رواية قصة وجدان الفصل السادس والثلاثون بقلم انين الليل
انا قررت بعد ما انزل القصه اتوقف لان بصراحه مو بس انتو الي اتفاجئتو وانصدمتو بااحداث القصه انا اكثر
اتفاجآت وانصدمت وجاي اتراسلوني طولتي علينه ومتى تنزلين وصار هوايه ما منزله بارت
تدرون صاحبة القصه شگلتلي گالت هاي مفاجئه بسيطه من الي راح تسمعينه وتكتبينه وقراءج يقرونه بهاي القصه
وانا هسه بصراحه محتاره بين اكمل القصه او لا خصوصا وهي جاي اتابع النشر وما قبلت اتكلمني عن باقي القصه
شتكولون اكملها او اتوقف
اذا اتكلولي كمليها فلا تضغطون عليه بالنشر تره انا هم دم ولحم ومشاعر يعني من اكتب لازم احاسيسي ومشاعري كلها
تكون حاضره وياي ومرات اتعب مو فقط جسديا لا لكن نفسيا فااذا تردوني اكملها اصبرو واذا اتكلولي طولتي ارجعو اقروها
مره ثانيه 😛😛
راح انزللكم هذا البارت وبس اكمل مراجعة البارت القادم راح انزله بااسرع وقت
تحياتي
///////////////////////
وجدان
الصبح بدلت ما اشتهيت اتريك لكن جبرت نفسي اكلت كعكه وشربت جاي وطلعت شفت عمو عاصف جاي دا يخابر
رحت وكفت يم السياره كمل ركب سيارته واني ركبت بالصدر الطريق كله مشغل الراديو ويدخن ردت اساله يجي
عليه الظهر من وصلنه. حاچاني
:: اليوم ما اگدر امر عليج عندي شغل ابغداد
فتحت عيوني :: هسه منا واطلع انا وصيت السايق ترحين وياهم والصبح اطلعي من وكت حتى تلحكيين عليهم
:: ياالله فيمان الله وديري بالج على حبوبتج
قبل ما افتح الباب سالته لا اراديا = رايح تشوف رقيه
عكف حواجبه رديت = مو اني قبل يومين سمعتها تحجي وياك
:: منو يگول هي ؟
= صوت نسائي
هز راسه :: اي صوت نسائي بس مو رقيه
رفعت وجهي = تحبها مو ؟
عض شفته من جوه وبااصبعه يضرب على الاستيرن ضربات خفيفه
:: شوفي اقبل اي احد يحچي وياي هالشكل بس انتي لا
= ليش اني وحد بعدين مجرد سوال
هز راسه :: اي انتي وحد وبعدج زغيره على هالكلام شي ما تعرفينه لا تسالين بي انزلي وديري بالج
على حبوبتج واخوج انا احاول ما اتاخر
هزيت راسي عرفته ضاج نزلت هو شخط السياره دخلت للمدرسه وكلساع اتحسس جيبي البي الموبايل وانتظرت يخلص
الدوام بفارغ الصبر مو الشي
اصلا كله بالنسبه الي مجهول لكن ردت بهاء يعرف الحقيقه من السان غزوان الحقير حتى يعرف اني بريئه
طلعت من الدوام ونزلت ع. الشارع مثل كل مره
رحت امشي واجاهد ما اريد احد يشوفني وقبل ما اوصل جربت الموبايل يعني حچيت كلمه على كيف وسمعتها كانت
واضحه الصوت درت من. الجهه الثانيه وصلت الغرفة الماطور ما اسولف الكم على الخوف دخلت شفته واگف بالغرفه
ياالله شكد اكرهه واتمنى اقتله ب ايدي هو اتقرب عليه // هلا حبيبتي
راد ايبوسني لكن اني ابتعدت عنه لان بصراحه هو بالنسبه الي انسان مقرف واكرهه
هاي شبيج
هزيت راسي = ما بيه شي
تدرين شكد صار ما شايفج ولا محاجيج
= اي ادري من اليوم المشؤوم سويت سوايتك وانهزمت
ابتسم بخبث // ليش مشؤوم همزين صار هذا الشي لان انتي القبلتي بيه وحاچيتهم گلتي اريد غزوان ابن عمتي
هزيت راسي = اي لان مجبوره
باوعلي باستهزاء // وشنو الجابرج ؟
= مصيبتك
- -:هههههههه وهسه احسبيني انسحبت وروحي كليلهم ما اريد غزوان ههه
= اي بعديش اكول ما اريده
- - ها يعني انتي ما ترديني
بقيت ساكته بعدها حاجيته حتى ما يشك = شوف غزوان اني من نتزوج اريد اكمل دراسه
رد عليه بنتر // اكلج انتي شتردين جايبتني لهنا جايبتني تتشرطين
= اتصور هذا حقي
- - ااا تدورين حقوق وياي ولج احمدي ربج راح استر عليج انتي منو ياخذج ومنو يرضى بوحده مثلج
اتقربت منه = هاي المثلي انظف منك انت الي كسرتني شنو نسيت من بهاء سوا الحادث وبالليل صميته الحلگي
واخذتني للبيت الثاني وانت تخابر بعمو عاصف اتكلهم اتعطلت سيارتي جايكم
