رواية قصة وجدان الفصل التاسع والأربعون 49 بقلم انين الليل

سالتني نفسي = متاكده ما يعنيلج شي 

هزيت راسي وحچييت =. بلي متاكده ما يهمني بشي بس شكو تعاتبه رجال واتزوج انتي شعليج 

اتمددت وگعدت = بعدين هو شدعوه عصب وگلي لا تجيبين اسمها على السانج 

=. لا اشو اجيبه واجيبه شنو ناسي اني زوجته 

التفتت اخاف هو وراي حجييت =. اقصد كدام الناس احنه متزوجين 

    رفعت اكتافي = واذا بعدين هو ليش ما يجيب علاوي وبيبي شنو قصده من الي دا يسوي

=. من يكعد اگله يجيبلي علووش وحتى لو بيبي ما تقبل تجي معليه المهم اخويه يكون يمي 

=. واذا ما قبل 

=. لويش ما يقبل بكيفه شنو 

  هزيت راسي =. بلي بكيفه كليتنه بكيفه مو بس علووش 

حكييت خدي = خليني احاول اغير من اسلوبي حتى اكسب ثقته لان هذا هسه ساكت بس من ينفجر محد 

يوكف بوجهه واحتمال اياذيني مثل ما اذاني بهاء اصلا كل الاذيه الي اني بيها هو سببها 

هزيت راسي = بس للامانه عمو عمره ما كان مثل بهاء 

= لج مو عمو شبيج انتي

المغرب طلعت من الغرفه اتوضييت ورجعت صليت كملت ورفعت ايدي بالدعاء انو الله سبحانه وتعالى 

يساعدني ويوكف وياي لان اني كلش تعبت بقيت كاعده حسيت بي طلع من الغرفه عرفته اجه للصاله  

انتظرت شويه وطلعت شفته كاعد اني هماتين گعدت هو سالني :: ما جوعانه 

هزيت راسي يعني اي 

   سالني :: شتحبين اوصيلج

رفعت اكتافي رن تلفونه شافه ما جاوب وتوالت الاتصالات عرفت هذا لو مهدي لو بهاء يمكن خمس مرات 

اتصال متواصل هو اخذ التلفون وراح للغرفه اخذني الفضول اسمع شيردون من عنده رحت ورا حاولت اسمع 

وهو اساسا ما طابك الباب اتقربت بخوف سمعته يحجي

:: لا لا تحچيين شي انا ما كايله 

       :: انا ما وعدتج بشي ابد 

      :: الحياة هي تقسم النه شنسوي لكن احنه نختار حتى ما نندم 

       :: اي اختاريت 

          :: منو كلج 

         :: لا غلطان الي گلج 

بقى فتره يسمع :: اي صح ما جذبت عليج وانتي ما وافقتي وانا من وكتها صرفت نظر 

      صرت اسمع بس نفسه بعدين حجى :: شوفي اكلج من الاخير انا احبها وما اگدر افاركها ومن اكون وياها ارجع 

عمري ثمنطعش سنه 

     :: مو بس احبها هي كل شي الي ومن تروح من ايدي ما اعرف شيصير بيه يجوز اموت ويجوز اتسودن ويجوز 

ما يصير بيه شي بس افهمي انا احبها 

  :: اسمعيني بابا اسمعيني رقيه انتي بنيه الف من يتمناج بس انا مو من ذول الالف ما اشوفج اله انسانه عزيزه عليه 

اتمنالج السعاده والاستقرار والستر ويه انسان يحبج ويقدرج وانتي هم اتمنيلي السعاده 

   :: فيمان الله

انسحبت الغرفتي وانا مذهوله من الي سمعته = معقوله عاصف هلكد يحبني يموت اذا يفاركني 

  = زين اذا هو هلكد يحبني وما يگدر ايفاركني ليش سكت من اخذني بهاء ليش 

  = ليش ما حماني 

  = هسه اني اصدك منو 

  = ولج شبيج مو هالعاف كل شي ورا وكعد يمج واي شي ما طلب منج

= هسه اتاكدت انو رقيه تحبه 

=. هي من البدايه ساحله روحها علي من يوم ما اجت ويه بيت عمو رحيم 

=. يعني عمو يحب...

سمعت صوته :: وينج 

  طلعت شفته بالصاله ردت اواجهه لكن حاولت ابين طبيعيه حتى اعرف افتهم منه كل شي 

باوعتله هو رد عليه ومبين ضايج :: گولي شتردين تاكلين 

      باوعتله واني دا الم بحلكي = امم شنو رايك نطلع نتعشى بره 

     استغرب :: وين بره ؟

   = ب. اي مكان اني ضايجه

بقى ساكت رديت = شنو رايك نروح للمطعم الي رحناله ذاك اليوم 

   فر ايده :: يمته ؟

  = لمن اجينه من الدكتور عجبتني الفطاىر الي دا يقدمها 

     رفع حواجبه وجاوبني :: اي اتذكرت خوش مطعم بس انا لابس دشداشه وما يصير ادخل هيج اماكن فخمه 

عرفته متحسس من كلامي جاوبته = لاعادي انت حتى ولابس الدشداشه لا يگتلك وهيبه وانت گلت الناس بزمنه 

ما تباوع بس للفلوس 

       هز راسه وباوعلي :: انا صح كلت بس انتي شفتي بعينج 

   = هسه اني راح البس ع السريع حتى نطلع وانت هماتين گوم بدل

رحت فتحت الجنطه الي جابتها داليا شفت بيها هواي ملابس اخذت بنطلون جينز وقميص طويل ولفيت شالي 

ولبست حذاء اسود واحچي ويه نفسي = هذا الشي الي اني بي حتى بالاحلام ما متوقعته 

  = لازم اعرف الكلام الي سمعته صدك لو هو هالشكل يكول حتى رقيه تبعد عنه 

  = لازم اسايسه واخذه بالهداوه حتى افهم كل شي لان اني هسه بدوامه ما اعرف اطلع منها وخليني احاول احچي 

الشكم كلمه الي حفظتهن من بيبي لان احسه يفرح من احجي مثلهم خلي اعلمه يحچي مثلي

هزيت ايدي =. الخاطر الله شكد غبيه هنوب انتي تعلمينه دسكتي احسن الج 

  طلعت هو باوعلي وسالني :: هالشكل تردين اتطلعين 

هزيت راسي 

  :: روحي البسي عبايه اسلاميه 

   = بس هذا لبسي ما بي شي 

:: اعرف وانا اريدج تلبسين فوگه عبايه اسلاميه 

   = مو عباتي ما خاسلتها 

  :: انا جايبلح اكثر من عبايه بالجنطه واذا ما كو البسي فستان طويل

رحت لبست العبايه الاسلاميه وهو لابس دشداشه يعني صدك لا يگتله باوعلي گلي ياالله 

طلعنه وركبنا بالسياره واحنه ساكتين حاچاني :: من نرجع للبيت صفطي ملابسج بالكنتور 

خجلت من كلامه يعني اني شبيه هاي شكد صارلي ما فكرت ارتب ملابسي

وصلنه وهم اتلكو الظاهر يعرفونه مبين هواي يتردد الهذا المكان واحد 

  اخذ المفاتيح حتى يركن السياره ودخلنه ورحنه النفس المكان كعدنا 

واجه النادل بعد ان سلم وخلا المنيو كدامنا هو جاي يدخن واني اشوفه شكد مهموم سالني :: شتحبين تاكلين 

