رواية ملاكي المجهول الفصل الثالث
تاني يوم صحيت ملاك وبصت حواليها بصت للغرفة الكبيره الجميله وبصت البلكونه الي بتبص على ورود ومنظر جميل دخلت للبلكونه واستنشقت نفس عميق وخرجته بهدوء:مش مصدقه ان جيه اليوم الي أتحرر فيه من أيد القذر خالد مش مصدقه اني بقيت حره اخيراً
دخلت ملاك خدت شاور واتوضت وخرجت تصلي فرضها وبعد ما خلصت رفعت أيدها ل ربها وهي بتبكي:يارب ارحم اهلي…وحشتوني اوي ريم وريان وماما وبابا نفسي اشوفكم كان نفسي قبل ما اهرب اخد البوم الصور بتاعنا واخليه معايا عشان يحسسني أنكم لسه جنبي لكن ملحقتش سامحوني دي الذكرى الوحيده الي كانت بقيالي منكم ولمست سلسلة موجوده على رقبتها:الحمدالله اني لبست السلسلة بتاعتك يا ماما وإلا كان زماني سيبتها هناك.
لقت حد بيخبط على الباب وسمحتله بالدخول
دخلت نهاد وهي مبتسمه:صباح الخير ياحبيبتي
ملاك ببتسامه جميله:صباح النور
نهاد:محبتش اطلع حد من الخدم يصحيكي قولت اطلع أنا وأصبح عليكي عشان ننزل نفطر
ملاك بهدوء:حاضر هغير هدومي وهاجي ورا حضرتك على طول
خرجت نهاد وقامت ملاك لبست فستان بسيط لكن جميل وسرحت شعرها ونزلت قابلت ادم في وشها
ادم ببتسامه وتوهان:ص صباح الخير يا ملاك اي القمر ده
ملاك بخجل:صباح النور يا استاذ ادم
ادم ببتسامه يخفف توترها:اي استاذ دي هو أنا بدرسلك عربي..انا ادم وبس
ضحكت ملاك بخفة:حاضر يا ادم وبس
سبقته ملاك على تحت وهو فضل واقف بيبص لاثرها ببتسامه كبييره:هيييح لا مزه مزه يعني
لقا حد بيضربه على دماغه بص وراه وهو بيتالم كانت أمه:لم نفسك ياواد انت وملكش دعوه بيها دي مش واحده زي الي بتعرفهم وبتسهر معاهم
ادم:ابدا يا امي والله ملاك غيرهم كلهممم
نهاد بضحك على ابنها:اه اه كلمة كل مره
……………………………………………………………
عند مراد بعد ما مشي من المستشفى راح على الشركه وهو غضبان وكان اي حد بيقابله ف وشه كان بيزعقله كان في مكتبه وبيزعق مع السكرتيره مها:قولتلك مش عايز غير الملف ده
مها بتوتر:والله يافندم حضرتك الي قولتلي امبارح انك لما تيجي على الشركه اكون جهزت الملفات دي
مراد بغضب ملهوش سبب:انتي هتجادليني اطلعي برا المكتب حاااالاً
طلعت مها بخوف وقفها زين:اي بيزعقلك ليه يامها
مها بغيظ:معرفش حضرتك
سابها زين ودخل ل مراد الي كان وشه احمر من كتر الغضب:مالك يا مراد في اي
مراد:حل عني انا مش ناقصك
زين:اهدا يا عم الوحش مش كفايه مجتش معايا مشوار امبارح وضحكت عليا
مراد:مشوار اي بس انا كل حاجه باظت بعد ما كان عندي أمل اني ألاقيها يا زين
زين قعد قصاده بملل من القصه الي حفظها:بردو البنت الي بتشوفها ف أحلامك….يامراد دي مجرد حلم افهم بقا
مراد بعصبيه ضرب على المكتب:مش حلم أنا بقولك مش حلم انا شوفتها واتكلمت معاها ده حتى خبطتها بعربيتي
زين بصله ببلاهه ورفع حاجبه بطريقه مضحكه:نعم يخويا! شوفتها ازاي وفين وامتى و ف انهي حلم ده
مراد حدفه بعلبة المناديل في وشه:يا بني ادم بقولك شوفتها شوفتهااا
زين:اهدا طيب واحكيلي براحه
قعد مراد وحاول يهدي نفسه وبدا يحكي ل زين الي حصل
……………………………………………………………
عند خالد كان قاعد ماسك كاس في ايده وبيشرب بغضب وبيبص ل رئيس الحراس الي مربوط ومش باينله ملامح من كتر الض.رب
الحارس ببكاء:بالله عليك يا خالد بيه سيبني أنا بم.وت مش قادر
خالد بصله بسخريه:ما ده المطلوب
صرخ خالد مره واحده:لما تبقا غبي ومش عارف تعمل شغلك يبقا لازم تم.وت
الحارس بخوف:والله حاولت الحقها وكلمت باقي الحراس بس هي استخبت وهربت
خالد قام وقف ف وشه ببرود ومره واحده لكمه في وشه:حتة بت غفلتكوا كلكوا يارجاله وهربت حتة بت لا راحت ولا جت مقدرتش على ١٥ راجل
الحارس:سامحني يابيه والله هجيبها لحد عندك والله صدقني
وقف خالد وبطل ضر.ب فيه وبصله:هنشوف ياسيد هنشوف هتعرف تجيبها ولا هرجعك للي خلقك..
