رواية بنت الكهوجي الفصل الثامن والثلاثون بقلم احمد
ياقوت : قبل المغرب بدقائق جنا واگفين بطارمة بيت تميم واهلو بطارمة بيتهم وننتظر على امل احد يتصل ويطمنا اخير شي رجع زيد
دخل من باب البيت وسط صدمة من الكل بالحالة الي رجع بيها والصدمة الاكبر من انتبهنا للي شايلو بايدو ومشى كم خطوة داخل الحوش ووگع على ركبو
ركضنا كلنا باتجاهو ومن وصلنا من صدگ المنظر الي شفتو گدامي ماگدر انساه طول عمري من الرعب والبشاعة الي بيه
جان وجه زيد مليان دم وملابسو بيهن دم والمرعب اكثر اكو سجينة ضاربة ايدو بعضلة الزند وطالعة من الجهة الثانية
جان شايل مرة بايديه نزلها بالگاع بكل هدوء ورفع الغطى عن وجهها وهنا الصدمة لان جانت اديان الي شايلها بس مغمضة عيونها
حركها تميم بس ما انطت اي رد فعل انتبه انها مضروبة طلقة ببطنها وعبايتها مليانة دم صار زيد يمسح على وجهها بهدوء ووگع فوگها وفقد الوعي
البنات كتلهن الخوف مثلي والولد واگفين وصافنين ما يعرفون شيسوون صاح عليهم تميم گال جيبو السيارات بسرعة خلي ننقلهم عالمستشفى
وراحو يركضون جابو السيارات وحطو زيد بسيارة واديان بالثانية وانطلقو مثل الصاروخ عالمستشفى وام زيد صارت تلطم على ابنها
ومن صعوبة الموقف ما بقينا بالبيت رحنا على بيت الحجي ولان السيارات بيهن الولد وزيد واديان ماگدرو يروحون ابو تميم وزوجتو
تميم : من شفت زيد والبنت بهاي الوضعية تخبلت ولان ما فد يوم مركز على خوات حازم فما جنت اعرفها وماعرف علاقة زيد بيها
الي جان مخبلني منو هاي وشجاب زيد عليها وليش هيج حالتهم ومنو حاول يقتلهم اسئلة هواي تدور ببالي وما الها اي جواب بالوقت الحالي
من فقد الوعي زيد تخبلت فد مرة عقل ما بقى براسي وصحت على اخواني لان شفتهم متربطين مايعرفون يتصرفون
اخذتهم للمستشفى وبگلبي اگول بس خلي اعرف الي سوا بيهم هيج الا اخليه يتندم تاليها اخو الشيخ تميم يوصل للموت فلا اكون زلمة اذا سكتت الهم
من وصلنا المستشفى راح زياد ركض يجيب سديات واني شلت البنت والولد شالو زيد وركضنا بيهم للمستشفى واجو الممرضين يركضون ووياهم السديات
حطيناهم عالسديات واخذوهم لغرف العمليات فورا لان مصابين برصاص بس مانعرف ان زيد متصوب عبالنا بس مضروب وگعدنا اني واخواني گدام غرفة العمليات ننتظر
طلع الممرض وگال فاقدين دم هواي تعرفون فصيلة دمهم
زياد : اني فصيلة دمي مثل زيد بس ماعرف فصيلة دم البنت
الممرض : تعال بسرعة وياي
تميم : زيد ليش دخلتوه للعمليات
الممرض : مضروب طلقة فوك الكلية اليمين
تميم : والبنت شلون نعرف فصيلة دمها
المنرض : فد شوية ونعرف فصيلة دمها واذا بيكم احد مثل الفصيلة يگدر يتبرعلها بالدم
تميم : تمام .. دگ تيلفوني وجان ابوي
ابوي : ها تميم شصار وياكم
- احنا بالمستشفى هسا ودخلوهم لغرفة العمليات
- زيد ليش دخلوه لغرفة العمليات
- متصوب بطلقة فوگ الكلية اليمين
- دز واحد من اخوانك يجي ياخذنا اني وصفية
- انتظرونا شوية يابة نريد نعرف فصيلة دم البنت علمود اذا بينا واحد مثل الفصيلة يتبرعلها بالدم
- يعني شگد ننتظر
- يابة الله وكيلك ماعرف بس نعرف فصيلة دمها ادز واحد من الولد يجيبكم
- تمام ننتظرك
تميم : سكرت من ابوي وشوية واجى ممرض ثاني گال فصيلة دم البنت AB يعني تگدرون كلكم تتبرعولها بالدم
ورحنا اني ومالك وفاضل نتبرع بالدم ودزيت رشيد علمود يجيب ابوي وزوجتو وبين ما تبرعنا ورجعنا لگينا ابوي وزوجتو واصلين وزياد گاعد يمهم
