رواية قصة وجدان الفصل الثالث والأربعون 43 بقلم انين الليل

عاصف 

صارت عيني على وجدان الي چانت مرتبكه وترجف بخوف ام احسان باوعت الها وردت 

  - - اني خابرت عمج لان هو ولي امرج وگدامي امج وصته بيج 

  - - واريد اكله انتي لو تبقيين اخر وحده بالدنيا ما اخذج الابني 

وجدان عيونها مليانه دموع رادت تحچي خليت اصبعي على حلگي وسالتها :: وليش ما تاخذينها ما دام ابنج رايدها 

  ابتسمت // لان هي مطلقه وابني بعده ما دخل دنيا شاب وحلو وشهاده او وظيفه محترمه ليش ياخذ وحده اتزوجت 

ابن عمها شهرين ما ادري تلاثه واتطلگت يعني بنيه ويتيمه واتزوجها ابن عمها وما سلكت ويا تريدها تسلك عد ابني 

وثاني شي لان جسره

باوعت الوجدان بتحدي وهزت راسها // اي جسره الي تعوف بيت جدها وتخلي عمامها واخوها الزغير وراها وتجي 

بدون ما تحسب حساب الكرامتها وكرامة اهلها والكلام الناس وهي ما عدها لا اخ ولا عم ولا خال التجات الهم 

حتى يساعدوها لا بت اخوك طلبت المساعده من ناس غربه هاي بصراحه ينخاف منها ما اكدر اوثق بيها 

لذلك اني ما احب المماطله خليتك بالصوره بس حتى تاخذ بت اخوك وتبعدها عن طريق ابني وخليت 

الحچي گدامك وگدامها وگدام ابني حتى بعد اقطع كل امل الابني انو ياخذها

باوعت الابنها // - ابني صار اسبوع من كلي واني اتحايلت حتى اعرف كل شي واندل مكانها 

بينتله اني موافقه وفرحانه بس حتى اعرف هي وين ومن عرفت هي موجوده ابيت داليا استغربت يطلع 

كل هذا الشي منها صحيح من سولفتلي منار على قصتها اني زعلت عليها لان هي عانت ولو ما اعرف 

شنو السبب وانتي منار احسابي وياج بعدين

لذلك اني خابرتك وخليتك بالصوره لهنا وبس اخذ بت اخوك واتصرف وياها كافي ابني هاي اكثر من تلث تشهر 

وهو مو ويانه كل اموره متخربطه ودائما صافن وينتظر يمته يصير الليل حتى يطلع ما اعرف يجي يسهر 

اهنا ما اعرف وين يكضيها

ام داليا //. لا ام احسان لتظلمين بختج البنيه لازمه عده باب النشتمل ما طلعتله ولا شافت احد بس اني وداليا 

ومنار تجي تشوفها 

   مو اله يجي يشوفها ويقابله لعد والنقال الي اشترا الها حتى يحجي وياها 

وجدان جاوبت والدمعه بعينها =. اني ابد ما حاجيه ويه ابنج وهذا هو اسالي بيش ترديني احلفلج

ام احسان بنظرة استهزاء // تمام دادا لتحلفيلي ولا اخلفلح ولهنا وكافي ( باوعتلي ) تاخذ بت اخوك ويادار 

ما دخلج شر 

بهاي اللحظه حسيت انا شكد قشمر هزيت راسي درت على وجدان واخزر بيها ولو بيدي الزمها واجنزها گدامهم 

:: لو عدج ذرة كرامه تفوتين تلبسين عباتج وتجيين بسرعه 

رادت تحجي خليت اصبعي على حلكي واحس شرار يطلع من عيوني

فاتت جوه وبظرف دقيقه طلعت وهي لابسه عبايه اسلاميه وصلت يمي وبيدها النقال بدون ما احاجيها انطتني ايا 

اخذته وشمرته على احسان :: هاك بابا اخذه مشكورين وما قصرتو وخلي ابالك شغله وانتي ام احسان هاي 

( اشرت على وجدان ) :: طلقه قيمتها الف دينار اخلي بگلبها وما انطيها الواحد مثل ابنج 

احسان راد يحجي اتقربت منه :: اي كلام تريد تحجي روح البيتكم سولفه على امك حباب

رحنا زرنا انا وعلاوي وبعدها طلعنا للمكان الي ا نتلاكه بي شقتها كاعده ::ها يمه زرتي 

- - اي الحمد لله طال عمرك

:: ازدحام مو 

- - اي بس شفتلي بنيه بت حلال الله يستر عليها وكضتني زرت وطلعت 

:: ترتاحين لو نمشي 

- - نمشي 

:: ياالله

رحنا نتمشى على كييف وانا اكللها // يمه اذا تحبين تشترين شي الج للبنات 

- - اي هلجاي اشوفن 

صارت تشتري اغراض وشفتها اخذت محرم صلا اتقربت منها :: محتاجه فلوس 

هزت راسها // غير اطيتني 

:: مي خالف خاف بنفسج شي 

- - عساك سالم

شفت محل يقدم عصاىر گتلها :: يمه اكعدي اهنا اخذ علاوي اشتريله وارجع 

كعدت وطلبت من ابو المحل يجيبلها عصير برتقال ورحنه انا وعلاوي وكتله :: عمو شنو يعجبك اشتري 

