رواية نارا حيدره الفصل الثامن والأربعون
يَ شوگيّ ورَجوتي ودِنيتي ولونيّ
وعَذابي ولَهفِتي وشَكوّاي وضِنوني
يَخيّ عَونَك عليه وبيّك خَيعوني.
⭐⭐⭐⭐⭐
نايمة علئ الچربايه ورافعه رجلية علئ الحايط وشابكتهن بأيدية، المحتركات
و اتسائل نفسي معقولة حركني عمداً ،!!
معقولة يريد ينتقم مني ؟
اني ما مأذيته بشيء لعد ليش حاول يكتلني ؟،
يدعي هو يحبني ...بس !!
تصرفاته عكسة تماماً ..
ماكو اي حب بعيونه، ولا بأفعالة ...
مجرد كلام ينطقة
ويگلي ،،، احبچ
دخت شنو معنئ تصرفات ...حيدرة ؟
جريت نفس، يا الله
شكلي رجعت لنقطة الصفر
ماداعرف حيدرة منو هو ....؟!!
...قبل يومين ...
اصرخ و النار تلشعني ورجلية يوصلها النار
ونهاية الفستان احترك
ركض بسرعه اليه ..
..راد يحضني ويطفيني احتركن ايديه حتار شيسوي
نزع جاكيته صار ينكته بالنار ...
لحضات قليله ..
انغمئ عليه ..
من شفت روحي داتحترك
وحيدرة يحاول يطفيني ..
وكعدت بالمستشفئ ورجلية ملفوفه
داتذكر الصار و احاول انتج شيء من التفكير ...
،،، انقطعت سلسلة افكاري بخول سالار .
بحركة سريعه تچقلبت ونزلت من الجرباية
سالار : الله بالخير
- هاا
- الشاش بقئ عندج ؟
- اي
- لعد انطينياه الف بي ايدين حيدرة المحتركات
يريد ينام ومايكدر، وهم يأذنه
- الدكتور مو كال فد شهر ويطيبن
- غير كلناله دير بالك لاتلوحك مي مايصير ولازم مدري شنو
وهسه ايديه راحن حيل الجلد فحم
- اوف لو ما ايديه الطفاني بيهن، جان هسه اني ميته
- حيل تغيرت نضرتب اتجاه حيدرة عبالي جذاب بس طلع صدك يحبج وشمر روحه للموت علمود ينقذج ومااهتم اذا يتأذئ لو لا
- اي صحيح هذا الشيء
بس !!
سالار عندي اسئلة شاغله بالي حيل، وخاصتا بعد الشيء الصار
- گولي شنو ؟
- بالمستشفئ من جبتوني علمود رجلية الاحتركن
سمعت حسن يحجي ويا حيدرة
بالردهه
عبالهم نايمة ..مايدرون سمعتهم
- احجي شنو كالو ؟
- حسن يكول لحيدرة ليش حركت ناردين ليش هيج سويت،
- شنووو !!
- والله ..بقو يحجون من خلال كلامهم عرفت ان حيدرة مشغل النار
ومنتظرني اوكف بالحديقة واحترك
- شنوو ولج شلون حيدرة يحركج مامعقولة
لان بوقتها هو جان واكف يم رائد و اصدقائة
وركضلج من بعيد ...ومستحيل هو شغل النار لان هو نقدج
وحاول بكلشي حتئ يطفيج
- اي مو داكولك اني هذا المدوخني
وصارلي يومين اصفن وافكر بكلامهم
..مو معقولة حيدرة يسوي هيج بيه
اصلاً مستحييل
- لاا مو مستحيل ..مسويها قبل .
- شنووو
- هيج ماكو شيء
- لاا احجي سالار احجي
صدك عندي سؤال لخ ..وهو يتعلق بيوم عرسنه
والطلقه الضربني بيها ..وانشليت
- سدي هلموضوع رحمة لوالديج
- لا، مااسدة
سالار صح حيدرة ضربني عمداً ؟
يعني جان متقصد ؟ يصاوبني بيوم عرسنه
- لاا
- لعد ؟
- مو وقتها، يجي يوم المناسب وتعرفين
هسه انطيني الشاش خليني اروح ..
