رواية بنت الكهوجي الفصل الثاني والأربعون بقلم احمد
اية : الحمدلله اجت سليمة وطلعتو منها انتي وزيد ثنينكم
اديان : اي والله الحمدلله
ياقوت : بقينا نحجي وياها الى ان صار وقت النومة وكل وحدة راحت لغرفتها ونمنا
تميم : مرن يومين واديان كلش تحسنت وتواصلت ويا حازم علمود عمامو بس جانو مختفين اختفاء تام وحتى بيتهم فارغ من الغراض
جيرانهم يگولون اجو اخذو غراضهم وراحو واخذوهن بعد مشكلتهم ويا زيد بيوم فالاحتمال الاغلب انهم رجعو سافرو
وگال انو راح يجي بالليل ياخذ اهلو وحاولت اجل الموضوع شوية گال ما يحتاج يبقون واساسا طولو يمك واني صارلي كم يوم عايش وحدي
وبالليل الساعة 8 اجى گعدنا اني وياه بالمضيف نتعلل وبيومها الدنيا مطر كلش قوي ومحد اجى للمضيف واخذنا راحتنا بالحجي
حازم : تميم ترا اني لحد الان ماعرف شنو صاير بين اختي وزيد وساكت ومتحمل لخاطرك فاحجيلي شنو الي صاير
- بما انو انفتح الموضوع اني طالب ايد اديان لزيد على سنة الله ورسوله
- لازم اعرف شوصلو الها بذاك اليوم وبعدها اقرر
- شوف زيد جان مقرر يخطبها من قبل ما يصير موضوع ابن عمك بس جان منتظر يخلص هاي السنة ويخطبها
واگدر احلفلكم عليهم ثنينهم ان قبل هالشي مو حاجين ويا بعض نهائيا مجرد شافها زيد عن طريق الصدفة وهذا كل الموضوع
ومن صار موضوع ابن عمك جان حاب يساعدها اول شي لان هي رافضة وثاني شي لان هو رايدها بالحلال وثالثا لان اني ماگدرت اتدخل
شلون جان يريد يساعدها ماعرف وحتى هو مايعرف بس جان يتأمل ان يلگي حل علمود يگدر يخلصها من ابن عمك بدون مشاكل
وانطاها رقمو وصار يتواصل وياها بس ركز هنا كلش زين جانت مجرد تحجيلو شنو يصير وياها بخصوص ابن عمك فقط مابينهم اي كلام ثاني
وحجيتلو بالتفصيل باقي الي صار وياهم من ولد عمو اخذو اديان ولحگهم زياد بس جان وجهو محتقن من العصبية وبين ما خلصت دخل زيد
حازم : افه عليك زيد توقعتها من الكل الا منك
- شنو قصدك حازم
- تحجي ويا اختي من ورا ظهري تخليها تخون ثقتي بيها
- تميم حجالك ليش حجيت وياها لو لا
- ماكو سبب يخليك تحجي وياها وانت تعرف مستعد اموت وما اخليهم ياخذونها
- واني اكثر استعداد منك وبما انو انفتح الموضوع اني اريد اصلح غلطي واطلبها منك بالحلال
- ما الك مرة يمنا
- صفن بوجهو بس على شوية وينفجر من العصبية
تميم : اهدو وخلونا نتفاهم مو نتعارك
حازم : تميم انطي خبر لاهلي لازم نروح
تميم : حازم دا اگول خلي نتفاهم
حازم : تفاهمنا وهاي هي
دا احجي ويا حازم وطلع زيد وصرت اهدي بحازم بس جان قافل كلش ماكو خمس دقايق ورجع زيد بايدو سلاح
وگف يم الباب ونزل السلاح ونزع قميصو وقرب على حازم وزت السلاح تحت رجلين حازم وگال باوع هنا كلش زين
حاط اصبعو على مكان الطلقة .. هاي الطلقة علمودها .. حط اصبعو على مكان السجين .. وهذا السجين علمودها
وهسا وبعدين اگولها الك اديان ما تصير لغيري ورب العزة لحرگ الدنيا حرگ اذا فكرت مجرد فكرة انك تزوجها لغيري وجرب وشوف