هز راسه بالنفي حاجيته :: اعرف بيك زعلان من تعرف ظروفنا راح تعذرنه 

يمكن ما فهم كلامي او فهمه وما رد اتنفست :: ياالله يابطل شنو يعجبك تشتري اشتري

هو راح يم محل نظارات وباوع عرفت يريد نظاره بس يخجل لزمته من ايده ودخلنه هو گلي 

( ) لا عمو بس جااي ابااوع 

رغم هو طاب لكن من يخجل او يتوتر يصير يقطع بالكلام :: اشتري اي وحده تعجبك 

ابتسمت بوجهه واتقربت يم اذنه :: حتى لو تريد تشتري الوجدان وحده هم اخذ الها 

هو باوعلي متفاجى انا هزيت راسي وابتسامه بيها طمانينه حاجيته 

:: ابالي اسويها مفاجاه الك والامي بس حتى اراضيك گتلك بس ها مو تحچي الحبوبتك خليها مفاجاه الامي

صار وجهه احمر وتنفيه عالي ( ) ي عنني رايح ين. الو. ج د 

هزيت راسي :: اي عمو علي على كيفك ارتاح حبيبي اخذك يمها وبعد ما تتفاركون بس شنو تسمع الكلام 

هو انملت عيونه دموع انا لزمت ايده حييل 

:: شكلنه مو الرجال تصير دمعته عزيزه هسه من اتشوفك حبوبتك راح تسال ليش تبچي انت كللها 

اعيوني طاح بيهن عطر وياالله شوف شنو يعجبك تشتري

سالني () عمو صدك راح نروح الوجدان 

:: اي حبيبي وتبقى يمها بس من اكلك ارجع ويه حبوبتك بسرعه تنفذ كلامي 

( ). ليش مو گلت ابقى يمها 

:: اي تبقى يمها بس اكو امور لازم نحلها اليوم نروح ونشوفا وتبقى يمها وتشبع منها بعد شتريد 

ابتسم وانا اشوف الرجفه بايده والخوف بعيونه اخذ نظاره اله ونظاره الوجدان حاسبنه وطلعنه وبطريقي اشتريت 

محرم صلاة وشغلات انطيتهن العلي 

:: هذني اخذهن ويه النظاره الها شوف ومن اكلك رووح ويه حبوبتك اسمع الكلام وروح

هز راسه وابتسم وصلت يم امي 

:: ها حجيه ؟

هلا بيك 

:: علاوي تشرب عصير 

هز راسه بالنفي اعرف يريد بس نروح 

:: وانتي حجيه بعد رايده شي 

    عساك سالم ارتاحيت وشربت عصير 

   :: يعني نتوكل 

بكيفك يمه انا ما عدي شي 

:: انتي بكيفج حجيه نتوكل نروح لو تردين نبقى اهنا 

لا نمشي احسن 

:: خوش خلي نتعشى وتالي نتوكل

وطلعنه رحنه المطعم واتعشينه وعلي بعيونه تساؤل يمته نروح 

بعدها ركبنا بالسياره ومشينه مسافه كان اكو حديقه عامه وكفت سيارتي بيها واشتريت چاي لان هذا مجربه يسوي جاي 

طيب كلش انطيت الامي وسالت علي الي هز راسه انا حاجيته انزل روح اشتري من الكشك الي يعجبك 

هو باوعلي انا عضيت على شفتي وهزيتله راسي من نزل علي باوعت الامي وحاجيتها 

:: يمه 

هي رفعت راسها انا راسا حجييت :: يمه اخذج الوجدان ؟

هي ما بين عليها متفاجئه ردت عليه وهي تهز براسها // ادري بيك 

  ابتسمت :: ها ياهو الكلج ؟

لملمت حلكها // من يوم الراحت وانت تعارك ذبان وجهك وادري بيك تندل مكانها بس ساكته لان انا هم ما سويت زين 

بس البارحه شفتك مختلف عن كل يوم عرفت لو شايفها لو جايبها 

هزيت راسي :: اي يمه هي هسه موجوده عدي 

- - ابيتك ؟

هزيت راسي :: لا حجيه مو ابيتي بغير مكان الي اريده منج من اتشوفينها لا تحجيين وياها تنكي عليها 