سكتت، ماردت الح عليه
فتحت الميز انطيته الشاش
طلع ورحت ورا .. وكفت بباب غرفه حيدرة
شافني و ضحك، :- هاا فرحانة احتركن ايدية
كلتلة :- غير انت حركتني عمداً
سالار :- ناااردين مو وقتجج
خزرني، :- ما حركتج انا فاااهمة ماحركتج لاتتهميني
ادري بيج فرحانة لان اتاذيت وانتي لا،
- هاي شبيك علئ شنو افرح ؟
- اطلعي بررره يلااا اطلعي
- حيدرا
صاح :- اطلعييي لافرغ المسدس براسججج
داحجي ودخل حسن،
تخبل من شاف حيدرة فقد اعصابه
بسرعه جرني من ايديه وطلعني ..
ضليت متفاجئة ..شبيه وليش بسرعه تغير
اول ماشافني ...ضحك
وهسه ليش ....عصب عليه
مو طبيعي ابــد ،
اجا وراي حسن ..وسالار طلع من غرفته،
كال هدء ونام ..
- ماشي،
حسن :- ناردين لاتعصبينه لو تضوجينه
- ما مسويتله شيء تره
- اي تغاضي عن تصرفاته معليج بي اذا تشوفينه معصب
لاتحجين وياا الا من يهدء
- خوش
- چؤؤ ناردين تعرفينه يحبج
- لاا مايحبني..جذاب اعرفه
جرني وكعدني علئ الدرج ..
- ولج يحبچ والله
- ما يحبني هو چذااااب
- ولج ماتدرين شلون دائما يفكر بيج ويحبج حيل، حتئ بالشغل اسئلي رائد كل شوي ويجيب طاريچ لو يخلي صورتج كباله يلا يشتغل والله متخبل بيج ويحبج ويعشكج
بس مشكلته مايعرف يعبر
عن مشاعرة دائما ..
مو بس بالحب ..
هو متناقض ...بكلشي
لايعرف يبرر ولا يعترف بشيء ..
- لا تقنعني حسن، لان ماراح اقتنع
اصلا حيدرة مايعرف الحب شنو
- ولج جربي تشوفي خلفية موبايله ...صورتج
وباسورد موبايله وشغله ...اسمج
و صورتج ياخدها وياه وين مايروح مخليها بمحفضته
- تريد اصدگ ؟
و شنو يعني اذا سوا هيچ
يعني هو يحبني!
- شبيچ نااارديـن!!
- مابيه شيء حسن بس تعبت منه!!
- ولج شتعبتي، يعني صارلچ
وياا سنتين باقيه علئ رغم المشاكل والمصايب الصارت ..
وهسه من كالج احبچ ويريدج وياا ...تتركي ؟؟
- ما تركته
- ناردين حيدرة محتاجج حيل ..
خاصتاً بهذه الفترة .. ابقي يمه
- علئ اي اساس ابقى يمه ؟ هو مطلگني
- هسه دروحي بـ أعتبار
انتي بنت عمه واطمني عليه ..
- غير گلت هو نايم
- لا ما نام .. روحي يلاا
- خاف سالار ما يقبل ؟
- لاا انه وسالار طالعين للمركز
نجي وره الـ 12 بليل
..راح والتفتت ورا
اطكطك اصابيعي
صليت علئ محمد
ودخلت لغرفتـة ..
متمدد بفراشه ..
كعدت بعيدة عنه بطرف الچرباية
- نايم لو كاعد
- نايم
أبتسمت .. سكتت
- ليش اجيتي شنو تردين ؟
- إذا تريد اطلع گول، حتئ اروح
- لا انچبي ابقي .. نارديـن
- هـا؟
- انـا احبـچ
سكتت ..
- احبچ ناري
- خـوش
- ليش متغيرة وما تردين تحچين وياي ؟
- لا ما متغيرة بس انت المتغير حيـدرة
عندي اهواي اسئلة ..
و اجوبتها عندك بس انتَ ..
- شششش اجلي كلشي
راسي يأذيني و الكائنات !!
مو بحمل اي سؤال!..
- لعد يمته تجاوبني
- بالوقت المناسب الي اكون بي مرتاح
- ماااشي
- وهسه عادي تجين
- وين ؟
- حضن اسلامي
- شنو
جرني من ايدي وسحبني لصدرة ..
- چؤؤ حيدرة وخرر خليني اروح لا أحد يجي
- رايدها من الله وكون سالار يجي
- علمود يگتلني فرد نوب
- شحده حتئ اموته وراچ
- انت ما منتبه تحچي كله
بالقتل وموت وهيچ ..
