رواية نعم أحببتك الفصل الرابع 4 بقلم انين الليل

نزلت الصبح وانا لابسه ملابس الكليه كنت لابسه كيلوت طويل نيلي وقميص ابيض قصير وحذاء عالي أحمر

وشال أحمر وجنطه بيضه ولا بسه 33 سوارات ذهب ناعمات ومحابس اثنين وميداليه زغيره وسبحه طويله ذهب 

بابا اشتراها الي من نجحت من السادس نزلت لكيت امي تصب الريوك رحت على بابا لان البارحه ما شفته بسته 

بخده وانا اكله

= باباتي حبيبي اشتاقيتلك البارحه ما شفتك 

بابا بضحك /ما طول باباتي حبيبي يعني بيها ان 

لملمت حلگي =افه عليك ابو زيوني تره وداعتك كل شي مااريد بس 

بابا /هاي هي مو بيها بس يعني اريد مصرف بعد عليمن كل شي ما ريد وبس تصبغين

+

هزيت راسي =لا هالمرة ما حزرت ابو زين صدگني لان البارحه ما شفتك وا اشتاقيتلك احس من البارحه منماا

ا كعدت ولا سولفت فد شي بكلبي فرغ بعدين ياحبيب گلب بتك هاي الحلوه التخبل 

بابا/:اي اصبغي اصبغي وبعد طلعي الجوهره شرايده بنيتي الحلوه التخبل 

لميت شفايفي وانوب حجيت = حسون حبيبي مو چنك تستهزا بيه 

بابا وهو يضحك /:بثينه حبيبتي كافي لواكه انتي وراج دوام وانا اريد اطلع كولي شتردين تردين مصرف 

ومد ايده على جيبه كمت علي من وره الكرسي وخليت ايدي على ركبته وحلكي يم خده 

=اممم حياتي حسوني يابعد روحي انت كريم واحنه نستاهل ولو عندي وانت الله يخليك الي مامخليني بعازه بس 

مي خالف مقبوله منك ،،،

هز ايده بابا وشالي فلوس وانطاني 

رحت حضنته وبسته بكصته وكتله =شكرا يا احلى أب بالدنيا بس عدي طلب زغيروووني(واحرك باصبعي )

بابا//غردي باالله خلي نسمعه للطلب مالتج 

=بابا اريدتشتريلي سيارة لان أكثر صديقاتي عدهن وانت تقبلها (ااشر على نفسي ) تقبلها انا بت 

حجي حسين على سن ورمح ما عندي سياره ترة واكفه مو صحيح ،،

،،هز ابويه رأسه وضحك وما رد علي طبعا انا انقصفت بس ظليت محافظه على ابتسامتي😄😄😄

وراح يبدل علمود يطلع للشغل

وانا عقجت حلكي وامي هزت ايدها حييل وما جاوبتني وانا صرت اتساءل ويخ نفسي 

=شبيهم وهيج صار بيهم لعد لو طالبه منهم يوافقون اسافر ابحدي يمكن ينامون مستشفى من هوول المفاجاه 

ضحكت وامي تباوعلي وهي تگول 

:بثينه مو وراچ دوام لو بعد عندج طلبات 

=لا ماما طلباتيش هي سياره اقمتو الدنيا وما قعدتوها لعد لو اطلب شي ثاني شتسوون 

هم صحيح ياالله حبيبتي هم ياالله ترحين 

طلعت امشي واتلاگيت ويه هدى وصرنا نتمشى وطلعت ماجده ومشينه الرأس الشارع نأخذ تكسي واجرنه ودفعت 

انالان اليوم علي وصلنه شفت نفس الشباب وهم منتجين عه السيارة البيضه 

همه من شافوني بدأ الغزل بس علي ويحجون ويعلون صوتهم يصفرون ويغازلون وتصرفات مو حلوه 

مشينا واحنا متنرفزات رفعت راسي لمحت ولد شاب واكف ع الجهه الثانيه وبس يبا وعلي انا ما اعرفه

