رواية قصة وجدان الفصل الخامس والأربعون 45 بقلم انين الليل

وجدان

بقيت محتاره بعد الي سمعته ما اعرف شجاوبه خلاني بين نارين انو ابقى ويا واصير زوجته او اروح البيت مهدي

مو البيت جدي

حلفته بروح بدر وداعة بيبي وروح جدو غازي لكن فاجآني من گلي حلفيني بداعتج

والي فاجآني اكثر من كلي بس اعقد عليج تكونين انتي رقم واحد بحياتي لان انتي الي راح تشيلين اسمي

صراحه صار كل شي مبهم شنو رقم واحد لعد رجاء شنو بالنسبه اله

اتنفست بعمق وعبرت الجمله الاخيره حاجيته = سولفلي اي شي خليني استوعب

رفع راسه :: شتردين تعرفين

= كل شي منو انت منو فيصل ليش اتسمي بيبي يمه وجدو ابوي سولفلي كل شي من اول ما اجيت للدنيا

ابتسم وهو يحرك بايده :: شني تردين تكتبين قصتي

رديت بعصبيه = لا تستهزا

:: ما استهزا بس اذا اسولف لازم بالاول اعقد عليج لان انتي تردين تعرفين قصة حياتي وهاي تاخذ ايام ويجوز.

انا اخبث واخليها تاخذ شهور وانتي ما يصير تبقيين يمي الوحدج ما يجوز وانتي تدرين ليش

فتحت عيوني هو رد :: انا بااعتبار احل عليج فحرام شرعا تبقيين يمي

اتنفست بعمق = انت كنت عمو وراح تبقى عمو

:: لا مو صحيح انا بعمري ما كنت عمج

=. هالشكل صار الحجي

نفخ الدخان من حلكه هز راسه :: اي هو هذا الحجي وحتى ابين الج حسن نيتي راح انطيج موجز زغير عن حياتي

= واني دا اسمع

:: ابوي عشك امي الي هي تصير اخت حبوبتج فرحه حباها بكل جوارحه هذا الشي سولفته الي حبوبتج

وابوي غازي الله يرحمه

= يعني انت ما شايف امك وابوك

هز راسه = لا ما شايفهم بس بالصور ابوي فيصل عشك امي جانت زغيره حباها ورادها ومن خطبها من ابوها ما اطاهه اله

  =ليش ؟

:: يكله چبير وبتي زغيره عاد ابوي كله چا عمي عز الله انهبها واشرد بيها واهلي واخوتي يتكمنون الفصل

ابوها اتخبل من كلام ابوي گال من باجر اعرس الها الاي واحد وانت ما اطيها الك اهنا ابووي كله عرس الها

ولا يهمك وداعتك طلقه بگلب العريس وهو ابيتك جاي ياخذها عود وگضوني عنها

بعد جدي عرف هو شكد يحبها عاد اطاهه اله بشرط ما تشتغل بالحقل ولا تسرح ولا كل شي تسوي

وابوي قبل

وعرسو وهو ما مصدك وحبلت صارت عدهم اختي ريمه وحبوبتج اتكلي ابوي چان مسودن بالعشك وامي اكثر

ما چنها فرخه جاهله ( باوعلي وكانما الكلام يوجهه اليه ) چانت تحبه لا شني تحبه تموت علي

بلعت ريگي = انت شمدريك مو تكول ما شايفهم

:: اي ما شايفهم بس حبوبتج تسولفلي عليهم

هزيت راسي بدون ما اعقب هو رد :: احم من صار عمر اختي تلث سنين لا ما صايره تلث سنين بعد الها شهرين انا

صرت وتكلي امي جان يووم مطر وعواصف وصرت بليل وظلمه والدنيا ما بطلت تزخ مطر ورعيد وماكو ما لكو

قابله تجي تجييب امي ولا يكدرون يطلعون من الكاع يودونها للمستشفى

  =. ليش شني اليمنع

:: الطين السياره تغرز ومشي ما نكدر نمشي

لعد شلون جابتك

: : حبوبتج هي واام جابر جيبن امي الله سهل يمكن حتى اتعذب بعد اله بيها اراده وانا اجيت للدنيا وهلسموني عاصف

= وشلون ماتو

:: ما ادري كل الاعرفه جابتني خلتني عد حبوبتج وگالت رايحين بشغله ونرجع واخذو اختي وياهم راحو وما ردو

