المحادثه كولها وبعد ما رد عليه انتظرته ما رد عفته وكمت اسوي عشا واني افكر اكول خاف طابت نفسه مني وتراجع

كوه كدرت اكمل العشا مالي خلك وزهور يمي اتسولف وياي بس بالي مويمها حست عليه مو طبيعيه سئلتني شنو بيه سولفتله انو اني هاهيه وافقت على تقي اتزوجه 

شو هاي فرحت وتمدح بتقي عبالك ما اعرفه 

كمت اضحك 

:- شبيج زهور ترا ابن عمي موغريب وتمدحينه الي 

ضحكت وغمتي 

:- موصوجج لا والله عود اسويلج واهس يالغمه 

ضحكتني بسوالفها وتصنيفها على ام تقي شلون من تعرف موافقه وهي معارضه انو تقي يتزوجني

بس اتعشينا وبعدني اسوي چاي وزهور تغسل بالمواعين سمعنى صوت سيارات بالباب اتدك هورنات 

طلع وسام ايشوف منو 

باوعت من الشباك شفت سيارة تقي وسيارة هشام وسيارة عمو ابو حازم وعائلته ويا

نزلو اباوع التقي الضحكه شاكه حلكه وحازم نزل ويا هشام يهوسون وفرحانين

            

              

                    

ـ خطابه خطابه جيناكم خطابه 

وينك يابو وسيم تحل النه الطلابه، 

دخلو للبيت بهوستهم وياهم عمو ابو حازم يضحك ويا ام حازم ولبنات ويا بس عمو ابو هشام ما جاي لا هو ولا عائلته بس هشام جاي ركضت الغرفتي خجلت عرفت تقي ليش بسرعه خرج من المحادثه راح يفزع يجيبهم

شويه وسمعت صوت عمتي ام زهور دخلت تهلهل هم اجو هي ولبنات زمرده وياقوته واخوهن هيثم 

اجن يمي للغرفه البنات زهور واخواتها ومرت حازم وهيفاء دخلن يضحكن ويصفكن ويهلهلن 

اضحك عليهن 

:- هاي شبيجن على شنو هلكد فرحانات هو حتى امه وابو ما جاين ولا فرحانين مثلكم انتو وين وجهكم

زهور:- فرحانين الج يالعوبه انريدلج الخير تقي ما يتعوض ويحبج 

وبعدين حتى اذا ما اجو اهله احنا مو غرب هم اهله 

وسحبتني من ايدي 

:- شو كومي عدلي جهرتج والبسيلج شي حلو مرتب حتى تطلعين ويانه يمهم واني راح اسوي چاي وارجعلجن 

:- شبيج زهور تخبلتي ما اطلع شكو طالعه ما شايفيني شنو

باوعت للبنات كالتلهن 

:- انتن استلمنها اني رايحه 

هي طلعت ولبنات فتحن الكنتور يطلعلي شي البسه من ملابسي شافن ملابس كولها لون اسود ما مشتريه الوان ابد بعدني حزينه على امي وحسام 

كالن انزعي الاسود ما قبلت لحن عليه ما سمعت الهم كمت اني طلعت فستان اسود طويل امرتب لبسته وما قبلت اخلي شي الوجهي بس رشيت عطر 

سمعنى صوت عمتي وم زهور تصيح وينج ندى تعالي عمه لا تستحين اهلج احنا مو غربه وعمه ام حازم وياها تصيح وينجن بنات جيبنها وتعالن هنا 

طلعت ويا البنات مارفعت راسي كلش خجلانه من عدهم

بس سلمت:- مساء الخير 

اسمعهم كلهم ردو السلام ويشاقون الولد ايقلدون عليه اشلون خجلانه منهم 

صاحني عمو ابو حازم كالي تعالي اهنا يمي دفع تقي من يمه وهو يضحك يكوله 

:- كوم ولك سوي مكان الاميرتنا

كام تقي وهو يضحك كعد يم وسام وحازم واني كعدت بمكانه 

بس كلش خجلانه احس الانضار كولها مركزه عليه

طلبو ايدي من ابويه واني كاعده ابينهم وابويه اشوفه فرحان 

الكل فرحان ماعدا اني امثل الفرح والابتسامه كلشي جان مجامله ابد مو من گلبي 

الكل اتبارك الي ولتقي وعمو كال الابويه عن عدم وجود اهل تقي وضح انو ما قابلين يتزوجني 

