رواية بنت الكهوجي الفصل التاسع والثلاثون بقلم احمد
انداريت عليهم جانو يحجون ويا الدكتورة رحت عليهم جانت ام حازم تگوللها فدوة دكتورة سوو اي شي واخت حازم گاعدة عالكراسي وحاطة ايديها على حلگها وتبجي
الدكتورة : اسفة خالة سوينا كل الي نگدر عليه
تميم : شنو الموضوع دكتورة
- المريضة دخلت بغيبوبة
- بس انتي البارحة گلتي ننتظر 24 ساعة بعدين نقرر
- ما يحتاج ننتظر هسا
- زين شگد مدة الغيبوبة
- مو معروف هي وقسمتها
- زين ماكو طريقة لو شي نسويه هسا او بالايام الجاية
- كل الي تگدرون تسووه هو انو تنتظرون واذا الله شاء تگعد او تبقى باقي عمرها بالغيبوبة وهسا عن اذنكم
تميم : بقيت واگف ماعرف شسوي رجعت لابوي وحجيتلو الي صار گال هسا نروح اني وصفية نحجي وياهم گلتلو تمام
من طلعت زوجة ابوي من الغرفة راحو هي وابوي علمود يواسوهم ويخففون عنهم واني وزياد ورشيد رجعنا للبيت بس جنت من صدگ متفلش
من وصلنا البيت رحت فورا لبيتي وماجنت ادري بامي واية وياقوت بايتات ببيت ابوي ومن دخلت استغربت ان البيت فارغ قبل ما اطلع اجت اية
اية : جوعان اسويلك ريوگ
- لا بس شو ماكو احد
- بقيتا ببيت بابا
- تمام
- راح نروح لزيد
- تمام بوية اني راح اصعد انام
- تمام نوم العوافي
- الله يعافيج
صعدت لغرفتي وقبل ما انام سويت تيلفوني صامت ونمت واعرف غلط اسوي تيلفوني صامت بس اعرف اذا بقى عالعام ماراح انام
لان الناس يكونون هسا گاعدين وماراح يسكت تيلفوني واذا اهلي احتاجوني يتصلون على زياد وهو يجي ينطيني خبر
امي واية وجدي وجدتي راحو ويا رشيد (ماجنت اعرف ان ياقوت باقية) واخذتني النومة ماگعدت للعصر باوعت للساعة جانت بال 4 العصر
ياقوت : بعد ما اخذو اديان وزيد الحجي والحجية جانو يتواصلون ويا تميم وزياد وخواتهم كل ما واحد من ازواجهن يتصل يحجنلو
بس الحجية نبهت عليهن ما يجيبن طاري اديان وبقن يمنا لحد ما گالو زيد طلع من العملية ورجعو ابوهن وامهن يلا راحن
ثاني يوم جانو متفقين كلهم يروحون على زيد الا اني رغم معزة زيد بگلبي بس ما حبيت الروحة لان اخوان تميم كلهم موجودين هناك
وبنفس الوقت ممكن يتأخرون ويجون ناس غريبة فالافضل اني ابقى بالبيت ومن يجي زيد هنا اجي اسلم عليه وهاي هي
من راحو كلهم بقيت بس اني ورجعت لبيت تميم وطلعت كتبي وگعدت اراجع دروسي بالصالة بس مشغول بالي بزيد واديان ومافهمت كلشي من دراستي
الساعة صارت 12 الضهر واني لحد الان مو ماكلة كلشي من غدا البارحة بسبب الخبصة وفكرت بيني وبين نفسي اسوي اكل لو انتظر تميم
بالاخير گلت انتظر علمود ياكل الاكل وهو حار ومن صارت الساعة 2 بلشت بالغدا وجنت على كيفي اشتغل علمود ما اكملو بسرعة
سويت نص دجاجة بالفرن ووياها تمن وزلاطة كملت كلشي بال 4 وخليتهن بالمطبخ وگعدت انتظر لل 4:15 ونزل تميم مبدل
تميم : السلام عليكم
ياقوت : عليكم السلام
- وين امي
- راحو لزيد من الصبح
- وما رجعو
- بعد
- تمام
- تتغدا
- جاهز الغدا
- اي جاهز وحار قبل شوية كملتو
- لحد حطيلي غدا
رحت حطيت الغدا وهو اتصل على زياد علمود يجهز نفسو ويجي يتغدا وبين ما اجيت اتصل على امو ووصل زياد هم
تميم : الو
الحجية : هلا يمة
- يمة شنو تباتون هناك
- لا يمة شوية ونرجع
