رواية اغفري لي الفصل السابع والثلاثون بقلم أوتار حزينة
مهيب
خاله طلعت من يمي ظليت وحدي يمها سمعتها
كامت تهذي كمت ورحت يمها
«،،لااا
حجت بصوت ناصي
«،،،لااا يابه لاتضربني عوووفني
عكدت حواجبي من سمعت هذا الكلام
سكتت وكامت تشهك وتبجي
كالت
«،،لاتعوفيني
كامت تحرك ايدها مثل واحد يريد
يگضب شي خليت ايدي
يمها گضبتها بهداوه
وكالت
««،،،حنين لاتعوفيني
صفنت عليها وكلت شنو ابوها جان ياذيها
وشنو حنين لاتعوفيني وهي
اسمها حنين
خاله طبت سحبت ايدي ورجعت كعدت
بمكاني ادحك الها مسحت وجهها
وايدها تردد
بقهر
«،،،حسبي الله عليكم ونعم الوكيل
وكعت بيها هالبنيه الفقيره الي بركبتها
طفله
جنت دايخ بيها وبلي سمعته كلت كامت
تخربط من وره الحراره
بس براسي الف
سؤال كام
يدور
وره مشوار كعدت ووعت كمت سالت
«،،،ها شلونج هسه
«،،زينة
ردت بتعب الوجه بعد ماجان احمر دم
من الحراره صار اصفر الدكتور اجت نظفت
الها الجرح وكالت
«،،،لازم تاخذ دوره ابر لان جرحها ملتهب
كلش
«،،،اي دكتورة اكتبي الها
«،،،،تمام وويا هم ادويه ومقويات ولا تخلون
الجرح يوصله مي منا فد عشره
ايام ويوميا ينتظف مرتين
ثلاثه يتعقم
وينشد بضماد
جديد
«،،،تمام
«،،شدو الها كانوله وطلعنا هم مشيت بصفها
لان وضعها جان بعده مو تمام
بالممر سمعت الدكتورة
صاحت
«،«ياولد
انداريت وجاوبت بضوجه
«،،،اسمي مهيب
ابتسمت وجاوبت
«،،اسفه عبالك ضوجتك
«««لا العفو منج بس مااحب واحد
يكلي ياولد
«««تمام استاذ مهيب اني صحتك لان
نسيت اكتب شغله
حجتها مبتسمه طلعت الوصفه من
جيبي انطيتها الها كتبت
وكالت
««هذا دوه شويه غالي لازم تاخذه وره
الابر
«««الغالي يرخص بس،تصير زينة
«،،،مرتك هاي
سكتت من سالت دحكت عليها صافنه علينا
جاوبت
««،لاا
اشرت وكلت
«،،يله خاله خلي نروح
مشيت وياهن ورحنا للسياره انتظرتهن
يصعدن يله صعدت حركت
كلت
«««خاله بعد لاتخليها تشتغل خلوها ترتاح جم
يوم منا الما اصير زين
«،،،اي يمه
«««اني راح اظل يمكم واساعدج بامي
«««ها يعني راح تاخذ اجازه
««،عندي اجازه عشره ايام انطوها اليه
استراحه
«««خوش يمه هم ترتاح وهم تساعدني بالحجيه
«،،مايحتاج اني باجر اصير زينة
من حجت رديت
«،،انتي بس اكعدي واسكتي وكافي تسوين روحج
رامبو براسنا
سكتت ماحجت شي ميلت راسها
على الجامه صفنت عليها بالمرايه ساكته
بس حسيت بيها وجع
مو من بس مرض لا اكو شي ويا كسر
مو طبيعي تحاول تخفيه
بس ذاك مبين وشفته بعيونها بملامح
وجهها من اول مرة شفتها بي
ردت احجي اكول احچيلي، گولي أي شي
بس ماكدرت احجي شي
خفت من رده فعلها
ركزت على الطريق وتجنبت
ادحك عليها مره ثانيه ماردت
تخاف مني اعرفها بعدها ماخذه حذر مني
ووجودي بيت اهلي راح يوترها
مني
وصلنا لبيتنا وي الاذان نزلت قبلها ورحت
فتحت الباب كلت
«،،انزلي على كيفج
خاله اجت كادتها وطبن لجوه قفلت السياره
ومشيت وراهن رحنا للمطبخ
طبينا ابويه اجه من
الصاله كال
«««ها يابه شكال الدكتور
«««الجرح ملتهب وانطوها ابر
جاوبته رد بضوجه
«،،استغفر الله ياربي محد وكع بيها غير
هالمسكينه الي بركبتها طفله
كمل
«،،هسه شلونج بنتي ان شاء الله احسن
«،،اي احسن
ردت بتعب
كلت
«،،خاله اخذيها لجوه خليها ترتاح
«،،اي يمه
اخذتها لجوه ابويه صافن عليها مبين
علي التأثر سال
«،،جرحها خما ملتهب كلش
«اي ونظفو الها وكتبو ادويه
وابر
رد من كعد
«،،،ديربالك عليها ابني هاي يتيمه وماعدها
احد
كعدت يمه وجاوبت
«،،يابه انت تذكر البنيه الي انقذتني من الموت
موو
صفن عليه ورد
«،،،اي شبيها
«««هي نفسها حنين
«،،شنووو
صاح وكام لحيله سأل مذهول
«««ولك انت صدك تحجي
اي
«،،ولك شلون هي يعني صارلها شكد يمنا
ليش،ماكلت هي نفسها البنيه
الي وكفتلك بذاك
اليوم
«،،اني ماعرفتها من شفتها اول مره
بس بعدين عرفتها
«،،ولك شلون ماعرفتها
«،،جانت ضعيفه كلش يعني مو مثل هسه
واني هم ماشفت بس عيونها بذاك
