رواية بنات سهر الفصل الثالث بقلم فراقد حسن علي
راح اعرض عيوني اليوم للبيع
وابيع بنص سعر لليشتريها
بعد فرگاك ما أحتاج العيون
عين الما تشوفك شلّي بيها!!!
===================
مسرة / ااااخ كلمات خاله أم عمر كانت أرماح النه
تملخت أرواحنا وكلوبنا على ماما ،،
على صوت عياطنا وبجينا ألتموا الجيران علينا
وأم عمر دزت أبنها فؤاد على الجامع
راح جاب نعش وأجى
وهي وأولادها ورجلها لفوا ماما بالبطانية
وخلوها بالنعش وأخذوها للمستشفى
كالت /يطلعون الها شهادة وفاة
أني تذكرت كلام ماما
اتصلت الصبح على خالتها فاطمة ماترد عليه ،،
بقوا الجيران يجون علينا
دخت وفترت الكاع بيه
اني شايفة فاتحة بابا ومحمد قبل
وفاتحة زوجي
بس ابد ما شايفتهم من هم ميتين
يعني ما شفتهم من ماتوا
ولا مريت بلحظات موتهم
للظهر يلا رجعوا بيت جارتنا ام عمر
سولفت هي جارتنا كدام النسوان
كم وحدة بقن
وكالت /اخذناها المرحومة للمستشفى
وكملنا إجراءات شهادة الوفاة
والطبيب كال/ سبب الوفاة سكته قلبيه ؟!
واخذناها مناك للمغتسل
واني وكنتي أية زوجة احمد
محلله وموهوبة ومبرية الذمة
غسلناها وكفناها
بس واحد من الأرقام
جاوبني رجال وكان نايم ساعة يلا أفتهم عليه
وكالي /هسة اخلي الحجية تتصل عليج
عاد صدك رجعت خالتي فاطمه اتصلت عليه
ومن سمعت جارتنا ام عمر الكلام
كالت / بين ماتجي خالتها هاي وصيتها للمرحومة
خالتها وأولادها يدفنوها،،
وأنتن حرام عليجن
لمستن أمجن وهي متوفيه
ادخلن أغسلن غسل لمس الميت
ترى تنجسن الناس
واقرن على نعشها قران
بين مااني هم اروح اغسل وارد عليجن تكون خالتها وصلت
أحنا هم وحدة وره الثانية دخلنا غسلنا
والله حتى مانعرف شنو غسل لمس الميت
غسلنا نفس ترتيب غسل الحيض بس بنيه الغسل من لمس الميت
الجيران اصلا للعصر محد بقى يمنا
وصدك على كلامها غسلنا
وكعدنا نقرة قران يم نعش ماما
والباب تكسرت ما فتحناها عبالنا الجيران
بس من دك رقم خالتي فاطمة جاوبتها
حاجاني رجال واني تخربطت من المستحى
حتى بعد مااعرف شكول وشرد عليه !!
من بعد الجرى والصار
ودعنا ماما وبريناها الذمة
واخذوها الرياجيل الدار حقها ،
راحت أرواحنا وراها
وعمت عيونا عليها من البجي
خالتي فاطمة ماقبلت نروح ويه ماما للدفن
كالت / مو زين عليجن تفوتن للمقبرة بليل
أنتن بنات تلبسجن التابعه
وبقت تصبر بينا ،
وتندعي لماما بالرحمة
وحشمت البنات يلمن هدومنا
تريد تاخذنا وياها لبيتها !!!!
أحنا هنا وحدتنا ماكو عقل براسها
من اثر صدمة فراك ماما
حتى ما ناقشت خالتي فاطمة
عود ليش مانبقى بالبيت ونسوي عزة لماما!!!!
كمت الملم بغراضنا واني تايهة الفكر
كل شور وعقل وتفكير ماعندي
وخالتي فاطمة خبصتني،، خفي ايدج
خل نمشي لبيتنا وتكونن تحت حماية منتصر
لا يجيجن الروج وتنذبحن وانتن مالجن ذنب !!!!
