رواية بنت الكهوجي الفصل السابع والثلاثون 37 بقلم احمد

تميم : انتي تعرفين انو مستحيل الگي وحدة تفهمني وتطيعني اني واهلي مثلج 

ياسمين : لا اكو بنات الحلال هواي وقريبات منك كلش 

- شلون يعني قريبات 

- يعني تزوج ياقوت 

- بصدمة .. لج ياسمين شبيج تخبلتي انتي 

- ليش تخبلت قابل بشنو تختلف ياقوت عن البنات 

- لج ياقوت مخطوبة وراح تتزوج 

- افصخ خطوبتها بحجة الشوفة الشرعية 

- وعلى اي اساس اقرر من يمي لنفرض هي مو رايدتني ومعتبرتني مثل اخوها شنو راح يكون موقفي 

- تتقبلك زوج مثل ما تقبلتك اخ 

تميم : سكتت ومدري شنو اجاوبها من صدگ البنت متخبلة عالاخر شنو افصخ الخطوبة شنو تزوجها قابل الموضوع بهاي السهولة 

باوعت لعمي وگلت عمي اني استرخص گال مرخوص ابني وگمت لبست تكرمون حذائي وباوعت عليها بالاستقبال 

جانت حاطة ايديها على وجهها وتبجي ومسكني عمي من كتفي گال تعال احجي وياك ومشيت وياه گال لا تحجي وياها بشي هسا 

- يا عمي ما تسمعها شتحجي 

- اسمعها ابني بس يا تميم الي صار وياها مو سهل خصوصا ان ما جانت متوقعة ان قدرها ما يصيرلكم اطفال 

عوفها هالفترة ترتاح ويجوز من حبها الك تريدك تاخذ ياقوت لان ما تتحمل تشوفك ويا وحدة ثانية بس من تهدئ راح تعرف ان كلامها غلط 

- الله كريم عمي إن شاء الله باجر امركم 

- هلا بيك بكل وقت ابني 

- تصبحون على خير 

- وانت بالف خير 

طلعت من يمهم ضايج اكثر من اول وكلامها يفتر براسي ومتخبل شلون گدرت تحجي هيج معقولة تتوقع مني اسوي هيج شي 

وصلت البيت واني بالحوش سحبت شماغي من راسي وگعدت عند صوندة الماي غسلت وجهي ورفعت راسي جانت اية واگفة بالطارمة وتباوعلي 

توجهت الها واجت حضنتني بدون ما تحجي كلشي واخذتها وياي للصالة گعدت يم امي واني دايخ لا مشكلة والها حل ولا اگدر اجبر ياسمين تجي وياي 

الحجية : ها يمة ما اجت وياك 

تميم : تمددت وحطيت راسي بحظن امي .. حليت مشاكل العالم وعجزت عن مشكلتي 

- هاي مو مشكلة ابني هذا قدر مكتوب عليكم انت وياسمين 

- والحل يا يمة والله راح اتخبل 

- والله يا يمة ماعرف شگولك 

- وين ياقوت 

- بالمطبخ دا تحمي الجاي 

- ليش عايفتها لحالها اية 

- هو جاي ابني مو فد شي صعب 

تميم : شوية وجابت الجاي ياقوت واجت عيني عليها وتعرفون بعد ما سمعت كلام ياسمين ولعب الشيطان بعقلي احس نظرتي الها تغيرت 

اعرف غلط واحتمال حرام بس الموضوع صار خارج ارادتي لاول مرة اشوف ياقوت بهيج نظرة لاول مرة احسها مرة كاملة والكمال لله 

جنت صافن لحد ما قدمتلي ستكانة الجاي بابتسامة شفقة عالحال الي وصلتلها بعد ما جنت حاس نفسي ملك زماني 

مسكت الستكانة وعصرت ايدي عليها وكاني دا اعاقب نفسي على نظرتي لياقوت ورغم حرارة الجاي ما عفتها 

وويا ما عصرت ايدي عليها اجى بتفكيري منظر ياسمين من حطت ايديها على وجهها وصارت تبجي وعصرت ايدي بعد اكثر 

