رواية نهوة عمامي الفصل الثالث 3 بقلم مرج البحر

ساره: ورى كم يوم اجت عمتي اقبال علينه وكالت

اقبال: تعاي نروح للسوك حتى نشتري الحلقات

ساره: ورحت وياها واني اختاريت حلقه كص البقلاوه واني اشتريت حلقه فضه ل سيف حجت 

عمتي اقبال 

اقبال: هسه ناخذ بس الحلقة بعدين نشتري ذهب 

خلي نرجع البيت

سارة اني سكتت خليت رجعت للبيت وامي كالتلها خل يجي سيف علينه بليل حتى يلبسون الحلقات وهيه عمتي اقبال اخذت الحلقات وياها كالت

اقبال: حلقة مالتج وحلقة سيف راح اخذهم البنات يردن يشوفنهن

 سارة : تمام عمه مثل ما تردين 

طلعت عمتي اقبال واخذت الحلقات وياهه 

ورى العشه اجو سيف وامه وابوه بس ناسين الحلقات ما جايبينهن واني جنت بعدني زعلانه على سيف ما احاجيه ومنا نسو الحلقات ضجت حيل ونقهرت لعد همه على شنو جاين 

 حجت امي روحو للصاله انت وياه واتفاهمو لان ما يصير زعل من هسه يله بنيتي روحي انت وخطيبج تفاهموا 

سارة: رحنه اني وسيف كعدنه بالصاله كام يعتذر ويكول

سيف: ساره والله اني دزيت فلوس بيد ياسين الج بس هيه امي ماقبلت وحتى الفلوس هيه اخذتهن وكامت تحجي عليه انت لا من هسه تطلع عينها على الصرف اني ادري بيها هيه بزر دلال ومتعلمات على الصرف بس لازم انت تعلمها على طبعك لا تنطيها على مايها 

سارة: خلص سيف الصار صار ابس اني عندي طلب يمك

 سيف : صار كولي شنو تردين حاضر 

ساره: اريد اكمل مدرسه 

سيف: الله كريم يصير خير

ساره: من طلعنه من الصاله كال لامه ساره تريد تكمل دراستها هيه ما قبلت كالت

اقبال: لا اني مره مريضه اريد وحده تخدمني لو تريد اني اخدمها لا ابد بعد لا تعيدون هذا الحجي

يالله يالله تريد تخلص دراسه

 سارة : بيت اهلي وحجت هذا الحجي واني بس ساكته اهلي ما تدخلو لان كالو راح تصير مشاكل مالها حد وهيه عمتي اقبال جانت هيه مسيطره على عمي وولدها ف الحجي والشور كله الها 

وبعد فتره بناتها اثنين نخطبن شيماء خطبها واحد من البصره ونجلاء خطبها واحد من الناصريه ورى شهر نجلاء قررو يوم العرس مالتها ورحنه بالحنه لبست تنوره سوده وقميص احمر وبدون مكياج طبعن وحتى حفافه ماكو وصارت الحنه ودك وركص اني طبعن ما تحركت من مكاني بس اباوع واصفك وبس رجعنه للبيت وسيف اجاني بليل كال

سيف: ليش ما بقيتي يمنه

 ساره: لا زحمه شلون ابقه يمكم

سيف: ليش غير بيت عمج اقبل لا اكون خطيبج

 سارة: ميخالف سيف احسن هيج واني وبفترت الخطوبه كمت احب سيف 

ورى اسبوعين صار عرس شيماء بس ما سوت حنه لان اهل الولد بالبصره فهمه مسويلها هناك ورى شهر او اقل جنان اخت سلام جابت ولد فعمتي بتول خابرت امي كالتلها اني وحدي خل تجي سارة يمي تساعدني وثاني يوم بالسبعه الصبح ابوي وداني الهم همه بيتهم مسافه قريبه على اهلي ابوي نزلني بالباب مالتهم وشغل السياره وراح اول ما طبيت تلكتني عمتي اقبال 

