رواية قصة وجدان الفصل الثاني والخمسون 52 بقلم انين الليل

من گلي عاصف :: انزلي غسلي اديج

نزلت وهو گلي :: تعاي 

راح يمشي وانا ورا جان اكو جدول بي ماي هو كلي :: غسلي اهنا 

اتقربت من الماي لمسته بايدي كان يجري وبارد غسلت اديه وصرت اشمر الماي على وجهي واستنشق الهوا 

اباوعله واگف حاچيته =. تعال غسل المي كلش بارد 

ابتسم واتقرب غسل اديناته :: ياالله 

اشرلي نرجع يم السياره رديت = لا خلينه اهنا 

:: لا ما يصير خلي نروح نكعد هناك

رحنه كعدنا وهو جاب الاكل صرنا ناكل انا ما اشتهييت او خلي اكول بعده راسي ماذيني عاصف انتبه الي 

:: ليش ما تاكلين 

= ما اشتهي 

:: ما تشتهيين لو بعدهي نفسج لعبانه 

=. راسي دا يوجعني 

قرب اللكمه من حلگي :: هاج اكلي هاي واشربي هذا اللبن

اخذتها للكمه وصرت اكل وبنفس الوقت متاذيه حييل شربت شويه لبن انطاني لكمه ثانيه 

رديت ايده =. لا ما اشتهي 

:: اخذج للطبيب 

=. لا 

صرت اتنفس بعمق واني مغمضه عيوني هو جاوبني :: ليش اتحسسيني بالذنب لان جبتج

اتحسرت. = الشفته شي فضييع 

حرك ايده :: بس مو افضع من الشي السوا ابد لا تفكرين هالشكل 

=. شقصدك 

:: اقصد لا تفكرين بهيج اشياء لاتخليين گلبج رعيع صيري قويه وقوي گلبج ودووم اتصرفي 

بعقلج مو بعاطفتج 

=. بس الموقف 

:: ياموقف موقفج الي جنتي بي لو موقفي لو شنو گووي چلب واخذ جزائه

رفعت راسي هو هز راسه :: اي مثل ما فهمتج تذكرين خروفج 

باوعتله هو كمل :: خروفج الزغيرون الي من ترحيين للمراح تلعبين ويا 

= اي وبعدين ذبحته من اجوك خطار 

عض شفته ونفخ :: بيومها انتي شكد بجيتي بس بنفس الوكت انتي جنتي مبتعده عنه وتلعبين ويه خرفان غيره 

= اي لان كبر وصار ينطح

ابتسم :: وحتى انتي صرتي تلعبين ويه ازغر منه ولان كبر فلازم لو انبيعه وهم ينذبح لو انذبحه وانتي بوكتها 

ما قصرتي صرتي تبجيين وتنعتيني بالشرير ولو بيدج تطگيني طلقه 

ابتسمت بتعب = عمو لان انقهرت 

:: لكن بعدين يمكن ثاني يوم او ثالث يوم انتي نسيتي ورجعتي الحياتج 

= صحيح

:: الشي الي اريد اوصله الج انو شما تكون المشكله چبيره ف الها حل لكن اهم شي نتصرف بحكمه 

وشفتي انتي لو جنت بوكتها كاتل غزوان جان صار كل واحد يتقول بكيفه

جاوبته = بس هو يستحق الي صارله مو 

ابتسم وهز راسه :: هسه انتي اتجاوزتي الشفتي ورجعتي ذيج انتي 

ما عرفت شيقصد لكن صدكوني حتى وجع راسي خف 

:: هسه بعد ما تاكلين 

=. لا شبعت حتى انت ما اكلت 

:: تدرين بيه مو هلكد ويه الدجاج ياالله خلي نروح

= ميخالف اسالك 

طلع جكاره وشعلها وباوعلي وهو مبتسم :: شوفي انتي قابل ما قابل تسالين بس انتي صدك مثقفه 

استغربت = شلون ؟

نفخ الدخان :: يعني انتي غصبا ع الخلفوني تسالين بس گبلها تستاذنيين بهاي كلمتج ميخالف اسال 

= ههههه عمو انت منتبه الكل شي اسوي 

:: طبعا ليش انا شعندي غيرج

انتبهت الكلمته والنظرته حاولت اتجاوزها وكفت سالته = عمو ما اشتاقيت للبستان للكاع 

اتحسر وجاوب :: اووو كلش 

= لعد لويش ما تروح 

:: عندي الاهم 

اشرت على نفسي = لاتكول اني 

ما جاوب وكف :: ياالله خلي نرجع 

= زين فد سوال لاخ بس جاوبني حباب 

:: اسالي 

= هسه قبل شويه من خسلت لويش ما قبلت نبقى هناك يم الجدول المكان يخبل 

حك شعره :: لان هاي كاع ناس وما يصير نكعد بيها 

= شنو قابل انبوكها اكيد اكو سبب 

:: اي اكو سبب 

رديت بتذمر. = شلعت گلبي گوله وخلصني 

:: واذا ما اكوله 

= تدري بيه ابقى الح الح الى ان امزعك واخليك تحجي 

:: هههه بهاي صدگتي 

= اي شنو ؟

:: استغفر الله لان من يشوفون سياره بيها مره ورجال ومبتعدين عنها ( حرك اديناته ) هسه هاي شلون افهمها 

= تره مو طفله لو ما افتهم انت كلامك جمل متقطعه 

:: بابا افهمي يعني هاي جايبها ...

