رواية قصة وجدان الفصل السادس والأربعون 46 بقلم انين الليل

    سالته واني دا احرك بايدي = صدمة شنو ؟

  اتنفس بعمق وحچى بحزن :: بدر وصل يمي حضني وشاورني

- - دير بالك من سعدي كل هاي المصايب هو السبب بيها لاتجيب طاري الابوي لو الامي تره الكل يروح وما ينلكاله اثر

اتفاجات واتسمرت بمكاني بعدها حضني بالصفحه الثانيه وهو يوصيني 

  - - - بهاء وامي وابوي باامانتك ابوي الي تعب عليك ورباك وما فرقك من عدنا دير بالك على ابني ولا تكله

الجنى على ابوك اخو ضمها بكلبك ولا تحجي ابد انت هسه المسوول عن العايله خليني ارووح وانا مرتاح

:: لزم وجهي باديناته اثنينهن وباوعلي وهو بالكوه كاظ روحه ما يبچي باوعلي بوكتها انا مبرطم ودموعي

هي التجاوب عني

شفت بعيون عاصف دموع حتى بعد هاي السنوات صار گلبي يرجف اتمالكت نفسي بلعت ريكي = وشنو صار ؟

:: من طلعنا رحنا للامام الكاظم وتالي ردينه البيتنا وكلنه امل انو من خلونه انواجهه اكيد راح ايحكمونه

الا انا جنت ادري مواجهتنا البدر هاي راح تكون اخر مره نشوفه بيها عدل

 

:: ابوي صار يروح ويرجع على ناس واصلين لان كل ما يحجي ويه سعدي ايكله انا مراقب

يمكن يردون ياخذوني امس اجو وحققو وياي

  ذاك اليوم اخذوني وبيتوني بالفرقه يومين وما كتلك خفت عليك وعلى امي

  :: خطيه وامي وابوي من يسمعون كلامه يتخبلون ويكلوله ابقى يم صاحبك لا تروح بيها مثل ما راح اخوك

وانا مثل بلاع الموس ادري بسعدي يجذب وما اكدر اسولف الابوي لان بدر حذرني الى ان وره اسبوعين بالضبط

اسبوعين دزو على ابوي بالاسم ويا اسمي ورحنا عبالنه مواجهه واهنا استبشر ابوي خير وامي تنذر هيج تسوي

وهيج تطي وتروح للائمه توفي نذورها بس يطلع بدر بالسلامه

اله انا جنت ادري هاي روحتي انا وابوي راح يطونه بدر وهو ميت

:: وصلنه انا وابوي النفس المكان الي رحنه واجهنه بي بدر اول مره وهالمره ما عطلونه بسرعه دخلنه

وطلبو مني ان ارافق ضابط واثنين ويا رحت وياهم دخلت الممر ومشينه بقاعه چبيره امشي والخوف مكتسحني

مو خوف على نفسي لكن خوف بداخلي على بدر وصلنه الباب

مسدود دخلت وهناك شفته بدر نايم گلولي شيله

  :: باوعت الهم وانا ابچي جان مبين عليه الضعف والخوف الضابط زمخ عليه گلي اخذه للمجرم الخاىن

باوع للاثنين الويا ساعدو خلي ياخذه شلنا وصلنه بي للمكان الابوي موجود بي من شافه وگف وراسا انهار

الضابط عاط على ابوي وگله اخذه الهذا الخاين واحمد الله ما ناخذك ويا انطوني ورقه كلولي اتراويها للسيطره

الي توكفكم

  :: سلمونه بدر جثه وقعو ابوي ياخذه ويدفنه بدون لا فاتحه ولا تشييع

واخذنا بدر لافينه ابطانيه قديمه وين ياالله حصلنه تكسي خلينا وره بحضنه بدون تابوت راسه على رجليه

ورجلينه بحضن ابوي والدرب كله ساكتين

نبچي بسكته خاف ابو التكسي يطلع ويه الحكومه ويكتب علينه تقرير ما اوصف الج حالتنا شني ابو التكسي نزل يم

مغيسل وطلب منهم تابوت والناس ما قصرو انطونه تابوت وصلنه للنجف للمغيسل

وهناك ابوي عافني يم بدر وراح ومن رجع سالته وين رحت جاوبني بشغل

  طلع رايح متصل بكرايبنه وطالب منه يجيب امي ورجاء وبهاء واجت امي وياها رجاء وبهاء جان عمره سنه وشهر

واجه وياهم ابو جابر الله يرحمه وما اسولفلج

الموقف ما اسولفلج من شال ابوي بهاء وخلا بحضنه وهو ايكله

  - - - ابنك بويه الما شبعت منه ابنك يابعد بيتي ياشبيب الما شبعت من الهوى شني السويته

  :: اما امي فوضعها بذاك الوكت يمكن لو شايفها الي نفذ بي حكم الاعدام يمكن مبطل ما منفذ بي الحكم

   = بيبي ؟

هز راسه :: اي بيبي على گولتج نامت بصفه وحتى طلعت صدرها وهي اتگلله // دللول يالولد يابني دللول

:: دفنا ورجعنه واحنه محملين ضييم وقهر ابوي بوكتها انصاب بكآبه اما امي فسكنت المكبره اتصوري مرات

تروح تبات يم الگبر وتبقى يومين تلاثه كوه يروح الها عمي ابو كريم وعمتي هديه يرجعونها يومين وترد

   = وابويه ؟

:: اول ايام موتة بدر ما اجه بحجة يم صاحبه المصلاوي ما يدري وبعدها بااسبوع اجه وصار يصرخ وشك قميصه

  وطك راسه بالحايط والكل مصدكه اله انا لان كلام بدر يرن بااذني

 

     باوعلي وهو يحك بخده :: ابوج بقى تلث تيام من راد يروح كال الابوي

- - - بويه تره صاحبي جان يدري بيوم الاعدام واشوفه يروح ويرجع ويخابر حتى بس تجون تشوفونه وما قبلو

ولو ما انا اتوسلت بي يحچي ويه جماعته ما چان اطوكم الجنازه تره للعلم غير الاوراق وسبب الاعدام خلا جاسوس

    ابوي اهنا لزم سعدي من ياخته. :: ولك ياهو الجاسوس بدر ابني السبع تكول علي جاسوس تخسا وتهبا

     سعدي //. ادري بي مو جاسوس بس لو ظال تهمته خاين ومنتمي الحزب ذيج الدوله جان تحلمون تشوفون اظفر

من جثته وچان كلنه رحنه بيها لا بقو النه لا عمام ولا ولد عم عاد هسه اله گبر تزورونه

ابوي رد باستهزاء // كثر الله خيرك وخير صاحبك

   سعدي // اي حجي ولازم نكافىه على تعبه وهو ما قصر خلاكم تشوفونه وتدفنونه احسن من هواي غيركم

