رواية نعم أحببتك الفصل الخامس 5 بقلم انين الليل

بثينه

اياد إجه من الصبح ابوي مسولفله عه القضيه اياد يمكن لو بيده جا فرمني بمكينة اللحم كان متوتر ما شايف الي كدامه

 هو لزم نفسه كدام امي حاول يكون هادئ لكن غلبته عصبيته حچى وياي قبل ما نطلع بدون مقدمات 

::اكلج بثينه يعني مليون طالبه بالكليه إشمعنى إجه عليج انتي بالذات 

انا عرفت ابوي مسولفله جاوبته بنفس أسلوبه = وانا شمدريني ارووح اسأله مثلا 

اياد وهو يباوعلي ::انا اكلج ليش اجه عليج لان انتي يابت عمي لابسه كيلوين ذهب والموديلات مو 

طبيعيه قصير على ضيك طبعا الحرامي يجي ليش ما يجي عليج والمكياج عبالك رايحه الحفله مو رايحه تدرسين ،

،،امي حاولت تبرد الموقف //يمه على كيفك اياد تعال تريك 

اياد بعصبيه ::ما اريد اتزقنب 

امي //يا يمه اسم الله شنو صار هاي وانت ضابط يوميه تمر عليك أشكال 

اياد بنفس عصبيته ::اي خاله صحيح بس هاي الي تمر علي مو عرضي مو بت عمي 

جاوبته بقلة صبر = هسه بابا إلا يكلك شغله وانتهت ما صار شي اوووف

اياد وهو يخزر بيه ::اي تاففي لعد شتردي خاتون يضمها الهاي الشغله 

انا بصوت عالي = هسه كلنه شغله وانتهت على خير شصايريعني وانت جاي اتعيط 

اياد باوعلي احس الغضب يطلع من عيونه

::أن شا الله تكون انتهت حاجي صديقاتج كليلهن هالايام ابن عمي يوصلني 

جاوبته باستغراب = شنو مو هسه گتلي خابريهن يجن ويانهر

اياد بعصبيه وصوته يرتجف ::مثل ما سمعتي شمدريني عصابه وراهم ناس تكرهنا عاد من يشوفوج وياي راح 

شويه يخافون

انا اتكلم ويه نفسي = اووي يعني هذا العقده يأخذني ويرجعني 

ما اسمع إلا صوته:: يالله امشي ،

حجيت ويه هدى صديقتي كتلها = هلو هدى 

هدى //هلو بثينه اشلونج 

=تمام الحمد لله اگلج هداوي انتي وماجده روحوا لاتنتظروني ابن عمي راح يوصلني هالايام 

هدى //لعد شگد بخيله ما تمرين علينه 

==اووو انا وين وانتي وين شگد بطرانه 

رحت ركبت بالسياره وانا اتخيل عمه كريمه وهي جني ويمها اياد ما كدرت الزم نفسي ضحكت هو باوعلي 

متعجب انا هم باوعتله الاياد يسحب جكاره ويدخن وحده ورة الثانيه بعصبيه انا كحيت باوعتله وانا صوتي 

من الكحه مختنك

= اياد هاي شنو خنكتني بدخان الجكاير،

،،،من غير ما يرد علي طفاها وفتح جام السيارة 

اياد بعصبيه وينفخ :: بثينه متأكده هذا الي أخذ الجنطه انتي ما تعرفي

انا باستغراب =شلك بهالحجي شنو قصدك اعرفه مو عيب هيج تحجي وياي لو مثل لمن تكول كدام ماما 

ألبس كيلوين ذهب وملابس ماركه

اياد بهدوء::انا مو قصدي على غلاءالملابس أقصد عن الموديلات الي تلبيسيها صراحه مو خوش لبس مفصل جسمج

 فصال والشال لابسته إسقاط واجب والحذاء شعلوة وبدون جواريب 

رديت بنتر = شنو قصدك اياد وضح لا تظل تشمر بالحجي

اياد غير نبرة صوته وجر نفس وفتر السيارة وباوعلي وكلي ::أقصد انو لبسج ملفت للنظر

انا بعدم اهتمام = والله اياد انا هذا لبسي ومن زمان وما مستعده اغيره

اهنا جن جنونه وضم ايده وضرب استيرن السيارة وكلي 

::مو صوجج صووج عمي الي مرخيلج الحبل ع الآخر أمس لو خاطفج ما فكرتي هسه احنه شلون حالنه 

