رواية جسر الذكريات الفصل الرابع 4 بقلم مريم الحيالي

أن الحب احياناً يصل الى درجة..

تفوق كل قول ربما الى حد العبادة!!

حبي (لنبيلة) من هذا النوع ..

أي العبادة لا الحب..!!!

بخط يد ...دريد طاقة

..............................................

......في وقت من اوقات الحاظر القريب........

....واكفة داسوي عشه الجهالي ولازمة الدفتر بأيدي واقرأ ..والابتسامة على وجهي واتخايل الموقف

...من گطع المدالية وهي لابستها ..الله شلون حب وغيرة حب نقي مو هسه الحب من وراء الكيبورد

...اقرأ ومندمجه وجان تكطع افكااري...

...ماما صار الاكل لو لا

....بعدة هسه يكمل شكو طلعتو ورايه امشوا طبوا جوة يلا

..... ماااااما جووعااانين

....افتهمت رحت للغرفه خليت الدفتر عالميز ورجعت كملت العشة اني واشتغل وبالي مشغول بالموقف الجميل وردة الفعل العفوية 

.... شنو الي صار حتى كلشي اتغير هسه الحب اختلف نادر ما اشوف اثنين ايحبون صح وصادق 

ليش كلشي قبل احلى

....رحت وديت العشه الجهالي.. وسحبت الدفتر وبقيت اقرأ وارتب بالاحداث وكل حدث اوصلة استمتع بي وبجماليته...

................................................

نبيلة: امشي بالشارع واني الابتسامة مالية وجهي وفرحة بقلبي لا توصف لازمة ايد اختي وسارحة بعيييد.. دريد ايحبني والله كل تصرفاته هيج اتكول بس شوكت يعترف مو لازم ايگلي

ابتسام: نبييلة ياربي هاي الابنية بس لو شوية تثگل نبييلة

نبيلة: شبيج بسمة شبيج هسه دعوفيني فرحانة بعد كل هالمدة الي اتعذبت بيها شتريدين احجي 

كولي حبيبه على گولتج ههههههه

ابتسام: نبيلة امي اذا سألتج هاي منين شراح اتجاوبين لأن مبينة عليها غالية ومميزة اني ما ارگعلج بعد ابد خلصت اعذاري 

نبيلة: وليش اترگعين عادي انگولها دريد جابها وهو حاسب حسابة وجايب الج وحدة علمود محد ايفكر بطريقه غلط ...ابتسمت وانداريت عليها شفتي شلون ايخاف علية حتى هذا الشي حسب حسابة

ابتسام: ان شاء الله الله يسعدكم شريد اني اهم شي انتي اتكونين سعيدة

نبيلة: سعيدة كلش لتخافين علية يلا امشي راح نتأخر امشي امشي ...واجرجر بيها بالشارع 

ابتسام: اتخبلتي رسمي ولج منا الشارع يااااا نبييلة ...هههههههه الله يهديج ويكمل فرحتج

...........................................

دريد: نزاااااااار

نزار: دريد لتخبلني شبيك اصحى كاعد تسمع لو شنو الفلم

غازي: فهموني شبيكم شكو شو مثل الاطرش بالزفة ؟

دريد: ماكو شي ..انت حاجي ويه الوالد يعني عندة علم الابنية الي اتريدها منيه لو بس كايلة اريد اخطب... احجي واحس نار مشتعلة بيه معقولة غازي يعني مو مناسب ابد نبييلة غير عن كل البنات تختلف مستحيل اخلي هذا الشي ايصير

غازي: لا ميعرف بس يدري اريد اخطب وفرح لأن هو ايلح عليه بالموضوع.. وانت نزار خيرك شبيك ضجت اكو شي ماعرفه

نزار: اكو كلشي اكو..اباوع الدريد الذبحني بسكوتة

لتخاف مو يمك تتهنى ياااب ورفعت حاجبي ودريد نضراته اعرفهن كلش زين

دريد:الله كريم اذا الك قسمة اتصير ..بس من رأيي مو مناسبة يعني فارق العمر بيناتكم هواية وهي بعدها طالبة شنو الي خلاك اتفكر بيها

غازي: عجبتني اكثر من مرة شفتها وسمعتها طيبة ماشوف العمر مشكلة كبيرة

دريد: ايصير خير ايصير... سكتت بعد بس اخذ وانطي ويا راح ايشك بالامر واني محافظ عليها وعلى سمعتها حتى لقاء ما اللتقي بيها الا ما ندر المعمل محد يعرف بيه ولا يعرفون شنو الي گلب كياني وخلاني مشتت الحد هاي الدرجه

....غازي اترخص وگام راح.. ونزار على هدوءة ادري بي ضايج مني بس غلط ميصير انقابل الامور بطريقة سريعه لأن مرات تصرف غلط من عندنة يهدم كل الي بنينا وساعتها الندم ميرحمنا