خزرني// وج انتي منين جبتي كل هاي الصلافه المثلج تتوسليلي وتبوسين ايدي ورجلي جيف قبلت اخذج
= انت الكسرتني وغصبا ما عليك تاخذني اني ساكته كنت اريد اكمل واخذ الشهاده واشوفك شاسوي
- - ها على اساس مو قبلتي تنخطبين البهاء لو ما انا هددتج
= قبلت انخطب حتى اشوف ردة فعلك
فتح عيونه // يعني انتي ما تحبين بهاء ؟
هزيت راسي = اني ما احب اي احد بس شي واحد اريد افتهمه انت ليش سويت وياي هالشكل ليش
بنفس ابتسامته الحقيره // انا مثلج ما احب احد والسويته بيج حتى اكسر عين بهاء وعين عاصف الشايفين نفسهم بس
همه وبس چان ابالي اكسرهم ابتهم ابفرح بس انتي طلعتيلي وما انسى من بهاء اتعارك وياي على مودج وكسر خشمي
ومن حجيت ويه عاصف صار يفلت بالحچي ويتهدد عبالك انتي الاميره ديانه ضميتها الهم
= لعد ما دام هلكد حاقد عليهم وتكرههم اكيد انت هماتين تكرهني فمن تاخذني شراح تسوي
رفع اكتافه // ما ادري يجوز افضحج واكسر عينهم بالزايد ويجوز اخذج وهناك اشوف شسوي بيج
= لعد انت شكد
خزرني // شگد شنو ؟
خفت لا يضربني لو يعتدي عليه لو يلكى الموبايل رديت بعتب
= لعد انت شكد حاقد عليهم بحيث عاقبتهم بيه اني بت خالك وبت عمتك اني عرضك شلون هنت عليك تعتدي
عليه وتكسرني
هز راسه // هذا سبب ثاني لان بت خالي وبت عمتي عاقبتج (زمخ وهو يحرك بايده ) وهسه شتردين ؟
= لا ما اريد شي
— — احمدي ربج طلعت شهم وراح اخذج واستر عليج ليش انا ادري ياهو لاعب بيج
جاوبته بعصبيه = انت غزوان انت بيوم حادث بهاء لو نسيت ؟
رد بخباثه // بس ياحلوه بيوم العرس من اطلع واگللهم لگيت بتكم مو بنيه ما راح ينطوج مجال تحچيين وحتى لو قرروج
وكلتيلهم غزوان ما راح ايصدگونج تدرين ليش لان انا اتزوجتج فلو معتدي عليج شلون اتزوجج
= يعني انت تريد تفضحني حتى يقتلوني
لملم حلگه // يجوز هاذ ويجوز لا
= شلون يعني
—- يعني انا اعقد عليج عقد سيد وهناك انتي توكليني على راتبج وراتب اخوج التقبضه جدتج من سنين وانتي ما شايفه
منه لو فلس احمر ونروح البيتكم البغداد وسنه ونبيعه نضم حصة هشام وحصتج انتي وعلي نشتري بي بيت اهنا بالولايه
والباقي اشتغل بالفلوس جا بيش اعيشج بالورث الخلا الي جدي
فتحت عيوني واني اكتشف كل يوم شي جاوبته = المهم اني ابقى بمدرستي ما ابطل واخويه علي يجي وياي ونعيش ابغداد
اشر بااصبعه - - تؤ لا بغداد لا
= ليش ؟
- - مثل ما گتلج بغداد لا
= موهسه توك دا تگول نروح البغداد
- - اي بعد سنه من زواجنه يصير عمرج 18 نروح نبيع البيت ونستقر بالولايه واليبقى افتح بي مشروع وهذا السمعتي
ممنوع يطلع الاي احد افتهمتي
هزيت راسي اتقرب مني وصار نفسه عالي كلي // هسه ماكو شي منا منا
عكفت حواجبي = شنو ؟
——. اتغشمين روحج عوفي كل شي وتعاي نتونس
ابتعدت واهز براسي = لا ات شتحجي ؟
- - - شني خفتي لو استحيتي
ما جاوبته گلبي يدك هو حجى باستهزاء // اتصوري نعقد ونتزوج والناس فرحانه عبالهم بنيه ما يدرون بيج انتي ... هههههه
بوقتها مو بس حقدت علي باوعت ما شفت لا حديده ولا صخره ردت اقتله وخلي شيصير يصير
بلعت ريگي = هسه انت موافق ؟
—— عليش ؟
= اكمل دراسه وعلاوي يبقى وياي
// شوفي لا تتشرطين
=اني ما اتشرط مو انت حاسبها عدل
- - شني الحاسبها احچي عدل
=. ما مكذبه تقاعد بابا والبيت
هز راسه // اي حاسبها وتحمدين ربج راح استر عليج شني عبالج بهاءمن ياخذج يسترج ولج بهاء يحط طلقه بگلبج
= اني راح اروح وانت هماتين اطلع وروح
- - عادي خلي ايشوفوني جاي اقابل حبيبتي
= اني رايحه
- - وين شو يباسي
شكد اكره كلامه اظطريت ابتسم وطلعت بسرعه بدون ما اباوع وراي طلعت وبس دموعي وياي مشيت ومسحت
دموعي وصلت للبيت دخلت للغرفه شفت بيبي گاعده سلمت وطلعت ملابس واخذتهن للحمام وهناك اول شي سويته
فتحت التسجيل واني مرتبكه خاف ما مسجل لكن الحمد لله لگيت كل شي متسجل ومو عبالكم اني ما زعلت على بهاء