اقبال: بعد وكت المن جايه لمن خليتيني اخلص شغل البيت كله واني كلت لامج اريدها تجي من وكت 

ساره: عمه صباح الخير ترى الساعه بعدها ما صايره بثمانيه

 اقبال: اي اني متعلمه اخلص شغلي من وكت بس يطلع عمج والولد للشغل اني اكوم للبيت  

ساره: عمه اعذريني ما ادري بيكم تكعدون من وكت

اقبال: يالله روحي اغسلي الملابس تلكينه بالحمام

ساره: صار عمه

 ورحت غسلت الملابس وبعدين ساعدتها بلطبخ طبعن اني كلشي ما اعرف اطبخ والله حتى بيضه ما اعرف اطك لان امي جانت تخاف علينه ما تخلينه نجيس كلشي بس تنضيف اي اعرف ف ساعددها نكعت التمن ومردت الطماطه ولكطت الخضره وهيه طبخت بعدين جنان كعدت رحت سلمت عليها تحمتلها بالسلامه وكالت اريد ريوك كتلها راح اكل لعمتي حتى تسويلج ورحت كتلها كالت

اقبال: انتي سوي 

ساره: عمه ما اعرف والله 

كامت هيه سوتلها وبعدين وقت الضهر اجو عمي والولد من الشغل اني حضرت الاماعين ورحت اصلي من كملت لكيتهم جايين سلمت على عمي والولد وصبينه الغده ومن كملو شلت الاماعين وغسلتهن وسويتلهم جاي وما عجبهم وكتلهم والله ما اعرف اسوي هاي اول مره اسوي جاي بعدين بقينه كاعدين نسولف وبقيت يمهم لليل ورى العشاء سيف عنده سياره كال خل اوصلج

 امه كالت لاخته الزغيره ايات روحي وياهم رحت جبت عبايتي وطلعت لكيتها كاعده بالصدر وسيف كاللها ارجعي اكعدي ورى هيه ما قبلت كالتله امي كالت انتي اكعدي بالصدر 

ساره اني ضحكت وكتله يالله بس فضني خل نروح اريد اسبح وانام نل من الصبح كاعده ومن وصلنه لاهلي نزلت وهوه نزل وياي كال اريد اسلم على بيت عمي ودك الباب وطلع اخوي علي وطب سلم على اهلي وراح 

ثاني يوم هم رحتلهم من الصبح ونفس الروتين من راد سيف بليل يرجعني هم اخته لزكت اله اروح وياكم اني جنت بعدني بالغرفه مال عمي وهوه اجه كال ها ترحين اوصلج كتله اي بس لا تخلي ايات تروح ويانه اريد احاجيك كال تمام وصدك ما خلاها تروح من رجعنه بالطريق اني سالته كتله اريد اعرف مشاعرك من ناحيتي هوه ضحك وكال 

سيف: اذا اكلج احبج راح اجذب عليج اني ما ردت اتزوج ولا ارتبط واني اصلن ما شايفج قبل ومن دريت عندج علاقه وي امير كلت اله احرك كلبه ما دام اجه وعاركني ويكلي سارة الي واني كتله تحلم اعوفها وصارت شغلت اعناد بس من شفتج اكثر من مره وسولفت وياج يعني كمت ارتاحلج وهسه انتي جاوبيني صحيح انتی 

تحبين امیر 

 ساره: لا تسميه حب يمكن تعويد

لان بس هوه كبالي ودائمآ هو يكلي اني احبج بس تصدك اذا اكلك اني كمت احبك وحتى بيني وبين نفسي كمت اقارن بينك انته وامير وعرفت اني ما جنت احب امير الله شاهد عليه ما ادري من يوم العقدنه احس كانما انته صرت النفس مالي والله 

ومن وصلنه لاهلي نزلت وهوه نزل لكيت الباب مفتوح دخلت صاح ساره اوکفي شويه واجه دنك علي وباسني من خدي وكال