ضحك :
- كتلچ القتل لعبتي وشيء طبيعي
- حيـدرا !!
-ناري اسكتي بس دقايق
ضل يتنفس شعري وراسه برگبتي..
- يناري .. تدرين شكد تعبان ؟
وهموم الدنيا متراكمة كلها عليه!
ماضل عندي اي طاقة لـ تحمل ..
ابد، مابية حيـل ..
تعـبان وعـلي ..
- احچيلي شنو بيك افتحلي گلبك
وسولفلي منين تعبان ..
- شسولف و انتي سالفتي
ضحكت :- صاير شاعر آخر وكت
- شاعريچ بوية دسكتي ..
غير حفظت كم كلمة من رائد
- صدك عود
- أي والله مو گتلچ أنا فقير أنا حباب
- هههههههه أي صح كلش فقير
- وعلي ما اعرف اتغزل
لو ارد عليچ بكلام حلو ..
علئ كولتچ فالح بس
بالقتل والمسدسات
ضحكت ..
- قبل من گلت لرائد أنا احبچ،
علمني شلون ارد عليها و اتغازل بيها
..اتصوري بقئ فوگ الساعتين يعلم بيه
وبعد هو خبره تعرفين بي شمسوي
بأختچ وموگعها بحبه ..
- هههههه أكيد رائد مكيف ..
امليها رومانسيات مو مثلك
رفعلي حاجبة ..
- هاا هاا تره شسمه ما گلت شيء
علئ نياتي حچيت وداعتك
- ام جفصات، شلون وياا لسانچ
- حـيدرا شسمه يلا عفية خليني اروح
انت مو تگول انت حباب و فقير
لعد خليني اروح ..
باسني برگبتي و بعدني عنه ..
ضليت اباوعله صفح ..وهو يضحك عالي
- هاي شسويت!!
- صارلي هواي ما ضايگ
- ياا حيدرا!! والله اذا عدتهاا
- اي كملي شسوين!!
- ها .. شسمه ؟
ضل يضحك عالي ..
و اني اباوعله صفح..
دائما اجفص ..
- ناردينتي
- خيرر ؟
- گومي بدلي علئ السريع ..نطلع
- صدگ وين ؟
- معليچ .. المهم روحي بدلي
- هسه نطلع ؟
- چاا باچر، شبيچ
- و سالار ؟
- شبي هذا نعلان
هسه اخابرة معليچ بي بس بدلي نطلع
- خـوش
طلعت و گلت لنبراس، رايحه وياا حيدرة
ضحكت وگالت :
- روحي واتأخرو علئ راحتكم
لبست فستان لحتئ البس
وياا حذاء فلات وما يأذني رجلية ..
ولو ما احس بـ اي الم ولا متوجعه..
لفيت شعري كعكه .. ونزلت جوه
شافني و ابتسم، مد ايده لزمتها قوي
- ايدي بيدچ ما اتركها للأبد
سكتت ..
طلعنه من البيت ..
استغربت من شفت اثنين واكفين
بالباب ..سئلته ..
- منو هذولي ؟
- ما اگدر اعوف البنات وحدهن وحساني ورويد وسالار طالعين ..
فاا الحراس تحرس البيت
كلشي يصير أمن عليهم افضل ..
- هاا ماشي احسن
ركبت السيارة .. وحركها
- شتحبين اشغل الچ ؟
ضحكت ..
- احب اسمع ساجدة عبيد
- هههههههههه هاي لو مااريد اركص تخليني اطكك اصبع
- احسن من بقيه اذا تسمعهم
يصير بيك جفاف ..
ضحك وكال :- ليش بوية جفاف عندج انا موجود حاضر صبح وليل بالخدمة
- ههههه لاا ما اقصد هيج بس شسمه
- دسكتي ام الشسمه
شغل اغنية لشيرين ونصاها ..
طول الطريق نسمعها
تالي
صف السيارة گبال المطعم ..
- نزلي يلا
- لا ما أريد ما جوعانة ليش جبتني لمطعم
- نزلي بسرعة نتعشه ونطلع
- چؤؤ مااشي .
نزلت ولزم ايدي ودخلنه ..
گعدنه بالاخير ..
منعزل لوحدنه ..
بقينه واحد صافن بالاخ ..
و ساكتين ..
آني اطكطك بأصابيعي ..
