رواية يوميات هجران الفصل الرابع بقلم شروق الشمس
زهره بعد ما رجعت من يم هجران رحنا بيت اهلي علوش راح ويانا على مود يدرس ياسين بعد ما رجعنا محمد نام لان جان تعبان من الطريق والجهال همينا كلهم ناموا نيمتهم بقينا بس اني وامي قاعدين نحجي جانت كلش هوايه مقهوره امي من عمامي عمي الصغير كلش هواي شاد وياها
ام هجران.... زهره يمه ليش ما تظلين يمي كم يوم كلش تعبانه اني ورايدتج يمي
زهره.... والله يمه لو بيدي ابقى العمر كله يمج بس تعرفين عندي دوام ليش ما ترحين وياي هناك تغيرين جو وتتونسين شويه وهم ياسين يغير نفسيته ويستعد للامتحانات
لا والله يمه ما اكدر اروح وياج اخوج عنده امتحانات خطيه خليه يقرا على مود ينجح
يمه اشبيج احسج مو على بعضج احد وياج من جنا يم هجران وانتي مو تمام احسج مو ويانا عقلك شارد بغير مكان بس جسدج ويانا بيج شي احد غاثج
اوف اوف ولج يمه شنو اكول شنو احجي لج هذا عمج ال.... اد شاد وياي فرد شده
ليش شكو هم رجع على سوالفه القديمه
ولج يريد يتحكم بينا بالطبه بالطلعه يكول كون من تردين اتطلعين للدكتور تجين وتطلبين مني فلوس تكحلين عيني تاخذيها لو قولي لي واني انطيك انتي منين عندك فلوس وهي جايه تصرفين لا نعرف منين فلوسج ولا نعرف شكد عندج منين تاكلين وتشربين كلت له من انت تعرف اني ما عندي فلوس ولا عندي مدخل اللي اصرف من عنده ما تجي تدك بابي وتسال علية ليش الا اني اجي تريدني اطلب من عندك يعني انت اكحل عينك اني من اطلب بس انت جاي تذلني شنو اني اريد اروح والله ابني يشتري له لو احنا مشتهين شيء زين واجي اني اطلب من عندك والله تعال ابو فلان تعال اريد من عندك ربع لو 500 والله ابو فلان محتاجه دكتور تعال انطيني وين لاقيها هاي
يصيح ويخلي اذا بوجهي يقول لي انت كله من وراج انت اللي خليتي هذا الولد يتكبر علينا انت خليتي ما يسمع كلام عمامه كلت له ابني ما مسوي الكم شيء ابني كافي خيره وشره من المدرسه للبيت ومن البيت للمدرسه حتى ويا جماعته ما يطلع شنو تريد انت من عنده يكول لي لا تخلينا يتنمر علينا قلت له احنا من جان ابونا موجود ما تنمرنا على الاكبر من عندنا مو هسه ما عندنا اب وتريد ابني يكبر عليك لو يتنمر عليك بس انت لا تاذي ترى ابني مو صغير على مود لا يردك يمه هوايه حجة وهوايه اكل تبن شنو اسوي اله تعبني وقهرني يريدون يذلوني باللقمه خلف الله على هالراتب هذا اللي عندي اللي جاي اعيش من عنده واللي اانتي تنطينه اختج تنطيه لو ما انتن والراتب جان ياسين من زمان بطل وكام يشتغل
بعدنا ما مكملين كلامنا جان يدك تليفون محمد اباوع الساعه 2:00 بالليل كلبي كلش كام يوجعني يا ستار شكو فز محمد اخذ التليفون وطلع بره شويه ورجع وجهها مكلوب
خير شكو
ماكو شي بس لازم هسه ارجع
واحنا
ابقوا هنايا كم يوم واجي عليكم
اكو شيء محمد ترى كلبي كام يلعب
لا ماكو شي بس اكو سالفه صايره وسعد خابرني يريدني من الصبح بالمضيف وياهم
سالفه وياكم ويا غيركم
