رواية جذبني فمك البني الفصل الرابع 4 بقلم عبير إدريس

ركض بينه العمر ركضة مجانين

لو بيدي ارجع ساعتي وين ارجع

ليا صدفه .....

_____

ترتبط الذاكرة البشريّة بثلاث عمليات أساسية :

الترميز، والتخزين، والاسترجاع،

أمّا الترميز فهو إعطاء المعاني للمثيرات والخبرات الحسية الجديدة، لإيصال تلك الخبرات إلى الذاكرة طويلة المدى، والتخزين هو الاحتفاظ بالمعلومة، والاسترجاع هو استدعاء المعلومات أو الخبرات او الاحداث المخزنة سابقاً.

لو يرجع الامر بيدي احذف احد هذه الاساسيات وهيه الاسترجاع اريد انسى كلشي يخص الماضي وما اتذكر بس هيهات هذا الماضي هو الحاضر والمستقبل راح يضل يلازمني بعقده ذنب جبيره وبديت ادفع ثمنها بدايه بصحتي وعقلي وماعرف شنو راح افقد بعد...

تمنيت ذاكرتي من النوع القصيرة المدى تخزن منا وتحذف علمود ترجع تخزن من جديد ومرات اتمنى تكون مثل الكمبيوتر بيه دكمه اسمها دليت مجرد اضغط عليها بأصبعي احذف شكو ذكريات سيئة و سوده مؤلمة ، بدماغي اكو مطرقه تدك براسي كل يوم تأنبني على السويته ...

اصعب مايمر على الانسان هو تأنيب الضمير كذب اكو عقاب اقوة من هذا ، جربت فقد الاحبة وجربت خسارة المال وجربت فقد الحبيب وجربت الخيانه وجربت الاتهام والغدر كلشي جربت بس من اجي اقارن بينهن عذاب الضمير هو الاشد ايلام للروح والجسد ....

اليوم راح ادخل على ذاكرتي الطويلة المدى واسترجع ملف من ملفات حياتي يخص رحلتنه المتعبه لبيت جدي من وصلنه شصار ويانه وشلون كان استقبالهم النه والمدة اللي عشناها يمهم وشلون طلعنه منهم ومنو جاب حقنه من الورث ...

تمارة : طلعت اربعين اخوج ولازم نروح لبيت اهلج نعيش هناك..

ياسة : شلون افارك البنات والله كلبي ماينطيني..

تمارة : تطلكين وتجين ويانه ؟

ضحكت وباوعت لعمه مستهزئة..

ياسة : عمر الاستهزاء ما كان حل لحياتج طول عمرج كضيتيه تستهزئين بينه اني واخويه شما نحجي وياج وشما نسويلج ما يعجبج على شنو شايفه نفسج ونافشه ريشج متكليلي ، تره كلنا اولاد تسعه تمارة...

تمارة : ها ياسه انفك الحلك شيسده بعد..

ياسة : تره انتي دافنه رجلج تعرفين حجم مصيبتج لو لا هذا ابو بناتج اخويه العزيز لج نار بكلبي شابه وانتي كاعد تتمضيكين عليه..

تمارة : حبيبتي روحي نامي بحضن رجلج اللي يحير شيسوي حتى يسعدج ويدلل بيج وهاج هذا وجهج شلون تفح من اخذتيه جنتي صفره وحال الضيم حالج قارني حياتج بحياتي وعود تعاي احجي اني لو رجلي مثل رجلج ومات اكتل روحي وراه..

ياسة : شوف شوف حسد عينك عينك اعوذ بالله لج انتي شنو كل يوم اكتشف بيج صفه احقر من القبلها وبعدين انتي وين شايفه علاقتي برجلي حتى تحجين هيج..

تمارة : ما يحتاج اشوف حبيبتي مبين عليج الخير من راسج لرجلج ياذهب يا لبس يا طلعات يوميه حاطج بالصدر وفارج مثل حضي عشت حسره عليه اصعد بالصدر ويه رجلي وتالي راح..