- يمة بالله عليج عايفة البنت هنا لحالها
- شعليها يا يمة قابل عايفتها بنص الشارع
- المهم خلي رشيد يجيبكم علمود نجي اني وزياد
- تمام هسا نرجع
- تمام
ياقوت : ترا عادي واذا باقية لحالي
- لا ما يصير باقية لحالج ابسط شي گدام الناس هسا الي يعرف انو اني وياج باقين لحالنا بالبيت يحسب الف حساب
- شدخلنا بالناس اذا احنا نعرف نفسنا
- ما يصير بوية منين ما تجيبيها ما يصير وهم راحو لزيد الصبح وهو نايم شدعوة باقين هناك يتطمنون عليه نص ساعة ويرجعون
- عادي ماصار شي
- عاشت ايدج عالغدا
- وانت عايش بس ما اكلت شي
- ترا اكلت نص الدجاجة ونص التمن وين اودي الباقي
- يمين المعدة او يسارها
- هههههههههه عالجايات
- هههههه عوافي
- الله يعافيج
ياقوت : غسل وبقى ينتظر لحد ما اجن الحجية واية وراحو هو وزياد ويا رشيد وسألت الحجية اذا يريدن غدا گالت لا يمة خليها عالعشى فد مرة احسن
تميم : رحنا للمستشفى اني وزياد ويا رشيد جانو اهلي بعدهم هناك من وصلنا جانو اهل اديان بعدهم هناك بس حالتهم تبجي حتى العدو
راحو زياد ورشيد عند اهلي واني اخذت حازم على صفحة علمود احجي وياه
تميم : ماكو تحسن بحالتها
حازم : لا والله بعدها
- اخذ الوالدة واختك خلي يرتاحن وباجر ارجعو
- امي ما تقبل تروح تگول اريد ابقى انتظرها
- احجي وياها واذا ما وافقت اني احجي وياها ترا مبين عليها كلش تعبانة گوللها ما نريدج تتخربطين ونكون بوحدة نصير بثنين لا قدر الله
- إن شاء الله اني راح اقنعها وبعد ما نروح اي شي يصير وياك انطيني خبر
- بعيوني
- سالمة عيونك
- الله يسلمك
تميم : رحت على اهلي وخليت ابوي ياخذهم كلهم ويرجعون للبيت وبقينا اني وزياد وويا روحة اهلي راحو اهل حازم هم
زياد : تعال ندخل عند زيد
- روح انت ادخل واني باقي هنا
- شعندك هنا
- خاف يصير شي لا قدر الله اكون اني موجود
- هم صحيح لعد من اطلع اني تدخل انت
- تمام
طلعت تيلفوني وگعدت اگلب بيه واضيع وقت ما حسيت الا زياد طلع ركض من الغرفة وتوجه للممر گلتلو شبيك گال زيد گعد وكمل ركضو
دخلت عليه ركض جان مغمض عيونو ويون من الوجع گلتلو زيد تسمعني اذا تسمعني بس گلي بس ما جان يرد بس يون
شوية واجى زياد والدكتور صار يفحصو وبين ما كمل فحص الدكتور اجت ممرضة علمود تنطيه ابرة مخدر بس فجأة سكت زيد
استغربنا كلنا وفتح زيد عيونو على وسعهن مثل الشخص المصدوم ومسك الدكتور من رگبتو الدكتور فورا گال مو بوعيو
عالسريع مسكناه اني وزياد بس جان متخبل فد مرة واجت الممرضة عالسريع انطتو ابرة المسكن وخلال شوية هدأت حركتو وبلش يحجي بس مانعرف شيگول
الدكتور: انتبهو عليه من يگعد
- اعذرنا عالي صار دكتور
- معذورين وهو مو بوعيو فطبيعي الي صار
- اكو تفسير للي صاير
- اكيد اعتقدني الشخص الي اذاه
- زين من يگعد راح يكون بنفس الحالة لو يصير عندو ادراك للاشياء الي حولو
- مو شرط ممكن اي وممكن لا حسب هو لاي مرحلة واصل للحذر من هالشخص بس اذا گعد سيطرو عليه لا ينفتح الجرح
- إن شاء الله مشكور دكتور
- العفو عندو العافية
- الله يعافيك
طلع الدكتور واني وزياد لا وعي حضنا بعض من الفرح وگلتلو اطلع گدام الغرفة بين ما اطلع اني گال تمام وطلع واني گعدت عند زيد
