رواية قصة وجدان الفصل الثامن والأربعون بقلم انين الليل
= ليش تكرهها
خزرني انا هزيت راسي = اي من يوم الاجيت واني دا احس بفجوه بينك وبين بتك وبينك وبين زوجتك
ما جاوبني گعدت = يعني انت اذا ما تريدها ما مجبور تتزوجها كان عفتها تربي ابنها او تشوف حالها تتزوج
ليش هالانانيه
رد وياشر على نفسه :: انا اناني
رفعت اكتافي = بعد هذا السؤال انت اتجاوب علي
:: بيها مجال نغير الموضوع
هزيت راسي ولملمت حلكي = لا لان انت وعدتني تحجيلي كول شي
:: بس اكو اشياء ما تنحچي
= لويش ؟
:: يعني بسبب المقابيل السماع للحجي
رفعت حواجبي = شتقصد ؟
:: اقصد اكو كلام تطير بي اركاب اذا طلع وتصير بي ادموم
= وتتصور اني بهاي حالي احجي
لملم حلكه :: ممكن
= الهلدرجه تشوفني مو گد الثقه
اتنفس بعمق :: تتصورين بهالوكت اكو ثقه
بقيت ساكته ما جاوبته هو كال :: اريد جاي
رحت حميته وصبيتله طلع جكاره خلاها بحلكه يريد يدخن اتقربت اخذتها هو كال بعصبيه :: لا اا
باوعتله باستغراب =. هاي اول مره هالشكل تعيط وعلى شنو على جكاره
رجعتها ع الطبله اخذها وشعلها وسحب نفس منها وشمر الدخان بعيد ورد عليه
:: لان هاي الي تشوفينها الوحيده الي بقت وياي ما تركتني وهي الي تهون عليه همومي وقهري
باوعتله = لعد انت شكد حامل هموم
رد بحسره :: اووووو. بگد الجبال والمشكله حابسهن بگلبي
حكيت ركبتي = هاي نهاد شكد تكرهني ؟
باوعلي وهو يلم بحلگه شرب ماي انا حچييت = ابويه كان خاطب نهاد وشافها الماما حبها وعاف نهاد واتزوج امي
اتنفس بعمق :: ابوج بعمره ما حب امج ابوج حب بس نفسه
= لعد لويش اتزوج امي وترك نهاد
:: لان عرف ابوي راد يخطبها الي وسنتين ونتزوج فسبقني خطبها
هزيت راسي = صحيح ؟
:: شنو الصحيح ؟
= ابويه بعمره ما حبها الامي والدليل شكد كان ايعذبها اريد اسالك هو ناظم شسوى وانتو ضربتو وخليتو يطلك مرته الي
هي عمتي سعاد
حرك رجله :: ها هاي امج هم مسولفتها الصاحبتها
هزيت راسي = گتلك امي بيومها كلش مقهوره وحتى متفشله لان مو من السهوله تشوف زوجها ما يثق بيها ولا ياامن
بيها مخلي المفتاح عد جاره الغريب وما مخلي عدها يعني واثق بالغريب اكثر من زوجته
:: اي اكو هوااي ناس بسرعه ما توثق بناس وتطلع ما تستاهل هاي الثقه
=. صحيح
:: وامج چانت هي وام احسان اكثر من الاخوات
= بلي واتذكر بيومها كل شي سولفت الها
هز راسه :: بس اكيد امج غلطانه لان وثقت بوحده مثل ام احسان
= ام احسان كانت اقرب وحده النه اصلا احنه منعرف جوارينه ولا النه اي علاقه بيهم بس همه بنتهم كانت صديقتي
وهي كانت داىما تجينه وتحجي ويه امي وتگللها لازم تاخذين موقف من زوجج لازم تتطلگيين او ترحين الاهلج
لكن امي تكتفي ب ان تسكت
:: اي وشحجت الها على خالج
= لا هي مو بس حجت على خالي هي تقريبا سولفت كل شي من اول ما راحت البغداد الزواج عمو كريم الى
ان بابا استشهد
:: ها يعني سولفت على اخوها ناظم
هزيت راسي = امم لا شي مقتضب هي صارت تسولف شلون بابا اتزوجها وبعدها شلون صار اياذيها لان اكثر
من مره كان يضربها وخاله خوله تجي تشوف اثار الضرب وهم اكثر من مره گالت الامي اتطلگي لكن امي
ماقبلت او خلي نگول اهلها ما قبلو تتطلك
يحرك برجله بدون ما يحچي سالته = اشو صافن
اتنفس بعمق :: على هالدنيا شكد قاسيه ورغم قساوتها متمسكين بيها
هزيت راسي = شبي ناظم
:: ولج انتي ما تنسيين
= اني اريد اعرف كل شي اريد اعذر نفسي واعذرك
:: تعذريني ليش ؟
= اعتبرني ما حچييت
هز راسه وحجى وياي بحده :: لا فهميني انا شسويت وانتي تعذريني
= كتلك اعتبرني ماحجييت اريد انطيك العذر ليش رحمتني ليش ما قتلتني من عرفت بغزوان اخذ اعز شي تمتلكه
اي بنيه ...
برطمت وبچييت بحركه رحت للغرفه قبل ما افتح الباب سمعته رد بقهر يمكن اكثر مني
:: لان دريت انتي مو بارادتج غزوان اغتصبج غصب عنج وانتي جاي تضغطيين عليه يجوز تمتحنيين صبري
رجعت واني اسحب خشمي = لا. مو امتحن صبرك بس اريد اعرف ليش اني منبوذه هسه عرفت ليش عمامي
يكرهوني بس ما عرفت ليش اهل امي عافوها الواحد مجرم مثل ابويه
صم حلگه واتنفس بعدها كال :: يعني تدرين ابابوج مجرم
رديت متفشله = عبالي يكره امي ويعذبها ويكرهها طلع يكره الدنيا كلها
نفخ :: خالج جان ...