سألتها / خاله منو يذبحنا ؟؟
وليش أحنا شمسوين ؟؟
جاوبتني وهي تحاجي أبنها بتلفون واكف بالطرمة
وتكول / كملنا يمه همام روح جيبلنا سيارة
باوعت علية وكالت / وراجن دفع دم الثار !!!
يبنات عدنان الله يستر عليجن .........
دخت من كلامها شنو دفع دم الثار ؟؟
شنو بحماية منتصر ؟؟
شنو يجينا الروج ؟؟؟
وليش ننذ بح ؟؟؟
ومنو يذب حنا ؟؟
وبقيت أفتر بالغرفة واجمع بغراضنا
وأسولف ويه روحي ،،
لان عافتني خالتي فاطمة وطلعت بره للصاله
كعدت يم النسوان موجودات كم وحدة من الجيران
ماكو دقايق وأبنها صاح / حجية يلا نتوكل
السيارة بالباب
وهي خالتي فاطمة سلمت وتشكرت من النسوان
على حضورهن ووكفتهن ويانه
وكامت تعتعت بسوار
عاندت متقبل تروح ويانه لبيتهم
سوار تخاف لان فقدت ماما
وتخاف لا هم واحد يعيرها بتشوهها
عاد اني وأساور كومناها بالكوة وطلعناها برة بالطرمة
وهي غطت وجهه بالشال حتى محد يباوع عليها
اني والشاب همام
قفلنا باب الصاله بزنجيل وقفل جبير
وباب البيت الخارجية
اني وخواتي طكينا من البجي
اني أقفل بالبوب وأنحب وأبجي
مانعرف وين رايحات وشنو مصيرنا
طريقنا مجهول ويه ناس غربه .....
(((يـا دار الأهـل يـا دار حـزنـانه اعله فركاهم
شـالـوا ويـن كـلـيلـي أهلنه وين نلكاهم
شـالـوا يـا بلد عـنج أهلنه وين منواهم
و آنـه إمـدوهـنه و أبجي حرمه و ما إلي والي )))
صعدنا بالسيارة وكعدنا حشك وحده بحظن الثانيه
أحنا ثلاثتنا وخالتي فاطمة رابعتنا
سوار كعدت بحظني كسرت رجليه
والسايق الله يغفر ذنبه
تشوفنا معزايات وننحب
ليش عيونك ما نزلتها من المراية
مااعرف هيج البشر عيونه فارغة
ومايردعة حتى الموت !!
أنا كل أعتقادي خالتي فاطمة صدك خياطه
وعبالي حالتهم تعبانه
لان ماما كاتبه على رقمها
فاطمة الخياطة !!!!
صلوات على النبي من وصلنا لبيتهم
طلع قصر مو بيت عادي
يمكن مساحته الف متر قليل
والبناء حديث وراقي ،
اني بقيت أصلي على النبي بداخلي
واقرة المعوذات أخاف أحسد العالم
وتروح حسناتي ،،
يعني طرمتهم يمكن تأخذ أربعة سيارات
والحديقة مساحتها اكبر من بيتنا
على طول الطرمة تصير على الجهه اليسرى من دخول البيت
دخلنا جوة وخالتي فاطمة تمشي كدامنا والشاب همام
هو الشال جنطة هدومنا ودخلها جوة
واجهت البيت بيها أثنين أبواب ضخمة
دخلنا وره خالتي طلع هذا مطبخ كلش راقي
الصراحة أستحيت واحد ينتبه عليه شلون اباوع
على الغراض الموجودة بي
حتى تخم قنفات جلد اسود بي
وميز طعام رئاسي ،،
وشاشة عرض بدل التلفزيون
بقيت أتلفت وأباوع
شو المطبخ صاير مطبخين واحد بصف الثاني !
