رواية قصة وجدان الفصل الرابع والثلاثون بقلم انين الليل
بيبي باوعت وهي عاكفه وجهها //. ياهنه الحيايه نهاد بالمثل انا بناتي بت ابني لو ام كرار لو شيماء
نهاد فلت وجهها ///. يا عمه اتشاقى
مو من اگول ما تعرفين تحجيين اختج تزعل
امل //. يممه مو سمعتيها تتشاقى
هزت راسها //. اي سمعتها وادري بيها تتشاقى بس اكو حجي ما ينحجي عيب فشل
اندك الباب وراح فتحه بهاء وهو يكول هله ومرحبا اتفضلن اهنا
الله يبارك بيكم
يمه اجت ام كرار
راحت رجاء // هله بيج خيه الله يسلمج اتفضلي
اجت ام كرار وشيماء سلمن وباوسن العروس وبعدها باوسن بيبي الي سالتهن //. ما عبالي اتباتن
شيماء //. بعد لزمت بينه بهيه واستحينه
وهي شلونها
زينه وتسلم بس بعدهي ما تكدر تمشي وهواي تتعذر منكم
معذوره شني نعتب عليها بهيه راعية بيت واجن بناتها وجنتها
ام كرار // شلونك خاله بهاء
الله يسلمج الحمد لله
الف مبروك وشايف كل الخير
الله يسلمج يوم للاولاد
بقو يسولفون ويضحكون وهو يتشاقى ويه بيبي ويرجع يخلي ايده على كتف ساره ويباوعلي بنظرات كلهن انتبهن عليها
امل //. عمه رووح للمضيف هسه ناس راح تجي عليكم
انصاف //. اي وعمامك كلهم كاعدين هناك وعاصف ذبح والطباخ جاي يطبخ
بيبي //. الله يطول عمره عاد وتجازي على تعبه
بهاء//. عاصف بروحي افدي يمكن لو ابوي حاضر ما سوالي نص السوا عاصف اليه
بيبي بعبره // عشتو وينه ابوك يمن عمت عيني عليك يمه بدر
وصارت تباوع الصورته وتبجي
امل // كافي يمه ما يصلح هذا ابنه وان شا الله يحيي اسمه
ضحكت عمتي انصاف //. ياالله شدو حيلكم وجيبولنه بدر
بهاء حضن بيبي // ان شاالله جده لاتبجيين امسحي دموعج
امل //. روحي وجدان جيبي ماي الحبوبتج شلون عراريس حتى ما بالجذب قدمولنه شربت
رجاء//. كل شي موجود التهينه بالسوالف
رحت للمطبخ اجيب البيبي ماي فتحت الثلاجه طلعت ابطالة ماي خليتهن بالصينيه واريد اطلع شفت ساره وامها
نهاد سالتني //. ها اخذتي الماي
بلي عمه
اخذت الصينيه مني // خوش عمه روحي اكعدي يم حبوبتج
= تره اني اجيت اخذلها ماي
ساره //. بس من امرنج المفروض ما تگوميين
نهاد // احنه موجودات انتي شعليج المثل يگول ياغريب صير اديب
= اسفه واعتذر
رجعت للصاله كعدت بدون ما احچي واجت وراي نهاد //. هههه لكيناها ما تندل الماي
قدمت الماي وبعدها اجت ساره وجابت عصير وجكليت والشي الشفته انو جابت على عدد الموجودين واني ما جابتلي
كوه لازمه نفسي ما بچييت يمكن ندم او حزن او حتى خذلان بيبي گالت العمه انصاف
گومي اخذي ام كرار او شيماء للبحيره يشوفنها
ام كرار // اي والله عمه ودي امشي بالخضار
تياالله بس مو تتاخرن خاف يجيبون الغدا
سالت بيبي = اروح وياهن بيبي
لزمتني // لا ابقي شويه وكلنه نروح
طلعت عمه انصاف ويه ام كرار وشيماء وبيبي باوعت الساره وسالتها
شني حبوبه ما تعرفين اتحسبين لو ما عدج مواعين
ليش جده
لا هييج ماكو شي هاج حبوبه ( قربت الصحن مني ) هزيت راسي =. بيبي ما احبه
بهاء طلع // مو ترحن اهنا كلنه نتغدا
امل //. اي كلنه نلتم ونتغدا بجال عاصف وجالك
شاورت عمتي =. عمه اروح للبيت احسن ؟
امل //. لا ابقي اهنا من ترحين تصير مشكله ويكولن انتي سويتيها عاد ظلي گاعده على گلبهن نتغدا ونرجع كلنه سوا
= عمه ما شفتي شسمعتني نهوده
امل //. ولج هاي سوده مو نهوده ادري بيها جلبه ما عليج خلي رجل على رجل وغيظيهن وانا منج هسه توديني
على بهاء واگله قابله بي وتكول خلي يجي يعقد ونتزوج
صدك ضحكت من كلام عمتي الي حضنتني وهي اتگلي //. اووف ياعمه ادري بنار كلبج وهم ادري بنار گلبه
ردت ماي قربت بطل بيبي واجيت اشرب بيبي گالت //. اوگفي ( باوعت الساره ) ولج سويره شني معناتها انتي وامج
لحكتن وجدان للمطبخ ورجعتنها
نهاد //. لاعمه يا...
بيبي بعصبيه // انجبي ولج شني عليمن تضحكيين عليه انا العاجنتج وخابزتج تره سكتت چييف بهاء گاعد ومرت كريم وشيماء
واله اكدر اكوم اكسرج انتي وبتج بهاي العوجيه
نهاد // شني شمسويات
بعد شتسون شني من راحت وجدان للمطبخ راح اتبوكجن لو تخليلجن سحر جايبته من اهديه
سكتن ما جاوبن بلعت ريگي وكفت وحجييت رغم مقهوره بس مثل ما قهرني اله افشلهن
= عمه نهاد ساره عيني تره اني الي رفضت بهاء مو النقص بي لا والله بهاء شيخ الشباب بس لان دا احسه مثل
اخويه واذا ع العصير والجكليت اني ابيت ابويه اصلا هذا النوع منجيبه لان مو اصلي وكله اصباغ
باوعت البيبي =. اني هرووح
بيبي //. اوكفي تكعدين وتتغدين هذا صدك بيت بهاء بس البنا واثثه عاصف محد صاحب فضل ومحد يگدر
يطردج منه والغدا سوا عمج من حلاله وانتي وانا وكلنه ناكل من جوه ايده
رجاء//. شني هالحچي عمه تعيرينه بعاصف
لا ما اعير بس اذكر اذكر رجوه
الصدك بقيت گاعده على اعصابي رغم وجود عمه امل وام كرار وخاله شيماء ومن رجعنا وره الظهر
قررت بعد ما اروح البيت بهاء حتى لو هو ما موجود
على العشا بلمطبخ اجه عمي عاصف وكعد كان مبين علي التعب وبيبي اتگله الله يساعدك ع التعب يمه
رد عليها :: ماكو كل تعب يمه هذا ابن الغالي
رفعت ايدها // الله يطول عمرك
سالها :: وين ام كرار وشيماء
راحن البيت ابو جلال عزموهن
:: هاا اي نسيت
:: انصاف وامل وين
انصاف راحت البيتها
:: شني توازت
رجلها مريض
:: اي يمه نروح نشوفه
ان شاالله
:: امل وين ؟
بحجرتي تكول دايخه ( باوعتلي ) روحي صيحي العمتج
:: عوفيها خافنها نايمه
بيبي حاجتني // شوفيها جده الا نايمه عوفيها گاعده خليها تجي يمنه
رحت للغرفه بس فتحت الباب لان ظلمه عمه گالت // ياهو هاذ
= عمه اني بيبي تكول اذا گاعده خلي تجي تكعد يمنا
اي جايه
طلعت عمتي // الله يساعدك عاصف
:: هلا اموله الله يساعدج خيرج ؟
ما بيه شي راسي وجعني
:: اوديج للطبيب
لا خويه عساك سالم الظهر كعدنا ما نمنا والبارحه هوسه وشويه دخت شربتلي حبايه وصرت زينه
بيبي //. روحي صبي جاي العمتج
:: ما تاكلين اموله
لا خويه بالعافيه
بيبي جا انت شني ما متعشي ويه الزلم
:: يمه ولا متغدي واكف ناس جايع وناس رايحه
امل //. الله يطول عمرك ونفرح بيك
باوع وابتسم //. اي شني عاصف نريدلك ولد
:: الله كريم
بيبي // شماخذين منك مل ما نكلك اتكول الله كريم يمه انتبه النفسك صدك يرادلك ولد يشيل كبرتك من تطيح محد بحالك
اليوم كلمن يگول ياروحي
:: بعد فات الوكت شيبنه
امل // ياهو الشيب انت حتى عمرك ما صار اربعين
ابتسم باوعلي :: جيبيلي جاي
صبيتله بااستكان :: ها شو باستكان
=. مو اعرف بالمضيف ...
