رواية نارا حيدره الفصل السادس والأربعون
-يُفارقني فيُراقبنِي يودِعُني ولا يَدعنِي.
⭐⭐⭐⭐⭐⭐⭐⭐⭐⭐
وافقت نبراس لأن طلعت هي تحبه بس ما گالت اله لأن رادته هو بالأول يعترف .. وبعد يومين حسن گال أريد اجيب الشيخ يعقد ..
تالي تذكرو ان ما گالو لسالار، ما انطيناه علم بشيء !! خابرو واجا من أربيل بقى يسب بحسن لان ما گاله وهم اصدقاء وضم عليه ..زعل واخذ جنطته الجابها وياا، ورجع لأربيل بنفس اليوم .. حسن سكت وطيبة تتصل عليه مايرد ومغلق
وگالتلنه ان سالار گايلها عرسهم هي وياا
يصير وياا حسن ومتفقين بس!! حسن ما گال لسالار ان نبراس هيه البنيه الاحبها
ضل يخابر عليه تالي راحله للشغل ومصالحة ومتفاهمين صار يوم الخطوبة،، بس احنه محد غريب ولا عزمنه أحد ،، اجا الشيخ وعقد عليهم وسويناها سكتاوي لان بعدهي سنوية خالتي ماطلعت .. والخطبة صارت بالبيت
وره العقد حيدرة گال نستعجل بالزواج لان هذا مو وضع كلنه عايشين بنفس البيت ..
وصار حسن يجي للبيت قليل، ويومه كله بالشغل ويبات اهناك ..
بعد ايام تعبت نفسيتي كل ليلة ابجي محد حاس بتعبي وقهري ابين الهم انو اني طبيعي مابيه شي وامثل الضحكة الكاذبة وبداخلي ضجيج من الالم بيومها تحلمت بأبوي بچيت اهواي بالحلم وهو ساكت ويباوعلي ومقهور ..
گلتله وين كلامك مو گلتلي حيدرة سندچ مو گلتلي رح ترتاحين بدنيتچ وحياتچ بابا وين الراحة تعبتتتتتتت..
كلشي صار بيه بسببه وبسبب حبي الاعمى اله
فعلا چنت مغمضة عيوني واركض ورا وهو ما معبرني ويين الرااااااحة وينهااااا ؟؟؟؟؟
فزيت من الحلم احس جسمي كله يشتعل نااار بسبب حيدرة صرخت وبچيت من هليوم بعد ما اتحمل مـا اريد اتجاهل تصرفاته وافعاله
واگول عادي وذا ويجي يوم ويحبني!
چنت منتضرته يبادلني الحب سنتين متزوجين وعايشين تحت سقف واحد وما حاول يبادر ويتقربلي ولا عاملني كزوجة اله چان دائمًا يعاملني كطفلة..
.....إذا هيچ الحب كله تعب، فاا ما اريدة ....
ما اريد اعيش حياتي علموده وعامود انتظر كلمة حلوة منه رايدة ارجع ناردين القديمة كياني وشخصيتي الضيعتهن بسببه اريد ارجع كرامتي الخسرتها بحبه..
مسحت دموعي وگلت بعد ماانزلهن علمودة
دام هو مـا يستاهل هلحب
مـا فكر بيه
من سوا كلشي،
ولا اهتم،
ولا حسب حساب لمشاعري ،
وبعمري مـا چنت شيء بالنسبة اله
تنهدت وجريت نفس، بعد مااهتم اله چنت شكد اسكت واجمع بگلبي قههرر لحد هلحظة تعبت مابيه صبر وگلبي طگ انعل ابو الحب
خابرت على سالار سولفتله على معاناتي وعدم تحملني گلتله رجعني لأربيل ما اريد ابقى دقيقة هنا !
- اصبري اسبوع علما تخلص الإجازة لان عندي خفارة ومشغول حيل ما اگدر انزل لبغداد
- ماااشي انتظرك .