ما ادري بس اللي اعرفه صايره هوسه ولازم هسه ارجع
خلينا نرجع وياك
لا اخاف على الجهال يصير بيهم شيء اذا ما كدرت اجي ادز واحد عليكم ويجيبكم
تمام بس طمني عليك من توصل
يلا يابا هذا الوالد حبيبتي انت يا روحي بس سوي لي شاي الحد ما اجاوب ابويا
اسوي لك شي تاكله
لا ما اشتهي مستعجل ديري بالج على نفسج والجهال
طلع محمد بره يحجي ويا عمي واني سويت له شاي عالسريع اخذ اغراضه وشرب شاي وطلع دكيت على وعد يرفضني دكيت على امل ترفضني ضل بالي يا رب شنو صاير هناك
ام هجران... يمه صلي على النبي ماكو شي ان شاء الله لا يظل بالج هي هاي السوالف العشائر يوميه مشكله
بس يمه محمد ماله شغله بسوالف العشائر ولا اله شغله بالمضيف ليش هسه دكوا عليه ياما وياما صارت سوالف واكبر من هاي الشغله وعمي وسعد اللي يحلوها اصلا ما يدخلون لا محمد ولا رعد كل الكباريه تكعد بالعشيره والله والله يمه كلبي يلعب ليش محمد ما رجعنا وياه اكو شيء والله ظل بالي يمه شلون كولي يا الله يمه والله كريم اللي بي خير الله يقدمه الله يبعدكم من الشر ان شاء الله ضليت طول الليل الوب لحد ماوصل محمد وانطاني خبر بوصولة للبيت طول ليوم محمد مادك علية ساعة 12 خابرني كال تحضرو اجي اخذكم لصبح اني هم حضرت غراضنة ساعة 6 صبح اجة ودعت امي ورجعت ابد ماحجينة شي اشوفة ضايج وتعبان وصلنة للبيت كلهم نايمين كبل للغرفة خليت لجهال نايمين بمكانهم رحت للحمام سبحت وغيرت ملابسي من طلعت محمد نايم ومخلي ايدة على عيونة دخلت بحضة
اشتاقيتلك حبيبتي
واني هم يروحي
شبيك حبيبي شصاير
سالفة جبيرة
شكو حبيبي احجيلي
اول شي تعاي احجيلج شلون مشتاقلج وبعدين احجيلج لسالفة
هههههه لا اتصير وكح
تعاي لج
احميد اكعد راحه
سحبني لحضنة ورحنة لعالمنة لخاص بعدهة ماضل عندي طاقة اسمع لمشكلة كبل نمت فزيت على جعفر يجر بشعري ويضحك اووووي فدوه تروحلك امك
ديمة.... اي عيني بس لجعفر افندي ترحيلة فدوه دكتورة
افديكم بروحي كلكم حبيبتي شعندي اغلة منكم
روح..؟ اي ياسين وبابة
لا ياجلبة
ماعاجبهة تهز بسدهة هي وكفشتهة طفرن علية بقيت ادغدغ بيهن وهنة يضحكن
روح... مااااامة كافي بطني جوعانة
خرة بمج تخربين ابو لسالفة انتي
محمد.... هههه مجايبتهة من غريب وكت لرومانسية اتصيحين جوعانة 😱 عزاااا اني
روح.... بااااابة
روح ابوج انتي
ديمة.... بابة انقذنة من عدهة موتتنة من لجوع الله يقبلهة
لا يا بت لزمالة هاي اني موتتجن من لجوع
روح.... اي والله نكلج جوعانين وانتي نايمة ومخلية جعفر بحضنج
لج بت لجحشة منو طفرة علية وهي كلهة ريحة جبس
تمسح بحلكهة وايديهة وتصيح وين اني تعال تعال حمادة اشتمني بية جبس
محمد.... شمهة بشوغة فيشش لا يروح حمادة مابيج اي ريحة بس لجذب حرام
روح.... تغمز اله جذبة بيضة حبيبي
طفرة عليهة ومحمد لزمني من خصري رفعني علية هي طفرت جوه واني مشعوطة فوك ديمة خربانة ضحك
محمد.... فدوه اروح لهاي عركاتجن الله لا يحرمني منهن ديمة بابة اخذ اخوج ونزلي لبيبيتج
زهرة.... نزلي محمد خلي ابدل لجعفر لا ينزل بملابس لنوم