حازم : ازوجها وان جانك رجال توگف بوجهي
زيد : فتح ايديه ثنينهن .. هسا اني واگف گدامك وهذا السلاح يمك شوفني شتسوي
تميم : جنت احجي وياهم ومحد يسمع مني لان ثنينهم قافلين ومن گال زيد هالكلام حازم تخبل واخذ السلاح وجهو على زيد وصرت بينهم اني
جان زيد يباوع لحازم بتحدي وحازم لو اني مو بينهم اني متأكد جان قتل زيد بذيج اللحظة ودفعت زيد على كيفي علمود اطلعو
بس من دفعتو رجلو ضربت برجل الطاولة ووگع على صفحتو المتصوب بيها وبس سمعتو گال اخ احس نفسي تخبلت
ركضت عليه وسندتو گعدتو عالقنفة وجان دا يطلع دم عالضماد طلعت تيلفوني اريد اخابر زياد علمود يجيب مضمد يضمد الجرح
مسك ايدي زيد وگال لا تخابرو خاف يسمعون اهلي وينشغل بالهم روح انت جيب مضمد واني ونسيبي ننتظرك هنا وغمزلي
فهمت قصدو وگمت اخذت السلاح من ايد حازم الي جان واگف وصافن وطلعت فورا حطيت السلاح بصندوق السيارة ورحت علمود اجيب مضمد
تقريبا نص ساعة ورجعت ويا المضمد طبيت لگيت زيد بمكانو بس الدم الي طالع زايد عن اول ما رحت وحازم گاعد بصفحة عنو
فتح المضمد ضماد زيد وجان شوية مفتوح جرحو نظفو زين وجان زيد طالعة روحو من حرگة المنظفات والوجع
زيد : باوع لحازم .. ارتاحيت هسا
حازم : ترا لحد الان گلبي مليان منك
- اي گلب والدة (يقصد جبير)
- احمد ربك ساتر عليك جرحك ولا جان گمت بردت گلبي بيك
- ههههههههه عندي الي يدافع عني
تميم : اني ما دخلني بينكم
زيد : لا يابة انت خارج الحسبة اصلا مو محتاج فزعتك
تميم : لعد منو يفزعلك
زيد : عمتي ام حازم
تميم : لا اذا هيج الوضع لعد انطيك ضمان محد بالانبار يگدر يوصلك
باوعت لحازم جان مبتسم وعرفت من خلال حجيهم انهم متفقين بس شلون قنعو زيد ماعرف فانتظرت المضمد لحد ما كملت ودزيتو مع زياد
بعدها انطيت خبر لام حازم ان حازم يريد ياخذهم ورجعت للمضيف بين ما كملن واتصلت امو عليه وطلعت گدام المضيف وياه
طلع زيد وگف ويانا وسحبو حازم علمود يصير ظهرو لباب بيتنا وگال ابقى هيج ادري بيك عينك زايغة گال زيد افه عليك ليش اني ايمتى باوعت لبنت
باوعلو حازم ورفع تك حاجب وگال يلا اني اترخص گلتلو مرخوص وراح يمشي وزيد گال بصوت عالي
يمة وكحل العين شل احوالي
جتال اخوها الليلة ويا جتالي
ماكون ابن امي ان ماخذتج حاليلة
والله لحرم الغترة والعگالي
حازم : تميم هاي گدامك ماطول حجيو هيج يحلم بيها بعد
تميم : واني اشد على ايدك وشحدو يحجي
زيد : عمتي ام حازم گولي لابنج وصاحبو يعقلون ترا بعدني بي حيل للمشاكل
ام حازم : معليك بيهم وليدي الي طلع بنيتي من الموت يأمر ويتدلل
تميم : واني اشد على ايدج عمتي
زيد : حازم توكل لا يروح يشد البيت ونبات بالمطر
ياقوت : بقن ام حازم وبناتها لحد ما شوية تحسنت اديان واجت الدكتورة مرتين بدلتلها الضماد وتطمنت عالجرح گالت كلش زينة