وكال اني عليه كل تكاليف العقد ولحفله 

وقرر بعد باجر يكون عقد القران ولحفله 

انصدمت شنو ليش بهل سرعه لمت نفسي احس نفسي اتسرعت واني ما مستعده اخطي هيج خطوه ويا تقي 

وخلصت ذيج اليله ويا البنات بقن يمي سهرانين الحد الصبح زمرده وياقوته وهيفاء فرحانات ويخططن شنو ايلبسن وشنو ايسون بالحفله وخابرت تبارك وضحى ما مصدكات فرحانات الي وكالن نجي بيوم العقد ما نلحك بس باجر نجهز انفسنه ونشتري فساتين 

            

              

                    

ولبنات ايجبرني اندمج وياهن بالسوالف وگلتلهن ما البس بدله وصالون شي أوفر اريد شي بسيط 

ما قبلن يحجن عليه ويقنعن بيه بس ما اهتميت اني عاجبني هيج 

اصريت على ذوقي بس نزعت الاسود ثاني يوم واخذتني زهور لصالون حفيت وجهي وشمرتلي حاجبي وسوتلي تنظيف للبشره

اذكرت لمن حفيت اول مره من رحت فصليه الوارث انعصر گلبي ورجع ذاك الشعور المخيف لكيت نفسي أبجي وزهور تحجي عليه على شنو ابجي 

ماتدري شنو ابداخلي وشنو احس 

كعدت اعاتب واندب بحظي ليش هاي مرتين انجبر ومو بأرادتي ارتبط بشخص اليريده گلبي

ليش كلشي عكس وياي ما كاعده احس بطعم الفرح كاره هالشعور يخنكني كوه متحمله الوضع

اجه يوم العقد رحت لصالون خليت مكياج بسيط وشعري سوتليا تسريحه بسيطه جان كلش طويل ولونه تمري برمته على طوله ويا الفستان اختاريته لون ماروني باوعت النفسي طالعه حلوه ما ادري ليش اجه ابالي وارث وتمنيت ايشوفني بهل منظر واتمنيت يكون هو بمكان تقي 

فزيت من صفنتي على صوت الهورنات مال السياره طردت الافكار من راسي 

ورجعت الواقعي 

اجانه وسام ياخذنه 

رجعنه للبيت اني وهيفاء وياقوته 

هم اتمكيجن وياي بالصالون 

رجعنه للبيت لاكني تبارك وضحى من الباب ايهلهلن ويبوسن بيه يتباركلي ما اتحملت بجيت وهن يحجن عليه مايصير ابجي خاف يخرب مكياجي دخلني لصاله اتفاجئت بوجود اهل تقي جاين بس ايباوعن عليه من بعيد ما اتقربلي ولا اتباركلي 

مبين الحقد بعيونهم امه واخواته 

كلت بگلبي هاي هيه مبينه من هسه شلون حياة سعيده راح اعيشها وياكم

ولبنات طرشني بصوت الهلاهل ولرگص زهور وهيفاء وياقوته وزمرده وتبارك يدبجن ويهوسن 

وضحى واكفه يمي تصفك اشوفهن هن الفرحانات مو اني هن مسوياتلي واهس اكمل الحفله للأخير

شويه ودخل وسام صاح سوو مجال راح يدخل الشيخ 

اجتني تبارك وضحى لبسني البرنص غطيت وجهي زين  

اختنكت نزلن ادموعي اريد اتراجع اريد ابطل اريد اكول الهم ماا ريد بس ما اكدر يوكف اكبال عيني تقي وحبه الي ما اخرب فرحته 

دخل الشيخ ويا عمو ابو حازم واكف 

سمعت الشيخ ردد الكلمات وسئلني

:- قطر الندى احمد هل تقبلين بـتقي محمد زوجاً لكِ على المهر المعلوم كذاوكذا 

أتذكرت عقدي على وارث هم جان مو بأرادتي ومجبوره 

انرسمت صورته وهو عريس وبالزفه فرحان 

غمضت عيوني وبسرعه گوتله 

:- نعم وانت وكيلي 

ودموعي نزلن ويا الكلمه 

اتباركلي وطلع ويا عمو 

ولهلاهل سطرني بيها عبالك صريخ ابراسي 

شويه وكالو هذا تقي رفعت راسي شفته دخل والابتسامه على وجه وبس مركز بيه وكأنما ماكو احد غيري بكل هل هوسه 

