رواية قصة وجدان الفصل الواحد والأربعون بقلم انين الليل
غفيت بدون ما ادري بنفسي غفيت رغم خوفي وارتباكي واني دا احاجي نفسي
= شلون راح احچي ويه عمو ومنو يكول اگدر احجي
= بس لازم اصير قويه. ولازم. اخلي يعرف اني ليش هالشكل سويت
= ياترى راح يفهم لو راح يجبر داليا اتدلي على مكاني
= لا وجدان داليا انسانه قويه لو شيصير ما راح اتدلي
= بس عاصف اقوى منها ويكدر كل شي يسوي
ابين هاي الافكار غفيت كعدت واني اسمع الجهاز دا يرمش عليه عرفت انو صار لازم اخابر عاصف واحجي ويا
اتصلت مره واثنين يمكن ثالث مره جاوبني
يمكن انتو غنيين عن التعريف بحالتي شلون صرت احچي ويا واني ارعش خوف لكن شويه شويه ربطت جآشي
وصرت احجي ويا وكان همي طلب واحد انو. يقنع بهاء ان يطلكني وصرت اسمعه وانا اعاتب بي
مره احسه عصبي كلش ويمكن لو يلزمني ايموتني ومره هادى يحاجيني بعتب ورزانت
وصار يحجي وياي وانو لازم ارجع الخاطير بيبي ومحد راح يحچي وياي ومستعد كل شي اريده ايسوي الي
فجأه سد الخط وياي وبذيج اللحظه خفت كلش منه خفت لا يجبر المحاميه ويضغط عليها حتى يعرف وين طريقي
ويجي ياخذني اترددت واني ارد على داليا =. الو
- - هلو وجدان لتخافيين عمج عاصف هو الي طلب مني اتصل بيج واطمنج
= ص صدك داليا
داليا // خايفه مو لا تخافيين فد ساعتين و واجي ونتفاهم
= تمام
- - اسمعيني وجدان لا تغلقيين التلفون واذا عمج اتصل بيج انتي مخيره تردين ما تردين بكيفج بس لا تغلقينه
جاوبتها = خايفه ست داليا
- - ابد لا تخافيين الكره بملعبج ياالله باي
رغم شكد متوتره وخايفه من القادم لكن شويه هدىت من كلام داليا
بقيت گاعده وما اعرف شسوي اتذكر كلامه وشلون صار عصبي وشلون هدا ومن ايگلي بيبي مقهوره عليج
وارجعي الخاطيرها
وعلاوي اخوي ما ادري محتاره وشلون اتصرف
صرت احجي ويه نفسي = لعد لو هلكد اهمك لويش قبلت تزوجني البهاء وهو متزوج لويش
قبلت ينهى عليه عبالك اني وحده جاريه او سلعه انباع وانشري
= صرت لعبه عد بهاء شوكت ما يريد ياخذني ويمته ما يمل يشمرني
بجيت بقهر =. بهاء الي عبالي راح يعوضني عن الي شفته وعن غدر غزوان الكلب لكن طلع احقر منه
=. والمصيبه لو حجى العاصف عني والي سوا بيه غزوان اكيد ما راح يرحمني وراح يقتلني اذا مو هو مهدي
سمعت دكة الباب عرفتها منار دكتها مميزه من كنا زغار ابيتنا ابغداد فتحت الباب هي باوستني وهي اتگلي
هلو وجد
ابتسمت = هلو منار
اشلونج
هزيت راسي =. زينه اشو ابحدج
احسان راح يجيب عشا
= لا تكلفون نفسكم منو يشتهي
احنه هههههه احنه نشتهي وشوفي بس يجيب العشا ما راح يبقى منه شي
اني اتمددت لان دا احس ظهري كلش ماذيني منار اتقربت مني //. شبيج. وجد
= موجوعه ظهري حييل دا ياذيني
اووف الله يساعدج
= وفوك كل هذا داليا اتاخرت
منار // هسه تجي تحسين بملل مو
= اي كولش ملل ما اوصفه
راح اسوي كهوه تشربين وياي
هزيت راسي فعلا دا احس بملل وخوف وحزن وكل شي خصوصا واني ما اعرف شنو الخطوه الثانيه
شربت الكهوه وبقيت منتظره داليا واني ومنال نسولف باامور خارجيه بس المهم اقضي وقت صرت اسالها
عن زميلاتنا بالمدرسه واغلبهن كملن دراسه وبكليات متعدده قله منهن الي ما كملن اتزوجن والي ماحبت اتكمل
بقت بالبيت يم امها وابوها
الشي الي لفت نظري انو منار اتكلي انو عمو عاصف دائما يجي للبيت اقصد البيت الي كنه عايشين بي ودائما ايمر
على بيت ابو احسان ايوصيهم ع الحديقه يسقوها
بس بعمره عاصف ما حجى ولا گال مريت ع البييت او ام احسان تسلم عليج هي ومنار
بقيت مترقبه الى ان اندك الباب راحت منار سالت منو
اني داليا افتحي
فتحت الباب دخلت هي وامها الي سلمت عليه // اشلونج خاله
ابتسمت = الحمد لله
لا توكفيين مبين عليج تعبانه
داليا //. شبيج وجد ؟
=. اليوم من الصبح دا احس نفسي مصخنه
خذيتي علاج
=. بلي اخذته وهسه احسن
اندك الباب منار گالت // هذا احسان اعرف دكته
راحت منار تفتح الباب اجه احسان جايب علاليك اخذتهن منار //. السلام عليكم
- - عليكم السلام
ها عمه اجيتي
ام داليا //. لعد شسوي غير كتلي ازعل اذا ما تجيين
لعد وين ايمن
طلع ويه اصدقائه مو تدري ما يفاركهم
