رواية بنت الكهوجي الفصل السادس والثلاثون بقلم احمد
الحجية : اليوم سألت تميم عنو گال سألنا عنو وعن اهلو بالمنطقة والناس كلها تمدح بيهم وباخلاقهم والولد كلش مدحو بيه
ياقوت : تمام
- شنو تمام اريد اعرف شنو رايج
- اني رايي من رايكم انتو تعرفون مصلحتي فاذا موافقين اني موافقة واذا رافضين فاني رافضة دامكم معتبريني مثل اية فاني اعتبركم اهلي
- الله يرضى عنج دنيا واخرة يا روحي انتي لعد نفذي هالنصيحة
- شنو هي
- اني راح ابلغ تميم انج موافقة وانتي صلي استخارة علمود الموضوع يطلع من ايدج ويصير بايد ربنا واكيد هو يختارلج الخير
- تمام
عفتها وصعدت فوگ صليت استخارة ودعيت ورجعت نزلت ومر باقي اليوم طبيعي تميم بالليل انطى خبر لاهل الولد اني موافقة
واتفقو وياه ثاني يوم يجون يتفقون عالمهر والذهب وهاي الاشياء واني رغم متوترة بس اعرف ان قراري جان صحيح
لان الحجية مستحيل تختارلي القرار الخطأ وجان تميم واهلو كلهم مأيدين قراري بانو هم الي يتكفلون بالموضوع لان اني بعدني صغيرة
صحيح عمري مناسب بس اقصد صغيرة على هيج امور وهم اكيد يعرفون مصلحتي اكثر مني
تميم : من بلغتني امي بموافقة ياقوت انطيت خبر لاهل الولد وگلت من يجي اتفق وياه ايمتى ما تريد تزورنا يجيبها فورا
وما يطلعلنا بسالفة انو احنا غريبين عنها وثاني يوم بالليل اجو وگعدو ويانا هو وابوه وعمو وكم واحد من گرايبو وبدينا نحجي بالمهر
قررنا المهر 7 مقدم و 7 مؤخر والذهب گلادة ومحبس وتراجي وخاتم مع المحبس ( الذهب امي قررتو واني نقلتلهم كلامها )
الولد : شيخ تميم اريد اشوف البنية شوفة شرعية
تميم : سكتت لحظات لان صعبة علي يشوفها وهي امانة يمي وبنفس الوقت حقو باوعت لجدي اشرلي بعيونو يعني خليه يشوفها
ابوه : اذا بيها زحمة ما يحتاج شيخ تميم
تميم : لا حجي هذا حقو بس اخذلو طريق
ابوه : تمام
ياقوت : يوم السبت جنا ننتظر اهل العريس فبعد العشى طلع تميم للمضيف وياسمين اخذتني وياها لغرفتنا وطلعتلي فستان احمر
اخذتلي دوش ولبستو وحطتلي مكياج خفيف ولبست وياه شال اسود علمود وجهي يبرز بيه وطلعت من صدگ اخبل
بين ما جهزتني ياسمين وصلن النسوان گالت من تنزلين سلمي عليهن وتعالي للمطبخ لان ماگدر اوصل المطبخ بدون ما يشوفني
فنزلت هي واني بقيت شوية بالغرفة استجمع قواي واحاول اقلل شوية من توتري بس مستحيل يخف التوتر او يروح بهيج ضروف
اخير شي سحبت نفس بقوة واول ما طلعت من الغرفة سميت بالله ونزلت تحت وتوجهت للصالة جانن جايات 3 نسوان و3 بنات
سلمت عليهن ورحبت بيهن ورجعت للمطبخ اخذت العصير ورجعت وزعتو الهن وهم الحجية گالت تعالي اگعدي يمي وگعدت يمها
جانن يحجن عن تحظيرات العرس واني انتظر بس يمر شوية وقت علمود اگدر ارجع للمطبخ لان هيج گعدات توترني فتخيلو ان گاعدات علمود عرسي
خلال گعدتنا سمعت صوت تميم صاح امو من باب الصالة الخارجي ومن راحت ياسمين انطاها خبر علمود الشوفة الشرعية