غلقته منه، وطلعت من الغرفة غسلت وجهي وصليت المغرب طلعت ملازمي ودفاتري وبديت ادرس..
طيبة اجتي تريدني اطلع ما رديتها وبقيت حاجرة نفسي بالغرفة ثاني يوم كعدت بدلت
ونبراس دوامها قبلي راحت من بـ7
وآني بقيت لـ 8 منتظرة ابو الخط يجي نزل حيدرة من غرفته مبدل وشكله يريد يطلع
شافني واكفة بالباب الكراج
گال :- صباح الخير
سمعته ودرت وجهي مارديته ،،
حيدرة :- ها اليوم عندچ دوام ؟
_ماجاوبته ..
- احچي وياچ بوية،
.... نبراس راحت موو ؟
....جاي احچچي وياااچ
......ناااردين
_فتحت الجنطة خليت الملزمة بيها ولبسته ماجاوبته اتجاهلته
..لزم ايدي دفعتها
.... بقئ يحچي عليه و اني ساكتة ولا عبرته
- امششي انا اوصلچ
.... الـووو
.....رحمةة للكعبة ولحسين جاي احچچچي ويااااچ
سمعت صوت دگ هورن السايق، اخذت جنطتي وطلعت وخليته واگف يباوعلي وصافن وصلت للكلية تجنبت الكل حتئ صديقاتي ماگعدت وياهن
رجعت للبيت بدلت ملابسي وسبحت اخذت ماعون فاصوليا وگعدت بالصالة واباوع على المسلسل واكل ..
اندك الباب ودخل حيدرة چان بالدوام، اجا شمر مسدسة وسترته وتمدد علئ القنفة يفتح بأزرار قميصة، واني مندمجة بمسلسلي
حيدرة :- اي شلونچ اليوم، خوما احد ضايقچ ؟
...جاي احچجي، شبيچ طرشة ؟
عليت الصوت حتئ ما اسمعة تالي گام وسحب الريموت طفئ التلفزيون ..
- من احچي اسمعي و جاوبي
بقيت اباوعله وعيني ما تباوعله اخذت الماعون وگمت عفته وطلعت اجا وراي للمطبخ سحب ايدي وانكسر الصحن..
-وخررر مني حيدرا
-گولي شبيچ ؟ على شنو هذا الاسلوب من امس احچي وياچ وانتي مجاهلتني ولا كأنو موجود
-ما دخلك بيه بكيفي اسوي العاجبني والعاجبني اتجاهلك عندك مشكلة ؟
- شنـو مو بعينچ انا ؟
- اييي
قبض ايدي بقوة، :- نااااردييين
دفعته من صدرة:- لا تتقرب مني بعد ورب الكون الأ اصير وحدة ثانية وتحلم بيه
- لا وعلي غير افتهم علئ شنو معصبة وزعلانه
احچي شمسويلچ انا، بوية ؟؟
-كل بالموضوع ان ما اريد احچي وياك خلص عاد
- انتي مصدگة نفسچ و نسيتي ويامن جاي تحچين عوووفني بحالي وخررر مني
ابتعد وگال :- براحتچ بويه الي يريحج..
طلع وصعد لغرفته، غسلت وجهي ودخلت لغرفة طيبة ونمت بدون تفكير رايدة اريح نفسي وعقلي وگلبي ..
ثاني يوم نفس الشيء ما حچيت وياا ابـد،
حاول مرة يحچي وياي بس تجاهلته ..
صرت اشوفه يغلي يغلي وآني اباوعله مبتسمة واتركة بعد ماخلاني اغلي ناااار وهو يبتسم هسه صار دوره ...
وبيوم چنت طالعة من القاعة وراسي رح ينفجر حسيت رح اموت اختنكت كلش وريگي يابس
بحيث شمرت الملازم وبقيت واكفة لازمة راسي اجوي بنات و3 ولد من قسمنه سألوا على حالتي
واحد اعرفة اسمه (جـلال ) لزمني وگعدني على الكرسي راحت البنيه جابتلي بطل مي، شربته وتشكرتها سألوني شبيه گتلهم صداع عادي فد شوية واصير زينة لا تقلقون ممنونه منكم اشكركم
-ولو احنه اخوتـچ.. يلا لعد رايحين لان عدنه محاضرة .