اليوم
كعد وسال
«««وهاي شوكت عرفتها
«،،قبل فتره
«،،زين ليش ماحجيت ليش ماكلت
سكتت شاحجي اكول ردت اعتدي عليها وعرفتها
وجان الوضع خربان بينا وردت
بس اصلح الوضع
وخرب بعد
اكثر من وره هاشم والحجيته
اله كذبت
«،،هي ماقبلت احجي شي
«،،زين ليش ماقبلت ليش ماكالت الك
هي نفسها الي انقذتك
«،،مااعرف يجوز خجلت مني منكم لان وضعها
بذاك الوكت جان مختلف
سكتت وكملت
«««انت تعرف هي جانت تبيع كلينس بالتقاطعات
والناس تساعدها ويجوز من هالشي
خجلت
سكت بس بين علي القهر رد
«،،ولك انت صدمتني بهل السالفه يعني
الي انقذتك هي حنين نفسها
وصارلها فتره بيتي
تشتغل واحنا مانعرف
بهل الشي
مارديت كمل
«،،،هاي شلون اجازيها مهيب وهي انقذتك
من الموت انت واحمد ابن اختك
««،مااعرف يابه اني هم مااعرف شلون راح
ارد فضلها عليه وعلي
ابويه كام كمت وراه راح لغرفتها خاله
طلعت وسدت الباب سال
«،،،ها شلونها هسه
«،،الحمد لله احسن ونامت
ذب حسره ورد
«،،نومه العافيه
«،،الله يعافيك حجي
«،،ام ياسين
امي صاحت راحنا الها يمامه نايمه يمها
سالت
«،،ها نامت حنين
«««،اي
«،،خلي عينج عليها لاتعوفيها وحدها لاتروح
تصخن مره اللخ
ابويه كعد يمها وكال
«،،حجيه طلعت حنين هي الي مخلصه مهيب
من الموت بذاك اليوم
«،،شنووو
صاحت مذهوله دحكت عليه سالت
««ولك صدك هالحجي
«،،اي
خاله ام ياسين سالت هم مذهوله
«««صدك يمه يعني حنين هي نفسها البنيه
الي انقذتك من الموت
«،«اي خاله هي نفسها
««،هاي شلون يعني انت ماعرفتها
امي سالت مصدومه
«،،لا بالبدايه ماعرفتها لان جانت متغيره
كلش مو هي وهم اني شفتها
ملتثمه يعني ماشفت
ملامحها كلها
صفنت عليه هي وخاله سالت
«،،زين هي عرفتك
««اي عرفتني بس ماحجت شي خجلت من
وره وضعها
الكل سكت سالت
«،،خاله انتي شتعرفين عنها يعني من اخذتيها
يمج ماحجت شي الج
««،والله يايمه الي عرفته منها ابوها وامها ماتو
بحادث عمها اخذها ومخاف الله
بيها عاشت بالضيم يمه
وراها زوجها لواحد
مو زين لا هو ولا اهله صارت حامل
وجابت وراها رجلها غرك وعيالها ماخلوها
يمهم وطردوها رجعت لعمها
هم طردها
««استغفر الله ياربي ذوله مو اهل وحوش
شلون يطردوها وهي صغيره
وبركبتها طفله
«،،هذا الي مايخاف الله باليتيم كلشي
يسوي
خاله جاوبت امي كالت
««ولك مهيب انت متاكد هي نفسها الي
خلصتك من ذوله الجلاب بذاك
اليوم
««،اي يمه هي نفسها
«،،ياربي يعني جانت يمنا طول هالفتره
واحنا ماندري
ردت سالت خاله
««زين يعني ماراحت ابد على عم خال
احد من اهلها
«،،لااا ادكول محد يريدني واذا اروح عليهم راح
يطردوني وكالت انتي صرتي امي واهلي
والله عوضني بيج عنهم
كامت تبجي امي هم بجت سالت
««،ماعدها اخ اخت
«««لا يتيمه هي بس هالوحده لاهلها
سكتت افكر بالي سمعته منها امي كالت
«،،ابو منير هاي شلون اراح اجازيها على
وكفتها لمهيب واحمد
«««والله مدري اني هم مااعرف شلون
راح ارد فضلها علينا
غاده
الشهريه فاتت رانيه واخذتها
للدكتوره حللت طلعت حامل كامت تبجي
من فرحتها
اخذت الوصفه وافتهمت من الدكتوره
شلون انطيها الدوه طلعنا جعفر
يروح ويجي يم سيارته
شافها فز واجه بسرعه
علينا سال
«،،،هاا بشري
«،،حامل
جاوبته بفرح وعيون مغوركه
رد بخنكه
««،الله يبشرج بالخير يوجه السعد
«،،الف مبروك اخويه ويوما تشوفه
بحظنك
«،،امين امين
رد يباوع عليها والعيون غوركت كال
«،،امشي بويه اريد احظنج وگاض
روحي گوة
مشينا هي بس تبجي بس
حرك خابرت عمه بشرتها كامت تهلل
واختنكت وراها امها هم تخبلت وكامت تبجي
كلت بضحك
«،،اليوم الا احتفل بهل الشي
«،،اي چا شلون هاي فرحه جبيره ولازم
افرح بيها
جعفر جاوبني يباوع عليها كمل
«،،بسج عاد بجي وافرحي بهل الخبر الحلو
«،مو مصدكه جعفر
«،لا صدكي واريدج اديرين بالج على روحج
لا طلعه ولا طبه اكعدي بيتج وارتاحي
واني اخدمج بعيوني
«،،راح اتعبج وياي غاده