وهم آواني عده هاي شكد صار وهسه راح يكفلني يم الحزب والدوله

  ابوي بوكتها ما حچى عمي كاظم ساله // بشني نكافئه هو شظل عد ابوك بس قطعة ارض زغيره لو تعيش امك واليتيم

لو ما تعيشه مو على ايدك كل شي ما بقى عده

    سعدي // جا عمي لازم نسايس هذا الرجال لا كلنه نروح بالرجلين تره هذول من يزعلون من الواحد لو راضعيين

سوا من ثدي واحد وكت زعلهم يشمرونه وره الشمس وانا هسه بوجه المدفع وهم ولدكم ينخاف عليهم

:: ابوي من گد خوفه على سعدي واخوته راح واتنازل اله لكن سعدي گال الابوي بيعها وانطيني الفلوس اوديهن اله

وسوا مثل ما گاله واخذ الفلوس وما شفنا ابوج جان يوديلنه جندي يگول ايسلم عليكم هو زين ان شاالله

عن قريب يجيكم وامي وابوي ايوصون بالجندي گله احنه زينين لايظل باله

عكب شهرين اجه ابوج بس شنو شفنا وهو مترفع واحوال

    = شنو ؟

  هز راسه :: اي مترفع الدوله مرفعته ومنطينه قدم ترفيع يعني صار نقيب ومن ساله ابوي شني شو مرفعينك

ابوج جاوب // اي بويه اخذو عليه تعهد وتبرئه مره ثانيه بعد شسوي كل الخاطيرك اخاف عليك وعلى مهدي

وعلى اولاد عمي وشني عبالك مرتاح وداعتك يكربون عليه ليل ونهار ومن درو ما عدي شي رفعوني

ابوي جاوبه والدمعه بعينه //. جا هم بدر ما عده شي

- - - بويه شمدرينه هاي الدوله ما تريد بس اليخدمها تريد اليتلوك الها

:: وبقينه بااحزانه وسعدي بي وما يبتعد عنه لكن الي اشوفه انو ابوي ما صار يسال على سعدي ولا حتى امي وما

عرفت السبب اله بعد سنين

  = شنو السبب ؟

  اتحسر ونفخ نفخات سريعه :: ابوي صار اي شي ما يملك لو متر واحد بس البيت الكاعدين بي بالعشاير

  = هذا الي عايشين بي

  هز راسه :: لا بيت قديم تالي طيحته للكاع وبنيت بمكانه بيت الجابر

  = بيت عمو جابر بيت جدي القديم

هز راسه :: اي هو

=. انت مو تكول جدي الله يرحمه باع كل شي وانطاهن للرفاق ما اعرف المن لعد الاراضي وكل هذا الشفته منين

دخن جگاره :: صار عمري خمطعش سنه بس الي يشوفني يگول عمره عشرين وهاي سبحان الله وراثه

   = شلون يعني ؟

:: يعني جدج غازي وابوي فيصل وكاظم وخيرالله كلهم جثليين اطوال وجسمهم مليان تكولين من هذوله اليلعبون حديد

وكلنه هالشكل طلعنه بس شويه مهدي يكولون طالع على واحد من عمام ابوي جان هالشكل ضعيف وكصير

     = رامي هماتين يشبه مهدي

      :: الله يرحمه

    :: المهم بالعايله العمره خمسطعش الي يشوفه يكول عشرين يعني نشب من وكت

  وانا چان عمري خمطعش سنه وكل شي صرت اعرف اسوق وازرع واحصد وابيع واشتري

   = ها يعني صرت تشتغل

   :: اي اشتغل بس مو مثل ما متصوره

   حركت ايدي = ليش شنو باعتقادك متصوره

  :: متصوره اشتغل عد الناس

   = لعد شنو مو هي هاي الحقيقه بعد ان جدي باع كل شي حتى يطلع عمو بدر وهماتين حتى يحميكم

  :: صحيح كلامج بس ابوي فيصل تاركلي بساتين وگيعان يعني الناس هي التشتغل عدي وانا بطبيعتي ما احب اعوف

حلالي بيد الناس جنت احاسب لحظه بلحظتها وهذا الشي اتعلمته من ابوي غازي الي علمني ما اعوف شغلي واباشره

الله يرحمه علمني كل شي وامي فرحه دومها چانت توجهني

  = يعني انت صرت اتكد على بيبي وجدو وعمه رجاء وبهاء

هز راسه :: اي واودي المهدي ورحيم فلوس بالاردن حتى يعيشون وما يحتاحون احد وبعد سنه او اكثر من

استشهاد بدر اتزوج كريم واجيت انا وابوي الي ما يعوف اخوانه وهو بااصعب حالاته

   = مو دا تكول انطى ارضه وفلوسه حتى محد يوصلهم

:: صحيح مثل ما سمعتي ومن ابوج اتزوج امج سكنو بالبيت الي عباله ابوج هو بيت غازي بس بالحقيقه هو بيتي

فتحت عيوني = صدك هذا الشي ما عرفنا اله بعد ما اتوفه بابا

   

  دخن جگاره :: انا من احجي احب احجي سالفتي بالتسلسل حتى اليسمعها يفهمها مو يسمعها وهي مشربكه

ابتسمت =. واني احب اسمع

  نفخ الدخان :: ادري بيج كاتلج الفضول

= مو حقي

اتحسر :: ع العموم الي صار ابوج ما صار يجي ويمر علينه ولا يسال وانا اشتغل واكد ع العوايل خصوصا

والدنيا حصار لكن احنه امورنا زينه

   = بالحصار ؟

:: اي بالحصار ليش مستغربه

= لان الي اعرفه بالحصار هواي الناس اتاذت خصوصا بالبدايه

  :: صحيح احنا چان عدنا گاع وبساتين وحلال

   = الي هو الك

هز راسه :: النه حلالنه حلال غازي وفيصل

= مو دا تكول جدو ما بقى عنده شي

:: استغفر الله انتي ما مليتي

=. بالعكس صار عندي فضول اعرف كل شي اكثر من قبل

:: من صار عمري ثمنطعش سنه صار حلال ابوي كله الي

   = ليش هو مو من البدايه الك

+

  هز راسه :: اي بس الي ما ادري بي ابوي عده بالبنك فلوس هواي وعده املاك بالولايه من صارن من حقي

سحبت الفلوس الي بالبنك وبعت قسم من املاك ابوي ورجعت اشتريت گاع ابوي غازي

   فتحت عيوني = صدك

  :: اي صدك ليش مستغربه اشتريت كل املاك غازي الي باعهن حتى يحمي اخو واولاد اخو ومن ضمنهم انا

   = اشتريتهن الك

   هز راسه :: لا اشتريتهن الابوي الي هو رفض ياخذهن بس انا اشتريتهن ومن ما اخذهن ما همني اهم شي رجعت كاع

حجي غازي ورجعت هيبته الي اشوف الهضمه والحسره بعيونه كل ما يمر عليهن لان الكاع عزيزه بمعزة الولد واكثر