سكت ما كمل رديت = ليش سكتت شبي ناظم
:: روحي نامي
اتقربت منه هوااي حچييت = وبعد اكو اوامر روحي انخمدي اكعدي اتسممي بعد نسيت شي
اضربني حتى بلكي شويه ترتاح وما تدخن
اتنفس بعمق رديت =. ليش ساكت الوين تريد توصل بعدك ما ملفق كلام
عرفته صار عصبي ومستعد يكسر الشقه وقبلها يمكن ايكسرني صم حلكه ويتنفس بعمق بدون ما يباوعلي
:: روحي نامي
= واذا ما انام تجبرني
هو وگف بصراحه خفت هوايه منه راح يمشي دخل للغرفه الثانيه وسداها بقيت گاعده بالصاله وكلش ضايجه لا شنو
ضايجه داعيه نار اريد اعرف شبي ناظم لزمت الريمونت بايدي وصرت ادور بالتلفزيون وصدكوني حتى ما اباوع
شنو موجود بس مجرد اريد شويه اهدا گعدت شفت الباكيت والجداحه مالته لزمتهن بيدي حجيت ويه نفسي
= خلي اخذهن اله واحجي ويا
هزيت راسي = لا ما اروح ياخذهن ويكلي فوتي نامي
طلعت الجكاير وصميت ايدي وصرت افتح ايدي واسدها بحيث اتكسرن قطع زغار
= اكيد هسه يطلع ويشوفهن وشيسوي خلي ايسوي ما عاد يهمني
رجعت اتمددت ع القنفه والريمونت بايدي ومثل ما اتوقعت طلع وصل يم الطاوله شاف الجكاير اخذ الجداحه
ودار وجهه يريد يرجع للغرفه جاوبته = اني كسرتهن
:: اي
=. اشو اتكلي اي
بقى داير وجهه ما يباوعلي :: شتردين اسويلج ؟
= شعجب ما تريد اتعاقبني
:: على شنو على تكسيرتج للجكاير انتي كسرتي الاغلى من الجكاير وما عاقبتج
نرفزني = شنو قصدك ؟
ما رد عليه گعدت لزمت ايده هو باوعلي مرت ثواني سحب ايده = شقصدك شكسرت اني ما كسرت غير نفسي
ضميت شفايفي بس حتى ما ابجي مررت اصبعي على خشمي دار عليه :: شتردين
= اذا تريدني ابقى احجيلي كل شي
:: واذا ما حجييت
= اطلع اروح
اتثاوب :: وين ؟
= اروح ايهناك للبستان
رجع كعد ع القنفه :: صرتي تحبين البستان ؟
= لا بس ما اله داعي وجودي يم شخص ما واثق بيه
:: انتي مجبوره تبقيين هنا يمي
=. اكيد مجبوره لان اذا ما ابقى الله العليم شنو ممكن تسويلي
هز ايده :: ليش مرااات احسج فاصله مثل مهدي
=. اني
:: اي انتي يا بشر يافهيمه مجبوره تبقيين اهنا لان الشرع يحتم عليج تبقيين يم زوجج وين ما يسكن انتي ويا
وعلى اعتبار انا زوجج فغصبا عليج تبقيين اهنا
بقيت ساكته ما رديت هو سالني :: شتردين تعرفين ؟
صدك فشلني بكلامه رديت = نفس السوال جاي اتعيده ونفس الجواب اريد اعرف كل شي
كعد باوعلي نفخ وبعدها گال :: روحي للغرفه افتحي كومدي الجربايه وجيبيلي باكيت
رحت بسرعه الغرفته وهاي اول مره ادخل واشوفها حتى ما ركزت بيها فتحت الجراره مالت الكومدي وجبتله باكيت
انطيته اله فتحه واخذ جكاره كعدت ع الجهه الثانيه
صار يدخن تثاوب واني اباوع اله
:: ناظم اتزوج سعاد قبل لا ابوج يتزوج امج هيج خطبه عاديه ومن اتزوجته جان هو يشتغل بشركه ودووم يسافر
فهي دووم موجوده يم اهلها جان يجي كل شهر شهر ونص اسبوع واذا اجه عشر تيام فجان ياخذها ويروح البيت
جدج يومين تلاثه
:: هي لان يم اهلها مستقره ومرتاحه لان جدج الله يرحمه كلش مداريها واحنه ما جنه نشوف على ناظم شي جان
يجي ويطلع بااحترامه هادي ومؤدب وحتى هي ما جانت تشتكي منه بالعكس گايم بواجبها على اكمل وجه
:: ولحد ما ابوج اتزوج امج سعاد تلح تريد تسكن ابغداد خصوصا وناظم صار شغله ابغداد وابوج شافالها مشتمل
بنفس المنطقه يعني مو بنفس الفرع وراهم بفرعين فمن يروح ناظم الشغله هي تجي تبقى ابيت اخوها الي هو ابوج
= يعني سعاد ما قاطعت ابويه مثل اهله
هز راسه :: لا ما قاطعته وحتى امل وانصاف لان ما يدرن بالشي السوا ابوج وهنه متزوجات يعني ملتهيات بيوت
وجهال وشغل واحنه انا وجدج وحبوبتج خلينه النعرفه بگلبنه محد يدري بي
= زين هو شنو صار
نفخ الدخان :: بيوم اجتنه سعاد ودخلت هي وابوي للمضيف وبيومها ابوي صاحني وسعاد صارت تسولف النه
على رجلها الشفيه استغربنه من كلامها وردت باللحظه اروح اكتله لكن ابوي ما قبل وگلي اتوانى خلي نتاكد حتى
الناس ما تلومنه واهله ما يحقونه
:: وصينه سعاد تتعامل ويا عادي وبس يجي تنطينه خبر عرفنه وكتها بجيته واجيت انا وابوي وگعدنا ابيت عمي
كاظم وفهمناها من يصير الشي الحچته تخابرنه وفعلا هي خابرتنه وبيومها اجينه انا وابوي وهي من راجعه
من يمنه رايحه البيت اهلج ومسولفه السعدي الي اجه ويانه وقبلها ابوي اتصل بااهله وعمه
جنه نريد انراويهم افعال ابنهم
ودخلنه وشفنه كل شي بعينه لزمنه ناظم كفرنه بي ردنا نكتله خلاص لكن ابوي ما قبل وفسر عدم قبوله لان
بدر معدووم فالدوله واحتمال اهله يرتكبون علينه وبالتالي الكل راح ينضر وراح نخسر
:: لذلك خلينا ايطلكها ويتنازل عن الولد وكل شي وصار الاتفاق انو هو يطلك سعاد وابوج ايطلك امج
ورجعو بيت جدج وياهم امج والجهال بس ناظم ما رجع لان بوكتها جدج كتب بي براءه وشيصير بي
هو متبري منه
= جدي ابو امي
:: اي اتبرا منه گدام اخو وكدامنه وحتى هدر دمه
= هو شبي ؟
:: منو ؟
= ناظم ؟
اتنفس بعمق ومد السانه يبلل شفته :: ما عليج شي راح وانتهى
= بس اني ايهمني اعرف
:: جان (هز ايده ولملم حلگه وهو يتنفس ) جان واحد سگط طايح حظه
= شنو يعني ؟
:: يعني استغفر الله
= عمو شلعت گلبي
باوعلي ابتسم هز ايده :: جان يجيب زلم ونسوان للبيت شرب وسكر وتالي
= شنو تالي ؟
:: هسه انتي ما افتهمتي
= شفتهمت يجيب اصدقائه ونسوانهم مو خوش اوادم
:: اي هذا هوه
= يعني مايستوجب هالشكل
:: شنو ؟
= تضربونه وتتعاونون علي
رفع حواجبه :: نتعاون علي هو خالج اسوي لكمه باايدي بس بذاك الوكت لازم كلنه موجودين
= هاي كلها لان اصدقاىه مو خوش اوادم تره هواي ما يشربون وهم مو خوش اوادم بعدين ابويه كان يشرب
ودووم يجي حتى يمشي مخربط
هز ايده :: استغفر الله هسه هاي شيفهمها
= تره مو حيوانه گدامك وما افهم مجرد وجهة نظر دا اكول هواي مو خوش اوادم وزوجاتهم عايشات وياهم
بعد ع شنو تفهمني لكن يجوز ...
