رواية اغفري لي الفصل الواحد والأربعون بقلم أوتار حزينة
فزيت من مكاني من سمعت عياط اختي
وام ياسين گضبت العگازه وكمت
طلعت اسند عليها اسمع
صراخ امي
«،،،ولكم شكووو شصاير
الصوت جان جاي من المطبخ مشيت اله طبيت
فگيت عيوني من شفت هاشم
شال حنين الدم يفلت
من راسها صحت
بخبال
«،،،وولك هاااي شبيها
اخذها للغرفه فاقده تخبلت عليها ومشيت
وراهم،،،، خلاها على الجربايه اختي
لفت راسها بخاولي تردد
««،،ولج حنين ااكعدي
«،،ولكم خلي ناخذها للمستشفى البنيه
فقدت الوعي ومانعرف شصار بيها
ابويه صاح بخوف كلت
«،،وووخري
وخرت اختي من يمها كعدت قريب منها ضربتها
بهداوه على خدها احجي
بتوسل ،،،وگلبي
يدك سريع من
الخوف عليها
«،،حنين ااكعدي فتحي عيونج
امي اجت تعرج تصيح
«،،، شبيها حنين
خاله ردت وهي تبجي
«،،كتلها جيبي الزاهي ووكعت البنيه وتصخمت
من ورايه
«،،ميسون جيبي مي
ثائر حجه طلعت تركض جابت مي
وشكر وكالت
«،،خلوه شكر بحلكها
خاله ام ياسين خلته، ،،وغسلت
وجهها سمعت بنتها كامت تبجي
اختي راحت شالتها
«،،،ااكعدي يولي
حجيت وضربت على خدها ونت وفتحت
بس مو وعيها مو تمام ابويه
كال
«،،ثائر خلي نوديها للمستشفى
ام ياسين بسرعه بدلي الها انتي وميسون
«،،اي حجي
كمت اسند على عگازي ادحك عليها درت
وجهي ،،،هاشم واكف يم الكنتور
وصافن عليها كال
«،،،عم انت ظل هنا اني اخذها وي اخويه
حجه هيج ومشى من يمنا ضجت كلش وتمنيت مابيه شي جان اني رگضت بيها بس ااخ
من الي بيه
طلعت لبره كعدت بالصاله امي يمي
هي وابويه وصاروا فد مره من وراها وحالي
اضرب منهم طلعن وره مشوار
ساندتها اختي وخاله
مغمضه وتمشي بصعوبه كمت
وكلت
«،،،اگضبوها زين لااتروح تگع وتتاذه بعد
اكثر
«،،،يابه ديربالك على يمامه
،،،روحي بنتي اني يمها
جاوب اختي امي كالت
«،،يارب الطف بيها يارب باوع لحالها ولحال
بنتها
يمامه
امشي واحس الدنيا تفتر بيه وعبالك
اذب رجلي بالهوه اسمع اصوات يمي
ماافتهم شي اخذوني للمستشفى اون وحالي حال
وصلنا وسويلي اشعه طلع عندي ارتجاج بالمخ
وجرح غميج وراه
راسي
مضمد خيطه اليه هن يمي وضعي جان مو تمام
وظليت دايخه مااكدر افتح عيوني
واحس بلعبان نفس
الدكتور من شاف وضعي ماقبل اطلع من
المستشفى خلاني اظل للصبح خاف يصير شي مو زين اني متمدده خلوه اليه مغذي لان ضغطي جان نازل هوايه من ضربوني مسكن حسيت الوجع شوي
خف غمضت عيوني وغفيت
كعدت الصبح ،،،، خاله يمي كاعده وهاشم
كاعد يم الحايط ورافع راسه ليفوك وغافي من
شافتني فتحت سالت بفرح
،،،ها يمه شلونج هسه
سحبت روحي لفوك وجاوبت
«،،زينة
رديت بتعب هو فتح من باوع عليه
نزلت راسي كام واجه ليمي
وكال
«،،الحمد لله على سلامتج ام يمامه
«،،الله يسلمك
خاله جاوبته حجه
«،،اروح اشوف الدكتور حتى يجي
يفحصج ويشوف وضعج
طلع من يمنا رجع وره مشوار ويا دكتور
اجه ليمي فحص النبض
والضغط رفع
ايده وكال
«،،،باوعي على اصبعي
ظليت اتابعه من وداه يمين ويسار
كال
«««،ان شاء الله ماكو شي وعدت على خير
بس اي شي يصير ودوها لدكتور
اختصاص
«««تمام دكتور
«،،،تكدرون تطلعون بس مااريد حركه زايده
خلوها ترتاح كم يوم
«،،،،ان شاء الله
خاله ردت وشكرته طلع من يمنا سالت
«،،تكدرين ادكومين يمه
«،،،اي
سحبت روحي كال
«،،،اروح اجيب السياره
«،،،اي
خاله ردت طلع من يمنا نزلت رجلي من
وكفت دخت والدنيا افترت بيه
لزمتني وسالت
بخوف
«،،،ها يمه دختي
«،،اي شويه
«،،اصيح الدكتور
«،،لااا
اخذت نفس وذبيته مشيت وياها طلعنا
لبره هو نزل من سيارته اجه
علينا بسرعه كال
من مد ايده
««،اساعدج
«،،لاا
جاوبته ومشيت وي خاله صعدنا
ليوره هو صعد وحرك غمضت عيوني تعبانه
وراسي يوجعني وجع قوي
«،،،شلونك وكعتي لخاطر الله
«،،اتزحلكت بالزاهي من غسلت المطبخ
فتحت يباوع عليه بالمرايه رد
،،،مخبله انتي اكو وحده تغسل بالزاهي
شبي المطبخ مو نظيف ويلمع
«،،واهس نظافه بعد
خاله ردت باوعت على الجامه من شفته
كل ساعه يباوع عليه كال
«،،،والله انتي اضرب من خالتي بالنظافه
جهازه دك جاوب
«،،هلا عم لاا لاتجون طلعنا اي كعدت
ووضعها شويه احسن اجي
وافهمك مع السلامه
وره مشوار وصلنا،،،، نزلت وي خاله طبينا
ام احمد طلعت من المطبخ واجت
علينا بسرعه لزمتني
وياها وسالت