  = دا اباوع للمنيو 

:: خوش اطلبيلي وياج

درت هو سالني :: شرايده ؟ 

  = دا اعيط للكابتن حتى اوصي 

  :: ها تردين انتي تصيحيله 

  هزيت راسي = ايي 

  :: وجعي 

فتحت عيوني ع الاخر رد وهو اياشر على نفسه :: چا هذا الگاعد يمج شني 

   عضييت شفتي = اسفه عم عاصف 

    :: انا اصيحه

اشر بايده واجه النادل كله :: شوف المدام شتطلب 

- اتفضلي مداام

       صرت احجي واباوع اله =. رايده بيتزا وصاج وببسي (اشرت بايدي ) لبن 

هز راسه = ولبن 

باوعتله = عدهم مشاوي 

  :: اذا تردين انتي اطلبي 

  = جيب واحد تكه لحم

بقيت منتظره الطلب وهو يدخن ويباوع النقاله ولا كانه اني موجوده 

حمحمت. = هلكد النقال مهم 

باوعلي :: ليش ؟

= المفروض احنه طالعين ما نگضيها اني ساكته وانت لازم النقال 

ما جاوبني دخن جگاره وعيونه بالموبايل رديت =. هاا وما انسى الجكاره

بقى ساكت ما جاوبني =. لازم الي جاي دا يراسلك شخص مهم ما تحب تزعله 

باوعلي بدون ما يرد اني هزيت راسي =. اكيد كلش مهم بحيث ما يهون عليك تترك النقال وترد عليه

اجه الطلب طبعا اني ضجت لكن سحكت على اعصابي لان لازم اوصل ويا الحل واشوف هو 

شناويلي سد النقال وخلا ع الطاوله واشر للنادل شاوره بعدها صار ياكل واني هماتين صرت اكل 

ما اوصفلكم الاكل كلش طيب هو اكل قطعة صاج ويمكن لكمتين 

او تلاثه تكه باوعتله واني اكل هزيتله راسي هو سالني :: شني ؟

= شنو كملت 

  هز راسه :: اي شبعت الحمد لله 

= انت شااكلت حتى تكول شبعت ناسي احنه بدون غدا

قطعتله بيتزا وقدمتها هز راسه :: ما احبها 

= بالخضاركلش طيبه ضوكها 

:: ما اشتهي 

= الخاطري عاصف اخذ من ايدي 

صارت عينه بعيني اخذها وصار ياكل ابتسمت = شفتها شكد طيبه 

رد باستهزاء :: اي طيبه عجينه ومخلين فوكها طماطه وفلفل وزيتون لو امي بحيلها چان سوتها بالتنور 

= ها يعني ما عجبتك ؟

:: تدرين انا اتعقد من الجبن الي يخلونه فوگها 

= هاا وليش ؟

:: الجبن من وعينه ع الدنيا انخلي بخبزه بصمونه ونشرب ويا جاي مو ينحط فوك العجين ويدخلونه فرن 

= هو الجبن تقريبا صار يتخلى بااكثر الوجبات حتى بالبيض 

:: اكلج خلي اللكمه ابطني لاتلعبين نفسي 

باوعتله بهدوء. = اسفه واعتذر 

:: اكلي 

= شبعت 

:: منين شبعتي مو ما متغدين

    سالته واني امسح بحلكي = لعد انت ليش ما تاكل 

:: صدكيني شبعان 

= يعني من انكمل نطلب حلا 

:: اطلبي 

= وانت 

:: تدرين بيه ما احب الحلا 

= تمام لعد اني هماتين ما اريد 

:: لا انتي شنو يعجبج اطلبي انا راح اطلب كهوه عدهم الكهوه شي خرافي اطلبلج

هزيت راسي = اريدها وسط 

اشر للنادل :: عيوني اثنين كهوه وسط 

شعل جكاره باوعتله هو رد :: ما ينهضم اذا مو جكاره 

حكيت خدي = تدري اني يعجبني اجرب 

فتح عيونه ع الاخر :: شتجربين 

= يعني هماتين اريد اهضم 

لملم حلكه :: مو شربتي ببسي وهسه راح يجيبولج كهوه وتهضميين 

جابو الكهوه شربناها سالني =. كملتي 

هزيت راسي =. بلي 

     :: اذا تردين شي اطلبي 

        =. لا شكرا 

    وكف السويج بايده :: ياالله نمشي

استغربت من تصرفه يعني بس اكلنه ما حجينه ولا ضحكنا عبالك اغراب وجمعتنا طاوله وحده 

وكف بعد ان حاسب وطلعنه وجاب ويا علاگه ما سالته عليها رجعنا ساكتين للشقه هو الجكاره 

ما فاركت حلكه واني دايره وجهي اباوع للمناظر والشوارع من وصلنه حاجيته 

= شكرا لان عشيتني بره غيرت جو

نزلنه فتح الشقه دخلنه واني نزعت عباتي وكعدت ع القنفه هو اجه وجاب علاكه خلاها يمي سالته = شنو هاي 

:: الج انتي ما اكلتي 

= بس اني اكلت 

:: مي خالف حتى لو تضميهن اتريكي بيهن

فتحت العلاگه شفتها فطاىر وبركر وبيتزا ومقبلات وريحتهن تشهي وفعلا اني ما شبعت اقصد اكلت قليل 

لان شفته ما اكل طلعت فطيره وصرت اكل بيها هو يباوعلي ابتسمت واشرت اله = تريد 

هز راسه طلعتله فطيره قدمتها. اله هو فتح حلگه انا بنيتي انطيها بايده خليتها قضم منها وصار ياكل بيها 

ويباوعلي خليت العلاكه ع الطبله وكفت = راح اجيب صحن

:: المن ؟

= اخلي بي وناكل 

:: تحجيين صدك انا شبعت 

رحت جبت الصحن وخليت بي فطاىر وبيتزا وجبت لبن هو سالني اذا الي انا شبعت 

= هسه بس تشوفني اكل تشتهي 

باوعلي بتساول حمحمت = اقصد يعني قبل شويه اكلنه قليل واحنه ما متغدين اقصد اني بعدني جوعانه 

