رواية بنت الكهوجي الفصل الثالث والأربعون بقلم احمد
الحجية : وبالنسبة للتجهيز كلشي تقريبا جاهز باقي بس بدلة العرس والحنة والصالون وهاي كلهن يكملن بيوم واحد
ياقوت : تمام
- وبالنسبة لتلبيس الذهب والحنة راح يسووهن ويا بعض يوم الاحد
- بعد احسن
ياقوت : بقيت گاعدة يمهن ومن خلصن راحت اية تغسل مواعين الريوگ واني اخذتني الحجية للغرفة علمود تشرحلي عن الحياة الزوجية
جانت طريقتها كلش حلوة بالشرح رغم الموضوع مخجل بس هي ما حسستني نهائيا وفهمتني شنو واجباتي وشنو حقوقي
وجانت اكثر نصيحة تكررها هو انو لا تراددين الجبير حتى لو هو على غلط انتظريه يهدأ وبعدين احجي وياه وفهميه غلطو
الساعة 10:15 اجى تميم ورحت اني ويا اية بلشنا بالغدا ومر الوقت الى ان خلصنا غدا وخلص المطر وقررنا نروح اني والحجية واية للسوگ
جنت اريد اشتري الفساتين (للعرس والحنة) واصريت عالحجية تجي وياي علمود هي تختارلي الفستان فاخذنا تميم للسوگ
بلشنا نفتر بالسوگ ونمر على المحلات الي بيهن فساتين اعراس واحتاريت كلش بينهن لان كلهن حلوات وكلهن مستورات
اخير شي رحنا لمحل لگينا بيه فستان احمر للحنة وكلش عجبني ولگينا بيه فستان للعرس هم عجبني فصالو واخذتهن ثنينهن واخذت وياهن عباية عواريس
بعدها رحنا على الصالون وحجزنا يوم الاحد للحنة ويوم الاثنين للعرس ورجعنا للبيت واخذت فساتيني للغرفة ولبستهن وشوفتهن لاية والحجية
جانن كلش حلوات وبين ما نزعتهن اجت اية گالت تميم يريد يحجي وياج گلتلها تمام ونزلت جانو بالصالة هو وامو وگعدت وياهم
- تميم طلبتني
- اي بوية علمود فلوس الفصل والزايد من المهر
- شبيهن
- الزايد من المهر موجود بس الفصل اليوم يجيبهن رجال جنت ضامهن يمو لان الوضع ما يطمن وما يريد يخلي شي بذمتو
- طيب اني شنو المطلوب مني
- شوفي اني الله شاهد اريد انطيجياهن وابري ذمتي امام الله بس الافضل نأجلهن فترة قليلة
- تدري بي ما الي قرار بعد قراركم بس مجرد فضول ليش تأجلهن اذا تريد تخلص منهن
- احنا ما نعرف معدن زوجج لحد الان وخاف ننطيه الفلوس ويروح يضيعهن على شي ما يسوا فمن نتأكد منو نسلمهن الج وسوو الي تريدوه بيهن
- صدگ ذكرتني اخصم منهن الاقساط مال المدرسة
الحجية : ياااااااا ولج شلون تحجين هالحجي
- باستغراب .. ليش شنو گلت
- شلون تريديه ياخذ الاقساط منج
- اني اتفقت وياه بعدين ارجعهن الو وجنت ناسية موضوع الفصل
- دسكتي عيب هالكلام
- بس احنا اتفقنا
- اتفاقج بليه واشربي ميو وديري بالج تعيديها انتي بنيتنا يعني هسا اية لو تتوظف هم تجي ترجع لتميم المصرف الي صرفو عليها
- هي بس لا تاخذ منو ما يريدها تنطيه
اية : اي اي والله صدگ يمة ترا ما ينقطع مصروفي من اتوظف
تميم : لا ربحنا ههههههههههه
اية : يمة من اتزوج هم تصرفون علي اني وجهالي مو
- اي يمة ونصرف على نسابتنا عيب منهم ونشوفلنا كم بيت من جيرانهم هم
اية : عفية يمة عجبتيني