  = زين انت مو تكول اخذوهن الرفاق

  :: الرفاق باعوهن شيسوون بيهن شيعرفون للكاع باعوهن على ناس بسلفنه والي عرفنا بعدين الرفاق اصلا

ما ماخذيهن هذا الشي بس گدامنا يقشمرونه بي

  باوعتله وانا احرك بيدي = لاتكلي ابويه هو الاخذهن

هز راسه :: بالضبط هو الاخذهن ومن يبيعهن يطي شكم فلس الكل رفيق

  

= زين عاصف انت مو كلت جدي قسم الورث شلون وهو ما قبل ياخذ الارض

  :: صحيح هو ما قبل اسجل ا لگاع بااسمه لان خاف من الحكومه بذاك الوكت ومن اشتريت الگاع انا وسجلتها

بااسمي سويت ورقه بيع وشرا بيني وبينه وخليتها وگبل لا يتوفى هو قسم الگاع بين بهاء ومهدي والبنات وما انطى

الابوج لو شبر

    = معقوله وابويه سكت

  ابتسم :: شوفي حتى انتي تعرفين باابوج واحد ظالم وما يخاف الله

   = يعني من كلامك انو هو شرير فشلون سكت ؟

    :: اول شي هو ما يدري انا اطيت الكاع الابوي وثاني شي چان يظن البيت اله

   = يعني هو البيت مو الجدي

   :: ابوي غازي جان اكثر همه يعزب

   = شنو يعني ما فهمت

حرك ايده :: شما فهمتي

=. هاي الكلمه الاخيره يعزب

:: شوفي جدي چاسب الله يرحمه ترك ثروه جبيره عباره عن كيعان واراضي اتقسمت ما بين ابوي وعمامي حتى اتذكر

ابوي غازي كال

انو اشترو حصة اخواته الثنين ما رادو الكاع تطلع من بيت جاسب والي صار عمي كاظم باع حصته وسكن بغداد

وعمي خير الله ظل بالكاع وشويه شويه صار يبيع بيها لمن ما بقاله حصه زغيره والجان يشتري ابوي وعمي

جدج غازي جان جبير اخوته واله كلمه والناس تحترمه ملتهي يروح منا ويرجع منا الامور العشيره والكرايب ودووم

خطار وعزوبيه (يعني كرم ) وكهوه چان كريم وسنين الحصار وهو ما عده گاع ما رجع واحد يريدله حنطه

لو شعير لو فلوس

    =. يعني جدي كان كريم

:: كريم كلش يعزب بهدومه

     = نيالك عشت ويا

:: ابوي غازي قليل زلم مثله دايس ع الجرح يمشي ويضحك وهو كاتلته الهضمه على ابنه الراح منه وعلى ابنه ال ...

   = ليش سكتت

    :: من اكمل راح تعرفين ليش سكتت

    = تره مو زعطوطه اذا كل كلامك صدك ...

   :: شوفي حتى انتي هم سكتي ما كملتي كلامج المهم بعدين تحجيين كل الي بكلبج غازي التهى بالعزوبيه وابوي

التهى بالشغل يشتغل ويكبر بشغله ويشتري بالاملاك وهو كبر بالعمر ياالله اتزوج اتزوج وحده عشكها كتل روحه عليها

=. الي هي اخت بيبي حباها مثل القصص

  ابتسم :: ابوي فيصل حسب ما تسولفلي امي جان لاغي فكرة الزواج ملتهي يشتغل ويكد ويبيع ويشتري جان ياخذه الليل

ويجيبه الليل وكل ما يكلوله اتزوج ما يقبل الى ان كبر وشاف امي الي تصير اخت حبوبتج فرحه جانت زغيره وكال

لو هي لو ما اخذ واتزوجها وتسولفلي امي تكول هي هم عاشكته رغم جانت فرخه زغيره وصارو ما يتفاركون حتى

من يطلع للشغل تروح ويا من كد ما تحبه ويحبها حتى موتتهم سوا لذلك كل حلال ابوي صار الي

  :: بيتكم الي بغداد الي جنتو كاعدين بي اشترا ابوي غازي بس بقى مطلوب علي وراد ايبيعه وابوي اشترا منه

وصحيح دارا باسمه بس ما جاب طاري يعني ابيناتهم لذلك ابوج من سكن بالبيت عباله كاعد ابيت ابو

    = شعجب ما اخذه وسجله بااسمه

  :: منو گلج ما راد ياخذه الشي الوحيد من راح بدر وما ساوم علي هو البيت لان على اعتبار الكاع والفلوس للرفاق

زين من ابوي غازي يبيع البيت ابوج وين يكعد بعد فتره وره ما مات بدر ابوج راد يتسجل البيت باسمه بحجة خاف

الحزب يرجعون بس ابوي گله البيت يبقى بااسمي وانا اسويلك تنازل تخلي عدك

ومن اموت البيت يصير حصتك وانت الك اسم ورتبه بالدوله تكدر تخليهم ما يوصلون للبيت

  وراح ابوي وسوا تنازل كتب ورقه خلاها عد ابوج البيت السعدي بعد ما يموت وابوج عباله

راح ياخذ البيت بعدين اتفاجا

= يعني ابويه كان يعرف البيت بااسمك

هز راسه :: اي يعرف

  = معقوله وبقى ساكت ما اتصور

:: انجبر يسكت

= شلون خاف مثلا

  حك خده :: تتذكرين من جنتي زغيره ودخلتي علينه شفتيني كامش ابوج من ياخته وحاصره ع الحايط واضرب بي

هزيت راسي :: بيومها چنت جاي وجايب اوراق البيت واوراق غيرهن

   = بلي وبيومها اني طلبت منك تبتعد عنه وانت ابتعدت وهو اجه فهمني جنتو تتشاقون

    :: يمكن

  = وهماتين بيومها كفر باامي بين ضرب وغلط ومسبه

:: مو غريبه كل شي يسوي جبان

بلعتها للكلمه الاخيره سالته =. كلت جايب اوراق اوراق شنو

:: سعدي بعد ما الحكم اتبدل وره ال 2003. وجمدو الضباط راح للقياده الجديده وكللهم انو هو وعمج بدر كانو

يشتغلون سوا وانو بدر لزمو وما اعترف على سعدي لذلك سعدي ظل مناهض للحكومه ويشتغل ضدها وباقي حتى

يوصل اخبار للناس الي تشتغل ضد الدوله بذاك الوكت وصار اخو الشهيد البطل بدر وهو بطل لان كل هاي السنين

ما خلاهم يكشفو

= يجوز صحيح

ابتسم :: لا مو صحيح وحتى انتي تدرين مو صحيح

= منو يكول ؟

:: الاوراق العدي حصلت عليهن من ملفات الامن وخضير جانن عنده اوراق مراويهن الجدج غازي هاي الاوراق

عباره عن ملف بكل واحد ياخذونه بذاك الوكت سواء ينسجن ينعدم يسووله ملف بداىرة الامن والشعبه الحزبيه