بس لبنات لزمنه يهوسن ويا واشوفه بنصهن يرگص وياهن وعينه عليه يضحك ما مصدك 

قرب عليه رفع راسي و باسني بگصتي وخدي 

گزبر جلدي 

همس بأذني :- واخيراً صرتي حلالي خاف ان بحلم معقوله نداوي صارت بأسمي ومرتي شرعاً

            

              

                    

خجلت من عنده نزلت راسي 

كارهه نفسي راح ما اريد اظلم تقي وياي ما يستاهل واني ما استاهله لان گلبي يم غيره

كملت مراسيم العقد ولحفله طلع تقي ولكل بدت تروح و أول ما طلعو گمت الغرفتي دخلت ولهوسه بعدها بالصاله 

نزعت فستاني ومسحت مكياجي ونمت بسرعه ماحسيت على نفسي شوكت غفيت من التعب 

لما گعدت مالكيت احد باقي الكل رايح ولبنات بعدهن كاعدات ويحجن عليه شلون هيج اسوي اعوف العالم بعدها نصها موجوده وانام 

وعيب من العالم والناس راح اتكول مجبوره، 

انزعجت كلش اصلاً روحي ما طايقتها 

كلتلهن

:- اييي مجبوره شتردون مني عوفوني عاد اختنكت 

عفتهم ورجعت الغرفتي 

فتحت جهازي يبووو محترك من الاتصالات ولرسائل من ارقام غريبه

واحد. من الارقام عرفته التقي من خلال الرسائل الدازها الي 

ولثاني عرفته الوارث من التهديدات الدازها

يعني يعرف اليوم عقدنه اني وتقي ومتخبل دازلي أشكال الغلط ولشتايم الي ولعشيرتي ويتوعد الي ولتقي يموته 

خفت من كلامه قفلت موبايلي

شيريد يسوي خلي يسوي واصلاً هو بس حجي بدون فعل لان محترگ گلبه 

الثاني يوم اجاني تقي طلعت شفته وسلمت علي وهلمره السلام يختلف واني اشوف الفرحه بعيونه و ما واسعته الدنيه بكبرها 

گالي اليله التحق للموصل و وصاني انتبه على نفسي وراح يخابرني اول ما يوصلون المكانهم  

راد يقترب أيبوسني ابتعدت من عنده

لاحظت علي حيل ضاج بس رسم ابتسامه على وجه مجامله وودعني وراح 

وبديت بمرحله جديده كل يوم يتصل عليه ويراسلني 

اني بالبدايه كارهه الوضع وكلشي  

بس بعدين اشويه اشويه اتعودت علي وعلى وجوده بحياتي دااحسه صديقي اكثر ما هو خطيبي 

وطول ما نزل بقى شهر يله كدر ينزل ومن نزل اجاني قبل لايروح حتى لهله 

من شافني احسه مثل العطشان ويريد يرتوي ايحير وين ايبوسني واني مضطره اجامله ما اريد اكسر واهسه وخاطره 

وكل مره هيج من ينزل ولشهر صار شهرين وثلاثه اشهر 

وتقي كل ما يلتحق ما ينزل اقل من شهر 

واني اتعودت علي وحبيت اسلوبه وياي وخوفه عليه والايام النازل بيها كل يومين اذا مو يوميه يجينه صار عبالك عايش ويانه وجابلي موبايل أيفون ولهدايا كل فترى يجيبلي فد شغله اتفرحني 

كدرت انسى وارث واندمج ويا ويندهني بأسم ( يا لوعة گلبي ) 

ومن اسئله ليش هيج تسميني يكول لان صار عمر ملوعه گلبي وساحله روحي سحل وراج 

اشوفه كلش حريص عليه ويحب يعرف كلشي عني شنو احب وشنو اكره ولاغلبيه يعرفه ويعرف كل اطباعي ومرات يسميني الحقنه 