وهو يطكطك علئ الطبلة ..
- ليش گلبچ يدگ هيج بهالشكل
- ليش عيونك تلـمع
- لـيش عيونچ تلمع
- لـيش متعرف تحچي
- لـيش خدودچ حُـمر
- لـيش تُفرك بيدك ومتوتر ؟
- شنو هالجمال الگاعد يمي
- شنو هالابتسامة ؟
- ليش عيونچ تحچي بدل شفايفچ ؟
- ليش احس كلبك رح يطلع ؟
- لأن كلبي ميت بيچ!
- و بعد ؟
- ﭑنتي أمرأةٌ لا تَتَكَرر ..
ابتسمت ... غمزلي و َ رفع حاجبه
- كافي حيـدرا
- ما متعود عليچ تخجلين
- ما خجـلت
- ممم
صاح للمـوضف ..
جابلنه القائمة .. الاكـل
ماطلبت شيء ..
- صدگ ما تشتهين ؟
- أي والله
- تدرين انا هسه شنو مشتهي ؟
- شنو مشتهي ؟
- سمچ مسگوف .....اويلي يابه
ضحكت :
- اطلب لعد، اذا مشتهي
- لا خلي على باچر، اگول لرائد
يشوي بالحديقـة ..
- كيفك .
گام و اخذ القائمة، دقائق و اجاا بيده ماعون بيهن همبرگر حجم كبير .. اثنين
- جبتلچ بالدجاج ادري بيچ ما تحبين اللحم
- حلوو تعرفني شحب
- چاا شعبالچ، حبيبتي
صفنت بوجهه بقت كلمة
( حبيبتي) ترن بأذني ..
دمعت عيوني لا ارادياً ..
لزم ايدي .. و َ باوعلي
- شبيچ يا بعد گلبي ؟
درت وجهي مسحت دمعتي
وجريت نفس ..
- مابيه شيء
بـَس !! ..حيـدرا
- عيونه لحيدرة
- تدري كلمة حبيبتي حلوة منك إلية؟
ماتصور شگد حلوة من تنطقها إليه ..
ابتسم و گال بهمس:
- حبيـبتي
ضحكت بفـرحَ :
- هاي اهواي عليه حيـدرا
مامتعودة عليك علئ هذا الكلام
- چاا اتعودي
سكتت ..مااعرف شحچي ..
قدملي الصحن اخذت همبركر ..
جابلي ببسي ..
اكلت شوي وهو كمل مالتي واكل اثنين
تالي دفع الحساب و طلعنه ..
رجعنه للسيارة .. بقئ يفتر بالمناطـق
- بعد ما نرجع لبغداد
- لا بس بوقت الشغل
- يعني راح نستقر اهنا بأربيل
- أي حبيبتي
- مشتاقة اهواي لـ هوئ بغداد .
- ان شاءالله نزورها ..
نبقئ كم يوم و نرجع..
رايد اروح للأمام الجوادين ..
- سلام الله عليه ..
حيل مشتاقة للزيارة طاگ گلبي..
مشتاقة أزور قبر بابا واحضنه ..
دمعت عيوني وبچيت
من ذكرت ابوي ..
كل ما أتذكر انسئ ان هو مات
وصارله 4 سنوات ..
وگف السيارة وتقرب مني ..
مسح دموعي ..
- لا تبچين گلبي اعتبري
أنا ابوچ لا تبچين ناري
سكتت و هزيت راسي " أي"
- مو تگولين عليه شايب اعتبريني
ابوچ وانتي بنتي ..
ابتسمت :
- چنت احلم بهذا الشيء و اتمناه
- وهسه شنو ؟
- هسه انت دا تحچيي
كرصني من خدي ..
جر ايدي و باسها ..
- احبــچ ولچ
- شكراً هههه
ضحك وباوع علئ الطريق ..
گال .. انزلي
- ويـن ؟
- البيت قريب فد شارعين هيچ ونوصل
انزلي نتمشئ ..
لحد مانوصل للبيت .. مشي
- ياا ياشارعين البيت بعيد حيل
يمكن نص ساعة يلا نوصل..إذا مشي
- أي عادي بوية ..
اكو احلئ من الـمشي و بليـل
وبس أنـا و ويـاج
و الجـو بـارد ...والقمـر فوگانـا ؟
- خوش حمستني هههه اقتنعت
لعد انزل ليش لا ..
نزلنه و قفل سيارته ..
