رواية انتقامي الفصل الثالث بقلم جمانه السعيدي
شاهين...لكيت نفسي محرج اني وعائلتي كدام اهلها
وماكو كدامنا غير نوافق بسبب إلحاح ابوها على هذا الموضوع
البنيه بعمري وخريجه وماكو اي شي يمنع القبول
غير احنا ما نعرف اي شي عنهم
حتلو نسئل عنهم همه جدد بلمنطقه والجوارين مايعرفون اي شي عن اطباعهم
اذا رادن يشترن شي ابوهن ياخذهن بسيارته
يشترن ويرجعن للبيت
والبنيه اداوم ويا امها بنفس المدرسه
غير هاي المعلومات ما نعرف
اما الكلوب بس رب العالمين يعرف بيها
بقينا اسبوع واحنا مامرجعليهم خبر موافقين لو لا
اني كنت متردد حيل
بعد اسبوع ابوها رجع اجانا للمحل
ابوي من شافه انحرج حيل منه لان احنا سكتنا ومارجعنا خبر مو معناها ماعاجبينا بس جنا نفكر بلموضوع
ابوي...تفضل تفضل اهلا وسهلا
...اهلا بيك شلونك شاهين شلونه
ابوي...هذا شاهين صاح ابوي بصوت شاهين شاهين تعال بسرعه
اجيت سلمت علي وكعدت يمه طلبنا جاي
...مارجعتو خبر علمود الخطبه ( هذا كان كلام ابوها بلحرف)
اذا الكم نيه للزواج استعجلو شويه لان اني عندي مشاكل وياا اخواني ومااحجي وياهم
واذا عرفو موضوع الخطبه راح ينهون على البنيه
وتخرب الخطبه
حتلو ماكو حفله شي بسيط عائلي
المهم تستعجلون بلعقد
شاهين...بعد هذا الكلام احنا صرنا محرجين اكثر واكثر
يعني ابد مو منطقي نكول بعد كلام ابوها هذا احنا مانريد بنتك
والمصيبه هو جاي للمره الثانيه يقدم بنته النا
ابوي...انشاء الله المهر الخميس
....مانريد هوسه حتى لا يعرفون عمامها
ابوي...خلاص احنا هم نجيب بس كم واحد بلمشيه
عمامه وخواله وبس
...انشاء الله
شاهين..تفاجئت من كلام ابوي
يعني خلاص تمت الموافقه
بوقتها وبمنطقتنا تحديدا كان المهر خمسه بعشره
ابوي انطا الامي خمسه وكاللها دزيهن الهم حتى يشترون بيهن ذهب
امي اخذتهن واني رحت وصلتها بس مادخلت وياها
ماكو اقل الساعه امي اتصلت عليه تعال رجعني
من اجت امي صعدت وياي بلسياره كانت ضايجه
شاهين.. هااا خير
امي...ما قبلت امها بخمسه تكول تنطوني ثمانيه بنتي خريجه باجر تستلم راتب
انتم مو ماخذين وحده عاديه
شاهين...وبعدين
امي.... كتلها اخذيهن واني اجيبلج بعد لان حرجتني
معانده ما تقبل
شاهين..... سهله ميخالف جمانه السعيدي
من رجعنا وابوي سمع الصراحه ماقبل حسهم جاي يستغلونه
اتصل على ابوها وكاله هذا مليون وبعد هاي هيه
اجا ابوها للمحل واخذ المليون وراح
بدينا نجهز واحنا هم حسب الاتفاق هس ما هس
لان ابوها خبصنا خبص
جهزوا نفسكم بسرعه وبدون مايعرف اي احد
محسسنا هي اخر قطعه واحتمال اطير من ادينا
جمانه السعيدي
أخذنا عمامي ثنيين وخوالي اتلاثه وسيد يعقد
وواحد صديق ابوي مقرب منه
ورحنا عليهم عقدنا وكملنا
امي...تعال شاهين لبس زوجتك الذهب
مااخفي عليكم من دخلت ولكيت نسوان هواي انحرجت