الحجية : ها يمة شيريد تميم
ياسمين : عمتي الولد يريد يشوف ياقوت
ياقوت : رفعت راسي باتجاهها واني مصدومة
الحجية : اي يمة خلي يجي
ياقوت : وين يجي
الحجية : عادي يمة الولد يريد يشوفج شوفة شرعية وهذا حقج وحقو
ياقوت : اني ما اريد ذني النسوان شافني ويگدرن يحجن الو عني
امو : بنيتي ترا مابيها شي كلنا شفنا ازواجنا قبل الزواج
ياقوت : اني ما اريد .. وبدون وعي عفتهن ورحت للمطبخ
تميم : ها يمة اجيب الولد
الحجية : لا يمة گوللهم البنت رافضة
تميم : تمام يمة
رجعت باتجاه المضيف واني اگول لج عاشت ايدج ياقوت قسم بالله سوت الي اني عجزت عنو هسا اگدر ارفض واني مسيطر
من دخلت الولد جان ينتظرني اگولو تعال بس صدمتو من گلت البنت رافضة واني ما الي اي حق انو اجبرها لان ابوها موصيني ما اجبرها على شي
الولد : تمام مو مشكلة
تميم : بس گدام الموجودين اذا الله تمم الكم على خير بعد العرس ايمتى ما تحب تزورنا تجيبها بدون رفض
- اكيد هذا الشي ما يحتاج اي نقاش
- گلت اذكرك علمود ما يصير اختلاف بعدين
- لا إن شاء الله ماكو كل اختلاف هي عاشت يمكم قبل ما اني اعرفها
- بالضبط
ياقوت : دخلت للمطبخ واني ارجف من العصبية والخوف مشاعري جانت متلخبطة
ياسمين : هاي هي حبيبتي ماراح يجي اهدي
- بيا اساس يريد يشوفني هو واني ما خليت شخص غريب يشوف وجهي
- لج هذا راح يصير زوجج شبيج انتي خبلة
- هذا راح يصير مو صار يعني بعد ما الو حق يشوفني
- زين لنفرض ان هذا الشخص مو حلو او اعور او بيه مشكلة بجسمو او وجهو شلون راح تعرفين بدون ما تشوفيه
- يحجولي تميم او زيد
- يا روحي هاي شوفة شرعية من اسمها معناها مو حرام بالعكس هذا حق الج والو تشوفون بعض قبل الزواج وبعدها تثبتون على قراركم
- اني انطيت موافقتي وخلص وهاي امو شافتني شدعوة الا حظرة جنابو يشوفني
- هاي هي لا راح يجي ولا راح يشوفج وافق الخير واهلو ما وافق مستحيل احد يجبرج تشوفيه
- اي احسن
بقيت بالمطبخ وما رجعت مرة ثانية للصالة ومن خلصن عصير راحت اية جابت الگلاصات ومن راحن النسوان صاحتني الحجية ومن رحت للصالة اجى تميم
الحجية : ليش سويتي هيج بنيتي
ياقوت : اني ما اريد اشوفو يكفي اخواتو وامو شافني
تميم : عوفيها يمة
الحجية : يا يمة قابل راح اضربها مجرد افهمها ان الي سوتو غلط هسا لا تشوفيه بس مو تعوفين النسوان وتروحين
تميم : معليج ياقوت عاشت ايدج .. حجاها وهو يضحك
الحجية : لا ربحنا عود انت الجبير
ياقوت : ضحكت على ردة فعل تميم ورجعت للبنات ومن خلصنا تنظيف رجعنا كلنا للصالة وجانت الحجية وحدها لان تميم صعد ينام
الحجية : ها ياسمين گلتي لتميم
ياسمين : بعد خايفة يعصب لان هو ما يحب هاي السوالف
اية : شنو من سوالف
ياسمين : اروح اسوي فحص لان ما صارلنا اطفال
اية : ترا ما صارلكم هواي متزوجين
الحجية : لا صارلهم هواي واذا اكو مشكلة لا قدر الله واحد يحلها من هسا