ياقوت : باوعت لتميم .. بس اني وياك اتفقنا
تميم : بمكر .. اني ما دخلني ماريد اكل كتلة من امي
ياقوت : غمزت للحجية .. اصلا راح انطيك انت الاقساط وانطي الحجية هدية 5 ملايين
الحجية : هسا احنا ما يصير ناخذ بس ماطول اصريتي ما نگدر نكسر بخاطرج
اية : واني اني انطيني
- انتي انطيج 10 الاف كافي عليج
- عابتلج 10 الاف شسوي بيهن
- مو زين انطيج ما اعوفج
زيد : ها منو ينطي لمنو وشنو ينطي
اية : تعال تعال ياقوت دا توزع فلوس
زيد : حيهم حيهم شگد حصتي اني
ياقوت : هاي هي ما اوزع .. باوعت لتميم .. حتى القسط انت تكمل هاي السنة
ضحكو كلهم بس زيد ما جان فاهم شي وحجالو تميم الموضوع وقرب على تميم شاورو شو تميم انگلبت ملامحو وكأنو عصب وترخص زيد وراح وعافنا تميم ولحگو
اية : شبيه تميم ضاج من شاورو زيد
الحجية : ما جانت منتبهة انو ضاج .. ايمتى ضاج
- هسا يمة قبل ما يطلع زيد بس انتي ما منتبهة عليه
- إن شاء الله ماكو شي
- آمين
ياقوت : مر الوقت وكل ما يقرب موعد العرس احس نفسي اتوتر اكثر واخاف لان تجربة جديدة وفوگها كلام الحجية خلاني اتوتر
وما جان اكو يوم سبت ذاك الاسبوع من الجمعة للاحد فورا من توتري وخوفي ما حسيت بيوم السبت نهائيا هههههههههه
يوم الاحد گعدت الصبح احس عندي مغص من التوتر وشگد ما احاول اكون طبيعية ماگدرت بعد الريوگ اجن خوات تميم
بلشن بتنظيف البيت واني صعدت علمود اخذلي دوش قبل موعد الصالون وبين ما اخذتلي دوش جهزت اية الفساتين واخذناهن ونزلنا
رشى تكفلت بترتيب الكوشة ومن نزلنا جانن دا يكملن التنظيف واني واية رحنا للصالون ( اخوات تميم من خلصن تنظيف راحن لغير صالون )
وصلنا الصالون الساعة 1 علمود ما نتأخر وحتى غدا ما تغدينا فبلشت ام الصالون بي اني قبل اية گصت شوية من شعري علمود يتعدل
واية گالتلها تحطلي مكياج خفيف لان حفلة حنة فرفعت شعري كلو ونزلتلي خصلات من گدام وبقت هواي ترتب بي
من خلصت باوعت لنفسي بالمراية طالعة وحدة ثانية تختلف اختلاف جذري عني عيوني احسهن اوسع والمكياج جان حلو بكل ما تعنيه الكلمة من معنى
ياقوت : بابتسامة .. هاي منو
اية : جدتي
- هههههههه لج والله تغيرت هواي
- لعد البنت قبلة شوية شجانت تسوي غير لبخت خلقتج علمود ما ينصدم بيج الولد وينهزم
- ههههه عابتلج
البنت : شنو الولد مو شايفج من قبل
ياقوت : لا طلب شوفة شرعية وما قبلت
- لو ادري هيج جان ما حطيتلج مكياج
- ليش
- علمود ينصدم بجمالج الحقيقي بدال ما يخاف ان المكياج مطلعج حلوة
- تسلمين حبيبتي
- الله يسلمج جمالج ويا لهجتج الغريبة مبينة مو منا
- لا من بغداد بس عايشة هنا
- اي عرفت من غير منطقة الله يوفقج ويسعدج حبيبتي
- واياج
- يلا عيني منتظرة عزيمة
اية : شبيج مطنگرة عيني ترا اني اخت الشيخ يا عيوني
- لعد روحي خلي اخوج الشيخ يحطلج مكياج
- لج لا لا التوبة