عدل جاكيتة وگف يمي شبگ ايدي
و بدينه نمشي ..
الشارع فارغ ولا شخص طالع..
و بيوت قليله و اهواي شجر و نخلات
المنطقة حلوة ..
ماتصورت مناطق اربيل هيچ حلوة
شوارع نضيفه ..
و اهواي گلوبات مشتغلة ..
خليت ايديه بجيب جاگيت حيـدرة
- ها ناري باردة عليـچ ؟
- لا بس ايدية مدري شبيهن صارن حمر
- وين البرودة ولچ
يمكن لان اتغير عليچ الجو والمكان
- أي يمكن ..
بس عادي ..
نـارك ادفي ايديهـا بـ برودك
- نـاراحيـدرة بـعد ..
- ايي
ضلينه نمشي علئ الرصيف
وهو رافع راسة يباوع للسما ..
تالي گال لي:
- نـاري
- هاا عـيوني
- من چنت صغير عبالي القمر يمشي وياي
- أي ؟
- وهسه هو واگف يمي
أبتسمت .. وهو ضحك قوي
- گمري انتي ..گمر حيدرة
- شلون گمرك و نارك بنفس الوقت؟
- عادي بوية ..
أنا وياچ ..
"تلاگينه ثلچ وياا النار واحد مات بالثاني"
- اوي هاي شنو حيـدرا مغيرينك ؟
حيل ما دا اعرفنك ..
- الله يستر عليه رائد هههههههههه لو ما هو چان شبعتچ فشار علئ شكل غزل
- شلون يعني
- يعني مثلاً ك*** تخبلين
- عزه بعينك!!
- واكو الاقوئ منه اگوله ؟
- ياا عفية لسان صدگ عود اسكت اسكت
- سمعني اكلچ ..احبچ حقيرة وضل يغم بكصته يگلي تربيتي راحت ..
- هههههههههههه
- ناردين
- ها حدحد
- حدحد شني
- شسمه هذا دلع ..
- موحلو .. شوهتي اسمي!
- لعد بس انت ادلعني نارك
- شوفي أنا اغار من اسمچ
- شنـو !
- والله اغار ..
اسمچ اسمه ( ناردين )
و اني اغار من ( دين) منو هذا ويكمل نص اسمچ
فاا مزجت اسمي وياا بداية اسمچ
وصار ( نـاراحيدرة )
احلئ مووو ؟ .. شرايچ ؟
- لا والله كيفك هو ..تجزء اسمي وتمزج
- اي چاا إذا مو بكيفي كيف منو ؟
- خوش ..لعد اني هم اغار من اسمك
- من شنو تغارين ؟
- اسمك ( حيدرة )
و اني اغار من (ة) و اعتبرها تاء تأنيث
ضحك :- و التاء التأنيث لا محل لها من الاعراب
- حيـدرا
- يابعـد روحة و گلبـه
حچه و هو يضحك :
- تدرين أريد اسوي فد شيء جريء
أريدة يبقئ ذكره بحيث ما تنسي..
- و شنو هـو ؟
- اصبري ..
ابتعد مني وصاح بصوت عالي و رافع ايديه - ولچ احبججج القزمة ام لسان احبجج بريو* احبجج
خليت ايدي علئ حلكي بصدمة:
- عززة انفضحنه حيـدرا شهرررتنه
اسكتتتت نوب تغلط!!
بقئ يصيح ..... سگته گـوة
- انت ابو لسـان
- اتعلمت طولة لسان منچ حبيبتي
- جذاااب والله انت ابو لسان جنك دلاله
- ولج ياهو دلاله
- انت ههههه
ضحك وكملنه مشي ..
- مو كتلك رح نتأخر حتئ رجلية
طاحن من المشي ..
- وين طاحن كليلي حتئ المهن الج
- هه هه جمعوله ضحكـة
ضحك :
- تردين اشيلج كولي لاتستحين
- خوب انت ماتصدگ ..
يلا عادي يابه وذا اكمل مشي ..
- عفية عليج ....بطلي عيارة
- عزه اني عيارة حيدرا ؟
- لاا لاا رويد العيار والعباس هههههه
ضحكنه .....بقينه نمشي وساكتين
يتحارش گوة واني اخزره ..ويبقى يضحك
فجئة ......عبرت دراجة نارية
سرعتها قوية .....