ياسة : وين فارني بالسياره هو اني شفت منه شي تزوجت منا ما طول اشهر وسافر ..

تمارة : شوف العيارة مو ذاك رجعلج..

ياسة : غير رجع علمود فاتحه اخويه وبس تخلص اجازته يرجع يسافر واربع سنين مدري شكد ماشوفه..

تمارة : اي عيني الله يهنيج ويسعدج..

ومن بعد هذا الحديث الدار بين عمه وماما عمتي ماشافت خير ابد ، صدك لو كالو ثلثين المقابر من العين جنت ماصدك بس الصار ويه عمه ياسه هو الأكدلي هذا الشي نفس ماما حركها مرات العين تكون اقوى من السحر وفعلا تأكدت وهاي اول درس تعلمته من الحياة ما احجي بسعادتي كدام احد هاي اذا عشت بسعاده بيوم من الايام...

راحت عمه مكسورة خاطر من امي واحنه شدينه الامتعة وانطلقنه برحلة محفوفه بالمخاوف منعرف شنو المنتظرنه قلق وخوف من المجهول والادهى والامر الرحله ناقصها بابا يعني رجعنه ناقصين نفر ،

دكت بينه السيارة ايفين خلت راسها بحضني ونامت ليوره اخذت الكشن كله لان حالتها متتحمل سفر ،

ماما كعدت لكدام بصف عمو فرات واني صافنه على وكاحتها شلون تناقش وتلاسن عمو تردله كلمه بعشره رغم هو ماحاجي شي وياها مجرد حديث عادي ...

هسه يلا فهمت سبب مشاكل بيت جدي ماما مبينه هيه تحفر البير بأبره وتطلع مشكله اذا هو بابا الفقير ما خلص منها شلون بعيالها ..

انام واكعد خلص الطريق وصلنه ، نزل عمو سند ايفين ونزلها ،

ردت انزل ما اكدر متكسره تكسر ورجلي خدرانه لان متحركت خفت ايفين تفز كضت الطريق كله نايمه على رجلي....

انتضرت شويه ونزلت دخلنه لنفس البيت اللي طلعنه منه قبل كم سنه بس شنو دخلتنه جانت مكسورين خاطر ماعدنه والي لا اخ اللي نسند ضهرنه بيه ولا اب مجرد اجتي الفكره على بالي دموعي كامت تنزل وحده وره الثانيه طبينه والكل جان كاعد بالهول سلمنه ردو السلام بدون حتى ميكومون ولا يبوسونه كأنما الصبح جانو شايفينه ....

عمامي ونسوانهم ولد عمامي وبناتهم اكو بكصتي واكو اصغر ، النضرات تكول انتو غير مرحب بيكم بس اللسان ينطق غير شكل ليش لان عدنه حصه ابونه بهذا البيت محد يكدر يطردنه ....

جرينه جنطنه وصعدنه لغرفتنه القديمه مسويها مخزن كلها كراكي

ب حجت ماما وغلطت عليهم وحارت شسوت واني اسكت بيها همزين محد فوك وسمع جان صارت هوسه ، ...

سيلين : ماما من اول يوم صدك جذب دسكتي..

تمارة : ماصدكن النذلات يسون غرفتي مخزن لزبايلهن...

ترفع راسها وتحجي بصوت تتقصد تسمعهم..

سيلين : ماما اذا مو لخاطري فالخاطر بنتج النايمه جوه بنص الزلم خلينه نكمل بساع علمود نصعدها تنام هنا واحنه نستقر..

تمارة : يا استقرار التحجين عنه كل عقلج يخلونه نرتاح هنا ونعيش بسلام.

سيلين : يخلونه بحاله اذا لزمتي لسانج..

تماره : بنت الكلب شايفتني كوه تخليني اسبه وهو انبش ماصارله كم يوم..