«،،،ها حنين شلونج هسه
«،الحمد لله احسن
امشي بهدؤ لاتستعجلين
«،،،عمو طلع واجه عليه كال
«،،،الحمد لله على السلامه بنتي
«،،،الله يسلمك عمو
اخذوني لجوه الحجيه كاعده بالصاله
يمامه بحظنها شافتني كامت
كالت بملامح
كلها قهر
«،،شسويتي بيه يمه حيلي راح
من شفتج شصاير
بيج
«،،قدر ولطف حجيه
عمو جاوب وكمل
«،،اخذوها لغرفتها وخلوها ترتاح
«،،اريد بنتي
«،،،خليها يمي يمه وارتاحي
الحجيه جاوبتني وام احمد كملت
«،،نايمه بحظن امي من تكعد اجيبها يمج
جنت تعبانه ومالي خلك ردت بس اتمدد
بفراشي اخذني للغرفه تمددت
خاله كالت
«،،اروح اسويلج ريوك
«،،اي وانتي هم تريگي تعبتي وياها بهل الليله
«،،،يمه يهون التعب بس ماصار بيها شي
«،،عدت على خير خاله وان شاء الله
خفيفه تصير هالوكعه عليها
«،،امين يارب
خاله جاوبت وطلعت من يمي هي سالت
«،،اجيبلج شي
«،،لا تسلمين
،،،،اروح اساعد خاله بالريوك لان كلنا ماتريكنا
ظلينا ننتضرج الما تجين
بسلامه
راحت من يمي وردت الباب وخرت الشال
من راسي ولزمت الضماد شعري
جان جوه هدومي والقراصه
ماكو طلعته احس
راسي يدك بقوه
خليته على صفحه ورجعت ليوره
سندت ظهري على المخده وغمضت عيوني
من التعب ووجع راسي غفيت
مهيب
لا نمت ولا غفت عيوني من وره حنين
والصار بيها خفت عليها كلش
من شفتها شلون
صارت
كرهت عجزي والصار بيه لان ماكدرت اني
اخذها واوديها للمستشفى هاشم الي اخذها وهالشي وترني كلش لان
اعرفه عينه منها وهي تكرهه وتضوج
منه
خابرت خاله ام ياسين اكثر من مره
وطمنتني عليها وجه الصبح تعبت كلش،وغفت
عيوني فزيت وكعدت من سمعت
حركه يمي جان ابويه
كال
«،،،،ها يابه كعدتك
«،،،اجتي ام يمامه
«،،،اي والحمد لله عدت على خير الوكعه
سكتت سال
،،،تتريك
«،،لاا مااريد هسه
«،،،ادكوم اتغسل
،«،،،اني اكوم يابه اخذ راحتك
«،،تمام من تريد شي صيحني
هزيت راسي،،،،، طلع من يمي وره مشوار
كمت اسند روحي على العگازه غسلت
وطلعت اريد اشوفها جان
ماكو احد بالصاله سمعت صوتهم
بالمطبخ
مشيت لغرفتها وكفت يم الباب جان مفتوح
شويه دكيته ماردت خفت وعبالي
بيها شي
دفعته وطبيت شفتها مغمضه وتتنفس
صفنت على شعرها وخلقتها صفنه واحد تايه
مايعرف شلون يحجي ويگول
الي بگلبه
خفت احجي اكول اني احبج واريدج زوجه
وحبيبه وام بيتي واسمع منها الرفض
لان اعرف بروحي شسويت
وشلون تركت اثر مو
حلو بيها
«،،،مهيب
انداريت من سمعت صوت اختي اجت ليمي
صافنه عليه كلت
«،،اجيت اطمن عليها
دحكت عليه بنظرات خلتني ادير
وجهي منها كالت
«،،امشي اتريك
«،،اي
مشيت من يمها رحت للمطبخ طبيت
الكل كاعدين عيوني راحت لهاشم
والمزاج تغير شاف نظراتي
كام وكال
«،،اترخص اني لازم اروح ام احمد تروحين
اختي دحكت لامي ابويه كال
«،،،روحي يابه وراج بيتج ورجلج وهم
ولدج ظلو وحدهم
«،،،والله اريد اظل بس تعرفون الوضع
ضجت وصرت اعصاب بس ماحجيت شي
رحت كعدت خاله كالت
«،،لاتشيلين هم يمه اني يمهم وحنين باجر لو عگبه
تصير زينه وادكوم وياي
«،،،راح امر عليكم باجر العصر
«،،هلا بيج بنتي
ابويه رد هي راحت اخذت جنتطها وطلعت
وي هاشم كلت
«،،،يابه خلي نجيب وحده وي خاله ام ياسين
«،مايحتاج ابني اني اكدر على البيت وحدي
«،،خاله الوضع اختلف منا امي بعدها رجليها
منا اني مكسر اجر بروحي جر وياسين
بركبتج وحنين هم تاذت ونامت
بالفراش يعني انتي
شتريدين،،، يصيرن راح تتعبين
ويفين حتى حظج
«،،اني راح اسلم الشغل لابو رسول واظل يمكم
ابويه رد امي كملت
«،،اي ظل يمنا منا الما ادكوم البنيه على
حيلها
«،،يمه خلي نجيب عامله لان اعرفها راح
ادوس على روحها وادكوم
على الشغل
«،،لا يمه اني ماراح اخليها وكعتها قويه سوده
عليه وتاذت مو مال تعاند وادكوم
تشتغل
خاله ردت كلت بضوجه
««،يعني انتو ليش ماجاي تقبلون اجيب وحده
توكف بدالها منا الما اصير زينه
«،،والله اخاف وحده غريبه اطب بيتي
امي ردت خاله كملت
««،واني هم والله اخاف منهن خليني وحدي
احسن مااظل افتر وراها وعيوني
عليها
«««خاله انتي طلعتي اضرب من امي بالواهس
ابويه كال
«««ابني كتلك اني راح اظل بالبيت هم ارتاح
شويه من الشغل وهم تظل عيني
عليك انت وامك والبنيه
««،شلون حظ ياربي تگومنا كلنا براسك
انت وام ياسين
امي حجت بقهر رد
««شده وتروح ام منير خلي بس اطمن على هاي