الستكانة جانت من النوع الخفيف لان امي تحب هالنوع فمن ضغطت عليها كل قوتي طگت وهي بايدي والقاعدة مالتها جرحت ايدي من تحت 

باقي الگزاز جرح ايدي من داخل ومن طگت كلهن فزن ياقوت راحت تركض تجيب وصلة علمود الف ايدي واية راحت تركض علمود تجيب واحد من الولد 

شوية واجى وياها زيد ومن شاف ايدي تخبل جانت حرفيا متشگگة من داخل نزع شماغو ولف ايدي بيه وطلعنا اني وياه للمستشفى 

زيد : بنص الطريق .. شبيك متخبل تميم احد يأذي نفسو بهالطريقة 

تميم : هذا عقاب 

- عقاب لشنو 

- لخيانة الثقة 

- يا ثقة شنو الموضوع 

- مو مهم انسى الموضوع 

- ما يكفي ياسمين متخبلة اجيت انت كملتها 

- مو جنت تگول جدر ولگت غطاها 

جان يريد يحجي واتصل ابوي گلتلو ماكو شي جرح بسيط شوية ونرجع وطمن اهلي لا ينشغل بالهم وبين ما كملت اتصال ويا ابوي وصلنا المستشفى 

دخلنا للطوارئ وفورا اخذوني لغرفة المضمد انطاني مسكن موضعي وخيط ايدي ونظفها من الگزاز وطلعنا اني وزيد 

زيد : قبل ما نرجع للبيت فهمني شكو تميم 

- ماكو شي يخوي 

- احجيلي اني اخوك 

- بالوقت المناسب احجيلك كلشي 

- احلف 

- والله العظيم بالوقت المناسب احجيلك كلشي بس هسا ماگدر احجي شي 

- تمام هاي هي براحتك 

تميم : رجعنا للبيت وتطمنن علي البنات وامي وبعدها صعدت لغرفتي گعدت عالسرير وكلام ياسمين يفتر باذني كأنو مقطع صوتي ودا ينعاد 

اخير شي نزعت دشداشتي لان صار عليها دم ولبست دشداشة النوم ومن تمددت دگ تيلفوني باوعت جانت ياسمين وجاوبتها فورا 

ياسمين : الو تميم 

- هلا ياسمين 

- شبيك ليش اخذك زيد للمستشفى 

- بصدمة .. شعرفج 

.- فدوة احجيلي شصار وياك 

- ماكو بوية جرح صغير انكسرت الستكانة بايدي 

- اذا جرح صغير ليش اخذك للمستشفى 

- والي خلق عيونج الحلوات مجرد جرح 

- تميم فدوة اروحلك انتبه لنفسك 

- صار تأمرين امر 

- ما يأمر عليك ظالم تصبح على خير 

- وانتي بالف خير 

تجاهلت كلشي وغمضت عيوني واخذتني النومة وثاني يوم مر طبيعي بس حاولت ما ابقى هواي بالبيت علمود لا التقي بياقوت 

اهلي عبالهم ضايج علمود ياسمين فقط ما يدرون ياسمين تخبلت وخبلتني وياها اخير شي بالليل رحتلها علمود احاول اقنعها ترجع وياي 

اول ما دگيت الباب اجت هي فتحتو وعرفتها دا تنتظرني علمود تطمن علي تقربت عليها وگلتلها بصوت ناصي انطيني بوسة قبل ما يجي ابوج 

ضحكت هي وگالت ينتظرك بالاستقبال بابا ودخلت وياها للاستقبال لگيناها فارغة گالت لعد هسا يجي گلتلها تمام مو غريب اني 

فتحت ايديها گدامي وفهمت قصدها وحطيت ايدي المجروحة بين ايديها ومسكتها بحذر وصارت تحسس عليها وبدون مقدمات باستها 

قبل ما انطي رد فعل او احجي دخل عمي ووراه اجو ولدو وزوجتو وتعللنا ويا بعض كأننا اني وياسمين جايينهم زيارة 

عمي : تميم نحجي بموضوع ياسمين 

تميم : اي عمي واني اشوف لو تجي وياي افضل الي والها ليش نبقى نطول ونعرض بالموضوع وهو مو مستاهل 