انكلبت بيهم السياره وظليت انا عد حبوبتج وجدج الي ما انكر فضلهم والي افديهم بروحي

=. يعني ربوك حالك من حال ولدهم

هز راسه :: واكثر ربوني وعلموني وتعبو عليه وما فرقوني من ولدهم رغم همه اكبر مني

= يعني بدر اكبر منك

هز راسه :: وعيت ع الدنيا شفت بدر اكبر مني بعشر سنوات وابوج سعدي اكبر مني بتسع سنوات

جان ابوي وامي يحبوني

    = ابوك فيصل وامك وضحه

هز راسه :: لا ابوي غازي وامي فرحه ذولاك ماتو من وعيت ما عرفت الي ام اله فرحه وابو غازي ذولاك

محد يذكرهم بس كل فتره اتذكر ياخذوني للمكبره وابوي ايكلي اقرا الفاتحه الابوك وامك واختك

   :: بدر جان يحبني وداراني وياما شالني ولعبني بس ابوج جان يكرهني

وللامانه هو مو بس يكرهني لا يكره الدنيا كلها ما يحب بس روحه جان اياذيني ويضربني دووم وبدر جان

ايحاميلي وحتى ايضربه على مودي وانوب يروح ايكل الابوي غازي ويجي هم يطي المقسوم رزاله وضرب

يرد ثاني يوم يعيدها انا اخاف منه واتحاشا وابوج يخاف من بدر ويتحاشا وانا استغل خوف ابوج من بدر

اروح اكعد ويا او وين ما يروح اروح وياه

=. يعني بما انه بدر اكبر منك بعشر سنوات معناتها انت من وعيت. كان بدر شاب

:: اي وحتى ابوج تره فرق سنه بينه وبين بدر

=. ابويه كان اياذيك ؟

اتحسر ورفع راسه كانه يتذكر شي :: جان ماذيني دووم يستغل فرصة بدر ما موجود ويكعد يكتل بيه بيوم وهذا الشي

بعمري ما انسا جنا نلعب انا وجابر بالبستان

=. عمو جابر ؟

  هز راسه :: اي ابو مصطفى ابو الله يرحمه جان يشتغل بالكاع ويه جدج ( اتحسر ) المهم جان اكو بير

شويه بعيد عن الگاع حافرينه اذا الكاع ينشف مايها او ما ينزل المطر يسگون بي اجه ابوج واخذنه ويا

جنه نخاف منه ما نكله لا اخذنه بحجة نلعب هناك من وصلنه كال ليش خايفين العبو وانا العب وياكم

بقينه نلعب بس شنو خايفين ونترقبه ونباوعله وهو يباوع النه ومبتسم ابتسامة خبث

    حركت اديه = ليش شسوالكم ؟

    اتنفس بعمق :: بالبدايه ربطنا اثنينه على جذع نخله

= شنو ؟

هز راسه :: اي مثل ما اگلج ولزم خشبة مالت شجره وصار يضرب بينه جان جايب حبال او وصل مال قماش

شد بي حلكي وحلك جابر حتى ما نصيح واحد يسمعنه وصار يضربنه جنزنا وهو يضحك

تالي فكني من النخله استبشرت خير لكن الي صار انو شبگني بالحبل من يم اديه وكثر العكدات يم جفوف ايدي

ويريد يشمرني بالبير وهنا جابر غافل ابوج ما اعرف شلون وراح يركض خبر بدر الي اجه ولحك عليه بااخر

لحظه وبدر كال الجابر يصيح ابوي غازي واجه وشافني بهاي الحاله اتجيونو علي ابوج بدر وابوي وشبكو

على نفس الشجره وطكو بنفس الخشبه وتالي دندلو بالبير من العصر الثاني يوم الصبح بحيث من طلعو شويه ويموت

وهذا الشي زاد الكره بكلب ابوج على بدر وعليه وحتى على ابو وامه

:: اصعب لحظات مريت بيها من انقبل بدر بالكليه العسكريه لان جان يداوم ابغداد وهناك استفرد بيه سعدي صار

يعذبني ويضربني الى ان بيوم كتله :: ليش تكتلني مو انا اخوك

هو صار يضحك بهستريا ويكلي // انت اخوي انت يا نغل اخوي انت امي وابوي ما ادري منين جابوك رووح دور

على اهلك وانشد وين لگوك بيا زباله

:: ما تعرفين ذيج اللحظه شصار بيه ما هانت عليه روحي صرت ابچي ورحت الامي وابوي وحجيت الهم الكاله سعدي

وابوي صار يتهدد طلع البندقيه وراد يرمي سعدي بس انا كضيته وحاجيته وگتله فهمني :: انا منو وين اهلي

:: وسولفولي شي مقتضب نفس القصه ابوي يصير اخو جدج وامي تصير اخت حبوبتج وانهم اتوفو بحادث وياهم اختي بذاك