كمت افور لو مو امي وحرام اله اضربها بس الصار طلع عمو صلاح واكف باب غرفته ويسمع حجيها طلع وصاح بصوت رج البيت رج..

صلاح : تمارررررررررة العرمه رجعنه لسوالفج العوجه، لج التحجين عليه هذا اخويه ياعاره النساوين شلون تذمين بيه وتوه ميت..

تخوصرت وجاوبته..

تمارة : اخوك على نفسك شفت منه اني حتى اذكره بطيب خاف تريد اسويله ثوابات ...

صلاح : لا ماريد ولا هو عايز على شكولاتج بس جفينه شرج وبلاج كلشي منريد وانتي وبناتج تنجبن وتكعدن بهاي الغرفه اذا طلع صوت وحده لو شفت خيالها وكتها تعرفين صلاح منو ...

تماره : والله خوش هذا بيتي مثل ما بيتك وعدنه حصه بكد حصتك يعني لا تطردني ولا اطردك كلنه نتشارك كاشيه الك كاشيه الي..

صلاح : لتخلين راسج براسي لا اهجج بليله ضلمه واي ورث ما الكم يمي ..

تمارة : من باجر اشتكي واشوف منو ياخذ فلس مني يازلمه وطالع من ظهر زلمه ..

وبهيج كبت العداوات ويانه من عمامي ومن نسوان عمومتي الكل كرهنه وحقد علينه وعشنه المر بهذا البيت والسبب الرئيسي امي للمره الالف اكولها ...

بهذا البيت الوحيد الحنين عليه زاكروز ابن عمي صلاح الجبير اكثر واحد وكف ويانه بوجه ابوه وحتى مرات تعلك بينهم و ينطرد من البيت ..وبيوم جنت كاعده بالهول يم ايفين وماما جانت بيت من بيوت الطرف منو يكدر عليها منو يحاجيها هو جان بابا على راسها ولابسه عبايتها وتفتر عاد هسه المهم ماما لا لزمتها عده ولا لزمها مرض بنيه عافتني وحدي بالهم اصارع الدنيا بتك رجل مثل ميكول ...

زاكروز : انتي ليش هيج ضعيفه شنو ماتاكلين..

رفعت عيني وهمست..

سيلين : ما الي نفس..

زاكروز : ممممم حقج ،، زين اذا جبت لفات تاكلين ويايه..

سيلين : والله ما اشتهي لتعب روحك ويايه .

زاكروز : مابيج امل للتالي..

سيلين : لتحاول قافله...

زاكروز : براحتج...

مرت الايام وصار اربع اشهر على وفاة بابا وبيوم

جنت منهاره وما اكل ومحد بحالي لا ماما ولا بيت جدي ،اجتي عمه ياسة يمي حجت هواي تريد بس اكوم واحجي وياها ، ضليت نايمه ومغطيه راسي.

مجنت ادري زوجها موجود بس من من حجه استحيت وكعدت عدل مسحت دموعي وسلمت عليه جان واكف والهيبه مالته والثكل هيه تحجي عنه ...

ميل راسه و لم شفته بأسى وكال..

ادهم : بقية بحياتج وعظم الله اجرج وربي يرحم والدج برحمته الواسعه ويغمد روحه الجنة..

مسحت عيوني وعصرتهن بيدي...

سيلين : امين شكرا...

ادهم : تسمحيلي اكعد..

سيلين : اي اي تفضل ...

ادنيت ليغاد وسويتله مجال كعد جر نفس وحجه بهدوء ونبرة مليانه حنيه ..

ادهم : شوفي انتي بعدج صغيره والحياه كدامج و حياة الانسان طويله ومرات تكون صعبه ومادام طويله لازم بيها منغصات كفقدان الصحة او موت شخص عزيز علينه خسارة منصب او اموال او بيت والخ هواي اشياء ممكن نخسرها بحياتنه بس احنه هنا لازم شنسوي...