البنيه والله من شفتها غركانه بدمها
مااعرف شصار بيه لشتي
كلها ماتت واذكرت
مهيب من
انضرب
«««الله لايعودها لا علي ولا على حنين
«««امين يارب
خاله ردت كلت
«،،يابه وديها العصر للدكتور اختصاص يشوف
وضعها
«««اي عجل شلون لازم اخذها بس اذا اخذ ام
ياسين منو يظل يمك انت وامك
«،،ماعلينا شي هي ساعه زمان تروحون وتجون
«،،تمام ابني
يالله اروح اخابر ابو رسول وافهمه
الوضع
طلع من يمنا امي كالت بقهر
«،،،عين الما صلت على النبي فگن عيونهن عليها
الما صخمنها للبنيه ظلن يحجن
شكد حلوه وبنتج مثلج تخبل ومبينه ام
بيت ومعدله الما وكعت وفان
حتى حظها
ذبيت حسره وكلت بگلبي
«،،هي هاي الي جنت احلم بيها واريدها
مرة اليه
حمزه
غاده زعلت عليه زعل ثگيل من وره السالفه
السوتها بنت عمي الچلبه ايام مرت وهي
نفس وضعها احجي وياها
تجاوب على كد
السؤال
لا ضحكه بعد شفت ولا دلال ولا سوالف
حلوه كاعدين على العشه اعاين الها اكلت قليل
وكامت حبوبه حجت
«،،،،مااكلتي يمه
«،،شبعت
ردت وطلعت من يمنا العيون صارت عليه ذبيت حسره جعفر حجه
«،،،شودااك عليها
«،،،اسگت تره واصله حدها
جاوبته بضوجه عمه كالت
«،،،،غلطت يمه وزعلتها عليك
«،،،يمه رحمه لاهلج انه اشم گفه ايدي حتى
اعرف هالسااقطه جانت جاي
واكو شي براسها تريد
تسوي بيه
جاوبت بغضب رانيه كالت
«،،،لا والله انت شمدريك هي جانت تريد
تسوي هيج هو احنا انصدمنا بالسوته ولحد
هسه مو مصدكين الشافته عيونه
والسمعته اذانه
«،،حسبي الله عليها لو ما غاده تسجل كلامها
جانت تلبست براسك يبن الخايبه
حبوبه حجت رديت بغضب
«،،،منهي الي تتلبس براسي وحگ هو الله
اخلي جيله براسها ومااخذها مخبل انه انزل
حرمه على غيده ومنهي گوثر
الي رفضتني من وره البيه
«««والله عرفتها وغاد هم عرفت هي خلت عيونها
عليك من شافت الدلال الي انت
مدلله الها
رانيه حجت وكملت
«،،وكلتها اخذي حذرج منها هاي مو شويه لاتروح
تسويلج مصيبه لچن ماتصورت هيج
تسوي
«««وسوت واكلت تبن وهاج شوفي انجتلت جتله
مووت وهالخميس عقدها على رفيج
عمي
جعفر حجه حبوبه ردت
«،،حيل بيها عساها بجتله صبح ومسيه من
هذا الزلمه
كمت وطلعت من يمهم غسلت ورحت لغرفتي
طبيت هي كاعده ترضع علي هم تجنب
النظر اليه
رحت كعدت يمها كلت
«،،تالي وياج ياغيده تره جاي اتعبين گلبي
بهل الزعل
ماكو رد
«،،يبنت الناس افهمي انه ماحبيت ولا راح
احب غيرج وانتي سمعتي
شحجيت بعد ليش
هالزعل
ظلت ساكته ضجت وكلت
«،،شلون يعني انه راح اظلن احجي وي روحي
مثل المخبل
عاينت عليه بعيون مغوركه وكالت
«،،ليش رحت الها
«،،ياطلابه روحتي عليها
جاوبت وكملت
««ولج بويه افتهمي عليه
«،،اني افتهم حمزه
نترت بغضب اخذت نفس وذبيته
كلت
«،،الله ماطولج ياروح
دارت وجهها كملت
«««غاده هي اجت لبيتنا وندهتني وعدالي بيها
شي ولا ليش تجي بهل الساعه
«،،ااعرف الصار وسؤالي وااضح انت ليش
رحت عليها ليش ماكتلها امشي
نحجي جوه
«،،كلت والله كتلها امشي نحجي يم جدي
لجن هي كالت لا اريدن احجي
وياك انت
«،،،ااي انت هي رادتك انت وركضت الها
جاوبتني وكامت تبجي كلت
«،،،بويه كافي تعذبين بروحج وبيه انه
والله مارحت الها الا عدالي
صاير شي مو زين
ماردت كامت تشهك بصوت قوي حجيت
بغضب
««،من سااعه السوده من رحت عليها لو ميت
ولا راجع للبيت
«،،ليييش تدعي على روحك اترريد تحرك
گلبي حمزه اكثر ماهوو محروك
صاحت بيه علي عاف الرضاعه وكام يبجي
وهي ويا الباب اندك صحت
«،،عوفونا وحدنا
انفتح طبت عمه وحبوبه كالت
«،،،يمه استهدوا بالرحمن واذكرو الله
اجت ليم غاده كعدت اخذت علي وكالت
«،،رقيه اخذي منا
«،،اي يمه
عمتي اخذت ابني وطلعت من يمنا حجت
وياها
«،كافي بجي يايمه ولاتخلين هاي الجلبه تفرح
بهجمان بيتج
ماردت ظلت تبجي كلت بعصبيه
«،،لا خليها تبجي وتنوح بوجهي
عاينت عليه كملت بغضب
«،،وولج هااي وانتي سمعتي شحجيت
وياها وهيج سويتي لو حاجي غير شي
جان شسويتي
««،شتررريد تحجي حمزه كوول ااحجي
لا ليش تحجي مو انت سويت
ورحت تركض الها
جدي طب وكال
«،،حمزه تعال بويه
نفضت دشادشتي وطلعت صاير نار من
الكاعد اشوفه منها رحت ويا للمجلس كعد
وكال
«،،اكعد يمي
كعدت ساكت بس صاير اعصاب كال
«،،هونها وانه ابوك
««،بويه ماجاي تهون