و حتى اذا ما عنده شبكه وهو اهناك يمشي مسافه بعيده حتى في سبيل يحجي وياي كل يوم 

وكالي هل مره من انزل انسوي العرس جهزي نفسج يعني بهذا الشهر مابقى شي بعد اسبوعين 

واهله مجهزيله الغرفه وكالي بس انزل اخذج نختار غرفتنه مال النوم اني وياج 

            

              

                    

بس رفضت كوتله انت اختارها على ذوقك عادي البعجبك يعجبني وبديت اجهز بالنيشان واحضر للعرس بس من داخلي ما مرتاحه احس راح يصير شي 

گلبي ناغزني احساسي ما يخيب 

ولغريب وارث ساكت ما نفذ تهديده 

وطمأنيت كلت ميسوي شي اكيد ملتهي بحياته وزوجته الجديده 

لما بيوم قبل موعد نزول تقي بثلاث ايام ايام 

فكدته اليوم ما اتصل ولا راسلني من البارحه 

قلقت علي اكيد صاير ويا شي ما مرتاحه. 

كلما اتصل يطلع مغلق مليت من الاتصالات بس ما احصله رجفت أيدي ويبس ريگي 

عقلي صار يألف من كيفه و بس بالأشيا السلبيه 

للعصر اتصل وماكو 

ما عندي غير اخابر واحد من اهله

خابرت هشام سئلته بس من صوته حسيته مو طبيعي صوته بي عبره كوه يحجي گالي

:- والله ما اعرف شكولج ندى بس تقي مفقود من البارحه وليوم ما كاعدين انحصله 

وعرفنه النقطه الموجود بيها ضاربينها بصاروخ داعش ومستولين عليها وهسه منعرف عدل ميت أسير عدهم كلشي ما ما نعرف

لزمتني رجفه مووطبيعيه صار عندي هبوط ما سيطرت على نفسي 

وكعت بالكاع على صوت الوكعه اجوني وسام وزهور 

ولضاهر وسام يعرف لان مبين من وجه وعرف اشبيه شفته يبجي وكام من عندي طلع برا 

واني احس اكو شي كاتم على انفاسي ثقل عجيب 

بجيت الحد ما تعبت ولنوم جافاني ثلاث ايام ما اكدر انام بليوم ساعه او ساعتين من يتعب كلشي بيه لكا نفسي غافيه واكعد مرعوبه من الاحلام واركض احاول اتصل بي بالكي يجاوبني 

بس ماكو 

ولكل داخل بانذار بس عبالك متأكدين انو تقي مستشهد مستحيل يطلع بعده عايش 

ثالث يوم اجاني الخبر الجنت خايفه من عنده  

طلعت على صوت اعياط وسام كاعد بالكاع ويصرخ ويلطم على وجه 

اجيت كعدت اكباله اهز بي وساااام وسااام تقي شبي شعرفت عنه احجي وياك جاوبني استشهد مووو حاجينننييي 

يعني تقي ماااات

اصرخ بحرورة گلبي اكلهم اكيد مشتبهين بي مو هوه تقي اليوم موعد نزوله 

اخذوني وياهم البيت اهله

دخلت لكيت العالم كوله ملتمه يمهم 

وامه املخه روحها وشعرها مكطعته 

وحالي مو احسن منها ملخت وجهي الطم كعدت اكبالها ابجي بحركه 

وهي شافتني لو ما اعرف شنو شافت تصرخ عليه ـ انتييي وجهج وجه الشؤم موتييي ابني ما ردتج اله بس هو دك رجل اله انتي ياخذج 

صار اسنين ينتظرج تالي نحستييي 

انصدمت منها وبنفس الوقت زرعت هاي الفكره ابداخلي اني نحسه الي اكون ويا ما يرتاح لو يموت 

من العياط صوتي صار ما ينسمع 

للعصر جابو التابوت اصدقائه بسيارات الجيش ومسويله عبالك زفه ويلطمون كدام السيارات يركضون ويرمون بالجو من عرفنه جابو طلعنه كلنع نركض للگراج دخلو بتابوت وميقبلون يفتح التابوت انريد انشوفه بس ميقبلون ايكولون مينعرف وجه ششوفون من عنده بس صدت عيني شفت وارث من ضمن الموجودين جذبت اعيوني كلت يتهيألي اكيد ما هتميت