اني جنت مدنكه راسي واستمع استحي اباوع بعينه..

ادهم : باعيني مو احجي وياج..

رفعت راسي وخليت عيني بعينه بس كل شويه ادنك اني من النوع خجوله كلش لابعد الحدود وعمري ما حاجيه ويه ولد حتى لو اقارب على طول منطويه على نفسي...

سيلين : اسمعك وياك..

ادهم : تمام سمعي اذا اجتاحت حياتنه احدى المنغصات اللي ذكرتها الج احنه لازم نتفائل بالمستقبل ونردد بينه وبين نفسنه القادم اجمل حتى وان كانت حياتنه تخلو من لحظات الفرح احنه لازم نبتسم حتى يصير النه دافع نكمل هاي الحياه ونعيشها صح ، لان براسنه براسنه وغصب علينه نكملها ،

اذا تردين رأيي كأخ كبير عم اب صديق شنو يعجبج اعتبريني واخذي بنصيحتي ، تناسي الحزن ما اكلج انسي لان مستحيل تنسين و تمسكي بأي لحظة فرح بسيطه تمر بحياتج ،

الكلب كبير يحتوي كلشي بيه مساحه واسعه تحوي كل المشاعر مثل ما احتوى الحزن وخيم على حياتج يكدر يحتوي لحظات من الفرح ...

سيلين : ما اكدر عمو ما اكدر لا انسى بابا ولا اتأقلم بيت جدي حياتي عباره عن كآبه وقهر...

ادهم : ميصير ديري بالج تخلين الكآبه تسيطر عليج الكآبه عباره عن افه تاكل اعمارنه بدون توقف تضل تاكل وتاكل ال ان نتلاشى ونصبح بخبر كان ...

سيلين : عمو اني حياتي توقفت ويه موت بابا لتتصور راح اكدر اعيش بعده واكمل حياتي طبيعي..

حجيتها وبجيت...

حجه بحزم..

ادهم : تكدرين هاي بس الضعفاء هيج يفكرون دائما افكارهم تكون سلبيه و تتوقف يم نقطه معينه وخلص ميفكرون بغير شي ، صيري قويه الق

وي دائما يتجاوز محطات المحبطه بحياته ميضل يبجي ويولول على الراح صح ابوج يستاهل تبجين عليه عمر بس مو على حساب صحتج وحياتج ، هو ميقبل وتلكيه ما راضي عنج ..

سيلين : تعبت ما اتحمل بعد وكاعد اختنك احس بروحي تريد تطلع.. ....

ياسة : لان تكبتين بداخلج كم مره جيتج وكتلج احجي حتى لتختنكين..

سيلين : هذا طبعي شسوي مشكلتي ما اكدر احجي لأي احد بشنو احس ولا اتصور راح تفهموني اني البداخلي شعور يوجع ما اعتقد اذا شرحته الكم راح تحسون بيه ...

ادهم : انتي عليش تكتمين بكلبج وتدفنين شكو شي متعبج تره الكتم يسوي امراض انه هسه فهمت حالتج وراح اشرحها الج حسب ما فهمتج ...

جان مضيق عينه ويحجي بعدين غمض وجر نفس فتح عينه مركز بوجهي واني الخجل اخذني استحيت منه كلش.. ...

ادهم : باعي انتي من النوع اذا تصير عندج مصيبه متبجين ولا تحزنين بوقتها مو صح ؟

سيلين : صح..

ادهم : ليش ؟

سيلين : لان ما اكدر اعبر عن حزني تصير عندي صدمه..

كام يأشر بيده ويعدد بأصابعه ..

