رواية قصة وجدان الفصل الثامن والثلاثون 38 بقلم انين الليل

كعد على حيله وفتح عيونه والشرار يطلع منهن 

• انتي شتكولين 

بقيت ساكته خفت من ردة فعله زمخ عليه // جاوبيني انتي حامل ؟

هزيت راسي بخوف = ايي 

   - - ايي شلون عرفتي 

= بيبي كالت انتي حامل لان الدوره هاي تلث تشهر ما وگعت عليه ولعبان النفس والدوخه ف...

  حرك ايده وهو متفاجئ // بس لاتكملين (باوعلي ) هذا تتخلصين منه شلون ما ادري

  استغربت كلامه سالته = منين اتخلص ؟

   بدون ما يباوعلي اياشر على بطني ويحچي بعصبيه // من هذا الي تكولين بي حامل 

  = بس ان... 

قاطعني // ما اعيده الكلام الگلته هذا الي ابطنج ما اريده 

    رديت باستعطاف = حراام 

   عكد گصته // حلال حرام ما اريده ما طولني هادي ما تدرين شيطلع مني

    رديت بعصبيه = ليش ليش 

لزمني من شعري // ولج لا تكليلي ليش هذا الي ابطنج ما اريده ولج انتي ياهيه حتى تحملين مني ولج نسيتي نفسج 

شني انتي انا ما اريده منج ما اريد جهال افتهمتي 

ما هانت عليه نفسي فكيت نفسي منه وحاجيته بنفس عصبيته = بس اني اريده ومستحييل اتخلى عنه 

    اتقرب مني // شنو شكلتي 

   = اني اريده اقلها يرد وحشتي عن هذا السجن 

     صك على اسنانه // تردينه مو تدللين خلي

ما حسيت اله دفعني وكعني ع الارض وصار يضرب بيه // طالع السانج مو هسه انا اخلصج منه ولا يهمج 

صار يرفسني بكل مكان واني اصرخ وهو يكلي 

- - اصرخي بيج وما تصرخين حييل محد يسمعج اصرخي 

كعدت خليت ايدي على بطني وابچي بحرگه واستعطفه = حرام عليك ليش تقتل نفس 

  - - منج ما اريده ما اريده اكرهج اتقزز منج تلعب نفسي من صورتج من حسج من كل شي بيج ما اريدج 

انوب اريد بزرج

= لعد طلگني وانطيني ايا اتنازل عنه كول ما اريدها ولا اريد البطنها 

  وهو يضرب بيه // انجبي بت الكلب انا بكيفي يمته ما يعجبني اطلكج ومن اطلكج تكونين خاليه 

  صرت اعيط = اني ما اريدك طلكني 

   - - صار يجرالح 

    يضرب بيه بكل مكان واني احاول احمي نفسي لكن هو هجم عليه مثل الاسد والي لا يمكن انسا لمن سحك على 

بطني برجله وهو ضاغط عليها ويفر بيها اهنا حسيت شي وكع مني صرت اصرخ بتوسل واحس روحي طلعت 

والدنيا سوده والهوا مكطوع مني كلمه حچيتها = موتتني 

حسيت على ضرب على خدي ورش مي فتحت عيوني شفت نفسي فايضه الدم واصل الاكتافي وهو واكف مبهوت 

اتقرب مني گلي // امشي اخذج للطبيب

بقيت فاتحه عيوني مذهوله من منظري وارجف ازيد من السعفه بهاي اللحظه والنزف عبالك حنفيه واحس بنفسي راح اموت 

    لكن فكرت لازم انهزم منه وبعد ما ارجعله اله جثه وكفت ما سيطرت على نفسي لان الصوره ما اعرف اوضحها 

هو ساعدني حتى اوكف اخذت العلاكه وياي لان حتى حفاظات ما عندي وصلني للحمام دخلت غسلت وغيرت ملابسي 

وطبكت قطعه من ملابسي خليتها مثل الحفاظه واا النزف ما قطعني لكن جاي اجاهد واكول ويه نفسي 

= هاي فرصتي لازم انهزم لازم بعد ما ابقى عد هذا الحقير لازم اذله وافضحه واتخلص منه حتى لو يكون اخر يوم بحياتي 

= اهم شي اخذ بطاقتي والفلوس الي انطتهن بيبي الي هاي اهم شي واني اعلمك يانذل بسيطه

رجعت للغرفه واني اعيط من الوجع هو گلي // راح اشغل السياره وانتي البسي عباتج 

من طلع ما تتصورون الالم والخوف رحت اركض الغرفته واخذت الجنسيه خليتهن بصدري وطلعت ويا وهو 

يسوق كان ساكت ومذهول واني اعيط بصوت عالي من الالم الي ما اكدر اوصفه وصلنه للمستشفى للطوارى 

وكال للدكتوره // زلكت من الدرج وطاحت وما افتهمنا شي بس الدم اخذها 

الدكتوره من شافتني سالته // انت شتعود الها 

زوجها 

نيمها ع السديه واطلع 

هي فحصتني // اه هاي انتي طارحه صدك زالكه

هزيت راسي لان خفت احچي الها والموضوع يتشعب هي فتحت الباب صاحتله دخل ويباوعلي واني نايمه 

  الطبيبه // ما نكدر نسويلها شي اله الصبح تاخذها الطبيبه نساىيه ولازم تنظيف وكرداج 

   سالها // وهسه شسوي 

بلحظه فقدت الامل يعني ارجع ويا لا يمكن عطت بتعب = اااخ راح اموت اااخ 

وبصراحه مثلت الاغماء واني اسمع الدكتوره اتكله // اخذها للردهه بسرعه لازم انحاول انوقف النزف الوكعه كلش 

قويه احتمال نحتاج دم هي زوجتك منو دكتورتها ؟

   بهاء// شنو ؟

- - عد منو تراجع يا طبيبه نساىيه ؟

  - -:دكتوره ما تراجع بعدهي توها درت بنفسها حامل 

  - - - هاي شلك بيها زوجتك اذا مو حامل من تلث تشهر يبقى من شهرين ونص 

حسيت اخذوني بالسديه وهو نيمني ع السرير 

   حسيت بضربات خفيفه على خدي وصوت الطبيبه // اتسمعيني ماما اتسمعيني 

   — مبينه نازفه هواي وهيج انغمى عليها 

- - زين شنسوي 

— هو تبقى الليله اهنا والصبح تجي الدكتوره الاختصاص ونشوف شتقرر 

    بهاء// دكتوره اريد انقلها بالجناح الخاص 

  - - بكيفك كمل الطبله 

  - شني ؟

   - - الفايل مال الدخوليه

شالني وخلاني بالسديه والمغذي باايدي الى ان وصلني للغرفه وانا مغمضه عيوني  

الطبيبه اجت وراي وكالت للممرضه // خلي نضربها ابره (. ) بلكي يتوقف النزيف على ما باجر تجي الدكتوره 