:: يجوز شنو
= انتو من النوع الي تنطون عذر النفسكم بس للباقيين لا ما تعذرونهم
هز راسه :: لا متوهمه بلي صار والي سمعنا وشفنا ماكو مجال الاي عذر
= الهلدرجه
:: واكثر خالج جان شاذ اتعرفين شنو شاذ وجان ما عنده مانع استغفر الله ما عنده مرته ( باوعلي )
هسه افتهمتي
ضربت على گصتي = انت تحجي صدك
:: اي لزمنا وشفنه بعيونه ولهسبب عوقنا
= شنو ؟
:: كتلنا كتله عوقنا بيها وابوج ما قصر بي دعمه بالسياره وسگطه ع الاخر
= يعني شنو ؟
اتنفس بعصبيه. :: يعني سكطه افتهمتي
هزيت راسي :: وانا رميته برجله
= وامي تعرف بهذا الشي
:: اكيد تعرف بس هي المسكينه ما الها يد بكل الي صار
= اتذكر بيومها امي گالت الخوله انت الي ما قبلت ياخذونه من امي
:: اي گلت (نفخ بحسره ) كلت المره تاخذ جهالها وتروح وتالي ايطلگها ما ردت ويجوز يتهموها هي مثل اخوها
= ليش حتى يتهمون امي
::لان الناس ما ترحم يعني انتي لو بيوم الي ردتي تنتحرين لو ما نلحك عليج وغرگانه وميته منو يكول لان انا
ضربتج راح تتأول الالف حجايه والف سالفه وقال وقلت
باوعتله وهزيت راسي =. كلامك صحيح بس اتصور انت الك رأي اخر
هز راسه :: شنو هو ؟
بلعت ريگي ما رديت سالني :: ليش سكتي احچي ؟
= على گولتك. شي راح وانتهى
ابتسم سالته = ليش تضحك ؟
:: ابتسمت ما ضحكت
= اي ليش
:: صرتي تحجيين مثلنه
اشرت على نفسي = اني شگلت
:: على گولتك
هزيت راسي = اي بعد اني عشت ايهناك هواي
:: جا ليش انا ما احجي مثلج
رفعت اكتافي = شمدريني يجوز تعرف تحچي وما يعجبك
اتنفس :: اي جاوبيني
= على شنو ؟
:: شنو الراي الجان عدي من ما خذيناكم من امج بساعتنا
= مو ات كلت شي راح وانتهى
هز راسه :: تمام خوش لا تكليلي سولف واريد اعرف كل شي لان كل الي اگوله شي راح وانتهى
= تهديد ؟
هز راسه :: لا مقايضه
= معقوله
:: اي معقوله
= ابيش تقايضني
:: تحجيلي كل الي تفكرين بي بدون لف ودوران
= ليش اني شعدي والف وادور اشو انت تعرف كل شي عني اصلا اني الي ما اعرف اي شي عنك
رن تلفونه باوعله وهو عاكف حواجبه :: منو هذا رقم غريب
=. رد شوف منو
:: الو هلا يابه شلونك
:: شخبارك
:: اي اي يمي
باوعلي :: هشام
ما اعرف ليش ارتبكت وحسيت بالخوف اخذت التلفون بلعت ريگي
= الو
- - الو شلونج وجد
صار گلبي يدك بلعت يكي = هلا حبيبي شلونك مشتاقتلك
- - وانا اكثر
صرت اشهك وصوتي يطلع همس حاجاني // وجد ما كو وكت لا تبچيين خابرتج اكلج انا موافق لان عاصف
اتزوجج اقلها اطمن عليج
باوعت العاصف وحجييت = انت تعرف ؟
- - اي اعرف عاصف اجه وگلي وقبلها هم عرفت بهاء اتزوجج لكن الله ماكتبها انفصلتو وانا لا زعلان لا عليج ولا على بهاء
لذلك انا اشوف عاصف انسب انسان ديري بالج علي واسمعي كلامه وربو علاوي
= شبيك هشام
- - ما بيه شي بس ضايج وتعبان
= حقك بس شتسوي شي وصار
- - وجد انا مو بس قتلت رامي لا انا قتلتج وقتلت امي وقتلت علاوي بس ما قتلت نفسي
= لا تحجي هالشكل الصار قضاء وقدر انت ما الك يد بيها
- - والصار بيج ؟
باوعت العاصف بعتب // شنو الصار بيه
- - زواجج من بهاء
= مو انت كلتها قسمه ما صارت
- - وانا متاكد عاصف راح يكون الج كل شي هو وعدني يكونلج اب واخ وزوج الله يسعدج
صرت ابچي = هشام عفيه حباب اني هوااي مشتاقتلك ومنتظرتك تطلع بخير وسلامه لا تخذلني
- - ان شاالله لاتبچيين
صرت اشهك حييل اتقرب مني عاصف اخذ مني التلفون :: الو هلا هشام
:: الله يسلمك انت شلونك
:: محتاج شي دير بالك على نفسك اي شي تحتاج دزلي خبر
:: انا راح احفظ هذا الرقم عدي عود تالي احچي ويا
::انت ما عليك يمي
:: بعيوني لا توصيني الله وياك
سد التلفون واتحمحم :: اححم روحي غسلي وجهج ونامي وارتاحي كافي بجي
= انت ...