ادهم : وهذا الشي يولد هواي اشياء سلبيه بحياتج تدرين لو لا بوقت المصيبه او الشده اذا ما بجينه واذا ما ارتمينه بحضن حنين يطبطب علينه راح تتراكم الاحزان بداخلنه وتحتقن ارواحنه بالتالي شنو نحصل غير الأمراض النفسيه والجسديه نعاني اعراضهة ونجهل اسبابها وهيه اسبابها معروفه الكتم الزايد عن حده ،

بالتالي راح ندخل بدوامه الوسواس القهري والافكار السلبيه وشويه شويه منحس اله حياتنه تحولت جحيم وكل يوم نعيش مشهد جنائزي حزين مو صح ...

هزيت راسي ب اي..

سيلين : بس اني كتلك وارجع اعيدها ياعمو ما اكدر احجي لأي احد ولا اكدر اعبر عن البداخلي شلون بهيج حاله شسوي لان تعبت...

ادهم : متكدرين لو تخجلين لان اكو فرق حتى على هذا الاساس اجاوبج..

سيلين : اخجل اكثر شي..

ادهم : هممم ، باعي كل انسان طبيعته ضعيف حتى اني ويحتاج بحياته لدعم مادي معنوي نفسي ويحتاج لأشخاص معدودين بحياته هو معتمد عليهم بالدرجه الاولى مثل والده او والدته اذا كان متزوج زوجته صديقه او ممكن لعبه عنده يخليها ويشكيلها لان يعرف هيه مجرد دميه لا تسمع ولا تتفاعل بس المهم يذب همه ويحجي اللي مأذيه ومضوجه..مو عيب اذا نلجئ لأشخاص قريبين علينه ونفضفض بس العيب اذا سكتنه وتحول سكوتنه لمشكله وتعالو حلوها هاي عمتج يمج يوميه كاعد تصعدلج احجيلها فرغي البكلبج وصيري قويه لا كل شويه باجيه ..

سيلين : يمكن انت هيج تحجي لان رجال والرجال ميبجي ولا ينقهر مو مثلنه..

ابتسم بينت سنونه ابيض من حياتي ضليت صافنه عليهن هو رأسن سد حلكه ورجع يحجي بحزم ..

ادهم : احنه كرجال عدنه الانهيار بحياتنه مرفوض بتاتا تعبيرنه عن الحزن يكون بفضفضه ومو دائما واذا ردنه نعبر عن حزنه ناخذلنه زاويه ونختلي بنفسنه نبجي لحد ما نحس هذا هو ارتاحينه ونطلع كدامكم طبيعين ليش لان انتو تستمدون القوه من عدنه اذا اني انهاريت زوجتي شلون بنتي امي اختي ،

احنه عدنه قانون اسمه التوازن كلشي عدنه بحساب نعرف وين نوكف وشلون نستمر بحياتنه اذا فقدنه التوازن راح نعيش بتخبط احنه وعوائلنه ..

سيلين : اي مو اكلك عدكم قسوه وانتو مو مثلنه وكلامك اكبر دليل لهذا عمو لتقارن نفسك بيه..

ادهم : الرجولة شي وقسوة القلب شي ثاني ، اشجع الابطال بالعالم من يفوزون يبجون مو كتلج احنه نبجي بس مو مثل النسوان لدرجه نوح اربع وعشرين ساعه ، احنه هم عدنه كلوب قابل حجر لو حجر جان ما حبيت عمتج وقاتلت عليها وانتي شاهده علينه مو صحيح..

هزيت راسي ب اي..

ادهم : لتخلين المفاهيم الخطأ تتربع بعقلج وتتشابك وبعدين تتعقد تمام ...

سيلين : تمام ...

ومن يومها كمت انزل جوه واكل وامارس حياتي بشكل طبيعي كدر يأثر عليه وعرف يقره افكاري وحل اللغز ما اعرف العقده اللي جنت اعاني منها لدرجه الانهيار...

وهذا الدرس الاول من دروس الحياه التعلمته من ادهم...

نرجع لحياتي الحالية وبعدين نكمل باقي الملف ما اسده هسه لان بعد بيه هواي...