الوكت عمرها ما مكمله تلث سنين وانا عمري اربع تشهر

وبيومها ابوي غازي راح السعدي وربطه يم الهوش كعده ع التبن بدون فراش وهو ايكله اريد اعلمك شلون اتگول

على ابن فيصل نغل خلا تلث تيام رابطه ويجيبله بس خبزه وماي ومن وكتها زاد كره ابوج مو بس الي لا للكل

= تقصد ابويه يكره جدو وبيبي

:: ويكره عمج بدر وعماتج ابوج ما يحب غير نفسه

= شنو دليلك ؟

ابتسم باستهزاء وهو يحرك ايده :: ليش انتي ما لمستي هذا الشي ؟

= شلون يعني ؟

   باوعلي وهو يسلهم بعيونه :: يعني من تصرفه ويه امج وياج ويه اخوتج شتردين اكثر من هيج دليل

صفنت واني اتذكر شلون كان ايگلي اضربيها هاي مو امكم اتفلي عليها هاي جايبها خدامه تخدمني وتخدمكم

:: ها وين صفنتي

اتنفست وحجيت بااصرار ،= اريد اسمع كل شي كل شي

شعل جكاره :: شوفي وجد سواء سولفت لج قصتنا او لا لازم اعقد عليج وتكملين دراسه وتتخرجين وبعدها اطلكج

وبيدي ازفج للانسان الي انتي تختارينه هذا وعد قطعته على نفسي امام امج

= يعني شنو ؟

:: يعني انا من اعقد عليج ما راح يصير اي شي بيناتنا شفتي بحچايه وحده سكتت بهاء ومهدي انتي وافقي

وكل شي يرجع طبيعي

= توعدني ما ...

قاطعني ولزم شاربه :: اوعدج وهذا شاربي مو عليه اذا اخلف بوعدي وياج

= امي طلبت منك هذا الشي

هز راسه :: اي امج

= احلف

:: وداعتج

= ليش انت بالذات

نفخ الدخان من حلكه :: لان اكو قصه بالموضوع

= انت وعدتني

:: اي والمهر الي تطلبينه

= اخاف ما بقى عندي ثقه بااي احد

وكف وطفى الجكاره :: تمام براحتج ابد ما اجبرج بس يكون بمعلومج اذا ما عقدنا انا مضطر اخابر مهدي يجي ياخذج وبعد

انتي تصيرين ما تهميني وما عليه بيج اشيل ايدي منج لان اتضحت الامور وبعد تصيرين بكيف مهدي يريد يرجعج

البهاء يريد ايخليج ابيته يشوفولج واحد يزوجونج اله انا بالنسبه الي راح اشيل ايدي لان انا رجال احل عليج

فاانتي بكيفج هسه اتقررين

::طالع راح اجيب الشيخ يعقد والج مطلق الحريه توافقين او ترفضيين وبحالة الرفض اتعذريني اخابر مهدي لان

انا اصير بالنسبه الج رجال حيا الله كرايب ابوج وبعد ما اكدر احميج

=. ليش تتخلى عني بهذا الوكت

هز راسه :: غلطانه ما اتخلى عنج بس انا راح اطلع جذاب وبعد ما الي اي داعي الوجودي وياج اصلا من اتدخل

مهدي ايحقني اذا ما حقاني هسه لان چذبت وكلت عاقد عليج انتي بكيفج ترحين ويه مهدي وانا اروح اعتذر من امج

راح يمشي حاچيته =. اوكف شنو تروح تعتذر

ما رد عليه طلع من الشقه بقيت ابحدي واني افكر بكلامه الي مره ايحسسني بالامان بوجوده وياي ومرات هواي

ايحسسني بالخوف

كعدت وبيدي الريمونت واني احجي ويه نفسي وابتسم بمراره

= هماتين بهاء خلالي النجم بايد والگمر بايد اللخ وتالي. شسوالي عاملني مثل ما تتعامل اي وحده رخيصه بعد

اصدك بعاصف الي اشوفه غامض والي عشت سنين واني عبالي هو عمي اخو ابويه لو هسه كلامه وتلفيقاته

على ابويه بس يريدني اصدكه مستحييل اصدك اي شي اني لازم اكون منتبهه الاي حركه او كلمه يحجيها

صرت احچي ويه نفسي بصوت مسموع = لعد اذا امي موصيتك عليه لويش فرطت بيه الغزوان لويش خليت بهاء