ويخلون واحد يراقب اهله وناس تراقب بيتهم ومنو يدخل ومنو يطلع ويامن يلتقون ومنو الكاتب على بدر ومنو

وصله للاعدام وحتى المحاكمه شكم مره حاكمو وحتى جابو الشهود الي شهدو ضد بدر وكلها مسجله

بيوم وتاريخ وكل هاي موجوده عدي ولازالت كل هذا بسبب ابوج نفس ما گلي بدر

اتصوري بالمحاكمه واكف وياشر علي ويگول مع الاسف عندي اخ مثلك مناوى للحزب والثوره بايع

ضميره وشرف مهنته خاين البلده والعقيدته وهواي كلام

:: وبعدها من حكم القاضي على بدر بالاعدام ابوج يصيح بالقاعه يحيا العدل يعيش القاىد يعيش الحزب والثوره

چنت لحد ما انعدم بدر مصدك كلامه بس مرات انطي الابوج عذر اكول يجوز واحد گال البدر وراد يورط

بدر حتى يحجي على ابوج ويگول وياي بنفس التنظيم وياخذون ابوج لكن من شفت الملف اتاكدت شكد ابوج نذل وحقير

صار كلبي يدك وعرگت خجل وانا اسمع ب ابوي هالشكل مسوي ويه اخو =. يعني من اجيت كان الملف عندك

:: اي وراويته الابوج لان بالبدايه هددني بمنصبه وانو راح يمحيني من على وجه الارض لكن صدگيني

اول ما حصرته ع الحايط وصرت اضرب بي من كل وكلبي شفته شكد هو جبان ونفخه ع الفاضي

وتالي من شاف الملف باس قندرتي حتى ما اقدمه وگلي وين تروح مرتي وجهالي لذلك سكتت وكتله بااي وكت اجي

واكلك اريد البيت تخلي اليه ثاني يوم

ردت اغير الموضوع بس ما يتغير حاچيته = الشي المستغربتله لويش ما گلت الجدو على الكلام الي كاله الك

عمو بدر اقلها كان ممكن تحافظ على گاع جدي وفلوسه

:: لان بدر امنني وانا جنت خايف من احجي الحكومه تجي وتاخذ ابوي وحتى خايف على روحي

= يعني ابويه هو الي وشى على عمو بدر

    هز راسه :: اي

  = معقوله ؟

  :: وليش اجذب عليج

  = وليش يفتن على اخو ؟

  :: هو ما فتن لا هو لفق تهمه وكتب تقرير وصار شاهد

   = وانت سكتت

:: جنت زغير والخوف والرعب على ابوي والعايله من الحكومه انتي هم تدرين من عدمو بدر صارت الناس كرايبنا

محد يمر بينه ويسلم يخافون من الحزب خاف ياخذهم بس ابو جابر اله موقف ويانه

  = ابويه ليش سوا كل هذا

::صدكي كلنه ما ندري ليش

  =واجهتو

:: ابوج ما محتاج احد يواجهه لان بكل بساطه هو يتفاخر بلي سوا

= يتفاخر ؟

  :: واكثر الكلام الي گلته الج ما يجي نقطه ابحر من السوا ابوج

= ليش شسوى

  :: كل شي يخطر على بالج

    =ما اصدك

::لا انتي مصدكه بس جاي اتغالطيين بنفسج وعلى كل صدكتي او لا شي راجع الج روحي الغرفتج اخذي علاجج ونامي

اتمدد ع القنفه ودار وجهه واتغطى استغربت من تصرفه رحت للغرفه گعدت ع الجربايه واحجي

   = معقوله ابويه واشي بااخو

  = معقوله ابويه ماخذ كل حلال جدي

   لزمت راسي وحچييت = لا كذب لوماخذ كل حلال جدي مو حتى بيت ما نملك ولا اي شي

   =بس عاصف لويش يكذب ؟

  هزيت راسي = اي يكذب اكيد يكذب

= ما مجبور يكذب ولو يريد يكذب اساسا ما حچالي يعني اني شريد اسوي مثلا

= هاي شبيج وجدان اشو كل الي سمعتي ما اثر بيج

لملمت حلگي = لا شنو ما آثر بيه بعد شريد ابويه طلع مجرم حقير ونذل واني يمكن جاي ادفع ضريبة السوا بااقرب

الناس اله

هزيت راسي = لكن بعد هوااي امور لازم اعرفها وبعدين اقرر شسوي

= لا تصيرين انانيه اذا صدك هذا الكلام يعني. انتي مديونه للناس الي احتضنتني اني واخويه

نمت وكعدت صليت ورجعت نمت فزيت الساعه بالتسعه شفته كاعد ويدخن جكاير فتت للمطبخ بدون حتى ما اسلم

ما اعرف عناد ما اعرف خجل لكيته مخدر جاي والخبز والجبن ع الطاوله وشفت فد استكان مشروب طلعت وسالته

= انت متريك

:: لا بس شربت استكان جاي

= وليش ما متريك

:: ما اشتهي

= تعال للمطبخ خلي نتريك

رحت قبله واتساءل ويه نفسي = لويش هالشكل احاجي العاصف هاي اني شبيه

= شويه استجني على كولة بيبي عاصف مو هين الكل يحسبله الف حساب

= طبعا يحسبوله الف حساب لان هو صاحب فضل ع الكل بس عليه لا

= صدك اني ووحده ناكره للجميل لعد منو وكف ويانه من صارت الحادثه مالت اخواني لو حالة علي هاي

شبيج انتي لاتصيرين مثل سعدي

هو كعد ع الكرسي واني طلعت بيض سويت صحن وخليت جبن بصحن وصبيت چاي وصرنا ناكل حجييت

= يعني ابويه اخذ كل املاك جدي بحجة ينطيهن رشاوي

هز راسه

= وانت شمدريك هسه عمو بدر گلك انو ابويه هو الي وشى بي بس منو يكول هو الي اخذ كل الارض والفلوس بحجة

انطاهن رشاوي للرفاق

:: سدي الموضوع ما اريد احچي بي

= بس اني اريد اعرف تدري من البارحه ما اعرف يمته نمت من كد التفكير

خلى جگاره بحلكه :: هاي انتي عرفتي هواي امور بعد لا تدورين ملفات قديمه

   = لا عمو من حقي اعرف لان الكلام الي گلته الي مو هين وما يخش بالعقل بعد محتاجه اعرف هواي امور

     :: گتلج من صارن الفلوس الي سحبتهن وصرت اشتري الگيعان الباعهن ابوي ع الرفاق وهمه باعوهن

على جماعتنا بالسلف والناس ما قصرو وخضير من ضمن الناس الرحت الهم والي استغربت ليش ما باع الگاع والرجال

رجعها اليه بفلوسها وحتى ابد لا فايت عليها ولا زارعها بالبدايه من رحتله سولفت بس مخطر منه خاف مخلينه الحزب

يراقبنه ويكتب علينه فهمته انو انا عندي شكم فلس واريد هاي قطعة الارض اريد اسوي بيها حقل مال عجول لان بوور

