رواية قصة وجدان الفصل السابع والأربعون 47 بقلم انين الليل

اتنفس بدون ما يباوعلي وسد الباب ورا واني جبرت نفسي ع الاكل گوه ابجي بصوت متقطع واكل عبالك طفل 

واسال بنفسي = معقوله كان يعرف وبقى ساكت 

= عاصف الي الگاع تخاف منه يبقى ساكت ما قتلني  

  = اكيد توه عرف من بهاء بس سوى نفسه يعرف 

  = مو سمعتي هو ضارب غزوان الكلب ومعوقه 

   = بس لويش؟

= شنو لويش 

  = لويش عوقه ما قتله 

= حتى دائما يذكرج هو صاحب فضل عليج وحتى انتي تكونين طووع امره 

      = كلهم. حقراء وما يختلفون عن غزوان 

         = بس ليش هيج سوا ليش قبل اتطلك من بهاء وعقد. عليه 

     = اني لازم اتطلك من عنده

            = انتي مخبله لج. هذا كل شي ممكن يسوي ما شفتي شلون حصر بهاء ع الحايط شلون شمر الموبايل بالكاع وكسره 

شنو كسره طشره كل قطعه بصفحه لو بهاء الي ما فك حلگه ويا هذا من يلزمج ما يرحمج 

     = علوا ايموتني ولا ابقى تحت رحمته اطلب الطلاق بلكي يقتلني وافتك من حياتي

  = اي بس ليش الكذب هو حنين ويايه ويه اخوتي 

= امدااج ياحماره شجاب حنانه عليج وعلى اخوج بمصيبتج 

         صرت اكل واشرب بالجاي واحاول اكون طبيعيه كملت واخذت علاجي وطلعت الصينيه ورحت للمطبخ 

غسلت الصحون رجعت شفته كاعد ويدخن وصلت يمه سالته 

  = انت تريكت 

هز راسه = تريد اجيبلك جاي 

  رد بدون ما يباوعلي :: لا 

باوعت شفت دشداشته بيها دم سالته بخوف = هاي شنو البدشداشتك 

  :: لا تاخذين ابالج

   =دم 

  :: اي 

  = خشمك ؟

:: اي ظغطي ارتفع 

= ليش ما رحت للطبيب 

:: رحت وانتي نايمه 

  = يمته 

  :: بالليل 

  = ما ادري 

هز راسه :: طلعت ورجعت وانتي نايمه

  = وهذا الدم من البارحه ؟

  :: لا قبل شويه ذيج دشداشتي نزعتها ولبست غيرها

= لازم تعرض نفسك على اخصائي 

هز راسه بدون ما يجاوب حاجيته = وياريت اتقلل جكاير 

طفى الجكاره واخذ بطل الماي وصار يشرب سالته = يعني. انت كنت تعرف 

  حرك اديناته :: بشنو ؟

     بقيت ساكته ما جاوبته واصلا ما اباوع بوجهه رد :: اي اعرف 

      = وبقيت ساكت 

:: شترديني اسوي اكتلج 

    جاوبته وانا اسحب بخشمي لان احس الهوا انكطع عني = ياريتك كاتلني ولا الصار بيه الصار 

   اتنفس بعمق :: الصار. وياج اقوى مني ومنج

    = من عرفت ليش سكتت ليش ما دافعت عني ليش قدمتني البهاء 

  :: لان ادري بي يحبج والامر طلع من ايدي 

  = شنو طلع من ايدك انت تعرف بهاء شسسوى بيه تعرف الذله والحقاره العاملني بيها تدري كنت ممنوعه احچي 

ويا ولا اگعد يمه تعرف شلون كان يعذبني شلون كان يهيني بشي ما الي يد بي هم تدري بيه كنت اتغطى ببساط 

شهر وانا اكل خبز وجاي مرات يحن عليه يجيبلي حبنه ومرات خياره وطماطيه

  :: انتي غلطتي من سكتي 

=هددني النذل ينكر ويقتل علاوي هددني يفضحني واني ما مسويه شي 

  :: اعرف 

فتحت عيوني باستغراب = تعرف وسكتت 

هز راسه :: اي اعرف وماردت اسوي فضيحه جان بترتيبي من يجي غزوان يخطبج انا انهى عليج واخذج وبعدين 

اتصرف ويا لو ما امي خربت كل شي

= بيبي ؟

  :: اي حبوبتج هي گالت البهاء بالبدايه انا اتفاجآت بيج من قبلتي بغزوان كلت يجوز لان ابن خالها وابن 

عمتها ولان تشوف بهاء فعلا مثل اخوها وعايش وياها بس انتي ما تعرفين انو لو تنطبك السموات ع الارض 

ما انطيج الغزون وحانت الفرصه گدامي سكتت وكلت كدامج وگدام امي ورجاء ما دام انتي موافقه عادي 

تتزوحينه لكن انا جان ابالي من يجون ويخطبون انهى عليح واسد الدرب على بهاء لذلك انا وديته البغداد 

بس حبوبتج هي الي كالت البهاء وخلته يجي وينهي وياخذج

= ها يعني انا صفقه اذا مو البهاء الك 

طفى الجكاره وهو يخزرني :: احجي عدل ابدا ما جنتي صفقه واذا جنتي صفقه فتكونين خاسره ابالي اتكملين وتدخلين 

كليه وبعدها تشوفين حياتج وانا احميج لكن من وافقتي على غزوان كلت هاي البنيه تريد تتزوج وهي ما تعرف مصلحتها 

لذلك جان ابالي انهى عليج واتزوجج وحتى لو ما اتزوجج لان اعرف انتي ترفضيني اخليج اتكملين دراسه وبعدها اتقررين 

مستقبلج لكن مثل ما كتلج امي خربت كل شي وهي عبالها تحميج 

= يعني انت ما گلتلها بخطتك 

هز راسه :: لا لان ادري من اكللها ذاك الوكت راح تودي خبر السعاد انو انا اريدها الي ويصير قال وقلت وتتدخل 

