رواية قصة وجدان الفصل الثالث والخمسون 53 بقلم انين الليل

بعد الي سمعته من عاصف صراحه خجلت من نفسي واتذكرت كلامه وهويكلي 

:: كل الي انتي بي والي احنه بي سببه سعدي 

احس بوجهي نار ودموع تنزل تلقاىيا عاصف اتقرب مني وكلي 

  :: وجد انتي واخوج ما الج يد بلي سوا ابوج 

رفعت راسي وحجيت باالم = لا الي احنه بي سببه دعاء جدي وحوبة الناس الي ظلمهم

نفخ دخان الجكاره واتحسر :: استغفري ربج الله سبحانه وتعالى عادل ولايمكن ياخذنه وياذينه بجريرة احد الايه الكريمه 

صريحه بسم الله الرحمن الرحيم ( ولا تزر وازره وزر اخرى ) 

جان صار الي صار وهو عدل لا مستحييل

جاوبته واني مبرطمه = والي عشنا شنو 

:: امتحان اختبار من رب العالمين صيري قويه واستغفري ربج الي سوا ابوج انتي ما عليج بي والدليل حبوبتج 

شكد تكرهه الابوج وشكد دعت علي بعدم الوفيق لكن وياج انتي واخوج كلش حنينه 

= حتى انت 

اشر على نفسه :: انا شبيه ؟

= انت حنين

ضحك ورد :: لا غلطانه انا عاصف (لم حلكه واتحسر ) روحي الغرفتج ارتاحي وانسي كل الي سمعتي 

= تتصور اكدر

:: اي تكدرين 

= صعبه 

:: لا بالعكس اسهل منها ماكو ياما راحو من عدنا اعزاز ودفناهم وبمرور الوكت نسيناهم ياالله كومي غسلي وجهج 

ونامي وانسي كل شي وابتدي من جديد

= زين انت من سولفتلي الي صار ما خفت احچي واسولف كل الي عرفته 

:: شوفي كل الكلام الي گلته بس انتي تدرين بي واي احد غيرج ما يعرفه واذا تردين تحچيين فلي راح يكون ضحيه 

انتي واخوج لا تخليين تفكيرج محدود وكبل لا تخطيين خطوه ليگدام ارجعي خطوتين ليوره 

ياالله تصبحين على خير 

= وانت من اهله

رحت الغرفتي وكلامه بااذني = شنو يقصد نروح ضحيه اني واخوي لويش 

بقيت ساكته فجاه حجييت = ها عاصف قصده اذا حجييت ف اكيد بهاءراح يعرف انو ابويه هو السبب بموت 

ابو وهو الي غد ... ر 

ام...ه اووف صدك يعني بهاء ما راح يرتاح اله يقتلني ويقتل علي 

= من هيج عاصف حجالي كل شي بدون تردد 

= وهماتين رجاء الي ما هتمت وما دافعت على زوجها من اتزوجني

= اني واخوتي مديونين العاصف والله يقدرنا نرد هذا الدين 

= عاصف ما يريد من عدنا شي اني لازم مثل ما كالي انسى كل شي وابتدي من جديد 

= حتى عاصف لازم ابدي ويا واحاول احتوي 

= اي هو هذا الي راح اسوي

هزيت راسي = لا ما اكدر ما اكدر اتقبل عاصف ولا غيره 

  = كذب مو وافقتي على احسان 

= اووو. وهو وينه احسان 

= خليني هالشكل وان شاالله يتبدل الحال

صرت اتكلب على فراشي ونمت كعدت الصبح ما لگيت عاصف اتريكت وانتظرت اباوع للنقال ما حبيت اتصل 

بي گلت يجوز عنده شغل وما يحب احد يتصل ويسال ،

انتظرت ما اجه صليت ولان اتريكت فايت وكت ما اشتهييت او لان اتعودت ناكل سوا 

فتحت التلفزيون وكل شويه اباوع للكامرا الى ان صار المغرب اتوضييت وجيت اصلي بالصاله وانا جاي اصلي 

بفرض العشا سمعت الباب انفتح كملت صلاتي وجاي الم بالسجاده سمعته ايكلي

:: عوفيها اريد اصلي 

باوعتله كان طالع من غرفته وصل يمي كلي 

:: تقبل الله 

= منا ومنكم الله يساعدك 

::هلا يابه 

= اليوم وين 

:: عندي شغل

= اني هم كلت عندك شغل وما حبيت اتصل لان خفت انت ما تقبل 

::لا عادي اتصلي بااي وكت 

هزيت راسي ورحت للغرفه هو بقى يصلي كمل سمعته يكول :: ياالله رحمتك وسترك يارب العالمين 

فتحت الباب = اسويلك عشا 

:: شنو عدنا 

= بيض وجبن 

:: اي سويلي لو انتي تردين اروح اجيبلج من بره

= لا ماكو داعي 

:: شتغديتي 

= اتريكت فايت وكت 

:: خلي اروح اجيب عشا 

= لا لاتروح انت تعبان

ما رد عليه اخذ السويج حاچيته = عاصف مو دا احجي وياك 

فتح الباب :: اروح اجيب كباب عود من باجر سويلنه اكل بالبيت 

هوراح واني حضرت الجاي واحجي ويه نفسي = خلي ابدي ويه عاصف واتقبله 

= لا ما اكدر مو بيدي ما اكدر خلينه هيج هو قابل واني قابله

اجه جاب العشا كلي :: تعاي خلي نتعشى اهنا بالصاله 

رحت جبت صينيه وخليت بيها الكباب والصمون وسالته اذا يريد جاي رد. :: خلي بعدين 

صرنا ناكل واحنه ساكتين كمل :: الحمد لله والشكر 

سالته = ما اكلت ؟

:: اليوم هواي ماكل

راح للمغسله واني بقيت اكل راح للمطبخ صبله كوب جاي واجه اني ردت اشيل الصينيه هو گلي 

:: ابقي اكلي انتي بدون غدا 

= شبعت 

:: لا لان شفتيني كمت جوزي من هاي العاده انتي ابيتج اكلي واشبعي 

ابتسمت وباوعتله رفع حواجبه جاوبته = حلوه كلمة بيتج

شلت الصينيه الباقي ضميته وصبيتلي كوب جاي خليته ع الطبله ورحت اغسل رجعت اشرب الجاي سالته 

= اليوم وين ؟

باوعلي حسيت دا اسال بشي ما يخصني رديت =. لان كعدت الصبح ما لگيتك 

هز راسه :: انا كتلج منا وغاد اروح اباشر شغلي

= ها يعني اليوم رحت للناصريه 

:: اي وهاي رجعتي 

= شفتها البيبي 

:: جا شلون اتغديت ومريت شويه ع الشغل واجيت 

= لويش ما بتت 

:: كتلج منا وغاد باجر اجيب علاوي يمج خاف ابات وتحتاجون شي 

عندي هواي اسىله بس اشوفه تعبان حاجيته =. اذا تعبان رووح الغرفتك ارتاح

:: شويه واكوم 

بقينه ساكتين سالني :: مشتهي باميا تعرفين اتسوينها 

هزيت راسي = بلي اعرف 

::منو علمج ؟

= خاله ام كرار وخاله شيماء من كانو يجونه للبيت 

:: وييي من يمته وبعدج تتذكرينها

= بلي اتذكره انت جيبلي باميا ولحم وطماطه ومعجون وخلي الطبخ عليه 

هز راسه ما جاوبني سالته = شنو اتغديت 

:: حبوبتج ذبحتلي افسيفس 

= ديك رومي 

:: اي ديك رومي شوو ع الحطب 

= والديك كله اكليته 

:: هههههه كله شبيه

باوعتله واني دا ابتسم :: يعني لان اتذكر كنت تاكل خمسه كيلو كوارع البقر 

:: ههههه اي ذيج الكراعين ما ينشبع منها بكيفج مره ثانيه اخذج للبستان واوكلج كوارع بقر على كولتج 

غيرت ترهيمة وجهي كلها هو ضحك بقى يباوع النقاله وبعدها وگف گلي :: تصبحين على خير 

= وانت من اهله 

اتنفس ورد :: وجد من اطلع المكان اتصلي بيه افرح من تسالين عني

ثاني يوم بعد ما اتريكنا هو طلع غاب ساعه ورجع جايب ويا علاليك مسواك لحم وباميا وطماطه وثوم ومعجون 

وخضره وخبز وفواكه الشي الي لفت نظري جايب هواي مسواك سالته 

= المن كل هذا 

:: النه 

= اعرف بس دا اقصد كلش هواي الباميا واللحم والطماطه نفس الشي يعني مو مال نفرين

:: شسوي وجد انا ما اعرف اتسوك مال نفرين 

= بس هذا تبذير ما يصير 

:: هسه اطبخيلنه وتالي نحجي خلي نضوك اكلج

= تمام بس مو دووم تعتمد عليه اذا بنيتك ترجعني للمدرسه 

:: تدللين 

= احم شكرا

رحت للمطبخ بديت اقطع اللحم خليته ع النار وكعدت اقلم بالباميا لمن ما دخل عاصف وهو يباوعلي 

:: محتاجه مساعده 

= لا تسلم 

:: تره انا من مناصري مساعدة المراه 

= بس ولا مره شفتك ... 