من طلعت ام عبد جريت نفس قوي وبجيت كاعد يعيشني بعذاب الضمير ويعرف شنو اكثر شي يأذيني و يضربني بيه يمكن لو يطب للشقه هسه ويكسرني اهون عليه من حنيته ومن اهتمامه ويايه واني ما استاهل...

نمت و جسمي يون من الألم عبالك فلاونزه بالعظام ، ثاني يوم كعدت الصبح اجر بروحي بدلت ورحت للدوام اخذت تكسي مكدرت اسوق لان عيوني مقفله وتدمع كوه اشوف بيها رحت للدوام اشتغل بدون تركيز انتبهت عليه البنيه الويايه ..

_ اليوم مو على بعضج بيج شي..

سيلين : مريضه والله صارلي كم يوم واليوم اكثر شي متأذيه..

_ كومي ارتاحي اني اكمل شغل عنج ..

ماكلت لا لان قابليتي صفر مابيه اشتغل...

سيلين : شكرا حبيبتي..

_ العفو هذا واجبي..

رحت كعدت بمكانها خليت ايدي على الميز وغفيت ما حسيت اله من كعدوني خلص الدوام ...

طلعت والسطره براسي لزمت كصتي نار اكو صيدليه قريبه رحت دخلت جانت هوسه هواي ناس واكفين همست للولد بصوت ضعيف..

سيلين : عفيه بلا زحمه ممكن سؤال..

جانت عينه بالكشف

يه رفع راسه وكال تفضلي..

سيلين : صار كم يوم اصخن وبلاعيمي وعندي كحه شنو اخذلها علاج..

_ بس العفو كحتج يابسه لو رطبه..

سيلين : لا يابسه..

_ تمام راح اكتبلج علاج وتستمرين عليه من تشوفين نفسج صرتي زينه اتركيه..

سيلين : اي عاشت ايدك...

خله العلاج بالعلاكه وخلاها على الميز..

_ تفضلي..

سيلين : شكد ؟

_ ١٥ الف..

فتحت جنطتي كلبت منا منا ماكو ولا فلس ، صخام من الخبصه نسيت اخذ فلوس همزين عاد جان بيها كروة من جيت للدوام ...

سيلين : خليه يمك اجيب فلوس من سيارتي واجي..

_ اخذيه اختي وبعدين جيبي..

سيلين : لا هنا السياره قريبه...

كذبت عليه شسوي استحي اكله ماعندي فلوس ، طلعت من الصيدليه اخذت تكسي وبوجهي للبيت وصلنه للعماره...

سيلين :هنا يمك ، بلا زحمه انتضرني دقايق اجيب الكروه لان ناسيه فلوسي بالبيت.

اشر براسه اي عفته ورحت لكيت ابو عبد بالباب واكف..

سيلين : عمو فدوة حاسب ابو التكسي ومن تصيرلي نزله انطيها الك مابيه اصعد وانزل احس راح يغمة عليه.

ابو عبد : صار بنتي روحي لتشيلين هم...

سيلين : الله يوفقك..

صعدت وكبل دخلت لشقتي مددت بملابسي ، شسوي حتى مابيه اكوم اجيب علاج ما اكدر مسطورة متأكده اوكع بس اطلع ، كمت فتت للحمام سبحت هلمره احس صدري ضاق كمت كوه اجر النفس ، سويت حليب حار وكعدت اشرب اندك الباب ، صحت منو ..

ابو عبد : اني يابه ..

سيلين : كول عمو مابيه اروح البس حجاب فدوه..

ابو عبد : هذا علاج اجه ولد كال انتي موصيته..

سيلين : اني ما موصيه احد ، لحظه عمو دقيقه..

رجعت لبست وطلعت فتحت الباب ...

سيلين : وينه العلاج..

رفع العلاكه اخذتها منه باوعت نفس العلاكه العفتها بالصيدليه..