كلت هيج وذبيت حسره رد
،،،حگها وانه جدك حرمتك تغار عليك وغيره
الحرمه الي تعشك زلمه تصير
بعله
عاينت اله كمل
«،،سايس بويه ،،، اخذها بالهدواه لاتعصب
وياها ولا تشد رخي خلها تحجي
وانت بس اسمع
ذبيت حسرات مو حسره حبوبه طبت وكالت
بقهر
«،،امشي عليها ماجاي تسكت البنيه ترضع وموزين
لا عليها ولا على ابنك القهر
كمت ورحت لغرفتي طبيت وسديت
الباب تبجي بصوت قوي
وتشهك كلت
«،،عفيه دموع ماتخلص
«،،عوفني حمزه واطلع
رحت كعدت يمها كلت
«،،غير لو اكدر اهدج
جاوبت وكملت
«،،والله لا روح ولا جسد صاروا اليه كلهن
صارن بايدج امانه وانتي عاد
شوفي روحج كد
هالامانه لو
لااا
عاينت عليه الوجه صاير دم والعيون
تبجي كملت مبتسم
«،،غيرتج عليه حلوه لچن تعبت حالي
ياجمره گلبي
ردت عليه بشهكه
«،،لوو اني مسوي هالشي حمزه جان سكتت
ابن خالها اجه بين عيوني وضجت كلش
كملت
«،،جاان تخبلت عليه وسويت اكثر من هيج
درت وجهي كالت
«،،ماعجبك كلامي موو
«،،شلون يعني راح نظل هيج مجافين والزعل
بينا
حجيت بتعب جاوبت
««،من ايدك الصار
«،،ولج افهمي انه مااكدر على زعلج اضيعن
غاده واحسن روحي تايه بلياج
زادت بالبجي قربت واخذتها لحظني
رفضتني وكالت
«،،عوفني حمزه
«««المن اعوف بويه والله عليل ظليت انه
بلياج
بستها من راسها وكملت
«««،انه الله بلاني بغيره زايده براسي ومن
شفتها بهل الليل،،،،جايه اخذتني غيرتي
عليها ولو غريبه هم
تاخذني غيرتي لان انه هيج وراح اظلن
هيج طول عمري
وخرت بفزه من حظني وردت بغضب
«،،،خلي تاااخذك غيرتك على االگحااب هي
لاااا
«،،صاار ادللي بس اهدأي
«،،كاعد تاخذني على كد عقلي موو
««لا بويه والله جاي احجي صدك
اشرت باصبعها
«،،والله ياحمزه اذااا بعد شفتك واكف ويااها
او حاجي وياها كلمه ماتلوم الا
روحك
ابتسمت وجاوبت
«،،شسوين يعني تجتلتني يله سويتها مره
وتكدرين تسويها مره اللخ
بس الامان بويه
افتحي
تخبلت وكامت تگزكز ومااشوفها غير تعضني
من صدري بقوه حسيتها انتقمت مني
بهل العضه لچن خربت
ضحك
هدتني تتنفس قوي كلت
«،،،برد گلبج
«،،،لااا
نترت وكامت من يمي گضيتها بسرعه وجريتها لحظني كعدتها صاحت
«،،عوفني خليني اروح اجيب علي
«،،،مو قبل مااخذ حگي منج
بسرعه بستها من الشفه وقسيت عليهن
دفعتني بالاول ورفضتني
لميتها لصدري بقوه
اريدن نفسها
يطب بريتي
هدأت بحظني بعدين،، بادلتني
لهفتي احلى شي
من باستني من
رگبتي وكالت
«،،،انت اليه بس اليه وبسجن مؤبد طول
الحياه
ليلى
صرت بالشهر الثالث ووضعي شويه تحسن
ووكمت مااذب من راسي مثل الاول
ورجعت اكل وزني رجع
وزاد كلش
وهالشي ضوجني حاولت مااكل هوايه
بس من يجي الليل انفجع على
الاكل اذكرت غاده جانت
هيج وكلت هاي
اني مثلها
سويت تعلوله لاهلي ووديتها الهم
قائد اخذ مالتنا وصعد قبلي رحت وراه
طبيت غرفتنا كاعد متربع
ومشغل التلفزيون
سال
«،،،شتريدين تشوفين
««،فلم اكشن
غمز ورد مبتسم من كعدت يمه
«،،،ها يعني مو رومنسي
«،،لااا اكشن
««،مصممه
«««اي قائد وبطل تغمز تره اعرفك شتريد
«،،ههه صايره تلكفيها وهي طايره
«،،ترباه ايدك استاذ
«،،واني اشهد لروحي
كمت اكرز كلت
«،،تعرف اليوم خاله رباب خابرت ماما
وكالت الها اكو شيخ متقدم لجنات وهي
رفضته
«،،،شيخ شنو جامع لو يعني عشيره
««،لا شيخ عشيره وابن ناس معروفين بعقوبه
«،،،وهو وين شافها لجنات
«،،يصير المدير مالتها
«،،،ها شسمه ماعرفتي
سكتت اريد اذكر اسمه كلت
««،يمكن اسمه ارشد
فك عيونه ورد
«،،ولج هذا اعرفه ارشد ابن شيخ تميم
«،،اي هو هذا اسمه بس منين تعرفه
«،،هذا شيخ عشيرتنا
««،حلو والله يعني تعرفه معرفه شخصيه
«،،لا من بعيد اعرفه بس هو يصير گرايب
عم محمود ابو مهيب ولد العم
«،،،يا صدك
«،،اي وهو اجه وي ابوه بفصل ولد اخته
بذيج المره
«،،،اكلك هو زين يعني خوش رجال
«««اي ليلى الرجال اله سمعته هو وابوه وشيخ
ابن شيوخ والكل تحلف براسهم
والهم وزن يم الناس
ويم الكل
«،،زين اذا هو هيج هي ليش رفضته
سالت رد
«««هاي بعدها ماطابت من السواه ذاك رجلها
العار وهم اكو سبب ثاني
صفنت علي وسالت
«،،شنو هو
«،،،اهلها ليلى صيتهم نجس بين الناس
وهي تخجل منهم ومن سوالفهم وتعرف اذا
قبلت بي راح يفشولها جدامه
«،،،هم صدك والله
«،،،اي تره جنات حساسه كلش وانتي تعرفيها