:: ليش سكتي ولا مره شفتيني اساعد رجاء هناك الظرف يختلف واساسا رجاء جبيره ومتعلمه على هذا الشغل

ابتسمت = زين لعد قلم الباميا لان اديه تتحسس منها 

:: كلها ؟

هزيت راسي = لا يمعود بس الي مخليته بالصينيه الباقي حضمه بالثلاجه

كعد يقلم بالباميا واني نگعت التمن وخلطت الطماطه سالته 

= مادام هالشكل ما تعرف تتسوك اله كميات جبيره اقصد مال خطار شنو رايك نوصي الحارس هو يتسوك النه 

باوعلي = اقصد اني اوصي الشي الي اريده ما بيها شي مو 

:: ان شاالله

طبخت وصبينه الغدا صار ياكل يغمس خبز بالمرك وياكل خضره هو سوا لبن واني ضفت علي ليمون ونعناع 

من شربه ابتسم سالته = شنو رايك بالاكل 

:: الصراحه طيب حييل ما شاء الله نفسج بالاكل فد شي 

= عوافي 

:: الله يعافيج بس اللبن 

= شبي ؟

:: ما متعود اشربه هالشكل 

= ليش شبي ؟

:: نعناع وليمون تدرين بيه احب الشي بدون اضافات 

= اسفه

:: لا تتاسفين ما دامج تحبين هذا الشي سوي الي يعجبج وخليني اتعود على الي تردينه واشاركج بي لاتنسين 

هذا بيتج وانتي بكيفج 

= شكرا 

وكفت = خلي اسويلك جاي 

:: لا اريد شويه امدد وبعدين اشرب 

=تمام 

وكف وانا جاي اشيل بالصحون كلي :: شكرا تعبتج

= لا ابدا ماكو تعب 

هو راح واني غسلت الصحون ورحت للغرفه اتمددت غفييت حسيت على باب الغرفه يندك مره والثانيه سمعت صوته 

:: وجد اكعدي اشربي چاي 

رحت غسلت وجهي وطلعت شفته بالصاله جاي يشرب بالجاي هو باوعلي وابتسم

:: سويتلج چاي بس على الله كون يعجبج 

= شكرا لو نادهني واني مسويتلك 

:: لا ماكو فرق 

= بعد اسويلك واخلي بالترمز 

:: لا ما احبه اله من راس القوري ها شلونه جايي 

= ما بي شي بس شويه ثخين 

:: المره التجي اقلل التخديره 

صرت اشرب وهو يدخن سالته = اجيبلك بعد 

:: لا وكف وگلي :: ما اتاخر

هو طلع واني بقيت بالصاله ولزمت النقال فتحته طبعا عاصف مخليلي نت بي مع العلم ما اعرف رمز الشبكه 

صرت اتصفح بالنقال فتحته ع اليوتيوب على قناة طبخ لان ما دامني باقيه اهنا وهو. طلب مني اطبخ يعني 

لازم على الاقل اعرف بعض الطبخات 

وصرت استمع للنصائح الي يقدموها الطهاة

صار مغرب اتوضييت وصليت وعاصف ما اجه ورغم هو گلي اتصلي عليه لكن اني ارتايت ان ما اتصل اله يتاخر 

يعني اذا صارت الساعه عشره ونص اتصل 

تقريبا الساعه ثمانيه سمعت باب الشقه انفتح كنت متمدده على ظهري واباوع للتلفزيون كعدت صارت عيني بعين 

علووش اخوي 

وعاصف ورا شايل علاليك راسا وكفت وحضنت علاوي وصرت ابوس بي واكله = حبيبي مشتاقتلك

هو يرد عليه ( ) واني اكثر 

= تعال اكعد ياروح اختك وعمرها 

:: احم صدك لو گالو من لكى احبابه نسى اصحابه 

بقيت اباوعله وابتسم هو كال :: السلام عليكم 

= عليكم السلام 

:: هاي جبتلج علاوي مو يوميه اتگليلي مشتاقتله

بقيت ساكته يعني كل كلمات الشكر قليله بحقه اتمنيت احضنه ابوسه لكن هذا الشي مو بيدي

عاصف :: هاي جبت عشا وياي ياالله خلينه بالصينيه وخلي ناكل اهنا بالصاله. 

اخذت العلاليك جايب كباب وبيتزا وببسي ولبن اني خليتهن بالصينيه هو اجه وراي 

:: ها كملتي اشيل الصينيه 

= شكرا لان جبته الاخويه ما تدري شكد مشتاقتله

هو اتنفس وگلي :: 9العفو شفت كافي علينه هواي بقى عد الناس واحنه هم خلص شهر عسلنه 

كالعاده كلامه بي عتب مخفي واني هماتين انربط الساني لا اگدر اعتذر وابرر تصرفي ولا اكدر اتقبله حالنه حال الناس 

شال الصينيه واني جبت الببسي والكلاصات علاوي گال 

( ) ليش عمو انت تشيل الصينيه كان اني شلتها 

:: لا حبيبي انت ارتاح

كعدنا تلاثتنا وطبعا لان صينيه صارت كعدتي يمه وصرنا ناكل ونسال بعلاوي على وجوده ابيت ابو كرار وفعلا كان 

مرتاح يمهم بس هو يگول مشتاق البيبي 

من يومها علاوي بقى يمي وصا عاصف شنو نريد مسواك اختك تكتبه بورقه وتودي للحارس ابو يوسف

وصار عاصف يسافر للناصريه ويخلي علاوي يمي وهو ما يتاخر يعني يبقى يومين تلاثه ويجي يمنه يومين مرات اكثر 

يبقى ومن يجي كان لازم يدخل الغرفتي يغير ملابسه بااعتبار احنه متزوجين وبعدها يطلع بالصاله وكان هو وعلووش 

يلعبون بالبلي واني اتصفح باليوتيوب لمن ما علاوي يروح الغرفته ينام بيها وهو يبقى كاعد بحجة التلفزيون وينام بالصاله

كمل اجراءات النقل وصار لازم نداوم مدرسه سجلنه بمدرسه اهليه اني وعلووش واجرالمل واحد خط 

اخذنا اشترالنه ملابس ومستلزمات الدوام

وداومنا وكان يحفزنا ع الدراسه وداىما يسالني اذا ما فاهمه ماده حتى يدخلني دوره او يشوفلي معهد تقويه 

ولان اني دارسه الماده وحافظتها كانت درجاتي زينه وطبعا بالمدرسه محد تعرف اني متزوجه

بيبي اجت مرتين كل مره تبقى تلث تيام وترجع ويه عاصف ودووم تسالني // ليش ماكو حمل 

اني اسكت وعاصف يرد عليها :: يمه بعد الله ما كتب النه 

بيبي // چا شني گعدتكم راجع بيها طبيبه

ومن تجي لازم عاصف ينام بالغرفه اقصد بغرفتي وبيبي تنام يم علووش وطبعا عاصف يفرش بالارض واني 

ع الجربايه اكثر من مره اگله خليني اني انام ع الارض لكن هو ما يقبل نبقى ساكتين الى ن كل واحد من عدنا يغفى

كانت الدنيا شتا نهاية شهر 12 صار يغيب عن البيت هوااي يعني اكثر الليالي انبات اني وعلووش ابحدنا لان بهيج 

ايام الكاع خصوصا زراعة القمح والشعير تحتاج مي فيسمونه موسم السقي وادري بعاصف يبات اكثر الايام بره 

كنت اتصل ومرات هو يتصل ودووم يوصيني اطفي الطباخ وما اخلي الهيتر او الصوبه شغاله وحتى الصبح 

يخابرني قبل ما اروح للدوام 

:: اتاكدي من الطباخ والهيتر وقفلي الغرفه واتاكدي منها 

وعودت نفسي شويه شويه اسمي بااسمه عاصف

كل يوم خميس اخلي ابو يوسف يتسوك مال اسبوع بين لحم ودجاج وسمج 

ومخضر وفواكه واني وعلووش نطلع للاسواق اليمنه نجيب اشياء نحتاجها ونظل بيهن الاسبوع كله 

ومن نحتاج شي علووش يروح للاسواق ويجيبه وتقريبا كل شي موجود واني اتابع ع اليوتيوب شلون 

احافظ على المسواك 

اتبل الدجاج واللحم اقطعه واثرم منه كباب عروك ولان الكبه تاخذ وقت باللف ما اسويها 

الف جدرية دولمه اذا ماكان عندي السبت امتحان لان اغلب الندارس الاهليه يداومون السبت

المغرب مكمله صلا وعلووش وصى ابو يوسف يجيب نص كيلو كباب وصمون وهو راح 

يجيب ببسي ولبن 

اجه عاصف وكان مبين علي التعب سلم وكعد ع القنفه وخله ساعد ايده على كصته 

اتقربت منه سالته = عاصف شبيك 

رد بتعب :: راسي يوجعني حييل يمكن مصخن

اتقربت اكثر لمست كصته وايده كان فعلا حرارته مرتفعه 

= عاصف انت مريض 

باوعلي حتى عيونه حمر هز راسه

= ياالله خلي نروح للدكتور 

:: يادكتور هسه موجود 

= موجود عاصف انت حرارتك كلش مرتفعه 

:: انا شويه واروح 

= لا اروح وياك

لبست جبه ولفيت حجابي عدل اجه علي وشاف عاصف (اشلونك عمو )

= علووش تبقى اهنا واني وعمو عاصف نروح للطبيب ونرجع بسرعه لان مصخن خو ما تخاف 

:: جيبي وياج خلي يجي 

= ياالله 

طلعت اني ويا وعلاوي صار يسوق ودنيا ليل هو كلي :: خلي نروح للمستشفى 

= بكيفك

وصلنه للمستشفى ودخلنه على طبيب وكتبله ابر وحبوب وگلي // اذا ترتفع حرارته سويله كمادات 