وتسويلها الكرداج 

- - هاك روح جيب هاي الابره 

    - - منين ؟

- - شوف صيدلية المستشفى واذا ماكو دورها بره لازم ما نتاخر 

غاب شويه واجه جايب الابره //. هاي هي 

- - اي منين حصلتها 

- - الصيدليه المقابيل المستشفى 

الدكتوره گالت للممرضه // انطيها هاي الابره وعلكيلها مغذي

اسمعه يحجي // كملت الطبله انا ما جايب جنسيتها واخذو جنسيتي على ما اجيب الجنسيه والعقد 

الممرضه // اي باجر الصبح بثمانيه ونص بالتسعه جيب جنسيتها والعقد حتى يدخلوها بالطبله وتسويلها عملية التنظيف 

  - - شنو دكتوره حالتها 

— هي متاذيه من النزيف وان شالله بس تسوي عملية الكرداج تصير احسن 

  - - والاغماء 

- - بسبب الدم الي وكع منها وهم الوكعه كانت قويه عليها

ردت اكوم واكول هو سحكني وخلاني اطرح وانزف لكن خليت هذا الشي اخر حل 

وراح وكال للعامله // ما اوصيج ديري بالج عليها على ما باجر اجي 

العامله ردت // رووح جيب امها اختها 

   - - يتيمه ما عدها احد بس الله 

  - - والنعم باالله چا جيب امك اختك خابرهم هسه لازم يكون وياها مرافقه 

   - - اهلي بعيدين انتي ديري بالج عليها

ما تعرفون شكد خفت وحده من العاملات كلتله /= لازم تطلع ما يصير تبقى اهنا 

- - يعني اروح 

— اي خليت رقمك يم الاستعلامات 

   - - اي خليته وحتى جنسيتي اخذوها 

- - بعد بكيفك تبقى بره المستشفى تروح بكيفك

ما عرفت شلي صار ولا عرفت هو راح وين نمت من الابره بس گعدت الفجر ورحت للحمام شفت نفسي بعدني 

انزف لكن اهنا قررت انو لازم اطلع بس يمته مو هسه اقلها شويه بعد غسلت ورجعت كعدت وانا اشوف ملابسي بيهن 

دم كعدت افكر شلون اطلع وين اروح 

لكن كل هذا الشي ما يهمني اهم شي اطلع وما ارجع بعد = ولج وجدان هاي فرصتج اذا ما تنهزمين هسه بعد تحلمين 

تطلعين من سجنه 

اجت المضمده شافتني // ها شلونج 

جاوبتها باالم حقيقي = مو زينه احس ظهري مكسور 

هزت راسها // اي بسبب النزف الصبح تجي الطبيبه وتقررلج عمليه 

=عملية شنو ؟

  — —. كرداج تنظيف يعني اكلج هو هذا الجابج رجلج 

   هزيت راسي = اي رجلي بس اني مرته الثانيه 

   - - ها يعني متزوجه بالسر 

   = لا شنو بالسر هو نهى عليه واتزوجتي 

  - - اهلج ابغداد 

  = اي هو ابن عمي 

   - - مبين يحبج هوايه يمشي ويوصي بيج گال الصبح يجيب عقد السيد وجنسيتج

انتبهت الكلامها = ها 

  - - اي خليناج بالگوه بعد ان اخذو جنسيته 

   شفتها بايدها ابره سالتها = شنو هاي الابره ؟

  - - مهدئ 

  = خو ما تنيمني ؟ 

  - - يجوز بس اكثر شي تهدا الالم وترخي الجسم ما تردين تنامين 

  هزيت راسي = لا 

   ابتسمت المنرضه // لا مو منوم لان لازم من تجي الطبيبه تشوفج صاحيه بس هاي مهدئ

طلعت الممرضه بعد ان علكتلي السيروم وبقيت گاعده ع السرير كنت كلش متاذيه لكن هاي فرصتي وصرت افكر 

شلون اطلع وين اروح لكن كان اهم شي انو ابعد عن المستشفى قبل ما يجي اجتي العامله الي تشيل النفايات باوعتلي 

وابتسمت // صباح الخير 

= صباح النور 

شلونج اليوم ؟

= احسن 

- - لا تضوحين الله ما قاسمه الج 

= الحمد لله على كل حال 

  سالتها = خاله رايده اشتري حفاظات وعصير احس روحي خاويه من الجوع 

  العامله // بس ما يصير تاكلين على مود البنج

  ==لعد منين اشتري حفاظات 

  اتاشر بايدها على ناحيه // من الكفتريا انطيني وانا اشتريلج 

   = لا اني اريد شويه احرك نفسي منين اطلع ؟

   هزت راسها // ما يصير اتطلعين 

طلعت الها خمس تالاف = هاج هاي الج وانتي امشي وياي بس اشتري حفاظات وشوف بعد شنو اشتري 

  - - خوش امشي نطلع من الباب الرئيسي بوجهج الكفتريا 

    =. شنو تردين اجيبلج ريوك 

    - - هسه يجيبون اهنا

  طلعت خمس تالاف ثانيه =. هاج خاله اخذي بيهن ريوك الجهالج 

   - - امشي وياي 

لبست العبايه ومشت قبلي وهي تكلي // بيج تمشين ؟

  = اي خاله بيه 

كان اكو ممر مكتوب علي الى الاشعه الى التحليل وهي تمشي وانا وراها عرفت الطريق وگلت =. اذا ما گدرت هسه انهزم 

   بغير وقت 

وصلنه للباب الرئيسي شافها الحرس // ها شو اهنا 

  - - هسه بس نشتري من الكفتريا 

طلعت وهي گالت // انا رايحه تندلين ترجعين

هزيت راسي طلعت رحت للكفتريا دخلت بس الخوف والرعب ما احچيلكم عنه اخذت حفاظات نسائيه باكيتين واخذت كيكتين وعصير حاسبته وصرت اباوع بره شفت سياره واگفه رحت امشي بسرعه للتكسي واني ارجف من الخوف خفت لا الحرس 

