رواية قصة وجدان الفصل الرابع والخمسون 54 بقلم انين الليل

وجدان 

من سالتني هالشكل رجاء واشوف ابتسامة الخبث بوجهها احتقرتها واحتقرت ابنها وهي اتكلي 

• كل شي انكشف وخاف عاصف ما يدري انا راح اكله ضحكتي على ابني ومن عرف بيج وانتي حامل 

شردتي منه وطيحتي النغل وتالي طلبتي الطلاك تره كلنه ندري بيج على خالاتج نظيمه النهبت وتالي باالف ياعلي 

اخذها وطلعت حبله منه وغنيه المن واحد الواحد بالمستشفى وتالي اخذتلها واحد شداله كرون ستيل

حركت اديها // شعبالج اعوفلج عاصف بلكت تشوفيلج واحد اتضحكيين علي يصاحبج ويحبلج وتخلين النغل باسمه 

بعد يومين يموت وتاخذين الورث بعيده عنج وعن عيونج ولج اكتلج انتي وابنج يو بتج 

— شوفي الج بس هالشهرين وتالي تختفيين من حياتنا كلنه عدج راتب ابوج حبوبتج تقبضه وتاخذين اخوج وتهجيين 

منا ومن بغداد ما اشوفج لا اخلي مهدي يذبحج بيده

ما اوصف حالي واني دا اسمع كل هاي الاتهامات الخطيره صار كلبي يدك عبالك مكينه وصرت ارجف لكن اتذكرت 

بلحظتها كلام عاصف لازم اواجه العاصفه والي يصير يصير 

ورغم اني وعدته ما اطلع اي شي من الكلام الي كاله الي لكن مضطره مو ادافع عن نفسي بس لان اذتني بكلامها واتهامها 

هي تبتسم باستهزاء وتباوعلي بنظرات كلها شماته هنا قررت اواجهها واخليها مو بس تخاف لا تحسبلي الف حساب 

تلفوني خليته ع الكاونتر يسجل بدون ما تنتبه اتقربت بكل هدوء من باب المطبخ سديته وطكيت المفتاح قفلته. 

هي تباوعلي وتحجي وعيونها تلمع ومبتسمه 

• شو قفلتي الباب شني تردين تذبحيني لو خايفه احد يسمع 

رديت بهدوء = تؤ ما اريد اذبحج بس اريد احجي وما اريد احد يسمع 

• ها شعدج شتحچيين

صرت امسح بشفايفي بقوه وبنفس ابتسامتها الخبيثه = سامعه بالمثل الي يكول الله يحب الساترين 

• وانا ما فضحتج بعدني حجيت وياج محد يدري بينه ردت افهمج 

=. شتفهميني ابنج ملفق عليه كل...

قاطعتني //. انجبي بت السكط ابني ما ملفق ابني لكاج وحده دايحه ساقطه الله اليعلم شكد كبله وهسه اخذتي عاصف 

وتردين تحبليين وتكليله النغل منك بعيد عنج وعن الخلفوج

هزيت راسي = اي حقج لان كلمن يشوف الناس بعين طبعه اكلج اريد اسالج هم سامعه بتحليل DNA 

حركت ايدها // شني هذا النوبه

حاولت ابين قويه رغم كل شي بيه يرجف = هذا هذا اريد اسوي انا وفرح واطلب من الحكومه يطلعون جثة سعدي 

حتى ياخذون منها عينه وحتى تبين انو فروحه حبيبتي هي اختي من ابويه 

= وهم بنفس الوكت يبين انو عاصف ستر عليج وما لمسج وفرح مو بته 

واخليها تتذكر فروحه انو جدي غازي للموت ما باسها ولا حچى وياج اصلا راد يقتلج لو ما خوفه من الناس تدري 

وابوج واخوانج خطيه يتعيرون

صارت ترجف وشفايفها صارن بيض رادت تحچي خليت اصبعي على حلكي وبنفس ابتسامتي 

= مو اهنا المصيبه المصيبه اذا نهوده اختج عرفت انتي جنتي على علاقه بخطيبها وعافها على مودج وبعدين وره 

ما رجلج الشهيد المظلوم مات انتي حبلتي من اخو الي كان ممكن يكون رجلها الاختج 

اتقربت مني // ولج بر... انتي اتهدديني بت النعال منو گلج

لملمت حلگي = يجوز لفقت جذبه عليج مثل ما انتي وابنج لفقتولي جذبه لو ليش ما دام انتي تكولين غزوان هو الي معتدي 

عليه انا ما راح انكر وراح يبين انتي متفقه ويه غزوان على مود يغتصبني حتى مهدي يكتلني مو 

وهسه ياالله امشي اني مستعده اواجهج گدام الناس كلها وكدام ابنج المسكين حتى يعرف شنو امه الشريفه 

الي خطيه اتزوجت ابن عم رجلها بس حتى ابوها ما يزوجها وتبعد عن ابنها وبعد سنه طلبت من عاصف ايطلكها 

وتبقى عايشه ويه ابنها وبتها ابيت جدهم حتى تبقى على ذكرى زوجها المرحوم وهم لان تستحي من ابنها 

يكبر ويشوفها متزوجه واحد اكبر منه بعشر سنين مو هالشكل مفهمته

اتقربت منها وحاجيته بثقه = على كلامج اني صدك بت سعدي البر ... وخالاتي وحده نهبت ورجعت حامل 

والثانيه رجلها شادله گرون 

يعني اني هسه لا اخاف ولا استحي ف احسن الج والبتج تسكتين وتخلين انتي وابنج نعال بحلگج وحلكه تره ما تعرفيني 

من اضوج وداعة عمه رجاء الما احلف بيها جذب احجي وعليه وعلى اعداىي

رحت للباب جاي افتحه درت عليها وحاچيتها بهدوء = استري على بتج لا يدرون بيها نغله وبعد محد ايگلبها 

وياعمه الحنونه الشريفه البيته من كزاز لايرامي الناس طابوك

اخذت نقالي ورحت يم بيبي واني دا اغلي من داخلي صدكوني بركان اريد بس انفجر واعرف باانفجاري راح 

احرك الدنيا ويجوز اول الي يحترگون اني كعدت بيبي سالتني // شبيج جده 

= لا ما بيه شي لويش 

- ضايجه 

= لا بيبي ما بيه شي بس لان تعبانه 

• خافنج حامل

= لا بيبي مو حامل 

• جا شمتانيه 

= بيبي الصدك 

• اي انا اريد الصدك 

= عاصف ما يقبل يريدني اكمل السادس

هزت ايدها وحجت باستهزاء// وشني ما كو معرسات وعدهن فروخ ويدرسن 

= بعد ابنج شسويله 

سمعت صوت عاصف :: شبي ابنها 

دخل وبيبي اتكله // هله بيك يمه 

رجع سالني :: شني شبيه انا 

بيبي جاوبته // ما بيك شي تكلي مرتك انت ما ترضى تحبل

باوعلي :: وبعد شكالت 

• ما كالت شي لاتخزرها 

:: ما خازرها غير اريد اعرف شكالت 

• تكول انت ما تريد جهال منا لمن تكمل السادس 

:: اي يمه احسن (سالني ) وين الجاي ؟

اتذكرت ما سويتله وگفت = تصدك نسيت هسه اخدر 

:: لا ما اريد تعاي اكعدي 

= هسه بسرعه اسويلك 

:: بعد شويه نتعشى ونشرب جاي 

هو اشرلي بايده كعدت بصفه شاورني :: شبيج

= ماكو شي 

:: وجهج اصفر وشفتج يابسه شصار 

= ما صار شي 

:: لا تضميين عليه منو محاجيج 

= لا ما اضم عليك على شنو 

بيبي گالت // وينج رجوه. تعاي

اجت وهي ما تخلي عينها بعيني // ها عمه 

• شسويتي عشا العاصف ومرته 

هو رد :: يمه مهدي ذبحلي طلي هرفي 

بيبي باستغراب // مهدي شعجب 

:: بعد ذبحه اروح اگله شعجب

بيبي. //. خوش من طلع منه اكلك يمه وناسك باجر تعطلهم ع العشا 

:: اي طبعا وصيت جابر يحضر كل شي 

• شني تذبح ؟

:: اي يمه اقل شي ذبيحتين واذا ما يكفن اسويهن تلاثه 

بيبي // انا ماردتها هيج كلت اهل وعمام بس رحيم گال اله اسويها مشيه تحجي بيها الناس 