ابتسم :: اجيبلج كراعين 

= عووع عمو خلينه ناكل 

  ابتسم :: اكلي

صرت اكل واعرف بي يراقبني شلت نص فطيره قدمتها اله هو هز راسه حاچيته = الخاطري عمو 

اخذها وخلاها بحلكه رديت حچيت = اني اسفه بعدني ما متعوده اسميك بااسمك 

:: راح انام وانتي هم كومي نامي 

هزيت راسي = لا اني اريد اباوع ع التيفي 

رافع حاجبه :: خوش تصبحين على خير 

راح يمشي رديت = ليش ما تجي نباوع سوا

وگف واسمع نفسه دار عليه هزيت راسي = اي هسه.نشوف فيلم اجنبي الظهر شفت عنه اعلان مبين حلو 

دخل للغرفه واني فلت وجهي واتمددت ع القنفه وصرت ادور بالقنوات طلع الفيلم يعني توه بادي لان جاي 

ايكتبون البدايه ع الشاشه 

رحت للغرفه اغير ملابسي لبست تراك وفتت غسلت وجهي ورجعت شفته كاعد ع القنفه لابس گلبيه رجاليه 

اجيت كعدت ع القنفه الثانيه صرنا نباوع من طلع الاعلان رحت للمطبخ خليت كرزات وجبتهن باوعلي وگلي 

:: ماكو جاي ؟

هزيت راسي ورحت جبتله كوب صار يشرب بالجاي ومره يدخن ويباوع للفلم واني اخذ كرزات كلي 

:: لازم نجيب العلاوي بلي مو 

اتفاجآت بسعاده يعني ليش هالكد اتفكر براحتنا احنه شنو بالنسبه الك سالني 

:: وين صفنتي سالتج 

= احم بكيفك 

:: اي اجيبله ولو انا ما اعرف الهن بس سهله اسال عنه واجيبه اقلها من نضوج نلعب 

=شنو تعرف ؟

هز راسه :: لا انتي تعلميني 

ابتسمت هو رد عليه :: اتذكرتي كلام حبوبتج من گلتي انا اعلمه 

= ما ناسي 

:: لا اي شي ما ناسي 

= ملاحظ نفسك كلش هوااي اتدخن 

:: ادمنت

= لازم اتقلل مو زين عليك 

:: خلي نباوع للفلم 

رحت للغرفه جبت بطانيه الي وبطانيه اله سالني :: المن 

= ما اعرف اشو بردت 

اتمددت ع القنفه وصرت اباوع للفلم وهو متمدد ع القنفه الثانيه بحيث راسنه على نهاية القنفه مالتنه لان القنفتين صايرات 

حرف L

صحيت الصبح شفته نايم ع القنفه واني هماتين نايمه ع القنفه الثانيه

ما حبيت اصحي شكد احب شكله وهو نايم عبالك طفل برئ درت وجهي ع الجهه الثانيه حسيت بحركته صحى 

اتثاوب وكال :: شكد نمت حتى الصلا فاتتني 

:: اه وهاي هم نايمه اهنا 

:: وجد وجد شو اكعدي 

درت وجهي :: نمنا وحتى الصلا فاتتنا 

ما رديت اتثاوبت هو راح يتوضا واني ورا اتوضييت وفتت الغرفتي صليت بعدها طلعت خليت الماي بالغلايه 

وسويت الريوك صارت تقريبا بالعشره رحت دكيت الباب فتحه حاجيته = الريوك جاهز

رحت قبله للمطبخ اني كليت بيض وحميت بيتزا وفطائر والصاج وخبز وصرنا ناكل انطيته صاج 

هو حاجاني :: مو مشتهي اكل بيض 

= اي اكل بيض وياها هاي الصاج 

خلاها بالصحن رديت =تره ما بيها جبن 

:: ادري 

= شتدري 

:: ما بيها جبن يعني تگدرين تگولين بعنا الجاموسات واجينه للولايه من زمان

هزيت ايدي. = شنو يعني ؟ 

:: من تكبرين راح تعرفين 

صار ياكل گلي :: رايد جاي باستكان 

هو راح للصاله واني اخذتله استكان الجاي بقيت گاعده وهو يشرب حاجيته 

=. تريد تطلع 

هز راسه :: اي ليش ؟

=. اريد احجي وياك 

:: اسمعج احچي 

=. عم ... (اتنفست )عاصف اني بعد شهرين اكثر شويه اريدك 

باوعت صارت عيني بعينه سالني :: شني بعد شهرين 

بلعت ريگي =. ننفصل 

اتغيرت ملامح وجهه خفت بلحظتها وبلعت ريگي حچييت 

=. اني امس بالصدفه سمعتك تحچي ويه رقيه وعرفت انتو تحبون بعض

رد عليه :: ها واكيد ضميرج ايانبج مو 

= اني جاي احرم اثنين يعني اني بنظر نفسي انان... 

قاطعني :: من سمعتي بالصدفه ما سمعتيني شكتلها لو اهنا انتي انطرشتي 

= مو جاي دا تستهزا بيه 

ما رد وگف اخذ الاستكان وفات للمطبخ بقى شويه وطلع اخذ السويج وطلع بدون ما يحچي 

بقيت گاعده واحجي

= شبي هالشكل ساكت وضايج 

= مبين هو يحب رقيه وعافها حتى ينقذني 

= هذا هو اذا يحبها ابقى الح الح الى ان يطلگني كافي حمل همي اني واخوتي هاي شكم سنه خلي يشوف حياته 

بس يجي ارجع احجي ويا ونتفق واكيد بالاخير هو حيوافق 

= اي هو هذا الي راح يصير مبين يحبها 

هزيت راسي= لا اني سمعته بااذني ايگللها هو يريدني واذا يعوفني يموت 

= وج يجوز مو عليج 

= لعد عليمن 

رفعت اكتافي = شمدريني يجوز على رجاء 

= هههههه شكد غبيه انتي هو رجاء اساسا شايفها بعينه 

   لملمت حلكي واني افكر = اي هذا الشي الي محيرني وصار لازم اساله عنه 

= اووف ياعاصف شكد غامض وشايل اسرار 

= ليش ما تسكتين وتبتدين من جديد

حكيت خدي ورديت باستهزاء = ويامن ويه عاصف لايمكن هذوله نفس الشي حاله حال ابويه وحال بهاء وحال 

غزوان اصلا هو اشرس منهم نسيتي شلون شفته كامش ابويه لو شسوى ابهاء لو من يكول عوقت غزوان 

لو من كسر الجامه 

= غير اتاسف وانتي ما قبلتي اسفه 

= لج هذا كسرها حتى ايخوفج ويگلج اني ما اهتم الاي شي ولا اخاف من اي شي نسيتي من يگول ناظم اسوي 

لكمه بايدي وبذاك الوقت عمره ثمنطعش سنه

= لعد لويش باقيه ؟

صرت اعض بااصبعي عضات سريعه = وين اروح اذا حتى خاله خوله اتخلت عني واستعرت مني وصرت 