يحجي بس يمكن ما انتبه الي 

وصلت للسياره الاجره = صباح الخير 

صباح النور 

= اريد اروح للولايه 

وين بالولايه 

   اتذكرت الفلكه = بالاستداره مالت البهو 

تلث تالاف 

  = تمام

ركبت ما صدگت طلعت السياره السايق سالني // شنو انتي نايمه باامستشفى 

  = لا اني مرافقه واجتي اختي ابدالي لان عندي دوام 

بعدها درت وجهي ما حچيت ويا الى ان گلي // وصلنه 

انطيته الاجره وكتله = اهنا نزلني 

مو عبالكم ما خايفه لو من ادنى حركه اكول اجه وراي لكن اني بهاي اللحظه خليت روحي ابين اديه يعني لو اموت بعد 

ما ارجع البهاء نزلت ورحت امشي اتجاه بيت ومن اتاكدت السايق الي وصلني ابتعد وگفت على صفحه باانتظار 

سياره تكسي دقايق عبالك سنين واجت سياره اشرت الها وكف كتله = صباح الخير 

صباح النور 

= للگراج الموحد 

اتفضلي 

= شكد 

تلث تالاف

ركبت وانا ابدي اتطير بيه السياره السايق سالني // خير طالعه من الصبح 

ما جاوبته او سويت روحي ما اسمعه هي مجازفه تمشي السياره وانا اقرا ايات وادعيه الله يسترها وياي وصلت للكراج 

ومن نزلت سمعت تكسي يكول نفر بغداد وصلت يم السياره شفت رجال بالصدر ومره ورجال وره هو سالني // بغداد 

هزيت راسي اي 

اي منو وياج اذا ابحدج هذا تفر 

= ابحدي 

- - ياالله اركبي خلي نتوكل 

شكد الكروه

15= 

ركبت بصف المره يعني صارت بالوسط رغم حسيت بيها اتضايقت لكن همه راكبين ويتوقعون اي احد يجي 

فلو هو لو زوجته يصيرون رسط 

مشت السياره بسرعه وانا اقرا ايات ودايره وجهي ع الجامه وخاله ايدي تستر وجهي وهالمره حتى ما فكرت 

وين اروح ولا عد منو التجئ المهم ابعد منا احس بالالام فظيعه والنزف مستمر نزلنه للاستراحه اول شي رحت 

للحمامات غيرت الحفاظات واني اشوف انو ما بقى بيه دم لان الي شفته شي فضيع

بدلت والرجفه وصلت لعظامي اني كل هذا الشي ليش حصلي شلي جنيته ما لكيت اي جواب غسلت وجهي ولان ارجف رجعت للسياره كعدت وشفت ولد يبيع جاي طلبت منه كوب اقلها ادفى شربته بسرعه وطلبت كوب ثاني وطلعت الكيكه اكلتها 

بعد فتره اجه السايق والركاب وبدت السياره تمشي طلبت منه ان يفتح التدفىه شويه وفعلا فتح التدفىه شويه دفيت كنت تعبانه وما حسيت بنفسي نمت رغم الالم ما حسيت اله على المره الي بصفي تگلي اكعدي // خاله وصلنه

فتحت عيوني عبالك بحلم شفت نفسي السياره واكفه والسايق والرجال الي ويه المره واكفيين هي باوعتلي 

شنو خاله انتي مريضه 

هزيت راسي = ب اي 

وليش جايه ابحدج 

= جنت بالمستشفى وجايه البيت اهلي 

خوش وصلنه تندلين ترحيلهم

هزيت راسي هي راحت وانا صرت امشي واتساءل = هسه شسوي وين اروح 

لان نمت ما عرفت بيش الساعه وانا لا وياي نقال شلون راح. اتصرف او وين اروح باوعت شفت كشك مفتح رحت. 

امشي واني اردد رقم منار ما ردت اروح البيت خاله ام احسان. خفت تتصل بعاصف لذلك قررت اتصل بمنار 

اكيد راح اتساعدني. 

وصلت للكشك كان يبيع لفات وعصير وجاي وحلويات 

بعد ان مشى المشتري كلي // امريني 

= لفه فلافل وجاي 

تدللين 

  = بلا زحمه عندك رصيد 

بلي تردينه آسيا آثير 

= آسيا ابو الخمسه

انطاني الرصيد خليته بايدي وانطاني اللفه والجاي. حاسبته باوعتله هو كلي /. رايده شي 

هزيت راسي = تلفوني وكع ما اعرف وين واريد اروح البيت عمي هذا الرصيد الك عبي بجهازك بس خليني اخابر 

• لا بابا شلقصه الدنيا ما تكاطعت 

= مي خالف عمو يجوز احتاج اخابر اكثر من مره 

  - فوتي بابا اكعدي اكلي لفتج وخابري براحتج 

  = اشكرك عمو بس اذا ما تاخذ الرصيد ما اخابر

هز راسه وفعلا دخلت للمحل اكلت اللفه وشربت الجاي وهو انطاني النقال كلي خابري. براحتج 

صاركلبي يدك واني مااعرف اذا منار راح تقبل اتساعدني او لا لكن بعدين. كلت اذا منار رفضت تساعدني اروح البيتهم 

وهناك اخليهم يتصلون. بعمو كريم وقبلها اطلب مساعدة الشرطه 

كل هاي الاشياء صارن كدامي. بصوره مخربطه لان اني من الخوف والالم والنزف احس ما الي قوه اتصلت مره 

ومره ثانيه جاوبت 

الو 

= الو منار اني وجدان 

منو ؟

  = هاي شبيج منار اني وجدان 

هلو وجدان وين هاي الغيبه 

= منار. اني محتاجتج تكدرين تساعديني 

شبيج وجدان شصاير ؟

  = اني كلش تعبانه. وهنايه ابغداد ومحتاجه مساعدتج 

زين اهدي اهدي بس وكليلي انتي وين 

= اني. هسه دا اخابر من نقال رجال عنده كشك يم الكراج الموحد 

  - زين وجدان انطيني الرجال خلي اعرف العنوان وين 

  = منار قبل كول شي ما اريد احد ياخذ علم. بوجودي بغداد لان اكيد راح يجون ويسالون عني 