رن تلفونه شافه رقم وگف وراح يم الدرج
الو
هلا
الله يسلمكم انتو شلونكم
الله يبارك بحياتكم عبالنه تجون
اي خابرني واعتذر
تشرفون يمته ما تجون
ها مو مشكله فد اجي واعزمكم انتو والاهل تجون تكضون شكم يوم يمنه
هله.ومرحبا الله وياكم
رجع بيبي سالته //. ياهو هاذ
::صاحبي يتعذر عده شغل وما اجه للعرس وانا كتله معذور
بيبي //. اذا منا يمته ما يجي هله بي بس اذا بعيد ما نعتب علي
:: لا مو منا
اجه بهاء وسلم كعد وهو وجهه ما يتفسر اني رحت الغرفة بيبي وسديت الباب هو عاط // يمه يمه وينج
رجاء //. هاي انا خير يمه
شوفي كلمه اتفهمينها الاختج من تدخل الاي بيت تحترم الناس البي
شكو شصاير
ها هسه تنشديني شصاير تره وانتي هم وياها
يايايا شبيك اسم الله يمه شجرالك
بعد يجوز امل جدتي لو ام كرار مسويتلي سحر وكلبتني
بيبي // اسم الله جده شبيك
بهاء // ان جاني سكتت عيب من شيماء وام كرار واله والخلقج جان سويت شي اله اخلي الناس تحجي بي سنين
امل // عمه شصاير غير اتفهمنا
رجاء//. لا خلي ايصيح
بهاء// اختج تحترم نفسها حچيتي انتي وياها الله يكافينه الشر وهي ترد الله يكافينه شر الحيايه السايبات وبلعتها لان
جدتي ما قصرت بس انا موجود وخطاري ابيتي وحضرة نهاد وبتها تجيب عصير لليعجبهن والما يعجبهن ايعوفنه
هذا الشي ما اقبل بي فهمي اختج وبتها تره من اتسودن محد يكضني لو مو تصير خالتي اكلب الدنيا
رجاء //. يااااا. تكول چيفن ما جابن عصير الوجدان تره هي تكول ما اشربه ولا اكل هذا الجكليت
- - حتى لو هنه قدملها لو غلسن ومن لحگنها للمطبخ شيسون
بيبي //. مي خالف جده عدهن وبالهن وجدان تسويلك سحر
بهاء // هسه انا اعلمهن بدون سحر
بيبي //. وين وين صاعد
انام بحجرتي
لا جده انزل رووح نام يم مرتك
خليها تتعلم شلون تحترم وجودي
رجاء بعصبيه // تره حبوبتك ما قصرت وياهن وحتى عيرتنا بالبيت والعزيمه مالت العرس
بيبي //. انا ما عيرت انتي واختج وبت اختج ضاگت عينجن ما بدجن نبقى عاد انا گلت البيت والاثاث
والعزيمه كله من عاصف
بهاء // جدتي بكيفها شتريد تحجي تحچي وحچيها كله صدك
امل //. انزل عمه هسه الناس شتگول من يشوفونك عايف مرتك وجاي اهنا
بهاء// خلي شيگولون يگولون
صعد ورجاء صارت تحچي // احنه شحصلنه من الاجتنه بس العرايك والمحارب من وراها واگفينه على الحجايه
بيبي // انجبي رجاء ولا تطولينها
امل //. ام بهاء وجدان شلها غرض هي اختج وبتها غايتهن يسون مشكله والبنيه رادت ما تجي وامي جابتها ولو
بيدهن خلنها بلا غدا
سمعت بيبي تخابر بهاء //. انزل اذا ما نزلت احبي واصعدلك
تنزل انزل رايدتك
اگلك بداعتي انزل
بقن ساكتات لمن ما سمعت صوت بهاء// ها جده
تعال اكعد يمي شوف اذا ما تروح هسه تنام يم مرتك راح ازعل وما احجي وياك
تؤ خليها تتادب وتعرف شلون تحترمني
ما سمعت شكالتله يمكن شاورته سمعته گللها //. رايح الخاطرج والخاطر كلامج وانتي يمه فهمي اختج وبتها
بهاء مو مهدي
رجاء // اختج ومهدي ما عبالك خالته وعمه
بهاء راح وعاصف طلع من غرفته وكال :: وجدان تعاي
وصلت يمه =. ها عمو
:: منا ورايح ممنوع ترحين البيت بهاء هذا بيتج وتكعدين يم جدتج
بيبي //. يمه محد ظل بالبيت واخذتها وياي بس هنه
:: حجيه عوفي الحجي شفتهمتي بابا
هزيت راسي =. اي عمو
:: راح انام وبلكي تنصن صوتجن
عمه امل وبيبي دخلن بالغرفه واني وياهن // هاي رجاء شبعد الها بس تدرم
ما عليج بيها
اكلج يمه اشاورتي بهاء وراح البيته
كتله رووح جده لا يذبنها براس المسكينه (اتاشر عليه ) ويكولن كله من وراها ويجي مهدي يتهدد وتصير چبيره وهلراح
سمعت صوت شيماء // وينكم شنو نايمين
امل //. لا متجمعين بدار الندوه
السلام عليكم
عليكم السلام
شيماء سالت // جا وين عاصف
توه دخل الغرفته
باوعتلي // روحي خاله گليله ابو كرار اجه خلي يروح يمه
رحت دكيت الباب مره ومره ثانيه فتحت الباب شفته مطفي الكلوب فتحت الضوه هو فز وكعد
يتثاوب :: ها وجد رايده شي
خجلت = عمو اجه عمو ابو كرار وهو بالمضافه
اتثاوب :: اي هسه اروح يمه
= عمو خابر عمو مهدي يروح يبات يمه لان انت تعبان
:: لا بابا انا رايح سويلنه جاي زين
= وكت جاي منو يشتهي روح وراسا افرش ونام
ابتسم :: خاف كريم ايريد
= عود اسال خاله ام كرار اذا يريد اني اصبه واجيبه
:: عيب تسالينها شنو قحط جاي
= عمو هو القوري مخدر هسه اصب واخذه وياك
:: خوش بعد احسن
رحت للمطبخ صبيت بس استكان واحد هو باوعلي :: شنو هاذ
= بس العمو كريم انت تعبان وراك شغل من الصبح رووح نام وارتاح
اخذ الصينيه حاجيته = دير بالك على علاوي
:: جا هو وين
= من سمع اجه عمو كريم راح للمضافه خلي ينام يمكم
:: خوش
داريريد يروح حاجيته =عمو
باوع عليه :: ها
= الخابرتك قبل شويه هاي رقيه مو
بلل شفايفه بلسانه واتنفس :: خابرتني اتكلي رايده تجي ويه بيت ابو غياث بس همه صار عدهم شغل وما كدرت تجي وتعتذر
= تعتذر ليش انت عازمها
حك خده //. اي من خابرت رحيم هي جانت عدهم
= ها وسلمت عليك وانت عزمتها
:: اي
=. مو تشوفها واكفه ...
