رواية بنت الكهوجي الفصل الواحد والأربعون بقلم احمد
تميم : رجع لغرفة اديان وهو فرحان واني رجعت طمنت زيد انها ما حجت شي وبقو حازم وامو واختو يم اديان الليل كلو
ثاني يوم الساعة 9:00 الصبح
تميم : يلا جهز نفسك راح نطلع للبيت بعد شوية
زيد : ما اروح
- شنو قصدك
- اريد ابقى يم اديان
- انت متورط بما فيه الكفاية فلا تورط نفسك اكثر
- تميم شلون اعوفها وهي البارحة گعدت
- زيد افهمني لازم نروح للبيت اول شي علمود صحتك ثاني شي تطمنا على اديان وبقى هسا نتأكد انكم بخير
- تمام امري لله
- يلا جهز نفسك بين ما اسجلك خروج
- تمام
رحت سجلتلو خروج وخابرت اهلي يجهزولو فراش بالمضيف وتلاگيت بحازم گلتلو انتظرني شوية وارجع گال تمام ورجعت لزيد
اخذتو وياي للبيت طلعتو اول شي للبيت علمود يغسل ويبدل وبعدها ياخذوه اخواني للمضيف ورجعت على بيتي
جانت امي تريد تسوي الغدا گلتلها عوفيه من نرجع نجيب ويانا واخذتها علمود تزور اديان وخليتها تدخل لغرفتها وطلعنا اني وحازم نحجي
حازم : اي تميم احجيلي
- لازم نطلع اديان
- ليش نستعجل
- انت ماتگدر تبقى هنا دائما ولا تگدر تبقى بالبيت دائما فمو امان انها تبقى هنا
- كلامك صحيح بس لازم ناخذ راي دكتورتها بالاول
- اذا تحتاج دكتورة نجيبلها دكتورة بالبيت
- يعني رايك هيج
- اي رايي هيج وعندي الك مهمة
- وهي
- انو تترك بيتك هالفترة وتحاول تدور على عمامك بدون ما هم يلگوك
- شلون اخذ اديان للبيت وبنفس الوقت اعوف البيت
- اديان وامك واختك الثانية راح يبقن يمي
- لا تميم الي صار وياكم بسببنا يكفي
- اسمعني هسا
- دا اسمعك وفكرتك مو راهمة
- لا راهمة هسا لنفرض تريد تلگي عمامك عندك احد تثق بيه تخلي اهلك يمو
- لا
- لعد امشي وياي خلي نحجي ويا الدكتورة وناخذهن لبيتي ونحاول نلگيهم
- تمام مثل ما تريد
تميم : رحنا سألنا الدكتورة وگالت الافضل تبقى ومن گلتلها نجيبلها دكتورة بالبيت گالت لعد اخذوها بس انتبهولها ولا تخلوها تتحرك هواي
تعاندنا اني وحازم على منو يدفع تكاليف المستشفى بس ما خليتو يدفع لان هو خطية حالتو المادية ضعيفة وتكاليف المستشفى هواي
كملنا تسجيل الخروج ورجعنا للغرفة بلغناهم واخذت امي ومرينا على مطعم اخذنا غدا ورجعنا للبيت قبل ما يوصلون حازم واهلو
جهزنا فراش لاديان اني وامي اني جنت اشيل عنها الفراش وافرشو وهي تعدلو المهم جهزنالها فراش بوحدة من الغرف التحت
امي گالت من يجن البنات يجهزن فراش لوديان وامها گلتلها تمام وبعد ما كملنا بشوية وصلو حازم واهلو واول شي وصلو اديان لغرفتها
بعدها ترخص حازم وطلبت منو يبقى عالغدا وگال لازم يروح عندو شغل قبل ما يدور لعمامو ولازم يكملو هسا گلتلو تمام وراح
خلال هالوقت وصلن البنات حطلي غداي بالاستقبال وهن تغدن ويا ام حازم وبناتها ومن خلصت غدا حطتلي اية فراش وطگيتها بنومة
ياقوت : اول ما اجينا استغربنا ان جابو اديان يمنا بس گالو تميم هيج يريد فگلنا اكيد ببالو شي ودا يسوي الشي الصح
بعد ما تغدينا استرخصنا اني واية من وديان وامها ورحنا لزيد علمود اسلم عليه جان بغرفتو بعد مو ماخذيه للمضيف بين ما يرتاح
اول ما وصلنا جان لحالو وهمزين اخوانو مو يمو لان ما متعودة عليهم واحس نفسي مقيدة بوجودهم اول ما دخلت انتبه هو
زيد : ها ولج خاينة
ياقوت : يااااااا هاي اني خاينة
- ولج طاح حظ حظي لا جيتي لا سلمتي
- تعرف ملتهية بدراستي واعرف يجون ناس غربة عليك بالمستشفى