باوعت الرجاء وحجييت بخبث = تستاهل فروحه 

رجاء //. ها عمه رايده شي اريد اروح اساعد نهاد 

بيبي //. روحي بس استعجلن تره شويه بعد وكلهم يسيرون على عاصف

عاصف دخن :: اكلج يمه شنو ياهو اجه وحجى وياج 

بيبي //. اجه رحيم ومرته واختها 

:: حجيه مو بعده طايش 

بيبي //. ما دامها قابله خلي تمشي بحال سبيلها 

سكت نا جاوبها بيبي سالته //. انت حجييت وياها 

:: اي سالتها قابله تاخذينه كالت قابله وانا خليتهن كلهن بيدها

بيبي //. هاا 

:: اي يمه كتلها الولد بعده يدرس وكاعد ويه اهله يعني ما عده يطلع بيج ابيت وهو رحيم اساسا على كد حاله 

وهي قبلت 

بيبي // ترى. رحيم وابنه زينيين خوش ناس

:: احم ياالله اذن خلي نكوم نصلي 

هو راح يتوضا واني هماتين دخلت الغرفته اتوضييت وهناك صليت وهو يمكن صلى بغرفة بيبي

بقيت وره الصلا بالغرفه متمدده ع القنفه فتحت التسجيل وسمعته واني متردده بين اسمع عاصف 

التسجيل وبين اسكت قررت اسمعه التسجيل من نرجع ما ردت يسوي مشكله اكون اني السبب بيها 

بصراحه مستغربه من تصرف رجاء وكمية الحقد الي شايلتهن الي والاخوي من وره عملة ابويه 

وياها بس ذاك الي صار كان بارادتها عكس الي صار الي 

من غزوان كان شي غصب عني اني لازم اخذ حذري صرت اكول 

=. همزين صرت ذكيه وسجلت الها

انفتح الباب عاصف وهو يباوعلي اتقرب مني سالني :: شبيج 

= ما بيه شي 

:: لويش ضايجه 

ابتسمت = ما ضايجه بس دايخه 

اتنفس :: ياالله كومي اتعشي 

= انت تاكل ويانه 

:: لا ويه مهدي واولاده شنو تردين اكل وياج 

سلهمت عيوني هو اتقرب عليه اكثر وكلي :: اي شي تردينه مني وتخافيين ما اسوي الج بس البسيلي 

الفستان راسا راح انفذه الج

فتحت عيوني باستغراب شفته مبتسم طلع واني ورا طلعت اجييت يم بيبي عاصف يمها كاعد

اني كعدت بيبي سالتني //. من تكملين سادس تدخلين كليه 

باوعت العاصف ورديت = بيبي بكيف عاصف 

ها 

= اي شيكلي عاصف اسوي 

رفعت ايدها بالدعاء // عفيه بالسباعيه الله يرضى عليج ( باوعت العاصف ) هالوجدان خوش بنيه

هو ابتسم بدون ما يعقب احس بي ارتاح من كلامي بيبي سالته // وديت على اخواتك 

:: خابرتهن وباجر يجن بس سعاد كالت ما تكدر تجي  

بيبي. //. سعاد وينها اووين الضيم كافي الميت العدها 

:: استغفري ربج 

• استغفر الله دووم اكللها الصار لابنج من دهايره وسوالفه المكسره 

:: بعد هذا قدره كما تدين تدان

بصراحه لعبت نفسي ومعدتي گلبت من اتذكرت غزوان وهو على الكرسي المتحرك 

حاولت اتنفس بعمق اتقرب مني عاصف :: شبيج 

= ما ادري دخت 

:: اخذيلج هيله من حبوبتج 

بيبي //. شبيها 

:: معدتها كالبه من السياره اطيها هيله

سمعنه صوت نهاد // وينكم شني نايمين 

بيبي //. يمته نمنا جا مو توها اختج جانت يمنه 

هي فاتت للغرفه //. اشلونك ابو فرح 

رد بلا نفس // هلا هلا 

اتقربت مني وباستني //. اشلونج حبيبتي صايره تخبليين 

باوعتله هو اشر بوجهه = هله عمه 

نهاد //. ياالله عاصف صبينه بالديوان 

وكف وراح للديوان ونهاد كالت //. راح افرش السفره بالصاله حتى كلنه نلتم وناكل

راحت فرشت السفره اني وكفت بيبي سالتني // وين رايحه 

= بيبي راح اخدر جاي 

• اي سوي بالقوري الجبير خاف يجون جماعة عاصف 

= بلي 

فتت خليت بالقوري الكبير ماي وفورته واسمع جابو الغدا ونهاد تكل البيبي //. ياالله عمه كومي جا وين وجدان

• بالمطبخ جاي تخدر چاي 

احنه سوينه بعد عليش هنا تخدر 

• بكيفها 

سمعتها تناديني //. ياالله احبيبه تعاي اتغدي 

استغربت من كلمتها هاي اني من اجيت لهنا ولحد هاي اللحظه نهاد ما كالتلي هاي الكلمه اله هسه 

اجيت شفت الكل كاعد ع السفره رجاء وفرح ونهاد وبناتها وبيبي اني اجيت كعدت يم بيبي 

وصرنا ناكل ّبيبي سالت نهاد //. وديتي غدا الساره

• اي عمه وديت 

بيبي // چا هي ليش ما اجت 

• تكول بدر تعبان شويه 

بيبي //. شبي 

• ما بي شي عمه جاهل وما ينام بالليل بعد شبي

كملت وگمت گلت = الحمد لله 

بيبي //. شو ما اكلتي جده 

= الحمد لله شبعت 

نهاد //. صدك ما اكلتي بس لا الطبخ ما عجبج 

ابتسمت = كلش طيب عاشت ايدج 

• بالعافيه حبيبتي

رحت غسلت بالمغسله ورجعت كعدت ع القنفه نهاد كالت //. شنو عاصف دز على امل وانصاف وسعاد