راحت گعدت عالكرسي وام الصالون تضحك وياها لان مبينة ان اية تتشاقى وياها واني بقيت گاعدة انتظر لحد ما خلصت اية
من كملت اتصلت على زيد وطگينا صور اني وياها بين ما اجى زيد تغطينا ثنينا وطلعنا وياه واخذنا للبيت جانت الدنيا قريبة من المغرب
من وصلنا لگينا البيت نظيف ومتعطر والكوشة جاهزة والبنات بعدهن مو راجعات اجى زياد جايب عشى من المطعم انطاه لاية وراح
الحجية : يلا يمة ياقوت روحي ويا خيتج قبل ما يرجعن البنات وتصير هوسة بعدين تبقين جوعانة ومو زين عليج
- تمام
- اليوم مانعرف منو يجينا وياهم فخاف وحدة من البنات تحجي كلمة بقصد او بدون قصد تجاهليها ولا تخربين فرحتج علمودها
- ليش اني شسويت علمود تحجي
- يمة اكو ناس تحسد الميت على كفنو فمو غريبة يحسدنج على فرحتج
- تمام
رحت ويا اية للغرفة تعشينا وشبعنا وتمددت ارتاحيت لورا اذان المغرب واجن البنات وبلشن نسوان الگرايب يجن
اجت رشى تأكدت ان مكياجي ما يحتاج تعديل وطلعت وياها گعدت بالكوشة وشغلت اية الاغاني وبلشت ترگص هي ورشى
وشاركن وياهن البنات كل واحدة تگوم الثانية وتگعد بمكانها جانت الحفلة تخبل رغم بيها اغاني بس تحسها هادئة ونازكة
- اشرت لاية واجت
اية : ها ياقوت
- شوفيلي شال ابيض جيبيلياه
- مو هسا ترگصين باجر ترگصين ويا العريس
- ولج ثولة جيبيه مو وقتج
- ههههههههه ولج شتسوين بيه
- اريد احطو على كتوفي علمود اذا دخل احد ويا العريس احطو على كتفي
- ابيض ما يصير لان فستانج احمر عندي الشال الاحمر يرهم للفستان هسا اجيبو
- تمام بس استعجلي فدوة قبل ما يجون
- تمام
راحت شوية ورجعت وياها الشال عدلتو على كتوفي وراحت تحجي ويا امها وتباوع علي وفهمت انها دا تحجي لامها سبب الشال
شوية وگالو وصلو اني من يمي خرطت من التوتر والخوف لو گايليلي جايج ملك الموت مو هيج فورا صرت ارجف وافرك بايديني
اجتج اللحظة الحاسمة يا ياقوت بعد دقايق راح تكونين گاعدة گدام رجال لاول مرة تشوفيه وانتي بكامل زينتج ولاول مرة راح يلمس ايديج
بدون وعي مني حطيت الشال على راسي رغم بعدهم مو داخلين اجت رشى ركض گال لا تنزعين الشال بقيه حتى من يدخل العريس
ما فهمت قصدها بس گلت امشي بنصيحتها افضل يجوز عاداتهم هيج بس جان اية گالتلي من البداية ياربي عديها على خير هسا شجاني ووافقت
تخيلو وصلت لحالة اتمنيت اني رافضة من گد ما توترت وخفت وزاد الطين بلة من دخلن خواتو والهلهولة وصلت لخور عبدالله
والبنات والنسوان كلهن تغطن ودخل هو بين خواتو اني جنت منزلة راسي واحس نفسي ميتة من الحر وكأني گاعدة تحت الشمس بظهر الصيف
اجى هو گعد يمي واخواتو صارن يرگصن بدال خوات تميم وبنات عمو وهو جان متوتر مثلي انتبهت انو حاط كلينكس بايدو وكل شوية يمسح عرگو من التوتر
تقريبا 5 دقايق واجت الحجية جايبة الصينية الي بيها الذهب والحنة وسلمتها لام العريس ووگفنا اني والعريس علمود يلبسني الذهب