احسان //. بس همه خوش ولد اني شفتهم واتعرفت عليهم
داليا //. ياالله اني جوعانه خلي ناكل اليوم عزمنا نفسنا اني وماما يمج وجد
= هلا بيكم شرفتوني
ام داليا // حبيبتي خاله
= اني جاي دا اسوي عليكم زحمه
داليا // لا تحجيين هالشكل تره ماما تزعل ياالله خلي نحضر العشا
ام داليا // شتحضرن هو كله بسفريات اكعدو واني ارتبه الكم
منار // عمه انتي تخبليين
ابتسمت // حبيبتي
حلوه لمت العايله بلحظه اتذكرت بيبي وكعدتنا بغرفتها لكن بنفس الوقت اتذكرت العيون الي كانت تكرهني وتتمنى اوكع
وانكسر (اتحسرت ). فعلا وكعت وانكسرت كسره كلش قويه
داليا //. هيي وين صافنه مدي ايدج
ابتسمت وكعدنا كلنه اتعشينه سوا كان جايب مشاوي ومقبلات وببسي وعلبة حلويات وكرزات وعلاكة فواكه
ورغم اني كنت كلش مستحيه لان ما متعوده اكل كدام ناس غربه بس اظطريت اكل
وبعدها منار جابت الجاي الي شرب بس احسان واني رحت خليت كرزات وفواكه وحلويات وقدمتهن
منار سالت داليا // شنو الاخبار
داليا باوعتلي // عاصف اجاني للمكتب وانتي حچيتي ويا
هزيت راسي = واريد اعرف شنو كان رد فعله
داليا // الي سمعتي وجدان الي سمعتي بدون زياده ولا نقصان
احسان // يعني شنو ؟
- - يعني هو جاي دا يفهمني انو دا يقنع بهاء يطلك لكن بالمقابل يريد وجدان ترجع
ام داليا // هو هذا الشي الطبيعي
احسان. // لا عمه شنو الشي الطبيعي اذا رجعت وجدان اكيد راح ايجبروها ترجع البهاء
راسا رديت = اقتل نفسي وما ارجع البهاء
داليا وهي تعض بشفتها وكانما تفكر وكفت وگالت
- - شوفي. من. خلال كلامه يريد ايطلكج ومستحيل ايرجعج البهاء نسيتي شنو گال هو مستعد شنو تردين يسوي
بس بشرط ترجعين واني احس انو عاصف انسان صادق وعد كلمته من يكول شي يسوي
منار // وين يسوي لعد ما حمى وجدان من بهاء
داليا // لان بكل بساطه وجدان. هي الي وافقت على بهاء
الكل باوعلي وداليا سالتني // مو صحيح ؟
بلعت ريكي وهزيت راسي = بلي صحيح لان ما كان الي خيار
داليا // خيار بشنو ؟
= يعني لو اتزوج غزوان لو بهاء وهمه واحد اتعس من الثاني وبيبي گالت اخذي بهاء اقلها ابن ابني وهو رايدج
وراح ايبقيج اهنا ابيت جدج ويخليج تكملين دراسه
داليا // وعلى هذا الاساس انتي اتزوجتي
بلعت ريگي = ظروف جبرتني ونفس الظروف هي الي خلتني انهزم واجي ليهنا
داليا // هسه انسي كول شي وفكري شنو الخطوه الثانيه
فتحت عيوني بااستغراب داليا ردت // اقصد بعد الطلاق شراح تسوين
اتقربت عليها واني استعطفها =. ست داليا موكلتيلي انتي راح اتساعديني
هزت راسها // ااكيد واني عد كلمتي بس اني حابه اعرف بشنو تفكرين
وجد ابد لا تستغربين من كلامي بس هذا الشي ضروري اعرفه
اتنفست بعمق = اني مجرد ما احصل ع الطلاق احاول الكى شغل واجر لي مكان واخذ علي وننتظر هشام يطلع ونعيش سوا
ابتسمت داليا هي اتقربت مني // كل الي گلتي حلو بس خلي اكولج هذا الي حچيتي عباره عن احلام يقظه
باوعت الها هي هزت راسها // بلي احلام يقظه بوجود عمج عاصف وبيبيتج وبهاء انتي شنو هالافكار العندج
ليش انتي ما تعرفيهم شنو همه وشنو ممكن يسوولج وبتصورج ايوافقون بهاي اآ رائج
منارر // يعني شنو بنظرج ممكن يسوون
داليا //. اني من رحت وقبلها انتي وجد حجيتيلي كلتي ذوله ناس بسطاء او خلي نگول عدهم اهم شي اسمهم وعيشتهم
لكن من رحت وشفت وسمعت واتاكدت من كلامج عرفت هذوله ناس وخصوصا عمج عاصف هذا من احد يحاول
يتحداه او يسحك علي لو بكلمه ما راح يرحمه ولا راح يردعه لا قانون ولا حتى شرع
ام داليا //. اووف الهلدرجه
= واكثر
ام داليا // لعد شتسوي فهميها
داليا // اني حسيت بكلام عاصف انو من يطلكج بهاء ما عنده مانع تبقيين يمي فتره وبعدها ترجعين ويا وهذا الشي
حسيته من كلامه
احسان // تحجيين صدك ؟
هزت راسها // بلي
- - بس ليش ؟
رفعت اكتافها // ما اعرف هو مجرد احساس بس
- -:بس شنو ؟
داليا حاچتني //. وجد انتي ما سمعتي كلام عاصف وتهديده
هزيت راسي = سمعت
- - شنو سمعتي
= من كلي لا تمرغين اسمي بالطين لان بذيج اللحظه اظطر اقتلج وحتى انتي سمعتج تحچين وياوتكليله جاي اتهدد
داليا //. صحيح حتى اني هماتين هددني
احسان // شلوون ؟
- - كلي اذا يصير بيج شي او انو انتي ...