هزيت راسي (اي) ..راحـو وگمت
اول ما گمت دختت حيييل غوشت عيوني
فقدت تركيزي و وگعت من طولي وماحاسه بشي ء
.....
حيدرة :- بالمركز وبوسط الغرفة گاعد لوحدي اجمع معلومات عن شخص مهم ..
رن موبايلي، شفت المتصل ( نــاري )
رديت بسرعة.. هلاا
- السلام عليكم اني صديقة ناردين
وگفت وجاوبتها.. نعم !؟
-شفت رقمك گبالي واتصلت هيه بالكلية وگعت انغمى عليها ودا نحاول نگعدها بس ما تگعد وما نگدر نطلعها إذا انت من اقاربها تعال اخذها البنيه وجها اصفر صار
- دقااايق و اجي .
سديته، وغلقت الابتوب، لبست سترتي طلعت وصيت عثمان يكمل شغلي ركبت سيارتي وصلت ودخلت لگيتها بغرفة العميد قسمهم شوفته البطاقة مالتي ودگ تحية احترام..
شفتها متمددة وزملائها يمها رحتلها ركض خليتها بحضني اعاينها صفرة صايرة وملامحها ذابلة
-منتظرين تموت يلا تتصلون عليه؟ چان اخذتوها للمستشفى
-انتظرناك سيدي..
ردت اشيلها على صدري ما قبلت لزمتها من ايدها وطلعتها صعدتها بسيارتي وانطلقت للمستشفئ حاولت اگعدها شمرت عليها ماي ماكو هي والميت سوه وصلت للمستشفى بدت تگعد
نقلوها للسدية حاچيت الدكتورة وسوتلها فحص
گالت صار عدها فقر دم حاد كتبتلها خروج وطلعنه رجعتها للسيارة ورحت للصيدلية اشتريت للادوية ..
رجعت يمها شربتها ماي ..
-شلوون بيچ رايدة تموتين نفسچ انتي؟
ناردين :- اي
-وعلي دريت رح تتخربطين بالكلية شفتچ الصبح مو طبيعية لا تاكلين ولا تشربين شنو قصتچ
-مايخصك.
-عوفي زعلچ علئ صفحة هسه نحچي علئ صحتچ الأهم ليش ما جاي تاكلين لچ صار بيچ فقر دم
ضحكت بأستهزاء وگالت بصوت خافت:- عادي يابة وذا
-ناري وتالي؟؟
-الله العالي.. وصلني للبيت اشكرك على موقفك الإنساني وياي
تنهدت ولزمت خدها :- رويحتي زعلانه مني يناري ؟
ابويه انتي، والله اجيت ركض علمودچ تخبلت من شفتچ بهاي الحالة ناري ليش ماجاي تهتمين لعافيتچ ؟!
- چان واحد عافية إليه بحد ذاتها وهلواحد كرهته وكرهت العافية من ورا ..
جريتها لصدري حضنتها وبستها براسها بسرعة بعدتني عنها سكتت.. سديت الباب ودرت صعدت يمها حركت السيارة ولزمت راسها
-وگف السيارة خبطت معدتي
وكفتها علئ سريع بس فتحت الباب كامت تقيئت طاح علئ بنطروني ..
- بارك الله بيج، الله يطيح حظچ
غسلت ورجعت صعدت،
- البنطرون منو يغسله ؟
-انت
- بربچ عندي شغل مفروض هسه انا بالمركز شلوون بيج
- احد كلك تعال اخذني للمستشفئ ماسامع المثل الي يكول لاتسوي خير الشر مايجيك
سكتت رجعتها للبيت دخلنه.. صعدي بسرعة جيبيلي غير ملابس رايد اطلع
ناردين :- تمام رح اجيبلك لانو جبتني للبيت يعني رد الجميل بجميل لا اكثر..