گعدنا ننتظر واللحظة نحسها سنة وتعرفون الانتظار بهيج حالة شگد صعب وكل ما يطلع ممرض نسألو يگول بعد وبقينا على هالحالة ساعتين ونص
اول ما طلع الدكتور گمنا كلنا وابوي سألو گالو شلون ابني دكتور
الدكتور : وضعو مستقر حاليا بس نازف دم هواي ويحتاج وقت طويل للراحة
- يعني شگد تقريبا
- ماعرف هالشي حاليا لازم ننتظر ونشوف استجابة جسمو للادوية وتطور حالتو بس إن شاء الله ما يتأخر
- الله يسمع منك مشكور دكتور
- العفو وعندو العافية
- الله يعافيك
تميم : يابة انتو ابقو هنا واني اروح اشوف وضع البنت
- اي ابني روح واي شي يصير وياك انطينا خبر
- تمام يابة
رحت لغرفة العمليات الثانية جانو بعدهم يمها گعدت انتظر واتصلت علي امي وجاوبتها
الحجية : الو
- هلا يمة
- ها تميم شلون وضعهم
- زيد طلع من العملية قبل شوية
- واديان
- باستغراب .. منو
- اديان اخت حازم شبيك
- يمة باليرحم والديج ترا عقلي مدا يجمع يعني الي بالغرفة اخت حازم ما غيرو
- اي يمة اخت حازم كل هذا ما تعرفها
- بعصيبة .. شجاب زيد الها
- واني شعرفني هسا جاوبني البنت شصاير بيها
- بعدها بالعملية ودا انتظر الدكتورة تطلع
- تمام اي شي يصير وياك انطيني خبر
- تمام
گعدت عالكراسي الي گدام غرفة العمليات واني متخبل هسا اذا اتصل على حازم شنو اگولو والله زيد جاب اختك لبيتنا
بس اريد اعرف زيد منين جابها اكيد مو من بيت اهلها لان لو حازم عندو علم جان حجالي قبل ما يسوي اي شي معقولة من بيت عمها
بس ثواني زيد شعرفو اذا اخذوها عمامها وثانيا هو اجاه اتصال قبل ما يطلع معقولة خابرو حازم علمود ينطيني خبر وزيد راح بدون ما يگولي
بس لو الامر هيج جان حازم وگف ويا زيد او باسوء الاحوال جابهم بسيارتو للمستشفى معقولة عمامها قتلو حازم وحاولو يقتلون زيد والبنت
طلعت تيلفوني اريد اخابر حازم وطلعت الدكتورة من الغرفة وگمت فورا گلتلها ها دكتورة بشريني شلون صحتها
الدكتورة : الحمدلله نجحت العملية بس البنت عدها سوء تغذية كلش حاد وهالشي راح يأثر عليها وممكن يسببلها مضاعفات
- ما تعرفين ايمتى تگعد
- بنفسي احجيلك شي يفرحك بس ماگدر احجي اي شي قبل مرور 24 ساعة لحد ما نشوف نسبة تفاعل جسمها ويا العلاج
- تمام دكتورة مشكورة
- العفو
- اخذت تيلفوني واتصلت على حازم وبگلبي اگول امانة الله رد علي مو ناقصني صدمات اليوم والحمدلله بسرعة رد
حازم : الو
- ها حازم شلونك
- بالضيم اني يا تميم بالضيم
- شكو فهمني
- اخذو اختي يا شيخ اخذو اختي وماعرف وين اختفو
- اديان مو
- اي يا شيخ اديان
- اديان موجودة
- بفرح .. وينها هسا
- اول شي ما اريد احد يعرف بالوقت الراهن اهم شي تجيب هويتها وتجيني للمستشفى ولا تحجي لاهلك انها بالمستشفى مفهوم
- شبيها اختي تميم احجيلي شبيها
- تعال واحجيلك بس تطمن هي حية ترزق
- تمام جايك
تميم : سكرت منو وسحبت نفس بقوة بعد ما تطمنت عليه ورجعت خابرت امي وحجيتلها على حالة اديان وانها طلعت من العملية
تقريبا نص ساعة واجى حازم جنت گاعد وشفتو اجى وبوجودو صادف انهم طلعو اديان لغرفة وحدها وعافني وراح عليها
صار يحجي ويا الممرضة وهو معصب وسحبتو من يمهم علمود لا يطلعوه الامن وباوع علي گلي شبيها اختي تميم احجي شبيها
تميم : اهدئ ترا ما راح نفهم شي اذا تبقى هيج
- اهدئ يا تميم اهدئ اختي بين الحياة والموت شلون اهدئ
- اهدئ لان اخوي هم بين الحياة والموت
- سكت وهو مستغرب وكأنو صحى على نفسو انو شجاب اختو علينا .. يا اخ وشنو صاير