ما فكرتي بامج بابوج خطيه ما فكرتي شيصير بحالي اقصد بحالنا 

= اياد انت جاي تحجي عبالك انا كايله للولد تعال بوك جنطتي شنو هالحجي بعدين ما ملاحظ نفسك شون تعيط عليه 

اياد ::بثينه مو قصدي اعيط بس مره ثانيه انتبهي على نفسج لان الدنيا ما تتامن 

= ليش محسسيني انو احنا عايشين بغابه بكل مكان وزمان اكو الزين واكو الشين يعني مو جديده 

اياد هز راسه ::لا جديده الناس كانت عدها غيره مروءه عدها ايثار وفزعه هسه اتبدلت صار كل واحد يفكر بنفسه وبس

بقيت ساكته وحسيت كلامه صحيح وصلت للكليه لكيت اباب الكليه ضابط أقل رتبه منتظرة من شافه أتسالموا باوعت

 شفت الولد إلي نقذني واكف بسيارته بالجهة الثانيه نزلت

اياد سالني ::بيش الساعه تطلعين 

جاوبته = احنه نطلع الساعه ثنتيين ونص بس انت اخاف عندك شغل انا ارجع ويه صديقاتي 

::لا ما عندي شي عاد بس هاليومين اوصلج 

بيني وبين نفسي = مو يومين عبالك سنتين

من نزلت ابتسمت بوجهه ورحت امشي وإياد صار يحجي ويه الضابط دخلت للكليه التمن صديقاتي وزملائي 

وطلاب وطالبات من غير أقسام كلهم يتحمدون السلامه حتى الأساتذة بس الطالبات متعجبات بشهامة وشجاعة الولد 

إلي دافع عني وهنه يسألني

بثينه هذا الي دافع عنج تعرفي

وانا اكلهم ما اعرفه

وهنه معقوله يدافع عنج وهو ما يعرفج

جاوبتهن = مو توجن اتكولن شهم وشجاع وهاي مو اله الواحد يعرف الثاني، 

وحده من الزميلات /:لج بثينه بس هو رجولته مو طبيعيه يجنن الله عليج بثينه شسمه ورقمه 

= هاي اشبيج والله ما اعرف اسمه لا وتردين رقمه والله تضحكين

،،،،كملت المحاضرة وانا بالي مو يمهه افكر برجولة وشهامة الولد الي نقذني طلعت ادور علي ما شفته لا 

بالكافيتريا ولا بالحديقه خلصت المحاضرات وانا بس اريد اشوفه وهو عبالك فص ملح وذاب طلعت 

شفت الغضب ابن عمي اياد وهو مبين علي عصبي كلش عبالك كاتله واحد من اهله بينس وبين نفسي 

= هذا شبي شنو نايب ضابط كريمه ماتت مقتوله والقضيه اتايدت ضد مجهول انل صرت اتصور شلون هي ميته 

وشلون اياد يصرخ عليها والرياجيل يوخروا وهو ما يقبل شابكها ويبجي بيني وبين نفسي ضحكت وانا اكول 

=صدك مخبله مو هذا واكف كبالي من باوعتله كتمت ضحكتي لان اتصورت الموقف باوعلي ما حاجاني انا 

ابتسمت بوجهه وكتله =

اشو هو ما رد حرك السياره وهو يدخن جكارة وأخذ يسحب نفس وايده ترجف عرفت اكو شي بقيت اسال نفسي 

=شعنده هذا الغضب شبي يتعارك ويه ذبانة وجهه ياستار ،،،

خليته يكمل أول وحده سحب الجكارة الثانيه راد يشعلها اخذتها منه لان حسيت بي يريد ينفجر

وعنده شي يريد يحجيه انا بادرت = مو كنه الجكاير تخنكني وهي بالأساس مو زينه على صحتك

فتر السيارة او وكفها باوعلي بعصبيه

اياد يحجي بعصبيه ::اكلج انتي شلون تجذبين تكولين واحد راد يبوك الجنطه وهمه جانو تلاثه شنو احنه 

مو بعينج احنه مو زلم كدامج انتي ما تخافين من أحد متشمخره على شنو فهميني 

 انا احس ريكي يبس ما اعرف شجاوبه يييمه يعني اياد عرف شيخلصني

ايادبنفس عصبيته ::ولج عليمن تضحكين تكولين حرامي وهو حاط المسدس براسج ويريد يخطفج والناس الي 