خطفت من يمنه مثل ....الطيارة
راكبها واحد ملثم ......شمر ورقة علئ حيدرة وراح،
حيدرة تخبل ، و كأنه يعرف
هيچ رح يصير ويعرف هذا منو
عافني بسرعه ....راح يركض ورا
بوسط ...الشارع
ركض سريع ......ومطلع مسدسة
واني كلبي راد يوكف ...من الهبطة ونوب عافني وراح يركض ورا
رجع بسرعه ....اليه
واني ارجف ......دنك بسرعة وشال الورقة
وكفت يمه ...مكتوب بالورقة تهديد وبيها رصاصة
شكك الورقة وسحكها بحذائة وتفل عليها ...بحركة گلب
حسيته فقد اعصابه ....ضل يهز براسه ويضربه بالعمود الكهرباء
- انا الهم هلنغوله شنو معتبرين انفسهم ويهددون حيـدرة!!
ماعاش الي يهددني ..
جنت ساكت عليهم خلي ينتظرون
شنو رح اسويلهم..
يهددوني و بمنطقتي! ..
بسيطـةةة.. سهلـةةة
- حيدرة منو هذا فدوة فهمني شصار جسمي دايرجف وخايفه والله
اجا يمي وجرني من ايدي ...بسرعة
وكال ...لاا تحجين ولاا كلمةة اسكتتتتتي
رجعنه للبيت ...دخلت بسرعة
صعد لغرفته خابر رائد
دقايق وكلهم اجوو ..وكفو يمه
عاط بيهم :
- ويييييين چنتوووو ويييييييين
رائد :
- لـك شصار فهمنه!!
- قيييس الحمااار داز واحد من جماعته عليه
ورقة بيها تهديد ....وطلقة
سالار :
- لك هذا مايتوب الا ينكتل موت خلاص
مو كلناله شيل ايدك منه مااايتوب!!
- كله مني ..لو بوقتها مفرغ مسدسي براسه جان ماوصل تهديد
عفتهم يحجون ...دخلت لغرفه نبراس
كعدت يمها وسولفتلها ...عن الصار
- عزة صدك عود شنو هااي ترة خفت
والله ماينسكت عنه الي صار
دخل حسن ...فتح الكنتور
كلت اله :
- عفية كول شنو رح تسوون ؟
وهدا قيس مو علئ الاساس بعد
ما يجيلنه ولا يعترضلنه ليش يهدد
حسن :- قيس مو ضابط، چذاب
وكل القضايا مزورة ..
واحنه درينه بهذا الشي وهو شرد ..
دورنه بغداد كلها ما موجود ..
بعد عفناه والتهينه بغيره ..
بس !! ..
صارله كذا يوم جاي لأربيل
و يهدد بحيـدرة ..
- ياعزة طلع واحد چذاب!!
بس ليش ما تخابرون الشرطه ؟
- شرطيش محد يهتم!!
احنه فريق كامل انه و حيدرة
ورائد وسالار وعثمان وحمزة وعباس
كلنه نشتغل ..
وكل واحد اله شغل خاص بي
بس!!
بهاي نجمتع ...كلنه علمودة
اذا ما قبضنه عليه هذا الشهر
وزوعناه العافية شاربنا مو علينا
- اي كفو عفية اسحلو الله ياخذه
اخذ ملفات وطلع ..
طلعنه ورا نزلنه جوا ..
رائد بقى يمنه ...والكل طلع
الساعه بـ2 بليل .... رجعو
صعد حيـدرة سبح وتالي طلع
نزل جوا ..
سألته :
- شنو سويتو ؟
- جاي نشتغل علئ كيف، نحدد الموقع
تالي نصيدة ....مثل الكلب
- اي والله واحد حقير وصلف
چنت ما مرتاحتله ..
طلع صدك واحد چذاب
و كلشي وكلاشي
ضحك :
- شحلاة حچيچ!
- اعرف كلامي حلو ..وشسمه يعني
- ابوس كلامچ يصير ؟
- اي ليش لا ؟
ضحك ..
- روحي نامي وتأخر الوقت ام الشسمه
- اي تصبح علئ الاخير
- و انتي بخير حبيبتي
صعدت للغرفة ..فارغه
صارت بس إليه ..
لان البنات كلهن يم ازواجهن ..
تمددت و اتكلب يمنه و يسرة ..
ما اجاني نوم .. واني افكر بي!