لكن صار شكم يوم اشوفه بهذا المكان موجود وكل ما اجي اشوفه 

، بيني وبين نفسي كلت = يجوز يجيب اخته او زوجته وتصدف ويه جيتنا لكن اشوفه ما ينزل عينه من عليه 

طلعنه من المحاضرة الأولي ورحت ويه البنات نروح للكافيتريا ناكل او نشرب عصير او مرات كهوه او جاي 

 باوعت وانا اسولف ويه البنات شفت نفس الولد كاعد يشرب كهوة وهو ابد ما نزل عينه من عليه حجيت بيني 

وبين نفسي

=هو عمرة مبين مو مال كليه شعنده يجي يجوز عنده شغل اوو اني شعليه 

بس هو ليش دا يراقبني ويباوعلي 

صرت اشوفه للولد تقريبا يوميه وهو بس يباوعلي كان رزن وشكله رجولي وهندامه يدل على واحد ذواق باللبس 

بقيت على هذا المنوال أكثر من أسبوعين وانا اتلصص النظر اله واشوفهربس يباوع وانا تلقائيا تجي عيني بعينه  

والسؤال الي محيرني 

شعنده يجي للكليه ؟

ذاك اليوم طلعنه وكنت لابسه جينز وقميص ابيض وشال ابيض 

وجنطه وحذاء اسود بدون جواريب وكنت بغرفة الطالبات عدلت لبسي ومكياجي وطلعنه كنت لابسه سبحتي الذهب

 والسوارات الناعمات ومحبس على شكل قلب بي فص احمر طلعت شفت ذوله الثلاثه اجيت امشي واحد صار

 بصفي او واحد ورأي واحد يمشي قبلي وهذا البصفي كلي تسمحييلي بكلمه انا باوعتله كانت الوقاحة تطلع 

من نظراته باوعتله وياي صديقاتي هو كلي 

/ شويه من رخصتج اريد احجي وياج على حده 

انا باوعتله وجاوبته = ليش حضرتك تعرفني على مود تحجي وياي 

هو ابتسم وگلي //انسه ما اخذ من وكتج بس دقيقه شغله مهمه 

 اضطريت اوكف صرت على صفحه كتله لان حسيت من كلامه بي نبرة تهديد عبالك يعرفني من زمان

= اتفضل اخويه شرايد اسمعك واختصر اذا امكن 

هو بابتسامه //اي انسه بس لاتصيرين عصبيه 

واباوع على اصدقائه الاثنين وكفو قريبين من عدنا 

انا جريت نفس = اتفضل اخويه اسمعك شرايد

ادنه علي كأنما يشاورني وبدأ يتكلم وياي كلام قليل أدب

:بصراحه ياحلوه انا بس شفتج انعجبت بيج بكل شي بيج انا معجب بلبسج وبجسمج بس امشي وياي نكعد ونرتاح

 ادللج اراويج الدلال والحب على اصوله وداعتج اله انسيج اسمج (وكلام اخر ما اتجرأ حتى اكتبه )

طبعا كلامه كان منتهى الوقاحة والابتذال كان كلام يحجون بي مع بنات الشوارع (عذرا)

انابس فاتحه عيوني ومتفاجئه من وقاحته احس نار صعدت بعيوني واختنكت صرت ارجف واتنفس بسرعه

 وهو مسترسل يسمعني بالكلام المبتذل انا بدون ما احس ضربته بكل قوتي بالجنطه على راسه 

وكتله = ايا عار ياحقير انت شلون تتجرا

اصدقائه من شافوني ضربته اجو يردون يسحبوني للسياره صديقاتي

انتبهن صارن يعيطن بأصوات كلها خوف علي 

واكو شكم واحد نزل من سيارته لكن هو بسرعه كمشني من شعري وطلع المسدس وكال

: الي يتقرب نموته بمكانه ما عليكم هاي تخصني واني عدي حساب وياهه ولازم اصفي

جانت هاي اللحظه أصعب لحظه بحياتي لان حتى الناس ما يعرفون منو همه او شنو شغلهم وليش هيج يسوون