متقربه كايللهم عندي حساب وياها شوفي ولج انا ما ينضحك علي هسه اوصلج البيتكم والي حجي ويه ابوج 

ما يعرف يضبج ما يكدرلج سهله اكو من يكسر راسج ويعلمج شلون تضحكين ع الزلم

،طبعا انا ساكته لان خايفه من هذا الأسد لا الثور الهائج اول مره اشوف عصبيته وشلون يرجف 

هذا شلون بي واذا حجى الأبوي بابا صحيح إنسان متفهم بس يكره شي اسمه كذب

يتحول من إنسان هادئ إلى سيل جارف واكيد راح يحكم علي ماكو كليه 

حتى لو يعاقبوني شكم يوم معاناتهاا ما راح أشوف الولد إلي نقذني ،

(هسه انتي وين الولد وين )

= ولج بثينه فكري بهذا الغضب اليمج شلون تقنعينه ما يحجي ،،

ما احس إلا العبرة خنكتني وكمت ابجي حيل انحب وابجي هو انتبه شغل السياره وانا ضليت

بس ابجي بدون كلام هو يدخن بالجكارة وانا محتارة شسوي هذا بس يحجي يصير قال وقيل

وانوب عمه كريمه ماشاء الله شكد تحبني تكوم تجيب وتحط ياربي شسوي 

بقيت ابجي وكف شويه قريب يم كافيتريا جر نفس قوي نزل شويه رجع جايب اثنين عصير رمان وبطل ماي بارد 

كلي بنتر ::هاج الزمي اشربي ماي واسكتي بدون بجي 

فتحت البطل وانا اشهك من البجي شربت شويه ماي نطاني كلنس وكلي 

::امسحي دموعج وييزي عاد لا تبجين 

هالمرة حاجاني بهدوء انا أخذت الكلينس منه وفكرت كلت خلي احجي ويا استعطفه بلكي ما يحجي الأهلي

اياد باوعلي وانا اشهك من البجي نفخ وگال ::اخذي اشربي العصير وكافي بجي 

باوعلي وايده على استيرن السيارة

انا جاوبته بصوت متقطع = ما اريد أشرب كافي الإهانات الي شربتهن 

اياد يباوعلي وهو مقهور ::ها بثينه هسه طاح اللوم علي لان انا ظميت على أهلي 

انا بتودد دموعي ينزلن =اياد عفيه افهمني انا ما حجيت خفت على اهلي بابا يصعد ظغطه وماما تدري ما تتحمل

 توكع وزيوني طايش كلت ما طول الله ستر خلي اسكت وكلت خلي اكلهم واحد راد يبوك الجنطه خاف يسمعون

 عاد انا حاجيتلهم والحمد لله عدت على خير

اياد بهدوء ::يعني بثينه انتي لو مخطوفه شلون حالي أقصد حالنه ه

انا باوعتله وابتسم بدمعه = لو خاطفيني ادري راح تلكاني خلال ساعه أعرف بيك تكلب الدنيا عليه على ما تلكاني

،باوعلي وهو يحجي وكلي ::بس اكلب الدنيا كولي احرك الدنيا وكل اليوصلج اكتله (ابتسم )

هسه انتي مو جوعانه شنو تحيين تاكلين 

جاوبته بكلام متقطع = ا،ما ،،ماريد انا هسه ما كله رزاله وانوب من يعرف عمك يجوز رزاله

يجوز كتله غسل ولبس بعد شلي بالأكل ،،

،(أبتسم وكلي ) ::ما راح احجي الأحد بس انتي بعد لا تضمين علي شنو يصير

اتصلي بيه ولا تضمين شي هسه راح انزل اجيبلج لفه 

انا بدون قصد حضنته وسمعت دگات گلبه وانا اگله =شكرا اياد عمري ما انسالك هذا الجميل 

هو ارتبك ونزل انا طرت من الفرح مو لان ما يكل الأبوي لان اروح للكليه واشوف منقذي شويه إجه وجابلي 

بركر اخذتها منه وكال ::العصير صار حار راح اجيبلج غيره 

كتله = علواه إذا اكو عصير جامد 

اياد بابتسامة فرح

::بعدج ما كبرتي بعدج تجمدينه وتاكلينه ما بطلتي هاي العاده من جنتي ازغيره وهذا طبعج،