باوعلي :: اكمل لو فهمتي 

لملمت حلكي = يعني اتضحت الرويا 

رفع ايده بالدعاء :: الحمد لله هسه نتوكل 

= بلي 

:: ياالله

ركبنا بالسياره وصار يسوق واني خليت ايدي على وجهي هو حجى :: لاتكليلي تردين تناميين 

= ما ادري 

:: شنو منعسه 

= لا بس ملل 

:: ابقي كاعده سولفي عليه 

= ههههه شسولف 

:: اي شي

= مو من اسولف اعرف راح تزعل 

:: حتى لو زعلي ما يطول 

شاف جهال جاي يبيعون مي واكلنس وكف اشترى منهم وانطاهم علاگة الاكل. :: هاكم عمو هذا غدانه اخذو بالعافيه 

اخذه الولد وعينه تلمع //. شكرا حجي 

ابتسم. :: الله يسمع منك

رفع ايده وساق انطاني علاكه :: هذا حبج وجبسج 

= عمو شبعانه 

:: اي عمو سولفي 

= شفت زعلت من گلتلك عمو 

:: احسبي شكم مره اليوم كلتيها

= لا تنسى سنين واني اگولها ولا واحد منعني منها 

:: صحيح حقج انتي ليش ما قبلتي نروح للبستان  

= لان اعرف انت دا تاخذني على اعصابك 

:: ها ومنو كلج ؟

= من طلعنه الصبح وگتلك ليش ما نمر ناخذ علووش انت جاوبتني ما نطول نروح ونرجع 

هز راسه. = هم صحيح 

:: تدري اني هماتين مشتاقه البيبي وللكاع 

= ان شاالله نجيها باقرب فرصه ،

تمينه ساكتين بعدها طلع جكاره ورثها سالني :: شلون صرتي 

=. زينه الحمد لله 

:: تردين تتعلمين اتسوقيين 

باوعتله واني الم بحلگي = وين ؟

= هسه اعلمج 

= ايهنا ؟

:: اي اهنا سيارات قليله والشارع فاضي 

=. تمام بس مو هالمره 

:: ليش ؟ 

=. مو راسي شويه يوجعني وخاف ما اسيطر 

:: لا جا اذا هالشكل ستري علينه

رديت = عاصف 

:: عيونه 

استغربت من رده = احم يعني اني 

:: اسالي التردينه 

= لا ما لازم هو مو سؤال مهم 

:: ميخالف اسمعج اي سؤال بدون تردد

= يعني اذا هسه تعلمني سياقه واحد شافك انت ما راح تضوج 

باوعلي وهو مغير ملامح وجهه :: عليمن اضوج ؟

= يعني انت الك اسمك ومعروف خصوصا ايهنا ويشوفون وياك وحده تسوق 

:: ولو ادري انتي مو هذا سوالج بس ميخالف اجاوبج 

:: اولا انا ما جاي اعلم بوحده غريبه وما اعرفها لو من الشارع انا جاي اعلم بزوجتي الي اشوف انو من حقها 

ان تتعلم ويصير عدها سياره

سالته بحماس = صدك ؟

:: اي صدك اتعلمي وانا اشتريلج سياره 

ابتسمت هو سالني :: بعد عدج اسئله 

هزيت راسي بالنفي عاصف رد :: ولو اشك بس مضطر اصدكج

= ليش اني كذبت عليك مره

صار يشغل بالراديو خلا على برنامج وصار يسوق ويدخن واني هم اسمع ودايره وجهي والالاف الاسىله الي اتمنى 

الها جواب = يعني كل ما اعرف منه شي احتاج اعرف اشياء ثانيه 

= بس هو يتنرفز من اساله 

= لكن لازم اعرف اشياء تخصني وهو ما يگولها 

=. اي خلي اساله بكل شي يخطر على بالي حتى لو ضاج او زعل او اتنرفز من حقي اسال واعرف

باوعت اله هو يسوق ومنتبه للشارع سالته بهدوء. = انت شلون حبيتني وانت تحب امي 

عوج ركبته باستغراب :: منووكلج ؟

حركت ايدي = شنو ؟

:: انا حبيتج 

= كلامك وتصرفاتك 

:: بس انا ولا مره كتلج احبج

صدك اتفشلت رديت. = لعد والبارحه من سالتك لويش عوقت غزوان شنو جاوبتني 

:: شنو شجاوبتج نسيت 

= لا ما نسيت واني حجاوبك كلت لان غزوان اعتدى عليه على بنتي على روحي 

باعلي :: وهي هاي الحقيقه 

= يعني انت تحبني 

:: وشيفرق وياج من تعرفيين قابل راح تحبيني 

= شتقصد ؟

وكف السياره وبقى يباوع ليكدام سالته = ليش مدا اتجاوبني 

:: لان ادري انتي ما تحبيني ولا تتقبليني فمو مهم تعرفين احبج او لا لان حتى انا ما اقبل تصدقيين عليه 