= ليش سكتي احجي شنو كلج
- - كال اذا انتي موجوده بمكان غير محترم فا انا احقج قانون وعشاير
ام داليا // اي حقه
داليا // شلون ماما
ام داليا // شنو شلون ابنيه ابيت جدها واتزوجت وانهزمت والرجال جاي دا يگول اتعهد وباالي اتريده وانتي متقبلين
لا هذا الشي مو صحيح
باوعتلي ام داليا // خاله لا تزعلين مني انا اعتبريني مثل امج وخلي اكولج انتي مهما بعدتي او انهزمتي ما الج اله بيت
جدج وبيبيتج وهذا عمج الي مبين كلش يخاف عليج
= بس اني اتاذيت
هزت راسها // اي صحيح اتاذيتي بس خلي اسألج انتي من رحتي حتى تزورين بيبيج حچيتي الها عن معاناتج
عن الي كان دا يسوي بي زوجج
هزيت راسي = لا لان هو هددني اذا فكيت حلكي ايموتني
- - وانتي ما حجيتي فطبيعي عبالهم مرتاحه ومستقره لا تظلميهم
=. بس خاله اني من رحت كلش متغيره وتعبانه
- - اي وبيبيتج عبالها من الحمل خاله من كلامج على عمج وكلام داليا عنه هو لو كان يعرف يمكن ما خلاج دقيقه عد بهاء
فلا تلوميين لا بيبيتج ولا عمج انتي بعدج زغيره وما تعرفين شنو يعني بتهم مهزومه شلون راح يكون منظرهم كدام الناس
خصوصا الناس الي تكرههم
بقيت ساكته ما جاوبت واني اداري دموعي داليا كسرت الصمت
- - هسه احنه متفقين تتطلگين وتتنازلين عن كل شي وبعدها نكعود ونتفاهم ويه عاصف
باوعت الها وهمست = وعلي اخويه
- - ما نسبق الاحداث عمج داعي ناار اي شي كدامه يحركه فما لازم نستفزه
ام داليا = هلكد يخوف ؟
داليا هزت راسها // لا ماما بالعكس من تشوفينه رزن وشخصيه بس من حجى ويه وجدان حس انو احنه اقصد اني
دا استغفله لكن هو لزم نفسه بس بعدين من سمع كلامها يمكن لو انتي يمي قتلج
- - - معقوله ؟
- - واكثر احس بي يقتل اي احد وما يهمه وما يخاف
- - - شلون يعني
جاوبت بمراره = يعني انتو ما تعرفونه ما عايشتو هذا من يدخل الكل يخاف منه واني شفته من كنت زغيره واجه البيتنا
داليا // شنو شفتي ؟
بلعت ريگي وصرت اتنفس بقوه = شفته كامش ابويه وخال ايده بركبته ويخنك بي
داليا فاتحه عيونها ع الاخر // تحجيين صدك ؟
= بلي واني لان خفت على بابا رحتله وكتله فك بابا لا تموته وهو وخر ادينه عن ركبة ابوي واني كلش
خفت الهسه اتذكر ايكله بختك ابتك
داليا // عاصف !
=. بلي وبعدها بابا اجه وكلي اني ويه عمج دا نتشاقى ما بيناتنا شي ( وخزرني ) مو تحچيين
هزيت راسي رغم ما مصدگته
منار //. ولا مبين علي هلكد قاسي
=. واكثر اتصورو بنته ما يعاملها على انها بنته ولو دا احس كلهم هالشكل
منار // شلون كلهم هالشكل مو تكولين مهدي يحب زوجته وبناته
هزيت راسي = اي ولهذا يباعوله باستزغار خو بيبي شكد تكره مرته ودووم تكول مسويته طلي
ام داليا // يعني همه ما يحبون نسوانهم
= ما اعتف احد بس مهدي هواي يحب زوجته وعمو جابر هماتين اقاربهم ويشتغل وياهم مبين كلش يحبها الزوجته
داليا //. وعماتج
= عماتي ما اتذكر فد يوم اجتي وحده زعلانه لو مقهوره من زوجها
- - وعاصف ؟
بلعت ريگي = عمو عاصف غير عنهم بعمري ما شفته سولف ويه رجاء او ضحك وياها وهو مسيطر عليهم كلياتهم
الشغل بايده والاملاك اكثرهن اله اصلا هو ينطي العمو مهدي مصرف
منار // مو دا تكولين بهاء شغله ابحد
= بهاء يشتغل ابحد وهم عنده املاك ويه عاصف بس. مهدي لا ياخذ مصرفه من عاصف
ام داليا // خاله وجدان. البيوت اسرار انتي بعدج زغيره ولازم تتحملين واكيد انتي مو كل شي تعرفيين
داليا //. هسه. اهم شي لا تغلقين جهازج
هزيت راسي = لا ما اغلقه
- - واي شي تسمعينه تتقبلينه منه وتجاوبين بكل هدوء
منار //. هاي شبيج داليا عبالك انتي خايفه منه
داليا هزت راسها // لا ابدا الكره بملعبنا والقانون بصفنا لكن اذا فكرو يرحون المحامي ثاني خلي انكول اله
بااع بمثل هيج قضايا يشوف خيط جدا مخفي ممكن ان ايكون اداة ضغط علينه او ممكن حتى انو يكسب القضيه الصالحه
لذلك اني دا اخلي كول شي امام عيني ما اريد مفاجات
سالتها. = يعني شسوي
حمحمت // يعني تسايسي العمج نحصل ع الطلاق وننتظر شويه وبعدين نتصرف
احسان // بشنو تفكرين داليا ؟
- - الي شفته انو بهاء لا يمكن يتخلى عن وجدان بسهوله وهذا الشي لمسته من رحت. الهم بالكوه لازم نفسه
او خلي نكول يمكن يحسب احساب العاصف لكن هم لازم ما تنسين الي سوا وياج فلازم نكون حذرين وبنفس الوقت
لازم يكون عندج احد يصده اذا ما اتعرض الج واني. اشوف انو عاصف هو انسب شخص ممكن يتصدى البهاء