   سالتني // وجدان اتي مهزومه 

= من توصليلي راح تعرفين كول شي تكدرين تجيلي ؟

- - اي انتظريني ساعه زمان واجي 

  = ماشي حنتظرج بس مو تتاخرين اني كلش تعبانه 

- - جايه بس مسافة الطريق 

انطيت النقال للرجال اتشكرته اريد اطلع حاچاني //عمو ابقي داخل المحل على ما تجي اختج

كعدت بالزاويه واني بين الخوف وبين الامل اخيرا راح اشوف منار واكيد من تسمع قصتي راح اتساعدني اني افكر 

والرجال جاي يبيع لمن ما اتصل الموبايل وسمعته وهو ايدليها باوعلي وابتسم وگلي 

- - اجت اختج 

طلعت وشفتها المنار صايره تخبل من الجمال والاناقه اتفاجات من شافتني بهالشكل حضنتني واني ما اتمالكت نفسي 

صرت ابجي واني اكللها = اشتاقيت لج منور 

اتشكرت من الرجال ورحنه اني وياها بنفس التكسي وهي تگلي // شصاير وياج كولي ؟

= وين اسولف لج ؟

افتهمت بقت ساكته الى ان وصلنه المنطقه وگلتله // اهنا نزلنه 

سالتها = وين جايين 

- -نكعد اهنايا بمطعم 

  = يمعوده يامطعم منار الالم راح ايموتني 

- هاي شبيج ؟

  = اني جهضت 

  منار وهي مستغربه // شنو اتي شدا تحجيين

= لا يروح بالج لبعيد اني اتزوجت او همه زوجوني وهسه. جهضت بس مو ابحدي لا هو جهضني 

منار // على كيفج وجد على كيفج خلي نكعد واحچيلي منو هذا الجهضج 

   = بهاء ابن عمي 

   منار ///زوجج ؟

   هزيت راسي =. بلي هو 

   منار //. اهدي واحجيلي واني اكيد احاول اساعدجبكول شي اكدر علي

  حاجيتها بتعب وكوه فاتحه عيوني = ما اكدر اكعد اني احس حتى الهوا راح ينكطع عني منار ساعديني بدون محد يعرف 

- - تمام على كيفج وجهج اصفر وشفايفج. بييض 

   = واحس الدنيا اتدور بيه بس ما اريد اغفى وانام 

   - - دقيقه وجد 

اتصلت // الو هلو داليا 

- - اكلج عدنا قضيه كلش حساسه ومحتاجه مساعدتج 

   - - لا ما تتحمل الانتظار البنيه تعبانه كلش زوجها ضاربها ضرب كلش قوي وادى الى اجهاضها 

   - - داليا دا اكولج صديقتي اختي ولازم اساعدها تكدرين لو اشوف غيرج 

   - - احنه هسه كاعدين بمطعم ال ... بس البنيه تعبانه 

   - - زين بانتظارج ابد لا تتااخرين

بقيت كاعده لكن ما اگدر اكعد الالم يمزقني انتظرت بعد ان رحت للحمام وساعدتني منار الى ان اجت داليا //هاي وينج اتاخرتي 

اتباوست ياها // ازدحامات 

سلمت عليه داليا بعد ان عرفتنا منار تكون بنت عمها وهي محاميه وشاطره كلش حسب كلام منار 

- - نكعد اهنا ونسولف 

  منار هزت راسها ///لا داليا لازم تشوفها طبيبه 

سالتني ///انتي رحتي للمستشفى 

هزيت راسي رغم الالم = اي رحت 

- - سوولج كرداج ؟

  هزيت ااسي = لا انهزمت اجيت لهنا 

   وكفت // زين لعد امشي وياي 

سالتها = وين نروح ؟

- - للطبيبه ونثبت الحاله اجهاض متعمد احتمال نطلب الشرطه 

= اني ما اريد شي بس اتطلك وما اريد يعرفون مكاني 

تزت راسها //لا هاي ما اريد ايعرفون مكاني صعبه شويه 

= مو صعبه من اتسمعين قصتي 

- - امشي وياي ما دام بعد وكت نلحك على طبيبه

وصلنه للمستشفى وراحت داليا بسرعه جابت سديه ودخلتني للطبيبه الي قررت اروح للردهه بعد ان عرفتها داليا بنفسها 

والي سالت الدكتوره شلونها المريضه 

لازم عملية كرداج باسرع وقت والا النزف يصفيها وتصير بيها شغلات ثانيه 

بكيفج دكتوره 

هسه تدخل للعمليات 

بس هي ماكله 

الكرداج ما اياثر لازم نسويلها تنظيف حتى لو بدون بنج 

معقوله دكتوره 

ماما من يمته تنزفين ؟

= دكتوره ضربني تقريبا الساعه بالعشره بالليل البارحه 

الدكتوره// ضربج ؟

هزيت راسي= اي سحكني برجلينه اثنينهم بعد ان موتني كتل 

- - اوف 

= اي ومن اخذني للمستشفى كال وكعت من الدرج واني ويه اول فرصه انهزمت 

- - بس لازم احد يوقع عنج 

= داليا اني اوقع اني محاميتها 

- - لعد اهنا لازم نخبر الشرطه 

باوعت الداليا وهزيت راسي= خاف يندل مكاني 

داليا // علوا يجي حتى راسا نلقي علي القبض وما يطلع منها

دخلوني الغرفه وبدن اثنين دكتورات بعملية التنظيف الالم ما اوصفها واني اعيط بكل قوتي وابجي ما اعرف شكد 

نمت فتحت عيوني شفت يمي منار وداليا ومنار اتقربت وباستني وهي اتگلي // الحمد لله ع السلامه 

غلبتني دموعي واني اتذكر قساوة وجه بهاء وهو يسحك ابطني حتى اجهض هذا المخلوق البرئ الي كان كل ذنبه 

انو بهاء يكون ابو. 