وما مزروعه فالرجال راسا كلي // اخذها عمي

:: اتفاجآت من رده عليه ومن اتكاسرت ويا ع السعر هو انطاها الي بسعر رخيص مع العلم الكاع زينه رجعت

وسولفت الابوي واهنا ابوي الله يرحمه جن جنونه وگلي هذا هسه يكتب بيك تقرير وكل هاي فلوسك وخيرك

يروح وبليلتها ابوي راح على خضير بس حتى يعتذر منه

ومن رجع ابوي اشوف الحزن والقهر بوجهه عرفت هو على حق لكن ثاني يوم گلي ودي الفلوس لخضير

وعرفت باان الكاع بعدها باسم ابوي

  :: استغربنا ليش خضير ما دايرها بااسمه وحتى لو يخاف من الدوله ممكن يسجلها باسم مرته او ابنه او واحد من اخوانه

وبقيت فتره ما عرفت السبب الى ان ابوي وره السقوط حجالي

  سالته = شنو ؟

    باوعلي. :: بعدين

   = كله عندك بعدين

     هز راسه :: اي

= براحتك بس اتصور انت اهنا ما نقلت الحقيقه

:: قصدج اچذب

=. لا مو هذا قصدي بس يمكن

:: احچي شتردين تگولين

= انت مو گلت الگاع بمجرد ما جدي الله يرحمه يتنازل بيها للرفاق همه يبيعوها وينطون فلوسها الابويه

  هز راسه :: اي

   = لعد شمعنى ما اخذ الكاع من خضير

حك خده :: كلامج صحيح بس الي عرفنا انو خضير ما قبل يبيع الكاع ومنطي الابوج فلوس من عنده

وحتى لا تساليني ليش لان جدج وعمج بدر اصحاب فضل على خضير وابنه لذلك اكو ناس يغزر بيها المعروف

وناس لا لو شتسويله يغدر بيك

عرفت يقصد ابوي بكلامه = اني حسالك سوال

:: اسالي

= امي (بلعت ريگي ) الله يرحمها من اتوفى ابويه اجتها ام احسان وسالتها شلون اتزوجتي سعدي وامي صارت

تحجيلها من خلال كلامها گالت من اجتي بعرس ابن عمتها هي عثرت او زلكت وگعت انت الي تلكيتها مو

  هز راسه

  عضيت شفتي بقهر = اني دا احس انو انت كنت تحب امي

  فتح عيونه جاوبته = جاي دا اكولك مجرد احساس

  :: احساسج غلط

  = ليش دا احس انت كنت تريد امي وابويه اخذها منك يعني مثل ما تصير بالافلام

  :: لا متوهمه اصلا امج اكبر مني باربع سنين

   = بس هذا الشي ما يمنع اذا كنت انت رايدها

      رد عليه بنتر. ::ولج

= ليش اتعصبت جاي دا اكولك مجرد احساس وبنفس الوقت اريد اعرف كول شي وانت وعدتني واني متاكده انت

ضام عليه اشياء هوايه ما تريدني اعرفها

رد باستهزاء واضح :: اخاف منج

  = لا تستهزا عاصف تره اني مو زغيره واعرف الكلام مرات يزيد وينقص

خزرني بغضب :: قصدج انا جذاب

= اني من حقي اعرف خصوصا انو هذا الشي يخصني الي

:: وانا جاي اجذب ماكو داعي تعرفين

= يجوز

   خزرني وعض شفته :: مو ااذيج

   حركت ايدي وكلبي يدك = تضربني لو شنو

  دخن وهز راسه :: لا مو هذا قصدي ما اريد ااذيج بهواي امور

    ابتسمت بمراره = متعوده ع الاذيه اقلها اعرف ليش اتاذه ناسي شلون اذيتوني بدون سبب

   باوعلي واشر على نفسه :: انا ؟

   هزيت راسي = لا الموجودين وحتى انت بسكوتك اذيتني هواي وبكل الاحوال انت جاي دا تسولف على ماضي

راح مات واندفن

:: ما دام تشوفينه ماضي مدفون ليش تلحيين بي خلي ايولي

=. لا هذا الماضي يخصني ما اكدر اتركه لان بالاساس ما اعرفه بس جاي اجني مخلفاته

  اتنفس بعمق :: جنت مراهق بس بنفس الوكت الحياة عاصرتني وناسي نفسي ملتهي بالعيشه والخوف من الحكومه

وباي ساعه يجون ياخذوني من شفت امج جايه هي وحبوبتج وخالتج

وجانن يمشن بسرعه وهي زلكت وصارت طيحتها بحضني بلحظتها دك كلبي بس ما ادري بوكتها شني

عقل جهل ردتها وصرت ابني احلام واكول هاي هي الي اريد اعيش وياها واحنه مثل ما گال عمي ابو كريم

من نعشك نتسودن

= يعني حدسي بمكانه انت ردتها

ابتسم وهز راسه :: اتصوري بنفس اللحظه رحت الابوي غازي كتله يخطبها وبيومها فاتح ابو كريم الي گله البنيه اكبر منه

وابوي كله يمعود ما مبين عليها نريد بس تحجيلنه ويه ابوها ونروح نخطبها ونخليها تلث اربع سنين

وهذا صار الاتفاق لكن اتفاجئنا باابو كريم وره ايام جاي ومسولف الابوي انو سعدي اخذهم يخطبونها ومن عمي گايله

انو ابوك رايدها العاصف

::هو مجاوبه ما دام بعدكم لا رحتو ولا خطبتو انا حچييت ويه اخوها وابوها وهمه رحبو وكالو گبع واخذ

واريد، تروح الابوي وامي يجون يخطبونها الي

ومن اجه عمي ابو كريم وسولف الابوي جن جنونه وگله لااروح ولا اخطب ولا عدي ولد اسمه سعدي

  باوعلي عاصف :: ابوج نذل كل همه يتشفى بالناس ويشوف كسرتهم

= معقوله

  :: وليش اجذب عليج ابوج حطمني وقهرني ومو بس هيج قهر ابوي وامي انا رغم مراهقتي بنيت وياها احلام وآماال

بحيث اخذت وعد على نفسي ما اتزوج

  = لان تحبها

   :: يجوز ويمكن چان عندي امل ان تتطلك او ابوج يموت واتزوجها

  =اف كل هذا الحب

  رد :: واكثر (باوعتله ). :: اقصد بوكتها هيج اتصور الي

  = ملاحظ انت تحچي عن امي وهسه انت عاقد على بنتها

  اتنفس بعمق ونفخ الدخان من حلكه :: لان هي وصتني

  فتحت عيوني مستغربه = شنو ؟

حك ذقنه وهز راسه ::اي مثل ما سمعتي

  حاولت اوتره ==بس انت وراها اتزوجت وصارت عندك فرح يعني انت لاتسوي نفسك انت انسان وفي وبقيت على