«،،بله اسكتي ولاتحجين هالكلام
اني ماانسه وكفتج اليه ولا السويتي
اليه من اجيت ولحد ماجبت
شلتني بالصلاوات وماقصرتي وياي
بشي وهسه دوري اشيلج
منا الما اجبين وادكومين
بالسلامه
«،،تسلمين ام علي ماتقصرين
«،،ادلل اخويه عيوني الكم
رانيه جاوبت
«،،تسلم عيونج حبي والله انتي اختي
واعز من الاخت
«،،وانتي هم والله اخت وغاليه عليه
جاوبتها وكلت
«،،خلي ابشر ابو علي
خابرته جاوب
«،،هلا بضوه العين ورمشها
«،،هلا ابو علي اابشرك
«،،يالله كولي بويه وفرحي گلبي
««،جعفر راح يصير اب
«،،ااالحمد لله والشكر الك يارب
رد بفرح كلت
«،،شفت اني ماابشر غير بالخير
«،،،انتي ام الخير كله
«،واليوم لازم نحتفل بهل الخبر الحلو
«،،اي ونحتفل كولي ياجمره گلبي شتريدين
اجيب وياي
«،،لا اني راح اجيب بطريقنا
«،تمام انه راد للبيت ومنتظركم
«،،توصل بالسلامه
سلم وراح جعفر سال
«،،وين نروح
«،،حلويات الزيتون عيني اليوم الا اعلك الجو
واحتفل بفرحتك انت ورانيه
اشتريت قالب كيك وحلويات هوايه رجعنا
اضحك واكول
««،اايوم اخرب الدايت
«««خربي يوم واحد ماراح يضر
جاوبتني مبتسمه وفرحانه رجعنا للبيت
وصلنا نزلت اني وياها امها
طلعت من يمنا هي
ورحمه واميره
اجت عليها بسرعه راحت الها تبجي
تاثرت كلش وعيوني غوركت
طبن لجوه بيبي فرحانه وتجر صلاوات هي وعمه
عفتها يمهم يحجن ورحت لغرفتي،طبيت
حمزه طلع من الحمام ينشف
براسه كلت من
سديت الباب
«««اني اجيت حب
خله الخاولي على جتفه ابتسم
ورد
«««هلا يالطولك غصن يتمايل بكلبي
«««ههه
ضحكت ورحت لحظنه لمني بي
شميته من رگبته بنفس طويل بسته منها
وكلت
«،،ريحتك تخبل
«،،مو اطيب من عطرج ياجمره گلبي
رفعني لصدره باسني من شفتي وطول
تننهدت بحظنه ودخت من
لثم رگبتي كال
بصوت
ضايع
«««احبج ياعيوني ونظرها
يمه مااعرف احجي اضيع كلشي اريد
بس اظل بحظنه واحس بحراره جسمه
ويحجي كلام يخليني
احس بمشاعر
مااعرف
اوصفها
باسني اكثر من مره وهو يشم
بيه ردد
«««هيل وعنبر وورد جوري واريدن يفتر
بالريه واخلي جوه صدري
مااطلعه بره
وخر العيون ذبلانه هي والملامح حجه
مركز على شفتي
««تعرفين انتي شنو
مارديت لان دخت وضيعت لساني كمل
««،انتي اغلى من الوريد الكاض گلبي
حجه هيج وباسني من شفتي وطول
بادلته لهفته وردنا ننسى
نفسنا بس علي
بجى كال
بضوجه وهو يفرك وجهه
برگبتي
«««مو وكتك ولك
ابني شد بالبجي كلت
«،،خلي اروح علي
«،،اي بويه روحي وعوفيني معطب
جاوب بضوجه رحت شلت ابني
بس صار بحظني سكت جبته اله كلت
««الزمه بس ابدل واجي ارضعه
«««تعال ولك والله اليوم الا العب بيك
طوبه شاد وياي ابن الخوش
زلمه كلما اكض امك
تبجي وتريدها
بس الك
عفته يتعارك ويا عركه حلوه طبيت الحمام
سبحت لان حاره كلش وطلعت
اخذته منه كعدت
اريد ارضعه هو
طلع وراح لبره
رضعت ابني ونظفته من نام خليته
بالجربايه مالته لبست شالي وطلعت اهل
رانيه تعشو يمنا واحتفلنا بيها
هي وجعفر
جنات
كم مرة اريد اروح لبيتي ومااكدر لان
اعرف بروحي راح اختنك بس اطبه واكوم
ابجي
بس لازم جان اروح اشوفه واشوف
شراح اسوي بالاثاث لان كلشي بي اني
سويته من راتبي كم حاجه
هو جابها من عنده
الجمعه ابراهيم اخذني اني واختي
وولدهم ورحنا علي بس طبيت المنطقه
اختنكت والدموع تجمعت
بعيوني
وكف يم الباب اباوع للحديقه الاشجار
كلها محتركه ومبين كاتلها العطش
نزلت صافنه علي
ماشفته بيتي لا عبالك مال واحد غريب
لا عبالك عشت بي كم سنه ولا
حسيت اني انتمي اله
ابراهيم فتح الباب طب
وراه ولده اختي
لزمتني كالت
«،،يله جنات تعالي
طبيت برجل ثگيله الكراج كله تراب والورد
الي جنت زارعته بالحديقه
والسنادين كله ميت
«،،شوف القهر هذا حتى الحديقه
ماجان ينطيها مي لا هي ولا الزرع
اختي حجت تباوع بقهر على
طبينا من المطبخ مو هو وصخ
والمواعين مطشرة هنا وهناك
وريحه الحاويه
الصغيره فايحه بالبيت
