رواية قصة وجدان الفصل الأربعون 40 بقلم انين الليل

باوعولي ولان فعلا بعد الطلاق ما اعرف شسوي اهنا احسان كال 

لازم نكون حذرين خلال هاي الفتره 

داليا //. شلون ؟

احسان // اقصد عاصف لازم انكون حذرين منه لان مو بهالسهوله راح يترك وجدان ولا يتركج 

داليا //. ما يتركني الي شتقصد ؟

احسان // يعني هو متاكد انو وجدان عندج لذلك راح يراقبج ويراقب البيت وهنا لازم نكون حذرين

رديت = معناتها حتى انت ومنار لازم ما يشوفكم لان هو يعرفكم 

داليا // ماكو مشكله وجدان همه اساسا يجون من الباب الخلفي بالفرع اللاخ 

  احسان //. لتخافين وجد هو احنه من البدايه اخذنه احتياطاتنا حتى السياره الصديقي اخلي يمه سيارتي واجيب سيارته

هزيت راسي = مو اله تجون اني هماتين ما اريد اسبب الكم اذيه 

احسان // لا على شنو هالاذيه وبعدين اذا احنه ما نوكف وياج بهيج موقف منو يوكف وياج 

بقيت خاله ايدي على خدي منار كالت // بشنو اتفكرين وجدان 

= يعني لو ما كان اكو باب خلفي شلون اشوفكم 

احسان وهو يبتسم // لاتهتميين بوكتها ااجرلج بيت 

ابتسمت بحزن منار اتقربت مني // لاتخافيين وجدان احنه كلنه وياج

داليا //. هسه خلي نترك. العواطف على صفحه ولازم. انتي ياوجدان تحجيين ويه عاصف 

اتفاجات من كلامها هي هزت راسها // خلي يسمعج حتى يفهم انتي مصره على رايج بالانفصال عن بهاء 

بقيت ساكته ما جاوبتها منار كالت // تخافين وجدان ؟

لملمت حلكي وما جاوبت 

داليا // بس لازم تحجيين ويا من رقم خاص 

قبل ما اجاوب احسان رد //خلص باجر اجيب شريحه وجهاز

ودعوني وراحو واكدت داليا عليهم ان يطلعون ويحاولون يفترون بالسياره يعني مو راسا يرحون البيتهم طلعو 

واني سديت الباب قفلته وسركيته اخذت علاجي ونمت رغم الخوف والتفكير لكن نمت يمكن بفعل العلاج والصبح كعدت 

فايت وكت رحت طلعت تفاحه واكلت وسويتلي كوب جاي واني افكر واتساءل 

= اذا بهاء رفض ان يطلكني اني بهاي الحاله شسوي وشلون اتصرف شلون اعيش ومنين 

    = اشتغل 

هزيت ايدي = وششتغل ومعقوله عاصف ايعوفني اعيش ابحدي 

   هزيت راسي = اي اني مو زغيره اكدر اعتمد على نفسي 

اتحسرت = وعلي منو راح ايخليج اتشوفينه هذا اذا مو عاصف لو مهدي قتلوج

بقيت بالبيت ضايجه واني ما عندي شي اسوي انتظر واشوف وعدت عليه الساعات كل ما اتحسن احس بضيق 

وملل اكثر الى ان صارت الساعه ثنتين ونص او اكثر ما اعرف اجت داليا وهي جايبه الغدا وتكلي 

- - اني اسفه اتاخرت عليج بس ماما مدا تكدر تصعد الدرج كان هي بنفسها جابتلج الاكل 

= لا ولا يهمج اصلا مو جوعانه 

داليا بابتسامه // شنو هاي مو جوعانه ناسيه عدنا علاج ولازم ناكل كلش زين حتى نطيب بسرعه 

خلت الصينيه بالكاع //. ياالله حتى اني حاكل وياج

وكعدنا ناكل بعدها كالت هي راح تنزل ترتاح شويه وبالليل تجي واتوسلت بيه انزل وياها لكن اني ما قبلت. وجاوبتها 

= بغير وقت انزل واسلم على الوالده 

وحاولت انام. لكن ما گدرت بالليل اجت داليا وياها منار واحسان وبمجرد ما كعدو احسان انطاني علاكه زغيره 

اخذتها واني اباوع اله گلي 

- - هذا جهاز موبايل. بي شريحه حتى تحچيين بي ويه عمج 

فتحت عيوني منار // شبيج وجد ؟

= لا بس متفاجئه

احسان // لا تتفاجئين لازم. تحجيين ويا ويعرف رايج حتى يساعدج 

= شكرا احسان اني كلفتك 

- - ما كلفتيني شي المهم. تحجيين ويا اني سيفت رقمي ورقم داليا ورقم منار

داليا مبتسمه // ونسيت تسيف رقم عاصف. 

- اهوو تصدگون نسيته هسه اسيفه

بقيت ساكته او خلي نگول متوتره من كتب الرقم احسان انطى الموبايل الي 

داليا // هذا الجهاز غالي 

احسان // تستاهل. وجد 

ما رديت سالتهم = يعني هسه اتصل بعمو 

احسان // اي اتصلي 

داليا هزت اصبعها. // لا لا انتظري 

احسان // شتنتظر

داليا //. دقيقه وتفهم 

اتصلت من موبايلها وفتحت الحاكيه وهي خاله اصبعها على حلكها سمعت صوت. عمو رجفت وهو يكول 

:: الو 

داليا // الو اشلونك استاذ عاصف 

:: اهلا استاذه هلا بيج 

— —. الله يخليك استاذ. تكدر تجيني للمكتب 

:: اي تدللين يمته ؟

داليا بابتسامه // اشو حتى ما سالتني لويش. رايدتك 

:: استاذه بدون ما اسال انا رجال ضايعتلي ضايعه فحالتي حالة الغرگان يتعلك بكشايه 

- - ان شا الله خير

:: ان شاالله الخير بوجهج. 