ماشفتي شلون من جانت مزوجه
ماجانت تجي ولا تروح الهم عزلت
روحها وهي ودانيه من وره
سوالفهم ومشاگلهم
«،،،،،اي والله اذكر هي هيج بس خطيه قائد
اتمنى تقبل بي بلكي الله يعوضها
عن ذاك الحقير ويصير عدها
جهال
«،،ياريت بس اعرفها ماراح تقبل بي من
وره اهلها
«««حرامات والله هيج واحد يروح من
ايدها
«،،زين اهلها عرفوا
«،،لا الحجي بس بين دانيه وخاله رباب
هي حجت وياها حتى تقنعها وماكو فايده
«،،هلو يابه والله اذا عرف خالج التحفه
هو ومرته الحيه فلا راح يعوفها بحالها
الا يخبلوها
«،،اي ماما هم كالت هالشي
اكلت نستله عقجت خشمي وكلت
«،،هاك اكل هاي مو طيبه
«،،هههه يعني اذا مو طيبه تشمريها عليه
«،،،انت تسحك كلشي
جاوبتني مبتسمه كلت
«،،،وانتي هم صايره تسحكين وياي على
الواهس والوزن صاير دبل
«،،،اهوو قائد لاتحجي بوزني تره
متعقده منه
«،،ليش يابه تره صايره تخبلين والسمن
لايك الج
«،،اي وهو هذا الي تريده
«،،،هههه اي نعم
،،،انعم الله عليك بس اجيب اسوي دايت
واروح جم
««،واني وياج
«،،،وانت شكو وياي بنص النسوان
«،،اشجعج ياشريان گلبي
خزرته وكلت
«،،،استقر قائد
«،،،ههههه
خرب ضحك ابتسمت وكلت
«،، انت اكعد يم ابنك منا الما اجي
«،،،ومنو يكول هو ولد
«،،ولد مادام اكل حامض
«،،،ههه منو كلج هالمعلومه بله
«،،غاده هيج جانت وجابت علوش
«،،،بس اني اريد بنيه
«،،،مره اللخ
قائد
تحارشت وكلت
،،،واذا اجانا ولد شراح نسوي
««،هم مره اللخ
«،،،هههه من صدك راح تصيرين ارونبه
«،،بطلت مااريد من هاللحظه انت بمكانك
واني بمكاني
«،،اشعل اهلج غير
«،،اهلي شعليهم
نترت بدلت
«،،اهلي مو اهلج
«،،هم شعليهم
«،،يابه اني
«،،وانت ليش
النكد اشتغل كلت خلي اگلب الموجه
«،،،شوفي البطل راح يموت ويفين حظه
دحگت وكالت
«،،هذا مو البطل هذا الشرير الموخوش
ولد
«،،عبالك تبسمرت
ابتسمت وجاوبت
«،،اي انت هم مثله باد بوي
«،،هههه هاي اني
«،،اي
«،،بس تحبيني وتموتني عليه
تنهدت وصفنت بعيوني ردت
«،،اي وحبي الك ماله حدود
«،،حظي جبير يم ربي وخلاج تحبيني
«،،،شوف ياربي تصوب البطل
«،،،عوفج من البطل خليج بالقائد الي يمج
«،،استقر قائد وخلينا ولو مرة نكمل الفلم
لنهايته
«،،والله مو حلو شايفه راح يموت البطل بالنهايه
«،،،اهووو ليش تحرگ
«،،،غير اخاف عليج تنقهرين وتبجي
عيونج الحلوه
«،،احسك كاعد اجذب عليه حتى ابطل
اشوف والتهي بيك
«،ليش هو اكو احلى مني
ااي اني
جاوبتني مبتسمه تاكل جبس وتمطك
كلت
««،،واني اشهد
سندت روحها عليه ادحك على الفلم
صافن عليها بگلبي شكرت الله الف مره
هي رجعت لحظني وصارت مرتي
وجاينا طفل بالطريق
حسيت روحي جاي احلم واني بعدني
بالمانيا وبعيد عنها بس
صوتها ضحكتها سوالفها
هي كلها خلتني اعرف اني عايش واقع
حلو والي جنت اريده واحلم
بي صار رغم خشوم
الكل
جنات
كلشي اختلف عندي من عرفت باستاذ ارشد
يريدني وجان يحبني من زمان
كمت اشوف الدوام صعب
لان حسيت بروحي مو مرتاحه لوجودي
ويا بنفس الدائره فكرت انقل
لغير مكان
بس،هالخطوه جانت صعبه ومو سهله وتاخذ
وقت طويل وهم اني جنت متعلمه
على اسماء واعرفها ماراح
تخطوه هاي الخطوة
مره ثانيه لان هي ارتاحت هنا واني هم جنت
مرتاحه لو ما حاجي وياي
هالكلام
اسماء طبت حجت
«،،،الله اليستر استاذ ارشد مااعرف
شبي
«،،خير شصاير
«،،مااعرف طلع من مكتبه وصاير عصبي
كلش
سمعت صوته بره وجان عالي هي كامت
وكفت يم الباب اشرت
اليه
ماتحركت ظليت بمكاني ولهيت روحي اشتغل
بالحاسبه سمعته يحجي بعصبيه
«،،هذاا مو شغل ست صباا انتي المسؤوله عنه
لاااتذبيها براس قسم التدقيق
رفعت راسي كالت
«،،خير اشو اسمنا اجه بالهوسه
حجت هيج ورجعت لمكانها بسرعه كعدت هو
طب صاير نار ويا صبا وهبه ومازن
كمنا اني وياها حجه
بعصبيه
«،،ست اسماء انتو دققتو اخر ملف اجاكم
«،،لا استاذ
لييش
نتر جاوبته
«،،لان محد دز النا اي شي
«،،لا دزيته لجنات
هبه حجت كلت
شوكت دزيتي
««،الخميس دزيته وكتلج اشتغلي قبل لايخلص
الدوام
عكدت حواجبي ووكلت
«««هاي شوكت دزيتي وحجيتي وياي هالكلام
«،،هااي شبيج كاعد اكلج الخميس
ردت احجي هو كال
«،،،ست جنات هي دزته الج لو لاا
«،،لا استاذ مادزت اي شي
«،،شلون جنات اني كتلها دزي الج حتى
تشتغلي
صبا حجت رديت