يالله فد أستحيت بقيت مبهورة وأباوع
على كبر المكان
وفخامة الغراض
وتصميم البناء
اللهم يرزقهم ويرزق أمة محمد من اوسع أبوابه
كعدنا اني وخواتي على التخم الجلد بالمطبخ
المكان كلش دافي
وخالتي فاطمة شمرت عبايتها على الكرسي
وصاحت / لمى يمة وينج تعالي أجاج خطار
دخلت علينا بنيه شابه
هلكد حلوة ومربربة
لابسة تراك ماروني قديفة
تنطي شبة للممثلة السوريه
ديمة الجندي (الممثلة زهرة بمسلسل باب الحارة )
وعبالك تعرفنا
بس خالتي فاطمة كالتلها / هذن البنات خواتج
بنات سهر بت خالتج مهجة
هي تقدمت علينا وبوستنا اني وأساور
ورحبت بينا
وعزتنا بمصابنا بفقدان ماما
وراحت للمطبخ الثاني ورجعت بيدها
جاي وكعك قدمتلنا وكعدت يمنا
هي أنتبهت سوار مغطية وجهه بالشال
حسيتها تريد تكسر علينا جو الغربة والمستحة
حجت وية سوار باأسلوب كلش حلو
بس ماضحكت تراعي مشاعرنا
لمى /داده ليش لابسة بوشيه ومغطية وجهج؟؟؟؟
اكيد حلوة مثل خواتج وتخافين نحسدج عمي لا تخافين أحنا ناس عيونا بارده مانحسد بس الكلبة وسخ والمليان حقد وغيرة !!!
خالتي فاطمة هم حجت على سوار
وكالتلها / يمه أنزعي الشال عن وجهج
ماكو احد من الولد موجود خافنج محجبة همام طلع لبيت عمة
سوار متقبل تنزع الشال
عاد أني كمت وسحبته عن وجهه
وهي بس تشهك وتبجي
خالتي فاطمة ولمى صفنن بوجهه ....
سوار/السلام عليكم ورحمة الله وبركاتة
أسمي / سوار عدنان
عمري هنا بوفاة ماما هستوني دخلت بعمر ال ١٥
حجتلكم أختي مسرة ألجبيرة عن حياتنا
قبل شلون جانت حلوة
وأتوقع وضحت عدكم صورة حياتنا
قبل بوجود ماما وبابا شلون جنا مرتاحين
بس شفنه الضيم من بعد فراكهم
وهذا الضيم المر علينا
راح تعرفوا من خلال قصتنا
أندعولنا بالقوة والصبر
أني مصيبتي أستحي وأحس بالنقص وأنقهر
اذا واحد باوع بوجهي
وصفن على التشوة النولدت بي
عيوني تك وتك الوانها
وحدة لونها عسلي والثاني أزرك
وياهو اليشوفني يصفن بوجهي
يستغرب لفرق اللون بعيونيِّ
وجانن البنات الصغار يعيبن عليه
ويصيحن عليه العمية
لو أم عيون البزونه
لو يضحكن عليه ويكللي هم تشوفين مثلنا
وأني أصركع من هذا الحجي
وأبقى أبجي وأحبس روحي بالغرفة والله أحس صارت بيه عقدة وحاله نفسيه من ورة هذا التشوه
هنا بيت خالتي فاطمة
بتهم لمى مبينه حبابة هي وخالتي ،،
من مسرة جرت الشال عن وجهي
وهن صفنن عليه بجيت بقهر
هم مقهورة على فراك ماما
وهم أنقهر اذا واحد صفن بوجهي
خليت ايدي على وجهي وضميته عنهن
وكمت أبجي بصوت عالي
مسرة حظنتني وبقت تسكت بيه
عرفت ليش أنقهرت
سمعت لمى كالت / ما شاء الله
صلوات على النبي
عيونج يجنن هنيالج بدون حسد
أتمنيت عيوني نفس عيونج
والله الا أفت بيهن كلب حيدر خطيبي
أني سمعتها هيج كالت ومدحت عيوني
فرحت بداخلي ،،
باوعت عليها وكتلها /صدك تشوفين عيوني حلوة ؟!
أبتسمت وكالت / ولج عيونج يخبلن
اول مرة أشوف بنيه نص وجهه عيون
ولونهن يخبل والرموش طاخات بالحاجب
عمي هنياله الياخذج ويصبح بعيونج هذا امه داعيتله
التفت هي على خالتي
وكالت /اكلج يوم ما تخطبيها لخطيبي حيدر وتخلصيني من عنده !!!!
خالتي هزت ايدها وكالتلها / ماكو فايده وياج
اكلج وين حسين وهذيج المكموعه ؟!