- بهاي وياج حق شلونج ولج والله مشتاقلج
- تشتاقلك العافية الحمدلله كلش زينة
- الله يجعلج
- صدگ انت تگول علي خاينة وما تحجي عن نفسك
- اني شنو
- ليش ما حجيتلي عن اديان
- شحجيلج عنها
- شوصلك الها وشنو صار بالضبط
- وربي جنت اريد احجيلج لولا هالسعلوة الي وياج
اية : اني شدخلني ابو صماخ
- من جنت نايم يمكم مو گلتلج اريد احجيلج شغلة واجت اية
- اي اتذكر
- بوقتها جنت اريد احجيلج على اديان
- من ذاك الوقت تعرفها
- مادري اگلج اعرفها بوقتها لو لا بس ويا الوقت راح تعرفين كلشي إن شاء الله
- امممممممم راح اخليها تحجيلي .. وغمزتلو
- شنو تروحون اليوم عليهم
- لا يا حلو اديان يمنا بالبيت
- بصدمة .. بشرف امج
- هههههههههههه اي والله
- اريد اشوفها
اية : وين تشوفها امها وامي گاعدات بالصالة تگول رادار مطار يراقبن البيت كلو
ياقوت : المهم زيدون الحمدلله على سلامتك واحنا نعتذر منك لازم نروح نراجع دروسنا وهم نعوفك ترتاح
- مرخوصات بوية الله يسلمج ويعافيج
- مع السلامة
- الله وياج
ياقوت : رجعنا للبيت اية راحت لوديان واديان بالغرفة واني صعدت اراجع لان اني سادس وما اريد تتجمع علي المادة واتورط
مر اليوم ذاك طبيعي تميم بعد ما شفناه لان مگضيها من المضيف للاستقبال ومن الاستقبال للمضيف واكثر اكلو بالمضيف او ببيت ابوه
باليوم الي جابو زيد واديان جان يوم خميس ومرت الجمعة والسبت بدون احداث تذكر وليوم الاحد يلا شفنا تميم من اخذنا للدوام
وبنفس اليوم العصر جنا اني واية ووديان بالمطبخ واخذت جاي للحجية وام حازم وشلون وصلت الصالة دخل علينا زيد ووجهو ما يتفسر
زيد : شنو هذا الي سمعتو
الحجية : باستغراب .. شنو سمعت يمة
- من هسا اگوللكم بس تتحسن اديان اخذها والي يعارض اقسم بالله لا يلوم الا نفسو
ام حازم : منو جاب طاري الزواج من الاساس
- يعني ما حجيتي
- حجيت بشنو
- ولك زياد اليوم اهجم بيت الخلفك
ياقوت : عافنا وطلع بس گوة يمشي واحنا مو فاهمين شي وورا شوية اجى تميم سلم على ام حازم وگال خوما زيد جفص يمكم بشي
ام حازم : لا يمة بس ما فهمنا شبيه
- طاگة عندو الجوزة معليج بيه
- شنو الي صاير
- ام حازم احنا طالبين ايد بنيتكم لزيد ونريد بس يستقر الوضع نزوجهم وبس يجي حازم احجي وياه
- النا الشرف بيكم يمة وما نلگي احسن من زيد لبنيتنا بس انت تعرف الوضع شلونو وهم الراي الها ولحازم اذا وافقو فاني موافقة
- جنا گاعدين بالمضيف واجى زياد گعد يم زيد وفجأة گلو زيد اخذني للبيت ووراها بشوية لگيتو واگف يم بيتي ويحجي على زياد
- ليش يحجي عليه
- زياد گايلو سمعت ام حازم تگول اديان ما ازوجها لاحد ابقيها يمي مستحيل افرط بيها وهو سمع هيج وتخبل عبالو تقصدينو بكلامج مايدري زياد ناصب عليه
- يا يا يا هذا زياد ما يبطل سوالفو
- والله يا ام حازم هم ونستنا بهالبيت تشوفيهم وين ما يكونون ينشرون الضحكة والفرح
- الله يحفظهم الكم ويحفظكم الهم
- ويحفظ احبابج المهم اني اترخص لا يروح زياد يخبل زيد علينا
- ههههههههه تمام يمة .. تميم
- هلا
- ترا اعرف اديان حجت ويا زيد لان من اخذوها ولد عمها جان اكو رقم غريب بتيلفوني وبالاخير لگيناهم هي وزيد
اني ما اگدر اگولك موافقة على سواتها بس اعرف انها حجت ويا الشخص الصح والي بالنهاية قرر يتزوجها بدون اي تردد
واني ما حجيت لحازم ولا خليت وديان تحجي لان نعرف اذا سمع حازم بالي سوتو راح يتخبل عليها فانت فهمو الموضوع