ذكرى الحب الي سرقه ابويه والكل لازم يتعاطف وياك

:: منو كلج اريدج تتعاطفيين وياي كل ما بالامر انتي اصريتي تعرفين السالفه وانا حچيتها مثل ما صارت

=. متاكد ؟

:: اي متاكد حچيتها بحذافيرها لو اريد انا عاقد عليج ما گلت شفت امج وانعجبت بيها چان ممكن اتخطا هذا الموضوع

    = وبعدين

:: بعدين شنو ؟

= كمل

:: شتردين تعرفين

= كل شي

:: استغفر الله شني كل شي

ردت استفزه = امم كلشي هسه انت مو بديت من اول ما اجيت للدنيا وابوك وامك اتوفو مو سولفتلي شلون ابويه

كان اياذيك وجدي غازي وعمو بدر يحامولك مو سولفتلي شلون امنك بدر بالسر

:: اي

= اي كمل لا تتوقف اريد اعرف كل شي اريد اعرف شنو مسوي ناظم وهالشكل تكرهونه وليش امي عاشت منبوذه 

واتحملت ضيم ابويه

:: هاي كلها تردين اتعرفينها ما كفاج العرفتي ما حرك شي بكلبج

غمضت عيوني حييل واني اعض بشفتي = قصدك ما اهتمييت للي سمعته العلمك اني اهتمييت والليل كله افكر

وتتهيالي كل جراىم ابويه السواها بس هم من حقي اعرف اشياء سمعتها وبقت غامضه اتصور من حقي

هز راسه :: لا مو من حقج هذا الشي تفضل مني

هزيت راسي = لا من حقي تعرف ليش لان الحد قبل يومين انت عمو اخو ابويه وبعدها صرت انت رجال تحل عليه

ومن سالتك ليش كان جوابك لان امج وصتني

:: واذا ما اريد احجي شتسوين

باوعتله بعتب وبلعت ريكي هو رد :: ليش سكتي جاوبيني

وكفت رديت بحزم = كلكم نفس الشي ما تختلفون

رحت الغرفتي واني مقهوره واحچي ويه نفسي واعاتبها = شتردينه ملاك مثلا انتي السبب طلعتي من مصيبه ودخلتي

نفسج بمصيبه اكبرشفتي شلون كان يتوسل ويوعدج وهسه صار يتمنن وشوفي اذا مو بعد شويه يطالبج بحقه الشرعي

غمييت كصتي = ولج هذا ما يطالب هذا من يريد الشي ياخذه وغصبا ما عليج

طلعت من الغرفه شفته متمدد ومتغطي بالبطانيه اعرف هو ما نايم واني بحاجه اعرف كل شي منه

= ما دامه صار زوجي غصبا ما علي يسولفلي كل شي

وصلت يمه واني واگفه = عاصف عاصف

ما جاوبني هزيته بايدي = عاصف اكعد ادري بيك ما نايم

هم ما جاوبني شلت البطانيه واحجي ويا = هاي اني لازم اشيل عنك الغطا يوميه حتى تكعد تره وادري بيك ما نايم

نفخ بدون ما يباوع :: شتردين

= اكعد فهمني

:: ما الي خلك تعبان

= واني هماتين ما الي خلك بس لازم تفهمني

:: عوفيني انام

= عاصف اذا ما هسه تكعد تحجي وياي ثق افتح الباب واطلع

دار وعض على شفته وهو يتوعدني بعيونه :: وانا ما راح احجي واشوف المره شلون تفتح الباب وتطلع

كعد واني رحت صوب الباب فتحته شفته مقفول والمفتاح ما موجود جاوبته وانا احرك بيدي = يعني شنو تبقى قافله

صار يضرب على ايده ضربات خفيفه وهو يكلي :: ولج انتبهي على تصرفاتج وياي

لملمت حلگي رد عليه :: ما اريد احجيلج كافي عيشي حياتج وفكري بمستقبلج ليش تردين اتاذين نفسج

تلقائيا بچييت = ليش اني من الصار بيه ما اتاذيت هاي كلياتها السنين اني متاذيه وانت ما يهمك ساكت هسه خفت عليه

:: اووف من السانج ولج بيش قصرت وياج

= بكل شي عاصف بكل شي واولهن من ما گتلي شنو قرابتك مني

:: جنت اريدج تحسين بيه عمج وتثقين بيه واي شي تردينه تطلبينه مني وكأنما تطلبينه من ابوج

رديت باستهزاء = مثل ابوي

:: اي ردت تطمنين وما تخجلين من اي شي تردينه

= وانت ما قصرت لكن هواي اشياء مبهمه ( رفعت اصبعي ) =وانت لازم تحچيها الي وهسه

باوعلي بتوعد :: لا تتامرين عليه وتحاچيني بااصبعج

لا اراديا ضميت ايدي رديت بهدوء= انت وعدتني

:: اعتبريني ما وعدتج

= يعني ضحكت عليه

:: شتفسرينها فسريها

= ومو توك اتگول ردت اثق بيك بس العلمك انت ولا مره كنت صادق وياي ولا مره خليتني اثق بيك لو احس

بالامان وياك لامن كنت تمثل عليه انت عمي ولا هسه

رد بلا مبالاة :: ادري

= يعني ان...

اندك جرس الباب باوعلي : منو جاينه هسه

  بقيت واگفه والجرس يرن كلي :: فوتي جوه

جاوبته باستفزاز = ما اروح ابقى اهنا ليش انت منتظر احد وخايف يشوفوني وياك

  نفخ :: المفروض انتي متزوجه واذا كان احد غريب فالاصول ما يشوفج لان هذا اليمج گدام الله والناس

رجلج ويكولون عده غيره وهسه فوتي جوه

   خجلت من كلامه رحت امشي هو كال :: هاج اخذي البطانيه وياج

اخذتها ودخلت للغرفه وهو راح يفتح الباب :: ايي اي جاي

خليت باب الغرفه مردود ما سديته اريد اعرف منو اجه فتح الباب شفت بهاء جاي والشر ابين عيونه دخل بدون

ما يسلم وهو يگول // شنو نايميين

  عاصف جاوبه :: وانت شعليك

  رد باستهزاء // لا عليه خاف عبالك فاتت بعقلي من اتكول عقدت عليها هذا الكلام اضحك بي على عقل مهدي

  صرت ارجف من گد الخوف لان عرفت بهاء المن جاي وعرفت راح يفضح كل شي الي استغربتله اكثر وخلاني اخاف

برود عاصف كالعاده وهو كاعد ويدخن ورد. بكل برود :: متاكد

بهاء هز راسه // اي متاكد عاصف متاكد مليون بالميه انت اتچذب عليه انت ما عاقد عليها