—. — امم بكرى الساعه اربعه العصر يناسبك 

:: اي استاذه يناسبني 

- - يعني افهم من حضرتك ما عندك التزام 

:: استاذه انا هسه بالنجف جاي ازور. واندعيلكم وباجر بحيل الله العظيم انا يمكم 

- - تمام لعد سجل العنوان 

:: بدون ما اسجله اندل 

باوعتلي وهي رافعه حواجبها // ها ماشي اتشرفنا بااي وقت 

:: ممنون في مان الله 

- - الله. وياك

داليا // طلع كلام احسان بمحله يعني هو يعرف عنوانه 

احسان //. اني متاكد هو حتى جاي ايراقبج 

منار //. يعني معقوله يجي ايهنا وياخذ وجد 

احسان هز راسه // لا ما اتصور عاصف انسان رزن وهو يعرف كلش زين. وجدان موجوده يم داليا بس 

هو ساكت اكيد اباله شي 

  داليا // شي مثل. شنو ؟

احسان // هذا جوابه عد وجد 

باوعولي =. اني اعرفه العمو داىما يشتغل بهدوء ويحتوي الجميع 

   منار // لعد لويش ما احتواج 

  = و هذا الشي الي ما اعرف. ليش سوا وياي هالشكل حتى ما حاول يسال عني طيلة التلث تشهر 

داليا // اكيد راح نلكى جواب ومبررات الكل هذا الشي بكرى من يجي اني ارمش عليج تحسبين عشر دقايق. 

وبعدها تتصلين على عاصف تمام ؟

باوعت الها باستفسار هي ردت //. تحچيين. ويا اتكليله كل شي تردي ونشوف. شنو رده 

  بلعت ريكي = بس هو اكيد راح يطلب مني ارجع 

  - وانتي ؟

   اشرت على نفسي = اني ؟

  داليا هزت راسها // اي انتي ليش سكتي. 

= اني ما اريد ارجع لان اخاف 

- - منين تخافيين ؟

= منه ومن مهدي ومن بهاء وحتى. من بيبي 

‏داليا // بس بيبيتج احس بيها تحبج 

=هي كلتلج ؟

هزت راسها // لا بس شفتها شلون مقهوره. عليج 

هزيت راسي = حتى اني مرات احس بيها تحبني رغم ولا مره حسستني بهذا الحب. ولان اعرف بيها تكره 

ابويه وامي لكن. من اجيت وعشت وياها هي بالذات ما سمعتني لو كلمه غثتني بيها وحتى عمو عاصف 

داليا // لعد ليش خايفه 

= انتو متعرفوهم كل هاي المداراة لكن. اذا نسوي هلكد غلط يگلبون حياتنا جحيم 

  داليا // شلون عرفتي مو دا تكولين همه من. رحتي يمهم ابد ما سمعوج حچايه شلون بنيتي تصورج 

   هزيت راسي = اني بنيت تصوري على. كرههم الابويه انتو هم شايفين ام هلكد تكره ابنها بحيث من اجه ايسلم عليها 

بفاتحة ابو طردته وما قبلت اترد علي السلام لا وطلبت ان ياخذ زوجته. واطفاله ويرجعون ثاني يوم وهذا عاصف ...

داليا // شبي عاصف ؟

بقيت ساكته منار اتقربت مني شافت دموعي وهنه ينزلن هي حضنتني وگالت // لا تبجيين وجد احنه كلياتنا وياج 

بقيت ساكته احسان كلي /. شنو رايكم نطلع انغير جو ونرجع 

منار // وعاصف؟

احسان // مو دا يكول هو موجود بالزياره ياالله خلي نطلع نتونس 

داليا // اني ما عندي مانع ياالله وجد 

   ابتسمت = انتو اطلعو اني ما اگدر 

   — ليش ؟

    = احسن افضل ابقى ايهنا 

منار // لعد احنه هم نبقى ايهنا شعدنا طالعين اذا انتي مو ويانه

بقو ما طلعو وبعدها راحو البيتهم واني بقيت ابحدي اتاكدت من قفل الباب ورجعت لفراشي مره اغفى ومره اكعد يتهيا 

الي عاصف ومهدي يجون ويقتلوني 

الفجر كعدت واحس ظهري كلش اياذيني وعندي نحول يمكن مصخنه لمست جبيي مصخنه حييل رجعت اتمددت 

واتغطيت والضحى كعدت سويتلي كوب جاي واكلت وياهه صمونه وجبنه واحجي ويه نفسي

= يعني لو ما منار اني هسه شنو مصيري 

ويجيني صوت بداخلي = الله ما ينسى عبده 

  وانتظرت داليا تجي لكن ما اجت واندك الباب الداخلي بصراحه خفت لكن اتذكرت هذا الباب المشترك بين بيت 