وويا تحسنها وخلاصها من عمامها رجعتلها عافيتها ورجع النور لوجهها بعد ما جانت كلش متغير باخر مرة شفناها بيها
من راحو طلعنا وياهن كتقدير الهن ووگفنا ورا الباب اني واية لان سمعنا زيد جان يحجي ويا حازم وشبعنا ضحك من گال تميم يشد البيت ونبات بالمطر
الحجية : اگولك حازم
حازم : هلا امي
- كانك تريدني استعمل العكازة وياك
- تمونين امي بس شسويت اني
- اديان لزيد وما تصير لغيرو وان سمعت ان مزعلها لو مسمعها حجاية ترا اندل بيتكم وامك ما توگف وياك
- بضحكة .. تميم ساعة السودة العرفتك بيها انهزم للبيت قبل ما تمردوني هنا
ضحكنا كلنا على كلامهم ويا بعض ومبين علاقتهم ويا بعض كلش حلوة بس الاهم حاليا ان وافق وما تعقدت الامور مثل ما جنا متوقعين
من راحو رجعنا دخلنا داخل وتميم شوية تأخر ومن رجع سألتو الحجية عن سبب تأخرو گال جنت استفسر من زيد شلون قنع حازم
الحجية : لعد مو انت قنعتو
- لا زيد
- وانت وين جنت لعد
- حجالها الي صار
- وهسا شلونو زيد
- لعد ما شفتيه واگف قبل شوية وما بيه شي
- وشلون قنعو
- يگول من رحت اني حاجي وياه بهدوء وگايلو ان هو طالبها بالحلال ويعرف الي سواه غلط بس جان مجبور يسوي هيج علمود يساعدها
وتعرفين ويا الكلام الطيب شوية مقتنع حازم وهو اصلا يحب زيد فاقتنع والحمدلله
- الحمدلله خلي منا كم يوم نروح الهم نخطبها خطبة رسمية علمود يصير كلشي رسمي
- هو هيج يمة وبصراحة منا لنهاية الدوام راح ازوج اخواني كلهم كافي عزوبية بيت ابوي مابيه احد نهائيا خلي يتزوجون ويستقرون
- والله يا يمة زينة العقل هم يكملون نص دينهم وهم يستقرون بحياتهم
- الله كريم
- يلا يمة روحو نامو تأخر الوقت
- تمام
ياقوت : مرت كم يوم وراحو الحجية والجدة والحجي وزوجتو وتميم لاهل اديان وخطبوها خطبة رسمية منهم (بوقتها ماعرف منو من عمامهم راحو وياهم)
واتفقو على الذهب والمهر وهاي الاشياء ومن رجعو اتصل تميم على اخوانو وبلغهم ينجمعون عندو وخلال نص ساعة تقريبا اجو
مالك : ها تميم شنو الموضوع
- جهزو نفسكم منا لنهاية الدوام هاي السنة راح تتزوجون كلكم
- هاي شنو
- بيت ابوي فارغ مابيه احد وانتو كبرتو كافي عزوبية شمنتظرين
زياد : تميم اني بالنسبة الي ما اريد اتزوج لحد ما اخلص الجامعة
- تزوج وداوم مثل زيد شنو المشكلة
رشيد : لا تميم احنا نريد نركز بدراستنا ولاحگين عالزواج زيد موضوعو مختلف وبالنسبة لمالك وفاضل فزوجهم ويا زيد
- شو ساكت فاضل
- اني ماعندي مشكلة اتزوج هسا ولا بعدين ما يفرق عندي ومثل ما گلت انت بيتنا فارغ ولازم نتزوج فراح نتزوج اني ومالك وزيد ونأجل زياد ورشيد
- هاي هي اتفقنا اني راح انطي خبر لابوي ومنا لنهاية الدوام إن شاء الله يكون كلشي جاهز
- تمام
- الي يريد يخطب من ناس معينين خلي يحجي هسا
الكل : ماكو احد زايغة عينو مثل زيد
زيد : ها ولكم جريذية متجمعين وتگصون بي واني مادري بيكم
مالك : الدكتور گالك يصير نسحلو لو لا
- لا يگول اجلوها هالفترة
- تمام من يسمحلنا نسحلو انطيني خبر