«،،لا دزت ولا شفت اي ملف
«،،،يعني ااني جذابه
هبه نترت بيه استاذ ارشد خزرها بنظرات
تخوف وكال
«،،انتي بعد ماظلين هنااا تنقلين اليوم قبل
باجر
«،،لييش استاذ اني ماسويت شي
حجه وي صبا
«،،ااانتي المسؤوله عن التأخير الصار لان انتي
السبب من سلمتي الشغل الها
واني كايلج اشتغلي
انتي ودزي لقسم
التدقيق
«،،اسف استاذ والله جنت مشغوله بشغل
ثااني
ماااعندج عذر هذا هم شغل ومهم ولازم ارفعه
بعد ساعه للوزاره هسه فورااا
ومااعرف شلون تشتغلي
وتكملي قبل
لايخلص الوقت
طلع من يمنا صاير نار صبا حجت
بغضب وي هبه
عبالي صدك اعتمد عليج بالشغل بس
انتي طلعتي وحده مو كد المسؤوليه
بس مال فره وسوالف
وي ذاك وذيج
احترمي روحج صبا وخليني محترمتج
ولاتخليني ارزلج وانتي بكبر
امي
«،،،ياادبسسز ياحقيره يااام الولد
كبت بينهن ،،، وحده كامت تغلط على اللخ
والتمو يمنا الموظفين والموظفات وصارت
هوسه استاذ ارشد رجع شاف الوضع
صاح بصوت قوي
«،،،كااافي
سكتن من شافنا صاير نار ويخزر بيهن
اشر
«،،وين كاعدات اانتن بسوك شعبي
«،،استاذ هيي
هبه حجت صاح بيها
«،،اااش انتي ولا كلمه وهسه فورا تسلمين
شغلج لاستاذ امجد وتطلعين منا وبعد مااريد
اشوفج بالمصرف مالتي
«،،لا بله ليش هو شنو مكتوب باسمك
لو اسم ابوك حتى تطردني منه
«««الكل تفاجأ من ردت علي هالرد وباستهزاء
عيوني جانت علي شفت الغضب،ترس
ملامحه بعد اكثر وبين جاز على
سنونه لان دمارت گصته
بينت رد
«««ادعي من الله انتي مره ولو جان عرفت
شغلي وياج
«،شتريد يعني تضربني
جاوب بروده
«،،مو رجال الي يضرب مره بس اني اعرف
شلون راح اخليج تندمين على الكلام
الي حجيتي
كال هالكلام وكمل
««،استاذ امجد فورا تكتب بيها مذكره وترفعها للتحقيق لسوء السلوك والتعدي
اللفضي واهمال العمل
هبه انصدمت وماعرفت شتحجي
كمل بغضب
«،،سمعت ااستاذ امجد
««««اي سمعت
«،،،نفذ الامر فورا
،،«تمام
وانتو شكو واكفين كل واحد يروح لشغله
نتر بالموظفين كلها تحركت بسرعه من يمنا
هي طلعت تبجي وراها صبا
حجه وي اسماء
عاكد الحواجب
وضايج
«،،،ست اسماء عوفي كل الشغل واشتغلي
الملف انتي وجنات
حجه هيج وطلع هي ابتسمت وكالت
««،«ماكو ست
تجاهلت كلامها وكلت
«،،روحي لصبا خلي ادزه بسرعه حتى نلحك
نكمله قبل الساعه ماتخلص
«،،،اوكي عيوني بس لاضوجين
جاوبتني وطلعت من يمي مبتسمه اشتغلنا
الملف وكملنا قبل لاتخلص الساعه
دزيته لحاسبته استلمه
كملنا دوام اخذتها وياي،،، وصلتها لبيتهم
ورحت لبيتي وصلت طبيت تعبانه اريد اتغده
وانام شفت يوسف متمدد بالصاله
كال
«،،ها اجيتي خاله
ابتسمت ورديت
«،،لا بعدني
«،،ههه حلوه والله
«،،تغديت
«،،اي بس مو غداج غده امي
«،،ليش بله هااا صدك انت ماتحب الشجر
«،،اموت منه مااعرف شتحبون منه
«،،خفيف على المعده
«،،ههه واني مااريد شي خفيف احب الثگيل
ثريد ولحم وهبر
«،،،على ابوك طالع
««««الحجي عظام وكلنا طلعنا علي بس اختج
نازوكيه طالعه عليج
«««شنسوي مانحب اندوس نخاف على رشاقتنا
«،،،خاله تره انتي سمنتي بهل الشهر
فزيت وصحت
««««صدك ولك
««،«ههه اي والله
«،،خرب بالحظ كله منك ومن تعلوله اخر الليل
«،،اكلي يمعوده اصلا من جنتي ضعيفه مدري
شلون صرتي عبالك سعلوه
«،،هاي اني ولك
«،،،ههه اي وبدون مااجامل
«««ادبسسز ماخذ راحتك بالكلام وياي
«،،ابطل يعني
ضحكت وجاوبته
«،لا احبك هيج
«،،عجل ابشري يوميا اشبعج تصنفين
«،،هههه ماصدكت ولك
«،،انتي كلتي ماعليه اني
«،،اي والله اني كلت وحيل بيه وابو زايد
خرب ضحك كملت
««،اروح اسبح وابدل بس ها شتغديت
«،،دولمه
«،،بله صدك واكلتها كلها وماخليت اليه
«،،لا خليت لان امي دزت جدر صغيره
«،عاشو والله عاشو
«،،ههه والشجر خاله
«،،خلي لباجر
«،،لا خالتو ارجوج ذبي خلصينا منا
بداعه اختج الحلوه
«،،ههه ولك حرامات
«،،والله حرامات احنا ناكله لابو زوعه
«،،خرب بالحظ والله طلعته من عيوني
«،،ذبي وسوي باميه يخني شي ثريد خاله
حتى اضرب بالخمسه
«،،ادلل والله الا اذبه واسويلك الي تريده
«،،كفو والله منج
ضحكت ومشيت من يمه سبحت وصليت
تغديت دولمه وجانت تخبل حامضه
ولاجعه
كملت شغل ورحت تمددت توني غفيت جرس
الباب اندك كمت عبالي دانيه
اجت طلعت سمعت
صوت امي
تحجي
«،،،شعدها نايمه اذن العصر خلي تكعد