= تمام 

- - وخلي اكله بهاي اليومين سواىل وعصير برتقال وليمون 

هزيت راسي كله // يرادلك راحه اقل شي اسبوع لاتجهد نفسك 

:: ان شاالله

طلعنه ورحت اني وعلووش نجيب العلاج ضرب ابره وبقن تلاثه اول مره اشوفه هالشكل تعبان 

وصلنه للبيت كتله = فوت للحمام اسبح وارتاح بالغرفه بين ما اسويلك شوربه 

:: ما اشتهي اريد انام 

= ماكو ما تشتهي نسيت الطبيب شنو كال 

::خليلي ملابس بالحمام 

= رووح اسبح بحمام الغرفه وابقى بيها 

:: لا لا بالحمام البره وافرشيلي بالصاله 

باوعتله = عناد هو ياالله اشو كووم بلا كسل

هو كام دار عليه :: وين تنامين 

= لا تهتم انام 

وكف واشوفه لزم يالقنفه وغمض عيونه وبعدها راح يمشي بتعب دخل الغرفتي واني رحت للمطبخ طلعت 

عدس خليته ع النار يسلك وطلعت شعريه كملت الشوربه وطلعت ليمونه قطعتها وعصرتله برتقال واخذته اله 

شفته متمدد ومتغطي حاجيته 

= عاصف اكعد شويه اكل 

رد بتعب :: لا ما اشتهي

   = ميخالف لاتنسى وراك علاج 

:: تلعب نفسي 

= حتى لو اجبر نفسك 

:: صدكي ما اكدر 

= تعرفني ابقى الح ادوخك عاد اكعد اكل

كعد شرب شويه شوربه يمكن خاشوكتين او تلاثه وشرب عصير برتقال گلي 

:: اخذي ما اكدر بعد 

= ما اكلت 

:: لا تجبريني 

= براحتك

اخذت الصينيه ورجعت الشوربه رجعت للغرفه حتى انطي العلاج صرت انطي الحبوب هو شربهن وبعدها كلي 

:: افرشيلي بالكاع 

= لا تبقى ايهنا ع الجربايه 

:: مكانج 

= ما عليك بيه وين ما كان انام 

:: لا لا شلون يصير 

= يصير عادي 

:: يمعوده انا احب انام بالكاع 

= اي ميخالف ارتاح هسه وبعدين احي افرشلك بالكاع اروح ارتب المطبخ

:: غطيني بعد ابطانيه حييل بردت 

جبت بطانيه ثانيه وغطيته بيها وخليت الهيتر شغال رحت للمطبخ حميت الكباب واجيت للصاله يم علووش 

الي كان يلعب بالبلي وهذا كان اتفاقنا الخميس والجمعه ليلا يلعب بلي والسبت يقرا 

اكلت شويه ويه علاوي ما اعرف لويش ما اشتهي 

بقى علاوي ياكل واني شربت جاي سالني بعد ان كمل اكل ( ) شلونه عمو 

= احسن شويه 

( ) تدرين وجد كلش خفت علي 

ابتسمت هو رد ( ) اي لا تستغربين اني احبه العمو 

= وهو هماتين يحبك

هو وكف ( ) ياالله وجد فايت اغسل واروح الغرفتي لان تعبان تصبحي على خير 

= وانت من اهله 

طبعا علووش كلش اتحسن والفضل ال الله وعاصف هوااي تعب ويا 

بقيت بالصاله ما اعرف شسوي او وين ممكن انام رحت للغرفه اشوفه اذا نايم اخذ فراش وانام بالصاله

دخلت للغرفه اتقربت منه لمست جبينه كلش مصخن فتح عيونه كلي بتعب :: غطيني 

اخذت بطانيه وغطيته واني خليت فراش جوه واتمددت اسمعه يوون اجي يمه اساله عاصف انت زين 

مرات يطلب ماي ومرات ما يرد عليه

غفييت حسيت علي دخل للحمام شفت الساعه ثمانيه ونص بقيت بفراشي وعلكت الهيتر طلع شفته ينشف بشعره 

= اشلون صرت 

جاوبني صوته مبحوح ::احس الصخونه مكسرتني گلت اسبح 

= زين تسوي 

رجع اتمدد على الفراش :: اعتذر خليتج تنامين بالكاع 

= بدون اعتذار انت تعبان اروح اسويلك ريوك

:: ما اشتهي 

= لازم تاكل على مود العلاج 

رحت خدرت جاي وسلكت بيض وفرت حليب جبتله كوب حليب كتله = اشربه دفي بطنك 

اخذه وشرب شويه وكلي :: ما اكدر 

= يعني شنو ما تاكل شي 

:: لا ابد ما اشتهي اي شي 

= بس علاجك 

:: من اشتهي اكلج روحي اتريكي 

= بعدين

اخذ جكاره خلاها بحلكه اخذتها منه = ماكو جگاير اذا ما تاكل 

:: وداعتج ما اشتهي 

= مي خالف اجبر نفسك راح اجيبلك صمونه وبيضه وجاي 

اتنفسبعمق. :: بيضه وجاي

اكلها واشوف صعوبه بالبلع انطيته علاجه وبقى متمدد ع الجربايه وسويتله اكل وهو مره يصخن مره تفكه الصخونه 

ولازم ياخذ الابر خابر ابو يوسف يشوفله مضمد 

والرجال ما قصر كله جيرانه البطابق الثاني مضمد واجه انطا الابره تقريبا الساعه 11 الصبح اندك الباب باوعت 

بالكامرا شفت نسوان اثنين ورجال كلت = منو 

اجه صوت بيبي // انا جده 

فتحت الباب شفتها بيبي وياها مهدي وفرح

باوستها البيبي لان كلش مشتاقه الها وعمو مهدي سلم عليه // اشلونج وجد 

= اهلا عمو اتفضلو 

فرح سلمت من وره خشمها // هلو اشلونج 

ابتسمت = اهلا فروحه اتفضلو اتفضلو 

ااشر ايكعدون 

بيبي سالتني //اشلونه عاصف

= بعده مصخن الصخونه تفكه شويه وترجع مره لخ هسه توه طلع المضمد انطا ابره ونام 

فرح // شنو يعني ما نشوفه 

= لا حبيبتي لويش ما تشوفينه بس يصحى شوفي 

رحت جبت الهم ماي واني واكفه سالت بيبي = اسويلكم ريوك

- - لا جده متريكيين الحمد لله شوفي عمج واختج

مهدي // لا تونه اتريكنه 

فرح مبتسمه اني هماتين ابتسمت = وانتي حبيبتي 

- - - هههههي جدتي اتگلج شوفي اختج ناسيه انتي مرت ابوي يعني لازم اسميج عمه 

اتقربت منها = بس اني فعلا اختج

رحت للغرفه شفت عاصف اتقربت منه خليت ايدي على كصته هو فتح عيونه = اشلونك هسه 

:: تعبان حييل 

= سلامتك بيبي ومهدي و فرح اجوي 

:: ها يمته 

= قبل عشر دقايق  

:: شو ما حسيت عليهم ؟

= يجوز غفييت 

:: شيلي الفراش 

= لا ما اشيله شنو يعني انت مريض واني نازله جوه ما بيها شي بس من. كللهم 

:: ما ادري سويتيلهم ريوك 

= كالو متريكين اخليهم يجونك 

هز راسه رحت كتلهم = اتفضلو كعد

دخل مهدي ورا بيبي وفرح مهدي يكله // ااه شني هاي عاصف صدك مريض 

باسه براسه احس عمي مهدي مو مثل قبل يعني اهدا وساكت او يمكن لان نهاد مو ويا ابتسمت بسري 

بيبي باسته بخده //. سلامتك يابعد امك واهلها 

:: الله يسلمج 

- - حتى حسك مبحوح يمن سوده عليه

فرح باسته بخده // سلامتك بابا حبيبي 

:: الله يسلمج 

بيبي // يمه من كلي جابر فرفحت من شفت روحك مريض ليش ما جيت يمنه طالع وانت تعبان 

مهدي //. هههه 

استغربت ضحكته عاصف ما عقب فرح گالت //. بابا انت تعبان يرادلك راحه ومدارا ارجع ويانه هناك انا وامي 

نداريك اهنا منو الك 

جاوبتها =. ليش حبيبتي منو اله لعد اني وين رحت

عوجت حلكها وردت // اقصد هناك امي كله موجوده بالبيت انتي عندج مدرسه وتلتهين بدوامج هناك حتى مرت 

بهاء تدير بالها علي 

رديت بدون تفكير = تره عاصف مصخن مو مشلول 

الكل باوعلي فرح بعصبيه //. خوش مف... 