داليا وهذا المشتمل سالت بحذر = منو ؟ 

  - - اني خاله افتحي الباب 

=. منو انتي ؟

  - - اني ام داليا

فتحت الباب شفتها الام داليا تشبهها وبابتسامتها وشايله صينيه بيها صحن تمن وصحن مرك وخبزه وخضره وهي اتگلي 

- - داليا خابرتني وكلتلي ماما اخذي الصديقتي غدا 

   كلش خجلت خصوصا واني اعرف بيها تعبانه ما تكدر تصعد درج = هلا بيج خاله اتفضلي فوتي اني اعتذر خليتج اتصعدين 

  - - لا خاله اني الي اعتذر شلون نسيتج بالغدا 

    = مصار شي خاله كلفتي نفسج وداليا اتكلي متكدرين اتصعدين الدرج 

- - حبيبتي ماكو اي تكلفه ايمن ابني صعدها للصينيه اكلي بالعافيه ولاتستحيين اي شي اطلبي مني او من داليا احنه اهل 

     = واكثر شكرا الج 

   - - ياالله اني اتركج تاكلين وتاخذين علاجج مع السلامه 

   = مع السلامه

نزلت ام داليا واني كلش خجلانه منها لان اعرف هي متكدر تصعد درج لكن طيب اخلاق منهم هالشكل يسوون وياي 

بعد ان كملت رحت شطفت الصحون واتمددت حاولت اغفى يمكن نمت الى ان سمعت داليا رمشت عليه عرفت 

عاصف وصل يمها وصار لازم اتصل 

///////////////////////

عاصف

من خابرتني المحاميه عندي احساس انو عدها خبر عن وجدان ومن اجت وسمعت طلبها وعرفت الي سوا بهاء 

اتمنيت الزمه واموته خلاص رغم انا ما قابل على الي سوته وجدان والي هسه كرامتنا واسمنا على المحك 

لكن السبب بهذا كله هو بهاء ورعانيته وهم الي كالته الي المحاميه السبب سكوتي لكن الي ما يعرف دواخل الانسان 

وشكد حامل هموم ومآسي ف اكيد يتكلم باريحيه

المهم بعد ان راحت المحاميه والي رفضت رفض قاطع ان تدلني وين وجدان 

وبنفس الوقت كان ممكن اضغط عليها وتدلني مكانها لكن خفت اي لا تستغربون خفت ان تنهزم المكان ابعد خفت 

ان تخطأ وتروح تطلب المساعده من الناس الغلط لذلك انا بردت الموقف وقنعت بهاء ان. يطلكها وبعدين نتفاهم وياها 

يعني انا انطيت البهاء امل انو ممكن ارجعها الك بس بالاول اخليها اتامن الوضعها وانا اعرف انو بهاء ما يحبها 

او خلي نگول يكرهها بكد ما هي تكرهه

الي صار انو انا راقبت بيت المحاميه ومكتبها عسى ولعل ان تطلع وياها واشوفها لكن الظاهر المحاميه ذكيه بحيث 

ماخذه احتياطاتها 

وارجع واكول اگدر كل شي اسوي لكن اريد رجوع وجدان يكون بهدوء بدون فضايح وقال وقلت

وبيومها رحت للزياره للنجف وهناك ذبيت همومي يم آمير المؤمنين. سولفت ويا على زماني والي صار بيه 

وعلى كسرة. ظهري وعلى كل شي سويته ودعيت وبچيت وصليت 

بيومها ما رحت للمقبره وهاي اول مره اسويها بصراحه كنت خجلان من الي صار رجعت للفندق وبلليل اتصلت 

بيه المحاميه وكالت تريد اتشوفني وهنا انا ما اوصف فرحتي او حسيت انو الله استجاب الدعاىي ببركة آمير المؤمنين 

واكيد جايبتلي خبر عن وجدان واتفقت انو اجيها للمكتب الساعه اربعه

الصبح طلعت البغداد ما حبيت اروح يم كريم خلصتها افتر واتغديت بااحد المطاعم وانا اريد بس الموعد يجي 

وصلت للمكتب بالموعد اتمنيت الگاها لكن ما لكيتها شفت بس المحاميه سلمت عليها ::السلام عليكم 

وكفت // عليكم السلام اهلا ( ابتسمت ) صدقا ما اعرف شسميك استاذ عاصف ما تقبل وبصراحه الك احترامك 

ما اگدر اسميك بااسمك 

  :: الله يحفظج استاذه ماكو فرق 

- - الزياره مقبوله 

  :: اتقبل اعمالج زرنا وندعينالج 

  - - شكرا ما تقصر هسه شتشرب 

:: ممنون منج استاذه جاي اسمع من حضرتج 

    - - الحقيقه انا ردت اكلك انو

اهنا رن تلفوني شفته رقم غريب ما جاوبت لان فضولي اعرف داليا شتريد اهم من اي تلفون هي سكتت وابتسمت 

لكن انا ما جاوبت فصل حاجيتها :: اي استاذه اسمع 

رن مره ثانيه هي گالت // رد 

  :: مو مهم استاذه 

  - - تمام 

فصل واتصل مره ثالثه المحاميه كالت // رد لان بهاي الحاله ما اگدر احجي 

رديت واهنا المفاجآه سمعت صوتها. وهي اتكلي

  = الو 

خزرت داليا الي ما بين عليها اي اهتمام والي تباوع المجموعه اوراق مقابيلها 

   اتنفست بعمق وجاوبتها :: وجد 

      صوتها والعبره مكسره بصرها = اي عمو وجد 

    :: وينج 

   = موجوده. 