هزت ايدها // خاب انا صدك زعلانه عليها بس هي خطيه الصار بيها مو شويه

:: ادري بس اريدها تتعلم الدرس 

امي // هسه انت ما تحجي وياها ؟

هزيت راسي :: لا 

- - عمنك حتى ما اخذت الهه لفه مثل گبل 

:: تولي تاكل الموجود 

- - بكيفك يمه كسبت حسنه بهذا اليتيم من يشوف اخته 

:: الحمد لله ها نروح ؟

- - بكيفك بس اكلك مهدي وبهاء شتگللهم ؟

:: حجيه كل شي بوكته حلو ومحد عده يمي شي 

- - انا مهدي ما اهم بي بس ذاك المخبل 

جاوبت بدون تردد :: فنه اليوصل الها 

امي اتنفست بعمق وگالت // شوف عاصف گبل لا اروح ولا اشوفها بعد انا ما بيه هبطات وصيحه ومهادد 

كلمن توگفه عد حده بس هم لا تنسى يبني همه اخوتك واعضداك لا تحصدها وياهم ورد خد وعين وانا ما افهمك 

انت التفهمنا وكافي انتبه يبني الروحك تره محد يفيد بهالوكت كلمن يكول ياروحي

:: ادري يمه 

- - خوش دامك تدري 

:: ياالله امشينه 

اشوف الفرح بوجه امي امي الي هاي اكثر من خمس اشهر انا زعلان عليها لان هي السبب الرئيسي بالصار الوجدان 

وصلنه تقريبا الساعه بالتسعه ونص فتحت الباب وامي كالت // وينكم شني نايميين 

شفتها متمدده ع القنفه الي بالصاله وتباوع للتلفزيون هي استغربت او اتفاجآت وهي تشوف امي وعلي الي ركض 

عليها صارت تشهك وهي تبوس بي بايده بوجهه براسه تشمه وهي اتگله = علووش مشتاقه الك يارووح اختك

حاضنته عبالك طفل وهو نفس الشي يبوسها بخدها ويباوع الها عبالك طفل مضيع امه ولكاها 

بقينه واكفين لمن كحيت هي انتبهت شافت امي اجت تحضنها بس امي ردت بايدها وهي تزمخ عليها 

- - شني توج اتفطنتي وهاي التلث تشهر وينج ما كلتي حبوبتي 

هي حظنتها وتبجي بدون اي رد وامي رغم اشتياقها لكن ما بدر منها اي عاطفه وهي اتكللها 

- - انا ما جايه لو ما علاوي المن اجي للعافت الزلم وراها واتصرفت من راسها ما گالت وراي اهل عمام

اتقربت منها :: يمه هذا الحجي مو وكته ارتاحي وغسلي 

ذبت عباتها ع القنفه وجدان تباوعلي وهي ساكته وامي سالتني // هي وين المغسله 

قبل ما تجاوبها وجدان لزمت امي من ايدها واخذتها للمغسله وامي تحجي وهي تعوج بحلكها 

- - هسه كاظه اليتيم وتحبب بي جا من رحتي ما كلتي اخوي عدمن يظل ما كلتي اخوي خطيه

اسمع بس شهكاتها وعلي بحضنها اجت امي للصاله سالتها :: يمه يسوولج جاي 

ردت بنتر // شني انسردت غير توني شربت ف

- - وانت ؟

اشرت ع القنفه :: انا انام اهنا 

- - ليش؟ 

:: احسن 

- - فوت نام بالحجره 

هزيت راسي :: لا حجيه تدرين بيه ما ارتاح اله الوحدي

- - اي ادري احنه انام بذيج الحجره وانت نام بالثانيه 

:: لا تحملين همي اهنا اريح الي 

- - بكيفك بعد انت اااذا كلت شي محد ايكلك لا 

باوعت الها هي اتساءلت // ها عاصف هم احد من عدنا كلك لا ؟

دخنت جكاره هي ردت على نفسها //. محد ايكلك لا كلامك سيف على اركابنا بس هالوكت طلعت بيها البنات 

المثقفات عشتو يتصرفن من حالهن 

:: اكلج يمه انتي مو تعبانه روحي نامي

امي بزعل // ها ما كمت تسمعلي حجايه 

هزيت راسي :: لا حجيه بس انا تعبان 

- - اي الله يساعدك من البارحه لليوم كاض السياره شضال بيك اگلك علاوي وين ينام 

:: بكيفه وين ما يريد ينام ينام 

- - خوش يجوز يريد ينام يم اخته 

:: بكيفه يمه 

- - شني تفرش بالكاع ؟

:: لا ع القنفه

امي // تعال علاوي تعال جده 

اجه يمها ( ) ها بيبي 

:: جيب مخده وبطانيه العمك

هي راحت قبل علاوي وبعدها اجه جايب المخده والبطانيه اخذتهن وهو گلي ( ) تصبح على خير 