نزار: ممكن اتفسرلي لأن اني حرت وياك وحرت بتصرفاتك الي مالها داعي 

دريد: اهنا اتنرفزت وطلعت غضبي بي ورفعت صوتي ولأول مرة اتصير... شبييييييك نزاااار شبيييييك كل عقلك اتسولف انت شلون اتريدني اكله لا لتتزوجها اني احبها متوقع شيصير لو لاااااااا جاوبني اني اخاف على نفسي؟ تعرف اني ما اهتم الاكبر شخص بس هي نزار هي سمعتها اتروح معقولة متفكر

نزار: بس تگدر اتكولة خاطبها رايدها اي عذر يا اخي مو تبقى ساكت وبعدين ديگلك موافقة ...اذا طلع صح هالكلام شنو راح ايكون موقفك؟؟

دريد: واني غشييم ماعرف الاحبها منو وشنو طبعها ..ماكو هيج حجي هاي لعبة من اخوها حتى ايضمنه لا اكثر...المقهى كله صافن علينه صوتنا عالي..كتلة كوم امه لا اله الا الله اتفرجت علينه بسببك

نزار: هسه اني صرت السبب.. براحتك شتسوي سوي بس خليها ببالك اذا مضاعت من ايدك تعال عاتبني

دريد: هو عندكم كلشي سهل مو هو بكيفي اروح اخطبها واني حتى بيت ماعندي شغل مستقر ماعندي عندي مسؤلية جبيرة على عاتقي انت شبيك عبالك غريب ومتعرف شكو ماكو

....حياتي ممرتبة شلون اتريدني اورطها ويايه بس فهمني شلوووووون... عفتة وطلعت مغثووث حييل مغثووث

...ليش بس هي الي مداكدر ارتب حياتي وياها الوحيدة الي احس نفسي عاجز امامها شنو هالحب هذا الي ما اله لا بدايه ولا نهايه

...استمريت امشي وصعدت سيارة واتجهت للبيت...

فتت للغرفة وطلعت الدفتر وكتبت بي احساسي ومشاعري ..صار فترة اني مكاتب خواطر ولا اشعار جنت اكتب هواية بس صار خمس سنوات مكاتب فقط بعض الابيات وجانت تلبيةً لبعض الاصدقاء وبطلب منهم اكتبلهم وهمه يهدوها للناس الغالية عليهم ...بديت اكتب كلشي بداخلي..وخطر على بالي بعض الابيات الها وكتبتها ..

اسهر الليالي.. وانتِ تنامين..

وابكي دوماً.. وانتِ تضحكين..

ورغم هذا..بسري اقول..

هل بيا تحلمين..؟

مرت الايام ومابيها شي جديد ونبيلة مرات اشوفها من اطلع للشغل وهي اتروح الكليتها ...الدنيا شته باردة والسنه مبقالها شي وتخلص وندخل سنه جديدة ان شاء الله اتكون خير علينه وعالجميع

... رحت للمعمل واجاني ابو محمد سلام وكلام وجان ايفاجئني بشي لا عالبال ولا عالخاطر..

ابو محمد: حظر روحك دريد عندنا سفرة قريبة ان شاء الله

دريد: خير ان شاء الله..بس فاجئتني مو ببالي ولا منتظر هالشي هذا

ابو محمد: ماعندك شي دريد هي جنطة سفر واتحظرها..ائمن بيك اني وما اريد احد غيرك ايرافقني واذا عندك اعتراض عادي كول ما ازعل عليك

دريد: لا ابد انت تدلل .. اعتبرها صايرة وهم تغيير جو

... ماكدر اردلة طلب افضالة علية هواية ابو محمد رجال طيب والنعم منه ... كملت شغل واني افكر هواي امور بعقلي صارت الساعة 6 مساءاً هو موعد انتهاء الدوام ..والاصدقاء الوياية ينتظروني عازميني على سهرة بمناسبة سفرتي الجديدة...باسم وأحمد وأبراهيم..وحتى انطي المفتاح الباسم قبل ما اسافر يبقى يمه 

...وجنت اتمنى أن ايدك التليفون وأسمع صوتها

حتى لو مو علمودي او مجرد اتگلي امي اتريد تحجي وياك بس المهم اسمع صوتها ..دك التليفون قرابة الست مرات ورديت بس جانوا معارفي ايودعوني وايسلمون عليه قبل السفر..دك التليفون ومجاوبت گلت معقولة هي لو احد ثاني ما اريد اخدع نفسي

وامنحها فرحه بغير مبرر..واگول هي..؟

للأسف !!!

................................

نبيلة: كملت امتحانات الكورس الأول واليوم موعد الدرجات ...دريد من انطاني الهدية مشفته غير صدف ومن بعيد ومرات الصبح اللتقي بي من اروح للكيلة..طلعت بالباب واللتفتت شفته واگف ابتسمت وهو اجه يتمشى علية..

