رواية فصلية الضابط الفصل الرابع والثلاثون 34 بقلم زينب نور

 نزلت راسي وكعت الدمعه بحضني حسيت بأيد ابويه على كتفي باوعتله غمض اعيونه وهز راسه بعلامة كولي اي 

ماكدرت انطق واكوله اي شي مانعني احس الساني مربوط 

 بس جبرت نفسي 

باوعت الوارث ورجعت باوعت لشيخ وهزيت راسي بعلامة اي اريد اطلگ

ونزلت راسي اكس گلبي كاعد يتكطع وبعد ما رفعت راسي ما اكدر اشوفه 

اسمع الشيخ يردد بكلمات ويا وراث 

وكاله ارمي عليها يمين الطلاق 

رفعت راسي اباوع بعيونه اتمنى يعترض ويكوم يطلع وما يطلگني اريده والله بعدني اريده اريد اصرخ بصوتي واكولهم ما اريد اطلگ احبه 

 بس صار العكس باوع بعيوني بنضرات خذلان ومتردد يحجي 

سكت ثواني غمض اعيونه وبلع ريگ اباوع الايده بيها رجفه تحمحم وگالي بدون ميباوع عليه مغمض اعيونه 

وارث :- انتِ طالق 

وسكت ثواني وطفر قبل الكل طلع بدون اي كلمه طلع واسعد طفر ورا بس سلم وطلع 

اختنكت بعد ما أكدر الدموع ينزلن مثل النار على وجناتي 

اسمع الشيخ يسولف ويا ابوي وعمامي 

عفتهم وطلعت طلع وسام وتقي وراهم 

ضليت واكفه اباوع الوارث ودموعي تنزل نزعت الكمامه 

 قبل لا يصعد السياره اندار باوعلي شافني راد يرجع عليه يحجي وياي 

 بس اعترضوله وسام وتقي وكفو بصدره 

ما اسمعهم شنو يحجون ويا 

بس شفته انفعل بسرعه ولزم تقي من ياخة قميصه وضربه كله بىاسه ونزل بي بوكسيات على وجه وكعه بالكاع وكعد على صدره يضرب بي فاقد علي مثل الاسد من يلزم فريسته

وتقي هم لازمه من قميصه ويحاول ايكوم بس وارث مسيطر علي   

و وسام واحازم واسعد يردون يبعدون وارث ميكدرون 

 بس حازم وكف ورا ودفره بقوه على ضهره واسعد يدفع بحازم عنه 

تخبلت ضليت مثل الطير المذبوح افرفر بمكاني والطم على خدودي 

عقلي طار من شفت وسام طلع من ورا البيت وبيده بندقيه ايريد يرمي وارث 

 طلعو ابويه وعمامي يركضون صارت هوسه لزمتني الرجفه ابويه ركض على وسام ويتلاوه ويا اخذ من عنده البندقيه 

ويعيط عليهم وارث ترك تقي وكام يلعث 

وزهور طلعت تصيح عليه حتى ادخل جوا بس ما اقبل سحبتني كوه دخلتني للبيت

احجي وارجف 

:- ولج زهور گلبي راح يوكف الحكيني لازمه دشداشتها وابجي وهي تهدي بيه

 ما اتحملت رحت طلعت اركض اشوف اشصار بعده صوت اصياحهم ولهوسه 

شفت وارث فاتح باب سيارته مشغلها ورجل مخليها بالسياره ورجل بعدها بالكاع ويصيح ويتوعد التقي 

 وتقي لازمينه وسام وحازم ايريد ايفلت نفسه منهم ويرجع على وارث 

وأبويه يصيح بيهم ويأشر الوارث روح

                                            

              

                    

بس روح وخلصنه الله ينتقم منك 

صدت عينه عليه باوعلي بغضب ايهز براسه 

 صعد سيارته وراح واسعد ولشيخ صعدو سيارتهم وراحو ورا 

اباوع الوجه تقي مليان دم ودمارات رگبته مبينه من كد العصبيه لعياط

يدفع بوسام من صدره ويغلط علي وعلى حازم 

شلون ما تركو حتى يرجع على وارث ايضربه 

دخلت للبيت ركض الغرفتي دخلتها وسديتها وكعدت ورا الباب مخليه عباتي بحلكي عاضتها واصرخ بقهر 