يتزوجني وياذيني

= احمدي ربج لو كان هو متزوجني وعارف الي صار شكان سوا اكيد قتلني بدون اي تفاهم

= تتصورين بهاء راح يسكت ما راح يفضح الي صار

= خلي يحجي ما عاد ايهمني شي

= ها ما يهمج وهشام من يسمع ومهدي ونهوده راح يسكتون

هزيت راسي = مو بس همه ورجاء اكيد بهاء راح يسولف الها وهي تجي تفضح كل شي العاصف

   حركت ايدي = اي خليها تحجي وخلي شيصير يصير ما يهمني

= انتي وين تحجيين وهو راح يجيب الشيخ شراح تسوين

= هو وعدني

= وانتي تصدكين ؟

= لا ما اصدك بس ما عندي حل ثاني وين اروح وشلون اعيش عاصف مو هيين صار اكثر من تلث تشهر عايفني ابيت داليا

بارادته وهو يندلني ما حاول حتى يحچي وياي بالتلفون كل هذا ليش سوا حتى يتزوجني

= ااااه ياربي شسوي تايهه ساعدني

صرت ابچي هو دخل شافني حجى :: فوتي غسلي وجهج الناس بره

باوعتله واني مبرطمه = انت عد وعدك الي

هز راسه وبس اسمع صوت نفسه

   = واذا طلكتني اني واخويه وين اروح

    :: تبقيين اهنا

    = وين اهنا

ااشر ع الشقه :: اهنا هذا بيتج ومكانج

   = احلف

    نفخ :: روحي غسلي وجهج وادخلي للغرفه عيب الناس واكفه

رحت غسلت ودخلت للغرفه واسمعه ايكللهم :: اتفضلو اهلا وسهلا

صار لازم اذعن للامر الواقع ما منها اي مهرب الشيخ كله اريد اسمع موافقتها وسالني وانا رديت بالموافقه

الشي الي حيرني انو انطا عشر ملايين المقدم اما المؤخر فكان مية الف الشيخ عاد وساله مية الف رد علي

  :: اي شيخنا ميه

وهيج وافقت واني اعرف انو جنيت على نفسي وهم اعرف انو عاصف ما يختلف عن بهاء وغزوان بشي

بالعكس اشرس منهم والكل يخاف منه

حچيت ويه نفسي = هاي هي شتردين اتصيرين وشتردين اتسوين تبقيين اهنا واذا باقي بيج ذرة خير خليها الاخوج علي

الي اتعذب من هو زغير عاد يبقى كدام عينج

اسمع الناس باركوله واتمنوله حياة سعيده وذريه صالحه

انفتح الباب وانسد عرفت بيهم طلعو وساد الصمت بقيت شويه وطلعت ما شفت احد الشقه فارغه بقيت گاعده واترقب

واحچي ويه نفسي = اني شسويت معقوله هذا الصار ليش هالشكل شمعنى اني من دون الناس

= يعني اخلص روحي من بهاء اذب نفسي بعاصف الي ما ينحزر شلون بيه وشتصرف

عاصف الي كلها تخاف منه وتحترمه من يعرف شراح يسوي من يحجيله بهاء شنو ممكن يسوي بيه

شسويت بنفسي شسويت

=. اووف صرت سلعه رخيصه انباع وانشري باارخص الاثمان

=. كلها حقرت وياي كلها بهاء وغزوان واخر شي خذلان خاله خوله والي سوته وياي لو ابنها الي عبالي راح

يكون لي سند اااخ وما اعرف شراح يصير وياي

بقيت كاعده واحجي ويه نفسي واعاتبها والومها لكن ارجع واكول

= وجودي ويه عاصف امان الي من بهاء وطيشه ومن مهدي وكرهه الي وهو وعدني انو ما راح يتقربلي

بس من بهاء يحچي الي صار اكيد عاصف ما راح يرحمني

عضيت على شفتي حيييل =. شيصير خلي يصير يقتلني ياريت ارحم من الذل الي اني عايشته

واتذكرت شلون بهاء من گلي اكرهج وما احب اسمع حتى صوتج وشلون كان اياذيني وهو يمارس بحقي كل انواع الذل

والاهانه جاوبت نفسي

= بعد الندم ما يفيد الي صار صار واني من البدايه غلطت كان المفروض افضح غزوان حتى لو كان مصيري القتل

ولا هسه اني جاي انقتل الف مره باليوم بعدني ما مكمله عشرين وانحسبت عليه متزوجه ومطلقه

السوال الي جاي يخطر ابالي = ممكن بهاء يكل العاصف على الي صار وياي ويسمعه التسجيل

   هزيت راسي وجاوبت = اي بهاء ممكن كل شي يسوي

     = زين اذا عاصف عرف شنو يكون رد فعله

   = خلي شنو ما يكون يكون ما عاد ايهمني شي

انفتح الباب شفت عاصف جاي وبيده علاكه دخل بدون ما يسلم اني بقيت كاعده حتى ما يعجبني اباوع بوجهه