نهاد تقلل وتكثر واكيد انتي ترفضيين 

= يعني ما جان بنيتك تتزوجني 

:: لا اذا مو انت تقبلين مستحييل 

= مو تكول امي وصتك 

:: اي وصتني بس انا جان اهم شي عدي انو انتي تكملين وتاخذين الشهاده

= وشلون عرفت بغزوان ؟

:: انسي 

= لا ما انسى 

:: لازم تنسين 

= تريدني انسى سولفلي كل شي لا تضم عليه اي شي 

:: ليش منو كلج انا اضم عليج 

= انت عباره عن صندوق اسرار وهاي الاسرار عباره عن آلغاز

   ابتسم :: ولج منين تجيبين هذا الحچي 

بقيت اباوع والحزن مالي وجهي ويمكن لو بس احد يعاتبني بكلمه اظل اعيط شعل جكاره وسحب منها نفس ونفخ الدخان 

:: مرات الصدفه تلعب دورها 

   = شلون 

  :: من قبلتي بغزوان تتذكرين سالتج وكتلج انتي قابله تتزوجين غزوان شجاوبتيني اي ومن سالتج عن السبب گلتي 

ابن خالي وعنده بيت وسياره وادري بيج هاي التفاهات ما تهمج لان بعمرج من اجيتي ما طلبتي شي النفسج اشوفج 

حتى من يسولفن البنات انتي ما تشتركين وياهن قنوعه وما مال تغرج هيج اشياء انتي متروسه عينج بوكتها جنت 

اباوع الوجهج وعيونج الي من تحجيين وياي ما تباوعيين مثل البايكله بوكه عرفت اكو شي ضامته قررت اراقبح 

وره يومين لو اكثر وصلتج وگتلج ما امر عليج اروح البغداد عدي شغل

هزيت راسي = اي اتذكر 

:: جان بنيتي اراقبج والصدفه كشفتلي كل شي 

= ليش تسكت كمل 

شعل جكاره وصار يدخن :: بيومها رحت للولايه امنت سيارتي يم جماعه واجيت بتكسي ونزلت براس الشارع وانا امشي 

ما اريد احد يشوفني شفت غزوان بسيارته وخلاها بمكان بعيد ما تنشاف استغربت ما حاجيته ولا خليته يشوفني بقيت ورا 

شفته دار وراح الحجرة الماطور عرفت مواعدج بس ليش اهنا ردت اوصل والزمه واكله شعدك اهنا بس گلت لا خلي 

اشوف حاي شيسوي اجيت بدون ما يحس صرت على صفحه بحيث اسمع كل شي 

وانتي اجيتي بوكتها حقدت عليج وگلت ياوسفه جاي تضحك علينه يعني هي عدها علاقه ويا وتقابله اهنا

:: گوه لزمت نفسي ما انقضيت عليكم خصوصا وانا سمعتج اتكولين الله ياخذه بقيت اريد اعرف شنو البيناتكم 

ودعيتي عليمن وبوكتها سمعت وياريتني ما سمعت وعرفت غزوان معتدي عليج لا شني عليج معتدي على 

عرض حجي غازي بوكتها اتخبلت ما صرت اشوف بعيوني ردت افرغ المسدس 

براسه بس كلت يضيع حقج والناس تظل تحجي عليج وانا اذا ما انعدم انسجن 

وانتي تنكتلين سحكت ع الرمح لا شني سحكت گولي الرمح مدجوج بصدري وانا امشي گدام الناس 

وابين ما بيه شي وانا بداخلي نار ما تنطفي انوبه المصيبه مربطات اديه ورجليه من باب اريد اكتل غزوان 

ومن باب اخاف لا الناس تدري الصار بيج

= ما تدري جاي اسجله 

هز راسه :: لا هسه دريت 

= بهاء من سمع قابله بغزوان اخذني وقررني 

::يمته ؟

= قبلها بيومين لاكاني وانا راجعه من المدرسه وصعدني كوه بالسياره واخذني للمكان العيشني بي وضغط عليه 

حتى يعرف ليش اني قبلت بذاك الحقير ومن سمع اتخبل لكن ما صدگني فبالليل جابلي الجهاز وكلي اتصلي 

من رقم بيبي واطلبي تشوفينه بغرفة الماطور 

    :: اخذج من حليتي من المدرسه من يم گاعنه ؟

هزيت راسي = بلي 

:: چا وين انا جنت من اتعطلتي شو امي ما كالتلي 

= بيومها رجعت ما لگيتك انت وبيبي رحتو على عمه امل لمن جبت بيبي متخربطه 

هز راسه :: هسه عرفت امي هي الودت بهاء عليج وخلتني اخذها الامل وتالي كالت اخذني للطبيب تعبت 

= يعني بيبي هي الخبرت بهاء من هيج اكله بيبي من تسالني شجاوبها ليش اتاخرت ايگلي ما عليج بيها تدري بيج 

اتحسر وكال :: اي امي هي خربت كل شي 

يعني انت سمعت وعرفت غزوان معتدي عليه غصبا عني

اتحسر وهز راسه :: بذيج اللحظه من سمعت كلامج وكلامه بوكتها ياريتني متت ولا سمعت السمعته ردت اخلي طلقه 

بگلبه وبگلبج لكن عرفت انتي ما الج يد بكل هذا الصار او يمكن وكفت عيون امج او وصيتها الي او جبنت 

= جبنت انت مستحيل ؟

عضيت شفتي وانا اداري دمعه :: بوكتها اتخبلت والبركان الي داخلي ما اكدر اطلعه لان اعرف راح احرگج بي 

= انت مو تكول سمعت كلامي ويه النذل غزوان

:: ايي 

= يعني عرفت اني ضحيه وهو الي اعتدى عليه 

::اي عرفت انو النذل معتدي عليج ومن اعتدى عليج يعني اعتدى عليه 

:: ما اگدر اوصفلج الصار بيه من الي سمعته معقوله غزوان يعتدي على عرضنا غزوان الي ربينا وكبرنا 