صعدت لغرفتة ..فتحت الكنتور طلعت قميص وبنطرون اله دا اسد بالباب صار بوجهي سحبني من ايدية ودفعني علئ الحايط..
صرخت.. وخررر منييي شرايييد؟!!!!
رفعلي حاجبة.. اذا ما تگولين شبيج ما تطلعين منا
-مو بكيفك و ما بيه شيء!
قاطعني من خله اصبعة علئ شفايفي وگال.. بوووويـة منو الي مزعل نـاري ؟
-أنت
-انـا ؟ افا لييش!!
دمعت عيوني مباشرةً دنگت راسي ..
همس بحنية :- رويحتي انتي ولچ تزعلين من حيدرة يناري
احچي وعلي مامرتاح وانتي زعلانة كولي شنو المضوجج شمسويلج انا ؟
شـبيها عيونچ تريـدين تبچين ؟
سواد بعـينچ وبالگـوه تحچين !
شــبيـچ احچيلي لاتخافين،
ليش هــواي ذبلانه ؟
شــنو متـعب معانييـچ
اول مـره احس مكسوره تمشين
وانـه الي اعرفچ اقوه انسانة
شـگد مكابرة وهالكثر تعبانه
حسيـت الدنيا ضاقت بيـه شهگت وانهاريت بالبچي ردت بس اصيح وارتاح واطلع الي بگلبي بس ما گدرت دفعته من صدره وگلتله..
-ابتعد عني ولا تتقرب.. انت ما تهمني
"بعــد سوي الي تريده مهنه"
باوعلي بنضره تفاجئ طلعت بسرعة من غرفتة ونزلت جوه گعدت يمهن وهنه يحجن واني مو يمهن نبـراس تخابر بحسـن وتضحك وطيبـة تخابر بسـالار واني صافنه بوجهن ..
"حسيت روحي غريـبة"
"حسيت هذا مو مكاني"
أخذت موبايلي تصفحت علئ سريع ماكو شيء رجعت ادرس ..
الدراسة الشي الوحيد الناقذني هالفترة هي القرار الي ما رح اتندم عليها
باوعت فلم كوري غير مزاجي طلعت من الغرفة نزلت جوة للمطبخ فتحت الثلاجة لگيت حافظه آكل بيها افكادو وخيار ولبلبي ستغربت شنو هذا ينوكل ينشرب اخذت خاشوكه واكلت كلش طيب وحامض اكلتها كلها ما بقئ منها شيء
رجعت گعدت بالهول، بيدي الملزمة وسماعاتي بأذني اسمع اغنيه لـ BTS سمعت حيـدرة يحچي وياا طيبة صوتهم عالي اجتي يمي ..سألتها شبيج؟
طيبة :- مابيه شيء بس حيدرة مخلي حافظة بالثلاجة ومن طلعها لگاها فارغة
- هاا
سكتت واني أضحك رجعت اسمع الأغنية اجا وباوعلي ..
-سـت نارديـيين
-نعم عيني
- أنتي إلي ماخذه الحافظة مالتي؟
- آي
أبتسم.. عجبتچ مو ؟
- آي والله كُلش طيبة عاشت ايدك
خزرني وطلع بقيت اضحك لان قهرته
تالي اجا گعد يمي وحافظة ثانية بيدة!!
- انا خليتها الج حتئ تاكليها لان بيج فقر دم وتعاندين وماتاكلين فاا كلت اخليها كبالج حتئ تفتحين الثلاجة وتاكليها
-انت عندك كلشي تخطيط حتئ بالاكل
-اي چاا شحسبالچ؟
عفت كتبي وگمت ثاني يوم فاجئنه سالار من اجا وگال حددنه العرس هذا الأسبـوع
-مانلحگ بعدنه كلشي ما مجهزين!!