داليا سالتني // الشلونج هسه 

هزيت راسي وانا حابسه عبرتي هي كالت // هاج هذا عصير اشربي حتى تكدرين تكومين على حيلج لان هسه راح 

يجون الشرطه وياخذون افادتج 

باوعت بخوف المنار وداليا ردت //لا تخافيين انتي صاحبة حق 

=بس اني ما اريدهم ايعرفون انو اني ابغداد او اساسا موجوده

داليا باستغراب //ليش 

=لان اكيد راح ايجبروني ارجع اله واني ما اريد ارجع اقتل نفسي ولا ارجع 

حكت حنجها وكالت // هاي سهله ما اخليهم ايعرفون اله بالوقت المناسب بس هسه راح يجون ويكلولج تشتكين انتي كولي 

اي اشتكي لان عنفني وكان السبب بان اجهض طفلي واني عندي تقرير الطبيبه الي اتاكد صحة كلامج

=تمام 

داليا //بس اني اريد اسمعج وافهم كول شي 

هزيت راسي اجت الدكتوره وصلت يمي سلمت //مرحبا 

= اهلا دكتوره

— اشون صرتي احسن 

=الحمد لله 

داليا //دكتوره يمته تكدر تطلع ؟

- - غالبا ترتاح ساعتين تلاثه وتطلع ومرات بالعياده ياخذوها بالبيت ترتاح لكن بمثل حالتها اخليها بالمستشفى ولو بس اليوم 

داليا // هو هذا الي نريده دكتوره نطمن على صحتها وبعدها نشوف 

الدكتوره // اني دكتور حسن حاجاني 

داليا //. هو صديق للعاىله 

- - اني بصراحه وياكم لان البنيه لو ما ستر الله كان صار عدها انفجار بالرحم وبالتالي كان ممكن نفقدها 

   داليا // اه الهلدرجه 

  - - واكثر اي شي تحتاجونه مني تلفوني بالاستعلامات وراح ابلغهم من تردونه ينطوكم الرقم وانتو اتصلو ،

اني هروح وراح يباشر الطبيب المقيم

داليا //. شكرا دكتوره 

ابتسمت //. العفو 

راحت الطبيبه احس بالم قوي بس مو مثل اول مره سالتني منار اذا بيه اكوم حتى اغير ملابسي لكن داليا كالت 

لا خليها هالشكل حتى من يجون يشوفون حالها شلون مبهذل 

= بس اني ما اريد يعرفون مكاني 

- -:هاي خليها يمي 

وبهاي الاثناء اجه ضابط شرطه واخذ اقوالي بصراحه خفت من ردة الفعل من يسمعون اني رافعه دعوه ونسيت هسه بهاء شجاي يسوي المهم اني خلصت منه وهذا الشي لاكنت متوقعته ولا بحساباتي

من راح الضابط داليا گالت // هذا هو اليوم تبقيين ايهنايه وبكرى تطلعين بحيل الله 

  = ان شاالله 

  داليا // اني اتعمدت اخليج بالردهه ما خليتج بالجناح الخاص حتى انبين الهم انو انتي انهزمتي لان حتى مصرف ما ينطيج 

   = اتصدكيني من اكلج من اتزوجنه الهليوم ربع دينار ما نطاني ربع 

داليا //. هسه انتي ابقي بس الليله والصبح يصير خير 

= مو خاف الشرطه تتخذ اجراءاتها ويندلون مكاني 

- - لا اني دبرتها بمعرفتي فلا تخافيين 

منار باوعتلي // بس نسينه شي مهم 

داليا // شنو ؟

  منار //. من تطلع وين تكعود ما دام ما تريد احد يعرف بوجودها 

داليا لملمت بحلكها وبااصبعها ع الميز مال الجربايه // مو مشكله 

   - - شون يعني ؟

  - - امم يعني تكعد بالمشتمل على انها مؤجر 

- - تقصدي مشتمل بيتكم 

هزت راسها // اي بالضبط وحتى من ماما تسالني تكوللها بنيه من طرف منار وياها بالكليه شوف شلون اندبرها 

= اني اشكرج وشكد ما اكعد الاجار واتعابج محفوظات 

   داليا // ها ؟

هزيت راسي = اي استاذه اني عندي راتب ابويه صار اكثر من تلث سنوات اني ما قابضه منه ولا فلس 

- وليش ؟

  = لان بيبي هي الي تقبضه ب اسميوهذا اشي هسه عرفته

   داليا //. هسه انتي ارتاحي ويصير خيير 

باوعت المنار = ما. يحتاج اوصيج منار مو خاله لو عمو ياخذون خبر 

اتقربت مني وهي تبتسم // لعد اني ليش كتلها راح ابقى ويه. داليا لان ما اكدر الزم الساني 

   داليا // يرادله گص

ضربتها بكتفها // ها ومن اتخرج. محاميه شلون ادافع عن المتهمين 

داليا باابتسامه // بالحركات اتاشرين وتكتبين 

- - ههههه. 

باستني منار وكالت /$ رقمي يمج شنو تحتاجين

باوعت الها بترجي ودموعي نزلن = منار بس لا تتخلين عني 

- - هاي شبيج شلوناتخلى عن اختي وصديقة عمري 

داليا // ياالله امسحي دموعج وان شاالله خير نامي وارتاحي بكرى هوااي راح انسولف لان لازم اعرف كل شي تمام 

هزيت راسي

باستني منار بخدي وهي اتكلي // اي شي تحتاجي رنة تلفون واجيج بسرعه لان اليوم راح ابات ويه داليا

ابتسمت بتعب وهنه راحن واني بقيت اساىل نفسي ياترى هذا السويته صح لو خطأ وحتى لو خطأ اهم شي انفصل 

عن بهاء وما ابقى ويا لو كلفني هذا الشي حياتي 

اجتي الممرضه وهي تسالني شلون صرت وليش محد يمي جاوبتها // الصبح تجيني اختي لان هسه راحت للبيت 

كالت // ولايهمج اي شي تحتاجينه اني يمج رايده شي

= شكرا ما قصرتي 

  طلعت الممرضه واني بقيت كنه تلاثه بالغرفه وكل وحده وياها مرافقه الا اني ابحدي صرت احجي ويه نفسي 

= لازم اواجه العاصفه ما اضم نفسي حتى لو كلفني هذا الشي حياتي او يمكن ما يكلفني شي بالعكس يجوز اربح 

واهم شي اربح راحة بالي 

هزيت راسي واني اكول = لازم اواجه العاصفه 

لكن فجأه اتذكرت علاوي غركن عيوني بالدمع واحچي ويه نفسي 

  = هسه انت وين وشجاي تسمع من حجي

مسحت دموعي وحچيت بااصرار = مي خالف علاوي حبيبي اتحمل على ما اتطلك واتخلص من هذا الوحش 

رغم الالم لكن حسيت بقوه واراده بداخلي انو اني بكل الي اشعر بي لكن عندي اصرار وقوه ولازم اواجه كل مشاكلي 