وصرفنا وكل شي سوينه حتى نطلعه رجال هالشكل يسوي وعزيت هذا الشي الامه سعاد الي تكره امج وابوج 

اكيد هي الي وزته عليج بس هاي تبقى عمتج اخت ابوج وتبقين انتي بت اخوها وما معقوله تودي ابنها يعتدي عليج

:: صارت الافكار تتضارب براسي وقررت اخابره واگله ما عدنا مره الك لكن خفت يفضحج ويتقول عليج ويصير 

بيها كاتل ومكتول خفت يحچي المهدي ويااولها بغير شي ونهاد تقلل وتكثر عليج وقبل يوم الخطبه بالليل 

اجه بهاء وطلبت منه يسافر البغداد يقرا فاتحه ويوصل فلوس وطلعتله شغل من جوه الكاع بس حتى ما يكون 

هو موجود ومن شفته وافق بس انا هم غبي

تستمر القصة أدناه

= لا حشاك 

:: لا انا فعلا غبي لان شفت امي واستغرابها لان بهاء قبل يسافر البغداد وهي كل ظنها تريده ينهي عليج وياخذج 

بس انا بوكتها ما سالتها لان المصيبه الي طاحت على راسي تكسر اكبر جبل واتصرفت عادي وامي بس تحجي عليه 

شلون تطيها الغزوان 

هذا مو كفو نطي مره 

وانا اصبرها واكللها عيني خير يمه

:: وقررت بمجرد ما يخطبون انهى واخليج تكملين حياتج وانا انتقم من غزوان بطريقتي 

لكن صار انو بهاء ضحك علينه كلنه وطابخها هو وحبوبته جذب عليه وما سافر واجه باللحظه الي بدو يحجون 

وطردهم وبدون اي كلام طلع ما رايح البغداد لا رايح متفق ويه شيخ جابه وعقد الج وانتي وافقتي وانا زاد استغرابي 

انتي مو رفضتي بهاء شلون تالي رضيتي وشراح اتكليله معقوله بهاء يعرف بالصار 

وهنا انسدت كل الابواب اخذج بدون ان يحجي ويه اي احد استغربت من امي الي كالت اي هذا هو عفيه علي 

ابن عمها نهى عليها واخذها

:: واستفسرت منها وعرفت انو هي مخابرته وكايلتله على خطبتج وهي الي مفهمته لازم ينهى عليج وياخذج ومن 

عاتبتها ليش هالشكل سوت گالت لان انت سكتت وانا ما اريدها تاخذ ابن ناظم حتى لو احنه مربينه

= ليش كلكم تكرهون غزوان وما تطيقونه ؟

ما جاوبني هو استردف :: بيومها من اخذج بهاء عاتبت امي وحييل اذيتها بالكلام وهاي اول مره اسويها 

بس من اخذج بهاء صدگي اخذ روحي ويا ارتفع ضغطي وصار خشمي ينزف بدون توقف امي اتدنت مني 

رادت تكض راسي بس انا دفعتها بدون ما اخلي الها خاطر وطلعت خابرت جابر واجه اخذني للطوارئ 

وامي صارت تتصل ابهاء لكن بدون فائده 

  

= خابرت جابر 

:: اي جابر صاحبي وامون علي بهواي امور 

  = وليش مو مهدي 

    :: مهدي بوكتها محتار شلون بهاء اخذج على بته 

= وشنو صار ؟

:: نمت مستشفى 

= انت

::اي لان حالتي كانت ما مستقره وضغطي ما ينزل بقيت تلث تيام بالمستشفى ومن طلعت 

جابر راح البهاء للمحل وكله واجه وهو وجهه ما يكصه السيف وكانما نسى كل شي انا سويته اله عرفته 

يحبج وزعلان علينه لان ما بلغنا على خطبة غزوان هذا الشي هدىني وعرفت انتي بايد امينه ومن سالنا وين انتي 

كال اجرت بيت بالولايه 

وهم عرفنا ما يريد احد يجيله و بيومها عشر دقايق كعد وطلع ولمن امي گالتله

رووح مر على مرتك تقصد ساره جاوبها خليها تتادب وتعرف شلون تضم عليه منا وغادي 

وبقى بهاء اكثر من شهر وهو زعلان علينه كلنه على مرته وامه ومهدي ونهاد وعليه بس على امي ما زعلان 

   = وانت 

  :: انا اول مره بحياتي ازعل على امي 

= انت زعليت على بيبي 

:: اي جنت ادخل ساكت واطلع ساكت ما احجي وياها

= ليش ؟

:: لان كالت البهاء وما خلتني انا اتصرف 

    = بيبي تعرف بلي سوا غزوان 

هز راسه :: طبعا لا منو ايكللها والعلمج بس تعرف راسا تنجلط ضمييت عليها وانا زعلان وما احچي وياها كل 

همي علاوي وانا اشوفه مكسور خاطره ويدور عليج صرت اخذه وياي واروحله للمدرسه اخذه من يحل افره 

بالولايه واغدي بالمطعم جان يكسر خاطري وبعيونه تساول عنج لكن جنت اسبقه واكله

:: انتي مسافره ماخذج بهاء يونسج 

:: ومرات اگله بعد اسبوع وتجي 

:: وبهاء صار عده شغل ومن هالحجي ما ردته ينتكس

= بس اتو ما سالتو عليه ولا واحد حاول يجي ويشوفني 

:: غلطانه جان بهاء مرات يجي البيته يبات والصبح يطلع مهدي ما صار يروح البيت بته بالليل ولا حتى رجاء 

ومن يجي ما يحجي ويه اي احد بس ويه جدته وكلنه عزينه هذا الشي لان يحبج وما يريد احد يغثج لو بكلمه صارت 