:: ليش سكتي ؟
=. ولا شي
:: لا احچي
=. هي هاي رقيه شكو لازكه بيك
ابتسم :: هي البنيه دمها خفيف وتجامل ما تقصد شي الجاي برد رجعي وصبي غيره
رجعت الاستكان وصبيتله اخذ الصينيه وراح واني احجي ويه نفسي =المفروض اگله بعد لاتحجي وياها ولا تنطيها وجه
=. عود ليش
رفعت اكتافي =. ما ادري
هزيت ايدي وضحكت على نفسي =. صدك غبيه شعليج وتتدخلين تردين تصيرين ولية امره
انا اخذت جاي وكعك وفواكه ورحت يم بيبي شفت فرح نازله وعمه رجاء كاعده يمهن بس مبينه ضايجه
صرنا نسولف الحد ما نمنا الصبح راحو بيت عمو كريم وخاله شيماء الي وصتني ادير بالي خصوصا من نهاد
صرت اتجنب الكل وبهاء يمر يسلم على بيبي ويطلع مرات من انا موجوده يمها بالغرفه ارد السلام وساعات اكون بالمطبخ
او ادرس بغرفة عاصف ما اطلع ولا اشوفه وبقيت نفس ما اني اروح للمدرسه واشتغل بالبيت وادرس اني واخويه
اجه عمو عاصف سلم ::السلام عليكم
عليكم السلام هله يمه الله يساعدك
هله بيج حجيه
راح غسل بالمغسله وانا خليت العشا ع الطاوله بيبي گالتله //. اتعشى يمه وروح ارتاح مبين عليك التعب
:: بعد هذا كل سنه مو جديده عليه
- - گبل اشوى وياك بهاء
ما جاوبها صار ياكل سالها :: وهو كام ما يمر
لا شني ما يمر انت الماموجود
:: ها يمر عليج
- - اي يمه بس مو يوميه يجي ويحبني ويكعد يمي ويروح انت الما موجود وما تشوفه
:: شسوي حجيه الشغل الفوك راسي
بيبي لملمت حلكها وباوعت الرجاء وفرح // اكلج رجوه ما دام بهاء ابيته. ودي غراضه هناك وفرغي الحجره مالته
رجاء // ليش عمه المن
المن بعد الوجدان وعلاوي
ما ادري عمه بس هو خاف ما يرضى
جا مو گاعد ابيته ليش ما يرضى
اجه صوت بهاء الي من اتزوج انا اتحاشى وجودي من يجي راسا ادخل بغرفة عمو عاصف لكن هالمره ما كدرت
ياهو هذا الما يرضى السلام عليكم
:: عليكم السلام
شلونج جده
هله بيك
شو من وره خشمج هله بيك
خايب انت هم تحجي
شمسوي جده
بيبي // عمك لوحيده بالشغل ياخذه الليل ويجيبه الليل وانت مبنطر ملتهي بالاسواق
والله بهاي حكج بس هالايام عدي شغل ما كدر اعوفه
:: يمه شنيه خلي براحته انا وياي جابر وفواد
الله يعينك
بهاء //. والله مبين من كلامك زعلان عليه
هز راسه :: لا عليمن ازعل
بهاء اتنفس //. حقك عاصف بس تعرف مشتري بضاعه وجاي اخليها بالمخزن والشغل اذا مو صاحبه يوكف علي يخرب
:: الله يوفقك
بهاء بابتسامه // اي ما كلتولي ياهو الما يرضى
فرح // جدتي تكول خلي بهاء ياخذ غراضه البحجرته تريدها
باوع الها // المن تردينها
اريدها الوجدان وعلاوي
ليش مو اكو حجره فارغه فوك وخلي يرحون بيها
بيبي //. وينهي
بهاء // البصف المخزن
بيبي هزت راسها // الزغيره اريدها العلاوي وحجرتك الوجدان
حك خده // والله حجيه اعذريني هاي حصتي من بيت جدي حجرتي ما اطيها بعد انتي تدرين بهالدنيا ما تتامن
بيبي // شني يا ستار شسادي عليك
جده خاف المره تطردني خاف ازعل عاد اجي اكعد بيها
بيبي // هاا تگول المره غاسلتك
وداعتج غاسلتني وجه وگفه
بيبي // عن الشقى اريد حجرتك
هز راسه وباعلي // لا جده ما اطيها حجرتي تبقى موجوده انا احتاجها
بيبي // المن ؟
بهاء // شني المن المرتي الثانيه
بيبي باستهزاء//ههههه ياهو الياخذ انت
هز راسه واعرف الكلام موجه الي // اي وداعتج وروح جدي وابوي اخذ واخذ وعيونكم تشوف اذا انتم اتضحكون
على روحكم وعبالكم ما اخذ الي ابالي لو من عرست عبالكم اجوز لا هاي كطنه والكل يشلعها من اذانه لو يبقى من
عمري يوم اخذها وعيونكم تشوف
بيبي // تنجب انجب لا تسمعك نهاد
صار يحرك بادينه // ههههه شوفيني كمت ارجف خاف تسمعني نهاد واذا سمعتني
بيبي // خايب تثولك تخليك مسودن
ههههههه بهاي صدگتي تره حتى لو ما سمعتني الله يسلم امي اول بااول الاخبار عدها
رجاء// صدك ما تستحي ولك شني انا افتن
اتقرب منها وباسها // لا يمه بس انتن اخوات وتسولفن
رجاء// خلف الله عليكم الحجيه سوت نهاد سحاره وانت سويتني فتانه يجيني اكثر اذا هذا حظي ويه ابني اسكت احسن لي
بيبي // هسه انا گلت نهاد سحاره
رجاء// جا شني عمه كلامج
بيبي بابتسامه ماكره // اگول نهاد مثل ما ثولت مهدي يجوز تعلم بتها تثول بهاء (وجهت كلامها البهاء ) هسه ما تطيها
بهاء// اعذريني حجيه خلوها تروح هي واخوها بالغرفه الفوك على گولتها
بيبي // شني گولتها شكايله
باوعلي وابتسم // ههه الغرفه مو مثلنه احنه العرب العايشين بالريف الغير متعلمين نسميها حجره
وهمه المدنيين العايشين بالمدينه يسمونها غرفه واحنه هم جاي نتمدن مثلها وغرفتي ما اطيها
بلعت ريگي وجاوبت = بيبي اني ابقى يمج بغرفتج وعلووش يمنه
كمت من الاكل ورحت الغرفة بيبي بقيت ساكته اصلا روحي فارغه بعدها سمعت صوت عمي عاصف بالهول
::وجد
طلعت = بلي عمو
:: سويلي جاي زين
رحت للمطبخ وشفت بهاء يباوع للنقال اخذت القوري وغسلته رجاء گالت // ليش ذبيتي الچاي البي
= عمو يريد جاي جديد
جا هذا توج سويتي
رفعت اكتافي = شمدريني هو گلي
جاي اخلي بالقوري ماي بهاء اتقرب مني //. الحجره وصاحب الحجره تحت امرج
= اشكرك اني ابقى يم بيبي
اي ابقي انا اقصد الحجره اتصير الج هي وراعيها من نتزوج