بهمس يحجيهة
ابد والله مااعوفج غير كزكزت عليج وانتي بهذا شكلج لمخربط
ضربتة بطنة وهوه سكران ضحك ديمة نزلت هي واخوهة وهوه شمرني للجرباية وقفل لباب
شنوووو راح اتسوي
اعيدلج سالفة لصبح
ماااااريد
مو بكيفج حبيبتي
من بعد عركة وجر وعر استسلمت اله واخذ ليريدة مني سبحنة ونزلت جوه سلمت عليهم جانت خالدة موجودة ومحضرة لغدة همة متغدين صبيت النة وتغدينة بس مو طبيعيين اسألهم شبيكم محد يحجي ويغيرون لسالفة بعدهة كلت شعلية يجوز سالفة بيناتهم ميردون يحجوهة
ثاني يوم لصبح رحت للدوام وصلني محمد
زهرتي
عيوني
محضرلج مفاجأة من تخلصين دوام دكي علية اجي اخذج
تمام حبيبي
دخلت للمستشفى وخلصتهة بين لمراجعين اليوم ماكو عمليات الحمدلله طلعت من وكت اجة محمد ولبنات وجعفر وياه بالسيارة
بعد مابوستهم وشميتهم يالله صعدت ليكدام
شو حبيبي شنو لمفاجئة
هسة نروح نتغدة واكلج شنو هي
تمام
رحنة تغدينة بمكان كلش شعبي بس اكلاتة اتجنن بقينة بالسيارة ومحمد جابلنة واجة لجو حلو لا حاࢪ ولا بارد نزلنة بحديقة كعدنة تحت لمضلة وبدينة نتغدة احس لفرحة مسايعتني بهاي لمة مالتنة رجعنة للسيارة وطلعنة بمكان مثل لصحراء فارغ كلشي مابي
هاي وين رايحين
شنو جنتي تردين مني من جنت بالدوام
لاااااا بشرفك
ههههه اي وعدتج وهسة راح انفذ
بس لجهال ويانة
علمود يشهدون على طموح امهم من اول خطوة
ياااااعمري انت حضنة من ايدة وخليت راسي علية وصلنة بنص هاي لصحراء مااعرف ساحة لمهم بدلنة مكاناتنة وبدة بااول خطوة يعلمني لسياقة اني جنت اعرف شي قليل لان بابة الله يرحمة علمني عليهة بالاول جنت خايفة بس بعدين لا بديت اتعود
ههههه لج طلعتي سايق مضبوط
لعد شعبالك حبيبي غير اني ماحجي
ههههه استمري عاشت ايدج
وبدة وياية خطوة بخطوة ماحسينة اله واني موصلتهم لمنطقتنة جان نشوف وعد لمشعشع بسيارتة وكف لسيارة وطلع نص جسمة من لجام ويصيح
لكككككك هااااااي شنوووووو لبررررغي يسوووق
من كد الارتباك مالتي جبتهم بالمكان مال لزبالة اجلكم الله
محمد..... خرررررررة بيك لك انت زمال شلووووون هيج تخرعهة لو صاير شي بيهة وبالجهال
زهرة بيج شي صارلج شي يروحي انتم بابة بيكم شي
زهرة.... هدي نفسك حبيبي كلشي مابينة شوف سيارتك خوما بيهة شي
انعل ابو لسيارة اهم شي انتم
لا يظل بالك والله كلشي مابينة
تعاي تحولي خليني ارجعكم للبيت
لا خليني اني اكمل لطريق
خايف عليج
لا تخاف حبيبي
عدلت لسيارة ورجعنة للبيت بس وعد اختفة بعد من شاف محمد جدي ومتعصب اله اني طايرة من لفرح
خوب روح ابد متضم سالفة كبل لبيبيتهة خلتهم بجفهة وتحولت لفيصل هم جانو هوه وامل عدنة سلمت عليهم وصعدت سبحت وبدلت نزلت احضر للعشة وامل وياية
اكلج شكو هذاك اليوم مخبوصين
ليش ماعرفتي
لاوالله محد حجة
سمعي هاي عشيرة..... بتهم منهزمة منعدهم وية واحد
عزززة بعينة