ياسمين : اي صحيح بدال ما نتأخر عالفاضي بس إن شاء الله يوافق تميم
الحجية : اذا ما وافق اني احجي وياه
ياسمين : تمام اني صاعدة وراح احجي وياه
الحجية : تمام وانتن (اية وياقوت) روحن نامن وراكن دوام باجر
اية : تمام
ياقوت : صعدنا فوگ ونمنا ثاني يوم گعدنا للدوام جان وضع تميم طبيعي فما اعرف هو وافق لو لا ولحد ما طلعنا ماكو شي يوضح موافقتو من عدمها
داومنا بشكل طبيعي من رجعنا عالغدا تميم گال لياسمين حجزت عند دكتورة بالخمسة عود نصلي العصر ونمشي گالتلو تمام
اني ما اهتميت للموضوع من خلصت غدا صعدت ادرس ومر الوقت الى ان راحو وبالسبعة رجعو وجوهم مگلوبة وياسمين صعدت مباشرة لغرفتها
الحجية : بسم الله الرحمن الرحيم شبيكم يمة
تميم : باجر نطلع لبغداد
- ليش شنو السبب
- يگولون عدها تشوه ولادي بالرحم وباجر نروح لبغداد نحاول نلاگي علاج
- متأكدين من الكلام
- اي يمة للاسف شوفنا السونار والتحاليل لاكثر من دكتورة وكلهن نفس النتيجة
ياقوت : الحجية عافتنا وصعدت على ياسمين علمود تحجي وياها واني واية سوينا العشى رغم محد مشتهي ياكل شي
بين ما كملنا العشى نزلن الحجية وياسمين وجان مبين على ياسمين انها باجية وبصراحة ما الومها الخبر مثل الصاعقة نزل علينا
من حطينا العشى محد اكل نهائيا وخصوصا ياسمين ما اكلت كلشي بس شربت ماي ورجعت لغرفتها واني عفت الاكل ولحگتها
دگيت الباب وبصوت مخنوگ گالت ادخل ودخلت لگيتها حاضنة نفسها وتبجي ورحت گعدت يمها
ياقوت : كافي حبيبتي لا تسوين بنفسج هيج
ياسمين : ياقوت اني حياتي انتهت
- لا ما انتهت ليش تحجين هيج
- بلى انتهت اذا ما اگدر اجيب جهال تميم مو مجبور يبقى بدون جهال علمودي
- توكلي بالله باجر من تروحون لبغداد راح تلگون علاج إن شاء الله فتوكلي بالله وادعي احسن من البجي
وحتى لو تزوج تميم انتي راح تبقين الاصل والثانية غصب عنها تحترمج
- ياقوت تحجين صدگ انتي تريديني اشوف وحدة تشاركني بتميم واسكت لج والله اتخبل
- هسا گولي يالله ونامي وارتاحي علمود باجر تگعدين من وقت وتروحون لبغداد
- تمام
ياقوت : تمددت بالفراش وغطيتها وطلعت نزلت تحت تميم ماكو ساعدت اية بغسل المواعين وصعدت راجعت الدروس عالسريع ونمت
ثاني يوم گعدتنا الحجية جانو تميم وياسمين طالعين لبغداد ومنطين خبر لزيد علمود ياخذنا وياه ومن تجهزنا اجى زياد گال يلا خلي نروح
من طلعت جان رشيد صاعد يم زيد من گدام واني واية وزياد من ورا وانطلق زيد وبنص الطريق باوعلي بالمراية وگال وين مدرستج
ياقوت : ماعرف
زيد : شلون ما تعرفين
- ما اندلها
- وهسا وين اروح غير اعرف طريقها
- ماعرف والله
- استعدو يا جماعة اليوم نگضيها فرات بالانبار
اية : دگ على تميم اسألو
رشيد : هسا فهمنا ياقوت من بغداد وما تندل بالانبار انتي اية شنو عذرج
اية : اني اذا اطلع من البيت للمضيف اضيع تريدني اندل مدرسة ياقوت بعدين مدرستها هي اني شدخلني