علاقته ويه الكل بارده بس ويه امي يجي ويكعد ويسولف ويضحك 

ومهدي بقى يجي للبيت 

هز راسه : لا ما صار يجي مرات ايمر

= بس اني ما اصدك نهاد ما تجي وتسال 

:: اكيد جانت تجي الاختها الصبح من الكل ما موجود 

::وبيوم اجه بهاء وراح گعد يم امي وصار يسولف ويتشاقى وامي طلبت منه ايجيبج تشوفج وهو وعدها ايجيبج لكن 

ما جابج وره شكم يوم انا خابرته گتله جيب مرتك حبوبتك مريضه ردت اطمن عليج واجيتي وبعدها صار الي صار

اسمع العاصف وانا خاله ايدي على حلگي 

= ليش نهاد تكرهني 

باوعلي هزيت راسي جاوبته = اتذكر من اخذني بهاء اجتني وهي تغم بيه والشر طالع من عيونها وهي اتكلي امج 

حطمتني وانتي حطمتي بتي الله ينتقم منج

سحب نفس من الجكاره ونفخ الدخان :: لان ابوج چان خاطبها النهاد لكن هو اتزوج امج وعافها فما كان من جدج غازي 

اله طلب من مهدي يتزوجها وهي اكبر منه بسبع سنوات 

= صدك ؟

:: اي مو اگلج ابوج هو سبب كل هذا الصار بيج وبينه 

= يعني بابا كان خاطب نهاد وعافها واتزوج امي

:: اي بس مو محبة باامج اتزوجها لا لان درا بيه حاچيت ابوي يخطبها الي 

= منين بابا عرف بيك تريد تخطبها الامي يجوز شافها وانعجب بيها 

ابتسم باستهزاء:: اولا ابوج ما يحب اي احد فمستحييل يكون حب امج ولا بحال من الاحوال وبعدين هو عرف 

من عمي كاظم ابو كريم

صفنت واني اتذكر ابوي شلون كان ايعامل امي سالني 

:: وين صفنتي ؟

= وياك 

بلعت ريكي = يعني بابا عاف نهاد واتزوج امي 

:: اي وجدج ما راد تصير ثكل وجه من جانب اخو فترم على مهدي يتزوجها 

= لعد عمه رجاء بشكد اكبر منك 

:: بعشر سنوات

فتحت عيوني ع الاخر وهواستردف 

:: ابوج وبدر خطبو الاخوات الي اعرفه كان بدر يحب رجاء وخطبها واتزوجها اما سعدي فخطبوله نهاد 

واشترو النيشان والحلقه وبعدين صارت حادثة بدر فتاجلت خطبة ابوج وزواجه من نهاد 

وابوج من كد حقارته ولان عرف بيه انو انا رايد اخطب امج هو سبقني

= ليش يجوز بابا انعجب باامي 

:: اي انعجب بيها وقرر يعاقبها بشي هي ما مسويته 

= امي هم اكبر منك 

:: بااربع سنوات لكن اتبين بذاك الوكت ازغر مني 

= عجيب لعد مهدي ازغر منها بسبع سنوات وقبل يتزوجها

اتثاوب :: بالبدايه ما وافق لكن امي وابوي اصرو علي ياخذها ابوي كل همه انو اخوته واولاد اخوته ما يتفرقون 

حتى اتذكر كله مهدي انت اخذ بت عمك وسنه وازوجك الي تريدها 

استغربت وسط ابتسامه استهزاء هو هز راسه 

:: اي ليش مستغربه مهدي ما جان يريدها وقبل يتزوجها بس حتى يرضي ابوي لكن هي بذكائها عرفت تسيطر علي 

وتخلي خاتم بااصبعها

= ذكائها لو شي ثاني 

رفع اكتافه :: بعد ما ادري 

= وانت ؟

:: انا شني ؟

= اتزوجت رجاء ليش 

:: عوفينه من هذا الشي

= ليش رجاء ما اشوف عدها ذكاء نهاد ولا حتى اشياء ثانيه 

:: شقصدج ؟

= اقصد انت ورجاء 

:: شبينه ؟

= يعني بالعقل وحده جايه ويه ابنها وتسمع زوجها يگول اريد اتزوج وهي تنسحب بكل برود هذا الشي ما وارد

:: عدي وارد 

راسا جاوبت بدون تفكير = اذن انت ما تفرق عن ابويه بشي

:: شلون ؟

هزيت راسي = ابويه اخذ امي بضدك لان يكرهك وعذبها وشبعها ضيم وقهر وانت ما اعرف لويش اتزوجت رجاء 

وتعاملها معامله ما اعرف شنو اسميها انتو مليانين تناقضات 

:: احنه مني احنا 

= كلكم انت وبهاء ورجاء ونهاد ومهدي وحتى بيبي 

:: شتردين تعرفين ؟

= سالتك 

:: عيدي سوالج

= ليش اتزوجت رجاء وشنو النفور الي ابيناتكم وهسه من اجت وعرفت انو انت راح تتزوجني ما بين عليها 

اي شي اصلا ولا اهتمت الك 

::وبعد عدج اسئله 

هزيت راسي واشر بايدي =. اي كومه هلگد بس اهم شي علاقتك ويه رجاء

اتنفس بعمق وعض شفته وحجى =. لمن انت تحجيلي شلون اعتدى عليج غزوان وشنو سويتي وليش ما گلتينه 

ذاك الوكت انا اسولف لج على رجاء وهسه اذا تسمحيلي وبيها مجال تعوفيني اريد شويه ارتاح

شفته غمض عيونه حاجيته رغم ضجت من كلامه وحتى كلبي رجف وريگي يبس لكن حاچيته

= گوم روح للغرفه مالت بيبي نام بيها ترتاح اكثر 

باوعلي جاوبته = لاتخاف ما انهزم لان قبل ويه بهاء وگعت بشط وعرفت اسبح بس وياك اني وگعت ابير وبير عميق 

واستحاله اكدر اطلع منه 

من حاجيته هالشكل باوعلي وهز راسه :: اذا تشوفين ارتباطج بيه طيحه ابير فكي وكل واحد يگعد بمكانه 