     :: وين كليلي وخلي اجي اخذج حبوبتج راح تموت عليج 

      ردت بجمله فاجآتني = من يمته عمو ؟

       :: شني من يمته ؟

       اتحسرت. = من يمته اني اهمكم لو انتو تردوني 

        استغربت كلامها :: ها

    = اي. عمو تلث تشهر ما سالتو عليه خليتو ياخذني مثل الجاريه عذبني اذاني ياريته قاتلني ولا سووا كل هذا السوا 

      :: ما ادري وهو حتى ما نعرف وين ماخذج. نساله يكول مرتي اماجر الها بيت وانا مسؤول عنها 

      = تدري ليش ؟

   :: ليش 

    = لان ما عندي اب ما عندي اخ ما عندي سند لذلك هالشكل سوا بيه

اتنفست بعمق وانا اسمع عبرتها : هسه تعوفين هذا الكلام وتگليلي انتي وين واجي. اخذج وانا اوعدج اصلح كل شي 

    شنو تردين يجرالح وانتي تعرفيني من احجي كلمه انفذها 

     = لا عمو فات الاوان كل الي اريده بهاء يطلگني ويقطع علاقته بيه 

      :: واحنه ؟

    = انتو ؟

     اتنفست :: اي انا وحبوبتج وعمج مهدي اولاد عمج عماتج واخوج علي 

    = علي يجي وياي 

    :: وين انتي هسه وين ؟

بقت ساكته بس صوت نفسها انا اتنفست بعمق :: اسمعيني بابا يمكن المحاميه. تدري او انتي وياها متفقات هذا 

الشي ما يهمني الي يهمني ترجعين وكل شي اله حل 

  = واذا ما. ارجع ؟

  حاولت اكون هادي :: وجدان مو انا الي احچي ويگلولي لا 

ردت بخوف = ليش ؟

  رديت بنتر :: هي شني ليش ؟ 

   ‎ اي ليش ليش ما اكلك لا = 

   :: لان انتي مسووله مني 

  = يعني ولي امري ؟

   :: اي 

  = بس انت ما حميتني بالعكس سلمتني لابن اخوك وانت ما تدري شنو صار بيه ( حسيت بيها بچت )

    نفخت :: هذا الحجي ما منه فايده تعاي بابا والي تردينه يصير 

   = ما ارجع 

   :: شتردين 

   = اتطلك من. بهاء واريد اخويه علي 

  :: وين تعيشون ؟

  = باارض الله الواسعه

:: شوفي ما اريد اطولها. وياج بهاء راح ايطلكج وانا اتعهد الج تردين اكتب ورقه يم المحاميه تردين يم ناس. 

اجاويد تردين بالشرطه انو محد يتعرض الج وشتردين يصير اتكملين دراستج تعويض اي شي تردينه كولي 

وفكري محد يلمج ويسترج غير بيتج الي هو بيت جدج وابوج انا هسه جاي احجي وياج بهدوء واستغلي هدوئي 

ولا تخليني اجن ومن. اجن ما تعرفين شنو ممكن اسوي فكري وجد فكري لا تصيرين انانيه 

ولا تضيعين نفسج وصدكي لو وين ما ترحين الگاج وبذاك الوكت (اتنفست ) ارجعي بابا محد يلمج غير بيتج

  ردت وهي تبچي = هو وين بيتي 

  :: كل بيوتنا بيتج بس الخاطري والخاطر بيبيتج على كولتج ارجعي الخاطري انا الي حاربت الدنيا 

على مودج ارجعي لا تمرغين اسمي بالطين وتذليني لان بذيج اللحظه مظطر اقتلج بايدي 

داليا وكفت // شنو هاي عاصف انت جاي اتهدد 

باوعتلها والنقال يم اذني :: لا انا جاي اوجه والفت نظر وجدان تعرفني كلش زين

= عم... قاطعتها :: وجد من تردين هسه محد يلزم منج شعره اسمعيني اعرفج انتي تخافين من الله ما تسوين شي غلط 

وطلعتج ما اعتبرها شرده لا اعتبرها تعب نفسي واجيتي يم صديقتج بس من اتطولين سالفتج راح تنعرف وبهاء 

الي ساكت هسه او خلي نكول كوه مسكتينه تجي ساعه وكل شي يحجي وبذاك الوكت الكل يصير عنتر براسج وراسي 

مهدي واولاده وبهاء وغيرهم فكري ولا تتهورين وخوفج ابد ما اله داعي ارجعي وانا اتعهد الج محد يلزم منج شعره 

   انا وياج مو ضدج فكري يا بتي لا تضيعين نفسج وتضيعيني

= عمو ارجع بس مو هناك 

   :: شني يعني مو هناك 

  = اي ما ارجع لهناك وين ما كان ارجع بس مو بذاك البيت ويم مهدي ونهاد 

  :: تمام يصير خير بس اريدج مثل ما اعرفج سباعيه ونچره تذكرين اريدج وجد العرفتها

سديته من وجدان وانا كل شي بيه يرجف كعدت واخذت بطل الماي شربته كله باوعت للمحاميه بعد ان كعدت ونفت لان 

احس الهوا انكطع مني :: هو هذا الشي الي تردين اتبلغينه الي 

هزت راسها بعد ان لملمت حلكها شعلت جكاره واخذت منها نفس وگفت :: تمام وصلت الرساله اكو شي ثاني 