ويوكفه عد حده فلازم نسايسه الى ان تتمكنيين او تتاكدين انو بهاء بعد ما يتعرض الج
منار // زين داليا ليش بهاي الحاله ما تاخذين علي تعهد بالشرطه
حكت خدها وابتسمت //. حتى لو اخذ بهاء ممكن كل شي يسوي وهاي وجدان اسالوها
هزيت راسي بالايجاب هي ردت // لكن هو احتمال يخاف او خلي نكول يحترم عاصف لذلك احنه لازم نحتوي العاصف
= بس.اني ما اريد ارجع
- - بالوقت الحاضر اذا عمج قرر يرجعج لازم ترجعيين وترجعيين للمدرسه وتشدين حيلج وبعد ان تكملين السادس
ممكن. اتدخلين كليه وهنا تكدرين تعتمدين على نفسج
جاوبتها باستغراب = كل هاي ترديني اسويهن واني يمهم مستحيل
ام داليا // ليش لا حبيبتي اتي مو تكولين بيبيتج وعمج عاصف مدارينج. طيلة كعدتج وياهم
هزيت راسي = اي مداريني لان اني كنت مثل النمله اي شي ايگلولي او يامروني. اسوي بدون صوت ولا مناقشه
لكن هسه من ارجع راح اكون بالنسبه البيبي. العدو رقم واحد لان انهزمت من ابن ابنها المدلل الي مربيته
وكسرت كلمتها والاهم من هذا كله كسرت كلام. عاصف
داليا // هسه هذا الكلام ما منه فايده اهم شي تحصلين ع الطلاق وذاك الوقت نتصرف
احسان // وما كالج يمته بهاء يطلك
داليا هزت راسها // لا كل الي كاله الي انو ما تغلق نقالها وتنتظر منه مكالمه
احسان //. اخاف هذوله يحاولون يعرفون مكانها ويجون ياخذوها
داليا //. لا استبعد هذا الشي دا احس انو عاصف يريدها تتطلق
منار // تدرون ياجماعه وجدان كلش ضايجه خلي نطلع نغير جو
باوعت الها وابتسمت هي ردت // ياالله خلي نطلع شتكولون
وقبل محد يجاوب ام داليا ردت // لا خليها وجدان اهنا لا تطلع
- - وليش ؟
حكت خدها // خاله ما لازم تطلع لان على كلامكم يجوز عمها يندل البيت يجوز مراقب داليا ومراقب المكان
بعدين همه ناس عشاير وما يقبلون بهيج شي وهي بنيه تريد تتطلك فما لازم تنلزم عليها لزمه
منار // لزمة شنو ؟
- - يعني هي منهزمه وتريد تتطلك ومشتكيه تطلع وياكم واحسان موجود تدرون شنو من مشكله راح تسوون
داليا // كلام امي صح مو اله نطلع
ام داليا //. اي لازم تتحذرون بالوقت الحاضر ما نعرف الي حيصيرشنو
داليا //اهم شي نحصل ع الطلاق وبعدين نشوف شلون نتصرف
وكفت =. اني ياجماعه ثقلت عليكم بس بمجرد ما احصل ع الطلاق اني اطلع منا
داليا //. هاي شلج بيها شكو داعي الهلكلام
=. ما اريد اسبب الكم مشاكل اني اعرفهم ما راح يسكتون
داليا //. وين ترحين
=. يجوز اروح البيت عمو كريم او اروح الخوالي بالبصره
احسان رد //. انتي تبقيين ايهنا واذا ما عجبج اشوفلج بيت وااجره تكعدين بي حد ما تخلص العده ولكل حادث حديث
بقينه كاعدين وبعدها احسان ومنار راحو وام داليا وداليا هم نزلو واني بقيت اتمددت على فراشي وكل شويه
اباوع للنقال ومتفاجىه عموعاصف حتى ما دزلي لو رساله نمت والصبح كعدت ونفس الروتين وماكو اي شي جديد لمن
ما بالليل اندك الباب واجت داليا وهي جايبتلي فلافل وصمون ومقبلات وكعدنا ناكل انا وهي وكالت
- - يمكن اليوم يخابرج عاصف
= ها ؟
هزت راسها // اي لان هو گلي انو مقنع بهاء ع الطلاق
=. اني منتظره من الصبح ولحد الان ماكو ما اتصل
- - انتظري اذا مو اليوم باجر
شربنا جاي ورصرنا نسولف بشغلات ثانيه لمن ما رن النقال شفته عاصف صار گلبي ايدك داليا هزتلي راسها
- - - شبيج اخذي شهيق وزفير ولا تبينيين انتي خايفه
صرت اتنفس شهيق وزفير رديت بهدوء= الو
:: الشيخ يسال انتي نظيفه
= يعني شنو
:: احم يعني انت طارحه نظفتي لو بعد دم يوكع عليج
بصراحه استحيت من كلامه بقيت ساكته هو رد بعصبيه :: لا تسكتين جاوبي
= نظيفه
:: خوش هذا الشيخ وياج
- - الو
= الو
- - اشلونج بابا
= الحمد لله
- - بابا انتي تقبلين اتوكلين عمج عاصف للطلاق من بهاء
= بلي شيخ
- - تمام
وبعدها انسد التلفون بقيت اباوع الداليا وفجاه وصلتني رساله وبنفس الوقت وصلت رساله الداليا انو انا انفصلت
ما عندي وصف الحالتي لان ما عرفت اوصفها بصراحه اي شعور اتجاه الصار ما عندي بالعكس فراغ خلو من اي
مشاعر لا مشاعر فرح ولا حزن ولا حتى خوف ولا سكينه بهاي الاثناء داليا خابرته وفتحت الحاكيه
- - الو مرحبا استاذ عاصف
:: اهلا ست داليا
- - بلا زحمه اريد اتدزلي خط الطلاق اقصد تصورها الي
:: وليش ؟
- - حتى موكلتي تتنازل عن الدعوه ارفق الورقه بالشكوى وهنا يتم التنازل
:: المهم ست هي قابله وراضيه
- - اني ما شفتها بس اكيد هي قابله
:: الحمد لله
- - يبقى اخوها الزغ...