لو نسى اخلي مهدي يتصل عليهن 

بيبي //. باجر يجن 

رجاء// ها يعني يتغدن اهنا 

بيبي // اي ليش 

رجاء بتذمر // انا مالي غرض باجر اروحن ويه بتي دبرو حالكم 

نهاد // حتى احنه جا مو وحد

بيبي هزت ايدها// عليش ع الغدا ما ندري راح تذبحولهن جمل ومحتارات 

رجاء// لا عمه بس تدرين باجر ياهو فارغ 

نهاد // انا بالنسبه الي اليظل منا اضمه غدا الهم 

رجاء//. خوش من تجي امل هي وانصاف يطبخن

كملن العشا ونهاد گالت البناتها هاجر وذهب شيلن المواعين ودنها البيتنا 

بيبي كلتلي // جيبيلي استكان جاي 

رحت صبيتلها جاي وصبيتلي اني كوب اخذته الها الغرفتها وسالتني 

- - جده شو من نحجي انتي ما تسولفين ويانه 

= ما عندي شي اسولف بي 

  - - مي خالف اشتركي ويانه هذا عرس اختج

صفنت على كلمة اختي اجت نهاد //. ها عمه اجيتي اهنا ويمج وجدان 

   • اي تدرين بيه ما ارتاح اله بحجرتي وكتلها جيبيلي چاي وهلنشد بيها 

• عليش عمه ؟

• اكللها ليش ما تسولفين ما تحجيين 

• عمه وجدان من اوانها من چانت اهنا ما تتدخل ولا الها غرض

الي مستغربتله نهاد اول مره هالشكل تحجي بيبي سالتها // فرح وين 

• ها تردينها هسه اصيحها 

• فرح فرح تعاي حبوبتج تريدج ،

اجت فرح // ها جده رايدتني 

• اي تعاي

اجت فرح وكعدت يم بيبي حاچتها //. ابوج حاچاج 

• على شنو ؟

• على خطبتج 

• اي جده حجى وياي 

• خوش بعد هو طلع من خطيتج ما دامج راضيه الله يهنيج

ابتسمت وباوعت لي اني حاچيتها = مبروك الله يتمم لج بخير 

فرح ردت // شكرا خ ... اوو ردت اكلج خيه نسيت لازم اكلج مرت ابوي 

نهاد ضحكت ويه فرح وتكللها // عادي مرت الاب تتسمى خيه 

فرح //. لا خاله ما تتسمى خيه هاي ( رفعت ايدها ليفوك وحركتها ) مرت ابوي مرت عاصف 

رديت عليها واني واكفه =. مو مشكله حبيبتي واذا دختي ومحتاره شتسميني روحي اسالي عمه رجاء

وهي اتكلج من رخصتكم

رحت الغرفة عاصف دخلتها ما اعرف شبيه ضايجه على تعبانه على متعجبه من تصرفات نهاد 

ومن رجاء الي تبين ما مهتمه للكلام الي گلته وعرفت انو هذني حيايه كل ساع يبدلن جلد 

ولو اني اعرفهن من زمان لكن مرات البشر هو الي يضحك على نفسه بالتمني

اتمددت ع القنفه وغطيت رجليه بجرچف حتى من يجي عاصف ينام على چربايته 

بقيت اسمع سوالفهن وضحكهن بالصاله گمت اخذت كتاب من مكتبته عباره عن قصه 

وصرت اقرا بيها صدكوني اني ولا يم القصه كل شويه اتذكر رجاء وحقارتها وكلامها الي مثل السم

غفييت من التعب ما حسيت على عاصف من دخل للغرفه اجه يمي سمعت ينده ب اسمي 

:: وجد وجد 

• امم 

:: شو اگعدي نامي ع الجربايه 

فتحت عيوني جاوبته بنعاس = اهنا مرتاحه ات نام ع الجربايه 

:: شنو نظل نتعازم 

= لا اهنا احسن الي 

:: انتي لويش تعاندين 

  = حباب خليني نايمه مرتاحه

درت وجهي نمت ماحسيت اله عاصف يندهني الصلاة الفجر حاجيته بتعب = صباح الخير 

:: صباح النور 

رحت اتوضييت وصليت وهو كاعد يدخن ع القنفه اجيت باوعلي 

:: روحي ع الجربايه 

= اهنا اني مرتاحه

::ادري بس كملي نومتج ع الجربايه

رحت اتمددت على جربايته اباوع اله اتمدد ع القنفه غفييت كعدت على دكة الباب وبيبي تكول 

• اكعدو سويتلكم سياح 

اثنينه كعدنا بنفس الوقت كنت لابسه دشداشه شلحه قصيره ونص ردن عريضه هاي من حضرت ملابسي 

ما اعرف لويش خليتها وياهن لان يمكن مريحه بالنوم 

وكف اتقرب مني :: صباح الخير 

= صباح النور 

:: ما تردين تكليلي شبيج منو غ ثاج امس 

= ما بيه شي

كعد بصفي ع الجربايه باوعلي بعتب :: ليش اتضميين عليه 

= اني ما ضامه شي 

:: وهذا الجمال

بلعت ريگي ما عرفت شجاوبه اتقرب مني وصار يخلي بشعري وره اذني صار يبوسني بكل مكان فقد

وهو بس انفاسه تطخني 

اتجاوبت ويا لكن فجاه خطفت صورة غزوان وهو يتشفى بيه وبهاء وهو يذلني 

ما اعرف شنو صار بيه اتقوقعت على نفسي يمكن صرت خشبه وگلبي يدك واني ادفعه العاصف بخوف

كعدني وهو يهزني :: شبيج شبيج وجد 

ما حچييت ويا هو راح للحمام بدون ما يحجي بقيت متمدده وبس اتنفس طلع وكلي 

فوتي للحمام غيري ملابسج 

ما جاوبته رحت اخذت تراك ودخلت لبسته وغسلت وجهي طلعت شفته جاي يمشط ويخلي عطر 

طلع گدامي اعرف بي زعلان دخلنه للمطبخ وسلمنه على بيبي هو باس راسها كعد بالكاع گلتله 

   • گوم اكعد ع الطاوله مرتك ما تعرف تكعد بالكاع 

     :: لا اتعلمت دووم ناكل بالكاع 

   بيبي سالتني وهي مبتسمه// صدك 

    بادلتها الابتسام وهزيت راسي 

كانت مسويه سياح وبيض وعاصف ايكللها

:: يمه ليش اتعبين نفسج 

• هالمره سويته الخاطر وجدان 

بستها بخدها = شكرا بيبي حبيبتي 

بيبي صبت النه كوبين چاي //. همزين من سمعت حسج 

:: هاا وليش 

• ابد امس كعدت وگامت يم البنات وهي ساكته 

  باوعلي وسالني :: شعجب ؟

   = شنو شعجب ؟

:: اكول يعني ليش ما تحچيين 

محد وجهلي سوال وهنه دا يحچن ب اشياء تخصهن فليش اتدخل 

:: خو سمعتي حجيه 

• اي سمعت بس حبوبه من سولفن انتي سولفي وياهن 

= بيبي شسولفن هنه محتارات بالغدا لان رجاء تروح ويه بتها للصالون ونهاد وبناتها ضمت البقى

من العشا حتى تروح هي وبناتها اني بهاي الحاله شسوي احجي ويامن ويه رجاء وبتها لو ويه نهاد

وشحجي اگللهن اروح وياكم

بيبي // اي شكو بيها 

= لا بيبي بيها ما دام ما عزمني ولا گللي امشي ويانه بيها وبيها اهواي بعدين اني عاصف مناك شارط

عليه ما اروح الاي مكان اله هو وياي ياخذني ويجيبني 

بيبي // ها جا كول انت المانعها 

:: اي انا ما تروح الاي مكان اذا ما تخلي يمي علم بس الاصول من رجاء وبتها ياخذنها وياهن 