:: ما الي خلك احجي اي شي روحي نامي
راح وطبك الباب اعرف بي ما نايم بس اني هواي لحييت خلي اروح الغرفتي دخلت للغرفه وكالعاده وين ياالله غفييت
كعدت الفجر صليت ورجعت نمت ما اعرف لويش احس بي ما نايم يجوز يخاف انهزم ويجوز هو هالشكل
بس اني ليش هالشكل اتصرف واحجي لويش اتبدلت اي اني دا احس بنفسي هواي تغيرت
صرت اشوف عاصف غيرما اشوفه قبل ما اعرف يجوز لان اني ويا بنفس الشقه او لان صار زوجي
او يمكن عاصف هو انطاني هاي القوه والجراه بس اني بمجرد ما يخزرني اخاف منه
=وج انتي صرتي تخزرينه ما اعرف لويش هالشكل جاي اتصرف يمكن اخاف من المستقبل او من الي شفته من بهاء
= والي عانيته ولا انسى خذلان ام احسان وابنها الي
= ام احسان الي امي وصتها عليه واكثر من مره اتكرر كلامها
= يعني اتصوري اذا ام احسان اتخلت عني وعمو عاصف ما موجود شكان ممكن يصير وياي
هزيت راسي = بس اني ما يصير هالشكل احچي ويا لازم احاول احسن اسلوبي
= لا خليني هالشكل مو مثل بهاء الي وثقت بي وتالي راواني الويل
= لاتنسيين هسه هو يجوز متحملني لان بس اني ويا موجودين لكن ما تدرين من نروح هناك شنو يطلع منه هناك
بالبيت الكبير وبيبي ورجاء
حكيت شعري = رجاء هي وعاصف بيناتهم شي واني لازم اعرفه
= اكيد شنو يكون ابيناتهم راح يربطه باابويه
= اي واني لازم ادفع ضريبة السوا اذا طلع كلامه صدك
= لج انتي ليش تضحكيين على نفسج شنو كلامه مو صدك انتي مخبله ممكن يكذب عليج شنو غايته
= لاتنسيين نفسج وجدان لا تنسيين انتي عايشه بفضل عاصف لاتنسيين شنو سوا ابوج لو انتي شنو هسه وقبل
احسنلج اسكتي واتحملي
تقريبا الساعه بالتسعه كعدت ما لكيته فتت للمطبخ خدرت چاي وطلعت صمون وجبن رحت دگييت الباب مره مرتين ما جاوب
حكييت شعري وحچييت =. شنو مات مثلا
ابتسمت ورديت = هاي افكارج شكد حقيره
فتت شفته نايم بقيت بالباب حاچيته
= عاصف عاصف
اتحرك اتثاوب = اگعد اتريك الساعه بالتسعه
فتح عيونه رحت قبله طلعت بيضتين وگليتهن وخليتهن بصحن هو اجه
:: صباح الخير
= صباح النور
صبيتله كوب چاي وخليت گدامه صحن البيض واني گدامي الجبن صرنا ناكل رفعت راسي وحاجيته
= هشام شعرفه
:: انا رحتله
= يمته
:: انا كل مواجهه اروحله
= شگتله عليه
:: على. شنو ؟
= ليش اني شعندي ...(دنكت واتحسرت )
سكتت هو رد :: من اخذج بهاء رحت خبرته گتله خطبها وهي ما وافقت بعدها غزوان خطبها هي رضت تكول ابن
عمتي وابن خالي وبيوم الخطبه نهى بهاء واخذها وتالي ما تراهمو
= وعليك
اتنفس وهو يحرك برجله :: عليه فهمته من خلصتي العده ما اريدج ترجعيين البهاء ومهدي يجبرج لو يزوجج الاخو سميره
رحت خطبتج منه وهو قبل
باوعتله =خطبتني ؟
هز راسه :: اي وداعتج
= قبل ما نعقد
:: اي
= تدري البارحه من حاچيته خفت هوااي
:: انتي ما مسويه شي غلط
= بس من حاجاني وگلي اقبلي بعاصف صدك خجلت منه
:: انا ما احب اسوي شي بالخفيه مثل الحراميه
وكف وگلي :: من تكملين جيبيلي چاي باستكان
بطريقه فتح الثلاجه وسدها واني صبيتله استكان جاي واخذته اله للصاله
:: رايده شي اجيبه من الاسواق
= لا بس اذا انت محتاج تشتري
:: انا شحتاح بس الجگاير وعدي منهن هواي
ورث جگاره وصار يسحب بالدخان وينفخه سالته = صدك نهاد رادت اتزوجني الاخو سميره
هز راسه سالته =. منين عرفت
:: من جابر
= معقوله
:: شنو المعقوله
=. يعني عمو. جابر ايكلك انو نهاد تريد اتزوجني الاخو زوجته يعني هو شبي وعمو جابر ما موافق
:: المعلومج اخو سميره خوش ولد انا اعرفه
=. لعد لويش عمو جابر گلك
:: لان جابر مثلي ما يحب احد يستغل الثاني ونهوده رادت تستغفل الجميع خافت خاف بهاء يرجعج لذلك سولفلي
وانا هم ضميتها بكلبي اجه وكتها وطلعتها
بيني وبين نفسي = لعد شكد ضام بگلبك ومنتظر الوقت المناسب
سالته = يعني انتو بعد ان ضربتو ناظم اخذتو سعاد وابنها
نفخ الدخان :: بعدج تردين تعرفين
= اي عفيه عمو خليني اعرف كل شي
:: اي وحده شريفه بمكان سعاد چانت ما تقبل تظل ويه واحد مثل ناظم
= وبنفس الوقت ردتو تطلكون امي من ابويه بس انت الي ما وافقت امي تنحرم من جهالها ما ردتها تبجي علينه
هز راسه. :: تؤ. مو هذا التردين تحچينه
= لا هو هذا
رفع راسه :: ولو انا متاكد انتي تقصدين غير شي بس انا راح اكلج لان قريت بعيونج الكلام انتي تقصدين
انا ما قبلت ابوج ايطلكها بنفس الوقت حتى ما بيت جدج ينفضحون والناس تصير تحجي وهم ما ردت گلبها ينكسر
على جهالها ردت ابوج ايطلكها بهدوء اخذته على صفحه وحجييت ويا وهو قبل
= شعجب ابويه. وافق على كلامك
:: بذيج اللحظه چنه كلنه متفاجئيين من الشفنا من ناظم وابوج جان يخاف على منصبه بالدوله فلذلك قبل بالامر الواقع
= ممكن اسال سوال
:: اتفضلي
= شكد كان عمرك بذاك الوقت
:: يمكن 18 او 19
= كنت بعدك زغير وهلكد تحبها الامي
اتنفس بعمق وغمض عيونه حاولت اغير الموضوع اصلا شلون اتجرا اسال هالشكل سوال حاچيته
= بعدين بابا رجعها لان خاف على اسمه بالقياده
رفع حاجبه :: هاا ؟
هزيت راسي = سمعتها الماما وهي تحچي الخوله تگول اجه رجعني من الباب وكللهم تنسوون عدكم بت
ولو ما اخاف على اسمي بالقياده كان طلگتها