دريد: واگف انتظرها تطلع بس شاءت الصدفة ان اتشوفني ابتسمتلي بوجهها الجميل ..فمشيت حتى اسلم عليها...صباح الخير

نبيلة: صباح الانوار...ليش واگف اهناك 

دريد: انتظرج ..شلونج

نبيلة: الحمدلله صارلك هواية مجاي علينة ..

دريد: شغل وماعندي وقت ..الوالدة شلونها

نبيلة: الحمدلله..اليوم استلم درجاتي ادعيلي اكون ناجحه

دريد: ان شاء الله اني واثق من عندج ..يارب الموفقية..

نبيلة: شكراً جزيلاً..اول مرة هيج اباوع بعيونة بشكل مطول بس احس عنده كلام ...احسك اتريد اتكول شي؟

دريد: احساسج صح ..مسافر ان شاء الله قريباً

وية ابو محمد عندنا شغل خارج العراق بس ما اطول اذا الله سهل

نبيلة: اكذب اذا اگول مضجت سفراته زادت من يوم الي اشتغل ويه ابو محمد وايروح يبقى اشهر مو يوم ويومين عيوني دمعت وبين عليه هالشي .. اتروح وترجع بالسلامة ...من رخصتك اتأخرت

دريد: ملامحها اتغيرت ووجها صار احمر ..مو بيدي لو علية من باجر اكلها تعالي نتزوج الظرووف مو صح والله مو صح...اترخصت وراحت حتى منتظرتني اودعها بقيت اعاين عليها الحد مختفت عن ناظري

...كملت طريقي ورحت للمعمل اشتغل بس بالي يمها ..يا ترى طلعت نتيجتها وشلونها هي اكيد انقهرت الله ايفرحها وميضيع تعبها لأن بمجرد اشوفها فرحانه اني ارتااح.. قطع افكاري صوت التليفون دك ..عبالك جنت منتظر هالاتصال رحت امشي عالسريع ورفعت السماعه..

دريد:: الوو

الوو..انقطع الاتصال بدون جواب

رجع دك رفعت الخط

الووو..اجاني صوتها بدون ما اسلم حجيت بسرعة

بشري طلعت النتيجه؟؟

نبيلة:ايي ومع الأسف بدرسين 

دريد: صوتها بي قهر مبين عليها..طمنتها وكتلها ميخالف سهلات اتگدرين اتعوضيهن ان شاء الله

وتدرسين

نبيلة: ان شاء الله..اخاف مشغول بس حبيت ابلغك 

دريد: فرحت لأن اتصلت وبلغتني وانطتني هالاهميه هاي كل شي يبدر من عندها ايخليني اتأمل واكول هي تحمل نفس المشاعر الي بداخلي.. لا اني كنت انتظر بفارغ الصبر حتى اعرف

...ودعتها وسديت الاتصال واتجهت للبيت حتى احظر جنطة السفر وابلغ الأهل بسفرتي...

..........................................

...سديت التليفون ...ورحت اتمددت عالمخدة واني افكر بحبي المجهول.. وشنو نهايتة اعرف بظروف دريد واعرف اسباب هواي تمنعه من الأرتباط

بس..

القلب وما يهوى!!!

صار الصبح وجان يوم جمعة وعطلة... 

صباح الخير

ابتسام: صباح الخيرات ..يلا طلعي غسلي الحوش

ووراها غسلي ملابس ووراها نظفي البيت

نبيلة: اباوع عليها فاتحه عيوني بصدمة هاي اختي لو بدلوها صدك تحجي.. بسمة خيرج شكو شسامعه 

هذا كله اني اسوي

ابتسام: سلامتج ماكو شي.. اي لعد اني مو يومية كله اسوي وحدي حيااااالة.. ارتاحي اتشاقة وياج ماعندي شي من الصبح كملت بس الغدة امي اتسوي 

راح اتلف دولمة كالت لأن انتي كاعدة ماعندج دوام

نبيلة: مو اكول اختي الحنينة ام گلب الطيب شبيها علية اليوم ... الله دولمة صارلي هواي مماكلتها..

حميت الجاي وسويت بيض وطلعت الخبز حتى اتريك.. حجت بسمة

ابتسام: اكووول دريد راح ايسافر عندة شغل تدرين؟؟

نبيلة: ادري البارحه شفته وگلي ..انتي منين عرفتي؟

ابتسام: مر علينه الصبح وسلم على امي كال هاليومين طالعين

نبيلة: اي ..الله ايوفقة ان شاء الله.. احجي ومدنگة اسوي بالبيض عيوني بسرعةاتدمع حييل حساسة صايرة هالفترةماكدر اسيطر على مشاعري

ابتسام: وايوفقج حبيبه..ويريح گلبج.. اكوم اشر ملابس اتريگي انتي

نبيلة: كامت بسمة واني كعدت اتريك هيج كوة اكلت لگمتين وشربت جاي ..افكر ليش كل ما اريد شي ميصير الشخص الوحيد الحبيتة بحياتي هو دريد 

ليش كل امورنا متعرقله شنو السبب

ياربي تعبت والله تعبت....