- ياسمين تريد الطلاق 

- بصدمة .. شنو من طلاق عمي قابل هي لعبة 

ياسمين : اي تميم اني اريد اتطلق وانت شوف حياتك بدوني 

- زين خلي نتفاهم ونحلها بدون طلاق 

- تميم اذا ما تطلقنا لا انت راح تعيش حياتك ولا اني راح اعيش حياتي ونبقى هيج متعذبين بدون فايدة 

- بقيت ساكت بس اباوع على عمي وزوجتو اريد واحد بيهم يحجي ماكو 

- شوف هذا قرار نهائي فدوة لا تصعبها وطلقني وعيش حياتك لان اني ماراح ارجع وياك والله يسعدك ويوفقك دنيا واخرة 

- قرارج نهائي 

- اي نهائي 

- تصبحون على خير 

الكل : وانت بالف خير 

طلعت من يمهم روحي صايرة براس خشمي وبس واحد يگلي شلونك اتعارك وياه وگفت گدام المضيف وما حبيت ادخل واني معصب هيج 

رجعت للبيت دخلت للصالة جانن گاعدات امي والبنات يتابعن مسلسل امي انتبهت علي اني ضايج ورحت گعدت يمها 

الحجية : ها يمة شو ضايج 

تميم : طلبت الطلاق .. من گلت هيج انتبهن كلهن 

- حجيت وياها حاولت تتفاهم وياها 

- حاولت بس ماكو فايدة 

- واهلها شنو رايهم 

- اهلها يگولون القرار قرارها ما نريد نجبرها على شي 

- خلص باجر اروح احجي وياها اني ما ردت اتدخل بالبداية بس ماطول ما گدرت تحلها انت فاني احاول افهمها 

- تمام تصبحون على خير 

- وانت بالف خير يمة 

ياقوت : صعد تميم وهو ضايج وكلنا ضجنا على ضوجتو وضجنا لان اذا تطلقو احتمال ما نشوف ياسمين مرة ثانية 

طفت التلفزيون اية وصعدنا نمنا وثاني يوم ما جان اكو شي يذكر بس اية تعاركت ويا الحجية لان سوت غدا واني واية نحاول نقنعها ما تتعب نفسها 

بس اكثر شي ضحكني من اية تگول راح اجيب ابوي مرة ثانية يراقبج انتي ما تجين بالعيني واغاتي اذا ما ابو تميم يخوفج ما يفيد 

والحجية تضحك على خبالها بس سبحان الله الحجية نفسيتها الحلوة انگلبت عالطبخ وطبخها طيب بكل ما تعنيه الكلمة من معنى 

اذا تسوي تمن لحالو يطلع يخبل من ايديها المهم تغدينا ومر الوقت لليل وراحو الحجية والحجي على اهل ياسمين 

تقريبا ساعتين ورجعو وياسمين ثابتة على قرارها والحجية گالت راح اگول لتميم يطلقها بس تميم ماراح يوافق لان بعدو يحبها 

شوية واجى تميم وشلون گعد بالصالة اتصل عليه خطيبي (على گولة بعض البنات ختشيبي ههههههه) گال باجر نمرلكم بالليل 

رحب بيه تميم وانطى خبر للحجية وحجو شوية على ياسمين بس الحجية ما فتحتلو موضوع انو لازم يطلقها حبت تأجل الموضوع شوية 

ثاني يوم بالليل اجو بس الزلم هالمرة وهذا احسن شي سووه جابو المهر واتفقو ويا تميم انو العرس يكون بداية عطلة نصف السنة اذا الوقت مناسب 

فبعد ماراحو اجى تميم حجى وياي گدام الحجية وما جنت اعرف شسوي من جهة دراستي ومن جهة ماعرف اذا لازم اوافق او ارفض 

اخير شي گلتلهم اني ماعرف كلشي انتو قررو واني موافقة على قراركم گال لعد هاليومين اذا حسمتي قرارج انطيني خبر علمود اگوللهم 