هز راسه :: ذاك الوكت اتفاجانه من سمعنه بي مرجعها
= مي خالف اسالك بدون زعل
:: اسالي
= انت كنت تريد امي تتطلك
لملم حلكه وصفن وكانه يتذكر شي :: اي ردتها تتطلك تكدرين تكولين تمني طيش انانيه بس هي كملت حياتها وكل
ظني هو من رجعها يحبها وانهم عايشين سعداءالحد ما صارت حادثة اخوتج وامج فقدت وصارت تحجي
هزيت ايدي = اوووو ياحب هذا ابويه كان جلاد بامتياز انت تتصور كنا نسمي امي بااسمها انت تعزف كان ايكلنه
اتفلو عليها سبوها ويعلمنه شلون انسبها وكان يضحك وهي تتالم گدامه هسه عرفت السبب وليش ابويه هالشكل يتصرف
ويه امي السبب اخوها ناظم
هز راسه :: لا ناظم مو السبب ابوج هو هالشكل ترهميته سبق وكتلج ابوج صنع حياة خاصه بي يكره الناس كلها وحاقد
على الكل ما يحب بس نفسه ولو باقي لحد الان هم نفس الشي نفس المعاناة ونفس الضيم
اتحسرت =. بس اقلها امي باقيه واخوتي ما صاير بيهم الصار
:: قضاء الله وقدره وحكمته
= وسعاد لان ابويه ما طلك امي هالشكل حاقده
هز راسه
= انت كلت عوقته الناظم
:: اي
= مثل ما عوقت ابنه
نفخ الدخان من حلكه :: لا ناظم خليته يمشي ولو ابوج دعمه بالسياره وسگطه لكن ابنه خليته بس يباوع بعيونه
= ليش ؟
عكف وجهه :: شنو ليش ؟
= ليش سويت كل هذا
بقى ساكت ما جاوبني حاجيته =. انت منين عرفت
:: شعرفت ؟
= انت ليش متقصد اتذلني
:: اذلج ؟
هزيت راسي = اي تذلني
:: انتي تعبانه وانا رايح للغرفه
= طلعت من سجن وجبتني السجن
اتنفس :: ما اريد ااذيج
= اكثر من هاي الاذيه هم بعد اكو اذيه
حمحم. :: اوووو. هوااي امور من اتسمعينها تتمنين ما عارفتها
حركت ايدي = مثل شنو ؟
:: اگلج راسي يوجعني ورايد ارتاح
= تكذب
نتر بيه :: ولج عيب تگولين عليه جذاب تره انتي مو زغيره
= اسفه بس اني متاكده انت من تدخل للغرفه ما تنام ولا ترتاح تكضيها جگاير وتفكير
:: وهسه شتردين
= شوكت قتلته الغزوان
گعد. على مضض :: استغفر الله (نفخ ) من سمعتج بحجرة الماطور وعرفت الحقيقه وبوكتها جان كدامي حلين
لو اكتل غزوان واكتلج لو اكتل غزوان واسترج وقررت اسوي الشي الثاني لان انتي ما الج يد بيها ودريت
من يموت ما يشفي غليلي فقررت ما اكتله خلاص لا اخلي كل جسمه ميت بس يباوع بعيونه وما يگدر يسوي شي
طكيته طلقتين وهو وحظه المات للقير والجهنم والما مات بلكي شويه يشفي غليلي لذلك ضربته وبمسدس ابوج وحده
لان خاني وما احترم البيت الربا وتعب علي والثانيه لان اعتدى عليج وانتي عرضه
اتفاجآت سالته = اوگف گلت بمسدس ابويه ليش هو مو مسروق
:: لكيته
= عد سعاد مو والسوار ؟
بقى ساكت =. ليش ما تجاوبني
:: روحي للغرفه افتحي جرارة الكومدي اليم الجربايه اخذي المفاتيح وافتحي القاصه
= يا قاصه
:: تلگينها بالكنتور
رحت بدون تردد حتى ما كتله لويش وشنو السبب
اخذت المفاتيح ورحت للكنتور فتحت القاصه بس بالمفتاح بدون رقم سري كانت قاصه زغيره شفت بيها فلوس وبيها
المسدس وشفت علبه ويمها السوار اخذته صرت اباوعله واتفحصه عرفته هو اي هو هذا اخذته بايدي
= هاي من يمته عندك
:: من زمان
جاوبت بثقه وخاله عيني بعينه
= يعني انت الي سارق ( ضربت على كصتي ) انت الي سرقت الفلوس والسوار (هزيت راسي )
= اي اكيد انت اني شلون ما فكرت بهذا الشي من قبل
فتح عيونه ع الاخر :: انا حرامي
هزيت راسي واشر بايدي على عاصف = بلي انت اني عبالي السوار عد سعاد ما صدكت بيبي من گالت قابل قحط
ماكو سوار مثل سوارج واني الغبيه ما فكرت عبالي سعاد ماخذته وهماتين ما فكرت كل هاي الفلوس الي تصرفها
وتبذخها منين عبالي من شغلك ما كنت اتوقع انت هالشكل
هز ايده وجاوب بسخريه :: وهسه عرفتي انا الحرامي چان بدربج طلعتي مسدس ابوج ورميتيني بي
هزيت راسي = لا لويش ارميك اني راح اشتكي عليك
هز راسه :: الج حق وبدربج كولي اخذت بيت ابوج وسجلته بااسمي وهم گولي اناالي وشيت على بدر وانا يمكن
الوديت عصابه كتلت ابوج وانا الوديت غزوان عليج والخليت بهاء يعذبج
صار گلبي يدك من جاب اسم غزوان وبهاء رديت بعصبيه
= اني معليه بكل هذا الحجي ولا تجيب اشياء صارت غصب عني وتعايرني بيها
اتقرب مني اكثر وسالني ابرود :: انتي تحچيين صدك لو تتشاقيين
= احچي صدك وميهمني اكبر واحد الي يهمني الفلوس الي اخذتهن من بيتنا وهسه اني لكيت السوار
لزم ايدي حييل والشرار طالع من عيونه :: انتي تعرفين شنو مره اتكل الرجلها انت حرامي شنو يعني
شفت الغضب بعيونه =. اااخ اذيتني عوفني
لكن هو بي وما يضغط على ايدي بقوه وهو عاض شفته الجوه بغضب غركن عيوني بالدموع واني احاول
افك ايدي منه لكن هو لازمها وما يتحرك عبالك حايط وبس جاي يضغط عليها بقوه
جاوبته واني اتالم = عوفني اذيتني راح تكسرها
رد بعصبيه :: واكسر راسج واكص السانج ادب سزز
= اخخخ. عوفني ( صرت ابجي ) ايي عوفني
تستمر القصة أدناه
صرت اتنفس ودموعي نزلن على خدي عافني گعدت بالكاع وايدي حييل تاذيني
بقى ساكت وبس نفسه اسمعه واني ابجي واجر بخشمي اتقرب مني لزمها صار ايمرغ بيها واني ابجي باوعلي :: انا اعتذر
برطمت وجاوبته =. اني اكرهك
بقى ساكت رديت =. عوفها
:: خلي اشدها
بچييت حييل = عوفها اني اكرهك انت ...