 خصوصا بهالوكت الي القتل والخطف صار عادي يصير وكدام الناس حتى بيهم عبالهم اخوتي او ولد عمي  

صديقاتي زادن بالصياح واكو ناس كامت تحجي واكو جماعه جوي يركضون لكن من شافوا السلاح يتوجه الي 

وسحبني وهمه يحاولون يصعدوني بالسيارةوأنا أقاوم 

وما احس إلا واحد اجاهم من ورة ما أدري شنو سووة

بعدين هو دفعني وكام يتعارك وياهم ويضرب بيهم الناس من شافوا اجو ويا شكم واحد هذول صعدو بالسيارة 

وعلى أخير سرعه ماشفت شي عيوني غوشن واحس اختنكت ما اعرف يمكن وكعت وما اعرف منو جابتلي ماي 

ورشت على وجهي وحسيت ضربات خفيفه او صوت وحده 

بثينه يثينه اصحي ما كو شي 

فتحت عيوني عبالي اتحلم بس من باوعت لكيت روحي بحضن هدى 

لكن الي شفته فاجاني شفته هو نفسه الي يباوعلي بالكليه رفع الشال وخلاه على رأسي وانطاني بطل ماي وكلي

لا تخافين اخذي اشربي شويه 

انا حسيت بكهرباء تسري لجسمي ما انتبهت للناس وكلامهم رحت الغير عالم اجتني صديقتي ماجده تكلي

بثينه خو ما صار بيج شي

انتبهت كتلها وانا ارجف بين الخجل والخوف (لا الحمد لله اني زينه ) هي

 استرسلت بالكلام /اولاد الكلب اكيد عصابه رادو يخطفوج لو ما

 الاستاذ -(واشرت على الولد )لوماهو الله العالم هسه شنو صاير 

اجوي الحمايه مالت الكليه ومن شافوني سالوا منو ذول وشرادو منج 

اجه صوته كللهم /:حراميه رادو يبوكون جنطتها بس هي عفيه عليها ما انطتهم مجال 

سالوني يعني ماكو شي 

انا هزيت راسي ماكو شي

  دنكت وانا اعدل بالشال واخذت جنطتي وهدى شالت الكتب والملازم انتبهت السبحهالي برگبتي ماكو لان انا دائما 

اخلي ايدي عليها سالتني ماجده 

بثينه شكو 

جاوبتها بتعب =السبحه مالتي ماكو لازم وگعت مني 

هدى //هسه اندورها 

   دورن عليها البنات وانا واكفه احس ولا قطرة دم بيه من الخوف ومن نظرات هذا الشخص الشهم

وأنا بعدها الرجفه بيه وفكرت شلون إذا درو اهلي يردون يخطفوني معناتها ابقى بالبيت 

وحتى الشمس ما اشوفها اوووف اشلون بالله شكلهم 

هدى ككگالت //بثينه ما لگيناها 

انا حجيت وياهن بس بعدني خايفه 

 = تولي اتركنها فدوه بس خلي نروح للبيت لان تعبانه

أخذنا السيارة مالت الحجي وهو هم اجه ويه العالم من صعدنا

إجه نفسه الشخص علينه سلم على الحجي او كله

حجي انت اخذهن وانا امشي وراك بسيارتي اخاف هذوله الحقراء لازميلهن الطريق علمود

اليوم أدفنهم بسيارتهم عدلين 

الحجي /:والله عمي كول وفعل السويته بس اخو اخيته يسوي 

هو باوعلي وكال //صدك جذب حجي هنه عرضنا نموت وما نفرط بيهن 

انا باوعتله بخجل كتله 

= شكرا الي سويته وياي م...