= اتصدق شنو ؟

:: يعني مثل ما نشوف بالمسلسلات والله هو يحبني ف انا لازم ابادله الحب حتى لو جذب لازم اضحي بعواطفي 

حتى اجازي على كل شي سوا الي وانا ما ادور هيج سوالف

= بس هي هاي الحقيقه

:: شنو قصدج تتصدقين بعواطفج عليه لا بابا احتفظي بيهن انا مو بحاجتهن 

= زعلت مو 

:: لا ليش ازعل 

= مني 

:: لا ما زعلان كل شي ينباع وينشرى بس العواطف هاي بذره تلگينها داخل بنادم وما تطلع اله بالوكت المناسب 

وللناس الي نحبهم

= وانت يمته عرفت بالعواطف اتجاهي 

  ما جاوبني رديت = ليش سكتت مو كنت تحب امي مو بقيت سنين وانت رافض تتزوج وبعدين اتزوجت بتها 

:: اتزوجت بتها حتى انقذها وحتى اريح انسانه مسكينه بكبرها انسانه ما شافت السعاده والراحه بعمرها 

انسانه عزيزه عليه 

حاجيته باستهزاء = بس ؟

ضم شفايفه وبعدين گال :: اي بس 

= كذب

باوعلي وسلهم عيونه :: مو تعبانه وتحسين بالملل نامي 

= دائما تتهرب 

:: يجوز 

= وانت تحبني عمه امل گالت 

حرك ايده :: شكالت عمتج امل 

+ كالت فاضحته عيونه من اول ما اجيتي البيت جدج انت دا تراقبني من امشي ومن اكل ومن احجي

:: هاي امل 

= اي وهماتين كالت من اتمرضت انت اتخبلت عليه 

:: ما دام امل هيج شايفه وهي تجينه بين فتره وفتره انتي ما شفتي ما حسيتي 

= دا اتصورك عمي اخو ابويه ما كنت اعرف انت مو عمو

باوعلي ورجع يضرب باصبعه ع استيرن السياره :: اريدج تفكرين اذا مو انا موجود وصار الصار من يوم حادثة 

اخوانج انتي واخوج منو الكم وشلون راح تعيشون  

:: وما شاء الله ابوج ما مخلي بكلب واحد محنه ابوج لاجم گلوبنه كلنه 

باوعلي :: و حتى ابرد راسج وما تلحيين ادري بيج لو شني اسويلج ابقى عاصف عمج الشرير الي ما تشوفيني 

بس هالشكل 

حرك ايده :: شتردين تعرفيين امج گتلج من گبل جان حب مراهقه او تمني بس انتي 

( غمض عيونه ونفخ حييل ). انتي مجموعة اشياء

:: تردين تعرفين شني انتي انتي بنيتي وامانة امج وبدون اخ ومكروهه من كل هاي الناس الحواليج دموعج 

ضحكتج كلامج وتصرفاتج وهدوىج كل هذا الشي خلني مسوول عنج ويمكن مثل ما گالت امل عشكتج وادري بيج 

ما تفكرين بيه ولا اجي على بالج

:: تردين تعرفين يمته عشكتج من حضنتيني من رجعنه من هشام بيوم المواجهه وعرفتي بي انحكم عشر سنين 

وصرتي اتصيحين عليه عبالك انا القاضي بعدها حسيتي على نفسج 

جاوبته واني مدنكه = واجيت اعتذرت منك بالمطعم 

هز راسه :: اي 

:: وبعد تردين تعرفين يمته من نمتي على ايدي من اخذت امي وعمتي هديه الله يرحمها من رحنه للزياره صرت 

اسوق بيد وحده وانتي نايمه على ايدي وعلى كلبي ما هان عليه اكعدج 

:: بعد تردين تعرفين يمته 

:: من اتمرضتي

:: بعد تردين تعرفين لو كافي والعلمج ادري بيج ما تفكرين بيه وانا منطيج الحق 

:: رجال فلاح واكبر منج بتسعطعش سنه فبردي راسج انا ما اريد منج شي هو وعد وكلمه گلتها الامج ورساله غصبا 

ما عليه ااديها وكل واحد يذكر صاحبه بالخير واي شي ما اريده منج لا هسه ولا بعدين

باوعت اشوف بوجهه كلام وعتب وحتى قهر ردت اكله انا اسفه وانطيني مجال استوعب الي حصل الي لكن خجلت 

هو رجع ساق السياره وصلنه البغداد العصر الطريق ازدحام هو يدخن واني ساكته وصلنه المكان گلي 