لان ما صدكني لكن كلت حقه
بمقابلتي ويه غزوان عرفت انو اني عايشه براتب ابويه الي تقبضه بيبي والي ابد ما فد يوم احد حجى وكال
انو اني الي راتب
يعني همه ما متفضليين علينه بس بكعدتنا وياهم مقابل شغلي بالبيت
والشي الثاني عرفت غزوان شكد حاقد ويكره بهاء وعاصف وهو سوا كل هالشي حتى ياخذ ثاره منهم يعني
اني ما الي اي ذنب والانكى انو يريد يتزوجني مو حتى يصلح غلطته لا يريد يتزوجني حتى يبيع البيت
سالت نفسي =. بس شعجب امه ما كإيلتله انو البيت ب اسم عاصف
لاول مره من يوم الي اعتدى عليه غزوان ارتاحييت لان اهم شي طلعت براءتي حتى لو انقتل ما يهمني المهم
بهاء يعرف الحقيقه
لبست ورجعت واني بعدني ارجف ومنتظره بهاء يجي
صبو الغدا وصرنا ناكل اربعتنا اني وبيبي وعلاوي وعمه رجاء الي سالتني // باجر اتداوميين
هزيت راسي ==اي ليش لا ؟
- - مو عكب باجر خطبتج
= وشنو يعني ؟
- - غير ترحين اتحفيين ؟
باوعت الها =لا عمه اني گتلج اي شي ما اسوي
- - عود ليش ؟
= عمه اني لازلت حزينه
- - شني بس انتي امج ماتت
= لا مو بس اني امي الله يرحمها اني عندي اخويه بالسجن مو مال افرح
رجاء// بكيفج حبابه انا اريدج اتطلعين احسن وحده مو باجر تگولين محد وكف وياي ومحد بحالي
= لا عمه اتي ما مقصره
بيبي ما اشتركت بالحديث وسمعنا صوت عمي مهدي اجه // وين امي
هاي انا وين
ها يمه الله يساعدج
هلا هم زين من اتذكرت عدك ام
ليش يمه
ليش يمه شكثر صارلك ما جاي ولا سائل
حجيه شغل ما احك راسي
شغليش غير الليل كله انت ومرتك وفروخك ابيت بتك
رد وهو يباوعلي چا وين نروح اهناك نگعد كلنه اهنا مره خلي نگعد بالهول مره بالحجره مره لايجون الولد مره
لاتصيحون البت عد امتحانات لو انا مجذب
هزيت راسي = لا عمو انت متكذب محشوم هانت كلها شكم يوم واروح
طلعت من الغرفه رحت للمطبخ وعيوني مليانه دموع
بيبي گالتله // شبيك صار شكثر ما جاي والباب بالباب ومن تجي تكسر خاطر البنيه
- - يمه شحجيت ما گلت شي
- - جا بعد شتكول هسه انت بالجذب اجيت نشدتها عمي راضيه ما راضيه تردين شي محتاجه شي بس تدش وتطلع
مشوها خلي تعرس اليكول شايلها على راسك
- - مو تكولون راضيه. خليها تمشي بحال سبيلها انتي ليش ضايجه
- - انا مو ضايجه انا ما راضيه تاخذ غزوان
- - ليش شبي غزوان خوش ولد وارباتنا
بيبي ما ردت وهو گال // يمه تردين شي محتاجه شي
بسلامة عاصف ما مخليني احتاج شي.
طلع بدون ما يعقب واجت فرح // ها انتي اهنا
بلي
امي وين
اجت رجاء// هاي انا شريت الملابس الله يساعدج
هلا. ماما جوعانه
صبيلج الغدا حار ع النار
باوعتلي وبلهجة آمر // صبيلي وجد بين ما اغسل اديه
صبيت الها خليته ع الطبله واني رجعت للغرفه اتمددت حتى ما فتحت كتاب ولا قريت علاوي الي كلي
عندي كتابة رياضيات ودرس جديد بالقراءه
فجاوبته = ارتاح شويه واساعدك هسه اذا تريد تكتب روح للصاله واكتب
() ايي اكتب ومن اكمل اطلع العب
= اطلع بس دير بالك مو يم النهر
هز راسه واخذ كتبه وراح يكتب واني اتمددت ع الچربايه غفييت كعدت المغرب رحت اتوضييت وصليت ومثل كل يوم
عمه رجاء وفرح راحن البيت بهاء بعد الصلا سالت بيبي شنو تريد اسويلها عشا هي ردت
- - رجاء سوتلي شوربه حميها وصبيها الي وانتي شوف شتسويلج
رحت خدرت جاي وصبيت صحن شوربه البيبي اخذته للغرفه وصبيت صحن شوربه العلاوي وحميتله خبزه هو سالني
( ) واتي اشو ما تاكلين
= ما اشتهي
صار ياكل واني طلعتله تفاحه اخذها وراح يكعد ع تلفزيون الهول وهذا الشي صار يسوي يوميه تقريبا لان ابراهيم ما صار
يجيله او يلعب ويا اتقربت منه وحاجيته
= علووش لا تضوج يوميه العصر اطلع العب ويه جهال عمو جابر
() مو اتي تكوليين لا تروح بعيد
= لا رووح بس دير بالك