يربي ....شسوي ؟
تهت ...ماگادرة استوعب و اصدگه
مااريد ارجع و اثق بي ..
تالي يخذلني و انكسر !!
من جديد ..
حتئ لو يكلي... احبچ
ما رح يتغير ... ادري بي!
وهسه هو متزوج ...وحدة
ويخابر بليلئ ...وغيرها
وماعدا طليقاته ... واني وحدة منهن
جمعت كلشي ابالي من اول ماعرفته ..
اهواي اللغار وحقائق واسئلة
وماعندي اجوبه الهن ..
ياترئ شنو سر بين ام حيدرة
الله يرحمها و عائلتي ؟
صح اني بنت عمة ؟
صح سالار مو اخوي ؟
صح هو طلكني ؟
صح امه و بنته ماتو ؟
صح هو ضابط ؟
صح هو يحبني ؟؟
لو كلشي چذبه ...و تمثيل ؟!!
ماكدرت اوصل لحل لحل و جواب ..
غمضت عيوني و نمت ..
ثاني يوم ..دخلت للمطبخ
شفت طيبـة تطبخ ...
سئلتها شنو دا تسوين
- ثواب لامي ...الله يرحمها
- منو يوزع ؟
- سالار كال اودي للجوامع
- ها .. زين
شفت الجدورة مسوية حلاوة
جزر و حلاوة چگليتيه ..
ضقتهن ..
عاشت ايدچ طيبة علئ اسمچ
چان كعدتيني اساعدچ؟
حسن :
- علمود تخلين ملح بدال الشكر
- اهوو اجا الغثة معليك انت
ضحك وطلع .. طلعت ورا
نبراس گاعدة تباوع افلام كارتون انمي
وحسن اخذ الريموت منها ..
وغير القناة علئ اخبار
وصارت تصيح و هو يضحك عليها وتعاركو
نبراس :
- اهوو جيب الريموت حساااني!!
- دولي تباوعين علئ ماروكو و عايفة الاخبار خل انشوف الاخبار شصاير بالعراق
- ما گلت يعني ما .. انطيني الريمووتت!!
- انچبي يا حياتي
طلعت من الاستقبال ضايجة وتنفخ..
وصعدت فوگ وهو لحگها للغرفتهم ..
ضحكت عليهم ..عبالي رح يعقلون ورا الزواج ويبطلون مشاكل وعركات ..
ضحكت يلا حلاة الحب بالعركات اصلا إذا ماكو كل يوم عركه مفيش حب
وزعو الثواب والحلاوة ..
والظهر شوا رائد سمچ وتغدينه بالحديقة
عبالك متغدين بره من كثر ما تونسنه وشبعنه ضحك ..
بليل كعدنه كلنه بالهول نقرة قران
ونهدي لروح خالتي وليله جمعه ..
مر 5 أيـام |
حيـدرة ما عاف موبايله ولا لحضة
وحيل مشغول ... علئ سالفه التهديد
وهما هم مشغولين ..
ليوم گالنه سالار يريد يروح لبغداد علمود سعاد بالمستشفئ و تخربطتت ..
چانت نور تريد تروح بس بطنها تأذيها
ورائد ماقبل گال بعدين اخذچ لأمج
قبل مايروح گلتله أريد اروح وياك اني هم لان مشتاقه لبغداد و هم عندي ملابس بالبيت ودفاتر و الالبوم أريد اجيبهن ..
ما قبل ....شمرتلي كم دمعه يلا وافق
تالي ...كال كولي لحيدرة بالاول حتئ يجي اهنا يبقى
رحت بسرعة خابرته بلگوه
وبعد نذورة يلا رد ..
وكتله أريد اروح ..
ما قبل وعصب عليه ..
كال إذا ترحين اموتچ..
- رجعنا لنفس اسلوبك موو!!
- نارردين اخذي الكلام خايف عليچ روحتچ مو امان اسمعيييي كلاميي لا تعانديين!!
- ليش عود؟
- لا ترحين نـاررري الوضع مو زييين
لا طلعين اخذي الحچي رحمة للكائنات!!
- خـووووش
سديته ..