• بعد انت تعرف رجاء

:: انا الاعرفها وفرح اتعس منها 

  اتقرب مني وشاورني :: ما تردين اتكليلي شبيج 

   رفعت راسي ردت احجي بس ما حبيت اضوجه يجوز يفسرها بشي ثاني يعني مثلا اريد اوكع بيناتهم 

حتى استفرد بي وبفلوسه لذلك كلت بس نرجع البغداد راح اسمعه كل شي

سالني :: تردين ترحيين للصالون ؟

= لا 

:: ليش ؟

= اني اسشور شعري واخلي شويه مكياج 

:: بس مو هواي 

= تمام 

:: ولاتنسيين وانتي گاعده الجبه والحجاب بحضنج خاف يدخلون زلم 

= هو منو يجي غير عمو رحيم 

:: مي خالف الكوستم لونه يجيب التايه 

ابتسمت بخبث = لو ادري جايبه الفستان 

:: حتى ما اخليج تطلعين من الغرفه لو يجي جدج

بيبي تسال // شجاي تتداسرون 

:: ماكو شي انشدها تروح للصالون وهي ما ترضى 

• خليها براحتها 

دخلن امل وانصاف بسكته وكالن // صباح الخير 

بيبي نزت // شني داخلات بسكته 

ههههه باسن بيبي واني وكفت بوسني

وانصاف تگول // اگلج يمه هاي الفرخه يوميه اتصبح احلى من اليوم الگبله 

بيبي // شتردن منها عين البارده هو عاصف شحصل بعمره بس هاي التفاحه 

امل // يمه تكولي تفاحه وتينه 

جاوبهن بابتسامه :: شو ظالات تتغزلن بمرتي ولا معبراتني 

امل // هلا خويه انت ومرتك ماكو فرق اثنيناتكم الروح والريه

:: هلا بيج ام غانم اشلونج ام احمد 

- 0 الحمد لله 

بيبي // اكعدن اتريكن 

انصاف // يمه متريكات وطالعات 

كامت امل جابت استكانين وصبت الها والعمه انصاف// چا شو محد بالبيت وين الحبايب 

• بالصالون 

انصاف // كلها اعباد الله 

بيبي // اي كلهن طلعن بلا ريوك يمه عود سوون غدا

انصاف // ان شاالله اي شي قابل احنه خطار 

اجه مهدي وهو يگول // شفت سيارة غانم گلت اجن اخواتي 

هنه وگفن باسنه بخده// اشلونك خويه 

الحمد لله زين 

بيبي // حبايبك كلهن راحن للصالون 

- اي يمه بعد هي فرحه 

• اي حكهن

صبتله عمه امل جاي وبيبي گلتله // اتريك 

• ماكل يمه 

• ميخالف اكل 

صار ياكل وعينه بين عاصف وامل الي كالت 

اكلك خويه عاصف گلت العمامنه كلهم 

:: اي خابرتهم حتى ابو غانم وابو احمد 

• ابو غانم يم اخو ابغداد غانم اجه ابمكانه 

:: جا ليش ما صحتيله

• كال يروح يم جابر 

:: الله يحفظه خوش مربيه محترم ويقدر 

• على خواله 

:: لا الشهاده ال الله ابو وعمامه خيرين وحتى ابو احمد خيير 

امل //. عاصف خويه وبهاء 

اتغيرت كل ملامح وجهه وسال :: شبي بهاء 

اكول يجي الخطبة اخته 

:: اي خلي يجي تبقى اخته بس دخله لهنا ما دامني انا ومرتي موجودين لا

انصاف //. خويه عاصف انت ابو كلب الچبير ...

رفع ايده :: ما بيناتنا شي بس ما ترهم من انتقل الذاك البيت يريد هذا البيت يشتري ما يريده اشوفلي شراي 

بيبي // وتگعد غريب بنصنا 

:: حجيه كاعي طابو والبيت بااسمي تره حتى ذاك البيت المفروض يصير بااسمي بس الخاطر ابوي غازي 

كتبته بااسم بهاء 

مهدي // جا وانا عاصف

:: انت عندك گاع تسوى ذهب بس شسويلك 

• ما اعرف الها 

:: هو شيراد الها 

• انا هسه ع البيت فروخي والمره 

:: مهدي البيت دايره ب اسمك من كبل سنه باقي بس على حضورك وتوقيعك

الكل اتفاجا ومهدي غركن عيونه يريد يبجي اما بيبي فعلا بچت عاصف گال 

:: انت اخوي وحتى اضمن البيت ما تبيعه خليت عليك بالعقد اطلبك تلاثين مليون اقبضهن 

من تريد تبيعه 

  مهدي // خلي مية مليون انا وين ابيعه وين اروح

بيبي وهي تمسح بدموعها ورافعه اديها بالدعاء // طال عمرك( باوعت المهدي ). ها مهدي شفت هذا عاصف 

الي تكوم وتكعد تگلي تحبينه ازود مني هالحفظ ماي وجهك 

:: مهدي اخوي وانا اريده يصير سبع

بيني وبين نفسي عرفت لويش نهاد البارحه طايحتلي حبيبتي واكلي 

وكف وحجى :: كومنا مهدي خلي نروح وره غانم وانتن خاف تحتاجن شي خابرلي 

طلع واني شلت الصينيه خليتها ع السنك وغسلت الصحون ومسحت الطباخ امل فتحت الثلاجه 

يمه ياهو يتسوك الكم 

عاصف من يجي من بغداد يجيب ويا مسواك يكفي ويزود

    انصاف // اكلج يمه هو بهاء يجي اهنا 

بيبي // اي يوميه يجيني يجيب ابنه ومرته ويجوني بس امس ما اجه ولا خلاها تجي تتعشى بس اظنها راحت

ويه حبايبها للصالون 

امل // شني شفتيها 

- - لا بس نهوده ما تخليها 

باوعتلي امل // تعاي اكعدي 

= عمه اريد اروح ارتب الصاله

انصاف //. الصاله ما بيها شي نظيفه بس اكول جابو كيك عصير جكليت 

بيبي // اي بهاء كال كل شي جبت اظنه من المحل مالته ياالله يمه استعجلن اطبخن غدا للزلم حتى

اتكفن روحجن تره ما تلحكن 

امل // هسه يمه ما عدنا شي

راحت طلعت دجاجات اربعه وسلكتهن ونكعن تمن ونظفن الخضره واجت خاله سميره جابت خبز بيت 

صبن غدا واحنه هماتين اتغدينه غسلت المواعين وعمه گالت روحي اسبحي وبدلي وسشوري شعرج 

هزيت راسي من طلعت من المطبخ صار وجهي بوجه ساره الي سلمت عليه والي ما شايفتها من يوم 

ما اجتنه للشقه كان بيدها ابنها اني شلته وبسته بس سبحان الله اتذكرت هو ابن بهاء راسا عفته 

رجعته الها

ورحت للغرفه گعدت ع الجربايه وافكاري متلاطمه بين كلام رجاء واستذكاري البهاء الحقير والي سويته 

اليوم بعاصف كان ممكن نكون زوجين ممكن لكن الي جاي دا يصيرلي مو طبيعي اني لازم احجي العاصف 

عن كل شي عن كلام رجاء وعن الي دا يصير اليه بمجرد ما يريد يتقرب مني

سالت نفسي = ياترى لو فزضا متزوجه واحد غير عاصف هالشكل يصير وياي 

صرت اخذ شهيق وزفير اكثر من ست مرات بعدها وگفت وگلت 

= لازم اضغط على نفسي وامكن عاصف مني هو حنين وما راح اياذيني بالاول اعتذر منه واسولفله