حجى بعتب () حتى بهاء ما صار يحجي وياي ولا ياخذني ويا للمحل
هزيت راسي ء = علووش المحل بعيد شياخذك شيجيبك
رحت للغرفه لان سمعت بيبي تگول // تعاي اخذي الصينيه
رحت اخذتها ودخلت للمطبخ شفت بهاء واگف ارتبكت هو سالني
- - شفتي
بلعت ريكي بخوف = بلي
- - وين التسجيل
طلعته من جيبي اخذه وراح ع باب المنور كعد ع الارض وصار يسمع لمن ما وگف ورجع كلي وهالمره بدون ان يباوع الوجهي
- - من اجي الجمعه وانهى عليج ويجوز واحد ايكول خلي ناخذ رايها انتي تكولين بكيفكم ما تحچيين زايد
ما رديت ولا بكلمه رجعت للغرفه عبالي يجي البيبي بس هو ما اجه يعني طلع من الباب الثاني بقيت كاعده ع الجربايه
وبيبي لازمه سبحتها سمعنا صوت هي ردت ياهو اجانه
عدلت شالي دخل عمي مهدي ونهاد وياهم بهاء وساره وعمه رجاء وفرح
مهدي // يمه. هالاجينه بس لا تزعلين
بهاء مبتسم ويباوعلي // جذب جده انا جبتهم
بيبي اتاشر // وانت وحد هم مثلهم وين شايفتك
اتقرب عليها وحضنها // حقج حبوبه. بس مشاغل
- - هاا الشغل يخليك تعوف جدتك ما تنشد عليها تنسى التعب والربى
- - - شتگولين ما اگلج لا عسا ما تشيلين النعال وتطكيني بي
نهاد مبتسمه // يا عمه ما ندري هلگد تشتاكيلنه خوش بعد يوميه نجي. اهنا
بيبي // شني ما تجين طاردينج عتبت على ابني الصارله شهر ما مار بيه ولا يگول خلي اروح اشوف امي
ساره اتقربت // شلونج جده
بيبي ردت ابرود // هلا جده وانتي شبيج ما تجيني
- - جده. تعبانه من الحمل
بهاء باس راسها وخلا. يمها علاكه ونهاد تكول // شني نكضيها عتب اشلونج وجدان
= الحمد لله عمه
بيبي حاجتني // هاج هاي العلاكه خلي منها بصحون البيت عمج
بهاء// حبوبه جايبها الج
- - وانا شلي بي روحي جده خلي بصحون وجيبيهن اهنا
مهدي // صبيلي جاي
اخذت العلاكه جايب كرزات وعصائر وكيك جاهز خليت بالصحون واخذته الهم بيبي كالت
فرح // حركي روحج ويه بت عمج جيبي الجاي
هي كامت واجت للمطبخ جابت القوري والاستكانات ورجاء صارت اتصب بيبي حجت
- - ابراهيم شمالك ما تجي تشوفني وتلعب ويه ابن عمك ها نسيت ثاريك تروح البيت اختك اسم الله من عرس بهاء
ما صرنه انشوفلنه احد
مهدي // شلون يمه. ؟
بيبي تهز بايدها // شني ما تدري نهاد ابد ما تجي لا بليل ولا بنهار وهي. جانت اربعه وعشرين ساعه يمنه وانت مهدي
صارلي شهر ما مار بيه ورجاء وبتها ما يعولن يجي الليل ويرحن
رجاء// غير بيت ابني وماخذ بت اختي ونروحله
بيبي باستهزاء// ها هم صدك
رجاء // اي عمه لو بهاء ماخذله وحده غير ساره نمون ندش البيته
بيبي //رجاء تره البيت گبل لا يصير بيت بهاء هو بيتج وهمده الزلمه التبدله مره
رجاء// ادري عمه ب...
بيبي رفعت ايدها وتباوع عليه // جا شني بهاء لو ماخذ غير ساره بالمثل ما ترحين لو المره ما تريدج. بس كولي لمة حبايب
بهاء // اي حبوبه. لو تشوفينهن ما يشبعن سوالف زين انتن يوميه وحده. بوجه الثانيه هاي السوالف منين اتجيبنها
بيبي /// هههههه نسوان ياابني
كعدت بالهول يم علي وحاولت اشغل نفسي باان اباوع ويا. لكن بالحقيقه گلبي برجليه لان كل شويه اسمع. بهاء يحچي
كلام كانما موجهه الي
ما اعرف راسي افتر رحت. اخذت كوب وطلبت من عمه رجاء اتصبلي جاي
بيبي گالت // اخذيلج كيكه
= لا بيبي. راسي يوجعني
- - غير ما متعشيه
= ما اشتهي
اخذت كوب الچاي ودخلت. للمطبخ واني ما عندي تفسير ليش دموعي جاي توكع
صرت اشرب بالجاي ومستغربه من تصرف بهاء وبرود بيبي واني دا احس الكل ما يريد بهاءيعرف والكل مترقب
يريد يعزف شنو تصرف بهاء الي راح يتصرفه اذا عرف السؤال الي يتبادر الذهني بهاء منو كله
اسمع مهدي يسال // يمه عاصف اليوم وين
بيبي // راح البغداد
نهاد //. يابويه ادفع نص عمري واعرف شيسوي يروح البغداد
بيبي // شغله ما الج بيها خبزه تدفعين نص عمرج عليها ليش شموازيج