ما رديت خصوصا ورجاء تريد تنفجر علينه خدرت الجاي وصبيت العمو باستكان واني طالعه اجت ساره
صارت عيني بعينها وكفت اباب المطبخ وحجت
شنو انت اهنا بهاء وانا بالي يمك
بيبي // سلمي بالاول تره ما شارد ولا بايگينه وهم اوليدنه والنه حصه بي
ساره // جده اتاخر وخفت علي
اي حكج جده
عاصف :: بابا ساره من تجيين الرجلج وتشوفينه گاعدين لا تحجيين بنرفزه
ساره // عمي ما متعود هلگد يتاخر
بيبي //. تعال بهاء مرتك تريدك
انطيت الچاي العمو ورجعت للغرفه سديتها وكعدت اقرا دروسي واسمع سوالفهم وضحكهم كنت اقرا مرات يتشتت ذهني
واكون مو ويه الماده ومرات اجبر نفسي ع القراءه
وكنت ما اگعد يمهم ولا اشاركهم لان اعرف هذا الشي يضوج ساره وعمه رجاء وهم حتى اتحاشى نظرات بهاء وكلامه
الي اعرف بي ايوجهه الي وفعلا ما دام يوم والثاني يجون وسوالفهم وضحكهم بااذني يرادلي غرفه ابحدي او اني وعلووش
ومن اجت بيبي للغرفه وبعد ان اتمددت وطلبت مني امرغ رجليها حاجيتها
= بيبي
ها
= بيبي اني صدوك يرادلي غرفه اقلها اقرا بيها
مو هل انتي جاي تقرين
= بيبي مدا اكدر اركز يعني دا اقصود اني جاي دا اسمع كول شي السوالف والشقى والضحك وهذا يشتت انتباهي
وكل شويه واحد فاتح الباب وساده
- - ها مو عاصف اطاج حجرته ليش ما تقرين بيها
= بيبي استحي عمو يجي يريد يتمدد يسبح بحمامه ايغير ملابسه ميصير يجي واني بالغرفه ويا طالعه ويا راجعه
بيبي // جا شلون ؟
= اني اگول ما دام بهاء ميقبل ينطيني غرفته اني عندي حل
- - حليش ؟
= بيبي عمو عاصف يصعد فووك واني اخذ غرفته
- - يصعد فووك وين ؟
= يم مرته وبنته
گعدت بيبي وحاجتني وهي رافعه اصبعها
• • اسمعيني ديري بالج هاي الحجايه تحچينها يم احد افتهمتي بهاي الحجره اتدرسين وهذا هو ومن يروح
عاصف انتي فوتي الحجرته وادرسي بيها
= بس اني مرات ما افهم
- - مو عاصف گالج من يجون ادرسي بحجرتي هذا هو بس مالت تاخذين حجرة عاصف وعاصف يصعد فووك
هاي لا تعيدينها
هزيت راسي واني دا احس بخيبة امل كبيره من ردة فعل بيبي
وبقيت مثل ما اني وبعد فتره صار عد غزوان ولد وراحت بيبي ومهدي ونهاد وعاصف يباركون
وعمه رجاء ما قبلت تروح ومن رجعو بيبي سالتها //. ليش ما رحتي ويانه نبارك الغزوان
عمه اروح ويه بهاء ومرته
ها شني اله انتي تاخذينهم
لا عمه ليش الجذب اخاف
منين تخافين ياستار
عمه اخاف من ابني ذاك اليوم گدامي من ردتي منه الحجره گال ما اطيها ومن اجت (اتاشر عليه ) كالها الحجره وراعيها تحت امرج بيبي // ها وشني هي مو صيته هيج يحجي كلنه ندري ابهاء شيريد
ما گلت موصيته بس الاصول وانا واگفه تگله لا انت مثل اخوي عيب هذا الحچي
= عمه اني اتفاجأت وما عرفت شنو اگول واصلا لو ما عمو عاصف طالب چاي اني ما ادخل
ومضى على زواج بهاء اربع تشهركنت اقرا بغرفة عمو عاصف لمن ما سمعت مهدي يكول
وين امي. يممه
طلعت بالصاله شفت بيت عمي مهدي مبين على وجوههم الفرح
سالني مهدي امي بحجرتها
هزيت راسي هو راح ودخلت ورا مرته واني اسمع بيبي تگول صلوات على محمد وآل محمد
وصارت بيبي تبچي وهي اتكول يمه بدر دارك زهت واتعمرت
ودقايق واجه بهاء هو وساره الي كانت مبدله ومتمكيجه وبهاء شايل علاليك وهو يگول يمه يمه
طلعت رجاء هله بيك حبيبي مبارك گلللوووش
الله يبارك بيج وباس راسها وانطاها العلاليك // وين جدتي
بحجرتها يم عمك
وگفت وصلت يم ساره ابتسمت وبستها = مبروك ساره حبيبتي
ردت ابرود // الله يبارك بيج
رحت وره عمتي للمطبخ = روحي عمه اني احضر
- - لا انتي روحي ما عدي شي
ميخالف اني اسوي تشكيله واجيبها ومن ادك الباب اطلعو للهول
رجاء// ها ليش عود ؟
ابتسمت = يعني عمه هيج شويه تغيير راح احضر كولشي بدل ما كلساع نجيب شي وهم شويه تغيير وفرحه
هزت راسها // بس مو تتاخرين
= لا قابل اطبخ دقايق
فتحت العلاليك جايب كيك وكرزات وفواكه وحلويات وعصاىر اني سويت نسكافيه لان حلويات وخليت بالصحون بمنظر
حلو وجبته للهول ودگيت الباب وعمه رجاء كالت // يالله عمه خلي نگعد بالهول
بهاء // شني يمه وين الجبتهن
رجاء // اي تياالله اطلعو للهول
اني رحت جبت الفناجين والترمز وهمه گعدو وصارت عمه رجاء توزع واني اصب الكهوه بيبي باوعتلي وهزت راسها
بعدين حجت
- - جا ما وديت على عماتك وخليتهن يجن وهم يسمعن ويفرحن
بهاء// الجمعه ان شاالله انسويلهن غدا ونعزمهن
- - ان شاالله
اجه عمو عاصف :: السلام عليكم
الكل وكفله // وعليكم السلام
كعد وكعدو :: هاي شنو اليوم محتفليين
رجاء// اي مو راح يجي حفيد البيت غازي
باوع البهاء وهو فاتح عيونه وبهاء هز راسه حضنه بشغف وكله :: مبروك الف مبروك يراد ذبيحه لوجه الله
الله يبارك بيك
:: تعاي بابا ساره
باس راسها ودعا :: الله يتمم عليكم
باوع البهاء :: وهاي انت جبتهن
ابتسم // اي عمي فرحه
بيبي //. انطي صدقه جده
هز راسه // اي ان شاالله انطي بدون ما توصيين
بيبي // عفيه ابني تره الصدقه تمنع هواي امور مو زينه
- - ادري جده
عمي عاصف كام وكال :: انا كلش تعبان اروح اسبح واتمدد وراي غبشه
بيبي // حتى ما نشوفك
:: بس هالايام شغلة وكت صدك مهدي باجر بطرة الفجر يمي عدك حمل