سيف: اعتبري الکلام الكلته ما صار اني احبج ساره

ساره : راح سیف خليت ايدي علی وجهي حسيت

بشعور کل حلو بهاي لحضه حبي ل سيف زاد

صادف بعد كم يوم ويبدي رمضان وصار رمضان وصمنه وجان سيف يجينه بليل مرات علاقتنا اني وياه صارت حلو وتفاهمنه 

 صار يوم العيد حسبالي اول ما يجي علينه ماكو خلص اول يوم وما اجه ولا ثاني يوم ولا ثالث يوم رابع يوم اجه من الصبح اني جنت نايمه فوك بالغرفه اجت امل تكعد بيه ولج كومي شوفي من اجه تكلها منو ان شاء الله اجه عزرائيل حتى اخلص من هاي الدنيا كامت تضحك كالت اذا اجه عزرائيل قابل اني اكعدج لو هوه يجيج ولج كومي شلعتي كلبي سيف اجه يريدج ضحكت كتلها والله بعد وكت المن جاي خل ياخذله بعد فد يومين تلاثه ويجي ما انزل هسه لو تنكلب الدنيا وما احس اله مرت عمي كامت تصيح من جوه الدرج عليه وكالت اذا ما تنزلين اصعد اشمرج من فوك انزلي بساع طبعن اني احترم مرت عمي واخاف منه اكثر من امي ههههه نزلت ولكيته واكف بالطرمه اجه يريد يبوسني اني وخرت منه وكتله مزاعلتك ليش صار كم يوم وانت ماكو  

سيف: والله رحنه لكربله اني وجماعتي والبارحه بليل اجيت

ساره: امل واكفه يمنه كالتله اذا جنت بكربله غير تجيبلها وياك هديه كام يضحك كال

سيف: ما اعرف بهاي السوالف 

ساره: طلع عشرة الاف وانطانياها بس ما خذتها وعفته وطبيت للبيت لحكتني امل وكامت تحجي عليه لان فشلته كتلها ويطبه مرض شكو هسه جاي حتى ما كملت نومتي من وراه ضحكت امال وكالت هو انتي زعلانه لان كعدج من الصبح

وفاتت ايام وبقيت فتره زعلانه على سيف ورى كم يوم اجانه وكت الضهر اني جنت اصلي وكال لابوي عمي راح اخذ ساره ويانه اني وامي والبنات للزياره نروح للامام العكار هذا الامام سلام الله عليه يصير حفيد الامام الكاظم اذا واحد ما يعرفه اني كملت صلاة وتغديت وبعدين رحت سبحت ولبست تنوره وقميص ولبست عدسات بس بدون مكياج طبعا لان احنه اهلنه ما يقبلون نخلي من نطلع لان معروفين 

فرحنه زرنه ورجعنه كالت عمتي ابقي يمنه للعشه بقيت يمهم واني كاعده اصلي صلاة المغرب اجه سيف وكف كبالي وكال 

سيف: انزعي العدسات لا يعيونج يعمن 

ساره: ضحكت ما جايبه العلبه مالتهن واذا انزعهن يخربن من اروح للبيت انزعهن 

ورى العشه رجعني للبيت 

مرات ايام واجت عمتي اقبال كالت

 اقبال: يمته تردين نشتري ملابس مال النيشان

 ساره: قبل العرس مو هسه

 اقبال: خوش واسمعوني احنه ما نشتري غرفة اخشاب اني انطيهم غرفتي وفلوس الغرفه اشتريلها بيهن بتوت ذهب 

ساره: اسمع کلامه وساکته وامي كالتلها بكيفكم بعدين كالت 

اقبال: اني راح اجيبلها بس محبس وتراجي غيرهن ماکو 

ساره: اهلي ما قبلو كالولها غير وياهن مداليه شني بس محبس وتراجي 

وراحت ورى فتره هيه جابت الذهب على ذوقها حتى ما خذتني وياها وبهاي الايام ابن خالي قرر يصير العرس مالته اني عمتي اقبال ما قبلت اروح وي اهلي بقيت بلبيت وهمه راحو بقو اسبوع يم بيت جدي ببغداد ورى عرس باسبوعين قررو يصير العرس مالتنه فترت الخطوبه مالتي بقت ستت أشهر وقبل العرس ب اسبوع اجت عمتي اقبال وكالت 