بهاء رد باستهزاء// فضول البيك ما يخليك
نهاد // شوف مهدي شوف ابن اخوك. حتى ما يحترمني
بهاء يضحك بصوت عالي // ههههههه لا تزعلين خاله جدتي سالت وانا جاوبت
ساره بتعب // انا تعبت اروح ارتاح
بيبي // اليوم تعبتي جيفن اجيتي هنا. يوميه النص الليل ما اتعبين
نهاد // لا عمه يوميه متمدده على فراشها
بيبي // گوم جده اخذ مرتك وروح البيتك البنيه تعبانه
بهاء// شني ما تندل تروح ابحدها
بيبي بعتب // خاف تريدك تروح وياها صار بعينها جيتك اهنا البيتك تشوفني
بهاء بعصبيه // ياهي هاي انتي تدرين بيه وهي هم تدري
نهاد // يا عمه شني صار بعينها بس تعبانه
بيبي // جا يوميه من تجي رجاء وانشدها. تگول زينه وسوتلنه كاستر لو سوت كيك والبيت نظيف يرهش رهش
والترتيب والطبخ اشكال الرجلها. هسه من اجتنه حگها خطيه صعدت جبل ياالله وصلت وهلتعبت
مهدي // اكعدي. بابا ساره شويه وكلنه نروح
بيبي // روحي نهاداخذي بتج البيتها وروحي وانت جده هم رووح ويه مرتك
بهاء// لا وداعتج ما اروح اظن انام اهنا
ساره ونهاد طلعن وياهن هاجر وابراهيم وعمي مهدي كال
- - يمه مو جنج طردتي نهوده وساره
بيبي // اسم الله يمته طردتهن مهدي لا تسويلك حجايه ما حاجيتها بتك گالت تعبانه كلت الامها. ورجلها اخذوها البيتها
ترتاح اكثر وانت يمه هم الا تريد رووح خافنك تعبان لو عدك شغل الصبح
مهدي // اي. من ناحية تعبان تعبان ياالله بهاء نمشي
- - لا ظال يم حبوبتي تالي اجي
- - خوش تصبحين على خير يمه
- - - وانت من اهل الخير عود باجر اطلع من غبشه اخوك مو اهنا
- - اي خابرني ان شاالله اكلج يمه هو يمته يجي ؟
- - باجر ما يتعطل
- - ان شاالله تصبحين على خير
- - اجمعين
طلع مهدي بقيت بالمطبخ ما سمعت بهاء يسولف ويه بيبيتي عرفت يريد يجي ويحچي وياي لكن وجود رجاء اكيد ما يگدر يجي
اني حسيت بدوخه وتعب اجت فرح // ليش ما تجين اتكعدين يمنه
= دايخه فرح وتعبانه
- - يا شبيج
= ما اعرف راسي يوجعني
اتقربت مني وشاورتني = هههه اكيد من التفكير بالخطبه
راحت فرح واشوف الاستهزاء بوجهها اعرف هذا الشي بسبب موافقتي على غزوان رحت للصاله اتقربت على علاوي شاورته
= حبيبي راح اروح انام بغرفة عمو كلش دايخه تجي وياي لو تبقى
() لا ابقى
= تمام اني راح اقفل الغرفه عليه وانت بس تكمل لعب روح نام بجربايتك
() واتي
= اني بس يرحون اجي انام بغرفتنا ماشي
( ) ماشي
دخلت الغرفة عمو عاصف اخذت مخده والبطانيه خليت المخده واتمددت واتغطييت بالبطانيه ونمت ع الزوليه الي بالگاع
واني افكر واتساءل = ياترى بهاء راح شيسوي يفضحني يقتل غزوان لو ايگل العمو عاصف ومهدي ويقتلوني
كعدت على حيلي = حتى لو يقتلوني اهم شي ما اخذ غزوان اصلا اني ميته من يوم الي هشام قتل رامي فما يهمني شنو يصير
كافي مليت من گد التفكير والخوف والترقب خلي ايقتلوني ولا يخلوني اخذ الحقير غزوان
رجعت خليت راسي ع المخده واتغطييت غفييت وكعدت باوعت شفت الساعه بالسته ونص اتوضييت وصليت بالغرفه
ورجعت نمت هاي اول مره ما افكر شراح يصير ما دام انكشف كل شي وبهاء عرف الحقيقه هذا هو
ثاني يوم اساسا ما حبيت اداوم وبقيت نايمه بيبي دكت الباب // شني اليوم ما تداومين
جاوبتها من جوه البطانيه = لا بيبي ما اداوم اريد انام
رجعت نمت صحيت على دگة الباب وصوت بيبي // شو اگعدي وفكي الباب
باوعت للساعه اهدعش ونص صدقا اني استغربت حييل هلكد نمت وليش هيج نمت هاي اول مره من يوم الليله المشؤومه
هالشكل انام
فتحت الباب بيبي واگفه وراها عمو عاصف سالتني // شبيج ؟
جاوبتها بتعب = ما بيه شي
- - عمج يكول خافنها مريضه ياخذج للطبيب
هزيت راسي = لا امس تعبت اليوم زينه
- - تياالله اكعدي عمج يريد يدخل الحجرته جاي تعبان
حكيت خدي = اسفه عمو