هزيتله راسي وجاوبته :: وانت من اهل الخير

امي گالت //. عاصف روح نام بالحجره وانا انام يم وجدان 

:: لا حجيه اهنا انام احسن 

- - بكيفك اگلك خطيه كسرت خاطري بس والله بيها كتله 

:: كل شي بوكته حلو 

- - اي صدك ياالله تصبح على 

:: اجمعين 

نمت ع القنفه الصبح سمعت امي تحجي // اكعد عاصف صلي 

اتثاوبت هي ردت // سوده عليه اتكسرت بنومتك

رحت للحمام اتوضييت وصليت ورجعت اتمددت هالمره ع الزوليه بالگاع اتغطييت ونمت ويمكن بثمانيه ونص 

امي جابتلي الريوك وهي اتكلي // شو اكعد اتريك وياي 

فتحت عيوني // صباح الخير 

- - صياح النور اكعد اتريك 

:: شني جا خليتيني انام 

- - چيف متعود ع كعدة الصبح

:: يمه تعبان 

- - متعيني اتكسرت من نومة القنفه 

باوعت الها بتساؤل رفعت اچتافها // مدري اظنها نايمه

صبتلي جاي وحليب وكعك وصرت اكل امي سالتني // شراح تسوي 

:: هسه ما اسوي شي اصبر 

- - ها 

:: اي 

- - ونظل ما نحجي وياها جم دووب 

:: انتي ما تدرين بالصار 

- - شني شصاير ؟

هزيت راسي :: ما صاير شي

امي باوعتلي بعتب // عاصف من يمته تضم عليه 

:: شي تافه ما ينحچي 

- - سولفه الي هذا الما ينحچي ،

:: خلي اكمل ريوكي 

امي بعصبيتها المعهوده // هو شني ريوكك كعكات وحليبه احجيلي عاصف 

    :: صبيلي چاي 

صبتلي باستكان اخذته ورحت للحجره وامي لحكتني //. ها يمه شصاير 

اضطريت اسولف الامي على الي صار هي ردت //. وهسه عاصف ؟

اتنفست بعمق :: هسه شني ؟ 

- - تبقى هالشكل ما تحجي وياها غير نفتهم منها 

:: حجيه اسمعته من ام احسان لو بذاك الوكت شايل المسدس جان ما خليتها تعيش

امي تهز بايدها //. على كيفك كول ياالله شني هي موديه عليهم 

نفخت :: ما سمعتي امه شحجت 

- - خليها تولي وهمزين هيج حجت كدامها 

:: ها همزين ؟

- - اي هاي بعدهي فرخه وكل حجايه اتاثر بيها عاد همزين ام احسان هيج سووت حتى بعد ما يبقالها عذر

:: عذريش حجيه 

- - عاصف البنيه من اجتنه كل شي ما شافت 

رديت بعصبيه :: شتردينها اتشوف ؟

- - انت ليش من واحد يحجي وياك تلده على حلكه 

:: مو تكولين كل شي ما شافت منو غالبها

امي هزت راسها // اي احجي ضميري غير المدرسه اشافت شني يوم من الايام عمه نشدت عليها عدنا ما عدنا امل 

من نودي عليها تجي وسعاد من تجي بس تخوزر وتسب وتغلط وخالاتها ما بيوم رفعن التلفون وبجذب سلمن نشدن 

عود من الشاكه باكه نوديها تزور اهلها وتخلصها بواجي 

:: چا شسويلها محد غالبها 

هزت راسها // لا كلهن غالباتها فريحه اسمها هي وامها البيت خالها اليوم تريد تشتري هدووم خو من حبلت 

ساره يوميه وياها رايحات للطبيبه رايحات نجهز للبيبي الفرخ البعده ما شايفينه فريحه اتسمي بيبي

:: بس انا ما قصرت دووم اطيج فلوس واكلج خلي تشتري التريده 

- - اي بس ويامن تطلع ما تكلي انت تشتريلها هدوم الله يطي ام كرار لو امل مرات تتذكر من بتك داومت كليه انت 

شسويت تكسي تاخذها وتجيبها هذا اليخابرون بي تسيته اي نقال اخر موديل انا ما ادري بتك واكفه وتحجي تكول 

كل البجامعه حاسديني ويباعولي يكولون بتمن هاي 

وهي المسكينه تخليها تمشي على رجليها بيوم العدك شغل من بيتنا للشارع بيت مهدي ما شافته بس بخطبة ساره 

ومهدي ما قصر طردها وانت ولا جن هذا الشي يمك

اتحسرت :: حجيه اخاف عليها وانتي ما قصرتي خربتي الاول والتالي 

- - اي انت كلساع ولومني 

هزيت راسي :: اي يمه الومج وما انسى السويتي 

اتحرك بيدها // جا ما تشوفني عفت بيتي وصيتي واجيت وياك 

  گفت :: خلي اصبلي چاي اريد اروح اتسوك 

  طلعت صبيتلي جاي وامي طلعت وراي ومن كملت سالتها :: يمه شجيب مسواك 

— —-بكيفك 

:: انتي تطبخيين مو ؟

  ردت بنتر // شني انا اطبخ انغيوه هاي (علت صوتها ) الخاتونه النايمه تكوم وتطبخ شني على اديها نقش الحنه 