كامت لمى وكالت /حسين بالصالة عفته غافي
اكوم أكعدة الدنيا مغرب
وهذيج العوجة بالسطح
تسولف ويه بت خالها من ورة الحايط .
وراحت تمشي للصاله
عاد هو كال / السلام عليكم
أنا أخوجن الصغير حسين
لا تستحن سلمن عليه
ترى اني اعمى مااشوف ماحاسنجن !!!
خالتي ضحكت وكالت / من فلك صاب سوالفك
ولك منين أجيب هاي السوالف ؟؟
هو ضحك وكال / يوم تربات عمي طارق أعجبج أنا
لمى هزت أيدها وكالت /لا ربحنا ما دامك تربات طارق
هو رجع وكال / بويه شلون تسلمن عليه لو تفشلني ؟
مسرة اخذت ايدة وسلمت عليه
وبعدين اني
وبعدين أساور
سألت خالتي /صدك هذا الولد اعمى وما يشوف
شو عيونه كلشي مابيهن ؟؟
هو جاوبني / اي انا أعمى من اجيت من بطن امي
عساس من جانت حامل بيه
تشرب حب وتريد توكعني
لان متعاركة هي وأبويه منتصر
وهاي الحبوب أثرت علية
وطلعت بعيني أوعية دموية مو طبيعية رقيقة
وصار بيها نزف من أجيت للدنيا
وخلوني الاطباء بالحاضنه
وبسبب قوة الأوكسجين أو قوة الضوة بيها
صار عندي نزيف بالشبكية وتلف
وبعدين صار عندي انفصال الشبكية
وصرت اعمى !!!!
ما يفيدني بعد اي علاج لو عملية
2
بقينا أني وخواتي صافنات عليه
شلون يحجي ويسولف جنه واحد جبير
هز راسة وكال / لا ليش أضوج
اني أحسن منكم أنتم التشوفون
أبوية منتصر يكول
.أول شي كل الذنوب والسيئات تجي من الشوف
.ورب العالمين عوضني بالذكاء وقوة الحفظ
.وأسمع أحسن من عدكم
مو صحيح عمه لمى ؟؟
هي لمى جعصته بحظنها وبقت تبوس بي
وتكله / انت وين أكو أذكى واشطر منك
وانوب صاير شيطان تربات طارق وهمام ولك اطلع مؤدب على أبوك
هو يضحك ويكلها / أبويه فقير ما يدور حاتات
خالتي فاطمة ضربته خفيف على جتفه
وكالتله / عيب هاي السوالف الزم السانك بعد مااخليك تطلع وياهم
هنا دخلت علينا بنيه سمينه وقصيره ولبسها خزي لاطش عليها
عود لابسة تراك سمائي أبو الكبوس
أحنا لا نعرفها ولا تعرفنا من دخلت للمطبخ هزيت أيدها وكالت / ها هذني بنات الساقطة !!!!