وانفخ ضجت خرب واهسي كله
مو بكيفة يتحكم بيه بدلت ملابسي ونزلت
كلتله حيدرة قبل ويدري رح اروح وياك
ماعنده مانع هز راسه وركبنه للسيارة
طلعنه من اربيل وصلنه لحدود بغداد ودخلنه اول شي رحنه للمستشفى علمود يشوفها
كعدت علئ الكرسي ما أريد اشوفها
نص ساعة بقينه ...تالي گال امشي نروح لجامعتچ نأخذ اوراق النقل طلعنه من المستشفى و توجهنه للكلية وفعلاً رحنه و اخذنه الاوراق. ..
تالي رحنه للبيت خليت دفاتري و كلشي بالكارتون ونقلته لصندوگ السيارة وركبت السيارة ...كتله قبل ما نرجع لتربية خلي نمر علئ المول لو السوك نشتري ونرجع ..
عارض، وگال لا غير مره لان نتأخر كلتله اخذ هديه لطيبة وآني اخذ هدية لنبراس ونور سكت...تالي قنعته وگال بس نص ساعة و ما نتأخر فرحت و گتله ماشي ورحنه للسوگ صفى السيارة بالكراج
رحنه لمحل الذهب اشترا سوارتين وحدة لطيبة وحدة لنبراس وآني صرت اباوعله صفح وهو ضحك كلتلة لعد و اني شبيه اكرص ليش ما اشتريتلي ..
-بعدين ما شايل وياي اشتريلچ انتي ونور من أربيل ..
-ايي صدكتك
طلعنه ورحنه لمحل اختارينه كم لبسه النه خليناهن بالعلاگه وطلعنه ..
گال اروح للمحل الساعات أشتري ساعة وصاني بيها حساني بلكت الگاها موجودة اهنا
- ماشي
بقيت واكفة بباب المحل ..ولازمه العلاليك منتظرته يطلع ...تالي گلت أشتري اصباغ اظافر حلوة من المحل الي اگبالي ..
وچنت شايله 10 الالف ..گلت أشتري و ارجع
لان اعرف بسالار ما يقبل واذا طلع نطلع من السوك
عفت العلاليك بباب المحل و مشيت
رحت أشتري ..
فوگ الربع ساعه ..
ما محسيت بالوقت.
و اهواي ناس بالمحل تشتري ..
بقيت منتظرة و واكفه يحاسب
ياربي أكيد هسه سالار طلع و ما لگاني
...صحت للولد خوية حاسبني وخليني اروح بسرعه
كالي شبيج تصيحين جيبي خلي احسبلج الغراض ..
انطيته الفلوس بعد ماحسب الاغراض
وطلعت بسرعه ..
رحت للمحل الساعات شفته فارغ !!
وسالار ما موجود !
.. عزززه ..
زين راح و عافني ؟
نوب العلاليگ ماخذهن وياة
وهنه وحده منهن بيهن موبايلي
الا شوي چان بچيت...
فوگ الساعة افتر بالسوگ
و ادور عليه
طلعت من السوگ بعد مافقدت الامل ..
رحت وكفت بالشارع عبرت سيارة تكسي
وكفتها...وكتله عمو فدوة وصلني
وكلتله ضيعت اخوي
گال ما حافضة رقمه ..
كتله لا ..
تذكرت حيدرة حافظه رقمه ..بس خفت مااتصل عليه لان ما كتله اجيت لبغداد ..
كال أكيد رجع للبيت ..اركبي سيارتي اوصلچ لبيتكم
ان شاء الله ماكو شي لا تبچين.
هزيت راسي ( اي)
فتحت الباب السيارة وصعدت وره ..
بس گلبي ما مرتاح
احس رح يصير "شيء" قوي
ما اطمئنت !!
....
حيـدرة
گاعد بالمركز ورائد وحسن يمي نشتغل علئ الابتوب ... ونتناقش اجاني اتصال رقم مجهول عرفته قيـس لان ماكو غيره! ..
سكتتهم ...ورديت الـوو
- زوجتك صارت جوه ايدنا حيدرة
انصدمت سكتت لحظات وجاوبت.. نععععم انت منوو!! احچچچجيي !!؟ مباشرةً سدة بوجهي .. گالوا منو هذا!!
-ما ادري!! والكائنات انا گلبي يم ناري!
حسن: لا تخاف ان شاءالله ماكو شيء!! خابرها شوفها وين ؟
-بالبيت هيه خابرتها قبل ساعات !
-ميخالف للحرص خابرها
-ااي هو هيچ ..
جاي ادگ علئ رقم انبعث إليه ڤيديو! فتحتة بسرعة وشفت
" ناردين