«،،،اوف حتى الوصخ مو مطلعه
دموعي نزلت مشيت احس بكل خطوه
اني خاله رجلي بيت مو بيتي
ولا جاي احس
بذاك الانتماء الي جنت احسه
من قبل
بيتي جان جنة هسه كمت اشوفه گبر
اسود
«،،مو ماخذ شي من الاثاث
ابراهيم حجه انتبهت هو عايف كلشي
مو ماخذ لا الثلاجه ولا المجمده
وكم حاجه هو جابها
رحت لغرفه نومي وكفت يم الباب ماكدرت
اطب لان شفت ذكرياتي
بيها اني ويا
كلشي كام يصرخ بأذني صوته سوالفنا
كعدتنا سوه اشوفها بكل
ركن وزاويه
سحبت روحي وطلعت بسرعه من البيت
اسمع اختي تصيحني وكفت
بره اتنفس بصعوبه
واحس بروحي
اختنكت
لزمتني فزيت كالت
«،،اسم الله الرحمن هاي شبيج جنات
«،،خلي نرجع مااريد اظل هنا
ابراهيم اجه سمع كلامي كال
«،،امشي خلي نرجع
رجعنا من يم بيتي ابجي بخنگه وذاك
اليوم هم صعد ضغطي وصرت فد مره ويا
الشقيقه هاجت والقهر زاد من
اجت امي السبت
وكالت
«،،اذا ماتريدين تكعدين بيتج انطي لاختج
ابتسام خلي تكعد بي وتخلص
من ضرتها
«،،بلاش يعني
دانيه سالتها جاوبت
«،،،اي لعد بفلوس
«،،وليش،بلاش يمه رجلها شبي
ماياخذلها بيت ويطلعها
من يم ضرتها
«،،اانتي ماعليج الحجي مو الج لاختج
انهدت باختي كلت
««،بيتي ماانطي لاي احد واذا ابتسام
تريد تطلع بيت وحدها خلي ادكول لرجلها
وهو يطلعها بيت
«،،مايقبل يطلعها بيت ايجار
«،،ليش بله مايقبل
«،،يكول ماعندي امكانيه افتح بيت ثاني
«،،بس عنده امكانيه يزوج الثانيه
دانيه حجت وهم انهدت
«،،،،هسه انت شعليج بهل الحجي انطي
لاختج وخلي تكعد بي وتخلص
من ضرتها الي لاعبه
بيها طوبه
«،،بيتي ماانطي لاي احد
صاحت بي
«،،ليييش ولج مو جان ذاك ماخذه وكاعد
بي حلال علي وحرام على اختج
«،،يمه انتي شبيج ماتعرفين اني كاعده
ايجار ولازم اجر ذاك حتى اكدر ادفع ايجار
هذا البيت
«،،وشكو مااجره بيت ماتجين تكعدين يمنا
«،،مااريد اكعد يمكم
«،،لييش،عيني مانعجب
مارديت كالت
«،،اجري الها بس لا غالي
«،،اخو البلاش يعني
دانيه حجت باستهزاء صاحت بيها
«،،ووولج مو هاي اختج شنو فرقها
عن جنات
«««فرقها جبير ذيج نكسه ماتعرفنا
غير وكت المصلحه
حجيت
«،،يمه حتى لادوخين اني اجرته لاخو
اسماء وبسعر كلش زين
«««ها يعني الغريب صار احسن من اختج
«««اي ومن زمان
جاوبتها ردت
«،،هيج الحجي جنات
«،،اي يمه هذا اخر الحجي وماعندي
بعد غيره
كامت وكالت
«،،بعد الله شسوي بيج من وره نكاستج
لا رجال حواج ولا بطنج شالت
جاهل
«،«يمممه
اختي صاحت بيها بغضب كمت وجاوبتها
بروده
«،،،،شاسوي والله يجوز هاي حوبه ليلى
بنت عمتي ندى طلعت بيه اني ومهند
ماردت طلعت تدعي عليه رانيه كالت
بقهر
«،،،مو ام هااي غضب ونزل علينا
كعدت ودموعي نزلت كالت
«،،لاتبجين انتي ماتعرفيها ماتعرف تحجي
مارديت بس من قهرها صرت فد مره وتعبت
بعد اكثر اسماء خابرت سالتني
من سمعت صوتي وحجيتلها
كلشي بنفس االيوم بليل
اني متمدده اجتني
رساله
فتحت جهازي جانت من استاذ
ارشد قريت
«،،مساء الخير ست جنات باجر
لادوامين لان ماعدنا شغل جثير وانطيتج
استراحه انتي واسماء
اجت من الله واني جنت مااريد ادوام
جاوبت
«««مساء النور استاذ شكرا الك بس،تره
اني ماعندي رصيد عادي
هالشي
«،،عادي لاتهتمين ولا تشيلين هم الرصيد
لان انتي مو مقصره بشغلج
«،اكرر شكري الك استاذ وتسلم
على هاي الاجازه
«،ادللي المهم ترتاحين
صفنت من رد هيج كتب
«،،انتي وست اسماء لان اعرفكم
جاي تتعبون بشغلكم جثير
ماجاوبت كتب
«««اترخص منج
««الله وياك استاذ
انتبهت هو مغير
الصوره مال الواتس فتحتها
شفته واكف يم سياره
حديثه لابس زي
عربي
صفنت علي من يلبس هيج يتغير كلش
ويختلف عن شكله بالرسمي
صح اله هيبه بي بس بهذا الزي
اشوفه يزيد هيبه
ثالث يوم دوامت طلعت شايله اوراق اريده
يوقعهن مشيت لمكتبه السكرتير
ماكو دكيت الباب
كال
«،،تفضل
طبيت شفته لابس الزي واكف
يوقع باوراق سلمت
«،،صباح الخير استاذ
««صباح النور ست تفضلي اكعدي