رد بنفس بروده :: خوفتني وعلى فرض ما عاقد عليها شتريد

- - اريدها اريد مرتي ترجع الي

ابتسم : وهي ما تريدك ولا تكول مرتي هي هسه انسانه متزوجه وبعصمتي

بهاء باستهزاء // ها متزوجه ؟

:: اي

بهاء// تدري عاصف اكدر اخبر الشرطه واخليهم يجون لهنا وعود ذاك الوكت كوول مرتي

هز راسه :: وكح وتسويها ادري كل شي ممكن اتسوي بس برد راسك هي مرتي وروح جيب الشرطه ما عندي

شي اضمه ولا اخاف منه وياريت تطلع منا لان نريد ناخذ راحتنا ابيتنا فااذا تسمح ( اشر بايده )

بهاء مشى خطوتين ودار على عاصف وابتسم بخبث //. طالع عمي بس احب اكلك انت مسكين

      جمد الدم بعروقي واحس الهوا انقطع عني عرفت بهاء راح يحچي عاصف جاوبه :: شلون انا مسكين ياريت اتعرفني

     بهاء // لان ما تدري بمرتك المصون اذا صدك هي مرتك ما تدري بيها كبل لا اخذها انا شنو جانت

حرك ايده :: شنو ؟

- - اسالها صيحها اهنا واسالها

تستمر القصة أدناه

هز راسه :: لا انا جاي اسالك انت شنو. جانت

ابتسم // وانا افضل انت تسالها

  وگف عاصف واتقرب منه :: انت مو تكول كبل لا انت تاخذها واخذتها وهسه اريد اعرف منك شجانت شبيها

   هو حك حنجه // صيحها حتى يصير الحجي مكابل خصوصا وانا عندي دليل واذا طلعت ما متزوجها شوفها

هي اتگلك انا ارجعله واذا ما تخليها تجي وتكلي ما قابله بوجهي اروح الهشام وانطي الدليل

  :: ما عليك بيها عدك حجي سولفه مو تگول عدك دليل وانا رجلها

    بهاء اتنفس بعمق // اي عدي وهسه خليها تجي اتشاركنا الكعده

     :: احچي عدل وسولفلي وبعدين انا اقرر يجوز صدك تطلع مو مرتي وانا ما عاقد عليها سولفلي

        بهاء حمحم // مرتك حسب ما تگول انت يا محفوظ السلامه چانت وحده ملعوب بيها وانا سترتها

         عاصف باستهزاء :: ها

      بهاء هز راسه // اي شنو اچذب عليك

     حمحم وطفى الجكاره وشعل ثانيه :: لا بس متفاجئ اكول اشلون كبل خمس دقايق كاتل روحك تريد اترجعها

وهسه اتكلي ( نفخ حييل ) :: انت ساتر عليها

    بهاء // اي وعدي الدليل الي راح اودي الهشام بس كبلها اريدك تسمعه

  عاصف رفع ايده :: بدون ما اسمعه غريمك اقصد هسه غريمي ياهو

   بهاء // ليش شتسويله ؟

  رفع اكتافه :: ما ادري على حسب

   بهاء // هي هوااي التعرفهم ومن ضمنهم انا يمكن انا الوحيد ال چانت تمثل عليه الشرف

    :: ها

    بهاء وكف // اي بس من تريد تعرف غريمك اسالها

   اخذ نفس من الجگاره وهز راسه :: تؤ ما اسالها وتجي تحلفلي وغصبا عني بعد انت تدري بالنسوان اريدك

انت تعرفني بغريمي ياهو

بهاء// خوش انت طلعت تعرف بسوالف النسوان

ابتسم :: اي جا شبيه ناسي انا اخذت امك وانا بعدني طفل جاهل وهسه ما علينه اريد اعرف ياهو غريمي

    - ابن اختك سعاد غزوان

  :: غزوان هو غريمي معقوله

    بهاء هز راسه // اي

  :: وتكول عندك دليل

   

   - موجود وهسه اسمعه الك

طلع موبايل ثاني من جيبه واني ما اعرف شلون متمالكه نفسي ما وكعت يمكن اريد اعرف شنو ممكن يسوي عاصف

هاي اللحظه الي كنت خايفه منها

عاصف يستمع للتسجيل وهو يسحب بالجكاره ويشمر الدخان حك شعره وبنفس بروده يعني ما شفته اتفاجئ

بالعكس يسمعه وكانه هو سامعه او يعرف بالموضوع حمحم وراح للمطبخ جاب بطل ماي وقدمه البهاء وگله

:: اشرب ماي برد گلبك

   بهاء استغرب وساله //. شنو. عاصف اشوفك ما مستغرب عبالك ملفقه صيحها واسالها

      هز راسه :: لا عليمن اسالها

    = چا شني

    طفى الجگاره وباوع البهاء وصار يضحك :: هههههه غزوان جان غريمك وعندك الدليل الي هسه توني سمعته

وانت يابطل ياصاحب الغيره والناموس من عرفته غزوان معتدي على عرضك شسويتله لاتكلي انت العوقته

:: اسمع ولك انا بكل شي ادري وديتك البغداد حتى ما تجي وتنهى لو ما انت وحبوبتك متفقين ومن اخذتها سكتت گلت

ابن عمها ياخذها والسترها خير على خير والرجعها انا اتصرف تانيتك ردت اعرف

شتسوي عبالي بيك خير وتاخذلها بثارها بس انت طلعت واحد ذرة غيره ما عدك

بهاء باستغراب // انا ما عدي غيره

:: اي مثل ماسمعت انا عدي علم بكل شي وگبل ما تاخذها ردت اشوف بهاء ابن بدر شيسوي عبالي سترتها گلت

مي خالف خلي ما دام ستر عرضه خلي بس طلعت واحد ما بيك خير

    بهاء // ياهو هذا المابي خير انا

:: اي انت انت الخليت غزوان يمشي على طوله واخذت البنيه وطلعت مراجلك عليها وكل هذا وقبلت گلت

  هذا هو ابن اخوي واخذ بت عمه وما دامه سترها خلص انا اخذ بثارها وثاري وحتى ثارك بس انت طلعت نذل

بهاء باستهزاء // هههههه خاف تتشاقى منين تدري لو هسه تريد تبين رجولتك من دريت بيه راح افضحها صرت.

انت المعوق غزوان

لزمه من ياخته :: ولك تعرفني انا من اسوي الشي اسوي وما اخلي ابن مره يدري بيه وما محتاج اكلك منين

ادري وانت التعرفني كلش زين اسوي الشي وما احچي بي تدري بيه گول وفعل وبسكته وانا الصوبت غزوان

وبمسدس ابوها

  اتفاجأ بهاء// انت

حجى بثقه :: اي ليش متفاجئ بيوم ما خابرتك وكتلك انا ابغداد تعاركت ويه المرور تتذكر واجيتني بذاك اليوم

اخذت ثارنا من غزوان وبسكته وبدون محد يدري وبدون ما افضح روحي بس انت يا ابن عمها شسويت ؟

:: انا اكلك اجيتها وطلعت رجولتك وياها تدري ليش لان انت واحد ناقص عبالي صدك تحبها بس ثاريك انت وغزوان

نفس النمونه ذاك ما عده شرف ولا ناموس وانت ما عدك ذرة غيره على عرضك

بهاء//. هههه انا ما عدي...