طبيت للمطبخ سلمت
«،،هلا يمه
«««هلا عيني توج اذكرتي عندج ام
ولج لاتجين لا تسالين اليكول احنا صرنا
اعداء الج انتي وذيج اختج
اخذتني حاصل فاصل بوستها كعدت يوسف
كال
«،،اروح اصيح امي
«،،اي روح صيحها للگاطعه الخ ولجن ربيت
وتعبت عليجن وانتن ولا وحده
تسال تجي ادكول عندي
اهل اروح اشوفهم
واخذلهم شي
رحت جبت مي وانطيته الها شربت تفر
براسها على المطبخ سالت
«،،،شنو مسويه كاونتر جديد
«،،اي بعت مال بيتي ذاك وسويت لهذا
«،«جان انطيتي النا ليش بعتي
««««مو كتلج يمه بعته واشتريت هذا
«««وبيش بعتي
«««بمليون
«،،،ياا وانتي سويتي باكثر مو
«،،اي
«««غراضج بذاك البيت وين وديتهن
«،،بعتهن كلهن
«،،ها وبيش بعتيهن
دانيه طبت وهم استلمتها ترزل وتعتب
كمت خدرت جاي وحضرت
عصريه حجت
«،،هذا كريم دز علينا ناس يريد يرجعج
هي بسولفها خنگتني ومن جابت سيرته
اختنگت بعد اكثر كملت
«،،كال اسجل بيت باسمها بس تقبل ترجع
اليه وشتريد مهر اني حاضر
وابوج كال خلي ترجع اله
مادام راح يسجل
بيت باسمها
«،،يمه انتي شكاعد تحجين شنو ترجعله وهو
تعرفين شسوه بيها
«،،،ااي لا هو اول رجال ازوج على مرته ولا
اخر واحد راح يزوج
«،،سؤال يمه انتي تقبلين ابويه يزوج
عليج
حجيت سكتت كملت
«،،،شفتي ماتقبلين ولا اي وحده تقبل
رجلها يزوج عليها تعرفين ليش
سكتت وكملت
«،،لان الضره مره علگم يصير بالحلك من
تشوفين رجلج مشاركته وحده ثانيه وياج لا ايامه
الج ولا هو نفسه الج هو گلب
واحد شلون تريدي يتقسم
على اثنين
«،،ولج افتهمي راح يسجل بيت باسمج
وتكدرين تطلبين منه اي
مهر نريدي
«،واني مااريد اي شي منه قصتنا انتهت
وهو اختار حياته واني اختاريت
حياتي
«،،وعاجبج حياتج عيني لا رجال فوك
راسج ولا جاهل
«،،يمه ليش هالكلام تره انتي جاي تقهريها
اختي حجت نترت بيها
«،،ولج ووعيها فهميها المره بلا رجال ماتكدر
تعيش بهل الدنيا
««،اني اكدر اعيش وشفتيني عشت مامتت
وراه
«،،،وشتريدين يمه تظلين هيج طول عمرج
عاله على بيت اختج
«،،يمه رحمه لاهلج كافي تحجين حجي مدري
شلونه شنو عاله اليسمعج يكول
احنا حاجين الج وكايلين
هالكلام
«،،ماايحتاج انتو تحجون الناس اكلت وجهنا
والكل كام يحجي ويكول شعدها
بنتج ماجره بيت وحدها
وكاعده بي وهي
تطلگت من
رجلها
صفنت على اختي ردت بعصبيه
«،،والله من انعل ابو اليحجي وخرب صفحته
الي يجيب سيره اختي على
لسانه
كلت بهدؤ
،،يمه من الاخر اني ماراح ارجع لكريم
لو خله روحه بايدي مو عاد
يسجل بيت باسمي
«،،لان غبيه وثوله ووجه فگر
«،،اي اني فگر بس عندي كرامه
جاوبت انهدت
«،،ابوج ماراح يقبل ومهند هم
«،،استغفر الله ياربي اني مااعرف شاحجي
يعني انتو تعرفون شسوه بيها وجايين
هسه ادكولون ارجعي اله بله
ليش لان يريد يسجل
بيت باسمها
«،،انتي بس اطلعي منها وهي تعمر
«،،اي مو اني خراب يمه
اختي حاوبتها بعصبيه وكملت
«««شبيكم انتو بس سمعتو كال هالكلام گلبتوا
منطيكم شي واعدج الج بشي
امي ارتبكت وعرفت اكو ان بالموضوع انهدت
«،،اانجبي ولج واعرفي ااحجي اني كل
الي اريده ترجع اله لان
اعرفه بعده يحبها
وشاريها
«،واني كرهته وكمت مااطيق شوفته ومستحيل
ارجع لواحد باعني وغدرني وخلاني
شهور نايمه على اذني وهو
مزوج ويگلي ملتهي
بالشغل
سكتت كملت
«،،يمه لا انتي ولا ابويه ولا ابنج يكدرون
يغصبوني على شي اني مااريده
««،اي هو احنا بعد مالنا كلمه عليج تفرعتني
يولي وفلت عيارج
«،،شلون ماتريديني تحجين تحجي
ووصلي كلامي لهذا الي الظاهر انتي
متواصله ويا واكو شي بينكم وكولي،اله
ادكول جنات لو تخلي روحك
بايدها ماراح ترجع الك
ظلت تقنع بيه ارجعله مره بالهداوه مره
بالتهديد بابويه واخويه واني
مو دايره بال
تالي ضاجت وسوتلها زعله وطلعت من يمنا
اختي كالت
«،،،امج عدها تواصل ويا
«،«اي الظاهر هيج
ذبت حسره وكملت
«،«ولج اقبلي بالشيخ واكسري خشمه
«،،دانيه سدي لهل الموضوع
«،،راح تموتيني جنات
مارديت التهيت اغسل بالمواعين
مهيب
ابويه وخاله اخذو حنين للدكتور والحمد
لله وضعها جان زين وماكو خوف
عليها وره ايام رجعت تفتر
بالبيت واسمع صوتها
متمدد بغرفتي
الباب اندك
كلت
«،،تفضل
هي طبت كالت
«،،تريد عصريه
«،،اي وجاي مر يرحم اهلج
وكيك اذا اكو
«،،،اي اكو لان سويت
ابتسمت وجاوبت