- زيد من انطاها رقمو جان مجبور بسبب عمامها وهو گالي جان ضميرو يأنبو بس لان فكر بيها وهي اخت حازم وهو يعتبر حازم صاحبنا
وجان يريد ينتظر لحد ما يجي الوقت المناسب ويخطبها ولولا اتصالها بيه جان صاير ازود من هالشي وجان اختفت ويا عمامها اذا ما صار اسوء
اما بالنسبة لحازم فراح احجي وياه وافهمو الموضوع وبنفس الوقت اخطب اديان منو
- تمام يمة
- يلا السلام عليكم
- عليكم السلام ورحمه الله
تميم : طلعت من يمها واني مرتاح بسبب كلامها صح انحرجت منها بس يكفي انها هي وبناتها يعرفن بالموضوع واكيد راح تكون ويانا بموضوع الخطبة
ما جان اكو شي محدد ببالي ومن طلعت صار بوجهي بيت عمي ابو ياسمين گلت اروح عليها اشوف شخبارها وارجع
رحت دگيت الباب طلعلي اخوها ودخلت وياه للاستقبال وورا شوية اجو هي وابوها گعدو وياي وحجينا شوية اني وابوها
تميم : اي ياسمين بعدج على قرارج
ياسمين : اي
- يعني ماكو امل تغيريه
- اذا غيرتو انت ماراح تتزوج لهذا ماراح اغير قراري
عمي : تميم ابني خلص طلقها وشوف حياتك ويا بنت الحلال الي تسعدك راح يروح عليك العمر وانت بعدك عزابي
- تمام عمي المهم ياسمين هذا مصروفج وراح انفذ طلبج
عمي : مو عيب تميم تنطيها مصرفها گدامي
- عمي انت على عيني وراسي بس هي بعدها بذمتي وهذا يعني اني مجبور اصرف عليها وهسا استرخص منكم
- مرخوص ابني الله وياك
تميم : طلعت من يمهم بين الضايج والمتوقع جوابها فاخذت سيارتي وتوجهت على عماد وكالعادة ما خابرتو لحد ما وصلت بيتو
وبعدها بشوية اجى ركب وياي گال اخذنا لفد كوفي مشتهي ادخن شيشة ( نارگيلة ) وتوجهنا لاقرب كوفي وگعدنا بيه اني طلبت جاي وهو طلب شيشة
عماد : هسا اجعرلي
تميم : ابن الاوادم هاي شلون رهمت
- ههههههههه ليش
- اولا ما يجعر الا الثور يعني اني ثور واجعر الك معناها انت بقرة ودا اجعرلك علمود اغريك واتزوجك
- ههههههههههههههه خرب يومك ( ضحك لدرجة كل الي بالمكوفي سمعوه )
- دكافي ضحك فضحتنا
- المهم احجيلي شنو مضايقك
- راح اطلق زوجتي هاي هي
- ومنين تتزوج
- ماعرف والله
- صدگ شلون صار اخوك زيد
- الحمدلله زين وخطبتلو اليوم
- البنت الي يحبها
- اي ( عماد اثق بيه واعرف اسرارو ويعرف اسراري كلها ودائما اخذ رايو بالشي الي اريد اسويه ومن خلال الاحداث الي صارت هو لحالو عرف ان زيد يحبها )
- والبنت الي يمكم بعدها مخطوبة
- اي وموعد العرس مثل ما هو
- انت غلطت بهواي اشياء يا تميم
- بشنو غلطت
غلطت بموافقتك على خطبة البنت هاي وغلطت من اخذت زوجتك لاهلها من اجيت لبغداد وغلطت من خطبت لزيد هسا
- عماد ترا هاي الاشياء كلها صارت اجباري
- لا مو اجباري
- فهمني شلون مو اجباري
- ابسط شي خلي نحجي عن زوجتك بما انها موضوعها صار بالبداية
- هسا انت عيني شلون اخذها لبيتي وهي تريد اهلها
- يا اخي مطلعلها اي حجة وماخذها لبيتك ومأجل روحتها على اهلها يوم لو يومين جان گدرت تحجي وياها بغرفتكم ولحالكم وممكن تقتنع
- يا عماد ليش اني بقى براسي عقل من اجيت من بغداد
- اعرف والله بس المشكلة ما فكرت بهيج موقف
- وبالنسبة للبنت الي يمي
- ابسط شي مو موافق على خطوبتها
- على اي اساس ارفض واني جنت مقرر ارجع ياسمين يعني مو مفكر اتزوجها
- ياخي مو الا انت تتزوجها ابسط شي زوجها لواحد من اخوانك عالقليلة تبقى يمكم
- يجوز خطيبها احسن من اخواني
- ويجوز اتعس من اخوانك ويبهدلها طول عمرها