احيت كعدت يم راس تقي وعاتبته بصوت مبحوح اصرخ اريد اكعده 

ولك ليييش تقي حتى انت رحت وعفتني ليش كل الاتعلق بيه ميصير الي مو تكول احبج يله ارجع الخاطري تقييي صدكككك انيييي نحسه مو جذب اني نحستك وموتك لطمت الحد ما فصلت عن الواقع فقدت 

            

              

                    

وعيت لكيت نفسي بالمستشفى مشكلين اليه مغذي 

عيوني وارمه وتحركني كوه افتحه 

بالاعيمي متجرحه من الصريخ

طلعوني بس بعد 

ما خلوني ارجع البيت اهله للفاتحه رجعوني للبيت حزنت بطريقتي الخاصه جافيت الاكل ولنوم وبس ابجي وميروح من بالي صوته وسوالفه الي وفرحته بيه

ضليت اكلب بصوره واسولف ويا اكوله اني ما استاهلك تقي جوز الله اخذك حتى يجازيك بالجنه وتزوج من حورالعين 

كل يوم احجي ويا الصور واطلب من عنده بس ايسامحني اسشتهد وهوه يتمنى يسمع من عندي كلمه احبك مات وهو بحسرتها 

كرهت نفسي حيل كرهت كاشي بحياني مجبوره اعيش موبيدي 

طول حزني هلمره وما داومت جامعه تركتها اجلت على السنة التجي 

مالي نفس اشوفلي مخلوق 

اعتكفت وبدت صحتي تتراجع 

وكل يوم بالطوارى من الم معدتي ولسهر موتني النوم امجافي اعيوني دااحس بالذنب 

ملابس النيشان كولها حركتها وكلشي اشتريته حركته بعد ما اريد غير الاسود بس هو ايلوك الحياتي 

احس هاي ايامي الاخيره صرت جلد على عضم 

ابويه حاير شنو ايسويلي اخذاني الاحسن الدكاتره يكولوله مابيها شي كلشي طبيعي والم معدتها بسيط ينطوني علاج بس ميفيد 

وعرفت بعدين من سوالفهم انو الجايب جثة تقي من داعش هوه وارث من هاجمين على داعش ومحررين النقطه ما عارفه بالبدايه بس ومتعرف علي من هويته

وهوه جابه لهله وياجماعته الي بالجيش

اتفاجئت گلت ابگلبي سبحانك ربي هوه الجان بس ايريد ايموته بيده تالي هو العرفه ووصل جثته لهله يدفنوها 

عرفت من هذا الموقف انو كل المشاكل ولاختلافات بالحياة بساحة المعركه تختفي ويتحدون سوا على طرد العدو من بلدهم ويقدمون انفسهم فداء في سبيل ينتصر العراق على الارهاب ويحررون اراضيه المغتصبة 

وصار اربعين تقي ورحت ويا وسام وابويه كوه ميقبلون اروح 

بس عاندتهم واصريت اله اروح ورحت وطلعنه قبل الكل بوقت صلاة الفجر اني اني يمه دافني يم حسام بصفه كابلت اكبورهم واصرخ

:- ولكم على منو بيكم ابجي والطم اخذتو كل حيلي ورحتو ليشششش عفتوني كلكم ابجي على امي لوووو حسام لوو تقي الكال ما اعوفج وهم عافني 

اخذوني يمكم ما اريد بعد اعيش بعدكم كلشي مررر كلشي اضلم

كوه سحبني وسام وابويه حتى اسمعه يغلط عليه من خوفه 

طلعوني من المقبره 

برجعتنه شفت سيارات عمامي واقاربنه وصلو جاينه 

رجعني وسام الكربلاء ما خلاني حتى انزل ازور الامام علي (ع) 

رجعت بس جثه هامده ثلاث ايام نايمه بالفراش ما اكدر اكوم على طولي 

ولشهر صار شهرين وثلاث شهور ونفس الوضع الحزن ميفاركني دافنه روحي بالغرفه ايحاولون وياي بس بدون فائده 

لما بيوم طلعت موبايلي شحنته وفتحته اباوع بالصور اذكر المواقف

وابجي اتصل عليه رقم جاوبته قبل لا ينفصل 

عرفته صوت وارث 

:- هلاو ندى اشلونج 

خنكتني العبره ياربي شكد فگر اني ردت انساه بتقي تالي حتى تقي مات 

كوه جاوبته من العبره

:- شلك دخل بيه عايشه ميته انت شعليك

:- اريد اشوفج ندى والله وداعتج ما اطول بس دقيقه واروح مشتاقلج حييل حتى لو من بعيد، 

:- انت وين هسه. 