قاطعني ما خلاني اكمل /:رجاءا كل شي ما سويت اي واحد بمكاني يسوي

اكثر الدنيا بعدهي بخير  

الحجي //والله صحيح بس همه باغتونه بسلاحهم انت ذكي ودرت الهم من وره 

رد بابتسامه /: ما سوينه اله الواجب 

ركبنا ويه الحجي وهو ورانا اشوفه بالمرايه مال السيارة الى ان وصلنه الحجي كلمن يم بيتها

دخلت سلمت لكيت ابويه وأمي كاعدين وزيوني لاكاني طالع عنده شغل بس شافتني امي كالتلي

 /اشبيج ماما سلامات مو على بعضج او وجهج اصفر شنو شصاير 

بلعت ريگي = لا ماما ما بيه شي بس شويه تعبانه

امي جاوبت بعصبيه /:طبعا دراسه ورجييم اكيد اتعبين ياالله روحي غسلي وبدلي وتعاي اتغدي

صعدت الغرفتي وبعدهي الخوفه والرعبه كدام وجهي وانا بيني وبين نفسي احچي

:اكلهم لو اسكت اذا سكتت اخاف يسمعون ويكولون اكيد شي جبير وما تردين تحجينه واذا اكللهم اويلي 

امي دك ولطم وبتي يردون يخطفوها وابوي بعد ماكو كليه ولا طلعه 

ولذا اسكت اخاف هذوله يرجعون ويحاولون يخطفوني مره ثانيه 

زين همه منو وليش اني بالذات

انا تخايلت الموقف خفت ع السريع بدلت وغسلت وجهي ونزلت لكيت امي مخليه الغدا وكاعده 

انا كعدت يمهم وامي تكلي 

: اكلي ماما وبطلي هذا الي تسمنه رجيم تره العافيه من الله بعدين مو زين تبقين بدون اكل 

انا صرت اكل وافكر شكلهم من كملو اخذت الجاي ورحت للصاله قدمته الهم وكعدت وانا افكر شراح اكللهم عضيت 

على شفتي الجوه وكلت 

= اريد اكللكم على شي بس بدون عصبيه وصياح هو شي صار وانتهى 

ابوي اتفاجا /:بثينه شصاير وياج كولي 

= اليوم اقصد هسه قبل لا اجي بنص ساعه 

امي //بثينه احجي شصاير 

اشوف الخوف بوجه امي والترقب بوجه ابوي ابتسمت 

 = ما صار شي وانا طالعه ويه البنات اجه واحد راد يخمش الجنطه بس

 لحكه ولد وشبعه كتل وبعدين الحرامي شرد

امي من سمعت كامت تدك على وجهه وابوي كام من مكانه يريد يخابر

زين انا ما قبلت كتله

= بابا شتخابر فدوه الولد شرد وره ما شبع كتل واتدمه وهذا زيوني طايش باجر يوكف اباب الكليه انوب كل واحد

  يباوع يتعارك ويا 

ابوي/:ها يعني نعوفه ما نسوي شي 

= كتلك بابا اكو ولد شبعه كتل ورجعلي جنطتي وانا يمكم الحمد لله ما بيه شي (واحرك باديه ) شوفوني كل شي ماكو 

وبعدين وين تلكونه يحلم بعد يمر لو مره من باب الكليه على الكتل الي اكله 

امي /عزا العزاني وهذا الحرامي منين تعرفينه 

باوعتلها = ماما منين اعرفه اكلج حرامي 

ابوي ما خابر زيوني وامي بس تلووم وتكوول

:اي الوضع مو زين وانتي حلوه مو يوميه نسمع على بنات انخطفن وشباب ساومو اهلهم وانوب يكتلوهم ويشمروهم

باالله هسه انتي لو صاير بيج شي شكول ومنو يعذر   

ابوي /:شنو يعني وفيقه الناس تبطل ما تطلع تنسد المدارس والكليات على ابو الوضع مو زين 

امي /:لا حسين بس الحذر غلب القدر 

ابوي /:يعني شنو وفيقه 

مانا /يعني بعد ما تطلع وما تروح بس هي وهدى وماجده تاجر خط اضمن واحسن

ما جاوبت اني كملت غسل المواعين وتنظيف المطبخ وصعدت اتمددت وانا افكر بالي صار بيه وشلون اجه