قاطعها :: ست داليا اخوها ابيت جده وهي اول وتالي ترجع للبيت لو انتي عندج راي ثاني
- - احم لا اني الحقيقه بعدني ما شايفتها
:: وشوفيها وخليها هاي الفتره يمج انا مأمن عليها عندج
داليا //. اا.... قاطعها :: ست لا تقاطعيني الي اريد اكوله خليها يمج ترتاح وتالي ترجع معززه مكرمه وارد
واكرر انا ياست داليا واثق بيج ومن ترد وجدان ترد بكيفها بدون محد يضغط عليها هلخليتها يمج براحتها بس
اهم شي تفهمينها اتدير بالها على نفسها هسه هي مره كاظه عده وانا واثق بيها فلا تتصرف تصرف تندم علي
داليا بابتسامه // ان شاالله ما يكون خاطرك اله طيب
:: واي شي تحتاجينه او هي تحتاجه بلغيني يكون يمج بنفس اليوم
- - شكرا ما تقصر
:: فيمان الله
- - الله وياك
داليا سدت التلفون وهي فرحانه باوعتلي سالتني // شبيج وجدان
= دا احس عمو ضايج
ضحكت //. هههه ضايج وبس شويه وينفجر
= بس هو ما گال خلي ترجع
- - هو ما يكول هو يريدج انتي ترجعين من نفسج
بقيت ساكته اتقربت مني داليا //. بشنو تفكرين
= ست اني مستغربه ليش عمو ما يگول خلص طلكناها خلي ترجع
- - شقصدج ؟
= اقصد يجوز عمو عاصف ناويلي على نيه
داليا // شنو يعني ؟
= يقتلني
داليا عكفت وجهها // معقوله انتي شدا تحجيين ؟
هزيت راسي = اني الي اعرفهم زين
- - يعني قصدج هو جاي ايبرد عليه وينطيني الامان وبعدين يجي ويقتلج
= بلي وخصوصا هسه ما ظل عندي عذر لويش ما ارجع فهو هالشكل خلاني بس حتى يقتلني حتى محد بعد ايلومه
- - هذا اتهام خطير وحد
= الي سمعتي اني اعرفهم مستحييل يسامحني ع السويته
داليا طمنتني // لا تخافيين ما يگدر يسويلج شي
= منو يمنعه انتي ما تعرفينه لاقانون ولا ناس توكف بوجهه
داليا تعض بشفتها عضات بسيطه بعدها حجت //شوفي وجدان انتي لازم تكونين اقوى من هالشي انتي ما سويتي شي خطا
واذا على طلعتج ف انتي خفتي والتجاتي الي وهسه انتي گاعده بمشتمل ابحدج مشتمل منفصل يعني محد وياج ف انتي اطمني
= الله كريم اني ما اريد اسويلكم وجع راس
- - لا اي شي ما راح يصير
بقيت ساكته والملم بحلگي داليا ردت // وجدان عندج حچي كولي خلي اسمعج
= يعني اني شنو راح اسوي ؟
ابتسمت /. قصدج الخطوه القادمه
هزيت راسي =. بلي
حمحمت // هسه نرتاح وبعدين نتصرف اخذي علاجج ونامي وارتاحي ولا تفكرين بااي شي المهم خصلنه ع الطلاق
وهاي الافكار الي براسج تشيليها لو كان عمج يريد اياذيج صدگي واني بالمكتب يرفع عليه مسدس ويكلي اتصل بيج تجيين
او حتى هو يجبرني ادلي بيج عمج يريد يلم الموضوع بدون محد يعرف وبااقل الخسائر
ابتسمت //. ياالله حبيبتي تصبحين على خير
راحت داليا واني اتاكدت من الابواب حاولت انام رغم تتهيا الي اي حركه انو عاصف راح يجي ويقتلني ما اعرف
ليش هذا الشعور انتابني فجاه
يمكن لان ما كال راح اجي واخذها او خلي ترجع غفييت وكعدت الصبح واول شي سويته انو باوعت للنقال
عسى ولعل اشوف عمو دازلي رساله او كلام لكن شفت رساله من منار وهي تكلي //. اخيرا الف مليون مبروك
واحسان الي كاتبلي // هذا اسعد خبر انتي هسه انسانه حره ولازم تبدين حياة حديده وتنسيين كل الي مريتي بي
وابد ابد ما تفكرين بلي صار كابوس وانطوى وبعد ما يرجع الايام الحلوه مقبله والامل موجود
///////////////////
عاصف
بعد ان حجييت ويه بهاء الصبح وسايسته وقنعته بالطلاك وهذا الشي حتى يحفظ كرامته وما ينطي مجال
البيت مهدي وحتى امه يسمعون بالشي الي صار ويكثر القال والقلت وتكبر المشكله قنعته يطلك وقبل ما تنتهي
العده يرجعها
هو وافق على مضض رحت على شيخ عالم ديني وسولفت ويا وهو انطا رايه بالموضوع انو لازم اخذ
منها الوكاله حتى اطلكها من بهاء وفعلا خابرتها وسالتها وهي بتردد جاوبت بعدها تم الطلاك واعرف بهاء طلك
وهو ما موافق يطلك واعرفه من طلكها ناوي الها على نيه سوده لان ادري بي مستحييل يسامحها لذلك انا قررت
اخليها يم المحاميه لحين تكملة العده وبذاك اضمن ما راح اياثر عليها وترجع اله لان ما ردت ايشوفها او يحجي وياها
لذلك حاجيته قبل ما يجي الشيخ
:: اسمع بهاء البنيه وره ما اتطلكها لازم تلزم عده ومن حقك ان ترجعها بهاي الفتره وانا اشوف انو طلاگكم محد يعرف
بي مثل ما وصيتك
:: اريده يبقى محد يدري انت عدك اثنين نسوان ليله يم هاي وليله يم هاي ومن تريد تجي لهنا يومين تلاثه عادي
بس مثل ما گتلك يبقى ابيناتنا محد يدري انت اول وتالي ترجعها
رد عليه بنبرة تهديد // اكيد بس خلي الگفها اله ابجيها على زمانها
هزيت راسي :: اي هذا حقك انت بكيفك تريد تكول طلگت تريد تسكت انا عن نفسي ما اتدخل بيكم بس بنفس
الوكت ما اجبرها ترجع الك
بهاء// ها عاصف شو بدلت كلامك
:: على كيفك ما بدلت خليها نطيها فرصه تراجع بيها نفسها وانت هم
- - انا شنو ؟
:: انت هم فكر زين يجوز تطيب نفسك منها
اتنفس بعمق // عاصف انا طابت نفسي منها مو اليوم لا من اول يوم زواجنا
:: جا خليها تمشي بحال سبيلها وعوفها
هز راسه // لا مستحيل اعوفها اله هذا ما يشم الهوى (اياشر على خشمه )
:: كول انت تريد تطلگها وتالي تسوي مشاكل وطلايب
- - عاصف هي مو تريد تتطلك خلص تتطلك وانا اعرف شلون ارجعها وبذاك الوكت يصير خير
:: شوف بهاء تره الطلاك مو عيب ولا حرام ويجوز يدخل الرحمن بيناتكم
- - عاصف انا ما اتخلى عن شي املكه بسهوله وخصوصا وجدان مو تكول ما تريدني انا هم ما اريدها واكرهها لكن
انا لازم ارجعها الي حتى اذلها
رفعت حواجبي :: الهلدرجه حاقد عليها