:: انزلي 

باوعت كوفي هو رد :: خلي ناخذ چاي 

= ليش مو بالبيت 

:: انلحك ع البيت

نزلت كعدنا بزاويه وطلب الي چاي بعد ان سالني :: اجيبلج شي تاكلينه 

   رفعت اكتافي = لا 

:: ليش انتي ما اتغديتي 

=. شفت المنيو عدهم بس كيك وحلا لو عدهم بيتزا فطاىر كان خليتك تطلبلبي 

    :: بكيفج شنو يعجبج اطلبي 

= شكرا اكتفي بالجاي

    ابتسم وهو فطلب گهوه مره سالته 

= شعجب مو چاي 

:: اهنا يسوون گهوه مضبوطه 

باوعتله باستهزاء رد بابتسامه :: انتي شاطره بالچاي الگهوه مو هلكد تضبطينها 

= يراد اخذ دروس بتحضيرها 

:: لا هي ذبه 

= شنو يعني ؟

:: يعني اكو وحده من تجي تطبخ خطيه تخلي كل حيلها بس يجي الطبخ مو مضبوط وتشوفلك وحده بمجرد ما تطبخ 

طبخها بي مذاق طيب لو شتسوي 

= احنه نسميها نفس يعني نفسها طيب بالطبخ 

:: بالضبط وانتي نفسج طيب بتخدير الچاي بعد يراد نضوط طبخج صدك انتي طبخج شلوننه 

ابتسم :: يعني نفسج بالطبخ شلونه 

رفعت اكتافي هو. رد :: منا وغاد اطبخي ونضوك ونحكم

شرب الكهوه ويباوعلي حچييت 

= رجاء ليش اتزوجتها وتركتها 

اتغيرت ملامح وجهه انا كملت = انت ورجاء بيناتكم قصه 

:: هاا 

هزيت راسي :: بلي حالها حال قصة سعدي ويه بدر وقصة ناظم 

رد :: ولا تنسيين قصة غزوان ويه وجدان 

= اي بالضبط

:: وانتي شلون عرفتي بين رجاء وبيني قصه 

= من خلال كلامك 

حرك ايده = ياكلام ؟

=. تدري دا اشوفك مقلل الجكاير 

:: انا 

=. بلي

:: ولا منتبه النفسي 

=. احسن الصحتك علوا تقطعها فد نوب 

:: منو يكدر ايجوز اموت اذا كطعتها 

ما رديت سالني :: اي ما جاوبتيني 

=. ع شنو 

:: سالتج منين عرفتي بيني وبين رجاء قصه 

= مره سالتك گتلك اكو شي ضامه عليه كتلي اشياء ومن لحييت كتلي اكو كلام من نحچي يمكن تطير اركاب 

ويصير بي دم

رفع حواجبه. :: ها عاد انتي ربطتي كلامي بعلاقتي برجاء 

= بلي 

:: شلون ؟

:: يعني انتو ما تشبهون اي اثنين متزوجين 

لملم حلكه :: يعني قصدج مثلنه انا وانتي

= لا ماكو اي وجه مقارنه 

:: ليش 

=. لان احنه بيناتنا اتفاق وانت الي برمت هذا الاتفاق ولو اكو غير اتفاق اكيد هم كنت اوافق بي لان ما كان عندي 

اي حل اخر 

:: وتعتقدين رجاء ما كان عدها حل ثاني 

= بلي ويجوز انت الي ما عندك حل ثاني

:: وضحي 

= بدون زعل 

:: بيا وكت ازعل من ( اتنفس ) اجيتي واحنه نسولف وكلساع اتكليلي مو تزعل 

ابتسمت بهدوء= يعني ما تزعل 

:: لا ا( ابتسم ) اصلا بس ازعل او اضوج مجرد ما تكليلي اسفه اقبل 

= زين لعد حگلك اسفه مقدما 

:: وانا قبلت اسفج

= شكرا 

:: العفو كملي 

= يعني من اتوفى عمو بدر انت التهييت بالشغل بعدها من حصلت ورث ابوك ورجعت حق جدي وابويه سبقك 

على ماما انت اتاثرت هوايه وانت شاب ف احتمال واسفه الهذا الشي بس اني هذا اعتقادي يجوز صحيح يجوز لا 

:: شنو اعتقادج ؟

= يعني ...( صرت الملم بحلكي ) 

:: ليش سكتي احچي اسمعج ولا تخافيين ما ازعل

= انت وعمه رجاء يجوز غلطتو يعني انت بوقتها شاب وبعدين صححت غلطك وتالي انتبهت الفارق العمر الي 

بيناتكم لذلك هجرتها 

خزرني بابتسامه :: وداعتج لو ما ناس جان صفگتلج 

= مو كلنه بدون استهزاء وبدون زعل

هز راسه :: لا منو گالج جاي استهزا او ازعل كل ما بالامر متفاجى من كمية الذكاء العندج وشلون تربطيين الاحداث 

مره كلتيلي اريد اعرف كل شي حتى اكتب قصتي بس انتي اكبر واحد يكتب قصص ما يلحك تفكيرج 

باوعتله هو رد :: صدكيني هاي الحقيقه ما ابالغ 

اشر للعامل يجيب الحساب 

اجه العامل هو خلى الحساب وابتسم وگف وگلي :: ياالله 

= ليش هربت 

رد باستهزاء:: شسوي شردت من الحقيقه

ركبنا بالسياره وتمينه. ساكتين وهو ساق السياره سالني 

:: تحبين نتعشى اهنا لو نرجع للبيت 

= لا نرجع للبيت راسي يوجعني 

:: تمام براحتج 

وصلنه للشقه دخلت وهو گلي :: ما اتاخر اروح اجيب عشا وارجع

هزيت راسي ودخلت كنت كلش تعبانه يعني سافرنه ورجعنه بنفس اليوم صد رد هواي تعبت دخلت للحمام