كعدت جهازه دك جاوب
«««هلا يابه لا اطلعو جدامي اني جاي
وراكم اي الحرس وياي
اي عجل شلون
مااجي لازم نوكف لابن عمك
بهل الشده تمام لا مااتاخر
سد الخط باوع عليه كال
«،،كملتوا الاوراق
««،اي
كمت وانطيته اله دقق بسرعه
وقع وكال
«،تفضلي ست مثل كل مره نزليهن بملف
بالحاسبه
««تمام
مشيت شفته اخذ حزام سلاح لبسه
طلعت من يمه وكفت
يم بنيه رادت اعلمها كم شغله
هو طلع لابس عبايه على جتفه
العيون كلها صارت علي وشفت هبه
اكلته بعيونها هي وكم
وحده من الموظفات
الي مو مزوجات
«،،بختها جبير الي يصير المدير من
نصيبها
اروئ حجت صفنت عليها ولا شالت
عيونها منه
عفتها ورجعت لغرفتي طبيت حجيت
لاسماء الي سمعته ابتسمت
وكالت
«،،اي والله بختها جبير الي يصير
استاذ ارشد رجلها هم شيخ وهم مدير
مصرف
سالت
«،،اكلج هو شعجب ماازوج وره مرته
«،،ماادري
«،،هذا يحبها كلش وما كدر يزوج وراها
هي قريبته مو
«،،اي سمعت تصير بنت خاله بس تره
زواجهم جان تقليدي يعني
مو علاقه حب
««،اي عادي يجوز حبها وره الزواج
سكتت كملت
«،،زين انتي شمدريج بهل الشي
«،،سمعت من ارؤى
سكتت وبعدين كملت
«،،تدرين اني سمعت هو حب وحده من
زمان وماقبلت بي
«،،يا صدك تحجين
«،اي
«،،زين ليش رفضته وهو مثل
ماجاي نشوف كامل مكمل
«،،مااعرف
«،،زين هي ازوجت
«،،هم مااعرف بس هذا الي سمعته
«،،شبيها هاي وشلون رفضته وهو شيخ
وابن ناس معروفه
«،،حظها بعد وحظه هم
«،،اي هي قسمه ونصيب
جاوبت وبديت انزل ملف الشغل
قائد
رجعت من الشغل العصر طبيت للمطبخ
شفت خاله رباب يمنا هي وولدها
وليلى وخالتي ندى
كلت
«««هلا والله بالغاليه
كامت واجت عليه مبتسمه ردت
«،،هلا بالي مايسأل على خالته
بستها وكلت
«،،حقج والله مقصر وياج بس كله من
ليلى
«،،ااني شعليه
جاوبتني مذهوله كلت اضحك
«،،ااني مو اكلج خلي نخابرها وادكولين
بعدين
«،،خاله جذاب لاتصدكي
«،،،،تعلميني بي هالكواد بس يعرفني بالمصلحه
«،هههه لا والله بس الشغل ماخذ كل وقتي
«««اي نعم
ليلى جاوبت كلت اضحك
«،،صيري وياي ولج تره راح انسحل من خالتج
الحلوه
«،،لا اني وي خالتي وخلي تسحلك
تستاهل
خالتي ضربتني على جتفي سالت
«،،هاا ولك شمسوي الها
«،كولي هي شمسويه اله
امها ردت وكملت
«،،والله قائد فقير بس بنتي الوكحه
««،ااني ماما
«،،عجل اني
جاوبتها مبتسم ردت بسرعه
«،«اي نعم والتاريخ يشهد
حسيتها نغزتني ماحجيت شي بس
بداخلي ضجت كلش
امها حجت
«،،،امشي بدل وتعال تغده
«،،،ما اشتهي
ترخصت من خالتي ومشيت من يمهم صعدت
لفوك طبيت غرفتنا هي طبت ورايه
سدت الباب دحكت الها
مرتبكه كالت
«،،قائد اني مجان قصدي الي فهمته
«««ماراح تنسين مو
سكتت كملت
«،راح تظلين كل فتره تنغزيني بهل السالفه
مو ليلى
«،،لاا
«،،عجل الي حجيتي جوه شنو
«««جنت اقصد وكاحتك ذيج القديمه
جاوبت وكملت
««والله ماجنت اقصد الصار قبل فتره
ولا اريد احجي بي لان
تعبت من الزعل
والقهر
ذبيت حسره وكلت
«،،واني مااريد بعد لا زعل ولا قهر
جاوبتها وفتحت ايدي اجت لحظني
لميتها بي وبستها من راسها
كلت
«،،ااوف ولج شگثر احبج
«،،اني هم احبك واموت عليك
وخرت ادحك لخلقه ربي الي بلاني بعشگها
وكلت اضحك
«،،باطل حق اوكفي وياي ولج
«،،ههه يعني اصير شاهد زور
«،،ههه صيري بس وياي
سكتت العيون تضحك ردت
«،،ادلل بس شكد تنطيني
«،،يعني رشوى
«،،ههه اي
«،،شكد تريدين
،،،ربع لا شويه خمسميه
صفنت عليها كملت
«،،تذكر باكه النعناع
«،،اي ليش هو اني اكدر انسى شي
من العشته وياج
جاوبت وجهازها دك جاوبت
«،،ها ماما اي هسه انزل
سدت الخط حجت
«،،يله اسبح وتعال تغده وبطل جذب
اعرفك مو متغدي
«،،هههه اي والله وداكني الجوع بس
شنو الغده
«،،باميه ودجاج شوي
««عااشو ااثردي باميه وعوفي الدجاج
«،،تمام
سبحت نزلت وكعدت يم خالتي اتغده اسمعها
تحجي بسالفه جنات
«،،،يعني رجعلها بيتها
«،،،اي خطيه رجعه الها بعد ماشلع گلبها