هز راسه بدون ما يجاوب ورحت اتوضيت وصليت وعمه صبت الغدا واجت سالت بيبي // اجيبلج اهنا لو تجين للمطبخ
- - جايه للمطبخ
بيبي راحت للمطبخ واني رحت وراها باوعت للصاله علاوي متمدد ع القنفه اتقربت منه = شبيك علاوي
() مابيه شي بس اتي قفلتي عليج الباب واني خفت عليج
= لا حبيبي لاتخاف كنت تعبانه ونمت
() وحتى للدوام ما رحتي
اخذت ايده وگومته =. اي حبيبي تعبانه ما كدرت اداوم
رحنه نمشي هو باوعلي ()بس ابراهيم يگول اتي حتتزوجين وغزوان ياخذج وتعوفيني
رجاء وهي تخلي الخضره // فلشه ابراهيم منين يجيب الحجي
بيبي ردت // منين بعد منج ومن امه خو مو مني
مسحت على راسه = لاحبيبي اني ما اتركك لان ات اخويه وحبيبي
بيبي //. علي. انا ما ارضى هيج رچيچ اريدك زلمه سبع شني تعوفيني شني كلي ابراهيم هذا بيتك بيت جدك وانا جدتك
بيتك تدرس وتكبر بي ويجوز حتى ازوجك الا الله اطاني عمر
صرنا ناكل ورن تلفون عمه رجاء باوعت //. هاي سعاد
هلا خيه ام غزوان
الله يسلمج انتي شلونج
هاي عمتي جاي نتغدا
الحمد لله زينه
بقت تسمع كلام سعاد بعدين ردت // خيه البنيه تگول ما اريد بدله ولا حفله البس شي رسمي
حتى من نشدتها ليش عمه تردلي اخوي مسجون واني افرح
هم صدك كلامها سعاد عود نسويلها حنه
اي كل شي حاضر خاله جاب الكيك والعصير من بغداد
الله يسلمج
براحتج كل الهلا
الله يسلمج
نهت المكالمه وهي تكل البيبي // عمه سعاد تسلم عليج
بيبي ابرود // الله يسلمج چا مو انا هل:يمج ليش ما گالت احاچي امي
عمه الله يعينها ابحدها
وشني هاي التگليلها خاله جابهن
عمه عاصف جاب كيك وعصير
بيبيدتباوعلي بعتب // ها خوش طال عمره وسهل امره حتى بذاك عرسه هم هيج سوا
رجاء// وهي نشدتني على وجدان اتگول حجزتو بدله صالون وانتي سمعتيني كتلها البت ما ترضى
بقيت ساكته ما جاوبت وحتى بيبي ما حچت حاولت اشغل نفسي. بااي شي الى ان صار المغرب وصليت والكل
مو بس اني مترقبه لكن اي. شي ما حصل اجه عمو بعد. ان اتعشى وكعد بالصاله واجت يمه بيبي وطلب مني چاي
رحت سويتله شفته. اتصل ويه بهاء واهنا عمه رجاء ارتبكت ما عرفت شتسوي لان عرفت انو عمو عاصف
راح ايخبر بهاء بخطوبتي بيني وبين نفسي ضحكت واحچي
= الكل خايف من. بهاء يعرف وينهى عليه وهمه ما يدرون ابهاء محضرلهم مفاجأه
عمو گال. :: ها بهاء تعال رايدك
:: اي هسه رايدك بشغله
:: ياالله منتظرك
اجه بهاء. هو وعمي مهدي الي مبين الارتباك على وجهه سلمو
السلام عليكم
:: عليكم السلام.
اني بالمطبخ هو گال :: جيبي جاي العمج. وابن عمج
اني بسرعه صبيت استكانين واخذتهن بيبي //. شوفيهم خاف. ما متعشين
هز ايده بهاء // شلقصه جده هاي ابيوتنا
- - اگول تجي متاخر ومهدي. دومه عشا يتاخر
— — لا يمه اتعشيت الحمد لله
— — بالعافيه
بهاء// ها عاصف خير
شفت مهدي. مرتبك حتى اكثر من رجاء عاصف جاوب
:: كل الخير باجر رايدك تروح البغداد
- - شكو
:: بيت حجي طالب عدهم فاتحه عمهم الچبير انطاك عمره
- - إنا لله وإنا اليه راجعون چا انت مو چنت ابغداد ما مريت بيهم
:: توهم خابروني ومناك تمرلي على ابو بشار
باوعله // انوبه امرن ليش ؟
:: على مود الدوا للبحيره.
- - شعجب ما جبته وياك ؟
:: مريت اخذه لگيته ما محضره كلي مرلي باجر وانا خابروني على شغل هالاجيت ما تانيت انت بويه باجر
تطلع بالسبعه. هيج لا اطلع بثمانيه اقرا فاتحه. واتغدا وخابر ابو بشار شوفه شيگلك واذا ع المحل انا اروح
بهاء// لا يابه يامحل بي.العامل خوش ولد
بيبي // اهم شي أمين ويخاف الله
- - اي جده أمين كلش ولو الناس هالوكت ما تنحزر بس انا اشوفه آمين والبلگلب بس الله يدري بي
بيبي // الله يرزقه ويستر علي
:: انت باچر الصبح كبل لا تروح مر بيه اكو فلوس اريدك توصلهن بدربك الحجي. حامد
بهاء بتذمر // هذني كلهن اسويهن گول ابات
رجاء //. اي يمه بات لا تستعجل وتجي بالليل.