عاصف حرك ايده وهو يخابر 

:: الو ابو يوسف اشوي سمجه جبيره وجيبها. اكلك سويهن سمجتين وسط

بيبي // المن يمه سمجه وحده كافي 

:: تازه كون صيد اليوم 

صار يكح انطته فرح الماي // بابا انت كلش تعبان خلي عمي مهدي ياخذك للطبيب 

:: لا بابا امس رحت وانطاني علاج 

= بس انت حرارتك مرتفعه 

بيبي // جا مو هل يكلج رايح ومطينه علاج وهلياخذه خو مو بساع يطيب 

فرح // جده ابوي حييل مصخن وانا اخافن علي لازم نبدل الطبيب

ما جاوبها اني طلعت فتت للمطبخ نكعت تمن علووش گعد وراح يسلم عليهم واني صرت اسوي زلاطه ولبن خليت 

فوكه ليمون ونعناع وفاكهه وسلكت صدر دجاج وهرسته خليته فووك الشوربه مالت البارحه

سويت كهوه وجبتها قدمتها الهم شفته يدخن باوعتله وهو ينفخ ويباوعلي :: البارحه كلش اتعذبت وياي 

اتقربت منه نكايه بفرح = صح كلامك كلش هوايه معذبني لان جاي دا اتدخن 

اخذت الجكاره وبيبي تكول // ما تنلام وياك 

سالته = ماجعت 

:: لا ما اشتهي

مهدي // هي شني ما تشتهي وراك دوا اذا ما تاكل شلون تاخذه 

بيبي // خو سمعت اخوك دكتور مهدي 

مهدي // ها يمه تقلدين 

- - لا اتشاقه بس صدك عاصف اذا ما تاكل شلون تاخذ العلاج وتطيب 

:: ا كل بس هسه ما اشتهي 

بيبي باوعتلي // خلي على راحته

اشرلي اجي يمه 

وصلت بيبي من جهه وفرح من جهه ومهدي كاعد يم فرح صار لازم اتقرب منه اكثر دنكت = ها 

هو شاورني بااذني :: طلعي فلوس من جيبي اطيهن العلاوي خاف ابو يوسف يجي 

= تمام 

:: وشوفي شنو تحتاجين وصي علاوي 

= لا كلشي موجود

رحت للزاويه ومديت ايدي بجيب دشداشته بيها رزمه فلوس اخذت منها لا على التعيين وطلعت للصاله بيبي گالت 

- - فرح روحي ويه وجدان ساعديها 

تحجي ابطأ تسمعني // شعدها جده قابل جاي تطبخ المفطح اشو ابوي وهو مريض يوصي على غدا 

طلعت بيبي وهي اتكلي // خليلي مصلايه اريد اصلي 

رحت جبت الها مصلايه ومصلايه ثانيه المهدي فرشتهن ورحت يم عاصف مهدي كال // اريد اصلي 

- - عمو خليتلك مصلايه بالصاله

هو طلع وبقت فرح اتقربت وصارت تمرغ برجلينه بقيت واكفه هو يباوع الي وهي اتكله 

- - - بابا انت لازم ترتاح تره انت مو زغير والعمر اله حوبه 

رغم تعبان رد باستهزاء :: اي بابا من يكونون اولادي سته راح اكعد وارتاح بجالهم 

- - بابا انت ما فهمتني انا اقصد انت عندك ناس تشتغل يعني انت بس اشرف ع الشغل 

:: اي ان شاالله 

- - وكثرة السفر هم مو زين عليك

:: اي ان شاالله اصفي اموري واجي هنا

باوعت الها وابتسامه بوجهي اتقربت منه ولمست گصته = هم بعدك مصخن اجيبلك هسه تاكل لو تنام شويه وترتاح 

:: لا اريد انام طفي الضوه. غدي الجماعه 

= تمام ياالله كومي حبيبتي اتغدي 

:: مو جوعانه اريد ابقى يم بابا 

= بس بابا سمعتي يريد ينام

طفيت الضوه وطلعت قبلها وهي هم طلعت رحت اتوضييت وصيت علاوي 

= من يجي ابو يوسف اساله شكد الفلوس وتعال انطيك 

ر جعت للغرفه وبديت اصلي بالظلمه وعاصف نايم كملت صلاتي وطلعت توني فتحت باب الغرفه واسمعها تكول كانما موقته 

كلامها على طلعتي 

الادب سزز طردتني من يم ابوي 

بيبي // اسكتي شني هالحجي

- - انتي تدافعيلها على گولة امي بت سعدي احقر من الحقاره 

- - دا كافي ابوج نايم 

- - انا الها اله اطيح حظها 

بيبي بعصبيه // ولج انتي جايه اهنا حتى تسوين طلايب 

- - خو انتي جده بس تدافعيلها هاي من اجت وامورنا كلها اتخربطت شوفي شسوت اول ما ضحكت على بهاء 

ومن ما صرفلها لافت على ابوي وخلته ما يشوف حتى هذا عمي بعينه

بيبي باستهزاء // اي عمته بسحرها 

- - اكيد جا شني 

اجيت يمهم واني ابتسم ما حبيت اسوي مشكله وعاصف مريض اندك الباب وعلووش فتحه هو جاب سمج وعلاگه 

وداهن للمطبخ واني سالته على الفلوس وانطيته دزاهن الابو يوسف صرت احضر بالغدا وعلاوي وياي 

اخذ السفره وفرشها بالصاله وخليت سمجات اثنين وصبيت تمن وخليت الي حضرته وكتلهم اتفضلو 

واعذرونه من القصور طبعا البيت بيتكم ما تحتاجون عزيمه

مهدي // تعبناج عمي 

فرح // منين تعبناهه شو السمج شوي بره خو مو مثل امي وخالتي ابوي كله يجيب ذبايح 

رديت بابتسامه = ولو اني من كنت هناك بالبستان كله عمو جابر يشوي السمج واذا اكو عزيمه فعاصف يجيب 

طباخ بس خاله رجاء نادره وتسيطر ع الشغل لا تنسين كاعده بالبيت وهي مره كبيره وياها انتي هماتين تساعديها 

ولا انسى عمه نهوده هم وياچن يعني ما شاء الله تتعاونن فتكملن شغلجن

مهدي // هسه خلي نتغدا 

= اي اتفضلو بالعافيه 

بيبي // وانتي جده 

= بيبي اني خلي احضر غدا عاصف بلكي الله يهدي وياكل طبعا البيت بيتكم ياالله علووش تعال اكل حبيبي

رحت للمطبخ وصبيت العاصف شوربه وعصرتله برتقال واخذته اله بصينيه دخلت وفتحت الباب سالته 

= عاصف كاعد 

جاوبني بتعب :: اي 

فتحت الضوه = ياالله اكعد اتغدا انت اي شي ما داخل بطنك من البارحه 

:: ما اشتهي 

= لا شنو ما تشتهي اشو اكعد حباب

گعد لزمت كصته = زينه خافه الحراره 

:: اي الحمد لله بس اعظامي متكسرات وبلاعيمي حييل يحركني 

= كله من الصخونه وبلاعيمك التهبن من البروده 

صار ياكل واشوفه بالكوه يبلع كلي :: شيلي كملت 

= هاي ات شكلت

گعدت بصفه وصرت اخذ بالخاشوكه اقربها من حلكه هو گلي :: ما اشتهي 

= الخاطري 

فتح حلكه وشربها وبعدها ثانيه وثالثه رفع ايده :: بعد ما اكدر كافي 

قربت العصير = هذا تشربه كلياته 

اخذه وشربه باوعلي :: روحي اتغدي

= ما اشتهي 

:: ما تشتهيين لو من وره فرح 

= اني اعتذرت منهم حتى اجيب غداك وكتلهم البيت بيتكم 

:: سمعتج 

= يعني ما كنت نايم 

:: لا وسمعت فرح وكل كلامها

= عادي 

:: شعجب ما رديتي عليها 

= لان همه ابيتك عيب ارد 

:: اريد جاي 

كمت = اي هسه بس حباب جكاير بلاها 

:: ما اكدر اذا ما ادخن 

= وحده وع الخفيف

ابتسم :: هاي شلون تصير ؟

= يعني هيج (صرت اقرب اصابعي الحلكي وبسرعه اميلهن ) 

ابتسم اكثر وهز راسه رجعت بالصينيه بيبي سالتني // ها جده اكل 

== اي بيبي اكل وشرب العصير وهسه اخذله جاي

- - وانتي ما اتغديتي 

= عادي اكمل عاصف وبعدين اكل 

فرح // والا ما يعجبج تاكلين ويانه وخليتي حجتج ابوي 

= هذا شلون حچي اذا اني ما اكل ويه فروحه حبيبتي اكل ويه منو بس عاصف عندي اهم من روحي

اخذتله الجاي واني دا اشوف الفرح بعيون بيبي والحقد بوجه فرح اما عمو مهدي فمتغير هواي 

اخذت الچاي شفته يدخن قدمته اله 

:: سمعتج 

= اعرف شنو رايك 

:: من حاجيتي فرح وتكليلها اذا ما اكل ويه فروحه ويامن اكل كلت عليج يابت الكلب اشكد حياله 

= بس اني كملته للكلام 

:: اي سمعته وكلت عاشت ايدج 

= فرح مسمومه وحاقده

:: اعرف 

= ياالله اشرب الجاي واني راح الم السفره 

:: تعبناج 

= ما سويت شي اهلك 

:: انتي اهلي

طلعت واني گلبي يرجف رحت لميت السفره وهمه غسلو وراحو يم عاصف اخذت الهم جاي وبسرعه غسلت 

الصحون ورشيت معطر بالصاله ورحت يمهم وبيدي بطل ماي عاصف گاعد ع الجربايه ومغطي رجلينه 

وفرح گاعده يمه اما بيبي ومهدي فكعدو بالكاع 

اتقربت انطيته العلاج الي كان كبسول ونوعين من الحبوب اخذهن بيبي كالتله // يمه نروح خافنك تريد تنام 