جنت اريد احجي وياه بس ماعرف شحجي فبقيت ساكت تقريبا 10 دقايق وگمت بستو من راسو وطلعت خارج ودخل زياد
خابرت اهلي بشرتهم وجانو يريدون يرجعون گلتلهم اخذ مسكن ورجع نام تعالو باجر يكون هسا گاعد علمود تحجون وياه
رجعت سكرت منهم وگضينا الوقت اني وزياد واحد يدخل وواحد يطلع وكل ما يجي ممرض او دكتور لغرفة زيد او اديان فورا نسألو عن حالة المريض
زيد اجى الممرض مرة وحدة بدلو المغذي وراح بس اديان لان بعدها بالغيبوبة جانو مهتمين هواي بيها بس بعدها ماكو تغيير بحالتها
جان سبب الغيبوبة سوء التغذية والنزيف الحاد يعني الجسم ماجان بيه طاقة ومواد كافية علمود يرجع يبني خلايا دم ويستعيد الوعي
وتعرفون ان الشخص مجرد يجوع يصير بيه خمول فما بالكم بسوء التغذية وفقدان الدم يعني جسمها كلش تضرر وخصوصا انها نزفت مدة طويلة
الساعة 12 دزيت زياد يجيبلنا عشى وبقيت گاعد گدام الغرف واتصل حازم گلتلو ماكو جديد نام انت واذا صار وياي شي اخابرك
جان مبين من صوتو التعب والحزن وما الومو فوگ الغدرة من عمامو ما يعرف ايمتى تگعد اختو وحالتو هو واهلو تبجي
شوية واجى زياد تعشينا اني وياه وبقى اخر شيش گال زيد اكلو مابقى بيها مجال گلتلو تخسى شيش كباب يخوفك
گطعتلي خبزة صغيرة ولفيتو سويتو لگمتين وانطيتو العلاگة راح ذبها ورجع وگعدنا اني وياه نحجي بمواضيع مختلفة
اخذنا الواهس بالكلام لحد ما صارت الساعة 4 دخل زياد على زيد جان بعدو نايم ورجع يمي وصرنا كل شوية نتأكد منو ويكون نايم
الساعة 5:45 فجأة انفنح باب غرفة زيد وانصدمنا اني وزياد من شفناه واگف گدامنا وعالسريع سندناه ونريد نرجعو للغرفة
زيد : وينها
تميم : مابيها شي تطمن بالغرفة هاي بس ارجع قبل ما ينفتح الجرح
- عوفوني اريد اشوفها
- ماتگدر الدكتورة مانعة الزيارة عنها
- مسكني من ملابسي بعصبية .. اني ما نقذتها علمود الدكتورة تمنعني فاهممممممممم
جان زيد لاول مرة يتصرف وياي هيج تصرف حتى زياد جان يباوعلي وهو مصدوم گلتلو تمام واخذتو من زياد ووديتو لغرفة اديان
اعرف غلط الي دا اسويه بس جانت حالتو خطرة كلش واعرف بيه ماراح يقتنع وراح يأذي نفسو ونرجع نتورط بيه مرة ثانية
دخل يم اديان واني بقيت خارج وجنت خايف يجي حازم واهلو واصير بموقف مو حلو گدامهم وصار الي خايف منو والساعة 6:00 دخلو للممر
واستغربو لان واگف گدام غرفة اديان والله لا يحطكم بهيج موقف اجى حازم بسرعة گال ها تميم شكو گلتلو ماكو شي زيد داخل
فتح عيونو على وسعهن وعافني ودخل ودخلت وياه جان زيد واگف يم الباب ويباوع لاديان وهو ساكت وعيونو مثبتات عليها
جنت متوقع حازم يعصب لو يحجي بس وگف گدام زيد وگلو احجيلي شنو الي صار بس زيد ساكت وما نطق ولا كلمة
جان حازم يريدو يحجي ولو كلمة وحدة بس زيد كانو اطرش وما يسمع كلام حازم ومجرد واگف مثل الصنم وعيونو مثبتات باتجاه اديان
حتى من وگف گدامو حازم بقن عيونو ثابتات بنفس المكان اخير شي سحبت حازم على صفحة گلتلو ترا بعدو مو بوعيو
وحجيتلو عن حالتو من گعد البارحة گال لعد اخذو لغرفتو لا يتأذى او ينفتح جرحو گلتلو اعذرني ماردت اجيبو بس تخبل علينا
گال ماصار شي ولو مو خايف عليها جان ما اجى وهو بهالحالة علمود يتطمن عليها وتشكرتو واجيت على زيد گلتلو يلا تعال لغرفتك