= شقصدك ؟

اتنفس بعمق :: راجعي كلامج وانتي تعرفين قصدي

راح للغرفه وطبك الباب قوي 

اني مستغربه هالشكل اگدر احچي ويه عاصف الي قبل كنت من اشوفه اخلي عيني بالارض والي من يحجي الكل 

يسمعه ومحد يناقشه. وكلامه هو اليمشي وحچايته ما تصير اثنين الكل يهابه ويحسبوله الف حساب حتى اني كنت 

اخاف منه لكن خلال هاليوومين صرت اتكلم وويا واني ماخايفه ليش هالشكل وشنو الي صار وكانه سحر 

احچي بكيفي واناقشه وگاعده ويا بمكان واحد ابحدنا وهسه طلع من يمي وهو عصبي

هزيت ايدي = اووو واني شگلت ؤهو زعل ليش اني هسه شنو 

رحت للغرفه الثانيه واني الملل ما اسولفلكم عنه 

كعدت ع الجربايه واسترجعت كل كلامه واحجي ويه نفسي 

=. وكأني بحلم ما اصدك معقوله هو مسوي كل هذا البيت جدي 

= اي مسوي ما شفتي الحل والشد بايده 

= بس يگعد اخلي يجيب بيبي وعلاوي لازم اتاكد منها

= شتتاكدين اصلا بيبي تكره ابويه مو بس تكرهه تموت منه حتى وهو ميت ما حبته ولا كانه ابنها

لو بالمستشفى امس من كلت اريد ابويه شردت انهجم بيتج وبيت ابوج ترا انهجم الاميره ديانه تريد ابوها تسكتي 

خلي نايم لا من چان عدل بي خير ولا من مات ورث خير 

= وهواي كلام 

= اي تكرهه

= لويش تكرهه ها هسه عرفت لان هو الي (ضربت على كصتي ) عزا يعني هي تكرهه الابويه لان وشى على بدر 

اوووف معقوله وتحبه العاصف لان اتكفل بكل شي 

  = يعني الاخو يفتك بااخو بدم بارد وانسان مجرد قريبك يشيل كل شي ويهتم باادق التفاصيل 

  = بس المفروض عاصف يكرهني الي لان اني بت سعدي 

= يجوز يسوي كل هذا حتى ينتقم مني 

= تتصورين عاصف هالشكل ؟

اتنفست = المصيبه اني الي ابين القوه. كدامه بس اني اضعف ما يكون 

لان الوقت ما خلالي شي اخاف علي 

  = ليش اتي ما خايفه من عاصف من عرف بيج وعرف بذاك النذل غادرج 

= لج ياغبيه عاصف يعرف بالسالفه قبل يوم الخطبه 

= اذا صدك كلامه يعني عاصف ما اعرف بشنو اوصفه 

= هذا الرجال خليط من طيب وشرير وذكي وقوي هذا عنده. كومه اسرار محتفظ بيهن 

واكيد اكو شي بينه وبين رجاء ولازم اعرف شنو

اتمددت. على الفراش والافكار تتلاطم براسي وحياتي مرت عليه بجميع احداثها من يووم الي انقتل ابويه 

غفييت فتحت عيوني واشوف الغرفه ظلمه طلعت شفته جاي يصلي بالصاله باوعت شفت الساعه بالسبعه ونص 

ما حاجيته فتت للمغسله اتوضييت ورحت اصلي كملت صلاتي وهو. يكح بقوه وبعدها دك الباب 

حاجيته = فووت 

فتح الباب وكلي :: اذا تحبين تتعشين الاكل بالمطبخ

راح للصاله وهو لازم الريمونت بايده واني رحت للمطبخ جايب بيتزا وفطائر وحلويات وعصاىر وفواكه 

حضرت العشا ورحت حاجيته 

= العشا جاهزز

مشيت قبله للمطبخ وصرنا ناكل واحنه ساكتين 

هو اخذ تفاحه وصار ياكل بيها وكف وراح يم الطباخ اخذ القوري يريد يخلي بي ماي باوعتله. وكفت 

= عوفه اني اسويلك چاي 

:: لا انتي اتعشي انا اسوي

هزيت راسي واتقربت واخذت القوري ابتسمت بوجهه = شنو ما اشتاقيت للچاي الي اسوي 

اتنفس بعمق وطلع من المطبخ واني بلعت ريكي = شبيج هالشكل تحجيين ويا 

رفعت اكتافي = ما اعرف بعدين اني ما كتله شي 

كملت الجاي صبيته بكوبين واخذت قطعه بيتزا وفطيرتين ورحت للصاله خليتهن گدامه هو اخذ الكوب واني هماتين 

وقدمتله الصحن = اكل شويه

:: شبعت 

= بس انت ما اكليت شي 

:: ما اشتهي 

اخذت فطيره وقدمتها اله = الخاطري عمو 

اخذها وغمض عيونه عرفت ضاج من كلمة عمو اني ما متعمدتها للكلمه هي طلعت تلقائيا 

صار ياكل واني هماتين وبعدها رحت جبت صحن بي فواكه هو باوع وابتسم :: هذا ًكله ناكله 

رديت الابتسامه = بلي 

هز راسه :: ما اگدر

= لعد من تاكل رجلين الابقار ( واحس بنفسي تلعب ) اشو ما تكول ما اگدر 

باوعلي وابتسم ابتسامه حاول يخفيها بالعض على شفته 

سالته = اريد احجي ويه علاوي

اخذ الموبايل من الطبله واتصل :: هلا يمه اشلونج 

:: الحمد لله زين 

:: الحمد لله انتي شلونج علاجج تاخذينه 

:: اي شكو ماكو 

:: زينين لا يظل بالج 

:: لا وين ترحين 

:: حجيه ظلي لا ترحين انا هسه اجي واجيبج 

:: اطيني كريم

:: هلا ابو كرار اشلونك 

:: ياخي ما سمعتها ردوني اريد اروح مناك بيتي 

:: الحمد لله زين انت شلونك 

:: اكلك علي وينه اخته تريد تحچي ويا 

انطاني النقال سمعت صوت علي () الو 

= حبيبي علووش اشلونك 

() اني زين انتي شلونج 

= الحمد لله انت مرتاح 

( ) اي وجد اني كلش مرتاح 

= علووش يمته تجي اشتاقيتلك 

()بكيف بيبي

حسيت بعاصف وراي دنك وقرب حلكه من اذني بحيث نفسه طخ بخدي :: احجي ويه حبوبتج 

بلعت ريگي واني مرتبكه لان اول مره هالشكل يتقرب = علي انطيني بيبي احچي وياها وانت دير بالك 