...................................................

مبقى شي على سفري بس يومين ..واني اتمنى وادعي بأن اشوفها كل ساعه اتمر واني ادعي بأن تجي للسوگ حتى اشوفها واحجي وياها..بس للأسف لا جدوى 

.... قررت بأن من ارجع من السفر اطلبها من اهلها بس قبل لا اسافر راح اعترفلها بحبي الها ..الحيرة والقلق والخوف من ردة فعل والدتها ناحية هذا الطلب وشلون راح اتفسر معقولة تاخذ نظرة عني واتكول ديستغلنه ..لو عبالها اريد مكافئة للشي الي قدمتة الهم خلال السنين ..معقولة اتفكر واتكول هو سوة كل هذا علمود نبيلة.. وجنت خادعهم كل هذا الوقت

راح تبقى معزتي يمها نفس ما هي لو راح اتجاوبني جواب يجرح كياني ومشاعري..؟

هواي فوارق بيني وبينها ..بس الحب ميعرف هذا الشي .. وشنو راح ايكون رأيها هي معقولة اتخالفهم الرأي.. لو اتأيدهم..؟؟

كل هذا ايدور بعقلي وايخليني اتراجع على اخر لحظة وما ابادر واخطي هالخطوة هاي...



جان ابد ميطلب منها يلتقون والسبب ايخاف عليها..

الأيام تمشي ..واليوم هو عيد رأس السنه باجر اسافر..الايأم اتودع العالم واني جنت كل يوم اشوفها من بعيد على طول السنة ...كاعد بالمعمل ودك التليفون وجان المتصل هي..!

نبيلة: مرحبا.. شلونك

دريد: الحمدلله انتي شلونج.. شعجب هذا الاتصال

نبيلة: راح اجي للسوك اكدر اشوفك؟

دريد: اي اهلاً وسهلاً موجود.. قطعت الاتصال وبقيت منتظرها اسعدني هذا الخبر جداً..بقيت منتظر كل شوية اطلع الباب المعمل وارجع..الحد ملمحتها من بعيد هي وصديقة الها وياها

..بقيت اعاينلها من بعيد منتظر جيتها اليه شافتني وابتسمتلي ..واني رديتلها الابتسامة ..وبقيت واگف حتى توصل بس الي صار ..اجاني احد الاصدقاء وسلم علية وبقى واكف يمي ايسولف ..ارتبكت ومعرفت شلون اصرفة لأن عيب بحقي هو ايسولف واني كل شوية اللتفت عليها واگفة يم احد المحلات هي وصديقتها

...وصلت يمي وحجت ويه صديقتها بكلام مگدرت اسمعه ودعني الولد وراح ..

نبيلة: شلونك دريد

دريد: الحمدلله يا هلا ومرحبا انتو شلونكم

نبيلة: الحمدلله اجيت حتى اودعك واسلم عليك

ويارب سنه سعيدة عليك

دريد: اشكرج عيوني وسنه سعيدة عليكم هم..صديقتها اتعاين علينه استحيت منها وكمت اشتت نظراتي عنها ..سلمت وراحن هذا لقائي وياها تجمعني من بعد كل ليالي وايام عشر دقائق لا اكثر

رجعت للبيت وطلعت الدفتر وكتبت عن هذا اليوم..

اليوم اخر يوم بالسنة وماعرف شلون راح يمضي الليل واني أودع هذا اليوم من السنة ..قررت انزل اتمشى لأن الجو بارد ومطر كمت لبست قمصلتي وطلعت

..الا ان الصدفة تجمعني باحد الاصدقاء الي مشايفهم صارلي فترة طويلة واقترح بأن يعزمني على سهرة ببيتهم بمناسبة عيد رأس السنة وان انودع السنه سوة..وافقت ورحت ويا من وصلت كعدت بس بالي يمها طلبت من عندة اتصل من تليفونهم

...گلي اتفضل وجابلي التليفون بلكت اسمع صوتها ..بس الخط خانني مرتين بدون ما احصل على الي ايصبرني لعذابي وهو صوتها.. لأن اتصلت ومحصل

...كاعد وية الاصدقاء وسألوني عن سفري وكلتلهم ان شاء الله باجر ..فگلت خلي اجرب حظي وارجع اتصل ..اتصلت واجاني صوتها