هو خلاهن ع الطاوله وبعدها راح غسل ورجع كعد ودخن جكاره حاجاني

  :: جبت عشا اذا يعجبج تاكلين

ما جاوبته وكف راح للغرفه الثانيه غاب شويه وطلع بيده علاگه اتقرب مني وخلاها بحضني :: هاي الج

استغربت هو رد :: هذني مهرج عشر ملايين

رجعتهن ع الطاوله = شلي بيهن ما اريدهن

  :: هذني حقج لازم تاخذيهن عسا ما تحرگيهن

    هزيت راسي = خلص ما اريدهن

  حجى بعصبيه :: كافي عناد واخذيهن خليهن بالغرفه

   رديت بنتر = لويش اتعيط اني ما اريدهن مسامحتك بيهن

   :: وانا جاي اگلج هذني مالاتج حقج اخذيهن ايفيدنج

اخذتهن ورحت للغرفه ضميتهن بالكنتور طلعت اخذت العلاكه وصبيتله. عشا كان جايب فلافل وصمون وياهن

مقبلات ومقالي باذنجان وبطاطا خليتهن بصينيه وصبيت الچاي اخذتهن اله شفته يدخن وصلت يمه وخليت الصينيه

حاجيته بحده = ياالله تعشا

ظل يسحب بالجكاره بنهم جاوبته = عوف الجكاره وتعال اكل

استغرب من كلامي عرفته من نظرته الي هو ما متعود واحد يحچي ويا هالشكل فتح عيونه واني اتحاشيت نظرته

باان ابين نفسي ما منتبها هو راح غسل اديناته وصل يمي وكعد وصار ياكل بدون ما يطلب مني اصبله جاي

صبيتله بكوب واني صرت اكل رغم ما اشتهي رفعت راسي اريد اساله وبنفس الوقت هو رفع راسه وتلاكت عيونه

راسا حچييت

  = ليش 100

    عكف حواجبه :: شني

       = 100 الموخر

     :: احسن

  = شلون

  :: للطرفين

   = ممكن توضح

  :: يعني من تردين تتطلكيين مني راح يكون سهل ان تتنازلين عن المؤخر ما تتندميين

ومن انا اطلكج انطيج المؤخر بسرعه ما اماطل وهواي وكسر ظهري وما عندي وانا رجال

فلاح بالقدره اطلع عيشتي ومن هالسوالف

تستمر القصة أدناه

جاوبته باستهزاء وانا ابتسم = وليش مكلف نفسك لو ما مخلي احسن

ما جاوبني شرب الجاي ورجع المكانه وصار يدخن اخذت كوب الجاي ورحت يمه حاجيته

  = انت وعدتني

  :: بشنو

    = بهواي وعود من ضمنهن تحجيلي كل شي

     اتمدد ع القنفه :: اريد انام

  = ليش كل ما احجي وياك تكلي اريد انام

اتثاوب :: لان انا فعلا تعبان واريد انام

  اتغطى بالبطانيه ودار وجهه حاجيته

  = واني

وخر الغطا من وجهه :: انتي شنو.

  = كتلك اريد افهم كل شي

  :: اتفهمينه

  = اكعد فهمني كل شي

: لا تتا مرين عليه

  حسيت بغلطتي من اني وافقت جاوبته بحزن. = اني من حقي اعرف خصوصا وانت وعدتني

خلى ايده على گصته وغمض عيونه وحاجاني :: فوتي نامي بعدين نحجي

  = لا هسه

  :: تعبان وما الي خلك

  = واني مدا اتحمل اريد اسمع كل شي

   باوعلي :: واذا ما احجي شتسوين

  = تكون مو عد كلامك القبل شويه حچيته

خزرني :: يعني قصدج انا ما التزم بكلامي

= انت كتلي بس نعقد راح تحجيلي كل شي واني وافقت فلا ترجع بكلامك

نفخ وكعد وهو يكول :: صبر جميل وباالله المستعان لا حول ولا قوة الا باالله العلي العظيم شتردين تعرفين

    = اريد اسمع

  :: شني ؟

استحييت اجاوبه حاجيته = بعد ان ابويه صار بالكليه العسكريه انت اكيد شويه امورك اتحسنت

  :: انا بوكتها جنت زغير ومن راح ابوج كانما كل مشاكلي انحلت

  = شلون يعني

اتحسر :: يعني ما صرت انضرب واتهدد اذا اكول الابوي اكل ضرب بالزايد من سعدي وما صرت يوميه اسمعه يغلط