ابتسمت وهزيت راسي من وصلت للباب امي حاجتني //اكلك السوك بعيد 

:: لا حجيه اهنا اصلا راح اروح اتمشى ليش 

  - - خوش عود مو تجيب هواي مسواك ومو تتاخر 

:: شني تخافيين يمه 

- - لا خاف احد يخابر يجي 

:: ما اتاخر شيعحبج اجيبلج 

- - كل شي نعمه

طلعت ورحت اتسوكت ما اتاخرت رجعت جايب المسواك ولگيت امي بنفس كعدتها سلمت عليها وهي شافت العلاليك 

شافتهن وحجت // شو بس مخضر وفواكه 

:: هذا كعك وخبز وحليب وبعد شويه يشوون النه سمجه 

- - چا ليش ما جبتها اهنا واحنه نشويها 

كعدت ع القنفه :: حجيه انتي ما بيج حييل وانا ما اشتهي اكل اله من ايدج ( عليت صوتي ) 

هزت راسها // خوش جا معناتها يوميه تتغدا ونتعشى من المطعم ما بيه حييل اگوم اطبخ 

:: هذا الموجود

اتقربت من امي شاورتها :: گعدت 

هزت راسها // ما شفتها يجوز گاعده وبعدهي بالحجره 

:: وعلاوي 

- - هم ما شفته بعده نايم 

:: خلي 

دخنت جكاره امي سالتني // خافن مهدي يخابر شكله 

:: كليله بعدني عد سعاد ومن يسالج ليش ماخذه علاوي كليله ضايج 

- - ها ؟

هزيت راسي :: اي

- - وتالي ؟

نفخت الدخان من حلكي :: تالي انا احچي ويا 

- - خو كله الصدك شني خايف 

:: انا اخاف منين 

- - چا عليش ساكت 

:: يجي وكته يمه 

لملمت حلگها // بكيفك انا هم عدي احسابات 

:: حجيه اول وتالي كل شي راح ينعرف انتي لا تهمين

كعد علاوي وكال ( ) صباح الخير 

:: صباح النور ليش متاخر بالنوم 

امي جاوبت // هذا نوام ما تدري بي لو تشوف شلون يشلع كلبي من اندهه للمدرسه 

ابتسمت وسالته :: شبيها بيبيتك وياك 

رفع اجتافه وابتسم امي گالت // روح غسل وتعال اتريك 

هز راسه ( ) ما اشتهي 

- - من تشتهي الچاي ع الطباخ والكعك بالثلاجه وعمك جاب اجبان وخبز

علي فات غسل ورجع للغرفه يم اخته تقريبا الساعه 12 الظهر جابولنه السمجه وامي ورا الصلاة خلتها وياها الخضره والخبز والطرشي ما شفت وجد طلعت من غرفتها امي صاحت على علي 

- - علاوي تعال جده اتغدا 

هو اجه وامي سالته // اختك وين 

( )بالغرفه 

- - چا وليش ما اجت تاكل 

( ) دا تگول ما تشتهي 

:: خليها براحتها عود انخليلها من الغدا

صرنا ناكل وبعدها شربنا جاي وهي ما طلعت امي راحت للغرفه وانا بقيت بالصاله وعلي هم راح للغرفه طلعت 

وفاتت للمطبخ غابت دقايق رجعت بيدها كوب چاي 

وبقينه هالشكل تقريبا تلث تيام وجنت يوميه العصر اخذ امي وعلاوي افرهم ابغداد وحتى اخليله مجال تطلع تاكل 

او تكعد بالصاله رابع يوم واحنه بالسياره رن تلفوني شفته داليا جاوبتها

:: الو 

- - الو شلونك استاذ عاصف 

:: هلا بيج ست داليا 

- - رايده اشوفك بلا زحمه 

:: اي تدللين وين 

- - حابه اشوف وياك وجدان 

:: احم وليش 

- - عندي شغله وياها

:: اي حقج ست وهم تتطمنين عليها يجوز احنه معنفينها حتى اتقيمين علينه دعوى 

- - - هههه لا مو الهلدرجه 

:: تمام اتشرفينه 

- - بلا زحمه العنوان 

انطيتها العنوان واتشكرت مني وسدت الخط امي حچت //. اشلون اتدليها البيت شمدريك شني جوه راسها 