- -؛واكثر واذا هسه الزمها ما ارحمها اعذبها عذاب محد شافه
:: ليش كل هذا ؟
- - شي بيني وبينها تكدر تگول سر ابيناتنا
:: طبعا ما اجبرك تحجي لان مثل ما تگول سر هذا هو عمي خلي نسايس ونبرد السالفه مو حلوه بحقك بت عمك اول قبلت
وانوب ما رادت وانوب نهيت عنها واخذتها وتالي شردت الرجال السبع يسوي شغلته بسكته محد يدري بي
هو هز راسه والانتقام مبين على وجهه وعرفت شكد شايل منها وشكد حاقد عليها وصار لازم اتصرف
تم الطلاك وثاني يوم الصبح قررت اسافر كان عندي شغل لازم انهي وصلت البغداد وهناك نزلت بمطعم اكلت لان طلعت
بدون محد يدري بيه وصرت اكل وانا افكر شلون وجدان تكمل حياتها وسط هذا الكم من الخوف والقهر وشلون راح
اتصرف كتبت للمحاميه :: السلام عليكم ست داليا
اجاني الرد بعد فتره // - - عليكم السلام ياهلا
:: ست ضروري اشوفج
- - - تمام يمته تحب نتشاوف
:: اليوم اكيد انا توني واصل
- - ماشي انتظرك الساعه خمسه بالمكتب
وانتظرت الموعد على احر من الجمر ورحت للمكتب لاكتني المحاميه
:: السلام عليكم
اهلا استاذ هلا بيك
باوعتلي وابتسمت // تشرب كهوه
:: ياريت
- - تدلل
ورنت جرس اجت مره يجي عمرها بالاربعين // ام علي كهوه للاستاذ هو يشربها مره
هزت راسها وراحت هي سالتني // اشلون الحجيه
:: الحمد لله هواي تسلم عليج
ابتسمت // تدري اني بس شفتها حبيتها
:: اي هي تنحب الله يطول بعمرها
- - وانت شلونك
هزيت راسي :: بصراحه ست انا جبت هاي الورقه حبيت اسلمها الج باليد طبعا استنسختها ما اعرف انتي تردين
الاصليه او النسخه
صارت تباوع بالورقه // لا راح اخذ النسخه واحتفظ انت بالاصليه
جابت الگهوه انا طلعت جكاره وصرت ادخن واشرب الگهوه باوعت الها شفتها تباوعلي حكيت گصتي وابتسمت
:: اعذريني يمكن اخذت من وقتج
- - لا بالعكس بس اتصور جيتك مو بس حتى تنطيني الورقه
:: الحقيقه لا
— لعد ؟
كحيت :: ست داليا انا اعرف انو وجد يمج وبنفس الوكت انا مطمئن عليها لان انتي انسانه فاهمه واعيه وتحسبين للخطوه
الف حساب قبل ما تمشينها
- - شلون يعني ؟
:: شلون يعني انتي رغم زغيره بس فاهمه ان انتي من اخذتي وجد يمج قد يكون مروءه من حضرتج
او حتى ورقه تضغطيبن بيها على نفسج
ابتسمت وحركت ايدها // هاي ما فهمتها شنو اضغط بيها على نفسي
:: الي اقصده ورقه ممكن تكون ناجحه او ممكن تخسر وانتي الحد هاي اللحظه نجحتي
- - استاذ عاصف حتى نكون واضحين اني اول ما شفتها الوجدان حسيت شكد هي انظلمت لذلك ساعدتها
هزيت راسي :: مو بس هالشكل انتي انسانه هذا شغلج وتردين شغلج ينجح
- - صحيح ليش الكذب كل انسان يشتغل يريد ينجح بشغله
:: اي والا يكون مجنون
— شنو قصدك ؟
:: يعني اذا كل واحد يشتغل ما ينجح بشغله ويبقى مستمر بي وهو يعرف انو شغله خساره ما بي ربح فهذا مجنون. مو صحيح
هزت راسها // تمام كلامك
:: الي اريد اكوله انتي قدمتي الوجد مساعده وهو انو انتي استضفتيها ابيتج
هزت راسها // لا هي مو ابيتي
:: ست داليا وداعتج انا ادري هي ابيتج وهذا الشي انا مو ضده گتلج انتي انسانه ثقه وينشد بيج الظهرولو ادري بيها
مو يمج وحقج دقيقه ما اخليها
- - انا لحد هسه ما عرفت حضرتك شتريد
:: اريد وجد تبقى يمج
باوعتلي باستغراب // معقوله ؟
هزيت راسي :: اي معقوله اريدها من ترجع ترجع بارادتها
- - ما فهمت
:: وجد بهاي المرحله بعدهي ما تعرف شتريد صحيح هي اتطلكت لكن بنفس الوكت ما اريد. احد اياثر عليها
- - تقصد بهاء ؟
هزيت راسي :: مو بس بهاء
- - زين انت شراح تكول مثلا للحجيه المهدي
:: راح اكول انو انا اندل مكانها وهي گاعده ابيتي
- - بس محد راح ايصدكك
ابتسمت وهزيت راسي :: اي صدك حتى انتي ما مصدگتني
ابتسمت // ليش الكذب بلي حتى اني
نفخت الدخان :: ست داليا وجد رافضه ترجع ف انا اخاف اذا رجعت يصير ضغط عليها اكثر وبعدين تشرد
ويمكن اذا شردت هلمره بعد ما نلكاها خصوصا وهي مطلكه
:: الي اريد اكوله انا اريدها من ترجع ترجع على قناعه البيتها
- - وليش ما تكلي بقاءها يمي تريدها ورقة ضغط عليها هي نفسها
:: ها تقصدين اخوها
هزت راسها // مو اقصد اني متاكده
حكيت خدي :: ست من اريد اخذها هسه اخذها وانتي تدليني عليها لكن انا اريدها ترجع من ذاتها ترجع البيت
جدها وتتخطى الي صار بيها ما اريد حالتها تتازم
لمت حلكها // بس هالشكل ؟
هزيت راسي ::لا مو بس هالشكل ما اريد بهاء يندل طريقها لذلك انا كتله هي موجوده يم ناس اصدقائي عائله محترمه
واقصدج انتي واهلج
ابتسمت // الله يخليك بس هم ارجع واسال ليش كل هذا
:: لان بهاء يريد يرجعها
- - يحبها ؟
:: چان ست جان يحبها هسه لا يكرهها فمن يرجعها راح ينتقم منها
- - معقوله؟
:: ليش عندج شك بكلامي ؟
- - لا ابدا بس متفاجئه
:: ست داليا اگدر هسه اروح وياج واخذها وانتي تاخذين عليه التعهد الي تردينه لكن ما اريدها تسمع كلام ايخليها
تتهور وتتخذ خطوه ما محسوبه
هزت راسها // البارحه كالت انو بمجرد ما تتحصل ع الطلاق احتمال تروح البيت كريم او الخوالها
:: شفتي هو هذا الشي الي اخاف منه ف اريدج يا ست بذكائج تبقينها يمج لان اذا طلعت من بيتج راح نظطر
نرجعها البهاء وراح كلش تتاذى واحتمال الف بالميه تنتحر
داليا //. تنتحر
هزيت راسي :: اي ست لان بمجرد رجوعها البهاء انا ما راح يكون الي عليها سلطه باعتبار هي متزوجه
وبهاء مستحييل يسامحها
داليا // بس عفوا منك استاذ اني اجيتكم هناك بالكاع وشفتها وشفتكم واعرف انتو ناس او خلي نكول كلياتنا ناس
تحكمنا عادات وتقاليد ...