،،انا هزيت راسي وابتسمت راح مالكه عصير جامد جابلي بارد باوعتله وحاجيته 

=ليش ما خليتني انزل وياك

اياد يباوعلي :: وين تنزلين

=للمطعم شنو مو كد المقام 

اياد نفخ وهز راسه ::لا كد المقام ونص بس ما أقبل والناس تباوعلج وهذا لبسج

طبعا سكتت لان حاجتي يمه والمثل يكول (لو حاجتك يم،،،،)

كتله = ا تاخرنه هسه اهلي بالهم يمي

::يدرون بيج وياي مامنين

انا احجي ويه نفسي = حييل هذا شكد مأخذ كول بنفسه ،شكد واثق من نفسه

**********************&&&&&*************

،،وصلنه انا واياد للبيت سلمنه وامي گلتله ابقى اتغد لكن هو اعتذر حسب ما يكول عنده دوام انا باوعتله بترجي 

يعني لاتكول عفيه هو هزلي راسه يعني اي باوعلي وكال 

::باچر اجي اوصلج 

امي //لا عمه ايودي باجر اخلي زيوني يوصلها

اياد ::لا عمه انا اوصلها اخاف عليها هاليومين عاد اوصلها واطمن 

ياالله مع السلامه

امي //الله وياك ما قصرت 

اياد ::ما سويت شي هذا واجبي فيمان الله

هو راح وامي گالت// غيري ملابسج وانزلي اتغدي 

جاوبتها = ما اشتهي اكلت بالكليه وهم اياد جابلي لفه وعصير 

امي //زين لعد اصعدي نامي والعصر انزلي ما عندج شي

صعدت للغرفه غيرت ملابسي وحاولت أنام ما كدرت

أخذت حمام وجففت شعري ونزلت لكيت امي بغرفتها رحت سويتلي كوب كهوه

وكعدت أشرب اندك الباب رحت أفتح لكيت منال وزوجها وحسوني حبيبي جاي وياهم 

تباوسنا انا ومنال وسلمت على مظفر اشو يكلي الحمد لله على سلامتج، ،

صحت على امي = ماما تعالي منول إجتي

 وانا بيدي حسوني امي طلعت من غرفتها كلتلها/ ليش اجيتي مو كتلكم لاتجوون ماكو شي 

منال وهي تباوس بامي /ماما بس سمعت بالخبر ما أدري شنو صار بيه ما كدرت اصبر الباجر،،

امي جرت حسره /:ماما الله ستر جا هسه احنه بس الله العالم بحالنه والله ينطي اياد جاي ياخذها ويجيبها

 (باوعت لمظفر )اعذرني عمه ما انتبهت وسلمت عليك الله يساعدك اشلونك 

اتقرب عليها وباس راسها /:هلا بيج عمه اشلونج عمي شلونه 

امي /الحمد لله زينين

انا هزيت ايدي = يعني امي إلا تكلج تره ما صار شي شوفيني كل شي ما بيه

منال/يا ما صار شي كولي الف الحمد لله والشكر الله نقذج جا هسه 

صرنا سالفه كل اثنين بصفحه يحجون بيها ويؤلون ،،،،،،

منال بيتهم يبعد عن بغداد ساعتين منطقه اسمها الصويرة 

هي متصلة على امي وامي ما مجذبه خبر سولفتلها

 سوينه عشا واجه بابا وحسوني حبيب خالتو يلعب ويكمز وظلينه نسولف بالليل 

نامت منال وزوجها بالغرفه الجوه بيتنا بي غرفتين جوه وأربع غرف فوك هي من تجي ويه زوجها تنام بالغرفه الجوه 

بس من يروح زوجها تصعد يمي بغرفتي نزلت الصبح مبدله شافتني امي 

ماما/،،شنو بثينه اليوم هم رايحه جان غبتي مو اختج اهنا

اتقربت عليها = ابدي أغيب بس هاي محاضرة صعبه ومن أغيب الأستاذ ما ملزم يعيدها وانا ما استوعب اله 

هو يشرحها بعدين اليوم اطلع من وكت لان خميس --انا التفتت سالت امي --

= ماما وين ابوي

امي /:اليوم ابوج طلع من غبشه جايه حمل وهو راح كال خلي زيوني يلحكني على الساعه ثمانيه