:: لا حجيه ما اريد انام 

- - مرتك تعبت 

= لا بيبي شسويت اشو سمج شوينا بره

بقو يسولفون هو ومهدي فرح طلعت كعدت بالصاله طفت البلي واخذت الريمونت ودارته ع التلفزيون 

بدون حتى ما تستاذن من علووش الي ضاج وراد يحاجيها بس اني لزمت ايده واخذته الغرفته وحجيت ويا 

= مي خالف علووش البنيه خطار وباجر يرحون 

(. ) بس هي مو مؤدبه 

= عيب هذا الكلام هاي بت عاصف انت اكعد ادرس 

(. ) اني اليوم عطلتي العب بلي باجر ادرس 

= وانت اليوم ما تكدر تلعب بلي لان عدنا خطار احسن شي اليوم ادرس وباجر اكعد العب 

( ) مو ترجعيين بكلامج 

= خلص علاوي باجر تلعب

رجعت كعدت يم فرح الي كانت مندمجه بمسلسل طالع بعدها باوعتلي // صدك وجدان شلونج بالمدرسه 

= الحمد لله زينه 

- - هي مدرسه اهليه مو 

= بلي 

- - اي الاهليات ينجحون حتى الكسالى يردون فلوس 

= بس مو كلهن المدرسه الي سجلني بيها عاصف خوش مدرسه وكلسنه اتطلع نسبه حلوه

اتنفست وهي كل شويه تغير شكل حلكها // صدك اكلج وجدان انتي من تطلعيين ويه ابويه شتكليلهن 

=. المن اكول 

- - الصديقاتج بالمدرسه 

= محد تسالني لان عاصف ما يجي عليه 

- - ولو فرضا مر عليج شتكولين 

= اكول زوجي

- - بس يعني مبين هوااي اكبر منج يعني ا نا اكبر منج بسنه انتي تصيرين بته الزغيره 

ابتسمت = سامعه بالحظ والنصيب 

- - اي شبيه سامعه 

= بعد عاصف هذا حظه يتزوج وهو زغير وحده لو متزوجه وهي زغيره يمكن صار عدها ولد بكده واني الي 

بكد بنته وره شكم سنه عايشه ويا بالبيت وعبالي هو يصير عمو صرت من نصيبه معادله متساويه حبيبتي

اندك الباب فتحه علاوي اجه المضمد حتى ينطي الابره اني رحت للمطبخ وفرح راحت الغرفة علاوي 

وصار مغرب طلعت كدر الدولمه طبخته دجاج وكليت فنكر وكباب عروك وخليت كدامهم واجه عاصف 

كعد ع القنفه واني اضطريت اكعد بصفه بيبي سالت

- - هاي انتي مسويته الدولمه 

= بلي بيبي اني لان تعرفين دوام وما الحك فكل شي نحتاجه نجيبه الخميس اتبل الدجاج واثرم لحم واسويلي 

جدرية دولمه 

- - عفيه عليج 

فرح // لا تنسيين جده هي كل شي ما عدها بس هي واخوها

كمل مهدي وبيبي كالت الحمد لله رحت جبت الجاي ولميت السفره مهدي حچى 

- - عمي انا كلش تعبان واريد انام باجر نمشي الاهلنه 

عاصف حچى بتعب :: وين تمشون ابقو 

بيبي //. لا يمه نمشي مهدي عده شغل وفرح عدها دوام شفناك وهالصرت زين الحمد لله 

باوعلي :: افرشي المهدي اهنا بالصاله وامي وفرح بغرفة علاوي

كمت فرشت الهم ومهدي اتمدد وگال // اتصبحون على خير 

وهنه هماتين راحن الغرفة علووش ثاني يووم الصبح كعدني عاصف :: كومي روحي للمدرسه 

جاوبته بنعاس = لا اليوم ما اروح 

:: وليش ؟ 

= انت تعبان لازم ابقى يمك 

:: انا ما بيه شي صرت زين

رجعت اتمددت على صفحتي = عاصف ما اداوم اوكي تصير زين عودن اداوم 

:: وليش ؟ 

= خلي ارجع انام وبعدها اكلك ليش

الضحى كعدو تريكو وعاصف طلب من بيبي تبقى لكن هي رفضت واتحججت 

- - انت مريض وانا يمه هم مريضه وعلاجي نصه هناك 

:: انا اجيبه منا 

- - لا وداعتك غير مره

وصل يم فرح كللها :: چان بودي تبقيين شكم يوم لكن كليتج اهم 

ابتسمت وتباوعلي // ان شاالله بابا انت تجينه هناك 

هو طلع فلوس من جيبه :: هاج بابا 

- - لا شنو هذني مو ذاك اليوم انطيتني 

:: ميخالف خليهن جوه ايدج 

مهدي بضحك // اطيني اياهن اضمهن الك 

بيبي // لا كل شي ولا مهدي 

- - يمه شلقصه صيري واسطة خير

راحو وعاصف كلي :: فوتي ارتاحي 

= ما عندي شي 

:: ميخالف ارتاحي 

= وانت 

:: اهنا باقي 

= لا فووت للغرفه 

:: صرت زين روحي الغرفتج 

وصلت يمه = اني حنام ع الارض وانت تعال على فراشك

بعدها بتلث تيام عاصف صار زين ونفس البرنامج يروح للبستان يوم او يومين ويجي يمنه يبقى تلث او اربع تيام 

ومرات يبقى اسبوع 

نجحت من الخامس للسادس الاعدادي وهنا عاصف سجلني دورات اني ردت درسين كيميا ورياضيات 

لكن هو سجلني الدروس كلهن 

وصرت اروح للدوره الصبح وارجع تعبانه اول ايام كان عاصف يجيبلنه غدا وعشا لكن بعدين قررت اطبخ 

المركه او اتبل الدجاج بالليل ومن ارجع من الدوام اطبخ التمن لكن عاصف ما قبل وگلي

:: انتي اتعبين والسادس صعب سوي بس العشا 

=. لعد والغدا 

جاوبني :: انا شفت مريه خوش تطبخ ونفسها كلش طيب يوميه تطبخ النه وانا اجيبه منها 

= شنو تعرفها 

:: ياخذ منها صاحبي وهو. دلاني عليها 

= بس ما يصير هالشكل 

:: لا يصير انتي مو عليج العشا وانتي لازم ترتاحيين هذا سادس مو لعبه 

رفعت ايدي بالدعاء= ان شاالله بس كون انجح 

:: ان شاالله

+

وصرت اروح للدورات واكثر وقتي بالدراسه وعاصف كان يحثني ع الدراسه ويشجعني وما تركني كان كل 

يومين يجي يبقى يومين ومرات اكثر ويروح اتصدگون اذا اكللكم عاصف يسويلي العصير بايده  

ومن اجي من المعهد يصب الغدا 

اتعودت يبقى وياي اذا غاب اكثر من يومين اتصل مره واثنين وتلاثه اطمن واني اشوف حتى التدخين قلله

هشام خابرني وشجعني ادرس وانجح بيبي وعماتي يطمنون عليه بالتلفون 

ودرجاتي بالكوز زينه يعني مسيطره ع الماده 

وكملنه تقريبا كل المواد بس الكيميا بقالنه شكم موضوع والمدرسه بقالها عشرين يوم صرنا انداوم بالعهد احد وثلاثاء 

عاصف اخذني اني وعلووش للزياره ورحنه زرنا ماما 

ومن رجعنا كال نرتاح وباچر نطلع نتونس ابغداد 

علووش طلب ناخذه للزوراء 

وفعلا رحنه وكضينه وقت ممتع واني اشوف اخويه كلش مرتاح هو راح يلعب واحنه دخلنه كوفي