دريد: الوو

نبيلة: دريد!!؟

دريد: اتصلت عليج حتى اتكون بداية السنة هي سماع صوتج

نبيلة: دزيتلك معايدة بالبريد وصلت؟

دريد: لا موصلني اي شي شوكت رسلتيها

نبيلة: من اجيتك للسوك مريت ورسلتها بالبريد

دريد: ان شاءالله توصل اني هم جايبلج هدية بهاي المناسبة بس مصار الوقت حتى انطيها الج

نبيلة: اذا موصلت معايدتي وسافرت من ترجع تلگاها 

دريد: ان شاء الله واني هم جبتلج كتاب عن حياة عبد الحليم حافظ وعد نلتقي وانطي الج

نبيلة: الله مطربي المفضل .. شكراً عالهدية الجميلة

دريد: ادللي يابة.. اني يم اصدقائي حبيت اهنيج بمناسبة السنة الجديدة واودعج ..تصبحين على خير

نبيلة: وانت بخير.. اتروح وترجع بالسلامة...

سديت التليفون واني فرحانة ...لأن فكر بيه وخابرني ياريت ايگلي احبج واسمعها من عندة ياريت... رحت علگت المسجل على عبد الحليم اغنية

أسمر يا أسمراني..

مين قساك علية..

لو ترضى بهواني..

برضوا أنت الي ليا..

بتزيد عذابي ليه..

ويهون شبابي ليه..

وتطول غيابك ليه..

قولي ليه..قولي ليه..

........................................

خلصت السهرة ويه الاصدقاء وجانت مميزة جداً..ودعتهم ورجعت لأن عندي سفرة الصبح وسلمت عليهم وطلعت رجعت للبيت ...خليت راسي عالمخدة حنى انام واتذكرت اني قررت بأن لازم اصارحها قبل لا اسافر وقررت بأن اكتب رسالة قصيرة الها اتكون عبارة عن مقطع شعري ايفسر كل شي...

وهذا هو...

أحبكِ

لقد مللت الصبر

فها انا أكتب أليكِ

لتعلمي اني أحبكِ

رضيتِ أم ابيتِ

أجيبي

فأنا أحبكِ

جارتي..

لا وعينيكِ..والحب والهوى..

قسمٌ يتجلى..مانسيتُ لحظة عرفتكِ..

مانسيتُ المساء..والليل والصبح..

والغروب..مانسيت آذار..ونيسان..وحزيران..

شهر حبي..لبيكِ للصلاة..

فوق ضريحُ حبي.. لبيكِ للصلاة..

فوق قتيل حبي..فوق نفسي..

جارتي..

صلي مثلي..تعبدي في محراب حبنا..

بخط يد.. دريد طاقة

...............................................

.....في وقت من اوقات الحاظر القريب......

...قريت النهاية وبقيت ساكتة يعني صعب شلون راح اكتبها وشنو هالحب هذا الي يرفض بأن يُعلن لا هو الي بادر واعترف ولا هي اعترفت . مجرد نظرات وتعلق من بعيد البعيد حب نقي نظيف مابي اي غلط شنو السبب الي ايخلي مينجح ولا يكمل ...الظروف الحياة بوقتها صعب نحكم لأن مجنه موجودين ولا عشنا نفس الشعور الي همه عاشوا بي 

أبراهيم:كتبي النهاية هاهيه

.... راح اكتبها اي بس مراح تنتهي القصه

أبراهيم: ليش شكو غير خلص الدفتر وكتبتي كلشي بي

..... بس ابوك عندة حياة ثانية عاشها واكيد الكل ايريد يعرف شنو الي صار وشلون عاش دريد مووو

أبراهيم: ديلا غير تستقر سقراط كتبي خلي انشوف وين توصلين

..... ان شاء الله الكل خير اوصل ..

........ذكريات في جوف الماضي......

كتبت الشعر بورقة وخليته بظرف وكلت الصبح من اطلع اسلم على نزار انطي اله وهو ايسلمة الها...بقيت افكر شنو راح اتكون ردة فعلها ..وهذا القرار صح بهذا الوقت لو لا ..اتنهدت ونمت خليها الوقتها ولكل حادث حديث

....كعدت الصبح بدلت واخذت جنطة السفر وسلمت عالوالدة وطلعت.. رحت الشارع الرشيد النزار اودعه وانطي الظرف ..وصلت للمعمل

دريد: صباح الخير شبااب..صبحوا عليه كلهم واجاني نزار 

نزار: صباح الخيرات ياااب ..شنو شوكت اتروح ان شاء الله

دريد: هسه رايح ابو محمد والولد ينتظروني بس اجيت اسلم عليك وانطيك امانه

نزار: خير ان شاء الله اماناتك معروفة ..انطيني شكاتبلها هالمرة

دريد: نزار تنطيها الها واتكلها تنتظرني من تجي راح افسر كلشي وتلتهي بدراستها وبس

نزار: خوش عيني خوش بعد اكو اوامر ثانية

دريد: الحبيب ميأمر عليك ظالم..انطيته الظرف بأيدة وضمة بجيب البنطرون 

نزار: يلا راح تتأخر اتروح وترجع بالسلامة

دريد: الله ايسلمك.. ودعتة وطلعت رحت لأبو محمد رحنه للمحطة ننتظر القطار ونتجه الأوربا..