ياقوت : اتصل زيد على تميم واخذ عنوان المدرسة ونزلني گدام الباب وگال راح ارجعلج من يخلص الدوام وكملو طريقهم
بذاك اليوم جان كل تفكيري يم ياسمين خايفة عليها انو ماكو علاج ومن الحزن يصير عليها شي لا قدر الله
من خلص الدوام لبست عبايتي والخمار وگعدت بالحوش انتظر زيد وخلال گعدتي اندگ باب المدرسة بهمجية واسمع اصوات هوسة عند الباب
ولان جان حوش المدرسة جبير فبقيت بمكاني لان بالطارف صايرة مجرد اشوف واسمع الكلام بس اذا يصير مضارب لو شي اكون بعيدة
اجت الفراشة تركض اول ما فتحت الباب اندفع بقوة لدرجة الفراشة لو مو ماسكة الباب جان وگعت بالگاع من قوة الدفعة
ودخلو رجال ووياه شباب ثنين وجانت المديرة طالعة يم باب المدرسة الداخلي علمود تشوف شكو شو ذول على شوية ويضربوها
صارو يصيحون عليها وصوتهم تارس المدرسة واسمع الرجال يگول مو بكيفج تفصليها تداوم وغصب عنج واذا انتي بنت ابوج امنعيها
بقو يتناقشون او يصيحون على بعض شوية ومن حظهم الاغبر واحد من الشباب دفع المديرة ويا دخلة الشرطة وشافوها وجتفوهم وبطحوهم بالگاع
وحطو الكلبجات بايديهم وقبل ما يطلعوهم دخل زيد متفاجئ بالي ديصير اني من شفتو اخذت جنطتي ورحت عليه
هو جان مضيعني مايعرف وين اني بوسط هاي الهوسة فمن قربت عليه صحتلو ومن شافني اجى واخذني بصفحة عن الشرطة
من سأل حجيتلو الي سمعتو ومن طلعو الشرطة طلعنا احنا وكالعادة اول ما صعدت صارو يسألون اية ورشيد وزياد وحجيتلهم
رجعنا للبيت وجانو تميم وياسمين بعدهم مو راجعين والحجية گالت خابرتهم بعد مو داخلين للدكتورة وطلعت خطية مسوية الغدا بنفسها
اني واية صعدنا بدلنا وصلينا ونزلنا حطينا الغدا والحجية كل شوية تتصل على تميم اخير شي صار يطلع مغلق وياسمين ناسية تيلفونها
بقينا ننتظر 3 ساعات كاملات لحد ما اجى تميم وحدو وهو مهموم ومبين عليه الحزن والتعب ولاول مرة اشوفو بهاي الحالة گعد بالصالة وهو مكسور
الحجية : ها يمة ليش مغلق تيلفونك ووين ياسمين
تميم : عند اهلها
- ليش شبيها
- ماكو علاج حتى زرع ما يصير .. وهسا عن اذنكم
- وين رايح
- ماعرف يمة
ياقوت : عافنا وطلع مانعرف وين يريد يروح واحنا بقينا كلنا ساكتات بس گلوبنا مكسورة عليهم ثنينهم وخصوصا ياسمين لان هي المريضة
تميم : طلعت من البيت واني كاره الدنيا كلها واحس حمل جبال فوگ كتفي وماعرف شلون اتخلص من هالحمل هذا
صحيح ما اخذت ياسمين عن حب بس هاي الانسانة الي تستاهل كل الحب الي ممكن انطيه لاحد غير اهلي
كلمة الزوجة الصالحة قليل بحقها من صدگ جانت اعظم هدية رزقني بيها ربي بحياتي بس ما كملت فرحتنا ويا بعض
انتبهت لنفسي گدام بيت صاحبي عماد (ما جان الو دور بالقصة من قبل) طلعت تيلفوني جان طافي شحن شكلتو على شاحنة السيارة وخابرت عماد
عماد : هلا بالضلع
تميم : وين انت
- بالبيت
- البس وتعال
- ها وين تريد
- بعدين احجيلك اني انتظرك گدام البيت
- تمام جايك