- - ان شاالله
بيبي // اي بات اذا. يوافكك ليل
هز راسه بدون ما يعقب
شفت. علاماتالراحه والاطمىنان بوجه عمه رجاء گعد مهدي وبهاء نص ساعه وراحو وبعدها. رجاء صعدت وانا رحت
الغرفة بيبي الي بقت هي وعاصف بالصاله وهي اتگله //. لدالي اتكله على خطبة الفرخه
:: يمه ما اريد اتصير مشاكل
بيبي //. چا گول وديته حتى ما يسمع
:: اي حجيه مالي خلك المشاكل
بيبي بزعل // هاا جا خوش بس اسمعني. عاصف انا ما راضيه
:: يمه باجر من يجون گولي انا ولية امرها وماقا بله
بيبي // اي اگول جا خايفه بس انا المعجبني انت
:: شبيه انا ؟
- - انت شلون ترضى. تطيها الابن ناظم
:: يمه هي راضيه الف مره گلت هي راضيه شسوي بالمثل. اطكها طلقه
بيبي بعصبيه // ها وهو لو تطگها طلقه لو ماكو. تاخذ ابن ناظم ما طگيتها طلقه من گالت على بهاء احرك روحي وما اخذه
:: انتي ما حاجيتي بت ابنج
- - شحاجيها ؟
:: كليلها انا ما راضيه
بيبي بعتب // ههه جا. غير حجيت وگلت وزعلت وهي بلسان الهاطوله تگلي راضيه بي.
:: خليها يمه تمشي بحال سبيلها
بيبي بقلة صبر وزعل //. اگلك يمه انا مره مالي خلك ومو زين. عليه الحريك لا حركه من الحرگات صايبتني جلطه
ومحد ايفيدني
:: حجيه عمرج طويل بس. انا مومال اوكف بنصيبها
- - خلي. اروح انام
:: يمه لا تزعلين من يجون باجر عدي شروط وياهم رضو اطيتهم. البت ما رضو طبهم طوب اخليها تطك راسها بالحايط.
خو ما اشمرها عليك ياراضيه
- - شني الشروط ؟
:: يمه بوكتهن اتعرفينهن روحي. نامي ومن اصبح افلح
اجت بيبي واني مثلت انو نايمه لان اعرف. من تشوفني تفتح وياي سمفونيه
دخلت بيبي للغرفه باوعتلي وحچت // نايمه المسعده
وصارت تدخن وتتنفس بعمق الى ان سمعت حمحمة عاصف هي ردت // فووت
دخل سالته //. ها يمه
:: ما اريدج تنامين زعلانه
- - مو زعلانه
يمكن حضنها :: وداعتج بردي راسج ما يصير خاطرج اله طيب
- - رووح نام يمه الله يرضى عليك
:: تصبحين على خير وكافي جكاير مو زين عليج
- - تنصح روحك وبطل انت الجكاير
:: ههه اليوم امي گالبه عليه خلي اروح انام احسنلي
نمنا والصبح كعدت شفت بيبي. كاعده بالصاله مبينه گاعده من وكت سلمت على بيبي ورحت للمطبخ لگيت فرح گاعده سلمت
=. صباح الخير
باوعتلي وابتسمت // صباح النور ياعروس
رجاء // اكعدي اتريگي
اكلت شويه. ما اشتهي واجه عمو عاصف گعد بالصاله راحت رجاء. سالته // اجيبلك ريوك
ما سمعته جاوبها هي اجت وسوتله بيضتين بالدهن وخبزه وكوب جاي. اخذتهن اله بالصاله
هو سال بيبي :: يمه اكلي وياي
- - هني ومري تريگت
:: بالعافيه.
- - الله يعافيك راح بهاء
:: اي يمه راح
- - الله ويا.
بهاي الاثناء اجت عمتي امل وعمتي انصاف واسمعهنويكولن // وينكم
اهنا يمه هلا بيجن
سلمن على عمو وباوسن بيبي وطلعت رجاء. هم باوستهن وبقيت اني ويه فرح واحنه نغسل بالمواعين اجت رجاء وگالت.
- - سون ريوك العماتجن
كليت بيض وطلعت جبن ويه خبز اخذت الصينيه. وفرح القوري والاستكانات سلمنه عمو دخل الغرفته
وعماتي يگولن الفرح // يوم الالج
- - لا عمه اريد اكمل الحك
حسيت بكلامها تقصدني بقيت ساكته صارن ياكلن ويسولفن على بيبي وعمه رجاء
عمو فتح باب غرفته وانا شايله الصينيه هو گلي :: وديها وتعاي
عرفت يريد يحجي وياي ع الخطبه خليتها ع الكاونتر رجعت للصاله باوع الرجاء
:: اطبخي بس تمن وصيت جابر يشوي دجاج
بقيت واكفه هو گال :: اكعدي
كعدت حچى :: مادام عماتج وحبوبتج موجودات انتي قبلتي باابن سعاد وانا بغض النظر عن رايي ما اجبرج على شي
بقيت مدنكه امل رادت تحچي هو رد :: من رخصتج ام غانم خلي اكمل
حمحم وهو يشعل جگارته :: من يجون راح اشرط عليهم تكملين دراستج ما تبطليين سمعتي هاي كدام عماتج وجدتج
ما تبطليين حتى لو انتي تردين تعوفين المدرسه ممنوع تبطلين واخوج يبقى اهنا يمي
انتفضت من مكاني جاوبته بخوف = لا عمو علي وياي وين ما اروح
باوعلي وخزرني وهز راسه رد باستهزاء :: شني اودي علي يربى ابيت غزوان وبيت جده موجود وعمامه موجودين
لا بابا هذا الشي ما يصير