سيلين : شلون شكله الولد الجابها الك شكد يطلع عمره...

باوعلي بشك وكال.

ابوعبد : ضعيف ويطلع كصه ابني عبد..

هزيت راسي وتشكرته اخذت العلاح ودخلت ، يعني جان موجود من جنت بالصيدليه زين منو هذا الولد الدازه راح اتخبل...

اخذت العلاج على معده فارغه لان مابيه حيل اسوي اي شي ولا اشتهي اكل ، طبيت للغرفه ونمت ماعرف بيش الساعه بس وره المغرب...

فزيت الصخونه تدك براسي كمت اتذكر شلون جان يداريني من اتمرض لو خوفه عليه واللهفة بسؤاله اول مايفوت ويصيح شلون صرتي ،

درت وجهي على مكانه البارد بعد كم ليلة لازم انتظر حتى اشوفه مره ثانيه يخلي راسه على مخدته واشمر مخدتي وانام على صدره واتوسد احضانه ،

كلشي بالغرفه يعزيني بغيابه فراشي قطع الاثاث مرات احس حتى الحياطين تبجي على فراكه..

ماكو هيج بشر اثر بيه و ترك بصمه بحياتي متنسي مستحيل يجي رجال ويأثر عليه مثل ادهم..

غمضت عيني متوسله بيها متبجي كافي تعبت، حضنت المخده وشددت لزمتي عليها وعصرتها بصدري ماعرف انتقم منها لو اذب حركتي بيها ،

ضليت اتكلب وحرارتي بدت ترتفع اكثر حسيت راح يغمى عليه كمت استندت على مخدتي وخليتها ورايه ارتاجيت على الجربايه ماريد افقد الوعي اريد اضل صاحيه،

صفنت ورجعت دموعي تنزل اريد ارتاح ما افكر بيه ولو يوم واحد ما اتذكر لمساته ولا النغزات على وجهي مال لحيته بكد ما جنت اضوج منها حنيت الها هسه محتاجه اغرك بقبلاته بلمساته الدافيه غمضت عيني اريد دموعي توكف عيوني راح تعمى ،،،،

تلمست شفتي بأصابعي وتذكرت اول بوسه شسوت بيه وشلون بهذلت احواله حتى بوقتها سألته اللي يشوفك يكول ما مجربها قبل رد عليه وكال كلشي وياج مختلف ...

ميروح من بالي الشعور الاول الحسيته وياه من اختلطت انفاسنه سوه طعم ما مجربته قبل اشبه برحيق الورد ..

رجعت باوعت لوسادتي الخاليه اعزيها كل يوم قبل لا انام اتسامر وياها ونحلم سوه بشوفته لحد الارهاق رجعت نمت بعد ما قضيت نص الليل ارق وتعب ..

دكت بيه الصخونه للحد اللي تبللت بيه ملابسي استسلمت للمرض ونمت ماكو احد يداريني لو يسويلي اكل لو عصير مثل ما جان هو يهتم بيه غطيت بالنوم ماعرف اغمى عليه ، وحلمت بابا اجاني بالحلم خله ايده على راسي..

بعدها دنك وخله شفته على كصتي تحسس حرارتي وكعد بصفي على السرير ،

اتخله شي على كصتي بارد بده يسحب حرارتي شي مثل الكمادات بس الغريب وين؟؟؟؟؟

كاعد اشتم عطر مو عطر بابا عطر قريب عليه وشامته هواي لحد الارتواء اريد افتح عيني اشوف هذا بابا لو لا ماكدرت لان جنت بين الوعي واللاوعي انتضرت شويه كدرت افتحها بس اجفاني ثكيله حيل باوعت ظلمه ضوه خفيف يفوت من جوة الباب كلوب صفر معلوك بالممر الكبال غرفتي زين اني هذا ممشغلته معقولة احلم ؟ .....

شكرا لزيارتكم عالم روايات سكيرهوم