بلع ريكه وهو لازمها :: كملي شرير (ابتسم ) مو اشتاقييت الهاي الكلمه خلي اشدها
عتيتها منه رغم توجعني =. ما اريد ولا اريد اشوفك واكرهك ولا بيوم راح اسامحك
رحت للغرفه وسديت بابها وصرت ابجي حييل وبصوت مسموع دخل وراي
:: كافي لا تبجيين
ما سمعته بقيت ابجي اتقرب مني راد يحضني عطت بي بعصبيه = ابعد عني لا تلمسني اكرهك من اشوفك
تلعب نفسي واتقزز
:: ما اجيسج بس لا تبجيين
احچي لان حييل توجعني = ايدي انت كسرتها الايدي
:: امشي اخذج للطبيب
هزيت راسي = ما اريد
:: شتردين
= الله ياخذك
هز راسه :: امشي بس اخذ الج اشعه
بقيت ابجي وكف مقابيلي :: شتردين
ما رديت بس ابچي ولازمه ايدي هو مد ايده اليه :: اتكسرين ايدي اكسريها
باوعتله وحجيت بعتب وعبره = انت شايف نفسك قوي
:: اعتذر انتي هم غلطتي بحقي روحي اشتكي عليه كليلهم بايك فلوس ابوي وجاي يصرف بيهن عليه
صرت ابجي هو اتقرب اكثر :: فلوس ابوج شكد خمسه وعشرين تلاثين ولج متر ابستاني ما يجيبن
ما بيهن ربع قيمة سيارتي
باوعتله باستغراب ولازمه ايدي باالم هو اتنفس بعمق :: كافي لا تبچيين ايدي النمدت عليج هسه اكسرها
رديت بعصبيه = اطلع ما اريد اشوفك انت ما تفرق عن ابويه وعن بهاء انتو من نفس الطينه
اتحرك من يمي كان اكو بالغرفه شباك يطل ع المنور رراح وكف يمه ما حسيت اله وهو ضارب ايده بشباك الغرفه
والجام ترس ايده صارت كلها دم من شفت هالشكل خفت اتقرب مني وحاجاني وهو يتنفس بقوه
:: هسه متعادلين بس انا اطلبج
استغربت من الي سوا هذا شدا يسوي وليش هالشكل ضرب ايده بقيت بالغرفه ما طلعت واني اشوف الشباك شلون
اتكسر بصراحه خفت اكثر دا احجي ويه نفسي = معقوله عاصف هالشكل شرير
بقيت امرغ بايدي ما عرفت هو وين اتمددت لمن ما انفتح الباب وهاي اول مره عاصف يفتح الباب بدون
ما يستاذن اشوف بايده السوار والعلبه الي كانت بالقاصه وايده الثانيه غاسلها بس بعد جاي يطلع منها دم
هواي بحيث دمر كاشي الغرفه شمر عليه السوار
:: هاج هذا سوار امج وهذا ( فتح العلبه وخلى الذهب ع الجربايه ) الذهب الج ذهب امي جان عد حبوبتج
وضمته الي من اتزوج انطي المرتي مرتي الي طلعتني حرامي وعايش بفلوس ابوها
طلع من الغرفه واني بقيت صافنه واباوع للذهب واسال بنفسي
=شنو قيمه السوار امام كل هذا الذهب شنو فلوس ابوي مقابل الي ايملكه شكد غبيه اني ليش هالشكل سويت
لو هو شلون يعتذر واني بس اعيط واغلط اووف مني ما اعرف ليش هالشكل احجي واتصرف
رغم وجع ايدي بس صرت اباوع للذهب گلاده طويله ام الليرات وسبحه وسلاح وملاوي اربعه وسوارات انواع
ومحابس هواي والتراجي ما اعرف شكد وكلايد زغار ونواعم كومه
حاجييت نفسي = شبيه اني هالشكل حجييت شنو عاصف وياخذ السوار والفلوس شكد غبيه اني
لمييت الذهب بالعلبه وطلعت وصلت يمه شفته جاي يخلي على ايده كلنس وباوعت للطبله مليانه. كلنس بي دم
كعدت بصفه = هاك هذا الذهب ما اريده
حاجاني بعبره مختنكه عبالك جان يبچي بدون ما يباوع :: روحي ودي للقاصه
= اتاذيك ايدك
بقى ساكت ما جاوبني سالته = ليش كسرت الشباك
:: حتى ترتاحين
= وين المعقم
:: ما عندي شلج بي
= اريد اعقم ايدك
:: عوفيها تولي
= جاي يوكع منها دم
:: هسه ينكطع
= امشي خلي نروح للطبيب يعقموها ويضمدوها
:: ما بيه شي
= كل ما احجي وياك ما بيك شي
ما جاوبني اشوفه ضاغط على ايده بكلنس هوااي اتقربت منه بتردد مديت ايدي وخرت ايده وشلت الكلنس مجرد ما شفت
الجرح جسمي كزبر بلعت ريكي حچييت بخوف = هذا الجرح عميق لازم نروح للمستشفى ياالله فوت غير ملابسك
وخلي نروح
رد عليه بقهر :: گتلج ما اروح
= مو قبل شويه كتلي خلي نروح للطبيب
:: وانتي ما قبلتي
= وهسه اني اكلك خلي نروح الخاطري
غمض عيونه واتنفس وكف وراح للغرفه :: فوتي البسي
رحت بسرعه لبست عباتي الاسلاميه وخليت الشال على راسي وطلعت شفته لابس دشداشه بيضه وكاف ردانه
فتح باب الشقه طلعت وهو سد الباب وقفله وصى الحارس الي كان اباب العماره يدير باله ركب بالسياره واني
ركبت يمه وتمينه ساكتين الى ان وصلنه للمستشفى اخذ باص ودخل ع الطبيب ردت ادخل ويا لكن هو عض شفته
ورفع حاجبه يعني ابقي
هو دخل وبعد فتره طلع وكفت راح يمشي واني ويا سالته = شنو
:: راح يخيطوها
راح للمضمد واني دخلت ويا هو كلي :: ابقي بره
بقيت عشر دقايق او اكثر طلع سالني :: ايدج توجعج
= شويه
:: يحتاج اتدخلين ع الطبيب
هزيت راسي ==خلي نرجع
صرنا نمشي من دخلنه بالسياره :: ايدج توجعج ليش ما دخلتي للطبيب اقلها تاخذيلها اشعه
= لو تريد كان دخلتني وياك
:: شتكليله لوه ايدي لان اتهمته بايك قاصة اهلي
= ليش انت شكتله للطبيب
:: صرت عصبي وكسرت الشباك
= اي المفروض اتكله كسرت الشباك بعد ان كسرت ايدها