  داليا // رجاءا استريح وبلا توتر خلي نتفاهم 

  كعدت :: استاذه شتردين ؟

  - - مثل ما سمعت منها ومنك 

    :: شنو ؟

   - - تنفصل عن بهاء وانت تتعهد امام الشرطه محد ايمسها بسوء

وگفت واتقربت اكثر من المكتب. بحيث خليت اديه ع الميز وحجييت بثقه 

:: شوفي حضرة المحاميه من اريد الكاها الكاها ومن اريد اكتلها الف مركز شرطه ما يوگف بوجهي 

صحيح انتي محاميه. وخلي اعترفلج محاميه شاطره لكن من يوصل الشي للعرض والشرف ولا اعترف بااي 

احد بلغيها وفهميها بهاء يطلك وهي ترجع معززه مكرمه وارجع واكلج. شتريد انا حاضر استغلي ذكائج استاذه 

ولا تخلين نجاحج وقتي 

- - شتقصد 

:: اقصد اذا يطلكها بهاء ويصير قال وقلت بالموضوع وعشاير احتمال تتلبس تهمه تمس الشرف وبذاك الوكت 

تنكتل ونجاحج يصير عليج فشل

درت اريد اطلع من المكتب رجعت عليها مديت ايدي بجيبي وخليت امامها رزمه من الفلوس هي باوعتلي 

واتساءلت بعيونها جاوبتها 

:: هذني اتعابج بقضية بتي انا ما ادري على شنو وشكد متفقه وياج واذا الج بعد يمها اتعاب گليلي. 

واتمنى هي ما تعرف انو انا الي دفعت اتعاب القضيه 

     - - بس هي احتمال متقبل انت تدفع الاتعابد

ابتسمت :: حتى لو استاذه البت. بتنا واحنه مجبورين بيها بس كل الي اريدهرمنج اذا تندلين مكانها ارجو ان 

يكون مكان محترم لان اي شي يصير راح تكونين انتي بالواجهه قانونيا وعشاىريا 

:: ها وقبل ما انسا اتمنى اتفهمينها انو الجهاز الي عدها يبقى مفتوح لان اكيد نحتاجها بقضية طلاقها لان مثل ما تعرفين 

حضرتج حتى لو انا اتوكل عنها اكيد الشيخ الي ايطلكها يحتاج يسال ويحتاج الاجوبه

  داليا // يعني انت تقبل انو بهاء يطلكها 

  هزيت راسي :: اكيد اقبل لان هم ما اقبل انو تعيش ويا مجبوره وتكرهه ولو ادري بيج تندلين مكانها اوهي عدها جهاز 

نقال يمكن خليته ايطلكها ثاني يوم استاذه داليا قنعيها ترجع 

داليا لملمت حلكها // ما اخفي عليك البنيه منهاره حتى نوم ما جاي تنام وكاطعه الاكل وعايشه ع السيروم 

   عضيت شفتي وحجيت :: ترجع واخذها الاحسن طبيب وانسيها كل الي مرت بي وهذا وعد مني گدامج

  - - بس انت كلش مهتم يعني لو مهدي هم هالشكل يسوي وياها

:: ما عليه بكل احد انا مسوول عنها وعن اخوها وقبل ما اكون مسوول هي عرضي وشعره من شاربي 

اتنفست بعمق :: ست داليا راح اطلع خابريها وطمنيها 

   هزت راسها // ليش مصر انو اني اعرف مكانها 

ابتسمت بتعب :: انا متاكد ولان شفت شخصيتج كلش قويه وانا قابل ان تستضيفيها ابيتج بس مو للدووم فترة وكت 

واجي اخذها وانا الممنون منج خليها يمج وديري بالج عليها واي شي تريده تجيبينه الها بدون ما ترديلي

ما. خليتها تجاوب لان طلعت من المكتب يمكن. اول مره ما اعرف شلون افكر ركبت بالسياره وانا احس 

انو راسي راح ينفجر وعيوني ما صرت اشوف بيهن وجهي ناار ما اعرف اوصف حالي سقت السياره حسيت 

بدوخه مو طبيعيه عرفت ما اگدر اكمل سياقه ركنت على صفحه واتصلت بابو كرار الي راسا رد عليه وكتله يجيني 

وفعلا يمكن نص ساعه اجه هو وابنه الي اخذ سيارتي وانا وابو كرار ركبت ويا وطلبت منه ارووح للمستشفى

اخذني ولگو ضغطي معلك للعلم انا ما عندي ضغط لكن هاي ثاني مره تحصل وياي فكلولي ضغط انفعالي ولازم 

ادير بالي حتى لا يصبح عندي ضغط دائمي وهذا جاييني نتيجة التوتر الي حاصل الي 

كتبلي علاج ورجعت ويه كريم البيته وتعشينه انا ويا واولاده وسالت على رحيم جاوبني ابو كرار. // زعلان 

ومن سالته ليش كلي 

- - رحيم يريد نبيع البيت ونقسم الورث 

  :: ها. 