امل // عمه شني تخافيين على علاوي يم عاصف وامي وهو هم مو زغير
باوعت الها هي عضتلي شفتها يعني اسكتي ما جاوبت هو رد بعد ان نفخ الدخان
:: انا ما راح اشرط علي يطلك مرته بس اشرط يخليلج بيت الج ابحدج ما عليج بمرته انتي ابحد وهي ابحد واذا يريد ايطلكها
شي راجعله وبعد عندي كلام هذا ما يخصج بس لازم احجي ( اتنفس وغمض عيونه ونفخ الدخان )
:: گبل لا تجي الناس عدج شي
بقيت مدنكه عمه امل // لا خويه شعدها
رفعت راسي باوعتله شفته مو بس ضايج يريد ينفجر حاچيته بخجل على خوف = عمو بس لازم تاخذ راي هشام
رد بحده :: هشام اذا انتي قابله هو شيكدر يسوي يجي يمنعج بالمثل
امل //. مي خالف خويه لازم اتخبره
:: هشام مخولني تخويل تام عنها وعن علاوي وحتى عنه
وكف وهو يهز براسه :: انا طالع شويه يم الفلح من تحتاجون شي خابروني (باوع البيبي )
:: يمه تجي سعاد حجي زايد ناقص ما اريد
وهاي مرت مهدي مو تخبص الجو بالهلاهل والگولات
طلع وهو ضايج بيبي //. هي اتهلهل فرحانه البتها مو الغزوان
امل //. يممه
بيبي بعصبيه // شگايله غير هلتسمعنه وهلشفتنه داعي ناار بس شنسوي (باوعتلي ) بعد هذا الوكت كلمن بكيفه
الچبير ما صارتله كلمه
عمتي انصاف رادت تغير الموضوع اتقربت يمي // عود ليش ما حافه ولا حاجزه عد صالون وما ماجره بدله
= عمه ما اريد حفله عندي كوستم والبسه واسشور شعري
- - ها عود ليش
رجاء// تكول اخوي بالسجن وانا افرح
انصاف //. بس انتي ام بهاء المفروض ما تقبليلها هي هم مثل بتج
رجاء//. اسالي عمتي طلع بلساني عظم وهي ما تقبل
- - بس انتي عمه بنيه ومن حقج تفرحين
لا اراديا نزلت دموعي عمتي امل حضنتني // لا تبچيين مو زين
بيبي //. خليها تبجي بلكت اتحس على روحها
امل //. يمه صدك چذب ما تشوفينها ( وجهت كلامها الي ) عمه كافي لاتبجيين عيونج ورمن هسه اليشوفج شيگول مجبوره
رجاء// محد جبرها هي رضت
امل // ما گلنه احد جبرها بس بنيه حالها من حال البنات وامي الله يسلمها (ربتت على كتفي ) كافي عمه
الظهر جابو الغدا انا ما اشتهييت اكل لكن عماتي انصاف وامل گالن اذا انتي ما تاكلين احنه هم ما ناكل استحييت منهن اكلت شويه وبعدها دخلت الحمام سبحت واخذتني فرح الغرفتها وهاي اول مره ما اشوف نهاد موجوده شسورت شعري ولبست كوستمي لونه تفاحي وفرح طلعتلي كلاده وسوار (مو ذهب ) لبستهن وخليت مكياج خفيف وهي هم بدلت لبست نفس الكوستم بس لونه بيجي
ولبست ذهب سوار وگلاده ومحابس تلاثه وساعه وخلت عطر ضامته بكنتورها ترش بي وكانها اتگلي
شوفي انا كل هذني عندي وانتي ما تملكين شي
نزلت بقت فتره بعدها صعدتلي وكالت اجوي بقيت بالغرفه وكل الاحتمالات صارن گدامي لكن من سافر بهاء عرفت
باان هو ما راح ايسوي اي شي ولا راح يتدخل
حجييت ويه نفسي = يعني بهاء ما راح يسويلي شي لازم انا اواجه مصيري بهاء انتقم مني وخلص راح واني
هم راح اتزوج غزوان بعد ما بيها اي مجال
هزيت راسي = المهم هو عرف انو اني كنت ضحيه الواحد حقير مثل غزوان
ما اگللكم ما ضجت لا ضجت هواي لان كنت اتمنى انو بهاء يفضح غزوان وانقتل ولا اتزوجه الهذا الحقير لكن
مع الاسف بهاء اتخلى عني
جاهدت حتى دموعي ما ينزلن لكن نزلن لمن ما اجتني فرح وعمه امل گالت // ياالله انزلي
رفعت حنجي // شبيج عمه تبچيين
جاوبتها = تمنيت امي وياي
- - انا امج وجبوبتج وفروحه اختج ياالله سمي وانزلي
نزلت شفت عمه سعاد جايه وياها بنتها ونهاد وساره وهاجر وعماتي وبيبي وسميره ومن دخلت سعاد رادت تهلهل
لكن بيبي گالت ابرود // اسكتي ما يرضون خلي يعقدون ياالله
گعدت وعماتي يصلن ع النبي وسعاد تگلي // الف مبروك
سميره باركتلي ضاكت الدنيا بعيني اريد اعيط واصرخ وافضح غزوان النذل عرفت بعد ماكو اي امل
بهاي الاثناء سمعنا اصوات جايه من المضافه صوت عمي مهدي وهو ايگله // يواشك البنيه قابله
بهاء بصوت عالي هادي // خاف تتشاقى قابله ما قابله البت الي ومو انا الي انضرب بكفاي وانتم الجايين كل الهلا بيكم
شربتو چايكم اتفضلو انتم منهيين البت بت عمي ومحد ياخذها غيري