ركبنه بالسياره درت وجهي عنه وهو يدخن احجي ويه نفسي =. شنو الي سوا حب لو يريد يراويني رجولته
باوعت اله سالته = انت شتريد مني
نفخ الدخان :: انا الاريد منج لو انتي
= خلص اعتبرني ما سالت ولا انت وعدت
نفخ بقوه :: منيلج كل هاي القوه
رديت باستهزاء = ياقوه لو تسمعك نهاد تكول صلافه
:: ما اقصد
= اعرف قصدك بس منيلي من المريت بي انت تعرف شنو واحد كاعد بين ناس يسولفون ويضحكون بس هو محد بحاله
:: انا ما عفتج ولا دقيقه
نزلن دموعي = انت الي عايفني ولا بحالي
:: ليش تبجيين
مسحت خشمي = هو اني شعندي غير البجي تكدر تكول البجي صديقي مثل ما الجكاره صديقتك
طفاها وسالني :: ما تردين ترحين المكان
= وين يعني
:: بكيفج
هزيت راسي = لا
:: تستحين لان لابس دشداشه
= تره حتى اني ما مبدله
::جا ليش ؟
= لان مبينين متعاركين انت ايدك مضمديها واني ايدي ملفوفه
ابتسم :: خو اليسالنه نكول حادث
بقيت ساكته دار عليه :: شتردين كولي
باوعتله بدون ما ارد واني اسحب بخشمي
وكف ودك هورن اجا ولد كله :: سويلنه كوكتيل عصير
:: هذا العصير مالته خرافي
جابه قدملي واحد واخذ الثاني اله وصرنا نشرب فعلا العصير طيب
من كمل حمحم وسالني :: هسه ما نروح ناخذ اشعه الايدج
هزيت راسي = لا
:: اتاذيج
= بلي
:: وليش كل هذا العناد ؟
= اني هماتين جاي اعاقب نفسي
نفخ حييل :: وين تردين نروح
= للبيت
ساق ونزل يم صيدليه غاب شويه ورجع انطاني علاكه :: هاج هذا باندج ودهن وكبسول مسكن الايدج
وصلنه للشقه دخلنه كعد وانا اريد اروح للغرفه گلي
:: تعاي خلي اشد ايدج
=. اني حغسلها وبعدين اشدها
:: روحي اغسليها وتعاي ادهنها الج
... ... رحت غسلتها ونشفتها اجيت اخذ العلاگه شفته لازم العصاره بايده باوعلي گعدت ووصار يمرغ بايدي
وهو ساكت بعدها لف الباندج حاچاني وراسه سانده ع القنفه :: حاولي لا تنامين عليها
هزيت راسي وجاوبته = روح الغرفتك غير ملابسك ونام
:: لا انتي روحي نامي بيها
= وليش ؟
:: على ما اجيب ابو الجام يشدلي جامه للشباج
= لا عادي ابقى بيها
عض شفته وگال :: اتمنى مره وحده اكلج على شي وتكليلي صار حاضر
لملمت حلگي = وقبل ؟
:: قبل شنو ؟
= من كنت تطلب مني مو راسا انفذ
:: وهسه كبرتي واتمردتي لو لان اتزوجنا (اتنفس بعمق بدون ما يباوعلي ) كدام الناس
ما رديت هو كلي :: روحي للغرفه
= كتلك ما اروح
:: براحتج
وگف وراح صوب غرفتي فتحها اني رحت ورا = وين وين جاي لهنا
شفته ينزع بدشداشته وصار ينكت بالشرشف وبعدها كعد ع الجربايه :: انا راح انام اهنا وانتي بكيفج وين ما تردين
تنامين نامي
= اهنا انام ما عليه شي
:: ادري بس انا ما اقبل تنامين اهنا روحي نامي اريد ارتاح
= وين
اتقرب مني :: بكيفج حتى لو ...حتى لو بالصاله
طلعت وحاجاني :: من تشتهين شي كليلي حتى اوصي الحارس
= وانت هم لازم تاكل حتى تعوض الدم الي وكع منك
:: من تشتهين اوصيلج واكل وياج
رجعت وگفت اباب الغرفه = زين لعد خلي اجي انظف الكزاز
:: عوفي روحي ارتاحي
= ويمته تسولفلي ؟
:: شسولف ؟
باوعتله بعتب هو رد بعتب :: بعد ما اسولف اي شي اخاف اطلع جذاب ويجوز اطلع قاتل
طلعت بدون ما اجاوبه رديت شفته متمدد على فراشي سالته
= ما تخاف اطلع وبعد ما تلگاني
رد بدون اهتمام :: وين ترحين الداليا
= يجوز اي ويجوز لا
هز راسه :: ما اتصور
= لويش ؟
كعد ع الجربايه :: لان انا الاعرفح انتي عدج عزة تفس ما تطخيين راس وترجعين الداليا وادري بيج ما
عدج مكان ثاني ترحيله
رجع نام على صفحته واني رحت الغرفته دخلت ما باوعت كل الي سويته نزعت العبايه واتمددت بالتراك الماروني
الستن النص ابو الدگم بقيت اتكلب وافكار هواي تجيني اسال نفسي واجاوب بنفس الوقت الى ان نمت ما اعرف
بيش الساعه صحيت على اصبع يلعب بوجهي فتحت عيوني شفته عاصف
فزيت واني الم بقيميصي من يم صدري كلي :: ندهتج وانتي غافيه عاد صحيتج ياالله اكعدي تريگي
راح قبلي بلعت ريكي اتوضييت وصليت قضا ورحت للمطبخ شفته گاعد ومخلي الجاي والكيمر سالته
= اسويلك بيض
هز راسه كمت گليتله بيض وخليته بصحن وصرنا ناكل واحنه ساكتين كملنه راح للصاله واني غسلت الصحون
من اريد اطلع شفته وراي گلي :: فوتي للغرفه
بهاي اللحظه جمدت بمكاني هذا شيريد مني باوعتله هو رد
:: فوتي ادخلي للغرفه وسدي عليج الباب راح يجي العامل يسوي الشباج
دخلت الغرفته وانا اضحك على نفسي واسمع ايكله :: فوت عمي حياك الله
اتمددت ع الچربايه تقريبا ساعه ودك الباب كعدت دكه مره ثانيه وفتحه گلي :: راحو
هو رجع للصاله واني فتت للغرفه ابالي انظفها لگيت شايلين الكزاز المكسور وخالين جديد وحتى الغرفه نظيفه
رجعت شفته گاعد بالصاله ويباوع للنقال رحت للمطبخ شفت صينيه بيها كوبين جاي وصحن بي بقايا گيمر
غسلتهن وساله = هاي انت خليت للعمال ريوك