..............................................

كعدت الصبح اول يوم بالسنة الجديدة يارب سنة خير علينا ...فرحانة لأن البارحة كدرت اشوف دريد وبليل حجيت ويا بالتليفون

...طلعت غسلت وصبحت على امي واختي وكعدت اتريك وياهم ...اكوول يووم اليوم دريد ايسافر هم اجه عليج الصبح 

ام غزوان: وانتي شمدريج راح ايسافر؟

نبيلة: رفعت عيوني بسمة اتباوعلي وعظت شفتها متحلفتلي..مو البارحه رحت للسوك وشفته بالصدفة وكال..منين اعرف يعني

ام غزوان: هااااا اي الله ايرجعه بالسلامة شغله ويه ابو محمد متعب جان بالمحل كاعد وساكت بس هسه كل فترة ايسافر وياهم ...الله يستر عليه وايوفقه

نبيلة: اميين يوم امين .. كملت ريوگي وكمت ساعدت بسمة بشغل البيت والجو بارد ثلج ..فتت الغرفتي واتذكر كلامة من گلي جبتلج كتاب حياة عبد الحليم بس نلتقي انطي الج ..ابتسم وسارحه بعالم ثاني يارب تكمل على خير صح هو معترف ولا واعدني بشي بس كل تصرفاته اتبين بأن هو يحمل مشاعر اتجاهي..انفتح الباب ودخلت بسمة

ابتسام: اي نبيلة خاتون جان فضحتي نفسج الا شوية تدرين لو لا

نبيلة: رحت بستها واني مبتسمه ...عادي لو بيدي اخلي العالم كله يعرف بحبي الدريد

ابتسام: اي فاتن حمامه وعمر الشريف ...ضحكت عليها 

نبيلة: طبعاً قابل همه احسن من عندنا ..بسمة البريد الي دزيته اله موصل شلون اتأكد بأن وصل للمعمل لو لا

ابتسام: عود من اشوف نزار اسأله وانتي شوكت دازتله بريد عيني ليش اني ماعرف

نبيلة: وهسه عرفتي يا عيني.. احس نفسي فرحانه هواي فرحانه يارب من يرجع دريد كلشي يتصلح

....طلعت بسمة وبقيت واكفة بالشباك اباوع على الجو المغيم وباااارد وقطرات المطر تنزل خفيفه عالشباك ..رفعت راسي وغمضت عيوني ودعيت بأن ننجمع اني ويا بيوم من الايام

....مر الوقت وصار الغدة داحظر بالصينيه ويه بسمة واجه غزوان فات سلم طبعاً كل ما يجي يعني وراه مشكله..

ام غزان: الله ايساعدك يووم صارلك يومين وين غاط ماكو

غزوان: ويساعدج يووم موجود بس شغل ملتهي اليوم اجيت اشوفكم.. واحجي ويه نبيلة بموضوع

نبيلة: وكعت الخاشوكة من ايدي وبسمة شالتها كلتلي... الله على كيفج ..هو رفع عيونه ايباوعلي 

...اي شنو هذا الموضوع خير اتفضل كول

غزوان: غازي ينتظر صارلة هوايه وراح ايسافر خارج العراق ايريدكم اتعقدون حتى ايكمل اوراقج ياخذج ويا وايكول ماعندي اعتراض عادي اتكمل كليتها اهناك

نبيلة: هو يحجي واني نار مشتعلة بيه مخطط ومقرر ولا عبالك هاي حياتي وخصوصيتي واني الي راح اعيش ..بس اني مگتلك موافقة ولا اريد اتزوج هسه وامي تعرف قراري

غزوان: هذا الحجي ميصرفلي راح تتزوجين غازي شعندج بعد على گلبنه.. زيادة مصرف 

نبيلة: من گال هيج اني مسكتت كمت بعصبية ووگفت وكتله..زوااااااج ماكووووو ما اتزوج انسى وبعدين حظرت جنابك من تصرف عليه ذاك الوكت احجي 

...هو كام بسرعة وضربني راجدي قووي ..بس سمعت صوت شهگه بسمة وبسرعه اجتي عليه 

وامي دفعته وبقت تحجي عليه

ام غزوان: انت اتخبلت شلوووون اتمد ايدك على اختك واني موجودة واني گتلك زواج ماكو وهي مموافقة غصب شنووو

غزوان: اي يووم غصب كااااافي منطيتها مجال خليتيها على حل شعرها واتطب وتطلع بكييفها 

غازي شناااقصه كوليلي ليش اترفضة فوك ممگلبها وجه الفگر

نبيلة: هو يحجي بصياح وبسمة لازمتني واني دموعي تجري اريد استوعب الي ديصير كتله..