كل شي حتى يعذرني ويساعدني اتخطى الي مريت بي

طلعت الكوستم خليته ع القنفه ودخلت للحمام اخذت بس المنشف وملابسي الداخليه وصرت اسبح نشفت

ولبست ملابسي واجيت كعدت گدام المرايه واني اباوع الوجهي جففت شعري حتى اسشوره انفتح الباب 

شفت عاصف دخل وهو يباوعلي اني راسا دنيت المنشف على جسمي لكن عاصف دخل گبل للحمام

حتى بدون ما يطلعله ملابس

لبست دشداشتي وصرت اسشور بشعري لمن ما طلع وهو لابس نفس دشداشته يعني حتى ما اخذ المنشف 

مالته صرت على صفحه وهو اجه اخذ المنشف وصار يمسح الماي من شعره ومن داخل جسمه وصار يمشط 

بشعره عرفته يريد يبدل طلعت من الغرفه شافتني بيبي // شني هيج لابسه 

ابتسمت بوجهها = لا بيبي بس انت صحتيني واجيتج 

هزت راسها // انا ما صحتج 

= اني سمعتج 

• لا يحبوبه ما صحتج فوتي بدلي واطلعي 

= تمام

دخلت شفته جاي يلبس بالصايه مالته والعطر الي خال منه يموت وصلت يمه 

= هذا العطر يجنن ريد اخلي منه 

سلهم عيونه :: يمج خلي شكد ما تردين 

= شكرا 

:: العفو

من راد يطلع دار عليه :: مكياجج ما اريده صارخ والجبه والحجاب مو تنسينها من يدخلون الحجاب عدل

مو طك عطيه 

ردت اساله على هاي الجمله الي ما سامعتها منه بس هو طلع وانا مبتسمه واباوع للمرايه واحجي 

=معناتها شويه زعلان مني حتى يعرف اني شكد احترم كلامه حتى جواريب البس 

سشورت شعري ولبست الكوستم وخليت مكياج خفيف طلعت نفس ما اني بس الفرق شويه لمعه بالوجه

وسحبه بالعين طبعا وهذا كله الفضل لليوتيوب اي شي اريده اكتبه ويطلعلي

لبست الذهب واهنا اعرف هو يريدني البس ذهب لكن اني لبسته حتى بس احرك گلب رجاء 

بقيت كاعده بالغرفه واجن عماتي انصاف وامل شافني صارن يصلن ع النبي وانصاف تگلي 

شويه طوخي الكياج 

= لا عمه هالشكل احلى 

امل // اي صدك احلى ياهو علمج 

= باليوتيوب اي شي اريد اعرفه بس اكتب واشكال تطلعلي واني اختار

انصاف // هسه تعاي حطيلنه شويه حمره كحله جا بس رجاء ونهوده 

امل باستهزاء// وداعتج هسه يجن ملغمطات روحهن تكولين مطي ماكل فدووع 

اكتفييت ابتسمت لان اليوم كل ساع اسمع مصطلح ما اعرفه 

سمعنه حركه وصوت نهاد تكول // خلي تدخل بحجرة ابوها

ساره // مرته موجوده وعماتي يمها خلي تصعد فووك بحجرتها حتى من تنزل تنزل مثل الاميره 

امل // ابقي اهنا لا تطلعيين على ما يصعدن 

انصاف// ابقي لا تطلعيين منا لمن يجوون احسن 

= بس لازم اطلع احضر عصير ماي 

امل // كل شي موجود اكعدي وسكتي بنات مهدي هنه اليحضرن والزلم مناك يمهم العصير والكيك 

واحد من الشباب يصب الجاي

طلعن واني بقيت بالغرفه صورت نفسي ردت ادزها اله بس بعدين گلت يجوز ما يقبل خلي اصورها

وبعدين اراويها اله

سمعت كالو وصلو اهل العريس ف اانا راسا طلعت يعني قبل لا يدخلون شافتني بيبي اشرتلي اجي يمها

رحت يمها والكل يباوع عليه هي شاورتني // عاصف يگول تگعدين يمي 

راحن رجاء ونهاد وعماتي وهنه اياهلن ويسهلن دخلت مرت رحيم وامها واخواتها اثنين وياهن بناتهن ومن ضمنهن 

رقيه وامها واختها ومرت اخوها ما اعرف لويش ولا ارتاحييت الوجودها رغم هنه سلمن على بيبي ومن وصلت 

مرت رحيم يمي // هاي شنو وجدان ما تلاكيني وتسلميين عليه

صدك خجلت بيبي جاوبتها // انا خليتها يمي تكومني شو ظهري كلش يوجعني اظن من الكعده 

• ما صار شي عمه وجدان عزيزه وغاليه 

= وانتي هماتين خاله 

باوستها وباوست اخواتها لمن ما اجت رقيه 

• هلو وجد شلونج 

رغم استغربت من لفظ اسمي بس ابتسمت بوجهها وباوستها بصراحه بوساتي بالهوى لان ما احبها

واجتي ام كرار الي بوستني وشاورتني //. طالعه احلى وحده نيال عاصف بيج 

   ابتسمت واني ابوس خاله شيماء وبناتها اثنينهن 

وبعدها اجت رحمه بت عمه سعاد وياها بنات عمتي امل رواء وميس عمه انصاف عدها بنيه وحده ومتزوجه

بالحله وزوجة ابنها توها والده فما اجت 

هاجر وذهب وياهن رحمه وهنه ايقدمن الماي والجاي

بعدها گالو راح يجي السيد يعقد اني راسا لبست الجبه وخليت الشال على شعري رجاء صعدت وهي 

تسمع بيه // اله فووك الخواتين ما قبلن ينطنه الحجره ساعه 

ما اهتمييت الكلامها وهمه دخلو صعدو فوك السيد والولد وياهم عاصف ومهدي الي دخل بس كال 

مساجن الله بالخير 

وصعدو تقريبا عشر دقايق نزلو ونزلت نهاد وهي تگول

• • مبارك مبارك تم العقد 

نزلت ساره وفرح ورجاء وراها لازمه مبخره 

صارت الهلاهل وشغلن الديجي والكل فرحان ويهوس ساره شايله ابنها وتهوسله ونهاد وبناتها وام غياث 

وبنتها وطبعا رقيه وحتى عماتي صارن يهوسن وهنه فرحانات واني بس مجرد اصفك 

اجت يمي رقيه تريد اتكومني ارگص لكن اني هزيت راسي بالنفي لان اعرف عاصف ما يقبل هي عافتني 

وكومت بيبي الي جبرتها تهوس وهي تبوس بيها. وتگول // هذا الذهب مو احنه التقليد

بعدها كالو اجه العريس يريد يلبس الحلقات 

هو دخل واني راسا لبست ومو بس اني البنات بصوره عامه لبسها حلقه وساعه ومحبس 

وما اوصف الهلاهل بعدها سمعنه صوت عاصف وهو يگول ياالله 

دخل ويا مهدي الي وصل يم بته وقبلها راح باس راس بيبي وهي اتكله الله يرضى عليك ويفرحك 

فرح مدنكه باسها براسها بس شلون خله ايده يعني باس ايده وكللها :: الف مبروك 

• الله يبارك بيك بابا

كانت بيده علاكه فتحها طلع علبه من فتح العلبه طخم ذهب الكل صفن على جماله حجى ويه غياث گله 