  - اي عاصف وانت تعرف احنه كل ورثنا هذا البيت ومن انبيعه ما عدنا. قابليه نشتري ابغداد 

  :: صحيح وهم حصة اختكم شيماء

      هز راسه // عاصف انا. هم گتله بس هو مصر ايكول جهالي كبرو واحنه لازم نستقل 

        :: زين ليش ما تقسمون البيت 

باوعلي كريم انا هزيتله راسي :: اي هو بيتكم طابقين كل واحد ياخذ طابق. والديوان مشترك 

    نفخ كريم // هم كتله بس رحيم يگول لا كل واحد يشتريله بيت احسن 

     :: هو. رحيم وين يريد يشتري ؟

   - - يريد يشتري بالسماوه يم اهل مرته هناك البيوت رخيصه مو مثل اهنا 

   :: صحيح وانت ابو كرار 

       - - اني منيلي كل العندي راتبي 

  

    :: چا وشلون.

    كريم // گتله لو انت لو اني نشتري بيت ابونه بس هو ما قبل گال نعرضه. ونبيعه وكلمن ياخذ حقه 

     هزيت راسي :: تنحل ان شاالله ابو كرارتنحل 

   - - الله كريم وانت عاصف شبيك هالايام 

   :: ما بيه شي 

   - - وهذا التعب وضغطك المعلك 

جاوبته :: بسبب زخم الشغل والمسووليه كلها عليه 

  - - صحيح كلامك عاصف بس لازم تاخذ شويه راحه

   باوعتله وانا انفخ الدخان من حلكي :: منين تجيني الراحه ابو كرار 

  - - يااخي سافر اطلع اتونس غير جو كافي عاصف انت سويت العليك وزياده هسه لازم تنتبه النفسك 

     هزيت راسي :: الله كريم

   - - وياريت تبطل الجگاير لو اتقلل منها 

     رديت باستهزاء :: احرك جگاير ولا احرك بروحي 

     كريم // شبيك عاصف انت تعبك مو شغل

       بقيت ساكت كريم كلي // ليش ما تتزوج 

بصراحه اتفاجات بكلامه هو هز راسه وابتسم // اي عاصف ليش متفاجى انت بعدك. شاب ويرادلك مره فليش ما تتزوج 

   :: ياشاب. يمعود 

  - - شبيك عاصف تره اكو بعمرك لحد الان مامتزوجين 

وگفت. واخذت جگايري كريم سالني // وين 

  :: اريد اروح البيتي 

  - - يابيت ؟

   :: بيتي. من زمان ما جايله تمشي وياي ؟

  كريم هز راسه // امشي وياك بس مو هسه من تخليلك مره ويصير عدك جهال 

   :: اهوو انت بطران 

   - - اي اليحاچيك عن حالك يصير بطران 

   :: انا رايح 

    - - هسه انت متوازي تروح باجر الصبح وروح 

    :: باجر اريد اردن لهلي

    - - ياالله امشينه امري ال الله خو ما اخليك تروح ابحدك بحالتك هاي

وطلعنا رحنا للبيت. دخلنه وفتحنا الضوه كريم كعد بالصاله وانا. فتت للبيت فتحت الضوه بالغرف عبالك اليوم 

عايفينه للبيت دخلت. للغرف بعدها طلعت فتحت. الحنفيه وسقيت الحديقه شفتها ما بيها شي لان اعرف ابو احسان 

دووم يجي ويفتح الها الماي. 

رجعت كعدت يم كريم وانا اشوفه مهموم حاچيته :: ابو كرار هونها وتهون 

   - - الله كريم 

   :: والنعم باالله 

     اتحسر // والله عاصف ما يهون عليه ابيع بيت ابوي تره هو يجيب الرحيم بيت بالسماوه وانا هم يجيبلي بيت 

بااطراف بغداد المشكله بااولادي متعلقيين بالمكان ويكولون منطقتنا وعشنا بيها شلون نشيل بعيد عنها 

   :: ليش تشتري بااطراف بغداد مو عندك قطعه خو ابنيها 

  - - بس البناء يكلف 

    هزيت راسي :: لا بالعكس فلوس البيت يبنن بيت 

    - - ها انت تشوف هالشكل 

  :: هو هذا الحل تعرض البيت للبيع وشوف شكد يوصل واتقاسم انت واخوك واختك وبلش ابني قطعتك ولو بالبدايه 

بس طابق واحد وعلى الطول ابنيلك طابق ثاني وانا هم احاول اشوف رحيم واقنعه

كريم // بشنو تقنعه عاصف هو مقتنع يريد يعيش يم نسابته وجاي يشتغل وياهم ومن نحچي هسه حتى شيماء هم تريد 

حقها بالورث 

:: بعد هذا حقها ابو كرار 

  - - اي حقها وما ناكره لكن هي بااخر جيه يمكن قبل شهر گالت ما طول كاعدين بي انا ما اريد شي اهم شي عندي 

انو بيت ابوي ما ينباع 

:: بس ما ترهم ابو كرار ويجوز هسه بس رحيم يطالب بالورث لكن بعد سنه سنتين يجوز يجولك ولد شيماء او ولد 

رحيم ايكلولك انريد حقنا 

- بعد اذا وازاني رحيم ابيعه وابني قطعتي

  :: شوف انت اعلن قطعتك للبيع واعلن البيت اذا القطعه تجيب نص فلوس البيت انت بيع القطعه وابقى ابيت ابوك 