عليه ويسب اهلي

= بس انت گلت مو بس وياك

  هز راسه :: ايي مو بس وياي ويه اخواته چان مراويهن الويل ويه امي ويه كل الناس اتصوري خطيه جان

  جابر زغير ابوج ما خلا شي ما سوا بي وبيه وبكل الناس

    = اووو متحامل هواي على ابويه

   هز راسه :: اي

  = +لكن اني ما اشوف ابويه يجيكم اكثر من يوم وليله

ابتسم :: ابوج اصلا ما جان يجي واذا اجه ما يبقى اكثر من ساعه ساعتين بالميت

  = بس ماما كانت تكول ابوكم راح البيت جدكم

  :: يجوز هو امفهمها انو يجينه بس هو ابد ولا وصل من يوم وفاة ابوي غازي ما شفنا

هزيت راسي = اتذكر اجينه وثاني يوم من غبشه رجعنا لان بيبي طردتنا

   :: ها تتذكرينها

     = بلي اتذكر الطريق كله ساكتين وابويه ...

  رفع حاجبه :: شبي ابوج احچي ليش سكتي

    هزيت راسي = لا ولا شي

ابتسم :: تره اعرفه كلش زين من رجعتو الطريق كله وهو مشغل اغاني ومن وصلتو للبيت مثل على جماعته

شكد هو مقهور وضايج وحزين على ابو مو صحيح

  اتنفست بعمق = انت لحد الان ما جاوبتني على سؤالي

  :: يا سؤال ؟

  = ليش الكل يكره ابويه وانت تكلي انو كل الي انتو بي سببه ابويه

راخذ من الباكيت جكاره وشعلها ونفخ الدخان :: شوفي عوفي كل شي وخلي الماضي يولي وعيشي حياتج

هزيت راسي =. لا اريد اعرف كل شي وانت وعدتني

     :: احسبيني ما وعدتج

=. لا ترجع بكلامك

نفخ الدخان. :: ما اريدج تتاذين

     باوعتله وهزيت راسي = لا تسولف ع الاذيه كل شي صار عندي عادي

اتنفس بعمق :: اتخرج بدر ضابط وصار يداوم بدائره من دوائر الدوله المهمه لان هو جان ضد الحرب وزهق الارواح

بس طبعا ما يحجي الكلام بينه وبين ابوي غازي انا سمعته يسولف على ابوي واتذكر ابوي كله

- - سوي جهدك ودورلك واسطه وانتقل وانا اطيك فلوس الواسطه انا ياابني من البداايه ما قابل تدخل ضباط

بس ما ردت اخلي ابالك

- - بويه تدري امنية حياتي اصير ضابط

- - وصرت الله يوفقك

   وفعلا انتقل الدائره داخل بغداد وجانو جنوده ايحبونه لان هو شجاع بكل معنى الكلمه وچان شريف ونظيف واخو اخيته

   = حتى بابا بشهادة الناس وجماعته

فلت وجهي لان ما عقب على كلامي :: واتزوج رجاء وره شهرين حملت ابهاء وهو يداوم ما يتاخر عن دوامه

واترفع الى ان صار نقيب وسعدي ملازم وجانت حرب العراق وايران بذروتها وبليله من الليالي هو ملتحق اجانه واحد

من جماعته ومبين الخوف على وجهه وكال الابوي انو الامن اعتقلت بدر

:: وبذاك الوكت الي يعتقلونه الامن ينتهي امره اذا مو امر عائلته ويا

:: ابوي طار عقله بدر اعتقلو ليش وشنو السبب بنفس الليله راح البغداد يدور على واسطه يريد يعرف بيها ليش

اعتقلو لكن بدون فايده وراح السعدي وخبره يدير باله لا الامن يجوله ويعتقلونه وسعدي گله شسوي اشرد

اثبت عليه وعلي التهمه الماخذينه بيها ابقى ميه بالميه يجون وياخذوني ابوي اتوسل بسعدي يعوف كل شي ويجي

اهنا عدنا بالكاع بس سعدي كله

اثبت التهمه على بدر وعليه والحكومه تندل دربي وتالي حتى انت ياخذونك

:: وصار سعدي بوكتها يمشي ويه ابوي وبنفس الوكت خايف على نفسه لا يعتقلونه لان كبل اي واحد ضد النظام

او حتى ياخذونه الامن كل عاىلته تروح بالرجلين سعدي جان عنده صديق من اهل الموصل هذا واصل كلش بالدوله