:: شتريد اتسوي 

- - يمه الدنيا تخوف

ما جاوبتها امي كالت // وهاي انظل ما نحچي وياها 

:: حجيه بكيفج تردين تحجين تردين لا 

امي بنتر. // اووو چا هي زعل 

:: لا عليش زعل بت ابنج وبكيفج 

- - وانت ؟

:: انا ؟

- - اي انت 

:: مو وكته حجيه غلطت ولازم تتحاسب

- - ومهدي ؟

:: شبي ؟

- - اليوم خابرني 

:: شو ما كلتيلي 

- - نشدني وين انتي 

:: اي وشكلتيله 

- - كتله روحي مازعه اخذت علاوي وطلعت يم ام غانم 

:: ها مو گلنه السعاد 

- - اي هو هم نشدني انا حاجيته گتله ما مريت بيها مالي خلك بجيها ولومتها

:: خابرتي امل 

- - اي فهمتها اتكول يمها 

:: خوش 

- - بس اكول يمه جم دووب انضم عليهم 

:: الله كريم تصفى

وصلنه دخلنه للشقه انطيت العلاوي فلوس يجيب عصير للمحاميه ومن رجع راح يم وجدان بعد ان فهمته ما يحچيلها شي 

ربع ساعه واجت داليا بعد ان اتصلت عليه فتحت الها الباب دخلت وبيدها جنطه جبيره 

بابتسامتها // السلام عليكم 

:: عليكم السلام اهلا ست اتفضلي 

- - اشلونك عاصف 

:: حياج الله اهلا وسهلا

دخلت وشافت امي اتقربت منها // اشلونج حجيه 

امي رادت تكوم بس هي البنيه سبقتها // هلا ومرحبا بيج ياعيني اشلونج 

- - الحمد لله اسال عنج 

- - كل الهلا شرفتينه 

كعدت وانا قدمت الها ماي والعصير :: اتفضلي ست لو اسويلج كهوه 

- - لا شكرا كافي هذا 

عضت شفتها وحجت // الحقيقه استاذ عاصف ما اعرف كيف اتاسف الك 

بلا مبالاة :: على شنو ؟

اتنفست // على الموقف الي صار 

:: يا موقف ؟

- - عمه ام احسان وكلامها صدگني اني جدا محرجه 

ما جاوبتها حچييت بصوت عالي :: علي علي صيح اختك كللها ست داليا اهنا وحابه اتشوفها 

- - افهم من تصرفك انت زعلان 

اجت وجدان = السلام عليكم 

وگفت // اهلا وجد اشلونج 

هزت راسها بحزن = الحمد لله

كعدت يمها وادري بيها تباوع الي داليا // اني اجيت اليوم اريد اصحح سوء فهم الجميع وكع بي 

باوعت الها هي استردفت // يمكن انت ما تعرف انو ابو احسان يكون عمي 

:: ما جنت اعرف بس كبل يومين عرفت 

• - - وخاله ام احسان هي هم حالها من حالي اتفاجأت بالموضوع لذلك ه...

وكفت وقاطعتها :: ست داليا ام احسان ما غلطت من حقها تختار الابنها مره ( باوعت الوجدان بعتب ). خصوصا من 

يكون ابنها ضعيف شخصيه ام احسان ما غلطت ( اشرت على نفسي ) احنه الي غلطنا

هزت راسها // لا استاذ عاصف انتو ما غلطتو خاله فاجاتنا كلنه حتى ابنها هم اتفاجأ وهو الصراحه خابرني واني جايه 

اريد افهمكم انو الولد مست...

لملمت حلگي واشرت بايدي :: ست داليا لا تكملين احنه ناس عشاير من نريد نطي بتنا نطيها الزلمه نعتمد انو هو 

يحافظ على بتنا يكون مثل الحايط بتنا تنتجي علي وما تخاف يميل بيها لو يطيح وشفتي بتنا مثلنا ما اتحملت ابن عمها 

من مال بيها وشفتي شسوت وكفت زلم مشوربه زلم تخاف منهم الگاع دوختهم ياالله لكوها وابن عمج مع احترامي 

الشديد الج انا اشوفن انتي ارجل منه اقلها اجيتينه هناك وكفتي وهددتي وحصلتي البتنا ع الطلاك وهذا الشي مشهود الج 

واحنه هواي نتشكرج لان انتي استضافيتي بتنا ودرتي بالج عليها وساعدتيها بهواي امور

- - العفو هذا واجبي وايضا عملي 

:: الله يخليج 

داليا باوعت الوجدان الي چانت كاعده ومدنكه //. اي وجدان شلونج 

هزت واسها =. الحمد لله 

- - اني اكرر اسفي مره ثانيه 

= = لا تتاسفين انتي ما الج دخل 

- - وجدان هاي ملابسج اني جبتهن 

هزت راسها =. لا ست ما اخذهن هذني مالاتج اشكرج هواي 

داليا تباوعلي //. لا حبيبتي هذني بالحقيقه عمج اشتراهن الج وكلي لا تگولين

باوعتلي وعيونها مليانه دموع رجعت دنكت داليا وگفت // ياالله اسمحولي 

امي // وين رايحه ابقي اتعشي ويانه 

ابتسمت // شكرا خاله ما تقصرون عندي شغل 

:: ست داليا احنه هواااي نتشكرج واذا اكو بذمتنا مصاريف كليلي حتى اسدهن الج 

- - لا ما كو اي مصاريف انت سديتهن وزياده اسمحولي 

:: هلا بيج السويتي البتنا ما ننسا وخلي ابالج الانسان المل شي متعرض والله لا يعوزج اذا بيوم احتاجيتي الاي شي اي شي 