اي والله اهلهة ناس فقرة اجوي ذبو حملهم بمضيف ابوية وتنخو هوه وسعد نص لطريق جانو لازمينهم عمامهة مصوبين لولد وعايفينة بالشارع وهي جايبيهة سحول اول ماطبت اهنا جان تصرخ اني دخيلة عدك شيخ سعد بعد مايكدر يحجي شي لان هي دخلت عنده وهسه هو محتارين بين اهلها وبينها لازم سعد ينصفهم لان هو الشيخ قدام العشيره لذلك اخابر محمد بهذا الوقت راده يحل السالفه محمد يتكفل بالحكومه وهو يتكفل بالعشائر هاي البنيه هسه ببيت سعد لان دخيله ما ينطيها لاهلها لحد ما يحل السالفه وهسة كلهم مختبصين عليهة
زين ولولد لشردت وياه وينة
محد عرفلة طريق بعد سعد كلهم خلي يجي ونزوجهم بالعلن وتفظ لسالفة
دوورو علية مالكو محمد كال هذا يريد بس يتونس بيهة ويعوفهة لا اكثر واصلا هوه مو منا من غير محافظة وهي تكول لو تذبحوني مااكلكم منين هوه
يمة عززززة بس لا يخلونهة براس واحد من لولد
لايمة اسم الله غير اذا تورط بيهة فيصل اموت
والله اذا محمد قبل بيهة اعرفة وارجع لبيت اهلي مستحيل اقبل
محمد..... اكو واحد يبدل لذهب بتنك هاي صدك هيج تفكرين بية اني ليش ماحجيتلج لان اعرفج راح اتضلين تفكرين وتهوسين بالج
وثاني شي هي دخيلة مايصير ناخذهة
يعني حماده حتى لو تنجبر مراح تاخذهة
لا رد...... الله كريم بنتي لا تفكرين وتعبين روحج
راح محمد وبقينة اني وامل
أمل
ها
ليش احس اكو شي اكبر من لجاي يصير هسة ولسمعتة
والله مااعرف
احس محمد اكو شي عنده بس ميحجي
شلون يعني
شوفي تصرفاتة محمد بس من يرتكب ذنب بحقي هيج يسوي
بس ماشفت شي منة
لا انتي مجاي تحسين بس اني احس اهتمامة زايد اهواي
والله ماعرف الله كريم
اخذنة لعشة وكعدنة كلنة تعشينة بس ابد مو نفس كل مرة ضحك وسوالف كلمن ملتهي يفكر وساكتين واحنة على لعشة جعفر بحضن محمد نام عفت عشاية وكمت اخذتة منة
عوفي اني اخذة للغرفة
لا اني كمت بعد شبعت
بس مااكلتي شي
شبعانة من لغدة
تمام اخذي
اخذتة وصعدة فوك خليتة بفراشة ونزلت جانو مخلصين لمينة لمطبخ وكعدنة ثاني يوم هم محمد وصلني للدوام ونفس سالفة لبارحة كال اني اجي عليج خلص دوامي جان لساعة 2 طلعت لكيتة منتضرني بدل مكانة واني رجعت بالسيارة للبيت وهيج بقينة طول اجازة محمد كل يوم جنت بس ارجع بالسيارهة هنوب لا كمت اروح وارجع بس هوه كاعد يمي ابد بعد مافتحنة طاري لدخيلة لان كل لهوسة بيت سعد ولمضيف مو يمنة باجر محمد يلتحق بليل نايمين اني بحضنة وديمة بالطرف لثاني نايمة روح على صدرة مخليهة وجعفر بحضني ونباوع افلام كارتون وية ست روح جان بهمس يبوسني
ماكو وداعية
غير لجهال ينامون
وانتي غير تفكرين بمشاعري الي انعل ابو خيرهن بهذا لبسج لج بوية كبرتي بعد انتي وبناتج نفس لزي لابسات على منو اكزكز بيجن
ركز بس علية حبيبي
ههههه كلشي بسة مركز عليج
سحبني لحضنة وايدة تلعب بشعري شوية شوية جوه لكيمونة راحت ههههه اباوع علية بعد ميتحمل اكثر اعرفة كمت خليت جعفر بفراشة الي حولتة للغرفة مال لبنات لان كبر وبدة يفتهم
يلة ديمة انتي واختج لمكانكم بسرعة
روح..... ما اريد يم بابة انام
ميصير حبيبتي انتي جبيرة لازم تنامين بسريرج
بس اني اريد بابة