اخذت دووش وغيرت ملابسي وصليت وبقيت متمدده بالغرفه تعبانه واريد انام لكن ما اگدر حسيت على باب الغرفه 

يندك ويسالني :: نايمه ؟

رحت بسرعه فتحت الباب هو گلي :: ياالله جبت عشا تعاي اكلي

طلعت ورا لگيت جايب بيتزا وفطاىر وعصير وخالهن ع طبلة الصاله ابتسم = ياالله تعاي لايبردن 

صرت اكل البيتزا وهو ياكل فطائر سالته = صرت تحب الفطائر 

:: انا من زمان اكلهن شنو نسيتي 

= بلي نسيت انت ما تحب العجينه البيها زيتون وفلفل وبيبي تخبزها بالتنور 

:: هههه اي بالضبط

جاي اكل حاچيته = شكرا هوااي 

رد بهدوء:: على شنو ؟

= على هاي العشوه 

:: تدللين يوميه اجيبلج مثلها 

= تسلم 

رفعت راسي شفته يباوعلي بدون ما ياكل سالته = شنو شبعت 

:: اي الحمد لله

= ما اكلت 

:: لا شبعت 

وگفت = تمام لعد اسويلك جاي 

:: بكيفج 

= شنو ما تشتهي 

:: لا ما اريد اتعبج 

= ولو تدلل

هو رفع راسه وباوعلي واني رحت للمطبخ والوم بتفسي = شنو هاي هنوب تدلل شكد غبيه اني 

بقيت بالمطبخ حد ما كمل الجاي صبيتله كوب واجيت هو كاعد والجكاره بحلكه =. اتفضل 

:: شكرا 

اخذ الاستكان خلا ع الطبله كان يمه علاكه زغيره قدمها الي :: هاي الج

اخذتها ما اعرف شنو بيها هو هز راسه يعني افتحيها فتحتها شفت باكيت عرفته جهاز نقال طلعته 

:: هذا جهاز جبته الج وسيفت بي رقمي ورقم حبوبتج وحتى رقمج حتى اتحفظينه 

ما حاجيته هو گلي :: انا منا وغاد لازم ارجع اباشر شغلي وانتي هم ترجعيين للمدرسه 

ما حجييت اكتفييت اباوع هو ضم شفايفه وهز راسه :: اي راح اسويلج نقل انتي وعلاوي

بصراحه اتفاجآت من تصرفات هذا الشخص الي يوميه ايفاجآني بشي جديد = يعني نداوم ايهنا 

:: اي تداوميين اهنا واني كل يومين تلاثه اجي بس من هسه اكلج 

:: اي رقم غريب ممنوع تردين علي وهم ممنوع تنطيين رقمج الاحد احنا بعدنا ما نعرف الناس 

والدنيا تخوف والوكت ما يتامن 

= تمام

اخذ نقاله :: خلي اصورج حتى اسحبهن وابلش بنقلج لان يراد الها فره 

بلعت ريكي = راح اتعبك هواي 

:: لا تعبج راحه اهم شي تشدين حيلج وتنجحيين 

= ان شاالله 

:: روحي عدلي حجابج وتعاي اصورج 

درت اريد اروح للغرفه هو گلي :: هاج خلي ع الشحن

خليته ع الشحن ورحت للغرفه عدلت حجابي ورجعت كعدت ع القنفه وهو كلي :: باعيلي 

باوعتله وصورني :: باجر ان شاالله اسحبهن 

بقينه ساكتين فتره هو يدخن ويباوع للنقال مالته وكفت اخذت بقايا الاكل والكوب ورحت للمطبخ سمعته يحاجيني 

:: جيبيلي جاي 

صبيتله باستكان وجبته اله صار يشرب ويدخن حاجيته ابرود = ليش البرود بعلاقتك ويه رجاء 

ابتسم سالته = ليش تضحك ؟

:: لان صدك لحوحه 

حكيت كصتي = هو كل شي عرفت بس هاي النقطه ما عرفتها

:: وليش تردين تعرفينها ؟

لملمت حلكي = هو من باب الفضول واذا الشي يخصني فهم لازم اعرفه 

:: بس هو شي مو مهم 

جاوبت بلا مبالاة = لعد احجي الي 

:: مو مهم وما يخصج 

= زاد فضولي اكثر

:: هو هذا الي گلتي 

هزيت راسي = مستحييل 

:: ليش مو تكولين بعدني شاب ومراهق 

= لا انت مو مال هيج شي 

:: بس انتي تهمتيني 

= تكدر تعتبره تسرع مني 

:: لا مو تسرع وهاي الحقيقه 

= تكذب

خزرني :: ديري بالج تحچيين هاي الكلمه گدام احد 

بلعت ريگي = اسفه ابيناتنا 

:: وحتى ابيناتنا عيب تنعتيني بهيج شي حتى لو صدك 

= بس انت ما تكذب 

:: مو توج تكليلي جذاب 

= اي دا اقصد من گلت على كلامي صحيح

:: هاي السولفته كله ما اتاثرتي بشي ؟

اتنفست بعمق = بكل شي اتاثرت بس اكيد الي ضامه شي كلش كبير ويجوز على كلامك تطير بي اركاب 