غالي رخيص مخابره يستوجب جيتج ما يردج الا السانج انا اخوج ونتب الج عدنا دين بارگابنا يمته ما تردينه نسده

داليا //. خجلتي استاذ عاصف اني جدا ممنونه منك ( باوعت الوجدان ) حبيبتي وجدان اي شي تحتاجي اني مو بس 

محاميه اعتبريني اخت وصديقه 

= شكرا ست ما قصرتي 

حضنتها // مع السلامه 

= الله وياج سلميلي على الوالده هوااي 

- - الله يسلمج (لزمت ايد وجدان ) وجدان حبيبتي كل واحد بهاي الدنيا يحتاج الناس يتعايش وياهم اني وانتي وكلياتنا 

لان ما نگدر نعيش ابحدنا انتي عندج ناس تحبج ومستعده كل شي اتسوي حتى اتسعدج واني وحده من الناس جاي احسدج 

على حب عمج وبيبيتج الج ديري بالج عليهم ولا تضيعيهم من اديج

اكتفت بهز راسها وشفت عيونها غورگن 

طلعت داليا واني طلعت وراها ما سديت الباب لان اريد ارجع هي ابتسمت وحاچيتها 

:: شكرا مره ثانيه وسلامي للاهل 

- - واني اعتذر على الشي الي حصل صدكني لو كنت اعرف هالشكل خاله راح تسوي اصلا ما اخليها توصل للمشتمل 

:: ست داليا شنو تتصورين حتى لو مرت عمج ما حاجيه وقابله تتصورين انا اوافق على العموم لاتفكرين بلي صار 

احنه اصلا نسينا 

ابتسمت //تدري عاصف اني فعلا احسد وجدان عليك 

   :: انتي اصيله اتمنالج النجاح والتوفيق واعتبريني اخوج الجبير اي شي تحتاجينه انا برسم الخدمه 

    - - ما تقصر اشكرك هواي مع السلامه 

:: الله وياج 

دخلت شفتها بحضن امي وهي تبجي وتكللها 

= بيبي سامحيني بوكتها ما عرفت شسوي 

اثنينهن ما منتبهاتلي امي تدفعها وهي لازمه بيها وتبچي عبالك طفل جاهل //. ميلي عني ما اريدج 

= بيبي اني غلطانه بس الي صار بيه اذاني حييل وانتو اتخليتو عني 

امي بعصبيه // شني ولج ما خليتي عيوني كدامج عيون عاصف ما كلتي شراح يسوي شراح يصير بي ولج من درا 

لحد ما جابج لهنا مثل المسودن 

صارت تقطع بكلامها من كد البچي = بيبي انتو انتو عفت ني عبالك غريبه 

- - ها عكب كل السوا الج عاصف تكولين عفناج

رفعت راسها شافتني واكف وهي براطمها يرجفن ااشرت عليه = هذا هو الي خلاني اسوي هالشكل 

- - انجبي لا تحجيين زايد 

  = ها اي كلمه انجبي مو هو ولي امري شسوالي ها گولي شسوالي حتى امي حرمني ما خلاني اشوفها بحجة 

راح اجيبها واجي شسوالي جابني للناصريه بالگوه واني اتوسل ابقى بالبيت جابني حتى غرفه اني واخويه ما 

النه لو نسيتي من يجي عمو مهدي وين نروح نگعد لو من بته اتداوم هو يوصل ويجيب ويودي و من دخلت كليه 

خلاني امشي توكع رجليه من المشي حتى اوصل للخط 

=. ها شسوالي گولي راد يتخلص مني انطاني البهاء مو اني اليتيمه ماخلاني اكمل دراستي حالي من حال بته

امي //. انوبه هو اطاج البهاء ولج مو انتي القبلتي

هزت راسها = اي قبلت لان ما لكيت اب ايكلي لا تقبليين كملي دراسه واكبر واحد ما يحجي وياج وهم مي خالف صارت 

ومن اتزوجني بهاء سالتو عليه اجيتوني شفتوني اني غلطت مره بس انتو غلطتو الف مره 

امي تتهز بايدها // اي صدك يجينه اكثر جا ما كالتلج المحاميه شكثر اتوسلنه بيها حتى بس نندل مكانج ما گالتلج 

شكتلها بس كون تردين ما گالتلج ما گعد لا شاف گاعه ولا رزقه ويهوفج ابغداد وما گالتلج اطاها فلوسها زايدات قاطين 

بس حتى اتدير بالها عليج وهسه جايه وتحاسبينه بكل عين صلفه گومي منا ما اريد لا اشوفج ولا احجي وياج واحمدي 