محمد.... احسب الج للعشرة اذا متنامين ارجعج لسريرج
روح.... اووووكي
ديمة..... اني اروح انام يم اخوية تصبحون على خير
لحد مدخلت للحمام غيرت ملابس وتعطرت اجيت لكيت روح نايمة رجعت كلشي مكانة ومحمد اخذهة لغرفته اجة يمي وبدت ليلتنة لجان متقبل تخلص للفجر اذن كمنة سبحنة وصلينة رجعت تمددت بحضنة يلعب بشعري ويحجي
زهرة لو بيوم انجبرت على شي وسويتة راح اتسامحيني
لازم هذا لشي بي اذية الية
شي مؤقت
وليش اله انت
لان اعرف نفسي وكلهم يعرفوني مراح اتقبلة بالمستقبل
تقصد لدخيلة
اي
فزيت من مكاني شنووووو اي
هدي بوية مو زين عليج هاي لفزة
فهمني شنو اي
اقصد اذا بيوم انجبرت اعقد عليهة تقبلين
مستحيل
واذا شغلت حياة او موت
بيوم لتعقد عليهة مراح اتشوفني يمك
ليش
مراح تلكة اجابة هسة بس جرب سويهة وشوف شراح يصير
واذا صارت
لا تخبلني شنو شبيك حبيبي شنو هذا لكلام هسة اله نتزاعل يالله ترتاح
خايف اخسرج
لا تسوي لغلط مراح تخسرني
اووووف الله كريم تعاي يروحي انتي
رجعت بحضنة جان يشم شعري بشوغة نام للساعة 6 كعد جنت احضرلة لريوك تريك ودعنة وطلع للدوام بس ضل بالي من كلامة
رجعت كملت شغلي وسويت غدة دكيت على امل حجيتلهة لصار حلفتهة اذا تعرف شي
والله والله ماسامعة اي شي بخصوص لدخيلة ليش
كلبي يلعب من كلام اخوج
اسألي وعد
خايفة
ليش
خاف احساسي صح
شنو راح اتسوين اذا صح
اعوف كلشي وارجع الاهلي
بهاي لسهولة
طبعاً لا بس صعبة امل
حقج
يلة اخذي راحتج حبيبتي
كعدت بالمطبخ انتظر وعد يجي لليل وهوه ماكو عبالك يتهزم مني يعرفني اسألة بهذا لموضوع
تعدة على روحة محمد اسبوع بعد 3 ايام وينزل مجاز بس كل هاي لمدة ابد ماصادفت وعد ولو صادفتة بس كد الاكل ويطلع
دك علية محمد كال بعد 3 ايام انزل ساعة 6 لصبح اريدج توكفيلي بالباب عندي مفاجأة الج
صدك والله
اي يروحي انتي
تمام حبيبي انتظرك حبيبي
خلصن هاي ل3 ايام واجة يوم نزول محمد كعدت من ساعة، 5 حضرتلة لريوك ولحمام وبقيت انتظرة صارت ساعة 6 دك علية كال اطلعيلي للباب
طلعت بس فتحت لباب وجان اهنا لمفاجئة سيارة جايبلي اووووويلي اسود كاحت اجنن بقيت بمكاني من لصدمة نزل منهة لولد تحاسب وياه وراح اريد احجي مااكدر من لسعادة حضنتة بالشارع وهوه ماكال لا شالني ودخلنة للبيت
عجبتج
اجنن
بس ممنوع اطلعين بيهة وحدج لحد مااطلعلج اجازة سوق
تمام حبيبي شكرا شكرا
اشششش مو اهنا اتشكريني بالغرفة
بالاول تعال تريك
خلي ادخل لسيارات للكراج ياللة
تمام
حميت لشاي لحد مااجة محمد تريكنة ولميت لمواعين صعدنة لغرفتنة هوه دخل يسبح وانتي جنت محضرتلة نفسي عشنة اجمل ساعات سوة مقبل ينام راح كعد لجهال واني نزلت اسوي ريوك للبقية لحد متريكو حضرت لغدة كلهم باركولي على لسيارة 3 ايام اروح وارجع بيهة للدوام ومحمد وياية باليوم لرابع ماعندي دوام ساعة 10 دكو علية حالة طارئة ويردوني بالعمليات جان محمد بيت سعد دكيت علية كال طالع بشغلة كتلة اني اروح على كيفي كوة اقتنع اروح