  لبسه المرتك انا ما اعرف 

ام غياث وهي تتشكره وتدعيله بطولة العمر اجت ام كرار سلمت علي هي وخاله شيماء 

وبعدها طلع وحتى غياث بعد ما لبسها الطخم هم طلع 

اهنا بدت دراما رجاء

صارت تبجي وتگول // الله لا يوفق الي جان السبب 

امل// شبيج رجاء شصاير 

• ما تدرن شصاير ليش اخوها ما يدخل للبيت الي عاش بي من عمره يووم ليش ما يجي الاخته كدام رجلها

يبارك الها وهو مشتريلها هديه 

نهاد //. ما صار شي هسه شويه وتروح البيته وهو يبارك الها 

ام غياث // شنو احنه غربه هاي بيوتنا كلها وماكو فرق 

رجاء //. چا انا ليش مستهظمه البيوت الجانت باب واحد صارت بيبان

رقيه // خاله ام بهاء لا تهتمين صدكي راح تتصلح الامور ب اقرب وكت 

رفعت ايدها بالدعاء// الله يسمع منج ياطيبه 

باوعت الفرح //. لا تبجيين يمه الله ينتقم من الي چان السبب

 امل //. شبيج رجاء اخوها لو يريد يجيها اهنا محد يمنعه كافي اسكتي مو ترديلج مشكله 

رجاء// ياهو اليخلي يجي غير يترمى خليني ساكته تره مدبوله ياساعه انفجر

هاجر ورحمه قدمن الضيافه بعدها ام كرار اجت استاذنت من بيبي تروح البيت خاله شيماء بيبي ما قبلت

بس هي ما اعرف شنو گالت البيبي وبيبي ردت عليها //. ما دام هيج راشده 

راحت خاله شيماء هي وبناتها وحسن دز على رحمه وبيبي كالت الها // باتي اهنا جده 

رحمه // لا حبوبه امي ابحدها اروح 

   رجاء//. عمه ابقي باتي ويه البنات والصبح بهاء يزتج بدربه وانا اروح ويا

    • لا عمه امي تحتاجني 

رجاء// الله يساعدها ما ادري منين اجتها 

   بيبي // سلميلي على امج. حبوبه 

راحت وياهن بنات عمه امل وعمه انصاف هم راحت لان زوجها شويه تعبان

بقينه گاعدين ورقيه واختها وبنات ام غياث وياهن ساره وبنات مهدي يسولفن ويضحكن ويه فرح

ورقيه تباوع عليه مو ما اهتمييت بس بينت عدم اهتمامي وانا خاله رجل على رجل واحرگهن واعلج 

اتقربت من بيبي وشاورتها 

= هذني الي ترديني اروح وياهن للصالون واسولف عليهن شوفيهن حتى ما يحجن وياي 

بيبي وهي تبتسم //. اعرفهن البسيهن 

= لابستهن ولا يهمني

اجت رجاء // ياالله فروحه امشي هناك البيت اخوج 

رادت تكوم بيبي كالت الها // خليلج عليها عبايه 

تاشر بيدها // هذا البيت ومحد غريب 

بيبي // عاصف ما يرضى 

رجاء بقلة صبر // نهاد اطينه عباتج لا اليوم نشيل

راحن وامل سالت بيبي //. هاي شبيها شبعد الها 

• ما تعرفينها تريد الها بس اطلابه 

امل // ما تستحي يمكن اخرفت احنه ابخته بدر اشاف منها واخذها 

بيبي // عشگها 

امل // لا مو عشك بس انتي تعرفين 

بيبي بحسره // وشحصل منها حتى ابنه ما شافه ولا شاف كبرته

اجه مهدي //. ها چا وين البنات 

- - راحن البيت بهاء 

— ونهوده 

- - وياهن 

بيبي سالته // شني بقو الزلم ع العشا 

مهدي // يمه همه ياهمه كلهم عمامنا بيهم بس شكم واحد غريب ذوله اليشتغلون عد عاصف هو عطلهم 

بيبي // وعاصف وين ؟

مهدي // مدري ياهو خابره وطلع عبالي اجاكم 

• لا ما اجه خاف خابرو على مود الشغل 

دخلت للغرفه ذبيت الكوستم واتمددت شويه بعدها لبست المخور وعدلت الشال وعدلت مكياجي وطلعت

لگيت رجاء ونهاد بالمطبخ وحده تنظف بالخضره والثانيه تغسل بالفواكه سالتهن 

= محتاجات مساعده 

نهاد //. لا حبيبتي مشكوره

كعدت بالصاله وهنه يسولفن واني متاكده نيتهن ايسمعني 

نهاد// شنو هالرقيه هاي شتكل العاصف يكلها بكيفج تدللين مبين يعزها هوااي عبالك يعرفها من زمان 

رجاء// لا يمعوده هو عاصف من يشوفله سواده يسدح روحه عليها 

نهاد // شفتيها شلون من رحنه البيت بهاء كالت شويه وراجعتلكم وداعتج غازي يكول خابرته من يم الزلم وطلع الها

 گلتله اريد اروح اشوف القصر الجاي تبني بي كللهاخلي يكمل واسويلج عزيمه بس هي كايلتله فدوه اروحلك

يعجبني اشوفه وماخذها

رجاء// ابحدها ؟

نهاد // لا ويا علاوي وابراهيم 

رجاء // المن ذوله راحو 

نهاد // لزو ويا هو ما راضي 

رجاء // يو مخلينه بس هو وياها بلكي مصيحته تالي عمره 

نهاد // لا تخافيين فلوسه هوااي ويسدها

من سمعت كلامهن ما اعرف شنو حسيت ما اگدر اوصف احساسي صرت عباره عن بارود عن بركان 

دخلت للغرفه اتصلت بي جاوبني بهدوء :: الو 

=. انت وين 

:: موجود 

= رايدتك تعال 

:: ما تتاجل 

= لا شي ضروري 

:: جاي

رحت وكفت اباب البيت اجه هو يتمشى شافني واگفه اتقرب مني :: ليش ما لابسه عبايه اسلاميه 

= ما بي شي لبسي دشداشه عريضه وطويله 

:: تدرين بيه من تطلعين تلبسين الاسلاميه 

= من اطلع انا واكفه بالباب ما رايحه اتونس 

:: شكو ليش خابرتي

= اريد احجي وياك بموضوع 

:: ما يتقبل التاجيل مو تدرين زلم عدنا بالمضيف 

ردت اكله احسبني رقيه الي اخذتها للقصر لكن هي اجت وهي تبتسم لابسه بنطلون جنز ضيق وتيشيرت

مفصل جسمها ولابسه عبايه اسلاميه مفتوحه كلش اما الشال فمخليته هيج على نص شعرها وكلساع

مفتوح ومبينه رگبتها

صارت گبال عاصف تحاجي //. خو ما ازاحمكم 

   جاوبها :: لا عليش هالمزاحمه 

سلهمت عيونها وتحجي مره تهز ايدها مره تقدم رجل ع الثانيه // اتمنى اشوف بساتينكم فرح اتگلي يخبلن

ممكن نروح تراويهن الي 

قبل لا يجاوب حاجيتها وانا اتصنع الابتسامه والهدوء لكن بالحقيقه ابدي اموتها 

= لا حبيبتي مو ممكن اقصد عاصف عنده خطار ( اشرت ) اذا تحبين فرح تاخذج

حكت خدها باصبعا // اي فرح ويه خطيبها واني ما اريد اصير عذوول 

= كلج ذووق روحي انتي وهو وهي سوا وتراويج البستان وانتي استمتعي بالمناظر الخلابه الي تخبل 