وفعلا خلال اليومين حجت وياي الحجية اكثر من مرة علمود احسم قراري بس بكل مرة جنت اگوللها ماعرف اخير شي گالتلي يعني نوافق 

گلتلها وافقي گالت اكيد گلتلها اي گالت تمام وگالت لتميم اني موافقة وهو رجعلهم خبر وبهالحالة صار لازم ابدي اجهز جهاز العرس 

فصرت ايام الخميس والجمعة اروح للسوگ اجهز مرة ويا الحجية ومرة ويا اية بحيث لا اتكاسل بدراستي ولا اتأخر بالجهاز 

بعد امتحانات الشهر الثاني قررو يشترون الذهب ولازم اروح ورحنا اني والحجية وتميم وكالعادة لابسة العباية والنقاب ومغطية حتى عيوني 

من وصلنا للسوگ جانو ينتظرونا هو وامو ووحدة من خواتو من دخلنا للمحل شو ذني طنشن الحجية وصارن هن يختارن بنفسهن ويعاملن الصايغ 

الولد جان واگف بجهة ومبين عليه مفتشل بسبب امو واختو اخير شي سألتو امو عالذهب گال ام تميم وياقوت يقررن 

امو انصدمت من جوابو بس تداركت نفسها وانطن مجال للحجية هي وبنتها والحجية اختارت الگلادة والتراجي والمحبس اما الحلقات فهم يختاروهن 

اختارو ثنين وحدة ذهب الي ووحدة فضة الو لبست الذهب وجانت مطابقة لاصبعي وحاسب الصايغ وطلعنا من المحل 

من رجعنا الطريق كلو الحجية تحجي عليهن وتميم يگوللها عوفيهم وتسكت شوية وترجع تحجي مرة ثانية اخير شي حجى وياها تميم 

تميم : اگولج خاف ذني بعد الزواج هم يزعجن ياقوت ويصيرن يتدخلن بينها وبين زوجها 

الحجية : شحدهن غير املص رگبتهن 

- لج كفوووووو بام تميم 

- هو كم ياقوت عندنا والله الي يزعلها ما يلوم الا نفسو 

- والله ما اتمنى الشر لاحد بس امنيتي وحدة منهن تزعل ياقوت وتتواجهين انتي وياها 

- الله يرحمها 

- ياقوت فدوة لا تسوين مشاكل ما نريد امي تنسجن 

ياقوت : ههههههههه الله يحفظها الي وما يحرمني من وجودها بحياتي 

الحجية : ولا يحرمني منج يا روحي 

تميم : اگلج هالة ماكو غزل منا منا لهالفقير الي وياج 

- لا ممنوع يضر بصحتك الغزل 

- هاي بالعكس 

- دحرك جيبك واخذلنا لحم من ذاك الگصاب 

- غير تدلل ام تميم وشرط تنزلين وياي تختاريه 

- مابي حيل انزل 

- گلت الا تنزلين 

- تمام 

ياقوت : نزلو يشترون لحم وشگد حلوة علاقتهم ببعض هالعائلة هاي كلها علاقتهم ببعض كأنهم اصدقاء ودائما يتشاقون ويا بعض ويضحكون 

بس اكثر شي عجبني بالحجية من تدافع عني قبل شوية يمكن لو اية بمكاني ما تدافع عنها هيج ومن اشترو اللحم رجعو 

توجهنا للبيت وجانت اية تنتظرنا جانت الدنيا بداية عصر لان رحنا ورا الغدا بما انو الدنيا شتاء وكالعادة تميم عزم اخوانو عالعشى اول ما رجعنا 

واجو گضوها ضحك وشقى بحيث بطونا صارت توجعنا من الضحك اني صار بي مغص واحس حتى نفسي انگطع من الضحك 

بعد العشى على اساس جنا مقررين انو نتعلل ويا بعض بس اجت ام حازم وراحو الولد للمضيف ودخلت هي وبناتها 

وتعرفون فورا اجت عيوننا على اديان جان وجهها شاحب وضعفانة ومبين عليها كمية الخوف والحزن الي عايشة بيهن وبصراحة ما الومها 