………………
بعد ما مراد خلص كان قاعد زين مصدوم وكانه بيتفرج على فيلم ليه احداث مشوقه:طب وهتعمل اي يا مراد
مراد حط ايده على دماغه:مش عارف مش عارف يازين بس الي اعرفه اني هقلب الدنيا لحد ما ألاقيها مش بعد ما عرفت انها حقيقه وما صدقت لقيتها تمشي وتسيبني..
دخل حد عليهم مره واحده بدون خبط:سلام عليكم يحبايب قلبي
مراد بغيظ:هي العادة الي فيك دي مش هتبطلها ابداً
ادم ضحك:ربنا ما يحرمكوا مني ولا من عوايدي يامارو
زين:يا أخي أنا نفسي افهم الدماغ المتكلفه دي بتعملها فين
ادم بضحك:تعالى وانا اقولك
قعد ادم قصاد زين قدام مكتب مراد وسرح بشرود
زين بيحرك ايده قدام وشه:ها وصلت ل فين
ادم بتنهيده:هييح يا زين اسكت اسكت ده انا عايش في حلم من امبارح
زين:اه صحيح انا وانا طالع للبيت سالت البواب عنك قالي انك مش ف بيتك كنت ف انهي بار يالا
ادم:كنت عند نهاد والله
مراد:اه نونا دي وحشتني اوي والله بقالنا كتير متجمعناش مع بعض
زين بضحك:اه والا كان زمانها أدت اجازه للخدم وسابتنا احنا نروق البيت كله
مراد ضحك:اه والله تعملها عادي…المهم ليه ف حلم من امبارح يا عم الرايق
سند ادم ايده على راسه وسرح وهو بيتكلم بتوهان:ملاك يامراد ملااااك بمعنى الكلمه اسم على مسمى فعلاً
مراد وزين عقدو حواجبهم بعدم فهم ف كمل ادم:بنت امي اتعرفت عليها وجابتها تقعد معاها
زين:اي ده بالسهوله دي
ادم:انا معرفش قصتها صراحه مسالتش يعني مقعدتش مع ماما وفهمت بس الي اعرفه انها هتقعد معاها لكن حتة بنت عامله زي البسكوته بتدوب كده ياض يازين بتدوووب
مراد:يابني لم نفسك انت اي بنت تشوفها بتقول كده اصلا
زين ضحك:اول مره أشوف واحد ممكن يُعجب بأنثى الكلب
ادم كشر بغيظ:تصدقو انا غلطان اني بحكيلكم بصوا انتو تعالو عندنا انهارده كده كده امي قالتلي الصبح اعزمكوا انهارده على الغدا ف تعالو ونفهم منها كل حاجه لأني عارفكم فضوليين زي اخوكم وعايزين تعرفوا قصة البسكوته ا قصدي ملاك..
بعد وقت خد ادم مراد وزين وراحو على بيت أمه خبط زين وهو بيطبل على الباب فتحت الخادمه
ودخلو كلهم بدوشتهم المعتاده:نهاد يانونو ياحبيبة الملايين
نهاد بضحك:ياعيال يابكاشه بقا كده اكتر من شهر ولا بتيجوا ولا بشوفكم ينفع كده
مراد قرب منها وحضنها:والله ياست الكل ضغط الشغل قرب يخليني امشي اكلم نفسي في الشارع حتى اسألي ابنك
ادم:اينعم على يدي فعلا مراد اتجنن
مراد قام عشان يضربه مسكته نهاد بضحك:معلش عيل وغلط يلا عشان نتغدا
ندهت نهاد على الخادمه:نوال اطلعي اندهي ملاك من فوق عشان تتغدا
زين بصلها:اه صحيح يانونا عايزين نعرف القصه ابنك وصلنا لمحه كده بس عايزين نعرف التفاصيل منك ياجميييل
نهاد:يلا يافضوليين كلكوا من قدامي عشان ناكل
نزلت الخادمه وقالت:نهاد هانم ملاك هانم قالت انها مش قادره تاكل بعد شويه هتنزل
نهاد ابتسمت عشان عارفه ان ملاك هتتحرج تنزل وسط صحاب ادم وادم:تمام سيبيها على راحتها
زين:ليه بس يا ام ادم كده ده حتى ادم بيقول انها حتة بسبوسه كنا عايزين نشوف بقا
نهاد ضربته:بس ياض لم نفسك عيب كده ملاك بنت محترمه جدا بجد
مراد:معلش يانونا عيال استحميلهم
راحوا على السفره وابتدو ياكلوا
عند ملاك فوق كانت ماسكه روايه بتقرأها وحست بالعطش بصت جنبها وكشرت بضيق:يووه المايه خلصت لسه هنزل
قامت بملل وفتحت الباب ونزلت على المطبخ
عند نهاد خلصو غدا وقام مراد:هدخل اقول ل نوال تحضرلي قهوتي وهغسل ايدي واجي
مشي مراد في طريقه للحمام وهو معدي على المطبخ قال:نوال حضريلي قهوتي لسه بيكمل مشي لقا صوتها الناعم الرقيق:ها بتكلمني انا!
بص مراد بسرعه وضربات قلبه بتزيد:ا انتي!!!!
ملاك بصتله بصدمه:ا انتتَ!!!