   وبعد ما اخلي احد ياذيني 

اكلت شويه بسكت وجاي حتى ادفي اعظامي ونمت والنساء الي بالردهه يسولفن لكن اني كان كل همي 

اطلع من المستشفى واتطلك من بهاء ب اسرع وقت ممكن وب اقل الهسائر 

ابتسمت بحزن =. ليش اني شنو عندي بعد حتى اخسره

الصبح كعدت حسيت بنفسي احسن واجت داليا تشوفني وسللتني 

اشلون صرتي 

= الحمد لله وين منار 

عدها امتحان تجي وره الدوام 

  = وانتي ست ما رحتي للدوام 

   ابتسمت واتقربت مني // انتي قضيتي منتظره الطبيبه 

باوعتلي وسالتني //. بعدج متوجعه 

هزيت راسي وبرطمت =. شويه بس خايفه على اخويه

   - - - اخوج منو هااا اي سولفتلي منار تقصدين الزغير 

   هزيت راسي = اي اخاف اياذونه 

   - - منو اياذي بس احصلج الطلاق ذاك الوقت نتفاهم على اخوج 

    سحبت خشمي = الشهاده لله عمو عاصف كلش مداري 

    داليا باابتسامه // عاصف حلو اسمه وغريب 

  = اي سالته ايكلي صرت بيوم مطر وعاصفه وهوا لذلك سمو عاصف

ابتسمت // اي لعد اطمني ما دامه داير باله على اخوج لا تخافيين

   = اني ما اخاف من عمو عاصف اخاف من بهاء ينتقم منه او عن طريقه يضغط عليه ارجع اله

     داليا // ليش اخوج مو عد عمج وبيبيتج ؟

هزيت راسي =بلي 

   حركت اصبعها // لعد شلون. يضغط عليج ؟

     = همه اخاف منهم همه 

  - هلكد ماذينج ؟ 

  هزيت راسي = لا خصوصا. عمو رغم قساوته ويه الكل بس وياي ويه اخويه لا 

   داليا // يعني زين وياكم ؟

   = كولش زين بس اني بعد ما عندي ثقه لان الي شفته من بهاء. ماخلاني اثق بااقرب الناس الي 

حكت حنجها ولملمت حلكها // شوفي وجدان اني ما اكلج لا تخافيين على اخوج خصوصا من بهاء وخصوصا 

انتي تكولين همه عشاىر وطبعا انو انتي تنهزمين هذا الشي ما وارد اني اكدر. اتحرك من اليوم واضغط على بهاء 

  ايطلكج بس بالبدايه اريد اطمن عليج واامن محد يوصلج اقلها الى ان نكسب الحكم القطعي فخلي اكولج حتى 

لو اخوج الزغير راح يتاذى هو هم لازم يتحمل والج عليه. اني راح اجيبه الج هسه تجي الطبيبه وتطلعين وبوجهنه. 

للمحكمه اتسويلي وكاله همزين جبتي جنسيتج ولو نحتاج بطاقة سكن لكن مو مشكله هاي كولها سهله

اجتي الطبيبه وسالتني. // اشلونج هسه 

   = بعدني دايخه ودوار 

   هزت راسها وهي تفتح بعيوني // اي طبعا من كد الدم الي وكع منج انتي ما مراجعه سابقا ع. الحمل 

    = لا دكتوره ما مراجعه 

    - - تمام 

  صارت تكتب بعدها باوعت الداليا وكالت. // هذا العلاج اتصرفونه من الصيدليه البره على حسابكم ولازم اتابعوها بالاكل. 

وهماتين ضروري تراجع طبيبه 

   داليا بابتسامه // ان شاالله يعني نكدر. نطلعها اليوم

  - - اي طلعوها بس الالتزام بالعلاج بوقته وضروري الابر تاخذهن ولازم تاكل زين 

  - - ان شاالله دكتوره ويجوز نحتاجج بالشهاده بعد انتي شفتي حالتها 

    - - اي. اكيد اني حاضره 

   - - ممنونه دكتوره هذا رقمي سيفي يمج

اباوع الداليا ما شاء الله بنيه كلها حيويه وعرفت هذا الشي. لان شقت طريقها وحصلت ع الشهاده الي صارت 

الها سلاح الشهاده الي. انحرمت منها بسبب. نذالة وحقارة غزوان وانتقام بهاء 

انطتني داليا ملابس جايبتهن وياها لبستهن وطلعت واخذتني للمحكمه. سويت وكاله بوكتها كلش تعبت 

وهمه من شافوني هالشكل وبحكم. معرفتهم بداليا ساعدوني بعدها رحنا للمشتمل مالتهم مشتمل بطابق ثاني 

  درجه ابحد عباره عن غرفه ومطبخ وصاله. وصحيات واكو باب هذا يتصل ابيت داليا 

    داليا قفلته وانطتني المفتاح وكالت / / راح تگعدين اهنا واني. حجيبلج فراش وشوية حاجات وهذا المفتاح عندج 

من نريد اني او منار او ماما نجي ندخل منا يعني بمثابة باب داخلي

اتشكرتها وهي راحت جابت بساط. وجودليه ومخده وبطانيات اثنين وجابت قوري وكلاص وشكر وجاي وشويه 

فواكه وخضر وصمونات وكالت هذني تصبيره والغدا والعشا من يمنا 

  = لا لتزاحمون نفسكم اني ادبر حالي 

داليا // شلون وبيش تدبرين حالج ممنوع تتحركين من فراشج وهم ممنوع اتطلعين كل شي يصير يجون البغداد 

يشوفوج واني اريد افاجئهم اسمعيني وجدان اهم شي السريه وتسمعين الكلام ما اريد نتفاجا بشي احنه. ما حاسبيله حساب 

//////. //////// . ///////.