- - اي ان شاالله ان شاالله
:: مو ان شاالله وتظل نايم احرك النقال عليك
مهدي // لا يمعود ذاك اليوم ناسي النقال ما بي شحن وماخذتني نومه
راح الغرفته وهمه ايسولفون ويضحكون بعدها ساره كالت // دخت راسي جاي يفتر
رجاء //. يمه فووت اخذ مرتك وروح البيتك تعبت خطيه
بيبي //. منين تعبت من نكال الماي
مهدي //. احنه ابختج يمه ياهو هسه صار ينكل ماي
نهاد //. ياالله مهدي مو سمعت وراك غبشه
مهدي // اي جاي
راح. الكل ورجاء صعدت فووك هي وفرح اني جمعت الصحون وشطفتهن ع السريع ومن رجعت الغرفة بيبي اتذكرت
كتابي بغرفة عمو عاصف
= اووو
بيبي // شبيج يا ستار
= كتابي بغرفة عمو نسيته
روحي جيبي
= خاف نايم واقلقه
بيبي // جا غير تردين تقرين بي روحي ادخلي بسكته وجيبي
= لا بيبي اذا ما ادك الباب ما ادخل واجيبه
بيبي // اي روحي واخذيله شي ياكله
= شنو ؟
- - من هاي الحبشكلات هو ما ضاكهن حطيله بماعون
=. مو اخاف الگا نايم
الا نايم خليهن يمه من يكعد الفجر يفك ريكه
= لعد خلي اسويله نسكافيه واذا الكا نايم اني اشربها
بكيفج شتسوين سوي
اخذتله كرزات وكيك ونسكافيه وصحن فواكه ومن اخذته شافتني بيبي الي رايحه تتوضا
بيبي هزت ايدها وگالت // عشتو هذا كله ياكله
ابتسمت وهزيت راسي دكيت الباب وفتحته شفته متمدد وخال زنده على عيونه اتقربت منه = عمو
اتنفس بدون ما يشيل ايده :: اممم
= عمو اكعد اكل شويه
جاوبني بتعب :: ما اشتهي تعبان
= ميخالف اكل اي شي حباب
رفع زنده وفتح عيونه واتثاوب اني حاجيته = عمو اكل اي شي
گعد على حيله وباوع اتثاوب اخذ خلاها بحلكه :: ما شفتج من اجيت
= بالمطبخ
قطعتله كيكه هو هز راسه واشر باصبعه :: ما اكل الكيك
=ليش ؟
:: ما ارغبه مره اكلته ولعبت نفسي
= اكيد الي مسوينه ميعرفون
:: يجوز
= بس اني اسوي حلو
:: حتى لو ما اكله
= اني متاكده من اسوي تاكله
:: لا ما اكله
= زين لعد اكل هاي التفاحه
:: ما اشتهي
= عمو الخاطري اكلها
:: كصيلي نص ما اكدر اكلها كلها
= لويش
:: لان متعشي مثكل بالعشا
= شنو اتعشيت لا تكلي شويتو سمج ؟
هز راسه :: لا كراعين
بلعت ريكي = شنو ؟
:: كراعين هووش
= هاي السوتها عمه رجاء رجلين البقر
:: اي هنه
بلعت ريكي باشمىزاز = عمو تاكلوهن بالليل
:: اي ليش لا جدر شكبره بي تقريبا خمس ست كيلوات وياهن بصل وطرشي وخبز حار
= لعد انتو شكم واحد واكلتو هاي المجزره
:: هههههه سته لا سبعه
= وهاي كله اكلتو
:: اي كله اكلنا
= بالعافيه
:: الله يعافيج
حاچيته بفرح = شوف عمو اخذتنه السوالف وانت اكلت حلويات وفواكه
:: اي لو على سوالفج اسمن
= شتسمن اذا ماكل رجلين بقر عشره كيلو وما تسمن تريد تسمن من شويه حلويات
= ما تشرب نسكافيه
:: لا تسهرني وانا اريد انام
=. لعد اشربها اني
شربت منها =. طيبه
اخذ الكوب وشرب الباقي = اجيبلك بعد
:: لا اريد انام وياالله شيلي صينيتج وروحي
= تمام
درت اتذكرت الكتاب = شوف شلون نسوه
:: شكو ياستار ؟
= كتابي ايهنا خليته
:: ياكتاب ؟
= كتابي الاحياء
:: دوري خاف مو اهنا
= لا عمو من اجو بيت عمو مهدي اني خليته وطلعت
:: دوري وتلكينه ما يضيع
صرت ادور وماكو هو رد سالني :: انتي متاكده اهنا عفتي
= بلي عمو
:: چا وين راح
وصرنا ندور علي لمن ما رفع المخده وشفنا موجود هو كلي :: هذا جوه المخده
لملمت حلگي وحكيت خدي = ايي مو من اجوي اني كنت متمدده فخليته جوه المخده
:: هااا
هزيت راسي = بس اني ما اتذكر خليته ايهنا
:: هااج وروحي اقري
اخذت الكتاب = شوف شلون بيبي عدها حق من گالت تريدلي غرفه ابحدي
هو اتنفس بعمق اكملت = هو اني گلت البيبي
:: عليش ؟
گعدت ع القنفه والصينيه بيدي = هو رأي بس بيبي صارت عصبيه عليه
وگفت ردت اطلع گلي :: اوگفي
اتقرب مني :: اتعلمي من تحجيين تكملين كلامج
دنگت = عمو ماكو شي
:: لا باالله سولفي
بلعت ريكي = كل ما باالامر هو مجرد راي اني گتلها بيبي ليش ما عمو يعني انت تصعد فووك يم زوجتك وبنتك
واني وعلاوي ناخذ غرفتك
سالني بدون اهتمام. :: وشگالت ؟
= مو كتلك عمو صارت عصبيه وگلتلي (صرت اقلد على بيبي واهز بااصبعي ) هذا الكلام بعد لا تحجينه
هز راسه :: زين اتسوي
اتفاجآت من كلامه. رديت. = اني اسفه وحتى بعد ايهنا ما اجي واقرا
رفعت اكتافه :: بكيفج
طلعت رحت للمطبخ لميت المتبقي ورجعت كعدت بالصاله وصرت اراجع واني احجي ويه نفسي
= بعد ما اطلب منهم شي
صرت اقرا واصلا مو يم القراءه وحسيت اباب غرفة عمو انفتح واجه يمي :: جاي تراجعيين
هزيت راسي هو اتقرب عليه وگلي
:: شوفي بابا كل واحد بينه بهذا البيت اله خصوصيه وهاي الخصوصيه مرات تنوجد اهنا (واشر على گلبه ) ومرات اهنا
(واشر على عقله ) ومرات الخصوصيه تنوجد بمكان عمله او يجوز يكعد بحديقه او بغرفه
= عمو اسفه لان طلبت هذا الطلب
:: من حقج اتطلبين بس مثل ما گتلج حتى اذا تردين اتنامين بحجرتي نامي وهاج
طلع مفتاح اني باوعتله = شنو هذا
:: هذا مفتاحها تدخلين. انتي واخوج تقرين وتگعدين ترتاحين بيها وكل شي بيها انا امونج علي.
هزيت راسي = لا عمو اني اسفه لان طلبت منك هذا الشي انت مثل ما كلت كل واحد واله خصوصيته.