سـالار:اني وحسن مجهزين كلشي بأربيل
- شنوو ليش بأربيل ؟
- لعد غير العرس رح نسوي اهناك
- عزة صدگ لعد ليش مو اهنا ؟
- اهناك أحسن و أمن النا
- اوكي بكيفكم!
عزلنه الغرف و اخذنه كُلشي ملابس والغراض وحتئ البزونة اخذتها وياي وخليناهم الجنط بسيارة سالارر حتئ رائد ونور اجوي ويانا .. واني ونبراس وطيبة ... صعدنه وره طلعنه الفجر وانطلقنة لأربيل وصلنه بـ 10 الصبح هالمرة مو شقـة
نزلنه بـ بيت كبير حيل و حواليه شجر
ونخل وزرع وحديقة كبيرة ..
سألت رائد: هذا بيت منو ؟
جاوبني: بيت ملك حيدرة
هلاا ونوب عنده بيت رابع واني مادري!! بي هواي غرف گعدنه اني والبنات بغرفة وحدة وخلينا الجنط گلنه رحنه سبحنه من التعب ولفيت راسي ونمت گعدت الظهر جايبين أكل تغديت وياهم تالي حسن وسالار ورائد .. طلعو
بس حيدرة موجود ..گاعد بالأستقبال ويشرب گهوة وبحضنة الأبتوب طلعت بره للحديقة اشم هوى واكتشف البيت والاماكن البي..
وبيدي بزونتي ...گعدت علئ الكرسي
خليتها بحضني واكلها ...(دللوو ياروح امج)
اجتي نبراس گعدت يمي باوعتلي وضحكت گالت صدك شنو سميتيها ؟
- قصدج البزونة ؟
- اي
- سميتها حيدرة ههههههههه.
فتح الباب اجا يمشي ...
حيدرة :- الله يطيح حظج وحظ الجابلچياها
ضلت تضحك نبراس تالي راحت واني اصيح للبزونـة ..
"يمة حيدورتي فدوة لهل عيون الخضره"
حيدرة :- لگيتي الحنية بيها
-ما يخصك.
تقرب مني و اخذ البزونة من ايديه وراح ركضت ورا واصيح.. ياا ياا جيبهاا
- ترديها ؟
- آي !!
- تردين حيدرة ؟
- ما اررريـدك
ضحك وگال:- مو انا ، البزون
- عود تلفها علية وهاي دروح ما اريدكم اثنينكم
گعدت بالگاع كلها حشيش اعصر بأصابيعي .. التوتر يصعد الف من يتقرب مني أو من نكون نفس المكان!!
شفته خله البزونة علئ المرجوحة واتمشئ الية .. گعد گبالي سكتت بس صافن بعيوني ..ماحچه شي
- شيل عيووونك
- واذا ما شلتهن ؟
- افگسهن الك
- جربي تقربي
- اكرهه قربك واكرهك
- بوية الچذاب وين يذبوه ؟
- اني النار ونارك و ما اخاف شعبالك اخاف منك وما افگس عيونك
- مو جاي اگلچ تعاي افگسيهن
سويتها صدگ وگمت وگفت ولزمته من ياخة قميصه و هو لام شفايفه وعينه بعيني نضراته خلتني صافنة
-ها يابه اتراجعتي ؟ وين جرأتچ
جريت ايده وعضيتها بكل قوتي سنوني انطبعن بيده وتركته وهو يضحك ولا اهتز ولا كال اخ
ابن اللذين بس والله العضه توجع عديم الاحساس
صاح :- تعاي تعاي تعضين وترحين شني بوية ولد الناس لعبة اشتكي عليچ هسه ؟ هـاا ؟
رجعت گعدت بمكاني ولا كأنو سويت شي واللعب بالحشيش
-ليش صايرة متوحشة
ماجاوبته صار يحجي واني منطيته الاذن الطرشة ولا رديت عليه صافنة بالحشيش
وظهري عليه
-كافي ناردين رحمة للكعبة شبيچ زودتيها
گمت والبزونة راحت دخلت جوه ..