- باوع اليوم طلع زيد العصر ومانعرف وين اختفى وحرگنا التيلفون عليه وهو ماكو لحد ما اجانا المغرب ووياه اختك
هي وزيد متصوبين بطلقات ببطونهم وزيد مضروب بسجينة بايدو غير الضرب الي على باقي جسمو شنو صاير ومنو حاول يقتلهم ماعرف
- عمامي اكيد لان اخذو اديان من البيت واني غايب
- زيد شلون عرف وشوصلو لعمامك
- المفروض اني اسألك هالسؤال لان زيد اخوك انت
- المهم هسا اهدئ اختك طلعت من العملية وعمليتها ناجحة الحمدلله
- وليش اني ماعرف من البداية
- يا حازم شعرفني هي اختك وثانيا شفت اخوي بهالحالة هاي عقل ما بقى براسي وبقيت عندو لحد ما خلصت عمليتو واجيت هنا
وقبل ما اخابرك بشوية يلا عرفت ان هاي اختك اديان وجنت اريد اخابرك وطلعت الدكتورة واول ما راحت الدكتورة خابرتك
- اريد اروح اشوفها
- اول شي روح انت وواحد من الولد سجلولهم دخول وبعدها نسأل الدكتورة اذا يصير نشوفهم لو لا
- تمام
اشرت لرشيد ودزيتو ويا حازم ورجعت عند اهلي وجانو مانعين الزيارة عن زيد وبين ما اجو حازم ورشيد اجو الدكاترة يجيكون وضع زيد واديان
من طلعو سألناهم اذا نگدر ندخل وگالو حاليا ممنوع علمود صحتهم وخصوصا اديان والافضل نروح للبيت وباجر نرجع
تميم : يابة روحو انت وامي ( زوجة ابوي اسميها امي احتراما الها )والولد واني ابقى هنا وباجر الصبح تعالو
صفية : اني ما اريد اروح اريد ابقى يم ابني
- الدكتور گال ماراح يصحى اليوم فروحي ارتاحي شوية وباجر الصبح تعالو كلكم مع بعض
الاب : يلا بوية خلي نروح وباجر نجي اني وياج ويا بعض
صفية : زيد امانة يمك يا تميم دير بالك عليه لا يجون يأذوه
- ما يوصلوه وخشمي يشم الهوا .. باوعت لاخواني .. وانتو هم روحو
رشيد : روح انت لان تبرعت بالدم وتحتاج راحة واني ابقى
- لا روحو انتو واني باجر الصبح ارجع للبيت
رشيد : تمام .. يلا زياد
زياد : صافن وما جاوب
- زياد
- ها تميم .. وهو يباوع للباب
- يلا روح وياهم
- ما اروح
- هسا نقنع بيكم واحد واحد
- لا تقنعني لان ما اروح واعوف زيد
- باجر........ قاطعني
- لا باجر ولا بعدو ما اروح وانتهى الموضوع
- خلص رشيد روحو واني وزياد نبقى
رشيد : تمام
من راحو اهلي رحت لحازم الي جان گاعد بمسافة عننا لان غرفة اختو وغرفة زيد بنفس الممر فگعدت يمو وگلتلو شراح تسوي هسا
حازم : ماعرف
تميم : روح ارتاح وباجر ارجع
- شلون اروح واعوفها
- اني موجود هنا وراح ابقى لباجر
- شوف روح طمن امك ودير بالك عليها هي واختك الثانية خاف يستغلون غيابك مرة ثانية وباجر تعال
- اذا هم زلم اعرف وين صارو لك سوو عملتهم واختفو هالنغولة
- مع ذلك روح عالبيت وباجر تعال اختك هي اختي واني باقي هنا
- يا تميم تريدني اروح اگول لامي بنتج بالمستشفى بين الحياة والموت وما اجيبها لباجر غير تتخبل علي بهالليل
- من توصل هناك اذا ما اقتنعت اتصل علي خليني احجي وياها
- سكت بين الي يريد يروح وما يريد يروح
- يلا مثل ما گلتلك روح للبيت هم ارتاح علمود باجر بالنهار تبقون هنا انت واهلك
- تمام بس اي شي يصير خابرني حتى لو نص الليل
- بعيني
- السلام عليكم
- عليكم السلام
گام يريد يروح وصفن شوية وبعدها مشى وهو ضايج ومهموم بذيج اللحظة احس گلبي انعصر عليه الله ورطو بعمام يجيبون الجلطة
تمنيت هو اخوي وربي احرگ الدنيا كلها اذا واحد يسوي بيه هيج بس حظو تعيس ان ما يقربلي بس عمامو هم راح احاسبهم على اذية زيد
تميم : زياد
زياد : ها تميم