عاصف 

چنت كاعد بالصاله واجت يمي الحجيه الصبح تقريبا الساعه بالتسعه بيومها رحت شفت البستان ومريت ع الفلاليح 

ورجعت كعدت بالصاله طلبت من رجاء اتسويلي ريوك اكلت شويه وامي اتگلي 

يمه اتريك 

كحيت ودخنت جكاره حاچيتها ابرود :: حجيه ما اشتهي 

   حركت ايدها // اشوفك هالكاضي

   ما رديت عليها دخل بهاء علينه وجهه ما يتفسر استغربت جيته بدون ما يسلم كلي // تعال عاصف رايدك 

دخل الغرفة امي وانا لحكته وامي اجت ورانه هو سد الباب ورد السركي وهو يباوع امي سالته 

  • ها جده شبيك 

بلع ريكه وگال // وجدان اجت لهنا ؟

استغربنه جاوبته :: شني 

الحجيه // وجدان ياهو جابها ؟

هو اتنفس بعمق وگال // وجدان شردت صبحت ماكو 

  اتقربت منه بخوف واردد بكلامه :: شني. شردت شني صبحت ماكو 

  هز راسه // اخذتها للمستشفى ومناك شردت 

   :: يمته وشبيها ؟

  • ما ادري اخذتها وكالو لازم تنام رووح جيب جنسيتها وعقد الزواج خليت جنسيتي يمهم ورحت للبيت ما لكيت جنسيتها 

امي // شسويت بالفرخه 

• جده ما سويت بيها شي هي نزفت واخذتها للطبيب 

   امي باستهزاء وصوت ناصي // ها نزفت البت جان كل شي ما بيها بس وصلت البيتك نزفت 

لزمته من ياخته وانا اصك على اسناني :: البت وين وين وديتها 

  • عمي وين وديتها هي شردت شني مشردها

  جاوبته بعصبيه وانا احس گلبي يريد يطلع ::البت عدك ابيتك انت رجلها والبارحه يمنه ( درت على امي ) يمه شحاجتج شگلتلج 

  هزت راسها // ما كالت شي ساكته حتى من ردتها اتبات يمي وهو ما رضى هي سكتت وراحت ويا

   لزمته من زنده :... امشي 

    بهاء//. وين ؟

   :: امشي ( حچييت ويه امي ) وانتي يمه لاتجيبين طاري الكل احد ابد اي شي يسالونج علي گولي بهاء متعارك بالشغل 

امي وهي تخرط بخدها // تزين راسنا يمه المن اجيب طاري 

    عضيت على شفتي :: حجيه على كيفج ضغطج مو زين عليج ياالله 

طلعنا وانا اسوق بجنون واحچي ويه نفسي :: وين راحت وليش ؟

وصلت للمستشفى ودوني ع الردهه وهناك كالو هي طلعت بدون محد يدري بيها بحجة تشتري وراحت ما رجعت 

ومن سالت الطبيبه كالو جانت تنزف بقوه واخذت ابره شويه وقف النزف وانو زوجها گال هي طايحه من الدرج 

زالكه وطايحه 

طلعت وانا اعض على شفتي من الغيض سالته بعصبيه :: وين بيتك ؟

هوباوعلي رجعت سالته :: بيتك المخليها بي وينه 

   • ليش ؟

  :: اريد اشوفه وادور حوالي 

   • وين اتدور شيجيبها 

   ركبت بالسياره :: امشينه

رحت البيت بهاء وبالطريق احس الهوى انگطع عني وصلنه باوعتله :: اهنا هذا بيتك 

هز راسه بدون ما يجاوب 

  :: وليش كل هذا اخذتها حتى تدولبها 

    - ليش مدولبها بيت ومسواك يوصلها 

   هزيت راسي :: اي وتلث تشهر لو ما انا اگلك حبوبتها مريضه ما جبتها 

    بهاء// انا بكيفي مرتي وبكيفي 

   :: اي بكيفك اذا گايم بواجبها اذا مخليلها حجره واثاث اذا تجيبها تشوف اهلها اذا مداريها ( وصلت يمه ) 

   :: شوف ولك ما ردت اسويها مشكله وننفضح كلنه البت ترد البيت جدها تلگاها ما تجيس شعره منها 

تجيبها اليه ما ادري شلون وانا اتباصر بيها ما حچيت گدام امي مره مريضه والحبايب من يسمعن ما يرحمن 

    بهاء بعصبيه // بس خلي الگاها اله اسويها فرجه الامة محمد 

   :: هاي. التريد تسويها فرجه الامة محمد مرتك وبت عمك مثل ما ساره مرتك وبت عمك وحجايه زايده ناقصه لا تحچيها

      - تغدي فدوه الساره 

    :: محد ضربك على ايدك جان خليتها وظليت على مرتك 

        بهاء وهو يحرك ادينه // شو انت تدافع الها قابل ع السوته شنو 

    هزيت راسي :: لا ما قابل واعرف شلون تحجي انا من اكضها اذبحها بس اول شي اعرف ليش سوت هالشكل 

    رفعت اچتافه // ما ادري هذا الشي تساله الها من تلكاها 

    :: لا. اساله الك البنيه اربع سنين عدنا ما بيوم غلطت ولا سوت شي موزين ( اتقربت يمه وصرت اضرب صدره بااصبعي ) 

:: عدك تلث تشهر شنو صار شنو جرى ما ندري فمن تحچي وياي اعرف شلون تحجي انا رايح واذا ما الكاها انت 

يابهاء غريمي البت عدك وين راحت شسويت بيها ما ندري ومثل ما انت ابن بدر هي بت سعدي

خليته وطلعت وانا ما اشوف بعيوني واسال بروحي :: وين شردت وليش 

رجعت الامي الي شفتها مخطوف لونها وعلى نفس كعدتها دخلت. شافتني سالتني // ها يمه 

   جاوبتها بعصبيه :: شها ما تكليلي شها البت شارده من غبشه من المستشفى 

    • شبيها ؟

    :: تنزف

هزت راسها // هو طرحها 

    باوعت الها :: ها تدرين بي 

عضت جف ايدها // الصار صار ياوسفه 

  :: اي صار بس هي وين راحت وعدمن وين ندور عليها شنكول للعالم وشراح تحچي الناس عليها 

    - على كيفك عاصف 

       حجييت بعصبيه اكثر :: كله من ابن ابنج وكله منج انتي كله منج

طلعت ما طايق ابقى صرت افتر بالشوارع واحجي :: وين رحتي عدمن يجوز راحت البغداد 

وكفت السياره ونزلت والجكاره بحلكي واحجي :: راحت البغداد وين تندل ( هزيت راسي ) :: اي تندل بيتهم يجوز 

راحت البيت ابو احسان

ركبت السياره وسقتها وانا ابالي شي واحد انو بلكي الگاها عد بيت ابو احسان ما راح اوصف الكم حالي حتى ماي 

ما شربت ولا وكفت الى ان وصلت بالليل دكيت الباب وهاي اول مره اسويها انقتح الباب بدون ما يسال 