..الي عندي كلته الك زواااااااج ماكوووو يعني ماكووووو رحت الغرفتي فتت وطبگت الباب حييل وهو بعدة ايصيح برة هو وامي اجتني بسمة 

ابتسام: حبيبه كولي ياالله معليج بي هو كل مرة هيج وهسه يسكت وايروح..كتلج نبيلة لتتأملين اهدي لتاخذين الامور بتسرع مسمعتي مني

نبيلة: اباوعلها وابجي اشهك متت قهر انوب دريد مسافر ياربي ليش من احتاج وجودة ماكو شلوون خاف يتأخر ياربي شيصير ..كتلها

نبيلة: شنو الغلط فهميني شنو حبييت عيب حرام شسويت شو حب نظييف يادوب بس نظرات واني بعدني ادرس لييش مصر ايزوجني هو مصرف مينطي صار سنين دريد متكفل بينه هسه جاي صاير رجااال علينه

ابتسام: اسكتيي ليسمعج شيخلصج منه ..ميخالف اخوج الجبير شتسوين يعني وگفنه بوجهها والنهايه شنو شراح ايكون..كومي غسلي ونامي 

وايحلها الحلال

نبيلة: طلعت بسمه واني نمت عالمخدة وابجي قوي ابجي متت بجي ليش يعني ليش شلون راح احل هاي السالفه وشراح ايصير .. التفكير والقلق موتني..

.....................................................

وصلنا اوربا ورحنه للسكن الي نگعد بي حتى نرتاح وانباشر بعملنا.. اوربا رغم جمالها الخلاب الا انها متوسعني واني بعيد عن احبابي واصدقائي ..لياليها المظلمة والباردة ..نفس برودة مشاعرنا وأحلامنا الي احسها عالمحك...

....طلعت للمعمل ويه الاصدقاء وبدينا بشغلنا ..مرت الايام واني التفكير بيها مفارقني ولا لحظة والرسالة وصلتها لو بعد درت بمشاعري وحبي الها ..اشتغل واني اتسائل واحجي بداخلي 

....خلص وقت الشغل. اتجهنا للسكن اكلنا واترخصت من الاصدقاء ودخلت للغرفه وطلعت الدفتر وكعدت اكتب عن المجهول المنتظرني وعن الايام القادمة ودونت كل لحظه عشتها واني خارج الوطن وبعيد عنها وعن عائلتي ..

..ليالي اوربا الموحشة

....مرت الأيام وصار على وجودنا ببلغاريا اسبوعين بس اعتقد هالمرة هم مطولين لأن العمل ماشي وبكثافة وما اتوقع ابو محمد يترك كل هالزحمة ويرجع بهالوقت ..رحت عالتليفون واتصلت للمعمل على نزار جاوبني احد العمال وكال نزار مموجود طلع 

سديته وبلغته من يجي ايكله دريد طلبك وخلي يرجع ايخابرني

....بقيت بحيرة من امري نزار بهيج وقت بالمعمل ميطلع ابد وين راح .. القلق شغل تفكيري ورحت الامور عميقه هل هي مبالغه في الأمر لو اني احساسي صح بأن اكو شي ..؟

.................................................

نزار: واگف اشتغل ويه العمال وملتهي واجاني احد اليشتغلون ويايه وگلي غازي برة ايريدك... استغربت اول تالي شعندة هذا جايني.. كتله كله جايك خلي ينتظرني

....طلعت وشفته مخلي ايدي بجيبة وجگارته بحلكة وواكف هو شافني وجان ايصيح...

غازي: نزاااااااااار شلووووونك ياااب

نزار: انت بيك خلل مال عياط مادري انت اتسويها عناد مو اطرش اني اسمع ترى ..صافحته وبسته وسألته... خيرك اليوم جايني لهنا اكو سالفه وراك مو خالي احجي

غازي: اي والله اريد وگفتك ويايه 

نزار: خير ان شاء الله گول رگبتي سدادة يابة شعندك؟

غازي: الخميس اروح اخطب حجيت وية الحجي ورافض بأن يجي ويايه ايگلي ماروح وياك واخطب نبيلة الگالك غيرها واروح وحيرني وتعبني وماعرف شنو سبب بالرفض هذا

نزار: هو يحجي واني اباوعله بقهر وحيرة وقلق هذا يحجي صدك لو شنو فلمة يخطب ودريد ماكو صبرك ياربي شلون راح احلها..