زيد : باوع علي .. ليش ما گعدت لحد الان
تميم : بسبب سوء التغذية تتأخر كم يوم
- دخلت غيبوبة مو
- لا بس.......... قاطعني
- اني مو جاهل تميم
- بحسرة .. اي دخلت بغيبوبة بس إن شاء الله ما تتأخر يلا تعال على غرفتك علمود تتعافى بسرعة وتكون بخير من تگعد
بينت عليه ملامح العصبية واحس يريد ينفجر من العصبية بس مابيدو شي يسويه وسندتو علمود اخذو لغرفتو ومن طلعنا من الغرفة وگف
باوع لام حازم واختو الثانية ولاول مرة اشوف زيد بهالصلافة هاي كل مرة ما يباوع للنسوان بس هاي المرة ماعرف شبيه من صدگ تخبل
ام حازم گامت سلمت عليه وتتحمدلو بالسلامة وتشكرتو لان انقذ بنتها وهو ساكت ما يجاوب حتى اني من يمي افتشلت بسببو
تجاهل كلشي وباوع لاخت حازم (وديان) گاللها ديري بالج على نفسج وكلنا استغربنا من كلامو وخصوصا البنت كلش خافت
حاولنا نفهم منو سبب كلامو بس رجع سكت وانجبرت اخذو لغرفتو قبل ما ينفتح الجرح ومن وصلتو رجعت على حازم
گلتلو حاليا مثل مو شايف ماگدر اضغط عليه بس راح احاول اعرف منو كلشي وانت بنفس الوقت ديري بالك على اهلك بين ما نفهم منو
گال تمام ودزيت زياد علمود يجيب الدكتور ودخلت عند زيد جان متمدد وحاط ايدو اليمين فوگ عيونو واليسار لان مضروب بيها سجين مايگدر يحركها شوية واجى الدكتور فحصو گال
الدكتور : كلش زين الحمدلله .. دا تتوجع
زيد : كلش
-هسا تجي ممرضة تنطيك مسكن
- ما اريد مسكن
- علمود ما تحس بالوجع
- خليني اتوجع علمود اتذكر كلش زين
تميم : زيد خلي ينطيك مسكن واوعدك ايدي بايدك لحد ما نرجع حقك
زيد : ما اريد مسكن وهاي هي
تميم : هاي هي .. مشكور دكتور
الدكتور .. العفو
تميم : طلع الدكتور بس وضع زيد مو مطمني اكو شي مأثر بيه لهاي الدرجة بس المصيبة ماگدر اضغط عليه علمود لا ينفعل
گلت اتحملو هالكم يوم لحد ما يطيب ومصيرو يحجيلي كلشي من الالف للياء بس لازم انتظرو وخلال گعدتي يمو اجو اهلي
صارو يسلمون عليه ويتطمنون على حالتو واني اخذت ابوي وطلعنا خارج گلتلو حاول تفهم منو شنو الي صاير بلكي يحجيلك انت
گال تمام وتأكدت من حازم انو ما يحتاج شي وگلتلو اذا احتاجيت شي خابرني ورجعنا للبيت اني وزياد وهم جابنا رشيد علمود ياخذ باقي اهلي
قبل ما يروحون وصيت امي ما تتأخر مثل البارحة لان ياقوت لحالها گالت تمام وتوجهت لغرفتي اخذتلي دوش ونمت
ياقوت واية ما نريدهن يداومن لان اني واخواني ملتهين وبنفس الوقت لازم نكون حذرين هالكم يوم بعدها يرجعن لدراستهن
گعدت العصر مثل البارحة ونزلت تحت لگيت امي والبنات موجودات حطتلي الغدا اية ومن خلصت غدا اجى زياد گال يلا رشيد وصل
رحنا للمستشفى جان زيد نايم واديان على وضعها رجعو اهلي للبيت وحازم واهلو هم راحو وبقينا اني وزياد ومن گعد زيد دخلت عندو وبقى زياد خارج
گعدت يمو گلتلو احجيلي شنو صار علمود اساعدك وراح يبقى الكلام هذا سر بيناتنا لحد ما انت تحجيه او تگولي احجيه بدالك
زيد : توعدني
- افه عليك ليش اني اخلفت بكلامي وياك من قبل
- الموضوع هالمرة جبير كلش يجوز حتى انت تصير ضدي بيه
- اني وياك حتى لو الكون كلو ضدك بس احجيلي علمود اعرف شنو الموضوع
- تمام
شكرا لزيارتكم عالم روايات سكيرهوم