=اشو سيارته اهنا شلون راح

امي /:مرله يوسف ابن عمج وراح ويا

اندك الباب انا فتحته لكيته اياد كتله بابتسامة خفيفه

= هلواياد تتريك 

هو ابتسم وكال :: لا أشرب بس جاي 

امي صبت الجاي وأنا خذيت نص صمونه وقطعت جبن واكلت وانا واكفه

باوعت امي الاياد وحاجته /:اياد خاله اليوم اتغده يمنا منال ومظفر اجونه البارحه 

اياد :: صدك يمته اجو 

جاوبته = البارحه اجونا خالتك خابرتهم على ابو واحد راد يبوك جنطة بثينه عاد همه اجو ركض مو مشي 

حجيتها وانا اضحك اياد يباوعلي وامي حجت 

هسه يمه ايودي ننتظرك ع الغدا 

اكيد ما جذب خبر كل الامي ::أن شالله خاله اذا اكدر ،،

امي //شنو اذا اكدر انت مو تجيب بثينه وأنزل اتغدا وروح 

اياد ::اتامربن أمر شكم خاله وفيقه عدنا الي نفسها بالطبخ يخبل

انا بكلبي = لعد شبي نفس نايب ضابط كريمه بس هذا زين وذاك مو زين تگعد تطبخلكم لگمه بدل ما النهار 

كله كال فلان وحجى علتان

هو قطع عني الحش بامه :: بثينه هي بثينه وين صفنتي يالله هم يالله نروح 

:: يالله انا كول شي ما عندي انت الي ملتهي تسولف ويه امي

اياد وگف :: يالله خاله سلميلي على مظفر ومنال 

صعدت بالسياره واشوف اياد اليوم هادئ الحمد لله ما شغل جكارة وحاط الراديو على الأخبار انا ساكته وهو هم ساكت

بادرت بالكلام 

= اياد انا هواي أشكرك لان ما كلت البابا 

باوعلي وحجه::ولو بثينه انا رجال أحترم كلمتي شلون وهاي الكلمه كلتها ال ،،الج --هو بسرعه بدل--

بيش الساعه اليوم تطلعون 

=12 ونص لان خميس نطلع على وكت 

اياد ::اوكي امرلج 

= اياد اذا عندك شغل لا تلتزم بيه 

اياد /:لو عندي شغل جان كتلج ارجعي ويه صديقاتج

وصلنه للكليه نزلت من السيارة وانا اباوع بلكي اشوف منقذي ما شفته دخلت للكليه ادور بعيني هم ما شفته دخلنه 

للمحاضرة وبعدها طلعنه انا والبنات جنت ضايجه رحنه للكافتيريا كعدت ويه البنات انا أخذت كهوة وهنه كل 

وحده أخذت شي 

هدى سالتني/:بثينه شنو ابن عمج راح يبقى يوصلج 

ماجده /: اكيد راح يبقى مبينه بثينه شغلته عدها سايق 

انا باستهزاء = هههه وج يا سايق دكولي جبل على صدري جاثم 

هدى /:اسكتي بثينه وج هذا ابن عمج يخبل انوب يمه عيونه يصفنن لو طوله يممه يهوس 

حچيت باستهزاء =علوا هدى تاخذينه وتفكيني منه 

هدى بحسره /:لج بثبث علوا يقبل ياخذني بس هو ما يشوف احد ...كدامه هنيالج علي

هزيت ايدي = والله بطرانات شايفات شكد ثكيل ع المعده شكد غثيث 

ماجده /:والله ما بطرانه الا انتي شايفه روحج والولد مبين يموت عليج 

هدى //حظوظ 

انا بقيت اضحك ورة شويه شفت صديقاتي باوعن ليفوك اكو واحد واكف وراي حسيت بي والبنات سكتن كلت 

ويه نفسي = هذا هو اكيد اياد صخام انوبه سمعني شيفكني منه ااخ منك يا الساني هسه انا الا احجي

انا درت شفته اتفاجات لان مو اياد بقيت دايره وجهي علي هو سلم بكل إحترام وبابتسامه هادئه كال 

: مرحبا اتمنى ما اكون قاطعتكم 

ماجده /:لا استاذ ما قاطعتنه اتفضل بيش نخدمك 

العفو منكم (بعدين وجه كلامه الي ) انسه بثينه إذا ممكن كلمه على انفراد اذا ما اعطلج 

الفصل السادس من هنا 

شكرا لزيارتكم عالم روايات سكيرهوم