حمحم :: بالليل ما راح تشوفون شي خليها بالنهار احلى واحسن 

عضت شفتها بدلال وتحاول تسوي بحلكها حركات // مثل ما تريد الصبح لو يمته تحب تاخذني الهن

قررت افشلها = حبيبتي الصبح نسافر بعد انتي يعجبج تبقييين شوفي منو ياخذج ويونسج ع المناظر الخلابه 

الي تخبل 

باوعتله :: شنو نسيت باجر العصر عندك موعد ويه صديقك 

هز راسه هي ردت // مو مشكله غير مره لو ما تريدنا بعد نجي 

رد عليها :: تدللين البيت والكاع والبساتين تحت امرج 

  - - شكرا هوااي صدك انت يلگولك يسموك شيخ 

:: هههه لا يمعوده ياشيخ انا رجال فقير مخلي الشيخه الاهلها 

  جاوبت بدلاعه زايده. // وانت اهلها ابو فرح 

  :: الله يخليج

  لزمته من ايده وحاجيتها = اكلج حبيبتي اذا كملتي كلامج رايدته الزوجي من رخصتج 

    هزت راسها // اي اتفضلي تره انا حچيت ويا بحضورج وطلبت منه شي عادي 

   = ما صار شي تدللين

  • تسلمين ياگلبي 

  = شنو ما تدخلين جوه يم امج وخاله ام غيث 

  - اي ادخل ليش لا

هي دخلت وهو خزرني راد يحجي اجه ابراهيم // عمي العشا جاهز 

  باوعلي :: جااي 

فلت ايدي وراح للمضيف وانا احس نار تطلع من عيوني رجعت للبيت فتت اتوضييت وصليت بالغرفه بعدها

طلعت للصاله والنقال بيدي اجت عمتي امل جايبتلي صينيه 

- - هاج عمه ودتها حبوبتج 

  = لا ما اشتهي 

• ليش ما تشتهيين تره هاي العزيمه سواها عاصف

  = ادري بس مو كان المفروض يسويها اهنا 

  - - مو هو وما يدري هاي رجاء وبتها ياالله اكليلج لكمه 

= لا عمه ما اشتهي عاجبني اكل جبن وجاي 

- - شبيج عمه 

   = ما بيه ليش 

- - ضايجه ومبين عليج عصبيه 

=لا ما بيه شي

  امل // - ادري من وره رجيوه الچلبه بس ما عليج انتي بس شدي حيلج وحملي وجيبيلنه ولد تره رجلج مو زغير

يرادله ولد يشيل اسمه لو تردين كل هاي الماليه تصير من فال النسيب 

ما رديت عمتي صارت تاكل بالعشا الجابو واني طلعت خبزه وجبنه وخدرت جاي بعدها عمه امل 

طلبت مني اصب الها چاي 

جاي اكل وهو دخل كال :: ياالله 

شاف عمه والصينيه سال :: هاي شنو ؟

امل //. خويه امي ودته الوجدان وهي ما قبلت تاكل 

  :: ليش هناك العشا ؟

امل ما جاوبت هو رد :: امل سالتج ؟

  • خويه تدري انت رجاء وبتها ونهاد وحتى بالچذب ما ودن على وجدان گدام النسوان 

:: وجدان ما تروح 

  • هي بقت لا راحت منا ولا منا 

اتنفس :: وهذني اعرف شغلي وياهن هاي الچلبه فرح انا الها 

  • خويه ماكو فرق كلها بيوتك

  :: لا امل هذا بيتي ذنيج مو بيوتي بيوت الناس مهدي اخذ حصته وبعد ابن بدر لو يبيع لو يشتري 

• ليش عاصف 

  ::احسن وابرك واستر 

• انا اروح 

جاوب بعصبيه :: اگعدي وين رايحه (باوعلي ) صبيلي چاي

صبيتله استكان وجبته اله صار يشرب بالجاي ويدخن لمن ما اجت بيبي وياها رقيه وفرح 

بيبي // ها يمه انت اهنا 

  :: هلا بيج حجيه توني اجيت

رقيه //. السلام عليكم 

  رد عليها :: عليكم السلام 

  هو شرب باقي الجاي واجت رقيه كدامه دنكت واخذت الاستكان وتحچي بابتسامه

  - - انا احب اخدم نفسي بنفسي تريد بعد جاي ابو فرح 

   :: لا تسلمين 

     • من رخصتكم راح اصبلي چاي 

   بيبي // لا ليش تگومين البنات اهنا ويجيبلج 

  • لا جده انا متعوده ما احب احد يخدمني بعدين عجبني اشرب باستكان 

اخذت الاستكان وصبت بي وطلعت تشرب بالجاي سالتني// ليش ما اجيتي تتعشين 

  = اني ما اتعشى 

ردت باستهزاء// شنو مسويه رجييم

   = لا بس التمن واللحم والدهن بالليل هواي يغثوني ف اكتفي بجبن وخبز وجاي 

  • هاي بس عشاج زين ما مخسره زوجج 

  = لا احب اكل فطاىر وبيتزا ومشاوي بس تمن ولحم بالليل ثگييل على معدتي 

  - - بس اليوم الطبخ رهييب يخبل فاتج 

  بيبي // بالعافيه جده 

  • الله يعافيج جده حبيبتي 

   فرح تحجي وتباوعلي // شعجب ما تسمينها بيبي ؟

   هزت راسها // لا احنه اهل السماوه نسمي جده بيبي بس اهل بغداد يسموها (سالتني وهي تباوع العاصف ) 

عود شنو معناتها اسم بيبي 

فرح // ما ادري اسالي وجدان 

عاصف :: يگولون هي كلمه تركيه او فارسيه معناتها الجده ام الاب او الام وهم الها معنى ثاني السيده المحترمه 

رقيه //. لا انا سامعه البيبي المربيه مالت الاطفال 

فرح //. صدك 

      رقيه // الله عليكم منو الاحلى انا يتراوالي جده

عمه امل // هسه حچينه بس ع الجده والبيبي 

   رقيه وهي تباوع العاصف // الكلام وياكم اله طعم ثاني 

بيبي //. فرح اخذي رقيه وروحن نامن باجر وراهم روحه 

  رقيه // وين ديرة النوم اليوم نبقى نسولف للصبح ياالله امشي ويانه وجدان 

  = لا حبيبتي باجر الصبح نسافر لان عاصف عنده شغل ضروري فهم ياالله انام

شلت الصينيه والاستكانات ورحت للمطبخ غسلت المواعين ونشفتهن سمعت فرح ورقيه يگولن

اتصبحون على خير 

عاصف :: فرح من تصعدين انتي ورقيه انزلي رايدج 

- - اي بابا 

صعدن وجاي امسح بالكاونتر وبيبي اتكله/$ على كيفك يمه ما صار شي 

:: شني على كيفي هذني جلبات ما يتوبن 

   بيبي // شلدالك رجاء اتوب هي واختها لا وداعتك بيهن وما يزيدن

امل //. عاصف لا تضوج هنه متقصدات هيج ايسون يردلهن طلابه 

:: شحدهن غير اموتهن واحسب الله ما خلقهن عود خلي بهاء ومهيدي يكطعولي الدرب 

اجت فرح لابسه دشداشه جوه الركبه ونص ردن وهي تكله // ها بابا ردتني 

  ::ليش. ما نمتي هناك فد نوب يم امج 

- - ليش بابا هالشكل تحاچيني انا شسويت 

 :: شسويتي انتي وامج ما تصير الجن جاره بت الكلب يكولون هذا بيتي وانتي گدام الناس بتي