ربج على سواية ام احسان هذا ( اشرت عليه ) ما خلى بكلبج طلقه كومي ما اريدج انتي وحده نكاره مثل ابوج

ردت حضنتها = بيبي حتى لو هسه عمو يكتلني يخلي بگلبي طلقه ما اگوم اله تسامحيني 

امي وهي خافيه ابتسامه بوجهها //وانا ما اسامحج چان اجيت لهنا الخاطر هذا المسكين علاوي بس انتي ما تستاهلين 

الواحد يباوع بوجهج

وصارت تبوس ب امي بخدها وبيدها وتحضنها وامي تدفع بيها على كييف وتباوعلي هزيت راسي 

ورجعت طلعت رحت للمحل الي يم العماره اخذت منه جكاير وبعدها صرت اتمشى صار دنيا ليل مريت بمطعم اخذت 

عشا ورجعت للبيت 

فتحت الباب واشوف امي اتصلي خليت الاكل بالمطبخ لان اعرف بيها جاي اتصلي رحت اتوضييت وصليت 

واني اتكللها // حضري العشا العاصف

جاب علاوي الصينيه وامي شاورتني // صيحها خلي تتعشى ويانه 

هزيت راسي بالنفي امي گالت // وشچم دووب 

:: خليها تتعلم 

  - - هسه اكللها تسويلنه جاي 

:: حجيه اذا. ما بيج حييل اروح بره اشربلي استكان چاي 

امي هزت ايدها // ههههي هي تراضيمن وتعوفمن

اتعشيت انا وعلاوي وامي اكلت شي بسيط وكالت راح اسويلك جاي ادري بوجدان هي الي مخدره الجاي بس انا 

غلست علي شال الصينيه وانا غسلت وانتجيت على مخده بالكاع وعلي جاب صينيه بيها استكانين چاي امي اجت 

وانا ادخن واخوط باستكاني 

امي //. عود كلت اروح اشوف اولاد عمك عيب يدرون بيه اهنا وما ماره عليهم 

هزيت راسي :: اي فد يومين تلاثه ونروح الهم كلنه 

امي // كلنه حتى (تاشر براسها ) 

:: لا شتسوي تروح تبقى اهنا 

امي // يمه انت هم شويه على كيفك وياها

باوعت الها وانا احك بحنجي امي سالتني //. ليش تباوعلي 

:: متعجب 

عكفت وجهها //. منين ؟

:: منج حجيه 

- - ليش شبيه انا ؟

:: مو هذوله الجبتهم للناصريه وانتي كلتي المن جايبهم مو ذوله فرووخ سعدي 

امي بعتب //. بروح ابوك فرقتهم عن بزر بدر عن فرح 

:: مو هل اكلج مستغرب 

- - - لاتستغرب المن نصلي المن نصوم سعدي غلط هو وربه فروخه شلهم غرض وانوب ايتام

اتقربت على امي وبست راسها لان حسيت بيها اخذت بخاطرها مني هي ردت عليه //. عاصف زعطوطه وسامحها 

:: اگلج يمه گومي نامي ومو تنسيين دواج 

هزت راسها // اي انت هم كوم نام بالحجره 

:: شني هي يمه اكلج اهنا ارتاح 

- - انا انام اهنا وانت فوت نام بحجرتك 

:: لاحجيه اهنا احسنلي ما عليج بيه 

- - بكيفك بس افرش بالگاع القنفه تكسرك

هزيت راسي وهي راحت وهي تستغفر 

نمنا والصبح نفس الشي اتريكنا وطلعت جبت شغلات ورجعت بسرعه والعصر طلعنه انا وامي وعلاوي اتعشينه بره 

وامي طلبت لفتين سفري وقوطية ببسي اطتهن العلاوي وكلتله //. هذني عشا اختك 

سالتها :: شني يمه تردينه نرجع 

هزت راسها // اي مو يوميه نتعطل الفرخه ابحدها 

:: خو ما بيج شي 

- - شويه راسي يوجعني

مريتها على مضمد قاس السكر شويه مرتفع رجعنه انطيتها علاجها واتمددت بالصاله //. ها اشلونج هسه 

- - الحمد لله صرت زينه 

  :: اخذج للمستشفى 

- - عاصف يمه ليش اتريد اتمرضني گوه ما بيه شي لجن ما اريد اخلي الفرخه الوحدها الدنيا موور 

:: احنه ابختج حجيه شعليها مو تلث تشهر ونص عايشه ابحدها 

- - چا انت الا متحمل منها هاكثر ليش خلي ...

اندك الباب امي باوعت الي // ياهو اجانه هسه متانيلك احد 

ابتسمت :: هو ياهو يندلني اهنا ومتانيلي احد خاف الحارس يريدله شي 

فتحت الباب واتفاجآت 

الفصل الرابع والأربعون من هنا 

شكرا لزيارتكم عالم روايات سكيرهوم