بس الله سخر الها واحد هو الي
خلاه الشيوخ تخلي
يرجعه الها
«،،ومنو هذا الي حجه وي الشيوخ
«،،والله محد عرفه ولا هي عرفت
منو هذا الي ساعدها ورجع الها بيتها
«««هالبنيه انظلمت هوايه ورجلها مع الاسف
علي طلع واحد نذل وحقير
«،،اي والله جنات ماتستاهل الصار بيها
«،،خلي يولي يجوز الله يريدلها الزين من
تطلكت منه حتى يعوضها
بالاحسن
ليلى
اسمع حوار ماما وخاله ومقهوره على جنات
لان ماتستاهل الصار بيها لان
هي انسانه طيبه وشايله اخلاق حلوه
وتمنيت الله يعوضها عن
الصار بيها ويجيها
واحد احسن
من رجلها هذا الحقير الي سمعنا بي
ازوج عليها من وراها وفوكاها ماانطاها بيتها
لان خلعته بس الله كسر خشمه
وهذا الي ساعدها
رجعه الها
بليل بغرفتنا كاعدين اني وقائد جهازي
دك جانت غدو جاوبت
«،،هلا حبي
،،،،هلا كبد شلونج وشخبارج
«،،بخير انتي شلونج علوش شلونه
هو وحمزة
«،،الحمد لله بخير احزري من طلعت حامل
«،،عززه اانتي
«،،هاااي شبيج شصاير
قائد سال هي خربت ضحك
«،،ههههه
ردت
«،،لاا ولج رانيه
«،،صدددك
«،،غير لو تحجي شبيها كل ساع فازه
ومفززتني وياها
قائد حجه وجاوبته خربانه ضحك
«،،ماكو شي التهي بشغلك
فر ايده وكال
«،،والله لا انتي صاحيه ولا ذيج
اللخ
«،،غاده يحجي عليج
«،،شاهد الزور تره ماتشوف الخمسميه
«،،ههههه مااريدها خليها الك
جاوبته ذيج صاحت
«،،وولج مو جاااي احجي ماتسمعيني
«،،ها حبي اسفه يله احجي
«««ولج شاحجي كلت رانيه حامل
«««الف مبروك ويوما ادكوم بالسلامه
«،«بعد وكت
«،،ههه ولج عقلي تشوش منا انتي تحجين
ومنا قائد لزك
اشر على روحه هزيت راسي كال
مبتسم
«،،اطلع للغرفه الثانيه
خزرته خرب ضحك كلت
«،،عاابت
«،،ولج لييش شمسويه الج
«،،ها مو انتي
«،،اكلج روحي الظاهر قائد من صدك
مشوش عليج
«،،لا ظلي ماراح استلم شي منه
«،،،ههه خلي اني اكدر للعندي عود انتي
اكدري باي حب
سدت الخط هو ضحك وكال
«،،زحلكتج موو
«،،من وراك كل ساع حاجي كلمه
ومخربط عليه الكلام
«،،زعلت لان تزحلكت
«،،كافي قائد
«،،والنكد راح يبلش بيه
ابتسمت كمل
«،،لا ضحكت راح تعدي هالليله على
خير
«،،ههه اي
يمامه
كعدت ثاني يوم الصبح وضعي
شويه احسن باوعت على يمامه فزيت
من شفتها ماكو يمي لبست
شالي طلعت بسرعه
االحجي بالصاله
شافني كام
وكال
«،،هاي شبيج بنتي
«،،،وين يمامه
«،،،يم الحجيه لاتخافين عليها نايمه
وغافيه
خاله اجت من المطبخ شافتني
اجت عليه سالت
««،،ها شلونج اليوم يمه
«،،زينة
رحت لغرفه الحجيه طبيت كلت
«،،صباح الخير خاله
جاوبتني بفرح
«،،هلا يمه صباح النور
عمو طب هو ويا وخاله كال
«،،اكعدي ام يمامه
كعدت هو كعد اگبالي كال
«،،بنتي انتي ليش ماقبلتي تحجين وادكولين
انتي هي نفسها الي ساعدت
مهيب بذاك اليوم
باوعت لابنه كال مرتبك
«،،اني كتلهم انتي ماقبلتي احجي
واكول انتي هي نفسها الي خلصتني
من العصابه
عرفته من وره السواه ماحجه واني هم ماردت
احجي هالموضوع لان اعرف
راح يبدون يسالون
اسئله مااريدهم
يسالوها
جاوبت
«،،،السالفه جانت قديمه عمو وشفت مالها
داعي احجي بيها وهي صارلها
فتره طويله من صارت
«،،،لا شلون ماتحجين بيها وانتي صاحبه
فضل علينا
جاوبته
««،عمو اني مااريد اي شي منكم انتو ماقصرتو
وياي بشي ولا وي بنتي
واعرف لو احتاجيت
لاي احد منكم
راح توكفولي
بسرعه
«،،،اي والله واحنا عند عيناج بنتي اني وابني
اشر علي الحجيه حجت
«،،،يمه انتي مااعرف شلون اجازيج لان
فكيتي ابني من الموت بذاك اليوم ولو ما
انتي جان الله اليدري شصار
بي من وره ذوله
الجلاب
«،،قدر ولطف خاله والحمد لله ماصار
بي شي
كمت حسيت رجلي ماشالتني وحيل
ماظل بيه كعدت بسرعه هي
سالت بخوف
«،،هاي شبيج حنين
«،،تعبت شويه
الكل صار يمي هو وابوه وخاله
كال
«،،اوديج للمستشفى
«،،،لا مايحتاج
جاوبت بضعف ابوه كمل
«،،بنتي خلي نوديج خاف هم صخنتي
خاله لزمت كصتي ردت