- اتفقنا
حجو شوية وتونسو ويا بعض وبعدها راحو مالك وفاضل ورشيد وصارو يحجون عن خطبة اديان واني واية اجينا عدهم من راحو البقية
سمعنا انهم محددين الذهب والمهر مثلي بالضبط وجان زيد كلش فرحان مجرد الواحد يشوف فرحتو يعرف شگد هو يحبها
دائما من نحجي عنها الاحظ لمعة بعيونو تشرح كمية حبو الها ولو ان تضحيتو اكبر دليل بس هيج تفاصيل تحسسك تزيد وضوح حبهم لبعض
مرت الايام وبدا وضع الرمادي الامني يتدهور وخصوصا من بداية 2013 بسبب اعتقال حماية وزير المالية رافع العيساوي
السنة بوقتها اعتبرو هالشي تهميش بحقهم وخصوصا ان المعتقلين جانو متهمين بقانون 4 ارهاب وهالشي سبب توتر بالمنطقة
جانت اكثر منطقة متشددة بيها الاعتصامات هي الرمادي وبنهاية 2013 تدخل الجيش وفض الاعتصامات بالقوة
وهالشي جان السبب بسلسلة الاحداث الي صارت بعد هالفترة هاي وراح تعرفوها خلال القصة
بالبداية جانو يريدون يأجلون الامتحانات بس رجعو بقوهن بتوقيتهن الاساسي والي هو من 20/1 الى 30/1 لسنة 2014
اني من بلشت الامتحانات الشفوية صرت اروح امتحن شفوي وارجع وهالشي قررتو المدرسة علمود تخفف علينا من عبئ الدوام خلال هالاوضاع هاي
بس بوقتها جنت محتارة شلون اروح وارجع لان من يروحون للدوام ما تبقى سيارة علمود يجي احد ياخذني وهم يبقون بالجامعة زيد وزياد وتميم
فتميم صار ياخذني وياه الصبح ويطلب من المعلمات يمتحنني عالسريع ويشرحلهن وضعي وجانن كلش متساهلات ويانا
فامتحن شفوي ويرجعني للبيت وبعدها يروح للجامعة ومن خلصت الشفوي كرست وقتي كلو للدراسة وصارت الغرفة هي مكاني الوحيد
جنت هواي اتعب بس اتذكر ان هاي اخر سنة ويجيني نشاط علمود اكمل والحجية وتميم واية دائما يشجعوني اشد حيلي واركز بدراستي
الحجية جانت مانعتني اشتغل اي شي بالبيت اول واهم شي دراستي جنت مجرد اكل واشرب وارجع للغرفة ومگضيتها دراسة
يوم 19/1 جان بوقتها يوم الاحد بقيت ادرس بيه اسلامية من گعدت من النوم لحد الساعة 2 بالليل ختمتها ختم وحفظتها مثل اسمي
نمت للساعة 6 وگعدت جهزت نفسي وبلشت اراجع لحد ما صارت الساعة 7:30 واجى زيد علمود ياخذني لان تميم راح للجامعة
رحت ويا زيد وصلني للمدرسة وبلش الامتحان الساعة 8 وبقى زيد ينتظرني لحد ما خلصت امتحانات ورجعنا للبيت
صار هذا نظامي يوميا ادرس للساعة 2 وانام لل 6 واجهز نفسي واراجع لل 7:30 واروح للامتحان وبسبب الوضع الامني تأجلت امتحانات زيد
هالشي جان لمصلحتي لان بقى زيد ياخذني ويرجعني لحد ما خلصت امتحاناتي بس ما احجيلكم عن التعب الي عشتو
اخر يوم رجعت بيه لان اعرف نفسي راح ارتاح صرت گوة امشي من التعب وكانو جسمي جان ينتظر هاللحظة علمود يذكرني انو تعبان
وصلت البيت الساعة 10:15 وجان يوم خميس اول ما وصلت رفعت ايدي بمعنى سلام للحجية واية وتوجهت للغرفة
وصلت الغرفة متفلشة حرفيا گعدت ارتاحيت شوية واخذتلي دوش علمود شوية يخفف عني من التعب وطلعت تمددت بفراشي ونمت