بيبي //. عاصف شنو هذا الكلام 

:: اي يمه هي ما مخلتلي احترام لا بيناتنا ولا كدام الناس شتكلها امها ونهاد تسوي مسمومه مثلهن 

- - بابا انا ما سويت شي 

:: موانا موصي الطباخ العشا هنا شلون تديرنه هناك بس منين تطلبينها رجاء ونهاد و استغفر الله 

  - - بابا بعد احنه كلنه هناك ملتميين شمدريني 

  :: لا تدرين وتدرين تره البنيه من تكبر هي التعلم امها

  - - بابا انا ما عليه واذا على جيتي لهنا تره رقيه اصرت رادت تشوف غرفتي 

امل // ياالله عمه ما صار شي روحي نامي زحمه البت الوحدها 

  - - اصلا انا ما اجي لهنا بس رقيه اتكلي احب ذاك البيت 

   :: وهي منين شايفه ذاك البيت وتحبه 

   — - تگول احس بي احلى من هذا بيتكم يمكن لان عاصف باني 

امل //. هي هيج كالت 

فرح //. اي عمه 

امل //. جا ما گلتيلها عاصف باني كل هاي البيوت والناس كعدت بيها ع الحاضر المستريح

    بيبي // هالرقيه وكحه حييل 

   راسا رد :: يممه عيب لا تسمع 

حسيت بوجهي نار شو هذا يدافع الها طلعت شفت فرح تريد تصعد 

= اوكفي عيني فرح ( هي دارت عليه ) الاصول تستاذنيين مني ومن ابوج من تردين تجيبين البنيه وياج 

فرح ردت باستهزاء //. شنو اوكي استاذن من ابوي ايي بس منج انتي لويش شنو صفتج واستاذن منج 

=. اني صاحبة البيت ناسيه ابوج زوجي

فرح // لا ماناسبه بس انتي الناسيه ما دام جدتي موجوده ماكو وحده صاحبة بيت غيرها 

( تهز بايدها باستهزاء ) هاي امي تلاثين سنه ما ادري شگد بهذا البيت ما كالت بيتي وهسه الي اجتنه امس 

تصيح وتامر وتنهي وتگول بيتي

اتنفست بعمق لان اشوف عاصف داعي ناار حاچيتها =. اني ردت تستاذنيين لان اهنا بس اني وابوج يعني

عيب بنيه ما متزوجه تجي لهنا وتعوف امها واختها وخالتها 

- - اطمني حبيبتي استاذنت امها وخالتها وسالت جدتي ورحبت بيها 

بيبي //. لزت وگدام امها شكللها گتلها هلا بيج

اتقربت مني فرح وهي تحچي وياي //. حبيبتي هذا البيت بيتي لان بيت بيبي وبيت ابوي ويمته ما يعجبني اجي 

ابات بي ومنو ما يعجبني من صديقاتي وكرايبي اجيبهن ويباتن بي بدون ما اخذ رخصه منج

صعدت وهي تحرك بايدها وتگول //. مصدكه نفسها بيتها 

عاصف ساكت اعرف بي عصبي نار سالت = بيبي وين علاوي 

     بيبي // مدري غير يم الزلم اكلك يمه عاصف علاوي وين 

   :: گال ينام بالمضيف 

امل /= فدوه ال الله عود صار چبير 

بيبي // يا چا وهو شقاصره ياالله كومي النه خلي انام انا دايخه 

  راحت بيبي هي وعمه امل وگالت // تصبحون على خير

بقينه كاعدين هو يدخن وانا گاعده بالجهه الثانيه وگفت اريد ادخل للغرفه نزلت رقيه وهي تبتسم 

- - همزين لگيتكم گاعدين ما جايني نوم لو اعتبر نفسي عذول 

  نفخ الدخان ورد :: لا عذوليش بعدنا گاعدين وين فرح 

- - تكول اريد انام تعبانه يمكن انا ما جايني نووم لان متغير مكاني بس اكيد بعدين اتعود 

رديت عليها = ليش ناويه اتسكنين اهنا ؟

هو خزرني وهي ردت // ياريت حلم عمري اسكن اهنا وين واحد يلكى هيج طبيعه وهوا نقي او وجه حسن 

رديت = انتي اصعدي فووك احلمي حلم طويل لان احنه نريد انام ياالله عاصف باجر ورانه طريق ولازم ترتاح 

  - - بس مو بعد وكت 

= اتصور لازم نروح الغرفتنا نكمل حديثنا طبعا اذا تسمحيين 

  - - اي اتفضلو اخذو راحتكم 

گمت ودخلت للغرفه واسمعه ايكللها:: تصبحين على خير 

- - وانت تصبح على اجمل امنيه

دخل واشوف الغضب بوجهه ماحچى نزع العكال والجفيه والستره والصايه والقميص خلاهن ع الميز بقى 

بس بالسروال الداخلي الطويل والفانيله النص اخذ الگلبيه وفات للحمام سبح واني نزعت الدشداشه لبست 

تراك نص هو طلع من الحمام وهو لابس الگلبيه وكعد گدام المرايه

  اني گاعده ع القنفه واتصفح بالنقال باوعلي :: تره كلش تصرفج ما مقبول ويه البنيه 

   = ليش خفت على شعورها 

:: هاي خطار لو انتي ما تعرفيين شنو خطار ؟

   وگفت اتقربت منه = لا ما اعرف لان اني عشت طوول عمري خطار بس محترمه نفسي وبعدين انت شدعوه

هلكد مهتم الها 

:: ها هالشكل 

= بلي وبلا هالمقدمات الي ما الها داعي شتريد تحجي 

عض شفته :: صار كلامي مقدمات ما الها داعي 

   = ليش انت شايف غير هذا الشي الي اني شايفته

لزمني من ساعد ايدي وهو يحچي بعصبيه 

:: ولج انتي شنو صنفج اشايفه روحج انطيتج مجال ولج مو انا الي تلوي ايدي مره انا لاويت الزمان 

مو تجيني على تالي وكت وحده زعطوطه مثلج تتلاوه وياي وهي ريشه بمهب ريح چان احترمتي وجودي

جان سويتيلي قيمه من منساع لمن احنه بره وانتي ما تعرفين تحچيين عبالك الواكفيين يمج ما يفتهمون

ولج تعرفيني منو انا لو لا زلم ترجف من احچي انتي تالي وكت تتصرفيين بكيفج

عتييت ايده واني ارجف = ما سويت شي 

  :: لا سويتي وما خليتيلي كرامه 

= اوو ياكرامه الكرامه بس وياي تدورها كله عندك ممنوع وعيب وكرامه 

    :: احجي عدل لا اعلمج شلون تحچيين 

= اني اعرف شلون احجي بس الباقي على الي مسوي نفسه بس هو وبس ديري بالج ردي حجابج صوتج 

نصي اسمعي الكلام ولازم اطيعك وكله صار لان انت عندك اهم شي صورتك امام الناس ما يدرون بيك

من تدخل يمي للغرفه تصير دجاجه 

شكرا لزيارتكم عالم روايات سكيرهوم