اخذ اول شي الحلقة ومديت ايدي واريد اسيطر على رجفة ايدي ماگدر مسكها هو واحس مسكتني كهرباء من الخوف بذيج اللحظة
واخذ المحبس ومديتلو ايدي الثانية وهم مسكها علمود يثبتها ولبسني الحلقة واجت اصعب لحظة ممكن امر بيها خلال اليوم هذا
مسك الگلادة وصرت ابلع بريگي واريد ارفع راسي واحس راسي مدا يرتفع ممكن البعض يشوفني بالغت بتعبير خوفي بس والله احس كل هالوصف ما يعبر عن نص خوفي
جبرت نفسي ورفعت راسي وغرغت عيوني واول ما رفعت راسي اجت عيوني بعيونو وصفن بي ونسى حتى الگلادة الي بايدو
جان شاب مرتب شعرو خفيف ولحيتو مرتبة وانيق وملابسو كلش راهمات لجسمو جان بيومها لابس قاط اسود وطالع كلش حلو عليه
دقتو امو وتذكر الگلادة ولبسنياها بس يمكن 4 او 5 مرات يحاول بيها لحد ما شبكت وياه واجى دور التراجي واخذ الترجية اليمين
من مسك شحمة اذني جسمي كلو رجف وبعدها اليسار ونفس الحالة وبعدها اجى دور الحنة
اخذ شوية من الحنة بخاشوگة وحطها بايدي وسكرت ايدي عليها ولبسني كف على شكل جيس مربع لونو احمر
وقربت امو الصينية علي واخذت الحلقة اريد البسها الو بس مدا اسيطر على ايدي وهو دفع اصبعو عالحلقة والحمدلله فضت بسرعة
ورجعنا گعدنا وماكو تقريبا 5 دقايق وطلع بس من طلع كأنو كان مستعجل وصارن خواتو وخوات تميم يصورن وياي وعافن حتى الرگص لحد ما خلصن تصوير يلا رجعن للرگص
بقو اهلو تقريبا نص ساعة وراحو بس خوات تميم وبنات عمهن گالن احنا نريد الحفلة خاصة بينا وبقيت گاعدة وهن يرگصن
الساعة صارت تقريبا 10 وخلصت الحفلة وبلشو الناس يروحون واني رحت للغرفة اول شي غسلت ايدي من الحنة ونزعت الذهب
ولل 11 يلا فكيت التسريحة وبدلت ملابسي واجت اية گالت نامي ورانا باجر گعدة من الصبح واني ما جذبت خبر فورا تمددت بفراشي
جنت اريد انام بس من التوتر ما اجاني نوم بقيت تقريبا لل 4 مغمضة عيوني بس ماگدر انام وعقلي يرسم سيناريوهات ليوم باجر
گعدت على صوت اية جانت الساعة 7 الصبح گوة فتحت عيوني من النعاس صليت الفجر ونزلنا تريگنا ورجعت للغرفة
اخذتلي دوش وجهزت الفستان وعفت الذهب ما اخذتو ووصيت اية تقفل الغرفة لحد ما نرجع خاف يجي احد ويشوف الذهب
وبال 8 اخذنا زيد للصالون وهالمرة لان بس مكياج وتسريحة ما طولت ام الصالون وياي وهالمرة عافت شعري ما رفعت اي شي منو
بس كم خصلة رفعتهن ثبتت بيهن التاج وسوتلي اطرافو كيرلي وطلع شكلو احلى من البارحة بهواي لو ادري هيج جان حتى البارحة سويت نفس التسريحة
ومكياج طلبت منها يكون خفيف ما اريد يغير ملامحي هواي وهي عجبها اختياري لان كثرة المكياج يعدم جمالي نهائيا
الساعة صارت 11 كملتنا ومثل البارحة خابرنا زيد وطگينا صور بين ما وصل ومن وصل غطيت نفسي بالعباية مالت العواريس وطلعنا اني واية
ركبنا ويا زيد وبقيت العباية علي لان مهما كان زيد مو حلوة اني اكشف جمالي گدامو فالاحسن ابقى بالعباية وهو واية ما علقو عالموضوع