«،،عاشت ايدج خلي وجثري لان الكيك
التسوي كلش،طيب
الوجه ضحك وردت
«،،اي وماجاي يظل من وره عمو وخاله
«،،واني هم
سكتت وبعدين ردت
«««وانت هم
الصمت صار بينا بس عيوني ظلت ادحك
الها نزلت راسها وكالت
«،،اروح اسويلك العصريه
طلعت من يمي ذبيت حسره وكلت
احجي اطلع الي بگلبي ارد لااا راح ترفضني
اني ماجنت افكر بالمستوى الاجتماعي
ولا هي ارمله وعدها بنيه
كل همي جان نظرتها
اليه
جفصت وياها جثير وهي تعرف اني
شنو ابو نسوان وعلاقات وتحارشت بيها
اكثر من مره وهالشي
يوگع الواحد من
عيون اي بنيه
مو عاد هي
الي جانت مختلفه اختلاف جبير عن البنات
وحسيتها من صدك تلوك اليه
ورثت جگاره جريت نفس طويل وذبيته
سمعت جرس الباب وره مشوار
صوت ابويه
«،،،تفضلوا يابه
طب وراه قائد وحسين جان محترم
روحه جدام ابويه وماجفص
سلموا عليه وكعدو
يمي
ابويه طلع من يمنا حجه
«،،،خرب حظك عبالك بعدك مكسر
وفاين حظك
«،،اسكت حسين هالمره تختلف عن كل
مره
«،،اي مو عزرائيل هالمره جان قريب منك
كلش
كلت
«،،،قائد سكته
«،،هههه والله مااكدرله
«،،طاح حظك انت ويا
«،،شكرا سيدي
حسين جاوب بنعوصه ابويه طب شايل
مي قائد كام اخذه منه وكال
«،،العفو منك عمو
اخذ الصينيه وخلاها يمنا
«،،جاي يولد لو شي بارد
«،،،جاي عمو لان احنا لو تصير درجه الحراره
خمسين الا نشربه
حسين رد يضحك ابويه هم ضحك وكال
«،،،ههه اي والله صدك
حجه هيج وطلع
«،،شلونك يول مو احسن
قائد سال جاوبت
«،،اي الحمد لله احسن من قبل
«،،يعني جاي ادكوم على رجلك
«،،اي بس بالعگازه
«،،،تاخذ وقت يله طيب لان صوابك
جان قوي
جاوبني حسين كال
«،،شد حيلك ولك والله ضوجه بلياك حتى
كمنا مانروح للگافي من وراك
««،هانت ماظل غير كم يوم وارجع
امشي على رجلي
«،،ان شاء الله اليوم قبل باجر
قائد رد ابويه طب شايل طبله كال
«،،،تعالي بنتي
حنين طبت شايله صينيه ضجت
وعكدت حواجبي من هي اجت ضيفت الولد
خلتها على الطبله من خلاها
ابويه يمهم ومشت من
يمنا
عيوني عليها درت وجهي انتبهت قائد
صافن عليه مبتسم كلت
بضوجه
«،،اشرب جايك
«،،،خلي يبرد شويه
،،،شلونكم يابه وشلون اهلكم
««،،الحمد لله بخير عم
«،،الله يجعلكم يارب اني اترخص منكم
عفت الفلاح يشتغل بالحديقه
«،،اخذ راحتك
ابويه طلع من يمنا حسين اخذ قطعه
كيك اكل وكال
«،،لك هااي شكد طيبه الكيكه ضوكها
قائد يخبل طعمها
اخذ وحده اكل وهم انعجب بالطعم
ابتسم وكال
«،عاشت ايد السوتها
«،،مال بيت مو
«،،اي
رديت اخذ اللخ وكال
«،،اكيد ام يمامه سوتها
«،،يول ازقنب بلا اسئله
جاوبته بنتره صفن عليه وبعدين
على قائد كال
«،،هاي شبيك ولك عبالك دست
على وتر حساس
«،،حسين عوفه
قائد حجه كلت
«،،هذا حاگه جلده
«،،استقر عيني واستر على روحك
لا بكفخه وحده افك براغيك الباقيه
«،،والله وكت اني اصير مكفخه الك
بس،هينه يول اكوم من هالشده شلون
مااگضبك ودك بالصونده
«،،ههه واهون عليك
«««تهون من نعل صفحتك
،،،ههه مقبوله منك لان اعرف النفسيه
صفر
«،،اني زيرو صايره فاسكت احسنلك
وجيب كيكه دكيتها كلها اليكول مو شايف
كيك
«،،لا والله مو شايف هيج كيك حلو
وطعمه ترف
غمز خزرته وكلت بغضب
«،،،حسين اگضب السانك لا اكوم
اگصه الك
«،يول اسكت وخلي راكد
قائد حجه وكمل
«،،شسويتو على ذوله الي ضربوك
«،،نايمين بالسجن وراح ينرفعون محكمه
«،،يعني ماراح تفصلوهم
«،،لا شافصل حسين ليش اني بحال فلوس
سكتت وكملت
«،وحگ هو الله لو ما هذا وضعي جان اني
جاتلهم من زمان وناعل والديهم
«،،عوفهم القانون ياخذ حگك
«،،اي هي بايد القانون واريد بعد الرجال
الي يندك بيه شلون ماافرغ
شاجور المسدس براسه
وراس الي
يشد ظهره بي
الولد كعدو يمي ساعه بعدين طلعوا هي
اجت تريد تشيل الصينيه كلت
بضوجه
«،،،ام يمامه بعد من يجوني اصدقائي
لاتجين ولا تقدمين شي
خلي خاله ام ياسين
هي تقدم
صفنت عليه وسالت
««،ليش سويت شي اني
«،لاا
«،،لعد ليش هيج حجيت
سكتت ماكدرت احجي واكول اغار عليج
كلت
«،سوي الي كتلج علي بدون نقاش
الملامح انطعنت وجاوبت
«،،تمام بس تره اني ماسويت شي
يخجلك مني
شالت الصينيه ومشت صحت
«،،حنين
وكفت واندارت عليه ترددت بعدين
كلت
«،،انتي ماسويتي شي بس اااني
سكتت ودرت وجهي سالت
«،،،انت شنو
شكرا لزيارتكم عالم روايات سكيرهوم