اسمعت صوتهم دخلو للبيت يغلطون على وارث ويشتمون بي ويتوعدوله

دقايق وخف الصوت الضاهر رجعو طلعو 

بقيت بغرفتي ما طلعت لليل يله فتحت الباب وطلعت للمغاسل كوه اسحب بروحي مهدود حيلي احس شي كاعد على صدري وخانگني 

اعتكفت على نفسي ثلاث ايام ما احب اشوف بشر 

نفس وضعي بجي ونوم حتى علاجي تركته نسيته يوم بعد يوم حالتي اتسوء اكثر من معدتي القهر كوله اتحول صار عباره عن وجع بمعدتي لا أكل ولا علاج يبقى بيها 

بس ابويه وزهور يلحون عليه حتى اروح لدكتور لو أكل يحاولون وياي اطلع من من الغرفه 

واختلط وياهم وانسه بس ما اكدر اتخطى بهل سهوله ورا اسبوعين اكثر 

اتفقو انروح للمدينه كولنه حتى انزور الامام الحسين واباالفضل (عليهم السلام ) من زمان ما طالعين ولا زايرين الأئمه وهم علمود اطلع من جوي وعالمي الكئيب 

جان يوم خميس ليلة جمعه وزهور حضرت العشا حتى ناخذه ويانه طبخت دولمه وبرياني وعزمت اهلها الي هم بيت عمتي طلعنه سوا سيارتين

من وصلنه ودخلت زرت الامام الحسين ( ع ) ورجعت زرت اباالفضل العباس ( ع )

 ارتاحت نفسيتي واني ازور من بجيت وارتاحيت بالضريح 

دااحس شكو هم بداخلي انزاح عن صدري الطاقه السلبيه الجنت بيها اختفت طلعت واني مرتاحه اتنفس بعمق 

احس نفسي جنت بسجن وطلعت حسيت بطاقه أيجابيه  

وصارلي واهس وياهم صدك جنت محتاجه هيج جو وزيارة اهل البيت هم علاجي مو دكتور: 

ورا ما تعشينه رحت ويا البنات زهور واخواتها زمرده وياقوته لسوك افترينه اشوف العالم البنات البعمري شلون متونسات ويضحكن احس كبرت اكبر من عمري بعشرة سنوات مالي واهس اشتري ولا اختلط ويا احد: 

من رجعت للبيت مرتاحه بس هم بعدني ما اكدر انام اذا ما اطلع صور وارث واشبع بجي صرت مدمنه بشي اسمه وارث لحضه ما يروح من بالي ما اعرف شلون اكدر انساه واشيله من گلبي وعقلي كلعاده رحت 

دخلت على صفحته واگلب بصوره اركز بيهن واتمعن بملامح وجه شفت ناشر صوره جديده 

الصوره ما واضح اذا هو لو لا 

طالعه بس ايده لازم جگاره مورثها

وايد الثانيه لازم بيها كوب چاي 

 عرفته هو من ساعته شايفتها عنده من قبل 

وكاتب جوا الصوره عباره 

(( تعال ارجع وراك الحيل ڰام ايڰوم ويطيح )) 

 اعرفه ديقصدني الي بيها لان اعترفلي يحبني وگالي لا تعوفيني 

انعصر گلبي واني اقراها 

وما عندي غير ادموعي ايواسني 

دخلت على المحادثه راسلته بدون تفكير كتبت 

            

              

                    

(( - أتجرع ألم غايبك دائمًا، يبكي قلبي كل ليلة، ومنذ زمن وأنا أحدث طيفك، لا أريد السخط لكني أشعر بروحي تخرج عند ذكراكِ )) 

دزيتها اله 

بسرعه اداركت وضعي الوم بنفسي اني شسويت وليش راسلته عضيت ايدي كرهت روحي الوم بنفسي شلون اراسله شأنتظر من عنده بعد واني اعرف مستحيل بعد ننجمع  