:: كبل مو هسه 

= يعني صحيح ضام شي 

:: يمته تبطلين ملحه 

= من اعرف منك كل شي

:: هسه باالله اچذب 

= ما عندك مصلحه 

: : منو يگول 

= كلياتنا ( رفع حواجبه ). يعني اني واخويه علووش وبيبي وحتى مهدي كلنا نعرفك انت ما تكذب

حك حنجه :: بدر الله يرحمه عشكها الرجاء لاتنسيين قريه وحده وسلف واحد واولاد عم 

اتزوجها جان يحبها يموت عليها ومن استشهد بقت گاعده على ابنها واهلي دللوها دلال بس الله يدري بي 

وره تلث سنوات اجه ابوي الله يرحمه وگلي بويه عمك جاي يضغط عليه يريد ياخذ مرت بدر وابنها 

استغربت وسالته :: وين ياخذهم ؟

كلي // يكول بتي شابه وجاي يجون عليها خطابه وانا اريد اطلع من خطيتها

:: وهذا الشي ابد ما سمعته من ابو رجاء الله يرحمه اله مره وحده كبل ما اقبل اتزوجها 

= شلون يعني 

:: هي مره اجه وحجى بالسالفه وبعدها ابوي حاچاني 

= يعني بنفس اليوم 

:: اي بنفس اليوم ،

= وشنو كان ردك

:: ما قبلت وگلت مستحييل وحتى ابوي زعل عليه وتالي اجاني للبستان صاحني ورحتله وهناك ابوي اتوسل بيه اتزوج 

رجاء وانا ما قبلت مو لان اكبر مني ولا لان ما احبها بس لان هي مرت بدر شلون يصيرلي نفس بيها وانا ادري بي 

شكد يحبها وبيومها ما رديت للبيت وبتت بالبستان بحجره موجوده بذاك الوكت نخليها للعمال لو للفلاليح الي يتنيسنون

= شنو يعني يتنيسنون 

:: يعني يجون بوكت الحصاد من مناطق بعيده يشتغلون واكثرهم يلمون اليبقى من الحاصده ياخذونه الهم 

= ما اعرف هاي اول مره اسمع ،

سلهم عيونه وابتسم سالته = من بتت بالبستان شنو صار 

اتحسر :: اجت امي وابوي وهمه الحزن والخوف بعيونهم وابوي بچى. بحركه وكلامه الهسه يرن بااذني 

بويه لا تشمت الناس بيه 

:: اهنا انا تخبلت نزلت على رجله وگتله بويه انا روحي فداك بس مرت بدر ما تطيعني روحي عليها 

رد عليه // الخاطري

هزيت راسي وجاوبته :: اكتل روحي ولا اخذها. وانكشف عليها لو امووت 

جاوبته = ليش الله محللها 

:: لان ما تدرين عشك بدر الها ما تدرين شكد يحبها جنت اشوفه من يقابلها بالبستان لو من اتزوجها يمكن بوكتها 

ملك الدنيا 

ضميت شفايفي هو سالني :: شبيج ؟

= يعني اني دا اشوف عمو بدر حلو وشاب ف اختياره كلش مو ضابط

:: لا من چانت شابه حلوه هاي حقيقه 

= وشنو صار 

:: ابوي من سمع گلي واذا اكلك انا انزل على رجلك مو على ايدك 

استغربت كلام ابوي حسيت اكو شي چبير سالتهم بهدووء:: ليش شصاير ؟

امي فجرت المفاجأه وهي تمسح بدموعها گالت // مرت بدر حامل

فزيت من مكاني وانا خاله ايدي على حلگي عاصف باوعلي 

:: استغربتي مو 

=. بلي معقوله لووبيبي حجت هالشكل بس حتى يقنعوك 

:: حتى انا اتفاجآت لا دكولي اتخبلت واحد وطگني طلقه بقيت حتى ما رمشت ما احس اله اخذت المسدس 

وطلعت اريد اروح اكتلها 

وابوي كاظني وهو يترجاني // استر على شيباتي تالي عمري لا تفضحني

:: انا اول مره اعت ايد ابوي واكله :: انا اغسل عاري بايدي اكتلها واكتل الجلب الضحك عليها 

ابوي كاظني ويبجي ويگلي // ولك هو ياهو اللعب بعرضنا ولك المنه وبينه 

صرت الهث وابوي وامي كاظيني باوعت الهم ابوي كلي وهو يبچي // سعدي سعدي حبل مرت اخو

فزيت من مكاني =. لا ما معقوله انت شدا تحچي 

:: مو انتي تردين تعرفين الحقيقه هاي هي الحقيقه 

= عاصف بلا ما تستهزأ

:: استهزا بيمن 

بقيت ساكته وارجف عبالك سعفه وگلبي يدك هو باوعلي

:: كعدت بالكاع اريد استوعب السمعته ما ادري شسوي بذيج اللحظه ردت ارمي روحي طلعت بيدي سلاحي 