واذا لا البيت جاب سعر زين بيعه وابني قطعتك او بيعها وكمل واشتريلك بيت 

هز راسه جاوبته :: هونها وتهون ابو كرار 

    - - الحمد لله 

   :: واي شي تحتاجه تره انا اعين واعاون 

  — ادري بيك ما تقصر انت هم الله يساعدك رجال عدك مسووليات

وطلعنا من البيت وهالمره ما مريت ابيت ابو احسان لان قبل شكم يوم اجيت ومريت. بيهم 

كريم گلي // اطبك اهنا خلي نتعشى 

طبكت يم مطعم وطلبنه عشا وصرنا ناكل كريم سالني // عاصف ليش ما تتزوج 

   :: ياهو انا ؟

  - - اي انت الى متى تبقى هالشكل يرادلك ولد يشيل اسمك 

     اتنفست :: تتصور اذا اتزوج الحك اشوفلي ولد يشيل اسمي 

    ابتسم // شنو شبيك شكد عمرك 

   :: فات الاوان 

  هز راسه // لا ما فات انت حتى اربعين ما مكمل

   :: شنو عندك مره الي 

  - - انت بس اشر والف وحده 

  :: هههه الله كريم 

   كريم لملم حلكه وسالني // عاصف ليش ما نخطبلك رقيه ؟

   :: اححم لا يمعود 

  - - البنيه رايدتك ومبين عليها تحبك وانت هم مستلطفها 

        :: لا ابو كرار متوهم بس طبيعتي ما احب افشل الواحد 

        - - منو انت ما تحب اتفشل انت تخلي كل واحد طينته بخده بس سبحان الله ويه رقيه غير شي 

         بلعت ريكي :: الله يستر عليها بس ما تصيرلي 

       - - ليش ؟

           !!!!!!!!!؟؟؟ ؟

رجعت البيت كريم وثاني يوم سافرت الاهلي بالطريق كل شويه امي تتصل وفرح ما حبيت ارد عليهم خابرت جابر 

  :: الو 

- - هلا بيك عاصف اشلونك 

:: الحمد لله اكلك شصاير عدنا بالبيت 

  - شصاير ياستار ؟

:: خبصوني تلفونات

- - هههه ما كو شي بس هاي عمتي كلبها عليك 

  : : خوش مو تكلها اتصلت انا جاي بالطريق 

  - - شني جا انت زعلان عليها ما تجاوبها 

   :: يابه واصل ومن ارد حتى ما تخليني اسوق دير بالك واتسور وتسمي وتوصي 

    - - غير گلبها عليك

ما جاوبته غلقته وبقيت اسوق حجييت باستهزاء گلبها عليه 

اسوق ومو ابالي اي شي شفتها من بعيد واكفه. عرفت كريم مخابرها وكايللها تعبت 

وصلت ومن شافت السياره اجت تمشي مبين عليها التعب والخوف 

  - - الله يساعدك 

   :: هلا يمه الله يساعدج 

   - - يساعد بختك اشلونك 

  :: على الله

مشيت داخل البيت وصلت الغرفتي حتى ما گعدت وياها وحتى اي شي ما جبت وياي لامسواك ولا هدايا ولا اي شي 

مو مثل كل مره من اسافر وارجع ما الي واهس 

اندك باب غرفتي رديت :: فووت 

شفت رجاء وهي فتحت الباب // الله يساعدك 

  :: هلا 

- - اسويلك اكل 

  :: مو جوعان 

- - شعجب شو ما جايب مسواك وياك 

:: ما صار لي مجال

هزت راسها وطلعت وبعدها امي فتحت الباب // ادش لو ما تريد تشوفني 

بقيت. ساكت ما جاوبتها هي دخلت وشفتها شگد متعبه وبعيونها حيره سالتني 

- - وين رحت وين اجيت 

   :: للزياره 

- - ها الزياره مقبوله 

:: زرنا واندعينالج 

    - - چا شو كريم خابرتي گال بايت عدهم 

    :: اي مريت بي. عدي شغل 

   - - ايكلي تعبان واتصلت علي 

   

:: شويه ارتفع ضغطي 

    - - منين ؟

   :: من التعب 

   اتحسرت // عاصف يمه لاتزعل مني السويته بس حتى. ...

قاطعتها وانا انفخ دخان جكارتي :: يمه السويتي هدمني كتلني وحطمني 

   - - ما ادري يابني شفتك ساكت 

صرت احرك بااديه :: اله اتشرشب. اصير. خوش وسبع واخو اخيته 

   هزت راسها // لا بس ...

رفعت ايدي :: بعد الحچي ما يفيد ابن ابنج وين ؟

- - امه. تكول اجه وطلع من غبشه ويعارك ذبان وجهه 

::يمه اريد انام ومن يجي. بهاء ندهوني 

- - اكلك. عاصف ماكو خبر شي 

:: الله كريم يمه الله كريم 

  :: يعينك الله 

ط لعت وانا اتمددت على فراشي وادخن بشراهه حاولت انام ما كدرت. كتبت البهاء. مسج 

:: من تجي مرلي رايدك

شفته قرا وعرفت راح يرد. ويتصل لكن انا خليته وضع الطيران لان ما الي خلك لا ارد كتابه لا ارد احجي الدنيا 

طالعه من عيني ما نمت اتوضيت. وصليت وبقيت بغرفتي لمن ما اندك الباب ودخلت فرح // اشلونك بابا 

:: هلا يابه 

اتقربت مني وباستني وهي اتكلي // الحمد لله ع السلامه 

  :: الله يسلمج 

  - - بابا اجه بهاء 

   :: زين جاي 

طلعت وانا رحت غسلت ولبست دشداشه وطلعت شفته كاعد بغرفة امي سلمت وكعدت هو رد السلام لكن ابرود 