طلبنه كهوه كتله = شكرا هوااي 

:: العفو على شنو 

= على هاي الطلعه صدك محتاجتها 

:: ما سويت شي حتى انا محتاجها 

= صدك ؟

:: اي صدك من زمان ما طالع ومغير جو 

= عاصف

تلاگت عيونه بدون ما رد اني حجييت = انت لا تضغط على نفسك 

:: شقصدج ؟

= الي دا اقصده يعني لاتترك شغلك وتلتهي بينه اني واخويه انت ابدا ما قصرت ويانه 

:: وجد 

باوعتله نفخ الدخان وكلي :: تدرين شي 

= شنو 

اتنفس بعمق :: شكد ما اريدج تنجحين شكد ما انا خايف 

= خايف من شنو ؟

هز راسه :: ولا شي لا تفكرين بااي شي كل الي تفكرين بي نجاحج وشهادتج 

= اذا نجحت فالفضل يرجع الك 

:: الفضل ال الله وجهودج 

= ليش داىما ما تريد احد يشكرك

اجه علاوي وكان مبين كلش فرحان هو اخذنا المطعم اتعشينه وعلي كال 

( ) عمو 

:: ها عمو 

( ) اريد تاخذني وياك البيت جدي 

:: ها شعجب 

( ) ضايج اريد اروح للبستان واشوف حبوبتي واولاد عمي 

= واختك ياهو يبقى يمها 

() خابر عمو جابر يجي ياخذني وانت ابقى يم وجد 

  هز راسه :: بس اكمل عندي شغل واخذلك تدلل 

( ) شكرا

باوعلي :: وانتي ما تردين ترحين اشوفين حبوبتج 

= اي بكيفك 

:: تمام 

طلع التلفون 

:: الو شلونك ابو مصطفى 

::شخباركم 

الشغل شلونه

:: اكلك باجر تعالي 

:: كل الخير اخذ علاوي البيتنا يريد يشوف امي 

:: اي بس غير اكمل الشغل العدي واجي 

:: ههههه اكلك مو تكللهم خليها مفاجىه ابو حسين يريد يسويها مفاجىه الحبوبته 

:: الله يخليك سلم على ام مصطفى 

:: اي حكها وداعتك بس اكمل شغلتي اجيبها تبقى يمنه شهر 

:: لا لا ما اطيرها ام مصطفى تستاهل كل الخير

:: الله وياك الله يسلمك 

وكف :: ها نمشي 

= بكيفك 

:: لا مو بكيفي اذا يعجبكم ترحون الغير مكان حاضر 

= لا كافي مو علووش 

( ) اي 

:: ياالله جا خلي نمشي هم ياالله تحضرين ملابس علاوي 

باوعناله وهو ابتسم :: باجر يجي جابر وياخذك 

( ) شكرا عمو

:: بس تندل الدرب اخليك تروح وترجع ابحدك 

لا اراديا نشغت هو باوعلي :: شني تخافيين على علاوي 

= طبعا اخاف علووش زغير بعده 

( ) لا شنو زغير اندل واعرف اروح وارجع 

:: ما لك غرض بيها علاوي وداعتك بس تندل الدرب اخليك ابحدك تروح وترجع 

= هاا هو تحدي 

:: ياالله امشونه

شفته ضاج من حجييت وصلنه عاصف گعد بالصاله وعلي كال راح احضر ملبسي ،

اني رحت جبت مي من الثلاجه خليته گدامه سالته = لويش ضايج 

:: ما ضايج 

= لا عاصف ضايج شكو شصار 

:: ما صار شي بس مره ثانيه انتبهي التصرفاتج 

فتحت عيوني ع الاخر = ليش شبيها تصرفاتي

:: ما بيها شي 

وگف :: رايح للغرفه اغير ملابسي واجي 

ردت اروح ورا افهم شبيها تصرفاتي لكن شي منعني راح غسل ورجع للصاله صار يدخن سالته 

= اسويلك چاي 

:: لا ما اريد 

= شعجب مو عوايدك 

حك خده :: بعد جاي اتعود اقلل منه 

= المهم اتقلل من الجكاير

ما رد عليه رجعت سالته = صدك عاصف شبيك اني بشنو غلطت 

:: وجد لازم تعرفين من نطلع سوا نطلع ( اتنفس بعمق ). هسه ما لازم تعتبريني رجلج بس من نطلع احنه عايله 

= اعرف ليش شكو 

نفخ انا بقلة صبر = ايي شكو فهمني 

:: انا ما اتحدااج علي ابني مثل ما هو اخوج 

= اني اسفه ما كان قصدي كل ما بالامر اني اخاف لاتنسى علاوي وضعه خاص 

:: علاوي ما بي بس الخير طاب وحالته كلش زينه 

= اعتبرني ما حچيت واني اسفه مره لخ 

:: وج مو على الكلمه صوتج العالي واتخوصرتي انا مو بگدج افتهمي بابا 

كلمة بابا حركت مشاعري جاوبته بحزن = شكد مشتاقه الهاي الكلمه من زمان ما سمعتها منك 

:: وجد انتي مو بس ... انتي بنيتي واختي 

اتقربت منه لا اراديا بسته بخده وانت كل شي الي بالدنيا

حسيت بكلبي يريد يطلع من الرجفه واني اباوع العاصف وهو لازم الجكاره وايده ترجف رحت للغرفه كعدت 

واني اتلمس شفايفي الي باست خد عاصف = شنو شكو شبيه شصار كنت دائما ابوسه واحضنه 

بقيت بالغرفه حتى ما بدلت اندك الباب گلت = فووت علووش 

لان اميز دكته من دگت عاصف اجه گعد يمي وهو يگلي 

( ) ليش ما ترحين وياي البيت جدي 

= لا علووش ال كيميا بعد ما مكمليها 

( ) مو اني ضايج 

= انت رووح واني بس اكمل اجي 

( ) تمام تصبحين على هير 

= وانت من اهله

ثاني يوم اجه عمو جابر الساعه بالسبعه الصبح طلعت سلمت وسويتله ريوك رغم هو قسم انو متريك بس عاصف 

اصر واخذه وگعدو بالمطبخ واني كملت الهم وخليته ع الطاوله طبعا عمو جابر مو اول مره يزورنا كان 

دووم يجي ويجيب فلوس العاصف اخذ علي وراحو واني عاصف وصلني للمعهد وگلي ارجع بالتكسي 

الي ماجرها الي وانطاني نسخه من المفتاح

تستمر القصة أدناه

بقينه بالبيت هو يطلع ما يرجع اله بالليل ومن يرجع الظهر مجرد يتغدا ويشرب جاي ويطلع 

للشغل ما حبيت اساله شنو الشغل لكن اسمعه يوصي العمال حمل هلكد وجيب منه هلگد هذا اكتبله وصل ذاك 

لا تنطي بالدين 

ومن راح علي هو رجع ينام بغرفته 

يوم الثلاثاء وصلني للمعهد وكلي امرلج نتغدا بره

وفعلا من طلعت شفته واگف بسيارته رحت ركبت بعد ان سلمت رحنه المطعم حسب ذوقه كعدنا هو سالني 

:: شعجب ما تلحيين عليه وين اروح وليش متاخر 

= لان ما تبات بره 

:: انا ولا مره بتت بره 

= حتى لو كنت ترجع متاخر هوااي يجييك تلفون وراسا تطلع

:: وهسه انا حتى بالنهار ماكو 

= بس اسمعك بالتلفون وانت تحاجي العمال 

:: تدرين انتي يلوكلج دور المحققه 

= شلون 

:: يعني اذا يجيبولج مجرم وما معترف غصبا على الخلفو تخلينه يعترف 

ابتسمت = ها وشلون باالله

:: تظليين تلحيين تلحيين تلحيين الى ان يعترف بشي سوا وشي ما سوا 

= هههه بس حتى يتخلص من ملحتي 

:: اي 

= يعني اني هلكد الح وياك 

:: غير ما تنجرعيين 

جاوبته بعتب واشر على نفسي = اني 

:: اي وداعتج بس شسوي متحملج

= خلص بعد ولا احجي ولا اسال ولا اطلب منك شي 

اتقرب مني رفع حنجي وهو يتنفس كلي :: شنو زعلتي 

كان كلش قريب صارت عيونه بعيون بعض ونفسنا سوا باوعتله وهزيت راسي يعني اي 

:: ارضييج شتردين 

بلعت ريكي حاجيته = عاصف 

:: عيونه 

= ناس منا

باوع :: اووف نسيت نفسي 

ابتسمت :: شكد حلوه ابتسامتج 

= بس مو مثل جمال ابتسامتك 

:: احلفي

صدك ما اعرف ليش هالشكل جاوبته ردت اغير الموضوع 

= بس اني بعدني زعلانه 

:: ارضييج كليلي شتردين ويجرالج 

= امممممم خلي افكر 

صرت الملم بحلگي وابتسم وهو يباوعلي :: ها شتردين 

= هواي اشياء بس ما اگلك عليهن هسه 

:: يعني نايدهن ع الحساب 

= بلي

:: خوش خلي نتغدا وتالي ادفعلج قسم من الحساب حتى شويه يخف عليه 

طلب قوزي بعد ان سالني واتغدينه وشربنا الجاي كلي = ياالله 

ركبنا بالسياره وهو يسوق واني مثل كل مره اباوع من الجامه واشوف بغداد يوميه شكل وكل شي بيها يتغير 

دخلنه المنطقه وكف السياره سالني :: تدرين وين جايين 

رفعت اكتافي = شمدريني مو جاي تدفعلي قسم من الخساب

:: هههه ولا تنسيين المهم صدك ما تعرفين وين جايين 

= لا وداعتك على كولة بيبي 

:: هههههههه اي كون بعد تتعلمين شكم حجايه جا صرتي فرحه الثانيه 

= قصدك الثالثه 

:: لا ماكو ثالثه امي وانتي 

= اسفه مدا اقصد بس انت الي سميتها مع تحوير بسيط بالاسم

:: لا مو انا الي سمتها امها كدام الناس سميتها على اسم عمتي ومتاكد لو صاير ولد يمكن لو مسميته غازي لو بدر 

= ممكن اسالك 

:: اسمعج 

=. ليش هلكد تكره رجاء 

:: لا صلفه 

=. شلون 

:: هسه المسوي غلط شويه يسكت يستحي هي جابت الفرخه وسمتها فرح انتي تدرين للموت وابوي ما حاب فرح 

ولا شايلها ولا يحجي ويه رجاء

= لويش 

::لان المفروض رجاء على سوايتها تنكتل 

بلعت ريگي واتذكرت نفسي هو راد يغير الموضوع :: ياالله ما علينه صدك ما تدرين وين جايين 

= لا منين اعرف 

:: هم حقج ما تندلين اجينه من غير منطقه 

مشى شويه بالسياره وكلي :: انزلي 

نزلت باوعتله = دقيقه عاصف هذا مو (باوعتله بعتب )