عدوه الها من عرفت احسان رايدني لو هو احسان الي طلع لا شخصيه ولا شي دلووع امه نفخه ع الفاضي 

  = اوو ف تايهه وما اعرف شلون اتصرف ساعدني ياربي 

=. المشكله ما جاي اگدر اتعايش ويه عاصف ما اشوفه اله عمي 

صوت بداخلي = كذب 

هزيت راسي =. لا مو كذب 

= كذب هس توج حتى ضجتي من عرفتي رقيه حجت ويا 

=. اي لان اني هسه زوجته

=. بس كدام الناس يعني من حقه يشوف حياته ،

=. ومنو لازمه خلي يشوفها هو الي يگول ( حجييت بصوت مسموع وباستهزاء ) = اموت اذا اعوفها 

=. ميخالف خلي الح علي بالانفصال ما دام يحبها الرقيه اقلها يعرف اني دا احس بمعاناته اي هو هذا الي حيصير

فتت للمطبخ غسلت الصحون ومسحت الطباخ الي اساسا ما بي شي ورجعت طلعت ملابس وفتت للحمام 

سبحت وبدلت لبست دشداشه وشسورت شعري واني اتساءل 

= شلون عرف قياسي. وليش كل شي مشتريلي هذا مقرر انو اني بعد ما ارجع البيت جدي 

= لج يا بيت جدي حتى البيت الهناك طلع اله مو الجدي 

= بس يجي اگله يجيب بيبي وعلووش 

= بعدين خلي اساله وين يغسل ملابسه اشوداىما اشوفهن نظيفات

هزيت ايدي =. صدك بطرانه على گولت بيبي شعليج بملابسه وين ما يغسلهن يغسلهن بس 

انتي ليش تفكرين بي هالشكل ما دامه ما يهمج 

=. شسوي اذا بس هو گبالي اصحى بوجهي انام بوجهي مضطره افكر بس بي

اتوضييت وصليت الظهر والعصر بالصاله لان هو ما موجود وفتحت التلفزيون وصرت اباوع هيج لا على التعيين

طفيته ورحت للمطبخ طلعت تفاحه اكلتها ورجعت الغرفتي اتمددت بقيت فاتحه عيوني وافكر بهواي اشياء 

غفييت كعدت من النوم واني اشوف الدنيا ظلمه فتحت الضوى وطلعت للصاله فتحت ضواها وفتحت التلفزون شفت 

الساعه بالسبعه باوعت اريد اشوفه اجه او بعده رحت دگيت باب غرفته ما جاوبني معناتها بعده ما جاي 

رحت اتوضييت وصليت كملت صلا وهو ماكو صارت افكاري تودي وتجيب واني منتظره بس شنو 

غديت نار واسال =. هو وينه الهسه

لمن ما تقريبا الساعه تسعه وشويه 

حسيت بي فتح باب الشقه واجه كنت متمدده ع القنفه وماده رجليه والريمونت بايدي من اجه حتى ما كعدت 

هو اتقرب وكال :: السلام عليكم 

  اني ما رديت خلى علاكه ع الطبله وگلي :: جبتلج عشا 

  ما جاوبته هو جاب علاكه ثانيه فتحها عبالي اكل وطلع كارتون :: هذا البلي اشتريته ويا اقراص بس انا 

ما اعرف اشكله

بقيت اباوع ع التلفزيون بدون ما اجاوبه واگف گدامي حاجاني :: تدرين بيه اتعقد من احجي والمقابيلي يلبسني 

باوعتله ورجعت اباوع ع التلفزيون :: شبيج 

   ما جاوبته هو راح طفا :: من احجي وياج ردي عيب تلبسيني 

وكفت اريد اروح للغرفه هو لزم ايدي :: مو جاي احچي وياج 

  باوعتله بعتب هو عاف ايدي وكلي بهدوء :: شبيج ليش ما تردين عليه تره يحترك جد جدي من تلبسيني

    اتقرب مني حجى بنتر :: مو جاي احچي وياج 

خفت منه رفعت اكتافي = ما بيه شي 

رد بعصبيه :: لا بيج شصاير گولي خلي افهم 

      جاوبته بعصبيه ما تخلو من الخوف = تسالني شصاير طلعت من الساعه عشره ونص الصبح وشوف 

هسه بيش الساعه واني ايهنا ابحدي 

:: عادي ما احتركت الدنيا 

= اي صحيح ما احتركت الدنيا واني لازم احترك طبني الف طووب

     اتنفس بعمق :: شكو داعي الهلحجي 

     = اله داعي وين رحت قافل عليه الباب واني ما اعرف انت وين ما تگول يجوز يصير تماس كهرباىي واحد 

مراقبك يكسر الباب ويخش يريد يسرق يتفاجا بيه يقتلني 

= نهاد مثلا تدزلي عصابه يقتلوني 

ابتسم جاوبته بعصبيه = اتصور ماكو شي يخليك تضحك 

:: هو حقج بكل شي بس مالت نهاد محد مفكر بيها 

   راح گعد :: ياالله اكعدي اتعشي اكيد ما متغديه

   هزيت راسي = ما اشتهي 

:: تو اكلي تره حتى انا ما متعشي 

= ليش الي رحت الهم ما عشوك 

رد بابتسامه وهدوء :: لا لزمو بيه ع العشا بس انا جنت ما اشتهي 

بصراحه نرفزني = لو مكمل سهرتك يمهم ومتعشي فد نوب تره عادي اتعودت ابقى ابحدي 

اشر باصبعه :: مره ثانيه الايام جايه اليوم ما لحكت ومن اريد اتعشى لازم اعمل حسابي اتاخر خو مو بس 

حد العشا وهذا هو لازم ابقى سوالف وضحك ومسامر

رفعت اكتافي =. مو مشكله كان اتاخرت يجوز يزعلون 

:: لا اعتذرت منهم كتلهم ما الحك غير مره الايام جايه هوااي 

=. لويش ما تلحك طلعت من وكت 

هز راسه :: اي طلعت افتر الوره الظهر رحت يم امي شفتها صدك اتسلم عليج هي وام كرار وبوكتها 

صبو غدا انا ما اكلت لان توني متريك وبقيت يمها للعصر كلش بعدها رحت للطبيب شاف ايدي وفتحولي 

الزرارات وانوب رحت على ولد صديق عدي مصلحه ويا تالي طلعت ادور على البلي لمن ما لكيته 

وهسه خلي نتعشى لان انا كلش جوعان ياالله جايب لفات جيبيهن اهنا خلي ناكل

راح يغسل بالمغسله ارتايت اسكت واهدا حتى اتناقش ويا خليت اللفات بصينيه صرنا ناكل واحنه ساكتين هو 

كالعاده بعدها دخن جگاره. 