:: اي
گعدت وقررت اساله بدون مقدمات = شلون عرفت السوار عد سعاد
هو ما جاوبني بقى عينه بالنقال رديت = منو كلك وشلون جبته
ما جاوبني وكف وهو يحجي بالتلفون :: هلا يابه
:: الله يسلمج انتي شلونج
:: زين الحمد لله اسال عنكم
:: ان شاالله
:: الله يسلمج
:: بعد الصار بسرعه ما لحكنه كل شي نسوي بس ان شاالله اعوضكم
:: يوصل انتي هم سلمينه
صار يسمع بااهتمام ويلم بحلكه جاوب :: ما ترهم انا فهمتها ما ترهم
:: حتى لو هي تستاهل الاحسن
:: ان شاالله
:: الله وياج يوصل
رجع كعد سالته = منو هاي ؟
ما جاوبني = رقيه مو
رد ابرود ما يخلو من الامر. :: اسمها لاتجيبينه على السانج
رفعت حواجبي = ها الهلدرجه خايف على مشاعرها
هز راسه :: اي
= وليش ما اتزوجتها ؟
:: وبعد
= شنو
:: احجي بعد شعدج
ما جاوبته كعدت احرك برجلي هو رد :: هاي ام غيث مرت عمج رحيم سامعه وخابرتني اتبارك
= على شنو ؟
:: على الي احنه بي هسه
= وليش من سالتك رقيه هاي گتلي اسمها لاتجيبينه
:: البنيه مو يمنه وانا ما عدي شي وياها
= ها
:: شنو اخاف منج مثلا واضم عليج
= بس هي كومه مهتمه بيك
:: منو يگول ؟
= اني شفتها
حك خشمه باوعتله =. اشو ساكت
:: شتردين اگول
= ليش احس هاي الشقه انت دائما تجي بيها
:: احساسج بمحله
= بس مو ابحدك
غمض عيونه :: شتقصدين
= غرفتي
رفع عينه جاوبته = اقصد الغرفه الي انام بيها مو مال واحد عزابي
لملم حلگه واشوفابتسامه :: وانتي شمدريح مو غرفة عزابي
= جاوبتك مجرد احساس
وكف يسالني :: راح اروح للاسواق تردين شي اجيبلج وياي
هزيت راسي راح راد يفتح الباب رجع سالني :: تطلعين نتسوك
هزيت راسي بالنفي هو طلع بدون ما يحجي اتمددت ع القنفه وبيدي الريمونت والضوجه تقرا الف مره ادور على
صفحتي مره ادور التلفزيون صدك ضايجه هاي شبيه اني ليش هالشكل
حسيت انفتح الباب كعدت شفته هو والجكاره بحلكه وجايب علاكتين دخلهن للمطبخ طلع بيده بطل ماي
= ما اتاخرت
:: ما عرفت شجيب رحت اشتريت جكاير وجبت عصائر وكرزات
هزيت راسي سالني :: رايده شي اجيبه
= لا اصلا كل شي موجود
:: شتردين تتغدين
= ما اشتهي
:: ليش ؟
= مو قبل شويه اتريكت
:: من تجوعين كليلي
= وانت ؟
:: انا شبيه
= تبقى ما تتغدا
:: هم ما اشتهي
التقت عيونه هو نفخ الدخان = بس انت جاي هواي اتدخن ولازم تاكل
:: من اجوع اكل اي شي شلونها ايدج
= زينه ع العلاج وانت
:: انا شنو ؟
= ايدك شلونها
:: زينه عكب باجر اشيل الخياط
= يعني ما اتاذيك
:: شويه بس ضايج لان ما اگدر اغسلها
= لويش ؟
:: الطبيب كال ابعدها من الماي
= راح ايظل اثر مو
:: عادي
= اسفه
:: على شنو
= على الاثر الي حيظل بايدك
ششعل جكاره ثانيه وحاجاني :: مرات الجرح الي بالجسد ما اياذي بكد الجرح الي بالروح
عرفت يقصد كلامي من اتهمته هو بايك قاصة اهلي اتنفست بعمق = اني اسفه
رفع راسه :: مو توج اتاسفتي
= اني ما اعرف شنو صار بيه من شفت السوار والمسدس وبعدين انت السبب
باوعلي هزيت راسي :: اي انت مرجع السوار وما گتلي
بقى ساكت رديت == عمو يمته رجعته
:: شنو هو ؟
= السوار
:: يا سوار ؟
= سواري اقصد السوار الي خلته الي ماما
هز راسه :: لا هذا انا اشتريته
= لا عمو انت كلت انت رجعته
:: مي خالف اتخليني افوت للغرفه
= ليش ؟
:: ليش يعني اريد ارتاح
وكف وانا وكفت وحاجيته = بعدك زعلان عليه
هز ايده واتنفس :: والله ما ادري ياهو الزعلان ع الثاني
انت زعلان لان اني نعتك با...
:: كملي حرامي ليش سكتي
= معناتها عمو بعدك زعلان
راح للغرفه وسد الباب بقوه واني هماتين رحت للغرفه مالتي كعدت واني احجي = شبي ليش زعل مو اعتذرت اله
= مو كافي الله ستر ما كسر ايدي
= لاتنسيين انتي كلتي عنه حرامي
= اي احد بمكاني هالشكل يظن
= لج انتي ناسيه هناك بالبستان شلون يتصرف وشلون الكل يحترمه
رفعت اكتافي = ما اعرف يمكن اني فعلا صلفه
= لا شنو صلفه اني شمسويه ( هزيت راسي ) مو هذا موضوعنه ليش هسه زعل اني اعتذرت قابل ابوس ايده
اتذكرت من كنت قبل احضنه وابوسه هزيت راسي = قبل كان عمو
صرت اعض بشفايفي عضات سريعه واحرك برجلي بعدها كلت وكانما اتذكرت شي
= اها اكيد زعل لان اسمي عمو
= اني لازم اعرف كل شي ما اكدر اعيش ويا واني كل شي حواليه مجهول مبهم
حاولت انام ما گدرت =. هاي ام غيث تريده البت اخوها اي مبين من كلامه ما ترهم وانا فهمتها على شنو
اكيد سالته لويش ما اتزوجت رقيه
= لا ما معقوله ام غيث هالشكل تحجي ويا
= معقوله ونص اتذكر من اتوفت بيبي هديه الله يرحمها شلون اخذتها وراحت تتسوك واله عاصف ايوصلهن
وبعدين لمن اتكل الامها ماما هذا عاصف الي حچيتلج عنه
=. واني شعليه لويش هلگد مهتمه
رفعت اكتافي =. ما مهتمه اصلا هو ما يعنيلي شي
شكرا لزيارتكم عالم روايات سكيرهوم