وارث:- قريب عليكم اجيت اشم هواكم 

:- تعرف اني بيا حال ولك كله من وراك قبلت بتقي حتى انساك تالي اني نحسته وماتت اني منحوووسه اني فكر 

وحتى انت هم بس ارجع وياك اتموت وتعوفني  

وارث:- احلى موته يمج الله شحلاته بحضنج واخير امسان اشوفه هو انتي شوفي ندى خلي اكولج انتي الي الله من فوك ماقبل اتصيرين الغيري 

:- وارث انت اجيت حتى تتشمت بيه لان مات تقي مو ترا وروح امي حييل مالي خلك لا تجي ولا تتصل بعد الله يخليك خليني ابحالي احسن الي هيج

وسديت الموبايل بوجه 

بس مو بيدي گلبي الاخذني وطلعت النفس المكان شفته واكف منتظرني 

انصدمت من شكله اشصاير بي 

وهو هم مبين بملامحه علامات الصدمه 

الضاهر القهر مغيرنه اثنينه اني ويا اباوعله ضعفان حيل وحتى لحيته طالعه ومليانه شيب 

بس شفته انهاريت بالبجي رفعت اديا على وجهي ونزلت راسي 

اتقرب عليه رفع راسي بأيده باسني بگصتي ما دفعته جنت مشتاقتله موبيدي احبه 

حضني حيل على صدره بس صوت انفاسنه تنسمع وشهكت صدري 

بعدني عن حضنه ايباوع بوجهي مركز بعيوني كالي

:- معقوله هاي انتي ندى لج شصاير بيج ليش هيج شمسويه بنفسج

:- وانت شعليك بيه وبعدين انت شعجب عفت زوجتك وعشك واجيتني 

اشوفه عقج وجه ما مفتهم شي وكالي 

:- زوجتي؟؟ 

:- اي زوجتك ليش مو ازوجت قبل اربعه اشهر اني شفت عرسك لا تنكر 

:- صدك تحجين يعني انتي اتصدكين بعد اتزوج ؟ و غيرج !! 

:- اني شفتك لا تجذب عليه شفت منشوراتك وشفت زفتك 

خنكتني العبره وبجيت 

:- بس لا عبالج زفة محمد هو عرسي ! 

باوعتله بتركيز واحس نسمة فرح مرت عليه

:- يعني انت ما تزوجت وارث صدك والله

:- انتي خبله لو شنو من كل عقلج اتقبل بعد مره غيرج تكون الي 

نسيت نفسي وكاشي حواليه احساس حلو واني اسمع هيج كلمات من محبوبي حضنته بقوه وهو يشتم برگبتي 

كالي:- بس لا قبلتي بأبن عمج اعناد بيه لان شفتيني ناشر عبالج اني متزوج 

نزلت راسي وهزيته بعلامة أي 

:- واذا هلكد اهمج ليش ما خابرتيني سئلتيني هيج منها الى الله اتهمتيني وردتي اتورطين روحج يا غبيه

:- اي من وراك وبعدين اني احاول ابعد نفسي عنك لان اعرف مستحيل ننجمع 

:-ماكو شي مستحيل عندي 

وحضري نفسج نهاية الاسبوع اني يمكم وهلمره اخذج لو اعرف ارتكب جرائم 

:- لا وارث كلش مو وكتها نفسيتي حيل مدمره واصلاً مريضه حالتي مدهوره 

:- اشبيج يرويحتي شيوجعج اني مستعد اصيرلج علاج 

حسينه بحركه ورانه التفتنه شفت ابويه واكف ايباوعلنه ابصدمه ........

شكرا لزيارتكم عالم روايات سكيرهوم