:: باجر ع الغدا نشوي سمج 

ما جاوبته اشر بايده :: اي هذا اهنا بالركن خوش يشوي سمج 

كملت شلت الباقي ضميته وغسلت اجه وراي للمطبخ اخذ الغلايه شاف بيها ماي فتح الدكمه هو حچى 

:: كلت ما دام ما الج خلك تردين عليه اجي اسويلي جاي

   رديت بدون ما اباوعله = اني حسويلك 

:: شكرا ما اريد اتعبج 

= لعد سوي انت اني هماتين يعجبني اشرب جاي من ايدك 

رحت للصاله كعدت والريمونت بيدي واحرك برجلي طلع گلي 

:: انا كملت الماي فار بس اريد جاي انتي تسوينه الي 

باوعتله = لويش ما تعرف 

ابتسم :: لا كل شي اعرف بس جايج يعدل راسي

رحت خدرت وصبيت كوبين خليتهن ع الطبله هو اخذ كوب واني اخذت كوب صرت اشرب باوع الي 

:: ياالله كومي ركبي البلي خلي نجربه 

= قبل ا اركب البلي رايك بكلامي 

  :: ياكلام 

   =. شوف ما اريد اصير انانيه انت لازم تنتبه الحياتك انت سويت شي وياي لايمكن اي احد يسوي بس الانسان الشجاع 

والي عنده مروءه ولهنا كثر الله خيرك لهنا لازم نخلي نهايه الهذا الي جاي يصير 

     :: شكو 

   = گتلك بعد شهرين ننفصل وانت تشوف حياتك 

     :: انا شاكيلج اسمعيني هذا الي انا بي بارادتي لا مجبور علي ولا احد طالب مني اسوي وبعد ابد ابد 

لا تحجيين الكلام الي حجيتي وياالله گومي شگلي البلي خلي نجربه

هزيت راسي =. بس بشرط تحچيلي كل شي 

  ابتسم وهز واسه اخذت البلي وركبته وشغلته هو جايب اقراص سباق سيارات خليت اول قرص صرت اجربه 

اتقرب :: ياالله خلي نلعب 

= شنو تعرف 

:: انتي بس علميني وشوفيني اله افوز عليج 

= نشوف 

صرنا نلعب ورغم هو مو هلكد سريع بس حلو اثنينه جاي نلعب ومن اغلبه يكلي :: لاتنسين تره انا مبتدا 

= شنو مبتدا هو شيرادله بس انت ما تعرف

:: ولج لا تسمعج حبوبتج 

= هي هاي الحقيقه انت ما تعرف تلعب 

:: احسن 

=. احسن ما تعرف تلعب 

:: اي ليش اچذب واكول انا العب ومحد يكيشني وتالي انغلب عاد اگول ما اعرف العب حتى من تفوزين عليه 

اطي الروحي عذر 

عرفت مو قصده اللعب بالبلي بس غلست بقينه نلعب ومن افوز يكلي :: مو قبول انطيني مجال

بعدها گلي :: انا انسحب 

= لا عفيه ليش 

:: عمي غلبتيني ما اكيشج 

= لعد لو علي يلعب وياك 

:: هذاك يبلعني 

هو گعد ع القنفه واني بقيت العب 

حاجيته = صدك من كنت شاب ما لاعب اقصد ما عندك هوايات 

:: لا ما عندي وكت للعب يادوب الحك ع العيشه 

= وهسه ؟

:: هسه شنو ترديني العب 

= مو هذا قصدي يعني لازم تمارس هواياتك اكيد عدك هوايات 

:: اتصدكيني اذا اكلج حتى هوايات ما عدي 

= بس اني شفت بغرفتك كتب وقصص 

:: اي اقرا بس مو دووم 

= شفت كومه قصص 

:: ادري هاي القصص من اقراهن اصير بغير عالم 

=شلون يعني 

:: يعني ارجع بعمر الثمنطعش واعيش وياهن

= ليش ؟

     سالني :: اكلج انتي من تلعبين ابحدج ماكو فوز وخساره 

عرفته غير الموضوع جاوبته = لا هماتين اكو فوز وخساره ياالله تعال خلي نلعب 

ابتسم وكلي :: ياالله بس خليني انا اغلب 

= صار 

صرنا نلعب وانا احاول ابطي حتى هو يغلبني ومن يغلب يحجي :: عمي لا تلعبون ويانه احنه ما نتكيش

اجاوبه = هسه مال اخابر علووش ويجي يلعب وياك 

:: لا على بختج هو انا ويه اخت علووش بالشافعات والواسطات غلبتها داسين انوب علووش يخليني وره الشمس 

= العب لا اغلبك 

:: لا شحدج تغلبيني (اتحسر وصفن ) 

حاچيته بسعاده =. شوف غلبتك 

رد بزعل :: گولي فزت عليك 

استغربت من رده وليش ضاج اني اصلا ما زعلته بشي سالته = شبيك (

دخن جگاره هز راسه :: مابيه شي ليش 

= فجاه ضجت 

  نفخ الدخان :: تعبت شويه 

اندك الباب باوعلي وكال :: منو جايينه هسه الساعه بثنعش 

= مو اله تفتح الباب 

:: شني خايف بالمثل اليجي هلا بي 

راح يمشي :: منو منو 

اجه صوت مره وهي اتكله // انا عمو

باوعلي فتح الباب شفتها ساره وهي مبين عليها الحزن والتعب استغرب :: منو جابج بهالليل 

= لاتخاف عمي ما اجيت ابحدي (باوعتلي ) اشلونج وجد 

وكفت ورديت = هلو حبيبتي هلا بيج (باوستها ) اتفضلي اكعدي 

لزمتها من ايدها وكعدتها ع القنفه عاصف راح جاب بطل ماي 

هي فتحت البطل وشربت شويه عاصف سالها :: شبيج بابا ومنو جابج 

- - عمي جاي احجي ويه وجدان

باوعتله وسلهمت عيوني هو هز راسه رغم نعرف اثنينه المن جايه = خير ساره شكو 

لزمت ايدي وتريد اتبوسها وهي تبجي حاجيتها = شبيج ساره ليش دا تسوين هالشكل 

هي ردت بعبره // وجدان وابوس رجلج ارجعي البهاء وانا اصيرلج خدامه خدامه شنو اصلا اتطلك منه بس ارجعيله 

شفت عاصف عيونه صارن بگصته ويريد يگوم ايكسرها 

   عضيت شفتي وغمضت عيوني يعني اسكت = انتي شدا تحچيين

- - جاي اكلج اتطل...