«،،لاا مو مصخنه
الحجيه حجت
«،،ام ياسين اخذيها للغرفه وخليها ترتاح
لان الصخونه تعبتها
كلش ومو زين تظل كاعده
«،،خلي اخذ يمامه
«،،لا عوفيها يمي نايمه بس راح تشيلها
راح تكعد
جنت مالي خالك كلش وهالحركه الي تحركتها
حسيتها اخذت جهد مني
تمددت بالغرفه هي سوت اليه ريوك
وجابته اليه اكلت شويه
لان جنت مااشتهي
رجعت هو جاي
وياها
كالت
«،،يله يمه خلي مهيب يضربج
الابره
«،،ها لا اني اضربها
«،،اش واسكتي بله
جاوبني وكمل
«،،خاله جيبي الدوه
طلعت من يمنا هو سحب كرسي
واجه كعد يمي كلت
«،،تره اعرف مايحتاج تجي انت وتضربني
الابره
«،،اي حتى ادخلين هوه للوريد وتفطسين
اجت انطته الدوه ابوه
صاحها طلعت من يمنا
سحب الدوه وخبطه
يشتغل
منزل راسه كمل كال
«،،انطيني ايدج
ترددت حجه
«،،يابه قابل طالب ايدج للزواج مديها
حتى اضربها الج وتصيرين
زينة
مديتها بعد تردد لزمها وخله الدوه كمل
«،،هاي الابره قويه ولازم اخليها الج
بطيئ
مارديت رفع راسه باوع عليه وكال
بتردد
«،،ماكدرت احجيلهم اني عرفتج من وره
السويته بيج بذاك اليوم
كمل
«،،بس حجيت لان افضالج صارت جثيره
وجان لازم يعرفوج ويعرفون
انتي صاحبه فضل
علينا كلنا
«،،اني مااريد اي شي منكم
«،،بس اني اريد اسوي شي الج
جاوبني وگلبي هبط من كال
«،،حنين اني سمعتج تهذين وادكولين
كلام بين اليه ابوج جان يأذيج ويضربج
درت وجهي وسحبت ايدي لزمها وكال
«،،الدوه بعده
سكت وكمل
«،،يولي احجي كولي شنو الي كسر هالعيون
القويه وخلاج تطفين
«،،رجلي الي كسرني وطفى عيوني
دموعي نزلت وكمت ابجي على اختي
سكت بعد ماحجه شي
بس كمل الدوه
سحبت ايدي
منه
كام وكال
«،،الله يرحمه
مشى كم خطوه اندار وكال
«،،بس الي اعرفه هو جان مو زين وياج
«،،اسمه رجلي وابو بنتي والعشره ماتهون
الا على اولاد الحرام
صفن عليه وبعد ماحجه شي طلع من يمي
وسد الباب من نظراته
واسالته عرفت
اني خربطت بالحجي من تخربطت
بس شنو الي حجيته بعد
ماعرفت
بنفس اليوم صارت كعده بيتهم ميسون
اجت هي ورجلها وخوالها عرفت من خاله اجوهم
شيوخ من بعقوبه وشيوخ
تبع الحجيه من
الجنوب
مهيب
كاعدين كلنا وي شيخ تميم وابنه شيخ
ارشد وي شيخ فخذنا بغداد
وشيوخ الولد الي
عالو على ولد
اختي
شيخنا بده بالكلام
«،،باي حگ يابه ولدكم يعيلون على
ولدنا ويسحبون عليهم
سجين
«،،شيخ تميم الحگ يمكم وولدنا تعدو
والي تريده احنا حاضرين بي
ونعتذر منكم ومن
اهل البيت
الطيبين
كلام طيب الخاطر من شيخهم ابويه
رد
«،،اني مو بحال فلوس ولا اريد منكم شي
جيتكم فوك راسي وهاي كلمتك
تكفيني
«،،بارك الله بيك ابو منير بس ارجع
اگلك احنا مانراح نطلع الا وانتو راضين
عنا
ابويه سكت شيخ تميم
«،،ااشغله مو فلوس ياشيخ فضل الرجال
ابو منير عنده خير من الله بس
الشغله يمكم
اشر لاهل الولد وكمل
«،،اذا تنازلنا عن ولدكم منو الي راح يضمن
باجر عگبه ماراح هم يعتدون
على غير ناس ويجوز
يگتلون واحد
ومن صدك
تبتلون بدمه
محد رد كمل
«،،اهلنا قبل جانو يگلون
انطي تربيه قبل لاتنطي خبز
«،،لا عاب حلكك شيخ
واحد حجه شيخ فضل كال
«،«احسبها عليه شيخ
««،محشوم يابه انت فوك الراس
وخاطرك جبير عندي
«،،وهذا الخاطر اريده هسه منكم
رد على شيخ تميم دحك لابويه كال
««،انت فصل واحنا نلبس
اني راح افصل للبيت ابو منير وللبنيه
الي واحد من ولدكم
ضربها بسجين
وجرحها
«،،يعني بنتهم
لا تشتغل عدهم بنيه يتيمه وماعدها
احد وهم بحسبه اهلها
«،،تمام شيخ
ماجنت اريد فصل ولا فلوس بس
سكتت وحجيت لشيخ ارشد عليها
وشلون ضربوها سجين
حتى اخذلها
حگها فلوس
منهم
تفيدها وتفيد بنتها لان جنت اعرف ماراح
تقبل اساعدها بشي جبير
شيخنا وكع عليهم ودي سحبه سجين
والنيه القتل عشرين مليون
لخاطر الشيوخ صارت 15مليون ماتنازل عن
فلس اللخ وتم الفصل خلينها
بينا منا الما تجي
الفلوس يله
نحجي
الها
يمامه
ميسون اخته ضربت الابره اشوفها