 هذا الولد يعني لو ما هو الله العليم شنو صار وانا هسه وين وامي وابوي شصاير بيهم نمت ما حسيت الا على 

رنت الموبايل شفتها هدى سالتني وانا فهمتها شتكول خاف امي تشوفها لو ابوي يسالها او وصيتها تفهم ماجده

،،، ثاني يوم اريد اروح للكليه من الصبح شافتني امي انا هم ابتسمت بوجهها وگلت 

= صباح الخير 

امي ردت وهي عاكفه حواجبها //صباح النور شنو ماما إله ترحين اليوم 

= اي اروح ليش لا 

امي//وج يمه خاف هذا لازم لج الطريق ويجيب ويا جماعه 

رديت بثقه = يولي ماما اصلا همه اقصد هو من راد يبوگها للجنطه بطلعتنه للتكسي

يعني لو الحرس شايفي جان نخلة نخل انتي بس ادعيلي 

امي / ماما ما اريد اعرض بس لا ترحين اخاف عليج مرري شكم يوم وبعدين داومي 

= لا ماما أرووح هسه الطلاب الي بالكليه شيكولون شبيها ما إجت 

امي //اذا مصره خلي زيوني يوصلج أقلها يشوفون وياج رجال 

= ماما هاي شبيج والله ما علي شي لا تخافين تلكيهم نشاله شافوني امشي على كيف واجو للجنطه 

امي //بثينه شو نشاله واجو ليش همه شكم واحد 

انا من سمعت هيج رجفت بخوف ما اسمع إله الباب اندك فتح بهاء الباب طلع الجاي اياد الظاهر ابوي متصل 

بي ومفهمه اياد يباوع لي وبوجهه الغضب :: سلام عليكم ،

،،ردينا وعليكم السلام،،،،،

امي /:هله يمه اياد اشلونك تكعد اتريك 

اياد متنرفز ::الحمد لله خاله ما اشتهي مشكوره 

،بعدين باوعلي وحجى بنفس النرفزه

::ياالله امشي وياي اليوم عندي واجب يم الكليه مالتج وكلت امرج بطريقي اوصلج 

انا بارتباك =بس انا البنات ينتظرني 

اياد ::عادي ناخدهم بطريقنا خابريهن 

انا احجي ويه نفسي= لو باقيه على زيوني احسن اكيد سامع شي اي مبين من وجهه وهذا مخبل شسوي وهو شلون

 لزكه خلي اروح ويا شيريد يسوي يعني شي انتهى وراح

وصعدت بالسياره يمه وانا احس بروحي مختنكه لو اعرف منو كايله اكيد عده علم وهو صعد وطبك باب السياره بكل قوته عبالي كسره وصار 

يسوق وهو يدخن وكل اشويه نفخ وعض على شفته 

انا بكلبي = هذا شبي بس ينفخ عبالك واحد يسوي اسعافات اوليه بس لا عتب علي هو عليمن يطلع اكيد مو عليه

طالع نكدي على امه 

انا اتذكرت عمه كريمه كمت احجي بكلبي 

= بسم الله الرحمن الرحيم اسكنو في مساكنكم اسكنو في مساكنكم 

باوعت الاياد وانا اتخيل كريمه عبالك جني وهو يمها يسوق وهي تكله منا وتباوعلي وتخنزر عليه وتكله روح منا 

وارجع منا واتخايل السياره تمشي بطريق كله تعرجات اتخايلت نفسي اخذت مكان اياد بالسياقه ومن تكلي منا امشي 

بالعكس بعدين سقت السياره بسرعه وانا ماده الساني الها وفتحت الشباك وشمرتها 

ما صبرت ضحكت بصوت واشوف اياد يباوعلي ويخزر بيه والغضب طالع من عيونه  

الفصل الخامس من هنا 

شكرا لزيارتكم عالم روايات سكيرهوم