للساعة 4 لعصر ياللة رجعت من لمستشفى اول مادخلت لمنطقتنة جان اشوف كومة ناس وهوسة باب بيت سعد ولمضيف مليان زلم ياستار شكو وصلت البيت سليمان برة فتحلي باب لبيت ودخلت كبل للكراج اباوع وجوهم تنطي الوان كلبي عصرني دخلت للبيت واسمع لهوسة كابة ومحمد يتهادد على خوانة وعمامة وابو بس لسمعتة خلاني اتيبس بمكاني ومااطلع صوت
محمد..... بسسسس فهمووووني تردون تهجموووون بيتي انتم هيج گح.... ة مااخليهة بذمتي اااااني كووووومة اكو غيري خلي ياخذهة
ابو محمد..... مووووو بكيفك انت تاخذهة غصب تنطينة لنيشان وبعدهة اطلكهة واذا على مرتك مراح تعرف بشي كلة ساعة زمن ويخلص
ابو فيصل..... محمد بوية لا تعضمهة وهي صغيرة حرمتك ماموجودة ومراح تعرف بشي بس انطي موافقتك وخلص لا تضيع ولدنة انت تعرفهم زين يم لنسوان يفقدون بس انت كدهة واحنة مانريد هيج وحدة اتظل يمنة
محمد.... مستحيل والله مرتي تموت لو عرفت
ابو محمد.... مرررراح تعرف كنالك
خلي سعد ياخذهة مو هوه دك صدرة
لك ابني دخيلة عنده شلون ياخذهة
فيصل..... شجلبتو ماتكلولي ليش تهجمون بيتة
ابو محمد..... اخر كلام عندي لو انت لو هوه
فيصل.... لو تخلوني جوه لسجين مراح اخذهة
محمد.... مستحيل اقبل بيهة
ابو فيصل..... انه احجي وية حرمتك اكيد تتفهم لسالفة
مستحيل لا اجبروهة لو تحرجوهة والله اخذهم واهج بليلة ضلمة محد يعرف طريقنة
من بعدهة ماعرفت شنو صار بعد لان كميتة لضغط لجاي يصير على محمد مستحيلة
أمل.... كلهة واكفة وتتصايح مانسمع اله هبدة ورانة جان نندار. ونشوف زهرة متكومة بالكاع محمد من خبصتة سوة لستقبال طفرتين وشالهة بحضنة صعدهة فوك ديمة وروح من شافو امهم هيج ضلن يتباجن عليهة كوة ميعاد سكتتهن واخذتهن لبيتهم
محمد.... زهرة اصحي بوية والله مااخذهة ولا اكسرج لا تكسريني بيج بنيتي انتي لا تشلعين كلبي كومي انعل ابو لعشيرة لابو لدخيل عدنة بعد روحي وكل هلي انتي
جان محمد يحجي كلام مو مفهوم ومخبوص بس علمود توعة لنفسهة شوية شوية بدت تصحصح من شافت محمد يمهة دفت راسهة بحضنة وضلت تبجي
الله عليك لا تاخذهة لا تكسرني فدوه مااتحمل اشوفك وية غيري
والله مااخذهة بس خليج قوية لا تضعفين
راح يجبرونك
لو اعرف يتبرون مني مااخذهة واشوف دموعج
والله ان اخذتهة مراح ابقالك بالبيت اكمل حياتي بدون اخاف اول مرة رجعتلك هسة تحمل بعد ارجعلك
لا تهددين كتلج مراح اخذهة كومي اسبحي وارتاخي لبنات خافن عليج
لاااااا تنزل جوه والله يغصبونك تاخذهة
مراح انزل باقي يمج يروحي انتي خوفتيني عليج
رغم محمد طمني بس كلبي ممرتاح ابد تعدت يومين ونسدت لسالفة شلون وليش محد يعرف ومن بعد يومين راجعة من لدوام وية وعد محمد مااجة علية بس وعد مو على بعضة ومن اخذني من لمستشفى بس يتراسل
شبيك وعد
مابية شي
شنو ضام علية
مضام شي
اذا اكتشفت ضام علية شي تخرب خوتنة ولصداقة والله
زهرة والله مااعرف شلون اكلج بيهة بس والله مجبورين انتي مجاي تفهمين سوالف لعشاير هاي
لزبدة وعد
محمد راح يعقد على لدخيلة
شكرا لزيارتكم عالم روايات سكيرهوم