قاطعتها = انتي جايبه تلفونج وياج 

استغربت // اي ليش 

= افتحي التسجيل حتى بهاء ايسمعه مو هو دازج 

باوعت العاصف واني اطك باصابع اديه ولامه حلگي واتنفس هو وگف وگال :: راح ادخل للغرفه بين ما تخلصن كلام 

= لا عاصف ابقى 

:: مي خالف اخذن راحتجن

هزيت راسي = ما عندي شي اضمه لا عليك ولا على ساره 

:: مي خالف اروح وانتي سولفي براحتج 

دخل للغرفه واني ادري هو يتصنط الكلامي لان الغرفه كلش قريبه ع الصاله يعني كل شي يسمع والشباك 

الداخلي مفتوح فهو يسمع كل شي واني هماتين اتعمدت ارفع صوتي باوعت الها هي ردت 

- - ما دام عمي عاصف ما موجود فدوه اغديلج ارجعي البهاء والله متسودن عليج ومالج غرض لا باامي ولا باامه 

هو يخليلج بيت اهنا ابغداد وشتردين حاضر فدوه وجدان الولد يحبج وراح يتخبل عليج

= انتي شدا تحجيين استغفري ربج هذا الكلام ما يجوز 

صارت تبجي بحركه //. وجدان انتي ما شايفته ما شايفه حاله هو مو صوجه صوج ابوي وامي رادو بس يتزوجني 

انا اتفقت ويا اذا انتي ما ترديني ايطلكني وانا ادري بي ما يحبني وانا حقيره قبلت وفرضت نفسي علي كلنه ندري هو 

ايحبج لا شنو يحبج يموت عليج اغديلج فدوه وجدان ارجعي وشتردين يسويلج

اسمعها واني مذهوله واحچي ويه نفسي = الحقير يريد يرجعني حتى يتفنن بتعذيبي 

  اتنفست قوي واخذت كلنس قدمتها الها = انسحي دموعج ماكو داعي للبچي 

   هي باوعتلي ابتسمت = شوفي حبيبتي ما احب لا اللف ولا الدوران من الاخير اني وبهاء اتزوجنه والله ما قسم النه 

ان نكمل انفصلنه لا حرام ولا عيب ولا ما صايره وبهاء ابن عمي بس انتي ياساره اختي واني لو تنطبك 

السموات ع الارض ما ارجع البهاء لان بكل بساطه بهاء زوج اختي ومن اخذته اخذته مجبوره واتطلكت واتزوجت 

عاصف وانتي وهو وكلكم تعرفون منو عاصف فسلميلي علي خلي ينتبه الج والابنه وهاي العيطه الي دا يسويها 

ما تفيده لان اني ما حرجعله حتى لو طلگني عاصف حتى لو عاصف مات اني ما ارجع البهاء لو اعرف اموت 

من الجوع لو اكدي بالاشاره ما ارجع هذا اخر كلام واني طلبت منج تفتحيين التسجيل حتى هو يسمعه وامج ومهدي

وگفت وحچييت بعصبيه = كافي اني احب زوجي ومستقره واريد اعيش اكمل حياتنا سويه رجاءا عوفونه 

بحالنه وكل واحد ينتبه النفسه مو كل شويه واحد جاي يامهدي ونهوده يافرح ورجاء 

- - بس وجدا... 

= ساره ما عندي كلام غير هالكلام اذا باقيه ايهنا خلي نغير الموضوع ما احب احچي بي 

- - يعني انتي صدك متزوجه عاصف 

= استغفر الله لعد شنو گاعده ويا ايهنا عيب هذا الكلام خلي رجلج وكل الي يحچي يلزم حده تره اني لازمه عاصف 

بالگوه عنهم

هدىت شويه وكلامها اتوازن // ياالله انا اروح 

= شلون ترحين هسه باتي يمنه 

ابتسمت // لا متانيني بره تصبحون على خير 

= وانتي من اهله ديري بالج على نفسج وفرحينه عن قريب بجية بدر الزغير 

- - ان شاالله

        وكفت وحچييت =. عاصف عاصف تعال ساره راح تروح

طلع من الغرفه :: وين رايحه باتي يمنا 

- - غير مره عمي متانيني بره مع السلامه 

راد عاصف يطلع وراها اني لزمت ايده لان اعرف بهاء منتظرها 

سالها ::عمي اكيد متانينج 

- - اي عمي واگف بالباب

طلعت ساره وهو سد الباب وراها اني واكفه واباوع اله شفته كلش عصبي حاچيته بعصبيه اكثر منه 

= سمعتني شگلت مو ( باوعلي رديت ) = هسه انت تسمعني امامك تلث حلول 

احسب بصابعي =. الحل الاول لو تصارحني بكل شي وبعدين نقرر حياتنا 

= لو تطلكني وتعوفني اني واخويه يااما اهنا او بالبستان وبشرط ما اشوفك نهاىيا ومعليك بيه واني 

اشوف حياتي 

اتنفس بعمق :: هذا اخر كلام 

ما اتحملت صرت ابجي = او الحل الثالث تقتلني وتموتني وتريحني من الي اني بي 

رحت امشي هو رد بصوت حزين خلاني اخاف واوكف :: حلولج ذني تلاثتهن بيهن موتي 

سمعت جملته الاخيره رجعت باوعتله هو بيده جگاره وگاعد ع القنفه رجعت يمه واحچي ويا بعصبيه 

= شنو تموت منين 

:: خايف 

حركت ايدي = هاا منين 

  :: منج 

صفنت بوجهه كان متعب ومقهور هز راسه. وسلهم عيونه :: منج انتي تموتيني

فات للغرفه واني بقيت بالصاله ابچي بصوت مسموع مقهوره رحت دخلت الغرفتي ودموعي تجري 

= على شنو ليش ابجي هاي ثاني مره اسمعه اذا اتركها امووت لعد بس انت جاي تقتلني 

فتحت الباب ومشيت وصلت الغرفته واني اشهك من البچي شفته متمدد على صفحته والضوى طافي وصلت يمه 

گعدت على طرف الچربايه هزيته بايدي حاجيته بكلام متقطع //هسه تگعد اتكلي ليش تمووت

صرت ابچي واني ما لاكيه اي مبرر التصرفي گعد وشافني گاعده واشهك هوحضني وهو ساكت احس گلبه دخل 

ويه گلبي من كد ما كان يرجف 

وهو يحچي ويكلي :: كافي لا تبجيين 

العبره بصوته ورغم ظلمه بس متاكده هو جاي يبجي رديت =. انت هماتين جاي تبجي 

:: على روحي ابچي. على روحي 

صرت ابچي حييل وبقيت حاضنته وفاصله عن. كل شي وهو يمسد على شعري بهدوءه ورزانته

=. هسه كل شي تحجيلي اذا تريدني ابقى وياك وما اتركك 

:: كافي لاتبجيين ابنيتي لاتبجيين بس ما اريد اشوف دموعج تخليهن من اموت 

   اتنفست = لا تكول هالشكل الصبح تاخذني الامي 

   :: وين ؟

  = الامي اريد اروح مشتاقه الها وهناك اقتلني واغسل عارك وخلي گلبك يبرد 

اتنفس ورد بهدوء :: صار اسكتي لا تبچيين

  = زين انت مو تعيط على مهدي وعلى نهاد وحتى على رجاء ليش ما تعيط عليه 

       گال حچايه رجفتني :: لان انتي روحي لا تعوفيني من اتعوفيني اموت

صرت اشهك بحضنه =. عمو اني ...