على نفسك وشنو تگلك بيبي اسمع كلامها 

( ) يعني حتى لو كالت اروح وياها

باوعت العاصف الي بعده واكف وراي = بلي شتكلك گلها صار

( ) هاي بيبي وياج

- الو 

= هلا بيبي شلونج 

جاوبتني ابرود // هلا بيج 

= بيبي ليش ما تجين ايهنا اني هواي مشتاقتلج 

جاوبتني بجمله خلتني ارجف 

- - • لا يابيبي شسوي اجي انتو. عراريس تردون تاخذون راحتكم تردون تتونسون 

ما عرفت شحجي = هااج هذا عم هذا عاصف وياج

اخذ التلفون مني :: ها يمه 

:: تانيني انا اجي اخذج 

:: يومين تلاثه 

:: ها وليش 

:: خوش بس ديري بالج على علاوي 

:: ما عليشي يمه انا اتفاهمت ويه المدير ومن يصير وكت امتحانه يروح يمتحن وتاللي انقله هو واخته 

:: الله وياج اخذي علاجج مو تنسينه

:: زين انا الحمد لله 

:: لا ماكو شي 

:: وداعتج 

:: ان شاالله يمه 

:: الله وياج

شعل جكاره سالته ردت اغير الموضوع = من يمته وانت تدخن 

بدون ما يباوعلي جاوب :: من زمان 

= اي اعرف من زمان يعني من يمته 

:: اكثر من عشرين سنه 

= بس دا اشوفك تدخن بشراهه

اتنفس بعمق وغمض عيونه سالته = انت كلت انو عمو بدر شاورك من رحتو اتشوفو زين جدو شلون عرف 

لان اكيد انت ما گتله بلي سمعته 

:: خضير كاله 

==منو خضير ؟

:: الرفيق الي اخذ الكاع وما سجلها ياسمه 

= اتذكرته الي ابنه كان يداوم ويه عمو بدر 

:: اي 

= زين لويش خبره الجدو

  :: من الامن اخذو بدر صار لازم يراقبون اهله وصار الامر انو خضير هو الي يراقب بيت جدج وبالصدفه 

ابوج متفق ويا ياخذ الارض حاله حال الي اتفق وياهم 

وخضير هو السولف الجدج شلون ما باع الكاع وانطى الفلوس من جيبه حتى تالي يردها وفعلا رجعها بفلوسها 

حتى ما قبل ياخذ فلس زايد وهو الكال الجدج على ابوج

=. و جدو ليش سكت الابويه ليش ما واجهه 

:: هههه واذا واجهه شراح يصير ابوي جان يخاف على ولد اخوته مثل ما يخاف على ولده ودرى اذا واجه سعدي 

مو بعيده ياخذون ولد اخوته لكن هو كله انو شاف الملف وعرف منو واشي على بدر 

= يعني جدو واجه ابويه 

:: اي واجهه كله انو انت الي وشيت على اخوك فسعدي بالبدايه نكر بعدها كال

:: اني ما وشيت بس همه كتبو عليه هالشكل لان انا كتبت تبرئه ابدر لان اخاف عليك بويه وعلى اولاد عمامي 

:: ابوي من خلال كلامه عرف بان سعدي جاي ايهدده ويگله بصريح العباره انو هو يكدر ياخذ ولد عمه وكلهم 

يخليهم ينعدمون لذلك ابوي سكت وبقى حاقد على سعدي لحد ما اتوفى

هزيت راسي = اني اتذكر امي من سولفت الام احسان كالت بان اهل سعدي ما يردونه 

رفع حاجبه :: معقوله. امج سولفت الام احسان على ابوج شنو ما جانت تخاف منه 

= امي سولفت لام احسان لمن ما ابويه استشهد لان كان ضام المفتاح مال القاصه عد ابو احسان فماما بوقتها 

ضاجت من تصرفه وصارت تحجي وام احسان سالتها ليش هالشكل يتصرف وياج 

:: وبعد شنو سمعتي من امج 

= جدو اجه البيتنا قبل ما اني اجي للدنيا 

:: ايي 

= وبعدها جدو طلع وهو يدعي على ابويه بااشياء مو زينه ليش عمو 

:: شنووليش ؟

= ليش جدو ايدعي على ابويه 

:: لان عرف الحقيقه 

= ياحقيقه ؟

:: ابوج هو الواشي على بدر 

= بس من اجه جدو كان عمو بدر متوفي من سنين 

:: هواي تلحيين 

باوعتله بعتب = مو حقي 

:: شوفي وجدان شكد ما اريد اسولف على حقارة وحقد ابوج ثقي ما انطي حقه 

= ما خابف احنه نطلع مثله ؟

هز راسه :: الي جان عد ابوج مو وراثه لا هذا الشي هوا سوا بايده

= شلون 

:: يعني اذا اكو قاتل ماجور يقتل بالناس مقابل فلوس او منصب هذا عنده وراثه اكيد لا مو 

هزيت راسي = بلي 

:: نفس الشي ابوج الي سوا سوا النفسه هو 

بقيت ساكته هوورد :: ابسط شي اسمج سماج على اسم وحده راقصه بملهى جان يروح يگضي وكت وياها ولان 