   - - هلا عاصف 

  :: السلام عليكم 

   اتسالمت ويا - - عليكم السلام هلا بيك اتفضل اتفضل 

   :: اشلونك ابو احسان 

  - - حياك الله زارتنا البركه اتفضل 

دخلت للبيت وفتحولي الاستقبال وهو يكول // اهلا وسهلا شعجب اجينه على بالك

  ابتسمت :: والله انتو دووم ع البال بس مشاغل ياخويه انتو شلونكم الاولاد ان شاالله بخير 

  - - الحمد لله

وگف طلع وهو يحجي // ام احسان تعاي شوفي منو اجانه عاصف 

دقايق مرت واجت ام احسان لابسه العبايه الاسلاميه وشالها على شعرها وهي تگول 

   - - هلا بيك خويه كول الهلا اشلونكم شخباركم 

  وگفت :: الحمد لله انتي شلونج 

   - - استريح دادا هلا بيك شنو هالغيبه حتى ما تسالون 

    :: مشاغل 

   - - شلونها وجدان وعلاوي 

ابتسمت وهزيت راسي :: الحمد لله زينين 

- - بالدراسه اشلونهم هي سادس مو ؟

هزيت راسي :: ايي سادس 

   رفعت ايدها بالدعاء// الله يوفقها لو جايبها وياك نشوفها

    ابتسمت :: بعد ملتهيه بدراستها 

  - - وعلاوي شلون صار ؟ 

  :: الحمد لله ( وگفت ) ابو احسان كلي //. اشو وكفت هاي وين 

  :: مريت اسلم واشوفكم 

ام احسان // لا هاي مو طلعه تبقى ع العشا 

   :: دايم البيت واهله بس عدي شغل ومريت من يمكم گلت اسلم 

ابو احسان // انت شتحچي ابقى اهنا والشغل ملحوك علي 

:: يمعودين هذا بيتي قابل تعزموني علي

ابو احسان //. لا ما نعزمك بيتك بس النه عتب شكم مره بمره تجي للبيت وما تمر علينه 

     :: حقكم بس هم تدرون بيه ما الحك ان شاالله ع الجايات اجي واتعشى 

         ام احسان /. امانه دادا مره لخ من تجي جيب وجدان وعلاوي اشوفهم 

    :: ان شاالله مره ثانيه ا جيبهم واجي ونتغدا ونتعشى

       ابو احسان // تشرفونه 

    :: يشرف مقداركم فيمان الله 

   - - الله وياك

  عرفت هي ما جايتهم وهمه ما عدهم اي خبر على غيابها ما كدرت احچي طلعت من بيتهم بخيبة امل 

حتى ما مريت بالبيت رحت للكاظميه زرت ابو الجوادين وهناك نزلن دموعي الي كنت حابسهن نزلن على 

الامانه والكرامه نزلن على البنيه الي ما اعرف وين راحت والي من الگاها ما راح ارحمها 

صرت امرر باصبعي على حلكي واعض بي واحچي :: ولج وجدان بس الزمج انهييج من الحياة كلها 

بس قبلها خلي الكاج واعرف منج ليش هالشكل سويتي

رجعت وانا ما طايق نفسي يمكن وصلت الساعه بالثنتين ونص بعد نص الليل ودخلت كبل للغرفه سبحت واتمددت 

حسيت على باب غرفتي يندك وامي اتكلي // عاصف كاعد 

اتنفست :: فوتي يمه 

   دخلت وسدت الباب وراها وتحجي // ها يمه الله يساعدك 

   :: هلا بيج حجيه 

  - بشر 

    جاوبتها باستهزاء ومراره :: شبشر شني شدري شعرف افتر مثل المسودن ورديت كل شي ما حصلت 

    

  امي //. اگلك يمه خاف انباكت 

    :: شني ؟

    - - اكول انخطفت 

     نفخت :: يمه البنيه تنزف وما بحالها شي محد يعرفها ومو زغيره وتنخطف 

   • ها ؟

   هزيت راسي :: اي نشدت ابو الكفتريا وسولفلي برجلها راحت للسياره واجرتها 

• ما عرفت المن اجرتها وين مشت ؟

    :: لا ابو الكفتريا ما منتبه للسايق ياهو 

     • وين راحت شتندل هاي شردت من الدولاب

رفعت وجهي هي هزت راسها // من اجت بالليل الفرخه شبعانه ضيم وجوع 

   اتنفست وغمضت عيوني امي تحچي // اخذها لدالي ينومسها طلع ماخذها اموتها من ا لجوع والضيم 

    :: بعدهذا الحجي ما يفيد البت شردت واحنه تكبعنا بالعار 

    - يمه وداعتك كلبي بارد هسه نلكاها 

:: وين حجيه وين نلكاها

   رفعت ايدها بالدعاء وتحچي بعبره // ان شا الله نلكاها 

   ما صبرت بچت سالتها :: بجيتي عليمن ؟

     • ااخ يايمه كلبي مفحم ما دريت هيج يصير 

    :: حجيه ما اريد احد يدري 

   - - شلوون محد يدري وشچم دووب 

   :: بلكت بهاليومين خبر. علم 

  - - الله كريم بس هذا بهاء شيسكته  

   جاوبتها بعصبيه // يسكت غصبا ما علي شني عبالج من اكضها ابري لا وداعتج ما ابري بس هسه انا ساكت بلكت 

تبين تجي وذاك الوكت اول ما احاسبه وتالي اشوفها 

   امي مسحت دموعها // نام يمه نام وارتاح

طلعت وانا احجي ويه روحي :: منين يجيني. النوم والراحه وبت ابنج كبعتنا بالعار مثل ابوها 

صرت هاي الايام بس افتر بالسياره افتر. بالشوارع عبالك اصادفها بعدين. قررت اسال عليها. يعني مو اسال عليها 

ناس بالشارع لو ادك بيبان لا گلت :: ما دامها من طلعت من المستشفى طلعت تنزف ف اكيد الكاها بمستشفى 

     هزيت ايدي :: شني ادور عليها بالمستشفيات 

هزيت راسي :: اي لو ادري ادور عليها مستشفيات العراق كلها 

       صار هذا رايي وبهاء ما شفته وحتى ما صار يجي البيته وانا ولا اخابره 

المهم وره اربع تيام من اختفاىها جنت افتر بالسياره واسال تقريبا الساعه بالثنتين الظهر واتصل عليه رقم غريب راسا.جاوبت

الفصل التاسع والثلاثون من هنا