وحدتنا ذبحتها الغصة
وماكدرنا نردها لو نحجي شي وياها بس خالتي فاطمة ولمى بلشن بيها رزايل وكامن يحجن عليها
ولمى حلفت بروح أبوها
بس يجي منتصر تكله على سالفة بنته الأدبسزز
مسرة /
خالتي فاطمة كالت / كومن يمة أنزعن ألعبي
وأختجن لمى وياجن أتدليجن على الحمام
كومن توضن وصلن صلاتجن
وصلن وياجن صلاة الوحشة لأمجن
أخذتنا لمى لداخل البيت صلوات على النبي بيتهم راقي
وبنائه فخم وحديث
وكلشي بي حلو
من المطبخ طلعنا على الصاله
كلش جبيرة وشكلها دائري ،
وكل تقاسيم البيت تتوزع من خلالها
طلعنا بوجهنا على تقسيم بشكل باب مقوسة
كلش ضخمة،،
من دخلنا بالكلدور على اليسرى حمام ملكي
يمكن بكبر بيتنا ،،
وهذا الكلدور أحنا واكفين بي
بي مغسلة على عرضه من المرمر يعني ٣ أحواض مغاسل بالطرف شكلهن دائري والوسط مستطيله
والمرايا أثنين بالطرف كلش كبار
وعلى اليمنى غرفة
كالت لمى / هذا جناح أمي أخذوا راحتكم بي
من يجي همام أبلغه ما يوصل هنا
الصراحة وبدون كذب
بقينا نمشي ونتلفت ونباوع على البيت
صلوات على النبي يبهر
يعني الواحد يتخيل نفسة داخل ب فله خليجية
بدبي لو بغير دولة راقية
دخلنا الغرفة خالتي
لكينا جنطة هدومنا موجودة
طلعت اليه والخواتي عبايات أسلامية
لونهن أسود وياهن ربطاتهن هم لون اسود
أحنا اصلا بقينا
حزانا على بابا ومحمد الله يرحمهم
من بعدهم ابد ما لبسنا الألوان
عود أني من أنخطبت وتزوجت ماما نزعتني الاسود
وهم رجعت لبسته على زوجي الله يرحمه
وأحنا أصلا لبسنا حجاب أسلامي كامل من نطلع
يعني عباية راس وجواها جبه وربطه نتحنك بيها
ماما علمتنا على الستر
يعني اذا موجود رجال غريب حتى جواريب نلبس ولبسنا عريض وراهي علينا
أهنا بيت خالتي خو ما نبقى بعباية الراس
كلت الخواتي البسن العباية الإسلامية فوك الدشداشة
اخذت ملابسي ودخلت للحمام
هم أخذتلي صفنه على البانيو
شلون حلو تصميمة ومكانه
وعلى الحمام البي دوش شلون صاير
بغرفة زجاجية معزولة ،
وبجهه اكو مكان مخصص لنزع الملابس مفروش الكاع مالته سجادة مستطيلة
وموجود عليها كرسي والعفو نعال طبي وتعاليك للملابس
والعفو بالزاوية البعيدة موجود التواليت شرقي وغربي
والمغسلة صغيرة أم الخزانة الطلاقتين قريبه علية
وفوكاها مراية دائرية الشكل ،،
واكو رفوف ثلاثة بصفها كلش حلوات
عليهن اشكال والوان الغسول والصابون والشامبوات
استخدمت الحمام واني صافنه على كلشي
واكول لنفسي صدك هذوله الناس عراقيين
وعايشين بغداد !!!
بيتهم ولبسهم وغراضهم
محسوبين على الخليج مو علينا هلكد ما راقين
طلعت توضيت ورجعت الغرفة خالتي
لكيت لمى موجوده
وكاعدة تصلي هي وخالتي يم خواتي
وجايبه النا سجادات للصلاة
أحنا منصلي على تربه
لان ماما متصلي على تربة
بس بابا لا جان يصلي عليها
اساور ،، وسوار
لكيتهن متوضيات وكاعدات يصلن
وأني هم بديت بصلاتي
بس شنو أمسح دمعة تسيح عشرة بدالها
شلون هسه بماما وغربتها وحشتها
وظلمة وضقة القبر عليها وهي وحدها
دعيتلها من صمصوم كلبي
ياربي اجعل قبرها وقبور المسلمين والمسلمات
روضة من رياض الجنة
وانزلهم بمنزل حسن
وأنر ظلمة قبرهم بنور القران
وحب محمد وال بيته الكرام ،
وتغمدهم برحمتك ياارحم الراحمين
شكد مااشهك وأبجي ماترتاح روحي....
وخالتي علمتنا على صلاة الوحشة
وهم صلت هي ولمى ويانه ثواب على روح ماما ، بعدين كعدنا كلنا قرينا قران وهدينا سورة يس
على روحها وأرواح المسلمين والمسلمات
خالتي سألتنا /يمة ليش متصلن على التربة ؟؟
بعدين سألتنا / يمة أنتن تعرفن شنو أصلجن ؟؟
اقصد تعرفن أسم عشيرتجن شنو ؟؟
بعدين سألتنا / يمة أنتن تعرفن شنو أصلجن ؟؟
اقصد تعرفن أسم عشيرتجن شنو ؟؟
شكرا لزيارتكم عالم روايات سكيرهوم