تميم : شوية واجى وطلب مني اگعد ومن لاحظ اني ضايج ما اصر علي واخذتو وطلعنا خارج الانبار ووگفنا يم نهر الفرات
عماد : احجيلي ضلع ليش ضايج
تميم : حجيتلو الموضوع
- لا حول ولا قوة الا بالله وهسا شتسوون
- هسا مرتي يم اهلها واني الحيرة كاتلتني
- شوف هسا لا تسوي شي عوفها هاليومين ترتاح يم اهلها وبعدها روحلها واحجي وياها وخليها ترجع وياك للبيت وويا الايام راح تتفاهمون
- على شنو نتفاهم يا عماد بس فهمني
- يا اما تتبنون طفل يتيم او تتزوج وحدة ثانية وتبقى زوجتك هاي يمك معززة مكرمة
- ما توافق اعرفها وثانيا بهالحالة كأني جابرها تعيش بحزن طول العمر
- هي راح تتقبل هالشي ويا الايام بس انت حاليا لا تسوي اي شي حاليا لازم توگف يمها وما تتخلى عنها
- هو اني لو اريد اتخلى عنها تلگيني هنا وهيج حالتي
بقينا نحجي اني وياه وهو لان يعرفني من جنا صغار عرف شلون يهون علي وگلت بگلبي التزم بكلامو وما اروحلها هسا
صحيح هي بحاجتي بس خلي اليوم ترتاح يم اهلها وباجر بالليل اروحلها واحجي وياها وإن شاء الله تقتنع وترجع وياي للبيت
بقينا نحجي للمغرب وما قبل اروح للبيت وبحجة انو زوجتي مو موجودة جبرني اروح اتعشى يمو واتصلت على امي گلتلها لا تنتظروني عالعشى
صحيح جمعتنا هالمرة مو ضحك وشقى مثل كل مرة بس حالتي صارت احسن بهواي عن اول ما اجيت لبغداد لان انطاني امل ببقاء ياسمين وياي
بعد العشى رجعت للبيت متفلش ومن الباب للغرفة فورا دخلت للحمام ووگفت تحت الدوش يمكن نص ساعة كاملة واني افكر
ومن طلعت من الحمام تمددت عالفراش وبسبب التعب وقلة النوم فورا نمت بس طول الليل ما ارتاحيت بنومتي
ثاني يوم رحت للدوام ومن رجعت تغديت وطلعت للمضيف ولاول مرة من بلش الدوام اطلع للمضيف بعد الغدا مباشرة
بقيت بالمضيف للمغرب وطول الوقت صافن حتى من اجو اخواني ما شاركت وياهم بالكلام بقيت صافن وساكت
ورا العشى طلعت لبيت عمي ومن دخلت للاستقبال اجى فورا رحب بي لان كلش يحبني وگعدو هو واولادو يتعللون وياي
بعدها طلبت اشوف ياسمين واجت عيونها حمر ووجهها ذبلان ومنظرها احس حرگ گلبي حرگ وبلشت احجي وياها علمود اقنعها
جانت رافضة ترجع وياي للبيت وتگول شوفلك مرة تجيبلك اولاد اني لا اگدر اشوف وحدة تشاركني بيك ولا اگدر احرمك من الاولاد
تميم : يا بوية افهميني حتى اولاد ما اريد اني اريدج انتي
ياسيمن : واني ما اقبل تبقى بدون اطفال
- زين انطيني حل غير انو تبقين يم اهلج
- ماكو غير حل اني حسمت قراري اريد ابقى عند اهلي وانت حاول تنساني وتزوج ومن اليوم راح ابقى ادعيلك دائما بالسعادة والتوفيق
اني عشت وياك احلى ايام حياتي ومستحيل يهون علي ابتعد عنك او عن عمتي واية وياقوت بس گلتلك لا اريد وحدة تشاركني بيك ولا اريدك تبقى بدون اطفال
- انتي تعرفين انو مستحيل الگي وحدة تفهمني وتطيعني اني واهلي مثلج
- لا اكو بنات الحلال هواي وقريبات منك كلش
- شلون يعني قريبات
- يعني تزوج ياقوت
شكرا لزيارتكم عالم روايات سكيرهوم