كعدت دقيقه بس لبستها الحلقه
كمت اصب عرك من الاحراج ماكدرت البسها تراجي
وحتى ماكدرت ادقق بملامحها حيل
طلعنا من بيتهم واني الكل يباركلي
وامي كانت اكثر وحده فرحانه اخير زوجت اخر ولد
بلبيت وراح ترتاح
صدك عود الام اذا عدها ولد مامزوج ليش تبقى بقلق
علي هو ولد عادي يمتى مايريد يزوج
المهم ثاني يوم منى تواصلت وياي
منى...هلو شلونك
شاهين...هلو طبعا اني قريت اسمها واسم ابوها مكتوب بلانكليزي
...هذا حسابج
منى....اي هذا حسابي وماعندي غيره
شاهين...شلونج
منى...الحمد لله تمام
منى...باجر ياخذني بابا اشتري ملابس العرس
شاهين...بلعافيه
منى...الله يعافيك
شاهين....اذا تحتاجين شي اتصلي عليه
منى.... ميخالف ولو اني خفت
شاهين...ليش ياستار
منى....لان انتم حددتو المهر بكيفكم وشنو جايبين خمسه
شاهين....هو المهر الي ماشي هسه خمسه بعشره
منى...لا عيني اني غير اني غاليه ومهري غالي
شاهين...ترا قيمة الإنسان ما تحددها الفلوس
قيمة بأخلاقه بشرفه بثقافته
منى...واني ولله الحمد ذني كلهن عندي وما ناقصني شي
شاهين...ليش البنات تحدد قيمتها بلمهر الي تاخذه
هيج تخلي النفسه سعر
اذا هي فعلا غاليه المفروض ما يحددها سعر
منى...يعني شلون تريد تاخذني بلاش
شاهين...اني ماكلت بلاش بس الفلوس تروح والذهب احتمال يتغير لو ينباع
بس القيمه الحقيقيه تكون بلروح
الاشياء الي تزرعها بنفس المقابل
منى...اني ماأحب هاي الفلسفه الناس تسئل شكد المهر
المهر اذا كان غالي بعني هي غاليه
واذا مهرها شويه بعني مالها قيمه
شاهين...موخوش منطق وهذا الكلام مو صحيح
منو سيدة نساء الجنه وريحان الرسول
منى...اكيد السيده فاطمه ع
شاهين....وشنو مهرها كان درع الإمام علي درع عادي كان يحمله الإمام علي بلحرب
رغم هي طلبوها للزواج أمراء وملوك
بس النبي محمد اختار علي ع علمود يزوجها اله
رغم فقره بذاك الوقت
اكيد اني مااقارني نفسي بلامام علي وماكو اصلا واحد مثل الإمام علي
بس الرسول كان اله نظره اختار الإمام علي لان يعرف
ايمانه واخلاقه
منى... هذا كان بلوقت القديم بس بهذا وقتنا اهم شي المظاهر اهم شي الكشخه
اهم شي الواحد يكون عنده فلوس حتى يبرز كدام الناس
المثل يكول الي عنده فلس يسوه فلس
جمانه السعيدي
شاهين...اني مراح اناقشج بهذا الموضوع لان كل واحد متمسك برائيه
وانتي حره تفكرين مثل مااتردين
منى...حبيت قناعتك برائي
اريد اسئلك سوال
شاهين...اي اسئلي
منى...انت مخلص جامعه
شاهين.. اي
منى...شعجب ماعندك علاقه لو تحب وحده شباب هلوكت ما يطلع من الجامعه اله ويا وحده
شاهين...الكلب يختار واني كلبي ماقبل يختار وحده من الجامعه
منى...شعجب معقوله كل هاي البنات انت مااختاريت اي وحده ولا عجبتك وحده
شاهين...ليش العجب عادي اكدر اني اسئلج نفس السؤال