وهمه وراي رحت امشي مثل المخبل لمن ما وصلت للبيت ودخلت الحجرتها كضيتها وصرت اضربها راشديات 

واحاجيها :: بت الكلب ليش هيج سويتي بينه

وهي ساكته بس دموعها تصب وابوي كاظني وامي تبچي وتتوسلي //. يمه فدوه اغديلك لحد يسمع وننفضح 

:: ازيد من هاي فضيحه شنو بعد احچي ولج ليش هيج 

هي ردت وهي تبجي // قشمرني گلي احبج حتى گبل ما يحبج بدر ولو ما بدر معدووم جان انا كتلته حتى اخذج 

وصار يجي ويكلي اتزوجج وهسه وانتي بت عمي وما حبيت وحده بكد ما حبيتج صار يسمعني كلام وهيج اسويلج 

وهيج اعيشج انتي وابنج ومحد يلومني لان انا ابن عمج اخذج واعيشج احسن عيشه 

ويوميه على هالرنه 

:: ولج يمته يوميه 

- - بالليل يجي ومحد يدري بي لمن ما طلعت حامل ودرا بيه هو گلي اسبوع الجاي روحي الاهلج وانا اجي 

اجيب ابوي واخطبج واخذج واكول اريد الم مرت اخوي وابنه وانتي اقبلي 

ومن رحت هو ما اجه وگلت خاف عمي ما رضا بس من رجعت ونشدت عمتي گالت ما اجه وتانيته يوم يومين 

لمن ما ايست تالي رحت للولايه انا وامي وهناك خابرته ومن رد عليه گتله ليش ما اجيت كلي شسوي اجي 

جاوبته غير تجي تخطبني وتاخذني وتستر عليه

- - - هو بوكتها ضحك وگلي ليش اخذج انا اخذلي وحده كح... سلمت نفسها ويه اول حجايه 

روحي بابا لا تتبليين عليه روحي دوري واحد تخلينه ابو الهذا البطنج انا المفروض اذبحج واغسل عاري 

بس شعليه كل لشه تتعلك من اكراعها 

:: هي صارت تبجي // حاولت اطيحه ما طاح شسوي بكيفكم اتكتلوني اكتلوني

:: صرت ارجف مثل السعفه ابوي اخذني هو وامي للديوان وسولفلي رايح الابوج للبيت ومتوسل بي 

لايفضح اخو بكبره وشنو ذنب ابن اخو يمشي والناس اتاشر علي وابوي اهنا صدمني وهو يگلي  

رحتله واتوسلت بي ياخذ مرت اخو ويستر عليها عبالي ينكر ويكول چذابه ما متدني العرض اخوي 

لكن سعدي صدمني من ما نكر وگلي اي انا الحبلتها وشتريد اتسوي سوي 

ومن نشدته //. ليش ولك تريد تفضحنه وتفضح اخوك وابنه رد عليه كلي وهو يضحك 

انا اكره بدر حتى بكبره واكرهك انت بويه انا ما اريدكم ولو بيدي اخلي فوككم بانزين واحرككم كلكم

وابوي گلي //. طلعت من بيته وكبل لا اطلع دعيت علي وكتله

- - اموت وانا ما راضي عنك لكن سعدي ضحك وگلي ولا ترضى مو بحاجة رضاك طلعت وانا ادعي علي 

الله لا يوفقه ويشوفها بااولاده

سلهمت عيوني وحجيت ويه نفسي = فعلا الله ما وفق ابوي ولا وفق اولاده 

اتحسر وگلي :: اضطريت وانا اشوف ضعف ابوي وتوسل امي وانا اشوف كرامة بيت چاسب وشرفهم اتمرغ 

بالتراب من وره ابنهم قبلت اتزوجها زواج صوري يعني لا اتقربت منها ولا بلحظه فكرت انها تكون زوجتي 

اتزوجتها وانا اكرهها واحتقرها لهسه ولو بيدي اكتلها بس الخاطر ابوي والخاطر بدر قبلت بكل شي

باوعلي :: هسه عرفتي السر الي بيني وبين رجاء 

دنكت وعرفت هو يشوفني مثل ما يشوف رجاء 

   احس ب انفاسه عبالك كان يركض صدكو ما الي عين ارفعها بوجهها سالته واني عاضه على شفتي خجل 

= ومتى طلكتها ؟

:: بمجرد ما جابت البت گعدت وياها بحضور امي وابوي وكتلها بالحرف الواحد 

:: بتج اتفهمينها انا مو ابوها شلون ما اعرف وانتي راح اطلكج وتبقيين عايشه اهنا يم امي وابوي وابنج 