قاطعتها وانا ابتسم :: ادري شتردين تكولين بس هاي البنيه اتاذت وكلنه چنه السبب باذيتها يمكن سوء تصرف يمكن ظروف ولو عندي شك صفر بالميه بااخلاقج ما اخليها يمج دقيقه بس اعرف بيج انتي انسانه متفهمه ومثقفه وذكيه وراح تحافظين عليها وخلي اگلج شي ما اريد بهاء يلتقي بيها
هزت راسها // تمام
:: يعني اعتمد
- - الاعتماد على الله
:: ممنون وارجو هي ما تعرف بكل هذا الي صار
هزت راسها // ليش ؟
اتنفست بعمق :: احسن المصلحتها
- - تريدها هي تترجاك حتى تجي تاخذها
:: لا اريدها ترجع من ذاتها
- - ان شاء الله
طفيت الجكاره وكفت ؛: استاذه ما اريدها تطلع الاي مكان تبقى گاعده الى ان تكمل عدتها ويجوز قبل العده اجي
واخذها البيت جدها وهناك ان شااء الله تبتدي من جديد
داليا // تتصور ممكن تتخطى الي صار بيها
:: انا اخليها تتخطى هذا الشي بس انتي تساعديني
- - ليش تسوي كل هذا انت تكدر هسه تجي وتاخذها
:: لان هي امانه عدي ولان انا مسؤول عنها
- - بس ؟
هزيت راسي :: شتردين اكثر من هذا الشي
- - وليش ما تكول ضميرك دا يانبك لان ظلمتها
:: انتي وهي فاهمات غلط انا ما ظلمتها وزواجها كان اختيارها لذلك ياست داليا اريدها تاخذ وكتها ومن ترجع ترجع بقناعتها
- - ولو عندي شك مو هذا السبب بس اوكي تمام
وطلعت ظرف بي فلوس :: هذني باقي اتعابج
ردت بايدها. // لا استاذ اني اخذت اتعابي كاملات
:: مي خالف اعتبريهن هديه من اخ لاخته وهذني ( طلعت فلوس ) مصرف الها بس اتمنى ما تعرف انو
من عدي او انا اجيت وحجييت وياج
- - يعني حتى ما اگللها انت دفعت اتعاب القضيه
هزيت راسي :: اي على اي شي لاتگليلها
- - اها
:: اتمنى تكونين اتفهمتي الشي الي اريده منج
- - طبعا مفهوم
:: واي شي يستجد ارجو تبلغيني بي
- - ان شاالله اكيد طبعا
:: واي شي تحتاجينه. حضرتج ما يردج اله السانج اعتبريني اخوج الچبير بس ساكن بغير محافظه
- - اتشرف انت الخير والبركه ونحتاجك بس بالخير
:: الله يخليج ست ممنون
- - اني الي ممنونه
:: انا اترخص
- - الله وياك خلينه نشوفك
:: ان شاالله فيمان الله
- - مع السلامه
درت امشي رجعت عليها :: استاذه ما اوصيج عليها بس اكمل من خبالات بهاء اجي اخذها
ابتسمت بهدووء// تشرف بااي وقت البيت والمكتب كلهن على حسابك
:: الله يخليج ويحفطج
طلعت وانا حسبات هواي ابالي بس مضطر اشتغل على هواي جبهات
بتت والصبح سافرت الاربيل وكملت شغلي وبالطريق رجعت اتصل بيه مهدي ما جاوبته رجع اتصل
ومره ثالثه بعدها اتصلت امي عرفت انو مهدي صار عنده علم بطلاك وجدان وگفت على صفحه وخابرت امي
هي ردت // ششني وين
:: شغل حجيه
- - هذا بهاء گال المهدي. على الطلاك ومهدي اتخبل وصار يصيح ويتهدد
:: عليمن يتهدد
- - عليمن بعد على وجدان وبس اكظها اشرب من دمها واكبر واحد ما يكضني عنها
:: هو هسه وين
- - شمدريني ما تعرفه انت مهدي
:: هسه ارجع ونتفاهم
- - يمته تجي
:: باجر حجيه انا بالطريق
- - يمه خابره وسكته و اكف ويبعبع
:: ونهاد ويا
- - لا ما ادري شعجب
:: هسه اتصل عيني خير
اتصلت بمهدي جاوبني // انت يا خي ما تكلي وينك
:: العب مهدي وين يعني بالشغل
- - ما كلت تلعب بس من اتصل ليش ما تجاوبني
:: مو اگللك عدي شغل مهم شكو مهدي
- - بهاء گلي طلك بت سعدي
:: قرة عينك
- - شني قرة عيني شبيك عاصف مو جنك تتمهزا
:: شني تريد اتگلي انت ما راضي على طلاكها لو ما فرحان
- - اي ما قابل ليش طلكها
:: الخاطر بتك
- - انوب خليت بتي بالوسطه
:: شنو ما قابل
- - عاصف مو وكت شقى
:: لا منو گلك جاي اتشاقى
- - عاصف تره بهاء گلي البت شارده
رديت بنتر :: ياكل تبن
- - ها
:: اي شو صار يمشي ويتقول اجي اكص السانه
- - والمحاميه
:: المحاميه انا خليتها ابن اخوك جارم بيها ومطرحها ليش ما رضت بي ورضت بغزوان
- - هي وين
:: موجوده البارحه رحت شفتها واطيتها مصرف
- - اي وين ؟
:: مهدي لا تصيح شتريد منها
- - بت اخوي غصبا ما عليه اعرف هي وين واذا طالعه من الطريق اعرف شسوي
:: شتسوي
— —اذبحها
:: اكلك مهدي انت ناسي انت اتكترت من بت اخوك واولاد اخوك وانا المسوول عنهم
- - بس من توصل للعرض ......