جرني من ايدي
و صاح :- الطرررشة ،،،القزمة ،،، ام الجفصاات
جاوبته و عيني بعينه:
- المعذرررب ،،ابو لساان ،،،،ابو المهمااات
دفعته من ايده وشردت ..
ركض وراي .. واني اركض
فريته الحديقة والطارمة كلها مرتين وهو يركض ويگلي ولچ منو المعذرب.. اخير شيء تعب ووگف واني ضحكت
- ولج الزمج اليوم الزمچ يالقزمة
- طولي 155 انته چنك خط بغداد طولك 192سم
- الطول هيبة يابـه
- ولا يستقر الضابط الاستخباريتي
- غير ترحيلي سبع فدوات
- سبع غمات
- ولج ام الجفصات اجيلج وعلي
- اي تعال هياتني يمك
غمزلي :- مشتاقلج تعاي حضن اسلامي بداعتي
- روح لغيري تحضنك
- اي اروح لــ وليان
- لــ طليان احسن
- خاب فوگ ما جاي اراضيچ ما عاجبج بويه ولي مناا
- ولت روحك و ورمت جروحك
- مطورريـن
- لعد شعبالك لا تستخف عيني
- راجديين علئ شكم بوكسي
اگعدلچ روحي وزن
- اعرفك مخبل أحتمال
تكتل روحك كلش عـادي!
- هسه مو گلنا الچ تعاي ضبيني وعقليني
انا عندي أحساس هدايتي راح تكون علئ ايدچ!!
- اگلك ابو الهداية ما عندك شغل أنتَ ؟
روح للمركز بلكت مهمة لو قضية
جديدة منتظرتك؟
- انتي قضيتي اليوم رايد أحضنچ
بلا شلون تمنعيني؟
داحجي وياا اجاا ركض وحضني قوي
بأثنين ايديه اضربة مايوخر ويضحك عالي
بالگوة كمت من حضنة..
راد يلزم أيدي دفعتها ونترت:
- وخررررر عنييييي!!
وتمشيت لنهاية الحديقة وكفت وچتفت أيدي غمضت عيوني نزلت دمعتي
أجر بالهوئ گوه الجو بارد حيل دنگت .. باوعت ايدي صايرة حمرة وخرت شعري ليورا اذاني لحظات و تقرب مني وشبگني من ظهري ورجعني عليه ..
حضنني قوي واحس ايدة ترجف يهمس بأذني بصوت يرجـف.. نـاري
"يانار ياصحوة جمر مرخوصلچ تچويني"
سكتتَ ما رديت ..
كُل قواي باتت تفشل شگد حاولت البس ثوب القوة انزعة بالخذلان نزلت دموعي بچيت بقوة
واحچي وياا..
-حيدرا تعبتتتت شنو الي ترريده مني؟؟
دارني عليه وصار وجهي بوجهة دفعني على الشجرة وهو حاضنني احس گلبي راد يطلع نبضات گلبي تسارعت اباوع بعيونه حمرة وذبلانة ..
حچيت بصوت متقاطع.. عووفني حيَـدرا
- مااعوفچ انتي مالتي وشسوي بيج بكيفي
دنگ علئ رگبتي طبع بوسة رقيقة .. عصرت چتفه اختل توازني بسبب حركته هذه
رفعت راسي جسمي يرجف ..
-وخر حيدرا وخرر لا أحد يجي ويشوفنه
-خل يجي ويحجي حتئ اترس حلكه رصاص
سكتت وهو همس بأذني ..
-نـارديـن، نـاري، يا نـاراحيـدرة
يادنـيتي الصـغيرة"
جاوبتة برجفه.. هاا !!
- والقران والانجيل والتوارة وعلي والحسين والعباس وحق الكائنات الحية
والكون والنبي محمد وحق سبع السموات وحق المسيح وحق هذا الله
والدم يجري بشرياني واعروقي انا احبــچ ينــاري .