من وصلت جانت رشى دا تجهز الكوشة ورحنا للغرفة اني واية ننتظرها تكمل باوعت للفراش واحس اجتني البجية من الدوخة
ياقوت : لج اية
اية : ها
- اريد ابجي
- ليش
- لج نعسانة الليل كلو ما نمت
- طاح حظج عبالي تگولين راح ابجي لان افارگج
- لا يوم السعد من اخلص منج
- عابتلج ولا تعرفين تجاملين
- هههههههه ولج والله اكثر شخص زعلانة على فراگو انتي
- شرايج من يجي العريس تنطينو ذهبو وتخلصين منو
- هههههههه اتفقنا
- لج والله اني هم تعبانة بس اني عالاقل بعد الزفة اگدر انام انتي الله يعينج لازم تبقين گاعدة النهار كلو والبنات يگضنها تمرگص گدامج
- انتي اكيد ضايجة لان ماراح تشبعين رگص
- اي والله صحيح بس يلا عوضت البارحة
بقينا نحجي اني وياها الى ان اجت رشى گالت يلا ياقوت جهزت الكوشة گالتلها اية خلي تتغدا وتنزل هسا يجيب الغدا زياد گالتلها تمام وراحت
ورا شوية جاب الغدا زياد وجابتو النا رشى بس ما بقت راحت تجهز نفسها للحفلة وتغدينا اني واية وعدلتي اية الحمرة ولبست الذهب ونزلنا
گعدت بالكوشة جانن موجودات كم وحدة من عمام تميم وبدو عمامهم يتجمعون شوية شوية الساعة صارت 1 وبلشت الحفلة
وبقن البنات يرگصن لل 2 وبوقتها وصلت الزفة صوت الهورنات والاغاني ترس المنطقة ودخلن النسوان كالعادة ويا الهلاهل
اجى هو گعد يمي شوية وبعدها مسكني من ايدي وگومني وياه ونزلنا من الكوشة وعفتو ورحت عالحجية وحضنتها
صارت تبجي ونزلن دموعي وياها وطلعت كلينكس ومسحت دموعي گالت لا تبجين يمة هذا يوم فرحج لا تخلين دموعج ينزلن
واجت اية حضنتني وانفجرت بالبجي من صدگ ما سكتت اريدها تهدأ وماكو اخير شي سحبتها الحجية گالتلها كافي يمة راح تخربين فرحة خيتج
واجن خوات تميم كلهن سلمن علي وودعني ورجعت مديتلو ايدي علمود يمسكها وطلعت امشي وياه وجان تميم واگف بطارمة بيت اهلو
من نزلنا من طارمة بيت تميم توجهت لتميم والعريس فورا فهم علي واجى وياي ومن شافنا تميم تقدم علينا واول ما وصل گال الف مبروك
ياقوت : الله يبارك بيك .. اريد اشكرك على كل وگفاتك وياي بس ماعرف شلون اعبرلك عن شكري وامتناني
- افه عليج ياقوت قابل اني غريب
- لا والله بالعكس انت من اقرب الناس الي بعد ما فقدت اهلي
- باوع للعريس .. ياقوتة بنيتنا وهسا صارت مرتك ومثل ما جانت وراح تبقى امانة يمي فهي هسا امانة يمك فدير بالك عليها
العريس : بعيوني اخليها
- ياقوت امانة الله اذا قصرت وياج بيوم لو بدر مني شي بقصد او بدون قصد فسامحيني
- ما بدر منك الا كل خير وماكو شخص يصون الامانة ويحافظ عليها مثلك وبابا الله يرحمو جان اختيارو الك احسن اختيار
سلملي على اهلك الي ما شفتهم وخصوصا اخواني زيد وزياد
- الله يسلمج ويعافيج يوصل إن شاء الله
- مع السلامة واشوفك على خير
- الله وياج ياقوتتنا
رجعنا اني والعريس توجهنا لسيارة العاروس ركبت اني من ورا وركبن اختو يميني والحجية يساري وامو گدام وهو يسوق