طول الگعدة الحجية وام حازم يحجن على موضوع ياسمين اخر شي حجن عن اديان گالت امها شوفة عينج لا الها نفس تاكل لا الها نفس تحجي 

ويوم بعد يوم تهديدات عمامها تزيد وفوگها يگولون عبالكم تضغطون علينا من جبتو تميم وما يعرفون ان تميم يسواهم كلهم 

والمشكلة ما يگدرون يشتكون عليهم بالوقت الحالي لان عمامهم اكيد ينكرون اي تهمة ضدهم وماكو دليل انهم متورطين فماكو فايدة من الشكوى 

بقو يمنا لل 11 بالليل وبعدها راحو واجى تميم متخبل من الكلام الي سمعو من حازم بس المصيبة ماكو اي طريقة يعاقبهم بيها ويبرد گلبو 

مرت كم يوم وبيوم من الايام جنا گاعدين ورا الغدا واجن خوات تميم وبعدهن بشوية اجو زيد وزياد وطلعنا گعدنا بالحديقة عالشمس 

خوات تميم بين فترة وفترة يجن بس اكثر المرات يبقن عند اهلهن ويخصصن كل فترة جية خاصة النا بس يسلمن على اهلهن ويجن علينا 

بيومها الجو يخبل وصارت گعدة ووناسة من العمر قبل صلاة العصر بكم دقيقة اجى اتصال لزيد واخذ تيلفونو واتجه لداخل البيت علمود يخابر 

رشى : زياد هسا من زوجي يتصل علي ضروري ابتعد عنكم 

زياد : اي هسا صاحبتي من تتصل علي لازم ابتعد 

رشى : اي صحيح زوجي من جان صاحبي جنت اخابرو واختل عنكم 

زياد : عفية عليج الاحتياط واجب 

تميم : اگولك زياد من تطلع للسوگ اشتريلنا گرون وياك 

زياد : تريدهن حديد لو ستيل لو ذهب 

تميم : يعني ضروري احدد 

زياد : غير اعرف شتريد بالضبط 

تميم : جيبلنا فضة علمود ما يتغير لونهن بسرعة 

زياد : اتفقنا 

ياقوت : اني گاعدة بصفحة واضحك على كلامهم وانتظر زيد يجي علمود اعرف شراح يسوي ويا زياد ورشى بس تأخر داخل 

وبالاخير طلع يركض مثل الصاروخ بحيث حتى احنا فزينا وما اجى باتجاهنا لا طلع خارج البيت ولحگوه زياد وتميم علمود يعرفون شبيه 

احنا مثل الاطرش بالزفة ناس تباوع لناس ومو فاهمين كلشي شوية واجو زياد وتميم صعدو بسيارة تميم وطلعو عالسريع 

بقينا ننتظر تقريبا نص ساعة ورجعو تميم وزياد وسألتهم الحجية گالو مانعرف وين راح فص ملح وذاب ودا نخابرو ما يجاوب على تيلفونو 

گعد بالحديقة تميم وبقى يتصل عليه وما يجاوب وتميم صار وجهو احمر من العصبية ويريدو بس يجاوب يطمنا وبعدها لا يجاوب 

اهلو سمعو بالموضوع وتخبلو وهم حرگو تيلفونو باتصالاتهم وهو ولا كأنو موجود بهالدنيا وقربت الدنيا عالمغرب ولحد الان مختفي 

صار تميم يتصل على اصدقائو ويسألهم عنو اذا حجو وياه او احد من جماعتو صاير عليه شي بس كل الي يعرفونهم هو وزياد ما شافو زيد او حجو وياه 

قبل المغرب بدقائق جنا واگفين بطارمة بيت تميم واهلو بطارمة بيتهم وننتظر على امل احد يتصل ويطمنا اخير شي رجع زيد 

دخل من باب البيت وسط صدمة من الكل بالحالة الي رجع بيها والصدمة الاكبر من انتبهنا للي شايلو بايدو ومشى كم خطوة داخل الحوش ووگع على ركبو 

الفصل الثامن والثلاثون من هنا 

شكرا لزيارتكم عالم روايات سكيرهوم