- اهجم بيتو هو والخلفو اذا فكر مجرد فكرة انو يزعلها
- ما يفيد وقتها فيا تميم موافقتك جانت غلط وقرارك مو صائب
- طيب وزيد
- زيد المفروض مو خاطبلو هسا منتظر لحد ما تستقر الاوضاع بعدين تخطبلو
- عادي ماكو فرق هسا اخذت موافقة امها وبقى اخوها
- يعني ما حجيت ويا اخوها
- لا من نرجع اخابرو ونلتقي اني وياه واخطبها منو
- لا تخطبها هسا
- ليش
- انتظر كم يوم
- مصيري اخطبها منو خصوصا انها بعدها يمنا
- انتظر لحد ما يقرر ياخذها لبيتهم
- هيج رايك
- اي هيج رايي
- الله كريم
بقينا نحجي اني وياه ودخن هو من خلص رجعنا للبيت وصلتو لبيتو قبل ما امشي رجع علي وفتحت الجام گال راح انطيك نصيحة اخيرة
گلتلو احجي گال ما جنت اعرف شلون احجيها الك بالكوفي بس اذا بيها مجال افصخ خطوبة ياقوت واخذها انت او واحد من اخوانك
سكتت ماعرف شحجي وكملت طريقي للبيت ويتردد باذاني كلامو والمصيبة صار ضميري يأنبني واحس فعلا غلطت من وافقت على خطوبة ياقوت
رحت للمضيف وگعدت محتار لا اگدر افسخ الخطوبة ولا مقتنع بزواجها بعد كلام عماد وصرت اتخيل تتخارب ويا زوجها وتجي تشكيلي
احس نفسي تخبلت مجرد تفكير لعب باعصابي لعب لعد اذا صارت بالواقع وزعلها شيصير بي غير ابتلي بيه ياربي صبرني
ياقوت : بعد الي سواه زيد تأكدنا كلنا انو يحب اديان ومو بس يحبها يعشقها عشق وكملت فرحتنا بخطوبتهم باقي بس موافقة حازم
جنا متأكدين حازم ما يرفض بس يبقى موقفو من يسمع بان اديان جانت تحجي ويا زيد مو مضمون بس مستحيل تميم وام حازم يبقون ساكتين
بالليل خلصنا شغلنا ورحنا يم اديان خطية كلش فرحت من اجينا يمها لان تبقى اليوم كلو بالغرفة وتضوج لان لحالها گعدنا يمها وصرنا نسولف ونضحك ونغيرلها جو
اية : اديان احجيلي شسوا اخوي السبع
اديان : يا اخو
- شنو يا اخو زيد شبيج
- ما اتذكر كلشي
وديان : لحد الان اخير شي تتذكر من اجو ولد عمي وبعدها ما تتذكر شي اعتقد مخترعة (خايفة) ولهالسبب ما تتذكر
اية : اها على كل حال الاوضاع مو طيبة بين امج وزيد خصوصا من طلبج منها وطردتو وگالتلو لو تموت ما تاخذها
وقبل شوية لولا ستر الله جان انتحر زيد گوة اني وياقوت گدرنا نحجي وياه ونهديه
ياقوت : اني اباوع على اية ومنصدمة من جذبتها وباوعنا على اديان جانت حاطة ايديها على حلگها وتبجي بسبب كلام اية
اية : گلتيلي ما تتذكرين مو جاية تمشينها على اية
اديان : يعني شنو
اديان : احجيلي شنو الي صار ادري بيج جذابة واني مثلج جذابة لان تميم خطبج من امج ووافقت بقى بس يحجي ويا حازم ويوافق
ياقوت : اديان صار عدها خربطة بدماغها مرة تضحك مرة تبجي واني ووديان شبعنا ضحك عليها
اديان : ماگدر احجي
اية : ليش
- لان تميم وصاني ما احجي
- معليج بتميم محد بينا راح يحجي
- خاف يزعل مني
- لا تطمني ما يزعل
- بس امانة يبقى سر بيناتنا
- اي والله ما نحجي شي
- حجتلهن الموضوع كلو من اخذت رقم زيد بس ما وصفتلهن حبها لزيد مثل ما وصفو زيد لتميم لان تستحي من هاي الامور
- كل هذا صاير وياكم
- اي هذا الي صار بالحرف الواحد
- يمة والله لو اني بمكانكم يكتلني الخوف
- لعد اني شنو اگول وربي من ضربو زيد طلقة احس روحي انسحبت مني حتى من ضربوني طلقة ما حسيت بوجع مثل الطلقة الي ضربو زيد بيها
- الحمدلله اجت سليمة وطلعتو منها ثنينكم
- اي والله الحمدلله
بقينا نحجي وياها الى ان صار وقت النومة وكل وحدة راحت لغرفتها ونمنا
شكرا لزيارتكم عالم روايات سكيرهوم