....هاا بيها الخير بس ليش الحجي رافض وبعدين انت ليش هيج مستعجل وانتظر خلي يرجع دريد ايهون عليك تخطب وهو محاظر..حرت شحجي مادري

غازي: اتأخرت هواي نزار راح ايصير سنه من حجيت ويه اخوها وبعدين لازم اسافر واريد اخطبها حتى اكدر امشي بأوراقها

نزار: شلون بلا اگله دريد ايحبها بس والله دريد يعدمني ميقبل اي مخلوق يدري علمود سمعتها 

والرسالة لحد الأن منطيتها الها لأن مصارت الفرصة شلون شجاوبة

غازي: هاااااا يمعووود شو ساكت تجي ويايه لو لا

نزار: خلي يجي دريد ماكو داعي للعجلة اصبر 

وابوك هم مقابل شبيك انت ماكو غيرها خلصن البنااات شلحيت عوفها واني اخطبلك احلى منها

غازي: نزار هاي تحجي صدك لو تتشاقة اكلك حاجي ويه اخوها ومنطي كلمة ...اني صح سرسري ومو خوش بس تدري بيه كلمتي وحدة والابنية موافقة شلون اعوفها بنص الطريق

نزار: سمعتها كالت موافقة شمدريك مو اخوها جابرها انت تدري بي مو خوش ادمي وتدري هو رايدك على مصلحة ماكو داعي اجاملك

غازي: ادري وهو شرط علية ليگدام الي ايريدة..نزار من الاخير تجي ويايه لو لا لتعبني 

نزار: ضليت بحيرة من امري موقف ما انحسد علية شلون اروح ويا شلون واغدر دريد بظهرة ورسالته الي كلي انطيهيا ..ربي شنو هالاختبار هذا

.....انطيني مجال شبيك جنك رايح المنيتك اصبرلي روح هسه وحاول تقنع الوالد وايصير خير ان شاء الله... راح غازي واني بقيت صافن شنو هالمصيبة اي والله مصيبة شلوون راح احلها ودريد اذا سألني شجاوبه.. رجعت للمعمل وكملت شغلي دريد من راح مرة وحدة اتصلت عليه..

...... مرت الأيام واجه يوم الخميس واني لا انطيت الرسالة ولا كدرت الگي حل وكلشي مكلت الدريد لأن صعبه هو بالغربة شلون احرگ گلبة وشيسوي وهو يبعد عنا قارات .... كمت طلعت من وقت اليوم مالي واهس مختنك وماكدر اروح مستحيل هيج اخون دريد واروح اخطب محبوبته الشخص ثاني حتى لاازعل الاثنين طلعت ووصيت العامل كتله اذا اجاك غازي گله ابو نزار اتخربط ودزوا عليه ويعتذر من عندك ميكدر يجي... وطلعت رحت للبيت

...............................................................

.....مرت الايام مثل السم حتى للكلية مرحت وغزوان بقى مصر على رأييه وامي بس تبجي ومتگدر اتسوي شي شتكول يعني وهي حتى متعرف سبب رفضي شنو؟؟

ام غزوان: يووم شنو الي مخليج رافضة هيج انتي مو جنتي اتكولين اكمل دراستي واسافر واشتغل واعوضكم عن كلشي هاي اجتج الفرصة ..كومي حبيبة لتسوين بنفسج هيج

ابتسام: هسه يوم اني احجي وياها ليضل بالج ..

نبيلة: يحجون يمي واني بس دموعي تنزل ماعندي كل ردة فعل ... امي طلعت اجتي بسمة كعدت يمي وجرتني نيمتني على رجلها واتسولف ويايه

ابتسام: ماعندي كلمات اواسيج بيها ولا اكدر اكلج انسي دريد وابدي حياة جديدة وغازي احسن ومن هذا الكلام الي لا ايقدم ولا ايأخر ...حقج حبيبة اول حب بحياتج واول شعور يحتل گلبج بس مجان متبادل او بالاحرى مخفي من الطرفين مجرد نظرات لا اكثر لا هو واعدج بشي ولا انتي ..حتى رسالته مجانت واضحه يمكن مجرد اعجاب 

.... ودريد من خيرة الشباب وجنت اتمنى اتصيرين من نصيبة بس ظروفة احنه اكثر العالم نعلم بيها الرجل عندة مسؤليات كبيرة..ورغم هذا مأملج على شي ولا حتى اجه عشمج بي 

نبيلة: هي تحجي واني ابجي بس من كالت معشمج بي اهنا اطلقت سراح دموعي ابجي بصوت واشهك وبس كلمة ليش تطلع مني...

.....ليش بسمة ليش هااا بس لو جاي وكايلي حتى انتي شكد ردت اروح واكوله عن مشاعري وانتي جنتي متقبلين ...انتي السبب انتي المنعتيني

شكرا لزيارتكم عالم روايات سكيرهوم