اقبال: تعاي نروح للسوك حتى نشتري ملابس

ساره: رحنه وشترتلي قاط سترى وتنوره كص السمجه لونهن جوزي ودشاديش اثنين ومكياج وسيت ابيض مال نوم وجنطه وشحاطه وشال واحد كلهن صارن بسبعين الف وهوه سيف منطيها ميتين الف وطبعن الباقي تنزله بالجيب لان هيه وحده طماعه بشكل والله عمري كله ما شفت مثل طمعها وعينها الفارغه ورجعت لليت اهلي واجو نسوان جيرانه يشوفن النيشان والله كامن يضحكن بس شنسوي مجبوره اسكت بس اهلي الله شاهد ابد ما قصرو بشي حملوني تحمل وحتى غرفة اخشاب ابوي راد ينطيني واني ما قبلت كتله لا ماريد وقبل الحنه بيوم اخذتني عمتي للصالون حفيت وصبغت شعري اشقر رمادي غامق وصار كلش حلو وحتى البدلات هيه عمتي راحت هيه وبتها اختارتهن وبيوم الحنه مالتي صادفت اهلي عدهم كعده مال شيوخ من غير محافظه فسويت الحنه بيت اهل هجران لان احنه وياهم نفس الشارع واني بالصالون جانن وياي اثنين عرايس فتاخرت ومن رحت لبيت اهل هجران لكيت نص المعازيم رايحين بس صارت حفله حلوه امي جابت ملايه سوت مولد ومتنه تعب بليل بس حطيت راسي على المخده نمت ما حسيت اله ثاني يوم بلتسعه الصبح امل تكعد بيه ولج راح الوكت ام الصالون تريدنه بلعشره كومي خل اسبحج كتلها شنو تسبحيني اني اسبح كالت لا اني اسبحج حتى اجلفج جلف وكمنه نضحك طبعن امل اعتبرها امي مو بت عمي لان دائما تنصحني واني اخذ كلامها وصدك هيه سبحتني ورحنه اني وياها للصالون وبعدين جابونه الغده اني ما اكلت وحتى ريوك اني ما متريكه ورجعوني لبيت اهلي وطب عمي حميد وحده جايب السياره وجاي وهمه هناك ينتضرون وعمي عزام كام يحجي عليه بعدين راح واجت الزفه وصارت كلش حلوه لان اقاربنه كلهم ملتمين وخوالي يقلدون على سيف جان ضعيف كلش ولابس قاط وبنص الزفه وكفت السيارات واحد من خوالي اجه عليه ويريد ينزلني يكل ل سيف حرام هذا الجمال الك راح اخذ بت اختي واشرد وكامو يضحكون وصلنه لبيت عمي وذبحو خروف اول ما طبيت وبعدين جابو جدر بي مي خالتي كالت اضربيه برجلج اني من ضربته جان خالي مدنك يذبح بلخروف واضربه براسه وكام يصيح وكال اني صوجي اذبح الخروف لو اذبحج انتي احسن طيرتي راسي هاي احنه بعدنه بالباب والكل كام يضحك كتله خالو والله ما اشوف ما ادري انته يمي وطبينه وكعدنه شويه على الكراسي وسيف طلع يم الزلم وصبو عشه اني طببوني بالغرفه كمت ارجف خالتي علكت الصوبه حسبالها بردانه اني ارجف من الخوف صار يوم زواجنه 2006/12/8 ورى ساعه تقريبن زفو سيف شو هذا اول ما طب الغرفه

 كال.... 

شكرا لزيارتكم عالم روايات سكيرهوم