متوتره من الكعده وتدعي
تفض على خير
الدوه جان قوي بس اخذته هو والابره
نمت ورحت بسابع نومه ماعرفت شصار كعدت
على صوت
«،،يمه حنين اكعدي
فتحت شفت خاله يمي سحبت
روحي كلت
«،،بيش الساعه
«،،عشره ونص
جاوبتني وكملت
«،،شلونج اليوم مو احسن
«،،اي خاله احسن
«،،اي وجهج رد لونه
«،،يمامه كاعده
«،،اي بحظن ام احمد كومي يمه غسلي
حتى تتريكين وتضربين الابره
«،،اي
كمت هي لزمتني كلت
«،،اكدر امشي خاله
«،،ها خاف بعدج تعبانه
«،،،لا مابيه شي
مشيت هي وياي شافتني زينة راحت
للمطبخ واني غسلت مشيت
اله طبيت شفت
ام احمد كاعده تحجي وي
يمامه وتضحك
شافتني سلمت
«،،صباح الخير
«،،،هلا صباح النور
ردت وسالت
«،،شلونج اليوم
«،،«الحمد لله احسن من بارحه
«،،،،يستاهل الحمد
ابوها طب وراه ابنه سلمو وسالو
عن صحتي كعدو يمنا
الحجي حجه
«،،بنتي البارحه كعدنا وفصلنا اهل الولد
الي اعتدو على ولد ميسون
وانتي وياهم
صفنت علي من حجه هيج كمل
،،،والفصل صار 15 مليون
فكيت عيوني مذهوله من الرقم كمل
«،،الج النص وولد ميسون النص راضيه
يابه بهل القسمه
«،،ها عمو
رديت بفهاوه عيوني راحت لابنه ابتسم
وكال
«،،يابه انطيها عشره وولد ميسون خمسه
«،،والله هي الي تأذت اكثر ولو ما هي
جان ولدي راحو مني ووياهم اخويه
عرفت منهم كملت
«،،،،انطوهن كلهن الها هي تستاهل هالشي
ولو تريد عيوني انطيهن الها
«،،اني مااريد شي
«،،لا هذا حگج ولازم تاخذي
هو جاوب اخته حجت
«،،،حتى ثائر كال مااريد شي انطوهن الها
لان هي تاذت والها فضل
علينا
ماعرفت شاحجي اباوع لخاله ساكته
العيون عليه عمو كال
«،،ها يابه شكلتي
خجلت وماعرفت شلون
اتصرف بس كلت بتردد
«،،عمو مثل ماكلت نص اليه والنص الباقي
لولد ام احمد
«،،اني مااريد
«،،لعد ماراح اخذهن
جاوبت هو حجه
«،،عشره الج وخمسه الها
«،،والله مااريدهن ولدي بفضل الله وفضلها
ماصار بيهم شي هي الي
تستحق هالفصل
هي حجت جاوبها
«،،يابه فضيها تره اعرفها ماراح تاخذهن
كلهن
«،،خلي اخابر ثائر
خابرته حجت اله الكلام جاوبت
«،،ماجاي تقبل تاخذهن كلهن الا احنا
وياها بالنص مهيب كال
عشره الها وخمسه
النا وهم ماقبلت
سكتت بعدين كالت
«،،،يكول مثل ماكال مهيب سوه
خاله غمزت اليه عمو كال
«،،بنتي اخذي عشره الج والباقي لولد
ميسون
«،،هاهيه حجي مثل ماكال مهيب
خاله حجت ابتسم وسالني
«،،فضت يعني ام يمامه
«،،اي عمو
جاوبته بخجل بنته كالت
«،،يله تريكي حتى تاخذين دواج
تريكت وعرفت منها هو حاجي وي شيخهم
وطالب حقي من الي اعتدو
علينا
السوه اليه خلاني اشوفهم بعين جبيره
وصدك حسيت بيهم اهل
وسند
كعدت بالغرفه مو مصدكه اني صار عندي عشر
ملايين واني المليون
مو شايفته
زين شراح اسوي بيهن ووين اضمهن عبالي
راح تجيني علاكه فلوس بس
من اجني جانن كم ضبه
من الخمس
والعشرين
فرحت بيهن كلش وكلت اسوي تراجي
ليمامه لان جانت مو لابسه
وهم انطيت مليون لخاله ماقبلت تاخذهن
وحلفت من شافتني
زعلت كالت
«،،،من احتاج اجي عليج
ردت اضمهن يمها كالت
«،،لا يمه خليهن يم الحجيه بيتي هدد
ونعوفه اني وياج وخاف ينباكن منه
كلامها جان صح وضميتهن يمها اني
جنت غاليه يمهم ومن عرفوني اني نفسي
الي انقذت ابنهم وولد اخته
زادت الغلاه عدهم
بس هو ظل خال مسافه بينا مايحجي
وياي الا على كد الحاجه بس
جنت اشوفه يصفن
عليه من انتبه
يدير وجهه
صرت زينة ورجعت اشتغل الحجيه
هم صارت زينة ورفعو ااجبس بس لازم تمارين
وعلاج فيزيائي وهم طلبت
نظل يمها
بليل قبل اذان العشه طلعت اذب الوصخ
بالحاويه فتحت الباب شفته نزل من سيارته
وجاي من الدوام سلم
شلونج ام يمامه
هلا
رحت ذبيت الكيس هو راح للجنطه
مال سيارته رجعت للباب
سمعت صوت سياره اجت
بسرعه انداريت شفته
سحب يسلاحه
وصاح بيه
طبببي جوو
فزيت وعطت من
سمعت صوت
طلقات
شفته وكع على رگبته عيونه علي
صرخت
لاااااا لاااا
شكرا لزيارتكم عالم روايات سكيرهوم