بس محد فكر بخصوصيتي
:: الج حق هاج اخذي المفتاح خلي. يمج
= لا ما اخذه اني اقرا بااي مكان حتى لو بره
هز راسه وراح وشفت الزعل بوجهه مو بس الزعل العصبيه هماتين وبيني وبين نفسي حجيت
= حتى لو زعل ما عليه لعد ليش ما يفكرون بزعلي
= لج شيفكرون نسيتي انتي شنو بهذا البيت
كملت قراءه ورجعت للغرفه نمت وگعدت الصبح وبيومها وصلني عمو وگلي ما يكدر. يمر عليه راح يخابر السايق
وصار هذا روتيني بيوم الي ما يوصلني عمو. او يجي عليه ايخابر السايق وهذا الشي حييل اذاني يعني شمعنى اني. هالشكل
هاي فرح اجرلها خط تكسي للكليه وهاجر ياخذها ابوها او اخوها بس اني. بيوم الي عد عاصف شغل لازم امشي شكد وانتظر الخط
المشي. الصبح حلو خصوصا ابين المناظر الموجوده من اشجار ومناطق مزروعه ونهر الصراحه اني اتونس الصبح.
من اطلع لان اشم نسيم الصباح وصرت اعرف المنطقه وما صرت اخاف من الكلاب لان حتى هنه عرفني
اكثر من مره واني امشي يجي بهاء ويعرض عليه ايوصلني لكن اني ارفض. واتشكره واكله
= عمو خابر الخط وهسه يجيني
وبيوم لگيت عمه سعاد عدنا واني سلمت وهي ردت وكالت // تعاي احبج
وصلت يمها وسط استغراب بيبي وباستني وهاي اول مره تطلب مني هالشكل // اشلونج عمه
= الحمد لله
حسيت بروحي طلعت لان ادري بيها كذابه ولان اني هماتين اكرهها اخذت ملابس ورحت للحمام واني ابدي اتقيا
بدلت واتوضييت وصليت بغرفة عمو ورجاء جابت الغدا.
وكعدنا ناكل وسعاد تسالني
- -شلونج بالدراسه
- - وترحين ويه الخط. ومن ما يجيج عاصف شلون ترجعين
كملنه الغدا شلت الصينيه وسعاد اتكلي // سويلي چاي زين من اديج الحلوات
رحت خدرت الجاي وغسلت الصحون واخذت القوري والاستكانات وبديت اصب چاي وعمتي سعاد تسال على عمي
عاصف ويمته يجي وبيبي سالتها // شرايده من عاصف
• يمه شغله
• شغلة شنو خير ان شاالله
• ان شاالله خير هو انا خلي افتح الموضوع وياج وتالي انتي سولفي على عاصف ولو احنه مستعجلين
بيبي // احجي اسمعج
سعاد // يمه غزوان ما متراهم ويه مرته ويريد ايطلگها
بيبي هزت ايدها // هذا متعافي
ردت بهدوء // بعد يمه مو عجبه ياما ناس اتزوجو واتطلكو
- - اي صحيح بس خطيه عنده وليد ليش يريد ايطلگها
- - يمه يكول ما اريدها وحتى لو اخليها على ذمتي اخليها الخاطر الولد
- - الله يهدي
- - آمين وانا اليوم جايه حتى اخطب الغزوان مره
بيبي باستغراب // تخطبيله ؟
هزت راسها // اي يمه هو وداني اخطبله مره بعد انتي تدرين الرجال اذا اتعلم ع المره ما يگدر ايفارگها
وكفت ردت اطلع بس هي لزمت ايدي // اوگفي عمه لا ترحين انا اريد الحجي مكابل
باوعت البيبي // يمه غزوان وداني اخطب وجدان
بيبي باستغراب وعصبيه // شني
مثل ما سمعتي يكول بت خالي وبت عمتي وانا مو غريب عليها
سدي الموضوع سعاد بعد لا تحجينه
ليش يمه شبي غزوان
مابي شي بس ما يصير هيج تحچين چان انتي ما اجيتي وكلتيله يمه عيب رجع امريتك وربي وليدك
سعاد // يمه حاجيته بس هو گال نفسي طابت منها وهلوداني ويگول انا حاضر الكل شي تريدونه
لا يمه ما عدنا مره اله گليله جدتك اتكول رجع مريتك وربي ابنك لا يتدوهن بالنسوان
يمه ما اضم عليج صارلي شكثر اقنع وماكو بس هو مصر
يمه خلي يدور ابعيد عنه وجدان موش مال عرس هسه
ياا تره مو زغيره البكدها حبلن وجابن
والبنيه تريد تدرس
اتكمل عدنا يمه
بيبي هزت راسها // لا يمه شني اتكمل هي تظل بمدرستها والله كريم
والنعم باالله يممه بس خلي نسمع رايها للبنيه
بيبي تحرك بايدها // ياراي هذا سعاد البنيه ما تعرس
سعاد تباوع لي وتبتسم // ها عمه وجدان انا جايه اخطبج الابني غزوان شتگولين
بيبي //. شوفي هاي تحجي سته بالشهر
ها عمه شكلتي
هزيت راسي وسط ذهول بيبي وعمه رجاء بيبي زمخت عليه // ولج انتي شتسوين
سعاد // خليها يمه خليها تحچي (باوعتلي ) احچي عمه ولا تخافين من اكبر واحد
بيبي // سعده شني تردينها بالكوه
سعاد // يمه ياگوه هاي البنيه وناخذ رايها احجي عمه انتي قابله بغزوان
عوفيها مو وكته هسه
يمته وكته ما تحجين رجاء
رجاء// خاف احجي وعمتي تكول ضايجه وتريد الفكه
سعاد // عاد انتي ام بهاء ياهو مثلج
بيبي // سعاد البنيه تدرس
سعاد // جا واحنه انخليها تعوف دراستها لا يمه احنه نريدها تدرس وتكمل ها عمه شكلتي
بيبي بعصبيه // اگلج شو انتي مره تحچيين وياي انوب تردين. على البنيه
سعاد // يمه غير هي صاحبة الشأن والراي الاول والاخير الها ها عمه شگلتي
جاوبتها = موافقه
بيبي // شني ؟
هزيت راسي = بس بشرط يخليني بمدرستي
رجاء اتفاجات وبيبي خزرتني وحجت بعصبيه // شني هسه ردتي تتزوجين ليش من خطبج بهاء ما قبلتي
= لان هو مثل اخويه
عوجت حلگها // هاا مثل اخويه انهجم بيتج وبيت اخوج ترا مهجوم من زمان
سعاد //. خوش يمه انا رايحه وانتي اطي خبر العاصف
رجاء // خو انتي تاني
سعاد // لا خيه امي تحجي ويا وانتي هم ام بهاء وبلغومهدي واحنه حاضرين بلي تردونه ياالله نسلم عليكم
رجاء// تاني واحد من الولد ايزتج
- - لا غزوان متانيني ع الشارع
باوست بيبي وعمه رجاء وراحت رجاء طلعت وراها واني بيبي بقت تخزر بيه رجعت رجاء وراحت للمطبخ
وبيبي حجت // انتي قابله صدك لو تتشاقيين ،
= بلي قابله
بيبي بعصبيه // وبعد ما مستحيه تكولين قابله
هزيت راسي = اي بيبي شبي ابن عمتي وابن خالي وحيد وهم حالته الماديه زينه
بيبي // هسه صار ابن خالج هو انتي شايفه خالج تعرفينه
ما جاوبتها هي ردت // ما تحچيين وبهاء اشعايز حتى تكولين حالته الماديه زينه
= بيبي اني سبق وگلت بهاء حاله حال هشام
بيبي هزت ايدها // انتي شعبالج بكيفج تكولين على هذا اي وعلى ذاك لا
= بس اني موافقه بيبي