عجبته سماج على اسمها ف ابوج واحد صنعله حياة ابحده

= زين ما كتلي جدو منو كله 

:: عرف من خضير وحتى مراوي التقرير 

=. يعني من اجه البابا حتى يكله اني عرفت انت الي واشي على اخوك 

هز راسه :: لا يمكن كبل ما يتزوج امج وقطعنا كل شي ويه ابوج الي جان يجي كل فتره 

= وين يجي ؟

:: النه للكاع

= مو تكول جدي قطع كل صله بي 

:: اي لكن هو يجي ويكعد ويسولف ويضحك 

= وجدي 

:: ابوي الله يرحمه جان مثل بلاع الموس ما يگدر يگول ابني هو الكاتب على اخو وهم بنفس الوكت يخاف علينه 

= عليك انت كان يخاف 

:: مو بس عليه وعلى اولاد اخوته 

= من يجيكم ابويه انت شتسوي

لملم حلگه بعدين جاوب :: شوفي انا وجدج ندري انو ابوج هو الواشي على بدر بس واحد ضام ع الثاني 

= يعني انت ما سولفت الجدو على وصية عمو بدر الك 

هز راسه :: لا ولا جدج سولفلي على كلام خضير اله بعد السقوط 

= اووف 

:: اي كل واحد حمل همه 

= زين انت مو تكول جدو قطع كل صله باابويه شنو كان ايگل للناس عن ابنه لان اكيد تساله 

:: مرات ايكللهم زعلان لان بقى يداوم ما بطل والناس يكلوله غير يخاف عليكم وعلى نفسه يعني سوا ابوج بطل 

=. اكو سوال ابالي 

:: اسالي 

= شعجب ابويه تركك 

عگف وجهه :: شقصدج ؟

= يعني هوا يكرهك من انت زغير ليش ما كتب عليك تقرير وهماتين اخذ فلوسك وگاعك 

ابتسم بحزن :: ابوج حاسبها صح اذا كتب عليه تقرير راح الامن ياخذوني وبالتالي راح يصادرون كل املاكي 

المنقوله وغير المنقوله ياخذونها الهم وهذا الشي موجود بقانونهم مصادرة الاموال المنقوله وغير المنقوله 

== ايييي 

:: ابوج لو كاتب عليه لو متهمني ما رراح يحصل شي بالعكس راح ينضر ويصير ملزم بالعوايل يعيشها 

لذلك خلاني حتى اشتغل واكد

:: يعني جدي كان يعرف ابويه هو الكاتب على عمي وبسببه انعدم وانت هماتين تعرف وقطعتو كل صله الكم بي 

وهو يجي يشوفكم ويروح 

هز راسه :: اي يجي يكعد ويمشي محد يحچي ويا يفتر بالكاع وبعدها يركب سيارته ويرجع 

= بيبي 

:: شبيها ؟

= عدها علم بالسوا ابويه 

نفخ نفخات متسارعه :: اي بس هي التدري 

= يعني عمه رجاء وعمو مهدي ميعرفون

هز راسه وباوعلي وهو رافع حواجبه :: لو يعرفون دقيقه ما خلوج يمهم ولكوها حجه عليج حتى ما تبقيين 

= لعد لويش يكرهوني 

:: مهدي طلعي من الحسبه ما يعرف يتصرف حجايه تاخذه وحجايه اتجيبه 

رديت بدون تفكير = يعني غبي 

زمخ عليه :: ولج شلون اتكولين على عمج غبي 

رديت =هو غبي مو تكول ما يعرف يتصرف 

:: هاي الحجايه الطلعت منج لاتحجينها افتهمتي

هزيت راسي = ماجاوبتني ليش هلكد ايكرهوني 

:: كل هاي الاسباب وهذا الحجي وبعدج تسالين 

= اريد اعرف 

::شتعر...

اندك جرس الباب باوعت سالته = منو يكون اجانه ؟

:: يجوز الحارس وصيته على شوية غراض 

هزيت راسي وراح فتح اتفاجانه بعمي مهدي ويا نهاد لكن المفاجأه الكبيره اجت وياهم فرح

دخل وكال ابرود السلام عليكم 

وكعد ع القنفه نهاد وفرح دخلن فرح حزينه وصلت يم ابوها // شلونك بابا 

هو غمض واتنفس بعمق :: هلا ليش جايه 

مهدي // شنو ما تريدنه نجي 

نهاد باستهزاء// جايين نبارك بعرسك كللوووش

عاصف گعد بكل ثقه وبرود ودخن جگاره وهنه بقن واگفات وهو هماتين بقى ساكت ما حجى مهدي يحرك برجلي 

عرفته متوتر وهنه يراقبن بعاصف بعدها نهاد گالت 

  - - چا شو العروس ما سلمت علينه لو مستحيه 

اتقربت فرح وحاجته بزعل وقهر // بابا شلون طاوعتك نفسك تاخذ هاي (اشرت عليه ) 

هو خزرها وهي كملت // بابا هاي بكدي يعني ما لگيت اله هاي تاخذها

:: اذا خلصتي كلامج اخذي هذوله الجايبتهم ورجعي للبيت وبدل ما اتعنيتي واجيتي لهنا چان ممكن تحاچيني بالنقال 

وما تعبتي عمج وخالتج يجون وياج 

- - بابا انت تعرف شسويت 

وكف باوعلها بعصبيه وحاجاها وهو خال اصبعه على حلكه 

:: اااش ولا كلمه انتي مو تعلميني بس العتب مو عليج على امج واخوج الي خلوج تجين لهنا وعلى عمج الشفيه 

مهدي كال //. عا... 