احتاريت اشلون امسحها 

شفته دخل قراها 

بس ما رد عليه انقهرت بالزايد 

ضليت الوج من القهر احسه عرفني وتعمد ما يرد عليه متجاهلني 

من حرڪت گلبي مسحت برنامج الفيس بوك من جهازي وقفلته وشمرته بالكنتور 

واخذت قرار على نفسي من اليوم اساعد نفسي اطلع من قوقعتي وأواجه الحياة 

نمت ذيج اليله كلي أصرار باجر راح يكون يوم جديد الي لازم اصير قويه واتخطى 

وفعلاً بديت اغير من نفسيتي احارب گلبي احارب افكاري وكلما احس بنفسي ضعفت واريد ارجع النفس الحاله 

انتفض واطلع يم ابويه ويم زهور والتهي ويا جهال وسام نطلع للبستان ابويه جايب دجاجات وكتاكيت ومسويلهن بيوت 

نلعب وياهن 

وكل فتره ياخذنه وسام لزيارة اهل البيت

واخذانه للنجف زرنه أمي وحسام 

اقتنعت بواقعي وتعودت على حياتي الجديده

وصيت ابويه جابلي شكم كتاب للتحفيز عن القوه ومواجهة الحياة وتطوير الذات نضمت يومي وسويت روتين جديد كل يوم اقرا الحد ما اتعب 

بس اكو نتيجه احس بتحسن

وجنت اتعب نفسي بشغل البيت واطبخ ابدع لأكلات

 و لان زهور تعبانه من الحمل واني اريد الهي نفسي ما انطيها مجال اتعب من القراءه يله ادخل للغرفه حتى ابسرعه انام وما ابقى افكر و اتذكره واضعف 

هيج مشت ايامي وصار على طلاقي من من وارث ثلاث شهور ونص 

 بس ما انكر بعده بمخيلتي ما انساه 

ولا انسه أمي وحسام ڪل يوم اقرالهم الفاتحه واهديها الارواحهم واقرالهم قرأن 

وابويه ابد ما ناسيهم كل ليلة جمعه يسويلهم ثواب لو يساعد العالم المحتاجه ولفقراء وينطيهم بثوابهم 

جنت ڪل يوم اسمع قصيده للملا باسم الڪربلائي نازله جديده 

»~روووحي 

مشتاڰه وبعيد الدرب 

روووحي

 ولينتظر ليله صعب

روووحي 

وحبابـي بديار الغرب 

روووحي ~«

ڪد ما اسمع هاي القصيده صار عندي ادمان من اسمعها لازم اصفي مي راسي على كلماتها ولحنها اخلي هيتفون واغطي راسي واشبع بجي ياخذني الحنين الأمي وحسام وحتى وارث هاي القصيده حيل أثرت بروحي 

بهل فتره ڪثرت جيات تقي ڪل يوم يجينه يبقى يم وسام 

ومرات يبقى على الغدا او العشا 

ولاحظت اعيونه دائماً تتبعني يباوعلـي بالسكته

واني من يكون موجود احاول اختل بس اسلم علي وادخل الغرفتي بس لضروره اطلع لو اساعد زهور لما بيوم العصريه ڪاعده ويا جهال وسام بالبستان ننطي اڪل لدجاجات ونلعب وياهن حسيت بحركه وراي 

التفتت شفت تقي واكف ايباوعلي ومخلي اديه ليوره 

            

              

                    

ڰمت اريد ارجع للبيت اعترض طريقي باوعتله 

:- رايد شي 

تقي:- اي رايد اريد احجي وياج ڪلمتين اذا تسمحيلي 

ندى :- متخاف لا يطلع وسام لو ابويه ايشوفك واڪف اتسولف وياي بڪل حريه 

تقي :- شببج ندى ترا انتي بنت عمي مو غريبه عليه وشبيـها اذا وڪفت يمج واسولف وياج ترا ڪبرنا سوه يعني عادي 