هز راسه :: اي بيتج اقصد بيت اهلج 

= وينه 

كانت اكو بنايه مشيده هيكل اشر عليها :: هذا 

= هذا هديته 

:: ايي لان بعد ما نكدر نسكن بي وموقعه تجاري قررت اسوي بنايه 

عضيت شفايفي = طبعا بيتك حلالك وانت حر بي 

اتحسر :: اسمعي وجد ما اريد اسمع بيتك حلالك سيارتك 

فتحت عيوني هو رد گولي :: بيتنا حلالنا سيارتنا كاعنا

فكرت ويه نفسي = اشو يكول بيتنا حلالنا لعد وكلامه 

ما ردت اكمل تفكيري سالته = والاثاث -

:: الاثاث المهم امنته والباقي بعته 

= انت منين تعرف المهم حتى تامنه مو كان المفروض تسالني 

:: يعي موجود من زمان اثاث قديم شنسوي بي

= وين امنتهن 

:: يم بيت ابو كرار 

= ميخالف تاخذني الهم 

:: ياالله

ركبنه بالسياره ودكينه الباب فتح كرار الباب سلمنه ودخلنه واجت ام كرار وسلمت علينه وهي تحاجيني بعتب 

- - شعجب شعتب شنو تهتي ومريتي تعاي شيماء شوفي منو اجتنه 

شيماء اجت وكالت //. هاي ياهي انتي ياعياره حتى ما تكولين خلي اسال على خالتي 

حضنتها وهي تبوسني = خاله انتو دووم ع البال بس مشغوله 

ام كرار // شوفي شكد صار ما ماره بينه 

كعدت = حقج خاله بس تعرفيين سادس ودورات واني ما اطلع اذا مو عاصف هو يطلعني 

- - اي اعرف اني كل ما يمر بينه اساله

= اشلون هدى 

- - زينه الحمد لله 

= جاي تداوم 

- - اي خاله بس تعبانه من الحمل صدك وجدان ما ناويه تسوولكم طفل 

= الله كريم 

- - والنعم باالله بس عاصف مو زغير ويحتاج الولد يشيل اسمه 

شيماء// تدرين لو واحد غير عاصف جان اخذله ثانيه وثالثه 

ام كرار // يجوز السبب منه 

- - ليش منه مو عنده فرح بس خاله لازم ترحين الطبيبه تشوفج ليش الهسه ما حبلتي 

= ان شاالله

باوعت الخاله ام كرار =. بلا زحمه عليج عاصف يكول مخلي عدكم غراض من ذاك البيت 

- - اي خاله موجودات بغرفة هدى لان عاصف كال ديرو بالكم عليهن 

= ميخالفاشوفهن 

- - اي طبعا ياالله 

راحت قبلي صعدت ورحت وراها دخلت الغرفه هدى كان اكو كارتون كبير ام كرار كالت هذني خاله وانا من ايد 

عاصف لهنا 

= شكرا خاله

فتحت الكارتون شفته صورة امي المرسومه وصورة رامي وحتى صورة ابويه والبوم صور وصوره الي من وانا زغيره كانت بغرفتي استغربت يعني بيت شكبره وشكده بي اثاث جديد ويخبل اي شي مو مهم عد عاصف بس الصور 

ظليت حاضنه صورة امي وابچي وبصراحه ما عندي كلام اگوله 

نزلت بعد فتره وخاله شيماء سالتني // باجيه مو 

ما جاوبتها اتقربت يمي وكالت // الله يرحمهم اهلج والله يطول بعمر عاصف ويخلي خيمه الج

= الله يسلمج 

اتقربت من ام كرار = خاله 

- - ها حبيبتي 

= خليهن يمج بعدين اجي واخذهن 

- - خليهن قابل شايلتهن على راسي 

كعدنا وخاله شيماء جابت جاي //. خاله وجدان انتي سباعيه بس هم ديري بالج 

= منين 

- - من كل شي انتبهي خاله تره عاصف سوا المحد سواا 

هزيت راسي = اعرف

- - ما دام تعرفين ديري بالج على رجلج وعلى بيتج عاصف ابن حلال وخله كل شي ورا الخاطرج 

= ان شاالله 

- - وهم اريد اوصيج ديري بالج من رجاء وابنها 

من سمعت كلمة ابنها عبالك انلدغت جاوبت راسا = لا خاله معليه بيهم 

- - تره بهاء خوش ولد لو ما هالحيه امه وخالته 

= خاله ما يهموني اصلا اكثر من سنه ما شايفتهم

شيماء // ادري مريت بعمتي وسولفتلي بس انا جاي اكلج رجاء ونهاد والحواليهم ما يصحون 

ام كرار // شلون ام علي شو رجاء تبين فقيره 

شيماء // انا الاعرفهن عاصف جان بنك وين ما دارو يصرفون بديهم ورجليهمووهسه انكطع عنهم شني بالمثل 

نهاد واختها يسكتن لا وداعتكم عاد خاله اريدج دووم منتبهه الكل شي 

= ان شاالله 

- - تره عاصف ذهب وانتي ما قاصره رجلج يحبج ديري بالج علي وشدي حيلكم جيبولكم وليد يشيل اسم ابو اقلها 

الحلال ما يصير فال النسيب 

ابتسمت = ان شاالله

كملت استكان الچاي وكفت = ياالله بعد احنه نروح 

ام كرار // وين ترحون ما شفناكم 

= لا خاله عندي دراسه وهم اتعرفين البيت واحتياجاته 

- - اي اعرف (باوعت الشيماء ) تذكرين وجدان الي ما تعرف اتطك بيضه ما شاء ام بيت 

شيماء // على امها الله يرحمها 

= الله يرحمها

رحت امشي وياي ام كرار وشيماء دخلن للاستقبال سلمن على عاصف وام كرار اتكله 

انكلها ابقي ما شايفينكم من زمان تكول عندي دراسه 

هو رد :: اي ام كرار بعد شتسوي خطيه هالكه روحها بالدراسه ان شاالله غير مره نجي ونتعشى 

- - هله بيكم 

سالني :: ياالله بابا نمشي في مان الله سلمي على كريم 

ام كرار // الله وياكم هله بيكم

طلعنه وخاله شيماء توصيني // ديري بالج على بيتج ورجلج ومن تجون هناك مرو علينه 

ابتسمت ما جاوبتها سالتني // شبيج خاله 

= غير اذا ياخذني لهناك 

- - ياخذج جاي يبنيلج بيت يكمل وياخذج

استغربت ما رديت باوستها ورجعت بالطريق گتله = شفتهن للاغراض المهمه 

:: ها شفتيهن خوش 

= بلي عبالي صدك اغراض طلعن بس صور 

::ليش شكو غيرهن مهم 

= ليش البيت ما بي شي مهم 

:: وجد الاثاث صار قديم صدكي نصه اطيته للثواب

بقينه ساكتين هو سالني :: نروح للبيت 

= يابيت 

:: اوو اقصد الشقه 

= بلي 

:: خاف حابه ترحين المكان 

= لا تعبانه خلي نرجع 

:: بكيفج

تمينه ساكتين ورجعنا للشقه ما حبيت اساله على البيت الي جاي يبني بالبستان 

دخلت للحمام سبحت ولفيت شعري رحت اسوي كهوه وطلعت من الغرفه وصادف ويه طلعته من الحمام الخارجي 

تلاگينه هو ابتسم ويباوعلي وكلي 

:: نعيما 

ابتسمت = شكرا وانت هماتين 

:: انا شنو 

= حمام الهنا 

:: ايباااخ هاي جديده

ابتسمت صار يباوعلي كلي :: شراح تسوين

=. ع اساس كهوه بس يمكن انام 

:: وانا هم راح انام عود من نكعد نفكر شنتعشى 

هزيت راسي رحت للغرفه سديت الباب عليه مشطت شعري دك باب الغرفه عاصف استغربت شيريد فتحت 

الباب سالته = ها شكو 

:: لا ولا شي بس رايد فلوس من القاصه

هو راح للقاصه فتحها اني بقيت امشط بشعري وبصراحه ما اريد اتمدد. 

من سد القاصه اجه يمي وشال قنينة العطر ورشلي كال 

:: هذا العطر يخبل من تخلينه 

ابتسمت هو رد :: دووم خلي من انا موجود بس من تطلعيين ابد لا تخلين 

ما جاوبته هو كال :: ما راح انام عدي شغل اروح وارجع رايده شي اجيبه وياي 

= لا 

طلع اتمددت غفييت كعدت على دكة باب غرفتي فتحت الباب هو يباوعلي :: عبالي ما نمتي 

= لا غفييت 

:: ياالله صحصحي وكومي صلي 

= بيش الساعه 

:: بثمانيه 

رحت اتوضييت وصليت بالغرفه وطلعت لكيته كاعد والريمونت بايده 

= شمشتهي تتعشى 

:: اي شي

حكيت خدي = مخلصين اي شي 

:: هههه صايره تحششين 

اتثاوبت = راح اسوي كعك وجاي وحليب تريد 

:: ايي نعمه 

جبت علبة الحليب وصبيت الجاي وخليت فوكه الحليب الباودر وخطته وقدمته اله واني هماتين صبيتله وصرنا ناكل 

واحنه ساكتين رن تلفونه شاف المتصل بيبي باوعلي وگال :: امي

:: الو هلا يمه 

الله يسلمج انتي شلونج 

ليش ما تجينه 

باوعلي ورد :: اي والله خطيه كلش تعبانه بالدورات 

:: ان شاالله يمه 

:: ها 

:: اي 

:: وياهو اجه

:: شو ما گلي 

:: هااا بس احنه اهل 

:: اي 

:: خوش 

:: خلي يجون وانتي اگعدي يمهم لو اخوها تره همه اهلنه مو اغراب 

:: ها چا گولي مكملينها 

:: خوش يمه لا تحلفيين خلي يتشاوفون وتالي الجمعه خلي يجون 

:: يمه اليوم احد باجر يتشاوفون واذا صار موافقه بين الطرفين ي خابروني وانطيهم موعد الجمعه