:: ياروح عمج ما اريد اشوف ادموعج شنو التردينه يجرالج 

=. وعد

بقى يمسد على راسي واسمع بس انفاسه هدىت فتحت عيوني شفت نفسي نايمه بحضنه على ايده 

وجهي بصدره 

ايده الثانيه على ظهري اتذكرت البارحه والي سويته والي طلبته 

اول مره انام براحه انام باامان ما حبيت اكعد واسوي حركه لان شفته غافي عبالك طفل شابع بجي وتعب 

ونام نوم عميق ف اعرف بمجرد ما اتحرك راح يكعد بقيت متمدده واحاول حتى نفسي الي اتنفسه يكون على كييف 

احب شي الي من اشوفه نايم البراءه الي بوجهه تجبر الواحد يباوع اله 

احچي ويه روحي = خلي اينام الله يساعده شكد متحمل وضام بكلبه وانوب اجيت اني كملت علي 

رن تلفونه اتحركت اريد اگوم هو شاورني باذني :: خلييج لا تكوميين

كانت انفاسه حاره وهو ضامني بين اديناته بقييت بحضنه وهو بس يتنفس بعمق وايده حاضنتني اني غمضت عيوني 

وهنا توالت عليه الاحداث الي مريت بيها غزوان والي سوا 

  بهاء وظلمه وتعذيبه الي ومقدار الاهانه والمذله الي شفتها منه صار گلبي يدك وجسمي كزبر حسيت حتى 

نفسي انقطع وروحي تلوب اريد اتقيا

حس عليه وعلى رجفتي فتح عيونه :: شبيج وجد 

گعدت واني مختنكه عبالك واحد يركض وراي وبس نفسي عالي والتلفون ما بطل يرن 

:: على كيفج روحي غسلي بيج تگوميين 

غمضت عيوني وفتحتهن گمت احس دايخه واعرف بي يراقبني رحت للمغسله غسلت واني احاول اتقيا بس ما گدرت 

مجرد بس اهووع لكن بدون اي شي اجه وراي لزمني من كتفي من ورا اني راسا فزيت وابتعدت هو سالني

:: يحتاج اخذج للطبيب 

  هزيت راسي بدون ما اجاوبه 

:: شبيج وجد 

بقيت بس اتنفس وانا صامه حلكي هو كال 

:: هاي احنه غفينه وما درينه بروحنه روحي للغرفه ارتاحي

دخلت للغرفه وصليت ارتاحييت شويه واني ما لاكيه اي مبرر لا التصرفي البارحه ولا الردت فعلي هسه 

  اسمع موبايله يرن طلعت للصاله وهو هم طلع من الغرفه الثانيه گال 

  :: شنو امي شعدها جاي تتصل

كعدت = رد عليها 

... :: الو 

:: هله يمه 

  :: الحمد لله 

اشرتله اذا تسال عليه ايكلها نايمه

:: هاي هي يمي نايمه 

استغربت كلامه هز راسه :: حجيه انا هسه بطريق الزياره 

    : :اي رايحين نزور 

     :: رحم الله والديج نايمه اكعدها 

      : : اي بعد انتي تعرفينها 

  :: ها يمه 

  :: يمه اصفي اموري وانتي وياي

شفته يحرك بيده الي كنت نايمه عليها عرفت جاي اتاذي الله يساعده راسي شكبره 😜😜

رد بنوع من العصبيه :: اكبر واحد ما يمنعني عنج بس ما ترهم اخذ مرتي هناك هسه 

:: لا يمه ما اعوفن شغلي وگاعي بس انتي تعرفيين ما دام بهاء وامه ونهاد جيراني ما ترهم 

:: نتبايع حجيه واليريدونه يجرالهم 

  بقى يستمع :: باجر اوديلج جابر روحيلج يومين وارجعي 

  :: انا اخابر كريم واگله يخلي علاوي يمه 

  :: لا يمه لاتاخذينه خلي يم بيت كريم اطيني كريم

  :: هلا ابو كرار 

  :: الله يسلمك اكلك باجر اخلي جابر يمر على امي ياخذها 

  :: ياخي ما تسمعها تريد تروح البيتها خلي علاوي يمكم انا امرن واجيبه يمنا 

  ؛: تسلم ماكو فرق عدي شويه شغل 

  :: تمام هذا هو ما محتاج شي 

  :: الله يسلمك 

  :: ان شاالله كتلك بس اكمل الشغل نجي نتعشى يمكم 

:: فيمان الله

سالته = شكو 

:: ماكو شي امي تريد تروح البيتها وانا طلبت من كريم يخلي علاوي يمهم 

   = ليش ما تجيبه لهنا 

    :: هسه هو متونس يم ولد عمه اهنا شيلكى حبوبتج سالتني عليج 

   = سمعتها 

ما خليته يحجي رحت امشي = ياالله نروح 

  :: ما تتريكين 

درت واني لازمه يدة الباب = لا عود بالطريق ناكل رايحه اخذ حمام وابدل 

هز راسه =. وانت هم 

   :: سبقتج

فتت الغرفتي وطلعت ملابس وبوجهي للحمام غسلت ولبست بعشر دقايق واخذت العبايه بايدي طلعت ما شفته بالصاله 

رحت للغرفه دكيت الباب هو رد :: فوتي 

  فتحت الباب شفته كاعد جاي يمشط ولابس دشداشه بيضه شنو بيضه ناصعة البياض سالته 

= خو هذا لبسي ما بي شي 

  :: لا ما بي شي العبايه وين 

   رفعتها = هياتها بايدي

باوعت الوجه المخده بي دم رجعت سالته بخوف :: اوكف هاي انت واكع من خشمك دم 

هز راسه = وهاي انت ليش ما تروح للطبيب 

   :: هاي انا عندي علاج 

  = اي بس لازم تعرض نفسك على طبيب 

=. هاي البارحه وكع منك دم 

    هز راسه :: اذا كملتي ياالله 

  طلعنه بايده العلاكه وبيدي العبايه ركبنه واخذ العبايه خلاها وره هي وعلاكته ركبنه گال 

:: توكلنا على الله

ساق السياره وهو ساكت واني صرت اباوع من الجامه اشوفه يحرك بشفايفه عرفته جاي يقرا ايات 

مشت السياره والسكوت سيد الموقف لكن اني مقرره لازم انهي هذا الشي واتوصل الحل 

طبعا الجگاره بحلكه مجرد ما يكملها يشعل الثانيه سالني بعد ان مشينه تقريبا ساعه

:: ننزل نتريك 

  = بكيفك 

  :: اي خلي ناكل اي شي ومن نوصل ندخل مطعم 

باوعتله = هم بكيفك

وكف يم كشك ع الطريق :: السلام عليكم 

عليكم السلام وهله 

:: انطينه اثنين جاي 

صار 

:: تنزلين تشترين نساتل وبسكت 

هزيت راسي يعني لا هو نزل جابلي كوب الجاي ويا نستله وبسكت اخذتهن وصرت اشرب الجاي واكل بالنستله 