خلت اصبعها على حلكها // اسس ولا كلمه لا تفكيين حلكج اسكتي وخلي اگلج الحچي لا بكيفي ولا بكيفج يجي
عاصف عوود كليله قابله شلون وكت اغبر. بنات بعدهن بالبيضه ما نگدر عليهن
رجاء//. عمه ما دام البنيه قابله خليها تروح بحال سبيلها ،
بيبي //. خو انتي ما تعولين
رجاء//. اي عمه ليش الجذب ودي تعرس وتنستر حتى ابني يدير باله على مرته
بيبي //. ليش هي شمسويه الابنج
عمه ذاك اليوم من حجيتي يطيها الحجره گدامي حاجاها الحجره الج وانا وياها من نتزوج وهسه يجي ويروح يكعد يم
مرته امحايا لا بسالفه لا بضحكه عمه خليها تمشي بلكت ينساها ويدير باله على مرته وابنه
بيبي //. ها ومن يدري يسكت عاد خلينه ما نطيها وشويه شويه يعرف البت ما تريده
رجاء// عمه الفرخه اذا ما تاخذ هذا ولا يعوفها ابني واعرفه ع
بيبي //. ومن يسمع
لا عمه ما نخلي يسمع محد ايكله وانتي فهمي عاصف يودي منا منا
بيبي //. وانا ترديني اظلم البنيه على مود بهاء يدير باله على مرته كلكم تعرفون بيومها شكال هي حجايه
وجدان ما تاخذ غزوان
رجاء طلعت واني اتفاجات من ردة فعل بيبي. ليش ما تريدني اتزوج شنو السبب شفتها ضايجه وصايره
عصبيه اخذت جدولي ورحت الغرفة
عمو عاصف حتى اقرا دا احس حتى الغرفه ما تريدني كعدت فتحت كتابي. حاولت اقرا ما كدرت كان عدنا
حل رياضيات گعدت بالارض وصرت احل صح خطا اريد اشغل نفسي الخايفه المتوتره المغرب طلعت من الغرفه
ورحت اتوضييت وصليت ودخلت للمطبخ سالت عمه رجاء الي كانت كاعده بالهول = عمه شسوي عشا ا
- - بكيفج انا وفرح نروح البيت بهاء نتعشى. عاصف ضامتله من الظهر فخذ دجاج واناي شوفي حبوبتج شتريد
وسويلج عشا انتي واخوج
راحت من الباب الثاني. واني رحت سالت بيبي رغم اعرف بيها زعلانه لكن حاولت اختصر السوال
= بيبي. اشويلج. باذنجان لو اسويلج حليب
بدون ما تباوعلي // سويلي حليب
رحت للمطبخ فتحت الثلاجه اشتهيت اسوي بيض وطماطه قطعت الطماطه وقبلها ذبيت شويه بصل. بالزيت وخليت الطماطه وخلطت تلث بيضات ظليت اخلط بيهن الى ان صارن مثل الكريمه ومن استوت الطماطه خليت فوكها البيض ونصيت الطباخ الى ان صارت
مدوره بالكامل وتشهي خصوصا واني ضفت عليها الكركم والفلفل الاسود وطلعت الخبز بعد ان حميته زايد بالاوفن وصبيت جاي الي والعلوش وسمعت صوت عمو عاصف اجه مر سلم على بيبي وفات للمطبخ من شفته وكفت هو گال
::السلام عليكم
عليكم السلام
غسل اديناته بالسنك مبين تعبان
=عمو اخليلك عشا
هز راسه وسالني ::ليش شنو عشاي
=عمه مخليتلك فخذ دجاج دقيقه بس احمي
لا عوفي اشتهيت اكل بيض وطماطه صبيلي جاي
علي () حتى اني اتعلمت مثلك اشرب جاي ويه الاكل
ابتسم ::لا حبيبي مو كل الاكل نشرب ويا جاي اكو اكل نشرب الجاي وره ما نغسل مثل السمج والتمن والمرك والتشريب
() اادري عممو. دا اقصود على الي نشرب ويا الجاي
= كافي علووش خلي عمو يتعشى
:: عوفي يحجي براحته ،لاتزمخين علي
رحت جبت صحن وخليت بي بيض وطماطه وخليته گدام عمو والي بقى بالطاوه خليته بيني وبين علاوي وصرنا ناكل بعد ان صبيت جاي الي مستغربتله وداىما اسال نفسي بس ما اتجرا اسال عمو او بيبي ليش عمو من يجي ابد ما يسال عن رجاء وحتى ما صار يسال عن فرح والي من يوم الي اتزوج بهاء صارن يرحن يتعشن هناك ويتاخرن ياالله يجن للبيت واذا صادف جمعه فيباتن هناك ومن يجن ثاني يوم يسولفن على انو بقن ويه بيت بهاء ومهدي للفجر وهمه يسولفون ويضحكون
لكن ولا مره شفت عمو عاصف راح البيت بهاء واتعشى او بقى يمهم
بعد ان كملنه عشا هو گال الحمد لله وباوعلي وحاجاني
:: من تكملين عشا انتي وعلاوي جيبيلي جاي يم امي
هزيت راسي واني دا اترقب ردة فعله على خطبة غزوان الي غسلت الصحون وحميت الجاي واتعمدت اتاخر لان
اعرف بيبي اكيد راح اتسولف اله اخذتله استكان وخليت گلاص ماي بابصينيه ورحت قدمته اله بدخلتي سمعته
ايكل البيبي :: سهله يمه انتي لاتضوجيين
انطيته الاستكان واني طلعت كعدت بالصاله يم علي الي متمدد ع القنفه سالته
= لويش ما تروح تنام مو باجر عندك دوام
() ي فد شويه
= شبيك علاوي ليش هلكد ضايج
() ابراهيم ما صار يجي يلعب وياي لان انتي ضميتي البلي
هزيت راسي = اي لان من اطلعه تصير ما تقرا وترسب وهو هم وبعدين يكلون كله من علاوي ملتهي بس يلعب ويا
( ) بس اني اضوج
= لو يش تضوج مو تطلع للبستان مو تلعب ويه اولاد عمو جابر
() بس اتي تدرين اني احب ابراهيم وهو صديقي
= علي صديقك الي يعرفك بس وقت اللعب هذا مو صديق
تستمر القصة أدناه
باوعلي باستغراب هزيت راسي = اي علي المفروض الصديق يكون اخ وهو ابراهيم مو بس صديقك وابن عمك
يعني اخوك بس هو وينه اذا ماكو. بلي مدا نشوفه
() يروح يم اخته
= تمام وان هماتين تبقى يم. اختك
حضنته = تدري بيه شكد احبك بكد هاي الدنيا كلياتها
( ) واني هم احبج
= حبيبي لازم تشد حيلك وتنجح حتى يكبر. هذا قبل هذا (اشرت على عقله وطوله )
( ) ههههه
= بس اكمل امتحانات اكول العمو يطلعنه نغير جو.
( ) وين
= وين ما كان ياالله فوت غسل وفرش اسنانك ونام واني راح احضر ملابسك
راح. علي للمغسله واني دخلت طلعت ملابسه ورحت اكويهن بالهول عمو طلع راح الغرفته وكلي :: الصبح انا اوصلج
هزيت راسي وانا. امثل القوه لان اعرف بيبي مسولفتله على جية سعاد وموافقتي كملت. ورحت طلعت ملابسي
كويتهن واتمددت واعرف بيبي ما نايمه وهم زعلانه عليه
الصبح كعدنا صلينه واني طلعت للصاله راجعت وبعدها سويت جاي طلعت جبنه اكلتها ويه نص صمونه وشربت جاي
ورحت ندهت علووش الي گعد وهو. يتثاوب اخذته غسلت وجهه وگتله = بدل راح يجيك الخط
كل هذا وبيبي اعرف بيها گاعده. بس ما نازله من الجربايه سويت كوب حليب وجاي العلووش الي رفض يشربه مثل.