مشت الزفة واني گلبي معصور على فراگ اهل تميم خصوصا اية ماعرف شلون راح اتحمل بعدها عني بس دا اقاوم علمود ما ابجي ويخرب المكياج
جان وجود الحجية وياي بنفس السيارة ينطيني شوية راحة عالقليلة اكو احد اگدر اعتمد عليه باهم يوم بحياتي كلها
مشت الزفة واني تركيزي مو وياهم الى ان وگفت السيارة عند المصور ونزلنا صورنا اني وياه بالبداية ودخلو اهلو هم صورو ويانا ورجعنا للسيارات
الحلو بالزفة جانو كل الموجودين هادئين بالسياقة جانت سيارة العروس وسيارة ثانية بالمقدمة ووراهن باقي السيارات
وما جان احد يتجاوز احد علمود لا يصير حادث لا قدر الله وينگلب العرس لعزا وكل سيارة مشغلين اغاني الهم ومسكرين الجام لان الجو بارد
من وصلنا بيتهم دخلت ويا النسوان داخل بس هو ما دخل وگعدت بالكوشة وانتبهت انهم مسوين الكوشة لنفر واحد واعتقد لهذا السبب ما دخل
وحدة من البنات جابت كرسي للحجية علمود تگعد يمي واجت اخذت العباية مني وبلشن البنات بالحفلة
جان الوقت يمر بسرعة مو طبيعية لان جنت اتمنى يتأخر الوقت قبل ما يجي هو بس بهيج مواقف الساعة تصير تركض ركض
ما حسيت الا گالو راح يجي العريس واخذتني الحجية من ايدي وتوجهنا للغرفة مالتنا ودخلنا اني والحجية وام العريس
جماعتو وصلوه لباب الصالة ورجعو واجى هو يمشي وخواتو وگرايبو حرگن الدنيا بالهلاهل واني كل ثانية يزيد توتري الف ضعف عن القبلها
اخر شي دخل للغرفة وماعرف شنو حجن وياه الحجية وامو من التوتر ما جنت مركزة بشي اخير شي طلعن واجى هو باتجاهي
مسك ايدي ورفعها بمعنى اوگف ووگفت ورفع الغشاوة عن وجهي ورفع راسي باصبعو من حنجي وبقى صافن بوجهي
ما جنت اعرف شنو قصدو من هالصفنة بس الي اعرفو جان صافن وكانو دا يتفحص وجهي وبعدها توجه للدرج الي عند السرير
نزع ساعتو وحطها عالدرج هي والتيلفون وگالي راح ادخل اجدد وضوء ومن اطلع تدخلين انتي علمود نصلي ركعتين لوجه الله وهزيتلو راسي بالموافقة
دخل هو للحمام ورجعت گعدت عالسرير وجان تيلفونو قريب علي ودگ وهيج بعفوية باوعت عليه وجذبني اسم الرجال الي متصل
جنت مترددة اخير شي استجمعت قوتي وجاوبت بس ما حجيت شي مجرد فتحت التيلفون وهو حجى بس دمرني دمار بكلامو
ماعرف اگول هاي مصيبة لو كارثة لو طامة شگد ما اوصف بشاعة الموقف مستحيل انطيه حقو مستحيل اكو موقف ببشاعتو
عالسريع سكرت التيلفون وطلعتلي ملابس وضميت التيلفون بين الملابس وجسمي كلو يرجف من الخوف وماعرف شسوي بهالموقف
من طلع هو توجهت للحمام وقبل ما اوصل الحمام مسكني من زندي واني نشف الدم بعروگي من الخوف وگال ليش متوترة
بقيت ساكتة وگال لا تخافين اني من اليوم زوجج لا تخافين مني من اليوم اني مسؤول عنج واريدج تحسين بالامان يمي مو الخوف
هزيتلو راسي بس علمود يعوفني ومن عاف ايدي رحت للحمام والتيلفون وياي اول ما دخلت قفلت الباب علمود ما يگدر يدخل علي
شكرا لزيارتكم عالم روايات سكيرهوم