:: بكيفها عدج فلوس وشتريد تسوي بكيفها 

:: هسه باجر وردولي خبر 

:: يمه خلي تصير وانشدها 

:: اي هاي يمي 

باوعلي :: حبوبتج

اخذت التلفون = الو شلونج بيبي 

- - هلا ياحبوبه شلونج گولي جدتي اجي اشوفها انشد عليها 

= بيبي اني ما اكذب عليج دورات ودك دراسه وهم بعد 

- - شني 

باوعتله ورديت = عاصف ميقبل ي جيبني هناك طلبت منه مرتين وهو ما قبل 

- - ادري جده وانتي ما ناويه تسويلنه جاهل 

باوعت العاصف = اح ان شاالله بس غير اخلص السادس 

- - - الج بس تخلصيين السادس تره وره السادس اذا ما تحبليين ازوجه

بقيت ساكته واباوع العاصف بيبي ردت // شو ساكته وجدان جده عاصف مو زغير يرادله ولد 

= ان شاالله بيبي 

اخذ التلفون مني وصار يحچي وياها 

:: يمه شحاجيتي وجدان وجهها صار يطي الوان 

صار يسمع ويباوعلي :: الله كريم يمه 

:: اي اي اجيبها ورووح ابوي اجيبها 

:: الله وياج 

سد التلفون وانطاني بطل الماي :: هاج اشربي وجهج اصفر

شربت الماي كلي :: هم تدرين ليش امي خابرت

هزيت راسي =. لا لويش 

:: غياث ابن رحيم خطب فرح 

حكيت كصتي =. ابن عمو رحيم 

:: اي باجر يجي يشوفها واذا صارت الموافقه الجمعه يمشون 

= بيها الخير هي اتصور اكبر منه بسنتين 

:: اي يدرون وقابلين 

ثاني يووم عمو رحيم خابر عاصف الي كله :: خلي ابنك يخابرني 

وبعدها عاصف طلع وما رجع اله الساعه عشره ونص الصبح كعدنا اتريكنا وصلني للمعهد 

وبالطريق كلي 

:: اتحضري الخميس نروح للخطبه 

= ان شا الله 

:: العصر اخذج تشترين ملابس 

= عندي 

:: لا اشتري فستان وروحي للصالون

دنكت بدون ما اجاوبه نزلت للمعهد ومن كملنه المحاضره رجعنا للبيت اتغدينه ورحت الغرفتي نمت الساعه بالخمسه 

دك الباب فتحته والنعاس بعيوني حاجاني :: بدلي خلي نروح للسوك 

رحت بدلت لبست فستان محجبات وطلعت هو باوعلي وكلي ياالله 

واني بالسياره خليت ابالي شي نزلنه للسوك وصرنا نفتر ع المحلات وهو يسالني عجبج شي الى ان وكفنا يم محل كلش كبير 

وعارض فساتين كلش حلوات دخلنه وهو گلي ::شني يعجبج اشتري

صرت اباوع وهو واگف يم ابو المحل لمن ما اجيته سالني :: ها شختاريتي 

همست =. اريدك انت تختارلي على ذوقك 

باوعلي باستغراب ابتسمت بهدوء = اي احب ذوقك 

:: بس انا ما اعرف بملابس الحفلات 

=. هنه ذني المعروضات وانت اختار

اجه وصار يباوع الى ان شاف فستان اصفر مذهب بينصل وبي فتحه من كدام طبعا بدون ردن كان ثكيل وبي شغل هوااي 

هو كلي :: هذا 

= بس هذا ثكييل 

:: شني ما تكدرين تلبسينه 

= لا دا اقصد ثكييل بي شغل واكيد غالي 

هو كال للعامل :: نزل هذا الفستان

العامل نزله اخذته حتى اقيسه وطلع فييت عليه اشترا طبعا كان غالي ومن طلعنه كلي :: اخذي حذاء وكوستم 

= المن 

:: الكوستم تبدليين بي خو ما تبقيين مبزنكه بالفستان 

ابتسمت ودخلت للمحل اخذت كوستم كلش حلو وهماتين سعره غالي واخذت خذاء وعجبتني گلبيه خليجيه 

بيها تطريز (مخور ) مخيط وكامل اخذته

من كملت ركبنا بالسياره وكف يم مطعم اتعشينه ورجعنه للبيت صلينه وبعدها كعدنا بالصاله كلي 

:: العصر باجر ان شاالله اخذج للصالون 

هزيت راسي سالني 

:: انتي تلبسين البدله كدام النسوان مو 

= بلي 

:: يعني من يجون الزلم شتلبسيين 

= اكيد اخذ عبايه اسلاميه او جبه اي اخذ جبه للسهوله

:: خوش 

= ليش تسال 

باوعلي :: لا هيج 

= شتريد تكول 

:: ماكو شي 

= لا اكو شي گلي 

:: بس لا تفهميني غلط 

=. ابد بس كول 

:: احب اكون اول واحد يشوفج بالفستان

باوعتله =. يعني قصدك تريدني البسه 

سكت ما جاوبني رحت للمطبخ صرت افكر = شلون البس الفستان كدامه 

= اي شكو بيها تره مو حرام 

= حرام الي اسوي بي

جبتله جاي لكيته يدخن ويباوع ع التلفزيون اخذ كوب الجاي واني گتله =. تصبح على خير 

:: اجمعين 

دخلت للغرفه طلعت الفستان اباوعله =. صعبه صعبه ما اگدر 

اتمددت = تره ما بيها شي خلي البسه واروح يشوفني بي 

لبسته الفستان ومشطت شعري فتحته هو مو كلش طويل يعني ما غطه فتحت الظهر 

الفستان من يم الصدر مفتوح وبالظهر هم مفتوح ونازل على جسمي والفتحه فوك الركبه خليت شويه مكياج 

والعطر الي يحبه

وطلعت ما لكيته بالصاله رحت للغرفه دگيت الباب گلي فوتي دگيته مره لاخ مو اكول فوتي 

دكيته مره ثالثه فتحه بعصبيه شافني واكفه وخاله ايدي على صدري صار يباوعلي حاچيته 

=. هاي لبسته شنو رايك 

لزم ايدي الي خالتها على صدري ويباوع لعيوني وينزل التقاسيم جسمي دارني واتقرب عليه صار يتنفس بسرعه 

بحيث انفاسه تطخ بوجهي حضني حييل وحتى اني صرت ارجف ابين اديناته 

صار يهمس بااذني :: تخبليين انتي الي محليته اتجنننين انوب مخليه من العطر حتى تخبليني بالزايد

=. مدا اقصد 

:: واذا تقصدين انا اريدج هيج ما تدرين بالنار الي جاي تحركني وانتي ابين اديه وبعيده عني

كعدني ع الجربايه وهو يباوع الي عبالك ما شايفني وهو يرفع بحنجي ويباوعلي وبس دكات گلبه اسمعهن 

لازم اديه اثنينهن وصار يبوسني بيهن مرر ايده على وجهي وقرب وجهه اكثر وصار يشم بشعري بركبتي 

وصل الشفايفي صار يبوسني واني مغمضه ومتجاوبه ويا وهو حاضني وكلامه بااذني 

:: دمرتيني احبج

حسيت على نفسي بلعت ريكي وفتحت عيوني حاجيته واني الهث عبالك جاي اركض 

= يعني حلو الفستان عليه 

جاوبني وهو مغمض عيونه واتنفس :: يخبل حلو كلش 

= لعد ارووح انزعه 

رحت امشي هو گلي 

:: وجدان 

= بلي 

:: الفستان لاتلبسينه هناك البسي الكوستم

ما ناقشته هزيت راسي وطلعت ادري يغار عليه صرت الزم خدي وايدي زين اني لويش الهسه ارجف 

نزعته ولبست دشداشه وثاني يوم العصر اخذني للصالون وهو ساكت من وصلنه انطاني فلوس وگلي 

:: من تكملين رمشي عليه 

= مو يجوز الكى هواي گدامي 

:: عادي اخذي وكتج

كملت من الصالون واجه يوم الخميس طلعنا الظهر اخذت ملابس الكلبيه والكوستم ودشداشه مالت بيت 

وانا رحت لابسه عبايه اسلاميه وعاصف گلي البسي ذهب وما سالني ع الفستان

وصلنه العصر كلش سلمت على بيبي وشفت علاوي 

بسته واجت رجاء سلمت عليه اني هماتين باوستها وفرح باركت الها كانت خافه وجهها وميشه شعرها 

سلمت على عاصف الي اخذها وراح للبستان وكلي :: سويلي جاي

رحت للمطبخ اريد اسوي جاي لحكتني رجاء 

- - اي شلونج وجدان 

= الحمد لله عمه زينه 

- - انا دووم انشد عنج بس انتي كلش كطعتي 

= بعد بيت ودراسه 

- - الله يساعدج جا شعجب ما حبلتي شو عد بهاء بساع شلتي 

ما جاوبتها گلبي صار يدك وريكي يبس واني اشوف رجاء تحچي وتبتسم بخبث واجاني الخنجر المسموم 

الي ما كنت متوقعته 

هو صدك انتي من بهاء لو جنتي حامل بي من غزوان

الفصل الرابع والخمسون من هنا 

شكرا لزيارتكم عالم روايات سكيرهوم