كل يوم وراح هو وابراهيم بعد ان اجا الخط
رحت سالت بيبي. اذا اخليها ريوك قبل ما اروح هي دارت وجهها وما جاوبتني
سالت نفسي ليش كل هذا. معقوله بيبي هلگد تخاف عليه من غزوان لو من سعاد
سمعت. كحة عاصف وهو يگول :: ياالله اذا كملتي خلي اوصلج
بيبي ونت بدون ما تحچي طلعت وگتله = صباح الخير
::صباح النور كملتي
= اي بس مو. بعده وكت يعني اتريك
:: ما اشتهي
هزيت راسي وركبنه. السياره ساكتين وصار عمو يسوق سريع الى ان وصلنه المنطقه. قبل المدرسه هو اتنفس بعمق وسالني
:: امي گالت جايه سعاد امس تخطبج
ةدنكت. وهزيت راسي :: وهم گلتلي انتي راضيه
بقيت مدنكه هو رد :: ليش مدنكه ارفعي راسج وجاوبيني انتي راضيه تاخذين غزوان
بقيت ساكته هو رد بنوع من. العصبيه :: انا اهنا جايبج اريد افتهم منج راضيه لو لا
رفعت راسي وبلعت ريگي =اي عمو قابله
::ها قابله تتزوجين غزوان.
= بلي
::غزوان متزوج وعنده ولد
= تگول راح ايطلگها
::وليش كل هذا. بعدج زغيره
=عمو اني قابله
:: قابله بغزوان
= ايي قابله ابن عمتي وابن خالي
:: ووانتي قابله لان هو ابن عمتج وابن خالج
=عمو غزوان عنده بيت وسياره و...
رد بعصبيه :: بس بس شو تحچيين چنج وحده. ما شايفه شني بيت شني سياره وانتي عايزه
بقيت ساكته هو رجع. اتنفس بعمق :: شوفي بابا وجد انتي مقتنعه ما كو ابن مره يجبرج بس مقتنعه اما تگولين عنده بيت
وسياره ف انتي مو فگر لو ما شايفه انتي بت خير وبعدج زغيره اما. اذا احد ضاغط عليج فكليلي حتى انا اتصرف
رفعت راسي = لا عمو اني قابله اتزوج غزوان
:: خوش. بكيفج بس انا رجال اخاف الله ما اطلب منه يطلك مرته يعني هو بكيفه يريد. ايطلگها يريد ايرجعها هذا شي هو يقرره
هزيت راسي وانا الملم بحلكي ساق وصلني للمدرسه والظهر اجه عليه رجعني للبيت وهو ساكت
ومن رجعت دخلت سلمت وبيبي ردت ابرود وما سالتني او حاجتني وعلاوي هماتين اجه وراي بدل واخذت ملابسه غسلتهن وشريتهن ع الحبل صبت عمه الغدا. تتغديت انا وعلاوي لان عمه گالت بيبي اكلت قبل ما نجي
بعدها شربت جاي وشفت جدول علاوي كان عنده كتابه فكتله يكتب واني لزمت كتاب الادب وصرت اقرا
من ما اجت فرح سلمت وكالت العمه رجاء جوعانه
عمه صبت الها واكلت ومن طلعت من المطبخ اتقربت عليه // مبروك سمعنا انخطبتي
بقيت ساكته هي ردت بضحك // بس الصدك ما چنت متوقعه غزوان
صدك وجدان انتي الج علاقه بي
= شنو هالحجي هذا مو عيب
- - ليش انا شگلت اي مخبل يسمع خطبتج يگول لو جانت رايدته قبل ما يتزوج لو حاكت علي من وره ما اتزوج
عمه رجاء كالت // كافي فرح ما عليج
- - شني يمه انا شكلت
- - فوتي اصعدي نامي وراج دراسه والبنيه بكيفها هاي حياتها وهي ادرى بيها يجوز شافته مناسب الها الله يسعدها
اتنفست ورديت = اشكرج عمه بس كان لازم اتفهميها الفرح انو اني ما الي علاقه بغزوان ولا شايفته واصلا حتى ما اعرفه
رجاء//. عوفيها تولي ما تعرف تحجي
صعدت فرح وانا بقيت فاتحه الكتاب اجه عمو عاصف شافني جاي اقرا سلم
:: السلام عليكم
= عليكم السلام اخليلك غدا
:: لا ما اشتهي وين امي
= بغرفتها
صوتها اجه من الغرفه // انا اهنا يمه تعال
:: سويلي جاي
هزيت راسي
رحت للمطبخ وسويتله جاي جديد وسمعته يحجي ويه بيبي :: شبيج يمه
حاجيت البنيه
:: اي يمه حاجيتها
اي وشكالت
:: راضيه
وبكيفها
:: حجيه ترديني اجبرها
اي اجبرها وكسر راسها
: : يمه نسيتي من اجت ام كرار وانتي ما رضيتي وبهاء گال الي شحجت مو صارت تكول تبيعون وتشترون ولان
انا يتيمه واخوي مسجون
وشلون ؟
:: حجيه وروح ابوج ما اكدر اجبرها
وتاخذ غزوان احركها بنفط وما تاخذه
:: يمه شتردين منها خلي التاخذه تاخذه لاتدخلين بخطيتها
خووش عفيه عليك خوش امانه وخوش حافظت عليها
:: يمه شسوي فهميني البت راضيه
وانت عمها مو بكيفها
:: كلتلي قابله شسويلها
اي هم صدك انا اسويلها
:: يمه عوفيها
اكلك انت شبيك شو عبالك دايخ وما مهتم
جبت استكانين جاي اخذ عمي استكان وخليت كدام بيبي استكان اخذته مني ومبين على وجهها القهر والعصبيه درت
اريد اطلع هي حجت // اوكفي ولج
وكفت حاجتني // اكلج لمن اجت ام كرار وخطبتج وانا ما رضيت ثاني يوم مو حاجيتج وكتلج اذا قابله كليلي وهسه
اخابرها واكلها البنيه الكم
هزيت راسي = اي بيبي
وانتي رديتي عليه ما اريد اتزوج اريد اكمل
:: يممه
بيبي بعصبيه // اوگف انت اتكتر خلي اكمل كلامي
=. بلي بيبي
- - وانوب خطبج بهاء وهم حاجيتج وكلتي قابله وتالي سويتي ذيج المصيبه ومحد حامالج بس انا وعاصف لو نسيتي
هزيت راسي
بيبي // جا هسه شحدا ما بدا
= بيبي اني قابله على غزوان وما اتزوج اي احد غيره
- - كالي مهدي صلفه بس ما صدكته
وكف عاصف وگال :: حجيه خابري بتج يجون الجمعه هي خطبه هي عقد
طلع وهو ينفخ وبيبي هزت راسها
نهاد ومهدي ما اجو ورجاء بالليل تروح هي وبتها البيت بهاء واني حتى ما درست وثاني يوم وصلني عاصف
ومن حليت الظهر ركبت بالخط ومن نزلت صرت امشي وبهاي الاثناء حسيت بسياره بصفي بقيت امشي هو نزل
عرفته بهاء الي لزمني من جتفي وكلي اركبي
////////