= يعني فرح تعرف بيك مو ابوها 

هز راسه :: هذا الشي ما ادري بي لان ولا بيوم سالت رجاء 

= ليش ؟

:: لان البنيه ما الها ذنب الذنب كله من ابوج وحقارته وامها 

= اهاا من هيج هي داىما محجبه منك اكيد كايلتلها 

:: يجوز ما اكدر اجزم

= ليش ما سالت رجاء اذا كانت حاچيه البنتها او لا 

:: لان بصراحه فرح تكسر خاطري 

=. تحبها الفرح 

:: يمكن تستغربين اذا كتلج اي عاطفه اتجاهها ما عندي 

= بس گدام الناس انت ابوها 

:: كتلج هي البنيه ما الها ذنب 

= وابنها الرجاء 

:: شبي ؟

= يعرف باامه

عكف وجهه :: شبيج شيعرف ؟

= لتفهمني غلط اقصد يعرف باامه مطلقه 

:: اي يعرف لان من هو زغير يعني بالابتداىيه ابوي فهمه سبب طلاكي 

= يعني شنو گله الحقيقه 

:: شبيج شيكله الحقيقه ابوي فهمه انو انا اتزوجت امه حتى اضمن بقاءه يم بيت جده واهلها ما 

يزوجونها الواحد غريب وهو من كبر اتقبل الموضوع 

= يعني الناس اقصد اهلها يعرفون

:: لا ما يعرفون ،انا سويت كل هذا الشي الخاطر الناس الي ربوني وحسبوني مثل ابنهم واكثر 

بقييت ساكته حاجاني :: ها شو ساكته بعد ما عدج شي تردين تعرفينه لو اكتفيتي 

خجلت من كلامه ومن تصرفات ابوي رد عليه :: لا تسكتين 

انا مدنگه خجل من الي سمعته ودموعي نزلن هو رد عليه :: وجدان شبيج احچي

رفعت راسي والعبره متكسره بصدري جاوبته = شحجي اصلا كرهت حتى نفسي ياريتني ساكته وما ساىلتك 

ولا عرفت انو ابويه سبب كل هاي المصايب ابويه هو السبب بلي صار النه والي احنه وصلناله فعلا ابوي ... 

صرت احجي بصوت متقطع = ما اعرف شكول وشحچي هاي الناس حقها من تكرهني وتكره اخوتي وتكره امي 

اصلا متفضليين علينه انو قبلو نجي يمهم ونكعد والا لو غيرهم ناس وجرى عليهم الي جرى كانو يخلونه بالشارع 

لو يدزونه الملجأ

:: انتو ما الكم ذنب بالصار الذنب ذنب ابوج 

  = اي ابويه الي جدو دعا علينه واني مستغربه واسال بنفسي ليش بيبي من انقتل ما مهتمه اصلا تبجي على بدر 

لو رجاء الي بين عليها شكد فرحانه وما لابسه اسود 

صفنت بقهر وگلت = اووف ابويه 

:: اخذ جزاءه وانتي ما عليج

باوعتله = بربك ما عليه اصلا انطي كل الحق الكم كلكم تكرهوني وتكرهون اخويه اصلا كل العذاب المريتو 

بي سببه سعدي وكل الي شفته وحسيته منكم هذا قليل بحق وحده ابوها اقل ما يقال عنه مجرم 

:: اي بهاي صدكتي ابوج اكبر مجرم بس انتي وامج واخوتج ما الكم ذنب 

= الذنب انو اسمنه ارتبط بااسمه هسه عرفت لويش جدي حرمه من الورث

:: ابوي لو بيده جان حط طلقه وكتله لكن ابوج جان قمه بالنذاله بزمن الحكومه جان بالقياده والناس تحسبله 

الف حساب جان زايده فخر انو هو كتب على اخو وعلى اثرها اخوانعدم وهو اترفع وما عده مانع يكتب 

علينه كلنه اذا جان بدر عدمو بالرصاص وانطو النه فاابوج بذاك الوكت ما عده مانع يكتب على ابو وعمامه 

او ولدهم ويعدمهم بالتيزاب 

:: ومن صار السقوط اجه وصار ويه الاحزاب وبااسم بدر وگال النظام عدم اخوي لان هو مجاهد وانا اتحملت 

كل شي الخاطره وصار يجذب وانو بقى وياهم حتى يعرف تحركاتهم والكل صدكه واترفع اكثر واكثر 

حد ما انكتل ومحد عرف كتاله وليش

بقيت مدنگه ودموعي ينزلن واني احاول جاهده اجمع شتات امري ما اعرف شسوي اتمنيت الگاع تبلعني 

ولا سمعت الي سمعته وكانما القدر مخلي بيت غازي بكفه واني الوحيده بكفه ثانيه 

ولا انطي النفسي عذر بعد الي سمعته 

حسيت بي وگف وصل يمي رفعت راسي كلي 

:: هسه ارتاحيتي من عرفتي كل شي 

بقيت ساكته هو رد. :: اذا ارتاحيتي ليش ما تحجيين ياالله امسحي دموعج كل شي سمعتي ومريتي بي 

انسي هوااي وراج امور لو ناسيه وراج ترجعيين للمدرسه وتديرين بالج على اخوج 

= تتصور اكدر 

هز راسه :: اي تگدرين بالاراده الواحد كل شي يكدر يسوي 

شكرا لزيارتكم عالم روايات سكيرهوم