منى...لا شنو تسئلني هيج سوال اني ماعندي هاي السوالف
اهم شي سمعتي وسمعت اهلي
شاهين...تمام كلش زين اذا عندج شي احجي لا اضمين عليه اني راح احترم رايئج
منى...اذا سئلت هيج سوال مره ثانيه ازعل عليك
اني محترمه نفسي مو لعبه بأيد الولد
شاهين.. تمام اني احترم البنيه الي تخلي قيمه النفسها
وتفرض شخصيتها واحترامها كدام الناس
منى...لا تخاف اني متربيه مو مره عشر مرات
جمانه السعيدي
شاهين.....طلبت مني اجي البيتهم نكعد نحجي ونتعرف على بعض
فعلا رحت ثاني يوم
هاي اول مره نكون وحدنا واول مره هيج ادقق بملامحها
شكلها كلش عادي
حنطاويه اكو فركه بسنونها من كدام
عيونها موكبار ولا كلش زغار عاديات
شعرها عادي لا ثخين ولا خفيف مكسر نازل على جتفها شويه بعني شكلها عادي جدا
بس اني تقبلتها مثل ماهي
لان الجمال مو اهم شي بلنسبه اليه اهم شي نكون متفاهمين اني وياها
شاهين....ابوها من بعد المهر كل يوم يجي يسئل
عن العرس ويطلب منا نستعجل بسرعه
رغم عمامها كلهم عرفو وابد ما اعترضو على هذا الزواج
على فكره عمامها من نفس منطقتنا بس مو جيرانا
المهم استعجلنا بلزواج خلال اسبوعين حددنا يوم العرس
كانت زفه بسيطه بس بيتنا كان عرس موطببعي
هوسه والناس كلها مجمعه بيتنا
لان اني اخر ولد يزوج بهاي العائله
المهم اجت ويا العروس امها وخالته واختها وبس
حسب كلامهم ما يحجون وياا أقاربهن واكو مشاكل بين الطرفين
اني ابد ما تهمني علاقتهم بااقاربهم
المهم زوجتي تطلع خوش انسانه
زفوني عليها طبعا اني رحت اكثر من مرتين شفتها
بيتهم وبلزفه كنت لازم ايدها
بس دخلت للغرفه سلمت عليها راسا كامت تبجي
وترجف من راسها الحد.رجليها
شاهين....هااا شكوووو ليش تبجين
منى...اريد امي
شاهين...صار بس هاي تدللين نزلت حتى بعدني ما نزعت قاطي
طلعت من الغرفه ونزلت جوه لكيت امها كاعده تسولف على امي هي وخالتها واختها بعدهن موجودات
شاهين...خاله من رخصتج
...هااا
شاهين...منى تبجي تريدج جمانه السعيدي
صعدت امها فوك ردت اصعد وراها امي اجتني
امي...هااا يمه شكو
شاهين...ماكو شي بس العروسه شويه خايفه
امي.. عادي كل البنات تخاف بليلة العرس
صعدت لكيت امها فاتحه البركع وتهدي بيها
دخلت رحت للكنتور نزعت الستره وعلكتها
ام منى....على كيفك وياها
شاهين...لا تخافين اني مراح أقرب عليها لمن تهدء وتوافق
هاي علاقه زوجيه مو حرب
نزعت ملابسي لبست دشداشه
شويه اختي الزغيره صعدت الاكل اني اكلت بس هي ما قبلت تاكل
شكد توسلت بيها بس ما قبلت
نزلت الصينيه وطلعت حلويات ونساتل خليتهن على الميز
كنت كلش حنيين وياها وشكد طولت بال
حتى لا تخاف مني
المهم هاي اليله عدت على خير بينا
حمدت ربي وشكرته الف مره
اخيرا ازوجت وراح استقر
شكرا لزيارتكم عالم روايات سكيرهوم