وبعدها اجه جايب ماي وجبس ليز اثنين كبار ركب وسالني :: تردين بعد جاي 

= لا شكرا 

:: نمشي لو تردين شي 

= اريد علج وحب

   ابتسم :: ونفاخ ما تردين 

   = تستهزا بيه امشي ما لازم 

ابتسم وكال للبياع :: ياولد (سالني ) تردين كرزات لو بس حب

= الي يعجبك 

:: انتي شتردين 

   = حب الشمس 

    اشر للولد :: تعال بابا جيبلنه حب شمسي باالف وجيب جيس كرزات وعلج ابو النعناع

جابهن حاسبه ودك هورن رفع ايده ع البياع واصلننه سفرتنا فتحت الجبس وصرت اكل سالته = تريد 

   :: لا 

  = ليش طيب 

  :: ما اريد 

  = تره مو مال زعاطيط جبس بطاطا احسن من الجگاير 

  :: تضوجين لان ادخن 

  = هوااي

اخذت جبسايتين وخليتهن بحلكه هو اخذهن وصار ياكل ويگلي :: ما احبه 

    = هو طيب انت الي ما تاكله بس صدك اذا تتعود تاكله راح يفيدك هوااي 

   :: يعني قصدج كل ما اريد اورثلي جكاره اخلي بحلگي جبسايه 

   = اي وهماتين سلس حب واعلج وشويه شويه تنسى التدخين 

   :: حتى اصير برميل مال نفط 

    سالته باستغراب = شنو تسمن 

   :: اكيد هذا بتيته وزيت يسمن يو لا ؟

اتخيلته سمين هزيت راسي = لعد ابقى هالشكل بس حاول لاتدخن هواي 

     فتحت حب الشمس انطيته سالني :: انتي شلون تاكلينه 

   = احبه مو بيدي بعدين هذا نباتي يعني ما متدخل بي الانسان وضايفله اشياء تخليك تسمن 

   :: انتي تدرين من نزرعه وما نسوقه شنسوي بي 

     هزيت راسي = لا اصلا ما ادري تزرعونه 

     :: اي بالبستان الثاني نزرعه ونستعمله علف للحيوان

     باوعتله = بربك ؟

   هز راسه :: اي وداعتج 

   = عمو لعبت نفسي بعد ما اكله 

  :: ليش 

  = شنو ليش مو تستعملونه علف 

  :: ليش الحيوان ما ياكل الخبز الخضره التمر تره الحيوان الاليف بس ما ياكل اللحم 

بگلبي گلت = خلف الله عليك سويتني حيوان

رد :: سلسي بس مو هواي لان بي دهن وراسج يظل يوجعج 

=. تدري هسه عرفت انتو تزرعونه الهذا الحب بيبي كانت تنطيني واني احس بالفرق بالطعم 

    :: لان كاعنه ترابها حلو فتطلع كل شي حلو 

   = واني ولا بيوم سالتها منين تجيبونه عبالي انت تجيبه 

:: هو انا جايبه 

= عرفت قصده لان الگاع مالته 

بقى ساكت واني اباوع من الجامه واترقبه يحجي على البارحه لكن هو بقى يسوق ويدخن ومرات يشغل راديو على ادعيه 

الى ان دار عليه راح نوصل الكربلاا نزور ونرتاح شويه وبعدها نروح للنجف وغبشه نروح للمگبره 

ما عقبت بقيت ساكته ومو عبالكم ما خايفه لا جاي تجيني افكار تخوف وتهيؤات بمجرد ما گلي نروح للنجف 

ونغبش ع المكبره

وصلنه الكربلا هو خلى السياره بكراج وگلي انزلي البسي عباتج عدل 

اخذت العبايه لبستها وصرت امشي بصفه وصلنه المطعم دخلنه وكلي فوتي غسلي بالحمام 

رحت غسلت اديه ورجعت ولگيته گاعد گلي 

  :: طالب تمن وقوزي لحم ويا مقبلات وخبز حار 

هزيت راسي =. بكيفك 

  :: لا من اتضوكينه راح اتدمنينه كل ما نجي راح تكليلي خلي نتغدا اهنا واذا عاجبج شي اطلبه الج 

  = لا كل شي نعمه

ابتسم جابو الغدا وصرنا ناكل هو حاجاني :: اذا ما عاجيج الاكل اطلبي اي شي يعجبج 

  = لا طيب كولش 

   اتغدينه وشربنه جاي ورحت للحمام اتوضييت وعدلت حجابي طلعت سالني 

  :: نمشي 

= بلي 

  :: ياالله 

من وصلنه واتراءت القبتين ما اوصف شعوري دخلنه باوعلي :: اهنا نلتقي تمام احفظي المكان 

  هزيت راسي = تمام 

   :: اخذي وكتج يمته ما يعجبج اطلعي حفظتي النقطه الداله 

   = بلي 

   :: ديري بالج على نفسج

هزيت راسي ورحت زرت وصليت ودعيت والتقينه بنفس المكان وبعدها رجعنا سالني اذا يعجبج نبقى ايهنا او نروح للنجف 

= خلي نروح للنجف 

:: براحتج ياالله خلي نتوكل 

صار عصر كلش قريب المغرب ساق السياره فتحت عيوني لكيت روحي غافيه وهو مخليلي مسند باوعتله رجعت 

غمضت عيوني كلي :: صح النوم 

اتثاوبت رد كلي :: ياالله خلي ننزل  

باوعت احنه بكراج وهو طلع العلاكه وصرنا نمشي سالني :: شنو منعسه 

    = لاكسرت نعوستي بس انت 

   :: انا شبيه 

  = يعني بس اتسوق اكيد تعبان 

:: متعود هسه خلي نروح للفندق نحجز وشويه نرتاح وبعدها نزور

وصلنه الفندق كلش فخم هو كلي اكعد انتظر وهو. راح وبدا الحجز اتقرب مني وگلي :: ياالله 

صعدنا بالمصعد للطابق الثاني فتحلي باب دخلت وهوو دخل وسد الباب شفته سويت مو غرفه حاجيته 

  = يعني لو ماخذ غرفتين منفصلات مو احسن 

هو گعد ع القنفه وهز راسه :: لا مو احسن شني اخليج ابحدج 

  = اي شنو عليه 

  :: ها وانا 

بلعت ريگي = انت شنو 

  :: انا شنو جايه وياي لا انتي بتي ولا اختي ولا انا عمج لو خالج جايه للفندق بالمثل صاحبتي العلمج لو ما شافو 

العقد ما يخلونه دقيقه 

شكرا لزيارتكم عالم روايات سكيرهوم