اشلون افهمه من احجي ويا عبالك خاينه وارث اتخيل شڪله من يعرف واڪفه ويا تقي اسولف عـادي 

ڰالي:- شبيج صفنتي ندى ترا والله ما مفڪر بيج بالحرام وجنت منتظرج اترجعين لحضه ما نسيتج اعرف ما تحبيني ولا يوم حبيتيني

 بس اني موبيدي من اني صغير حبيتج وكبرت وكبر وياي حبج وهاي صار عمري 27 سنه ونفسيتي ما تتقبل وحده بحياتي غيرج واجيت اشوف رئيج واذا تقبلين حتى اخطبج من عمي وتصيرين الي حلالي 

ضليت صافنه بوجه ما اعرف شكوله 

وهو بنفس الحضه اعترف بحبه الي 

ويريد يخطبني واتزوجه

واني بعدني عايشه بذكرى وارث 

اشلون اكدر افهمه بله

اخذت نفس وزفرته وباعتله 

:- شوف تقي اني مقدره حبك الي واعرف بيك ترا من جنه صغار حاسه بيك مو غبيه بس جنت اتغابه لان هذا الشي مو بكيفي وما اريد اضلمك وياي ولا اكدر اجبر نفسي عليك مو انتقاص بيك لا صدكني 

ومعزتك عندي بمعزت وسام وحسام الله يشهد وانت تستاهل الاحسن ولاحلى من عندي وانت شاب مثقف وواعي ومتعلم والف بنيه تتمناك 

و اكيد تحترم جوابي الك اذا رفضت 

تقي:- لا لا لتتسرعين هسه وترديلي جواب بسرعه خليج اخذي راحتج بالتفكير واني ما عندي شي انتظرت عمر ما انتظرج هسه 

اني اعرف بيج انتي مريتي بتجربه صعبه و مختلفه وتزوجتي غصب عنج واحتمال حبيتي الزوجج 

وصعب تنسين وتجتازين هل مرحله بسهوله اني مقدر وضعج وما متسرع بس اذا تنطيني فرصه اساعدج تتجاوزين هلمرحله وتتخطينها واذا تردين عادي احسبيني صديق الج مو اكثر ماعندي مشكله وجربي اذا راح اتحبيني او لا 

:- ما اعرف شكولك تقي وما اريد ازعلك والله افهمني اترجاك

تقي:- فاهمج والله بس شسوي الهذا الغبي گلبي المايقبل يقتنع وينساج تعبتيني حيييل واخذتي نص من حيلي 

استحيت من عنده وكاعده احس بي بس موبيدي شسوي 

وهم ما كدرت اكسر گلبه مره ثانيه

:- شوف تقي خاي نأجل هذا الموضوع الغير وقت ڪلش مو وقته بالنسيه الي 

زفر نفس وصفن بعيوني نزلت راسي انحرجت من نضراته مثل الي يترجاني بعيونه

شفته دار وجه وراح بدون مايسلم حتى على وسام صعد سيارته وراح 

ڪسر خاطري اعرف بي يحبيني ويمكن اڪثر من حب وارث الي بأضعاف ومستعد ڪلشي يسوي علمودي بس موووبيدي ما اريد اضلمه وادخل بحرام 

            

              

                    

خفف جياته النه واذا يجي يبقى بالاستقبال ما يدخل جوا يمنه  

واذا التقينه صدفه ميباوعلي 

اينزل راسه ايحاول ميضغط عليه باي شكل من الاشكال حتى بلنضره عبالك مو هو الجان يكتل نفسه حتى بس ايشوفني

بهل فتره لاحظت تقي شڪد محترم عڪس ما جنت مفكرته قبل جنت اشوفه من ذول الشباب المراهقين الطايشين

بس غلطانه  

 جنت ماخذه عنه فڪره غلط بس طلع من ڪد ما يحبني هيج يصرف ولصراحه حسيت بي من مريت بتجربة الحب وحبيت وارث 

الايام تمشي واني يزيز ما ينقص الشوگ وحنيت الوارث شڪد ما احاول بس ما اڪدر رجعت برنامج الفيس بوك وهم رجعت مثل قبل ابقى اباوع بصوره