طگيتها بنومة ما گعدت لثاني يوم الساعة 6 الصبح گعدت شبعانة نوم بس عندي خمول من گد ما نمت باوعت لاية نايمة
نزلت تحت الكهرباء طافية واجواء شتوية تخبل صدگ عشاق الشتاء تلوگلهم هالاجواء والبيت بارد حطيت الصوبة بالمطبخ وشغلتها
بقيت يمها لحد ما دفيت شوية وسويت جاي ورجعت گعدت يم الصوبة ومن استوى صبيت كوب وبلشت اشرب جاي واباوع للحديقة من الجام
جانت الدنيا مغيمة وتمطر بس لان الدنيا فجر ومغيمة جانت ظلمة وتقريبا ربع ساعة واجت الكهرباء وشربت جايي ورجعت اجهز الريوگ
بين ما صارت الساعة 7:20 كملت الريوگ واجى تميم يريد يروح للجامعة بدون ريوگ بس من شافني اجى يمي وجنت ناسية انها جمعة بالبداية
تميم : صباح الخير
- صباح النور
- شو گاعدة من وقت
- تعودت على الگعدة من هذا الوقت وهم شبعت نوم بس شعندك انت گاعد بهالوقت واليوم جمعة
- عندي شوية شغل بالجامعة للعشرة هيج وارجع بس لمنو مسوية الريوگ انتي
- تصدگ اذا اگولك مسويتو الك وهسا تذكرت ان اليوم جمعة
- هههههههههه يلا لخاطرج راح اتريگ واروح
- يسلم خاطرك
صبيتلو جاي وگعد يتريك وگعدت اتريگ وياه دا اتريگ وانتبهت عليه انو صافن علي واول مرة بحياتي اشوفو هيج صافن علي گلتلو شبيك
- لا ماكو شي بس دا افكر بموضوع زواجج
- الله كريم
- اجو اهل العريس البارحة
- صدگ
- اي ويريدون العرس يوم الاثنين وگلنالهم يبقى الموافقة والرفض قرارها وامي تگول تعبانة وما گعدتها وگايلتلهم انج خلصتي امتحانات وتعبانة كلش بس شنو قرارج
- ماعرف اني
- من تگعد امي هي تحجي وياج وشوفي شنو تنصحج
- تمام
كمل ريوگو وطلع من البيت واني شلت الي زاد من الريوك ومن دفى البيت شوية بسبب السبالت طفيت الصوبة وضميتها
رحت تمددت بالصالة مقابيل التلفزيون واني اتابع اخذتني الغفوة وگعدت على صوت اية گالت شعندج نايمة هنا گلتلها گعدت من وقت وغفيت هنا
گمت وياها جهزنا ريوگها هي وامها ومن حطيناه انتبهن اني ما اكلت وسألتني الحجية گلتلها جهزت الريوك لتميم وتريگت وياه
الحجية : وين راح تميم
- للجامعة يگول عندو شوية شغل هناك
- شنو من شغل واليوم جمعة
- ماعرف والله بس گال منا للعشرة يجي
- بيها الخير
- البارحة اهل خطيبي اجو
- اي يمة اجو علمود يحددون موعد العرس
- شنو نصيحتج انتي
- تريدين احجي الصراحة لو اجاملج
- اكيد الصراحة والي يفيدني
- اني برايي انو توافقين عالثنين علمود شوية تتعودين عليهم وتخصلين من هوسة العرس قبل ما تخلص عطلة نصف السنة
- يعني انتي رايج هيج
- والله يا يمة لو بايدي ما اخليج تتزوجين وابقيج يمي بس هذا الاختيار الي يفيدج انتي وبكيفج بعد
- لعد هاي هي مثل ما گلتي
- وبالنسبة للتجهيز كلشي تقريبا جاهز باقي بس بدلة العرس والحنة والصالون وهاي كلهن يكملن بيوم واحد
- تمام
- وبالنسبة لتلبيس الذهب والحنة راح يسووهن ويا بعض يوم الاحد
- بعد احسن
شكرا لزيارتكم عالم روايات سكيرهوم