امي حاچت رجاء // روحي صبيله عشا

هزت راسها وراحت وبقينه ساكتين هي جابت العشا انا بديت اكل بعد ان سالت بهاء ياكل وياي لكن هو رد ما اشتهي 

اكلت شويه وحاجيت رجاء تصب چاي وجابتلي كوب الي وكوب البهاء واستكان الامي 

شربت الجاي بعدها وگفت حاجيت بهاء :: تعال وراي 

مشيت للمضافه وكعدت بيها وره شويه اجه بهاء گعد انا كتله :: الله بالخير 

رد // الله بالخير 

  ::اشلون الشغل 

  - - زين

   امي اجت گعدت انا جاوبته :: الحمد لله انا حجيت ويه المحاميه واتوصلت وياها الحل اتطلك وهي تتنازل عن 

الشكوى وعن كل شي 

نفخ بحلكه // وهي هسه وين 

  :: هذا الشي انت ما عليك بي

  - - شنو ما عليه ناسي هي بت عمي 

   هزيت راسي :: لا ما ناسي وهم ما ناسي انت الوصلتلها الهذا الشي 

رد// قرت عينج جده بتكم دايحه وابنج يغطيلها 

امي //. انجب واحچي عدل

اتنفست :: شوف هاي العيطه مالتك ما بيها فايده خلي نگعد ونتفاهم

   - - يعني افهم من كلامك انت تندل هي وين 

   :: بهاء انت طلكها وبعد ما الك علاقه بيها 

     - - تحلم 

  :: شنو ؟

   هز راسه // اي هي تحلم ما الي علاقه بيها شوف هاي وجدان بكد ما حبيتها كرهتها وما يشفي غليلي اله اموتها 

     امي رادت تحجي انا باوعتلها يعني اسكتي رديت :: وتكولها بوجهي ؟

  - - اي اكولها صدكني مو هسه انا راح اطلكها بارادتها بس اواعدك اذا ما اخليها نفسها هي تكي وتبوس القنادر 

بس حتى ارجعها ما اكون انا ابن بدر 

اله اخليها ما تعرف ليلها من نهارها اله اخبلها اله اخليها تدور ع اللكمه ما تلكاها 

نفخت الدخان وسالته :: تتصور اذا بدر عايش يقبل. عليك هالشكل تحجي على بت اخو

بهاء// ما يهمني انا ما شفت بدر ولا عرفته انا عرفت حجي غازي الي رباني وحن عليه وعرفت جدتي الي دللتني 

وعرفتك انت الي علمتني شلون اخذ حكي وما افرط بي 

  جاوبته بعصبيه :: عمر المره ما چانت حك الزلمه المره شريكته الها حقوق وعليها واجبات وانت مو اول واحد 

يتزوج ويطلك شنو مشكلتلك 

  - - غدرتني 

:: وانت عذبتها واذيتها 

- - متعجب منك شو شارده وانت جاي تغطيلها والمفروض تذبحها وتغسل عارك 

    باوعتله :: اذبحها اذا فعلا شارده

   عكف وجهه // جا وينها ؟

    :: موجوده واندلها 

   - - وين ؟

  ابتسمت // ما اكدر اكول وين جان بنيتي اجيبها لهنا بيوم التطلك لكن بعد السمعته ( هزيت راسي ) لا ما 

اخليها توصل لهنا وباجر نروح للشيخ ونخلي ايطلكها 

بهاء وكف وضحك ضحكه هستيريه //ههههههههههه 

  :: ليش تضحك 

- - صدكني اطلكها وانت تجي برجلك تتوسل بيه حتى ارجعها واتذكر كلامي 

    هزيت راسي :: هو انا اريدك تطلكها واسايسها اجيبها وكبل العده ارجعها الك وغصبا عليها مو احنه التلوي ايدنا مره

بهاء//. چا ليش ما تجيبها اهنا 

:: ما ادري بيك هلگد غبي 

- - ااه انا. ؟

:: اي انت من اجيبها لهنا ومهدي يدري هو وخالتك بنفس اليوم يزوجونها الواحد ثاني شبيك بهاء صير ذكي 

شني اعلمك بسوالف نهاد وحتى امك وياها 

هز راسه //. هم صدك 

:: خليها عليه والتريده يجرالح وموضوعها سده لاتحچي بي اتصرف عادي ما جن صاير ابيناتكم شي

هو راح البيته وانا احس مو نفس يطلع من خشمي عبالك نار وامي واكفه وبعيونها دموع اتقربت على صورة 

ابوي وصارت تحجي ويا 

- - غازي ليش هيج بزرنا من دون الناس عاد احنه تعبنا بتربيتهم حتى ابن الولد وبت الولد ما بيهم خير شو احنه 

فالسين لامن ولد ولا من بت انوب ابن بدر طلع زايد على زيدان ومزيد

ظلت مكابله الصوره وتنعى وتبچي

طلعت من يمها بدون ما احاچيها سمعتها // انوب حتى الولد الما اشوف بس شوفته وال. هو ناكوط كلبي صار 

ما يكبلني غازي شلي بظلتي اخذني وياك 

بقت تبجي بالمضافه وانا امشي رايح صوب البيت دمعتي نزلت لكن ما كدرت احاجيها وادري قسيت عليها 

بس الصار بيه مو شويه وهي السبب اتصرفت بدون ما تردلي 

شكرا لزيارتكم عالم روايات سكيرهوم