رفع ايده :: ايي ياحمار لان غزوان راد يطيح حظنا ويكسرنا بعرضنا چان اباله اختك بس ما صح بيده اجه على بت عمك

شوف ولك تطلع منا ما اشوف وجهك واذا بيوم جبت طاري مرتي على السانك خاف غزوان عوقته وگبله ناظم لا انت

شي من اثنين لو اكتلك خلاص وافجع امك بيك لو اكص السانك واسودنك اتذكرني انا عاصف

1

رد باستهزاء/. اي اعرفك عاصف الي تاخذ الفضايل

:: هسه ما فارغلك بس هذا كلامك اندمك علي

- - عليمن على مود وحده ما تسوى فلس

كمشه من ياخته وحصره على الحايط خله اصابع ايده ابلعومه وخنكه وهو صاك على اسنانه ويحچي

:: هاي الماتسوى فلس صارت عرضي وانا الي يجيب طاري عرضي لو مو انت لو بدر يطلع من كبره ويجيب طاري

عرضي اكتله وما يرفلي جفن شتريد تسوي تاخذ التسجيل وتسمعه الهشام ما الك زود لان انت جبان ما كتلته

من دريت بي لا صرت اتعذب بيها وهسه جاي تبيع عليه مراجل

بهاء بتعب // انا رجال غصبا عنك

  رد باستهزاء :: ولك انت وينك او وين المراجل متحسف شي واحد انا شكد تعبت عليك عبالي تطلع مثل ابوك بس مع

الاسف طلعت بس نفخه وهسه فوت اطلع لا افجع بيك امك ومرتك وايتم ابنك البعدك ما شايفه

:: اطلع وانسى انسى وجدان وللابد لان صارت مرتي ملكي وانا الي يتعدا على ملكي لو منو ما يكون ثق اسحگه وانهي

من هاي الحياة ولا يرفلي جفن

بهاء عدل ياخته // اتمنى المسوي وياي هالشكل واحد غيرك جان شفت شسوي بي

   :: شتسوي ليش انت شسويت بالبدايه

  - - اذا على غزوان جان بنيتي اكتله واعدمه حياته

هز راسه :: صح وادري بيك بس انت ارتأيت تعذب الانسانه الي وثقت بيك الانسانه الي طلعت ظهرها وراك عبالها

تنومسها وتاخذلها حقها

عبالها تسعدها وتنسيها كل المرت بي لكن انت شسويت عاملتها مثل ما تتعامل (نفخ بقوه ) استغفر الله

خليته ما سويت شي الغزوان حتى دووم اتذكرها بي اتذكرها بغلطه هي ما الها يد بيها

:: اطلع منا وروح المرتك وامك وعوفنا نعيش حياتنا واياني وياك تجيب اسمها لو بالحلم صدك اعدمك حياتك مثل

ما عدمت حياة غزوان وخليته بس يباوع بعيونه

بهاء ما جاوبه دار يريد يطلع عاصف گله بهدوء :: اوكف بهاء

وصل يمه كله :: شغلي التسحيل خلي اسمعه

بهاء وكانه انتصر طلع الموبايل وفتح التسجيل وعاصف خلا على اذنه وفجأه عاصف ضرب الموبايل بالحايط ضربه

قويه بحيث اتفلش ولزم بهاء ما ايده وكله وهو فاتحله باب الشقه ويدفع بي

:: هذا الشي السمعته تنسا وهسه انت چنت ماخذ بت عمك وطلگتها واي شي ما الك يمنه اطلع وما اشوف وجهك

اهنا والجهاز الكسرته اجيبلك ابداله واحد جديد

طلع بهاء وهو يتوعده بنظراته ويكله // نتواجه وشوف شراح اسوي

  :: شتسوي سوي بس دير بالك اتجيب اسمها لو بالحلم واحد جبان مثلك اذا جاب طاري مرتي راح اعدمه حياته

صرت اتنفس بقوه حسيت براسي افتر والدمعه بعيني ما نزلت من المفاجآه شفته گعد ع القنفه وصار يدخن وهو يرجف

ما طلعت بقيت بالغرفه ويه كل حركه بره افز من مكاني خايفه وكلبي يدك سريع واحجي ويه نفسي

= يعني عاصف يعرف بلي سوا غزوان وبقى ساكت منين يعرف شلون

صرت اضرب على خدي = ياريتني بساعة ما اعتدى عليه غزوان كتلت نفسي ولا هيج صاير بيه

= ياريته من اعتدى عليه موتني

= كله مني ليش ما فضحته وخليتهم يكتلوني

= شنو على مود علي مو ردت انتحر لويش ما فكرت بعلي

صرت اضرب بروحي = صدك اني وحده صلفه وجسره هسه انتظري عاصف شراح يسوي بيج عاصف الساكت

طلع كل شي يعرف

     بقيت بالغرفه والرجفه بكل جسمي خوف وترقب وما اگدر اطلع واساله وعن شنو اساله سري وانفضح

والي كنت زوجته يكول اني مو شريفه هسه عاصف الله العليم شراح يسوي

اتهسترت وصرت احجي بكيفي من هوول المفاجآه

= شيسوي مو يكول بكل شي ادري يعني هو يعرف وقدمني البهاء بدون ان يدافع عني

هزيت راسي = لا ما معقوله يسكت عن الي سوا غزوان كان قتلني وقتله

= يعرف يعرف بس اكو سر بالموضوع

= ولج ما سمعتي هو ضارب غزوان ومعوقه

= غزوان صار معوق وعاصف هو الي ضاربه معقوله

= اي معقوله مو سمعتي بااذنج

ما اتمالكت نفسي صرت ابجي واضرب راسي بالحايط لان بهاي الاحداث الي صارت يمكن من قبل ما اجي للدنيا

بس اني الضحيه

بقيت بالغرفه ما طلعت منها نمت ما اعرف يمته او بيش الساعه الى ان اندك الباب مرتين بعدني بفراشي هو دخل

وكف بالباب بدون ما يتقرب حاجاني

:: اگعدي اتريكي حتى تاخذين علاجج

درت وجهي ما جاوبته يمكن خجل يمكن عتب هو طلع غاب عشر دقايق او اكثر بعدها اجه وجاب ويا صينيه بيها

كيمر وصمون وكوب جاي خلا ع ميز الجربايه وكلي

:: وره ما تتريكين اشربي علاجج

دا. يمشي يريد يطلع من الغرفه سالته بخجل = انت تعرف شنو سوا غزوان

    هز راسه واتنفس قوي :: اي وما اريد احچي بالموضوع اتريگي

   =. ليش بقيت ساكت

:: كلت اتريكي مو زين عليج تبقيين بدون اكل

= اريد اموت

رد بقهر :: اتريگي وبعدين نحجي

بچييت = ليش ما قتلتني من عرفت

شكرا لزيارتكم عالم روايات سكيرهوم