- روح جيبلنا عشى ترا كتلني الجوع
- تمام .. شنو اجيب
- الي يعجبك المهم ما نبقى جوعانين مو ناقصنا نتخربط او يصير عدنا هبوط بالضغط
- تمام
راح زياد وبقيت انتظرو وتقريبا نص ساعة واتصل علي حازم وجاوبتو وگال امي تريد تجي هسا علمود تشوفها گلتلو انطيني احجي وياها
ام حازم : ها تميم
- هلا امي شلونج
- گلبي محترگ على بنيتي يا تميم
- تطمني امي بنتج بخير وسلامة وهسا هي نايمة بالغرفة
- اريد اشوفها يا تميم
- يا امي والله مانعين الزيارة عليها حاليا لان قبل شوية طلعت من العملية وحتى زيد اخوي نفس الشي باجر من تجون الصبح تشوفيها وتبقين يمها لليل
- گلبي دا يحترك على بنيتي .. وانفجرت بالبجي
تميم : صرت اهدي بيها بس ماكو فايدة ام وتسمع ببنتها بهالحالة اخير شي حازم گال راح اجيبها وسكر الاتصال واجى زياد جايب عشى
زياد : شبيك مگلوب وجهك
- حجيتلو الصار
- حقها انت كل عقلك مقتنع انها ما تجي
- گلت بلكي تقتنع
- المهم تعال تعشى قبل ما يبرد الاكل
- وين لگيت كباب بهالوقت
- دبرت نفسي
تميم : گعدنا اني وياه على 3 نفرات كباب ولان جوعانين وتأخرنا بالعشى طگيناهن كلهن ووياهن ببسي بارد مجرش
زياد : وربي احنا عارات
- ليش
- اخونا متصوب واحنا ملتهين ببطونا
- والله هم صحيح بس اني متأكد ان زيد باذن الله راح يطلع منها سلامات وهذا الامل دا يخليني اكون طبيعي
- إن شاء الله
- شو ما اجو حازم وامو
- ماعرف يجوز اقتنعت على گولتك
- والله مادري بس خلي اخابرو اتأكد
- خابرو
تميم : اتصلت عليه وسألتو گال قنعناها اني واختي انو تنتظر لباجر لان بدون فايدة اذا اجينا هسا گلتلو هيج احسن وسكرت منو
بقينا ننتظر اني وزياد وبدا تيلفوني اتصال ورا اتصال لان بدت تنتشر سالفة انو زيد تصوب بس محد يعرف بموضوع اديان
جنت خايف تجيها سمعة مو حلوة بسبب زيد بس الحمدلله محد سأل عنها حتى ازواج خواتي محد بيهم سأل عليها
وبالاخير سمعت ان قبل ما يروحن امي موصيتهن محد يجيب طاري البنت لحد ما نتأكد من سبب وجودها ويا زيد
صارت الساعة 6 الصبح اجو حازم وامو واختو واني بقيت بعيد احتراما لامو واختو فبقن هن گدام الغرفة وهو اجى علي
سألني اذا اجو دكاترة لو شي گلتلو بعد منا لل 8 يجون والاحسن ما تدخلولها لحد ما تجي الدكتورة احسن خاف ما يصير گال تمام
وراح گعد عند امو وبالسبعة اجو اهلي واتفقنا اني وزياد بعد ما يجي الدكتور ويفحص زيد نتطمن عليه ونروح للبيت نرتاح
الساعة صارت 8:07 اجو دكتور لزياد ودكتورة لاديان بقو شوية داخل وبعدها طلعو وسألنا الدكتور گال الحمدلله صحتو زينة
سألتو امي اذا يصير نشوفو لو لا گال اي تگدرون تشوفوه بس لا تتأخرون عندو گلت لزياد خلي نشوفو احنا ونروح گال تمام
نسيت حتى موضوع اديان ودخلنا اني وزياد جان نايم زيد ووجهو بيه كدمات مال ضرب ومجروح من گصتو ومخيط 3 نفذات الجرح
گعدت يمو عالسرير ومسكت ايدو وگلت والي خلقك الا اخليهم يتندمون بس اگعد وفرحني بيك وشوف شنو اسويلك بيهم
بستو على راسو وانتبهت وراي جان زياد واگف يم السرير ودموعو تجري وهو ساكت سحبتو لحضني وانفجر بالبجي بحضني
گلتلو شبيك تبجي عليه لا تخاف مابيه كلشي يوم والثاني يگعد شد حيلك وطلعتو وياي واول ما طلعت سمعت شهگة ام حازم
انداريت عليهم جانو يحجون ويا الدكتورة رحت عليهم جانت ام حازم تگوللها فدوة دكتورة سوو اي شي واخت حازم گاعدة عالكراسي وحاطة ايديها على حلگها وتبجي
شكرا لزيارتكم عالم روايات سكيرهوم