قرر يروحله ويحاول بلكي يحصل خبر منه عن بدر

وطلب من ابوي يرجع ويسكت وما يجيب طاري انو الامن ماخذين بدر على ما يحصل خبر

  :: وفعلا راح ابوج وبعد يومين اجه وكال النه الخبر الي نزل علينه مثل الصاعقه

انو بدر يشتغل ضد النظام ومرتبط بحزب معادي ويحاول ان يشترك باانقلاب ضد الحكومه

وسعدي اكيد هم ياخذونه الامن لان اخو وبذيج اللحظه ابوي انهار يعني راح يخسر ولده اثنينهم

     (صار يدخن ويسحب بالجگاره حييل وينفخ الدخان ) :: الحد الان اتذكر ابوج

وهو ايكله مو احتمال اكيد ويجوز حتى مهدي وحتى انت يابه وحتى عمامي واولادهم

ف ابوي ما كدر يتحمل طاح وشلنا للمستشفى وبنفس اللحظه شكل ويا سكر

دخن جگاره وصار يذخن وهو يتنفس بقوه :: اتذكر بقيت انا ويا بالمستشفى بعد ان ابوج طلب مني هذا الشي وكلي

راح ايدور واسطه اقلها يحمي بيها نفسه وعمامه واخو

:: واحنه ما نعرف بدر شنو مصيره ومن طلع ابوي من المستشفى رغم تعبه ومرضه بس ما كعد صار يدور على

ناس واصله لكن كل ما يعثر على واحد ما يقبل يوكف ويانه لان الناس تخاف بذاك الوكت

وهذا الشي ابوي من يمشي ويدور جان يصرف فلوس لكن بدون فايده وبدون ان يحصل اي خبرعن بدر

:: الى ان اجه سعدي وخبر ابوي انو بدر معترف هو ضد الحكومه ومنتمي الحزب معادي بدوله معاديه وجاي

يتخابر وياهم وانو يريد يسوي انقلاب ضد الحكومه وكل اسماءنا ذاكرها اهنا ابوي انجن مو بس على بدر لكن

على اخوانه واولاد اخو سال سعدي

شنسوي

فگله انو هذا المسوول جاي يتواصل ويه شكم واحد بالحكومه ويشوفه بلكي يلكانه حل انت بويه تسكت وابد ما تحجي

ولا تروح الاي واحد من عمامي اتصرف عادي على ما انا اجي ونشوف شنسوي

:: وبقينه نترقب وما اسولفلج على الصار بينه امي وابوي ما اوصف حالتهم اما انا فتكولين طفل جاهل فاقد اهله

جنت ابجي على بدر

تقريبا اسبوع واجه سعدي وكال

—- المسوول راح يمسح الاسماء الي بالتقرير بس هذا يكلفنه هوااي هو ما ياخذ شي بس للرفاق هذا الي يبدل التقرير

وذاك الي يقدمه ويجيبون شكم واحد وياهم ايصادقون ع التقرير

واول شي كال لازم مهدي انبعده من العراق كله بااي طريقه

وفعلا اخذه رحيم وسافرو للاردن

  = عمو مهدي ؟

  هز راسه :: اي

   = دقيقه مو دا تكول الدوله بحالة حرب ويه ايران شلون عمو رحيم ومهدي طلعو للاردن

   :: صحيح بذاك الوكت الحرب تعبت الطرفين وشويه الدوله انفتحت وسمحت بالسفر بس همه ما سافرو اصولي

  = لعد

  :: سافرو قچق

= شنو يعني قچق

  :: يعني تهريب

  = مو تكول الدوله سمحت للناس بالسفر ليش همه تهريب

  ابتسم :: واذا لزموهم مسافرين راح يعتقلوهم نسيتي مهدي اخو البدر وبدر معترف عليهم كلهم

  = يعني بس انت بقيت يم جدو وبيبي

  هز راسه :: اي

= وشنو سوا جدي

   غمض عيونه وهويتنفس :: صار كل ما يحصل خبر يكتب قسم من گاعه اباسم رفيق من الرفاق وهذا بدوره يبيعها

على ناس بسلفنه لان هو الرفيق شيسوي بالكاع وتقريبا ابوي باع كل كاعه وحلاله وجان ابوي ما يكعد يروح ويسال

الى ان اتوصل الشي

ما دام الرفاق يرتشون فيريد يشوف بدر لكن وين ما يروح ينسد الباب بوجهه

الى ان اجه سعدي وكله اريد اروح اواجه بدر

:: وهنا سعدي جن جنونه وصار يحچي عصبيه منو ضحك عليك ومنو يخليك ومستحييل ومن هالحچي هذا بس