قاطعته :: مهدي احجي عدل شي ما تعرفه لاتحجي بي الولد ما يريد البت والبت ملت وانا الطلكتها منه بعد شني
- - هيج كل وحده ماله تتطلك محد بقى عد الثاني
:: گتلك شابعه ضيم
- - يعني افهم من كلامك انت تندلها
:: شني اندلها اكلك البارحه رحت شفتها انا مامنها يم ناس
- - وليش ما تجيبها اهنا
:: حتى هذا الزمال ما يحاول اياثر عليها ويسوي مشاكل ويرجعها
- - يعني شنو ؟
:: يعني اطيعني انت ما عليك وحتى لو كالك اريد ارجعها واخليها خدامه الساره ومن هذا حجي المسلسلات كله منك
العاصف وانت بكيفك تريدني اردها على بتك شريجه ما عدي مانع بس هالمره بشروطي واول شرط تگعد وياها بنفس البيت
- - ها ؟
:: اي چا هي مو وحد حالها من حال بتك ولا تنسى هو خطبها كبل لا ياخذ بتك ورد نهى عليها
- - وهسه انت اتفطنت تريد تتشرط علي
:: اي لان البنيه يتيمه وامانه ومن اخذها ويا دولبها عاد اخليها يم بتك حالهن سوا وعينه عليهن
- - هذا مو موضوعنا عاصف الفرخه وين ؟
:: موجوده واندلها عد ناس ثقه اعرفهم مثل ما اعرفك وكل سبه وكت اروح اشوفها والفرخه على گولتك ما تريد بهاء
عاد خليها تكمل عدتها وتالي اي واحد يخطبها نزوجها ونفتك من بعبعة بهاء
:: ومن يحجي يطك راسه بالحايط ينتبه البيته ومرته مهدي انت بكيفك تريدني اجيبها وياي حاضر وتامر امر بس تره باجر
يردها انا اعرفه تدري بي ايريدها وانت بكيفك ها شكلت
- - شكول عاصف بكيفك بس مو تالي تكعد تلوم
:: هههه الوم بيمن رووح مهدي ما عليك الك الصافي
- - اريدلي مصرف
:: رووح الجابر انا مخلي يمه فلوس واخذ هسه اخابره وبلكي شويه تلزم ايدك تره هالايام السيوله قليله
- - - بعد انت تعرف البيت والجهال ولا تگل الامي
:: استغفر الله (هزيت راسي ) روح الجابر اخذ هسه اخابره فيمان الله ها مهدي صدك انت كلت المرتك على طلاك بهاء
- - لا بعدني
:: لا تكللها اتكل الرجاء وهذني ما يسكتن ويسمع بهاء ويعند ويردها وانوب تعال يابوي شيلني
- لا ما راح اگول
:: خوش الله وياك
اعرف الفلوس تاخذهن نهاد وما اعرف شتسوي بيهن لذلك لازم اخلي يعتمد على نفسه وفكرت افتح له محل مواد غذائيه جمله
يكعد بي ويبيع ويشتري اقلها بلكي من يتعب يعرف قيمة الفلس
رجعت للمزرعه والكل مترقب الي راح يصير الكل خايف من الخطوه الجايه خصوصا وانو بهاء صار انسان لا يطاق
والكل عنده تساول وكلام لكن ساكت اما انا فكل الي يهمني ان ابعد بهاء عن وجدان هذا اهم شي عندي ولان ما
اريدها ترجع له وما اريد هو يشوفها او يسمعها او يحجي وياها وما اريد اياثر عليها
وصرت كل فتره اروح اشوف المحاميه وانطيها مصرف الها وحتى ما صرت اسال عنها
ولا بمره حاچيتها او راسلتها وكل شهر اروح اشوف هشام واطمنه عليها وصار لازم احچي ويا وافهمه كل شي
ولازم اخلي بالصوره وهذا الشي ما يصير اذا مو امي تكون وياي
وتقريبا كملت العده وخليت الها اسبوع اسبوع للتاكيد
الى ان بيوم انا چنت بالحقل واجاني تلفون
:: الو
اشلونك عاصف
:: اهلا منو وياي
اني ام احسان
:: هلا خويه هلا بيج شلونكم
الحمد لله الحجيه شلونها وجدان وعلاوي
:: احم الحمد لله كلنه زينين
عاصف رايدتك بشغله ضروري
:: اي اتفضلي
مو مال تلفون اريدك تجي البغداد
:: خير خو ماكو شي
ان شاالله بس الخير
:: يمته
ياريت هسه تجينه البغداد لان الشغله ما تحمل تاخير
:: اي ان شاالله اجي قلقتيني
يا دا اكولك خير اتگلي قلقتيني
ان شاالله العصر اذا الله راد يمكم
تمام واني بانتظارك
شكرا لزيارتكم عالم روايات سكيرهوم