بس هلمره ما ابجي بس اشبع اعيوني واروي اشتياقي اله واطلع مرت اشهر على هل حاله 

وزهور قربت ولادتها وكلش تعبانه واني اساعدها حتى على الجهال كمت اجيبهم يمي انيمهم عندي مابقى شي وتخلص سنة /2012/ ايام قليله وتخلص هاي السنه المشؤمه اخذت من عندي هوايه وغيرت بحياتي اشيا اهوايه نحسه هاي السنه ما احبها 

جنت من اضوج اروح يم ابويه اكعد اسولف ويا و اسمع السوالفه ونصائحه

وكل مره يكولي ليش ما ارجع ادرس خارجي واخذ شهادة

بعدين اتفيدني 

فديوم 

گالي :- بابا الدنيا متدوم الاحد وكلنه انموت واني يا بويه يا نداوي اخاف عليج و ما اريد بيوم تحتاجين احد حتى اخوج صح هو سندج بس هم اريد تسندين نفسج بنفسج وتڪون عندج شهاده او وضيفه 

اني ما دايملج بابا :

:- اسم الله عليك يابه يومي قبل يومك انت سندي وانت ذخري 

من بعد الله ولدراسه اتريد وقت وبال صافي واني مالي خلكها 

:- لا بابا اني ما دايم الج والاعمار بيد الله واحد ما يعرف بروحه بعد شكد باقيله بالدنيا واني مستعد اجيبلج كلشي وشنو تردينه اني اوفره ها شكلتي وعندج وقت منا السنة بعـد شنـو حجتج : 

ضحڪت وتقربت علي حضنته ابوس بخده

:- فدوه العمرك شعندي غيرك اني 

راح احاول جيبلي ڪتب حتى ابلش ادرس من هسه وبعدين الثالث صعب واني تارڪه صار اربع سنوات 

:- ميخالف وسام موجود واني اساعدج اذا ما تفتهمين الماده تعاليلي اشرحلج وافهمجياها 

بست ايده وڪمت فرحانه من عنده 

وفڪرت بكلامه صح اني ليش ما الهي نفسي بالدراسه حتى اڪدر انساه الوارث وهم اني محصله شهاده 

وكمت اتخيل نفسي اصير محاميه اخذاني الواهس 

وصار عندي هدف بحياتي انو اصير بيوم من الايام محاميه 

الفڪره اترسخت ابالي وصار عندي اصرار احقق حلمي واوصل الهدفي 

وبنفس الاسبوع جابلي ابويه ڪتب الثالث وقرطاسيه كامله فرحت بيهم وڪمت ڪل يوم اقرا اشويه حتى ما أمل واترڪها 

لما بيوم ڪاعدين العصريه بالحديقه وزهور متوجعه من بطنها شويه شويه ثكل عليها الوجع لما ڪامت تصرخ صارت عدها ولاده باول ايام شهرها التاسع 

 واكفه يمها احير شأسويلها انخبصت اتذكرت نفسي لما اجهضت طفلي صرت

ابجي وياها اتصلت على وسام يجي ياخذها جهزتلها جنطتها ابين نا وصل وسام واخذاها وراحت تولد 

واني بقيت يم الجهال وعمتي راحت وياها للولاده 

ضلينه ننتظر لليل يله خابرنه وسام مبين فرحان ويضحك بشرنه صار عنده ولد ثاني وگال زهور زينه وراح يطلعوها يم اهلها تبقى اشكم يوم 

ولجهال ماقبلو يرحون يمها

 بقو عندي واني ما قبلت يرحون متعوده عليهم ولبيت يفرغ عليه

ورا ثالث يوم العصر كاعدين يم ابويا ناكل عصرونيه سمعنه صوت سياره تدك هورن بالباب طلع ابويه ايشوف منو واني كمت ورا ماخذني الفضول اعرف منو دخلت للمطبخ اباوع شفت سيارتين حديثات ونزلو منها.........

شكرا لزيارتكم عالم روايات سكيرهوم