ابوي كله صاحبك ايوصلنه اله وشكد ما يريد انطي مو هالساعدك مسح اسماء اولاد عمك خلي يساعدني واشوف ابني

اتنفس بعمق :: اتذكر بوكتها ابوي بجى بحركه وهو يتوسل السعدي ياخذه الهذا صاحبه وسعدي گله راح احاول وما اوعدك

وفعلا وره اسبوع جابلنه مواجهه امي وابوي وانا بحيث بهاء چان عمره سنه ما قبلو ناخذه ويانه

  = شعجب انت رحت

   ابتسم :: صدكي الهسه ما اعرف ويمكن الله خلاني سبب حتى اكتشف الحقيقه

  حركت اديه. = اي حقيقه

   :: رحنه ومن ابوي سال سعدي انت ما تروح ويانه الاخوك جاوبه

  - - يابه شروح المواجهه جابها لرجال بسمكم تريد تفتح عليه باب انوب انا ياخذوني مو تدري جبروني

اوقع على البراءه منه ولحد الان متوقف عن العمل لو تريدهم هم ياخذوني وهالمره ما تعرف

النه اثنينه درب عاد خليني بعيد بلكي اكدر اطلع بدر من المصيبه الخلانه بيها

ابوي رد //. انت مصدك اخوك يسوي هذا الشي

   - - بويه هو معترف بلسانه شفت اعترافاته بعيني

- - - سعدي شني غشيم عن الدوله والامن يخلون اكبر واحد يعترف بدقيقه

- - اي بويه انا شكايل مو هالمعترف على عمامي وعلى ولدهم ولو ما انت وكاعك وفلوسك جان هسه كلنه محد يندل النه مكان

= ورحتو واجهتو بدر

:: اي

=. بس اني الي اعرفه او سامعه بي انو الي ياخذو بغض النظر عن احواله ورتبته وشهادته ياخذونه ويضيعون اثره

:: صحيح بس هم لا تنسيين الواسطه الي يعرفه ابووج واصل كلش بالدوله وهو سهلنه المواجهه

=. وشفتو العمو

     هز راسه :: اجه يوم المواجهه كل الي اتذكره انو من العصر طلعنه البغداد وهناك ما اعرف ابوي وين راح وبتنا

بالشارع اكبال السجن ومن دخلنه جانت الاجراءات مشدده خصوصا عليه انا ودخلنه الغرفه وره ساعه او اكثر

اجه بدر ما اگدر اوصف حالته

اللحيه والشعر والعيون الغايرات والضعف الي بجسمه وبوجهه كانما من يوم الي معتقلينه ما ماكل شي

جان يباوع النه والصدمه بعيونه عبالك ما شايف ناس واحنه ما نملك بس الدموع نبجي بسكته لان نعرف

اكو كامرات تراقبنا

كعد بين امي وابوي امي الي حاضنته وتحب بي وابوي الي ايبين قوته لكن ضعفه مبين من دموعه الي تنزل

اما انا فكعدت يم امي وما اعرف شسوي

:: ابوي ساله شلونك بويه

هز راسه // الحمد لله بخير لاتهمون بيه انا زين هلتشوفوني

امي تگله // ان شاالله زين وتطلع والله يخلي الحكومه والريس گلبه جبير وان شاالله تطلع

ابوي // اي ان شاالله ما دام خلونه نواجهك معناتها يدرون ما عدك شي وانا ثق يو ادري عدك شي اتبرا منك وبيدي

اسلمك الهم اذا ما اكتلك بيدي كل شي ولا الدوله يابني عايشين بخيرها والله ساتر علينه من بختها ربيتو واتعلمتو

وصرتو من الله والحكومه

هز راسه وابتسامة خوف او خلي نكول ابتسامة واحد يدري بان كل هذا الكلام ما منه فايده جاوبه

- - اي بويه اهم شي ديربالك على صحتك انا زين ما عليه شي

    وصار يسال ابوي على صحته وعلى بهاء ابنه وگال المواجهه الثانيه جيبو وياكم

:: واجو گالو ياالله خلصت المواجهه

هو نزل على رجل امي باسها وباس ايدها وشمها بصدرها وانوب باس ايد ابوي وهو ايگله ارضى عليه حجي

وابوي ايكله // انا راضي عليك دنيا واخره بس ا ارضى اذا ادري بيك عدك شي ضد الحكومه

- - انت التدري بيه بويه انا الحكومه والبلد افديها بعمري

الى ان وصل اليه حضني حييل وهنا الصدمه

   رفعت راسي واحرك بايدي =. صدمة شنو ؟

الفصل السادس والأربعون من هنا 

شكرا لزيارتكم عالم روايات سكيرهوم