رد بنتر :: بس مهدي طوول عمرك تبقى زعطوط وكايدتك مرتك مثل الطلي

مهدي بعصبيه // انا ما اسمحلك 

:: تسمحلي او ما تسمحلي شكو جايب بتي ها شكو 

نهاد // جبناها اتشوف ابوها المراهق 

عض شفته واتنفس بعمق :: لمن ما الكلام يجي من وحده مثلج ما ارد اسكت واسمع تفاهات واضحك 

نهاد //. شبيه انا ها شبيه سمعت مهدي 

:: عوفي مهدي وتعاي فهميني انتي ليش جايبه فرح لهنا وجايه 

- —. جايبتها تشوفك 

:: وعبالج اهتم اذا اجت هي او امها وانتي التدرين ليش بس انا اريد اعرف انتي خايفه عليها

   نهاد اتحرك بايدها وهي ترجف /. اي اخاف عليها من الناس تحچي وتگول ابوها عشگله وحده ازغر منها واخذها 

       :: حقج محد يلومج ما دام خايفه عليها من الناس تحجي وتكول ابوها اتزوج وحده بكد 

بته ليش انتي من اتزوجتي هذا شكد جان عمرج وشكد بينج وبينه 

مهدي // انا ما اسمحلك تحجي ويه مرتي هالشكل افتهمت 

:: خايب دا انجب كافي حس على روحك مسوي روحك مضحكه وتحجي اسمح وما اسمح 

نهاد ردت // منو المضحكه عاصف مهدي اتزوجني بحياة ابو وامه مو مثلك اخذت فضالة ابن اخوك 

هز راسه وابتسم :: اي اخذها واخليها ست النسوان لان ابن اخوي ما بي خير مگير مثل عمه 

فرح //. زين وانا بابا ما فكرت بيه 

نهاد // ليش يفكر بيج دادا ملتهي يرجع شبابه 

ابتسم :: نهاد انا بعدني شباب وانتي التدرين

اخذ النقال من ع الطبله واتصل وفتح السبيكر :: ولج رجاء بتج وين 

- - راحت ويه عمها وخالتها 

:: وين راحت 

- - ما ادري 

:: رجاء انتي ما تدرين ابتج خوش خلي اگلج ياما تدرين بتج هاي هي يمي جابها الهرفه عمها وخالتها

رجاء ردت بعدم مبالاة او يمكن تتصنع // اي شكو بيها جايه البيت ابوها 

:: وانا ما گلت شي جايه بس بعلمي وبعلم اخوها شوفي ولج تلزميين بتج وتضبينها لا تعرفين شكدر اسوي 

صدگي اخلي شوفت ابنج وبتج عليج حسره وانتي التدرين واختج هاي اليمي هم تدري

سد التلفون وصل يم فرح :: اجيتي وشفتي ابوج وزوجته تردين تبقيين هلا بيج ترحين الله وياج 

بقت ساكته ما جاوبت نهاد گالت // لا تروح شتسوي اتظل 

:: اتصور انا سالت بتي 

- - لا بابا ارجع 

:: ليش اجيتي 

نهاد // تباركلك عاصف

:: استغفر الله انتي شتردين بالضبط تردين اتفهميني انتي خايفه عليها خاف محد يتزوجها لان ابوها حسب 

كلامج مراهق بهاي حقج بس ليش تخافيين خو اخذيها الابنج تره ماكو فرق بيناتهم سنه او اقل يعني مو چبيره 

مثلج من اخذتي مهدي 

ردت بارتباك // اي اخذها ليش لا 

:: وانا اگلج اخذيها وانا متكفل (دك على صدره ) بكل شي مهر واثاث وذهب ها شتكولين لان انتي الحل والشد بايدج 

هزت راسها // اي اخذها بس انت تدري هي متربيه ويه ويلادي تشوفهم اخوانها 

:: ميخالف انتي تگدرين تقنعينها وتقنعين ابنج ياخذها لان انتي شاطره بالاقناع 

  ما ردت هو گال :: ها شو سكتي اقنعيها واقنعي ابنج مو هيج مفهمه سميره حتى تزوجين وجدان الاخوها لو نسيتي 

مهدي باوع النهاد وعاصف ابتسم. :: شعجب مهدي يعني مرتك من وراك متفقه ويه سميره وگايلتلها اخوج ياخذ وجدان 

ولا تهمون بالاعداد والمهر اخلصه الكم ابلاش

نهاد ردت // ياالله امشونه شعدنا ظالين 

گام مهدي وهي راحت تريد تفتح باب الشقه وراها فرح عاصف حچى 

:: اوكفي فرح 

  وكفو وهو اتقرب من فرح :: مره ثانيه اذا عرفت بيج طالعه بدون اذني راح افصل راسج عن جسمج 

بلعت ريكها بخوف // انا جايه اشوفك واشوف جدتي 

مهدي // شبيك عاصف ما جايه ويه غريب ناسي انا عمها 

هز راسه :: لا ما ناسي هاي بالذات ما ناسيها انت عمها وهلسكتت ما سويت شي بس مره ثانيه لا تعيدها

مهدي // على كيفك عاصف شو طردتنا 

:: فرح من اجيتي وعاتبتيني لان اتزوجت اشرتي على وجدان گلتي هاي انا بلعتها بس اذا عدتيها السانج اگصه هاي 

الي ما عاجبتج انتي وامج وخالتج مرتي وكرامتها من كرامتي وغصبا عليج وعلى امج تحترمنها وروحي گلي الامج 

عاصف هالشكل گال ها ام احمد شتكولين 

نهاد //. ياالله خلي نروح

طلعو هو حاجاهم :: اوكف مهدي 

اتقرب منه :: بعد احنه ما نتراهم گاعنه سوا

مهدي // ليش عاصف 

:: بعد كل واحد يدور على فايدته اذا تبيع انا شراي وانت بكيفك ما اجبرك بس انا شلت ايدي يادوب الحك كاعي 

نهاد // احنه اذا نبيع الكاع نبيعها على بهاء 

هز راسه :: بيها الخير بكيفكم بس منهي تنباع على احد ثاني 

نهاد تحرك بديها // وليش حلالنه وبكيفنه 

اتحسر :: حاچي مرتك لاتتدخل بشي ما تعرفه فكر مهدي وردلي خبر وحتى بهاء لو يشتري لو يبيع

طلعو وهو ظل ينفخ اني اباوعله وهو طلع جكاره يريد ايدخن وصلت يمه = هوااي قسيت على فرح

:: ولو ما كاض روحي جان موتتها خلاص 

= ليش تكرهها ؟

شكرا لزيارتكم عالم روايات سكيرهوم